Category: Thaama

Maathani Marĩa Ikũmi

1 Naake Ngai akĩaria ciugo ici akiuga atĩrĩ,

2 “Nĩ niĩ MWATHANI Ngai waku ũrĩa wakũrutire bũrũri wa Misiri, uume nyũmbainĩ ya ũkombo.

3 “Ndũkaanathaathaiye ngai ingĩ tiga niĩ.

4 “Ndũkaanethondekere mĩhianano ya kĩndũ o gĩothe kĩrĩ kũrĩa igũrũ, kana kĩrĩ gũũkũ thĩ, kana kĩrĩ maaĩinĩ marĩa me rungu rwa thĩ.

5 Ndũkaanainamĩrĩre mũhianano o wothe o na kana ũũthaathaiye, nĩ amu niĩ MWATHANI Ngai waku ndĩ Ngai ũteendeete kũigananio na ngai ĩngĩ. Nĩherithagia arĩa mathũire, o na ciana ciao, o nginya rũciaro rwa gatatũ na rwa kana.

6 Ningĩ nĩnjiguagĩra andũ ngiri na ngiri tha arĩa manyendeete na makaigua maathani maakwa.

7 “Ndũkaanagwete rĩĩtwa rĩakwa na itherũ nĩ gũkorwo niĩ MWATHANI Ngai waku nĩherithagia mũndũ o wothe ũgwetaga rĩĩtwa rĩakwa na itherũ.

8 “Menyagĩrĩra mũthenya wa Thabatũ ũwamũrage.

9 Rutaga wĩra waku wothe mĩthenya ĩtandatũ.

10 Mũthenya wa mũgwanja nĩ mũthenya wa kũhuurũka ũrĩa wamũrĩirwo MWATHANI Ngai waku. Mũthenya ũcio ndũkaanarute wĩra wee mwene, mũũrũguo, mwarĩguo, ndungata yaku ya mũndũ mũrũme kana ya mũndũ wa nja, ũhiũ waku, o na kana mũgeni ũrĩa ũrĩ gwaku mũciĩ.

11 Amu niĩ MWATHANI, ndoombire igũrũ, thĩ, iria rĩrĩa inene, o na indo ciothe iria irĩ kuo mĩthenya ĩtandatũ, no mũthenya wa mũgwanja ngĩhuurũka. Kwoguo niĩ MWATHANI, nĩndaraathimire mũthenya ũcio wa Thabatũ ngĩwamũra.

12 “Tĩĩa thooguo na maitũguo, nĩ geetha ũtũũre matukũ maingĩ bũrũri ũrĩa niĩ, MWATHANI Ngai waku, ngũkũhe.

13 “Ndũkaanooragane.

14 “Ndũkaanatharanie.

15 “Ndũkaanaiye.

16 “Ndũkaanaigĩrĩre mũndũ ũrĩa ũngĩ kĩgeenyo.

17 “Ndũkaanerirĩrie nyũmba ya mũndũ ũrĩa ũngĩ, o na ndũkaanerirĩrie mũtumia wake, ndungata yake ya mũndũ mũrũme kana ya mũndũ wa nja, ndeegwa yake, ndigiri yake, kana o kĩndũ gĩake o gĩothe.”

Andũ gwĩtigĩra

18 Rĩrĩa andũ maiguire marurumĩ, heni na mũgambo wa tũrumbeeta, na makĩona kĩrĩma kĩu gĩgĩtooga, magĩĩtigĩra na makĩinaina. Magĩkĩrũũgama o haraaya

19 makĩĩra Musa atĩrĩ, “Aria na ithuĩ arĩ we na nĩtũkũigua; reke Ngai atige kwaria na ithuĩ tũtigaakue.”

20 Naake Musa akĩmacookeria atĩrĩ, “Tigaai gwĩtigĩra; amu Ngai ookĩĩte o kũmũgeria, na gũtũma mũthiĩ na mbere kũmwathĩkĩra nĩ geetha mũtikaae kwĩhia.”

21 Nao andũ magĩthiĩ na mbere kũrũũgama o haraaya, na no Musa wathiire hakuhĩ na itu rĩu itumanu harĩa Ngai aarĩ.

Mawatho makoniĩ igongoona cia magongoona

22 Ningĩ MWATHANI agĩatha Musa eere andũ a Isiraeli atĩrĩ: Inyuĩ eene nĩmweyonera atĩ nĩndamwarĩria ndĩ igũrũ matuinĩ.

23 Mũtikaanethondekere ngai ingĩ cia betha o na kana cia thahabu cia gũthaathayanĩrio na niĩ.

24 Thondekeraai kĩgongoona mũgĩake na tĩĩri na igũrũ rĩakĩo mũrute ng’ondu na ng’ombe cianyu irĩ magongoona ma njino na thaayũ. Handũ o hoothe harĩa ndĩrĩmũamũragĩra hatuĩke ha gũũthaathayagĩria, hau nĩ ho ndĩrĩũkaga ngamũraathima.

25 Mũngĩthondekera kĩgongoona kĩa mahiga-rĩ, mũtikaanagĩake na mahiga ma gũacũhio, amu mwamacũhia na mũcumaarĩ mũtingĩnjakĩra kĩgongoona namo.

26 Ningĩ mũtikaananjakĩre kĩgongoona kĩrĩ na ngathĩ, mũngĩgeeka ũguo nĩmũkeeyonania njaga mũkĩhaica ngathĩ icio.

Ũrĩa ngombo ciagĩrĩire nĩgwĩkwo

1 “Na rĩĩrĩ, mawatho maya marũmĩrĩire nĩ mo ũkũhe andũ a Isiraeli:

2 Ũngĩgũra ngombo ya Mũhibirania, reke ĩgũtungatĩre mĩaka ĩtandatũ, na mwaka wa mũgwanja ũmĩrekererie ĩthiĩ ĩtarĩ na kĩndũ ĩkũrĩha.

3 Angĩkorwo ndĩahikanĩĩtie hĩndĩ ĩrĩa yatuĩkire ngombo yaku, ndĩagĩrĩirwo nĩgũthiĩ na mũtumia ĩkiuma gwaku, no angĩkorwo nĩyahikanĩĩtie hĩndĩ ĩrĩa yatuĩkire ngombo yaku, no ĩthiĩ na mũtumia wayo ĩkiuma gwaku.

4 Mũnene wa ngombo ĩyo angĩmĩhe mũtumia, naake mũtumia ũcio amĩciarĩre aanake kana airĩĩtu, mũtumia ũcio na ciana icio marĩtuĩkaga a mũnene wayo na ngombo ĩyo ĩgaathiĩ ĩrĩ iiki.

5 No ngombo ĩyo ĩngiuga atĩ nĩyendeete mũnene wayo, mũtumia wayo, o na ciana ciayo, na atĩ ndĩkwenda kũrekererio,

6 hĩndĩ ĩyo mũnene wayo no akĩmĩtware handũ harĩa hathaathayagĩrio na amĩĩre ĩrũũgame mũrangoinĩ kana gĩtugĩinĩ kĩa mũrango. Naake mũnene wayo amĩtũre gũtũ na mũkuha, nayo ngombo ĩyo ĩgĩtũũre ĩmũtungatagĩra matukũ maayo moothe.

7 “Mũndũ angĩendia mwarĩ agatuĩke ngombo-rĩ, ngombo ĩyo ya mũirĩĩtu ndĩkaarekererio ta ũrĩa ngombo cia arũme ciĩkagwo.

8 Angĩkorwo ngombo ĩyo ya mũirĩĩtu yendeetio kũrĩ mũndũ wendaga kũmĩtua mũtumia wayo na gũkorwo mũndũ ũcio ndaramĩenda-rĩ, ngombo ĩyo no ĩgĩkũũrwo nĩ ithe wayo; no mũnene wayo ndangĩmĩenderia andũ a ndũũrĩrĩ nĩ ũndũ nĩamĩheeneetie.

9 Na rĩĩrĩ, mũndũ angĩgũrĩra mũũrũwe ngombo ya mũndũ wa nja-rĩ, aagĩrĩirwo nĩkũmĩĩka o ta ũrĩa eekaga aarĩ aake.

10 Mũndũ angĩhikia mũtumia wa keerĩ-rĩ, ndakaananyiihanyiihĩrie ũrĩa wa mbere irio, nguo, kana ihooto iria araarĩ nacio mbere.

11 Angĩaga kũhingĩria mũtumia ũcio maũndũ macio matatũ, mũtumia ũcio no arekererio athiĩ atekũrĩha kĩndũ.

Mawatho makoniĩ kũgerana ngero

12 “Mũndũ angĩgũtha ũrĩa ũngĩ akue-rĩ, o naake no mũhaka ooragwo.

13 No angĩkorwo amũũraga na mũtino atekwenda, nĩngũmũthuurĩra kũrĩa mũndũ ũcio angĩũrĩra na agĩkorwo atarĩ ũgwatiinĩ.

14 No mũndũ angĩraakara na oorage mũndũ akĩendaga-rĩ, no mũhaka ooragwo o na angĩkorwo oorĩire kĩgongoonainĩ gĩakwa atĩ nĩguo ndakooragwo.

15 “Mũndũ o wothe angĩgũtha ithe kana nyina, no mũhaka ooragwo.

16 “Mũndũ o wothe angĩnyiita mũndũ akamwendie kana akamũige e ta ngombo yake, no mũhaka ooragwo.

17 “Mũndũ o wothe angĩruma ithe kana nyina, no mũhaka ooragwo.

18-19 “Ningĩ andũ eerĩ mangĩtetania na ũmwe agũthe ũrĩa ũngĩ na ihiga kana ngundi no ndamũũrage-rĩ, mũndũ ũcio ndakaae kũherithio. No mũndũ ũcio ũgũthĩĩtwo angĩkorwo nĩegũikara gĩtandainĩ na thuutha ahote gũũkĩra na gwĩtwara agĩĩtirimagia na mũtirima-rĩ, mũndũ ũcio wamũgũthĩĩte no mũhaka amũrĩhe ihinda rĩrĩa ateete na acooke amũtungate nginya hĩndĩ ĩrĩa akaahona.

20 “Ningĩ mũndũ angĩoya rũthanju agũthe ngombo yake ya mũndũ mũrũme kana ya mũndũ wa nja, nayo ĩkue hau hau-rĩ, mũndũ ũcio no mũhaka aherithio.

21 No ngombo ĩyo ĩngĩaga gũkua handũinĩ ha mũthenya ũmwe kana ĩĩrĩ, mũndũ ũcio ndaagĩrĩirwo nĩkũherithio, amu ngombo ĩyo nĩ yake.

22 “Ningĩ arũme mangĩkorwo makĩrũa, na hiihi magũthe mũtumia e mũritũ na matũme ahune, no we mwene aage gũtiihio-rĩ, mũndũ ũcio ũngĩkorwo amũgũthĩĩte no mũhaka arute irĩhi rĩrĩa mũthuuri wa mũtumia ũcio angĩĩtia, na rĩringaine na ũrĩa atuithania magaathĩrĩirie.

23 No rĩĩrĩ, angĩkorwo mũtumia ũcio nĩatiihĩĩtio-rĩ, no mũhaka muoyo uumage muoyo,

24 riitho riumage riitho, igego riumage igego, guoko kuumage guoko, kũgũrũ kuumage kũgũrũ,

25 ihĩa riumage ihĩa, kĩronda kiumage kĩronda, o na itiihia riumage itiihia.

26 “Mũndũ angĩringa ngombo yake ya mũndũ mũrũme kana ya mũndũ wa nja riitho, narĩo rĩthũũke-rĩ, no mũhaka arekererie ngombo ĩyo ĩĩthiĩre, naguo ũndũ ũcio ũgĩtuĩke irĩhi rĩa riitho rĩu.

27 Angĩgũtha ngombo yake ya mũndũrũme kana ya mũndũ wa nja igego, narĩo rĩgũũke, no mũhaka amĩrekererie ĩĩthiĩre, naguo ũndũ ũcio ũgĩtuĩke irĩhi rĩa igego rĩu.

Mawatho makoniĩ indo cia thakame

28 “Na rĩĩrĩ, ndeegwa ĩngĩtheecanga mũndũ na hĩa akue-rĩ, ndeegwa ĩyo no mũhaka ĩhũũrwo na mahiga yũragwo, na nyama ciayo itikaarĩo; no mwene ndeegwa ĩyo ndakaaherithio.

29 No angĩkorwo ndeegwa ĩyo nĩramenyereete gũtheecanga andũ na hĩa, na mwene yo akorwo nĩaramenyithĩĩtio ũhoro ũcio na ndamĩhingĩre, nayo ĩgĩcooke yũrage mũndũ-rĩ, ndeegwa ĩyo no mũhaka ĩhũũrwo na mahiga yũragwo, o naake mwene yo no mũhaka ooragwo.

30 Na rĩĩrĩ, mwene yo angĩĩtĩkĩrio kũrĩha irĩhi nĩ geetha ahonokie muoyo wake, no mũhaka arĩhe kĩrĩa gĩothe angĩtuĩrwo.

31 Ndeegwa ĩyo ĩngĩtheecanga kahĩĩ kana kairĩĩtu na hĩa ĩkoorage-rĩ, watho o ro ũcio noguo ũngĩrũmĩrĩrwo.

32 Ningĩ ndeegwa ĩyo ĩngĩũraga ngombo ya mũndũ mũrũme kana ya mũndũ wa nja-rĩ, mwene ndeegwa ĩyo no mũhaka arĩhe mwene ngombo ĩyo icunjĩ cia betha mĩrongo ĩtatũ, nayo ndeegwa ĩyo ĩhũũrwo na mahiga yũragwo.

33 “Ningĩ mũndũ angĩkunũra irima kana eenje irima na aage kũrĩkunĩka, nayo ndeegwa kana ndigiri ĩgwe irimainĩ rĩu-rĩ,

34 mwene irima rĩu no mũhaka arĩhe nyamũ ĩyo, nayo nyamũ ĩyo ĩkuĩte ĩtuĩke yake.

35 Ningĩ ndeegwa ya mũndũ ĩngĩũraga ndeegwa ya mũndũ ũngĩ-rĩ, andũ acio eerĩ no mũhaka meendie ndeegwa ĩrĩa ĩ muoyo, magayane mbeeca icio, na magayane nyama cia ndeegwa ĩyo yũragĩĩtwo.

36 No angĩkorwo nĩkũĩkaine atĩ ndeegwa ĩyo nĩramenyereete gũtheecangana na hĩa, na mwene yo ndamĩhingagĩra-rĩ, no mũhaka arĩhe mũndũ ũcio ũngĩ na ndeegwa ĩngĩ, nayo ĩyo ĩkuĩte ĩtuĩke yake.

Mawatho makoniĩ kũrĩhania

1 “Na rĩĩrĩ, mũndũ angĩiya ndeegwa kana ng’ondu amĩthĩnje kana amĩendie-rĩ, no mũhaka arĩhe ndeegwa ithaano nĩ ũndũ wa ndeegwa ĩyo, na arĩhe ng’ondu inya nĩ ũndũ wa ng’ondu ĩyo.

2-4 Mũndũ ũcio no mũhaka arĩhe kĩrĩa aiyĩte. Mũndũ ũcio angĩkorwo nĩ mũthĩĩni, nĩendio atuĩke ngombo nĩ geetha kĩrĩa aiyĩte kĩrĩhĩke. Ningĩ nyamũ ĩrĩa aiyĩte, ĩrĩ ndeegwa, ndigiri, o na kana ng’ondu, ĩngĩoneka gwake ĩ muoyo-rĩ, no mũhaka arĩhe nyamũ igĩrĩ nĩ ũndũ wa nyamũ ĩyo.

“Na rĩĩrĩ, mũici angĩnyiitwo agĩtua nyũmba ũtukũ, na agũthwo akue-rĩ, gũtingĩgĩa na irĩhi nĩ ũndũ wa mũici ũcio kũũragwo. No ũndũ ũcio ũngĩĩkĩka mũthenya, mũndũ ũcio egũtuuo mũũragani.

5 “Mũndũ angĩrĩithia mũgũnda wene, kana arĩithie mũgũnda wene wa mĩthabibũ, kana arekererie nyamũ yake ĩrĩe irio iria irĩ mũgũnda wa mũndũ ũngĩ, no mũhaka arĩhe irio icio na irio iria njega mũno irĩ mũgũnda wake kana irĩ mũgũnda wake wa mĩthabibũ.

6 “Mũndũ angĩakia mwaki mũgũndainĩ wake, naguo mwaki ũcio ũcine rũgiri rwa mĩigua, ũtambe nginya mũgũndainĩ wa mũndũ ũngĩ ũcine ngano ĩrĩa ĩrakũra kana ĩrĩa ĩtinĩĩtio ĩkoohwo itĩĩa-rĩ, mũndũ ũcio wakĩĩtie mwaki ũcio no mũhaka arĩhe hathara ĩyo.

7 “Mũndũ angĩnengera ũrĩa ũngĩ mbeeca kana indo ciake amũigĩre, nacio icooke ciiywo irĩ nyũmba gwake-rĩ, mũici angĩnyiitwo no mũhaka arĩhe maita meerĩ maacio.

8 No mũici angĩaga kũnyiitwo, mwene nyũmba no mũhaka atwarwo handũ harĩa hathaathayagĩrio, anyue muuma nĩ geetha oonanie atĩ ndaiyĩte indo cia mũndũ ũcio ũngĩ.

9 “Ciirainĩ o wothe ũkoniĩ indo, irĩ ndeegwa, ndigiri, ng’ondu, nguo, o na kana kĩndũ kĩngĩ o gĩothe kĩngĩkorwo kĩũrĩĩte-rĩ, andũ arĩa marauga indo icio nĩ ciao, no mũhaka matwarwo handũ harĩa hathaathayagĩrio, na mũndũ ũrĩa Ngai ekuonania atĩ nĩ we wĩ na mahĩtia, no mũhaka arĩhe mũndũ ũcio ũngĩ maita meerĩ.

10 “Mũndũ angĩtĩkĩra kũhithio nĩ mũndũ ũngĩ ndigiri, ndeegwa, ng’ondu, o na kana nyamũ ĩngĩ o yothe, nayo nyamũ ĩyo ĩkue, ĩtiihio, o na kana ĩtahwo, na kwage mũira wa ũndũ ũcio-rĩ,

11 mũndũ ũcio ũrahithĩĩtio, no mũhaka atwarwo handũ harĩa hathaathayagĩrio anyue muuma atĩ ndaiyĩte nyamũ ya mũndũ ũcio ũngĩ. Naake mwene no mũhaka eetĩkĩre muuma ũcio na hatingĩkorwo na kũrĩhania.

12 No nyamũ ĩyo ĩngĩiywo ĩ gwake-rĩ, no mũhaka arĩhe mwene.

13 Ningĩ ĩngĩrĩĩo nĩ nyamũ cia gĩthaka, mũndũ ũcio nĩonanie matigari matuĩke ũira, na ndakaarĩhe nyamũ ĩyo ĩrĩĩtwo nĩ nyamũ cia gĩthaka.

14 “Mũndũ angĩgwatio nyamũ nĩ mũndũ ũngĩ, nayo ĩtiihio kana ĩkue atarĩ ho-rĩ, mũndũ ũcio ũgwatĩĩtio no mũhaka amĩrĩhe.

15 No mwene angĩkorwo arĩ ho-rĩ, mũndũ ũcio ndangĩmĩrĩha. Angĩkorwo nyamũ ĩyo nĩyagũkombora, mbeeca iria ĩrutĩirwo cia kũmĩkombora nĩirĩĩkĩĩtie kũmĩrĩha.

Mawatho makoniĩ ũndini na mĩthiĩre ĩrĩa mĩrũngĩrĩru

16 “Mũndũ mũrũme angĩheenereria mũirĩĩtu gathirange ũtoorĩĩtio, akome naake-rĩ, no mũhaka amũraacĩrie amũhikie atuĩke mũtumia wake.

17 No rĩĩrĩ, ithe wa mũirĩĩtu ũcio angĩrega kũmũheana kũrĩ mũndũ ũcio, no mũhaka mũndũ ũcio arĩhe ithe wa mũirĩĩtu ũcio mbeeca o ta iria ingĩraacĩrio mũirĩĩtu gathirange.

18 “Mũtikaanareke mũndũ wa nja mũrogi atũũre muoyo.

19 “Mũndũ o wothe angĩkoma na nyamũ no mũhaka ooragwo.

20 “Mũndũ ũrĩa ũkaarutĩra ngai ĩngĩ o yothe igongoona tiga o niĩ MWATHANI, no mũhaka ooragwo.

21 “Mũtikaanahĩtĩrie mũgeni kana mũmũhinyĩrĩrie, amu o na inyuĩ mwarĩ ageni bũrũriinĩ wa Misiri.

22 Mũtikaananyamaarie mũtumia wa ndigwa kana mwana wa ngoriai.

23 Mũngĩmanyamaaria nao mangaĩre-rĩ, ndirĩ hĩndĩ itakaigua gũkaya kwao.

24 Nĩngaraakara na ndĩmũũragithie mbaarainĩ. Nao atumia aanyu matuĩke a ndigwa, na ciana cianyu itigwo itarĩ na maithe.

25 “ Ũngĩkombera mũndũ o na ũrĩkũ wa andũ aakwa arĩa athĩĩni mbeeca, tiga kũmũrandũra kana ũmwĩtie uumithio wa mbeeca icio.

26 Ũngĩthiĩ na nguo ya mũndũ ũngĩ ĩrĩ kĩndũ gĩa kũrũũgamĩrĩra thiirĩ atĩ nĩguo arĩmĩkũũra, no mũhaka ũmũcookerie riũa rĩtanathũa.

27 Ĩyo no yo nguo ĩrĩa arĩ nayo ya kwĩhumbĩra nĩguo aigue ũrugarĩ. Mũndũ ũcio arĩkĩĩhumbĩra na kĩ? Mũndũ ũcio angĩngaĩra, nĩndĩrĩmũiguaga amu ndĩ tha.

28 “Ndũkaanacambie Ngai, o na ndũkaanarume mũtongoria wa andũ aanyu.

29 “Ndũkaanagonderere kũũndutĩra maciaro ma ngano, ndibei, o na maguta maaku ma mĩtamaiyũ rĩrĩa magetha maamo makinya.

“ No mũhaka mũũheage aariũ aanyu a marigithaathi.

30 Ningĩ no mũhaka mũũheage marigithaathi ma ng’ombe na ma ng’ondu cianyu. Mũrekage marigithaathi ma njamba magaikara na maanyina mĩthenya mũgwanja, naguo mũthenya wa ĩnaana mũkandutĩra.

31 “Inyuĩ mũrĩ andũ aakwa, kwoguo mũtikaanarĩe nyama cia nyamũ o na ĩrĩkũ yũragĩĩtwo nĩ nyamũ cia gĩthaka; no mũhaka mũmĩikagĩrie ngui.

Waragania na kwaga gũthuutũkania

1 “Ndũkaanameemerekie ndeto cia mũhuuhu, o na ndukaanateithĩrĩrie mũndũ mwĩhia na njĩra ya kũheana ũira wa maheeni.

2 Ningĩ ndũkaanarũmĩrĩre mũingĩ atĩ ũgeeke ũũru hamwe naguo, kana ũheane ũira wa gũthũũkia waragania atĩ nĩguo ũnyiitanĩre na mũingĩ.

3 Ningĩ ndũkaanathuutũkanie mũndũ mũthĩĩni ciirainĩ wake.

4 “Ũngĩona ng’ombe kana ndigiri ya thũ yaku yũrĩĩte-rĩ, no mũhaka ũmũcookerie.

5 Ningĩ ũngĩona ndigiri ya mũndũ ũkũmeneete ĩgũĩte ĩkaremererwo nĩ mũrigo wayo, mũteithĩrĩrie kũmĩũkĩria; tiga kũmũhĩtũka o ro ũguo.

6 “Ndũkaanarege kũrũmĩrĩra waragania rĩrĩa mũthĩĩni egũciirithio.

7 Ehagĩrĩra thitango yothe ya maheeni, na ndũkaanooragithie mũndũ ũtarĩ na mahĩtia na mũthingu, amu nĩngaatuĩra mũndũ o wothe, wĩkaga waganu ta ũcio.

8 Ndũkaanamũkĩre ihaki, amu ihaki rĩhingaga andũ maitho makaremwo nĩkuona waragania na rĩkoogomia ciira wa arĩa mateehĩĩtie.

9 “Ndũkaanahinyĩrĩrie mũndũ mũgeni; wee nĩũũĩ ũrĩa mũgeni aiguaga, amu o na inyuĩ mwarĩ ageni bũrũriinĩ wa Misiri.

Mwaka wa mũgwanja na mũthenya wa mũgwanja

10 “Handaga irio bũrũriinĩ waku handũinĩ ha mĩaka ĩtandatũ, na ũgethage kĩrĩa ũrĩkũraga mĩaka ĩyo.

11 No rĩĩrĩ, mwaka wa mũgwanja nĩũrĩrekaga ũhuurũke, na ndũkaagethage kĩndũ o gĩothe gĩgũkũra kuo. Ũrĩĩkaga ũguo nĩ geetha andũ arĩa athĩĩni moonage gĩa kũrĩa, na kĩrĩa matigia nacio nyamũ cia gĩthaka ikarĩaga. Ĩkaga o ro ũguo mũgũndainĩ waku wa mĩthabibũ o na wa mĩtamaiyũ.

12 “Rutaga wĩra waku mĩthenya ĩtandatũ, no mũthenya wa mũgwanja ndũkaarutage wĩra, nĩ geetha ngombo ciaku, na ageni arĩa makurutagĩra wĩra, mahuurũkage, o na nyamũ ciaku nacio ikahuurũka.

13 “Athĩkagĩra maũndũ moothe marĩa niĩ MWATHANI ngwĩrĩĩte. Ndũkaanahooe ngai ingĩ, kana ũgwete marĩĩtwa maacio na kanua gaaku.

Thigũkũ Ithatũ Iria Nene

14 “No mũhaka ũkũngũyagĩre thigũkũ ya kũndĩĩya maita matatũ thĩinĩ wa mwaka.

15 Hĩndĩ ya mweri wa Abibu, mweri ũrĩa mwoimire bũrũri wa Misiri, nĩũrĩkũngũagĩra Thigũkũ ya Mĩgate Ĩtarĩ Mĩĩkĩre Ndaawa ya Kũimbia o ta ũrĩa ndĩmwathĩĩte. Mĩthenya mũgwanja ya thigũkũ ĩyo, ndũkaanarĩe mũgate o na ũmwe wĩkĩrĩĩtwo ndaawa ya kũimbia. Na ningĩ mũndũ o na ũrĩkũ ndakaanooke gũũthaathaiya arĩ mooko matheri.

16 “Thigũkũ ĩrĩa ĩngĩ ũrĩkũngũagĩra nĩ ya Magetha ma Mbere ma irio iria ũhandĩĩte mũgũndainĩ waku.

“Ningĩ ũkũnguagĩre Thigũkũ ya Ithũnũ mwaka ũgĩthiĩ gũthira hĩndĩ ĩrĩa wagetha maciaro kuuma mũgũndainĩ waku wa thabibũ o na wa matunda.

17 O mwaka, thigũkũinĩ icio ithatũ, arũme oothe no mũhaka mookage gũũthaathaiya niĩ MWATHANI Ngai wanyu.

18 “Ndũkaanandutĩre mũgate mwĩkĩre ndaawa ya kũimbia rĩrĩa ũkũndutĩra igongoona rĩa nyamũ, o na kana ũreke maguta ma nyamũ iria ndutĩirwo igongoona hĩndĩ ya thigũkũ icio maraare nginya rũũciinĩ.

19 “O mwaka no mũhaka ũreehage magetha marĩa meega mũno ma mbere ma irio cia mĩgũnda yaku nyũmbainĩ ya MWATHANI Ngai waku.

“Na ningĩ ndũkaanaruge koori na iria rĩa nyina.

Ciĩranĩro na mataaro

20 “Na rĩĩrĩ, nĩngũrekia mũraika mbere yanyu amũgitagĩre mũrĩ rũgendoinĩ na amũkinyie kũndũ kũrĩa ndĩmũthondekeire.

21 Mũthikagĩrĩriei na mũmwathĩkagĩre. Mũtikaamũremere, amu nĩ niĩ ndĩmũrekeetie na gũtirĩ hĩndĩ angĩmwohera mwamũremera.

22 Mwamwathĩkĩra na mwĩkage ũrĩa wothe ndĩrĩmwathaga, nĩndĩrĩhũũranaga na thũ cianyu ciothe.

23 Rĩrĩa mũraika wakwa akaamũtongoria amũkinyie bũrũri wa Aamori, Ahiti, Aperizi, Akanaani, Ahivi, o na wa Ajebusi na ndĩmaniine-rĩ,

24 mũtikaanainamĩrĩre ngai ciao kana mũcithaathaiye, o na ningĩ mũtikaanarũmĩrĩre ndini ciao. Nĩmũgaathũũkangia ngai ciao na muunange itugĩ ciao cia mahiga iria mathaathayagia.

25 Angĩkorwo nĩmũrĩthaathayagia niĩ MWATHANI Ngai wanyu, nĩndĩrĩmũraathimaga na irio na maaĩ, na ngeeheria mĩrimũ gatagatĩinĩ kaanyu.

26 Bũrũriinĩ wanyu-rĩ, gũtirĩ mũtumia ũkaahuna kana athaate. Nĩngaamũhe ũtũũro mũraihu.

27 “Nĩngaatũma andũ arĩa makaamũũkĩrĩra manjĩtigĩre; ndũme hagĩe kĩrigiicano gatagatĩinĩ ka andũ arĩa mũrarũa nao, o na ndũme thũ cianyu imũhuutatĩre ciũre.

28 Ningĩ nĩngaarekia magi mbere yanyu maingate Ahivi, Akanaani, o na Ahiti, mamweherere.

29 No rĩĩrĩ, ndikaamaingata mamweherere mwakainĩ o ro ũmwe; ingĩĩka ũguo bũrũri watigwo ũtarĩ andũ, nacio nyamũ cia gĩthaka ciingĩhe mũno imũnyariire.

30 Handũ ha gwĩka ũguo, ngamaingata kahora kahora, nginya hĩndĩ ĩrĩa mũgaakorwo mũrĩ aingĩ a kũhota kũgaya bũrũri ũcio.

31 Mũhaka wa bũrũri wanyu ngaũrutia Iriainĩ Ituune, ndĩũkinyie iriainĩ rĩa Mediteraneani, na ndĩũrutie werũinĩ, ndĩũkinyie rũũĩinĩ rwa Farati; amu nĩngaamũhe hinya wa kũhoota andũ arĩa matũũraga bũrũri ũcio, na mũkaamaingataga o ũrĩa mũgaakorwo mũgĩthiĩ na mbere.

32 Mũtikaanagĩe kĩrĩĩkanĩro o na kĩrĩkũ nao kana na ngai ciao.

33 Mũtikaanameetĩkĩrie maikare bũrũriinĩ wanyu, nĩguo matikaanatũme mũnjĩhĩrie, amu mũngĩgaatungatĩra ngai ciao, ũndũ ũcio ũgaakorwo ũrĩ mũtego harĩ inyuĩ.”

Kĩrĩĩkanĩro kũiguithanĩrio

1 Ningĩ MWATHANI akĩĩra Musa atĩrĩ, “Ambata ũũke kĩrĩmainĩ harĩ niĩ, mũũke na Harũni, Nadabu, Abihu, o na atongoria arĩa mĩrongo mũgwanja a Isiraeli, na mũinamĩrĩre mũũthathaiye mũrĩ o haraihu.

2 Wee ũrĩ wiki hatarĩ o na ũmwe wa acio angĩ, no we ũgũũka hakuhĩ na niĩ; andũ matikaae kwambata kĩrĩmainĩ.”

3 Naake Musa agĩthiĩ akĩĩra andũ ũhoro wothe ũrĩa MWATHANI aamũheete o na maathani maake. Nao andũ oothe magĩcookia hamwe atĩrĩ, “Ũrĩa wothe MWATHANI oigĩĩte nĩtũgwĩka.”

4 Naake Musa akĩandĩka ciugo ciothe cia MWATHANI. Agĩũkĩra rũũciinĩ tene agĩaka kĩgongoona magũrũinĩ ma kĩrĩma kĩu na akĩhanda itugĩ ikũmi na igĩrĩ, kũringana na mĩhĩrĩga ĩrĩa ikũmi na ĩĩrĩ ya andũ a Isiraeli.

5 Agĩcooka akĩrekia aanake amwe a andũ a Isiraeli, makĩrutĩra MWATHANI magongoona ma njino, na makĩruta ndeegwa imwe ituĩke magongoona ma thaayũ.

6 Naake Musa akĩoya nuthu ya thakame ya nyamũ icio akĩmĩĩkĩra mbakũriinĩ, na nuthu ĩrĩa ĩngĩ akĩmĩminjaminjĩria kĩgongoona.

7 Agĩcooka akĩoya ibuku rĩa kĩrĩĩkanĩro, akĩrĩthoomera andũ aanĩrĩire. Nao andũ makiuga atĩrĩ, “Nĩtũgwathĩkĩra MWATHANI na twĩke ũrĩa wothe aathanĩĩte.”

8 Musa agĩkĩoya thakame ĩrĩa yarĩ mbakũriinĩ akĩmĩminjaminjĩria andũ akiuga atĩrĩ, “Ĩno nĩ yo thakame ya kĩrĩĩkanĩro kĩrĩa MWATHANI aarĩĩkanĩra na inyuĩ gĩkoniĩ ũhoro ũcio wothe.”

9 Nao Musa, Harũni, Nadabu, Abihu, o na atongoria arĩa mĩrongo mũgwanja a Isiraeli makĩambata kĩrĩmainĩ

10 makĩyonera Ngai wa Isiraeli; harĩa aakinyĩĩte na magũrũ maake haahaanaga ta haarĩĩtwo mahiga ma goro ma rangi wa mburuu na haathereete o ta matu.

11 No we Ngai ndaigana gwĩka atongoria acio a Isiraeli ũũru; moonire Ngai, magĩcooka kũrĩa na kũnyua.

Musa kwambata kĩrĩmainĩ gĩa Sinai

12 MWATHANI akĩĩra Musa atĩrĩ, “Ambata ũũke harĩ niĩ kĩrĩmainĩ wetangĩrĩre ho, na nĩngũkũhe ihengere igĩrĩ cia mahiga iria irĩ na mawatho na maathani moothe marĩa nyaandĩkĩĩte nĩ ũndũ wa gũtaara andũ.”

13 Kwoguo Musa na Joshua ũrĩa wamũteithagĩrĩria makĩĩhaarĩria, naake Musa akĩambata kĩrĩmainĩ kĩu gĩtheru.

14 Naake agĩtiga eera atongoria atĩrĩ, “Tweterereei haaha o nginya rĩrĩa tũrĩcooka. Harũni na Huri marĩ hamwe na inyuĩ; nĩ ũndũ ũcio, mũndũ ũrĩa ũngĩgĩa na ciira nĩathiĩ kũrĩ o.”

15 Musa agĩkĩambata kĩrĩmainĩ kĩu, narĩo itu rĩgĩkĩhumbĩra.

16 Naguo riiri wa MWATHANI ũkĩiyũra kĩrĩmainĩ gĩa Sinai, narĩo itu rĩu rĩgĩikara rĩkĩhumbĩrĩĩte mĩthenya ĩtandatũ, na mũthenya wa mũgwanja MWATHANI arĩ ituĩinĩ agĩĩta Musa.

17 Naguo riiri wa MWATHANI wonekaga nĩ andũ a Isiraeli ũhaana ta mwaki mũnene ũrĩ gacũmbĩrĩ ga kĩrĩma.

18 Naake Musa akĩingĩra ituĩnĩ akĩambata kĩrĩmainĩ, agĩikara kũu mũthenya na ũtukũ, mĩthenya mĩrongo ĩna.

Andũ kwĩrwo mahothere Hema ĩrĩa nyamũre

1 MWATHANI akĩĩra Musa atĩrĩ,

2 “Arĩria andũ a Isiraeli ũmeere maahothere. Nawe wamũkĩre kĩrĩa gĩothe mũndũ o wothe ekũigua na ngoro yake akĩenda kũũhothera.

3 Nayo mĩhothi ĩrĩa ũkwamũkĩra kuuma kũrĩ o nĩ: thahabu, betha, icango;

4 gataani ĩrĩa njega; guoya wa rangi wa mburuu, babũ, na mũtuune, na nguo ithondekeetwo na guoya wa mbũri;

5 na njũũa cia ndũrũme itobokeetio rangiinĩ igatuunĩha; njũũa iria njega; mbaaũ cia mũgaa;

6 maguta ma gwakia mataawa; na mahuti manungi wega ma gwĩkĩrwo magutainĩ ma kwamũrana o na ma gwĩkĩrwo ũbaaniinĩ;

7 tũhiga twa goro twa rangi mũtũũne, o na tũhiga tũngĩ twa goro twa gũtheecererwo ebodiinĩ ya Mũthĩnjĩri Ngai Ũrĩa Mũnene o na nguoinĩ yake ya gĩthũri.

8 No mũhaka andũ maathondekere gĩikaro gĩtheru gĩa gũikaraga nĩ geetha ndũũre gatagatĩinĩ kaao.

9 Gĩikaro kĩu kĩamũre, o na indo cia gwĩkĩrwo kuo thĩinĩ, ũgĩthondeke kũringana na mũbango ũrĩa ngũkuonia.

Ithandũkũ rĩa Kĩrĩĩkanĩro

10 “Thondeka ithandũkũ rĩa mbaaũ cia mũgaa, na rĩkorwo na ũraihu wa cenitimita igana rĩa ikũmi, na wariĩ wa cenitimita mĩrongo ĩtandatũ na ithathatũ, na kĩrũũgamo cenitimita mĩrongo ĩtandatũ na ithathatũ.

11 Nawe ũrĩhumbĩre thĩinĩ na na nja na thahabu ya gũturwo ĩrĩa therie mũno, na ũrĩrigiicĩrie mĩena yothe mũgũkũ wa thahabu mĩthiainĩ yarĩo ya igũrũ.

12 Ningĩ ũrĩthondekere icũhĩ inya cia kũrĩkuua cia thahabu, ũciĩkĩre magũrũinĩ mana maarĩo, igĩrĩ mwena ũmwe na igĩrĩ mwena ũrĩa ũngĩ.

13 Ũcooke ũthondeke mĩtĩ mĩraaya ya mĩgaa ya kũrĩkuua na ũmĩhumbĩre na thahabu,

14 ũcooke ũmĩharũkie icũhĩinĩ icio irĩ mĩenainĩ ya ithandũkũ rĩu.

15 Mĩtĩ ĩyo mĩraaya no mũhaka ĩtigagwo icũhĩinĩ na ndĩkaae kũrutagwo.

16 Ningĩ ũcooke ũige thĩinĩ wa ithandũkũ rĩu ihengere igĩrĩ cia mahiga iria ngũkũnengera, iria ciandĩkĩĩtwo maathani.

17 “Ningĩ ũthondeke gĩkunĩkogĩa thahabu ĩrĩa therie mũno, gĩkorwo kĩrĩ na ũraihu wa cenitimita igana rĩa ikũmi, na wariĩ wa cenitimita mĩrongo ĩtandatũ na ithathatũ.

18 Na ũthondeke ciũmbe igĩrĩ irĩ mathagu, ũcithondeke na thahabu,

19 inyiitanĩĩte na gĩkunĩko kĩu, kĩũmbe kĩmwe gĩikare mũthia ũmwe wa gĩkunĩko kĩu, nakĩo kĩrĩa kĩngĩ mũthia ũcio ũngĩ.

20 Nacio ciũmbe icio ikorwo iroranĩĩte na itambũrũkĩĩtie mathagu maacio makahumbĩra gĩkunĩko kĩu.

21 Ũcooke ũige ihengere igĩrĩ cia mahiga thĩinĩ wa ithandũkũ na ũigĩrĩre gĩkunĩko kĩu igũrũ warĩo.

22 Hau nĩ ho ndĩrĩcemanagĩria nawe, na ndĩ igũrũ wa gĩkunĩko kĩu, o hau gatagatĩinĩ ga ciũmbe icio igĩrĩ irĩ mathagu iria irĩ igũrũ wa ithandũkũ rĩu rĩa kĩrĩĩkanĩro nĩndĩrĩkũheaga mawatho maakwa moothe nĩ ũndũ wa andũ a Isiraeli.

Meetha ya mĩgate ĩrĩa ĩrutĩirwo Ngai

23 “Ningĩ ũthondeke meetha ya mbaaũ cia mũgaa, ĩkorwo na ũraihu wa cenitimita mĩrongo ĩnaana na inyaanya, na wariĩ wa cenitimita mĩrongo ĩna na inya, na kĩrũũgamo cenitimita mĩrongo ĩtandatũ na ithathatũ.

24 Ũcooke ũmĩhumbĩre na thahabu ya gũturwo ĩrĩa therie mũno na ũmĩthiũrũrũkĩrie mĩena yothe mũgũkũ wa thahabu.

25 Na ũmĩĩkĩre karũbaaũ gaceke ka wariĩ wa mirimita mĩrongo mũgwanja na ithaano mĩena yothe, nako karũbaaũ kau gaceke ũkahumbĩre na thahabu guothe.

26 Ningĩ meetha ĩyo ũmĩthondekere icũhĩ inya cia thahabu cia kũmĩkuua ũciĩkĩre koonainĩ ciayo inya harĩa magũrũ mayo marĩ.

27 Icũhĩ icio cia kũharũkio mĩtĩ ĩrĩa mĩraaya ya gũkuua meetha ĩyo ũciĩkĩre hakuhĩ na karũbaaũ kau gaceke.

28 Nayo mĩtĩ ĩyo mĩraaya ũmĩthondeke na mũtĩ wa mũgaa na ũmĩhumbĩre na thahabu.

29 Ũcooke ũthondeke thaani, ikombe, ndigithũ, na mbakũri nĩ ũndũ wa meetha ĩyo cia kũhũthĩrwo nĩ ũndũ wa magongoona ma ndibei. Indo icio ciothe ũcithondeke na thahabu ĩrĩa therie mũno.

30 Meetha ĩyo ũmĩige mbere ya Ithandũkũ rĩu rĩa Kĩrĩĩkanĩro. Na rĩĩrĩ, igũrũ rĩayo ũnjigagĩre mĩgate mĩtheru ĩrĩa ndutĩirwo.

Mũtĩ wa gũcuuria mataawa

31 “Ningĩ ũcooke ũthondeke mũtĩ wa gũcuuria mataawa na thahabu ĩrĩa therie mũno. Gĩtina kĩaguo o na mũtĩ waguo ikorwo irĩ cia thahabu ya gũturwo; mahũa maguo ma kũũgemia na thundo ciaguo, ciothe ithondekwo inyiitaine naguo.

32 Naguo mũtĩ ũcio ũgĩe na honge ithathatũ ciumĩĩte mĩenainĩ yaguo, o mwena honge ithatũ.

33 O rũhonge hakorwo na mahũa ma kũũgemia mahaana ihũa rĩa mũroothi, namo makorwo na mahũa matatũ ma kũgemia na thundo ithatũ.

34 Naguo mũtĩ ũcio wa kũhangĩrwo mataawa ũkorwo na mahũa mana ma kũgemia mahaana ihũa rĩa mũroothi, namo makorwo na mahũa na thundo.

35 Ningĩ o mũhuro wa honge igĩrĩ igĩrĩ hakorwo na thundo ĩmwe.

36 Nacio thundo na honge ciacio, o na mũtĩ ũcio wa kũhangĩrwo mataawa ikorwo inyiitanĩĩte irĩ kĩndũ kĩmwe ithondekeetwo na thahabu ya gũturwo ĩrĩa therie mũno.

37 Ũcooke ũthondekere mũtĩ ũcio mataawa mũgwanja, ũmaige ũguo atĩ ũtheri wamo nĩũmũrĩkaga hau mbere.

38 Nayo mĩĩhato yaguo, na thaani cia mũrarĩ wa ndambĩ ciaguo ũcithondeke na thahabu ĩrĩa therie mũno.

39 Mũtĩ ũcio wa kũhangĩrwo mataawa hamwe na indo ciaguo ciothe ithondekwo na thahabu ĩrĩa therie mũno ya ũritũ wa kiro mĩrongo ĩtatũ na ithaano.

40 Na ũmenyerere ũcithondeke ta ũrĩa ndĩrakuonia gũũkũ kĩrĩmainĩ.

Hema ya gũtũnganwo

1 “Ningĩ ũthondeke Hema ĩrĩa nyamũre, Hema ya gũtũnganwo na itambaya ikũmi ithondekeetwo na gataani ĩrĩa njega ĩtumĩĩtwo na guoya wa rangi wa mburuu, babũ, na mũtuune. Na ũgemie itambaya icio na mĩcoro ya ciũmbe iria irĩ mathagu ĩtumĩĩtwo nĩ mũndũ mũũhĩgĩrĩru wĩrainĩ ũcio.

2 Itambaya icio no mũhaka ikorwo ciiganaine o gĩtambaya gĩkorwo kĩrĩ na ũraihu wa mita ikũmi na igĩrĩ, na wariĩ wa mita igĩrĩ.

3 Itambaya ithaano ũcinyitithanie hamwe ituĩke kĩmwe, na wĩke o ro ũguo na icio ingĩ ithaano.

4 Ũcooke ũthondeke ciana na gĩtambaya kĩa rangi wa mburuu, ũcitumĩrĩre mĩthiainĩ ya itambaya icio inyiitithanĩĩtio.

5 Ũtumĩrĩre ciana mĩrongo ĩtaano gĩtambayainĩ kĩmwe, o na ũtumĩrĩre ciana ingĩ mĩrongo ĩtaano mwenainĩ wa gĩtambaya kĩu kĩngĩ gĩa keerĩ, nacio ciana icio ciikare iringaine.

6 Ũcooke ũthondeke ngathĩka mĩrongo ĩtaano cia thahabu cia kũnyiitithania itambaya icio, nĩguo hema ĩyo ya gũtũnganwo ĩtuĩke kĩndũ o ro kĩmwe.

7 “Ningĩ ũthondekere Hema ĩyo kĩandarũũa gĩa kũmĩhumbĩra, ũgĩthondeke na itambaya ikũmi na kĩmwe ithondeetwo na guoya wa mbũri.

8 Ciothe ũcithondeke ciiganaine irĩ na ũraihu wa mita ikũmi na ithatũ na wariĩ wa mita igĩrĩ.

9 Ũcooke ũtumanĩrĩrie ithaano ituĩke kĩndũ kĩmwe, nacio icio ingĩ ithathatũ ũcitumanĩrĩrie ituĩke kĩndũ kĩmwe. Nakĩo gĩtambaya gĩa gatandatũ ũgĩkũnje mwena wa na mbere wa Hema.

10 Ningĩ ũtumĩrĩre ciana mĩrongo ĩtaano mũthiainĩ wa itambaya cia mbere, na ingĩ mĩrongo ĩtaano mũthiainĩ wa itambaya icio ingĩ.

11 Ũcooke ũthondeke ngathĩka mĩrongo ĩtaano cia gĩcango ũciĩkĩre cianainĩ icio nĩ geetha ũnyiitithanie itambaya icio nĩguo hema ĩyo ĩtuĩke kĩndũ kĩmwe.

12 Nakĩo kĩnuthu gĩa gĩtambaya kĩrĩa gĩgũtigara ũgĩcuurie na mwena wa na thuutha wa Hema ĩyo.

13 Nacio cenitimita mĩrongo ĩtaano iria igũtigara o mwena nĩ ũndũ wa itambaya icio kũraiha-rĩ, ũcicuurie mĩenainĩ ya gĩikaro kĩu nĩguo ikĩhumbĩre.

14 “Na ũthondekere hema ĩyo ciandarũũa igĩrĩ cia kũmĩhumbĩra; kĩmwe kĩa njũũa cia ndũrũme itobokeetio rangiinĩ mũtuune igatunĩha, na kĩrĩa kĩngĩ kĩa njũũa irĩa njega gĩa kũigĩrĩrwo igũrũ rĩa kĩu kĩngĩ.

15 “Ningĩ ũthondekere Hema ĩyo mbaaũ cia mũgaa cia kũmĩrũũgamia.

16 O rũbaaũ rũkorwo rũrĩ na ũraihu wa mita inya na wariĩ wa cenitimita mĩrongo ĩtandatũ na ithathatũ,

17 na o rũbaaũ rũgĩe na ihoce igĩrĩ cia gũcinyiitithania. Mbaaũ ciothe cia Hema ĩyo igĩe na ihoce icio.

18 Ũthondeke mbaaũ mĩrongo ĩĩrĩ cia mwena wa na kĩanda wa Hema ĩyo,

19 na ũcithondekere njikarĩro mĩrongo ĩna cia betha, o rũbaaũ rũgĩe na njikarĩro igĩrĩ cia kũnyiitĩrĩra ihoce cierĩ.

20 Ningĩ mwena wa na rũgongo wayo ũũthondekere mbaaũ mĩrongo ĩrĩ

21 na njikarĩro mĩrongo ĩna cia betha, o rũbaaũ rũgĩe na njikarĩro igĩrĩ.

22 Ningĩ mwena wa na thuutha wa Hema ĩyo, nĩguo mwena wa na ithũĩro, ũthondekere mbaaũ ithathatũ,

23 na ũthondekere mbaaũ igĩrĩ cia koona.

24 Mbaaũ icio cia koona ikorwo inyiitithanĩĩtio gĩtinainĩ na ithiĩ inyiitithanĩĩtio o ro ũguo nginya igũrũ. Nacio mbaaũ icio cierĩ cia koona cierĩ igaathondekwo o ro ũguo.

25 Kwoguo hagaakorwo na mbaaũ inyaanya na njikarĩro ikũmi na ithathatũ cia betha, o rũbaaũ rũrĩ na njikarĩro igĩrĩ.

26 “Ningĩ ũcooke ũthondeke mĩgamba ikũmi na ĩtaano ya mũtĩ wa mũgaa, ĩtaano yayo ĩtuĩke ya kũnyiita mbaaũ cia mwena ũmwe wa Hema ĩyo,

27 ĩngĩ ĩtaano ya kũnyiita cia mwena ũrĩa ũngĩ, na ĩyo ĩngĩ ĩtaano ya kũnyiita mbaaũ cia mwena wa na thuutha ũrĩa ũroreete na ithũĩro.

28 Naguo mũgamba wa gatagatĩ, ũrĩa ũgwĩkĩrwo gatagatĩ ka mbaaũ icio, ũtuĩkanĩrie gatagatĩ gaacio kuuma mũthia ũmwe wa Hema ĩyo kinya ũrĩa ũngĩ.

29 Ũcooke ũhumbĩre mbaaũ icio na thahabu na ũciharũkie icũhĩ cia thahabu cia kũharũkio mĩgamba ĩyo ĩrĩa o nayo ũkũmĩhumbĩra na thahabu.

30 Na ũmenyerere ũthondeke Hema ĩyo ta ũrĩa ndĩrakuonia gũũkũ kĩrĩmainĩ.

31 “Ningĩ ũtume mbathiya ya kũhakania, ũmĩtume na guoya wa rangĩ wa mburuu, babũ, na mũtuune, na gataani ĩrĩa njega, na ũmĩgemie na mĩcoro ya ciũmbe iria irĩ mathagu.

32 Ũcooke ũmĩcuurie itugĩinĩ inya cia mũtĩ wa mũgaa ihumbĩrĩĩtwo na thahabu, na ciĩkĩrwo tũhocio twa thahabu, icooke irũũgamio njikarĩroinĩ inya cia betha.

33 Nayo mbathiya ĩyo ũmĩcuurie gathĩkainĩ irĩa irĩ igũrũ mwena wa na thĩinĩ wa Hema ĩyo, narĩo Ithandũkũ rĩa Kĩrĩĩkanĩro rĩrĩ na ihengere iria igĩrĩ cia mahiga ũrĩige na thuutha wa mbathiya ĩyo. Nayo ĩhakanie Handũ Harĩa Hatheru na Harĩa Hatheru Mũno.

34 Ũcooke ũkunĩke Ithandũkũ rĩa Kĩrĩĩkanĩro.

35 Naho hau nja ya Handũ Harĩa Hatheru Mũno ũige meetha na mwana wa na rũgongo wa Hema, naguo mũtĩ wa gũcuuria mataawa ũũige mwena wa na kĩanda.

36 “Naguo mũromo wa Hema ĩyo, ũthondekere mbathiya ya gataani ĩrĩa njega ĩtumĩĩtwo na guoya wa rangi wa mburuu, babũ, na mũtuune, na ĩgemeetio.

37 Ningĩ mbathiya ũmĩthondekere itugĩ ithaano cia mũgaa, ũcihumbĩre na thahabu na ũciĩkĩre tũhocio twa thahabu; itugĩ icio ũcithondekere njikarĩro ithaano cia gĩcango.

Kĩgongoona

1 “Nakĩo kĩgongoona-rĩ, ũgĩthondeke na mbaaũ cia mũgaa. Kĩgongoona kĩu gĩkorwo gĩ thikwea, kĩrĩ na ũraihu wa mita igĩrĩ na boiniti igĩrĩ (2.2), na wariĩ wa mita igĩrĩ na boiniti igĩrĩ (2.2), na kĩrũũgamo mita ĩmwe na boiniti ithatũ (1.3).

2 Ningĩ ũthondeke hĩa igũrũ wa koona ciakĩo inya, nacio hĩa icio ituĩke o kĩndũ kĩmwe na kĩgongoona kĩu, nakĩo gĩothe ũkĩhumbĩre na gĩcango.

3 Ũcooke ũthondeke ngĩo cia kũrutaga mũhu wakĩo, iciko cia tĩĩri, mbakũri, njibe o na ngĩo cia mwaki. Indo icio ciothe ũcithondeke na gĩcango.

4 Ningĩ ũcooke ũgĩthondekere rũgara rwa gĩcango na koonainĩ ciaruo wĩkĩre icũhĩ inya cia gĩcango cia gũgĩkuua.

5 Ũcooke ũthondeke rũgara rwa gĩcango ũrwĩkĩre mũhuro wa mũgũkũ wa kĩgongoona kĩu, naruo rũgĩkinye o gatagatĩ ga kĩgongoona.

6 Ningĩ ũthondeke mĩtĩ mĩraaya ya mũgaa ya gũgĩkuua, na ũmĩhumbĩre na gĩcango,

7 ũmĩharũkagie icũhĩinĩ iria irĩ mĩena ya kĩgongoona kĩu hĩndĩ ĩrĩa rĩothe gĩgũkuuo.

8 Kĩgongoona kĩu ũgĩthondeke na mbaaũ na wĩkĩre irima gatagatĩ gaakĩo kũringana na ũrĩa ndĩrakuonia gũũkũ kĩrĩmainĩ.

Nja ya Hema ya MWATHANI ya gũtũnganwo

9 “Ningĩ Hema ĩyo yakwa ũmĩthondekere nja ĩirigĩirwo na mbathiya cia gataani ĩrĩa njega. Mwena wa na kĩanda mbathiya icio ikorwo na ũraihu wa mita mĩrongo ĩna na inya,

10 inyiitĩrĩirwo nĩ itugĩ mĩrongo ĩrĩ cia gĩcango irĩ na njikarĩro mĩrongo ĩrĩ cia gĩcango; natuo tũhocio twa itugĩ icio, o na tũmĩtĩ twacio twa gũcinyiitithania ũtũthondeke na betha.

11 Ũguo noguo mwena wa na rũgongo wa nja ĩyo ũgũkorwo ũtariĩ.

12 Naguo mwena wa ithũĩro hagĩe na mbathiya irĩ na ũraihu wa mita mĩrongo ĩĩrĩ na igĩrĩ na irĩ na itugĩ ciacio ikũmi na njikarĩro ciacio ikũmi.

13 Naguo mwena wa irathĩro, harĩa mũromo ũrĩ, nja ĩyo ĩkorwo ĩrĩ na wariĩ wa mita mĩrongo ĩrĩ na igĩrĩ.

14-15 O mwena wa mũromo hagĩe na mbathiya ya mita ithathatũ na boiniti ithathatũ na itugĩ ithatũ na njikarĩro ithatũ.

16 Ningĩ mũromoinĩ wa nja ĩyo hagĩe mbathiya ya ũraihu wa mita kenda ĩthondekeetwo na gataani ĩrĩa njega ĩtumĩĩtwo na guoya wa rangi wa mburuu, babũ, na mũtuune, ĩgacooka ĩkagemio. Nayo ĩkorwo ĩnyiitĩrĩirwo nĩ itugĩ inya irĩ njikarĩroinĩ ciacio inya.

17 Ningĩ itugĩ ciothe iria ikũriigicĩria nja ĩyo inyiitithanio na tũmĩtĩ twa betha, na tũhocio twacio tũthondekwo na betha, na njikarĩro ciacio ithondekwo na gĩcango.

18 Naruo rũirigo rũu rũkorwo na ũraihu wa mita mĩrongo ĩna na inya, na wariĩ wa mita mĩrongo ĩrĩ na igĩrĩ, na kĩrũũgamo gĩkorwo na mita igĩrĩ na boiniti igĩrĩ. Nacio mbathiya ikorwo irĩ cia gataani ĩrĩa njega, nacio njikarĩro ciayo ituĩke cia gĩcango.

19 Nacio indo ciothe cia kũhũthĩrwo Hemainĩ ĩyo na higĩ ciayo ciothe o na higĩ cia rũirigo rũu, ciothe ikorwo irĩ cia gĩcango.

Kũmenyerera taawa

20 “Atĩrĩĩrĩ, athaga andũ a Isiraeli makũreehagĩre maguta marĩa matheru mũno ma mĩtamaiyũ ma taawa, nĩ geetha taawa wakagio hĩndĩ ciothe.

21 Na rĩĩrĩ, Harũni na aariũ aake nĩ o marĩigaga taawa ũcio thĩinĩ wa Hema yakwa mwena wa na nja wa mbathiya ya kũhakania ĩrĩa ĩcuurĩĩtio mbere ya Ithandũkũ rĩa Kĩrĩĩkanĩro. Taawa ũcio ũrĩakanaga hau mbere ya MWATHANI kuuma hwaĩinĩ nginya rũũciinĩ. Naguo ũndũ ũcio ũtuĩke watho wa kũrũmagĩrĩrwo nginya tene nĩ andũ a Isiraeli na njiarwa ciao.

Nguo cia Athĩnjĩri Ngai

1 “Na rĩĩrĩ, ĩta mũrũ wa maitũguo Harũni na aariũ aake, Nadabu, Abihu, Eleazaru, na Ithamaru, ũmaamũranie na andũ a Isiraeli, nĩ geetha mandungatagĩre ta athĩnjĩri Ngai.

2 Ningĩ ũtumithĩrie mũrũ wa maitũguo Harũni nguo cia ũthĩnjĩri Ngai cia kũmũheithia gĩtĩĩo o na cia kũmũthakaragia.

3 Ũcooke wĩte mabundi moothe marĩa heete ũũgĩ, ũmeere matume nguo icio cia Harũni nĩ geetha aamũrwo ta mũthĩnjĩri Ngai wa kũndungatĩra.

4 Nguo iria megũtuma itariĩ ta ũũ: meere matume nguo ya gĩthũri, ebodi, nguo ndaaya, nguo ĩkinyĩĩte maruinĩ ng’emie, kĩremba, na mũcibi mwariĩ. No mũhaka matumĩre Harũni na aariũ aake nguo icio cia ũthĩnjĩri Ngai, nĩ geetha mandungatagĩre ta athĩnjĩri Ngai.

5 Namo mabundi macio mahũthĩre guoya wa rangi wa mburuu, babũ, na mũtuune, na mauuthi ma rangi wa thahabu, na gataani ĩrĩa njega.

Ebodi

6 “Nayo ebodi mamĩtume na guoya wa rangi wa mburuu, babũ, na mũtuune, mauuthi ma rangi wa thahabu, na gataani ĩrĩa njega ĩgemeetio.

7 Ningĩ ebodi ĩyo ĩgĩe na mĩkwa ĩĩrĩ ya kũmĩoha ciandeinĩ, nayo mĩkwa ĩyo ĩtumĩrĩrwo mĩthiainĩ ya yo.

8 Naguo mũcibi ũrĩa ũgemeetio wega, na ũtumĩĩtwo na indo o ta cia ebodi ĩyo ũnyiitithanio nayo ũtuĩke kĩndũ kĩmwe nayo.

9 Ũcooke woe tũhiga twĩrĩ twa goro twa rangi mũtuune ũtũkurure marĩĩtwa ma aariũ a Jakubu.

10 Namo marĩĩtwa macio ũmaandĩke kũringana na ũkũrũ wao; matandatũ kahigainĩ kamwe, na matandatũ kahigainĩ kau kangĩ.

11 Caria mũndũ mũũhĩgĩrĩru wĩrainĩ ũcio akurure tũhigainĩ tũu marĩĩtwa ma aariũ a Jakubu, ũtwĩkĩre tũkonyoinĩ tũthondekeetwo na thahabu.

12 Ũcooke wĩkĩre tũhiga tũu twerĩ mĩkwainĩ ĩrĩa ĩĩrĩ ya kuoha ebodi ĩyo ciandeinĩ, nĩguo tũrũũgamagĩrĩre mĩhĩrĩga ĩrĩa ikũmi na ĩĩrĩ ya andũ a Isiraeli. Ũndũ ũyũ nĩũrĩtũmaga Harũni akuue marĩĩtwa ma mĩhĩrĩga ĩyo ciandeinĩ ciake, nĩ geetha niĩ MWATHANI ndirikanage andũ aakwa hĩndĩ ciothe.

13 Ningĩ ũthondeke tũkonyo twa thahabu,

14 na irengeeri igĩrĩ cia thahabu ĩrĩa therie mũno, ũcinyiitithanie na tũkonyo tũu.

Nguo ya gĩthũri

15 “Ningĩ ũthondekere Mũthĩnjĩri Ũrĩa Mũnene nguo ya gĩthũri ya kũhũthĩra hĩndĩ ĩrĩa egũtua ciira. Nguo ĩyo ĩthondekwo na indo o ta iria ithondekeete ebodi na ĩgemio o ta yo.

16 Nguo ĩyo ĩkorwo ĩ thikwea na ĩkũnjwo maita meerĩ. Ũraihu wayo ũkorwo ũrĩ cenitimita mĩrongo ĩĩrĩ na igĩrĩ naguo wariĩ ũkorwo ũrĩ o cenitimita mĩrongo ĩĩrĩ na igĩrĩ.

17 Ũcooke ũmĩĩkĩre mĩhari ĩna ya tũhiga twa goro; mũhari wa mbere wĩkĩre kahiga ka goro ka rubi, kahiga ka goro ka rangi wa yerũũ, na arumaathi ĩrĩa nduune.”

18 Naguo mũhari wa keerĩ wĩkĩre kahiga ka goro ka rangi wa ngirini ũrĩa mũtheru mũno, o na kangĩ ka arumaathi.

19 Naguo mũhari wa gatatũ wĩkĩre kahiga ka goro ka rangi wa mburuu kana wa mũtukanio wa mburuu na ngirini, na kangĩ ke na marangi meerũ na ma gĩtĩĩri, o na kangĩ ka rangi wa babũ.

20 Naguo mũhari wa kana wĩkĩre kahiga ka goro ka rangi wa ngirini kana wa mũtukanio wa mburuu na ngirini, ningĩ kangĩ ka rangi mũtuune, na kangĩ karĩ na marangi ma mĩthemba mĩingĩ geetagwo Jasiperi.

21 Natuo tũhiga tũu tuothe ikũmi na twĩrĩ o kahiga gakorwo gakururĩĩtwo rĩĩtwa rĩa ũmwe wa aariũ a Jakubu, kũringana na ũrĩa mĩhĩrĩga ya andũ a Isiraeli ĩigana.

22 Ningĩ nguo ĩyo ya gĩthũri ũmĩthondekere irengeeri ciogotheetwo ta mũhĩndo, ithondekeetwo na thahabu ĩrĩa therie mũno.

23 Ũcooke ũthondeke icũhĩ igĩrĩ cia thahabu ũciĩkĩre mĩthiainĩ ya na igũrũ ya nguo ĩyo ya gĩthũri,

24 na woherere irengeeri icio igĩrĩ cia thahabu icũhĩinĩ icio cierĩ.

25 Mĩthia yerĩ ya irengeeri icio ũmĩoherere tũkonyoinĩ twerĩ, ũmĩĩkĩre mĩkwainĩ ya kuoha ebodi ciandeinĩ, o mwena wa na mbere wayo.

26 Ningĩ ũthondeke icũhĩ igĩrĩ cia thahabu ũciĩkĩre koonainĩ cia mwena wa na kĩanda wa nguo ĩyo ya gĩthũri mũthiainĩ wa na thĩinĩ kũrigania na ebodi.

27 Ũcooke ũthondeke icũhĩ ingĩ igĩrĩ cia thahabu ũciĩkĩre mĩkwainĩ ĩyo yerĩ ya ebodi ĩyo, kĩanda wa icio ingĩ mwena wa na mbere wayo hakuhĩ na inyiitithanĩrio rĩayo, igũrũ wa harĩa mũcibi ũrĩa ũgemeetio wega wa ebodi ũrĩ.

28 Ũcooke woherere icũhĩ icio cia nguo ĩyo ya gĩthũri harĩ icũhĩ cia ebodi na kĩrengeeri kĩa rangi wa mburuu, nĩ geetha nguo ĩyo ya gĩthũri ĩikare igaigũrũ wa harĩa mũcibi wa ebodi ũrĩa ũgemeetio wega ũrĩ, nĩguo nguo ĩyo ya gĩthũri ndĩkaae gũkorwo ĩregereete.

29 “Rĩrĩa Harũni atoonya Handũ Harĩa Hatheru, arĩkoragwo eekĩrĩĩte nguo ĩyo ya gĩthũri ĩrĩ na marĩĩtwa ma mĩhĩrĩga ya andũ a Isiraeli, nĩ geetha niĩ MWATHANI ndirikanage andũ aakwa hĩndĩ ciothe.

30 Ningĩ nguoinĩ ĩyo ya gĩthũri wĩkĩre Urimu na Thumimu nĩguo ikoragwo irĩ gĩthũriinĩ kĩa Harũni rĩrĩa egũũka mbere yakwa. Hĩndĩ o yothe rĩrĩa egũũka mbere yakwa no mũhaka eekagĩre nguo ĩyo ya gĩthũri, nĩ geetha agatuĩrĩria andũ a Isiraeli wendi wakwa.

Nguo ingĩ cia Mũthĩnjĩri Ngai

31 “Nayo nguo ndaaya ya gwĩkĩrwo thĩ wa ebodi ĩthondekwo na guoya wa rangi wa mburuu.

32 Na ĩgĩe na irima rĩa gũtoonyeria mũtwe rĩtumĩrĩrwo gataamĩ gatirihĩĩtwo rĩtikaae gũtarũka.

33-34 Nguo ĩyo ndaaya ũmĩrigicĩrie mwena wa kĩanda mĩthiainĩ na tũcunjuura tũhaana ta matunda ma makongomanga tũthondekeetwo na guoya wa rangi wa mburuu, babũ, na mũtuune, na o gatagatĩ ga tũcunjuura twĩrĩ wĩkĩre njingiri cia thahabu.

35 Naake Harũni eekagĩre nguo ĩyo rĩrĩa egũtungata ta mũthĩnjĩri Ngai. Hĩndĩ ĩrĩa egũũka mbere yakwa thĩinĩ wa Handũ Harĩa Hatheru kana rĩrĩa e kuuma ho, njingiri icio nĩirĩiguĩkaga ikĩgamba, nĩguo ndagaakue.

36 “Ningĩ ũthondeke kĩraũni gĩa thahabu ĩrĩa therie mũno na ũkurure igũrũ wakĩo ciugo ici: ‘Wamũrĩirwo MWATHANI.’

37 Ũcooke ũkĩoherere mwenainĩ wa na mbere wa kĩremba kĩa Harũni na karengeeri ka rangi wa mburuu.

38 Naake Harũni agĩĩkĩrage thiithiinĩ wake, nĩ geetha niĩ MWATHANI njĩtĩkagĩre mĩhothi yothe ĩrĩa andũ a Isiraeli manyamũrĩra, o na angĩkorwo andũ no meeke mahĩtia makĩmĩhotha.

39 “Na rĩĩrĩ, ũtume nguo ĩkinyĩĩte maruinĩ ya Harũni na kĩremba gĩake na gataani ĩrĩa njega mũno, na mũcibi mwariĩ ũgemeetio wega mũno.

40 “O nao aariũ a Harũni ũmathondekere nguo ikinyĩĩte maruinĩ, mĩcibi mĩariĩ, o na tũkũbia, cia kũmaheithia gĩtĩĩo na kũmathakaria.

41 Na rĩĩrĩ, ũhumbe Harũni mũrũ wa maitũguo hamwe na aariũ aake nguo icio. Ũcooke ũmaitĩrĩrie maguta, ũmamũre ũmatherie, nĩguo mandungatagĩre ta athĩnjĩri Ngai.

42 Ningĩ ũmatumithĩrie thuruarĩ cia gataani cia kuuma njohero nginya cieroinĩ nĩ geetha matikaae kuonwo njaga ciao.

43 Naake Harũni na aariũ aake maciĩhumbage rĩrĩa rĩothe megũtoonya Hemainĩ yakwa, kana rĩrĩa megũkuhĩrĩria kĩgongoona gũtungata ta athĩnjĩri Ngai thĩinĩ wa Handũ Harĩa Hatheru, nĩ geetha matikaae kuonwo na mahĩtia, nao magĩkue. Watho ũcio ũtũũre ũrũmagĩrĩrwo nĩ Harũni o na njiarwa ciake.

Mataaro makoniĩ kwamũra Harũni na aariũ aake

1 “Na rĩĩrĩ, ũũ nĩguo ũgeeka Harũni na aariũ aake nĩguo ũmamũre maandungatagĩre ta athĩnjĩri Ngai: Ũkooya ndeegwa ĩmwe ĩtarĩ ngũrũ na ndũrũme igĩrĩ itarĩ kaũũgũ.

2 Ningĩ woe mĩgate ĩtarĩ mĩimbie, na tũkeeki tũtarĩ tũimbie tũkimanĩĩtio na maguta ma mĩtamaiyũ, o na tũmĩthuguiti tũtarĩ tũimbie tũhake maguta igũrũ, nayo yothe ĩgakorwo ĩthondekeetwo na mũtu mũhinyu wa ngano mwega mũno.

3 Ũgaacooka ũmĩĩkĩre gĩkabũinĩ ũndutĩre ũkĩndutĩra ndeegwa ĩyo na ndũrũme icio igĩrĩ.

4 “Nawe ũkaareehe Harũni na aariũ aake mũromoinĩ wa Hema ya gũtũnganwo, na ũkaameera methambe na maaĩ metherie.

5 Ũgaacooka ũhumbe Harũni nguo icio cia ũthĩnjĩri Nga: nguo ĩkinyĩĩte maruinĩ, nguo ĩrĩa ya gũĩkĩrwo thĩ wa ebodi, ebodi, nguo ya gĩthũri, o na mũcibi.

6 Na ũkaamuoha kĩremba mũtwe na woherere kĩrembainĩ kĩu kĩraũni kĩrĩa gĩtheru kĩandĩkĩĩtwo atĩrĩ, ‘Wamũrĩirwo MWATHANI.’

7 Ũcooke woe maguta ma kwamũrana ũmũitĩrĩrie mũtwe.

8 “O nao aariũ aake ũkaamareehe na ũmeekĩre nguo ikinyĩĩte maruinĩ,

9 ũmoohe mĩcibi mĩariĩ njohero ciao na ũmeekĩre tũkũbia mĩtwe. Ũguo nĩguo ũkaamũra Harũni na aariũ aake. O eene na njiarwa ciao magaatũũra maandungatagĩra ta athĩnjĩri Ngai nginya tene.

10 “Nayo ndeegwa ĩyo ũkaamĩreehe mbere ya Hema ya gũtũnganwo, wĩre Harũni na aariũ aake maigĩrĩre mooko maao mũtwe wayo.

11 Ũcooke ũthĩnjĩre ndeegwa ĩyo hau mbere yakwa mũromoinĩ wa Hema yakwa.

12 Ũcooke woe thakame ĩmwe yayo ũhake koona cia kĩgongoona na kĩara gĩaku, nayo thakame ĩyo ĩngĩ ũmĩite hau thĩ wa kĩgongoona.

13 Warĩĩkia gwĩka ũguo woe rwambũ ruothe, habaya, na higo cierĩ, nacio ciothe ũcicinĩre kĩgongoonainĩ.

14 No nyama cia ndeegwa ĩyo, rũũa, na mara ũcicinĩre nja ya kambĩ. Icio nacio igĩtuĩke igongoona rĩa meehia ma athĩnjĩri Ngai.

15 “Ningĩ woe ndũrũme ĩmwe, wĩre Harũni na aariũ aake maigĩrĩre mooko maao mũtwe wayo.

16 Ũmĩthĩnje, ũcooke woe thakame yayo ũmĩminjaminjĩrie mĩena yothe ĩna ya kĩgongoona.

17 Ũcooke ũtinangie ndũrũme ĩyo icunjĩ, ũthambie nyama ciayo cia nda na mathaagiro maayo, ũciigĩrĩre igũrũ wa mũtwe na icunjĩ icio ingĩ cia nyama.

18 Nayo ndũrũme ĩyo yothe ũmĩcinĩre kĩgongoonainĩ; ndũrũme ĩyo nĩ yo ĩrutĩirwo MWATHANI ya igongoona rĩa njino, na nĩ yo ya mũtararĩko ũrĩa ũkenagia MWATHANI, o na no yo kĩndũ kĩrĩa kĩrutĩirwo MWATHANI na ũndũ wa gũcinwo na mwaki.

19 “Ũcooke woe ndũrũme ya igongoona rĩa kwamũrana, wĩre Harũni na aariũ aake maigĩrĩre mooko maao mũtwe wayo.

20 Ũmĩthĩnje, woe thakame ĩmwe yayo ũmĩĩkĩre mũthiainĩ wa gũtũ kwa ũrĩo kwa Harũni na aariũ aake, o na ciarainĩ iria nene cia mooko maao ma ũrĩo, na ũmĩĩkĩre ciarainĩ iria nene cia magũrũ maao ma ũrĩo. Thakame ĩyo ĩngĩ ũmĩminjaminjĩrie kĩgongoona mĩena yothe.

21 Ũcooke woe thakame ĩmwe ya ĩrĩa ĩ kĩgongoonainĩ, o na maguta mamwe ma makwamũrana, ũciminjaminjĩrie Harũni na aariũ aake, o na ũciminjaminjĩrie nguo ciao. We mwene, aariũ aake, na nguo ciao magĩtuĩke nĩmaamũrwo.

22 “Ũcooke ũtinie maguta ma ndũrũme ĩyo, kĩmengemenge, rwambũ, habaya, higo cierĩ hamwe na maguta maacio, o na kĩero gĩa kũgũrũ kwa ũrĩo.

23 Kuuma gĩkabũinĩ kĩa mĩgate ĩrĩa ndutĩirwo, woe mũgate ũmwe ũkimanĩĩtio na maguta ma ndamaiyũ, mũgate ũmwe ũtakimanĩĩtio na maguta ma ndamaiyũ, na gakeeki gaceke.

24 Indo icio ciothe ũciigĩrĩre mookoinĩ ma Harũni na aariũ aake, ũmeere macinyamũrĩre ituĩke kĩheeo kĩa mwanya.

25 Ũcooke ũcioe kuuma mookoinĩ maao, ũcicinĩre kĩgongoonainĩ, igũrũ wa igongoona rĩu rĩa njino irĩ igongoona rĩrĩa ndutĩirwo. Mũtararĩko wa igongoona rĩu nĩũngenagia.

26 “Ningĩ woe gĩthũri kĩa ndũrũme ĩyo, ũnyamũrĩre ta kĩheeo kĩa mwanya, nakĩo gĩtuĩke rũgai rwaku.

27 “Rĩrĩa mũthĩnjĩri Ngai ekwamũrwo, gĩthũri na kĩero kĩa ndũrũme ĩrĩa ĩkũhũthĩrwo nĩ ũndũ wa kũmwamũrana nĩndĩrĩamũragĩrwo irĩ ta kĩheeo kĩa mwanya na igacooka ikaigĩrwo athĩnjĩri Ngai.

28 Nacio icunjĩ icio irĩtuĩkaga cia Harũni na aariũ aake, irĩ rũgai rũrĩa maagĩrĩirwo nĩkũheagwo nĩ ciana cia Isiraeli hingo ciothe. Icunjĩ icio irĩkoragwo irĩ kĩheeo gĩa athĩnjĩri Ngai kuuma magongoonainĩ maao ma thaayũ. Irĩkoragwo irutĩirwo Mwathani.

29 “Nacio nguo cia ũthĩnjĩri Ngai cia Harũni agaacitigĩra aariũ aake thuutha wa gũkua gwake nĩguo magaaciĩkĩraga magĩitĩrĩrio maguta makĩamũrwo.

30 Mũũriũ wake ũrĩa ũgaatuĩka mũthĩnjĩri Ngai ithenya rĩake agaaciĩhumbaga mĩthenya mũgwanja rĩrĩa egũtoonya gũtungata Handũ Harĩa Hatheru thĩinĩ wa Hema yakwa.

31 “Ningĩ woe ndũrũme ĩyo ya kwamũrana, ũtherũkĩrie nyama ciayo handũ hatheru.

32 Naake Harũni na aariũ aake marĩĩre nyama icio hamwe na mĩgate ĩrĩa ĩrĩ gĩkabũinĩ mũromoinĩ wa Hema ya gũtũnganwo.

33 Marĩe indo icio cia horohio ya meehia, o icio maamũrĩĩtwo nacio. Athĩnjĩri Ngai no o maagĩrĩirwo nĩkũrĩa indo ici amu nĩ nyamũre.

34 Gĩcunjĩ o na kĩmwe kĩa nyama cia kwamũrana kana kĩa mĩgate ĩyo kĩngĩgaatigara gĩkinyie rũũciinĩ gĩgaacinwo na mwaki; gĩtikaanarĩo amu nĩ gĩtheru.

35 “Maũndũ macio nĩ mo ũgeeka Harũni na aariũ aake, o ta ũrĩa ngwathĩĩte; nawe ũkaaniina mĩthenya mũgwanja ũkĩmaamũra.

36 O mũthenya no mũhaka ũkaarutaga ndeegwa ya igongoona rĩa meehia nĩ ũndũ wa horohio. Horohio ĩyo nĩgaatheria kĩgongoona. Nawe nĩũgaacooka ũgĩitĩrĩrie maguta ma mĩtamaiyũ nĩguo ũkĩamũre ũgĩtherie.

37 Maũndũ maya ũkaameeka o mũthenya mĩthenya mũgwanja. Nakĩo kĩgongoona kĩu nĩgĩgaagĩtuĩka gĩtheru biũ, na kĩndũ o gĩothe kĩrĩa gĩkaahuutia kĩgongoona kĩu gĩgaatuĩka gĩtheru.

Magongoona ma o mũthenya

38 “Na rĩĩrĩ, o mũthenya nĩũkaarutaga kĩgongoonainĩ tũtũrũme twĩrĩ twa mwaka ũmwe.

39 Gatũrũme kamwe ũgakaruta rũũciinĩ, nako karĩa kangĩ ũgakaruta hwaĩinĩ.

40 Na rĩrĩa ũkũruta gatũrũme kau ka mbere, ũgakarutanĩria na kiro ĩmwe ya mũtu wa ngano mũhinyu ũtukanĩĩtio na rita ĩmwe ya maguta ma mĩtamaiyũ matheru wega. Na ũgacitĩrĩria rita ĩmwe ya ndibei, ĩtuĩke ya igongoona.

41 Nako gatũrũme kau kangĩ ũgakaruta igongoona hwaĩinĩ, na ũgakarutanĩria na mũtu, maguta ma mĩtamaiyũ o na ndibei, o ta ũrĩa ũkũrutĩĩte rũũciinĩ, nacio indo icio igĩtuĩke nĩ niĩ MWATHANI, ndutĩirwo na ũndũ wa gũcinwo na mwaki. Mũtararĩko wacio nĩũngenagia.

42 Ngũtũũra ndutagĩrwo igongoona rĩu rĩa njino hau mũromoinĩ wa Hema ya gũtũnganwo. Hau nĩ ho ndĩrĩtũnganaga na inyuĩ na ngaaranĩria na inyuĩ.

43 Ĩĩ, hau no ho ndĩrĩtũnganaga na andũ a Isiraeli, na ũtheri wakwa ũrĩa ũrĩkengaga ho nĩũrĩtuaga handũ hau handũ hatheru.

44 Nĩngũtũma Hema na kĩgongoona ituĩke theru, na nĩngwamũra Harũni na aariũ aake mandungatagĩre ta athĩnjĩri Ngai.

45 Na niĩ nĩngaatũũrania na andũ a Isiraeli, na nduĩke Ngai wao.

46 Nao nĩmakaamenya atĩ nĩ niĩ MWATHANI Ngai wao ũrĩa wamarutire bũrũriinĩ wa Misiri nĩ geetha ndũũranagie nao. Nĩ niĩ MWATHANI Ngai wao.