Category: Nehemia

GŨTAARĨRIA

Ibuku rĩa Nehemia rĩahota kũgayanio icunjĩ inya ta ũũ (1) Nehemia gũcooka Jerusalemu atũmĩĩtwo nĩ mũthamaki wa Perisia agaathe bũrũri wa Juda. (2) Gwakwo rĩngĩ gwa thingo cia Jerusalemu. (3) Ezira gũthooma watho wa Ngai na kinyi, na andũ kuumbũra meehia maao. (4) Mawĩra marĩa mangĩ ma bata Nehemia aarutire ta barũũthi wa Juda.

Ũndũ ũrĩa wa bata wonanĩĩtio thĩinĩ wa ibuku rĩĩrĩ nĩ rũgano rwa ũrĩa Nehemia we mwene aatũũrire ehokeete Ngai na ũrĩa aahooyaga Ngai kaingĩ.

Maũndũ marĩa marĩ ibukuinĩ rĩĩrĩ

Nehemia gũcooka Jerusalemu 1.1–2.20

Thingo cia Jerusalemu gwakwo rĩngĩ 3.1–7.73

Watho wa Ngai gũthoomwo na kwerũhia gwa Kĩrĩĩkanĩro 8.1–10.39

Maũndũ mangĩ ma bata marĩa Nehemia eekire 11.1–13.31

1 Maya nĩ mo maũndũ marĩa Nehemia mũrũ wa Hekalia eekire.

Nehemia gũcaaĩra Jerusalemu

Atĩrĩĩrĩ, mweri wa Kisilevu, mwaka wa mĩrongo ĩĩrĩ wa hĩndĩ ĩrĩa Aritashashita aarĩ mũthamaki wa Perisia, niĩ Nehemia, ndaikaire o kũu Susa mũciĩ ũrĩa mũnene.

2 Hĩndĩ ĩyo Hanani ũmwe wa aariũ a baaba agĩũka me na andũ moimĩĩte Juda, makinya ngĩmahooya ũhoro ũkoniĩ Jerusalemu, o na wa Ayahudi arĩa maatigarĩĩte arĩa angĩ maatahwo magĩtwarwo Babilonia.

3 Nao makĩnjĩĩra atĩ Ayahudi arĩa maatigarĩĩte kũu bũrũriinĩ maarĩ na mathĩĩna maingĩ mũno na atĩ nĩmaconoragwo mũno. Ningĩ makĩnjĩĩra atĩ rũthingo rwa Jerusalemu rwatũũraga rũrĩ rũmomoku, o nacio ihingo itiathondekeetwo rĩngĩ kuuma ciahĩa.

4 Na rĩrĩa ndaiguire ũguo ngĩikara thĩ, ngĩrĩra mũno.

Ngĩgĩikara ndĩthikĩire mĩthenya mĩingĩ na ndĩhingĩĩte kũrĩa irio. Ngĩhooya Ngai ngiuga atĩrĩ,

5 “MWATHANI Ngai wa igũrũ, Wee wĩ mũnene, na nĩtũgũtĩĩĩte. Wee MWATHANI nĩũhingagĩria kĩrĩĩkanĩro gĩaku arĩa makwendeete na arĩa mahingagia ũrĩa wathanĩĩte.

6 Ndagũthaitha MWATHANI, ũndore na ũigue mahooya maakwa maya ndĩrahooya ũtukũ na mũthenya nĩ ũndũ wa ndungata ciaku, o andũ aaku a Isiraeli. Nĩndĩroimbũra atĩ ithuĩ andũ a Isiraeli nĩtwĩhĩĩtie. Ti itherũ niĩ na maithe maitũ nĩtwĩhĩĩtie.

7 Nĩtũgwĩkĩĩte maũndũ mooru mũno, na tũtiĩkĩĩte ũrĩa watwathire. Nĩtwagĩĩte kũhingia mawatho maaku marĩa waheire Musa ndungata yaku.

8 Ririkana ũrĩa wothe werire Musa ndungata ĩyo yaku, rĩrĩa wamwĩrire atĩrĩ, ‘Andũ aya a Isiraeli, mũngĩkaagarara watho wakwa-rĩ, nĩngaamũhurunja ndũũrĩrĩinĩ iria ingĩ.

9 No rĩĩrĩ, mũngĩkaanjookerera, na mwĩkage ũrĩa wothe ndĩmwathĩĩte, hĩndĩ ĩyo nĩngaamũcookia o handũ harĩa thuurĩĩte ha kũhooyagĩrwo o na angĩkorwo mũgaakorwo mũhurunjĩĩtwo ituri ciothe cia thĩ.’

10 “Na rĩu MWATHANI, andũ acio nĩ ndungata ciaku, o na andũ aaku. Nĩwe wamahonokirie na ũhoti waku mũnene o na hinya waku.

11 Rĩu thikĩrĩria mahooya maakwa o na mahooya ma ndungata ciaku ciothe iria ciendeete gũkũhe gĩtĩĩo. Ndeithia hootane ũũmũũthĩ, na ũtũme mũthamaki anjiguĩre tha.”

Na rĩĩrĩ, matukũinĩ macio ndaarĩ mũtwarĩri mũthamaki gĩa kũnyua.

Nehemia gũthiĩ Jerusalemu

1 Na rĩĩrĩ, thuutha wa mĩeri ĩna, hĩndĩ ĩmwe mũthamaki Aritashashita arĩ meethainĩ akĩrĩa, ngĩoya ndibei ngĩmũtwarĩra. Na rĩĩrĩ, mũthamaki ndakoreetwo ooneete ndĩ na kĩeha ta ũguo mbere ĩyo.

2 Nĩ ũndũ ũcio akĩnjũũria atĩrĩ, “Kaĩ wĩ na kĩeha ũguo nĩkĩ, Nehemia? Na tondũ ndũkĩrĩ mũrũaru-rĩ, no mũhaka gũkorwo kwĩ na ũndũ ũragũthĩĩnia.”

Hĩndĩ ĩyo ngĩkĩmaka mũno

3 ngĩkĩmũcookeria atĩrĩ, “Mwathi wakwa mũthamaki, ũrotũũra tene na tene. Kaĩ ingĩkĩaga kũigua kĩeha nĩkĩ kuona atĩ itũũra, o kũndũ kũrĩa mbĩĩrĩra cia aabaaba irĩ, nĩ gũkiru ihooru, o nacio ihingo ciarĩo nĩcianangĩĩtwo nĩ mwaki?”

4 Naake mũthamaki agĩkĩnjũũria atĩrĩ, “Nĩ atĩa ũkwenda?” Hĩndĩ o ro ĩyo ngĩkĩhooya Ngai wa igũrũ,

5 ngĩcooka ngĩcookeria mũthamaki atĩrĩ, “Wee mwathi wakwa mũthamaki, ngũgũthaitha angĩkorwo nĩũkuona kwagĩrĩire, ũnjĩtĩkĩrie thiĩ bũrũriinĩ wa Juda, o itũũrainĩ kũrĩa mbĩĩrĩra cia aabaaba irĩ, nĩguo ngarĩake rĩngĩ.”

6 Hĩndĩ ĩyo mũthamaki, aikaire hamwe na mũtumia wake, akĩnjĩtĩkĩria thiĩ. Naake akĩnjũũria ngũthiĩ gũikara ihinda rĩigana atĩa na ngaacooka rĩ. Na niĩ ngĩmwĩra rĩrĩa ngaacooka.

7 Hĩndĩ ĩyo ngĩkĩmũthaitha ahe marũa ma gũtwarĩra abarũũthi arĩa maarĩ mwena wa ithũĩro wa rũũĩ rwa Farati, nĩguo manjĩtĩkĩrie hĩtũkĩre bũrũriinĩ wao ngĩthiĩ Juda.

8 O na ningĩ ngĩũria heeo marũa ma gũtwarĩra Asafu, ũrĩa wamenyagĩrĩra mũtitũ wa mũthamaki. Marũa macio maarĩ ma kũmũũria ahe mĩtĩ ya gwaka ihingo cia nyũmba ĩrĩa yakĩĩtwo na hinya ya kũgitĩra Hekaarũ. O na ningĩ ahe mĩtĩ ya gwakwa rũthingo rwa itũũra rĩu, o na nyũmba yakwa ya gũikara. Naake mũthamaki akĩĩhe kĩrĩa gĩothe ndeendaga nĩ gũkorwo Ngai aarĩ hamwe na niĩ.

9 Naake mũthamaki akĩĩhe anene amwe a thigari o na thigari imwe cia mbarathi nĩguo matwarane na niĩ. Ngĩkiumagara ngĩthiĩ na mwena wa ithũĩro wa rũũĩ rwa Farati. Ndakinya kuo ngĩhe abarũũthi marũa marĩa ndaheetwo nĩ mũthamaki.

10 No rĩĩrĩ, hĩndĩ ĩrĩa Sanibalati wa kuuma itũũra rĩa Bethi Horoni, na Tobia, mũtongoria woimĩĩte rũgongo rwa Aamoni, maiguire atĩ kwĩ na mũndũ wokĩĩte gũcaria njĩra ya kũguna andũ a Isiraeli, makĩraakara mũno.

11 Tondũ ũcio ngĩgĩthiĩ Jerusalemu na ngĩikara kũu mĩthenya ĩtatũ

12 itekwĩra mũndũ ũrĩa MWATHANI aanguũrĩirie gwaka Jerusalemu. Ngĩcooka ngĩũkĩra ũtukũ gatagatĩ, na ngĩoya andũ amwe mataarĩ aingĩ tũkiuma nja. Tũtiarĩ na nyamũ ingĩ tiga ndigiri ĩyo ndahaicĩĩte.

13 Kũrĩ o ũtukũ ũguo, ngiumĩra kĩhingo gĩa Gĩtuamba kĩrĩa kĩarĩ na mwena wa ithũĩro ngĩerekera na mwena wa kĩanda thiĩrĩire gĩthimainĩ kĩrĩa gĩĩtagwo gĩthima kĩa Ndamaathia ngĩkinya kĩhingo gĩa Kĩarainĩ. Hĩndĩ ĩyo nĩkũbaara ndabaaraga thingo cia Jerusalemu iria ciatharũkĩĩte na mĩrango ĩrĩa yahĩĩte nĩ mwaki.

14 Ningĩ ngĩthiĩ ndoreete na mwena wa irathĩro wa itũũra rĩu, ngĩkĩambata na rũgongo o nginya kĩhingoinĩ gĩa Gĩthima na kariainĩ ka mũthamaki. No rĩĩrĩ, hatiarĩ handũ ha kũhĩtũkĩria ndigiri ĩrĩa yanguuĩĩte.

15 Hĩndĩ ĩyo ngĩkĩambata kũrĩ o ũtukũ ũguo, ngĩbaaraga rũthingo rwa na mwena wa gĩtuamba gĩa Kidironi. Thuutha wa ũguo, ngĩhũndũka na njĩra ĩrĩa ndookĩire ngĩtoonyera kĩhingoinĩ gĩa Gĩtuamba ngĩcooka itũũrainĩ.

16 Nao atongoria aakuo matiigana kũmenya kũrĩa ndathiĩte o na ũrĩa ndeekĩĩte. Nginyagia hĩndĩ ĩyo gũtirĩ ũndũ ndamenyithĩĩtie Ayahudi, athĩnjĩri Ngai, anene, atongoria, o na kana mũndũ o wothe ũrĩa ũngĩateithĩrĩirie wĩrainĩ ũcio.

17 Hĩndĩ ĩyo ngĩmeera atĩrĩ, “Tabaaraai mũone ũndũ ũyũ twĩ naguo ũrĩa wĩ mũũru; itũũra rĩa Jerusalemu nĩ maganjo matheri, na ihingo ciarĩo icinĩĩtwo na mwaki! Ũkĩraai twake rũthingo rũũrũ rwa Jerusalemu rĩngĩ, nĩ geetha tũtikaanacooke kũnyararwo.”

18 Ngĩcooka ngĩmamenyithia ũrĩa Ngai aandeithĩĩtie, o na ũrĩa mũthamaki aanjĩrĩĩte.

Nao makĩnjookeria atĩrĩ, “Nĩtũgĩũkĩreei twambĩrĩrie kũrĩaka rĩngĩ.” Tondũ ũcio magĩkĩĩhaarĩria kwambĩrĩria wĩra ũcio.

19 Na rĩĩrĩ, hĩndĩ ĩrĩa Sanibalati, Tobia, na Mũarabu wetagwo Geshemu maiguire ũrĩa twehaarĩirie gwĩka magĩtũthekerera makiuga atĩrĩ, “Ĩ ũndũ ũyũ mũrenda gwĩka nĩ ũrĩkũ? Kaĩ mũrenda gũũkĩrĩra mũthamaki?”

20 Na niĩ ngĩmacookeria ngĩmeera atĩrĩ, “Ngai wa igũrũ nĩ we ũgũtũhe ũhootani. Ithuĩ-rĩ, tũrĩ ndungata ciake, na nĩtũkwambĩrĩria gwaka. No rĩĩrĩ, inyuĩ mũtirĩ a ho ũndũinĩ ũyũ, o na gũtirĩ kĩndũ mũngĩgaya ho, o na mũtirĩ rũrĩra gũũkũ Jerusalemu.”

Rũthingo rwa Jerusalemu gwakwo rĩngĩ

1 Na rĩĩrĩ, Eliashibu Mũthĩnjĩri Ngai Ũrĩa Mũnene, me na athĩnjĩri Ngai arĩa angĩ, magĩaka rĩngĩ kĩhingo kĩrĩa gĩetagwo kĩhingo kĩa Ng’ondu. Magĩcooka magĩkĩamũra, na magĩgĩĩkĩra mĩrango. Ningĩ makĩamũra rũthingo o nginya mũnaarainĩ wa Igana o na nginyagia mũnaarainĩ wa Hananeli.

2 Nao andũ a Jeriko magĩaka rĩngĩ rũthingo marutĩĩtie harĩa athĩnjĩri Ngai maakinyĩĩtie.

Naake Zakuru mũrũ wa Imuri agĩaka rũthingo rũu arutĩĩtie harĩa andũ a Jeriko maakinyirie.

3 Nayo mbarĩ ya Hasenaa ĩgĩaka rĩngĩ kĩhingo kĩrĩa gĩetagwo kĩhingo gĩa Thamaki. Ningĩ makĩrũũgamia buremu na magĩgĩĩkĩra mĩrango. Magĩcooka magĩkĩoha wega na cuuma na magĩgĩĩkĩra mĩgĩĩko ya cuuma ya kũhingaga nayo.

4 Naake Meremothu mũrũ wa Uria na mũcũkũrũ wa Hakozu, agĩthiĩ na mbere gwaka arutĩĩtie kĩhingoinĩ kĩu.

Naake Meshulamu mũrũ wa Berekia na mũcũkũrũ wa Meshezabeli, agĩthiĩ na mbere gwaka arutĩĩtie harĩa Meremothu aakinyirie.

Naake Zadoku mũrũ wa Baana agĩthiĩ na mbere arutĩĩtie harĩa Meshulamu akinyirie.

5 Nao andũ a Tekoa magĩthiĩ na mbere magĩaka marutĩĩtie harĩa Zadoku aakinyirie. No rĩĩrĩ, andũ arĩa a bata a itũũra rĩu matiigana kũruta wĩra ũrĩa maaheetwo nĩ anene aao.

6 Naake Joiada mũrũ wa Pasea me na Meshulamu mũrũ wa Besodeia magĩaka rĩngĩ kĩhingo kĩrĩa gĩetagwo kĩhingo gĩa Jeshana.O na ningĩ makĩrũũgamia buremu na magĩgĩĩkĩra mĩrango. Magĩcooka magĩkĩoha wega na cuuma na magĩgĩĩkĩra mĩgĩĩko ya cuuma ya kũhingaga.

7 Naake Melatia wa kuuma Gibeoni, Jadani wa kuuma Meronothi, marĩ na andũ a Gibeoni na Mizipa, magĩaka marutĩĩtie harĩa Joiada na Meshulamu maakinyirie. Acio maakire itĩĩna magĩkinyia o hakuhĩ na mũciĩ wa barũũthi ũrĩa wathanaga mwena wa ithũĩro wa rũũĩ rwa Farati.

8 Naake Uzieli mũrũ wa Harihaia, mũturi wa thahabu, agĩaka arutĩĩtie hau.

Naake Hanania ũrĩa warĩ mũthondeki wa maguta manungi wega agĩaka arutĩĩtie harĩa Uzieli aakinyirie. Agĩaka itĩĩna rĩake nginya harĩa heetagwo Rũthingo Rwariĩ.

9 Naake Refaia mũrũ wa Huri, ũrĩa wathaga nuthu ya rũgongo rwa Jerusalemu, agĩaka arutĩĩtie harĩa Hanania aakinyirie.

10 Naake Jedaia mũrũ wa Harumafu agĩaka arutĩĩtie harĩa Refaia aakinyirie. Handũ hau haarĩ hakuhĩ na nyũmba yake.

Naake Hatushu mũrũ wa Hashabuneia agĩaka arutĩĩtie harĩa Jedaia aakinyirie.

11 Naake Malikija mũrũ wa Harimu me na Hashubu mũrũ wa Pahathu Moabi magĩaka marutĩĩtie harĩa Hatushu aakinyirie. O na ningĩ magĩaka cimuni.

12 Naake Shalumu mũrũ wa Haloheshu, na nĩ we wathanaga nuthu ĩrĩa ĩngĩ ya rũgongo rwa Jerusalemu, agĩaka arutĩĩtie harĩa Malikija na Hashubu maakinyirie. (Ũcio aateithĩrĩirio gwaka nĩ airĩĩtu aake.)

13 Naake Hanuni na andũ arĩa maatũũraga itũũra rĩa Zanoa magĩaka rĩngĩ kĩhingo kĩrĩa gĩetagwo kĩhingo gĩa Gĩtuamba. Magĩcooka magĩgĩĩkĩra mĩrango na magĩkĩoha wega na cuuma, na magĩgĩĩkĩra mĩgĩĩko ya cuuma ya kũhingaga. Ningĩ magĩcooka magĩcookereria rũthingo rũu itĩĩna rĩa mita magana mana na mĩrongo ĩna makĩrũkinyia handũ harĩa heetagwo kĩhingo gĩa Kĩarainĩ.

14 Naake Malikija mũrũ wa Rekabu, na nĩ we wathanaga rũgongo rwa Bethi Hakeremu, agĩaka rĩngĩ kĩhingo kĩrĩa gĩetagwo kĩhingo gĩa Kĩarainĩ. Agĩcooka agĩgĩĩkĩra mĩrango na agĩkĩoha wega na cuuma na agĩgĩĩkĩra mĩgĩĩko ya kũhingaga.

15 Naake Shalumu mũrũ wa Kolihoze, na nĩ we wathanaga rũgongo rwa Mizipa, agĩaka rĩngĩ kĩhingo kĩrĩa gĩetagwo kĩhingo gĩa Gĩthima. Agĩcooka agĩkĩgita wega, agĩgĩĩkĩra mĩrango, agĩkĩoha wega cuuma na agĩgĩĩkĩra mĩgĩĩko ya kũhingaga. Ningĩ no we wakire rũthingo rwa karia karĩa geetagwo karia ga Shela rũrĩa rwariganĩĩtie na mũgũnda wa mũthamaki. Aarwakire nginya ngathĩinĩ iria ciikũrũkĩĩte ciumĩĩte itũũra rĩa Daudi.

16 Naake Nehemia mũrũ wa Azibuku, na nĩ we wathaga nuthu ya rũgongo rwa Bethizuri, agĩaka arutĩĩtie harĩa Shalumu aakinyirie. Aakire arutĩĩtie kũng’ethanĩra na mbĩĩrĩra ya Daudi akĩhĩtũka karia karĩa keenjeetwo, agĩkinyia kambĩinĩ ya thigari.

Alawii arĩa maateithĩrĩirie gwaka rĩngĩ rũthingo

17 Na rĩĩrĩ, Alawii aya marũmĩrĩire magĩtwarithia na mbere gwaka rĩngĩ rũthingo rũu kuuma kambĩinĩ ya thigari.

Rehumu mũrũ wa Bani agĩaka arutĩĩtie harĩa Nehemia aakinyirie. Naake Hashabia, na nĩ we wathaga nuthu ya rũgongo rwa Keila, agĩaka arutĩĩtie harĩa Rehumu aakinyirie. Aahaakire handũinĩ ha andũ a rũgongo rũu aathaga.

18 Naake Bawai mũrũ wa Henadadi, na nĩ we wathaga nuthu ĩyo ĩngĩ ya rũgongo rwa Keila, agĩaka arutĩĩtie harĩa Hashabia aakinyirie.

19 Naake Ezeri mũrũ wa Jeshua, na nĩ we wathanaga Mizipa, agĩaka arutĩĩtie harĩa Bawai aakinyirie. Hau haarĩ na mwena wa mbere wa harĩa haigagwo indo cia mbaara. Naake akĩhaaka o nginya koonainĩ ya rũthingo.

20 Naake Baruku mũrũ wa Zabai agĩaka arutĩĩtie harĩa Ezeri aakinyirie, akĩhaaka o nginya mũromoinĩ wa nyũmba ya Eliashibu Mũthĩnjĩri Ngai Ũrĩa Mũnene.

21 Naake Meremothu mũrũ wa Uria na mũcũkũrũ wa Hakozu, agĩaka arutĩĩtie harĩa Baruku aakinyirie, agĩkinyia o mũthiainĩ wa nyũmba ya Eliashibu.

Athĩnjĩri Ngai arĩa maateithĩrĩirie gwaka rĩngĩ rũthingo

22 Na rĩĩrĩ, athĩnjĩri Ngai aya marũmĩrĩire magĩtwarithia na mbere gwaka rĩngĩ rũthingo rũu.

Athĩnjĩri Ngai arĩa maatũũraga hakuhĩ na Jerusalemu magĩaka marutĩĩtie harĩa Meremothu aakinyirie.

23 Naake Benjamini na Hashubu magĩaka marutĩĩtie harĩa athĩnjĩri Ngai acio maakinyirie. Hau maakire haarĩ na mwena wa na mbere wa nyũmba ciao.

Naake Azaria, mũrũ wa Maaseia na mũcũkũrũ wa Anania, agĩaka arutĩĩtie harĩa Benjamini na Hashubu maakinyirie. Hau aakire haarĩ na mwena wa mbere wa nyũmba yake.

24 Naake Binui mũrũ wa Henadadi agĩaka arutĩĩtie harĩa Azaria aakinyirie. Aahaakire arutĩĩtie nyũmbainĩ ya Azaria akĩhakinyia koonainĩ ya rũthingo.

25-26 Naake Palali mũrũ wa Uzai agĩaka arutĩĩtie harĩa Binui aakinyirie. Aahaakire aharutĩĩtie kuuma koonainĩ ya rũthingo rwa na harĩa mũnaara wa na rũgongo wa nyũmba ya mũthamaki warĩ, hakuhĩ na nja ya arangĩri.

Naake Pedaia mũrũ wa Paroshu agĩaka kuuma harĩa Palali aakinyirie. Aahaakire akĩhakinyia handũ haarĩ mwena wa irathĩro hakuhĩ na kĩhingo kĩrĩa gĩetagwo kĩhingo kĩa Maaĩ na harĩa mũnaara ũrĩa wahũthagĩrwo kũrangĩra Hekaarũ warĩ. (Hau haarĩ kamwenainĩ ga itũũra rĩrĩa rĩetagwo Ofeli, na hau nĩ ho aruti wĩra a Hekaarũ maikaraga.)

Andũ arĩa angĩ maateithĩrĩirie gwaka rĩngĩ rũthingo

27 Nao andũ a kuuma Tekoa magĩaka marutĩĩtie harĩa Pedaia aakinyirie. Maahaakire kuuma kamwenainĩ karĩa kaariganĩĩtie na mũnaara ũrĩa mũnene wahũthagĩrwo kũrangĩra Hekaarũ. Maahaakire makĩhakinyia hakuhĩ na rũthingo rũrĩa rwarĩ hakuhĩ na Ofeli. Hau haarĩ haao ha keerĩ gwakwa.

28 Nao athĩnjĩri Ngai amwe magĩaka marutĩĩtie harĩa andũ acio a Tekoa maakinyirie. Maarutirie kĩhingoinĩ kĩa Mbarathi maroreetie na rũgongo. O mũndũ aakaga o mbere ya nyũmba yake.

29 Naake Zadoku mũrũ wa Imeri agĩaka arutĩĩtie harĩa athĩnjĩri Ngai maakinyirie naho haarĩ mbere ya nyũmba yake.

Naake Shemaia mũrũ wa Shekania agĩaka arutĩĩtie harĩa Zadoku aakinyirie. Ũcio nĩ we waikaragia kĩhingo kĩa Mwena wa Irathĩro.

30 Naake Hanania mũrũ wa Shelemia, me na Hanuni mũrũ wa gatandatũ wa Zalafu magĩcooka magĩaka marutĩĩtie harĩa Shemaia aakinyirie. Hau haarĩ haao ha keerĩ gwaka.

Naake Meshulamu mũrũ wa Berekia agĩaka arutĩĩtie harĩa acio eerĩ maakinyirie, naho haarĩ mbere wa nyũmba yake.

31 Naake Malikija, mũturi wa thahabu, agĩaka arutĩĩtie harĩa Meshulamu akinyirie. Naake aahaakire akĩhakinyia nyũmbainĩ ĩrĩa yaikaragwo nĩ aruti wĩra a Hekaarũ na ahũũri a mbiacara. Nyũmba ĩyo yaringaine na kĩhingo kĩa Mifikadi, hakuhĩ na nyũmba yarĩ igũrũ wa koona ya rũthingo rũrĩa rwarĩ na mwena wa rũgongo kwerekera na irathĩro.

32 Nao aturi a thahabu na ahũũri a mbiacara magĩaka marutĩĩtie harĩa Malikija aakinyirie. Maahaakire marutĩĩtie nyũmbainĩ ĩrĩa yarĩ koonainĩ makĩhakinyia kĩhingoinĩ kĩrĩa gĩetagwo Kĩhingo kĩa Ng’ondu.

Nehemia kũhoota arĩa maararagia wĩra wake

1 Na rĩĩrĩ, hĩndĩ ĩrĩa Sanibalati aiguire atĩ ithuĩ Ayahudi nĩtũraaka rũthingo rĩngĩ, akĩng’ũrĩka mũno, na akĩambĩrĩria gũtũnyũrũria.

2 Naake Sanibalati, araata aake na thigari cia Samaria irĩ ho, akiuga atĩrĩ, “Ĩ Ayahudi aya o na matarĩ nyama ingĩiyũra mũkuha mareeka atĩa? Hiihi marenda gwaka itũũra rĩĩrĩ rĩngĩ? Mareciiria atĩ o na mangĩruta magongoona no marĩĩkie wĩra ũyũ na mũthenya ũmwe? Mahota kũũngania mahiga moothe marĩa maacinirwo na magĩteeo?”

3 Naake Tobia arũũgamĩĩte hakuhĩ naake akĩgwatĩria ũhoro ũcio akiuga atĩrĩ, “Nĩ rũthingo rwa mũthemba ũrĩkũ mangĩaka? O na mbwe ĩngĩrũikarĩra to rũmomooke!”

4 Hĩndĩ ĩyo ngĩhooya atĩrĩ, “Ngai, tathikĩrĩria ũrĩa tũranyũrũrio nĩ andũ aya! Reke kĩnyũrũri kĩu kĩao kĩmacookerere. Ningĩ ũreke matuunywo indo ciao ciothe na ũmarekererie matahwo mathaamĩrio bũrũri mũgeni.

5 Ndũkaanamoohere ũũru ũrĩa meekaga o na ndũkaanariganĩrwo nĩ meehia maao. Tondũ ithuĩ tũkoreetwo tũgĩaka nĩmatũrumĩĩte.”

6 Nĩ ũndũ ũcio tũgĩthiĩ na mbere gwaka rũthingo rũu, na tondũ andũ maarĩ na kĩyo gĩa gwaka thuutha wa ihinda iniini, rũgĩgĩkinya nuthu ya kĩrũũgamo kĩaruo.

7 Na rĩĩrĩ, rĩrĩa Sanibalati, Tobia, andũ a kuuma Arabia, Aamoni, na Aashidodu, maiguire ũrĩa wĩra wa gwaka rũthingo rũu rwa Jerusalemu wathiaga na mbere, na ũrĩa mathenya marĩa maarĩ matharũku mathiaga na mbere gũcookererio, makĩraakara mũno.

8 Nao magĩthiĩ ndundu nĩguo matharĩkĩre itũũra rĩa Jerusalemu matũme kũgĩe ngũĩ.

9 No ithuĩ tũkĩhooya Ngai witũ na tũkĩiga andũ a kũrangĩra itũũra ũtukũ na mũthenya.

10 Nao andũ a Juda magĩkĩina rwĩmbo rũũrũ:

Nĩtũrathira hinya nĩ wĩra ũyũ;

mahiga marĩa maamomorangirwo maiyũire gũũkũ.

Tũtingĩkĩhota gwaka rũthingo rũũrũ.

11 Nacio thũ ciitũ igĩciiria atĩ tũtingĩciona, o na kana tũmenye mĩbango yacio mbere ya itũtharĩkĩre itũũrage, igirie wĩra wa mwako ũthiĩ na mbere.

12 No rĩĩrĩ, Ayahudi arĩa maatũũranagia na thũ ciitũ, magookaga kaingĩ kaingĩ gũtũmenyithia ũrĩa thũ ciitũ ciatũciiragĩra itwĩke.

13 Tondũ ũcio ngĩbanga andũ mbarĩ kwa mbarĩ, ngĩmaiga thuutha wa rũthingo marĩ na hiũ cia njora, matimũ, na mĩguĩ. Ndamaigaga handũ harĩa mwako ũtaakoragwo ũrĩĩkĩĩte.

14 Hĩndĩ ĩyo ngĩbaara ngĩona ũrĩa andũ maiguaga guoya, ngĩĩra atongoria o na anene aao atĩrĩ, “Tigaai gwĩtigĩra thũ ici ciitũ. Taririkanaai ũrĩa MWATHANI arĩ mũnene na wa kũmakania, mũgĩũkĩre mũrũĩrĩre andũ aanyu, ciana cianyu, atumia aanyu, o na nyũmba cianyu.”

15 Na rĩĩrĩ, thũ ciitũ igĩkĩmenya atĩ nĩtwamenyeete mĩbango ĩyo mĩũru ciatũbangĩire o na ikĩmenya atĩ Ngai nĩathũũkangĩĩtie mĩbango ĩyo yacio. Hĩndĩ ĩyo ithuothe tũgĩcooka gũthiĩ na mbere na mwako.

16 Na rĩĩrĩ, kuuma hĩndĩ ĩyo, nuthu ĩmwe ya andũ aakwa ĩgĩtuĩka ya kũrutaga wĩra, na nuthu ĩyo ĩngĩ ĩgĩtuĩka ya kũrangagĩra ĩkĩrĩĩte nguo cia gĩcango, na ĩnyiitĩĩte matimũ, ngo, na mĩguĩ. Ningĩ atongoria oothe magĩikara makĩũmagĩrĩria andũ

17 arĩa maakaga rũthingo. Nao andũ arĩa maanenganagĩrĩria indo cia mwako, mũndũ aakuuaga indo na guoko kũmwe, nakuo kũu kũngĩ gwakoragwo kũnyiitĩĩte matharaita.

18 O nao andũ arĩa maakaga, mũndũ aakoragwo o eyoheete rũhiũ rwa njora njohero. Naake mũhuuhi wa karumbeeta aikaraga hakuhĩ na niĩ.

19 Ningĩ ngĩĩra andũ o na anene na atongoria aao oothe atĩrĩ, “Wĩra ũyũ nĩ mũingĩ na nĩtũraihanĩrĩirie mũno, na ithuĩ tũkaraihanĩrĩria mũno tũgĩaka.

20 Mũngĩigua karumbeeta kahuuhwo ũrĩraai na kũrĩ ithuĩ. Ngai witũ nĩwe ũgũtũhũũranĩra.”

21 Ũguo nĩguo twakĩrutaga wĩra wa gwaka rũthingo rũu. Nuthu ĩmwe ya andũ yarutaga wĩra kuuma rũũciinĩ o nginya hwaĩinĩ njata ikĩumĩra, nayo nuthu ĩyo ĩngĩ ĩkarangagĩra ĩnyiitĩĩte matimũ.

22 Hĩndĩ ĩyo ngĩcooka ngĩĩra andũ arĩa maarũũgamagĩrĩra wĩra o hamwe na ndungata ciao maraarage Jerusalemu nĩguo tũrangagĩre itũũra ũtukũ, na mũthenya tũkaruta wĩra.

23 Na rĩĩrĩ, o na niĩ mwene, andũ arĩa maarĩ hamwe na niĩ, ndungata ciakwa, o na arangĩri aakwa, gũtirĩ mũndũ o na ũmwe warutaga nguo ciake mwĩrĩ. O mũndũ aikaraga anyiitĩĩte matharaita maake na mooko.

Athĩĩni kũhinyĩrĩrio

1 Na rĩĩrĩ, thuutha ũcio, gũkĩgĩa kĩrĩro kĩnene gĩa athuuri na atumia aao, nĩ ũndũ wa ũrĩa meekagwo nĩ Ayahudi arĩa angĩ.

2 Amwe aao makiuga atĩrĩ, “Ithuĩ tũrĩ na ciana nyingĩ, na nĩtũbatairio nĩ irio nĩguo tũtũũre muoyo.”

3 Angĩ makiuga atĩrĩ, “Tũracuuria mĩgũnda iitũ ya kũrĩma na ya mĩthabibũ, o na nyũmba ciitũ, nĩ geetha tuone irio tũtigaakue nĩ ng’aragu.”

4 Angĩ nao makiuga atĩrĩ, “Tũrakomba mbeeca cia kũrĩha mũthamaki igooti nĩ ũndũ wa mĩgũnda iitũ ya kũrĩma o na ya mĩthabibũ.

5 Na rĩĩrĩ, ithuĩ tũrĩ a kĩruka kĩmwe na Ayahudi arĩa angĩ. Githĩ ciana ciitũ ititariĩ o ta ciao? No rĩĩrĩ ithuĩ nĩtũratua ciana ciitũ ngombo. Amwe a airĩĩtu aitũ nĩmeendeetio magatuĩka ngombo. Na rĩĩrĩ, ithuĩ tũtirahota gwĩteithia, nĩ gũkorwo nĩtũtuunyĩĩtwo mĩgũnda iitũ ya kũrĩma o na ya mĩthabibũ.”

6 Na rĩĩrĩ, rĩrĩa ndaiguire mateta maao ngĩraakara mũno

7 na ngĩĩhotora gwĩka ũndũ. Ũhoro ũcio wothe ngĩũcookereria atongoria na anene a andũ ngĩmeera atĩrĩ, “Inyuĩ-rĩ, nĩkũhinyĩrĩria mũrahinyĩrĩria aariũ a ithe wanyu!” Ngĩcooka ngĩĩtana mũcemanio mũnene nĩguo njarie igũrũ rĩa ũhoro ũcio.

8 Ngĩmeera atĩrĩ, “Nĩtũgereetie o ũrĩa tũngĩhota gũkũũra Ayahudi aitũ arĩa meyendeetie kũrĩ andũ a ndũũrĩrĩ. Rĩu inyuĩ mũrahũthĩra hinya mũgatũma Ayahudi arĩa angĩ meyendie kũrĩ inyuĩ, o rĩrĩa mũrĩ a ithe ũmwe!” Nao atongoria oothe magĩkira ki, matiigana kuona ũndũ wa gũcookia.

9 Ngĩcooka ngĩmeera atĩrĩ, “Ũndũ ũcio mũreeka ti mwega! Nĩmwagĩrĩirwo nĩgũtĩĩa Ngai o na gwĩka ũndũ ũrĩa wagĩrĩire. Na njĩra ĩyo nĩmũgũtũma ndũũrĩrĩ iria irĩ ũthũ na ithuĩ ciage gũtũmena.

10 Niĩ na andũ arĩa marĩ hamwe na niĩ, na ndungata ciakwa-rĩ, nĩtũmakombagĩra mbeeca o na irio. Rĩu-rĩ, nĩtũtigeei kũmeetia uumithio.

11 O ro ũũmũũthĩ, macookeriei mĩgũnda yao ya kũrĩma, ya mĩthabibũ, o na ya mĩtamaiyũ, na nyũmba ciao. Ningĩ mũmacookerie uumithio wa mbia ciao, wa ngano, wa ndibei, o na wa maguta ma mĩtamaiyũ, ũrĩa mũmeetagia.”

12 Nao atongoria acio magĩkiuga atĩrĩ, “Nĩtũkũmacookeria indo ciao o ta ũguo uugĩĩte, na nĩtũkũmoohera mathiirĩ.” Ngĩcooka ngĩĩta athĩnjĩri Ngai matuĩke aira, nao andũ acio ngĩmehĩtithia moige atĩ nĩmekũhingia ũguo meeranĩire.

13 Hĩndĩ ĩyo ngĩribariba mũcibi wakwa mwariĩ, ngiuga atĩrĩ, “Mũndũ wothe ũtakũhingia kĩrĩĩkanĩro kĩu, Ngai aromũribariba o ro ũguo. Ngai aromũribariba amũtige atarĩ nyũmba, kana wĩra, aromũribaribĩka ũguo atigwo atarĩ kĩndũ.”

Nao andũ acio oothe moonganĩĩte makiuga, “Ameni” na makĩgooca MWATHANI. Nao atongoria magĩgĩĩka o ta ũrĩa meeranĩire.

Ũtaana wa Nehemia

14 Na rĩĩrĩ, handũ ha mĩaka ikũmi na ĩĩrĩ, hĩndĩ ĩrĩa ndakorirwo ndĩ barũũthi wa bũrũri wa Juda, niĩ na andũ a nyũmba ya baaba tũtiahũthagĩra gĩcunjĩ kĩa indo kĩrĩa ndaagĩrĩirwo kũheeo ta barũũthi. Hĩndĩ ĩyo nĩkwambĩrĩria mwaka wa mĩrongo ĩĩrĩ, nginya mwaka wa mĩrongo ĩtatũ na ĩĩrĩ ĩrĩa Aritashashita aakorirwo athamakĩĩte.

15 Na rĩĩrĩ, abarũũthi arĩa maarĩ mbere yakwa nĩmahinyagĩrĩria andũ mũno; nĩ ũndũ nĩmaameetagia irio na ndibei cia thogora wa mbeeca cia betha mĩrongo ĩna o mũthenya. Ningĩ o nacio ndungata ciao noguo ciahinyagĩrĩria andũ. No niĩ ndiigana gwĩka ũguo nĩ ũndũ wa ũrĩa ndatĩĩĩte Ngai.

16 Ngĩkĩruta wĩra wa gwaka rĩngĩ rũthingo rũu na hinya wakwa wothe, na ndiigana kũgũra mũgũnda. Ningĩ nacio ndungata ciakwa ikĩnyiitanĩra na niĩ wĩrainĩ wa mwako ũcio.

17 Na rĩĩrĩ, nĩndaheaga Ayahudi na atongoria igana rĩa mĩrongo ĩtaano (150) irio. Ningĩ hamwe na acio nĩndaheaga irio o na andũ arĩa mookaga kũrĩ niĩ moimĩĩte ndũũrĩrĩinĩ iria ciatũkuhĩhĩirie.

18 Andũ acio nĩndamathĩnjagĩra o mũthenya ndeegwa ĩmwe, na ndũrũme noru ithathatũ, na ngũkũ nyingĩ. Ningĩ o thuutha wa mĩthenya ikũmi, nĩndamaheaga ndibei ĩrĩa njega kwa ũingĩ. Na tondũ wa ũrĩa andũ acio maarĩ na mawĩra maritũ ma kũruta, ndiigana gwĩtia gĩcunjĩ kĩa irio kĩrĩa ndaagĩrĩirwo kũheeo ta barũũthi.

19 Ndagũthaitha Ngai ũndirikane na ũnjĩke maũndũ meega nĩ ũndũ wa maũndũ marĩa njĩkĩire andũ aya.

Nehemia gũciirĩrwo kũũragwo

1 Na rĩĩrĩ, Sanibalati, Tobia, Geshemu ũcio Mũarabu, o na thũ iria ingĩ ciitũ, magĩkĩmenyithio atĩ nĩtwarĩĩkĩĩtie gwaka rũthingo na hatiarĩ ithenya o na rĩmwe rĩatigarĩĩte. O na kũhaana o ũguo-rĩ, tũtiakoreetwo twĩkĩrĩĩte ihingo.

2 Tondũ ũcio Sanibalati na Geshemu makĩndekanĩria atĩ tũcemanie gatũũrainĩ kamwe ga tũtũũra twa bũrũri ũrĩa mwaraganu wa Ono. No rĩĩrĩ, o meendaga kũngera ngero.

3 Na niĩ ngĩmarekeria andũ makeerwo ũũ: “Nĩndĩraruta wĩra wa bata mũno, na ndigũikũrũka kũu. Ndingĩhota gũtiganĩria wĩra atĩ nĩguo njũke tuonane.”

4 Nao makĩndekeria andũ mahinda mana makĩnjĩĩraga ndũmĩrĩri o ta ya mbere, na niĩ ngamacookagĩria macookio o ta marĩa ndacookeetie rĩa mbere.

5 Hĩndĩ ĩyo Sanibalati akĩndekeria ndungata ĩmwe yake ihinda rĩa gataano ĩ na marũa mataarĩ matume

6 maandĩkĩĩtwo ũũ:

“Atĩrĩĩrĩ Nehemia, nĩmenyithĩĩtio nĩ Geshemu atĩ kwĩ na mũhuuhu ũrathiĩ na mbere gatagatĩinĩ ka ndũũrĩrĩ iria itũkuhĩrĩirie, atĩ wee o na Ayahudi nĩmũthondekeete ndundu ya kũremera mũthamaki na nĩkĩo mũraaka rĩngĩ rũthingo rwa itũũra rĩĩrĩ. Ningĩ Geshemu nĩathiĩte na mbere kuuga atĩ wee nĩũrenda gwĩtua mũthamaki.

7 Ningĩ nĩũhaarĩirie anabii amwe kũu Jerusalemu moige atĩ wee nĩ we mũthamaki wa Juda. Na rĩu mũthamaki no eende kũmenya ũhoro ũcio wega. Na tondũ ũcio gĩũke twaranĩrie ũhoro ũcio.”

8 Ngĩcooka ngĩtũmĩra Sanibalati ndũmĩrĩri ĩno: “Atĩrĩĩrĩ, Sanibalati, ũhoro ũcio wothe uugĩĩte nĩ wa maheeni. Maũndũ macio moothe nĩ we mwene wĩtungĩire.”

9 Andũ acio meendeete gũtũmakia nĩguo tũtiganĩrie wĩra wa mwako. Ngĩkĩhooya ihooya rĩĩrĩ, “Ndagũthaitha Ngai njĩkĩra hinya!”

10 Na rĩĩrĩ, ngĩgĩthiĩ mũciĩ gwa Shemaia, mũrũ wa Delaia na mũcũkũrũ wa Mehetabeli, ngĩmũkora ahingĩirwo gwake nyũmba, akĩnjĩĩra atĩrĩ, “Reke niĩ nawe tũthiĩ tũkehithe o Handũ Harĩa Hatheru Mũno ha Hekaarũ na tũhinge mĩrango, nĩ ũndũ andũ acio nĩmegũũka gũkũũraga na megũũka ũtukũ.”

11 Na niĩ ngĩmũcookeria atĩrĩ, “Ndirĩ kĩguoya gĩa kũũra na gũthiĩ kwĩhitha. Ũgwĩciiria atĩ no honokie muoyo wakwa na ũndũ wa kwĩhitha Hekaarũinĩ? Ũguo ndigwĩka.”

12 Ngĩciiria ũhoro ũcio, ngĩgĩtaũkĩrwo atĩ ti Ngai warĩĩtie na Shemaia, no nĩkũhakwo aahakĩĩtwo nĩ Tobia na Sanibalati nĩguo anjiguithie guoya.

13 Nao maamũhakĩĩte nĩguo anjiguithie guoya njĩhie, naguo ũndũ ũcio ũgĩtuĩke wa gũthũũkĩria rĩĩtwa o na wa kũũmenithia.

14 Ngĩkĩhooya ihooya rĩĩrĩ, “Ndagũthaitha Ngai ũririkane Tobia na Sanibalati ũrĩa meekĩĩte na ũmaherithie. Ningĩ o na ũherithie Noadia mũnabii mũndũ wa nja ũcio, o na anabii acio angĩ, mageragia kũnjiguithia guoya.”

Kũrĩĩkia wĩra

15 Naguo wĩra wothe wa gwaka rũthingo rũu ũkĩrĩĩka mũthenya wa mĩrongo ĩĩrĩ na ĩtaano wa mweri wa Eluli. Wĩra ũcio wothe twaũrutire na mĩthenya mĩrongo ĩtaano na ĩĩrĩ.

16 Rĩrĩa thũ ciitũ ciothe iria ciarĩ ndũũrĩrĩinĩ iria ciatũkuhĩhĩirie ciaiguire ũrĩa wĩra ũcio warutĩkĩĩte ikĩmaka mũno. Wĩra ũcio wothe watuĩkire wa kũmakania nĩ ũndũ o mũndũ wothe eetĩkĩĩtie atĩ warutĩkire nĩ ũndũ wa ũteithio wa Ngai.

17 Ningĩ matukũinĩ macio atongoria a Ayahudi maatũire maandĩkanagĩra marũa na Tobia.

18 Na rĩĩrĩ, kũu Juda andũ nĩmeehĩtĩĩte atĩ makorwo mwena wake, nĩ ũndũ Shekania mũrũ wa Ara aarĩ mũthoniwe. Naake Noadia mũrũ wa Jehohanani aahikĩĩtie mwarĩ wa Meshulamu mũrũ wa Berekia.

19 Na rĩĩrĩ, andũ nĩmaagaathagĩrĩria Tobia mũno nĩ ũndũ wa ciĩko njega iria eekaga o na makamwĩraga ũrĩa wothe ndoigaga. Naake Tobia agĩikara akĩnyandĩkagĩra marũa ma kũnjiguithia guoya.

1 Na rĩĩrĩ, rũthingo rwarĩĩkia gwakwo rĩngĩ o na ihingo gwĩkĩrwo, aikaria a ihingo, aini a nyĩmbo, o na Alawii magĩthuurwo.

2 Ngĩcooka ngĩthuura andũ eerĩ a gwathanaga itũũrainĩ rĩu rĩa Jerusalemu. Ũmwe aarĩ mũrũ wa maitũ wetagwo Hanani na ũrĩa ũngĩ eetagwo Hanania na nĩwe warĩ mũnene wa nyũmba ĩrĩa yakĩĩtwo na ihingo cia hinya ya kwĩgitĩra. Hanani ũcio aarĩ mwĩhokeku na agatĩĩa Ngai gũkĩra andũ arĩa angĩ oothe.

3 Ningĩ ngĩmeera matikahingũrage ihingo cia Jerusalemu riũa rĩtarathĩĩte, na macihingage na cuuma hwaĩinĩ riũa rĩgĩthũa arangĩri makiumĩra wĩra. Ningĩ ngĩcooka ngĩmeera mathuure arangĩri kuuma andũinĩ arĩa matũũraga Jerusalemu, na o mũndũ arangagĩre itũũrainĩ rĩake, na o mũndũ arangagĩre harĩa harigiicĩirie nyũmba yake.

Mũtaratara wa andũ arĩa moimire ithaamĩrio

4 Na rĩĩrĩ, itũũra rĩa Jerusalemu rĩarĩ rĩariĩ na rĩkaneneha, no rĩĩrĩ, andũ arĩa maatũire kuo matiarĩ aingĩ, na ti nyũmba nyingĩ ciakĩĩtwo.

5 Naake Ngai akĩĩhe wendo nĩguo njookanĩrĩrie andũ, o na atongoria o na anene, nĩguo mũigana wa mbarĩ ciao ũmenyeke. Ngĩkĩona ibuku rĩrĩa rĩandĩkĩĩtwo mũtaratara wa andũ arĩa maambire gũcooka kuuma ithaamĩrio narĩo rĩandĩkĩĩtwo ta ũũ.

6 Na rĩĩrĩ, andũ aingĩ a arĩa maatahĩĩtwo nĩ moimĩĩte bũrũriinĩ wa Babiloni, magacooka Jerusalemu na Juda, o mũndũ agacooka itũũrainĩ rĩake. Andũ acio oothe maatũũraga ithaamĩrio kuuma hĩndĩ ĩrĩa Nebukadinezaru aamatahire akĩmatwara Babilonia.

7 Atongoria aao maarĩ Zerubabeli, Joshua, Nehemia, Azaria, Raamia, Nahamani, Moridekai, Bilishani, Misiperethu, Bigivai, Nehumu, na Baana.

8-25 Mũigana wa andũ a mbarĩ ya Isiraeli, kuuma o mbarĩ, arĩa maacookire kuuma ithaamĩrio waiganaga ta ũũ:

Paroshu 2,172
Shefatia 372
Ara 652
Pahathu (rũciaro rwa Joshua na Joabu) 2,818
Elamu 1,254
Zatu 845
Zakai 760
Binui 648
Bebai 628
Azigadi 2,322
Adonikamu 667
Bigivai 2,067
Adini 655
Ateri (ũrĩa wetagwo Hezekia) 98
Hashumu 328
Bezai 324
Harifu 112
Gibeoni 95

26-38 Ningĩ o nao andũ arĩa maithe maao maatũũraga matũũrainĩ maya, nao magĩcooka.

Bethilehemu na Netofa 188
Anathothu 128
Bethi Azimavethu 42
Kiriathu Jearimu na Kefira na Beerothu 743
Rama na Geba 621
Mikimashi 122
Betheli na Ai 123
Nebo ĩrĩa ĩngĩ 52
Elamu ĩrĩa ĩngĩ 1,254
Harimu 320
Jeriko 345
Lodi, Hadidi, na Ono 721
Senaa 3,930.

39-42 Nacio mbarĩ cia athĩnjĩri Ngai iria ciacookire kuuma ithaamĩrio nĩ ici:

Jedaia (nayo nĩ ya rũciaro rwa Joshua) 973
Imeri 1,052
Pashuri 1,247
Harimu 1,017

43-45 Nacio mbarĩ cia Alawii iria ciacookire kuuma ithaamĩrio nĩ ici:

Jeshua na Kadimieli (a rũciaro rwa Hodavia) 74
Aini a nyĩmbo Hekaarũinĩ (a mbarĩ ya Asafu) 148
Aikaria a Hekaarũ (njiarwa cia Shalumu, Ateri, Talimoni, Akubu, Hatita, na Shobai) 138

46-56 Mbarĩ cia arĩa maarutaga wĩra Hekaarũinĩ iria ciacookire kuuma ithaamĩrio nĩ ici:

Ziha, Hasufa, na ya Tabaothu
Keroso, Sia, Padoni,
Lebana, Hagaba, Shalimai,
Hanani, Gideli, Gaharu,
Reaia, Rezini, Nekoda,
Gazamu, Uza, Pasea,
Besai, Meunimu, Nefushesimu,
Bakabuku, Hakufa, Harihuru,
Bazilithu, Mehida, Harasha,
Barikosu, Sisera, Tema,
Nezia, na ya Hatifa.

57-59 Nacio mbarĩ cia andũ arĩa maarĩ ndungata cia Solomoni arĩa maacookire kuuma ithaamĩrio nĩ aya;

Sotai, Soferethu, Perida,
Jaala, Darikoni, Gideli,
Shefatia, Hatili, Pokerethu Hazebaimu na ya Amoni.

60 Mũigana wa njiarwa cia aruti wĩra wa Hekaarũ na wa njiarwa cia ndungata cia Solomoni arĩa maacookire kuuma ithaamĩrio warĩ 392.

61-62 Nao arĩa maarĩ a mbarĩ ya Delaia na ya Tobia, na ya Nekoda, maarĩ 642, nao magĩcooka moimĩĩte matũũrainĩ ma Teli Mela, Teli Harasha, Kerubi, Adoni, na Imeri. No rĩĩrĩ, acio oothe matiigana kũhota kuonania atĩ maarĩ njiarwa cia andũ a Isiraeli.

63-64 Mbarĩ ici cia athĩnjĩri Ngai, nĩciagire kuonekana thĩinĩ wa mũtaratara wa kuonania kĩhumo gĩacio: Mbarĩ ya Habaia, Hakozu, na ya Barizilai (Barizilai nĩ we wahikĩĩtie mũirĩĩtu wa mbarĩ ya Barizilai wa kuuma bũrũriinĩ wa Gileadi na akeĩtania na rĩĩtwa rĩa mbarĩ ya mũthoniwe.) Mbarĩ ici ciaremwo nĩkuonania wega kĩhumo gĩacio ikĩgirio gũtuĩka athĩnjĩri Ngai.

65 Naake barũũthi akĩmeera matikaarĩe irio cia magongoona marutĩirwo Ngai, o nginya hĩndĩ ĩrĩa hakooneka mũthĩnjĩri Ngai ũngĩhota gũtũmĩra Urimu na Thumimu.

66-69 Nao andũ oothe arĩa maacookire kuuma ithaamĩrio maarĩ ngiri mĩrongo ĩna na igĩrĩ, na magana matatũ ma mĩrongo ĩtandatũ 42,360.

ndungata cia arũme na cia andũ a nja 7,337.
Arũme na atumia aini nyĩmbo 245
Mbarathi 736
Nyũmbũ 245
Ngamĩĩra 435
Ndigiri 6,720.

70-72 Na rĩĩrĩ, andũ aingĩ magĩkĩruta indo ciao nĩ geetha mateithĩrĩrie gwaka rĩngĩ Hekaarũ:

Barũũthi we mwene akĩruta indo ici: Kiro inyaanya cia thahabu Mbakũri mĩrongo ĩtaano cia magongoona Nguo magana mataano na mĩrongo ĩtatũ (560) cia kwĩhumbwo nĩ athĩnjĩri Ngai
Nao atongoria a mbarĩ makĩruta indo ici: Kiro igana na mĩrongo ĩtandatũ na inyaanya (168) cia thahabu Kiro ngiri imwe na magana meerĩ na mĩrongo ĩtaano (1,250) cia betha
Nao andũ acio angĩ makĩruta indo ici: Kiro igana na mĩrongo ĩtandatũ na inyaanya (168) cia thahabu Kiro igana na mĩrongo ĩna (140) cia betha Nguo mĩrongo ĩtandatũ na mũgwanja cia kwĩhumbwo nĩ athĩnjĩri Ngai.

73 Na rĩĩrĩ, athĩnjĩri Ngai, Alawii, aikaria a Hekaarũ, aini a nyĩmbo, andũ amwe a mũingĩ, o na aruti wĩra Hekaarũinĩ, na andũ oothe a Isiraeli, makĩambĩrĩria gũtũũra matũũrainĩ maao.

Ezira gũthoomera andũ Watho

1 Na rĩĩrĩ, mweri wa mũgwanja ũgĩkinya-rĩ, andũ acio oothe a Isiraeli magĩkorwo matũũrĩĩte matũũrainĩ maao. Nao oothe makĩũngana hamwe kũu Jerusalemu, magĩikara handũ harĩa haarĩ mbere ya kĩhingo kĩrĩa gĩetagwo kĩhingo kĩa Maaĩ. Nao magĩkĩũria Ezira mũthĩnjĩri Ngai na mũndũ warĩ mũũgĩ ũhoroinĩ wa Watho ũrĩa MWATHANI aaheire Aisiraeli ahũthĩrĩĩte Musa, amareehere ibuku rĩa Watho.

2 Naake Ezira akĩreehe ibuku rĩu rĩa Watho harĩa andũ acio moonganĩĩte, arũme, atumia, na ciana iria ingĩahotire gũtaũkĩrwo nĩ Watho ũcio. Aarĩreehire mũthenya wa mbere wa mweri ũcio wa mũgwanja.

3 Naake Ezira akĩmathoomera Watho ũcio arĩ o hau mbere ya kĩhingo kĩu gĩetagwo kĩhingo kĩa Maaĩ kuuma rũũciinĩ nginya thaa thita. Nao oothe magĩtega matũ mathikĩrĩirie.

4 Naake Ezira hĩndĩ ĩyo aathoomaga watho ũcio aarũũgamĩĩte igũrũ wa njukwaa yakĩĩtwo na mbaaũ ĩrĩa yakĩĩtwo nĩ ũndũ wa ũhoro ũcio kĩũmbe. Nao andũ aya marũũgamĩĩte guokoinĩ gwake kwa ũrĩo: Matithia, Shema, Anaia, Uria, Hilikia, na Maaseia. Nao aya marũũgamĩĩte guokoinĩ gwake kwa ũmotho: Pedaia, Mishaeli, Malikinja, Hashumu, Hashibadana, Zekaria, na Meshulamu.

5 Naake Ezira, arũũgamĩĩte hau njukwaainĩ harĩa oonagwo nĩ andũ oothe, akĩhingũra ibuku rĩa watho andũ oothe mamwĩroreire; nao oothe makĩrũũgama.

6 Hĩndĩ ĩyo Ezira akiuga atĩ, “Goocaai MWATHANI o we Ngai ũrĩa Mũnene!”

Nao oothe moeete mooko maao na igũrũ magĩcookia atĩrĩ, “ Ameni! Ameni!” Magĩturia maru magĩturumithia moothiũ maao thĩ magĩthaathaiya MWATHANI.

7 Nao andũ acio makĩrũũgama o harĩa maarĩ, nao Alawii aya magĩkĩmataarĩria ũhoro wa Watho ũcio: Jeshua, Bani, Sherebia, Jamini, Akubu, Shabethai, Hodia, Maaseia, Kelita, Azaria, Jozabadu, Hanani, na Pelaia.

8 Nao magĩtaũra Watho ũcio wa Ngai na mwarĩrie ũkũigwĩka nĩguo andũ mataũkĩrwo wega.

9 Rĩrĩa andũ maiguire ciugo icio cia Watho makĩigua maahuutio mũno, makĩambĩrĩria kũrĩra. Naake Nehemia ũrĩa warĩ barũũthi, na Ezira, ũcio mũthĩnjĩri Ngai na mũndũ warĩ mũũgĩ ũhoroinĩ wa Watho, o na Alawii arĩa maataaragĩria andũ maũndũ makĩĩra andũ o oothe atĩrĩ, “Mũthenya wa ũũmũũthĩ nĩmwamũrĩre MWATHANI Ngai wanyu. Tigaai gwĩthikĩra o na kana kũrĩra.

10 Nĩ ũndũ ũcio inũkaai mũkarĩe na mũnyue. Ningĩ-rĩ, arĩa nao matarĩ na irio kana ndibei, maheei. Ũũmũũthĩ nĩ mũthenya mũtheru wa MWATHANI witũ, nĩ ũndũ ũcio tigaai kĩeha. Gĩkeno kĩrĩa MWATHANI ekũmũhe nĩkĩo gĩgũtuĩka hinya wanyu.”

11 Nao Alawii magĩkĩrĩrĩria kũhooreria andũ oothe makĩmeraga matige kũigua kĩeha mũthenya ũcio mũtheru.

12 Nao andũ oothe makĩinũka makĩrĩa na makĩnyua makeneete, o na makĩhe arĩa mataarĩ irio nĩ ũndũ nĩmaamenyire wega ũrĩa maathoomeirwo.

Thigũkũ ya Ithũnũ

13 Naguo mũthenya ũyũ ũngĩ, anene a mbarĩ, athĩnjĩri Ngai, o na Alawii, magĩthiĩ oothe hamwe harĩ Ezira nĩguo makeerute ũhoro wa Watho.

14 Nao magĩkĩona kwandĩkĩĩtwo wathoinĩ atĩ MWATHANI nĩathanĩĩte na kanua ka Musa, atĩ hĩndĩ ya thigũkũ ya Ithũnũ andũ a Isiraeli maagĩrĩirwo nĩgũikaraga ithũnũinĩ.

15 Nao magĩkĩheana ndũmĩrĩriikuuga ũũ, makĩmĩtuma nĩguo imenyithanio Jerusalemu guothe, o na matũũrainĩ moothe: “Umaai mũthiĩ irĩmainĩ, mũgatue honge cia mĩkarakaba, mĩtamaiyũ, mĩhandathi, mĩkĩndũ, kana cia mĩtĩ ĩngĩ nĩguo mwake ithũnũ kũringana na ũrĩa kwandĩkĩĩtwo Wathoinĩ.”

16 Tondũ ũcio magĩthiĩ, magĩtua honge, magĩaka ithũnũ o mũndũ igũrũ rĩa nyũmba yake, njainĩ ciao, njainĩ cia Hekaarũ, o na handũ harĩa harĩ hakuhĩ na kĩhingo kĩrĩa gĩetagwo kĩhingo kĩa Maaĩ, o na hakuhĩ na kĩhingo kĩa Efiraimu.

17 Nao andũ acio oothe maacookeete kuuma ithaamĩrio makĩyakĩra ithũnũ, magĩikara kuo. Rĩrĩ nĩrĩo rĩarĩ ihinda rĩa mbere rĩa gwĩka ũndũ ũcio, kuuma o matukũinĩ ma Joshua mũrũ wa Nuni. Nao andũ oothe makĩgĩa na gĩkeno kĩnene mũno.

18 Naake Ezira akamathoomagĩra ibuku rĩu rĩa watho mũthenya o mũthenya kuuma mũthenya wa mbere wa thigũkũ ĩyo nginya mũthenya wa mũthia. Nao magĩkũngũĩra thigũkũ ĩyo ya Ithũnũ mĩthenya mũgwanja. Ningĩ mũthenya wa ĩnaana gũkĩgĩa igongoona rĩa kũrĩĩkĩrĩria o ta ũrĩa Watho wathanĩĩte.

Andũ kuumbũra meehia maao

1-2 Na rĩĩrĩ, mũthenya wa mĩrongo ĩĩrĩ na ĩna wa mweri ũcio-rĩ, andũ a Isiraeli makĩũngana mehingĩĩte kũrĩa irio, nĩ geetha moonanie kĩeha nĩ ũndũ wa meehia maao. Hĩndĩ ĩyo nĩmaarĩĩkĩĩtie kwĩamũrania na andũ a ndũũrĩrĩ. Nao magĩkĩĩhumba nguo cia makũnia na makĩitĩrĩria tĩĩri mĩtwe nĩguo moonanie ũrĩa maarĩ na kĩeha. Magĩkĩrũũgama makĩambĩrĩria kuumbũra meehia maao o na ma maithe maao.

3 Nao magĩikara makindĩirie ihinda rĩa mathaa matatũ magĩthoomerwo watho wa MWATHANI Ngai wao. Narĩo ihinda rĩu rĩngĩ rĩa mathaa matatũ makiumbũra meehia maao magĩthaathaiya MWATHANI Ngai wao.

4 Alawii arĩa marũũgamĩĩte njukwaainĩ ĩrĩa yathondekirwo nĩ: Jeshua, Bani, Kadimieli, Shebania, Buni, Sherebia, Bani, na Kenani. Nao makĩhooya MWATHANI Ngai wao maanĩrĩire.

5 Nao Alawii aya magĩtongoria mahooya: Jeshua, Kadimieli, Bani, Hashabaneia, Sherebia, Hodia, Shebania, na Pethahia, makiuga atĩrĩ,

“Rũũgamaai mũgooce MWATHANI Ngai wanyu.

mũgooceei tene na tene!

Mũndũ o wothe tanĩakĩgooce rĩĩtwa rĩake rĩrĩ riiri,

o na gũtuĩka rũgooco rwa andũ rũtingĩigana.”

Ihooya rĩa umbũri

6 Hĩndĩ ĩyo andũ a Isiraeli makĩhooya ihooya rĩĩrĩ:

“Wee, MWATHANI nĩ we MWATHANI wiki;

nĩ we wombire igũrũ o na njata cia matuinĩ.

Nĩ we wombire thĩ, iria o na indo ciothe irĩ kuo,

na nĩ we waciheire muoyo.

Mbũtũ ya igũrũ nĩ we ĩinamagĩrĩra ĩgagũthaathaiya.

7 Wee, MWATHANI Ngai nĩ we wathuurire Aburamu

ũkĩmũtongoria kuuma Uru bũrũriinĩ wa Babilonia;

ũkĩmũgarũra rĩĩtwa ũkĩmwĩta Aburahamu.

8 Ũgĩkĩona atĩ aarĩ mwĩhokeku harĩ we,

ũgĩthondeka kĩrĩĩkanĩro naake.

Ũkĩmwĩrĩra atĩ nĩũkaamũhe bũrũri wa Akanaani, Ahiti, Aamori, Aperizi, Ajebusi, na Agirigashi.

Bũrũri ũcio ũgĩtuĩke kũndũ gwa gũtũũrwo nĩ njiarwa ciake.

Kĩrĩĩkanĩro kĩu gĩaku nĩũhingĩĩtie, tondũ wĩ mwĩhokeku.

9 “Ningĩ nĩwonire ũrĩa maithe maitũ maanyariirirwo Misiri,

ũgĩkĩigua gũkaya kwao marĩ o kũu Iria Ituune.

10 Ningĩ nĩwaringĩire mũthamaki, njaama ciake, o na andũ oothe a bũrũri wake,

ciama cia kũguoyohia,

nĩ ũndũ wee nĩwamenyeete

ũrĩa Amisiri mahinyagĩrĩria andũ aaku.

Nawe ũkĩĩgĩĩra igweta kinyagia ũũmũũthĩ.

11 Ũgĩgĩtemera andũ aaku njĩra iriainĩ,

ũgĩkĩmaringĩria thĩ nyũmũ.

Arĩa maamarũmĩrĩire ũkĩmarikia kũndũ kũriku mũno,

o ta ũrĩa ihiga rĩrikaga o thĩ maaĩinĩ marĩa mariku.

12 Nĩ we wamatongoragia na gĩtugĩ gĩa itu mũthenya,

na ũtukũ ũkamamũrĩkagĩra njĩra na gĩtugĩ kĩa mwaki.

13 O na ningĩ ũgĩikũrũka ũgĩũka kĩrĩmainĩ gĩa Sinai,

ũkĩarĩria andũ aaku,

ũkĩmahe mawatho meega o na ũrutani wa ma.

14 Ũgĩkĩmaruta kũrũmia Thabatũ ciaku theru,

na ũkĩmahe mawatho maaku ũhũthĩire ndungata yaku Musa.

15 “Maahũũta ũkĩmahe irio kuuma igũrũ,

na manyoota ũkĩmahe maaĩ kuuma ihigainĩ.

Ũkĩmaatha atĩ makeegwatĩre bũrũri ũrĩa wameerĩire atĩ nĩũkaamahe.

16 No rĩĩrĩ, maithe maitũ magĩĩtĩĩa na makĩũmia ngoro ciao,

na matiigana gwathĩkĩra maathani maaku.

17 Magĩkĩrega gwathĩka na makĩriganĩrwo

nĩ ũrĩa wothe wameekĩire;

na magĩkĩriganĩrwo nĩ ciama iria waringĩĩte.

Ningĩ nĩ ũndũ wa mwĩtĩĩo wao magĩĩthuurĩra

mũtongoria nĩguo amacookie ũkomboinĩ Misiri.

No rĩĩrĩ, wee wĩ Ngai muohanĩri

wĩ mũtugi na mũigua tha, na ndũhiũhaga kũraakara.

Tha ciaku nĩ nyingĩ

na ndũigana kũmatiganĩria.

18 Magĩgĩĩthondekera mũhianano wa gateegwa

makiuga atĩ nĩ yo ngai yao

ĩrĩa yamarutire bũrũri wa Misiri!

Ningĩ magĩkũruma mũno.

19 No wee ndũigana kũmatiganĩria kũu werũinĩ

nĩ ũndũ wa ũrĩa tha ciaku i nyingĩ.

Ningĩ ndũigana kũmeehereria gĩtugĩ gĩa itu o na kana kĩa mwaki

iria ciamoonagĩrĩria njĩra mũthenya na ũtukũ.

20 Ningĩ ũkĩmahe Roho waku mwega wa kũmataaraga,

na ũkĩmahe mana ma kũrĩa o na maaĩ ma kũnyua.

21 Nĩwatũire ũmaheaga kĩrĩa gĩothe meendaga,

ihinda rĩa mĩaka mĩrongo ĩna kũu werũinĩ,

nguo ciao itiigana gũtuĩka o na kana magũrũ maao makĩimba nĩ ũndũ wa gũthiĩ.

22 “Ningĩ ũgĩtũma mahoote ndũũrĩrĩ na moothamaki,

o na mabũrũri marĩa maamakuhĩhĩirie.

Magĩkĩhoota bũrũri wa Heshiboni kũrĩa Sihoni aathanaga,

o na bũrũri wa Bashani kũrĩa Ogu aathanaga.

23 Ũgĩkĩmahe ciana nyingĩ o ta njata cia igũrũ,

ũgĩgĩtũma mahootane na matũũre

bũrũriinĩ, ũrĩa werĩire maithe maao atĩ nĩũkaamahe.

24 Magĩkĩhoota bũrũri wa Kanaani,

magĩgĩtooria andũ arĩa maatũũraga kuo.

Nao andũ aaku ũgĩkĩmahe ũhoti wa gwĩka na andũ acio

na athamaki a Kanaani o ta ũrĩa mangĩendire.

25 Andũ aaku magĩkĩĩnyiitĩra matũũra mairigĩre na thingo cia hinya,

mĩgũnda mĩnoru, nyũmba ciaiyũire ũtonga

marima meenjeetwo ma maaĩ,

mĩtĩ ya mĩtamaiyũ, mĩtĩ ya matunda

o na mĩgũnda ya mĩthabibũ.

Nao andũ acio magĩkĩria makĩhũũna na makĩnora mũno.

Magĩgĩkenera indo icio ciothe njega wamaheete.

26 “No rĩĩrĩ, andũ aaku magĩgũũkĩrĩra

magĩkũremera na magĩkararia Watho waku.

Magĩkĩũraga anabii arĩa maamataaraga

magarũrũke magũcookerere.

Magĩikara magĩkũrumaga kaingĩ kaingĩ.

27 Ũgĩgĩtũma mahootwo na maathwo

nĩ thũ ciao.

Marĩ mathĩĩnainĩ macio maao magĩgũkaĩra ũmateithie,

nawe ũgĩkĩmaigua ũrĩ o kũu igũrũ.

Tondũ wa ũrĩa wĩ wa tha nyingĩ

ũkĩmatũmĩra atongoria, nao makĩmahonokia kuuma mookoinĩ ma thũ ciao.

28 No thuuthainĩ maacookwo nĩ thaayũ, makĩĩhia rĩngĩ,

ũgĩgĩtũma mahootwo nĩ thũ ciao rĩngĩ.

Na rĩrĩa meeririre, magĩgũkaĩra ũmahonokie,

ũgĩkĩmaigua ũrĩ o kũu gwaku igũrũ,

na mahinda maingĩ ũgĩikara ũkĩmahonokagia

nĩ ũndũ wa ũrĩa tha ciaku i nyingĩ.

29 Ũgĩkĩmataara maathĩkagĩre ũrutani waku;

no rĩĩrĩ, o no gwĩtĩĩa, o na kwaga

gwathĩkĩra Watho waku

o ũrĩa ũtũũragia mũndũ muoyo angĩwathĩkĩra.

Magĩkĩrema o kũrema, magĩkĩrega gwathĩka.

30 Ũgĩkĩrĩrĩria kũmataara mwaka o mwaka ũkirĩrĩirie.

Ũkĩmataara na tũnua twa anabii aaku,

no andũ aaku matiigana gũthikĩrĩria,

na tondũ ũcio ũkĩmarekereria

mahootwo nĩ ndũũrĩrĩ ingĩ.

31 Ningĩ o na gwatuĩka nĩ ũguo-rĩ,

ndũigana kũmaniina o na kana kũmatiganĩria,

nĩ ũndũ wa ũrĩa tha ciaku i nyingĩ.

Wĩ Ngai mũtugi na mũigua tha.

32 “Na rĩu, wee Ngai witũ wĩ na hinya

ningĩ wĩ mũnene na wa kũmakania.

Wee ũtũũraga ũmenyereire kĩrĩĩkanĩro

kĩrĩa warĩĩkanĩire na andũ aaku.

Kuuma rĩrĩa twahinyĩrĩirio nĩ athamaki a Aasiria kinyagia ũũmũũthĩ

nĩtũhinyĩrĩrĩkĩĩte mũno!

Athamaki aitũ, atongoria aitũ,

athĩnjĩri Ngai aitũ, anabii aitũ, maithe maitũ,

o na andũ aitũ oothe nĩmahinyĩrĩrĩkĩĩte mũno.

Ririkana Ngai ũrĩa twanahinyĩrĩrĩka.

33 Nĩwĩkĩĩte wega nĩgũtũherithia,

ũkoreetwo wĩ mwĩhokeku,

o na gũtuĩka ithuĩ tũkoreetwo twĩhĩĩtie.

34 Maithe maitũ, athamaki aitũ,

atongoria aitũ, o na athĩnjĩri Ngai

matiigana kũrũmĩrĩra Watho waku.

Matiigana gũthikĩrĩria maathani maaku

o na mataaro maaku.

35 Nao athamaki aaku magĩgĩthamakĩra andũ aaku ũkĩmaraathimaga,

o rĩrĩa maatũũraga bũrũri ũcio mwariĩ na mũnoru wamaheete.

No rĩĩrĩ, matiigana gũtigana na meehia maao nĩguo magũtungatĩre.

36 Na rĩu, ũũmũũthĩ tũrĩ ngombo

bũrũriinĩ ũrĩa watũheire,

o bũrũri ũyũ mũnoru ũrĩa ũtũheaga irio.

37 Bũrũri ũyũ kĩrĩa uumaga gĩthiaga na athamaki,

arĩa ũigĩĩte kuo matũthamakagĩre nĩ ũndũ nĩtwehirie.

Nao matwĩkaga o hamwe na mahiũ maitũ o ũndũ ũrĩa mekwenda,

na ithuĩ twĩ na thĩĩna mũingĩ mũno.”

Andũ gwĩkĩra Kĩrĩĩkanĩro thaĩri

38 Na rĩĩrĩ, nĩ ũndũ wa maũndũ macio moothe meekĩkĩĩte, ithuĩ andũ a Isiraeli, nĩtũkwandĩkanĩra kĩrĩĩkanĩro kĩrũmu, nao atongoria aitũ, na Alawii aitũ, o na athĩnjĩri Ngai aitũ meekĩre thaĩri ciao.