Category: Thaburi

Ihooya rĩa kũũria ũteithio

1 MWATHANI, nĩndagũkaĩra ndĩ ndiainĩ ndiku mũno ya mathĩĩna.

2 Igua gũkaya gwakwa, MWATHANI;

tegera matũ gũthaithana gwakwa!

3 MWATHANI, ũngĩtaraga maita marĩa tũkwĩhagĩria-rĩ,

nũũ ũtangĩtuĩra?

4 No rĩĩrĩ, wee nĩũtuohagĩra,

nĩguo tũgũtĩĩage.

5 Njetereire ũteithio waku, MWATHANI,

na ngoro yakwa yothe,

na nĩndĩhokeete ciĩranĩro ciaku.

6 Njetereire MWATHANI

gũkĩra ũrĩa arangĩri metagĩrĩra gũkĩe,

ĩĩni, gũkĩra ũrĩa arangĩri metagĩrĩra gũkĩe.

7 Isiraeli, wĩhoke MWATHANI tondũ we nĩ mũtugi

na nĩarĩ hinya mũingĩ wa kũhonokania.

8 MWATHANI we mwene nĩ we ũrĩhonokia andũ aake a Isiraeli

kuuma meehiainĩ maao moothe.

Ihooya rĩa wĩnyiihia

1 MWATHANI, niĩ ndirĩ mwĩtĩi na ndiĩgaathaga.

Ndirũmbũyanagia na maũndũ manene

kana marĩa itangĩhota gwĩka.

2 Niĩ-rĩ, nĩndĩrutĩĩte kũiganĩra na gũikaraga hooreire

o ta ũrĩa kaana gaikaraga kahooreire gakĩonga;

ũguo noguo njiganĩire ngoroinĩ yakwa.

3 Isiraeli, wĩhoke MWATHANI

rĩu na nginya tene na tene!

Kũgaathĩrĩria Hekaarũ

1 MWATHANI, ndũkariganĩrwo nĩ Daudi

na mathĩĩna marĩa moothe oonire.

2 MWATHANI ririkana, ũrĩa aakwĩrĩire na mwĩhĩtwa;

wee, Ngai wa Jakubu, o Wee ũrĩ Hinya,

ririkana ũrĩa akwĩhĩtĩire akiuga atĩrĩ,

3 “Ndigaatoonya nyũmba yakwa,

kana haice ũrĩrĩ wakwa;

4 ndigakoma toro,

kana hinge riitho,

5 itooneire MWATHANI handũ;

itooneire Ngai wa Jakubu,

o Wee Ũrĩ Hinya, gĩikaro.”

6 Atĩrĩĩrĩ, twaiguire ũhoro wa Ithandũkũ rĩa Kĩrĩĩkanĩro tũrĩ Bethilehemu,

tũgĩcooka tũkĩrĩkora mĩgũndainĩ ya Jearimu.

7 Tũkiuga atĩrĩ, “Nĩtũthiĩi nyũmbainĩ ya MWATHANI

tũkamũthaathaiye tũrĩ mbere ya gĩtĩ gĩake kĩa ũthamaki!”

8 Arahũka, MWATHANI, ũtoonye kĩhuurũkoinĩ gĩaku,

wee mwene na Ithandũkũ rĩaku rĩa Kĩrĩĩkanĩro,

rĩrĩa rĩonanagia hinya waku.

9 Athĩnjĩri Ngai maroehumbaga ũthingu,

andũ aaku marougĩrĩria nĩgũkena.

10 MWATHANI, tondũ wa ũrĩa werĩire ndungata yaku Daudi-rĩ,

ndũkaanatiganĩrie mũthamaki waku

ũrĩa ũitĩrĩirie maguta ũkamwamũra.

11 Nĩwerĩire Daudi na mwĩhĩtwa,

mwĩhĩtwa ũtangĩricũkwo ũkiuga atĩrĩ,

“Nĩngaatua ũmwe wa ciana ciaku mũthamaki,

naake nĩagaathamaka thuutha waku.

12 Ciana ciaku ingĩkamenyerera kĩrĩĩkanĩro gĩakwa

na irũmagĩrĩre maathani maakwa marĩa ndĩrĩcirutaga,

o na ciana ciacio igaatũũra ithamakaga

ithenyainĩ rĩaku nginya tene na tene.”

13 Tondũ rĩĩrĩ, MWATHANI nĩathuurĩĩte Zayuni;

nĩerirĩirie gũgũtua kũndũ gwake gwa gũtũũra.

14 Oigĩĩte atĩrĩ, “Gĩĩkĩ nĩkĩo kĩhuurũko gĩakwa nginya tene na tene;

gũũkũ nĩkuo ngũtũũra tondũ nĩndĩkwendeete.

15 Nĩndĩrĩheaga itũũra rĩa Zayuni kĩrĩa gĩothe rĩrĩbataragio nĩkĩo;

nĩndĩrĩheaga athĩĩni aarĩo irio makarĩa makahũũna.

16 Ndĩhumbaga athĩnjĩri Ngai aarĩo ũhonokio,

nao andũ aarĩo arĩa ehokeku marĩinaga

makĩrũũhagia nĩgũkena.

17 Kũu nĩkuo ndĩtũmaga ũmwe wa njiarwa cia Daudi atuĩkage mũthamaki mũnene;

wathani wa mũthamaki wakwa ũrĩa njitĩrĩirie maguta ngamwamũra,

nĩkuo ndĩtũmaga ũtũũre ũgaacĩire.

18 Thũ ciake ndĩrĩcihumbaga gĩconoko,

no we, ndĩtũmaga ũthamaki wake ũnenehage na ũgaacagĩre.”

Kũgaathĩrĩria andũ gũikaranagia maiguaine

1 Ĩ nĩ ũhoro mwega atĩa, o na wĩ gĩkeno,

andũ a mũciĩ ũmwe gũikaranagia maiguaine!

2 Ũiguano ta ũcio ũhaana maguta ma goro ma kwamũrana

maitĩrĩirio mũtwe wa Harũni

makanyũrũrũkĩra nderuinĩ ciake

o nginya karainĩ ya nguo yake.

3 Ningĩ ũiguano ta ũcio

ũhaana ime rĩa kĩrĩma kĩa Herimoni,

rĩrĩa rĩitĩkaga irĩmainĩ cia Zayuni.

Kũu Zayuni nĩkuo MWATHANI eeranĩire kĩraathimo gĩake,

nĩkĩo ũtũũro wa tene na tene.

Ũkaai Tũgooce Ngai

1 Ũkaai mũgooce MWATHANI, inyuothe ndungata cia MWATHANI,

o inyuĩ mũtungataga thĩinĩ wa Hekaarũ yake ũtukũ.

2 Ambarariai mooko maanyu mũrĩ Hekaarũinĩ mũkĩhooyaga,

na mũgooce MWATHANI!

3 MWATHANI, ũrĩa wombire igũrũ na thĩ,

aromũraathima e Zayuni!

Rwĩmbo rwa kũgooca MWATHANI

1 Goocaai MWATHANI!

Goocaai rĩĩtwa rĩa MWATHANI, inyuĩ ndungata cia MWATHANI,

2 o inyuĩ mũrũũgamaga nyũmbainĩ ya MWATHANI,

o inyuĩ mũrũũgamaga njainĩ cia Hekaarũ ya Ngai witũ.

3 Goocaai MWATHANI, tondũ nĩ mwega;

inĩraai rĩĩtwa rĩake, tondũ nĩ mũtugi.

4 MWATHANI nĩethuurĩire Jakubu atuĩke wake;

nĩethuurĩire andũ a Isiraeli matuĩke aake kĩũmbe.

5 Nĩnjũũĩ atĩ MWATHANI nĩ mũnene;

MWATHANI witũ nĩ mũnene

gũkĩra ngai iria ingĩ ciothe.

6 MWATHANI eekaga o ũrĩa ekwenda

kũũrĩa igũrũ na gũũkũ thĩ,

mariainĩ na kũrĩa guothe kũriku mũno.

7 Nĩ we ũtũmaga matu maambate kuuma ituri cia thĩ;

nĩ we ũtũmaga kũgĩe na heni ireehane na marurumĩ

na no we ũreehithagia rũhuuho kuuma thitooinĩ ciake.

8 MWATHANI nĩ we woragire marigithaathi moothe ma Misiri

ma andũ o na ma nyamũ.

9 Nĩ we wekire moorirũ na akĩringa ciama bũrũriinĩ ũcio wa Misiri

nĩguo aherithie mũthamaki wakuo na ndungata ciake ciothe.

10 Nĩ we wanangire ndũũrĩrĩ nyingĩ

na akĩũraga athamaki maarĩ na hinya;

11 Sihoni, mũthamaki wa Aamoni,

Ogu, mũthamaki wa Bashani,

na athamaki oothe arĩa maarĩ Kanaani,

12 agĩcooka akĩhe andũ aake a Isiraeli mabũrũri maao

matuĩke ũgai wao.

13 Rĩĩtwa rĩaku, MWATHANI, rĩgũtũũra nginya tene na tene;

ngumo yaku, MWATHANI, ĩgũtũũra ĩririkanagwo nĩ njiarwa ciothe.

14 Nĩ gũkorwo MWATHANI nĩakaagitĩra andũ aake,

na aiguĩre ndungata ciake tha.

15 Mĩhianano ya ndũũrĩrĩ ĩthondekeetwo na betha na thahabu;

ĩthondekeetwo nĩ mooko ma andũ.

16 Ĩ na tũnua, no ndĩaragia;

ĩ na maitho, no ndĩonaga.

17 Ĩ na matũ, no ndĩiguaga,

o na ndĩngĩhota kũhiihia.

18 Arĩa mamĩthondekaga na arĩa mamĩhokaga marohaana o tayo.

19 Goocaai MWATHANI, inyuĩ andũ a Isiraeli!

Kumiai MWATHANI, inyuĩ athĩnjĩri Ngai!

20 Goocaai MWATHANI, inyuĩ Alawii!

Kumiai MWATHANI, inyuĩ arĩa mũmũtĩĩĩte!

21 Goocaai MWATHANI arĩ Zayuni!

Mũkumiei arĩ Jerusalemu, mũciĩ wake!

Goocaai MWATHANI!

Rwĩmbo rwa gũcookia ngaatho

1 Cookeriai MWATHANI ngaatho, tondũ nĩ mwega;

tondũ ũtugi wake nĩ wa tene na tene.

2 Cookeriai Ngai ũrĩa mũnene gũkĩra ngai iria ingĩ ciothe ngaatho;

tondũ ũtugi wake nĩ wa tene na tene.

3 Cookeriai MWATHANI wa aathani oothe ngaatho;

tondũ ũtugi wake nĩ wa tene na tene.

4 We wiki nĩ we wĩkaga maũndũ ma kũgegania mũno;

tondũ ũtugi wake nĩ wa tene na tene.

5 Nĩ we wombire igũrũ na ũũgĩ wake;

tondũ ũtugi wake nĩ wa tene na tene.

6 Nĩ we wakire thĩ ndiainĩ iria ndiku,

tondũ ũtugi wake nĩ wa tene na tene.

7 Nĩ we wombire riũa na mweri;

tondũ ũtugi wake nĩ wa tene na tene.

8 Riũa rĩathage mũthenya;

tondũ ũtugi wake nĩ wa tene na tene.

9 Naguo mweri na njata ciathage ũtukũ;

tondũ ũtugi wake nĩ wa tene na tene.

10 Nĩ we woragire aariũ a marigithaathi ma Amisiri;

tondũ ũtugi wake nĩ wa tene na tene.

11 Akĩruta andũ a Isiraeli kuuma Misiri;

tondũ ũtugi wake nĩ wa tene na tene.

12 Na guoko gwake na gĩcoka gĩake kĩrĩ hinya mũno;

tondũ ũtugi wake nĩ wa tene na tene.

13 Nĩ we wagayanirie Iria Ituune;

tondũ ũtugi wake nĩ wa tene na tene.

14 Akĩringĩria Aisiraeli gatagatĩ kaarĩo;

tondũ ũtugi wake nĩ wa tene na tene.

15 No mũthamaki wa Misiri na mbũtũ ciake cia ita akĩmahubĩkania kũu Iriainĩ;

tondũ ũtugi wake nĩ wa tene na tene.

16 Nĩ we watongoririe andũ aake werũinĩ;

tondũ ũtugi wake nĩ wa tene na tene.

17 Akĩũraga athamaki maarĩ na hinya;

tondũ ũtugi wake nĩ wa tene na tene.

18 Akĩũraga athamaki maarĩ ngumo;

tondũ ũtugi wake nĩ wa tene na tene.

19 Sihoni mũthamaki wa Aamoni;

tondũ ũtugi wake nĩ wa tene na tene.

20 Na Ogu mũthamaki wa Bashani;

tondũ ũtugi wake nĩ wa tene na tene.

21 MWATHANI agĩcooka akĩhe andũ aake bũrũri wa athamaki acio ũgĩtuĩka ũgai wao;

tondũ ũtugi wake nĩ wa tene na tene.

22 Akĩũheana kũrĩ Isiraeli, ndungata yake,

ũgĩtuĩka ũgai wake;

tondũ ũtugi wake nĩ wa tene na tene.

23 MWATHANI ndariganĩirwo nĩ ithuĩ rĩrĩa twatooreetio;

tondũ ũtugi wake nĩ wa tene na tene.

24 Nĩatũhonokirie kuuma harĩ thũ ciitũ;

tondũ ũtugi wake nĩ wa tene na tene.

25 Nĩ we ũheaga ciũmbe ciothe irĩ muoyo irio;

tondũ ũtugi wake nĩ wa tene na tene.

26 Cookeriai Ngai wa igũrũ ngaatho;

tondũ ũtugi wake nĩ wa tene na tene.

Aisiraeli gũkaya marĩ ithaamĩrioinĩ

1 Hũgũrũrũinĩ cia njũũĩ cia Babiloni,

nĩkuo twaikaraga thĩ tũkarĩra,

twaririkana Zayuni.

2 Mĩtĩinĩ ĩrĩa yarĩ hũgũrũrũinĩ icio,

nĩkuo twacuuragia inanda ciitũ,

3 tondũ twĩ kũu, arĩa maatũtahĩĩte maatwĩraga tũmainĩre;

anyariiri acio aitũ maatwĩraga tũmacanjamũre makoiga atĩrĩ,

“Tũinĩreei rwĩmbo rũmwe rwa iria mwainaga mwĩ Zayuni!”

4 Twakĩhota atĩa kũinĩra MWATHANI rwĩmbo

tũrĩ bũrũriinĩ mũgeni?

5 Jerusalemu, ingĩkariganĩrwo nĩ we,

guoko gwakwa kwa ũrĩo kũroremwo nĩgũkaanahũũra kĩnanda rĩ o rĩ!

6 Ndĩroremwo nĩgũkaina rĩ o rĩ ingĩkaanariganĩrwo nĩ we,

kana ingĩkaaga gũgũtua gatũũrũ ga gĩkeno gĩakwa,

wee Jerusalemu.

7 MWATHANI, ririkana ũrĩa Aedomu meekire

mũthenya ũrĩa itũũra rĩa Jerusalemu rĩanyiitirwo.

Ririkana ũrĩa moigaga mategũtigithĩria atĩrĩ,

“Rĩmomoreei! Rĩmomoreei!

Rĩmomoraniei rĩothe!”

8 Babiloni, werekeire kũharaganio!

Gũkena-rĩ, nĩ mũndũ ũrĩa ũrĩgwĩka o ta ũrĩa watwĩkire!

9 Gũkena-rĩ, nĩ mũndũ ũrĩa ũrĩoya tũkenge twaku

atũhũũrithanie ndwaroinĩ cia mahiga!

Ihooya rĩa gũcookia ngaatho

1 Nĩngũgũcookeria ngaatho, MWATHANI, na ngoro yakwa yothe;

nĩngũkũinĩra ngĩgũkumagia ngaiciothe irĩ ho.

2 Ngũinamĩrĩra ndoreete na kũrĩa Hekaarũ yaku theru ĩrĩ,

ngooce rĩĩtwa rĩaku,

nĩ ũndũ wa ũtugi na wĩhokeku waku,

tondũ nĩwonanĩĩtie atĩ rĩĩtwa rĩaku nĩrĩo rĩnene,

o na maathani maaku nĩ manene.

3 Rĩrĩa ndagwĩtire, nĩwanjĩtĩkire,

na ũkĩnyongerera hinya.

4 Athamaki oothe a thĩ nĩmagaakũgooca, MWATHANI,

tondũ nĩmaiguĩte maũndũ marĩa wĩranĩire.

5 Ningĩ nĩmakaagana ciĩko iria wee wĩkĩĩte,

o na magane ũrĩa riiri waku wĩ mũnene.

6 O na gũtuĩka, wee MWATHANI, wĩ igũrũ mũno

nĩũrũmbũyagia andũ arĩa enyiihia,

na ũkamenya ũrĩa andũ arĩa etĩĩi mareeka ũrĩ o kũraaya.

7 Rĩrĩa thiũrũrũkĩirio nĩ mathĩĩna,

wee nĩũmenyagĩrĩra wega;

ũng’ethanagĩra na thũ ciakwa iria cindaakarĩire,

ũkahonokia na guoko gwaku kwĩ hinya.

8 MWATHANI nĩũrĩhingia, maũndũ moothe marĩa wĩranĩire.

Wendo waku, MWATHANI, nĩ wa tene na tene;

ndũgaatiganĩrie wĩra wa mooko maaku.

Ngai nĩoĩ maũndũ moothe na nĩamenyanagĩrĩra

1 MWATHANI, nĩũthuuthuurĩĩtie na ũkaamenya.

2 Wee-rĩ, nĩũmenyaga ũrĩa wothe ndĩreeka;

ũmenyaga ũrĩa wothe ndĩreciiria ũrĩ o kũraaya.

3 Wee nĩũnyonaga rĩrĩa ndĩraruta wĩra kana rĩrĩa huurũkĩĩte;

gũtirĩ gĩĩko o na kĩmwe gĩakwa wee ũtooĩ.

4 O na itarĩ ndĩratumũra kanua,

wee, MWATHANI nĩũkoragwo ũmenyeete ũrĩa ndĩrenda kuuga.

5 Ũthiũrũrũkĩirie na mĩena yothe,

ũkamenyerera na hinya waku.

6 Kũũmenya ta ũguo wee ũmenyeete nĩ ũndũ wa magegania mũno harĩ niĩ;

ũmenyo ta ũcio ũrĩ igũrũ mũno ũguo atĩ ndingĩhota kũũkinyĩra.

7 Nĩ na kũ ingĩgĩthiĩ ndĩthare kuuma harĩ we?

Nĩ na kũ ingĩũrĩra ndũkaanyone?

8 Ingĩambata igũrũ, wee ũrĩ kuo;

ingĩikũrũka kwa arĩa akuũ,

o na kuo ũrĩ o kuo.

9 O na ingĩũmbũka hĩtũke rũkĩrĩrĩ rwa mwena wa irathĩro,

kana ngorwo ndĩratũũra kũraaya mũno

mbere ya rũkĩrĩrĩ rwa mwena wa ithũĩro,

10 ũngĩkorwo o kuo ũkĩndongoria na ũkĩndeithia.

11 Ingĩũria nduma ĩhithe

kana ũtheri ũrĩa ũthiũrũrũkĩirie ũtuĩke ũtukũ,

12 nduma ĩyo ndĩngĩkorwo ĩrĩ nduma harĩ we,

na ũtukũ ũcio wakorwo ũthereete o ta mũthenya.

Harĩ we nduma na ũtheri itirĩ ũtiganu.

13 Wee-rĩ, nĩ we wombire ciĩga ciakwa ciothe;

nĩ we wanyiitithanirie ndĩ o ndainĩ ya maitũ.

14 Nĩngũkũgooca tondũ nĩũnyũmbĩĩte na njĩra ya kũmakania na ya kũgegania;

ũrĩa wothe wĩkaga nĩ wa kũgegania mũno;

niĩ mwene nĩnjũũĩ ũguo na ngoro yakwa yothe.

15 Rĩrĩa mahĩndĩ maakwa maathondekagwo

makanyiitithanio na kinyi ndainĩ ya maitũ,

rĩrĩa ndaakũragĩra kũu hithoinĩ,

wee nĩwoĩ atĩ ndarĩ kuo.

16 Nĩwanyonaga o na itarĩ ndĩraciarwo.

Wandĩkire ibukuinĩ rĩaku matukũ marĩa wangaĩire

o na matarĩ marambĩrĩria.

17 Ĩ meciiria maaku, Ngai, matikĩrĩ bata harĩ niĩ!

Ĩ matikĩrĩ maingĩ!

18 Ingĩtua kũmatara-rĩ, maingĩha gũkĩra mũthanga;

nĩguo hote kũmatara nginya ndĩmarĩĩkie no ndũũrire muoyo tene na tene o ta we.

19 Ngai, naarĩ korwo woraga andũ arĩa aaganu!

Naarĩ korwo ooragani maatigana na niĩ!

20 Maaragia maũndũ ma waganu igũrũ rĩaku;

moigaga maũndũ mooru igũrũ rĩa rĩĩtwa rĩaku.

21 MWATHANI, ĩ ndithũire arĩa magũthũire!

Ĩ ndimeneete arĩa magũũkagĩrĩra!

22 Ndĩmathũire o biũ;

ndĩmatuaga thũ ciakwa.

23 Ngai, thuuthuuria ũmenye ngoro yakwa;

ngeria, ũmenye meciiria maakwa.

24 Baara wone kana ndĩ na ũũru o na ũrĩkũ,

na ũkĩndongorie na njĩra ĩrĩa ya gũtũũra nginya tene na tene.