Gikuyu Common Language with DC (GIKDC)

Gũtaarĩria

Marũa ma Mbere ma Petero maandĩkĩirwo Akristiano arĩa meetĩĩtwo marũainĩ maya, “Andũ arĩa athuure a Ngai,” arĩa maahurunjũkĩĩte mwena wa na rũgongo wa bũrũri wa Asia Niini. Gĩtũmi kĩnene kĩrĩa gĩatũmire marũa maya maandĩkwo nĩkũũmĩrĩria andũ arĩa maanyariiragwo na magathĩĩnio nĩ ũndũ wa wĩtĩkio wao. Mwandĩki eekĩĩte ũguo na ũndũ wa kũririkania andũ acio Ũhoro ũrĩa Mwega wa Jesũ Kristũ, ũrĩa gĩkuũ gĩake, kũriũka gwake, na kĩĩranĩro gĩake atĩ nĩagooka ciamaheaga mwĩhoko. Nĩ ũndũ wa ũhoro ũcio, no mũhaka meetĩkĩre na moomĩrĩrie mĩnyamaaro yao, me na wĩtĩkio atĩ macio nĩ magerio ma kũgeria wĩtĩkio wao kana nĩ wa ma, na atĩ nĩmakaaheeo kĩheeo “Mũthenya ũrĩa Jesũ Kristũ akaaguũranĩrio.”

Hamwe na kũũmanĩrĩria kũu hĩndĩ ya mathĩĩna, mwandĩki nĩorĩĩtie andũ acio maikarage ta andũ a Kristũ.

Maũndũ marĩa marĩ marũainĩ maya

Gũtaarĩria 1.1-2

Kũririkanio ũhonokio wa Ngai 1.3-12

Mataaro ma mũikarĩre ũrĩa mũtheru 1.13–2.10

Wĩra wa Akristiano hĩndĩ ya mĩnyamaaro 2.11–4.19

Wĩnyiihia wa Akristiano na ũtungata 5.1-11

Kũrĩĩkia 5.12-14

1 Kuuma kũrĩ niĩ Petero, mũtũmwo wa Jesũ Kristũ:

Kũrĩ andũ arĩa moorĩĩte kuuma kwao makahurunjũkĩra mabũrũri ma Ponito, Galatia, Kapadokia, Asia, na Bithinia.

2 Inyuĩ-rĩ, nĩmwathuurirwo kũringana na wendi wa Ngai Ithe witũ, na mũgĩtherio nĩ Roho wake nĩguo mwathĩkagĩre Jesũ Kristũ na mũtheragio nĩ thakame yake.

Wega na thaayũ iromũingĩhĩra.

Kĩĩrĩgĩrĩro gĩa gũtũũra

3 Ngai Ithe wa Mwathani witũ Jesũ Kristũ arogoocwo! Tondũ wa tha ciake nyingĩ, nĩatũheete muoyo mwerũ nĩ ũndũ wa kũriũkio kwa Jesũ Kristũ kuuma gĩkuũinĩ. Ũndũ ũcio nĩũtũmaga tũiyũrwo nĩ kĩĩrĩgĩrĩro gĩa gũtũũra,

4 na kwoguo tũgagĩeterera igai rĩrĩa Ngai aigĩire andũ aake. Inyuĩ-rĩ Ngai amũigĩire igai rĩu igũrũ kũrĩa rĩtangĩbutha kana rĩthũũke kana rĩhwererekere.

5 Igai rĩu nĩ rĩanyu inyuĩ arĩa mũkoragwo mũmenyereirwo nĩ hinya wa Ngai, nĩ ũndũ wa wĩtĩkio wa ũhonokio ũrĩa ũhaarĩirio gũkaaguũranĩrio ihindainĩ rĩa mũthia.

6 Nĩ ũndũ ũcio gĩkeneei nĩ ũndũ wa ũhoro ũcio o na angĩkorwo rĩu no mũgĩe na kĩeha kwa ihinda iniini nĩ ũndũ wa magerio maingĩ marĩa maramũthĩĩnia.

7 Mũragerio nĩ geetha wĩtĩkio wanyu woneke kana nĩ wa ma. O na thahabu, ĩrĩa ĩthiraga, ĩgeragio na mwaki. Kwoguo o naguo wĩtĩkio wanyu ũrĩa wĩ goro o na gũkĩra thahabu, no mũhaka ũgerio nĩguo woneke kana nĩ wa ma, nĩguo mũkaagĩa na riiri, kũgoocwo, na gĩtĩĩo hĩndĩ ĩrĩa Jesũ akaaguũranĩrio.

8 Inyuĩ-rĩ nĩmũmwendeete o na angĩkorwo mũtirĩ mwamuona, o na nĩmũmwĩtĩkĩĩtie o na angĩkorwo rĩu mũtiramuona. Kwoguo nĩmũkeneete na gĩkeno kĩnene mũno kĩrĩa gĩtangĩgweteka na ciugo,

9 nĩ ũndũ mũregwatĩra ũhonokio wa mĩoyo yanyu, ũrĩa arĩ guo muorooto wanyu wa kũmwĩtĩkia.

10 Ũhoro wa ũhonokio ũcio nĩguo anabii maacaragia na kĩyo mũno o na magĩtuĩria, na makĩratha ũhoro wa kĩheeo kĩu Ngai akaamũhe.

11 Nĩmaatuĩragia mamenye nũũ kana nĩ ihinda rĩrĩkũ. Ihinda rĩrĩa ũhoro ũcio ũkaahinga rĩonanagio nĩ Roho wa Kristũ arĩ thĩinĩ wao, rĩrĩa maarathaga ũhoro wa mĩnyamaaro ya Kristũ na riiri ũrĩa ũkaarũmĩrĩra.

12 Ngai nĩaguũrĩirie anabii acio atĩ wĩra ũrĩa maarutaga ti wa kũmaguna o eene, no nĩ wa kũmũguna inyuĩ. Nĩ amu nĩmaamenyithanirie maũndũ marĩa mũiguaga kuuma kũrĩ ahunjia arĩa maagwetire Ũhoro ũrĩa Mwega, maheetwo hinya nĩ Roho Mũtheru ũrĩa uumaga igũrũ. Maũndũ macio o nao araika no meendaga kũmamenya.

No mũhaka tũtũũre mũtũũrĩre wa ũtheru

13 Kwoguo ikaragaai mwĩhaarĩirie meciiriainĩ maanyu, na mũkoragwo mwĩiguĩte na mũigĩĩte kĩĩrĩgĩrĩro kĩanyu biũ harĩ iraathimo iria mũkaaheeo rĩrĩa Kristũ akaaguũranĩrio.

14 Rĩrĩa mũtaamenyeete Ngai-rĩ, mwatongoragio nĩ merirĩria ma ũrimũ, no rĩu athĩkagĩraai Ngai.

15 Ĩndĩ tuĩkaai andũ atheru a Ngai maũndũinĩ moothe marĩa mũrĩĩkaga o ta ũrĩa Ngai ũrĩa wamwĩtire e Mũtheru.

16 Tondũ maandĩko moigĩĩte atĩrĩ, “Tuĩkaai atheru tondũ o na niĩ ndĩ mũtheru.”

17 Angĩkorwo hĩndĩ ĩrĩa mũkũhooya, mwĩtaga Ngai “Baaba” o we ũtuagĩra andũ oothe na kĩhooto kũringana na ũrĩa mũndũ eekĩĩte-rĩ, ikaragaai mũgĩtĩĩaga Ngai hĩndĩ ĩrĩa yothe mũgũtũũra ta agendi gũũkũ thĩ.

18 Nĩ tondũ nĩmũũĩ kĩrĩa kĩarĩhirwo nĩ geetha muohorwo kuuma mĩtũũrĩreinĩ ĩrĩa mwatigĩirwo nĩ maithe maanyu. Inyuĩ mũtiarĩhĩirwo thiirĩ na kĩndũ ta thahabu kana betha iria ingĩthũũka;

19 mwarĩhĩirwo na igongoona rĩrĩ goro rĩa Kristũ we mwene, ũrĩa wahaanaga gatũrũme gatarĩ na kaũũgũ kana karooro.

20 Ũcio nĩ we wathuurĩĩtwo nĩ Ngai o mbere ya thĩ kũũmbwo, na nĩacookeete akoonanio matukũinĩ maya ma kũrigĩrĩria nĩ ũndũ wanyu.

21 Kristũ nĩ we ũtũmaga mwĩtĩkie Ngai ũrĩa wamũriũkirie akiuma kũrĩ akuũ na akĩmũhe riiri mũnene, na kwoguo wĩtĩkio na mwĩhoko wanyu ikoragwo ciigĩĩtwo harĩ Ngai.

22 Rĩu tondũ nĩmũgĩĩthereetie nĩ ũndũ wa gwathĩkĩra ũhoro wa ma, o na mũkahota kwenda andũ arĩa angĩ meetĩkĩĩtie, o mũndũ nĩakĩendage ũrĩa ũngĩ biũ na ngoro ĩ yothe.

23 Tondũ thĩinĩ wa kiugo kĩa Ngai kĩrĩa kĩ muoyo, nĩmũciarĩĩtwo rĩngĩ ta ciana cia mũciari ũrĩa ũtũũraga tene na tene, no ti ũrĩa ũkuaga.

24 O ta ũrĩa maandĩko moigĩĩte atĩrĩ:

“Andũ oothe mahaana ta nyeki,

na riiri wao wothe ũhaana ta mahũa ma nyekiinĩ.

Nyeki nĩyũmaga, na mahũa makagũa,

25 no kiugo kĩa Mwathani gĩtũũraga tene na tene.”

Kiugo kĩu nĩkĩo Ũhoro ũrĩa Mwega mwahunjĩirio.

Ihiga rĩrĩ muoyo na rũũrĩrĩ rũtheru

1 Kwoguo eheriai ũũru wothe, maheeni moothe, ũhinga, ũiru wothe, na ciugo cia kũrumana ciothe.

2 Tuĩkaai o ta tũkenge, mũkoragwo mũnyooteire iria rĩrĩa rĩa kĩĩroho, nĩ geetha mwarĩnyua mũgakũra na mũkahonokio tondũ

3 nĩmũcamĩĩte wega wa Mwathani o ta ũrĩa maandĩko moigĩĩte.

4 Ũkaai kũrĩ Mwathani, o we ihiga rĩrĩ muoyo, rĩrĩa rĩaregirwo nĩ andũ, no harĩ Ngai nĩithuure na nĩ rĩa goro.

5 Inyuĩ-rĩ, tuĩkaai ta mahiga me muoyo maraakwo nĩ geetha mũtuĩke Hekaarũ ya kĩĩroho. O na mũtuĩke athĩnjĩri Ngai atheru, mũrutagĩre Ngai magongoona megwĩtĩkĩrĩka na ũndũ wa Jesũ Kristũ.

6 Nĩ ũndũ maandĩko moigĩĩte atĩrĩ:

“Nĩthuurĩĩte ihiga rĩa goro mũno,

rĩrĩa ngũiga Zayuni arĩ rĩo rĩa mũthingi;

na ũrĩa wothe ũkaamwĩtĩkia ndarĩ hingo agaaconorithio.”

7 Kũrĩ inyuĩ arĩa mwĩtĩkĩĩtie-rĩ, ihiga rĩu nĩ rĩa bata mũno;

no kũrĩ arĩa mateetĩkĩĩtie:

“Ihiga rĩrĩa aaki maaregire

nĩrĩo rĩatuĩkire rĩa goro mũno mũthingiinĩ.”

8 O na maandĩko nĩmoigĩĩte handũ hangĩ atĩrĩ,

“Ihiga rĩĩrĩ nĩrĩo rĩgaatũma andũ mahĩngwo,

nĩrĩo rwaro rwa ihiga rũrĩa rũkaagũithia andũ.”

Mahĩngagwo nĩ tondũ nĩmaaregire gwathĩkĩra ciugo cia Ngai,

ta ũrĩa Ngai eendaga meekage.

9 No rĩĩrĩ, inyuĩ mũrĩ rũũrĩrĩ rũthuure, athĩnjĩri Ngai a nyũmba ya mũthamaki, rũũrĩrĩ rũrĩa rũtheru, andũ a Ngai arĩa athuure o arĩa mathuurĩĩtwo a kũheana ũhoro wa magegania ma ciĩko cia Ngai, ũrĩa wamwĩtire mũkiuma ndumainĩ, mũgĩtoonya ũtheriinĩ wake ũrĩa mwega mũno.

10 Hĩndĩ ĩmwe inyuĩ mũtiarĩ andũ a Ngai, no rĩu mũrĩ andũ aake; hĩndĩ ĩmwe mũtiakinyĩirwo nĩ tha cia Ngai, no rĩu nĩamũiguĩrĩire tha.

Ngombo cia Ngai

11 Eendwa aakwa, ndamũthaitha mwĩ ta ageni na agendi gũũkũ thĩ, mwĩrigagĩrĩrie merirĩria marĩa mooru ma mwĩrĩ, amu makoragwo hingo ciothe makĩrũa na roho.

12 Mĩtugo yanyu rĩrĩa mwĩ hamwe na arĩa mateetĩkĩĩtie-rĩ, yagĩrĩirwo nĩgũkoragwo ĩ mĩega ũguo atĩ, rĩrĩa matua atĩ mũrĩ eehia, magacooka kuona ciĩko cianyu njega, na kwoguo makaagooca Ngai mũthenya ũrĩa agooka.

13 Heyagaai ũnene o wothe wa andũ gĩtĩĩo nĩ ũndũ wa Mwathani, o na mwathĩkagĩre mũthamaki ũrĩa arĩ we mũnene wa moonene moothe,

14 o na abarũũthi arĩa mathuurĩĩtwo nĩ mũthamaki ũcio a kũherithagia andũ arĩa meekaga mahĩtia, na kũgaathagĩrĩria arĩa meekaga wega.

15 Tondũ wa rĩĩrĩ, Ngai eendaga na ũndũ wa ciĩko cianyu njega andũ arĩa ahũhũũtĩki matigane na mĩario yao ya ũrimũ.

16 Ikaragaai ta andũ matarĩ ũkomboinĩ, na mũtikaahũthĩre wĩyathi wanyu kũhumbĩra mahĩtia, ĩndĩ ikaragaai ta ngombo cia Ngai.

17 Heyagaai andũ oothe gĩtĩĩo; endagaai andũ arĩa meetĩkĩĩtie o ta inyuĩ, tĩĩagaai Ngai na mũheage mũthamaki gĩtĩĩo.

Mĩnyamaaro ya Kristũ ta kĩonereria

18 Inyuĩ ndungata cia mũciĩ-rĩ, heyagaai anene aanyu gĩtĩĩo biũ. Mũtigaathĩkagĩre o ro arĩa me tha na ahooreri, no athĩkagĩraai o na arĩa mamũhinyagĩrĩria.

19 Nĩ ũndũ mũndũ atuagwo mũthingu nĩ Ngai nĩ ũndũ wa gũkirĩrĩria ruwo rĩrĩa egũthĩĩnio tũhũ, tondũ nĩoĩ ũrĩa Ngai eendaga.

20 Tondũ-rĩ, nĩ uumithio ũrĩkũ ũngĩgĩa naguo ũgũkirĩrĩria ũkĩhũũrwo nĩ tondũ wa ũndũ mũũru ũrĩa wĩkĩĩte? No ũngĩĩka ũndũ mwega ũcooke ũthĩĩnio nĩ ũndũ waguo na ũkirĩrĩrie, Ngai nĩagaakũraathima nĩ ũndũ wa gũkirĩrĩria.

21 Ũndũ ũcio nĩguo mwetĩirwo, nĩ tondũ Kristũ we mwene nĩathĩĩnirio nĩ ũndũ wanyu, agĩgĩtiga aamuonereria, nĩ geetha o na inyuĩ mũrũmagĩrĩre mĩthiĩre yake.

22 We ndarĩ meehia eekire, o na gũtirĩ ũndũ wa maheeni aaririe.

23 Hĩndĩ ĩrĩa aarumirwo, nderumĩire; rĩrĩa anyariiragwo, ndaamehĩtĩire, no aigire kĩĩrĩgĩrĩro gĩake harĩ Ngai ũrĩa ũtuaga ciira na kĩhooto.

24 Kristũ we mwene nĩakuuire meehia maitũ na mwĩrĩ wake mũtharabainĩ, nĩ geetha tũkoragwo tũkuĩte ũhoroinĩ wa meehia tũgatigana namo, na tũtũũrage muoyo tũrĩ athingu. Nĩ na ũndũ wa ironda ciake mwahonirio.

25 Inyuĩ mwahaanaga ta ng’ondu ciahĩtĩĩtie njĩra, no rĩu nĩmũcookereire mũrĩithi wanyu, na no we mũmenyereri wa mĩoyo yanyu.

Atumia na athuuri aao

1 Ũguo noguo o na inyuĩ atumia mwagĩrĩirwo nĩkũheyaga athuuri aanyu gĩtĩĩo, nĩ geetha kũngĩkorwo nĩkũrĩ athuuri amwe mateetĩkagia ciugo cia Ngai, maciĩtĩkie nĩ ũndũ wa mĩthiĩre yanyu. Hatirĩkoragwo harĩ na bata wa kuuga ũndũ,

2 tondũ nĩmarĩguucagĩrĩrio nĩ mĩtugo yanyu mĩega ya ũthingu na ya gĩtĩĩo.

3 Rekeei ũthaka wanyu ũtige gũtuĩka o wa kuoneka na igũrũ ta kũrama njuĩrĩ, gwĩkĩra mathaga ma thahabu, o na kwĩhumba nguo iria njega.

4 Rekeei ũthaka wanyu ũkorwo ũrĩ wa o ngoro thĩinĩ, na ũguo nĩkuuga ũthaka ũrĩa ũtathiraga wa ũhooreri na roho wa gũkindĩria. Ũthaka ũcio ũkoragwo arĩ kĩndũ kĩa goro maithoinĩ ma Ngai.

5 Ũguo noguo atumia a tene arĩa mehokeete Ngai meegemagia na ũndũ wa kũheyaga athuuri aao, gĩtĩĩo.

6 Ningĩ noguo Sara aatariĩ, amu nĩathĩkagĩra Aburahamu na akamwĩtaga mwathi wake. Inyuĩ mũrĩ ciana ciake angĩkorwo nĩmũrĩĩkaga ũrĩa kwagĩrĩire mũtegwĩtigĩra ũndũ o na ũrĩkũ.

7 Ũguo noguo o na inyuĩ athuuri mwagĩrĩirwo gũikaranagia na atumia aanyu na njĩra ya ũũgĩ, mũkĩmenyaga atĩ atumia matirĩ hinya mũingĩ wa mwĩrĩ ta inyuĩ. Maheyageei gĩtĩĩo nĩ ũndũ o nao nĩmakaaheeo igai rĩa Ngai rĩa muoyo hamwe na inyuĩ. Ĩkagaai ũguo nĩguo hatikaagĩe kĩndũ gĩa kũhĩngĩĩca mahooya maanyu.

Kũnyariirĩka nĩ ũndũ wa gwĩka wega

8 Ngũrĩĩkia na kũmwĩra atĩrĩ, no mũhaka mũkoragwo na meciiria o mamwe; mũiguanagĩre tha, mwendanage ta ciana cia nyina ũmwe, mũiguanagĩre tha o na mwĩnyiihanagĩrie.

9 Rĩrĩa mwarumwo tigagaai kwĩrumĩra, o na rĩrĩa mwekwo ũũru tigagaai kwĩrĩhĩria; kaba o na mwekwo maũndũ macio moothe mũraathimanage, tondũ kĩraathimo nĩkĩo Ngai aamwĩrĩire rĩrĩa aamwĩtire.

10 O ta ũrĩa maandĩko moigĩĩte atĩrĩ:

“Mũndũ ũrĩa wendeete muoyo wake,

na akeendaga gũkorwo akeneete,

no mũhaka atigage kwaria maũndũ mooru,

na atigage kũheenania.

11 No mũhaka atige gwĩkaga maũndũ mooru,

eekage marĩa meega,

na no mũhaka acaragie thaayũ na ngoro yake yothe.

12 Nĩ ũndũ Mwathani aikaraga acũũthĩrĩirie andũ arĩa athingu,

na akaigua mahooya maao,

no andũ arĩa aaganu, nĩamakararagia.”

13 Atĩrĩĩrĩ, angĩkorwo mũrĩ na kĩyo gĩa gwĩka maũndũ marĩa maagĩrĩire-rĩ, nũũ ũngĩkĩmwĩka ũũru?

14 O na mũngĩnyariirwo nĩ ũndũ wa gwĩka wega mũrĩ araathime. Mũtigeetigĩre mũndũ, o na mũtigathĩĩnĩke.

15 Tũũgagĩriai Kristũ ngoroinĩ cianyu na mũmũtĩĩage ta Mwathani. Koragwoi mwĩhaarĩirie hingo ciothe gũcookeria mũndũ ũrĩa ũngĩmũũria ũhoro wa kĩĩrĩgĩrĩro kĩrĩa mũrĩ nakĩo thĩinĩ wanyu,

16 na mwĩkage ũguo na ũhooreri na gĩtĩĩo. Ikaragaai mwĩ na thamiri itarĩ na ũcuuke, nĩ geetha rĩrĩa mwarumwo nĩ andũ arĩa marĩmũcambagia nĩ tondũ mũrĩ arũmĩrĩri a Kristũ magaconoragwo nĩ mĩario yao.

17 Nĩ kaba mũthĩĩnĩkage nĩ tondũ wa gwĩka wega, angĩkorwo nĩkwenda kwa Ngai, handũ ha gũthĩĩnĩkaga nĩ ũndũ wa gwĩka ũũru.

18 Tondũ Kristũ aakuirerĩmwe tu nĩ ũndũ wa meehia ma andũ oothe; o na e mũthingu agĩgĩkua nĩ ũndũ wa andũ eehia nĩguo atũtware harĩ Ngai. Ooragirwo mwĩrĩ, no kĩĩroho akĩgĩa na muoyo,

19 na e na muoyo ũcio wake wa kĩĩroho agĩthiĩ kũhunjĩria maroho marĩa mooheetwo.

20 Maroho macio nĩ ma andũ arĩa maaregeete gwathĩkĩra Ngai rĩrĩa eetereire akirĩrĩirie, rĩrĩa Noa aakaga thabina. Andũ aniini arĩa maarĩ thabinainĩ, o andũ anaana tu, no o maahonokirio na maaĩ,

21 marĩa rĩu maringithanagio na kũbatithio kũrĩa kũmũhonokagia. Kũbatithio ti gũthambia mũndũ gĩko kĩa mwĩrĩ, no nĩ kĩĩranĩro kĩĩrĩirwo Ngai na thamiri ĩtarĩ ũcuuke. Kũbatithio nĩkuo kũmũhonokagia na ũndũ wa kũriũka kwa Jesũ Kristũ,

22 ũrĩa wambatire igũrũ, na rĩu aikarĩĩte guokoinĩ kwa ũrĩo kwa Ngai, kũrĩa aathaga araika oothe o hamwe na moohoti na maahinya moothe ma igũrũ.

Mũtũũrĩre Mũgarũrũku

1 Atĩrĩĩrĩ, tondũ Kristũ nĩanyariirirwo mwĩrĩ-rĩ, o na inyuĩ mwagĩrĩirwo nĩkwĩyũmagĩrĩria mũrĩ na meciiria ta marĩa Kristũ aarĩ namo, nĩ ũndũ mũndũ ũrĩa ũnyariiragwo mwĩrĩ nĩatiganĩĩte na meehia.

2 Kwoguo kĩrekeei kuuma rĩu mũtũũrĩre wanyu gũũkũ thĩ ũkoragwo ũtongoreetio nĩ wendi wa Ngai, no ti merirĩria ma ũmũndũ.

3 Mahinda marĩa mwatũũraga mwĩkaga maũndũ marĩa arĩa matooĩ Ngai meekaga nĩ mathiru. Mwatũũraga mwĩkaga maũndũ ma ũũra thoni, mwĩriragĩria maũndũ mooru, mũrĩĩagwo nĩ njoohi, mũthiaga marugainĩ ma waganu, o na mũthaathayagia mĩhianano.

4 Andũ arĩa matooĩ Ngai rĩu nĩmagegeete nĩ tondũ mũtiranyiitanĩra nao mĩtugoinĩ ĩyo ya waganu, na nĩmarakĩmũcambia.

5 Ĩndĩ no mũhaka makaaheana ũhoro wao harĩ Ngai ũrĩa wĩhaarĩirie gũgaaciirithia arĩa me muoyo na arĩa makuĩte.

6 Kĩu nĩkĩo gĩatũmire Ũhoro ũrĩa Mwega ũhunjĩrio o na andũ arĩa akuũ, o acio maatuĩrĩirwo mũtũũrĩreinĩ wao wa kĩĩmwĩrĩ o ta ũrĩa andũ arĩa angĩ oothe matuagĩrwo, magĩkĩhunjĩrio nĩ geetha mũtũũrĩreinĩ wao wa kĩĩroho maikarage ta Ngai.

Aramati eega a iheeo cia Ngai

7 Atĩrĩĩrĩ, ithirĩro rĩa maũndũ moothe nĩrĩkuhĩrĩirie. Kwoguo mwĩnyiitageei maũndũinĩ moothe, na mwĩhũũgage nĩ geetha mũhotage kũhooya.

8 No ũndũ ũrĩa mũnene gũkĩra marĩa mangĩ moothe, nĩ mũndũ eendage ũrĩa ũngĩ na ngoro yake yothe, nĩ tondũ wendo nĩũhumbagĩra meehia maingĩ.

9 Ningĩ tuganagaai mũtekũng’oong’oora.

10 O mũndũ ahaana ta mũramati mwega wa iheeo mwanya mwanya cia Ngai, no mũhaka ahũthĩre kĩheeo kĩrĩa aamũkĩrĩĩte kuuma kũrĩ Ngai kũguna andũ arĩa angĩ.

11 Ũrĩa ũhunjagia no mũhaka ahunjagie ũhoro wa Ngai; ũrĩa ũtungataga no mũhaka atungatage na hinya wake wothe ũrĩa aheetwo nĩ Ngai, nĩ geetha Ngai akumagio maũndũinĩ moothe na ũndũ wa Jesũ Kristũ mwene riiri na hinya wothe kinya tene na tene. Ameni.

Mĩnyamaaro ya Mũkristiano

12 Eendwa aakwa, tigaai kũgega nĩ ũndũ wa magerio marĩa mũragerio namo ta arĩ ũndũ mũgeni ũrathiĩ na mbere gatagatĩinĩ kaanyu.

13 No rĩĩrĩ, kenaai nĩ tondũ nĩmũnyiitanĩire na Kristũ mĩnyamaaro yake, nĩguo mũgaakorwo mũkeneete na mũcanjamũkĩĩte rĩrĩa riiri wake ũkaaguũrio.

14 Gũkena-rĩ, nĩ inyuĩ angĩkorwo mũrarumwo tondũ mũrĩ arũmĩrĩri a Kristũ; ũguo nĩkuonania atĩ Roho ũrĩa wa riiri, na nĩ we Roho wa Ngai, arĩ thĩinĩ wanyu.

15 Angĩkorwo mũndũ nĩekũnyariirĩka, ndakaae kũnyariirĩka nĩ ũndũ nĩ mũũragani kana mũici kana mwĩki naaĩ kana mũndũ ũtoonyagĩrĩra maũndũ ma andũ arĩa angĩ.

16 No mũndũ angĩnyariirĩka tondũ nĩ Mũkristiano, ũndũ ũcio ndũkaamũconore; nĩacookerie Ngai ngaatho nĩ tondũ nĩ Mũkristiano.

17 Ihinda nĩikinyu rĩa ituĩro kwambĩrĩria, na andũ a Ngai nĩ o mekwambĩrĩria gũtuĩrwo. Angĩgĩkorwo nĩ ithuĩ tũkwambĩrĩra gũtuĩrwo-rĩ, hiihi gũgakĩhaana atĩa na arĩa mateetĩkĩĩtie Ũhoro ũrĩa Mwega wa Ngai?

18 O ta ũrĩa maandĩko moigĩĩte atĩrĩ:

“Angĩkorwo nĩ hinya mũndũ ũrĩa mũthingu kũhonoka-rĩ,

arĩa mateetĩkĩĩtie Ngai na eehia makaarigĩrĩria atĩa?”

19 Kwoguo kĩrekeei andũ arĩa manyariirĩkaga kũringana na wendi wa Ngai, mathiĩ o na mbere gwĩka wega, nayo mĩoyo yao mamĩĩhokere Mũũmbi ũrĩa ũhingagia ũrĩa eeranĩire.

Rũũru rwa Ngai

1 Ndĩ na ũndũ ngwenda kwĩra athuuri a kanitha arĩa makoragwo gatagatĩinĩ kaanyu, amu o na niĩ ndĩ mũthuuri wa kanitha o ta o. O na ningĩ ndĩ mũira wa mĩnyamaaro ya Kristũ, o na ndĩ ũmwe wa kũnyiitanĩra na inyuĩ riiri wake ũrĩa ũkaaguũrio.

2 Atĩrĩĩrĩ, tuĩkaai arĩithi a rũũru rũrĩa Ngai aamũneire, na mũrũmenyagĩrĩre mwĩ na wendo mũnene o ta ũrĩa Ngai eendeete, mũtekũringĩrĩrio. Rutagaai wĩra wanyu na ũndũ wa kwĩrutĩra no ti tondũ nĩmwetereire gũkaarĩhwo.

3 Tigagaai kũhaana ta mũrenda gwatha arĩa mũneetwo mũmamenyagĩrĩre, no rekeei mĩthiĩre yanyu ĩtuĩke ya kũmoonagĩrĩria njĩra ĩrĩa njega.

4 Na rĩĩrĩ rĩrĩa Mũrĩithi Ũrĩa Mũnene agooka, nĩmũkaaheeo thũmbĩ ya riiri ĩrĩa ĩtakaagarũrũka.

5 O na inyuĩ andũ eethĩ heyagaai arĩa akũrũ gĩtĩĩo. No mũhaka mũtuĩke enyiihia na mũtungatanagĩre inyuĩ eene; tondũ maandĩko moigĩĩte atĩrĩ, “Ngai nĩareganaga na andũ arĩa etĩĩi, no arĩa menyiihagia nĩamakinyagĩria wega wake.”

6 Nĩ ũndũ ũcio mwĩnyiihagiei mũtongoreetio nĩ hinya wa Ngai, nĩguo amũtũũgagĩrie hĩndĩ ĩrĩa yagĩrĩire yakinya.

7 Rekagĩrĩriai Ngai maũndũ moothe marĩa mamũthĩĩnagia, nĩ tondũ nĩamũrũmbũyagia.

8 Ikaragaai mwĩiguĩte na mwĩhũũgage! Nĩ ũndũ thũ yanyu Ngoma acangaga ta mũrũũthi ũkũrarama ũgĩcaria mũndũ wa kũrĩa.

9 Rũmiai wĩtĩkio wanyu na nĩmũkũhota kũmwĩtiiria. Tondũ nĩmũũĩ atĩ andũ arĩa angĩ meetĩkĩĩtie ta inyuĩ thĩinĩ wa thĩ yothe noguo maranyariirĩka.

10 No wona mwanyariirĩka kwa ihinda iniini, Ngai mwene wega wothe, o we wamwĩtire mũgae riiri wake wa tene na tene mwĩ thĩinĩ wa Kristũ, nĩekũmũtua aagĩrĩru, na amũikaragie mũrĩ arũmu, mwĩ na hinya, na mwĩ na mũthingi ũrĩa wa ma.

11 Ũthamaki ũrotuĩka wake kinya tene na tene! Ameni.

Ngeithi cia mũthia

12 Marũa maya makuhĩ ũũ ndĩrateithĩrĩrio kũmwandĩkĩra nĩ Sila ũrĩa nduaga mũrũ wa Ithe witũ mwĩhokeku. Ndĩrenda kũmũũmĩrĩria na ndĩmũrutĩre ũira wakwa ndĩmwĩre atĩ, ũyũ nĩguo wega wa Ngai wa ma. Mwĩhandeei wega thĩinĩ waguo.

13 Kanitha wa gũũkũ Babiloniũrĩa o naguo ũthuurĩĩtwo nĩ Ngai nĩwamũgeithia, o na mũrũ wakwa Mariko nĩamũgeithia.

14 Geithaniai inyuothe o mũndũ na ũrĩa ũngĩ na ngeithi cia kũmumunyana cia wendo wa Ũkristiano.

Thaayũ ũrogĩa na inyuĩ inyuothe andũ a Kristũ.

Gũtaarĩria

Marũa ma Keerĩ ma Petero maandĩkĩirwo gĩkundi kĩnene kĩa Akristiano a mbere. Ũndũ ũrĩa mũnene ũrĩa watũmire maandĩkwo nĩkũhũũra mawĩra ma arutani a maheeni na ciĩko njũru iria cioimanaga na moorutani macio. Kĩrĩa kĩngĩniina mathĩĩna macio moothe nĩkũrũmia ũmenyo ũrĩa wa ma wa Ngai o na wa Mwathani Jesũ Kristũ. Ũmenyo ũcio nĩ ũrĩa wamenyithanirio nĩ andũ arĩa meyoneire Jesũ na makĩigua akĩrutana. Mwandĩki nĩarũĩĩte mũno na ũrutani wa andũ arĩa moigaga atĩ Kristũ ndagacooka rĩngĩ. Oigĩĩte atĩ gĩtũmi gĩa Kristũ acererwo nĩgũcooka nĩ tondũ Ngai “ndeendaga mũndũ o na ũmwe akoora, no eendaga oothe merire meehia maao (2 Pet 3.9).”

Maũndũ marĩa marĩ marũainĩ maya

Gũtaarĩria 1.1-2

Gwĩtwo kwa Akristiano 1.3-21

Arutani a maheeni 2.1-22

Gũũka kwa mũthia gwa Kristũ 3.1-18

1 Kuuma kũrĩ niĩ Simoni Petero, ndungata na mũtũmwo wa Jesũ Kristũ,

Kũrĩ andũ arĩa maheetwo wĩtĩkio wa goro o ta ũrĩa twĩ naguo nĩ ũndũ wa ũthingu wa Ngai witũ, na wa mũhonokia witũ Jesũ Kristũ:

2 Wega na thaayũ iromũingĩhĩra na ũndũ wa kũmenya Ngai o hamwe na Mwathani witũ Jesũ.

Gwĩtwo nĩ Ngai na gũthuurwo

3 Rĩu-rĩ, hinya wa Ngai nĩũtũheete indo ciothe iria tũbatairio nĩcio cia gũtũhotithia gũikara tũrĩ athingu kũna, na ũndũ wa kũmenya ũrĩa watwĩtire tũnyiitanĩre naake riiri na wega wake.

4 Nĩ ũndũ ũcio nĩatũheete iheeo cia bata na cia goro mũno iria eeranĩire, nĩ geetha imũhotithagie kweherera merirĩria mooru ma gũũkũ thĩ, mũkĩhote kũhaanana naake.

5 Nĩ ũndũ wa gĩtũmi kĩu, geriai na kĩyo mũno kuongerera wagĩrĩru harĩ wĩtĩkio wanyu; na harĩ wagĩrĩru muongerere ũũgĩ;

6 na harĩ ũũgĩ muongerere kwĩnyiita maũndũinĩ moothe na harĩ kwĩnyiita maũndũinĩ moothe muongerere gũkirĩrĩria; na harĩ gũkirĩrĩria muongerere ũngai;

7 na harĩ ũngai muongerere kũigua mwĩ ciana cia nyina ũmwe; na harĩ kũigua mwĩ ciana cia nyina ũmwe muongerere wendani.

8 Nĩ tondũ mũngĩkorwo mwĩ na maũndũ macio thĩinĩ wanyu na maikare makĩongererekaga nĩmarĩtũmaga mũgĩe na kĩyo gĩa kũmenya Mwathani witũ Jesũ Kristũ.

9 Mũndũ ũrĩa ũtarĩ na maũndũ macio nĩ mũtumuumu wonaga o haniini, na nĩariganĩirwo atĩ nĩathambirio meehia maake marĩa aarĩ namo mbere.

10 Kwoguo aariũ na aarĩ a Ithe witũ, geriai na kĩyo mũno mũtũme gwĩtwo na gũthuurwo kwanyu kũrũme biũ, tondũ mweka ũguo mũtirĩ hĩndĩ mũgaatigana na wĩtĩkio wanyu.

11 Hĩndĩ ĩyo nĩrĩo mũgeetĩkĩrio gũtoonya Ũthamakiinĩ wa tene na tene wa Mwathani na Mũhonokia witũ Jesũ Kristũ.

12 Nĩ ũndũ ũcio nĩndĩrĩmũririkanagia ũhoro wa maũndũ macio hingo ciothe, o na angĩkorwo nĩmũrĩĩkĩĩtie kũmamenya na makarũma wega thĩinĩ wa ũhoro wa ma ũrĩa mwĩ naguo.

13 Ngwĩciiria nĩ wega gũtũũra ndĩmũririkanagia maũndũ macio ihinda rĩrĩa rĩothe ngũtũũra muoyo.

14 Nĩ amu nĩnjũũĩ atĩ mwĩrĩ ũyũ nĩũkũnjeherera o narua o ta ũrĩa ndaguũrĩirio nĩ Mwathani witũ Jesũ Kristũ.

15 Kwoguo nĩngũgeria mũno kuona atĩ, thuutha wa gũkua gwakwa nĩmũrĩhotaga kũririkana maũndũ macio hingo ciothe.

Aira arĩa moonire riiri wa Kristũ

16 Ithuĩ tũkĩmũmenyithia ũhoro wa magegania wa gũũka kwa Mwathani witũ Jesũ Kristũ, tũtiahũthĩrire ng’ano cia gwĩthondekerwo nĩ andũ. Ithuĩ nĩkuona tweyoneire ũkaru wake na maitho maitũ.

17 Ningĩ ithuĩ twarĩ ho rĩrĩa aaheirwo gĩtĩĩo na riiri nĩ Ngai Ithe, rĩrĩa mũgambo wokire kũrĩ we uumĩĩte kũrĩ Ũrĩa Mwene Riiri Ũrĩa Mũnene ũkiuga atĩrĩ, “Ũyũ nĩ we Mũũriũ wakwa nyendeete mũno na ũngenagia!”

18 Ithuĩ eene nĩtweigwĩrĩire mũgambo ũcio ũkiuma na igũrũ rĩrĩa twarĩ naake kĩrĩmainĩ kĩrĩa gĩtheru.

19 Ningĩ ũhoro ũrĩa warathirwo nĩ anabii nĩũtwĩkĩrĩĩte hinya o mũno makĩria. No mũgĩĩke wega mũno makĩria mũngĩũthikĩrĩria amu ũhaana ta taawa wakanĩĩte handũ ndumainĩ o kinya mũthenya ũkinye, ũtheri wa njata ya rũũciinĩ ũkenge ngoroinĩ cianyu.

20 No rĩĩrĩ, mbere ya maũndũ moothe mwagĩrĩirwo nĩkũmenya atĩ gũtirĩ mũndũ ũngĩhota gũtaũra ũrathi ũrĩa wĩ Maandĩkoinĩ we mwene.

21 Nĩ tondũ gũtirĩ ũrathi wokire nĩ ũndũ wa kwenda kwa mũndũ, no andũ maatongoragio nĩ Roho Mũtheru makĩheana ũhoro kuuma kwĩ Ngai.

Arutani a maheeni

1 Ĩndĩ anabii a maheeni nĩmookire gatagatĩinĩ ka andũ matukũinĩ ma tene na ũguo noguo arutani a maheeni magooka gatagatĩinĩ kaanyu. Nĩmakaareehe na hitho maũndũ ma gũthũũkia, na moorutani mahĩtanu, na nĩmagaakaana Mwathani ũrĩa wamakũũrire. Nĩ ũndũ ũcio nĩmakeereehere kũniinwo kwa narua.

2 Nao andũ aingĩ nĩmakaarũmĩrĩra mĩtugo yao mĩũru, na nĩ ũndũ wa ciĩko ciao, njĩra ya ũhoro wa ma nĩgaacambio.

3 Ningĩ nĩ ũndũ wa gũkoroka kwao nĩmakaamwĩraga ng’ano cia maheeni nĩguo metongie na inyuĩ, nao matũire marĩ atuĩre kuuma o kĩambĩrĩria, na ũrĩa ũkaamaniina ndarĩ hingo arĩ akoma!

4 Ngai ndaiguĩrĩire tha araika arĩa meehirie no aamaikirie icuainĩ kũrĩa matũũraga mooheetwo ndumainĩna mĩnyororo, meetereire Mũthenya wa Ituĩro.

5 O na ndaiguĩrĩire andũ a tene tha, rĩrĩa aareehire mũiyũro wa maaĩ kũrĩa kwarĩ andũ arĩa mateetĩkĩĩtie; no Noa ũrĩa wahunjagia Ũhoro wa ũthingu nĩahonokirio hamwe na andũ angĩ mũgwanja.

6 Ngai nĩatuĩrĩire matũũra ma Sodomu na Gomora akĩmacina biũ na mwaki. Magĩgĩtuĩka kĩonereria kĩa ũrĩa arĩĩkaga andũ arĩa matamwĩtĩkĩĩtie.

7 Ningĩ nĩahonokirie Loti, ũrĩa warĩ mũthingu na waiguithagio kĩeha mũno nĩ mĩtugo ya ũũra thoni ya andũ arĩa aaganu.

8 Mũndũ ũcio mũthingu aatũũraga gatagatĩinĩ kaao, na maũndũ ma waganu marĩa eiguagĩra na akeyonera o mũthenya nĩmaathĩĩnagia ngoro yake thingu.

9 Kwoguo Mwathani nĩoĩ kũhonokia andũ arĩa marĩ na ũngai kuuma magerioinĩ, na kũiga arĩa aaganu iherithiainĩ kinya Mũthenya wa Ituĩro ũkinye,

10 na makĩria arĩa marũmagĩrĩra merirĩria mooru ma mĩĩrĩ yao na makanyarara ũhoti wa Ngai.

Arutani acio a maheeni nĩ njoorua cia maũndũ, andũ egaathi, na matirĩ guoya makĩruma ciũmbe cia igũrũ iria irĩ riiri.

11 O na angĩkorwo araika me hinya gũkĩra arutani acio a maheeni-rĩ, matimarumaga makĩmathitanga kwĩ Mwathani.

12 No andũ acio meciiria maao no ta ma nyamũ cia gĩthaka iria ciombirwo cia kũnyiitagwo nĩ andũ ikooragwo; moomokagĩra na irumi maũndũ moothe marĩa mataramenya. Andũ acio makaaniinwo o ta nyamũ cia gĩthaka,

13 na maherithio ũũru nĩ ũndũ wa ciĩko ciao njũru. Gĩkeno kĩao gĩkoragwo arĩ o gwĩkenia na mĩĩrĩ yao mũthenya barigici; andũ acio nĩ a gĩconoko na a kũmũcambithia rĩrĩa mooka kũrĩanĩra na inyuĩ; hingo ĩyo yothe makoragwo magĩkenio nĩ mĩtugo yao mĩũru!

14 Matikoragwo makĩenda kũrora kĩndũ kĩngĩ tiga o atumia arĩa itharia, na maikaraga makĩhĩahĩaga nĩ meehia. Nĩmaheenagĩrĩria arĩa ahũthũ ngoro makamatoonyia mũtegoinĩ, nacio ngoro ciao ikoragwo imenyereetio o ũhoro wa gũkoroka. Andũ acio nĩmakinyĩirwo nĩ kĩrumi kĩa Ngai!

15 Nĩmatigĩĩte njĩra ĩrĩa nũngarũ makoora; magakĩrũmĩrĩra njĩra ĩrĩa yarũmĩrĩirwo nĩ Balaamu mũrũ wa Beori, ũrĩa wendeete mbeeca iria oonaga nĩ ũndũ wa gwĩka waganu.

16 Ĩndĩ nĩakũũmirwo nĩ ũndũ wa meehia maake, ndigiri yake ĩkĩaria ta mũndũ ĩgĩgĩtũma atige gũcooka gwĩka ciĩko icio ciake cia ũgũrũki.

17 Andũ acio mahaana ta ithima ihũĩte maaĩ, na ta matu makĩhũũrwo nĩ kĩhuuhũkanio; acio-rĩ Ngai nĩamaigĩire handũ ndumainĩ ĩrĩa nene.

18 Tondũ rĩĩrĩ, maaragia maũndũ ma ũrimũ na ma mwĩtĩĩo, makĩhũthagĩra merirĩria mooru ma mwĩrĩ magakĩguucagĩrĩria andũ arĩa marambĩrĩria kweherera andũ arĩa matũũraga meehagia.

19 Ningĩ makameeragĩra wĩyathi, o rĩrĩa o eene me ngombo cia mĩtugo ĩrĩa mĩũru, nĩ tondũ mũndũ akoragwo e ngombo ya kĩndũ o ro gĩothe kĩrĩa kĩmũhooteete.

20 Nĩ ũndũ angĩkorwo andũ no mahonokio kuuma maũndũinĩ mooru ma gũũkũ thĩ na ũndũ wa kũmenya Mwathani witũ, o we mũhonokia witũ Jesũ Kristũ, magacooka makanyiitwo na makahootwo nĩ maũndũ o ro macio rĩngĩ-rĩ, andũ acio matuĩkaga ooru gũkĩra ũrĩa maarĩ hĩndĩ ya mbere.

21 Nĩ kaba matangĩamenyeete njĩra ya ũthingu, gũkĩra kũmĩmenya magacooka kweherera maathani matheru marĩa maheirwo.

22 Ũndũ ũrĩa andũ acio meekĩĩte nĩwonanĩĩtie atĩ nĩ ũhoro wa ma ũrĩa thimo ciugaga atĩ, “Ngui ĩcookaga kũrĩa o matahĩko maayo,” nayo “Ngũrũe yarĩĩkia gũthambio ĩcookaga ĩgathiĩ kwĩgaragaria o mũtondoinĩ.”

Kĩĩranĩro gĩa gũũka kwa Mwathani

1 Eendwa aakwa, maya nĩ marũa maakwa ma keerĩ kũmwandĩkĩra. Marũainĩ macio meerĩ nĩngereetie kwarahũra meciiria maanyu ngĩmũririkanĩa maũndũ macio.

2 Nĩmwagĩrĩirwo nĩkũririkana ciugo iria ciaririo matukũinĩ ma tene nĩ anabii arĩa atheru, o na watho wa Mwathani, o we Mũhonokia. Watho ũcio nĩguo mwareeheirwo nĩ atũmwo aanyu.

3 Wa mbere mwagĩrĩirwo nĩkũmenya atĩ matukũinĩ maya ma kũrigĩrĩria nĩkũrĩũka andũ arĩa mĩikarĩre yao ĩrĩathagwo nĩ merirĩria maao mooru.

4 Marĩmũnyũrũragia makĩmũũragia atĩrĩ, “Githĩ ndeeranĩire atĩ nĩagooka? E kũ rĩu? Kuuma o rĩrĩa maithe maitũ maakuire gũtirĩ ũndũ o na ũmwe mũgarũrũku; kũhaana o ta ũrĩa kwahaanaga kuuma rĩrĩa thĩ yombirwo!”

5 Marĩmũnyũrũragia o makĩmenyaga ũhoro wa ma atĩ tene mũno Ngai nĩ we wathanire kũgĩe igũrũ na thĩ. Thĩ yombirwo na maaĩ kuuma kwĩ maaĩ

6 na thĩ ĩrĩa ya tene nĩyaniinirwo na mũiyũro wa maaĩ.

7 Igũrũ na thĩ iria ikoragwo kuo rĩu ikoragwo cigitĩirwo nĩ watho o ũcio wa Ngai nĩ geetha ikaaniinwo na mwaki. Ciigĩĩtwo cieterere mũthenya ũrĩa andũ arĩa mateetĩkĩĩtie Ngai magaatuĩrwo na maniinwo.

8 No rĩĩrĩ, eendwa aakwa, mũtikaariganĩrwo nĩ ũndũ ũyũ ũmwe atĩ kũrĩ Mwathani mũthenya ũmwe no ta mĩaka ngiri (1,000), na mĩaka ngiri (1,000) no ta mũthenya ũmwe.

9 Mwathani ndeguucagia kũhingia ciĩranĩro ciake ta ũrĩa andũ amwe meciiragia atĩ nĩeguucagia; amũkiragĩrĩria tondũ we ndarĩ mũndũ o na ũmwe eendaga akoora, no eendaga andũ oothe merire meehia maao.

10 No rĩĩrĩ, Mũthenya wa Mwathani ũgooka o ta mũici. Mũthenya ũcio igũrũ nĩrĩgaathira na mũrurumo mũnene, nacio ciũmbe ciothe iria tuonaga matuinĩ nĩikaahĩa ithire, nayo thĩ na indo ciothe iria irĩ kuo icinwo o biũ.

11 Tondũ ũguo nĩguo indo ciothe igaakĩniinwo-rĩ, mũkĩagĩrĩirwo nĩ gũkorwo na mĩthiĩre ĩtariĩ atĩa? Mwagĩrĩirwo nĩ gũkorwo na mĩthiĩre mĩtheru, na mwĩrutĩire Ngai,

12 mũgĩtaanyaga na mũkĩĩriragĩria mũno gũũka kwa Mũthenya ũcio wa Ngai, o ũcio igũrũ rĩkaahĩa rĩthire, nacio indo ciothe iria cionagwo igũrũ itwekio nĩ mwaki.

13 No rĩĩrĩ, nĩtwetereire igũrũ rĩerũ na thĩ njerũ iria Ngai eeranĩire, kũrĩa kũiyũire ũthingu.

14 Tondũ ũcio eendwa aakwa, kuona atĩ nĩmwetereire Mũthenya ũcio, geriai na kĩyo mũno gũkoragwo mũrĩ athingu, mũtarĩ na ũcuuke mbere ya maitho ma Ngai, na mũkoragwo mwĩ na thaayũ.

15 Ningĩ tuai gũkirĩrĩria kwa Mwathani witũ ta arĩ mweke wanyu wa ũhonokio, o ta ũrĩa mũrũ wa Ithe witũ Paũlũ ũrĩa twendeete aamwandĩkĩire kũringana na ũũgĩ ũrĩa aaheetwo nĩ Ngai.

16 Ũguo nĩguo oigĩĩte marũainĩ maake moothe rĩrĩa ekwaria ũhoro ũyũ. Nĩkũrĩ maũndũ mamwe maritũ thĩinĩ wa marũa maake, marĩa andũ arĩa ahũhũũtĩki na mĩgarũ magarũraga o ta ũrĩa magarũraga maũndũ mangĩ Maandĩkoinĩ, na kwoguo makeeniina o eene.

17 No rĩĩrĩ, inyuĩ eendwa aakwa nĩmũrĩĩkĩĩtie kũmenya ũguo. Tondũ ũcio mwĩmenyerereei mũtikaae gũkaanahĩtithio nĩ mahĩtia ma andũ aregenyũku, muume ũhoroinĩ wanyu wa kwĩhanda wega.

18 Ĩndĩ, thiĩi o na mbere gũkũra thĩinĩ wa wega na ũmenyo wa Mwathani na Mũhonokia witũ Jesũ Kristũ. Naake arogoocwo rĩu kinya tene na tene! Ameni.