Simoni mũrũ wa Oniasi
1 Simoni, ũrĩa warĩ Mũthĩnjĩri Ngai Ũrĩa Mũnene, mũrũ wa Oniasi,
o we warĩ mũtongoria wa arĩa maaciaranĩirwo naake,
na andũ aao nĩmeetĩĩaga nĩ ũndũ wake,
nĩ we warĩ wa mbere gũthondeka Hekaarũ rĩngĩ,
2 na gwaka mũthingi wa thingo igĩrĩ ndaaya,
iria ciarĩ cia kũgitĩra Hekaarũ.
3 Matukũinĩ maake iria rĩa maaĩ nĩrĩenjirwo rĩrĩa rĩarĩ inene o ta itangi.
4 Nĩeciiririe ũhoro wa kũgitĩra andũ aake matikaaniinwo,
naake agĩkĩirigĩra itũũra na thingo cia hinya
nĩguo rĩĩgitie rĩngĩthiũrũrũkĩrio nĩ mbũtũ.
5 Na kaĩ aarĩ na riiri mũnene rĩrĩa andũ maamũrigiicĩirie akiuma thĩinĩ wa Handũ Harĩa Hatheru Mũno-ĩ!
6 Aatariĩ ta njata ya Kĩwariĩ ĩgĩkenga matuinĩ,
na o ta mweri wĩ kĩmakia,
7 o ta riũa rĩkengeete igũrũ wa Hekaarũ ya Ũrĩa Ũrĩ Igũrũ Mũno,
o ta mũkũngambura uumĩrĩĩte matu marĩ matheru,
8 o ta mahũa mathaka thuutha wa mbura,
o ta itooka irĩ rũũĩinĩ,
o ta mĩtĩ ya mĩtarakwa ya Lebanoni hĩndĩ ya ũrugarĩ,
9 o ta ũbaani ũgĩakana kanyũngũinĩ ga gũcinĩra ũbaani,
o ta gĩkombe gĩa thahabu kĩgemeetio na tũhiga twa goro twa mĩthemba yothe
10 o ta mũtamaiyũ rĩrĩa ũciarĩĩte mũno,
na o ta mũkarakaba ũraihĩĩte ũkooneka ta ũhuutĩĩtie matu.
11 Rĩrĩa eekĩrire kanjũ yake ya riiri,
na akĩĩhumba nguo ciake cia goro cia ũnene,
agĩcooka akĩambata kĩgongoonainĩ gĩtheru-rĩ,
nĩatũmire nja ya Hekaarũ yoneke ĩ na riiri mũno.
12 O na rĩrĩa aamũkĩrire tũcunjĩ twa igongoona kuuma kũrĩ athĩnjĩri Ngai
arũũgamĩĩte hakuhĩ na kĩgongoona,
athiũrũrũkĩirio nĩ aariũ a ithe matariĩ ta thũmbĩ,
we aatariĩ ta mũtarakwa wa Lebanoni,
nao arĩa maamũthiũrũrũkĩirie maatariĩ ta mĩtĩ ya mĩkĩndũ.
13 Acio maarĩ aariũ a Harũni oothe mehumbĩĩte nguo ciao cia riiri
marũũgamĩĩte mbere ya andũ oothe a Isiraeli,
manyiitĩĩte indo iria irutĩirwo Mwathani na mooko maao.
14 Arĩĩkia kũruta igongoona kĩgongoonainĩ,
o na kũhaarĩria iheeo cia Ũrĩa Ũrĩ Igũrũ Mũno,
o we Ũrĩa Mwene Hinya Wothe,
15 nĩatambũrũkirie guoko akĩoya gĩkombe
agĩitanga ndibei gĩtinainĩ gĩa kĩgongoona,
mũtararĩko mwega wa gũkenia Ũrĩa Ũrĩ Igũrũ Mũno
o we mũthamaki wa andũ oothe.
16 Nao aariũ a Harũni nĩmaanĩrĩire,
na makĩhuuha tũrumbeeta twathondekeetwo na betha.
Nĩmaanegenire inegene inene mũno
atĩ nĩguo Ũrĩa Ũrĩ Igũrũ Mũno aigue.
17 Nao andũ oothe me hamwe makĩinamĩrĩra narua,
makĩhuutithia moothiũ maao thĩ mathaathaiye Mwathani wao,
Ũrĩa Mwene Hinya Wothe,
o we Ngai Ũrĩa Ũrĩ Igũrũ Mũno.
18 Nao aini makĩmũgooca na mĩgambo yao,
na makĩina rwĩmbo rwega mũno.
19 Nao andũ magĩthiĩ na mbere kũhooya Mwathani mũigua tha
Ũrĩa Ũrĩ Igũrũ Mũno,
o nginya rĩrĩa mũtaratara wa gũthaathaiya Mwathani warĩĩkire,
nao makĩrĩĩkia igongoona rĩake.
20 Naake Simoni akiuma kĩgongoonainĩ,
akĩoya mooko maake igũrũ rĩa andũ oothe a Isiraeli
arĩa moonganĩĩte akĩmaraathima,
21 nao magĩkĩinamĩrĩra rĩa keerĩ nĩguo mathaathaiye,
magĩkĩamũkĩra kĩraathimo kĩa Ũrĩa Ũrĩ Igũrũ Mũno.
Ihooya rĩa kũraathimana
22 Rĩu-rĩ, Ngai wa igũrũ na thĩ nĩakĩgoocwo,
ũrĩa wĩkĩĩte maũndũ manene kũndũ guothe,
o we ũrĩa ũtũreraga kuuma mũthenya ũrĩa twaciarwo na agagĩtũrora na tha.
23 Arogĩtũhe gĩkeno ngoroinĩ,
na agĩtwĩtĩkĩrie tũgĩe na thaayũ matukũinĩ maitũ thĩinĩ wa Isiraeli
o ta ũrĩa kwarĩ matukũinĩ ma tene.
24 Arotũhe tha ciake na atũhonokagie mahindainĩ marĩa tũrenda ũteithio.
Mabũrũri matatũ mamene
25 Nĩharĩ andũ a mabũrũri meerĩ meneete,
na angĩ a wa gatatũ o na mataagĩrĩire gwĩtwo andũ.
26 Nao nĩ andũ arĩa matũũraga kĩrĩmainĩ gĩa Seiru,
na Afilisiti na andũ arĩa akĩĩgu matũũraga Shekemu.
Ũũgĩ wa Jesũ mũrũ wa Siraki
27 Niĩ Jesũ mũrũ wa Siraki Eleazaru, wa kuuma Jerusalemu,
ndaandĩka ũũgĩ wa ngoro yakwa yothe thĩinĩ wa ibuku rĩĩrĩ
nĩguo he andũ arĩa angĩ mataaro o hamwe na ũũgĩ.
28 Kũraathimwo nĩ mũndũ ũrĩa wĩrutagĩra maũndũinĩ maya.
Na rĩĩrĩ, mũndũ ũrĩa ũmaigaga ngoroinĩ yake nĩagaatuĩka mũũgĩ.
29 Amu angĩmeeka, nĩarĩkoragwo arĩ na hinya maũndũinĩ moothe,
nĩ gũkorwo ũtheri wa Mwathani nĩguo njĩra yake.