Gikuyu Common Language with DC (GIKDC)

Moabi

1 MWATHANI ekuuga atĩrĩ,

“Andũ a Moabi nĩmeehĩĩtie kaingĩ kaingĩ,

nĩ ũndũ ũcio no ngũmaherithia.

Nĩ gũkorwo maacinire mahĩndĩ ma mũthamaki wa Edomu magĩtuĩka mũhu.

2 Nĩngũikũrũkia mwaki

njine bũrũri wa Amoabi,

na njine nyũmba cia Keriothu cia kwĩgitĩra.

Amoabi megũkua kũrĩ na mbũkĩrĩra

makĩnegenanagia o na gũkĩhuuhagwo macoro.

3 Nĩngũũraga ũrĩa wathanaga Moabi o hamwe na atongoria oothe.”

Juda

4 MWATHANI ekuuga atĩrĩ,

“Andũ a Juda nĩmeehĩĩtie kaingĩ kaingĩ,

nĩ ũndũ ũcio no ngũmaherithia.

Nĩ gũkorwo nĩmareganĩĩte na Watho wakwa,

makaaga kũrũmia maathani maakwa

na mageetĩkĩra kũhĩtithio nĩ mĩhianano yao,

o ĩrĩa maithe maao maatungatagĩra.

5 Nĩngũikũrũkia mwaki

njine bũrũriinĩ wa Juda

na njine nyũmba cia kwĩgitĩra iria irĩ Jerusalemu.”

Ngai gũtuĩra Isiraeli

6 MWATHANI ekuuga atĩrĩ,

“Andũ a Isiraeli nĩmeehĩĩtie kaingĩ kaingĩ,

nĩ ũndũ ũcio no ngũmaherithia.

Tondũ-rĩ, nĩmeendeetie andũ athingu,

na makeendia athĩĩni matangĩhota o na kwĩrĩhĩra thiirĩ wa nyamũga igĩrĩ.

7 Ningĩ nĩmarangĩrĩirie arĩa matarĩ hinya mũtooroinĩ,

makahotomia njĩra cia arĩa maranyamaarĩka.

Mũndũ na ithe magwataga mũirĩĩtu ũmwe magakoma naake,

magagĩthaahia rĩĩtwa rĩakwa rĩrĩa rĩtheru.

8 Nyũmbainĩ cia gũthaathaĩria

mooyaga nguo cia athĩĩni cia kũrũũgamĩrĩra thiirĩ,

magaciara thĩ magacikomera.

Ningĩ hekaarũinĩ ya ngai wao-rĩ,

nĩkuo manyuagĩra ndibei

ĩrĩa matuunyĩĩte andũ arĩa marĩ na mathiirĩ maao.

9 “O na kũhaana ũguo-rĩ, githĩ ti niĩ MWATHANI, ndamũhũũrĩire Aamori,

imũndũ ndaaya o ta mĩtarakwa, na irĩ na hinya o ta mĩgandi,

na ngĩmaniina mathenge mbere yanyu?

10 Githĩ ti niĩ ndamũrutire Misiri,

ngĩmũtongoria itĩĩna rĩa mĩaka mĩrongo ĩna kũu werũinĩ

nĩ geetha mũkenyiitĩre bũrũri wa Aamori?

11 Githĩ ti niĩ ndathuurire aariũ amwe aanyu ngĩmatua anabii,

o na aanake amwe aanyu ngĩmatua Anaziri?

Githĩ ũguo tiguo kũrĩ, inyuĩ Aisiraeli aya?

Nĩ niĩ MWATHANI ndoiga ũguo.

12 No rĩĩrĩ, nĩmwatũmire Anaziri manyue ndibei,

na mũkĩgiria anabii kũratha moohoro maakwa.

13 Nĩ ũndũ ũcio ngũmũrangĩrĩria thĩ,

o ta ũrĩa ngaari ĩkuuithĩĩtio mĩrigo mĩingĩ ĩrangagĩrĩria.

14 Andũ arĩa marĩ ihenya mũno matikaahota gwĩthara,

arĩa marĩ hinya nao nĩmakoorwo nĩ hinya,

na arĩa njamba matikaahonokia mĩoyo yao.

15 Andũ arĩa marathaga na mĩguĩ matikaahota gwĩtiiria;

andũ arĩa marĩ ihenya mũno matikoora,

na andũ arĩa mathiaga mahaicĩĩte mbarathi matikaahonokia mĩoyo yao.

16 Mũthenya ũcio o na thigari iria njamba mũno

ikaarekania matharaita maacio ciĩyũrĩre.”

Ũguo nĩguo MWATHANI oiga.

1 Inyuĩ andũ a Isiraeli, o inyuĩ rũũrĩrĩ rũrĩa MWATHANI aarutire bũrũri wa Misiri, tathikĩrĩriai thitango ĩno aramũthitanga nayo!

2 “Thĩinĩ wa ndũũrĩrĩ ciothe cia thĩ-rĩ,

githĩ inyuĩ to inyuĩ, andũ arĩa ndũire njũũĩ na namataga?

Nĩ ũndũ ũcio meehia maanyu nĩ manene ũguo atĩ

no mũhaka ndĩmũherithie nĩ ũndũ wamo.”

Wĩra wa Mũnabii

3 Atĩrĩĩrĩ, andũ eerĩ no moohe rũgendo

mathiĩ hamwe matarĩĩkanĩire?

4 Mũrũũthi-rĩ, no ũrarame ũrĩ mũtitũ,

ũtenyiitĩirie nyamũ ĩrĩa ũkũgwĩmaga?

Mwana wa mũrũũthi no ararame arĩ kĩmaamoinĩ

atanyiitĩĩte kĩndũ?

5 Nyoni no ĩnyiitwo nĩ gĩkerenge

hatarĩ na kĩndũ gĩa kũmĩheenereria?

Mũtego naguo no ũtegũke

ũtategũrĩĩtwo nĩ kĩndũ?

6 Atĩrĩĩrĩ, coro wa mbaara no ũhuuhwo itũũrainĩ,

na andũ maage kũhahũka?

Mũthiro no ũkorerere itũũra,

ũtatũmĩĩtwo nĩ MWATHANI?

7 Nĩ ma atĩ MWATHANI Mwene Hinya Wothe ndarĩ ũndũ eekaga,

na akaaga kũũguũrĩria anabii ndungata ciake.

8 Mũrũũthi ũngĩrarama-rĩ,

nũũ ũtangĩĩtigĩra?

MWATHANI Mwene Hinya Wothe angĩaria-rĩ,

nũũ ũngĩaga kũhunjia ndũmĩrĩri yake?

Samaria gũkorererwo nĩ haaro

9 “Anĩrĩra andũ arĩa marĩ matũũrainĩ marĩa mairigĩre na thingo cia hinya

ma Ashidodu na ma bũrũri wa Misiri ũmeere atĩrĩ,

‘Rũrũnganaai irĩmainĩ iria ithiũrũrũkĩirie Samaria

mwĩrorere mbũkanĩrĩro iria irĩ kuo o na ngero iria iragerwo kuo.’ ”

10 MWATHANI ekuuga atĩrĩ,

“Andũ acio maiyũragia nyũmba ciao

na indo cioneetwo na njĩra cia gũtũmĩra hinya o na cia kũgera ngero;

o na matiũĩ mangĩtuĩka ehokeku na njĩra irĩkũ.

11 Nĩ ũndũ ũcio thũ ĩgaathiũrũrũkĩria bũrũri ũcio wao,

ĩharaganie meegitĩro maao

na yũngũrũrie nyũmba ciao.”

12 MWATHANI ekuuga atĩrĩ, “O ta ũrĩa mũrĩithi ahonokagia o magũrũ meerĩ kana gũtũ kũmwe kwa ng’ondu ĩrĩa ĩrĩĩtwo nĩ mũrũũthi-rĩ, no taguo andũ anyiinyi makaahonoka gatagatĩinĩ ka andũ a Samaria arĩa makomagĩra itanda cia mwĩnjoyo.”

13 Ningĩ MWATHANI Ngai Mwene Hinya Wothe ekuuga atĩrĩ,

“Thikĩrĩriai na mũkaanie njiarwa cia Jakubu.

Ciĩreei atĩrĩ,

14 Mũthenya ũrĩa ngaaherithia andũ a Isiraeli nĩ ũndũ wa meehia maao,

nĩngaatharũria igongoona iria irĩ itũũrainĩ rĩa Betheli.

Koona ciothe cia igongoona icio ciothe nĩikoinangwo igũe thĩ.

15 Nĩngaatharũria nyũmba iria ciikaragwo hĩndĩ ya heho o na hĩndĩ ya ũrugarĩ.

Nyũmba iria igemeetio na mĩguongo ithũũkangio,

nacio nyũmba iria nene iharaganio.”

Ũguo nĩguo MWATHANI oiga.

1 Tathikĩrĩriai ũhoro ũyũ, inyuĩ atumia a Samaria,

o inyuĩ mũnoreete o ta ng’ombe cia Bashani!

O inyuĩ mũhinyagĩrĩria arĩa matarĩ hinya,

mũkarangĩrĩria arĩa athĩĩni,

na mwathaga arũme aanyu mũkĩmeeraga atĩrĩ,

“Tũreehereei njoohi tũnyue!”

2 MWATHANI Mwene Hinya Wothe ehĩtĩĩte akoiga atĩrĩ,

“ O ta ũrĩa ndĩ mũtheru-rĩ, mĩthenya nĩgooka,

na inyuĩ mũguucũrũrũkio na ndwano.

Mũndũ o mũndũ akaahaana o ta thamaki ĩgwatĩĩtio na ndwano.

3 Mũkaaguucũrũrũkio mũhĩtũkĩrio mĩanyainĩ,

o mũndũ mwanya ũrĩa ũmũkuhĩrĩirie,

mũtwarwo kĩrĩmainĩ kĩa Herimoni.”

Ũguo nĩguo MWATHANI oiga.

Isiraeli kwaga kwĩruta

4 MWATHANI Mwene Hinya Wothe ekuuga atĩrĩ,

“Inyuĩ andũ a Isiraeli, thiĩi itũũra rĩa Betheli mũkeehie;

thiĩi Giligali mũkoongerere meehia maanyu;

thiĩi mũgakĩrute magongoona ma rũũciinĩ o rũũciinĩ,

o na gĩtwarageei gacunjĩ kaanyu ga ikũmi o thuutha wa mĩthenya ĩtatũ.

5 Rutagaai igongoona rĩa gũcookeria Ngai ngaatho na mĩgate mĩimbie;

twaragaai magongoona ma kwĩyendera mũkĩanagĩrĩra!

Tondũ ũguo nĩguo mwendeete gwĩka.

Ũguo nĩguo MWATHANI Mwene Hinya Wothe oiga.

6 “ Atĩrĩĩrĩ, nĩ niĩ ndamũreehithĩirie ng’aragu matũũrainĩ maanyu moothe,

no mũtiigana kũnjookerera.

Ũguo nĩguo MWATHANI oiga.

7 No niĩ ndarũũgamirie mbura

rĩrĩa irio cianyu ciamĩbataire mũno.

Ndatũmire mbura itũũrainĩ rĩmwe,

narĩo rĩrĩa rĩngĩ ngĩrĩima.

Ngiuria mbura mĩgũnda ĩmwe,

na mĩgũndainĩ ĩrĩa ĩngĩ irio ikĩũma.

8 Andũ maatooreetio nĩ nyoota, moimire matũũrainĩ maingĩ,

magĩthiĩ itũũra rĩmwe mehokeete kuona maaĩ,

no mationire o na ma kũmanyootora.

O na kũrĩ ũguo-rĩ, mũtiananjookerera.

Ũguo nĩguo MWATHANI oiga.

9 “Ndamũhũũrire na mbaa

ĩgĩcina irio cianyu ikĩũma.

Ngigĩ igĩũka, ikĩananga mĩgũnda yanyu yothe,

ikĩrĩa mĩthabibũ, mĩkũyũ na mĩtamaiyũ yanyu yothe.

O na kũrĩ ũguo-rĩ, mũtiigana kũnjookerera.

Ũguo nĩguo MWATHANI oiga.

10 “Ndamũhũũrire na mũrimũ mũũru o ta ũrĩa ndahũũrĩĩte Misiri naguo;

Ngĩũragithia aanake aanyu mbaarainĩ

na ngĩreka mũtuunywo mbarathi;

Ngĩiyũria kambĩ yanyu na mũnungo wa ciimba cia andũ,

o nginya mũkĩĩnyiita maniũrũ mũtige kũigua mũnungo ũcio.

No o na kũrĩ ũguo-rĩ, mũtiigana kũnjookerera.

Ũguo nĩguo MWATHANI oiga.

11 “Ndaanangire andũ amwe aanyu,

o ta ũrĩa ndaanangire Sodomu na Gomora;

arĩa maahonokire magĩgĩtuĩka o ta gĩcinga kĩrutĩĩtwo mwakiinĩ.

O na kũrĩ ũguo-rĩ, mũtiigana kũnjookerera.”

Ũguo nĩguo MWATHANI oiga.

12 “Kwoguo inyuĩ andũ a Isiraeli

no ngũmũherithia,

na tondũ no ngwĩka ũguo-rĩ,

kĩĩhaarĩriei gwĩtiiria matua maakwa.”

13 Atĩrĩĩrĩ, Ngai nĩ we wombire irĩma

o na akĩũmba huuho.

Nĩ we ũmenyithagia andũ ũrĩa meciiria maake matariĩ;

o na agatũma mũthenya ũtuĩke ũtukũ.

Athiagĩra kũrĩa gũtũũgĩru gwa thĩ,

narĩo rĩĩtwa rĩake nĩ rĩĩrĩ:

“MWATHANI Ngai Mwene Hinya Wothe.”

Andũ a Isiraeli kwĩrwo merire

1 Inyuĩ andũ a Isiraeli, tathikĩrĩriai ngĩmũinĩra rwĩmbo rũũrũ rwa macakaya:

2 “Mũirĩĩtu thingi ũrĩa wĩtagwo Isiraeli agwĩte thĩ o mu!

Ndangĩhota kwĩyũkĩria o na atĩa!

Akomeete atiganĩirio o kũu bũrũriinĩ wake,

gũtirĩ mũndũ ũramũnyiita guoko amũũkĩrie.”

3 MWATHANI Mwene Hinya Wothe ekuuga atĩrĩ,

“Itũũra rĩmwe thĩinĩ wa Isiraeli

rĩgaathiĩ mbaarainĩ na andũ ngiri,

na no igana rĩmwe makainũka.

Rĩngĩ rĩthiĩ na andũ igana,

na no ikũmi magaacooka.”

4 MWATHANI egũkĩĩra andũ a Isiraeli atĩrĩ,

“Njookereraai na nĩmũgũtũũra muoyo.

5 Tigaai gũthiĩ Beerisheba gũũthaathaiya.

Tigaai kũnjaria kũu Betheli,

tondũ Betheli gũgaatuĩka gwa tũhũ.

Tigaai gũthiĩ Giligali,

andũ aakuo meetereire o gũthaamio.”

6 Cookereraai MWATHANI na nĩmũgũtũũra muoyo,

kwaga ũguo egũtumũkĩra nyũmba ya Josefu o ta mwaki,

mwaki ũcio ũcooke ũcine Betheli,

na gũtirĩ mũndũ ũkũhota kũũhoria.

7 Kaĩ mwĩ thĩĩnainĩ-ĩ! Inyuĩ mwogomagia waragania,

na mũkarangĩrĩria thĩ ihooto cia andũ.

8 MWATHANI nĩ we wombire itutu cia njata,

iria ciĩtagwo Kĩrĩmĩra na Karaũ.

Ningĩ nĩ we ũtũmaga thuutha wa nduma nene kũrooke gũkĩa;

o na thuutha wa mũthenya, gũgatumana gũgatuĩka ũtukũ.

Acookanagĩrĩria maaĩ ma iria rĩrĩa inene,

akamaitũrũra gũũkũ thĩ.

Rĩĩtwa rĩake nĩ MWATHANI.

9 No we ũreehagĩra arĩa marĩ hinya mwanangĩko,

o hamwe na nyũmba ciao iria ciakĩĩtwo na thingo cia hinya.

10 Inyuĩ nĩmũthũire mũndũ o wothe ũcaragia kĩhooto,

na mũkamenereria ũrĩa waragia ũhoro wa ma.

11 Na rĩĩrĩ, tondũ nĩmũhinyagĩrĩria mũthĩĩni, mũkamũtuunya irio ciake,

na mũkeyakĩra nyũmba cia mahiga maicũhie-rĩ,

mũtirĩ hĩndĩ mũgaatũũra thĩinĩ wacio.

Mũhandaga mĩgũnda ya mĩthabibũ,

no mũtirĩ hĩndĩ mũkaanyua ndibei ya yo.

12 Atĩrĩĩrĩ, nĩnjũũĩ ũrĩa meehia maanyu maigana

na ngamenya ngero iria mwanagera.

Mũnyamaaragia andũ arĩa athingu,

mũkaamũkagĩra mahaki,

na mũkahotomia waragania magootiinĩ.

13 Tondũ ũcio gũkira ki mahinda ta maya mooru ũguo,

nĩguo ũndũ ũrĩa mwega.

14 Tuai na ngoro cianyu gwĩkaga maũndũ marĩa meega,

no ti marĩa mooru,

nĩ geetha mũtũũre muoyo.

Mweka ũguo, MWATHANI Ngai Mwene Hinya Wothe

nĩarĩkoragwo hamwe na inyuĩ o ta ũrĩa muugaga.

15 Menaai maũndũ marĩa mooru,

na mwende marĩa meega.

Onaai waragania nĩũrarũmĩrĩrwo magootiinĩ maanyu.

No gũkorwo MWATHANI Ngai Mwene Hinya Wothe nĩekũiguĩra tha

andũ arĩa matigarĩĩte muoyo a nyũmba ya Josefu.

16 Tondũ ũcio MWATHANI Ngai Mwene Hinya Wothe egũkiuga atĩrĩ,

“Nĩgũkaagĩa kĩrĩro njĩrainĩ ciothe;

andũ makaarĩra makiugaga,

‘Ũi-ĩiya wakwa-ĩ! Ũĩ-ĩiya wakwa-ĩ!’

Macooke meete arĩmi mooke macakaya,

na andũ arĩa mooĩ kũina nyĩmbo cia macakaya marĩre.

17 O na mĩgũndainĩ yothe ya mĩthabibũ

no gũgaakorwo na kĩrĩro.

Maũndũ macio moothe mageekĩka

tondũ nĩngaagerera kwanyu ngĩmũherithagia.”

Ũguo nĩguo MWATHANI oiga.

Mũthenya wa MWATHANI

18 Kaĩ inyuĩ arĩa mwetagĩrĩra Mũthenya wa MWATHANI mũrĩ thĩĩnainĩ-ĩ!

Mũthenya ũcio ũkaamũguna nakĩ?

Mũthenya wa MWATHANI ũgaakorwo ũrĩ wa nduma, no ti wa ũtheri.

19 Ũkaahaana o ta mũndũ akĩũrĩra mũrũũthi,

agatũngwo nĩ nduba!

Kana ta mũndũ wainũka gwake,

enyitĩrĩra rũthingo na guoko, akarũmwo nĩ nyoka!

20 Mũthenya wa MWATHANI ũkaareehe o nduma, no ti ũtheri.

Ũgaakorwo ũrĩ mũthenya wa kĩeha, ũtarĩ na ũtheri o na haniini.

21 Atĩrĩĩrĩ, MWATHANI ekuuga atĩrĩ,

Nĩthũire thigũkũ cianyu

na nĩcinjiragia ngoro.

22 O na mwandeehere magongoona maanyu ma njino

o na kana magongoona maanyu ma irio cia mũgũnda, ndimaamũkĩra.

Ndirũmbũiya magongoona ma thaayũ,

marĩa mũrutaga nyamũ iria mũnoreetie.

23 Thengeriai nyĩmbo icio cianyu cia inegene,

ndikwenda kũigua mĩgambo ya inanda cianyu.

24 Handũ ha ũguo-rĩ, rekeei waragania ũtherere o ta maaĩ

naguo ũthingu o ta rũũĩ rũrĩa rũtahũaga.

25 “Andũ aya a Isiraeli, nĩndamũũririe magongoona kana matega mĩaka ĩrĩa mĩrongo ĩna, rĩrĩa ndamũtongoririe werũinĩ?

26 Rĩu-rĩ, tondũ nĩmũthaathaĩtie mĩhianano ya Sakuthu, ngai irĩa mũthamaki wanyu, o na mĩhianano ya Kaiwanu, ngai ya njata, nĩgũkuua mũgaakuua mĩhianano ĩyo mwĩthondekeire,

27 rĩrĩa ngaamũtwara ithaamĩrioinĩ bũrũri ũrĩ na kũu mbere ya Damasiki. Ũguo nĩguo MWATHANI, ũria wĩtagwo ‘Ngai Mwene Hinya Wothe’ oiga.”

Isiraeli kwanangwo

1 Kaĩ mũrĩ thĩĩnainĩ-ĩ! Inyuĩ mũikaraga mwĩgangarĩĩte Zayuni,

o inyuĩ mũiguaga mũiganĩire kũu Samaria,

o inyuĩ andũ arĩa mũrĩ igweta thĩinĩ wa rũũrĩrĩ rũũrũ rũnene rwa Isiraeli,

o inyuĩ andũ mookaga kũrĩ inyuĩ gũcaria ũteithio!

2 Tathiĩi itũũra rĩa Karine mwĩyonere.

Muoima kũu mũthiĩ Hamathu, itũũra rĩrĩa inene,

mũcooke mũikũrũke itũũra rĩa Afilisiti rĩa Gathu.

Atĩrĩĩrĩ, matũũra macio-rĩ, nĩ meega gũkĩra

moothamaki maya ma Juda na Isiraeli?

Ningĩ-rĩ, nĩ maariĩ gũkĩra mabũrũri maya maanyu?

3 Mũtirĩ hingo mwĩciiragia atĩ mũthenya mũũru no ũmũkorerere.

No rĩĩrĩ, maũndũ marĩa mwĩkaga

nĩmagũtũma mũthenya ũcio ũkuhĩrĩrie.

4 Kaĩ mũrĩ thĩĩnainĩ-i!

Inyuĩ mũkomagĩra itanda cia mĩguongo,

mũkarĩaga tũtũrũme tũrĩa tũnoru tuumĩĩte rũũruinĩ

na tũteegwa tũrĩa tuororo twa gũtuĩrwo.

5 Mwĩkenagia na gũtunga nyĩmbo

na mũgeethondekera inanda cia kũina nacio,

o ta ũrĩa Daudi eekaga.

6 Mũnyuaga ndibei na mbakũri

na mũkehakaga maraaci marĩa meega.

No rĩĩrĩ, mũtimakagio nĩkwanangwo kwa nyũmba ya Josefu!

7 Kwoguo nĩ inyuĩ mũgũkorwo mũrĩ a mbere gũthaamio;

na thigũkũ na maruga maanyu nĩmegũkinya mũthia.

8 Niĩ MWATHANI Ngai Mwene Hinya Wothe nĩndehĩta

ngĩgwetaga rĩĩtwa rĩakwa niĩ mwene ndoiga atĩrĩ,

“ Nĩkũnyira nyirĩĩte wĩtĩi wa andũ a Isiraeli,

na ngathũũra nyũmba ciao iria ciirigĩirwo na thingo cia hinya.

Nĩngũneana itũũra rĩao rĩrĩa inene

o na indo iria ciothe irĩ kuo mookoinĩ ma thũ ciao.”

9 Andũ ikũmi mangĩkorwo matigarĩĩte mũciĩ ũmwe,

o nao no megũkua.

10 Na rĩĩrĩ, mũndũ wa nyũmba yao ũrĩa ũngĩthika cĩimba icio,

angĩũka gũciruta nyũmba

oorie mũndũ ũrĩa ũtigarĩĩte ehithĩĩte kuo atĩrĩ,

“Mũrĩ na mũndũ ũngĩ kũu?”

Naake acookie atĩrĩ, “Gũtirĩ ũngĩ.”

Arĩmwĩraga atĩrĩ,

“Kira! Tũtikaagwete rĩĩtwa rĩa MWATHANI.”

11 Tondũ-rĩ, MWATHANI nĩarutĩĩte watho

atĩ nyũmba ĩrĩa nene ĩmomorwo ĩtigwo o ikĩngĩa,

nayo ĩrĩa niini ĩmomorwo ĩtuĩke mũthegethege.

12 Atĩrĩĩrĩ, mbarathi-rĩ, no ĩhanyũke mahiga igũrũ?

Andũ-rĩ, no marĩme iria-inĩ na mũraaũ ũguucĩĩtio nĩ ndeegwa?

No inyuĩ-rĩ, nĩmũtũmĩĩte waragania ũtuĩke ũrogi,

naguo ũthingu ũtuĩke waganu!

13 Inyuĩ mwĩrahaga mũkoiga atĩrĩ,

“Githĩ tũtiĩnyiitĩire itũũra rĩa Lodebari?

Githĩ tũtirĩ na hinya wa kũigana wa gũtaha itũũra rĩa Karinaimu?”

14 No rĩĩrĩ, MWATHANI Mwene Hinya Wothe ekuuga atĩrĩ,

“Inyuĩ andũ a Isiraeli, nĩngũtũma rũũrĩrĩ

na nĩrũkwĩgwatĩra bũrũri wanyu.

Naruo rũkũmũhatĩrĩria kuuma o Itoonyeroinĩ rĩa itũũra rĩa Hamathu mwena wa na rũgongo

nginya karũũĩinĩ ka Araba na mwena wa na kĩanda.”

Kĩoneki kĩa ngigĩ

1 Atĩrĩĩrĩ, MWATHANI Ngai nĩanyonirie kĩoneki. Thĩinĩ wa kĩoneki kĩu ndoonire Ngai akĩũmba ngigĩ gĩtutu, o rĩĩrĩ nyeki ya mũthamaki yarĩĩkia gũtemwo na yambĩrĩria gũkũra rĩngĩ.

2 Kĩonekiinĩ kĩu gĩakwa ngĩkĩona ngigĩ ikĩrĩa kĩndũ o gĩothe kĩruru kĩrĩa kĩarĩ bũrũriinĩ. Ndoona ũguo ngiuga atĩrĩ,

“MWATHANI Ngai, ohera andũ aaku!

Mangĩkĩhonoka atĩa?

Nĩ andũ aniini mũno na matirĩ na hinya o na haniini!”

3 MWATHANI akĩĩricũkwo akiuga atĩrĩ,

“Ũndũ ũcio wona ndũgwĩkĩka.”

Kĩoneki kĩa Mwaki

4 MWATHANI Ngai akĩnyonia kĩoneki kĩngĩ. Thĩinĩ wa kĩoneki kĩu nĩndoonire akĩĩhaarĩria kũherithia andũ na mwaki. Naguo mwaki ũgĩcina iria rĩrĩa iriku na ũkĩambĩrĩria gũcina thĩ.

5 Ngĩũka o ngiuga atĩrĩ,

“MWATHANI Ngai, kirĩrĩria andũ aaku!

Mangĩkĩhota kũhonoka atĩa?

Nĩ andũ aniini na matarĩ na hinya o na haniini!”

6 MWATHANI agĩkĩĩricũkwo akiuga atĩrĩ,

“O naguo ũndũ ũcio wona ndũgwĩkĩka.”

Kĩoneki gĩa kabirũ

7 Ningĩ MWATHANI akĩnyonia kĩoneki o kĩngĩ. Kĩonekiinĩ kĩu ndamuonire arũngiĩ rũthingoinĩ rwakithĩĩtio na kabirũ, naake anyiitĩĩte kabirũ na guoko gwake.

8 Agĩcooka akĩnjũũria atĩrĩ, “Amosi, nĩ kĩĩ ũrona?” Na niĩ ngĩcookia atĩrĩ, “Ndĩrona kabirũ.” Naake akĩnjĩĩra atĩrĩ,

“Ndĩragatũmĩra nĩ geetha nyonanie atĩ andũ aakwa mahaana o ta rũthingo ruogomu

na atĩ ndirĩ hingo ĩngĩ ngericũkwo njage kũmaherithia.

9 Atĩrĩĩrĩ, kũndũ kũrĩa gũtũũgĩru kũrĩa njiarwa cia Isaaka ithaathayagĩria nĩgũgũthario.

Nakuo kũndũ kũrĩa gũtheru gwa Isiraeli gũtigwo kũrĩ maganjo.

Ningĩ nĩngaaniina ũthamaki wa Jeroboamu na rũhiũ rwa njora.”

Amosi na Amazia

10 Hĩndĩ ĩyo Amazia ũrĩa warĩ mũthĩnjĩri Ngai kũu Betheli agĩgĩtũmĩra Jeroboamu mũthamaki wa Isiraeli ribooti akĩmwĩra atĩrĩ, “Amosi-rĩ, nĩaracoocera ũhoro waku thĩinĩ wa andũ a Isiraeli, na mĩario yake nĩkũharagania bũrũri.

11 Tondũ aroiga atĩrĩ,

‘Jeroboamu akooragĩrwo mbaarainĩ,

nao andũ a Isiraeli nĩmagaatahwo marutwo bũrũriinĩ wao mathaamio.’ ”

12 Amazia agĩcooka akĩĩra Amosi atĩrĩ, “Wee mũrathi ũyũ! Nĩũtororeetie! Cooka kwanyu Juda ũkarathĩre moohoro kuo! Reke o nao makũrĩhe nĩ ũndũ wa ũrathi ũcio.

13 Ndũgũcooka kũrathĩra ũhoro rĩngĩ gũũkũ Betheli. Gũũkũ Betheli-rĩ nĩkuo mũthamaki ookaga gũthaathaĩria na nĩkuo Hekaarũ ĩrĩa nene.”

14 Amosi agĩcookeria Amazia atĩrĩ, “Niĩ-rĩ, ndirathaga maũndũ atĩ nĩ geetha heeo mbia. Niĩ ndĩ mũndũ wa kũrĩithia na wa kũbaaragĩrĩra mĩkũyũ.

15 No MWATHANI nĩandigithirie wĩra wa kũrĩithia, akĩnjatha njũke ndathĩre andũ aake a Isiraeli moohoro.

16 Kwoguo rĩu tathikĩrĩria ũrĩa MWATHANI ekuuga:

‘Wee ũranjĩĩra atĩ ndigaacooke kũratha ũhoro mũũru

na ndigaacooke kwaria ũũru igũrũ rĩa Isiraeli.’

17 No rĩĩrĩ, MWATHANI egũkwĩra atĩrĩ wee Amazia,

‘Mũtumia waku agũtuĩka mũmaraaya wa na kũu njĩrainĩ,

nacio ciana ciaku ikooragĩrwo mbaarainĩ.

Mũgũnda waku nĩũkaagayanio ũheeo andũ angĩ;

wee ũgaakuĩra bũrũriinĩ mũgeni.

Ningĩ gũtirĩ hingo andũ a Isiraeli matakaarutwo bũrũriinĩ wao na mathaamio.’ ”

Kĩoneki kĩa gĩkabũ kĩa matunda

1 Ningĩ MWATHANI Ngai akĩnyonia kĩoneki o kĩngĩ.

Thĩinĩ wa kĩoneki kĩu ngĩona gĩkabũ kĩiyũire matunda.

2 MWATHANI akĩnjũũria atĩrĩ,

“Amosi, nĩ kĩĩ ũrona?”

Na niĩ ngĩcookia atĩrĩ,

“Ndĩrona gĩkabũ kĩa matunda ma ndomoko.”

Naake MWATHANI akĩnjĩĩra atĩrĩ,

“Nĩngũtomithia andũ aakwa a Isiraeli.

Na rĩu ndikwĩricũkwo atĩ nĩguo njage kũmaherithia.

3 Mũthenya ũcio nyĩmbo iria ikainagwo Hekaarũinĩ

igaatuĩka o macakaya.

Ciimba nyingĩ igaakorwo ciaraganĩĩte kũndũ guothe.

Igaateagwo gũkirĩĩtwo.”

Ũguo nĩguo MWATHANI oiga.

4 Inyuĩ mũrangagĩrĩria athĩĩni,

na mũkaananga arĩa matarĩ hinya bũrũriinĩ,

iguai ũhoro ũyũ.

5 Mwĩĩraga na ngoro atĩrĩ,

“Mĩthenya ya thigũkũ ĩrĩthira rĩ,

nĩ geetha tũkeendie irio ciitũ?

Thabatũ ĩrĩthira-rĩ,

nĩguo twambĩrĩrie gũthogorana,

tũcooke tuongerere thogora wa indo,

tũhũthĩre ithimi cia maheeni, na tũthũũkie

maratiri nĩ geetha tũheenie agũri.

6 Na twendie mathuuro ma ngano goro

nĩ geetha tũgũre mũndũ ũrĩa mũkĩa,

naake mũthĩĩni tũmũgũre na thogora wa nyamũga igĩrĩ.”

7 Atĩrĩĩrĩ, MWATHANI, o we Ngai wa Isiraeli, nĩehĩtĩĩte akoiga atĩrĩ,

“Nĩ ma ndikaariganĩrwo nĩ ciĩko ciao njũru o na rĩ.

8 Nĩ ũndũ ũcio thĩ nĩgaathingitha

na andũ oothe arĩa matũũraga kuo manyiitwo nĩ ihooru.

Bũrũri wothe nĩũkainainio

na ũkahaana o ta rũũĩ rwa Misiri rwa Nailo

rũkĩiyũra na rũkĩhũa.

9 Mũthenya nĩũrooka

na nĩndĩtũma riũa rĩthũe mũthenya barigici

na bũrũri ũgĩe nduma kũrĩ o mũthenya.

Nĩ niĩ MWATHANI Mwene Hinya Wothe ndoiga ũguo.

10 Mĩthenya yanyu ya thigũkũ ngũmĩgarũrania

ĩtuĩke mĩthenya ya macakaya.

Nyĩmbo cianyu cia gĩkeno ndĩitue cia kĩeha.

Nĩngaatũma mwenjwo mĩtwe yanyu kĩrĩĩa

na mwĩhumbe nguo cia makũnia njohero cianyu.

Inyuĩ na inyuĩ mũtuĩke ta aciari

maracakaĩra mwana wao wa mũũmwe.

Mũthenya ũcio ũgaakorwo ũrĩ mũrũrũ o nginya mũthia waguo.”

11 MWATHANI Mwene Hinya Wothe ekuuga atĩrĩ,

“Mahinda nĩmarooka na nĩngaatũma ng’aragu bũrũriinĩ,

no ti ng’aragu ya irio kana ya nyoota wa maaĩ.

Ĩgaakorwo ĩrĩ ya kũhũũtĩra na kũnyootera ũhoro wa MWATHANI.

12 Hĩndĩ ĩyo andũ magaacangacanga

moimĩĩte iria rĩa Cumbĩ o nginya iria rĩa Mediteraneani,

o na ningĩ macooke moime mwena wa na rũgongo mathiĩ mwena wa irathĩro

makĩenda kũigua ũhoro wa MWATHANI,

no matikaũigua.

13 Mũthenya ũcio-rĩ, aanake arĩa marĩ hinya na airĩĩtu arĩa nyoko

nĩmakaaringĩka nĩkũnyoota.

14 Ningĩ-rĩ, andũ arĩa mehĩtaga na mĩhianano ya Samaria

makiugaga, ‘Ndehĩta na ngai ya Dani’

kana ‘Ndehĩta na ngai ya Beerisheba,’ makaagũa na matigookĩra rĩngĩ. ”

Matua ma MWATHANI

1 Ningĩ nĩndoonire Mwathani arũngiĩ hakuhĩ na kĩgongoona, naake akiuga atĩrĩ,

“Ringa ciongo cia itugĩ cia Hekaarũ na hinya

ũinainie Hekaarũ yothe

na ũreke ĩmomooke ĩgũĩre andũ arĩa marĩ kuo.

Arĩa megũtigara-rĩ, ngaamaniinĩra mbaarainĩ

na gũtirĩ mũndũ ũgeethara kana ahonoke.

2 O na mangĩkeyenjera thĩ makinye bũrũri wa arĩa akuũ,

guoko gwakwa gũkaamaruta o kuo.

Ningĩ o na mangĩgaathiĩ mahaice na kũu igũrũ rĩa matu,

ngaamaharũrũkia ndĩmarute kuo.

3 Ningĩ mangĩkeehitha kĩrĩma gĩa Karimeli igũrũ,

ngaamacaria nginya ndĩmarute kuo.

Mangĩkeehitha na kũu rungu rwa iria atĩ nĩ geetha ndikamoone

ngaatũma ndamaathia ĩmarũmĩre o kũu iriainĩ.

4 Mangĩgaatahwo nĩ thũ mathiio nao,

nĩngaathana mooragwo.

Ndĩmaracũũrĩirie maitho

ndĩmathĩĩnie no ti ndĩmateithie.”

5 MWATHANI Mwene Hinya Wothe ahuutagia thĩ, nayo ĩkainaina;

andũ arĩa marĩ kuo makanyiitwo nĩ kĩeha;

thĩ yothe nayo ĩkaiyũra na ĩkahũa o ta rũũĩ rwa Nailo

6 Ũrĩa wakaga mũciĩ kũu matuinĩ

ageekĩra mũtambũrũko wa matu igũrũ rĩa thĩ,

ageeta maaĩ ma iria rĩrĩa inene akamoiria gũũkũ thĩ,

ũcio-rĩ rĩĩtwa rĩake nĩ MWATHANI!

7 Inyuĩ andũ a Isiraeli, MWATHANI aroiga atĩrĩ,

“Githĩ andũ a Ethiopia matitariĩ o ta inyuĩ mbere yakwa?

Githĩ to niĩ ndarutire Afilisiti bũrũri wa Kirete?

Na githĩ to niĩ ndarutire andũ a Siria bũrũri wa Kiri,

o ta ũrĩa ndamũrutire bũrũri wa Misiri?

8 Niĩ MWATHANI Ngai, nĩndoreetie maitho maakwa

igũrũ rĩa ũthamaki ũyũ mũremi wa Isiraeli,

na nĩngũũharagania ũthenge gũũkũ thĩ.

No rĩĩrĩ, ndikũniina mbeũ yothe ya Jakubu.

Ũguo nĩguo MWATHANI oiga.

9 “Nĩngũruta watho na thũngũthie rũũrĩrĩ ruothe rwa Isiraeli,

o ta ũrĩa mũndũ athũngũthagia ngano gĩcungiinĩ,

gũtirĩ thanda o na ĩmwe ĩkũgũa thĩ.

10 No rĩĩrĩ, andũ arĩa meehagia thĩinĩ wa Isiraeli,

o acio meciiragia atĩ ũgwati ndũngĩmakuhĩhĩria o na kana ũmakorerere,

oothe makooragĩrwo mbaarainĩ.”

Ũthamaki wa Isiraeli kũhandwo rĩngĩ

11 MWATHANI ekuuga atĩrĩ,

“Mũthenya nĩũrooka na nĩngaahanda rĩngĩ

ũthamaki wa Daudi ũrĩa ũhaana ta nyũmba ĩharaganĩĩte.

Nĩngaathondeka thingo ciaguo rĩngĩ

na ndĩũrũũgamie.

Ngaawaka ũhaane o ta ũrĩa watariĩ tene.

12 Nĩ ũndũ ũcio, andũ a Isiraeli nĩmakeegwatĩra

bũrũri ũrĩa ũtigarĩĩte wa Edomu

o na mabũrũri moothe marĩa maarĩ maakwa.”

Ũguo nĩguo MWATHANI oiga

na nĩ we ũgaatũma maũndũ macio meekĩke.

13 MWATHANI ekuuga atĩrĩ,

“Mahinda nĩmarooka

ngano ĩkũrage na ihenya gũkĩra ũrĩa ĩngĩgetheka,

thabibũ ĩkũrage na ihenya gũkĩra ũrĩa ndibei ĩngĩhihĩka,

irĩma ciuragie ndibei ĩrĩ mũrĩo,

nayo ndibei ĩyo ĩthererage tũrĩmainĩ.

14 Nĩngaacookia andũ aakwa bũrũriinĩ wao,

nao maake rĩngĩ matũũra maao marĩa maarĩ maganjo matũũrage kuo.

Makaahandaga mĩthabibũ na manyuage ndibei ya yo,

makaahandaga mĩgũnda yao na marĩage kĩrĩa makũrĩĩtie.

15 Ningĩ nĩngaahanda andũ aakwa bũrũriinĩ ũrĩa ndamaheire

na matikaarindũrwo kuo rĩngĩ.”

Nĩ niĩ MWATHANI Ngai wanyu ndoiga ũguo.