Gikuyu Common Language with DC (GIKDC)

Kũhaarĩria rũgendo

1 Naake Tobia akĩmũcookeria atĩrĩ, “Baaba, nĩngwĩka ũrĩa wothe wanjatha,

2 no rĩĩrĩ, ngũhota atĩa gwĩtia mbeeca icio o rĩrĩa niĩ itooĩ mũndũ ũcio? Ngũhota atĩa kũmuonia niĩ nĩ niĩ ũ nĩ geetha anjĩtĩkie na anengere mbeeca icio? O na harĩ o ũguo-rĩ, ndiũĩ ũrĩa ingĩhota gũthiĩ Media.”

3 Tobiti akĩmũcookeria atĩrĩ, “Nĩtwandĩkanĩire marũa na Gabaeli, ngĩcooka ngĩmatinania maita meerĩ, o mũndũ agĩthiĩ na gĩcunjĩ kĩamo. Gĩcunjĩ gĩake ndagĩikirie hamwe na mbeeca icio mĩaka mĩrongo ĩĩrĩ mĩthiru. Rĩu gĩthiĩ ũgacarie mũndũ mwĩhokeku wa gũthiĩ na gũcooka nawe, na nĩtũkaamũrĩha wona mwacooka. No rĩĩrĩ, no mũhaka ũgĩĩre mbeeca icio ndatigĩire Gabaeli.”

Tobia gũcemania na Rafaili

4 Tobia agĩkiumagara agĩthiĩ gũcaria mũndũ woĩ njĩra ya gũthiĩ Media ũngĩatwaranire naake, agĩkĩona Rafaili. No Tobia ndamenyire atĩ Rafaili aarĩ mũraika wa Ngai,

5 agĩkĩmũũria kũrĩa oimĩĩte.

Naake Rafaili agĩcookia atĩrĩ, “Ndĩ Mũisiraeli, ũmwe wa andũ a nyũmba yanyu, na njũkĩĩte gũũkũ Nineve gũcaria wĩra.”

Tobia akĩmũũria atĩrĩ, “Nĩũũĩ njĩra ya gũthiĩ Media?”

6 Rafaili akĩmũcookeria atĩrĩ, “Ĩĩ, nĩndĩmĩũĩ. Ndanathiĩ kuo maita maingĩ, na nĩnjũũĩ barabara ciothe wega. Nĩndaikaraga na mũndũ wa nyũmba iitũ ti Gabaeli ũrĩa ũikaraga kũu itũũrainĩ rĩa Ragesi. Nĩ rũgendo rwa mĩthenya ĩĩrĩ gũthiĩ kuo kuuma Ekibatana, itũũra rĩrĩa inene, amu itũũra rĩa Ragesi rĩrĩ irĩmainĩ.”

7 Tobia agĩkĩĩra Rafaili atĩrĩ, “Njeterera haaha nyambe thiĩ ngaahe baaba ũhoro. Nĩngwenda ũtwarane na niĩ, na nĩngũkũrĩha nĩ ũndũ wa rũgendo rũu.”

8 Naake Rafaili akĩmwĩra atĩrĩ, “Gĩthiĩ, na ndũkaae gũikara.”

9 Kwoguo Tobia agĩthiĩ akĩĩra ithe atĩrĩ, “Nĩndoona mũndũ wa gũtwarana na niĩ.”

Tobiti akĩmũcookeria atĩrĩ, “Mwĩte nĩ geetha menye nĩ wa mũhĩrĩga ũrĩkũ, na kana nĩ mũndũ mwĩhokeku wa gũtwarana nawe.”

Tobiti gũcemania na Rafaili

Kwoguo Tobia agĩkiuma nja agĩĩta Rafaili akĩmwĩra atĩrĩ, “Baaba nĩekwenda gũcemania nawe.” Na rĩrĩa Rafaili aingĩrire, Tobiti akĩmũgeithia.

Naake Rafaili agĩcookia ngeithi akiuga atĩrĩ, “Ngwĩciiria maũndũ moothe nĩ meega na we.”

No Tobiti agĩcookia atĩrĩ, “Maũndũ moothe mangĩgĩkorwo marĩ meega na niĩ atĩa? Ndĩ mũtumuumu na ndirĩ kĩndũ ingĩhota kuona. Ũguo ndariĩ nĩ ũndũ ũmwe na gũkorwo mũndũ akuĩte na atekũhota kuona ũtheri rĩngĩ. Nĩ kaba gũkorwo ndĩ mũkuũ! Nĩngũigua andũ makĩaria no ndingĩhota kũmoona.”

Naake Rafaili akĩmwĩra atĩrĩ, “Canjamũka! Ngai nĩegũkũhonia o ro na ihenya, kwoguo tiga kũmaka!”

Tobiti akĩmwĩra atĩrĩ, “Mwana wakwa Tobia nĩarenda gũthiĩ Media. Wahota gũtwarana naake ũmwonererie njĩra? Hatirĩ nganja nĩngũkũrĩha.”

Rafaili agĩcookia atĩrĩ, “Hatirĩ nganja no thiĩ naake. Ndaanathiĩ kuo maita maingĩ na nĩnjũũĩ barabara ciothe irĩmainĩ o na kũrĩa kwaraganu.”

10 Tobiti akĩmũũrangia makĩria atĩrĩ, “Tanjĩĩra atĩrĩ mũrũ wa maitũ, ũrĩ wa mũhĩrĩga ũrĩkũ na nyũmba ĩrĩkũ?”

11 No Rafaili akĩmũcookeria atĩrĩ, “Ũracaria mũhĩrĩga na nyũmba kana ũracaria mũndũ ũkũrĩha atwarane na mũũrũguo?”

Naake Tobiti akĩmwĩra atĩrĩ, “Mũrũ wa maitũ, no nyende kũmenya andũ aanyu na rĩĩtwa rĩaku.”

12 Rafaili agĩcookia atĩrĩ, “Niĩ njĩtagwo Azaria na ndĩ mũrũ wa Anania ũrĩa mũkũrũ, ũrĩa arĩ ũmwe wa andũ aanyu.”

13 Tobiti akĩmũcookeria atĩrĩ, “Nĩtwakũnyiita ũgeni mũciĩ gwitũ! Na Ngai akũraathime mũũriũ wakwa. Ndũkaae kũndaakarĩra nĩ ũndũ wa kũgeria kũmenya mũhĩrĩga wanyu na nyũmba yanyu. Nĩndamenya ũrĩ ũmwe wa andũ aitũ na uumĩĩte mũciĩ mwega na wĩ bata. Amu aariũ eerĩ a Shamaia ũrĩa mũkũrũ nĩ o Anania na Nathani nĩndamooĩ. Maakoragwo hĩndĩ ciothe marĩ ehokeku harĩ ndini yao, o na nĩtwathiaga hamwe Jerusalemu gũthaathaiya kuo. Andũ aanyu nĩ andũ eega, na uumĩĩte rũrĩrainĩ rwega. Gĩa na rũgendo rwega.”

14 Tobiti agĩthiĩ na mbere akĩmwĩra atĩrĩ, “Nĩngũkũrĩha mũcaara ũrĩa wagĩrĩire o mũthenya na nyongerere mahũthĩro maanyu inyuerĩ.

15 Tuĩka mũthiritũ mwega kũrĩ Tobia, na nĩngaakuongerera mbaciici harĩ mũcaara waku.”

16 Naake Rafaili akĩmwĩra atĩrĩ, “Nĩ ngũtwarana naake, na ndũkaae gwĩtigĩra; nĩ tũgũthiĩ nginya kuo na tũcooke thaayũ, amu barabara itirĩ na mũtino.”

Tobiti akĩmũcookeria atĩrĩ, “Ngai aroikara hamwe nawe!” Agĩcooka agĩĩta Tobia akĩmwĩra atĩrĩ, “Mũũriũ wakwa, oya indo ciothe iria ũkũbatara nĩ ũndũ wa rũgendo nĩ geetha inyuerĩ mwambĩrĩrie rũgendo. Ngai o ro hamwe na mũraika wake maromũgitĩra inyuerĩ na mamũcookie kũrĩ niĩ mũrĩ eega na mũrĩ agima.”

Mbere ya kuumagara gũthiĩ Media, Tobia akĩmumunya ithe na nyina akĩmaugĩra ũhoro. Naake Tobiti akĩmwĩra rĩngĩ atĩrĩ, “Gĩa na rũgendo rwa thaayũ!”

17 No nyina, Anaakĩambĩrĩria kũrĩra, akĩĩra Tobiti atĩrĩ, “Nĩkĩ gĩgũtũma ũtũme mwana witũ ũũ? Githĩ ti we wiki ũteithio witũ? Rĩu nũũ ũrĩtũmenyagĩrĩra?

18 Kaĩ mbeeca irĩ na bata kũrĩ we atĩa atĩ nĩũkwenda gũikia mwana witũ ũgwatiinĩ nĩguo ũcigĩĩre?

19 Kaĩ tũtangĩiganĩra nĩgũikara na kĩrĩa Mwathani atũheete?”

20 Naake Tobiti akĩmwĩra atĩrĩ, “Hoorera, mwana witũ nĩegũthiĩ kũu na acooke arĩ mwega na e mũgima na nĩũkaamuona na maitho maaku.

21 Tiga gũtangĩka, mwendwa wakwa, amu mũraika mwega nĩegũtwarana hamwe naake; rũgendo rwake nĩrũgũkorwo na ũhootani, na nĩagacooka arĩ mwega na e mũgima.” Kwoguo Ana akĩhoorera na agĩtiga kũrĩra.

Tobia kũnyiita thamaki

1 Kwoguo Tobia na mũraika ũcio makĩnyiita rũgendo maroreete Media, nao magĩthiĩ hamwe na ngui ya Tobia. Magĩthiĩ o nginya riũa rĩgĩthũa, makĩamba hema hakuhĩ na rũũĩ rwa Tigiri.

2 Na rĩĩrĩ, Tobia aathiĩte gwĩthamba magũrũ rũũĩinĩ hĩndĩ ĩrĩa thamaki nene yarũũgire ikiuma maaĩinĩ o rĩmwe, ĩkĩgeria kũmeria kũgũrũ gwake, naake Tobia agĩkayũrũrũka.

3 Naake mũraika ũcio akĩmwĩra atĩrĩ, “Nyiita thamaki ĩyo! Ndũkaareke yũre!”

Tobia agĩkĩmĩnyiita, akĩmĩguucia kinya hũgũrũrũinĩ.

4 Ningĩ mũraika akĩmwĩra atĩrĩ, “Mĩatũranie ũrute ngoro, ini, na nyongo ũciige wega. Nyama icio ingĩ cia nda cite. Nyongo, ngoro na ini no ihũthĩrwo ta ndaawa.”

5 Tobia agĩĩka o ũrĩa mũraika aamwĩrire. Agĩcooka akĩruga thamaki ĩyo akĩrĩa gĩcunjĩ na kĩrĩa kĩngĩ agĩgĩĩkĩra cumbĩ agĩgĩkuua.

Ningĩ eerĩ magĩthiĩ na mbere na rũgendo o nginya magĩkuhĩrĩria Media.

6 Tobia akĩũria mũraika ũcio atĩrĩ, “Azaria, mũrũ wa maitũ, ini, ngoro, na nyongo cia thamaki ĩyo-rĩ, ingĩhonia mũrimũ ũrĩkũ?”

7 Naake mũraika ũcio akĩmũcookeria atĩrĩ, “Ha ũhoro wa ngoro na ini rĩu-rĩ, mũndũ o na ũrĩkũ angĩthĩĩnio nĩ ngoma, atoogererio ndoogo ya indo icio, mũndũ mũrũme ũcio kana mũtumia ũcio ndagaathĩĩnio rĩngĩ.

8 Naho ha ũhoro wa nyongo-rĩ, ũngĩmĩhaka mũndũ wĩ na njereeri maitho no ahone.”

Marĩ njĩrainĩ gũthiĩ Ekibatana

9 Rĩrĩa maakinyire Media na maakuhĩrĩria itũũra rĩa Ekibatana,

10 Rafaili akiuga atĩrĩ, “Mũraata wakwa Tobia,” naake Tobia agĩcookia atĩrĩ, “Ũũĩ!” Rafaili akĩmwĩra atĩrĩ, “Hwaĩinĩ ũyũ tũgũikara kwa mũndũ wa nyũmba yanyu wĩtagwo Ragueli. Arĩ mwana ũmwe tu wa mũirĩĩtu wĩtagwo Sara,

11 na tondũ wee nĩ we mũkuhanĩrĩirie mũno, nĩ we wagĩrĩirwo nĩkũmũhikia. O na ningĩ nĩ we wagĩrĩirwo nĩkũgaya indo cia ithe ciothe.

12 Mũirĩĩtu ũcio nĩ mũũgĩ na nĩ mũũmĩrĩru, o na nĩ mũthaka; ningĩ ithe nĩ mũndũ mwega. Hwaĩinĩ nĩngwaria na ithe ũhoro wa njũũrio, na nĩegwĩtĩkĩra gũkũnengera mũirĩĩtu ũcio atuĩke mũtumia waku. Na rĩĩrĩ, wona twainũka kuuma itũũra rĩa Ragesi, nĩtũgaakũngũĩra ũhiki. Amu nĩnjũũĩ atĩ kũringana na Watho wa Musa, Ragueli ndangĩneana mũirĩĩtu ũcio kũrĩ mũndũ mũrũme ũngĩ. Angĩĩka ũguo nĩekwĩreehithĩria iherithia rĩa gĩkuũ, nĩ gũkorwo wee nĩ we wagĩrĩirwo nĩkũmũgaya no ti mũndũ ũngĩ o wothe. Tũkiuma Ragesi nĩtũkaamuoya tũinũke naake.”

13 Naake Tobia akĩĩra Rafaili atĩrĩ, “Mũrũ wa maitũ Azaria, nĩndĩkĩĩtie kũigua ũhoro wa athuuri mũgwanja arĩa Sara akoreetwo nao, na ũrĩa o mũthuuri aakuire hwaĩinĩ wa ũhiki o na atahaicĩĩte ũrĩrĩ.

14 Rĩu-rĩ, niĩ ndĩ mwana wa mũũmwe wa baaba, na nĩndĩretigĩra atĩ hiihi ingĩthiĩ kũrĩ we, nĩngũkua o ta ũrĩa acio maarĩ mbere yakwa meekire, amu kũrĩ na ngoma yendeete mũirĩĩtu ũcio, na ndĩĩkaga mũndũ ũngĩ ũũru tiga o ũrĩa wamũthengerera. Kwoguo nĩngwĩtigĩra atĩ ndahota gũkua, ndũme baaba na maitũ makue nĩ kĩeha nĩ ũndũ wakwa. Matirĩ na mwana ũngĩ wa kũmathika.”

15 No mũraika ũcio akĩmũcookeria atĩrĩ, “Kaĩ ũriganĩirwo nĩ mataaro ma thooguo? Aakwĩrire ũhikie mũtumia kuuma rũũrĩrĩ rwanyu. Kwoguo gĩthikĩrĩrie wega ũrĩa ngũkwĩra. Tiga gwĩtigĩra ngoma ĩyo; mũhikie! Amu nĩnjũũĩ atĩ hwaĩinĩ Ragueli nĩegwĩtĩkĩria Sara akũhikĩre.

16 Wona waingĩra nyũmba ya toro, woe ngoro ya thamaki ĩrĩa na ini ũciĩkĩre ũbaaniinĩ ũrakana,

17 nĩ geetha mũtararĩko wacio ũiyũre nyũmba ĩyo yothe. Rĩrĩa ngoma ĩyo ĩrĩigua mũnungo ũcio, nĩrĩthiĩ na ndĩgaacooka gũkuhĩrĩria Sara rĩngĩ. No mbere ya gũkoma naake, no mũhaka inyuerĩ mũũkĩre mũhooe Mwathani amũiguĩre tha na amũgitĩre. Tiga gwĩtigĩra, amu Sara aamũrĩirwo wee kuuma o tene. Nĩũkũmũhonokia kuuma harĩ ngoma ĩyo, na nĩegũthiĩ nawe nginya mũciĩ kwanyu. Ningĩ mũrĩ na Sara nĩmũkũgĩa na ciana nyingĩ na nĩmũgaacienda mũno. Kwoguo, tiga kũmaka.”

Tobia agĩgĩthikĩrĩria wega mũno ũrĩa Rafaili oigaga. Nĩamenyaga atĩ aarĩ wa nyũmba yao mwenainĩ wa ithe. Agĩkĩambĩrĩria kwenda Sara na akĩĩrirĩria mũno kũmũhikia.

Marĩ mũciĩ kwa Ragueli

1 Rĩrĩa Tobia na mũraika Rafaili maatoonyire itũũrainĩ rĩa Ekibatana, Tobia nĩerire Rafaili atĩrĩ, “Mũraata wakwa Azaria, ndwara na ihenya o ũrĩa ũngĩhota ngoone Ragueli.” Naake mũraika akĩmũtwara mũciĩ kwa Ragueli kũrĩa maamũkorire aikaire thoomeinĩ wa nja ya gwake. Rafaili na Tobia makĩmũgeithia; naake akĩmacookeria atĩrĩ, “Ingĩraai araata aakwa, nĩmwanyiitwo ũgeni gũũkũ gwakwa mũciĩ.”

Ragueli agĩkĩmatoonyia nyũmba gwake

2 akĩĩra Edina mũtumia wake atĩrĩ, “Na githĩ mwanake ũyũ mwĩthĩ ndahaanaine na mũihwa wakwa Tobiti?”

3 Naake Edina akĩmooria atĩrĩ, “Muumĩĩte kũ?” Nao magĩcookia atĩrĩ, “Ithuĩ tũrĩ Aisiraeli a mũhĩrĩga wa Nafutali, no rĩu tũtũũraga ithaamĩrio itũũrainĩ rĩa Nineve thĩinĩ wa Asiria.”

4 Kwoguo Edina akĩmooria atĩrĩ, “Nĩmũũĩ Tobiti ũcio mũihwa witũ?”

Nao magĩcookia atĩrĩ, “Ĩĩ, nĩtũmũũĩ.”

Edina akĩmooria atĩrĩ, “Atariĩ atĩa?”

5 Nao magĩcookia atĩrĩ, “Arĩ o muoyo na nĩ mwega.” Ningĩ Tobia akĩongerera atĩrĩ, “Tobiti nĩ we baaba.”

6 Tobia oiga ũguo Ragueli agĩũkĩra na ihenya akĩmumunya Tobia na agĩita maithori.

7 Agĩcooka akiuga atĩrĩ, “Ngai arokũraathima mwana wakwa. Thooguo nĩ mũndũ mwega na wa bata. Kaĩ nĩ ũhoro wa kĩeha mũndũ mũũgĩ na mwega ũguo atuĩkĩĩte gĩtumuumu-ĩ!” Agĩcooka akĩmũmumunya na agĩita maithori.

8 O naake mũtumia wake Edina na mwarĩ Sara magĩita maithori nĩ ũndũ wa Tobiti.

Ragueli nĩanyiitire Tobia na Rafaili ũgeni wega na akĩmathĩnjĩra ndũrũme ĩmwe yake. Thuutha wa ageni gwĩthamba na mbere ya gũikara thĩ marĩe-rĩ, Tobia akĩĩra Rafaili atĩrĩ, “Mũraata wakwa Azaria, nĩrĩ ũrĩũria Ragueli anjĩtĩkĩrie hikie mwarĩ Sara?”

9 No Ragueli akĩigua kĩũria kĩu, akĩĩra Tobia atĩrĩ,

10 “Amba ũrĩe na ũnyue na ũigue ũkeneete hwaĩinĩ ũyũ. Amu nĩwagĩrĩirwo nĩkũhikia Sara, na ndingĩĩtĩkĩria mũndũ ũngĩ amũhikie, nĩ gũkorwo wee nĩ we tũkuhanĩrĩirie mũno. No rĩĩrĩ, no mũhaka ngwĩre ũũma, mwana wakwa.

11 Mwarĩ wakwa, nĩndĩkĩĩtie kũmũheana kũrĩ arũme mũgwanja a mũhĩrĩga witũ, na rĩĩrĩ o ũmwe wao amũthengerera, akuaga o ũtukũ wa mbere. No rĩu mwana wakwa, rĩa na ũnyue.”

Naake Tobia agĩcookia atĩrĩ, “Ndingĩrĩa kana nyue kĩndũ gũũkũ nginya tũrĩe kĩrĩĩko nawe.”

12 Kwoguo Ragueli akiuga atĩrĩ, “Muoe o rĩu kũringana na Watho wa Musa. Ũrĩ wa nyũmba yao, nĩatuĩke waku. Ngai mwene tha aromũmenyerera wega inyuerĩ ũtukũ ũyũ.”

Mambura ma ũhiki

13 Ragueli agĩcooka agĩĩta mwarĩ. Rĩrĩa aingĩrire, akĩmũnyiita guoko akĩmũnengera Tobia, akĩmũraathima akiuga atĩrĩ, “Muoe atuĩke mũtumia waku kũringana na ũrutani ũrĩa wĩ thĩinĩ wa Watho wa Musa. Mũkuue na thaayũ mũthiĩ naake nginya gwa thooguo. Ngai wa matuinĩ aromũhe ũtũũro mwega mũrĩ hamwe.”

14 Ragueli agĩcooka akĩũria mũtumia wake amũreehere kabuku gatarĩ kaandĩke nĩ geetha aandĩke kĩrĩĩkanĩro kĩa ũhiki. Naake Edina akĩreehe kabuku kau, naake Ragueli akĩandĩka kĩrĩĩkanĩro atĩ Sara nĩaneanwo kũrĩ Tobia kũringana na ũrutani ũrĩa ũrĩ Wathoinĩ wa Musa.

15 Thuutha wa mambura macio, magĩkĩambĩrĩria kũrĩa.

16 Ningĩ Ragueli agĩĩta mũtumia wake akĩmwĩra atĩrĩ, “Mwendwa wakwa, haarĩria nyũmba ĩrĩa ĩtahũthagĩrwo, ũtware Sara kuo.”

17 Edina agĩgĩĩka o ta ũrĩa eerirwo, agĩgĩtwara Sara nyũmbainĩ ĩyo, naake Sara akĩambĩrĩria kũrĩra. No Edina akĩmũgiria maithori akiuga atĩrĩ,

18 “Wĩyũmĩrĩrie mwana wakwa; Mwathani wa igũrũ na thĩ arokũhe gĩkeno handũ ha kĩeha gĩĩkĩ gĩaku. Wĩyũmĩrĩrie mwarĩ wakwa.” Agĩcooka akiuma.

Ngoma kũingatwo

1 Rĩrĩa maarĩĩkirie kũrĩa, mathaa ma toro maakinya, aciari a Sara makiumagaria Tobia makĩmũtwara kũrĩa Sara aarĩ.

2 Na rĩrĩa aathiaga akĩririkana ciugo cia Rafaili, kwa ũguo akĩoya ini rĩrĩa rĩa thamaki na ngoro ya yo kuuma mondoinĩ ĩrĩa aaciĩkĩrĩĩte. Agĩcooka agĩciĩkĩra ũbaaniinĩ wakanaga.

3 Na rĩrĩa ngoma ĩyo yaiguire mũrukĩ ũcio, ĩkĩũrĩra bũrũri wa Misiri. Naake Rafaili akĩmĩteng’eria, akĩmĩnyiitĩra kuo, na o rĩmwe akĩmĩoha mooko na magũrũ.

Ihooya rĩa Tobia

4 Aciari maahinga mũrango, Tobia na Sara magĩtigwo marĩ oiki. Tobia agĩũkĩra akiuma ũrĩrĩ akĩĩra mũtumia wake atĩrĩ, “Ũkĩra mwendwa wakwa. Reke tũhooe nĩguo Mwathani atũiguĩre tha na atũgitĩre.”

5 Naake Tobia akĩambĩrĩria kũhooya atĩrĩ:

“Ngai wa maithe maitũ, wee nĩwagĩrĩirwo nĩkũgoocwo.

Rĩĩtwa rĩaku rĩrokumagio nginya tene na tene

nĩ ciũmbe ciaku ciothe thĩinĩ wa igũrũ na thĩ.

6 Wee nĩwombire Adamu na ũkĩmũhe mũtumia wake Hawa

atuĩke mũmũteithia na mũmũtiirĩrĩri.

Nao magĩtuĩka aciari a andũ oothe.

Ũkiuga atĩrĩ, ‘Ti wega mũndũ mũrũme gũikara arĩ wiki.

Nĩngũmũthondekera mũmũteithia mwagĩrĩru’

7 Mwathani niĩ thuurĩĩte Sara nĩ ũndũ nĩkwagĩrĩire,

no ti ũndũ wa ũmaraaya.

Twagũthaitha ũtũiguĩre tha na ũtũhotithie tũgaakũra tũrĩ hamwe.”

8 Nao eerĩ makiuga “Ameni.”

9 Nao magĩthiĩ ũrĩrĩ magĩkoma ũtukũ ũcio.

Aciari gũtangĩka

Thuuthainĩ ũtukũ o ro ũcio Ragueli agĩĩta ndungata ciake na marĩ hamwe magĩthiĩ makĩenja mbĩĩrĩra,

10 amu Ragueli eeciiragia atĩ Tobia o naake nĩegũkua, na andũ macooke mamathekerere na mamanyarare.

11 Marĩĩkia kwenja mbĩĩrĩra, Ragueli agĩcooka nyũmba, akĩĩra mũtumia wake atĩrĩ,

12 “Tũma ndungata ĩmwe ya mũirĩĩtu ĩthiĩ ĩkarore kana Tobia arĩ o muoyo, nĩ geetha angĩkorwo ndarĩ muoyo tũmũthike mbere ya mũndũ o wothe kũmenya.”

13 Kwoguo magĩgĩtũma ndungata ya mũirĩĩtu, naake akĩgwatia taawa agĩthiĩ akĩhingũra mũrango akĩingĩra, akĩmakora eerĩ marĩ toro.

14 Agĩcooka akĩĩra Ragueli na Edina atĩ Tobia aarĩ muoyo na ndaarĩ ũndũ ooneete.

15 Naake Ragueli akĩgooca Ngai wa igũrũ akiuga atĩrĩ:

Ihooya rĩa Ragueli

“Nĩtwagĩrĩirwo nĩgũkũgooca wee Ngai.

Andũ aaku marokũgooca nginya tene.

Marokũgooca marĩ na ngoro theru.

16 Nĩngũkũgooca tondũ nĩũtũmĩĩte ngĩe na gĩkeno;

gũtituĩkĩkĩĩte ũrĩa niĩ ndĩretigagĩra;

no nĩũtũtugĩĩte kũringana na ũrĩa tha ciaku irĩ nyingĩ.

17 Nĩwagĩrĩirwo nĩ ũgooci witũ, wee Mwathani.

Nĩũiguĩrĩire ciana ici tha, ciana cia mũũmwe cia aciari aacio.

Rĩu cihe tha ciaku na ũgitĩri waku.

Reke itũũre ũtũũro wacio irĩ na gĩkeno na wendo.”

18 Ragueli agĩcooka agĩatha ndungata ciake icookie mbĩĩrĩra ĩyo tĩĩri mbere ya gũkĩe.

Iruga rĩa ũhiki

19 Thuutha wa ũguo Ragueli akĩĩra mũtumia wake aruge mĩgate mĩingĩ, naake agĩthiĩ rũũruinĩ rwake akĩreehe ndeegwa igĩrĩ na ndũrũme inya. Akĩĩra ndungata ciake icithĩnje mahaarĩrie iruga rĩa ũhiki.

20 Agĩcooka agĩĩta Tobia akĩĩhĩtaakĩmwĩraga, “Ndũkuuma gũũkũ mĩthenya ikũmi na ĩna ĩtathirĩĩte. Ũgũikara gũũkũ ũkĩrĩaga na ũkĩnyuaga ũgĩkenagia mwarĩ wakwa ũrĩa ũkoreetwo na kĩeha kĩnene.

21 Thuutha wa ũguo nĩũgaakuua nuthu ya indo cia Ragueli ũinũke nacio kũrĩ thooguo ũrĩ na thaayũ na ũrĩ o mwega. Nuthu ĩyo ĩngĩ ũkooya twakua. Mwana wakwa wĩyũmĩrĩrie. Ndĩ thooguo na Edina nĩ maitũguo. Kuuma rĩu tũrĩ aciari aaku o ta ũrĩa tũrĩ aciari a Sara. Wĩyũmĩrĩrie mwana wakwa.”

Rũgendo rwa gũthiĩ Ragesi

1 Ningĩ Tobia agĩĩta Rafaili akĩmwĩra atĩrĩ,

2 “Azaria, mũraata wakwa, oya ndungata inya na ngamĩĩra igĩrĩ mũthiĩ mũciĩ kwa Gabaeli itũũrainĩ rĩa Ragesi ũngĩrĩre mbeeca iria; na ũmũreehe irugainĩ rĩa ũhiki.

3 Amu Ragueli nĩehĩtĩĩte atĩ ndikaae kuuma gũũkũ;

4 no baaba nĩ matukũ aratara, na ingĩikara mũno nĩegũkorwo na kĩeha kĩnene.”

5 Kwoguo Rafaili hamwe na ndungata icio inya magĩthiĩ Ragesi kũrĩa kwarĩ Media, magĩikara mũciĩ kwa Gabaeli.

Agĩcooka akĩmwĩra atĩ mũrũ wa Tobiti ũrĩa wĩtagwo Tobia nĩarĩĩkĩĩtie kũhikania, na atĩ nĩamwĩtĩĩte irugainĩ rĩake rĩa ũhiki. Naake Rafaili akĩnengera Gabaeli marũa marĩa meekĩrĩĩtwo thaĩri, naake Gabaeli akĩruta mĩhuko ĩrĩa ya mbeeca ĩrĩ na ndumo ciayo itarĩ ndumũre, akĩmũnengera, nao magĩciigĩrĩra igũrũ rĩa ngamĩĩra.

6 Kwarooka gũkĩa makĩnyiita rũgendo maroreete irugainĩ rĩa ũhiki. Rĩrĩa maakinyire mũciĩ kwa Ragueli, magĩkora Tobia akĩrĩa. O rĩmwe Tobia agĩũkĩra akĩgeithia Gabaeli. Naake Gabaeli agĩcookia ngeithi agĩitaga maithori akiugaga atĩrĩ, “Wee ũtũkĩĩtie thooguo ũrĩa mwĩhokeku na mũtaana. Mwathani arĩ igũrũ arokũraathima hamwe na mũtumia waku, na nyaciaraguo, o na thooguo. Ngai arogoocwo! Nĩanjĩtĩkĩrĩĩtie ndũũre nĩguo nyone mũihwa wakwa Tobia, ũrĩa ũtũkĩĩtie ithe biũ.”

Tobiti na Ana kũgĩa na kĩeha

1 Na rĩĩrĩ, ithe wa Tobia nĩataraga matukũ o mũthenya, na rĩrĩa matukũ marĩa maiganĩire rũgendo rwa gũthiĩ na gũcooka maathirire na mũũriũ ndacooke-rĩ, Tobiti akĩĩra mũtumia wake atĩrĩ,

2 “Nĩ kĩĩ kĩngĩkorwo kĩmũigĩĩte ũguo? Kwahoteka hiihi Gabaeli akorwo nĩakuire na gũkĩage mũndũ wa kũmũnengera mbeeca icio?”

3 Tobiti akĩnyiitwo nĩ kĩeha kĩnene mũno.

4 Naake Ana akiuga atĩrĩ, “Ndĩ na ma mwana wakwa nĩ mũkuũ.” Akĩambĩrĩria kũrĩra na kũgirĩka nĩ ũndũ wa Tobia, akiugaga atĩrĩ,

5 “Ũũi mwana wakwa-ĩ! O wee gĩkeno kĩa ũtũũro wakwa! Nĩkĩ gĩatũmire ngwĩtĩkĩrie ũthiĩ?”

6 No Tobiti akĩmwĩra atĩrĩ, “Hoorera na ũtige gwĩtigĩra; we arĩ o ho.”

7 Naake Ana akĩmũcookeria atĩrĩ, “Kira na ũtigane na niĩ! Tiga kũndua kĩrimũ. Mwana wakwa nĩ mũkuũ.” Na rĩĩrĩ, o mũthenya nĩathiaga barabarainĩ ĩrĩa Tobia aathiĩrĩire agatinda akĩrora kana amuona nginya riũa rĩgathũa. Mũthenya ndarĩaga kĩndũ, na ũtukũ wothe ndatigithagĩria kũgirĩka nĩ ũndũ wa mũũriũ Tobia.

Kuuma Ekibatana

Ciumia igĩrĩ ciathira cia gũkũngũĩra ũhiki o ta ũrĩa Ragueli eehĩtĩĩte, Tobia agĩthiĩ kũrĩ Ragueli akĩmwĩra atĩrĩ, “Ndagũthaitha njĩtĩkĩria nyinũke rĩu. Ndĩ na ma aciari aakwa na nĩmateete mwĩhoko wa gũkaanyona rĩngĩ. Kwoguo ndagũthaitha ũnjĩtĩkĩrie nyinũke mũciĩ kũrĩ baaba. Nĩndĩkĩĩtie gũkũmenyithia ũrĩa aatariĩ ngĩmũtiga.”

8 No Ragueli akĩmũcookeria atĩrĩ, “Mwana wakwa, ikaranga na niĩ. Nĩngũtũma arekio kũrĩ thooguo akeerwo atĩ ũrĩ o ho wega.”

9 Tobia naake agĩcookia atĩrĩ, “Aaca! Ndagũthaitha njĩtĩkĩria njooke kũrĩ baaba.”

10 Kwoguo Ragueli akĩnengera Tobia Sara mũhiki wake. Agĩcooka akĩmũnengera nuthu ya indo ciothe iria aarĩ nacio: ngombo, mahiũ, ng’ondu, ndigiri, ngamĩĩra, nguo, mbeeca, o na indo cia nyũmba.

11 Arĩĩkia kũmaraathima akĩmoigĩra ũhoro akĩmeera atĩrĩ, “Mũrũ wakwa, gĩa rũgendo rwega. Mwathani wa igũrũ arokũmenyerera wee na Sara. Aroĩtĩkĩra nyone ciana cianyu itanakua.”

12 Agĩcooka akĩĩra mwarĩ atĩrĩ, “Ũtĩĩage mũthoniwa na nyaciaraguo; acio rĩu nĩ o aciari aaku. Rĩrĩa rĩothe ngũtũũra muoyo ũreke njiguage o maũndũ meega igũrũ rĩaku.” Naake akĩmũmumunya.

Naake Edina akĩĩra Tobia atĩrĩ, “Tobia mwana wakwa nyendeete, Mwathani arogũkinyia mũciĩ na thaayũ, ningĩ arohotithia nyone ciana ciaku na ũndũ wa mwarĩ wakwa Sara, nĩ geetha ngene mbere ya Mwathani. Nĩndakwĩhokera mwarĩ wakwa; menyerera ndũkaae kũmwĩka ũndũ wa kũmũraakaria ũtũũro waku wothe. Gĩai na rũgendo rwega. Kuuma rĩu Sara nĩ mũtumia waku na niĩ ndĩ maitũguo. Tũrotũũra tũtugagwo matukũ moothe tũgũtũũra muoyo.” Edina agĩcooka akĩmamumunya eerĩ na akĩmoigĩra ũhoro.

1 Thuutha wa ũguo Tobia agĩĩthiĩra akeneete mũno akĩgoocaga Mwathani wa igũrũ na thĩ, o we mũthamaki wa indo ciothe, nĩ ũndũ nĩatũmĩĩte rũgendo rwake rũgĩe na mũnyaka. Naake akĩraathima Ragueli na mũtumia wake akĩmeera atĩrĩ, “Mwathani aroĩtĩkĩra ndĩmũheage gĩtĩĩo ũtũũro wakwa wothe.”

Gũkinya mũciĩ

Na rĩrĩa maakuhĩrĩirie itũũra rĩa Kaserini ndeereinĩ cia Nineve,

2 Rafaili akĩĩra Tobia atĩrĩ, “Tobia, wee nĩũũĩ ũrĩa twatigire thooguo atariĩ.

3 Nĩtũkĩagĩrĩirwo nĩgũthiaga mbere ya mũtumia waku tũkahaarĩrie nyũmba mbere ya mũndũ ũngĩ wothe gũkinya.

4 Na rĩĩrĩ, ũkuue nyongo ĩrĩa ya thamaki.” Kwoguo magĩgĩthiaga na mbere, nayo ngui ya Tobiaĩkĩmoima thuutha.

5 Hĩndĩ ĩyo Ana aikarĩĩte aroreete barabarainĩ agĩcũũthĩrĩria mũũriũ.

6 Akĩmuona agĩũka akĩĩra Tobiti atĩrĩ, “Tarora! Mwana witũ nĩokĩĩte arĩ hamwe na mũraata wake!”

7 Mataanakinya harĩ Tobiti Rafaili akĩĩra Tobia atĩrĩ, “Thooguo nĩekũhota gũcooka kuona rĩngĩ.

8 Nĩ ũndũ ũcio no mũhaka ũmũhake nyongo ĩyo maitho, na wona maambĩrĩria gũtuura, nĩekũmarigitha atũme ngaracũ igũe, akĩhote kuona.”

9 Naake Ana agĩteng’era kũmũtũnga, akĩmũhĩmbĩria akĩmwĩra atĩrĩ, “Mwana wakwa, rĩu tondũ nĩndakuona ũrĩ muoyo, no ngue na thaayũ!” Naake agĩita maithori nĩgũkena.

Tobiti kũhonio

10 Tobiti agĩũkĩra agĩtũgũũgaga eerekeire na thoome.

11 Tobia agĩthiĩ na kũrĩ we anyiitĩĩte nyongo ĩrĩa ya thamaki na guoko gwake, akĩhuuha ithe maitho akĩmũnyiitĩrĩra akĩmwĩra atĩrĩ, “Baaba, tiga gwĩtigĩra.”

12-13 Thuutha ũcio akĩminjaminjĩria maaĩ ma nyongo ĩrĩa maitho ma ithe. Na rĩĩrĩ, arutĩĩtie koona cia maitho, akĩũnũra ngũũcĩ iria ciarĩ maitho ma ithe.

14 Tobiti agĩkĩhĩmbĩria mũũrũwe Tobia agĩitaga maithori nĩgũkena akĩanĩrĩra akiuga atĩrĩ,

“Nĩndĩrahota gũkuona wee mwana wakwa,

o wee ũtheri wa maitho maakwa!

“Ngai arogoocwo. Arogoocwo nĩ ũndũ wa ũnene wake.

Araika aake oothe atheru marogoocwo.

Arothiĩ na mbere na gũtũraathima.

Araika aake oothe marogoocagwo tene na tene.

15 We nĩ we wandeeheire ndwari ĩno,

no rĩu nĩndahota kuona mwana wakwa Tobia!”

Tobia agĩkĩingĩra nyũmba akeneete akĩgoocaga Ngai aanĩrĩire. Agĩcooka agĩtaarĩria ithe ũrĩa aagĩĩte na mũnyaka, na atĩ ndacookeete o na mbeeca tu, no o na nĩahikĩĩtie Sara mwarĩ wa Ragueli, ũrĩa warĩ njĩrainĩ agĩũka na aarĩ hakuhĩ gũkinya.

Sara gũkinya

16 Tobiti agĩkiumagara akeneete akĩgoocaga Ngai, agĩthiĩ gũtũnga mũtumia wa mũũriũ kĩhingoinĩ gĩa itũũra rĩa Nineve. Nao andũ arĩa maamuonire agĩthiĩ makĩgega nĩ ũndũ nĩahotaga kuona.

17 Tobiti akĩgooca Ngai na akĩĩra andũ oothe ũrĩa Ngai na ũndũ wa tha ciake aamũhotithĩĩtie kuona.

Rĩrĩa Tobiti aatũngire Sara, akĩmũgeithia akĩmwĩra atĩrĩ, “Mwarĩ wakwa, nĩtwakũnyiita ũgeni! Ngai arogoocwo nĩ ũndũ wa gũkũreehe kũrĩ ithuĩ. Thooguo na maitũguo maroraathimwo. O nawe mwarĩ wakwa, nawe Tobia mũrũ wakwa mũroraathimwo. Toonya mũciĩ waku mwerũ. Ũrotũũra ũkeneete na ũtekũrũara. Gĩtoonye o gũtoonya mũciĩ ũyũ!”

Kwoguo ũgĩkorwo ũrĩ mũthenya wa gĩkeno kĩnene harĩ Ayahudi oothe a Nineve.

18 Nao Ahikaru na Nadabu aihwa a Tobiti magĩkũngũyanĩra hamwe na Tobiti. Iruga rĩathiire na mbere mĩthenya mũgwanja na nĩaheirwo iheeo nyingĩ.

1 Rĩrĩa iruga rĩa ũhiki rĩathirire, Tobiti agĩĩta mũũriũ Tobia akĩmwĩra atĩrĩ, “Mwana wakwa, tigĩrĩra atĩ nĩwarĩha mũndũ ũcio ũrathiĩte rũgendo naake, na ndũkariganĩrwo nĩkũmuongerera.”

2 Naake Tobia akĩũria ithe atĩrĩ, “Baaba, ũkuona njagĩrĩirwo nĩkũmũrĩha mũigana ũrĩkũ? Ndingĩthũũra kũmũhe nuthu ya indo ciothe iria tũrokire nacio.

3 Amu nĩaranjookirie kũrĩ we ndĩ mwega na ndĩ mũgima, arahonia mũtumia wakwa, arangĩĩrĩra mbeeca kuuma kũrĩ Gabaeli, o na arakũhonia. Njagĩrĩirwo nĩkũmuongerera kĩndũ kĩigana atĩa nĩ ũndũ wa maũndũ macio moothe?”

4 Tobiti akĩmũcookeria atĩrĩ, “Mũhe nuthu ya indo iria aragũteithĩrĩirie gũũka nacio. Nĩagĩrĩirwo nĩcio.”

5 Kwoguo Tobia agĩĩta Rafaili akĩmwĩra atĩrĩ, “Oya nuthu ya indo iria wandeithĩrĩirie gũũka nacio. Nĩũcithũkũmĩire; gĩa na rũgendo rwa thaayũ ũkĩinũka.”

6 Naake Rafaili akĩmeeta eerĩ marĩ oiki akĩmeera atĩrĩ, “Goocaai Ngai na mũmenyithie andũ oothe ũhoro wa maũndũ meega marĩa Ngai amwĩkĩire, nĩ geetha o nao mamũinĩre na ũgooci. Reke andũ oothe mamenye ũrĩa Ngai eekĩĩte. Mũtikaanatigithĩrie kũmũgooca.

7 “Nĩ ũndũ mwega kũiga hitho ya mũthamaki, no nĩ wega kwanĩrĩra kũndũ guothe ũrĩa Ngai eekĩĩte, nĩ geetha agoocwo na atĩĩo.

“Ũngĩĩka wega, gũtirĩ ũndũ mũũru ũngĩgũkora.

8 “Nĩ wega makĩria kũhooya hatarĩ ũhinga na gũkenia Ngai na njĩra ya gũteithĩrĩria athĩĩni gũkĩra gũtonga na kwaga wĩhokeku. Nĩ wega makĩria kũhe athĩĩni gũkĩra kwĩigĩra thahabu.

9 Amu gũteithĩrĩria athĩĩni nĩkũhonokagia mũndũ kuuma gĩkuũinĩ, na gũgatheria wĩhia o wothe. Arĩa maheaga athĩĩni megũtũũra ũtũũro mũkinyanĩru,

10 no arĩa matũũraga ũtũũro wa meehia na wa waganu nĩ thũ cia ũtũũro wao.

11 “Nĩndarĩĩkia kũmwĩra atĩ hitho ya mũthamaki no mũhaka ĩigwo, na maũndũ marĩa Ngai eekaga no mũhaka mamenyithio andũ oothe. Rĩu nĩngũmũguũrĩria ũũma wothe itekũmũhitha ũndũ.

12 Tobiti, rĩrĩa ũrĩ na Sara mwahoire Mwathani-rĩ, nĩ niĩ ndatwarire mahooya maanyu mbere ya Ũrĩa Mũtheru. Nĩndeekaga ũguo hĩndĩ ciothe rĩrĩa wathikaga akuũ.

13 Ningĩ mũthenya ũrĩa wokĩrire ũgĩtiga irio ciaku ũtarĩĩte nĩguo ũgathike kĩimba-rĩ, Ngai nĩandũmire ngũgerie.

14 Na ningĩ no aandũmire njũke ngũhonie na honokie mũtumia wa mũũrũguo, Sara, kuuma mathĩĩnainĩ maake.

15 Nĩ niĩ Rafaili, ũmwe wa araika arĩa mũgwanja maikaraga mbere ya riiri wa Mwathani mehaarĩirie kũmũtungatĩra.”

16 Nao Tobiti na Tobia magĩĩtigĩra mũno, makĩgwa thĩ makĩinainaga nĩ guoya.

17 No Rafaili akĩmeera atĩrĩ, “Tigaai gwĩtigĩra; maũndũ moothe nĩ meega. No mũririkane kũgoocaga Ngai hĩndĩ ciothe.

18 Amu eendaga njũke ndĩmũteithĩrĩrie; ndiokire na ũndũ wakwa niĩ mwene. Kwoguo inagaai Ngai mũkĩgoocaga ũtũũroinĩ wanyu wothe.

19 Mĩthenyainĩ ĩyo yothe no kuoneka ndĩronekanaga harĩ inyuĩ ta ndĩrarĩaga kana nganyua, no nĩ kĩoneki mũronaga.

20 Rĩrĩa rĩothe mũrĩ gũũkũ thĩ ĩno, no mũhaka mũgoocage Mwathani Ngai na mũmũcookagĩrie ngaatho. Rĩu no mũhaka njooke kũrĩ ũrĩa wandũmire. Maũndũ moothe marĩa meekĩkĩĩte maandĩkeei ibukuinĩ.” Naake Rafaili akĩbuĩria rĩerainĩ.

21 Nao Tobiti na Tobia magĩkĩrũũgama; no matiacookire kũmuona rĩngĩ.

22 Makĩambĩrĩria kũina nyĩmbo cia ũgooci, magĩcookagia ngaatho nĩ ũndũ wa maũndũ moothe manene marĩa Ngai eekĩĩte rĩrĩa mũraika wake Rafaili aakoreetwo hamwe nao.

Rwĩmbo rwa Tobiti rwa kũgooca Ngai

1 Naake Tobiti akĩhooya akiuga atĩrĩ:

“Ngai arogoocwo we ũtũũraga tene na tene,

o na ũthamaki wake ũrogoocwo mĩndĩ na mĩndĩ.

2 We nĩatũherithagia, na agacooka agatũiguĩra tha.

Nĩatũtwaraga na thĩ kũrĩa akuũ mathiaga,

ningĩ agacooka agatũruta kuuma mbĩĩrĩrainĩ.

Gũtirĩ ũngĩhota kũũrĩra hinya wake.

3 “Mũcookeriei ngaatho gatagatĩinĩ ka ndũũrĩrĩ, inyuĩ andũ a Isiraeli,

amu nĩatũhurunjĩĩte gatagatĩinĩ kaao.

4 Menyithaniai ũnene wake kuo,

na mũmũtũũgĩrie mbere ya arĩa oothe marĩ muoyo;

amu nĩ we Mwathani witũ na Ngai witũ,

nĩ we Ithe witũ nginya tene.

5 “Nĩegũtũherithia nĩ ũndũ wa waganu witũ;

na acooke atũiguĩre tha rĩngĩ,

ningĩ atũcookanĩrĩrie kuuma ndũũrĩrĩinĩ ciothe kũrĩa tũhurunjĩĩtwo.

6 “Mũngĩmũgarũrũkĩra na ngoro yanyu yothe

na muoyo wanyu wothe mũikare mũmwathĩkĩire,

naake nĩekũmũgarũrũkĩra na ndagũcooka kũmũhitha ũthiũ wake.

Ririkanaai ũrĩa Ngai amwĩkĩire,

na mũmũcookerie ngaatho na ngoro cianyu ciothe.

Goocaai Mwathani wa ũthingu,

na mũtũũgĩrie mũthamaki wa tene na tene.

Nĩngũmũcookeria ngaatho ndĩ bũrũriinĩ wakwa wa ithaamĩrio

na nĩngwanĩrĩra hinya wake mũnene kũrĩ rũũrĩrĩ rwa eehia.

‘Garũrũkaai mweherere meehia maanyu, na mwĩke ũrĩa ũkenagia Ngai!

Kwahoteka hiihi amwende na amũiguĩre tha.’

7 “Nĩngũgooca Ngai wakwa na ngene ndĩ thĩinĩ wa ũnene wake;

muoyo wakwa nĩũgũtũũgĩria mũthamaki wa igũrũ.

8 “Reke andũ oothe mamenyithanie ũnene wake

na mamũgooce me thĩinĩ wa Jerusalemu.

9 “Wee Jerusalemu, itũũra rĩtheru,

Ngai nĩakũherithĩĩtie nĩ ũndũ wa meehia ma andũ aaku,

no nĩekũiguĩra tha arĩa oothe meekaga wega.

10 Kwoguo cookeriai Ngai ngaatho tondũ nĩ mwega.

Goocaai mũthamaki wa tene na tene.

Hekaarũ yaku nĩgaakwo rĩngĩ,

na andũ aaku nĩmagaacooka gũkena rĩngĩ.

“Mwathani arotũma arĩa mathaamĩĩtio thĩinĩ waku makene,

na amenyerere andũ aaku arĩa marathĩĩnĩka

nginya tene na tene.

11 “Jerusalemu, ũtheri waku nĩũkaarĩra thĩ yothe na hinya,

na ndũũrĩrĩ nyingĩ nĩigooka kũrĩ we kuuma kũraaya.

Andũ aacio magooka gũkumia Mwathani Ngai waku,

mareehere Mwathani wa igũrũ iheeo.

Barabarainĩ ciaku njiarwa na njiarwa

nĩirĩinaga ũgooci waku na gĩkeno,

narĩo rĩĩtwa rĩaku, wee itũũra rĩthuure rĩa Ngai, rĩgũtũũra tene na tene.

12 Arĩa oothe mahũũranaga nawe, nĩmekũnyiitwo nĩ kĩrumi:

arĩa oothe makwanangaga,

arĩa oothe mamomoraga thingo ciaku,

arĩa oothe matharũragia mĩnaara yaku,

na arĩa oothe macinaga nyũmba ciaku.

No arĩa makwendeete megũtũũra marĩ araathime tene na tene.

13 “Jerusalemu, kena nĩ ũndũ wa andũ aaku arĩa athingu,

amu nĩmagaacookanĩrĩrio hamwe,

na magooce Mwathani wa tene na tene.

14 “Kũraathimwo nĩ arĩa oothe makwendeete na makenagĩra kuona ũkĩgaacĩra.

Kũraathimwo nĩ arĩa macakayaga nĩ ũndũ wa mathĩĩna maaku

amu nĩmagaakena moona riiri waku wothe.

Gĩkeno gĩaku nĩgĩgaatũma makene tene na tene.

15 “Nĩngũgooca Mwathani, ũrĩa mũthamaki mũnene.

16 Amu Jerusalemu nĩgaakwo rĩngĩ

ĩtuĩke mũciĩ wake tene na tene.

“I ngaakena atĩa mwana wakwa angĩgaatigara erorere riiri waku,

na agooce Mũthamaki wa igũrũ!

“Ihingo cia Jerusalemu igaakwo na mahiga ma yakuti ya mburuu na thumarati,

nacio thingo ciayo ciakwo na mahiga ma goro,

nayo mĩnaara ya yo na gwa kũũrĩra gwakwo na thahabu ĩrĩa therie mũno.

17 Nacio barabara cia Jerusalemu ikaarwo mahiga ma goro ma rubi na mahiga ma kuuma Ofiri.

18 Ihingoinĩ cia Jerusalemu nĩgũkainwo nyĩmbo cia ũkeni

na nyũmbainĩ ciakuo kwanĩrĩrwo, kwĩrwo atĩrĩ, ‘Goocaai Mwathani!

Ngai wa Isiraeli arogoocwo!’

“Jerusalemu, Ngai aroraathima andũ aaku,

nao marogooca rĩĩtwa rĩake tene na tene.”

Naake Tobiti agĩkĩrĩĩkia rwĩmbo rwake rwa kũgooca.

Mataaro ma Tobiti ma mũthia

1-2 Rĩrĩa Tobiti aatuĩkire gĩtumuumu aarĩ wa mĩaka mĩrongo ĩtandatũ na ĩĩrĩ, no thuutha wa kũhota gũcooka kuona, nĩatũũrire ũtũũro mũkinyanĩru biũ. Nĩathiire o na mbere kũhe athĩĩni na ũtaana, o na agĩthiĩ na mbere kũgooca Ngai na kũheana ũhoro wa ũnene wake. Tobiti aakuire na thaayũ arĩ na ũkũrũ wa mĩaka igana na ikũmi na ĩĩrĩ, na agĩthikwo na gĩtĩĩo kũu Nineve.

3 Ataanakua nĩatũmanĩire mũũriũ Tobia akĩmwĩra atĩrĩ,

4 “Mwana wakwa, oya ciana ciaku o rĩmwe mũthiĩ Media. Amu nĩnjĩtĩkĩĩtie atĩ itua rĩa Ngai rĩrĩa mũnabii Nahumu aanĩrĩire igũrũ wa Nineve rĩ hakuhĩ kũhinga. Maũndũ moothe meerĩĩtwo Aisiraeli nĩ anabii a Ngai igũrũ rĩa Asiria na Nineve nĩmekũhinga. Ihinda rĩrĩa rĩagĩrĩru rĩakinya moothe nĩmekũhinga. Wee ũkoona wega ũrĩ Media gũkĩra ũrĩ Asiria kana Babiloni. Niĩ mwene nĩnjũũĩ na nĩnjĩtĩkĩĩtie atĩ ũndũ o wothe Ngai oigĩĩte no mũhaka ũhinge. Ũguo nĩguo gũgaatuĩka na gũtirĩ mũgambo o na ũmwe wa ũrathi ũkaaga kũhinga.

“Andũ a rũũrĩrĩ rwitũ arĩa matũũraga Isiraeli nĩmegũtahwo na mathaamio marutwo bũrũri ũcio mwega. Bũrũri wothe wa Isiraeli nĩũgũtuĩka werũ, na Samaria na Jerusalemu ituĩke maganjo. Andũ aitũ nĩmekũhurunjũka thĩ yothe moime bũrũri ũcio mwega, na Jerusalemu ĩtigwo ũtheri. Hekaarũ ya Ngai nĩgũcinwo na ĩkorwo yanangĩkĩĩte kwa ihinda.

5 No Ngai nĩakaiguĩra andũ aake tha rĩngĩ na nĩakaamacookia bũrũriinĩ wa Isiraeli. Nao nĩmagaaka Hekaarũ ya Ngai rĩngĩ, o na gũtuĩka ndĩgaakorwo ĩrĩ thaka ta ĩyo ya mbere, nginya hĩndĩ ĩrĩa mahinda marĩa maagĩrĩire magaakinya. Na hĩndĩ ĩrĩa mahinda macio magaakinya andũ oothe a Isiraeli nĩmagaacooka kuuma ithaamĩrio, na nĩmagaaka itũũra rĩa Jerusalemu rĩngĩ rĩrĩ na ũthaka warĩo wothe ta tene. Nĩmagaaka Hekaarũ ya Ngai rĩngĩ thĩinĩ wa Jerusalemu o ta ũrĩa anabii a Isiraeli maarathĩĩte.

6 “Nacio ndũũrĩrĩ ciothe thĩinĩ wa thĩ nĩigaacookerera Ngai; imũthaathayagie arĩ o we Ngai wa ma, na itigane na mĩhianano ĩrĩa yacierekeirie gũthaathayainĩ kũu kwa maheeni.

7 Ndũũrĩrĩ cia thĩ nĩikaagooca Ngai wa tene na tene na njĩra ya gwĩka ũrĩa we eendaga.

“Hĩndĩ ĩyo Ngai nĩakaahonokia andũ oothe a Isiraeli arĩa ehokeku harĩ we. Nĩakaamareehe hamwe Jerusalemu, na areke meenyiitĩre bũrũri wa Aburahamu matũũre kuo na thaayũ nginya tene. Arĩa oothe meendeete Ngai na ngoro ciao o hamwe na mĩoyo yao nĩmagaakena, no eehia oothe na andũ ooru nĩmakeeherio kuuma thĩ.

8 “Rĩu ciana ciakwa, rũmĩrĩraai mataaro maakwa. Thaathayagiai Ngai mũtarĩ na ũhinga na mwĩkage ũrĩa ũmũkenagia.

9 Rutagaai ciana cianyu gwĩkaga ũrĩa kwagĩrĩire. Cirutageei atĩ no mũhaka citeithagĩrĩrie athĩĩni na hingo ciothe iririkanage kũgooca Ngai hatarĩ ũhinga.

10 “Tobia, mwana wakwa, uma Nineve rĩu, ndũkaae gũikara gũũkũ. Wona warĩĩkia gũthika maitũguo kũrigania na niĩ uumagare, ndũkaae gũikara ũtukũ ũngĩ thĩinĩ wa itũũra. Rĩĩrĩ nĩ itũũra rĩaganu na rĩiyũire ũmaraaya, na andũ aakuo matiiguaga thoni. Ririkana ũrĩa Nadabu eekire Ahikaru maamawe ũrĩa wamũrerire. Aageririe kũmũũraga agĩtũma athiĩ akeehithe munguinĩ. No Ahikaru nĩahonokirio, naake Ngai agĩikia Nadabu ndumainĩ ĩrĩa ya tene na tene nĩ ũndũ wa ũguo eekĩĩte. Ahikaru nĩahonokire kuuma mũtegoinĩ wa gĩkuũ ũrĩa Nadabu aamũtegeire nĩ ũndũ nĩaheaga athĩĩni na ũtaana. No Nadabu akĩgũa mũtegoinĩ ũcio ũkĩmũniina.

11 Kwoguo ciana ciakwa, nĩmũgũkĩona ũrĩa arĩa matangĩkagĩra arĩa angĩ meekagwo, na ũrĩa gĩkuũ gĩetagĩrĩra arĩa meekaga arĩa angĩ maũndũ matarĩ ma kĩhooto. Na rĩĩrĩ, rĩu ndĩ mũhinyĩrĩrĩku mũno.”

Nao makĩmũkomia gĩtandainĩ gĩake, agĩkua nao makĩmũthika na gĩtĩĩo.

12 Thuuthainĩ rĩrĩa Ana aakuire, makĩmũthika kũrigania na mũthuuriwe. Naake Tobia na mũtumia wake magĩthaamĩra Ekibatana bũrũriinĩ wa Media kũrĩa maatũũranirie na Ragueli, ithe wa mũtumia wa Tobia.

13 Tobia akĩmenyerera Edina na Ragueli ũkũrũinĩ wao, na nĩamaheaga gĩtĩĩo kĩnene mũno. Mũicoinĩ rĩrĩa maakuire, akĩmathika kũu Ekibatana. Naake akĩgaya indo cia Ragueli, o ta ũrĩa aagaĩĩte cia ithe Tobiti.

14 Tobia aakuĩrĩire kũu Ekibatana arĩ na ũkũrũ wa mĩaka igana rĩa ikũmi na mũgwanja.

15 No mbere ya gũkua nĩaiguire ũhoro wa gũthũũkangio kwa Nineve ĩrĩa yatahirwo nĩ Nebukadinezaru na Ahasuerusu. Naake akĩgooca Ngai nĩ ũndũ wa ũrĩa aaherithĩĩtie andũ a Nineve na a Asiria. Hĩndĩ ĩrĩa yothe aatũũrire muoyo nĩacookagĩria Ngai ngaatho nĩ ũndũ wa ũrĩa eekĩĩte Nineve.