Categories
Habakuku

Habakuku 3

Ihooya rĩa Habakuku

1 Rĩĩrĩ nĩrĩo ihooya rĩa mũnabii Habakuku:

2 MWATHANI nĩnjiguĩte maũndũ marĩa wĩkĩĩte

magagĩtũma njiyũrwo nĩ guoya.

Maũndũ macio wekire tene, meeke o na mahinda maya.

Maũndũ macio wekaga tene, o na rĩu marurumũkie.

O na ũngĩkorwo ũrĩ mũraakaru, ririkana tha ciaku.

3 Ngai arooka rĩngĩ oimĩĩte Edomu;

Ngai ũrĩa Mũtheru aroima irĩmainĩ cia Parani.

Ũkengu wake ũhumbĩrĩĩte matu

na kũgoocwo gwake gũkaiyũra thĩ.

4 Egũũka na ũkengu ta wa rũheni,

ũtheri ũkĩhenũkaga uumĩĩte mookoinĩ maake,

hau nĩ ho ahithĩĩte hinya wake.

5 Atũmaga mũrimũ ũmũtongorie

na agaatha gĩkuũ kĩmuume thuutha.

6 Rĩrĩa arũũgama, thĩ nĩgũthingitha ĩthingithaga,

ndũũrĩrĩ ikainaina rĩrĩa acirora,

irĩma iria itũũraga aagu na aagu ikaharagana,

tũrĩma tũrĩa twa tene na tene natuo tũkarikĩra na thĩ.

Kũu nĩkuo atũire athiagĩra.

7 Nĩndoonire andũ a Kushani manyiitwo nĩ guoya

o na Amidiani mainaina.

8 MWATHANI, kaĩ arĩ njũũĩ ciakũraakarĩĩtie?

Kaĩ arĩ iria rĩatũmĩĩte ũnyiitwo nĩ mang’ũrĩ?

Ũthiaga ũhaicĩĩte matu,

itu rĩa kĩhuuhũkanio nĩrĩo ngaari yaku ya mbarathi

ũkĩreehithĩria andũ aaku ũhootani.

9 Nĩwahaarĩirie gũtũmĩra ũta waku,

na ũkĩhaarĩria gũikia mĩguĩ yaku.

Nĩ we watũranganirie thĩ na njũũĩ.

10 Irĩma ciakuona igĩthingitha,

maaĩ magĩthothoka moimĩĩte igũrũ.

Maaĩ marĩa marĩ kũu thĩ kũrĩa kũriku magĩtherũka,

namo makũmbĩ ma iriainĩ makĩambarara na igũrũ mũno.

11 Riũa na mweri nĩciarũũgamire o ro ũguo,

rĩrĩa mĩguĩ yaku yahenũkaga na ihenya,

na rĩrĩa matimũ maaku maamenamenũkaga.

12 Ũgĩgĩtuĩkania thĩ ũng’ũrĩkĩĩte,

na ũkĩrangĩrĩria ndũũrĩrĩ nĩ ũrĩa waraakarĩĩte.

13 Woimagarire ũkahonokie andũ aaku,

o na ũkahonokie mũthamaki ũrĩa wethuurĩire.

Ũgĩkĩhehenja mũthamaki ũrĩa wamahinyagĩrĩria,

na ũkĩananga andũ aake.

14 Mĩguĩ yaku nĩyatheecire mũnene wa thigari ciake,

iria ciokaga o ta kĩhuuhũkanio gũtũhurunja,

o icio ciakenagio nĩkũhinyĩrĩria andũ arĩa athĩĩni na hitho.

15 Ũkĩranga iria na makinya ma mbarathi ciaku,

narĩo rĩkĩhuuhũkania.

16 Ngũigua maũndũ macio moothe, ngatuĩka nda,

mĩromo yakwa ĩkooyoya nĩ guoya,

mwĩrĩ wakwa ũgatuĩkĩra,

na magũrũ maakwa makaremwo nĩgũthiĩ.

Ngũgĩikara hooreire njeterere mũthenya ũkinye,

rĩrĩa MWATHANI akaaherithia arĩa matũtharĩkagĩra.

17 No rĩĩrĩ, o na mĩkũyũ ĩngĩaga gũciara,

mĩthabibũ yage kũruta thabibũ,

kĩmera kĩa mĩtamaiyũ gĩthũũke,

mĩgũnda yage kuumia ngano,

o na ciugũ cia ng’ondu na ng’ombe itigwo ũtheri,

18 ndĩikaraga ndĩ mũkenu,

na ndĩ mũcanjamũku,

nĩ gũkorwo MWATHANI Ngai nĩ mũhonokia wakwa.

19 MWATHANI nĩ we ũnjĩkagĩra hinya,

atũmaga magũrũ maakwa mahũthe wega o ta ma thwariga,

na nĩangitagĩra ndĩ o kũu irĩmainĩ.

Categories
Zefania

Zefania Gũtaarĩria

Gũtaarĩria

Mũnabii Zefania aahunjagia hĩndĩ ya mũthamaki Josia ũrĩa wathanaga bũrũriinĩ wa Juda kuuma mwaka 640-609 mbere ya gũciarwo kwa Jesũ Kristũ. Kwĩgeragĩrio atĩ aambĩrĩirie kũhunjia ta mĩaka ikũmi mbere ya mwaka wa 621, mwaka ũrĩa mũthamaki Josia aambĩrĩirie kwagĩrithia mĩtugo ya kĩndini thĩinĩ wa Juda.

Ibuku rĩĩrĩ rĩheanĩĩte maũndũ marĩa anabii maamenyereete kwaria. Maũndũ macio nĩ atĩ ihinda rĩa mũthiro o na rĩa kwanangwo rĩrĩ o hakuhĩ. Ihinda rĩu andũ a Juda nĩmakaaherithio nĩ ũndũ wa gũthaathaiya ngai ingĩ. Ningĩ Mwathani nĩakaaherithia o na ndũũrĩrĩ iria ingĩ. O na gũtuĩka itũũra rĩa Jerusalemu nĩrĩerekeire gũkorererwo nĩ mũthiro, nĩgũgaakinya hĩndĩ itũũra rĩo rĩene na andũ arĩa enyiihia na athingu matũũraga kuo mahonokio.

Maũndũ marĩa marĩ ibukuinĩ rĩĩrĩ

Mũthenya wa Mwathani wa gũtuanĩra 1.1–2.3

Andũ arĩa mahakaine na Aisiraeli gũkorererwo nĩ mũthiro 2.4-15

Jerusalemu gũkorererwo nĩ mũthiro na kũhonokio 3.1-20

Categories
Zefania

Zefania 1

1 Ĩno nĩ yo ndũmĩrĩri ĩrĩa MWATHANI aaheire Zefania mũrũ wa Kushi mũrũ wa Gedalia mũrũ wa Amaria mũrũ wa mũthamaki Hezekia. Hĩndĩ ĩyo nĩrĩo Josia mũrũ wa Amoni aathanaga Juda.

Mũthenya wa MWATHANI wa gũtuanĩra

2 MWATHANI ekuuga atĩrĩ,

“Nĩngũniina indo ciothe gũũkũ thĩ,

3 ngũniina andũ oothe, nyamũ ciothe, nyoni ciothe, na thamaki ciothe,

na nyanange andũ arĩa aaganu.

Ngũniina andũ oothe gũũkũ thĩ.

Nĩ niĩ MWATHANI ndoiga ũguo.”

4 Ningĩ MWATHANI ekuuga atĩrĩ,

“Ngũtambũrũkia guoko hũũre atũũri a Juda

na atũũri oothe a Jerusalemu.

Nĩngũniina kĩrĩa gĩothe gĩtigarĩĩte gũũkũ kĩa Baali,

o na ndũme athĩnjĩri aayo maage gũkaaririkanwo rĩ o rĩ.

5 Nĩngũniina mũndũ o wothe ũthaathayagia riũa, mweri, na njata arĩ nyũmba igũrũ.

Nĩngũniina o na arĩa maathaathayagia na makehĩta na rĩĩtwa rĩakwa,

o na makehĩta na rĩĩtwa rĩa ngai ĩrĩa ĩĩtagwo Moleku.

6 Ngũniinanĩria arĩa maandiganĩirie makaaga kũũnũmĩrĩra

na arĩa matarĩ maamenya o na matarĩ maahooya.”

7 Gĩkireei mũrĩ mbere ya MWATHANI Ngai;

mũthenya wake wa gũtuanĩra ũrĩ hakuhĩ.

Nĩarehaarĩria kũruta andũ aake igongoona

na nĩetĩĩte thũ ciũke itharĩkĩre bũrũri wa Juda.

8 MWATHANI ekuuga atĩrĩ,

“Mũthenya ũcio wa kũmaruta igongoona,

nĩngaaherithia atongoria, ciana cia mũthamaki,

o hamwe na arĩa oothe marũmagĩrĩra mĩtugo mĩgeni.

9 Mũthenya ũcio nĩngaaherithia

mũndũ wothe ũthaathayagia ngai cia mĩhianano,

ũiyaga na ũũraganaga

nĩguo oonere mũnene wake indo.”

10 MWATHANI ekuuga atĩrĩ,

“Mũthenya ũcio kĩrĩro nĩgĩkaiguuo

kĩhingoinĩ kĩrĩa gĩĩtagwo Kĩhingo gĩa Thamaki kũu Jerusalemu.

Ningĩ kũgirĩka kũiguuo

mwena ũrĩa ũraakirwo ica ikuhĩ wa itũũra,

na mũrurumo mũnene ũiguuo irĩmainĩ.

11 Inyuĩ mũtũũraga mwena wa na kĩanda wa itũũra, rĩraai mũthirwo nĩ maithori,

amu ahũũri oothe a mbiacara

na akũũrania a mbeeca mahũũrĩĩtwo makaniinwo biũ.

12 “Mũthenya ũcio niĩ MWATHANI nĩngouruuria Jerusalemu guothe ndĩ na mataawa,

na nĩngaaherithia mũndũ o wothe

ũtũũraga egangarĩĩte na ũtarũmbũyagia ũndũ,

na ũrĩa wothe wĩĩraga na ngoro

atĩ MWATHANI ndangĩmwĩka ũũru kana wega.

13 Indo ciao ciothe nĩigaatahwo,

na nyũmba ciao imomorwo.

Atĩrĩĩrĩ, andũ acio mangĩgaaka nyũmba, matigaacitũũra;

mangĩkaahanda mĩthabibũ,

matikaanyua ndibei ĩhihĩĩtwo kuuma thabibũ ciayo.”

14 Mũthenya mũnene wa MWATHANI wĩ hakuhĩ.

Wĩ hakuhĩ mũno na ũgũũka o narua.

Ũgũkorwo wĩ mũthenya wa MWATHANI wa maraakara.

Thigari iria njamba irĩrĩra ciũme ngoro.

15 Ũgũkorwo ũrĩ mũthenya wa maraakara,

mũthenya wa thĩĩna na kĩeha,

mũthenya wa mbũragano na kwanangwo,

mũthenya wa nduma na ihooru,

mũthenya wa kĩbii na nduma ndumanu.

16 Ũgũkorwo ũrĩ mũthenya ũrahuuhwo tũrumbeeta

na ũrĩ na mbugĩrĩrio ya thigari

igĩtharĩkĩra matũũra marĩa mairigĩre na thingo cia hinya,

o na igĩtharĩkĩra mĩnaara ĩrĩa mĩraaya.

17 MWATHANI ekuuga atĩrĩ,

“Mũthenya ũcio ngaareehithĩria andũ mĩthiro ũguo atĩ

magaathiaga makĩhambambataga ta itumuumu.

Tondũ nĩmaahĩtĩirie,

thakame yao ĩgaitwo o ta maaĩ,

nacio ciimba ciao ibuthĩre thĩ.

18 Mũthenya ũcio wa maraakara ma MWATHANI,

betha o na thahabu ciao itikaahota kũmahonokia.

Thĩ yothe nĩgaacinwo na mwaki wa maraakara maake,

na aniine o kũniina atũũri oothe a thĩ na ihenya.”

Categories
Zefania

Zefania 2

Andũ kwĩrwo merĩre

1 Inyuĩ rũũrĩrĩ rũũrũ rwothe rũtarĩ thoni,

cookaniai ndundu,

2 mũtanaingatwo ta mahuti marĩa moombũragwo nĩ rũhuuho,

mũtanakorererwo nĩ maraakara marakana ta mwaki ma MWATHANI,

o na mũtanakorererwo nĩ mũthenya wa marũrũ ma MWATHANI.

3 Inyuĩ andũ arĩa enyiihia a bũrũri,

o inyuĩ mwathĩkagĩra maathani maake,

cookereraai MWATHANI.

Ĩkagaai maũndũ ma ũthingu,

na mwĩnyiihagĩrie MWATHANI.

Hiihi no mwage gũkaanaherithio mũthenya wa maraakara maake.

Ndũũrĩrĩ iria ihakaine na Isiraeli gũcookererwo nĩ mũthiro

4 Itũũra rĩa Gaza rĩgaatigwo rĩtarĩ andũ,

narĩo rĩa Ashikeloni rĩtuĩke maganjo,

andũ a itũũra rĩa Ashidodu makaarutũrũrwo itũũrainĩ rĩao thaa thita cia mũthenya,

nao andũ a itũũra rĩa Ekironi maingatwo kuuma itũũrainĩ rĩao.

5 Inyuĩ Afilisiti, o inyuĩ mũtũũraga rũteereinĩ rwa iria,

kaĩ mũrĩ thĩĩnainĩ-ĩ!

MWATHANI nĩarĩĩkĩĩtie kũmũtuĩra;

ekũmwananga, na gũtirĩ o na ũmwe wanyu ũkũhonoka.

6 Wee nawe bũrũri ũrĩa ũrĩ ndeereinĩ cia iria,

ũgũtuĩka gĩthaka gĩa kũrĩithagio ndũũru cia ng’ondu,

na gĩa gwakwo ciugũ na ithũnũ cia arĩithi.

7 Bũrũri ũcio ũrĩ ndeereinĩ cia iria

ũkeenyiitĩrwo nĩ andũ arĩa magaatigara a Juda,

marĩithagie ndũũru cia ng’ondu ciao kuo,

na maraarage nyũmba iria irĩ Ashikeloni.

MWATHANI Ngai wao nĩakaamarũmbũiya,

na atũme magaacĩre o rĩngĩ.

8 MWATHANI Mwene Hinya Wothe ekuuga atĩrĩ,

“Nĩnjiguĩte ũrĩa andũ a Moabi na a Amoni

maranyarara na mararuma andũ aakwa,

magĩtĩĩaga atĩ nĩmekwĩnyiitĩra bũrũri wao.

9 MWATHANI Mwene Hinya Wothe, o we Ngai wa Isiraeli, ekuuga atĩrĩ,

‘O ta ũrĩa ndũũraga muoyo-rĩ,

nĩngwananga Amoabi na Aamoni ta ũrĩa ndaanangire Sodomu na Gomora.

Ngũtua mabũrũri maao marima ma cumbĩ,

na kũndũ gũtiganĩrie tene na tene kũrĩkũraga o thabai.

Njooke ndeke andũ aakwa arĩa magaakorwo matigarĩĩte,

matahe indo ciao na marigie na mabũrũri maao.’ ”

10 Ũguo nĩguo Amoabi na Aamoni makaaherithio

nĩ ũndũ wa mwĩtĩĩo wao,

amu nĩmaanyararire na makĩruma andũ a MWATHANI Mwene Hinya Wothe.

11 MWATHANI nĩagaatũma maiyũrwo nĩ guoya,

acooke atue ngai ciothe cia gũũkũ thĩ tũhũ mũtheri,

nacio ndũũrĩrĩ ciothe icooke kũmũthaathaiya,

o rũũrĩrĩ rũmũthaathayagĩrie bũrũriinĩ waruo.

12 Atĩrĩĩrĩ, inyuĩ andũ a Ethiopia,

no mũkaaniinwo na rũhiũ rwa njora.

13 MWATHANI akaahũthĩra hinya wake kwananga bũrũri wa Asiria,

acooke atue itũũra rĩa Nineve maganjo

na kũndũ kũũmũ o ta werũ.

14 Mahiũ na nyamũ cia gĩthaka nĩcio ikaarimũũthaga kuo.

Ndundu ikaarĩragĩra ndiricainĩ cia kũu gũtharũranĩĩtio,

magoogo magambage marĩ mĩrangoinĩ yakuo,

nayo mĩtarakwa ĩrĩa yakĩĩte kuo ĩtharũranio gũtigwo ũtheri.

15 Itũũra rĩrĩa rĩrerahaga

rĩgĩĩtĩĩaga ũrĩa rĩrĩ na thaayũ,

na rĩkeyona rĩkiugaga atĩ gũtirĩ itũũra rĩngĩ inene thĩinĩ wa thĩ kũrĩkĩra,

rĩu nĩrĩmomoreetwo biũ,

rĩgatuĩka kũndũ gwa kũrimũũthagwo nĩ nyamũ cia gĩthaka.

Mũndũ o wothe ũrĩhĩtũkagĩra kuo

ariugaga hĩ hĩ hĩ hĩ-ĩ! akĩinainagia mũtwe.

Categories
Zefania

Zefania 3

Jerusalemu kwĩhia na gũkũũrwo

1 Kaĩ itũũra rĩa Jerusalemu rĩrĩ thĩĩnainĩ-ĩ!

Nĩ itũũra iremi, rĩiyũire ungumania,

na rĩhinyagĩrĩria andũ aarĩo.

2 Nĩ itũũra rĩtathikagĩrĩria MWATHANI

na rĩtiĩtĩkagĩra kũrũngwo nĩ we.

Rĩtimwĩhokeete na rĩtimũhooyaga ũteithio.

3 Anene aarĩo mahaana o ta mĩrũũthi ĩrararama;

aciirithania aarĩo nao mahaana o ta njũũi ngoroki,

ũguo atĩ gũgĩkĩa gũtirĩ kĩndũ ikoragwo itigĩĩtie.

4 Anabii aarĩo matirĩ kĩhaarĩro na ti ehokeku;

athĩnjĩri Ngai aarĩo mathaahagia indo iria theru,

na makoogomia watho wa Ngai nĩguo megune o eene.

5 No rĩĩrĩ, MWATHANI no akoragwo o itũũra rĩu;

eekaga maũndũ ma kĩhooto na ndarĩ ũũru eekaga.

O rũũciinĩ areehithagĩria andũ aake ũhoro wa waragania,

na ndanogaga nĩgwĩka ũguo.

O na kũrĩ ũguo-rĩ, andũ acio matarĩ athingu,

mathiaga o na mbere gwĩka ũũru na maticonokaga.

6 MWATHANI aroiga atĩrĩ,

“Nĩniinĩĩte ndũũrĩrĩ ciothe,

ngaananga matũũra maacio,

na ngamomorania thingo na mĩnaara yacio.

Gũtirĩ mũndũ ũtigĩĩtwo matũũrainĩ maacio

o na barabarainĩ ciamo gũtirĩ andũ maratuĩkania.

Gũtirĩ mũndũ o na ũmwe ũtigarĩĩte.

7 Ndĩreciiragia atĩ nĩ hĩndĩ andũ aakwa mekũndĩĩa,

meetĩkĩre ndĩmarũnge,

na maage gũcooka kũriganĩrwo nĩ maũndũ marĩa ndĩmarutĩĩte.

No o no gũthiĩ mathiĩte na mbere

gwĩka maũndũ mooru makĩria.”

8 MWATHANI egũkiuga atĩrĩ,

“Taetereraai!

Etereraai mũthenya ũrĩa ngaarũũgama gũthitanga ndũũrĩrĩ.

Nĩnduĩte itua gũcookanĩrĩria ndũũrĩrĩ na moothamaki hamwe

nĩguo ndĩmaitĩrĩrie maraakara maakwa.

Thĩ yothe nĩgũcinwo nĩ mwaki wa mang’ũrĩ maakwa.

9 “Hĩndĩ ĩyo-rĩ, nĩngaagarũra andũ a ndũũrĩrĩ,

macooke kũũhooyaga o niĩ nyiiki,

na matikaahooyage ngai ingĩ.

Oothe nĩmakaanjathĩkagĩra.

10 Ningĩ o na kuuma bũrũri wa Ethiopia ũrĩa wĩ kũraaya

andũ aakwa arĩa mahurunjũkĩĩte nĩmakaandeehagĩra matega.

11 Hĩndĩ ĩyo, inyuĩ andũ aakwa, mũtigaacooka gũconoka

nĩ ũndũ wa ũrĩa mwananemera.

Tondũ nĩngaathengia gatagatĩinĩ kaanyu andũ arĩa etĩĩi na ang’athia

na mũtigaacooka kũũnemera

mũrĩ kĩrĩmainĩ gĩakwa kĩrĩa gĩtheru.

12 Ngaatigia o andũ arĩa enyiihia na ahooreri gatagatĩinĩ kaanyu,

arĩa marĩũkaga gũcaria ũteithio harĩ niĩ.

13 Andũ a Isiraeli arĩa magaatigara

matigeekaga ũndũ mũũru,

matikaaragia maheeni,

kana maaragie mathaara.

Nĩ gũkorwo makaarĩaga na magakoma,

matarĩ na mũndũ wa kũmaiga na guoya.”

Rwĩmbo rwa gĩkeno

14 Andũ a Isiraeli, inaai na kayũ kanene mũkeneete!

Jerusalemu, rũũharũũhia na ngoro yothe!

15 MWATHANI nĩatigĩĩte gũkũherithia,

agagũthengeria thũ ciaku.

MWATHANI, o we Mũthamaki wa Aisiraeli, arĩ hamwe nawe,

kwoguo rĩu ndũkĩrĩ na gĩtũmi gĩa gwĩtigĩra.

16 Ihinda nĩrĩrooka rĩrĩa Jerusalemu ĩkeerwo atĩrĩ,

“Wee itũũra rĩa Zayuni, tiga kũmaka!

Tiga kũregeria mooko maaku!

17 MWATHANI Ngai waku arĩ hamwe nawe;

nĩ njamba na nĩegũkũhe ũhootani.

Nĩarĩkenaga nĩ ũndũ waku

na akũhe ũtũũro mwerũ nĩ ũndũ nĩakwendeete.

Arĩinaga na agakenagio nĩ we,

18 o ta ũrĩa andũ makenaga hĩndĩ ya thigũkũ.”

MWATHANI ekuuga atĩrĩ,

“Nĩngũthengeirie mũthiro,

na ngakwehereria gĩconoko.

19 Atĩrĩĩrĩ, ihinda nĩrĩrĩũka

na nĩndĩrĩherithia arĩa makũhinyagĩrĩria,

honokie arĩa mathuaga,

na njookie arĩa mathaamĩĩtio mũciĩ.

Nĩndĩrĩtũma maheeo gĩtĩĩo handũ ha gũconorwo,

nayo thĩ yothe nĩrĩmagoocaga.

20 Ihinda nĩrĩrooka,

rĩrĩa ndĩrĩmũcookanĩrĩria ndĩmũcookie mũciĩ.

Ndĩrĩmũtua andũ marĩ igweta thĩ yothe,

na ndũme mũgaacĩre rĩngĩ.”

Ũguo nĩguo MWATHANI oiga.

Categories
Hagai

Hagai Gũtaarĩria

Gũtaarĩria

Ibuku rĩĩrĩ rĩa mũnabii Hagai rĩcookanĩirie ndũmĩrĩri nguhĩ mwanya mwanya iria Mwathani aaheanire ahũthĩrĩĩte mũnabii Hagai mwaka wa 520 mbere ya gũciarwo kwa Jesũ Kristũ.

Hĩndĩ ĩyo Aisiraeli nĩmaarĩĩkĩĩtie kuuma ithaamĩrio na magatũũra Jerusalemu kwa ihinda, no Hekaarũ ndĩakĩĩtwo rĩngĩ. Ndũmĩrĩri ici iringĩrĩirie atongoria a andũ maake rĩngĩ Hekaarũ, naake Mwathani akeerĩra andũ, arĩa merirĩĩte na magatherio, thaayũ na ũgaacĩru mahinda marĩa magooka.

Maũndũ marĩa marĩ ibukuinĩ rĩĩrĩ

MWATHANI gwathana Hekaarũ yakwo rĩngĩ 1.1-15

Ndũmĩrĩri cia kũhooreria na cia kĩĩrĩgĩrĩro 2.1-23

Categories
Hagai

Hagai 1

MWATHANI gwathana Hekaarũ yakwo rĩngĩ

1 Atĩrĩĩrĩ, mũthenya wa mbere wa mweri wa gatandatũ, mwakainĩ wa keerĩ wa wathani wa Dario mũthamaki wa Perisia, MWATHANI nĩarĩirie Zerubabeli mũrũ wa Shealitieli na Joshua mũrũ wa Jehozadaku. Zerubabeli aarĩ barũũthi wa Juda, naake Joshua aarĩ Mũthĩnjĩri Ngai Ũrĩa Mũnene. Aamaarĩirie ahũthĩrĩĩte mũnabii Hagai.

2 MWATHANI Mwene Hinya Wothe ekuuga atĩrĩ, “Andũ aya maroiga atĩ ihinda rĩa gwaka Hekaarũ rĩngĩ rĩtirĩ rĩrakinya.”

3 Hĩndĩ ĩyo MWATHANI akĩarĩria andũ ahũthĩrĩĩte mũnabii Hagai akĩmeera atĩrĩ,

4 “Nĩkĩ gĩgũtũma inyuĩ eene mũikare nyũmba cianyu iria mwakĩĩte wega, o rĩrĩa Hekaarũ yakwa ĩrĩ o kĩĩgĩĩgĩ?

5 Kaĩ mũtarona ũrĩa mũreekwo?

6 Mũhandaga nyingĩ, mũkagetha tũniini; mũrĩaga na mũtiiganagia; mũnyuaga na mũtinyootokaga; mwĩhumbaga nguo na gũtirĩ ũiguaga ũrugarĩ; arĩa maheagwo mĩcaara, mamĩĩkagĩra mĩhuko ĩrĩ na mahoro.

7 Kaĩ mũtareyũria mũreekwo ũguo nĩkĩ?

8 Atĩrĩĩrĩ, thiĩi irĩmainĩ mũteme mĩtĩ, mũũke mwake Hekaarũ yakwa rĩngĩ, nĩguo ngene na thaathaĩyo ta ũrĩa njagĩrĩirwo nĩguthaathaiyo.”

9 “Mũcaragia magetha maingĩ, no mũkoona maniini; mũmatwaraga mũciĩ, na niĩ ngatũma rũhuuho rũkamoombũra. Nĩmũũĩ njĩkaga ũguo nĩkĩ? Nĩ tondũ Hekaarũ yakwa nĩ kĩĩgĩĩgĩ, o rĩrĩa inyuĩ mũrũmbũyanagia na gwaka mĩciĩ yanyu.

10 Nĩkĩo gũtarĩ mbura na gũtarĩ kĩndũ kĩrakũra.

11 Nĩndũmĩĩte bũrũriinĩ kware na kũũme. Nĩndũmĩĩte irĩmainĩ, mĩgũndainĩ ya irio, ya mĩthabibũ o na ya mĩtamaiyũ kware na kũũme, na ngoomia irio ciothe iria ikũragio kuo. Ndũmĩĩte andũ maarĩrwo nĩ riũa, o ũndũ ũmwe na mahiũ o na kĩrĩa gĩothe andũ mageragia gũkũria.”

Andũ gwathĩkĩra MWATHANI

12 Hĩndĩ ĩyo Zerubabeli mũrũ wa Shealitieli na Mũthĩnjĩri Ngai Ũrĩa Mũnene Joshua mũrũ wa Jehozadaku, hamwe na andũ arĩa macookeete kuuma ithaamĩrio magĩathĩkĩra MWATHANI Ngai wao. O na nĩmaathĩkĩire mũnabii Hagai na makĩhe Ngai gĩtĩĩo.

13 Hagai agĩcooka akĩhe andũ oothe ndũmĩrĩri ya MWATHANI, atĩ MWATHANI nĩarĩkoragwo hamwe nao.

14 MWATHANI agĩgĩĩkĩra andũ oothe wendo wa gwaka Hekaarũ: Zerubabeli barũũthi wa Juda, Joshua Mũthĩnjĩri Ngai Ũrĩa Mũnene, na andũ oothe arĩa maacookeete kuuma ithaamĩrio. Nao makĩambĩrĩria wĩra wa gwaka Hekaarũ ya MWATHANI Mwene Hinya Wothe, Ngai wao.

15 Mawambĩrĩirie mũthenya wa mĩrongo ĩĩrĩ na ĩna wa mweri wa gatandatũ, mwakainĩ wa keerĩ wa wathani wa mũthamaki Dario.

Categories
Hagai

Hagai 2

Riiri wa Hekaarũ Njerũ

1 Atĩrĩĩrĩ, mũthenya wa mĩrongo ĩrĩ na ũmwe wa mweri wa mũgwanja, mwakainĩ o ro ũcio wa keerĩ wa wathani wa mũthamaki Dario, MWATHANI nĩaririe rĩngĩ ahũthĩrĩĩte mũnabii Hagai.

2 Eerire Hagai aarĩrie Zerubabeli mũrũ wa Shealitieli barũũthi wa Juda, Mũthĩnjĩri Ngai Ũrĩa Mũnene Joshua mũrũ wa Jehozadaku, o na andũ oothe, amoorie atĩrĩ,

3 “Nũũ ũtigarĩĩte gatagatĩinĩ kaanyu wonire riiri ũrĩa Hekaarũ ya mbere yarĩ naguo? Rĩu mũrona ĩno ĩhaana atĩa? Githĩ ndĩhaana ta kĩndũ hatarĩ?

4 No rĩĩrĩ, tigaai gũkua ngoro. Thiĩi na mbere na wĩra, amu ndĩ hamwe na inyuĩ.

5 Rĩrĩa muoimire Misiri nĩndamwĩrĩire atĩ nĩndĩkoragwo hamwe na inyuĩ hĩndĩ ciothe. O na rĩu ndĩ o hamwe na inyuĩ, kwoguo tigaai gwĩtigĩra.”

6 MWATHANI Mwene Hinya Wothe ekuuga atĩrĩ, “Ihinda rĩtarĩ iraaya, nĩndĩinainia igũrũ, thĩ na iria.

7 Ningĩ nĩndĩinainia ndũũrĩrĩ ciothe, mĩthiithũ yacio yothe ĩreehwo gũũkũ nĩ geetha njiyũrie hekaarũ ĩno na riiri.

8 Atĩrĩĩrĩ, betha na thahabu ciothe nĩ ciakwa.

9 Hekaarũ ĩno ĩraakwo ĩgũkorwo ĩrĩ na riiri gũkĩra ĩrĩa ya mbere. Nĩngũtũma andũ aakwa magaacĩre gũũkũ na magĩe na thaayũ.” Ũguo nĩguo MWATHANI Mwene Hinya Wothe oiga.

Mũnabii kũhooya athĩnjĩri Ngai kĩrĩra

10 Mũthenya wa mĩrongo ĩĩrĩ na ĩna wa mweri wa kenda, mwakainĩ wa keerĩ wa wathani wa mũthamaki Dario, MWATHANI nĩarĩirie mũnabii Hagai o rĩngĩ.

11 Aamwĩrire ũũ: “Tahooya athĩnjĩri Ngai kĩrĩra, ũmoorie atĩrĩ,

12 ‘Mũndũ angĩruta nyama ĩmwe ya iria nyamũre kuuma igongoonainĩ, akuue nyama ĩyo na ruuno rwa nguo yake-rĩ, nguo ĩyo yake ĩngĩhuutia mũgate o wothe, irio iria nduge, ndibei, maguta ma mĩtamaiyũ, o na kana irio ingĩ cia mũthemba o wothe-rĩ, no ĩtũme irio icio o nacio ituĩke nyamũre?’ ”

Rĩrĩa athĩnjĩri Ngai mooririo kĩũria kĩu macookirie atĩrĩ, “Aaca, ndĩngĩtũma ituĩke nyamũre.”

13 Hagai agĩcooka akĩmooria atĩrĩ, “Mũndũ ũrĩ na thaahu na ũndũ wa kũhuutia kĩimba, angĩhuutia indo icio-rĩ, ũndũ ũcio no ũtũme indo icio igĩe na thaahu?”

Athĩnjĩri Ngai magĩcookia atĩrĩ, “Ĩĩ, ũndũ ũcio no ũtũme.”

14 Hagai agĩkĩmeera atĩrĩ, “MWATHANI aroiga atĩ ũguo noguo andũ a bũrũri ũyũ mahaana o na indo ciothe iria makũragia. Nĩ ũndũ ũcio kĩrĩa gĩothe marutagĩra kĩgongoonainĩ kĩrĩ na thaahu.”

MWATHANI kwĩranĩra kĩraathimo

15 MWATHANI arooria atĩrĩ, “Kaĩ mũtarona ũrĩa mwĩkĩĩtwo? Mũtanaambĩrĩria gwaka rĩngĩ Hekaarũ-rĩ,

16 mũndũ arathiaga hĩbainĩ ya ngano ehokeete gũkora kiro magana meerĩ agakora o igana. Ningĩ mũndũ arathiaga mũtũngiinĩ wa ndibei erĩgĩrĩire gũtaha rita igana rĩmwe agakora o rita mĩrongo ĩna.

17 Ndamũrekeirie mbaa na mbura ya mbembe icine na ithũũkie indo ciothe iria mwakũragia, no mũtiigana kwĩrira.

18 Kuuma ũũmũũthĩ, mweri mĩrongo ĩĩrĩ na inya mweri wa kenda rĩrĩa mũthingi wa Hekaarũ warĩĩka, nĩmũkuona ũrĩa gũgũcooka kũhaana.

19 Atĩrĩĩrĩ, o na gũtuĩka gũtirĩ irio itigaire, na ningĩ mĩthabibũ, mĩkũyũ, mĩkongomanga o na mĩtamaiyũ ndĩciarĩĩte-rĩ, kuuma ũũmũũthĩ nĩngwambĩrĩria kũmũraathima.”

MWATHANI kũhe Zerubabeli kĩĩranĩro

20 Mũthenya o ro ũcio wa mĩrongo ĩĩrĩ na ĩna wa mweri wa kenda, MWATHANI nĩarĩirie Hagai o rĩngĩ.

21 Arĩria Zerubabeli, barũũthi wa Juda ũmwĩre atĩrĩ, “Nĩnjerekeire kũinainia igũrũ na thĩ.

22 Nĩngũng’aũrania moothamaki na niine maahinya maamo. Nĩngũng’aũrania ngaari cia mbarathi na arĩa mathiaga macihaicĩĩte. Mbarathi nĩigũkua, nao arĩa mathiaga macihaicĩĩte mooragane o eene.

23 Mũthenya ũcio nĩndĩkuoya wee Zerubabeli mũrũ wa Shealitieli, ndungata yakwa, ngũtue wa gwathanaga na rĩĩtwa rĩakwa. Wee nĩ we thuurĩĩte.” Ũguo nĩguo MWATHANI Mwene Hinya Wothe oiga.

Categories
Zakaria

Zakaria Gũtaarĩria

Gũtaarĩria

Ibuku rĩa Zakaria rĩĩrĩ na icunjĩ igĩrĩ itanyiitanĩĩte: (i) Gĩcunjĩ kĩa 1–8 nĩ moorathi ma mũnabii Zakaria marĩa maaheanirwo mahinda mwanya mwanya gatagatĩinĩ ka mwaka wa 520 na 518 mbere ya gũciarwo kwa Jesũ Kristũ.

Moorathi maya maheanĩĩtwo na njĩra ya cioneki iria iraaria ũhoro wa kũrũũgamio rĩngĩ kwa Jerusalemu, gwakwo rĩngĩ kwa Hekaarũ, gũtherio kwa andũ a Ngai na ũhoro wa mahinda ma Mesia ũrĩa ũgooka. (ii) Gĩcunjĩ gĩa 9–14 nakĩo nĩ mũũngũrũrio wa ndũmĩrĩri, ĩmwe ĩkoniĩ Mesia ũrĩa ũgooka, na ĩngĩ ĩkoniĩ ũhoro wa ituĩro rĩa mũthia.

Maũndũ maria marĩ ibukuinĩ rĩĩrĩ:

Ndũmĩrĩri cia gũkaanania na cia kĩĩrĩgĩrĩro 1.1–8.23

Itua rĩgiĩ andũ arĩa maariganĩĩtie na Aisiraeli 9.1-8

Iraathimo na thaayũ iria igooka 9.9–14.21

Categories
Zakaria

Zakaria 1

MWATHANI gwĩta andũ aake mamũcookerere

1 Mweriinĩ wa kanaana, mwakainĩ wa keerĩ wa wathani wa Dario, mũthamaki wa Perisia, nĩrĩo MWATHANI aaheire mũnabii Zakaria mũrũ wa Berekiana mũcũkũrũ wa Ido ndũmĩrĩri ĩno.

2 MWATHANI Mwene Hinya Wothe eerire Zakaria eere andũ atĩrĩ, “Niĩ MWATHANI, nĩndaraakarĩire maithe maanyu mũno,

3 no rĩu inyuĩ ngũmwĩra atĩrĩ, ‘Njookereraai na niĩ nĩngũmũcookerera.

4 Mũtikaanatũkie maithe maanyu. Nĩmaaheirwo ndũmĩrĩri ciakwa nĩ anabii arĩa maatũũraga tene, makĩĩrwo matigaacooke gũtũũra ũtũũro mũũru na wa meehia. No matianathikĩrĩria o na kana makĩnjathĩkĩra.

5 Rĩu-rĩ, githĩ maithe maanyu na anabii acio matiakuire tene?

6 “ ‘Atĩrĩĩrĩ, ndaheire maithe maanyu mawatho na ngĩmakaania na njĩra ya anabii ndungata ciakwa, no o makĩaga kũrũmbũiya, magĩkĩnyiitwo nĩ mathĩĩna. No nĩmaacookire makĩĩrira na magĩĩtĩkĩra atĩ niĩ, MWATHANI Mwene Hinya Wothe, ndamaherithĩĩtie o ta ũrĩa maagĩrĩirwo, na o ta ũrĩa ndataanyĩĩte gwĩka.’ ”

Kĩoneki kĩrĩ na mbarathi

7 Mũthenya wa mĩrongo ĩĩrĩ na ĩna wa mweri wa ikũmi na ũmwe nĩguo wĩtagwo (mweri wa Shebato), ndũmĩrĩri ya MWATHANI nĩyanginyĩrĩire, niĩ mũnabii Zakaria mũrũ wa Berekia mũrũ wa Ido. Hĩndĩ ĩyo yarĩ mwakainĩ wa keerĩ wa wathani wa Dario. MWATHANI aaheire ndũmĩrĩri ĩyo ũtukũ na njĩra ya kĩoneki.

8 Atĩrĩĩrĩ, nĩndoonire mũraika wa Mwathani ahaicĩĩte mbarathi nduune. Mũraika ũcio aarũngiĩ gĩtuambainĩ mĩtaathi-inĩ gatagatĩ, na nĩoimĩĩtwo thuutha nĩ mbarathi ingĩ, ĩmwe nduune, ĩngĩ bĩndu, na ĩngĩ njerũ.

9 Ngĩmũũria atĩrĩ, “Mbarathi ici-rĩ, nĩ kĩĩ irenda kũmenyithania?”

Mũraika ũrĩa wanjaragĩria akĩnjookeria atĩrĩ, “Nĩngũkuonia ũrĩa irenda kũmenyithania.

10 MWATHANI Mwene Hinya Wothe aracitũmĩĩte ikarangĩre thĩ.”

11 Nacio igĩcookeria mũraika wa MWATHANI ũrĩa warũngiĩ mĩtaathiinĩ atĩ nĩithiũrũrũkĩĩte thĩ na ikoona atĩ thĩ yothe nĩhooreire.

12 Naake mũraika ũcio akĩũria atĩrĩ, “MWATHANI Mwene Hinya Wothe, rĩu-rĩ, nĩũkoreetwo ũraakarĩire Jerusalemu na matũũra ma Juda mĩaka mĩrongo mũgwanja. Ũgũgĩikara itĩĩna rĩigana atĩa ũgĩgaacooka kũiguĩra andũ aakuo tha?”

13 Naake MWATHANI agĩcookeria mũraika ũrĩa twaragia naake na mĩgambo ya ũhooreri na ya kũũmanĩrĩria.

14 Mũraika agĩkĩnjĩĩra nyanĩrĩre njuge ũrĩa MWATHANI Mwene Hinya Wothe oigĩĩte atĩrĩ, “Ndĩ na wendo mũkĩru harĩ Jerusalemu na Zayuni.

15 Ningĩ nĩndaakarĩĩtio mũno nĩ ndũũrĩrĩ icio ciikaire ihooreire na irĩ na thaayũ. Nĩ gũkorwo rĩrĩa ndaraakarĩire andũ aakwa haniini, cio nĩgũthiĩ ciathiire na mbere kũmanyamaaria.

16 Kwoguo nĩnjookereire itũũra rĩa Jerusalemu ndĩrĩiguĩre tha. Hekaarũ yakwa nĩgaakwo rĩngĩ o na itũũra rĩcooke rĩrũũgamio rĩngĩ.”

17 Mũraika akĩnjĩĩra atĩrĩ, “Anĩrĩra riita rĩngĩ atĩrĩ, ‘MWATHANI Mwene Hinya Wothe aroiga atĩ matũũra ma andũ aake nĩmagaacooka kũgaacĩra, acooke ateithĩrĩrie Jerusalemu, na ethuurĩre itũũra rĩu rĩtuĩke rĩake kĩũmbe.’ ”

Kĩoneki kĩa hĩa

18 Atĩrĩĩrĩ, kĩonekiinĩ kĩngĩ nĩndoonire hĩa inya cia ndeegwa.

19 Ngĩkĩũria mũraika ũrĩa waragia na niĩ atĩrĩ, “Hĩa ici nĩ kĩĩ iramenyithania?”

Naake akĩnjookeria atĩrĩ, “Nĩ moothamaki ma thĩ marĩa maharaganĩĩtie andũ a Juda, a Isiraeli, o na a Jerusalemu.”

20 Thuutha ũcio MWATHANI akĩnyonia aturi ana.

21 Ngĩkĩũria atĩrĩ, “Andũ aya nao marooka gwĩka atĩa?”

Naake akĩnjookeria atĩrĩ “Mookĩĩte kũmakia na kũrũnda ndũũrĩrĩ iria irangĩrĩirie bũrũri wa Juda na ikahurunja andũ aakuo.”