Category: Thaama

Kĩgongoona gĩa gũcinĩra ũbaani

1 “Ningĩ ũthondeke kĩgongoona kĩa mbaaũ cia mũgaa gĩa gũcinĩrwo ũbaani.

2 Nakĩo gĩkorwo gĩ thikwea kĩrĩ na ũraihu wa cenitimita mĩrongo ĩna na ithaano, na wariĩ wa o cenitimita mĩrongo ĩna na ithaano. Nakĩo kĩrũũgamo gĩkorwo kĩrĩ na cenitimita mĩrongo kenda. Nacio hĩa ciakĩo iria irĩ koonainĩ inya ciakĩo ikorwo irĩ kĩndũ kĩmwe nakĩo.

3 Ningĩ ũkĩhumbĩre na thahabu ĩrĩa therie mũno mĩena yakĩo ĩna o na hĩa ciakĩo, ũcooke ũgĩthiũrũrũkĩrie na mũgũkũ wa thahabu.

4 Ningĩ ũcooke ũthondeke icũhĩ igĩrĩ cia thahabu cia gũgĩkuua, ũciĩkĩre mũhuro wa mũgũkũ ũcio mĩenainĩ yerĩ ituĩke cia kũharũkagio mĩtĩ ĩrĩa ĩĩrĩ mĩraaya ya gũgĩkuua.

5 Mĩtĩ ĩyo ĩĩrĩ mĩraaya ũmĩthondeke ĩ ya mũgaa, na ũmĩhumbĩre na thahabu.

6 Ũcooke ũige kĩgongoona kĩu mwena wa na nja wa mbathiya ĩrĩa ĩcuurĩĩtio mbere ya Ithandũkũ rĩa Kĩrĩĩkanĩro. Hau nĩ ho ndĩrĩtũnganaga nawe.

7 O rũũciinĩ hĩndĩ ĩrĩa Harũni egũũka kũhaarĩria mataawa, nĩarĩcinagĩra ũbaani ũkũnunga wega kĩgongoonainĩ kĩu.

8 Ũguo noguo Harũni arĩĩkaga rĩrĩa ekũgwatia mataawa hwaĩinĩ. Igongoona rĩu rĩa gũcina ũbaani rĩgũtũũra rĩrutagwo nĩ njiarwa ciake nginya tene.

9 Kĩgongoona kĩu gĩtikaanarutĩrwo ũbaani ũtarĩ mũtheru, kana igongoona rĩa njino, kana igongoona rĩa mũtu, o na gĩtikaanaitĩrĩrio ndibei ya igongoona.

10 Harũni nĩarĩrutaga igongoona rĩa gũtheria kĩgongoona kĩu o mwaka. Arĩĩkaga ũguo na ũndũ wa gũitĩrĩria hĩainĩ iria inya cia kĩgongoona kĩu thakame ya nyamũ ĩrĩa ĩrutĩĩtwo nĩ ũndũ wa gũgĩtheria. Ũndũ ũcio ũrĩĩkagwo o mwaka nginya tene. Kĩgongoona kĩu kĩrĩkoragwo kĩrĩ gĩtheru mũno, amu nĩ niĩ MWATHANI nyamũrĩirwo.”

Igooti rĩa Hema ya gũtũnganwo

11 Ningĩ MWATHANI akĩĩra Musa atĩrĩ,

12 “Hĩndĩ ĩrĩa ũgũtara andũ a Isiraeli nĩ ũndũ wa kwenda kũmenya ũrĩa maigana-rĩ, o mũndũ nĩarĩndutagĩra kĩndũ gĩa gũkũũra muoyo wake nĩ geetha ndagaakorwo nĩ itũhũũhũ hĩndĩ ĩyo kũrataranwo.

13 O mũndũ ũrĩa ũgũtarwo no mũhaka arutage mbeeca iria ituĩtwo, ithimĩĩtwo na gĩthimi kĩrĩa kĩiguanĩirwo. Nacio igĩtuĩke nĩ niĩ ndutĩirwo.

14 Mũndũ o wothe ũgũtarwo wĩ na mĩaka mĩrongo ĩrĩ gũthiĩ na igũrũ, no mũhaka andutagĩre mbeeca icio.

15 Mũndũ ũrĩa mũtongu ndakaarutage makĩria kana mũthĩĩni arutage nyiinyi hĩndĩ ĩrĩa mekũruta mbeeca icio, nĩ ũndũ wa kũhoroheria mĩoyo yao.

16 Ũrĩũnganagia mbeeca icio kuuma kũrĩ andũ a Isiraeli ũgacihũthĩra na wĩra wa Hema yakwa. Igooti rĩu rĩrĩrutagwo rĩrĩ irĩhi rĩa kũhoroheria mĩoyo yao, na niĩ nĩndĩrĩririkanaga kũmagitĩra.”

Mbakũri ya gĩcango

17 MWATHANI akĩarĩria Musa akĩmwĩra atĩrĩ,

18 “Ũcooke ũthondeke mbakũri ya gwĩthambĩrwo ya gĩcango, ĩrĩ na njikarĩro o ya gĩcango. Ũmĩige gatagatĩ ka Hema yakwa na kĩgongoona kĩu, na ũcooke ũmĩĩkĩre maaĩ.

19 Namo maaĩ macio nĩmo Harũni na aariũ aake marĩhũthagĩra gwĩthamba mooko na magũrũ.

20 Hĩndĩ ĩrĩa megũtoonya Hemainĩ yakwa, kana rĩrĩa megũkuhĩrĩria kĩgongoona nĩ geetha mandutĩre magongoona ma njino, nĩmarĩĩthambaga nĩ geetha matigakue.

21 No mũhaka methambage mooko na magũrũ, nĩ geetha matigakue. Watho ũyũ no mũhaka maũrũmagĩrĩre hamwe na njiarwa ciao nginya tene.”

Maguta ma kwamũrana

22 Ningĩ MWATHANI akĩĩra Musa atĩrĩ,

23 “Oya indo iria nungi wega mũno: manemane ĩrĩa ndweku ya ũritũ wa kiro ithathatũ, ndarathini iria inungaga wega cia ũritũ wa kiro ithatũ, na kiro ithatũ cia mahuti manungi wega meetagwo karamathi.

24 Na ningĩ woe mahuti ma mũtĩ wa mũthemba wa ndarathini ma ũritũ wa kiro ithathatũ, (indo icio ciothe ithimĩĩtwo na gĩthimi kĩrĩa kĩiguanĩirwo.) Ũcooke wongerere rita inya cia maguta ma mĩtamaiyũ.

25 Ũgĩthondeke maguta matheru ma kwamũrana, mathondekeetwo o ta maguta manungi wega.

26 Maguta macio ũmaitĩrĩrie Hema yakwa, Ithandũkũ rĩa Kĩrĩĩkanĩro,

27 meetha na indo ciayo ciothe, mũtĩ wa gũcuuria mataawa na indo ciaguo ciothe, kĩgongoona gĩa gũcinĩrwo ũbaani,

28 kĩgongoona gĩa gũcinĩrwo magongoona ma njino na indo ciakĩo ciothe, o na mbakũri ĩrĩa ya gwĩthambĩra hamwe na njikarĩro yayo.

29 Indo icio ciothe ũgĩciamũre na njĩra ĩyo, nacio igĩtuĩke theru mũno; kĩrĩa gĩothe kĩrĩhuutanagia nacio kĩrĩtuĩkaga gĩtheru.

30 Ningĩ ũcooke ũitĩrĩrie Harũni na aariũ aake maguta ũmaamũre matuĩke athĩnjĩri Ngai a kũndungatagĩra.

31 Ũcooke wĩre andũ a Isiraeli atĩrĩ, ‘Maya nĩ mo maguta maakwa matheru ma kwamũrana nginya tene.

32 Na rĩĩrĩ, maguta macio matikaanaitĩrĩrio mũndũ o ũguo, na gũtikaanathondekwo mangĩ matukanĩĩtio ta mo. Maguta macio nĩ matheru, na no mũhaka mũmatuage matheru.

33 Mũndũ ũrĩa ũgaathondeka mangĩ ta mo, kana amaitĩrĩrie mũndũ ũtarĩ mũthĩnjĩri Ngai, nĩarĩingatagwo kuuma harĩ andũ aakwa.’ ”

Ũbaani

34 MWATHANI agĩcooka akĩĩra Musa atĩrĩ, “Oya mahuti ma mĩthemba ĩrĩa ĩnungaga wega, nĩyo: thitakiti, onuka, garibane, o na ũbumba ũrĩa mũtheru mũno, (naguo mũigana wamo moothe ũkorwo ũiganaine.)

35 Indo icio ũcihũthĩre gũthondeka ũbaani ũtukanĩĩtio ta maguta manungi wega. Ũcooke wongerere cumbĩ wa gũtũma ũikarage ũrĩ mwega na ũrĩ mũtheru.

36 Ũmwe wa ũbaani ũcio ũũthĩe ũhinye biũ, ũcooke ũũige Hemainĩ yakwa mbere ya Ithandũkũ rĩa Kĩrĩĩkanĩro kũrĩa ndĩrĩtũnganaga nawe. Na rĩĩrĩ, ũtuage ũbaani ũcio kĩndũ gĩtheru mũno.

37 Mũtikaanetukanĩrie ũbaani wanyu na njĩra ĩyo. Ũtuageei ta kĩndũ gĩtheru kĩamũrĩirwo MWATHANI.

38 Mũndũ o wothe angĩgeethondekera ũngĩ taguo aũtue maguta manungi wega ma kwĩhaka, nĩarĩingatagwo kuuma harĩ andũ aakwa.”

Mabundi ma gwaka Hema ya gũtũnganwo

1 Na rĩĩrĩ, MWATHANI akĩĩra Musa atĩrĩ,

2 “Nĩthuurĩĩte Bezaleli mũrũ wa Uri na mũcũkũrũ wa Huri, wa mũhĩrĩga wa Juda,

3 na ngamũiyũria roho wakwa. Ningĩ nĩndĩmũheete ũmenyi, ũũgĩ, o na ũhoti wa gũthondeka na kinyi indo cia mĩthemba yothe,

4 nĩguo athugundage na ũũgĩ mĩcoro ya kũhũthĩrwo mawĩrainĩ ma gũtura indo cia thahabu, betha, na gĩcango.

5 O na nĩndĩmũheete ũũgĩ wa gwacũhia tũhiga twa gũtheecererwo indoinĩ, kweya mĩtĩ, o na wa gũthondeka na kinyi indo cia mĩthemba yothe.

6 Nĩthuurĩĩte Oholiabu mũrũ wa Ahisamaku wa mũhĩrĩga wa Dani arutithanagie wĩra naake. Ningĩ nĩheete mabundi moothe moogĩ ũũgĩ mũnene, nĩ geetha mathondeke indo iria ciothe ngwathĩĩte ithondekwo. Nacio nĩ:

7 Hema yakwa, Ithandũkũ rĩa Kĩrĩĩkanĩro hamwe na gĩkunĩko kĩarĩo, indo ciothe cia gwĩkĩrwo Hemainĩ,

8 meetha hamwe na indo ciayo, mũtĩ wa gũcuuria mataawa wa thahabu ĩrĩa therie mũno hamwe na indo ciaguo ciothe, kĩgongoona gĩa gũcinĩra ũbaani,

9 kĩgongoona gĩa gũcinĩra magongoona ma njino hamwe na indo ciakĩo ciothe, mbakũri ĩrĩa ya gwĩthambĩra hamwe na njikarĩro ya yo,

10 nguo cia ũthĩnjĩri Ngai irĩ riiri mũno cia Harũni na aariũ aake cia kũhũthĩra hĩndĩ ĩrĩa megũtungata ta athĩnjĩri Ngai,

11 maguta marĩa ma kwamũrana, o na ũbaani ũrĩa ũnungaga wega wa Handũ Harĩa Hatheru. Magĩthondeka indo icio ciothe, macithondekage o ta ũrĩa ngwathĩĩte.”

Thabatũ: mũthenya wa kũhuurũka

12 Ningĩ MWATHANI akĩĩra Musa

13 eere andũ a Isiraeli atĩrĩ, “No mũhaka mũmenyerere mũthenya wa Thabatũ, ũrĩa arĩ guo mũthenya wakwa wa kũhuurũka, amu mũthenya ũcio nĩ rũũri gatagatĩ gaakwa na inyuĩ nginya tene, rwa kuonania atĩ niĩ MWATHANI nĩndĩmũtuĩte andũ aakwa.

14 No mũhaka mũmenyerere mũthenya ũyũ wa kũhuurũka, amu nĩmwamũre. Ũrĩa wothe ũkaaruta wĩra mũthenya ũcio, arege kũũmenyerera no mũhaka akooragwo.

15 Mũrĩrutaga wĩra wanyu mĩthenya ĩtandatũ, no mũthenya wa mũgwanja nĩ mũthenya wa gĩtĩĩo kĩnene wa kũhuurũka ũrĩa niĩ nyamũrĩirwo. Ũrĩa wothe ũkaaruta wĩra wa mũthemba o na ũrĩkũ mũthenya ũcio no mũhaka akooragwo.

16 Andũ a Isiraeli no mũhaka mamenyerere mũthenya ũyũ nginya tene ũrĩ ta rũũri rwa kĩrĩĩkanĩro.

17 Mũthenya ũcio nĩ rũũri rwa gũtũũra gatagatĩinĩ gaakwa na andũ a Isiraeli, amu niĩ MWATHANI, ndoombire igũrũ na thĩ mĩthenya ĩtandatũ, na mũthenya wa mũgwanja ngĩtiga kũruta wĩra, ngĩhuurũka.”

18 Na rĩĩrĩ, rĩrĩa Ngai aarĩĩkirie kwarĩria Musa kĩrĩmainĩ gĩa Sinai, akĩmũnengera ihengere iria igĩrĩ cia mahiga iria Ngai we mwene aandĩkĩĩte maathani.

Gateegwa ga thahabu

1 Na rĩrĩ, rĩrĩa andũ moonire atĩ Musa nĩaikarire atacookeete kuuma kĩrĩmainĩ makĩũngana magĩthiĩ kũrĩ Harũni makĩmwĩra atĩrĩ, “Mũndũ ũyũ ti Musa watũrutire kuuma bũrũri wa Misiri tũtiũĩ ũrĩa ooneete; kwoguo tũthondekere ngai ĩrĩa ĩrĩtũtongoragia.”

2 Naake Harũni akĩmeera atĩrĩ, “Rutaai icũhĩ cia thahabu iria ciĩkĩrĩĩtwo matũ nĩ atumia aanyu, na aariũ aanyu, o na aarĩ aanyu mũũndeehere.”

3 Andũ oothe magĩkĩruta icũhĩ ciao cia thahabu iria ciarĩ matũ magĩcitwarĩra Harũni.

4 Naake akĩoya icũhĩ icio, agĩcitwekia, agĩciacũhia, agĩthondeka mũhianano wa gateegwa ga thahabu.

Nao andũ makiuga atĩrĩ, “Isiraeli, ĩno nĩ yo ngai iitũ, ĩrĩa yatũtongoririe kuuma Misiri!”

5 Ningĩ Harũni agĩaka kĩgongoona mbere ya gateegwa kau ka thahabu, akĩanĩrĩra atĩrĩ, “Rũũciũ nĩgũkaagĩa thigũkũ ya gũtĩĩa MWATHANI.”

6 Nao andũ oothe makĩrooka gũũkĩra rũũciinĩ tene makĩruta nyamũ cia magongoona ma njino, na ingĩ cia magongoona ma thaayũ. Nao magĩgĩikara thĩ kũrĩa, o na kũnyua, na thuutha wa ũguo magĩũkĩra kũina.

7 Naake MWATHANI akĩĩra Musa atĩrĩ, “Ikũrũka narua, amu andũ aaku arĩa watongoririe ũkĩmaruta Misiri nĩmeehĩĩtie na makandega.

8 Nĩmarĩĩkĩĩtie gũtiga gũthiĩ na mĩthiĩre ĩrĩa ndamaathire mathiage nayo; nĩmatwekeetie thahabu mageethondekera mũhianano wa gateegwa, na nĩmaũthaathaĩtie, o na makaũrutĩra magongoona. Rĩu maroiga atĩ, ‘Ino nĩ yo ngai iitũ, ĩrĩa yatũtongoririe kuuma Misiri!’

9 Nĩnjũũĩ atĩ andũ aya nĩ aremi mũno,

10 na tondũ ũcio ndũkaae kũndigĩrĩria; nĩndaakarĩĩtio nĩ o, na nĩngũmaniina, njooke ngũtue wee o hamwe na njiarwa ciaku rũũrĩrĩ rũnene.”

11 No Musa agĩthaitha MWATHANI Ngai wake akiuga atĩrĩ, “MWATHANI, nĩ kĩĩ gĩgũtũma ũraakarĩre andũ aaku ũguo, arĩa wee warutire kuuma Misiri na hinya mũnene na ũhoti?

12 Nĩkĩ gĩgũtũma ũreke andũ a Misiri mahote kuuga atĩ watongoririe andũ aaku kuuma Misiri ũthiĩ ũkamooragĩre irĩmainĩ ũmaniine biũ? Tiga kũraakara; garũra meciiria na ũtige kũreehere andũ aaku ũũru ũyũ.

13 Ririkana ndungata ciaku Aburahamu, Isaaka, na Jakubu, iria wee mwene wehĩtire na ũgĩciĩrĩra atĩ nĩũkaingĩhia njiarwa ciao o ta njata cia igũrũ, o na nĩũkaahe njiarwa ciao bũrũri ũrĩa wothe weranĩire ũtuĩke ũgai wacio nginya tene.”

14 Naake MWATHANI agĩkĩĩricũkwo na agĩtiga kũreehithĩria andũ ũũru ũrĩa oigĩĩte nĩekũmareehithĩria.

15 Naake Musa akĩhũndũka agĩikũrũka kuuma kĩrĩmainĩ, akuuĩĩte na mooko ihengere iria cierĩ ciandĩkĩĩtwo maathani mĩena yerĩ.

16 Nacio ihengere icio cierĩ ciathondekeetwo nĩ Ngai we mwene na no we wakururĩĩte maathani macio igũrũ rĩacio.

17 Na rĩrĩa Joshua aiguire inegene rĩa andũ makĩanĩrĩra akĩĩra Musa atĩrĩ, “Kũrĩ na inegene rĩa mbaara kambĩinĩ.”

18 No Musa akĩmwĩra atĩrĩ, “Mĩgambo ĩyo ndĩkũiguĩka ta arĩ ya andũ mekuugĩrĩria nĩkũhootana, o na kana ya andũ megũkaya nĩkũhootwo; ĩkũiguĩka arĩ mĩgambo ya andũ maraina.”

19 Rĩrĩa Musa aakuhĩrĩirie kambĩ akĩona mũhianano ũcio wa gateegwa, o na andũ makĩina, agĩcinwo nĩ maraakara, na arĩ o hau magũrũinĩ ma kĩrĩma agĩikania thĩ ihengere iria aakuuĩĩte, ikiunĩkanga icunjĩ icunjĩ.

20 Agĩcooka akĩoya mũhianano ũcio maathondekeete akĩũcina na mwaki, akĩũthĩa ũgĩtuĩka ta mũtu, agĩcooka akĩũtukania na maaĩ akĩnengera andũ a Isiraeli manyue.

21 Agĩcooka akĩĩra Harũni atĩrĩ, “Kaĩ andũ aya maagwĩkire atĩa nĩguo ũtũme meeke wĩhia mũnene ũũ?”

22 Harũni agĩcookia atĩrĩ, “Tiga kũndaakarĩra; wee mwene nĩũũĩ ũrĩa andũ aya matũire meendaga gwĩka ũũru.

23 Maanjĩĩrire atĩrĩ, ‘Tũtiũĩ ũrĩa mũndũ ũyũ ti Musa ũrĩa watũrutire kuuma Misiri ooneete; kwoguo tũthondekere ngai iria irĩtũtongoragia.’

24 Na niĩ ngĩkĩmeera mandeehere indo ciao cia thahabu, na arĩa maarĩ nacio magĩciruta makĩĩnengera. Ngĩgĩikia indo icio mwakiinĩ, ngĩthondeka gateegwa gaaka!”

25 Musa agĩkĩona atĩ Harũni nĩarekereirie andũ makarema na magetua irimũ maithoinĩ ma thũ ciao.

26 Kwoguo agĩkĩrũũgama mũromoinĩ wa kambĩ akĩanĩrĩra atĩrĩ, “Ũrĩa wothe ũrĩ mwena wa MWATHANI nĩoke haaha!” Nao aariũ a Lawi oothe makĩũngana harĩ we,

27 naake akĩmeera atĩrĩ, “MWATHANI Ngai wa Isiraeli ekũmwatha atĩrĩ: O mũndũ wanyu nĩeyohe rũhiũ rwake rwa njora, mũthiĩ kũndũ guothe kambĩinĩ muumĩĩte mwena ũmwe, o nginya mwena ũrĩa ũngĩ, o mũndũ oorage mũndũ ũrĩa maciaranĩirwo, na mũraatawe, o na ũrĩa mariganĩĩtie naake.”

28 Nao aariũ acio a Lawi magĩĩka o ta ũrĩa Musa aameerĩĩte; makĩũraga ta andũ ngiri ithatũ (3,000) mũthenya ũcio.

29 Naake Musa akĩmeera atĩrĩ, “Ũũmũũthĩ nĩ mweyamũra ta athĩnjĩri Ngai ũtungatainĩ wa MWATHANI na ũndũ wa kũũraga aariũ aanyu, na andũ arĩa mũciaranĩirwo, na nĩ ũndũ ũcio MWATHANI nĩamũraathima.”

30 Mũthenya ũyũ ũngĩ Musa akĩĩra andũ atĩrĩ, “Nĩmwĩkĩĩte wĩhia mũnene mũno, no rĩu nĩngwambata kĩrĩmainĩ kũrĩ MWATHANI rĩngĩ; hiihi kwahoteka ndĩmuonere ũrekeri wa wĩhia wanyu.”

31 Musa agĩgĩcooka kũrĩ MWATHANI akĩmwĩra atĩrĩ, “Andũ aya nĩmeekĩĩte wĩhia mũnene mũno. Nĩmethondekeire ngai ya thahabu na makamĩthaathaiya.

32 Ndagũthaitha ũmoohere wĩhia wao; no angĩkorwo ndũkũmoohera ndagũthaitha, gĩthengie rĩĩtwa rĩakwa ibukuinĩ rĩrĩa wandĩkĩĩte marĩĩtwa ma andũ aaku.”

33 No MWATHANI agĩcookeria Musa atĩrĩ, “Arĩa manjĩhĩirie-rĩ, acio nĩ o ngweheria marĩĩtwa maao kuuma ibukuinĩ rĩakwa.

34 Rĩu, thiĩ ũtongorie andũ ũmatware kũndũ kũrĩa ndakũheire ũhoro wakuo. Ririkana atĩ mũraika wakwa nĩegũgũtongoria, no mahinda nĩmarooka marĩa ndĩrĩherithia andũ aya nĩ ũndũ wa wĩhia wao.”

35 Naake MWATHANI agĩtũmĩra andũ acio itũhũũhũ, nĩ ũndũ nĩmaatũmĩĩte Harũni amathondekere gateegwa ga thahabu.

MWATHANI gwatha andũ a Isiraeli moime kĩrĩmainĩ gĩa Sinai

1 MWATHANI akĩĩra Musa atĩrĩ, “Ũkĩraai muume gũũkũ, wee o na andũ aya warutire bũrũri wa Misiri, mũthiĩ bũrũri ũrĩa ndeerĩire Aburahamu, Isaaka, na Jakubu atĩ nĩngaũhe njiarwa ciao.

2 Nĩngũtũma mũraika amũtongorie, na nĩngũingata Akanaani, Aamori, Ahiti, Aperizi, Ahivi, na Ajebusi.

3 Nĩmũgũthiĩ bũrũri mwega na mũnoru, no niĩ mwene ndigũthiĩ hamwe na inyuĩ, amu mũrĩ andũ aremi mũno, na ndahota kũmũniinĩra njĩra.”

4 Rĩrĩa andũ maiguire ndeto icio njũru, makĩambĩrĩria kũrĩra nĩ kĩeha na makĩaga gwĩkĩra mathaga maao ma kwĩgemia rĩngĩ.

5 Amu MWATHANI nĩathĩĩte Musa ameere atĩrĩ, “Inyuĩ mũrĩ andũ aremi mũno, na ingĩtwarana na inyuĩ ihinda o na iniini, no ndĩmũniine biũ. Rĩu aũraai mathaga maanyu ma kwĩgemia, na nĩngũmenya ũrĩa ngũmwĩka.”

6 Kwoguo marĩĩkia kuuma kĩrĩmainĩ gĩa Sinai, andũ a Isiraeli matiacookire kwĩhumba mathaga maao ma kwĩgemia.

Hema ya MWATHANI ya gũtũnganwo

7 Na rĩĩrĩ, o harĩa hoothe andũ a Isiraeli maakaga kambĩ, Musa akuuaga Hema ĩrĩa nyamũre akamĩamba haraiharaihu na kambĩ. Nayo yetagwo Hema ya gũtũnganwo, na ũrĩa wothe ũngĩendire gũtuĩria ũhoro kwĩ MWATHANI aathiaga kuo.

8 Ningĩ hĩndĩ ĩrĩa yothe Musa oimagara gũthiĩ Hemainĩ ya gũtũnganwo, andũ oothe mookagĩra makarũũgama mĩromoinĩ ya hema ciao makamwĩrorera nginya akaingĩra thĩinĩ wa Hema ĩyo.

9 Thuutha wa Musa gũtoonya thĩinĩ, gĩtugĩ gĩa itu gĩaikũrũkaga gĩgaikara mũromoinĩ wa Hema ĩyo, naake MWATHANI arĩ ituinĩ rĩu akaaria na Musa.

10 Nao andũ moona gĩtugĩ kĩu gĩa itu mũromoinĩ wa Hema ĩyo, magookĩra magathaathaiya o mũndũ arĩ mũromoinĩ wa hema yake.

11 Naake MWATHANI agakĩaria na Musa ũthiũ kwa ũthiũ, o ta ũrĩa mũndũ angĩaria na mũraatawe. Thuutha wa ũguo Musa agakĩhũndũka agacooka kambĩinĩ, no ndungata yake ĩrĩa yetagwo Joshua mũrũ wa Nuni, ĩgathiĩ na mbere gũikara Hemainĩ ĩyo.

MWATHANI kwĩranĩra nĩarĩkoragwo hamwe na andũ aake

12 Naake Musa akĩĩra MWATHANI atĩrĩ, “Ti itherũ nĩũrĩkĩĩtie kũũnjĩĩra njũkire njoe andũ aya tũthiĩ nao; no ndũrĩ ũramenyithia ũrĩa ũgũtũma atwarane na niĩ. Nĩũrĩkĩĩtie kũũnjĩĩra atĩ nĩũnjũũĩ wega na nĩũkenagio nĩ niĩ.

13 Rĩu-rĩ, angĩkorwo nĩnjĩtĩkĩrĩkĩĩte nĩ we, menyithia ũrĩa mĩbango yaku ĩtariĩ, nĩ geetha hote gũgũtungatĩra na thiĩ na mbere na gwĩtĩkĩrĩka nĩ we. Ririkana atĩ rũũrĩrĩ rũũrũ nĩ we wĩthuurĩire rũtuĩke rwaku.”

14 Naake MWATHANI akĩmwĩra atĩrĩ, “Niĩ mwene nĩngũtwarana nawe na nĩngũkũhe ũhootani.”

15 Naake Musa agĩcookia atĩrĩ, “Ũngĩkorwo wee ndũgũtwarana na ithuĩ-rĩ, ndũgaatũme tuume gũũkũ.

16 Mũndũ angĩkĩmenya atĩa atĩ nĩũkeneetio nĩ andũ aaku o hamwe na niĩ angĩkorwo ndũgũtwarana na ithuĩ? Gũkorwo ũrĩ hamwe na ithuĩ nĩgũgũtũma tũkũũrĩkanage kuuma kũrĩ andũ arĩa angĩ marĩ thĩinĩ wa thĩ.”

17 MWATHANI agĩkĩĩra Musa atĩrĩ, “Nĩngwĩka ũguo woria, amu wee nĩngũũĩ wega mũno o na nĩngenagio nĩ we.”

18 Ningĩ Musa akiuga atĩrĩ, “Ndagũthaitha nyonia riiri waku.”

19 Naake MWATHANI akĩmũcookeria atĩrĩ, “Nĩngũhĩtũkĩria ũkengi wakwa mũnene mbere yaku, na ngwete rĩĩtwa rĩakwa rĩtheru mbere yaku. Nĩ niĩ MWATHANI; ũtugi wakwa ndĩũkinyagĩria o mũndũ ũrĩa ndeenda kũũkinyĩria, na ngaiguĩra tha o mũndũ ũrĩa ndeenda kũiguĩra tha.

20 No ndingĩreka wone ũthiũ wakwa, amu gũtirĩ mũndũ ũngĩnyona acooke atũũre muoyo.

21 Atĩrĩĩrĩ, haaha harĩ handũ hakuhĩ na niĩ harĩa ũkũrũũgama ihigainĩ.

22 Rĩrĩa riiri wakwa ũrĩtua kũhĩtũka, nĩndĩrĩgũtoonyia mwatũkainĩ wa ihiga rĩu na ngũhumbĩre na guoko gwakwa nginya ndĩĩkie kũhĩtũka.

23 Ngĩcooke njeherie guoko gwakwa, ũnyone na thuutha, no ũthiũ wakwa ndũkũwona.”

Ihengere cia keerĩ cia mahiga

1 MWATHANI akĩĩra Musa atĩrĩ, “Acũhia ihengere igĩrĩ cia mahiga o ta iria cia mbere, nĩguo ndĩciandĩke ciugo iria ciarĩ ihengereinĩ iria cia mbere iria woragire.

2 Nawe wĩharĩrie rũũciũ kĩrooko, wambate kĩrĩmainĩ gĩa Sinai ũũke ũndũnge kũu igũrũ.

3 Ndũgooke na mũndũ o na ũrĩkũ, kana mũndũ o na ũrĩkũ ooneke kũu guothe kĩrĩmainĩ; ng’ondu kana ng’ombe itikaanarĩithio kũu magũrũinĩ ma kĩrĩma.”

4 Kwoguo Musa agĩacũhia ihengere ingĩ igĩrĩ cia mahiga, na rũũciinĩ kwarooka gũkĩa agĩcikuua akĩambata kĩrĩma gĩa Sinai o ta ũrĩa aathĩĩtwo nĩ MWATHANI.

5 Naake MWATHANI agĩikũrũka arĩ thĩinĩ wa itu, akĩrũũgama hakuhĩ na Musa, na agĩtamũka rĩĩtwa rĩake rĩtheru, MWATHANI.

6 Agĩcooka akĩhĩtũkĩra mbere yake akĩanĩrĩra atĩrĩ, “Nĩ niĩ MWATHANI Ngai, nĩnjiguanagĩra tha mũno na ngakinyĩria andũ wega wakwa, ndihiũhaga kũraakara, na njiyũirwo nĩ wendo na ũhoro wa ma.

7 Nĩhingagia kĩĩranĩro gĩakwa nginya mĩaka ngiri na ngiri, na ngoohanĩra waganu na meehia, no ndikaaga kũherithia ciana na ciana cia ciana ciacio o nginya rũciaro rwa gatatũ na rwa kana nĩ ũndũ wa meehia ma aciari aacio.”

8 Musa akĩinamĩrĩra thĩ na ihenya agĩthaathaiya.

9 Agĩcooka akiuga atĩrĩ, “MWATHANI, angĩkorwo ti itherũ nĩnjĩtĩkĩrĩkĩĩte nĩ we, nĩndagũthaitha ũtwarane hamwe na ithuĩ. O na gũtuĩka andũ aya nĩmoomĩĩtie ngoro, tuohere mawaganu maitũ o na meehia maitũ, na ũtwamũkĩre ta andũ aaku kĩũmbe.”

Kwerũhia kĩrĩĩkanĩro

10 Ningĩ MWATHANI akĩĩra Musa atĩrĩ, “Nĩngũthondeka kĩrĩĩkanĩro na andũ a Isiraeli. Nĩngwĩka maũndũ manene andũ aya makĩyonagĩra matarĩ meekwo thĩ yothe kana rũũrĩrĩinĩ o na rũrĩkũ. Nao andũ aya oothe mamũrigicĩirie nĩmekuona maũndũ marĩa niĩ MWATHANI ngwĩka, amu nĩngwĩka ũndũ wa gwĩtigĩrwo nĩ ũndũ wanyu.

11 Athĩkagĩraai mawatho marĩa ngũmũhe ũũmũũthĩ. Nĩngũingata Aamori, Akanaani, Ahiti, Aperizi, Ahivi, na Ajebusi mamweherere.

12 Mwĩmenyerereei mũtigaathondeke kĩrĩĩkanĩro na atũũri a bũrũri ũcio mũgũthiĩ, nĩ amu ũndũ ta ũcio wahota gũtuĩka mũtego mũũru gatagatĩ kaanyu.

13 Handũ ha gwĩka ũguo, tharũriai igongoona ciao, munange itugĩ ciao iria mathaathayagia, na mũtemenge mĩhianano ya ngai yao ĩrĩa ĩĩtagwo Ashera.

14 “Mũtikaanathaathaiye ngai ĩngĩ, amu niĩ MWATHANI ndĩ Ngai ũteendaga kũigananio na ngai ĩngĩ.

15 Mwĩmenyerereei mũtigaathondeke kĩrĩĩkanĩro na atũũri a bũrũri ũcio, amu mweka ũguo, rĩrĩa megũthaathaiya ngai ciao, na magacirutĩra magongoona, nĩmarĩmwĩtaga mũnyiitanĩre nao, na mũgakĩrĩa irio iria irutagĩrwo ngai icio ciao.

16 Nao aariũ aanyu mahota kũhikia airĩĩtu aao, matũme maage kwĩhokeka harĩ niĩ na mathaathaiye ngai icio ciao.

17 “Mũtikaanethondekere ngai cia kĩgera mũcithaathayagie.

18 “Ningĩ tũũraai mũmenyereire Thigũkũ ya Mĩgate ĩrĩa Ĩtarĩ Mĩĩkĩre Ndaawa ya Kũimbia. Ta ũrĩa ndĩkĩĩtie kũmwatha, rĩagaai mĩgate ĩtarĩ mĩimbie mĩthenya mũgwanja mweriinĩ wa Abibu, amu mweri ũcio nĩguo mwoimire bũrũri wa Misiri.

19 “Aariũ aanyu oothe arĩa marigithaathi nĩ aakwa, o na marigithaathi moothe ma njamba ma nyamũ.

20 No irigithaathi rĩa ndigiri nĩmũrĩrĩkũũraga na ndũrũme. Angĩkorwo mũtirĩrĩkũũraga-rĩ, mũrĩriunaga ngingo. O na aariũ aanyu arĩa marigithaathi nĩmũrĩmakũũraga.

“Mũndũ o na ũrĩkũ ndakaanooke gũũthaathaiya arĩ mooko matheri.

21 “Rutagaai wĩra mĩthenya ĩtandatũ, no mũthenya wa mũgwanja mũtikaanarute wĩra. O na hĩndĩ ya gũciimba na ya kũgetha no mũrĩhuurũkaga.

22 “Na mũmenyagĩrĩre Thigũkũ ya Magetha rĩrĩa mwambĩrĩria kũgetha irio cia magetha ma mbere ma ngano. O na mũmenyagĩrĩre Thigũkũ ya Ithũnũ mũicoinĩ wa mwaka rĩrĩa mũkũgetha irio.

23 “Arũme oothe marĩũkaga gũũthaathaiya niĩ MWATHANI Ngai wa Isiraeli maita matatũ o mwaka.

24 Ndarĩĩkia kũingata ndũũrĩrĩ imweherere, njooke njaramie mĩhaka ya bũrũri wanyu, gũtirĩ mũndũ o na ũmwe ũkaahoota bũrũri wanyu hĩndĩ ya thigũkũ icio ithatũ.

25 “Mũtikaanandutĩre mĩgate mĩimbie hĩndĩ ĩrĩa mũkũndutĩra magongoona ma nyamũ. Na ningĩ mũtikaanareke gĩcunjĩ o na kĩmwe kĩa thigũkũ ya Bathaka kĩraare nginya rũũciinĩ.

26 “Na rĩĩrĩ, o mwaka mũreehage nyũmbainĩ ya MWATHANI magetha ma mbere ma mĩgũnda yanyu.

“Ningĩ-rĩ, mũtikaanaruge koori na iria rĩa nyina.”

27 MWATHANI agĩcooka akĩĩra Musa atĩrĩ, “Andĩka ciugo ici, nĩ amu nĩndarĩa kĩrĩĩko nawe, o na andũ a Isiraeli kũringana na ũrĩa ciugo icio itariĩ.”

28 Musa agĩgĩikara kũu kĩrĩmainĩ hamwe na MWATHANI mũthenya na ũtukũ, mĩthenya mĩrongo ĩna, atekũrĩa kana kũnyua. Naake akĩandĩka ihengereinĩ ciugo icio cia kĩrĩĩkanĩro, na nĩcio Maathani marĩa Ikũmi.

Musa gũikũrũka kuuma kĩrĩmainĩ gĩa Sinai

29 Rĩrĩa Musa aikũrũkire kuuma kĩrĩmainĩ gĩa Sinai akuuĩĩte Maathani marĩa Ikũmi, ũthiũ wake nĩwahenagia nĩ ũndũ wa kwaria na MWATHANI, no we ndamenyaga.

30 Rĩrĩa Harũni na andũ oothe a Isiraeli maamuonire, makĩona ũthiũ wake ũkĩhenia, magĩĩtigĩra kũmũkuhĩrĩria.

31 No Musa akĩmeeta, naake Harũni na atongoria oothe a mũingĩ magĩthiĩ harĩ we, naake Musa akĩmaarĩria.

32 Thuutha ũcio andũ oothe a Isiraeli makĩmũthiũrũrũkĩria, naake Musa akĩmahe mawatho moothe marĩa MWATHANI aamũheete kĩrĩmainĩ gĩa Sinai.

33 Rĩrĩa Musa aarĩĩkirie kwaria nao, akĩĩhumbĩra ũthiũ na gĩtambaya.

34 Rĩrĩa rĩothe Musa aathiaga Hemainĩ ya gũtũnganwo kwaria na MWATHANI, nĩeheragia gĩtambaya kĩu. Oima nja aathiaga kwaria na andũ a Isiraeli akameera ũrĩa MWATHANI amwatha ameere.

35 Nao andũ a Isiraeli makoona ũthiũ wa Musa ũkĩhenia. Musa agagĩcooka akehumbĩra na gĩtambaya kĩu o nginya rĩrĩa rĩngĩ arĩthiĩ kwaria na MWATHANI.

Mawatho makoniĩ Thabatũ

1 Na rĩĩrĩ, Musa agĩcookanĩrĩria andũ oothe a Isiraeli akĩmeera atĩrĩ, “Ũũ nĩguo MWATHANI amwathĩĩte mwĩkage:

2 Rutagaai wĩra mĩthenya ĩtandatũ, no mũthenya wa mũgwanja mũũtue mũthenya mwamũre, ũtuĩke Thabatũ ya kũhuurũka yamũrĩirwo MWATHANI. Mũndũ o na ũrĩkũ ũrĩa ũkaaruta wĩra mũthenya ũcio no mũhaka akooragwo.

3 Mũtikaanakie o na mwaki ciikaroinĩ cianyu mũthenya ũcio wa Thabatũ.”

Magongoona ma Hema ĩrĩa nyamũre

4 Naake Musa akĩĩra andũ oothe a Isiraeli atĩrĩ, “Ũũ nĩguo MWATHANI amwathĩĩte mwĩkage:

5 Rutĩraai MWATHANI mũhothi. Ũrĩa wothe ũkwenda gwĩka ũguo nĩareehe mũhothi wa thahabu, betha, gĩcango,

6 ndigi cia gataani iria njega cia guoya wa rangi wa mburuu, babũ, mũtuune, o na nguo ithondekeetwo na guoya wa mbũri;

7 njũũa cia ndũrũme itobokeetio rangiinĩ igatuunĩha, njũũa iria njega, na mbaaũ cia mũgaa,

8 maguta ma gwakia mataawa, mahuti marĩa manungaga wega ma gwĩkĩrwo magutainĩ ma kwamũrana o na magwĩkĩrwo ũbaaniinĩ,

9 na tũhiga twa goro twa rangi mũtuune na tũngĩ twa goro twa gũtheecererwo ebodiinĩ ya Mũthĩnjĩri Ngai Ũrĩa Mũnene o na nguoinĩ yake ya gĩthũri.

Indo cia Hema ya MWATHANI ya gũtũnganwo

10 “Ningĩ andũ oothe arĩa marĩ na ũũgĩ nĩmooke mathondeke indo icio ciothe MWATHANI aathanĩĩte,

11 nacio nĩ: Hema, ciandarũũa ciayo igĩrĩ cia kũmĩhumbĩra, ngathĩka ciayo, mbaaũ ciayo cia kũmĩrũũgamia, mĩgamba yayo, itugĩ ciayo na njikarĩro ciacio,

12 Ithandũkũ rĩa Kĩrĩĩkanĩro, mĩtĩ mĩraaya yarĩo, gĩkunĩko kĩarĩo, mbathiya ya kũhakania,

13 meetha, mĩtĩ yayo ĩrĩa mĩraaya, indo ciayo ciothe, mĩgate ĩrĩa mĩtheru ĩrutĩirwo Ngai,

14 mũtĩ wa gũcuuria mataawa na indo ciaguo ciothe, mataawa maguo na maguta maamo,

15 kĩgongoona gĩa gũcinĩra ũbaani hamwe na mĩtĩ yakĩo ĩrĩa mĩraaya, maguta ma kwamũrana, ũbaani ũrĩa ũnungaga wega, mbathiya ya gwĩkĩrwo mũromoinĩ wa Hema ĩyo,

16 kĩgongoona kĩa magongoona ma njino, hamwe na kĩrũtara gĩakĩo gĩa gĩcango na mĩtĩ yakĩo ĩrĩa mĩraaya hamwe na indo ciakĩo ciothe, mbakũri ya gwĩthambĩra hamwe na njikarĩro ya yo,

17 mbathiya cia gũcuurio mĩenainĩ ya nja ya Hema, itugĩ cia nja ĩyo hamwe na njikarĩro ciacio, mbathiya ya gũcuurio mũromoinĩ wa kuuma na nja,

18 higĩ na mĩkanda ya hema na nja ya yo,

19 nguo iria irĩ riiri cia kwĩhumbwo nĩ athĩnjĩri Ngai rĩrĩa megũtungata thĩinĩ wa Handũ harĩa Hatheru, nĩcio nguo iria nyamũre cia Harũni ũrĩa Mũthĩnjĩri Ngai o na cia aariũ aake.”

Andũ kũreehe mĩhothi yao

20 Nao andũ oothe a Isiraeli magĩkĩehera harĩ Musa.

21 Na rĩĩrĩ, mũndũ o wothe weriraga gwĩka ũndũ ũcio agĩtwara mĩhothi yake kũrĩ MWATHANI ĩrĩ ya gũthondeka Hema ya gũtũnganwo. Magĩgĩtwara kĩrĩa gĩothe kĩabatarainie kũhũthĩrwo nĩ ũndũ wa gũthaathaiya o na nĩ ũndũ wa gũtuma nguo cia ũthĩnjĩri Ngai.

22 Arĩa oothe merutĩire gwĩka ũguo, arũme o na atumia, magĩtwara mĩthemba ya mbini ng’emie, icũhĩ cia matũ, icũhĩ cia ciara irĩ na marĩĩtwa, mĩgathĩ, o na mathaga ma mĩthemba yothe ya thahabu, magĩciamũrĩra MWATHANI.

23 Ningĩ ũrĩa wothe wakoragwo arĩ na gataani ĩrĩa njega, guoya wa rangi wa mburuu, babũ, na mũtuune, guoya wa mbũri, njũũa cia ndũrũme itobokeetio rangiinĩ igatuunĩha, kana njũũa iria njega magĩcitwara.

24 Nao arĩa oothe mangĩahotire kũruta kĩndũ kĩa betha kana gĩa gĩcango magĩtwarĩra MWATHANI mũhothi wao; nao arĩa oothe maarĩ na mbaaũ cia mũgaa ingĩrutĩrwo wĩra o na ũrĩkũ wĩrainĩ ũcio magĩcitwara.

25 Nao atumia arĩa maarĩ na ũũgĩ wa gũtuma magĩtwara ndigi cia gataani ĩrĩa njega, na ndigi cia guoya wa rangi wa mburuu, babũ, na mũtuune, iria moogotheete.

26 O na ningĩ makĩogotha ndigi cia guoya wa mbũri.

27 Nao atongoria magĩtwara tũhiga twa goro twa rangi mũtuune na tũhiga tũngĩ twa gũtheecererwo ebodiinĩ na nguoinĩ ya gĩthũri,

28 mahuti marĩa manungaga wega, maguta ma gwakia mataawa, maguta ma kwamũrana, o na ma gũthondeka ũbaani ũrĩa ũnungaga wega.

29 Ũguo noguo andũ oothe a Isiraeli arĩa meyendagĩra maatwarire mĩhothi yao kũrĩ MWATHANI ya wĩra ũcio aathĩĩte Musa arute.

Mabundi ma gwaka Hema ya gũtũnganwo

30 Na rĩĩrĩ, Musa akĩĩra andũ a Isiraeli atĩrĩ, “MWATHANI nĩathuurĩĩte Bezaleli mũrũ wa Uri na mũcũkũrũ wa Huri, wa mũhĩrĩga wa Juda,

31 akamũiyũria na roho wake. Nĩamũheete ũhoti, ũũgĩ, ũmenyi, o na ũũgĩ wa gũthondeka na kinyi indo cia mĩthemba yothe.

32 Amũheete ũũgĩ ũcio nĩguo athugundage mĩcoro ya kũhũthĩrwo mawĩrainĩ ma gũtura indo cia thahabu, betha, na gĩcango.

33 Nĩamũheete ũũgĩ wa gwacũhia tũhiga twa gũtheecererwo indoinĩ, wa kweya mĩtĩ, o na wa gũthondeka na kinyi indo cia mĩthemba yothe.

34 Ningĩ MWATHANI nĩaheete Bezaleli na Oholiabu mũrũ wa Ahisamaku wa mũhĩrĩga wa Dani, ũhoti wa kũruta andũ arĩa angĩ ũbundi wao.

35 MWATHANI nĩamaheete ũhoti wa kũruta mawĩra ma mĩthemba yothe ya ũũgĩ, kũgemia indo na ndigi cia guoya wa rangi wa mburuu, babũ, na mũtuune, gũtuma gataani ĩrĩa njega, o na itambaya cia mĩthemba ĩngĩ. Andũ acio me na ũhoti wa kũruta mawĩra ma mĩthemba yothe, o na ũũgĩ wa gũcora.

1 “Nao Bezaleli, Oholiabu, na mabundi marĩa mangĩ moothe marĩa MWATHANI aheete ũũgĩ na ũmenyi, o marĩa mooĩ gũthondeka indo ciothe iria ibatarainie gwaka Hema ĩrĩa nyamũre, megũthondeka indo ciothe o ta ũrĩa MWATHANI aathanĩĩte ithondekwo.”

Andũ gũtwara iheeo nyingĩ

2 Naake Musa agĩgĩĩta Bezaleli, Oholiabu, o na mabundi marĩa MWATHANI aaheete ũhoti marĩa meendaga gũteithĩrĩria, akĩmeera makaambĩrĩrie wĩra.

3 Nao magĩkĩnengerwo nĩ Musa indo ciothe iria ciarutĩĩtwo nĩ andũ a Isiraeli cia gwaka Hema ĩyo nyamũre. No andũ a Isiraeli magĩthiĩ na mbere gũtwarĩra Musa mĩhothi yao rũũciinĩ o rũũciinĩ.

4 Namo mabundi marĩa maarutaga wĩra ũcio makiuma o mũndũ wĩrainĩ ũrĩa aarutaga,

5 magĩthiĩ makĩĩra Musa atĩrĩ, “Andũ nĩmareeheete indo nyingĩ makĩria ya iria ibatarainie cia kũruta wĩra ũrĩa MWATHANI aathanire ũrutwo.”

6 Nĩ ũndũ ũcio Musa agĩgĩathana kambĩinĩ guothe atĩ mũndũ o na ũrĩkũ ndagathiĩ na mbere kũhotha kĩndũ nĩ ũndũ wa Hema ĩyo nyamũre. Nao andũ magĩgĩtiga gũtwara indo ingĩ.

7 Indo iria maarutĩĩte ciarĩ nyingĩ makĩria ma iria ciabatarainie kũrĩĩkia wĩra wothe.

Gwaka Hema ya gũtũnganwo

8 Namo mabundi marĩa maarĩ njoorua mũno thĩinĩ wa mabundi marĩa maarutaga wĩra ũcio magĩgĩthondeka Hema ya gũtũnganwo. Makĩmĩthondeka na itambaya ikũmi cia gataani ĩrĩa njega itumĩĩtwo na ndigi cia guoya wa rangi wa mburuu, babũ, na mũtuune, igacooka ikagemio na mĩcoro ya ciũmbe iria irĩ mathagu.

9 Itambaya icio nĩciaiganaine; o gĩtambaya kĩarĩ na ũraihu wa mita ikũmi na igĩrĩ na wariĩ wa mita igĩrĩ.

10 Nao makĩnyiitithania itambaya ithaano hamwe igĩtuĩka kĩmwe, na magĩĩka o ro ũguo na icio ingĩ ithaano.

11 Magĩcooka magĩthondeka ciana na gĩtambaya kĩa rangi wa mburuu magĩcitumĩrĩra mũthiainĩ wa itambaya cia mbere ithaano, o na wa icio ingĩ.

12 Magĩtumĩrĩra ciana mĩrongo ĩtaano harĩ itambaya cia mbere o na ingĩ mĩrongo ĩtaano harĩ icio ingĩ ithaano. Nacio ciana icio igĩikara iringaine.

13 Ningĩ magĩthondeka ngathĩka mĩrongo ĩtaano cia thahabu cia kũnyiitithania itambaya icio nĩguo ituĩke kĩndũ kĩmwe.

14 Ningĩ magĩthondeka hema ya kũhumbĩra Hema ĩyo na itambaya ikũmi na kĩmwe ithondekeetwo na guoya wa ng’ondu.

15 Nacio itambaya icio igĩthondekwo ciiganaine irĩ na ũraihu wa mita ikũmi na ithatũ na wariĩ wa mita igĩrĩ.

16 Itambaya ithaano magĩcitumania hamwe igĩtuĩka kĩndũ kĩmwe, nacio icio ingĩ ithathatũ igĩtumanio hamwe igĩtuĩka kĩndũ kĩmwe.

17 Magĩcooka magĩtumĩrĩra ciana mĩrongo ĩtaano mũthiainĩ wa itambaya icio cia mbere, na ciana ingĩ mĩrongo ĩtaano mũthiainĩ wa icio ingĩ.

18 Ningĩ magĩthondeka ngathĩka mĩrongo ĩtaano cia gĩcango cia kũnyiitithania itambaya icio, nĩ geetha ituĩke kĩandarũũa gĩa kũhumbĩra.

19 Magĩcooka magĩthondekera hema ĩyo ciandarũũa igĩrĩ cia kũmĩhumbĩra; kĩmwe kĩa njũũa cia ndũrũme itobokeetio rangiinĩ mũtuune igatuunĩha, nakĩo kĩu kĩngĩ kĩa njũũa iria njega gĩa kũigĩrĩrwo igũrũ rĩa kĩu kĩa mbere.

20 Ningĩ magĩthondeka mbaaũ cia mũgaa cia kũrũũgamia Hema ĩyo.

21 O rũbaaũ rwarĩ na ũraihu wa mita inya na wariĩ wa cenitimita mĩrongo ĩtandatũ na ithathatũ,

22 na o rũbaaũ rwarĩ na ihoce igĩrĩ cia kũnyiitithania mbaaũ icio hamwe.

23 Magĩgĩthondeka mbaaũ mĩrongo ĩĩrĩ cia mwena wa na kĩanda,

24 na njikarĩro ciacio mĩrongo ĩna cia betha, o rũbaaũ rũgakorwo na njikarĩro igĩrĩ cia kũnyiitĩrĩra ihoce ciaruo.

25 Naguo mwena wa na rũgongo wa Hema ĩyo makĩũthondekera mbaaũ mĩrongo ĩĩrĩ

26 na njikarĩro ciacio mĩrongo ĩna cia betha, o rũbaaũ rũgĩkorwo na njikarĩro igĩrĩ.

27 Ningĩ mwena wa na thuutha wa Hema ĩyo, nĩguo mwena na ithũĩro, makĩũthondekera mbaaũ ithathatũ,

28 magĩcooka magĩthondeka mbaaũ ingĩ igĩrĩ cia koona.

29 Nacio icio cia koona ikĩnyiitithanio gĩtinainĩ igĩthiĩ inyiitithanĩĩtio o ro ũguo nginya igũrũ. Nacio mbaaũ icio cierĩ cia koona magĩcithondeka o ro ũguo.

30 Nacio mbaaũ ciothe ciarĩ inyaanya na njikarĩro ikũmi na ithathatũ, o rũbaaũ rũgĩkorwo na njikarĩro igĩrĩ.

31 Ningĩ magĩthondeka mĩgamba ikũmi na ĩtaano ya mũgaa, ĩtaano ya mbaaũ cia mwena ũmwe wa Hema,

32 nayo ĩtaano ya mbaaũ cia mwena ũrĩa ũngĩ, nayo ĩyo ĩngĩ ĩtaano ya mbaaũ cia mwena wa na thuutha, nĩguo mwena wa na ithũĩro.

33 Ningĩ magĩthondeka mũgamba wa gatagatĩ ka mbaaũ iria irũngiĩ, ũgĩtuĩkania kuuma mũthia ũmwe wa Hema nginya ũrĩa ũngĩ.

34 Nacio mbaaũ icio irũngiĩ magĩcihumbĩra na thahabu, magĩcooka magĩciharũkia icũhĩ ciacio cia thahabu cia gũtoonyio mĩgamba. O nayo mĩgamba makĩmĩhumbĩra na thahabu.

35 Ningĩ magĩtuma mbathiya ya kũhakania ya gataani ĩrĩa njega ĩtumĩĩtwo na ndigi cia guoya wa rangi wa mburuu, babũ, na mũtuune, magĩcooka makĩmĩgemia na mĩcoro ya ciũmbe iria irĩ mathagu.

36 Magĩcooka magĩthondeka itugĩ inya cia mũgaa cia gũcuurio mbathiya ĩyo, na magĩcihumbĩra na thahabu. Nacio ihoce ciacio magĩcithondeka na thahabu. Magĩcooka magĩthondekera itugĩ icio njikarĩro inya cia betha.

37 Ningĩ mũromo wa Hema makĩũtumĩra mbathiya ya gataani ĩrĩa njega ĩtumĩĩtwo na ndigi cia guoya wa rangi wa mburuu, babũ, na mũtuune na ĩkagemio.

38 Nayo mbathiya ĩyo makĩmĩthondekera itugĩ ithaano hamwe na ihoce ciacio, makĩhumbĩra ciongo ciacio na tũmĩtĩ twacio na thahabu. Ningĩ magĩthondekera itugĩ icio njikarĩro ithaano cia gĩcango.

Gũthondeka Ithandũkũ rĩa Kĩrĩĩkanĩro

1 Na rĩĩrĩ, Bezaleli agĩthondeka Ithandũkũ rĩa Kĩrĩĩkanĩro na mbaaũ cia mũgaa, naguo ũraihu warĩo warĩ cenitimita igana rĩa ikũmi, na wariĩ warĩo cenitimita mĩrongo ĩtandatũ na ithathatũ, nakĩo kĩrũũgamo cenitimita o mĩrongo ĩtandatũ na ithathatũ.

2 Agĩcooka akĩrĩhumbĩra na thĩinĩ na igũrũ na thahabu ĩrĩa therie mũno, agĩcooka akĩrĩrigiicĩria na mũgũkũ wa thahabu mĩthiainĩ yarĩo ya igũrũ.

3 Ningĩ akĩrĩthondekera icũhĩ inya cia kũrĩkuua cia thahabu, agĩciĩkĩra magũrũinĩ maarĩo mana, igĩrĩ mwena ũmwe na igĩrĩ mwena ũrĩa ũngĩ.

4 Ningĩ agĩthondeka mĩtĩ mĩraaya ya mũgaa akĩmĩhumbĩra na thahabu guothe,

5 agĩcooka akĩmĩharũkia icũhĩinĩ icio ciarĩ mwenainĩ wa Ithandũkũ rĩu.

6 Ningĩ agĩthondeka gĩkunĩko gĩa thahabu ĩrĩa therie mũno, naguo ũraihu wakĩo warĩ cenitimita igana rĩa ikũmi, naguo wariĩ cenitimita mĩrongo ĩtandatũ na ithathatũ.

7 Agĩcooka agĩthondeka ciũmbe irĩa irĩ mathagu igĩrĩ na thahabu ya gũturwo, kĩũmbe kĩmwe gĩgĩikara mũthia ũmwe wa gĩkunĩko kĩu, nakĩo kĩrĩa kĩngĩ gĩgĩikara mũthia ũcio ũngĩ.

8 Bezaleli athondekire ciũmbe icio igĩtuĩka kĩndũ kĩmwe na gĩkunĩko kĩu inyiitaine nakĩo mĩthiainĩ yakĩo.

9 Ciũmbe icio ciaikaire iroranĩĩte hau gĩkunĩkoinĩ na itambũrũkĩĩtie mathagu maacio makahumbĩra gĩkunĩko kĩu.

Gũthondeka meetha ya mĩgate ĩrĩa ĩrutĩirwo Ngai

10 Ningĩ agĩthondeka meetha ya mbaaũ cia mũgaa ĩrĩ na ũraihu wa cenitimita mĩrongo ĩnaana na inyaanya, na wariĩ wa cenitimita mĩrongo ĩna na inya, nakĩo kĩrũũgamo cenitimita mĩrongo ĩtandatũ na ithathatũ.

11 Agĩcooka akĩmĩhumbĩra na thahabu ĩrĩa therie mũno, na akĩmĩthiũrũkĩria na mũgũkũ wa thahabu.

12 Agĩcooka akĩmĩĩkĩra karũbaaũ ka wariĩ wa mirimita mĩrongo mũgwanja na ithaano mĩena yothe, agĩcooka agĩkahumbĩra na thahabu guothe.

13 Ningĩ akĩmĩthondekera icũhĩ inya cia thahabu cia kũmĩkuua, agĩciĩkĩra koonainĩ ciayo inya harĩa magũrũ maarĩ.

14 Nacio icũhĩ icio cia kũharũkio mĩtĩ ĩrĩa mĩraaya ya gũkuua meetha ĩyo agĩciĩkĩra hakuhĩ na karũbaaũ kau gaceke.

15 Agĩthondeka mĩtĩ ĩyo mĩraaya ya mũgaa na akĩmĩhumbĩra na thahabu.

16 Nacio indo cia meetha ĩyo agĩcithondeka na thahabu ĩrĩa therie mũno, nacio nĩ: thaani, ikombe, ndigithũ, o na mbakũri ciayo cia kũhũthĩrwo nĩ ũndũ wa magongoona ma ndibei.

Gũthondeka mũtĩ wa gũcuuria mataawa

17 Ningĩ agĩthondeka mũtĩ wa gũcuuria mataawa wa thahabu ĩrĩa therie mũno. Nakĩo gĩtina kĩaguo o na mũtĩ waguo agĩcithondeka na thahabu ya gũturwo; nacio ikombe ciaguo, thundo ciaguo, o na mahũa maguo ma kũũgemia ciothe igĩcithondeka inyiitaine naguo.

18 Naguo mũtĩ ũcio ũgĩkorwo na honge ithathatũ ciumĩĩte mĩenainĩ yaguo, o mwena honge ithatũ.

19 O rũhonge rwa icio ithathatũ rwarĩ na mahũa ma kũũgemia mahaana ihũa rĩa mũroothi na moothe maarĩ na ikombe ithatũ na thundo ithatũ.

20 Naguo mũtĩ ũcio wa kũhangĩrwo mataawa warĩ na mahũa mana ma kũgemia mahaana ihũa rĩa mũroothi, namo maarĩ na mahũa na thundo.

21 Ningĩ o mũhuro wa honge igĩrĩ igĩrĩ haarĩ na thundo ĩmwe.

22 Nacio thundo na honge ciacio, o na mũtĩ ũcio wa kũhangĩrwo mataawa igĩkorwo inyiitanĩĩte irĩ kĩndũ kĩmwe ithondekeetwo na thahabu ya gũturwo ĩrĩa therie mũno.

23 Agĩcooka agĩthondekera mũtĩ ũcio mataawa mũgwanja, nayo mĩĩhato yaguo o na thaani cia mũrarĩ wa ndambĩ ciaguo, ciothe agĩcithondeka na thahabu ĩrĩa therie mũno.

24 Naguo mũtĩ ũcio wa kũhangĩrwo mataawa o hamwe na indo ciaguo ciothe agĩcithondeka na thahabu ĩrĩa therie mũno cia ũritũ wa kiro mĩrongo ĩtatũ na ithaano.

Gũthondeka kĩgongoona gĩa gũcinĩra ũbaani

25 Ningĩ agĩthondeka kĩgongoona kĩa mbaaũ cia mũgaa gĩa gũcinĩrwo ũbaani. Nakĩo agĩgĩthondeka kĩrĩ thikwea, kĩrĩ na ũraihu wa cenitimita mĩrongo ĩna na ithaano, na wariĩ wa o cenitimita mĩrongo ĩna na ithaano. Nakĩo kĩrũũgamo gĩgĩkorwo kĩrĩ cenitimita mĩrongo kenda. Nacio hĩa ciakĩo iria ciarĩ koonainĩ ciakĩo inya agĩcithondeka irĩ kĩndũ kĩmwe nakĩo.

26 Agĩcooka agĩkĩhumbĩra na thahabu ĩrĩa therie mũno, mĩena yakĩo ĩna o na hĩa ciakĩo, agĩcooka agĩgĩthiũrũrũkĩria na mũgũkũ wa thahabu.

27 Agĩcooka agĩthondeka icũhĩ igĩrĩ cia thahabu cia gũgĩkuua, agĩciĩkĩra mũhuro wa mũgũkũ ũcio mĩenainĩ yerĩ, igĩtuĩka cia kũharũkagio mĩtĩ ĩrĩa ĩĩrĩ mĩraaya ya gũgĩkuua.

28 Nayo mĩtĩ ĩyo ĩĩrĩ mĩraaya akĩmĩthondeka na mũgaa na akĩmĩhumbĩra na thahabu.

Gũthondeka maguta ma gũitanĩrĩrio o na ũbaani

29 Ningĩ agĩthondeka maguta matheru ma kwamũrana na ũbaani ũrĩa ũnungaga wega ũtukanĩĩtio na indo nungi wega, ũthondekeetwo o ta ũrĩa mũndũ mũũhĩgĩrĩru ũthondekiinĩ ũcio aũthondekaga.

Gũthondeka kĩgongoona gĩa gũcinĩrwo magongoona

1 Nakĩo kĩgongoona gĩa gũcinĩra magongoona-rĩ, agĩgĩthondeka na mbaaũ cia mũgaa. Na gĩgĩkorwo gĩ thikwea, kĩrĩ na ũraihu wa mita igĩrĩ na boiniti igĩrĩ, na wariĩ o wa mita igĩrĩ na boiniti igĩrĩ, nakĩo kĩrũũgamo mita ĩmwe na boiniti ithatũ.

2 Agĩcooka agĩthondeka hĩa ciakĩo igũrũ wa koona ciakĩo inya, nacio igĩtuĩka o kĩndũ kĩmwe na kĩgongoona kĩu. Agĩcooka agĩkĩhumbĩra gĩothe na gĩcango.

3 Ningĩ agĩthondeka indo ciothe cia kĩgongoona kĩu, nĩcio: ngĩo, iciko cia tĩĩri, mbakũri, njibe, o na ngĩo ciakĩo cia mwaki. Indo ici ciothe agĩcithondeka na gĩcango.

4 Agĩcooka agĩthondeka rũgara rwa gĩcango akĩrwĩkĩra mũhuro wa mũgũkũ wa kĩgongoona kĩu, naruo rũgĩkinya gatagatĩ ga kĩgongoona.

5 Agĩcooka agĩthondeka icũhĩ inya cia gũgĩkuua agĩciĩkĩra koonainĩ ciakĩo inya.

6 Na agĩthondeka mĩtĩ mĩraaya ya mũgaa ya gũgĩkuua, akĩmĩhumbĩra na gĩcango,

7 agĩcooka akĩmĩharũkia icũhĩinĩ iria irĩ mĩena ya kĩgongoona kĩu cia gũgĩkuua. Nakĩo kĩgongoona kĩu agĩgĩthondeka na mbaaũ na agĩtiga irima gatagatĩ.

Gũthondeka mbakũri ĩrĩa ya gĩcango

8 Ningĩ agĩthondeka mbakũri ya gwĩthambĩrwo ya gĩcango na njikarĩro ya yo ya gĩcango; acithondekire na iciicio cia atumia arĩa maatungataga mũromoinĩ wa Hema ya gũtũnganwo.

Nja ya Hema ya gũtũnganwo

9 Ningĩ Hema ya gũtũnganwo akĩmĩthondekera nja ya yo ĩirigĩirwo na mbathiya cia gataani ĩrĩa njega.

Mwena wa na kĩanda mbathiya icio ciarĩ na ũraihu wa mita mĩrongo ĩna na inya,

10 na cianyiitĩrĩirwo na itugĩ mĩrongo ĩrĩ cia gĩcango irĩ na njikarĩro mĩrongo ĩrĩ o cia gĩcango, na ciarĩ na tũhocio na tũmĩtĩ twa betha.

11 Ũguo noguo mwena wa na rũgongo wa nja ĩyo watariĩ.

12 Naguo mwena wa na ithũĩro haarĩ na mbathiya ciarĩ na ũraihu wa mita mĩrongo ĩĩrĩ na igĩrĩ, na irĩ na itugĩ ciacio ikũmi na njikarĩro ciacio ikũmi, o na tũhocio na tũmĩtĩ twacio twa betha.

13 Naguo mwena wa irathĩro, harĩa mũromo warĩ, nja ĩyo yarĩ na wariĩ wa mita mĩrongo ĩĩrĩ na igĩrĩ.

14-15 O mwena wa mũromo agĩthondeka na mbathiya cia mita ithathatũ na boiniti ithathatũ, na itugĩ ithatũ na njikarĩro ithatũ.

16 Mbathiya ciothe cia kũirigĩra nja ĩyo ciathondekeetwo na gataani ĩrĩa njega.

17 Nacio njikarĩro cia itugĩ ciathondekeetwo na gĩcango, natuo tũhocio, na tũmĩtĩ, na mĩthiainĩ ya itugĩ ciothe ciarĩ cia betha. Nacio itugĩ icio ciothe gũthiũrũrũkĩria nja ĩyo cianyiitithanĩĩtio na tũmĩtĩ twa betha.

18 Nayo mbathiya ya mũromoinĩ wa nja ĩyo yathondekeetwo na gataani ĩrĩa njega ĩtumĩĩtwo na ndigi cia guoya wa rangi wa mburuu, babũ, na mũtuune na ĩkagemio na magemio. Nayo mbathiya ĩyo yarĩ na ũraihu wa mita kenda, na kĩrũũgamo mita igĩrĩ o ta mbathiya cia nja ĩyo.

19 Yanyiitĩrĩirwo nĩ itugĩ inya irĩ njikarĩroinĩ ciacio inya cia gĩcango. Tũhocio twa itugĩ icio, mĩthiainĩ yacio, hamwe na tũmĩtĩ twa gũcinyiitithania, guothe kwahumbĩrĩĩtwo na betha.

20 Nacio higĩ ciothe cia Hema ĩyo na cia rũirigo rũu ciathondekeetwo na gĩcango.

Indo iria ciahũthĩrĩĩtwo gũthondeka Hema ya gũtũnganwo

21 Ũyũ nĩguo mũtaratara wa mũigana wa indo iria ciahũthĩrirwo gũthondeka Hema ya gũtũnganwo, harĩa ihengere iria igĩrĩ cia mahiga iria ciandĩkĩĩtwo maathani marĩa ikũmi ciaigĩĩtwo: Mũtaratara ũyũ watarithirio nĩ Musa na watarirwo nĩ Alawii arĩa maarutaga wĩra matongoreetio nĩ Ithamaru mũrũ wa Harũni mũthĩnjĩri Ngai.

22 Naake Bezaleli mũrũ wa Uri na mũcũkũrũ wa Huri, wa mũhĩrĩga wa Juda, nĩ we wathondekire indo icio ciothe MWATHANI aathanĩĩte.

23 Naake aateithĩrĩirio wĩrainĩ ũcio nĩ Oholiabu mũrũ wa Ahisamaku, wa mũhĩrĩga wa Dani, ũrĩa warĩ mũkururi mũũgĩ wa tũhiga, na mũũhĩgĩrĩru wĩrainĩ wa mĩthemba yothe ya ũũgĩ, o na mũtumi wa ndigi cia gataani ĩrĩa njega na ndigi cia guoya wa rangi wa mburuu, babũ, na mũtuune.

24 Thahabu ĩrĩa yothe yamũrĩirwo MWATHANI nĩ ũndũ wa gũthondeka Hema ĩyo nyamũre yarĩ na ũritũ wa kiro ngiri ĩmwe, ĩthimĩĩtwo na gĩthimi kĩrĩa kĩaiguanĩirwo.

25 Nayo betha ĩrĩa yarutirwo nĩ andũ acio maatarwo, yarĩ na ũritũ wa kiro ngiri ithatũ magana mana mĩrongo ĩtatũ (3,430), ĩthimĩĩtwo na gĩthimi kĩrĩa kĩaiguanĩirwo.

26 Mũigana ũcio waiganaine na mbeeca ciothe iria ciarĩhĩĩtwo nĩ andũ oothe makĩyandĩkithia, o mũndũ akĩruta mbeeca iria ciatuĩtwo, ĩthimĩĩtwo na gĩthimi kĩrĩa kĩaiguanĩirwo. Nao andũ arĩa maatarĩĩtwo a mĩaka mĩrongo ĩĩrĩ gũthiĩ na igũrũ marĩ ngiri magana matandatũ na ithatũ, na magana mataano ma mĩrongo ĩtaano (603,550).

27 Kiro ngiri ithatũ na magana mana cia betha (3,400) nĩcio ciahũthĩrirwo gũthondeka njikarĩro iria igana cia Hema ĩyo nyamũre hamwe na mbathiya, o njikarĩro igĩthondekwo na kiro mĩrongo ĩtatũ na inya.

28 Nacio kiro mĩrongo ĩtatũ cia betha iria ciatigarire, Bezaleli agĩthondeka mĩrĩnga, tũhocio twa itugĩ, na tũkunĩko twa gũcihumbĩra mĩthiainĩ.

29 Nakĩo gĩcango kĩrĩa kĩamũrĩirwo MWATHANI kĩarĩ kiro ngiri igĩrĩ na magana mana na mĩrongo ĩĩrĩ na ithaano (2,425).

30 Agĩgĩthondeka nakĩo njikarĩro cia mũromo wa Hema ya gũtũnganwo, kĩgongoona gĩa gĩcango hamwe na kĩrũgara gĩakĩo gĩa gĩcango, o na indo ciothe cia kĩgongoona kĩu,

31 hamwe na njikarĩro cia gũthiũrũrũkĩria nja ya Hema ĩyo, mũromo wayo, higĩ ciothe cia Hema ĩyo, na higĩ ciothe cia gũthiũrũrũkĩria nja ĩyo ya yo.

Gũthondeka nguo cia ũthĩnjĩri Ngai

1 Nao magĩtuma nguo iria irĩ riiri cia kwĩhumbwo nĩ Harũni rĩrĩa egũtunga thĩinĩ wa Handũ Harĩa Haamũre. Magĩcituma na ndigi cia guoya wa rangi wa mburuu, babũ na mũtuune, o ta ũrĩa MWATHANI aathĩĩte Musa.

2 Ningĩ magĩtuma ebodi na ndigi cia thahabu, guoya wa rangi wa mburuu, babũ, na mũtuune, hamwe na cia gataani ĩrĩa njega ciogotheetwo.

3 Magĩkĩhũũrahũũra thahabu makĩmĩtua ithuuma hũthũ mũno, magĩcitinangia ituĩke ndaamĩ njeke cia gũtumanĩrio na ndigi icio cia guoya wa rangi wa mburuu, babũ, na mũtuune, o na cia gataani ĩrĩa njega ciogotheetwo.

4 Magĩcooka magĩthondekera ebodi ĩyo mĩkwa ya kũmĩoha ciandeinĩ makĩmĩtumĩrĩra mĩthiainĩ ya yo nĩguo yohagwo.

5 Naguo mũcibi ũrĩa wagemeetio wega, na watumĩĩtwo na indo o ta cia ebodi ĩyo ũkĩnyiitithanio nayo nĩguo ũtuĩke kĩndũ kĩmwe nayo, o ta ũrĩa MWATHANI aathĩĩte Musa.

6 Ningĩ magĩthondeka tũhiga twa goro twa rangi mũtuune magĩtwĩkĩra tũkonyoinĩ tũgemie twa thahabu, na magĩtũkurura igũrũ rĩatuo marĩĩtwa ma aariũ arĩa ikũmi na eerĩ a Jakubu.

7 Magĩcooka magĩtwĩkĩra mĩkwainĩ ĩrĩa ĩĩrĩ ya kuoha ebodi ĩyo ciandeinĩ, nĩguo tũrũũgamagĩrĩre mĩhĩrĩga ĩrĩa ikũmi na ĩĩrĩ ya andũ a Isiraeli, o ta ũrĩa MWATHANI aathĩĩte Musa.

Gũthondeka nguo ya gĩthũri

8 Magĩcooka magĩthondeka nguo ya gĩthũri na indo o ta iria ciathondekeete ebodi, na makĩmĩgemia o ta yo.

9 Nayo nguo ĩyo yarĩ ya thikwea na ĩgakũnjwo maita meerĩ. Ũraihu wayo warĩ cenitimita mĩrongo ĩĩrĩ na igĩrĩ na wariĩ warĩ o cenitimita mĩrongo ĩĩrĩ na igĩrĩ.

10 Magĩcooka makĩmĩĩkĩra mĩhari ĩna ya tũhiga twa goro; mũhari wa mbere makĩwĩkĩra kahiga ka rubi, kahiga ka goro ka rangi wa yerũũ, o na ka arumaathi ĩrĩa nduune.

11 Naguo mũhari wa keerĩ makĩwĩkĩra kahiga ka goro ka rangi wa ngirini ũrĩa mũtheru mũno, o na kangĩ ka arumaathi.

12 Naguo mũhari wa gatatũ makĩwĩkĩra kahiga ka goro ka rangi wa mburuu kana wa mĩtukanio wa mburuu na ngirini, ningĩ kangĩ ka marangi meerũ na ma gĩtĩĩri, na kangĩ ka rangi wa babũ.

13 Naguo mũhari wa kana makĩwĩkĩra kahiga ka goro ka rangi wa ngirini kana wa mũtukanio wa mburuu na ngirini, na ka rangi mũtuune, na kangĩ karĩ na marangi ma mĩthemba mĩingĩ geetagwo Jasiperi.

14 Na rĩĩrĩ, tũhiga tũu tuothe ikũmi na twĩrĩ o kahiga gagĩkorwo gakururĩĩtwo rĩĩtwa rĩa ũmwe wa aariũ ya Jakubu, kũringana na ũrĩa mĩhĩrĩga ya andũ a Isiraeli ĩigana.

15 Na nguo ĩyo ya gĩthũri makĩmĩthondekera irengeeri ciogotheetwo ta mũhĩndo, ithondekeetwo na thahabu ĩrĩa therie mũno.

16 Magĩcooka magĩthondeka tũkonyo twĩrĩ twa thahabu na icũhĩ igĩrĩ cia thahabu magĩciĩkĩra mĩthiainĩ yerĩ ya na igũrũ ya nguo ĩyo ya gĩthũri.

17 Nao makĩoherera irengeeri iria igĩrĩ cia thahabu icũhĩinĩ icio cierĩ.

18 Magĩcooka makĩoherera mĩthia ĩyo ĩngĩ ĩĩrĩ ya irengeeri icio tũkonyoinĩ tũu twerĩ, magĩkĩmĩĩkĩra mĩkwainĩ ya kuoha ebodi ciandeinĩ, mwena wa na mbere wayo.

19 Ningĩ magĩthondeka icũhĩ igĩrĩ cia thahabu magĩciĩkĩra koonainĩ cierĩ cia na thĩ cia nguo ĩyo ya gĩthũri, mũthiainĩ wa na thĩinĩ kũrigania na ebodi.

20 Magĩcooka magĩthondeka icũhĩ ingĩ igĩrĩ cia thahabu magĩciĩkĩra mĩkwainĩ ĩyo yerĩ ya ebodi kĩanda wa icio ingĩ mwenainĩ wa na mbere wayo; hakuhĩ na inyiitithanĩrio rĩayo, igũrũ wa harĩa mũcibi ũrĩa ũgemeetio wega wa ebodi warĩ.

21 O ta ũrĩa MWATHANI aathĩĩte Musa, makĩoherera icũhĩ icio cia nguo ĩyo ya gĩthũri harĩ icũhĩ cia ebodi na kĩrengeeri kĩa rangi wa mburuu, nĩ geetha nguo ĩyo ya gĩthũri ĩkorwo ĩikarĩĩte igaigũrũ wa harĩa mũcibi ũrĩa wagemeetio wa ebodi warĩ, na nĩ geetha nguo ĩyo ya gĩthũri ndĩkaae gũkorwo ĩregereete.

Gũthondeka nguo icio ingĩ cia mũthĩnjĩri Ngai

22 Nayo nguo ndaaya ya gwĩkĩrwo thĩ wa ebodi ĩgĩthondekwo na ndigi cia guoya wa rangi wa mburuu wiki.

23 Narĩo irima rĩa gũtoonyeria mũtwe rĩgĩtumĩrĩrwo gĩtaamĩ rĩtirihĩĩtwo rĩtikaae gũtarũka.

24-26 Ningĩ nguo ĩyo ndaaya makĩmĩriigicĩria mwena wa kĩanda mĩthiainĩ na tũcunjuura tũhaana ta matunda ma makongomanga tũthondekeetwo na gataani ĩrĩa njega, na guoya wa rangi wa mburuu, babũ, na mũtuune wogotheetwo, na o gatagatĩ ga tũcunjuura twĩrĩ mageekĩra njingiri cia thahabu ĩrĩa therie mũno, o ta ũrĩa MWATHANI aathĩĩte Musa.

27 Magĩcooka magĩthondekera Harũni o hamwe na aariũ aake nguo ikinyĩĩte maruinĩ,

28 iremba, na tũkũbia, ciothe cia gataani njega mũno, o na thuruarĩ cia gataani ya ndigi njeke ciogotheetwo,

29 na mũcibi mwariĩ wa gataani ĩrĩa njega yogotheetwo, na ndigi cia guoya wa rangi wa mburuu, babũ, na mũtuune ũgacooka ũkagemio wega mũno, o ta ũrĩa MWATHANI aathĩĩte Musa.

30 Ningĩ magĩthondeka kĩraũni kĩrĩa kĩamũre, magĩgĩthondeka na thahabu ĩrĩa therie mũno, na magĩkurura igũrũ rĩakĩo ciugo ici, “Wamũrĩirwo MWATHANI.”

31 Magĩkĩoherera mwena wa na mbere wa kĩremba na kĩrengeeri kĩa rangi wa mburuu, o ta ũrĩa MWATHANI aathĩĩte Musa.

Kũrĩĩkia wĩra

32 Wĩra ũcio wothe wa gũthondeka Hema ya gũtũnganwo ũgĩkĩrĩĩka. Andũ acio a Isiraeli magĩgĩĩka maũndũ moothe marĩa MWATHANI aathĩĩte Musa.

33 Magĩkĩreehere Musa Hema ĩyo na indo ciayo ciothe, ngathĩka ciayo, mbaaũ ciayo cia kũmĩrũũgamia, mĩgamba ya yo, itugĩ ciayo na njikarĩro ciacio,

34 kĩandarũũa kĩa njũũa cia ndũrũme itobokeetio rangiinĩ igatuunĩha, kĩ kĩa njũũa iria njega, mbathiya ĩrĩa ya kũhakania,

35 Ithandũkũ rĩa Kĩrĩĩkanĩro rĩrĩ na ihengere iria cia mahiga, itugĩ ciarĩo, gĩkunĩko kĩarĩo,

36 meetha o hamwe na indo ciayo ciothe, mĩgate ĩrĩa mĩtheru ĩrutĩirwo Ngai,

37 mũtĩ ũrĩa wa thahabu ĩrĩa therie mũno wa kũhangĩrwo mataawa, mataawa maaguo na maguta maamo, na indo ciaguo ciothe,

38 kĩgongoona gĩa thahabu, maguta ma kwamũrana, ũbaani ũrĩa ũnungaga wega, mbathiya ĩrĩa ya gũcuurio mũromoinĩ wa Hema ĩyo,

39 kĩgongoona gĩa gĩcango hamwe na kĩrũtara gĩakĩo gĩa gĩcango, mĩtĩ ya yo ĩrĩa mĩraaya hamwe na indo ciakĩo ciothe, mbakũri ya gwĩthambĩra hamwe na njikarĩro ya yo,

40 mbathiya cia gũcuurio mĩena ya nja ya Hema, itugĩ ciakĩo o hamwe na njikarĩro ciakĩo, mbathiya ya gũcuurio mũromoinĩ wa kuuma nja na mĩkanda yakĩo, higĩ cia Hema ĩyo, indo ciothe cia kũhũthĩrwo Hemainĩ ĩyo,

41 nguo iria irĩ riiri cia kwĩhumbwo nĩ athĩnjĩri Ngai marĩ thĩinĩ wa Handũ hau Hatheru, nĩcio nguo iria nyamũre cia Harũni ũrĩa Mũthĩnjĩri Ngai o na cia aariũ aake.

42 Andũ a Isiraeli magĩgĩkorwo marutĩĩte wĩra wothe o ta ũrĩa MWATHANI aathĩĩte Musa.

43 Naake Musa akĩĩrorera wĩra ũcio wothe akĩona atĩ nĩmaũrutĩĩte o ta ũrĩa MWATHANI aathanĩĩte. Kwoguo Musa agĩkĩmaraathima.