Categories
Jona

Jona Gũtaarĩria

Gũtaarĩria

Ibuku rĩa Jona rĩ ũtiganu na mabuku marĩa mangĩ ma ũrathi thĩinĩ wa Mbaimbũ, nĩ gũkorwo rĩo nĩ rũgano rwa ũhoro wa mũnabii ũmwe wageririe kũregana na watho wa Ngai. Ngai nĩamwathire athiĩ Nineve, itũũra rĩrĩa rĩarĩ inene ũthamakiinĩ wa Asiria, arĩa maarĩ thũ nene cia andũ a Isiraeli. Ĩndĩ Jona, ndeendaga gũthiĩ gũtwara ndũmĩrĩri ya Ngai kũu, nĩ ũndũ aarĩ na ũũmĩrĩru atĩ Ngai ndangĩathiire na mbere kũharagania itũũra rĩu ta ũrĩa eehĩtĩĩte. Thuutha wa maũndũ maingĩ ma magegania gwĩkĩka, Jona nĩetĩkĩrire gwathĩka arĩ o na nganja, no mũicoinĩ akĩraakara nĩkuona atĩ ndũmĩrĩri yake ya kũharagania itũũra rĩu ndĩahingire.

Ibuku rĩĩrĩ nĩrĩonanagia ũnene wa Ngai igũrũ rĩa ciũmbe ciake. No mũno makĩria nĩrĩonanagia ũrĩa Ngai arĩ tha, wendo, na wendi wake nĩkuohera na kũhonokia o na thũ cia andũ aake gũkĩra gũciherithia na gũciniina.

Maũndũ marĩa marĩ ibukuinĩ rĩĩrĩ

Gwĩtwo kwa Jona na kũrega gwathĩka 1.1-17

Kũhera na kũhonokio kwa Jona 2.1-10

Ndũmĩrĩri ya Jona kũrĩ andũ a Nineve 3.1-10

Tha cia Ngai kũrĩ andũ a Nineve 4.1-11

Categories
Jona

Jona 1

Jona kũrega gwathĩkĩra MWATHANI

1 Hĩndĩ ĩmwe mũndũ wetagwo Jona, mũrũ wa Amitai, nĩarĩirio nĩ MWATHANI akĩĩrwo atĩrĩ,

2 “Ũkĩra ũthiĩ Nineve, itũũra rĩrĩa inene, wanĩrĩre ũkĩrĩkaanagia, tondũ maũũru ma andũ aarĩo nĩmanginyĩire.”

3 No rĩĩrĩ, Jona akĩnyiita njĩra ĩngĩ nĩguo oorĩre MWATHANI. Agĩikũrũka Jopa, agĩkora meeri yathiaga Sipania. Akĩgata tigiti, akĩhaica meeriinĩ ĩyo hamwe na andũ arĩa angĩ nĩguo oorĩre MWATHANI.

4 No marĩ iriainĩ MWATHANI akĩmatũmĩra rũhuuho rũnene mũno. Gũgĩkĩgĩa kĩhuuhũkanio kĩnene iriainĩ o nginya meeri ĩkĩenda kũrikĩra.

5 Atwarithia a meeri makĩmaka, o mũndũ o mũndũ agĩkaĩra ngai yake. Magĩcooka magĩikia mĩrigo ĩrĩa yarĩ meeriinĩ iriainĩ nĩguo ĩhũthahũthĩrwo. Hĩndĩ ĩyo gwekĩkaga ũguo wothe, Jona nĩaikũrũkĩĩte agatoonya kũu meeriinĩ o thĩinĩ agakoma toro mũritũ.

6 Mũnene wa meeri agĩkĩmũkorerera akomeete akĩmũũria atĩrĩ, “Ũreeka atĩa tondũ ũrĩ toro? Ũkĩra, ũkaĩre ngai yaku no gũkorwo nĩgũtũiguĩra tha ĩtũhonokie.”

7 Atwarithia a meeri magĩkĩĩrana atĩrĩ, “Ũkĩraai tũikie kuura tũmenye nũũ ũtũmĩĩte ũgwati ũyũ ũtũkorerere.” Magĩgĩĩka o ũguo, nayo kura ĩkĩgwĩra Jona.

8 Magĩkĩmwĩra atĩrĩ, “Tatwĩre, ũtũreehithĩirie mũtino ũyũ nĩkĩ? Wĩra waku nĩ ũrĩkũ? Uumĩĩte kũ? Bũrũri waku nĩ ũrĩkũ? Na rũũrĩrĩ rwaku nĩ rũrĩkũ?”

9 Naake akĩmeera atĩrĩ, “Niĩ ndĩ Mũhibirania na ngoocaga MWATHANI Ngai wa igũrũ ũrĩa wombire thĩ na iria.”

10 Agĩcooka akĩmeera nĩkũũra ooragĩra MWATHANI.

Maigua ũguo makĩmaka mũno makĩmũũria atĩrĩ, “Nĩkĩ gĩtũmĩĩte ũũre?”

11 Na rĩĩrĩ, kĩhuuhũkanio no kuongerereka kĩongererekaga, kwoguo makĩmũũria atĩrĩ, “Tũngĩgwĩka atĩa nĩguo kĩhuuhũkanio gĩĩkĩ kĩhoorere?”

12 Jona agĩcookia atĩrĩ, “Njikiai iriainĩ na nĩgĩkũhoorera; amu nĩnjũũĩ nĩ ihĩtia rĩakwa rĩtũmĩĩte kĩhuuhũkanio gĩĩkĩ kĩnene ũũ kĩmũkorerere.”

13 O na aameera ũguo makĩgeria na hinya wao wothe kuumĩria meeri rũteereinĩ, no makĩremwo tondũ kĩhuuhũkanio no gũkĩrĩrĩria gĩakĩragĩrĩria.

14 Nĩ ũndũ ũcio magĩkaĩra MWATHANI makiuga atĩrĩ, “MWATHANI twagũthaitha ndũgaatũniine nĩ ũndũ wa gĩkuũ kĩa mũndũ ũyũ; nĩ gũkorwo wee MWATHANI nĩ we ũtũmĩĩte ũndũ ũyũ wĩkĩke.”

15 Magĩkĩnyiita Jona makĩmũikia iriainĩ. Na ihinda o rĩu kĩhuuhũkanio gĩkĩhoorera.

16 Ũndũ ũcio ũgĩtũma andũ acio metigĩre MWATHANI mũno. Magĩcooka makĩmũrutĩra igongoona na makĩĩhĩta kũmũtungatĩra.

17 MWATHANI agĩtũma thamaki nene mũno ĩmerie Jona; agĩikara thĩinĩ wa thamaki ĩyo mĩthenya ĩtatũ na mootukũ matatũ.

Categories
Jona

Jona 2

Ihooya rĩa Jona

1 Na rĩĩrĩ, Jona arĩ o thĩinĩ wa thamaki ĩyo akĩhooya MWATHANI Ngai wake akiuga atĩrĩ,

2 “MWATHANI, ndĩ thĩĩnainĩ wakwa-rĩ, nĩndĩragũkaĩire,

nawe ũranjĩtĩka.

Ndĩrakũhooya ũteithio ndĩ kũrĩa kwa arĩa akuũ,

nawe ũranjigua.

3 Ũranjikirie ũrandikĩria kũrĩa kũriku,

o gĩtinainĩ kĩa iria rĩrĩa inene,

kũrĩa maaĩ marandigicĩirie mĩena yothe,

na ndiihũ ciamo irangunĩkanĩria.

4 Ndĩreciiria ndĩmũingate ngeeherio maithoinĩ maaku

na gũtirĩ hingo ngeerorera rĩngĩ Hekaarũ yaku theru.

5 Maaĩ marahumbanĩria o nginya maranjita;

iria rĩu rĩriku rĩrangunĩkĩria o biũ,

narĩo ria rĩa iriainĩ rĩreĩthiorereria mũtwe.

6 Ndĩrarikĩra o nginya itinainĩ cia irĩma,

o nginya kũu thĩ ĩrĩa ihingo ciayo ihingĩĩtwo nginya tene.

No wee MWATHANI Ngai wakwa, ũranduta kuuma kũu kũriku ndĩ o muoyo.

7 Rĩrĩa ngoro yakwa ĩragĩĩte hinya-rĩ,

nĩguo MWATHANI ndĩrakũhoire

nawe ũranjigua ũrĩ Hekaarũinĩ yaku theru.

8 Arĩa mathaathayagia mĩhianano

nĩmagũtiganĩirie makaaga gũgũtĩĩa.

9 No niĩ-rĩ, nĩndĩrĩkũgoocaga;

nĩndĩkũrutagĩra magongoona,

na hingagie mĩĩhĩtwa ĩrĩa ngwĩrĩire.

Tondũ wee MWATHANI, nĩ we ũhonokanagia.”

10 Thuutha ũcio MWATHANI akĩarĩria thamaki ĩyo,

nayo ĩgĩthiĩ ĩgĩtahĩka Jona rũteereinĩ rwa iria.

Categories
Jona

Jona 3

Jona gwathĩkĩra MWATHANI

1 Na rĩĩrĩ, MWATHANI nĩarĩirie Jona hingo ya keerĩ akĩmwĩra atĩrĩ,

2 “Ũkĩra ũthiĩ Nineve, itũũra rĩrĩa inene, ũkarĩkinyĩrie ũhoro ũrĩa ngũkwĩra.”

3 Jona agĩgĩathĩkĩra MWATHANI agĩthiĩ Nineve; itũũra rĩu rĩarĩ inene ũguo atĩ mũndũ angĩarĩtuĩkanirie na thikũ ithatũ.

4 Thuutha wa rũgendo rwa mũthenya mũgima atuĩkanĩirie itũũrainĩ rĩu, Jona akĩambĩrĩria kwanĩrĩra akiuga atĩrĩ, “No mĩthenya mĩrongo ĩna ĩtigaire Nineve ĩharaganio!”

Andũ a Nineve kwĩrira

5 Andũ a Nineve nĩmeetĩkirie ndũmĩrĩri ya Ngai. Magĩcooka makĩanĩrĩra atĩ kũgĩe na ihinda rĩa kwĩima irio. Magĩĩkĩra nguo cia makũnia, mũniini na mũnene, nĩguo moonie Ngai ũrĩa maahereete meehia maao.

6 Rĩrĩa mũthamaki wa Nineve aiguire ũhoro ũcio, no gũũkĩrĩria ookĩrĩirie gĩtĩ gĩake kĩa ũthamaki, akĩaũra nguo ciake cia ũthamaki, agĩĩkĩra nguo ya ikũnia agĩikara thĩ mũhuinĩ.

7 Agĩcooka akĩruta watho kũrĩ andũ oothe a Nineve ta ũũ: “Rĩĩrĩ nĩrĩo itua rĩa mũthamaki na njaama ciake: Mũndũ o wothe ndakaarĩe kana anyue. Mahiũ o namo matikaaheeo kĩndũ gĩa kũrĩa kana gĩa kũnyua.

8 Andũ na mahiũ nĩmehumbe nguo cia makũnia. O mũndũ nĩahooe Ngai na kĩyo na atige mĩtugo ya waganu na ciĩko ciake iria njũru.

9 Hiihi Ngai ahota kwĩricũkwo atige kũraakara na aage gũtũniina.”

10 Ngai agĩkĩona atĩ nĩmeerirĩĩte na makarũnga mĩtugo yao mĩũru. Nĩ ũndũ ũcio akĩĩricũkwo na akĩaga kũmaherithia ta ũrĩa oigĩĩte nĩekũmeeka.

Categories
Jona

Jona 4

Maraakara ma Jona na tha cia Ngai

1 No rĩĩrĩ, Jona ndaigana gũkenio nĩ ũhoro ũcio, no kũraakara araakarire.

2 Kwoguo akĩhooya MWATHANI akiuga atĩrĩ, “MWATHANI, githĩ ũhoro ũyũ to ũrĩa ndoigire o rĩrĩa ndaarĩ bũrũri witũ atĩ nĩũgeeka? Na nĩkĩo ndageririe kũũrĩra Sipania! Nĩndooĩ atĩ wĩ Ngai ũiyũrĩĩtwo nĩ wendani, tha, ũrĩ mũkirĩrĩria, mũtugi, na nĩwĩricũkagwo ũgatiga kũherithania.

3 Rĩu MWATHANI ndagũthaitha ũreke ngue, nĩ kaba gũkua gũkĩra gũtũũra muoyo.”

4 Naake MWATHANI akĩmũcookeria atĩrĩ, “He bata ũrĩkũ ũraakare?”

5 Jona akiuma nja ya itũũra rĩa Nineve agĩthiĩ agĩikara thĩ mwena wa irathĩro wa itũũra rĩu. Agĩgĩĩthondekera gathũnũ ga kwĩgitia riũa, agĩikara ho, eetereire oone ũrĩa itũũra rĩu rĩgwĩkwo.

6 Naake MWATHANI Ngai agĩtũma rũngũ rũmere na rũtambĩrĩre gathũnũ kau nĩguo Jona egitie riũa ho, na aigue aiganĩire. Jona agĩgĩkenio mũno nĩ rũngũ rũu.

7 No rĩĩrĩ, mũthenya ũyũ ũngĩ rũũciinĩ tene, Ngai agĩtũma kĩgunyũ kĩrĩe rũngũ rũu, naruo rũkĩũma.

8 Rĩrĩa riũa rĩahiũhire, Ngai agĩtũma rũhuuho rũhiũ ruumĩĩte na irathĩro, naguo ũrugarĩ wa riũa ũgĩcina Jona mũtwe o nginya akĩigua ta angĩringĩka. Kwoguo akĩĩrirĩria gũkua, akiuga atĩrĩ, “Nĩ kaba ngue gũkĩra ndũũre muoyo.”

9 No MWATHANI akĩmwĩra atĩrĩ, “He bata ũrĩkũ ũraakare tondũ wa rũngũ rũu?”

Jona agĩcookia atĩrĩ, “Ndĩ na kĩhooto gĩa kũraakara; ndaakare nginya ngue!”

10 MWATHANI agĩkĩmwĩra atĩrĩ, “Rũngũ rũu rũramerire na rũrakũra na ũtukũ ũmwe, na ũtukũ ũyũ ũngĩ rũrooma. Ndũnarũrutĩra wĩra kana ũrarũkũria, na no ũrarũcaaĩra!

11 Githĩ na niĩ ndikĩagĩrĩirwo nĩkũiguĩra itũũra rĩu inene rĩa Nineve tha, rĩrĩa rĩrĩ na makĩria ma andũ ngiri igana na mĩrongo ĩĩrĩ (120,000) arĩa mataahĩtĩirie, o na ningĩ rĩĩrĩ na mahiũ maingĩ!”

Categories
Mika

Mika GŨTAARĨRIA

GŨTAARĨRIA

Mũnabii Mika aarĩ kuo hĩndĩ ĩmwe na mũnabii Isaia, na oimĩĩte itũũrainĩ rĩarĩ Juda, ũthamaki wa mwena wa na kĩanda. We nĩetĩkĩĩtie atĩ Juda kwarĩ hakuhĩ kũgĩa na mũthiro mũnene ũhaana ta ũrĩa Amosi aarathĩĩte ũkoniĩ Isiraeli, ũthamaki wa mwena wa na rũgongo. Gĩtũmi o ta kĩu, nokĩo gĩgũtũma Ngai aherithie andũ a ũthamaki wa Juda nĩ ũndũ wa kũrangĩrĩria ihooto cia andũ. No rĩĩrĩ, ndũmĩrĩri ya Mika ĩrĩ na cionereria njega cia kĩĩrĩgĩrĩro kĩa matukũ ma thuutha.

Icunjĩ iria cia bata thĩinĩ wa ibuku rĩĩrĩ nĩ iria irĩ na mbica ya thaayũ wa thĩ yothe ĩrĩ rungu rwa ũthamaki wa Ngai (4.1-4); ũrathi ũkoniĩ mũthamaki mũnene ũrĩa ũkoima rũciaroinĩ rwa Daudi areehere rũũrĩrĩ thaayũ (5.2-5a); na kamũhari ga 6.8, karĩa koigaga na njĩra nguhĩ ũrĩa anabii a Isiraeli moigaga: “Ũndũ ũrĩa MWATHANI eendaga kuuma kũrĩ ithuĩ nĩ: Gwĩka maũndũ ma kĩhooto, gũtugana, na gũtũũra wĩnyiihĩĩtie wĩ na ngwatanĩro na Ngai witũ.”

Maũndũ marĩa marĩ ibukuinĩ rĩĩrĩ

Gũtuĩrwo kwa andũ a Isiraeli na a Juda 1.1–3.12

Gũcookio mũciĩ na thaayũ 4.1–5.15

Ndũmĩrĩri ya gũkaanania na ya kĩĩrĩgĩrĩro 6.1–7.20

Categories
Mika

Mika 1

1 Matukũinĩ marĩa Jothamu, Ahazu, na Hezekia maarĩ athamaki a Juda, MWATHANI nĩaheire Mika ndũmĩrĩri. Aamũguũrĩirie maũndũ maya moothe maakoniĩ Samaria na Jerusalemu. Mika oimĩĩte itũũra rĩa Moreshethu.

Gũcakaĩra Samaria na Jerusalemu

2 Inyuothe andũ a ndũũrĩrĩ, taiguai!

Inyuothe mũtũũraga thĩ, thikĩrĩriai!

Rekeei MWATHANI Ngai amũthitange.

Mũthikĩrĩriei arĩ Hekaarũinĩ yake theru.

3 Atĩrĩĩrĩ, MWATHANI nĩarooka kuuma handũ haake harĩa hatheru;

nĩegũikũrũka agerere tũcũmbĩrĩ twa irĩma.

4 Nacio irĩma irĩ rungu rwake nĩigaatweka

o ta mũhũra ũrĩ mwakiinĩ;

igaikũrũka ciĩitĩrĩre mĩkuru

ta maaĩ magĩikũrũka handũ he na mũharũrũko.

5 Maũndũ maya moothe megwĩkĩka

tondũ Aisiraeli nĩmeehĩĩtie na magookĩrĩra Ngai.

Nũũ wĩ na mahĩtia tondũ wa Aisiraeli gũũkĩrĩra Ngai?

Nĩ Samaria itũũra rĩrĩa rĩnene!

Nũũ wĩ na mahĩtia tondũ wa ũhooi mĩhianano ũrĩa wĩ Juda?

Nĩ Jerusalemu!

6 Kwa ũguo nĩngũtua Samaria kĩrũndo kĩa mahiga bũrũriinĩ,

ngũgũtua kũndũ gwakũhandwo mĩthabibũ.

Nĩngũita mahiga ma itũũra rĩu mũkuruinĩ

na humbũrie mĩthingi yarĩo.

7 Ngai cia mĩhianano ciarĩo nĩigũthuthangwo,

indo ciothe iria aka a maraaya a hekaarũ maheagwo icinwo na mwaki,

na mĩhianano yarĩo yothe ĩtuuo ya tũhũ.

Samaria yagĩire na indo icio na njĩra ya kũhũũra ũmaraaya,

no rĩu thũ igaakuua indo icio icicookerie aka a maraaya a kũndũ kũngĩ.

8 Mika agĩkiuga atĩrĩ,

“Nĩ ũndũ wa ũguo nĩngũcakaya na ndĩre.

Nguonania kĩeha gĩakwa na ũndũ wa gũthiĩ njaga, na itarĩ iraatũ.

Ngũgirĩka ta mbwe na ngae ta nyaga.

9 Amu ironda cia Samaria itingĩhoneka,

na Juda o nayo ĩrĩ hakuhĩ gũthĩĩnĩka o ro ũguo;

kwanangwo nĩgũkinyĩĩte kĩhingoinĩ kĩa Jerusalemu kũrĩa andũ aakwa matũũraga.”

Thũ gũkuhĩrĩria Jerusalemu

10 Mũtikaae kũhe andũ a Gathu ũhoro ũcio;

mũtikaae kũreka moone mũkĩrĩra.

Inyuĩ andũ a Bethi Leafara-rĩ, mwĩgaragariei rũkũngũinĩ.

11 Inyuĩ andũ a Shafiri-rĩ, thiĩi ithaamĩrio mwĩ njaga na mũconokeete,

na inyuĩ andũ a Zaanani mũtikaae kuuma itũũrainĩ rĩanyu.

Mwaigua andũ a Bethezeli magĩcakaya

mũkaamenya atĩ kũu gũtirĩ handũ hangĩũrĩrwo.

12 Andũ a Marothu maikarĩĩte mathethũkĩire maũndũ meega,

amu MWATHANI nĩaikũrũkĩĩtie ũũru nginya kĩhingoinĩ kĩa Jerusalemu.

13 Inyuĩ atũũri a Lakishi, ohereraai ngaari cianyu mbarathi.

Inyuĩ nĩmwegerekanirie na andũ a Isiraeli mũgĩĩka meehia ta maao,

na kwoguo mũgĩgĩtũma andũ a Jerusalemu meehie.

14 Rĩu inyuĩ andũ a Juda ugĩraai itũũra rĩa Moreshethu Gathu ũhoro.

Athamaki a Isiraeli matigaateithĩrĩrio nĩ andũ a itũũra rĩa Akizibu.

15 Inyuĩ andũ a Maresha, MWATHANI nĩekũmũnengerana kũrĩ thũ,

nayo ĩĩnyiitĩre itũũra rĩanyu.

Anene a Isiraeli nĩmegũthiĩ kwĩhitha ngurungainĩ ya Adulamu.

16 Inyuĩ andũ a Juda enjaai njuĩrĩ mũcakaĩre ciana cianyu iria mwendeete,

mwĩĩkĩreei ihara ta rwĩgĩ

amu ciana cianyu ikũrutwo kũrĩ inyuĩ itwarwo ithaamĩrio.

Categories
Mika

Mika 2

Marigĩrĩrio ma andũ arĩa mahinyagĩrĩria athĩĩni

1 Kaĩ andũ arĩa maikaraga ũrĩrĩ matarĩ toro,

magĩthugunda meciiria mooru marĩ thĩĩnainĩ-ĩ!

Gwakĩa o ro ũguo, mangĩona mweke,

meekaga ũũru ũrĩa maraire magĩthugunda.

2 Mangĩrirĩria mĩgũnda nĩmamĩtuunyanaga;

na mangĩrirĩria nyũmba nĩmacituunyanaga.

Mũndũ, andũ a mũciĩ wake, na indo ciake nĩmahinyĩrĩirio.

3 Kwoguo MWATHANI ekuuga atĩrĩ,

“Nĩngũmũreehithĩria mũthiro,

na mũtihota kũũrĩra.

Nĩgũkũgĩa na ihinda rĩa thĩĩna

na mũtigũcooka gũkinyũkia na mwĩtĩĩo hĩndĩ ĩngĩ.

4 Mũthenya ũcio wakinya-rĩ,

andũ nĩmarĩheana rũgano rwanyu ta ngerekano ya mũthiro,

na maine rwĩmbo rwa kĩeha rũmũkoniĩ moige atĩrĩ,

‘Nĩtwanangĩĩtwo biũ!

MWATHANI nĩatũtuunyĩĩte mĩgũnda iitũ

akamĩnengera andũ arĩa maatũnyiitire mĩgwate.’ ”

5 Kwoguo, ihinda rĩakinya rĩa andũ a MWATHANI gũcookerio mĩgũnda,

gũtirĩ o na ũmwe wanyu ũkaagaĩrwo.

6 Andũ manjĩĩraga atĩrĩ,

“Tiga gũtũhunjĩria.

Tiga kũhunjia ũhoro wa maũndũ macio moothe,

amu Ngai ndangĩtũconorithia.

7 Ũgwĩciiria andũ a Isiraeli me na kĩrumi?

Kaĩ MWATHANI aremeetwo nĩgweterera?

MWATHANI nĩ ma no eeke maũndũ ta macio?

Githĩ andũ arĩa meekaga ũrĩa kwagĩrĩire ndamaaragĩria wega?”

8 MWATHANI aramũcookeria atĩrĩ,

“Inyuĩ nĩmũũkagĩrĩra andũ aakwa ta marĩ thũ.

Andũ macookaga kuuma mbaarainĩ magĩciiragia atĩ mũciĩ marĩ na thaayũ,

no inyuĩ mũkamatuunya magooti maao.

9 Mũingataga atumia a andũ aakwa kuuma mĩciĩ ĩrĩa meendeete,

mũgagĩtuunya ciana ciao kĩraathimo gĩakwa nginya tene na tene.

10 Ũkĩraai mũthiĩ, amu gũũkũ gũtirĩ ũhuurũko.

Meehia maanyu nĩmatũmĩĩte kũndũ gũũkũ gũtuĩke gwa kũniinwo.

11 “Mũndũ angĩthiĩ akĩaragia maheeni akoiga atĩrĩ,

‘Ndaratha atĩ ndibei na njoohi nĩigũkorwo irĩ nyingĩ gũũkũ,

ũcio nĩ we mũhunjia ũrĩa andũ aya mangĩenda.’

12 “No inyuĩ, andũ oothe a Isiraeli arĩa mũtigarĩĩte,

nĩngaamũcookanĩrĩria hamwe.

Ngaamũcookanĩrĩria ta ng’ondu igĩcooka kiũgũ.

Bũrũri wanyu ũkaiyũra andũ rĩngĩ

o ta rũũru rũrĩ ũrĩithioinĩ waruo.”

13 Ngai nĩakaamahingũrĩra njĩra

na amatongorie moime ithaamĩrio.

Magaatua ihingo cia itũũra

methare matongoreetio nĩ mũthamaki wao,

naake MWATHANI arĩ mbere yao.

Categories
Mika

Mika 3

Mika kũmenereria atongoria a Isiraeli

1 Tathikĩrĩriai inyuĩ atongoria a andũ a Isiraeli!

Mwagĩrĩirwo nĩ gũkorwo mũkĩrũmĩrĩra kĩhooto,

2 no inyuĩ mũthũire maũndũ marĩa meega, mũkeenda marĩa mooru.

Mũthĩnjaga andũ aakwa marĩ muoyo mũkamaruta rũũa,

na mũgathoora nyama ciao kuuma mahĩndĩinĩ.

3 Mũrĩaga nyama cia mĩĩrĩ ya andũ aakwa,

mũmathĩnjaga mũkamaruta rũũa,

mũgacooka mũkamoinanga mahĩndĩ,

na mũkamatinangia ta nyama cia kũrugwo na thaburia.

4 Ihinda nĩrĩrooka rĩrĩa mũrĩkaĩra MWATHANI,

no ndarĩmũcookeria;

ndarĩthikĩrĩria mahooya maanyu tondũ nĩmwĩkĩĩte ũũru.

5 Ha ũhoro wa anabii arĩa maheeo irio,

maheenagia andũ aakwa makameerĩra thaayũ;

no maimwo irio makamarathĩra mbaara,

MWATHANI ekũmeera atĩrĩ,

6 “Inyuĩ anabii, mũthenya wanyu wĩ hakuhĩ gũthira,

nĩmũrĩthũĩrwo nĩ riũa.

Na tondũ nĩmwahĩtithirie andũ aakwa,

mũtigũcooka kuona cioneki, kana kũratha ũndũ o na ũmwe.”

7 Arĩa marathaga nĩmarĩconorithagio tondũ wa kũremwo nĩkũratha.

Oothe marĩkoragwo maconokeete

tondũ Ngai ndarĩmacookagĩria.

8 No niĩ-rĩ, nĩnjiũrĩĩtwo nĩ hinya;

MWATHANI nĩanjiũrĩĩtie Roho na hinya wake;

nĩaheete kĩhooto na ũcamba wa kwĩra andũ a Isiraeli meehia maao.

9 Tathikĩrĩriai inyuĩ atongoria a Aisiraeli,

inyuĩ mũteendeete kĩhooto,

o inyuĩ mũgarũraga ũũma mũkaũtua maheeni.

10 Inyuĩ mũraaka Jerusalemu, itũũra rĩa Ngai,

na ũũragani na wagi wa kĩhooto.

11 Atongoria a itũũra rĩu matuaga ciira nĩguo mahakwo,

athĩnjĩri Ngai marutanaga nĩguo marĩhwo,

nao anabii marathaga nĩguo maheeo mbeeca.

Oothe megiritanagia na MWATHANI makoiga atĩrĩ,

“MWATHANI arĩ hamwe na ithuĩ,

na gũtirĩ ũũru ũgũtũkora.”

12 Kwoguo, nĩ ũndũ wanyu, Zayuni gũkaarĩmwo ta mũgũnda,

Jerusalemu gũgaatuĩka hĩba ya mahiga,

nakĩo kĩrĩma kĩrĩa Hekaarũ yakĩĩtwo gĩtuĩke mũtitũ.

Categories
Mika

Mika 4

MWATHANI gwatha thĩ yothe na thaayũ

1 Atĩrĩĩrĩ, matukũ marĩa magooka,

kĩrĩma kĩrĩa Hekaarũ yakĩĩtwo gĩgaakorwo kĩrĩ kĩraihu gũkĩra irĩma ciothe,

gĩgaakorwo gĩtũũgĩrĩĩte igũrũ wa ithũngũri ciothe.

Ndũũrĩrĩ nyingĩ nĩikoomokagĩra kĩrĩmainĩ kĩu.

2 Andũ aingĩ magooka moige atĩrĩ,

“Ũkaai twambate kĩrĩmainĩ kĩa MWATHANI,

ũkaai twambate Hekaarũinĩ ya Ngai wa Isiraeli,

nĩguo agatũrute ũrĩa ekwenda twĩkage,

nĩ geetha tũthiage na njĩra ciake.

Nĩ gũkorwo ũrutani wa MWATHANI uumaga Zayuni,

na MWATHANI aaragĩria andũ ũhoro wake arĩ Jerusalemu!”

3 Nĩagaatuithania andũ aingĩ,

na nĩakaiguithania ndũũrĩrĩ irĩ hinya cia kũraaya.

Nacio iture hiũ ciacio cia njora ituĩke mĩraaũ,

na iture matimũ maacio matuĩke tũhiũ twa gũceeha.

Gũtirĩ rũũrĩrĩ rũgaacooka kũrũa na rũrĩa rũngĩ,

na itigaacooka kũhaarĩria mbaara.

4 O mũndũ agaatũũraga na thaayũ mĩgũndainĩ yake ya mĩthabibũ na ya mĩkũyũ,

na gũtirĩ mũndũ ũgaatũma etigĩre.

MWATHANI Mwene Hinya Wothe nĩ we wĩranĩire maũndũ macio.

5 O rũũrĩrĩ rũthaathayagia na rũgaathĩkĩra ngai yaruo,

no ithuĩ tũrĩthaathayagia na twathĩkagĩre MWATHANI Ngai witũ tene na tene.

Aisiraeli nĩmagaacooka kuuma ithaamĩrio

6 MWATHANI ekuuga atĩrĩ,

“Ihinda rĩu rĩakinya nĩngaacookanĩrĩria

arĩa herithĩĩtie, o arĩa manyamaarĩkĩire ithaamĩrioinĩ.

7 Andũ acio nĩ arĩa matuĩtwo ithua na marĩ kũraaya na mũciĩ,

no nĩngaambĩrĩria ũtũũro ũngĩ mwerũ na acio matigarĩĩte,

na nĩmagaatuĩka rũũrĩrĩ rũnene mũno.

Ngaatũũra ndĩmaathaga me kũu kĩrĩmainĩ gĩa Zayuni

kuuma hĩndĩ ĩyo nginya tene na tene.”

8 Nawe Jerusalemu, kũrĩa Ngai atariĩ ta mũrĩithi,

e gathũrũmũndũinĩ ka mũnaara, arangagĩra andũ aake,

nĩũgaatuĩka o rĩngĩ itũũra inene rĩa ũthamaki ũrĩa warĩ waku.

9 Rĩu-rĩ, nĩ kĩĩ kĩratũma ũrĩre wanĩrĩire ũguo?

Ũrathĩĩnĩka nĩkĩ ta mũtumia ũrarũmwo aciare?

Kana nĩ tondũ ndũrĩ na mũthamaki, na agũtaari nĩmakuĩte?

10 Inyuĩ andũ a Jerusalemu,

mwĩnyogondeei na mũcaaye ta mũtumia ũrarũmwo aciare,

nĩ gũkorwo rĩu nĩmũkuuma itũũrainĩ

mũthiĩ mũgatũũre na kũu werũinĩ.

Mũgũthiĩ Babiloni, no mũrĩ kũu,

MWATHANI nĩakaamũhonokia kuuma mookoinĩ ma thũ cianyu.

11 Ndũũrĩrĩ nyingĩ nĩciũnganĩĩte imũũkĩrĩre.

Iroiga atĩrĩ, “No mũhaka itũũra rĩa Jerusalemu rĩanangwo!

Nĩtũkwĩrorera itũũra rĩĩrĩ rĩanangĩkĩĩte.

12 No ndũũrĩrĩ icio itiũĩ rĩciiria rĩa MWATHANI;

itiũĩ atĩ MWATHANI abangĩĩte

acicookanĩrĩrie hamwe aciherithie o ta ũrĩa ngano ĩtwaragwo ihũũrĩroinĩ.”

13 MWATHANI egũkiuga atĩrĩ,

“Andũ a Jerusalemu, ũkĩraai mũkaherithie thũ cianyu.

Nĩngũmũhe hinya mũhaane ndeegwa i na hĩa cia kĩgera na mahũngũ ma gĩcango.

Nĩmũgũthethera ndũũrĩrĩ nyingĩ,

na ũtonga ũrĩa cianagia naguo na njĩra ya ũtuunyani

nĩmũkũnengera, niĩ Mwathani wa thĩ yothe.”