Category: Thaburi

Ihooya rĩa kũũria ũteithio

1 Ndakaĩire MWATHANI ndĩ thĩĩnainĩ,

naake akĩnjĩtĩka.

2 MWATHANI, honokia,

kuuma harĩ andũ a maheeni na a ũhinga.

3 Inyuĩ aheenania aya, Ngai akaamwĩka atĩa?

Akaamũherithia atĩa hiihi!

4 Akaamũratha na mĩguĩ mĩũgĩ,

na amũcine na makara mararĩrĩmbũka mwaki!

5 Gũtũũrania na inyuĩ nĩ kũũru o ta gũtũũra Mesheki

kana gũtũũrania na andũ a Kedari.

6 Nĩndũũranĩĩtie kwa ihinda iraaya mũno,

na andũ matendeete thaayũ!

7 Niĩ nyendeete o thaayũ,

no ingĩaria ũhoro wa thaayũ, o meendaga o mbaara!

MWATHANI nĩwe Mũtũgitĩri

1 Ngũtiira maitho ndore irĩmainĩ;

ĩ ũteithio wakwa ũgũkiuma nakũ?

2 Ũteithio wakwa ũngiuma harĩ MWATHANI,

ũrĩa wombire igũrũ na thĩ.

3 We ndangĩreka ũtirũke;

mũkũmenyereri ndacũngaga.

4 Mũmenyereri wa Isiraeli-rĩ,

ndacũngaga kana agakoma.

5 MWATHANI nĩ we mũkũgitĩri;

arĩ hakuhĩ nawe nĩguo akũmenyagĩrĩre.

6 Ndũrĩkagwo ũũru nĩ riũa mũthenya,

kana nĩ mweriũtukũ.

7 MWATHANI nĩarĩkũgitagĩra kuuma moogwatiinĩ moothe;

nĩarĩmenyagĩrĩra muoyo waku.

8 MWATHANI nĩarĩkũmenyagĩrĩra,

ũgĩthiĩ o na ũgĩcooka,

kuuma rĩu nginya tene na tene.

Kũgaathĩrĩria Jerusalemu

1 Nĩndĩrakenire manjĩĩra atĩrĩ,

“Nĩtũthiĩi nyũmbainĩ ya MWATHANI.”

2 Atĩrĩĩrĩ, wee Jerusalemu,

rĩu tũrũngiĩ na thĩinĩ wa ihingo ciaku!

3 Ĩ wee, Jerusalemu,

ndũrĩ itũũra rĩakĩĩtwo rĩnyiitithanĩĩtio wega!

4 Gwaku nĩkuo mĩhĩrĩga yũkaga,

o yo mĩhĩrĩga yothe ya Isiraeli,

gũcookeria MWATHANI ngaatho o ta ũrĩa aamĩathire.

5 Thĩinĩ waku wee Jerusalemu,

nĩkuo athamaki a Isiraeli maikaragĩra itĩ ciao cia ũthamaki

nĩguo matuithanie andũ aao.

6 Hoeraai Jerusalemu thaayũ; ugaai atĩrĩ,

“Arĩa meendeete Jerusalemu marogaacĩra.

7 Kũrĩa thingo ciaku irigicĩirie kũrogĩa na thaayũ,

na thĩinĩ wa nyũmba ciaku cia ũthamaki kũroikara kũhooreire.”

8 Tondũ wa arĩa twĩtainwo nao o na araata,

wee Jerusalemu, ndakũhoera thaayũ.

9 Tondũ wa nyũmba ya MWATHANI Ngai witũ,

ndakũhoera ũgaacĩru, wee Jerusalemu.

Ihooya rĩa kũũria tha cia Ngai

1 Wee, MWATHANI, nĩ we njũthĩrĩirie,

o wee ũikarĩire gĩtĩ gĩaku kĩa ũnene kũu igũrũ.

2 O ta ũrĩa ndungata ĩroraga igũrũ mũnene wayo,

na o ta ũrĩa mũirĩĩtu ndungata aroraga mũmĩathi-rĩ,

ũguo noguo na ithuĩ tũkũroreete igũrũ,

wee, MWATHANI Ngai witũ, ũrĩtũiguĩra tha.

3 Tũiguĩre tha, MWATHANI, tũiguĩre tha,

nĩ gũkorwo nĩtũcambĩĩtio o kũigana.

4 Nĩtũkirĩrĩirie o kũigana

kĩnyũrũri kĩa arĩa maikaraga megangarĩĩte,

na njambanio ya andũ etĩĩi.

Ngai nĩagitagĩra andũ aake

1 Tiga MWATHANI araarĩ mwena witũ,

Aisiraeli ta nĩmagĩcookere ũguo;

2 “Tiga MWATHANI araarĩ mwena witũ

rĩrĩa thũ ciitũ iratũtharĩkĩire,

3 ingĩratũmeririe tũrĩ o muoyo,

nĩ ũrĩa irarĩrĩmbũkĩĩtwo nĩ maraakara nĩ ũndũ witũ.

4 Tũngĩrahaatirwo nĩ mũiyũro wa maaĩ,

tũhubĩkanio nĩ maaĩ;

5 tũngĩrahubĩkanirio nĩ kĩguũ

gĩgũtherera na ihenya ta rũũĩ.”

6 MWATHANI arogaathwo,

tondũ ndanatũrekereria tũniinwo nĩ thũ ciitũ.

7 Tũhonokeire ciarera

o ta kanyoni koorĩĩte kuuma mũtegoinĩ wa mũtegi nyoni;

mũtego nĩũtuĩkĩĩte, tũgakĩũra!

8 Ũteithio witũ uumaga harĩ MWATHANI,

ũrĩa wombire igũrũ na thĩ.

Ngai nĩwe ũikaragia andũ aake na thaayũ

1 Arĩa mehokeete MWATHANI mahaana kĩrĩma gĩa Zayuni

kĩrĩa gĩtangĩenyenyeka o na atĩa,

na gĩgũtũũra kĩĩhandĩĩte nginya tene na tene.

2 O ta ũrĩa irĩma ithiũrũrũkĩirie Jerusalemu,

noguo MWATHANI athiũrũrũkĩirie andũ aake

rĩu nginya tene na tene.

3 Andũ arĩa aaganu matigũtũũra maathaga bũrũri wa andũ arĩa athingu;

mangĩtũũra meekaga ũguo-rĩ,

andũ arĩa athingu o nao

mahota gwĩka ũũru.

4 MWATHANI, ĩka wega andũ arĩa eega,

o arĩa matarĩ ũcuuke ngoroinĩ ciao.

5 No rĩĩrĩ, MWATHANI, ũkĩherithia arĩa matarũmagĩrĩra njĩra yaku,

herithia o na arĩa meekaga ũũru.

Isiraeli kũroikara na thaayũ!

Kũhooya Ũhonokio

1 Rĩrĩa MWATHANI aatũcookirie Jerusalemu,

tuonaga ta arĩ kũroota twarootaga!

2 Hĩndĩ ĩyo tũgĩtheka

na tũkĩina nyĩmbo tũkeneete,

nacio ndũũrĩrĩ ikĩĩrana atĩrĩ,

“MWATHANI nĩekĩĩte andũ aake maũndũ manene!”

3 MWATHANI nĩatwĩkĩire maũndũ manene;

kaĩ nĩtũkeneete-ĩ!

4 Tũma tũgaacĩre o rĩngĩ, MWATHANI,

o ta ũrĩa mbura ĩtũmaga njũũĩ iria ihũĩte ciyũre rĩngĩ.

5 Arĩa mahandaga makĩrĩraga,

marogetha makĩrũũhagia nĩgũkena.

6 Arĩa moimagaraga makĩrĩraga makuuĩĩte mbegũ cia kũhanda,

makaahũndũka makĩrũũhagia nĩgũkena,

makuuĩĩte magetha maao.

Kũgaatha Ngai tondũ wa wega wake

1 Tiga nyũmba yakirwo nĩ MWATHANI,

amĩaki marutaga wĩra wa tũhũ;

tiga itũũra rĩmenyereirwo nĩ MWATHANI,

arangĩri no wĩra wa tũhũ makoragwo makĩruta.

2 Nĩ tũhũ mũtheri mũndũ gũũkagĩra kĩrooko tene

na gũkomaga acereirwo

akĩruta wĩra nĩguo oone gĩa kũrĩa.

MWATHANI-rĩ, ahingagĩria arĩa eendeete mabataro maao marĩ o toro.

3 Ciana nĩ kĩheeo

na nĩ kĩraathimo kuuma kũrĩ MWATHANI.

4 Ciana iria mũndũ aciaraga arĩ o mwĩthĩ

ihaana ta mĩguĩ mĩingĩ ĩnyiitĩĩtwo na mooko nĩ njamba ya ita.

5 Gũkena-rĩ, nĩ mũndũ ũcio ũrĩ na mĩguĩ mĩingĩ ta ũguo,

tondũ ndarĩ hingo akaahootwo nĩ thũ ciake

rĩrĩa rĩothe arĩkoragwo agĩciira nacio.

Iraathimo iria ciumanaga na gwathĩkĩra MWATHANI

1 Kũraathimwo-rĩ, nĩ mũndũ o wothe ũtĩĩĩte MWATHANI,

o ũrĩa ũrũmagĩrĩra njĩra ciake.

2 Wĩra ũrĩa mũndũ ũcio arutaga nĩũrĩmũhingagĩria mabataro maake,

na nĩarĩikaraga akeneete na agaacĩire.

3 Mũtumia wake arĩciaraga o ta mũthabibũ ũrĩa ũciaraga mũno e mũciĩ gwake,

nacio ciana ciake irĩkoragwo ihaana ta thuuna cia mĩtamaiyũ

ithiũrũrũkĩirie meetha yake.

4 Ũguo nĩguo mũndũ ũrĩa ũtĩĩĩte MWATHANI arĩraathimagwo.

5 MWATHANI aroraathimaga mũndũ ũcio arĩ Zayuni.

Arotũũra oonaga maũndũ meega

thĩinĩ wa Jerusalemu ũtũũro wake wothe!

6 Arotũũra nginya akoona ciana cia ciana ciake!

Isiraeli kũroikara na thaayũ!

Ihooya rĩa kũũria Ngai ahoote thũ cia Isiraeli

1 Atĩrĩĩrĩ, Isiraeli, twĩre ũrĩa thũ ciaku cianakũnyariira

kuuma ũrĩ o mwĩthĩ.

2 “Kuuma ndĩ o mwĩthĩ, thũ ciakwa ciananyariira ĩtarĩ na tha,

no gũtirĩ hĩndĩ irĩciandooria.

3 Thũ ciakwa ciandemangire mũgongo

ũkĩhaana ta mũgũnda ũrĩmĩĩtwo na mũraaũ.

4 No rĩĩrĩ, MWATHANI nĩ mwĩhokeku,

nĩatuangĩĩte mĩnyororo ĩrĩa ndĩroheetwo nayo nĩ andũ aaganu.”

5 Arĩa oothe mathũire Zayuni

marohũndũrwo maconokeete.

6 Marohaana ta nyeki ĩmereete igũrũ wa nyũmba,

ĩrĩa ĩhoohaga o na ĩtarĩ ĩrakũra,

7 na ndĩtuagwo nĩ mũndũ o na ũrĩkũ

kana ĩgakuuo ĩrĩ ihĩĩri.

8 Arĩa mahĩtũkagĩra hakuhĩ matiugaga atĩrĩ,

“MWATHANI aromũraathima!

Nĩtwamũraathima rĩĩtwainĩ rĩa MWATHANI!”