Category: Siraki

Mĩnyamaarĩko ya ũtũũro wa mũndũ

1 Mũndũ o wothe nĩaheetwo wĩra mũingĩ mũno wa kũruta,

na mũndũ o wothe nĩakoragwo na mũrigo mũnene mũno kuuma gũciarwo

nginya mũthenya ũrĩa agacooka tĩĩriinĩ ũrĩa arĩ guo nyina witũ ithuothe.

2 Nĩakoragwo na meciiria mathĩĩnĩku mũno me na guoya;

akoragwo o agĩciiria ũhoro wa mũthenya ũrĩa agaakua.

3 Kuuma mũndũ ũrĩa ũikaragĩra gĩtĩ kĩa ũnene

nginya ũrĩa wĩhuragĩria rũkũngũ na mũhu nĩ ũndũ wa thĩĩna;

4 kuuma mũthamaki nginya mũndũ ũrĩa ũtarĩ kĩndũ;

5 ithuothe o mũndũ akoragwo na maraakara, na ũiru, na mathĩĩna,

na gwĩtigĩra gĩkuũ, na mang’ũrĩka, na kũhaarana.

O na mũndũ athiĩ toro ũtukũ,

toro ũkareehe maũndũ o macio na njĩra ingĩ.

6 Rĩrĩa akoma angĩkorwo nĩekuona toro,

akomakoma akaambĩrĩria gũthĩĩnio nĩ maũndũ ma gwĩciirĩria o ta atakomeete,

makamũthĩĩnia o ta mũndũ ũũrĩĩte kuuma mbaarainĩ.

7 Rĩrĩa akuhĩrĩria kũnyiitwo agookĩra amakĩĩte,

akoona atĩ kĩndũ kĩu aretigĩra gĩtirĩ ho.

8-9 Atĩrĩĩrĩ, gĩkuũ, mbaara gũũkanĩrĩra, kũũragana,

ng’aragu, mĩrimũ, na mũthiro nĩikooraga mũndũ o wothe na nyamũ,

(no mũndũ mwĩhia athĩĩnagio nĩ maũndũ macio maita mũgwanja gũkĩra acio angĩ.)

10 Maũndũ macio moothe moombirwo nĩ ũndũ wa andũ arĩa aaganu,

na no o maatũmire mũiyũro ũrĩa mũnene ũũke.

11 Kĩndũ o gĩothe kiumaga tĩĩriinĩ gĩcookaga o tĩĩriinĩ,

nakĩo kĩrĩa kiumaga maaĩinĩ gĩcookaga o maaĩinĩ.

Mũcaara wa meehia

12 Kĩndũ o gĩothe kĩonekanaga na njĩra ya ihaki,

kana na njĩra o yothe ĩtaagĩrĩire gĩtitũũraga,

no maciaro ma ũthingu nĩmatũũraga.

13 Ũtonga o wothe wonekanaga na njĩra ĩtaagĩrĩire

ũthereraga ũgathira, o ta kĩguũ thuutha wa mbura nene.

14 Mũndũ ũrĩ ũtaana nĩagaakenio,

no mũndũ mwĩhia nĩakaaniinwo biũ.

15 Ciana cia mũndũ ũtarĩ mũthingu itikaagĩa na ciana nyingĩ,

itariĩ o ta mũtĩ ũratũrĩkia ihiga na mũri.

16 Ithanjĩ rĩrĩa rĩkũraga maaĩinĩ kana hũgũrũrũinĩ cia rũũĩ rĩtuagwo mbere ya nyeki.

17 Kũiguanĩra tha gũtariĩ ta mũgũnda wa iraathimo,

na kũheana gũtũũraga tene na tene.

Ikeno ũtũũroinĩ wa mũndũ

18 Kwandĩkwo wĩra kana kwĩyandĩka cierĩ nĩ njega,

no kũgĩa na ũtonga nĩ kwega makĩria.

19 Kũgĩa ciana na gwaka itũũra nĩitũmaga mũndũ agĩe igweta,

no kũgĩa mũtumia ũtarĩ ũcuuke nĩ kwega makĩria.

20 Ndibei na rwĩmbo nĩikenagia ngoro ya mũndũ,

no kwenda ũũgĩ nĩ kwega makĩria.

21 Karumbeeta na kĩnanda nĩitũmaga rwĩmbo rwagĩre,

no mũgambo mwega nĩũcikĩrĩĩte.

22 Riitho rĩkenagio nĩ riiri na ũthaka,

no mũmera ũgĩkũra nĩũrĩkenagia makĩria.

23 Mũraata kana mũndũ ũrĩa mũikaranĩĩtie mũiguithanĩĩtie nĩ mwega,

no mũtumia wĩ na mũthuuri nĩ mwega makĩria.

24 Arĩa maciaranĩirwo na mũndũ, na arĩa mangĩteithĩrĩria mũndũ nĩ eega hĩndĩ ya thĩĩna,

no kũhe athĩĩni nĩgũkoragwo kũrĩ na ũteithio mũnene makĩria.

25 Thahabu na betha itũmaga mũndũ aigue aiganĩire,

no mataaro nĩ meega makĩria.

26 Ũtonga na hinya wa mwĩrĩ nĩitũmaga mũndũ etĩĩe,

no kũhe Mwathani gĩtĩĩo nĩgũcikĩrĩĩte cierĩ.

We nĩ ũteithio o wothe ũrĩa ũngĩkũbataria.

27 Kũhe Mwathani gĩtĩĩo gũtariĩ ta mũgũnda wa iraathimo,

kũhumbagĩra mũndũ gũkĩra ũgooci o wothe.

Kũhooya ũteithio

28 Mwana wakwa, ndũkaae gũtũũra wĩ mũhooi ũteithio,

nĩ kaba gũkua gũkĩra gũtuĩka mũhooi.

29 Mũndũ angĩtuĩka atĩ arĩheagwo irio nĩ mũndũ ũngĩ,

mũndũ ũcio ndatũũraga ũtũũro wake biũ,

nĩethũũkagia na ũndũ wa kwamũkĩra irio kuuma kũrĩ mũndũ ũngĩ,

no mũndũ mũũgĩ na ũrereetwo wega nĩemenyagĩrĩra ũhoroinĩ ũcio.

30 Mũndũ ũtaconokaga no atũme kũhooya kũiguĩke gwĩ kwega mũno,

no thĩinĩ wake ũndũ ũcio ũkoragwo ũhaana ta mwaki ũraakana.

Gĩkuũ

1 Atĩrĩĩrĩ, mũndũ ũrĩa ũiguaga aiganĩire na indo ciake,

na wĩ igweta na ũtarĩ na ũndũ wa gwĩtigĩra,

na ũkoragwo agĩkenio nĩ kĩrĩa araarĩa

kaĩ nĩaiguaga ruwo eciiria ũhoro waku, wee gĩkuũ-ĩ?

2 Wee gĩkuũ, itua rĩaku rĩamũkagĩrwo na gĩtĩĩo nĩ mũndũ mũthĩĩni ũtarĩ na hinya,

na mũndũ mũkũrũ ũnogeetio nĩ maũndũ moothe,

na mũndũ wa ngũĩ ũremeetwo nĩgũkirĩrĩria.

3 Ndũkaae gwĩtigĩra itua rĩa gĩkuũ;

ririkana arĩa maarĩ mbere yaku nĩmaakuire

na ũririkane arĩa megũũka thuutha waku no magaakua.

4 Rĩu nĩ itua rĩa Mwathani kũrĩ andũ oothe,

na ndũngĩhota kũrega wendi wa Ũrĩa Ũrĩ Igũrũ Mũno.

Mũndũ angĩikara mĩaka ikũmi, kana mĩaka igana rĩmwe, kana mĩaka ngiri ĩmwe,

gũtirĩ kĩũria gĩkoorio nĩ ũndũ wa ũguo kũrĩa akuũ mathiaga.

Ũndũ ũrĩa wagĩrĩire arĩa aaganu

5 Ciana cia andũ eehia, nĩ ũndũ wa kũrererwo kũndũ gũtarĩ ũhoro wa kũhe Ngai gĩtĩĩo,

nĩituĩkaga cia kũmena andũ.

6 Ciana icio nĩciũragwo nĩ igai rĩacio,

na njiarwa ciacio itũũraga gĩconokoinĩ.

7 Ciana icio nĩicookagĩrĩria aciari ũũru ũcio,

amu moonaga gĩconoko kĩu nĩ ũndũ wacio.

8 Kaĩ mwĩ na thĩĩna inyuĩ andũ arĩa aaganu,

o inyuĩ mwaregire watho wa Ngai Ũrĩa Ũrĩ Igũrũ Mũno-ĩ!

9 Rĩrĩa mwaciarirwo, mwaciarĩirwo kĩrumiinĩ,

na mwakua igai rĩanyu no kĩrumi.

10 Mwĩrĩ ũrĩa uumĩĩte tĩĩriinĩ ũcookaga o tĩĩriinĩ.

Kwoguo andũ arĩa aaganu moimaga kĩrumiinĩ makaniinwo.

11 Macakaya makoragwo marĩ ma o gũcakaĩra kĩimba,

no ngumo njega ndĩthiraga.

12 Geria kũgitĩra ngumo yaku,

amu nĩgũgũtũũria mĩaka mĩingĩ gũkĩra mũthiithũ wa ngiri cia thahabu.

13 Matukũ ma mũndũ ma gũikara wega nĩmatare,

no ngumo njega ĩtũũraga tene na tene.

Gwĩka ũrĩa kwagĩrĩire

14 Ciana ciakwa, rũmĩrĩraai mataaro maakwa, na nĩmũgũtũũra na thaayũ;

ũũgĩ mũhithe ndũrĩ bata, ũhaana ta ũtonga mũhithe.

15 Mũndũ ũrĩa ũhithaga ũrimũ wake,

nĩ mwega gũkĩra mũndũ ũrĩa ũhithaga ũũgĩ wake.

16 Tĩĩagaai ciugo ciakwa,

amu maũndũ ma gĩconoko matiagĩrĩire kwĩrwo atĩ nĩ meega,

na ti maũndũ moothe makoragwo matĩĩĩtwo nĩ andũ oothe.

17 Iguagaai mũconokeete mbere ya aciari aanyu nĩ ũndũ wa ũtharia;

kana mbere ya mũthamaki kana mũndũ mũnene nĩ ũndũ wa maheeni.

18 Iguagaai mũconokeete mbere ya mũciirithania nĩ ũndũ wa kuuna watho,

na mbere ya mũingĩ ũũnganĩĩte nĩ ũndũ wa meehia,

na mbere ya mũraataguo kana mũndũ mũceeraga naake nĩ ũndũ wa ciĩko itarĩ njagĩrĩru.

19 Iguagaai mũconokeete mbere ya andũ a kũrĩa mũikaraga nĩ ũndũ wa ũici;

iguagaai mũconokeete nĩ ũndũ wa kwaga kũhingia kĩrĩĩko,

na mũiguage mũconokeete nĩ ũndũ wa kwĩyenda irugainĩ,

na nĩ ũndũ wa kwaga kũheana mwahooywo.

20 Iguagaai mũconokeete nĩ ũndũ wa kwaga gũcookia ngeithi mwageithio,

na nĩ ũndũ wa kwĩrorera mũtumia wa ũmaraaya.

21 Iguagaai mũconokeete nĩ ũndũ wa kwaga gũthikĩrĩria ithaithana rĩa mũndũ wanyu,

na gũtuunya mũndũ ũrĩa ũngĩ kĩndũ gĩake,

na kwĩrorera mũtumia wa mũndũ ũrĩa ũngĩ.

22 Iguagaai mũconokeete nĩ ũndũ wa gũthaaka na ndungata ya mũndũ wa nja ya mũndũ ũrĩa ũngĩ.

(Mũtikaanakuhĩrĩrie ũrĩrĩ wayo!)

Iguagaai mũconokeete nĩ ũndũ wa kũruma araata aanyu makĩiguaga,

o na kũrumanĩra kĩrĩa mwaheana,

23 na kuumbũra hitho.

Mahinda macio nĩ mo mwagĩrĩirwo nĩgũconoka nĩ ũndũ wamo

na andũ oothe nĩmarĩmũheaga gĩtĩĩo.

Mwĩtĩĩo

1 Ndũkaareke gũthutũkania andũ gũtũme wĩhie,

no maũndũ maya ngũgweta ndũkaanaconoke nĩ ũndũ wamo:

2 Watho wa Ũrĩa Ũrĩ Igũrũ Mũno, na kĩrĩĩkanĩro gĩake,

gũtuĩra o na andũ arĩa matarĩ athingu na kĩhooto.

3 Kũiga ithabu rĩa mbeeca wĩ na mũndũ ũrĩa mũrarutithania wĩra kana ũrĩa wĩ rũgendoinĩ naake,

o na kũgayania igai.

4 Gũthima ũrĩa kwagĩrĩire,

5 o na kũgĩa na uumithio mũnyiinyi kana mũnene,

na gũthogorana na mũhũũri mbiacara,

na kũruta ciana ciaku mĩtugo kaingĩ,

na kũhũũra ngombo iria itarĩ njathĩki nginya igaita thakame.

6 Nĩ wega kũhingĩra indo na kũburi angĩkorwo ndũrehoka mũtumia waku

kana rĩrĩa kwĩ na andũ aingĩ.

7 Igaga ithabu rĩagĩrĩru rĩa gĩthimi

kana rĩa mbeeca wĩrainĩ o wothe ũrĩa ũrĩrutaga,

o na ũigage ithabu rĩega rĩa kĩrĩa wanengerana kana kĩrĩa wanengerwo.

8 Ndũkaiguage thoni gũtaara mũndũ mũkĩĩgu kana mũkingitaru,

kana mũndũ mũkũrũ mũmaraaya.

Weka ũguo nĩũrĩonanagia atĩ ũrereetwo wega,

na andũ nĩmarĩkũganaga nĩ ũndũ wa mĩtugo yaku.

Maithe na aarĩ aao

9 Mũndũ nĩoragwo nĩ toro tondũ wa mwarĩ no ndoigaga,

na gũthĩĩnĩka nĩ ũndũ wake nĩkũgiragia akome.

Mwarĩ e mwĩthĩ ageciiragia atĩ hiihi ahota kwaga kũhika,

na ahikĩĩte ageciiria hiihi ahota kũmenwo.

10 Na rĩrĩa e mũirĩĩtu gathirange ageciiria hiihi ahota gũkomwo naake akĩgĩe ihu rĩa riiko,

kana agĩe na mũthuuri acooke akorwo we ti mwĩhokeku,

kana hiihi akĩage ciana.

11 Rora mwarĩguo na kinyi angĩkorwo nĩ mwaganu,

amu ahota gũtũma ũtuĩke wa gũthekererwo nĩ thũ ciaku,

atũme ũhoro waku ũtuĩke nĩguo ũrĩaragio itũũrainĩ,

nawe ũgĩtuĩke wa kwaragĩrĩrwo nĩ andũ;

naake agĩtuĩke wagũgũconorithia kũrĩ andũ oothe.

12 Ndũkaanareke oonie arũme ũthaka wake,

kana atuĩke wagũkorwo ho atumia magĩcuukana.

13 Amu o ta ũrĩa memenyi ithũũkangagia nguo,

noguo mũtumia athũũkangagia mũtumia ũrĩa ũngĩ.

14 Nĩ kaba mũndũ mũrũme mwaganu gũkĩra mũtumia ũrĩa wĩkaga wega,

atumia nĩ o mareehage gĩconoko na kũimwo gĩtĩĩo.

Ũkumio wa Ngai maũndũinĩ marĩa tuonaga

15 Rĩu nĩngũkũririkania mawĩra ma Mwathani,

nĩnguuga ũrĩa nyoneete.

Ciugo cia Mwathani nĩcio ciareehire mawĩra maake moothe,

na indo ciothe iria ciombirwo nĩciathĩkagĩra uuge wake.

16 Riũa rĩaragĩra indo ciothe,

na indo ciothe nĩ ciyũirwo nĩ riiri wa Mwathani.

17 Mwathani ndahotithĩĩtie o na araika aake kũgĩa ũhoti

wa kũheana ũhoro wa wĩra wake wa magegania,

ũrĩa Mwathani Mwene Hinya Wothe arutĩĩte

nĩ geetha indo ciothe itũũre ciĩhandĩĩte riiriinĩ wake.

18 We nĩonaga iriainĩ kũrĩa kũriku mũno,

o na nĩonaga thĩinĩ wa ngoro ya mũndũ,

na nĩoĩ hitho ciacio cierĩ.

Amu Ũrĩa Ũrĩ Igũrũ Mũno nĩoĩ maũndũ moothe marĩa mangĩmenyeka,

na nĩataũkagĩrwo nĩ marũũri ma mahinda o moothe.

19 We nĩoĩ ũrĩa wothe kwaneekĩka na ũrĩa wothe gũgeekĩka,

na nĩaguũragia hitho cia maũndũ marĩa mahithe.

20 Gũtirĩ rĩciiria rĩmũhĩtũkaga,

na gũtirĩ kiugo o na kĩmwe ahithĩĩtwo.

21 Mũbango mwega wa thĩ nĩwonanagia ũrĩa ũũgĩ wake wĩ mũnene.

We ndarĩ aagarũrũka na ndakaagarũrũka.

Gũtirĩ ũndũ angĩongererwo na gũtirĩ ũndũ ũngĩrutarutwo kuuma harĩ we,

na ndabatairio nĩ mũndũ wa kũmũtaara.

22 Na kaĩ indo iria oombire nĩ thaka-ĩ!

Kaĩ nĩ ũndũ wa ũkengi gũciona-ĩ!

23 Indo ici ciothe itũũraga nginya tene na tene,

na ciothe o kĩndũ nĩkĩrĩ bata wakĩo.

24 Indo ciothe ikoragwo irĩ igĩrĩ igĩrĩ,

kĩmwe gĩgakorwo gĩ gĩakũringithanio na kĩrĩa kĩngĩ,

na gũtirĩ kĩndũ o na kĩmwe oombire gĩtarĩ gĩkinyanĩru.

25 O kĩndũ kĩrĩĩkagĩrĩria wega wa kĩndũ kĩngĩ.

Hiihi nĩkũrĩ mũndũ ũngĩiganwo nĩkuona riiri wake?

1 Na kaĩ matu marĩa mekũũrĩa igũrũ gũtheru nĩ mathaka-ĩ!

Kaĩ nĩ kũndũ gũthaka gũkĩoneka-ĩ!

2 Rĩrĩa riũa rĩoimĩra rĩkooneka, nĩrĩmuumbũraga o ũrĩa rĩrathiĩ.

Rĩo nĩ wĩra wa magegania wa Ũrĩa Ũrĩ Igũrũ Mũno.

3 Mũthenya gatagatĩ-rĩ, nĩrĩũmagia thĩ;

nũũ ũngĩkĩũmĩrĩria ũrugarĩ warĩo?

4 Mũndũ ũrĩa ũrutaga wĩra riiko arutaga wĩra kũndũ aracinwo nĩ ũrugarĩ,

no riũa rĩcinaga irĩma maita matatũ ma ũguo,

na rĩkairia andũ maitho nĩ ũndũ wa gũkenga kwarĩo.

5 Mwathani ũrĩa warĩũmbire nĩ mũnene,

na arĩatha rĩthiaga narua rĩgereire njĩra yarĩo.

6 O naguo mweri aũmbire ũtungatanagĩre ũtegũcererwo,

aũmbire ũrĩ wa kũmenyithania mahinda na wĩ rũũri rwa gũtũũra tene na tene.

7 Mweri nĩguo wonanagia mahinda ma thigũkũ,

ũtheri waguo waraga biũ ũgacooka ũkagĩa na mairia.

8 Matukũ marĩa mathondekeete mweri maheetwo rĩĩtwa rĩa mweri,

nĩ ũndũ wa magegania kũwona ũgĩthiĩ ũkĩnenehaga o mũthenya.

Nĩ rũũri rwa mbũtũ cia igũrũ,

ũkengeete kũũrĩa matuinĩ.

9 Riiri wa njata nĩguo ũthaka wa matuinĩ,

ikoragwo ikĩhenia kũũrĩa igũrũ kwa Mwathani.

10 Nĩciikaraga harĩa ciathĩĩtwo ciikare nĩ Ũrĩa Mũtheru,

na itihuurũkaga kũruta wĩra wacio.

11 Tacũũthĩrĩria mũkũngambura na ũkĩgooce ũrĩa waũmbire!

Kaĩ ũkengi waguo nĩũkoragwo wĩ mũthaka-ĩ!

12 Nĩũthiũrũkagĩria matuinĩ na ũkengi waguo.

Mooko ma Ũrĩa Ũrĩ Igũrũ Mũno makoragwo maũtambũrũkĩĩtie.

13 Aathana tharunji nĩĩitĩkaga,

na rũheni rũkahenũka rũkahingia itua rĩake.

14 Kwoguo makũmbĩ ma igũrũ nĩmahingũre,

namo matu marombũka ta nyoni.

15 Hinya wake nĩũcookanagĩrĩria matu hamwe,

nĩamaringithanagia gũkoira mbura ya mbembe.

16-17 Angĩaria marurumĩ nĩmathũngũthagia thĩ ĩkenyogonda nĩ ruwo,

irĩma nĩithũngũthagio nĩ hinya wake,

o rĩrĩa we eenda rũhuuho rwa kuuma mwena wa na kĩanda rũkahuruutana,

rũhuuho rũnene nĩrũũkaga na makũmbĩ ma huuho kuuma mwena wa na rũgongo.

Nĩahurunjaga tharunji ĩtariĩ ta nyoni ciũmbũkĩĩte iroreete na thĩ,

ĩkahaana ta ngigĩ iharũrũkĩĩte.

18 Mũndũ nĩagegaga nĩ ũndũ wa werũ wayo mũthaka,

o na nĩ ũndũ wa ũrĩa ĩraitĩka.

19 Nĩahurunjaga mbarabu thĩ ta cumbĩ,

nayo ĩgakĩheha ĩgatuĩka ihiga rĩa mĩigua rĩ na mĩtheece

20 Rũhuuho rũhehu rwa kuuma mwena wa na rũgongo rwahuruutana

mbarabu ĩkagĩa maaĩ igũrũ;

maaĩ marĩ handũ o hoothe mahumbagĩrwo nĩ mbarabu,

na ĩgagĩtuĩka ta arĩ kĩndũ kĩũmũ gĩa kũmagitĩra.

21 Nĩcinaga irĩma cia werũinĩ,

na ĩkahoohia nyeki ta ĩcinĩĩtwo nĩ mwaki.

22 No rĩĩrĩ, kĩheho nĩgĩtũmaga ĩringũke

na o ũrĩa kũraagĩa heho na ime ĩgathiĩ ĩkĩagĩraga.

23 Nĩahooreririe iria rĩrĩa rĩriku mũno na ũũgĩ wake,

na agĩkĩhanda icigĩrĩra kuo.

24 Andũ arĩa mageraga iriainĩ nĩmaheanaga ũhoro wa ũgwati warĩo,

na ithuĩ tũkamathikĩrĩria tũgegeete.

25 Amu iriainĩ nĩkũrĩ nyamũ itoĩo na cia magegania,

indo i muoyo cia mĩthemba mĩingĩ, na nyamũ nene mũno.

26 Nĩ ũndũ wake, ũrĩa atũmĩĩte nĩamenyaga njĩra,

na indo ciothe inyiitithanĩĩtio hamwe nĩ kiugo gĩake.

27 O na tũngĩaria maũndũ maingĩ atĩa, tũtingĩkinyia mũthia,

na moothe marĩa tũngĩaria nĩkuuga; “Mwathani nĩ we indo ciothe.”

28 Tũngĩruta kũ hinya wa kũmũgooca?

We nĩ mũnene kũrĩ indo ciothe iria oombire.

29 Mwathani nĩ wa kũmakania na nĩ mũnene mũno,

na nĩ wa magegania ciĩkoinĩ ciake.

30 Rĩrĩa ũkũgooca Mwathani mũtũũgĩrie o ũrĩa ũngĩhota,

amu nĩakĩrĩĩte ũgooci ũcio wothe,

na ndũkaanoge, amu ndũngĩmũgooca kũigana.

31 Nĩkũrĩ mũndũ ũrĩ wamuona nĩguo agĩtaarĩrie ũrĩa atariĩ?

Kana hiihi nĩkũrĩ mũndũ ũngĩmũgooca kũringana na ũrĩa atariĩ?

32 Maũndũ ma magegania manene gũkĩra maya no mahithe,

amu marĩa tũũĩ no manyiinyi.

33 Amu Mwathani nĩ we wombire indo ciothe,

na andũ arĩa athingu nĩamaheete ũũgĩ.

Ũgooci wa Mwathani maũndũinĩ marĩa mahĩtũku

1 Rekeei rĩu tũkumie andũ arĩa maarĩ igweta,

o na maithe maitũ ma mariika marĩa mahĩtũkĩĩte,

2 arĩa Mwathani aagaĩire ũgooci mũnene,

arĩa ũnene wake wonekire thĩinĩ wao kuuma kĩambĩrĩria.

3 Nĩkwarĩ amwe maathanire kũrĩa maathanaga,

na amwe maamenyekeete nĩ ũndũ wa hinya wao,

na amwe maarĩ ataarani oogĩ,

na amwe maarathaga moohoro.

4 Nĩkwarĩ andũ a bũrũri arĩa mataaro maao maatongoragia andũ,

na aathani maatuaga matua,

andũ athoomu maaragia ciugo cia ũũgĩ,

na arĩa maahũthagĩra thimo ndikĩru.

5 Nĩkwarĩ arĩa maatungaga nyĩmbo,

na angĩ maathondekaga marebeta,

6 na andũ me na ũtonga na hinya maatũũraga na thaayũ mĩciĩinĩ yao.

7 Acio oothe nĩmaaheirwo gĩtĩĩo hĩndĩ ya mariika maao,

na makĩgoocwo nĩ andũ a matukũ maao.

8 Nĩkũrĩ amwe maatigire ngumo njega,

na andũ nĩ makĩmakumagia.

9 Na nĩkũrĩ angĩ mataririkanagwo,

maariganĩire ta matarĩ maakorwo kuo,

maatuĩkire ta matarĩ maaciarwo,

na maariganĩire o hamwe na ciana ciao.

10 No rĩĩrĩ, nĩtũgũkumia andũ aya athingu,

arĩa ciĩko ciao cia ũthingu itarĩ ciariganĩra.

11 Ngumo yao ĩgaakinyĩra ciana ciao,

na ĩgĩtuĩke igai rĩa ciana ciao.

12 Njiarwa ciao nĩithiaga na mbere kũhingia kĩrĩĩkanĩro,

na cigũthiĩ na mbere o ro ũguo nĩ ũndũ wa ũrĩa maithe maacio meekire.

13 Njiarwa ciao igũthiĩ na mbere irũmanĩrĩire nginya tene na tene,

na ngumo yao ndĩgaathira.

14 Mĩĩrĩ yao yathikirwo ĩkĩhuurũka,

no marĩĩtwa maao matũũraga maririkanagwo.

15 Andũ mariumbũraga ũũgĩ wao,

nao andũ a Ngai nĩmarĩmagoocaga.

Enoku

16 Enoku nĩakenirie Mwathani, naake agĩkĩambatio igũrũ;

nĩatuĩkire kĩonereria gĩa kwĩrira kũrĩ njiarwa ciothe.

Noa

17 Noa nĩonekire e mwagĩrĩru na e mũthingu;

thuutha wa mũiyũro wa maaĩ mũndũ nĩagĩire kĩambĩrĩria kĩerũ kuuma harĩ we.

Kwoguo nĩgwatigarire andũ thuutha wa mũiyũro wa maaĩ.

18 Na rĩĩrĩ, Mwathani nĩathondekire kĩrĩĩkanĩro naake gĩa tene na tene,

akĩmwĩrĩra atĩ ndakaaniina andũ rĩngĩ na mũiyũro.

Aburahamu

19 Aburahamu nĩatuĩkire ithe mũnene wa ndũũrĩrĩ nyingĩ,

na gũtirĩ ũngĩ ũrĩ wagĩa na ngumo taake.

20 Nĩakĩhingirie watho wa Ũrĩa Ũrĩ Igũrũ Mũno

na agĩgĩthondeka kĩrĩĩkanĩro naake;

kĩrĩĩkanĩro kĩu nĩakĩonanirie na mwĩrĩ wake,

na rĩrĩa aageririo akĩoneka atĩ aarĩ mũthingu.

21 Kwoguo Mwathani nĩehĩtire akĩmwĩrĩra atĩ,

njiarwa ciake nĩigaatuĩka kĩraathimo gĩa thĩ,

ikaingĩha o ta rũkũngũ,

nĩikaaheeo gĩtĩĩo kũrĩ andũ arĩa angĩ oothe me thĩ,

na bũrũri wao ũkoima iriainĩ rĩmwe ũkinye rĩrĩa rĩngĩ;

ũkoima rũũĩ rwa Farati nginya mũthia wa thĩ.

Isaaka na Jakubu

22 O naake Isaaka nĩamũheire kĩrĩra o kĩu nĩ ũndũ wa ithe Aburahamu.

23 Na rĩĩrĩ, kĩraathimo kĩa andũ oothe o hamwe na kĩrĩĩkanĩro nĩacihingirie na Jakubu;

nĩamũnengerire kĩraathimo,

na akĩmũnengera igai rĩake;

aamũnengerire bũrũri wake,

akĩũgaya maita ikũmi na meerĩ, o mũhĩrĩga ũkĩgĩa na gĩcunjĩ kĩaguo.

Musa

1 Kuuma harĩ njiarwa cia Jakubu

Mwathani nĩareehire mũndũ mũigua tha,

ũrĩa wetĩkĩrĩkire nĩ andũ oothe,

na akĩendwo nĩ Ngai o hamwe na andũ,

naake nĩ we Musa, na kũmũririkana gũkoragwo arĩ kĩraathimo.

2 Mwathani nĩamũheire ũkumio ũigana ta wa araika,

na agĩtũma thũ ciake imwĩtigĩre.

3 Aaria thĩinĩ wa Misiri moorirũ nĩmaathirire,

Mwathani nĩamũgoocithirie athamaki marĩ ho;

nĩamũheire mawatho ma andũ aake,

na akĩmuonia riiri wake ũkengeete.

4 Mwathani nĩamũthuurire kuuma kũrĩ andũ oothe,

na akĩmwamũra tondũ wa kwĩhokeka na kwĩnyiihia.

5 Nĩarekire aigue mũgambo wake,

na agĩkĩmũtongoria agĩthiĩ ndumainĩ ndumanu,

naake akĩmũnengera maathani meerekanĩire,

na nĩ mo mawatho ma muoyo na ma ũũgĩ,

nĩguo Musa arutage Aisiraeli ũhoro wa kĩrĩĩkanĩro

na wa itua rĩa Mwathani.

Harũni

6 Na rĩĩrĩ, Mwathani nĩatũũgĩririe Harũni ũrĩa maaciaranĩirwo na Musa,

mũndũ mũthingu o ta Musa

wa kuuma mũhĩrĩga wa Lawi.

7 Nĩathondekire kĩrĩĩkanĩro naake gĩa gũtũũra tene na tene,

na akĩmũtua mũthĩnjĩri Ngai wa andũ a Mwathani,

o na akĩmwĩkĩra kanjũ ya riiri.

8 Nĩamũhumbire riiri mũkinyanĩru biũ,

na akĩmũhe hinya na ũndũ wa kũmũhe marũũri ma wathani,

na nĩmo: thuruarĩ ya ndigi cia gataani, kanjũ ndaaya, na ebodi.

9 Magũrũ ma kanjũ ĩyo maathiũrũrũkĩirio tũcunjuura tũhaana ta matunda ma makongomanga,

na njingiri nyingĩ cia thahabu.

Njingiri icio ciarĩ cia kũgambaga rĩrĩa arathiĩ

ikaiguĩkaga ikĩgamba thĩinĩ wa Hekaarũ

irĩ ciakũririkania andũ aake ũhoro wa Mwathani.

10 O na Mwathani nĩaheire Harũni kanjũ ndaathime,

ĩgemeetio na ndigi cia rangi ũtariĩ ta wa thahabu,

na wa mburuu, na wa babũ.

Na gako ga gĩthũri ke na Urimu na Thumimu,

11 na gĩkũnja kĩa ndigi cia rangi mũtuune

ciogotheetwo nĩ mũndũ mũũhĩgĩrĩru wĩrainĩ ũcio,

na tũhiga twa goro twandĩkĩĩtwo marĩĩtwa,

twĩkĩrĩĩtwo thahabu igũrũ nĩ mũndũ mũũhĩgĩrĩru ũhoroinĩ wa mahiga,

tũtumĩrĩirwo gakoinĩ ga gĩthũri

tũrĩ twa kũririkania Mwathani mĩhĩrĩga ĩrĩa ikũmi na ĩĩrĩ ya andũ a Isiraeli.

12 O na nĩamũheire kĩremba kĩohereirwo ithaga rĩa thahabu

rĩandĩkĩĩtwo ciugo ici, “Wamũrĩirwo Mwathani.”

Kĩarĩ gĩthondeke wega mũno nĩ mũndũ mũũhĩgĩrĩru wĩrainĩ ũcio,

na warĩ ũndũ wa gĩtĩĩo mũno gũkĩĩhumba.

13 Mariika ma mbere ya Harũni gũtiarĩ indo ta icio thaka ũguo,

na gũtirĩ mũndũ ũngĩ wanaciĩkĩra tiga o we Harũni na njiarwa ciake.

14 Nĩmaacinagĩra Mwathani magongoona maita meerĩ o mũthenya tene na tene.

15 Musa nĩamũrire Harũni, na akĩmũitĩrĩria maguta maamũre ma kwamũrana.

Kĩu kĩarĩ kĩrĩĩkanĩro gĩake o hamwe na njiarwa ciake

gĩa gũtũũra tene na tene matungatagĩra Ngai ta athĩnjĩri Ngai,

na maraathimaga andũ thĩinĩ wa rĩĩtwa rĩa Mwathani.

16 Nĩamũthuurire kuuma kũrĩ andũ oothe maarĩ muoyo arutagĩre Mwathani igongoona,

na amũcinagĩre ũbaani, mũtararĩko mwega wa kũririkania Mwathani andũ aake,

na arutage igongoona nĩ ũndũ wa meehia ma andũ.

17 Nĩamwĩhokeire ũnene wa gũtua maũndũ,

na wa kũrutaga Aisiraeli Watho.

18 Hĩndĩ ĩmwe rĩrĩa andũ a Isiraeli maarĩ werũinĩ andũ amwe a na nja nĩ maiguĩrĩire Musa ũiru,

nao makĩmũthondekera mũbango mũũru me na maraakara na mang’ũrĩka.

Andũ acio maarĩ, Dathani, Abiramu, na Koora na arũmĩrĩri aao.

19 Mwathani nĩonire ũrĩa meekaga na ndakenire,

nao magĩkĩniinwo nĩ mang’ũrĩka ma maraakara maake.

Nĩaringire kĩama, akĩreehithia mwaki kuuma igũrũ akĩmacina oothe.

20 Mwathani nĩongereire Harũni riiri, akĩmũhe gĩtĩĩo kĩa mwanya;

nĩamũheire maciaro ma mbere matuĩke nĩ mo irio cia kũigana athĩnjĩri Ngai.

21 Amu maarĩaga magongoona marĩa marutĩirwo Mwathani,

naake Mwathani akĩhe Harũni na njiarwa ciake magongoona macio.

22 No rĩĩrĩ, bũrũriinĩ ũrĩa Mwathani aaheire andũ a Isiraeli, Harũni ndaarĩ na igai kuo;

ndaarĩ na gĩcunjĩ thĩinĩ waguo,

amu Mwathani we mwene nĩ we warĩ gĩcunjĩ gĩake na igai rĩake.

Finehasi

23 Ũhoroinĩ wa kĩyo gĩa kwĩrutĩra Mwathani-rĩ,

Finehasi mũrũ wa Eleazaru nĩ we wa gatatũ.

Rĩrĩa andũ oothe mookĩrĩire Mwathani,

we nĩarũũgamire na ũcamba oomĩrĩirie,

agĩkĩhoroheria andũ a Isiraeli.

24 Kwoguo Mwathani nĩathondekire kĩrĩĩkanĩro gĩa thaayũ naake

atĩ we hamwe na andũ aake nĩ o marĩroraga kĩgongoona

na atĩ Mũthĩnjĩri Ngai Ũrĩa Mũnene arĩumaga harĩ we na njiarwa ciake tene na tene.

25 Kĩrĩĩkanĩro kĩrĩa Mwathani aarĩĩkanĩire na Daudi mũrũ wa Jesii gĩtiahaanaga kĩu,

tondũ ũthamaki woimaga kũrĩ ithe ũgathiĩ kũrĩ mũũriũ,

no ũthĩnjĩri Ngai woimaga kũrĩ Harũni ũgathiĩ kũrĩ njiarwa ciake ciothe.

26 Mwathani ũrĩa ũkũhumbĩĩte thũmbĩ ya riiri arogoocwo!

Mwathani arokũhe ũũgĩ wa ngoro ũhotage gũtuĩra andũ aake na kĩhooto,

nĩ geetha ũhootani wao na ũnene wanyu itũũre nginya tene.

Joshua

1 JoshuaMũrũ wa Nuni aarĩ njamba ĩ hinya mbaarainĩ,

na Musa aakua nĩ we wacookire handũ haake ũhoroinĩ wa ũrathi.

We nĩahingirie ũrĩa rĩĩtwa rĩake rĩataũrwo riugĩĩte,

amu nĩahonokirie andũ athuure a Ngai.

Nĩahootire thũ iria ciamookĩrĩire, na njĩra ĩyo agĩtũma Aisiraeli meyonere igai rĩao.

2 Na kaĩ warĩ ũndũ wa riiri rĩrĩa oire mooko maake na igũrũ

na akĩoya rũhiũ rwake rwa njora magĩũkĩrĩra andũ a matũũra-ĩ!

3 Gũtirĩ mũndũ ũngĩamwĩtiiririe,

amu aarũaga mbaara ya Mwathani.

4 We nĩarũũgamirie riũa,

mathaa ma mĩthenya ĩĩrĩ magĩkorwo arĩ mũthenya ũmwe.

5 Rĩrĩa thũ ciamũhatĩrĩirie kuuma mĩena yothe-rĩ,

nĩahoire Ũrĩa Ũrĩ Igũrũ Mũno, Ũrĩa Ũmwe Wĩ Hinya,

6 naake Mwathani ũcio mũnene akĩmũcookeria mahooya maake

na mbura ya mbembe yarĩ nene mũno.

Mwathani nĩoirĩirie thũ mbura ĩyo ya mbembe

na agĩciniinĩra mwanyainĩ wa Bethi Horoni,

nĩ geetha andũ a ndũũrĩrĩ mamenye ũrĩa Joshua aarĩ hinya

amu we aarũaga ta mũrũmĩrĩri wĩrutĩire Mwathani.

Kalebu

7 Atĩrĩĩrĩ, Joshua na Kalebu mũrũ wa Jefune maarĩ andũ aathĩki hĩndĩ ya Musa,

na nĩmaang’eng’anire na mũingĩ makĩgirĩrĩria andũ kwĩhia,

na makĩmagiria gũteta.

8 Kuuma harĩ andũ ngiri magana matandatũ (600) arĩa moimĩĩte Misiri,

acio eerĩ no o maahonokire magĩĩtĩkĩrio gũtoonya bũrũri mwega na mũnoru.

9 Mwathani nĩaheire Kalebu hinya,

na o na akũra aarĩ o naguo,

naake nĩagĩthiire bũrũriinĩ wa irĩma akĩũtunyanĩra njiarwa ciake.

10 Kwoguo njiarwa ciothe cia Isiraeli ikĩona atĩ nĩ wega kũrũmĩrĩra Mwathani.

Atiirĩrĩri bũrũri

11 Tũgacooka tũgooka harĩ atiirĩrĩri bũrũri, o mũndũ akagĩa ngumo riita rĩake.

Acio matiahoire mĩhianano,

na matiareganire na Mwathani.

Kũririkanwo kwao kũrotuĩka kĩraathimo!

12 Andũ acio tũraririkana marĩĩtwa maao marotũũrio nĩ njiarwa ciao.

Samũeli

13 Samũeli nĩendeetwo nĩ Mwathani,

aarĩ mũnabii wake, na nĩ we wambĩrĩirie ũhoro wa ũthamaki,

na nĩaitĩrĩirie athamaki a andũ aao maguta.

14 Nĩatuĩrĩire andũ na watho wa Mwathani,

na Mwathani nĩarangagĩra andũ a Isiraeli.

15 Nĩ ũndũ wa ũthingu wake nĩonekire atĩ nĩ mũnabii,

na nĩ ũndũ wa ciugo ciake andũ makĩmũtua mũrathi mwĩhokeku.

16 Rĩrĩa thũ ciake ciamũhatĩrĩirie kuuma mĩena yothe,

nĩakaĩire Mwathani Mwene Hinya,

na akĩmũrutĩra kagondu igongoona.

17 Mwathani nĩaririe arĩ igũrũ,

na mũgambo wake ũkĩiguĩka na mũrurumo mũnene mũno.

18 Na nĩanangire atongoria a andũ a Turo,

o hamwe na aathani oothe a Afilisiti.

19 Mbere ya Samũeli gũkua,

nĩetire andũ meekĩre ũira mbere ya Mwathani,

o na mbere ya arĩa maitĩrĩirio maguta,

moige kana wee nĩarĩ akuua kĩndũ kĩa mũndũ o na angĩkorwo nĩ iraatũ,

na gũtirĩ mũndũ wamwĩrire atĩ arĩ akuua.

20 Na o na akua,

nĩarathire akĩĩra mũthamaki Saũlũ ũrĩa agaakua.

Nĩaririe e mbĩĩrĩrainĩ akĩratha,

nĩguo athengie waganu wa andũ aao.

Nathani

1 Thuutha wake Nathani nĩ we wacookire,

naake agĩgĩtuĩka mũnabii mahindainĩ ma mũthamaki Daudi.

Daudi

2 O ta ũrĩa maguta mathuuragwo kuuma harĩ igongoona rĩa thaayũ,

noguo Daudi aathuurirwo kuuma kũrĩ Aisiraeli.

3 Nĩathaakire na mĩrũũthi ta arĩ tũũri twa mbũri,

na agĩthaaka na nduba ta arĩ tũgondu.

4 E mũndũ mwĩthĩ nĩoragire mũndũ warĩ mũnene mũno wetagwo Goliathũ

nĩguo ahonokie andũ aao.

Eekĩrire ihiga kĩgũthainĩ gĩake,

agĩcooka agĩthima, akĩmũgũtha, akĩmũniina mwĩtĩĩo wake.

5 Nĩguo amũũrage aahoire Mwathani Ũrĩa Ũrĩ Igũrũ Mũno,

naake agĩkĩheeo hinya wa kũũraga njamba ĩyo ya ita,

nĩguo ndũũrĩrĩ imenye hinya wa andũ aake.

6 Andũ nĩmaamũheire gĩtĩĩo nĩ ũndũ wa kũũraga andũ ngiri nyingĩ,

na rĩrĩa aigĩrĩirwo thũmbĩ ya ũthamaki andũ nĩmaamũkumirie

nĩ ũndũ wa gũkorwo athuurĩĩtwo nĩ Mwathani.

7 Nĩaniinire thũ ciake ciothe,

na akĩhehenja Afilisiti biũ, makĩaga hinya nginyagia o na ũũmũũthĩ.

8 Maũndũinĩ moothe marĩa eekaga nĩacookagĩria Ũrĩa Mũtheru ngaatho,

nĩagoocaga Ũrĩa Ũrĩ Igũrũ Mũno.

Nĩendeete ũrĩa wamũũmbire

na nĩamũinagĩra nyĩmbo cia kũmũgooca na ngoro yake yothe.

9 Nĩatwaraga aini hakuhĩ na kĩgongoona,

nĩguo maina rwĩmbo rũkaiguĩka rũmatĩĩte wega mũno.

10 Nĩabangire mahinda ma thigũkũ thĩinĩ wa mwaka,

na agĩtũma igĩe na riiri;

rĩrĩa maagoocaga rĩĩtwa itheru rĩa Mwathani thĩinĩ wa Hekaarũ

gwatindaga gũgĩkumio Mwathani mũthenya wothe.

11 Mwathani nĩamuoheire meehia maake,

na agĩtũũgĩria hinya wake nginya tene na tene;

nĩathondekire kĩrĩĩkanĩro naake atĩ,

we hamwe na njiarwa ciake megũtũũra maathaga Aisiraeli maikarĩire gĩtĩ kĩa riiri.

Solomoni

12 Thuutha wake mũũrũwe nĩathanire;

we aarĩ mũndũ mũũgĩ,

na nĩathanire wega nĩ ũndũ ithe nĩamũthondekeire njĩra.

13 Mahinda marĩa Solomoni aathanire kwarĩ na thaayũ,

naake Ngai nĩamũheire thaayũ mĩhakainĩ yothe nĩ geetha amwakĩre Hekaarũ,

na kĩgongoona kĩrĩa kĩarĩ gĩa gũtũũra tene na tene.

14 Na kaĩ Solomoni wĩ mwĩthĩ warĩ mũũgĩ-ĩ!

Waiyũrĩĩtwo nĩ ũũgĩ o ta ũrĩa rũũĩ rũiyũraga hĩndĩ ya mbura.

15 Ũhoro waku mwega waiyũrĩĩte kũndũ guothe,

ndaĩ ciaku na thimo ciamenyeetwo kũndũ guothe.

16 Wamenyekeete kũndũ guothe,

na andũ nĩmaakwendeete nĩ ũndũ waku kwenda thaayũ.

17 Andũ a ndũũrĩrĩ nyingĩ nĩmaagegeetio nĩ nyĩmbo na thimo,

na ndeto cia ngerekano na mĩario ya ũũgĩ.

18 Thĩinĩ wa rĩĩtwa rĩa Mwathani Ngai,

o we ũrĩa wĩtagwo Ngai wa Aisiraeli-rĩ,

nĩwonganirie thahabu ta arĩ kĩgera kĩa ibaaba ũrongania,

o na ũkĩũngania betha ta arĩ kĩgera kĩa bũrũbũrũ ũrongania.

19 No rĩĩrĩ, thuti yaku ya atumia nĩ yo yatũmire ũhooteke.

20 Wee nĩwathũũkangirie ngumo yaku,

o na ũgĩthũũkangĩria njiarwa ciaku.

Nĩwatũmire ciana ciaku iherithio nĩ ũndũ wa ũrimũ ũcio waku,

ũrĩa watũmire igĩe na kĩeha kĩnene mũno.

21 Ũthamaki nĩwatũkanire keerĩ nĩ ũndũ wa ũrimũ waku,

na rũũrĩrĩ rũkararia rũkiuma harĩ Efiraimu.

22 No rĩĩrĩ, Mwathani ndarĩ hingo agaatiga kũiguanĩra tha

kana atũme kĩndũ o na kĩmwe kĩa iria oombire kĩũre.

Ndarĩ hingo akaaniina njiarwa cia Daudi ũrĩa aathuurĩĩte na eendeete.

Kwoguo nĩ ũndũ wa Aisiraeli agĩkĩrekereria andũ a nyũmba ya Daudi matũũre.

Rehoboamu na Jeroboamu

23 Solomoni nĩakuire,

naake agĩtigĩra mwana wake ũmwe wathani.

Mwana ũcio eetagwo Rehoboamu

na aarĩ mũndũ mũkĩĩgu mũno.

Mũtaratara wake wa gwathana nĩwarutithirie njũkanĩrĩro.

O na nĩkwarĩ Jeroboamu mũrũ wa Nebati,

ũrĩa watũmire Aisiraeli meehie,

na akĩonereria Aefiraimu njĩra ya meehia.

24 Meehia maao nĩmaakĩrĩrĩirie kũingĩha,

o nginya makĩmaruta bũrũriinĩ wao,

25 amu nĩmeekire mawaganu ma mĩthemba yothe

o nginya Mwathani akĩĩrĩhĩria harĩ o.

Elija

1 Thuutha wa ũguo nĩ mũnabii Elija wokire atariĩ ta mwaki,

na ciugo ciake ciakengaga ta gĩcinga.

2 Nĩareehithirie ng’aragu kũrĩ andũ,

na nĩ ũndũ wa kĩyo gĩake agĩtũma andũ mathiĩ makĩnyiihaga.

3 Nĩagiririe mbura yure na ũndũ wa kiugo kĩa Ngai,

o na agĩikũrũkia mwaki thĩ maita matatũ.

4 Elija, kaĩ ciama ciaku ciarĩ cia magegania-ĩ!

Gũtirĩ mũndũ ũngĩ ũngĩĩtĩĩa nĩ ũndũ wa ciĩko ta icio.

5 Wee-rĩ, thĩinĩ wa rĩĩtwa rĩa Ũrĩa Ũrĩ Igũrũ Mũno nĩwariũkirie mũndũ ũkuĩte.

6 Wee nĩwatũmire athamaki na andũ maarĩ igweta marũare o na makue.

7 Kĩrĩmainĩ gĩa Sinai nĩwaiguire Mwathani agĩgũkũũma,

o na ũkĩigua ũrĩa eehĩtĩĩte atĩ nĩekũherithia thũ ciake.

8 Wee nĩwaitĩrĩirie mũthamaki maguta ma gũkũrĩhĩria,

o na mũnabii wa gũgaacooka handũ haaku.

9 Wee nĩwambatirio na igũrũ nĩ rũhuuho rũnene,

ũkuuĩĩtwo nĩ ngaari ya mbarathi ĩguucĩĩtio nĩ mbarathi ĩtariĩ ta mwaki.

10 Maandĩko moigĩĩte atĩ wee nĩwehaarĩirie kũhooreria mang’ũrĩka ma Ngai matanatuĩka maraakara,

na ũtũme maithe meendane na ciana ciao,

na ũcookie mĩhĩrĩga ya andũ a Isiraeli.

11 Kũraathimwo nĩ arĩa maakuonire na arĩa maakuire me na wendani,

amu o na ithuĩ nĩtũgaatũũra.

Elisha

12 Elija nĩ we wahumbĩrirwo nĩ rũhuuho rũnene

Elisha naake akĩiyũrwo nĩ roho wake.

Rĩrĩa rĩothe Elisha aarĩ muoyo ndetigĩrire mũthamaki o na ũmwe,

na gũtirĩ o na ũmwe watũmire eeke kwenda gwake.

13 Gũtirĩ ũndũ wamũritũhagĩra mũno,

na o na akua mwĩrĩ wake nĩwaringire kĩama.

14 E muoyo nĩaringaga ciama,

na agĩkua nĩekire maũndũ ma magegania.

15 No o na gwekĩka ũguo andũ matieririre,

na matiatiganire na meehia maao.

Nĩmaagĩtahirwo makĩrutwo bũrũri wao makĩhurunjwo thĩ yothe,

no andũ anyiinyi maatigarire,

no o nao maathagwo nĩ andũ a kuuma nyũmba ya Daudi.

16 Amwe aao nĩmeekire maũndũ ma gũkenia Mwathani,

no angĩ magĩthiĩ na mbere na ciĩko ciao cia meehia.

Hezekia

17 Hezekia nĩairigĩire itũũra rĩake

na akĩreehe maaĩ itũũrainĩ gatagatĩ.

Nĩatũrĩkanirie muungu ihigainĩ na mĩcuuma,

na agĩaka matangi ma maaĩ.

18 Hĩndĩ ĩrĩa aathanaga Senakeribu nĩokĩrĩire itũũra rĩake

na agĩtũma njamba ya ita kuuma Lakishi.

Nĩagĩũkĩrĩire itũũra rĩa Jerusalemu,

na agĩgĩĩtĩĩa mũno nĩ ũndũ wa waganu wake.

19 Nao andũ nĩmeetigĩrire mũno na magĩkĩinaina nĩ guoya;

maagĩire na ruwo ta rwa mũtumia ũrarũmwo.

20 No rĩĩrĩ, nĩmaakaĩire Mwathani wa tha,

na magĩkĩmũtambũrũkĩria mooko maao,

naake Ũcio Mũtheru akĩamũkĩra mahooya maao o narua e igũrũ,

na akĩmahonokia na njĩra ya mũnabii Isaia.

21 Mwathani nĩakĩanangire hema cia Asiria,

na mũraika wake akĩmaniina.

Isaia

22 Gwekĩkire ũguo nĩ tondũ Hezekia nĩekaga maũndũ ma gũkenia Mwathani,

na nĩarũmagĩrĩra agwatĩirie mĩthiĩre ya ithe Daudi

ĩrĩa aathĩĩtwo nĩ mũnabii Isaia

ũrĩa cioneki ciake ciarĩ nene na cia kwĩhokwo.

23 Matukũinĩ maake riũa nĩrĩacookire na thuutha,

na agĩkĩongerera matukũ ma mũthamaki.

24 Roho wake ũrĩa warĩ na hinya nĩwonaga maũndũ marĩa mageekĩka thuuthainĩ,

na nĩakĩũmĩrĩirie arĩa maacakayaga thĩinĩ wa Zayuni.

25 Nĩaguũranĩirie ũrĩa gũkooneka matukũinĩ ma mũthia,

o na maũndũ marĩa mahithe mataneekĩka.

Josia

1 Kũririkana Josia no ta gũcina ũbaani ũthondekeetwo nĩ mũndũ mũũhĩgĩrĩru wĩrainĩ ũcio;

Harĩ andũ oothe kũmũririkana kwĩ mũrĩo o ta ũũkĩ.

Kũhaana o ta rwĩmbo rũrĩa rũinagwo irugainĩ rĩrĩ na ndibei.

2 We nĩekire ũrĩa kwagĩrĩire akĩgarũra andũ,

na akĩeheria mĩhianano ya waganu.

3 We nĩathĩkĩire Mwathani kũna,

na matukũinĩ ma andũ arĩa aaganu nĩanyiitire ũhoro wa ũthingu mbaru.

Jeremia

4 Athamaki oothe tiga Daudi, Hezekia na Josia nĩmeehirie mũno

tondũ nĩmaatiganĩirie watho wa Ũrĩa Ũrĩ Igũrũ Mũno,

nao athamaki a Juda magĩkinya mũthia.

5 Amu hinya wao nĩmaũheire andũ angĩ,

na gĩtĩĩo kĩao magĩkĩnengerana kũrĩ ageni,

6 arĩa maacinire itũũra itheru.

Magĩgĩtũma njĩra ciarĩo ikorwo itarĩ andũ

o ta ũrĩa Jeremia aarathĩĩte.

7 Jeremia nĩekirwo ciĩko njũru

o na gũtuĩka aaraathimĩĩtwo gũgaatuĩka mũnabii kuuma arĩ o ndainĩ ya nyina,

wa kũmunya na kũharagania na kwananga,

na o na wa gwaka na kũhanda.

Ezekieli

8 Ezekieli nĩ we wonire kĩoneki kĩa riiri wa Ngai,

kĩrĩa Ngai aamuonirie aikarĩire gĩtĩ kĩa ũthamaki ngaariinĩ ya ciũmbe iria irĩ muoyo.

9 Amu Mwathani nĩaririkanire thũ ciake akĩreehe mbura nene,

nao arĩa njĩra ciao ciarũngĩrĩirie akĩmeeka wega.

Anabii arĩa ikũmi na eerĩ

10 Mahĩndĩ ma anabii arĩa ikũmi na eerĩ maroriũka kuuma mbĩĩrĩrainĩ ciao,

amu nĩmoomĩrĩirie andũ a Isiraeli,

magĩkĩmahonokia na kĩĩrĩgĩrĩro kĩa ma.

Zerubabeli na Joshua

11 Zerubabeli angĩgaathĩrĩrio atĩa?

We aahaanaga ta gĩcũhĩ kĩrĩ na rĩĩtwa gĩ guoko kwa ũrĩo.

12 Ũguo noguo Joshua mũrũ wa Jehozadaku aatariĩ.

Matukũinĩ maao nĩmaakĩire Mwathani Hekaarũ theru rĩngĩ ya gũtũũra nginya tene na tene.

Nehemia

13 O nakuo kũririkanwo kwa Nehemia nĩ ũndũ mũnene.

nĩatwakĩire thingo cia Jerusalemu iria ciamomokeete

na agĩĩkĩra ihingo na mĩcuuma,

na agĩtũthondekera nyũmba ciitũ iria cianangĩĩtwo.

Maithe ma tene ma Aisiraeli

14 Gũtirĩ mũndũ ũhaana Enoku ũrĩ wakorwo thĩ,

amu we aambatirio igũrũ kuuma thĩ.

15 O na gũtirĩ mũndũ wanaciarwo ũhaana Josefu,

o na mahĩndĩ maake nĩmaamenyereirwo.

16 Shemu na Shethi nĩmaheetwo gĩtĩĩo mũno,

no Adamu aheetwo gĩtĩĩo gũkĩra ciũmbe ciothe.