Categories
2 Timotheo

2 Timotheo 1

1 Kuuma kũrĩ niĩ Paũlũ, mũtũmwo wa Kristũ Jesũ nĩ ũndũ wa kwenda kwa Ngai, o niĩ ndatũmirwo ngaheane ũhoro wa muoyo ũrĩa twĩrĩirwo thĩinĩ wa Kristũ Jesũ.

2 Kũrĩ Timotheo mwana wakwa nyendeete:

Wega na tha na thaayũ kuuma kwĩ Ngai Ithe, na kwĩ Mwathani witũ Kristũ Jesũ irogĩa nawe.

Gũcookia ngaatho na kũũmĩrĩrio

3 Niĩ nĩnjookagĩria Ngai ngaatho, o we ũrĩa ndungatagĩra na thamiri ĩtarĩ na ũcuuke o ta ũrĩa maithe maakwa ma tene meekaga. Ndĩmũcookagĩria ngaatho hĩndĩ ĩrĩa yothe ngũkũririkana mahooyainĩ maakwa ũtukũ na mũthenya.

4 Hĩndĩ ĩrĩa ndaririkana maithori maaku-rĩ, nĩnjiguaga ngĩenda gũkuona, nĩguo njiyũrwo nĩ gĩkeno.

5 Nĩndirikanaga wĩtĩkio waku ũtarĩ wa ũhinga, wĩtĩkio o ta ũcio nĩguo warĩ na ũcũũguo Loisi na maitũguo Eunike. Ndĩ na ma ngiuga atĩ, o nawe wĩ na wĩtĩkio o ta ũcio wao.

6 Kwoguo niĩ ndĩragĩkũririkania atĩ ndũkaahorie mwaki wa kĩheeo kĩa Ngai kĩrĩa waheirwo hĩndĩ ĩrĩa ndakũigĩrĩire mooko.

7 Amu Ngai ndatũheire Roho wa gũtwĩkĩraga guoya; aatũheire roho wa gũtwĩkĩraga hinya, wendani, na kwĩnyiita maũndũinĩ moothe.

8 Kwoguo ndũgagĩconoke ũkiumbũra Mwathani witũ, kana ũkĩheana ũira wakwa niĩ njoheetwo nĩ ũndũ wake. Kaba o nawe ũkoragwo ũgĩthĩĩnĩka nĩ ũndũ wa Ũhoro ũrĩa Mwega, amu Ngai nĩarĩkũheaga hinya.

9 Ngai nĩ we watũhonokirie na agĩtwĩta tũtuĩke andũ aake. Ndaatwĩkire ũguo nĩ ũndũ wa ũrĩa twekĩĩte o tiga nĩ ũndũ wa kwenda gwake o na wega wake mwene. Wega ũcio Ngai aatũheire na ũndũ wa Jesũ Kristũ kuuma tene na tene.

10 Wega ũcio rĩu nĩtũguũrĩirio na gũũka kwa Mũhonokia witũ Kristũ Jesũ. We nĩaniinire hinya wa gĩkuũ, na agĩtũmenyithia ũhoro wa muoyo wa tene na tene na ũndũ wa kũhunjia ũhoro ũrĩa Mwega.

11 Ũhoro ũcio Mwega nĩguo niĩ ndathuurirwo nduĩke mũhunjia, mũtũmwo na mũrutani waguo,

12 na kĩu nĩkĩo gĩtũmi kĩrĩa gĩtũmaga niĩ thĩĩnio. Na niĩ ndiconokaga amu nĩnjũũĩ Ngai ũrĩa njĩtĩkĩĩtie, na ndĩ na ma atĩ nĩekũgitĩra maũndũ marĩa anjĩhokeirekinya mũthenya ũcio ũgaakinya.

13 Ciugo iria waiguire kuuma kũrĩ niĩ-rĩ, cirũmie wĩ na wĩtĩkio na wendo thĩinĩ wa Kristũ Jesũ.

14 Maũndũ meega marĩa wee wĩhokeirwo nĩ Mwathani-rĩ, magitagĩre ũteithĩĩtio nĩ Roho Mũtheru ũrĩa ũikaraga thĩinĩ witũ.

15 Atĩrĩĩrĩ, nĩũũĩ wega atĩ andũ oothe a Asia nĩmandiganĩirie, amwe aao nĩ Fegelo na Herimogena.

16 Mwathani aroiguĩra andũ a mũciĩ wa Onesiforo tha, amu aanatũma njookwo nĩ thaayũ kaingĩ. We ndaconokire nĩkuona atĩ ndĩ muohe,

17 amu hĩndĩ ĩrĩa aakinyire Roma nĩanjaririe na kĩyo mũno o kinya akĩnyona.

18 Ningĩ wee nĩũũĩ wega ũrĩa aandeithirie hĩndĩ ĩrĩa ndaarĩ Efeso. Ndamũhoera Mwathani akaamũiguĩra tha Mũthenya ũcio!

Categories
2 Timotheo

2 Timotheo 2

Mũthigari mwĩhokeku wa Jesũ Kristũ

1 Wee mwana wakwa-rĩ, ĩkagĩrwo hinya nĩ wega wa Ngai ũrĩa ũtuĩkĩĩte witũ thĩinĩ wa Kristũ Jesũ.

2 Maũndũ marĩa waiguire kuuma kũrĩ niĩ ngĩrutana mbere ya aira aingĩ-rĩ, manengerane kũrĩ andũ ehokeku, arĩa ũkũmenya atĩ nĩmekũhota kũruta andũ angĩ.

3 Ĩtĩkĩra gũthĩĩnĩka ta mũũthigari mwĩhokeku wa Kristũ Jesũ.

4 Hĩndĩ ĩrĩa mũũthigari e mbaarainĩ akoragwo akĩenda gũkenia mũnene wake, na kwoguo ndahuutanagia na maũndũ marĩa marĩ na nja ya ũũthigari.

5 O naake mũndũ angĩthiĩ mathaakoinĩ ndarĩ hĩndĩ angĩheeo kĩheeo atathaakĩĩte kũringana na mawatho.

6 Mũrĩmi aagĩrĩirwo nĩ gũkorwo arĩ wa mbere kũrĩa maciaro, amu nĩ we ũnogaga.

7 Tawĩciirie ũhoro ũcio ndĩroiga amu Mwathani nĩegũkũhotithia kũmenya maũndũ moothe.

8 Ririkanaga Jesũ Kristũ ũrĩa wariũkire akiuma kũrĩ arĩa akuũ, o we ũrĩa woimĩĩte rũciaroinĩ rwa Daudi, o ta ũrĩa niĩ hunjagia Ũhoroinĩ ũrĩa Mwega.

9 Nĩ ũndũ wa kũhunjia Ũhoro ũcio Mwega-rĩ, nĩndĩranyariirwo kinya ngoohwo na mĩnyororo ta mũndũ ũgereete ngero. No rĩĩrĩ, kiugo kĩa Ngai ti kĩohe.

10 Nĩkĩo niĩ nyũmagĩrĩria mathĩĩna moothe nĩ ũndũ wa andũ arĩa athuure a Ngai, nĩ geetha o nao mahonokio nĩ Kristũ Jesũ na magĩe na riiri wa tene na tene.

11 Ũhoro ũyũ nguuga haaha nĩ wa ma, atĩrĩ,

“Angĩkorwo nĩtwakuire hamwe naake, nĩtũgaatũũrania naake.

12 Akorwo nĩtũgũthiĩ na mbere kũũmĩrĩria, nĩtũgaathana naake.

Akorwo nĩtũkũmũkaana, o naake nĩagaatũkaana.

13 Akorwo nĩtũkwaga kwĩhokeka,

we atũũraga e mwĩhokeku, tondũ ndangĩĩkaana we mwene.”

Mũruti wa wĩra mwĩtĩkĩrĩku

14 Ririkanagia andũ aaku maũndũ macio, na ũmakaanagie mbere ya Mwathaniũhoro wa gũkararanĩria ciugo, tondũ ngarari itirĩ bata, wĩra wacio nĩgũthũũkia ithũũkagia arĩa marathikĩrĩria.

15 Geria o ũrĩa ũngĩhota gũtuĩka mũndũ mwĩtĩkĩrĩku mbere ya Ngai. Tuĩka mũruti wa wĩra ũtaconokaga nĩ ũndũ wa wĩra ũrĩa arutaga, na ũrutanaga ũhoro wa ma arũngĩrĩirie.

16 Ehagĩrĩra ndeereti itarĩ na ũngai na cia ũrimũ, wĩra wacio no gũtwara andũ kũraaya na Ngai.

17 Ndeereti ta icio itheyaga ta kĩronda kĩa ndĩĩra kĩrĩa gĩtahonaga. Atĩrĩĩrĩ, Humenayo na Fileto nĩ andũ eerĩ marutanĩĩte ũhoro ta ũcio wa ngarari tondũ

18 nĩmoimĩĩte ũhoroinĩ ũrĩa wa ma, makahunjagia atĩ ũhoro wa kũriũka nĩwahĩtũkire. Nĩ ũndũ ũcio nĩmathũũkĩĩtie wĩtĩkio wa andũ amwe arĩa meetĩkĩĩtie.

19 No rĩĩrĩ, mũthingi ũrĩa Ngai aakire ndũngĩenyenyeka; na wĩkĩrĩĩtwo mũhũũri na ciugo ici: “Mwathani nĩoĩ andũ aake” na, “Mũndũ o wothe ũkayagĩra rĩĩtwa rĩa Mwathani nĩetheeme maũndũ ma waganu.”

20 Atĩrĩĩrĩ, nyũmba ĩrĩa nene ya mũndũ ndĩkoragwo o indo cia thahabu na cia betha cio ciiki, no nĩkoragwo o na indo cia mbaaũ na cia rĩũmba. Indo imwe cia icio ihũthagĩrwo o hĩndĩ ĩrĩa kwĩ na ũndũ mũnene, na iria ingĩ ihũthagĩrwo hĩndĩ ciothe.

21 Mũndũ angĩĩtheria kuuma kwĩ maũndũ marĩa mooru, arĩhũthagĩrwo hĩndĩ ĩrĩa kwĩ na bata mũnene, tondũ nĩamũrĩĩtwo agatuĩka wa bata harĩ mũmwathi, na nĩehaarĩirie kũhũthĩrwo gwĩka gĩĩko o ro gĩothe kĩega.

22 Ehagĩrĩra merirĩria marĩa mooru ma wĩthĩ, ĩndĩ rũmagĩrĩra maũndũ ma ũthingu, wĩtĩkio, wendani, na thaayũ, wĩ hamwe na andũ arĩa mahooyaga Mwathani me na ngoro theru.

23 Ehagĩrĩra ngarari cia ũrimũ na cia mũhũhũũtĩko nĩ gũkorwo nĩũũĩ atĩ ireehage o haaro.

24 Ndungata ya Mwathani ndĩagĩrĩirwo nĩkũhaarana. Yagĩrĩirwo nĩ gũkorwo ĩ mũndũ wa gũtuga andũ oothe, ĩ mũrutani mwega, na ĩ mũndũ mũkirĩrĩria.

25 Ningĩ yagĩrĩirwo gũkoragwo ĩ mũndũ mũhooreri hĩndĩ ĩrĩa ĩgũtaara andũ arĩa mamĩkararagia, tondũ Ngai ahota kũmahe kamweke ga kwĩrira mamenye ũhoro wa ma.

26 Hĩndĩ ĩyo magĩĩcookerere moime mũtegoinĩ wa Ngoma ũrĩa ũmagwatĩĩtie nĩguo meekage ũrĩa yo ĩkwenda.

Categories
2 Timotheo

2 Timotheo 3

Matukũ ma mũthia

1 Ngwenda ũmenye atĩ, matukũinĩ ma mũthia nĩgũgaakorwo na mahinda maritũ,

2 tondũ hĩndĩ ĩyo andũ magaakorwo marĩ eyendi, akorokeri mbeeca, egaathi, eegani, arumani, andũ mataheaga aciari aao gĩtĩĩo, andũ matarĩ ngaatho na matarĩ atheru,

3 andũ matarĩ na wendani na tha, andũ a kũmenereria arĩa angĩ,mahaana nyamũ, mathũire maũndũ marĩa meega,

4 andũ a gũkunyanĩra arĩa angĩ, arũũgĩrĩri na marĩ na mwĩtĩĩo mũingĩ, andũ a kwenda maũndũ ma ikeno handũ ha kwenda Ngai,

5 na mooĩ ũhoro wa ũthingu no mareganaga na hinya wa ũthingu ũcio. Andũ ta acio mehagĩrĩre.

6 Amu gatagatĩinĩ ka andũ ta acio nĩgũkoragwo andũ arĩa maingagĩrĩra mĩciĩ yene, matoonyagĩrĩra atumia arĩa ahũthũ ngoro, makomereirio nĩ meehia maao na matongoragio nĩ merirĩria ma mwĩrĩ ma mĩthemba yothe.

7 Atumia acio nĩmageragia kwĩruta, no matirĩ hĩndĩ mahotaga gũkinyĩra na kũmenya ũhoro ũrĩa wa ma.

8 O ta ũrĩa Jane na Jambare maakararirie Musa, ũguo noguo o nao andũ acio makararagia ũhoro ũrĩa wa ma. Andũ acio meciiria maao nĩmabuthu, na nĩ andũ magwĩte biũ ũhoroinĩ wa gwĩtĩkia.

9 No rĩĩrĩ, andũ acio matikaahota gũthiĩ na mbere mũno tondũ andũ oothe nĩmakoona ũrimũ wao, o ta ũrĩa kwahaanire na Jane na Jambare.

Mataaro ma mũthia

10 No wee-rĩ, nĩũrũmĩrĩire ũrutani wakwa, mĩtugo yakwa, muorooto wakwa, wĩtĩkio wakwa, gũkirĩrĩria gwakwa, wendo wakwa, gweterera gwakwa na kũũmĩrĩria gwakwa.

11 O na nĩ ũrũmanĩrĩire na kũnyariirwo gwakwa o hamwe na mathĩĩna maakwa moothe. Wee nĩũũĩ ũrĩa ndanyariirirwo hĩndĩ ĩrĩa ndaarĩ Anitiokia, Ikonio, Lusitera, na macio moothe nĩndoomĩrĩirie. No Mwathani nĩandutire maũndũinĩ macio moothe.

12 Mũndũ o wothe ũrĩa wendaga gũikara thĩinĩ wa Jesũ Kristũ o naake nĩarĩnyariiragwo.

13 No rĩĩrĩ, andũ arĩa aaganu na arĩa maheenanagia no gũthiĩ marĩthiyaga magĩkĩragĩrĩria gũthũũka, makĩheenanagia o nao makĩheenagio.

14 No wee-rĩ, ikaraga ũrũmĩĩtie biũ maũndũ marĩa werutire na wetĩkirie, tondũ nĩũũĩ wamamenyire kuuma kũrĩ a.

15 Na ũririkanage atĩ kuuma wĩ mwana nĩũtũire ũũĩ Maandĩko marĩa Matheru, marĩa me hinya wa gũkũhe ũũgĩ ũrĩa ũhonokanagia na ũndũ wa gwĩtĩkia thĩinĩ wa Kristũ Jesũ.

16 Ũhoro wothe ũrĩa wandĩkĩĩtwo Maandĩkoinĩ Ngai nĩ we werire ũrĩa wa wandĩkire kĩrĩa ekwandĩka. Maandĩko nĩ ma bata mũno hĩndĩ ĩrĩa mũndũ ekũrutana ũhoro wa ma, rĩrĩa egũkaanania, rĩrĩa ekũrũnga andũ mahĩtia maao, na hĩndĩ ĩrĩa egũtaarĩria andũ ũhoro wa mũtũũrĩre mwega,

17 nĩguo mũndũ ũrĩa ũtungatagĩra Ngai akoragwo e mwagĩrĩru na ahaarĩirio gwĩka gĩĩko o ro gĩothe kĩega.

Categories
2 Timotheo

2 Timotheo 4

1 Nĩngũgwatha ndĩ mbere ya Ngai na Kristũ Jesũ ũrĩa ũgaatuĩra andũ arĩa me muoyo na arĩa makuĩte, na tondũ nĩarooka gwathana e mũthamaki,

2 atĩ ũhunjagie ũhoro wa Ngai, na ũkoragwo wĩhaarĩirie gwĩka ũguo mahinda marĩa maagĩrĩire o na marĩa mataagĩrĩire, ũiguithagie andũ, ũmakaanagie, ũmoomagĩrĩrie, o na ũkoragwo ũhooreire hingo ciothe ũkĩmaruta.

3 Nĩ gũkorwo mahinda nĩmagooka rĩrĩa andũ makaarega kũrutwo maũndũ ma ma, methuurĩre arutani aao kũringana na merirĩria maao, nao arutani acio mameerage maũndũ marĩa mekũmakenia.

4 Andũ nĩmakaarega gũcooka gũthikĩrĩria ũhoro ũrĩa wa ma, mathikagĩrĩrie o ng’ano cia tũhũ.

5 No wee-rĩ, ikaraga ũhingũrĩĩte maitho na ũkiragĩrĩrie mathĩĩna moothe; rutaga wĩra wa kũhunjia Ũhoro ũrĩa Mwega, na ũhingagie wĩra waku wothe wa gũtungatĩra Ngai.

6 Atĩrĩĩrĩ, ihinda rĩakwa rĩa gũkua nyume muoyoinĩ ũyũ nĩrĩkinyĩĩte; ihinda rĩakwa rĩa kũrutwo igongoona nĩrĩkinyu.

7 Niĩ nĩndũĩĩte mbaara ĩrĩa njega, ihenya rĩakwa nĩndĩrĩkinyĩĩtie mũthia, o na nĩndũũrĩĩtie wĩtĩkio wakwa.

8 Kĩrĩa njetereire no thũmbĩ ya ũhootani ĩrĩa njigĩirwo, ĩrĩa Mwathani ũrĩa ũtuaga ciira na kĩhooto akaahe mũthenya ũcio, na to niĩ nyiiki ngaaheeo thũmbĩ ĩyo, amu andũ arĩa oothe meetagĩrĩra gũũka gwake me na wendani o nao nĩmakaaheeo.

Paũlũ gũtaara Timotheo

9 Atĩrĩĩrĩ, Timotheo, geria na kĩyo mũno gũũka gũũkũ kũrĩ niĩ na ihenya.

10 Amu Dema nĩandiganĩirie agĩthiĩ Thesalonike nĩ ũndũ wa kwenda maũndũ ma gũũkũ thĩ. Naake Keresike nĩathiire Galatia, na Tito agĩthiĩ Dalamatia.

11 Ndigĩĩtwo na Luka o wiki. Oya Mariko mũũke naake, amu nĩambatairie andeithĩrĩrie wĩrainĩ.

12 Naake Tukiko nĩndamũtũmire Efeso.

13 Ũgĩũka-rĩ, njũkĩra na kabuuti gaakwa karĩa ndatigĩire Karipo kũu Teroa; na ndũkariganĩrwo nĩkũnjũkĩra na mabuku na makĩria njũũa iria ciandĩkagĩrwo.

14 Atĩrĩĩrĩ, Alekisanda, ũrĩa mũturi wa indo cia betha na gĩcango, nĩanjĩkire maũndũ maingĩ mooru; Mwathani nĩ we ũkaamũrĩha kũringana na ciĩko ciake.

15 Wega nĩũmwĩmenyerere mũno, amu nĩakararirie ũhoro witũ na hinya mũno.

16 Hĩndĩ ĩrĩa ndaatwarirwo igootiinĩ ihinda rĩa mbere gũtirĩ mũndũ o na ũmwe warĩ mwena wakwa; oothe nĩmandiganĩirie. Ngai aromoohera ũguo meekire!

17 No rĩĩrĩ, Mwathani akĩrũũgama mwena wakwa, akĩĩhe hinya wa kũheana Ũhoro ũrĩa Mwega nĩ geetha andũ oothe a Ndũũrĩrĩ maũigue, na akĩĩhonokia ndigaikĩrio mĩrũũthi ĩniine.

18 Na rĩĩrĩ, Mwathani nĩekũngitĩra maũndũinĩ moothe mooru na nĩekũũhonokia na andware Ũthamakiinĩ wake wa igũrũ. Naake arogoocagwo tene na tene! Ameni.

Ngeithi cia mũthia

19 Geithia Pirisila, Akula, na andũ a mũciĩ wa Onesiforo.

20 Erasito nĩatigirwo Korinitho, naake Terofimo ngĩmũtiga Mileto e mũrũaru.

21 Geria na kĩyo mũno gũũka mbere ya hĩndĩ ya heho.

Nĩwageithio nĩ Eubulu, na Pudene, Lino, Kilaudia, o na Akristiano arĩa angĩ oothe.

22 Mwathani aroikara na roho waku.

Wega wa Ngai ũroikara hamwe nawe.

Categories
Tito

Tito Gũtaarĩria

Gũtaarĩria

Tito aarĩ mũrũũrĩrĩ watuĩkĩĩte Mũkristiano, na nĩatuĩkire wa kũrutithania wĩra na Paũlũ o na wa gũteithania naake wĩrainĩ wa kũhunjia. Marũa maya Paũlũ aandĩkĩire Tito mũndũ mwĩthĩ ũrĩa wamũteithagia wĩra Kirete, kũrĩa aatigĩĩtwo kuo arorage wĩra wa kanitha. Marũa maya maandĩkĩĩtwo ũhoro ũkoniĩ maũndũ matatũ.

1. Tito nĩaririkanĩĩtio mĩtugo ĩrĩa atongoria a kanitha maagĩrĩirwo nĩ gũkorwo nayo, na makĩria nĩ ũndũ wa mĩtugo mĩũru ĩrĩa yarĩ na andũ aingĩ a Kirete. 2. Tito nĩataarĩĩtwo ũrĩa aagĩrĩirwo nĩgũthoomithia ikundi mwanya mwanya cia kanitha, ũguo nĩ ta kuuga athuuri arĩa akũrũ, na atumia arĩa akũrũ (arĩa thuuthainĩ marĩcookaga gũthoomithia atumia arĩa eethĩ), o na athoomithie arũme arĩa eethĩ o na ngombo. 3. Akĩrĩĩkĩrĩria mwandĩki nĩataarĩĩte Tito ũhoro wa mĩtugo ya Mũkristiano, na makĩria ũhoro wa thaayũ na kũiguithania, na gwĩtheemaga rũmena, ngarari, na nyamũkano thĩinĩ wa kanitha.

Maũndũ marĩa marĩ marũainĩ maya

Gũtaarĩria 1.1-4

Atongoria a kanitha 1.5-16

Mawĩra ma andũ ikundi mwanya mwanya cia kanitha 2.1-15

Gũtaarwo na gũkaanio 3.1-11

Kũrĩĩkia 3.12-15

Categories
Tito

Tito 1

1 Kuuma kũrĩ niĩ Paũlũ ndungata ya Ngai, na mũtũmwo wa Jesũ Kristũ.

Niĩ ndathuurirwo na ngĩtũmwo nĩguo nyonererie andũ arĩa athuure nĩ Ngai ũhoro wa gwĩtĩkia. Ningĩ ndĩmamenyithie biũ ũhoro wa ma, ũrĩa ũrutanĩĩtwo nĩ ndini iitũ,

2 na wĩ na kĩĩrĩgĩrĩro kĩa muoyo wa tene na tene. Muoyo ũcio nĩguo Ngai ũrĩa ũtaheenanagia eeranĩire kuuma o kĩambĩrĩria,

3 na mahinda marĩa maagĩrĩire maakinya nĩaguũranĩirie muoyo ũcio thĩinĩ wa ũhoro wake. Ũhoro ũcio nĩguo niĩ ndehokeirwo, na nĩguo hunjagia o ta ũrĩa njathĩĩtwo nĩ Ngai Mũhonokia witũ.

4 Ndĩrakwandĩkĩra wee Tito, mwana wakwa kũna thĩinĩ wa wĩtĩkio witũ ũrĩa tũgwatanĩire.

Ũrogĩa na wega o na thaayũ ciumĩĩte kũrĩ Ngai Ithe witũ, na kũrĩ Kristũ Jesũ Mũhonokia witũ.

Wĩra wa Tito thĩinĩ wa Kirete

5 Atĩrĩĩrĩ, Tito, gĩtũmi kĩrĩa gĩatũmire ngũtige Kĩrete-rĩ, nĩguo ũthondeke maũndũ marĩa maahĩngĩĩcanĩĩte, na ũthuurĩre o itũũra athuuri a kanitha. Ririkanaga ũrĩa ndakwĩrire atĩ:

6 mũthuuri wa kanitha no mũhaka akorwo atarĩ na ũcuuke na e mũthuuri wa mũtumia ũmwe, nacio ciana ciake ikorwo ciĩtĩkĩĩtie na itarĩ na ngumo njũru nĩ ũndũ wa kwagana kana kwaga gwathĩka.

7 Tondũ mũrori wa kanithaarutaga wĩra wa Ngai-rĩ, ndaagĩrĩirwo nĩ gũkorwo e na ũcuuke. Ndaagĩrĩirwo nĩ gũkorwo e mũndũ mũrũũgĩrĩri, kana mũndũ wa kũraakara na ihenya, kana mũndũ wa kũnyuaga njoohi akarĩĩo, kana mũndũ wa gũtũmĩra hinya, kana mũndũ wa gũkorokera mbeeca.

8 Mũrori wa maũndũ ma kanitha aagĩrĩirwo nĩ gũkorwo e mũndũ mũnyiiti andũ ũgeni, mwendi maũndũ marĩa meega, mũndũ wĩ na ũũgĩ wa ngoro, mũrũngĩrĩru, mũthingu na mwĩnyiiti maũndũinĩ ma mwĩrĩ.

9 Ningĩ nĩagĩrĩirwo nĩ gũkorwo e mũndũ wa kũrũmia ũhoro wa kwĩhokeka, o na wa gwĩtĩkia ũrutani ũrĩa wa ma tũrutanaga. Na njĩra ĩyo nĩarĩhotaga kũũmĩrĩria arĩa angĩ na ũrutani ũrĩa wa ma, o na ahotage kuonania mahĩtia ma arĩa maũregaga.

10 Amu nĩkũrĩ na andũ aingĩ, na makĩria arĩa moimĩĩte ndiniinĩ ya Ayahudi, arĩa mareganĩĩte na Watho, na maheenagia andũ na maũndũ matarĩ kĩene.

11 Andũ acio nĩmaagĩrĩirwo nĩgũkirio na ihenya, nĩ amu nĩmathũũkĩĩtie mĩciĩ mĩingĩ nĩ ũndũ wa kũrutana maũndũ marĩa mataagĩrĩire, na meekaga ũguo nĩ ũndũ wa gũkorokera mbeeca tu.

12 Mũnabii ũmwe wao, ũrĩa o naake aarĩ wa kuuma kũu kwao Kirete, oigire atĩrĩ, “Andũ a Kirete nĩmaheenanagia hingo ciothe; nĩ nyamũ njaganu cia gĩthaka, na nĩ igũũta ngoroku mũno.”

13 Ũhoro ũcio nĩ wa ma. Tondũ wa ũguo makũũmage mũno nĩguo magĩe na wĩtĩkio mũrũmu,

14 nĩguo matigaacooke kũrũmbũyanagia na ng’ano cia tũhũ cia Ayahudi, kana maathani ma andũ arĩa mareganĩĩte na ũhoro wa ma.

15 Indo ciothe nĩ theru kũrĩ andũ oothe arĩa atheru, no kũrĩ andũ arĩa aaganu na arĩa mateetĩkĩĩtie-rĩ, gũtirĩ kĩndũ o na kĩmwe gĩtheru, amu meciiria maao na thamiri ciao nĩ thũũku.

16 O moimbũraga na kanua atĩ nĩmooĩ Ngai, no ciĩko ciao nĩireganĩĩte na ũhoro ũcio. O nĩ andũ mameneete andũ arĩa angĩ na matiathĩkaga, na hatirĩ ũndũ o na ũmwe mwega mangĩĩka.

Categories
Tito

Tito 2

Ũrutani ũrĩa mwagĩrĩru

1 No wee-rĩ, rutanaga o maũndũ marĩa maringaine na ũrutani ũrĩa mwagĩrĩru.

2 Taaraga athuuri arĩa akũrũ makoragwo matarĩ arĩĩu, marĩ na meciiria ma ũũgĩ, mahotage kwĩnyiita maũndũinĩ ma mwĩrĩ, makoragwo marĩ athingu, agima wĩtĩkioinĩ, na me na wendani na ũkirĩrĩria.

3 O nao atumia arĩa akũrũ ũmataarage atĩ maikarage na mĩikarĩre ĩrĩa yagĩrĩire na matigatuĩke atumia a gũcuukanaga kana matuĩke ngombo cia ũrĩĩu. Mataarage atĩ no mũhaka marutanage maũndũ marĩa meega,

4 nĩguo moonererie atumia arĩa eethĩ ũrĩa maagĩrĩirwo nĩkwendaga athuuri aao na ciana ciao,

5 na ũrĩa maagĩrĩirwo nĩgũikara menyiitĩĩte maũndũinĩ moothe ma mwĩrĩ, marĩ atheru, na marĩ atumia eega mĩciĩinĩ yao, maheyage athuuri aao gĩtĩĩo, nĩguo gũtikaagĩe na gĩtũmi gĩa gũtũma ũhoro wa Ngai ũcambe.

6 Aanake nao nĩwagĩrĩirwo nĩkũmahatĩrĩria atĩ no mũhaka makoragwo menyiitĩĩte maũndũinĩ ma mwĩrĩ.

7 No mũhaka wee mwene ũkoragwo wĩ kĩonereria kĩa mĩtugo ĩrĩa mĩega maũndũinĩ moothe. Rĩrĩa ũkũrutana ũrutanage na ma na ũtarĩ na itherũ.

8 Hũthagĩra ciugo iria ciagĩrĩire o iria itangĩtuuo njũru, nĩguo thũ ciaku iconorwo nĩ ũndũ wa kwaga ũndũ wa gũtũcambia naguo.

9 Taaraga ngombo atĩ iheyage aathani aacio gĩtĩĩo na imakenagie maũndũinĩ moothe. Ningĩ ũcitaarage atĩ itiagĩrĩirwo nĩkũmakararagia

10 kana kũmaiyaga. O na atĩ ciagĩrĩirwo nĩgũkoragwo ikĩonania ũrĩa irĩ njega na njĩhokeku, nĩguo igaathagĩrĩrie ũrutani wa ũhoro wa Ngai Mũhonokia witũ thĩinĩ wa maũndũ moothe marĩa irĩĩkaga.

11 Nĩ amu wega wa Ngai ũrĩa ũreeheire andũ oothe ũhonokio nĩũguũranĩirio.

12 Wega ũcio wa Ngai nĩũtũtaaraga tũtigane na maũndũ ma waganu, o na tũtigane na merirĩria ma maũndũ ma gũũkũ thĩ, tũikarage gũũkũ thĩ twĩnyiitĩĩte maũndũinĩ ma mwĩrĩ, na tũrĩ arũngĩrĩru, na tũikarage na mĩikarĩre ya ũngai.

13 Na ningĩ tũikarage twĩhaarĩirie nĩ ũndũ wa mũthenya ũcio mũraathime, ũrĩa twĩrĩgagĩrĩra, rĩrĩa riiri wa Mũhonokia witũ Jesũ Kristũ, ũrĩa arĩ we Ngai witũ mũnene,ũkooneka.

14 Mwathani witũ Jesũ Kristũ nĩerutire nĩ ũndũ witũ, nĩguo atũhonokie kuuma waganuinĩ na atũtue andũ aake atheru, na andũ a kwĩriragĩria o gwĩka wega.

15 Rĩu-rĩ, rutanaga maũndũ macio, ũhatagĩrĩrie andũ kũmarũmia na ũkũũmage arĩa matarũngĩrĩirie wĩ na ũhoti wothe. Ndũkaanareke mũndũ o na ũmwe akũire.

Categories
Tito

Tito 3

Mĩtugo ya Mũkristiano

1 Atĩrĩĩrĩ, ririkanagia andũ aaku atĩ maheyage aathani na anene gĩtĩĩo na mamaathĩkagĩre, na makoragwo mehaarĩirie gwĩka ciĩko ciothe njega.

2 Meerage atĩ matikaaragie ũũru igũrũ rĩa mũndũ, na makoragwo me na thaayũ, meendanĩĩte, na moonanagie mĩtugo ya ũhooreri kũrĩ andũ oothe.

3 Amu ithuĩ eene hĩndĩ ĩmwe twarĩ akĩĩgu, tũtiathĩkaga na nĩtwekaga ũrĩa gũtaagĩrĩire. Twarĩ ngombo cia merirĩria marĩa mooru na cia maũndũ maingĩ mooru. Twatũũraga ũũruinĩ na tũkaiguanagĩra ũiru; nĩtwameneetwo nĩ andũ arĩa angĩ, o na ithuĩ nĩtwamameneete.

4 No hĩndĩ ĩrĩa tha na wendo wa Ngai Mũhonokia witũ ciaguũranĩirio,

5 nĩatũhonokirie. Ĩndĩ ithuĩ tũtiahonokirio nĩ ũndũ wa ũrĩa twekĩĩte ciĩko njega, no nĩ ũndũ wa tha ciake. Roho Mũtheru nĩatũtheririe, agĩtũciara rĩngĩ, na agĩtũhe muoyo mwerũ.

6 Naake Ngai ahũthĩire Jesũ Kristũ Mũhonokia witũ agĩtũitĩrĩria na ũtaana Roho Mũtheru.

7 Nĩguo wega wake ũtũiguithanagie na Ngai, na nĩ ũndũ ũcio tũgĩtuĩke a kwĩrĩgĩrĩra igai rĩa muoyo wa tene na tene.

8 Ũhoro ũcio nĩ wa ma.

Nĩngwenda ũhinyĩrĩrie ũhoro ũcio mũno, nĩguo andũ arĩa meetĩkĩĩtie Ngai, makoragwo magĩĩka ciĩko iria ciagĩrĩire mahinda moothe, o iria ikoragwo irĩ cia bata, na cia kũguna andũ oothe.

9 No rĩĩrĩ, ehagĩrĩra ngarari cia ũrimũ, maũndũ ma gũkinyĩra ũhoro wa njiarwa, haaro, na mbaara ya ũhoro wa Watho. Maũndũ macio ti meega nĩ ma tũhũ.

10 Naake mũndũ ũrĩa ũtũmaga kũgĩe nyamũkano-rĩ, mũkaanie hĩndĩ ya mbere, na ya keerĩ, arema regana naake.

11 Wagĩrĩirwo nĩkũmenya atĩ mũndũ ta ũcio nĩ mũũru, namo meehia maake nĩmoonanagia atĩ nĩahĩtĩĩtie.

Mataaro ma mũthia

12 Wona ndatũma Aritema kana Tukiko kũrĩ we-rĩ, geria na kĩyo gũũka o kũũrĩa Nikopoli, tondũ kũu nĩkuo nduĩte gũikara hĩndĩ yothe ya heho.

13 Geria mũno gũteithia Zena ũrĩa wakiri na Apolo, nĩguo maambĩrĩrie rũgendo rwao, na ũtigĩrĩre atĩ nĩmoona indo ciothe iria mangĩenda rũgendoinĩ.

14 Andũ aitũ no mũhaka mamenye kũhũthĩra mahinda maao na gwĩka ciĩko iria njega, nĩguo mateithagĩrĩrie maũndũinĩ marĩa mangĩbatarania; matigaatũũrage mũtũũrĩre wa tũhũ.

15 Andũ arĩa oothe twĩ nao nĩmakũgeithia. Geithia aariũ na aarĩ a Ithe witũ oothe.

Wega wa Ngai ũrogĩa na inyuĩ inyuothe.

Categories
Filemona

Filemona Gũtaarĩria

Gũtaarĩria

Filemona aarĩ Mũkristiano woĩkaine mũno, hiihi wa kanitha ũrĩa warĩ Kolosai, na nĩarĩ na ngombo yetagwo Onesimo. Ngombo ĩyo nĩyorĩĩte kuuma kũrĩ Filemona, nayo ĩgĩcemania na Paũlũ ũrĩa hĩndĩ ĩyo warĩ njeera. Naake Onesimo agĩgĩtuĩka Mũkristiano na ũndũ wa kũhunjĩrio nĩ Paũlũ. Marũa maya Paũlũ aandĩkĩire Filemona nĩmakũmũthaitha atĩ aiguithanie na ngombo yake ĩrĩa Paũlũ aramũcookeria, na amĩamũkĩre to ta ngombo ĩrekeirwo meehia, no ta mũrũ wa Ithe thĩinĩ wa wĩtĩkio.

Maũndũ marĩa marĩ marũainĩ maya

Gũtaarĩria 1-3

Filemona kũgaathĩrĩrio 4-7

Gũthaithanĩrĩra Onesimo 8-22

Kũrĩĩkia 23-25

Categories
Filemona

Filemona 1

1 Kuuma kũrĩ niĩ Paũlũ, o niĩ njoheetwo nĩ ũndũ wa Kristũ Jesũ, o na kuuma kũrĩ Timotheo mũrũ wa Ithe witũ.

Kũrĩ mũraata witũ Filemona o wee tũrutithanagia wĩra nawe,

2 o hamwe na andũ a kanitha ũrĩa ũcemanagia gwaku mũciĩ. O na kũrĩ mwarĩ wa Ithe witũ Apufia, na Arikipo ũrĩa tũrũagĩra ũhoro wa Ngai naake:

3 Wega na thaayũ wa Ngai Ithe witũ o na wa Mwathani Jesũ Kristũ irogĩa na inyuĩ.

Wendo na wĩtĩkio wa Filemona

4 Atĩrĩĩrĩ mũrũ wa Ithe witũ Filemona, hĩndĩ ciothe rĩrĩa ndakũririkana mahooyainĩ maakwa-rĩ, nĩnjookagĩria Ngai wakwa ngaatho.

5 Amu nĩnjiguaga ngumo ya ũrĩa wĩtĩkĩĩtie Mwathani Jesũ, o na ũrĩa wendeete andũ oothe a Ngai.

6 Mahooya maakwa nĩ atĩ wĩtĩkio ũcio mũnyiitanĩire nao ũgĩtũme mũrikĩre mũmenye mũno ũhoro wa iraathimo ciothe iria tũheagwo nĩ ũndũ wa gũkorwo twĩ thĩinĩ wa Kristũ.

7 Wendo waku, mũrũ wa Ithe witũ, nĩũtũmĩĩte ngĩe na gĩkeno kĩnene mũno na ũkanyũmĩrĩria mũno! Ningĩ wee nĩũcanjamũrĩĩte ngoro cia andũ a Ngai ũkameekĩra hinya.

Paũlũ gũthaithanĩrĩra Onesimo

8 Nĩ ũndũ ũcio, o na gũtuĩka no ngwathe thĩinĩ wa Kristũ atĩ wĩke ũndũ ũrĩa ũbatarainie-rĩ,

9 niĩ Paũlũ, barũũthi wa Jesũ Kristũ, na rĩu nĩkuohwo njoheetwo nĩ ũndũ wake, nĩngũgũthaitha nĩ ũrĩa ngwendeete.

10 Kwoguo ngũgũthaitha nĩ ũndũ wa mwana wakwa Onesimo, ũrĩa nduĩkĩĩte ithe thĩinĩ wa Kristũ ndĩ njeera.

11 Hau kabere Onesimo ndararĩ mũndũ wa bata harĩ wee, no rĩu nĩatuĩkĩĩte mũndũ wa bata kũna harĩ we o na harĩ niĩ.

12 Rĩu-rĩ, nĩndamũcookia kũrĩ wee, na ngĩmũtũma no ta ngoro yakwa mwene ndagũtũmĩra.

13 Nĩingĩrendire tũikarage naake nĩ geetha andungatagĩre handũ haaku rĩu njoheetwo nĩ ũndũ wa Ũhoro ũrĩa Mwega.

14 No rĩĩrĩ, ndĩragĩciiria atĩ ndiagĩrĩirwo nĩgwĩka ũguo wee ũtooĩ, nĩguo ndikaahaane ta ndĩrahũthĩra ũtaana waku na hinya; kaba wee ũkorwo wĩyendeire.

15 No gũkorwo ihinda o rĩu iniini arehereete kuuma harĩ we-rĩ, arehereete nĩguo acooka ũtũũranie naake matukũ macio mangĩ moothe.

16 Rĩu ndegũcooka atariĩ ta ngombo, no egũkorwo e kĩndũ kĩnene gũkĩra ngombo. Harĩ niĩ-rĩ, egũkorwo e mũrũ wa Ithe witũ nyendeete mũno. Angĩkorwo ũguo nĩguo ahaana harĩ niĩ-rĩ, harĩ wee akĩagĩrĩirwo gũkorwo ahaana ũguo makĩria ta ngombo na ta mũrũ wa Ithe witũ thĩinĩ wa Mwathani!

17 Angĩkorwo nĩũtuĩte atĩ twĩ rũmwe nawe, mwamũkĩre o ta ũrĩa ũngĩnyamũkĩra niĩ mwene.

18 Angĩkorwo nĩakũhĩtĩirie kana agakorwo aarĩ na thiirĩ waku-rĩ, reke ngaakũrĩha arĩ niĩ.

19 Haaha nĩ niĩ Paũlũ ndaandĩka na guoko gwakwa: (ndiagĩrĩirwo nĩkũgweta atĩ o nawe mwene wĩ thiirĩ wakwa).

20 Kwoguo mũrũ wa Ithe witũ, reke ngĩe na uumithio kuuma kũrĩ wee nĩ ũndũ wa Mwathani; njanjamũra ngoro ta mũrũ wa Ithe witũ thĩinĩ wa Mwathani.

21 Ngĩkwandĩkĩra marũa maya ndĩ na ma atĩ ndũngĩaga kũnjathĩkĩra o na atĩ nĩũgwĩka o na makĩria ya ũrĩa njugĩĩte.

22 Hamwe na ũguo thondekera handũ ha gũikara amu ndĩ na mwĩhoko atĩ nĩ ũndũ wa mahooya marĩa mũhooyagĩra nĩndĩĩtĩkĩrio njũke kũrĩ inyuĩ.

Ngeithi cia mũthia

23 Epafara ũrĩa twoheetwo naake nĩ ũndũ wa Kristũ Jesũ nĩakũgeithia,

24 o na nĩwageithio nĩ andũ arĩa tũrutithanagia wĩra nao, nĩ o Mariko, Arisitariko, Dema na Luka.

25 Wega wa Mwathani witũ Jesũ Kristũ ũrogĩa na inyuĩ inyuothe.