Category: Nahumu

Gũtaarĩria

Ibuku rĩa Nahumu nĩ marebeta ma gũkũngũĩra kũng’aũranio kwa itũũra rĩa Nineve. Itũũra rĩĩrĩ rĩa Nineve nĩrĩo rĩarĩ mũciĩ mũnene wa Aasiria arĩa maatũire mahinyagĩrĩria Aisiraeli o na marĩ thũ ciao matukũinĩ ma tene. Kũng’aũranio kwa Nineve kwarĩ mũthiainĩ wa mĩaka ya 700 mbere ya gũciarwo kwa Jesũ Kristũ. Ũndũ ũyũ wa kũng’aũranio kwa itũũra rĩa Nineve wonekaga ta itua rĩa Ngai we mwene igũrũ wa rũũrĩrĩ rũtarĩ tha na rwĩtĩĩi.

Maũndũ marĩa marĩ ibukuinĩ rĩĩrĩ

Nineve gũtuĩrwo 1.1-15

Nineve kũng’aũranio 2.1–3.19

1 Ĩno nĩ ndũmĩrĩri nditũ ĩkoniĩ Nineve. Ningĩ nĩ maũndũ marĩa maaguũrĩirio Nahumu ũrĩa woimĩĩte itũũra rĩetagwo Elikoshi.

MWATHANI kũraakarĩra Nineve

2 MWATHANI Ngai ndeendaga kũigananio na ũngĩ:

nĩaherithagia arĩa mamũkararagia.

Nĩerĩhagĩria harĩ o e na mang’ũrĩ.

3 MWATHANI ndahiũhaga kũraakara,

no nĩarĩ hinya

na ndangĩaga kũherithia mũndũ mwaganu.

Harĩa MWATHANI agerera, hoimaga kĩhuuhũkanio,

namo magũrũ maake moombũraga mbĩĩri ndumanu.

4 Akũũmaga iria rĩkahũa!

Agatũma njũũĩ ihũe,

ithaka cia Bashani ciũme,

kĩrĩma gĩa Karimeli kĩhũrũrũke,

namo mahũa ma kũu Lebanoni mahoohe.

5 Irĩma nĩgũthingitha ithingithaga ciamuona,

nacio ithũngũri ikaringũka.

Thĩ yamuona no kũinaina ĩinainaga,

mabũrũri na andũ oothe makaiyũrwo nĩ guoya.

6 Nũũ ũngĩhota gwĩtiiria maraakara maake?

O na kana etiirie mang’ũrĩka maake?

Aitũrũraga maraakara maake mahaana ta mwaki ũkũrĩrĩmbũka,

na agaatũranga ndwaro cia mahiga icunjĩ icunjĩ.

7 MWATHANI nĩ mwega,

nĩagitagĩra andũ aake hĩndĩ ya mathĩĩna;

na nĩamenyagĩrĩra arĩa mamwĩhokeete.

8 Thũ ciake aciniinaga ta iniinĩĩtwo nĩ mũiyũro wa rũũĩ,

nao arĩa mamũkararagia akameerekeria o gĩkuũinĩ.

9 Nĩ ũndũ ũrĩkũ ũrathugundĩra MWATHANI?

Nĩkũniina egũkũniina.

Gũtirĩ ũngĩrũũgamana naake keerĩ.

10 Inyuĩ arĩĩu mũgaacinwo mũthire biũ,

o ta mĩigua mĩtumanu mũno,

o na kana ta rũũa rũũmũ.

11 Atĩrĩĩrĩ, andũ a Nineve,

he na mũndũ ũrĩ na mĩbango mĩũru uumĩĩte kũu kwanyu.

Mũndũ ũcio-rĩ, nĩathugundĩire MWATHANI mathugunda mooru.

12 Na rĩĩrĩ, MWATHANI arakĩĩra andũ aake a Isiraeli atĩrĩ,

“O na angĩkorwo Aasiria marĩ na hinya mũno na nĩ aingĩ-rĩ,

gũtirĩ hingo matakaaniinwo mathire biũ.

Atĩrĩĩrĩ, inyuĩ andũ aya aakwa, nĩndĩmũhũũrĩĩte,

no ndigũcooka kũmũhũũra rĩngĩ.

13 Na rĩu, nĩngũniina hinya wothe wa Aasiria,

na nduange mĩnyororo yothe ĩrĩa mamuoheete nayo.”

14 Atĩrĩĩrĩ, MWATHANI aathanĩĩte igũrũ rĩa Aasiria akoiga atĩrĩ,

“Aasiria makaaniinwo na hatirĩ njiarwa ciao igaatigara.

Nayo mĩhianano ya ngai ciao ĩrĩa ĩrĩ hekaarũinĩ ciao, nĩngaamĩananga yothe.

Atĩrĩĩrĩ, inyuĩ Aasiria nĩkwenjithia ndĩramwenjithĩria mbĩĩrĩra,

nĩ ũndũ mũtiagĩrĩirwo nĩgũtũũra muoyo.”

15 Oneei, kwĩ na mũndũ ũroima na irimainĩ amũreeheire ũhoro mwega!

Aramũreehera ndũmĩrĩri ya ũhootani!

Atĩrĩĩrĩ, inyuĩ andũ a Juda rĩai maruga maanyu mũkeneete,

nĩmũhingĩirie MWATHANI mĩĩhĩtwa yanyu.

Imaramari icio cia Asiria itigaacooka gũtuĩkania bũrũri wanyu rĩngĩ.

Rĩu nĩiniinĩĩtwo igathira biũ!

Kũng’aũranio kwa Nineve

1 Atĩrĩĩrĩ, andũ aya a Nineve, rĩu mũrĩ athiũrũrũkĩrie!

Mũmũniini nĩakinya.

Ita cianyu nĩciĩhotore!

Rangĩraai njĩra.

Mwĩhaarĩriei kũrũa mbaara.

2 (Nĩ gũkorwo MWATHANI nĩarehaarĩria gũcookeria Aisiraeli riiri wao,

riiri o ũrĩa maarĩ naguo mbere ya kwanangwo nĩ thũ.)

3 Thũ cianyu ikuuĩĩte ngo nduune

na ikehumba nguo nduune cia mbaara.

Nĩciĩhaarĩirie gũtharĩkĩra!

Ngaari ciacio cia mbarathi irahenahenũka ta mwaki.

Mbarathi ciacio no gũtuuma iratuumatuuma.

4 Ngaari ciacio cia mbarathi ihithũkĩĩte na ũũru mũingĩ kũu njĩrainĩ,

irateng’era na gũũkũ na kũũrĩa itũũrainĩ.

Ironwo ihaana ta imũrĩ cia mwaki,

na irahiũka ta rũheni.

5 Atongoria nĩmeetĩĩtwo hamwe,

marooka makĩhĩngagwo.

Marahiũhahiũha makinye rũthingoinĩ rwakuo

nĩ geetha mahaarĩrie indo cia kũrũtharĩkĩra.

6 Ihingo iria irĩ ndeereinĩ cia rũũĩ nĩhingũre;

nayo nyũmba ya ũthamaki ĩiyũire kĩmako

7 Kwini nĩanyiitĩĩtwo agatahwo,

ndungata ciake irarĩra ta ndutuura, ikĩĩhũũrahũũraga gĩthũri nĩ kĩeha.

8 Nineve kũhaana o ta iria riunĩĩte,

andũ aakuo nĩkũũra maroora.

Kũraanĩrĩrwo gũkiugagwo atĩrĩ,

“Tigaai kũũra! Tigaai kũũra!”

No rĩĩrĩ, gũtirĩ o na ũ ũrehũgũra.

9 Tahaai betha na thahabu o gũtaha,

ũtonga ũrĩa ũrĩ itũũra rĩĩrĩ nĩ mũingĩ!

10 Itũũra rĩa Nineve nĩrĩanange, nĩrĩtiganĩrie, rĩkirĩĩte ihooru!

Ngoro nĩkũhũũra ĩrahũũra nĩ guoya;

maru nĩ maregeru,

hinya wothe nĩ mũthiru,

nacio ithiithi nĩ thitu.

11 Rĩu-rĩ, itũũra rĩrĩa rĩrahaanaga ta kĩmaamo kĩa mĩrũũthi rĩrĩ ha?

O itũũra rĩrĩa mĩrũũthi ĩraheyagĩra ciana ciayo gĩa kũrĩa,

o kũndũ kũrĩa mĩrũũthi ya njamba o na ya mĩgoma ĩratũũraga,

na kũrĩa ciana ciayo iratũũraga na thaayũ.

12 Mũrũũthi woragĩire ciana ciaguo nyamũ cia gũciigana,

o na cia kũhũũnwo nĩ mĩrũũthi ya mĩgoma.

Ningĩ ũkĩiyũria kĩmaamo kĩaguo

na icunjĩ cia nyama.

13 MWATHANI mwene hinya wothe aroiga atĩrĩ, “Nĩ niĩ thũ yaku. Ngũcina ngaari ciaku ciothe cia mbarathi na mwaki. Thigari ciaku ikooragĩrwo mbaarainĩ, na niĩ nguue indo ciothe iria watuunyĩĩte andũ arĩa angĩ. Mĩgambo ya arekio aaku ndĩgaacooka kũiguuo o na rĩ.”

1 Hĩ! Kaĩ itũũra rĩrĩa rĩiyũire maheeni

na rĩitithagia thakame rĩrĩ thĩĩnainĩ-ĩ!

Kaĩ itũũra o rĩrĩa rĩngĩtahwo

ũtonga warĩo na ndũthire rĩrĩ thĩĩnainĩ-ĩ!

2 Taigua mwanũko wa kĩboko,

mũrurumo wa magũrũ ma ngaari cia mbarathi,

mũkubio wa mbarathi,

o na ngaari cia mbarathi ikĩrũũgarũũga!

3 Andũ mahaicĩĩte mbarathi nĩgũtharĩkĩra maratharĩkĩra,

hiũ no kũmenamenũka,

namo matimũ no kũhenahenia!

Andũ makooragwo,

ciimba itangĩtarĩka ikamaamanĩra,

andũ makahĩngagwo nĩcio!

4 Atĩrĩĩrĩ, itũũra rĩa Nineve rĩraherithio nĩ ũndũ wa ũmaraaya warĩo!

Rĩraheenagĩrĩria ndũũrĩrĩ na ũthaka warĩo,

rĩgaciguucĩrĩria na mĩthaiga yarĩo ĩtangĩtatĩka,

rĩgacitua ngombo ciarĩo.

5 MWATHANI Mwene Hinya Wothe aroiga,

“Nĩngũkũherithia, wee itũũra rĩĩrĩ rĩa Nineve,

ngũkũruta nguo ngũtige njaga;

ndeke ndũũrĩrĩ ikwĩrorere

mahinda macio ũiyũrĩĩtwo nĩ gĩconoko.

6 Nĩngũtũma ũgwatwo nĩ maũndũ me magigi,

na ndũme ũgwatwo nĩ thaahu

ũgĩtuĩke kĩndũ gĩa kũnyararwo.

7 Andũ makuona nĩkũũra marĩũraga makiugaga atĩrĩ,

‘Hĩ! Kaĩ itũũra rĩa Nineve rĩtigĩĩtwo rĩrĩ o maganjo-ĩ!

Nũũ ũngĩrĩiguĩra tha?

Nũũ ũngĩrĩhooreria?’ ”

8 Atĩrĩĩrĩ, itũũra rĩĩrĩ rĩa Nineve,

ũgwĩciiria wee nĩ we mwega gũkĩra Thebesi,

mũciĩ ũrĩa mũnene wakĩĩtwo rũteereinĩ rwa rũũĩ rwa Nailo,

ũthiũrũrũkĩirio nĩ maaĩ mĩena yothe,

magatuĩka rũthingo rwaruo?

9 Mũciĩ ũcio nĩguo wathaga Ethiopia na Misiri,

ũhoti waguo ndwarĩ na gĩthimi,

na nĩwateithagĩrĩrio nĩ mabũrũri ma Putu na Libia.

10 O na mũciĩ wa Thebesi ũtariĩ ũguo-rĩ,

andũ aaguo maatahirwo magĩthaamio;

o nacio ciana ciao ikĩmemenderwo kũu barabarainĩ igĩkua;

andũ aao arĩa atĩĩĩku makĩohwo na mĩnyororo,

nao arĩa maamatahĩĩte makĩmacuukĩra mĩtĩ, o mũndũ agĩkuua aake.

11 Atĩrĩĩrĩ, wee Nineve, ũkaarĩĩo nĩ njoohi ũtũgũũge.

Ningĩ nĩũgaacaria handũ ha kwĩhitha thũ ciaku.

12 Nyũmba ciaku iria njake cia kwĩgitĩra ikaahaana o ta mĩkũyũ

ĩrĩ na ngũyũ iria ciambĩĩte kwĩrua.

Ciainainio igũaga o kanuainĩ ka mũcirĩi.

13 Atĩrĩĩrĩ, thigari ciaku irĩ guoya o ta andũ a nja,

bũrũri waku ndũrĩ na wa kũũgitĩra harĩ thũ ciaku.

Ihingo ciaku icinĩĩtwo na mwaki irĩ o hinge.

14 Wĩtahĩre maaĩ nĩguo ũgaakorwo namo hĩndĩ ĩrĩa ũkaarigiicĩrio;

nyũmba ciaku iria njake na thingo cia hinya cia kwĩgitĩra cirũmie wega!

Ranga ndooro ũthondeke maturubaarĩ

haarĩriai harĩa megũthondekerwo.

15 O na weka ũguo, no ũgaacinwo na mwaki,

waga gũcinwo na mwaki ũkooragĩrwo mbaarainĩ.

ũkaaniinwo o ta ũrĩa nyeki ĩthiraga yarĩo nĩ ngigĩ.

Ciaranaai o ta ngigĩ!

16 Oonjoria aaku maingĩhĩĩte magakĩra njata cia igũrũ!

Rĩu mathiĩte makabuĩria,

o ta ũrĩa ngigĩ ibatabataga ikoombũka.

17 Anene aaku maingĩhĩĩte o ta mũrumbĩ wa ngigĩ;

mahaana o ta ngigĩ ũrĩa ciũmbaga ngiriinĩ hĩndĩ ya heho.

Riũa rĩara ciũmbũkaga igathiĩ,

kũrĩa ithiaga gũtirĩ mũndũ ũũĩ.

18 Atĩrĩĩrĩ, wee mũthamaki wa Aasiria,

abarũũthi aaku nĩmakuĩte,

nao andũ aaku a bata magakoma toro matagookĩra.

Andũ aaku mahurunjũkĩire irĩma igũrũ;

na hatirĩ wa kũmacookanĩrĩria.

19 Nguraro ciaku itingĩhoneka;

ironda ciaku nĩtheeu mũno.

Arĩa oothe maraigua ũhoro wa kũrũndwo gwaku

nĩkũhũũra marahũũra hĩ magĩgũkenerera.

Rĩu-rĩ, nũũ ũtaacamithirie ũũru ũcio waku ũtaarĩ mũthia?