Category: Macakaya

GŨTAARĨRIA

Ibuku rĩĩrĩ rĩa Macakaya nĩ mũũnganio wa marebeta mataano ma gũcakaĩra kwanangwo gwa itũũra rĩa Jerusalemu kũrĩa gwekĩkire mwakainĩ wa 586 mbere ya gũciarwo kwa Jesũ Kristũ. Ningĩ macakaya maya nĩ ma gũcakaĩra gũthaamio kwa andũ aarĩo rĩarĩĩkia kwanangwo. O na gũtuĩka gĩcunjĩ kĩrĩa kĩnene kĩa ibuku rĩĩrĩ nĩ gĩa kuonania kĩeha, nĩ rĩĩrĩ na gĩcunjĩ gĩa kuonania mwĩhoko harĩ Ngai o na kĩĩrĩgĩrĩro kĩa mahinda marĩa magooka. Marebeta maya nĩmahũthagĩrwo nĩ Ayahudi magĩthaathaiya Ngai hĩndĩ ya thigũkũ cia kwĩhinga irio na cia gũcakaya rĩrĩa mekũririkana mwanangĩko wa bũrũri wao wa mwaka 586 mbere ya gũciarwo kwa Jesũ Kristũ.

Maũndũ marĩa marĩ ibukuinĩ rĩĩrĩ

Kĩeha kĩa Jerusalemu 1.1-22

Kũherithio kwa Jerusalemu 2.1-22

Ihera na kĩĩrĩgĩrĩro 3.1-66

Thuutha wa kwanangwo kwa Jerusalemu 4.1-22

Ihooya rĩa kũũria tha 5.1-22

Kĩeha kĩa Jerusalemu

1 Kaĩ Jerusalemu itũũra rĩraiyũire andũ,

nĩrĩkirĩĩte ihooru-ĩ!

Nĩrĩraheetwo gĩtĩĩo nĩ thĩ yothe,

no rĩu rĩhaana o ta mũtumia wa ndigwa.

Rĩrahaanaga ta mwarĩ wa mũthamaki

rĩĩrĩ gatagatĩinĩ ka matũũra marĩa mangĩ,

no rĩu rĩtuĩkĩĩte o ta ngombo.

2 Ũtukũ wothe no kũrĩra rĩrarĩra,

maithori makĩnyũrũrũkaga makaiinĩ maarĩo.

Andũ arĩa oothe mararĩendeete gũtirĩ ũrarĩhooreria.

Araata aarĩo oothe nĩmarĩtiganĩirie,

marĩgarũrũkĩĩte magatuĩka thũ ciarĩo.

3 Andũ a Juda nĩ ngombo itangĩĩteithia,

irutũrũrĩĩtwo mũciĩ.

Maratũũra mabũrũri mageni,

matirĩ kũndũ mangĩĩta kwao.

Mathiũrũrũkĩirio nĩ thũ

na matirĩ na ha kũũrĩra.

4 Gũtirĩ andũ marooka Hekaarũinĩ

gũthaathaiya Ngai mĩthenya ya thigũkũ.

Airĩĩtu arĩa mainaga kuo manyariirĩĩtwo magathira,

athĩnjĩri Ngai nao no gwĩthikĩra methikĩire.

Ihingo cia itũũra nĩhingũranie,

Zayuni kũiyũire o mĩnyamaaro.

5 Thũ cia Jerusalemu nĩcio ituĩkĩĩte anene na ikagaacĩra kuo;

MWATHANI nĩarĩherithĩĩtie

nĩ ũndũ wa ũrĩa mahĩtia maarĩo maingĩhĩĩte.

Ciana ciarĩo itahĩĩtwo na igathiio nacio.

6 Riiri wothe wa Jerusalemu nĩũthengeetio.

Anene aakuo matuĩkĩĩte o ta thwariga ĩhinyarĩĩte nĩ ng’aragu.

Maramateng’erio, no matirĩ na hinya wa kũũra.

7 Mahinda ma mathĩĩna na mũũro,

Jerusalemu rĩraririkana riiri ũrĩa rĩarĩ naguo tene.

No andũ aarĩo maanyiitwo nĩ thũ,

gũtirĩ mũndũ wokire kũrĩteithĩrĩria.

Thũ ciarĩo nĩgũkenera irakenera kũgwa kwarĩo.

8 Jerusalemu nĩrĩhĩĩtie mũno, rĩgakĩgwatwo nĩ thaahu.

Arĩa oothe mararĩheete gĩtĩĩo nĩ marĩmeneete

tondũ nĩmooneete njaga yarĩo.

Rĩgĩthikĩire na rĩkehumbĩra ũthiũ warĩo

tondũ wa ũrĩa rĩconokeete.

9 Gĩko kĩarĩo kĩronekana o wega,

no rĩtiratarania ũhoro wa marĩĩkĩrĩrio maarĩo.

Kũgwa kwarĩo kũraarĩ gwa kũmakania;

gũtirĩ ũngĩhota kũrĩhooreria.

Rĩroiga atĩrĩ, “MWATHANI, rora wone mĩnyamaaro yakwa,

nĩ gũkorwo thũ ciakwa nĩcio ihootanĩĩte.”

10 Thũ ciarĩo iratambũrũkĩĩtie mooko

irenyiitĩra mũthiithũ warĩo wothe.

Nĩrĩronire ndũũrĩrĩ ng’eni igĩtharĩkĩra Hekaarũ,

o irĩa MWATHANI ateetĩkĩrĩĩtie itoonye kuo.

11 Andũ oothe a Jerusalemu maracakaya

magĩcaria gĩa kũrĩa.

Maracenjania mũthiithũ wao na irio

o geetha metũũrie muoyo.

Itũũra rĩa Jerusalemu rĩroiga atĩrĩ

“MWATHANI, ndora wone ũrĩa menereirio.”

12 Itũũra rĩa Jerusalemu rĩroiga atĩrĩ,

“Inyuĩ mũrahĩtũka, kaĩ ũndũ ũyũ ũtaramũmakia?

Roraai muone gũtirĩ mũndũ

ũrĩ wakorererwo nĩ thĩĩna mũnene ta ũyũ wakwa;

thĩĩna ũyũ nĩ MWATHANI wandeehithĩirie,

aandeehithĩirie mũthenya ũrĩa aaraakarĩĩte mũno.

13 “Aatũmire mwaki kuuma igũrũ, mwaki ũcio ũgĩkĩnjina o kũnjina.

Aanjikirie mũtego akĩnũnda.

Agĩcooka akĩndiganĩria,

agĩkĩndiga ndĩ na ruwo rũtagũthira.

14 “MWATHANI nĩaririkanire mahĩtia maakwa moothe

na akĩmacookanĩrĩria moothe hamwe.

Akĩmacuuria ngingoinĩ yakwa,

magĩkĩnjagithia hinya nĩ ũrĩa maarĩ maritũ.

Agĩkĩĩnenganĩra mookoinĩ ma thũ ciakwa,

andũ itangĩahotire gwĩtiiria.

15 “MWATHANI agĩgĩthekerera thigari ciakwa ciothe iria njamba,

agĩgĩtũma mbũtũ yũke yanange aanake aakwa,

agĩgĩkimania andũ aakwa o ta thabibũ irĩ kĩhihĩroinĩ.

16 “Kĩu nĩkĩo kĩratũma ndĩre,

na maitho maakwa maiyũire maithori.

Gũtirĩ mũndũ ũngĩhota kũũhooreria o na kana kũnyũmĩrĩria.

Thũ ciakwa nĩihooteete,

na ciana ciakwa itigĩĩtwo itarĩ na kĩndũ.

17 Ndĩratambarũkia njara, na gũtirĩ mũndũ ũrandeithia.

MWATHANI aranjĩtĩire thũ ciumĩĩte mĩena yothe.

Nduĩkĩĩte kĩndũ kĩrĩ magigi harĩ cio.

18 “No rĩĩrĩ, MWATHANI eekĩĩte ũndũ wa kĩhooto

tondũ nĩ niĩ ndamũremeire.

Andũ oothe thikĩrĩriai;

roraai muone mĩnyamaaro yakwa.

Aanake na airĩĩtu aakwa nĩmatwarĩĩtwo ithaamĩrio.

19 “Ndĩretire araata aakwa nao marakĩaga kũndeithia.

Athĩnjĩri Ngai na atongoria maragĩkuĩra gũũkũ itũũrainĩ,

magĩcaria gĩa kũrĩa nĩ geetha metũũrie muoyo.

20 “MWATHANI taone ũrĩa ndĩ na kĩeha,

na ũrĩa ndĩ na ruwo ngoro!

Ngoro yakwa ĩratangĩka nĩ ũrĩa ndanakũremera.

Njĩrainĩ no njũragano ndĩrona,

nyũmba thĩinĩ nakuo no ikuũ.

21 “Andũ nĩmaraiguire ngĩcaaya,

na gũtirĩ ũrooka kũnyũmĩrĩria.

Thũ ciakwa nĩiraiguire thĩĩna wakwa,

iragĩkenerera ũguo ũnjĩkĩĩte.

Cireehere mũthenya ũrĩa wĩranĩire,

reke thũ ciakwa inyamaarĩke ta niĩ.

22 “Citũire nĩ ũndũ wa waganu wacio wothe,

ciherithie ta ũguo ũherithĩĩtie nĩ ũndũ wa meehia maakwa.

Nĩgũcaaya ndĩracaaya nĩ ũrĩa thĩĩnĩkĩĩte,

na ndĩ mũrũaru ngoro.”

MWATHANI kũherithia Jerusalemu

1 Hĩ! MWATHANI araakarĩĩte

akahumbĩra Zayuni na nduma!

Riiri wa Isiraeli aũrutĩĩte kuuma o igũrũ

akaũgũithia thĩ.

Mũthenya ũrĩa aaraakarĩĩte

nĩatiganĩirie gaturwa gaake.

2 MWATHANI nĩanangĩĩte matũũra moothe ma Juda atarĩ na tha o na haniini.

Ningĩ nĩamomoranĩĩtie nyũmba cia kwĩgitĩra cia Juda arĩ na marũrũ maingĩ.

Nĩaconorithĩĩtie ũthamaki na anene aaguo.

3 Arĩ na marũrũ maingĩ, nĩatuunyĩĩte Isiraeli hinya wothe.

Rĩrĩa thũ ciakuhĩhĩirie nĩahetire guoko gwake kwa ũrĩo.

Aarĩrĩmbũkĩire ciana cia Jakubu

o ta mwaki ũrarĩrĩmbũka ũgacina indo ciothe.

4 Aatwerekeirie mĩguĩ yake ta arĩ thũ

akĩũraga arĩa oothe twerahaga nao.

Nĩtũkinyĩrĩirwo nĩ maraakara maake mararĩrĩmbũka ta mwaki gũũkũ Jerusalemu.

5 MWATHANI atuĩkĩĩte o ta arĩ thũ akaananga Isiraeli;

nĩamomorangĩĩte nyũmba ciakuo ciothe cia ũthamaki o na cia kwĩgitĩra.

Andũ a Juda nĩkũmaingĩhĩria amaingĩhĩirie gũcakaya na kĩrĩro.

6 MWATHANI nĩaharaganĩĩtie Hekaarũ ĩrĩa tũmũthaathayagĩria,

nĩatũmĩĩte thigũkũ na Thabatũ iriganĩre kũu Zayuni,

na akarega mũthamaki na mũthĩnjĩri Ngai arĩ na mang’ũrĩ maingĩ.

7 MWATHANI nĩaregeete kĩgongoona gĩake na agatiganĩria Hekaarũ yake.

Nĩetĩkĩrĩĩtie thũ imomoranie thingo ciayo,

thũ iroigĩrĩria irĩ Hekaarũ thĩinĩ nĩkũhootana

o ta arĩ mũthenya wa thigũkũ.

8 MWATHANI nĩabangĩĩte atĩ thingo cia Zayuni nĩikaamomorwo,

nĩacithimĩĩte wega nĩguo oone atĩ ciothe nĩcianangwo.

Nyũmba cia kwĩgitĩra o hamwe na thingo

nĩmomoranie ciothe.

9 Ihingo ciakuo nĩihorokeire na thĩ na cuuma ciacio ikoinangwo.

Mũthamaki na anene aakuo nĩathaamie.

Watho nĩũtigĩĩte kũrutanwo,

nao anabii matironio cioneki nĩ MWATHANI.

10 Athuuri a itũũra rĩa Zayuni maikarĩĩte thĩ methikĩire,

meitĩrĩirie mũhu mũtwe na makehumba nguo cia makũnia.

Airĩĩtu a itũũra rĩa Jerusalemu maikarĩĩte mainamĩĩtie mĩtwe.

11 Maitho maakwa nĩmanogeetio nĩkũrĩra,

nayo ngoro yakwa ĩrĩ na ruwo.

Ngoro yakwa ĩrĩ na kĩeha tondũ andũ aakwa nĩmaanangĩĩtwo.

Ciana na ngeenge iraringĩkĩra o kũu njĩrainĩ cia itũũra.

12 Irarĩrĩra maanyina

ikĩmooragia gĩa kũrĩa na gĩa kũnyua.

Iraringĩkĩra kũu njĩrainĩ cia itũũra o ta andũ atiihangie.

Irakua o kahora irĩ o mookoinĩ ma maanyina.

13 Jerusalemu, ngũgĩkwĩra atĩa?

Ingĩkũhaanania na ũ?

Zayuni, ingĩkũgerekania na ũ nĩguo ngũhoorerie?

Mwanangĩko waku nĩ mũingĩ o ta maaĩ ma iria

na ndũrĩ na mwĩhoko o na atĩa.

14 Anabii aaku maakuoneire

o cioneki cia maheeni na cia tũhũ.

Matiakũmenyithirie mahĩtia maaku nĩguo ũhere ndũgaatwarwo ithaamĩrĩoinĩ.

Maakũheete o ndũmĩrĩri

cia maheeni na cia gũkũhĩtithia.

15 Andũ oothe arĩa marahĩtũkĩra hakuhĩ nawe, no kũnyiira marakũnyiira.

Marainainia mĩtwe yao makiugaga hĩ hĩ hĩ hĩ-ĩ!

nĩkuona ũrĩa Jerusalemu yanangĩĩtwo.

Marorania atĩrĩ, “Ĩ itũũra rĩĩrĩ no rĩrĩa rĩraarĩ kĩĩrorerwa?

Ĩ norĩo rĩretĩĩagwo narĩo nĩ thĩ yothe?”

16 Thũ ciaku ciothe nĩgwathamia igwathamĩirie kanua,

ikiugaga hĩ hĩ hĩ hĩ-ĩ!

Ĩrahagarania magego ikiugaga atĩrĩ,

“Nĩtũrĩanangĩĩte.

Mũthenya ũyũ nĩguo tũretereire

na rĩu nĩmũkinyu na nĩtũwoneete.”

17 MWATHANI nĩahingĩĩtie ũndũ ũrĩa aabangĩĩte nĩagwĩka

Atwanangĩĩte atarĩ na tha o ta ũrĩa oigĩĩte o tene.

Nĩaheete thũ ciitũ ũhootani,

nĩgũkenerera irakenerera kũhootwo gwitũ.

18 Jerusalemu, thingo ciaku nĩikaĩre MWATHANI,

maithori maaku nĩmanyũrũrũke o ta rũũĩ ũtukũ na mũthenya;

rĩra ũtegũtigithĩria na ndũkaanoge.

19 Ũkĩraga ũtukũ kaingĩ kaingĩ, ũgakaĩra MWATHANI.

Mũitũrũragĩre ngoro yaku o ta maaĩ,

mũkayagĩre aiguĩre ciana ciaku tha,

tondũ iraringĩkĩra njĩrainĩ ciothe,

nĩ ũrĩa ihũũtĩĩte.

20 MWATHANI, rora wone!

Kũrĩ mũndũ ũngĩ ũrĩ weka ũũ?

Atumia nĩmaagĩrĩirwo nĩkũrĩa ciana ciao iria maciarĩĩte?

Athĩnjĩri Ngai na anabii-rĩ, nĩkwagĩrĩire mooragĩrwo Hekaarũinĩ yaku?

21 Andũ eethĩ na akũrũ makomeete njĩrainĩ marĩ akuũ,

Aanake na airĩĩtu

wamooragithirie na rũhiũ rwa njora,

ũtekũmaiguĩra tha mũthenya ũrĩa waraakarĩĩte.

22 Wetire thũ ciakwa o ta andũ meetagĩrwo thigũkũ

ciũke injĩkĩre guoya na mĩena yothe.

Mũthenya ũcio warĩ mũraakaru, MWATHANI,

na gũtirĩ mũndũ o na ũmwe wetharire kana akĩhonoka.

Thũ ciakwa nĩcioragire ciana iria nderereire na ndendeete.

Kũherithio, kwĩrira na kwĩrĩgĩrĩra

1 Ngai anyoneetie mathĩĩna na rũthanju rwa maraakara maake.

2 Anyingatithĩĩtie ngathiĩ ndumainĩ ndumanu.

3 Atindĩĩte akĩĩhũũra mũthenya wothe.

4 Atũmĩĩte mwĩrĩ wakwa ũhinyare

na akabeberanga mahĩndĩ maakwa.

5 Ahatĩrĩirie njikare njeera ya mathĩĩna na kĩeha.

6 Atũmĩĩte ndũũre ndumainĩ o ta andũ arĩa maakuire tene.

7 Athiũrũrũkĩirie na thingo

na akanjoha na bĩngũ ndikoore.

8 Rĩrĩa ndakaya kana ndeetia ũteithio,

ndathikagĩrĩria ihooya rĩakwa.

9 Ahingĩĩte njĩra ciakwa na irũndo cia mahiga,

na akahĩngĩĩcania njĩra iria ingĩgerera.

10 Anjoheirie ahaana o ta njũũi

kana ta mũrũũthi wĩĩhithĩire.

11 Anguucũrũrũkĩĩtie akanduta njĩrainĩ,

akandambururanga na akandiganĩria.

12 Ageeteete ũta wake,

akandathanga na mĩguĩ yake.

13 Atheeceete ngoro na mĩguĩ yumĩĩte thiakainĩ wake.

14 Nduĩkĩĩte kĩndũ gĩa gũthekererwo nĩ andũ oothe;

rĩrĩa mekũina mainaga makĩndemaga mũthenya wothe.

15 Anjiũrĩĩtie mathĩĩna,

ngakĩhũũna maruwo o kũhũũna.

16 Anũndĩĩte rũkũngũinĩ,

akangũũra magego na mahiga.

17 Anjagithĩĩtie thaayũ

kinya ngariganĩrwo atĩ nĩgũkenagwo,

18 ngagĩkiuga atĩrĩ, “Riiri wakwa na kĩĩrĩgĩrĩro

kuuma harĩ MWATHANI nĩthiru.”

19 Ndeciiria ũhoro wa ruwo rwakwa na kwanganga gwakwa

itũmaga ndũrĩrwo o ta mũndũ ũrũrĩirwo nĩ nyongo.

20 Ndĩciiragia maũndũ macio, ngoorwo nĩ hinya.

21 No rĩĩrĩ, ndirikanaga ũndũ ũyũ ũmwe

narĩo ngacookwo nĩ kĩĩrĩgĩrĩro,

22 atĩ ũtugi na tha cia MWATHANI itiagaga o rĩ o rĩ.

23 Irurumũkaga mũthenya o mũthenya;

wĩhokeku wake nĩ mũingĩ mũno.

24 Ngagĩkiuga na ngoro atĩrĩ, “ MWATHANI nĩ we igai rĩakwa

tondũ ũcio nĩngũmwĩrĩgĩrĩra.”

25 MWATHANI nĩ muuma andũ,

harĩ andũ oothe arĩa mamwĩhokaga na mamũcaragia.

26 Nĩ wega gweterera ũhonokio wa MWATHANI mũndũ ahooreire.

27 Kuuma mũndũ arĩ o mwĩthĩ,

nĩ wega kwĩruta gũkirĩrĩria.

28 Nĩ kaba gũikara mũndũ arĩ wiki na ahooreire

rĩrĩa akomerwo nĩ maũndũ maritũ.

29 Nĩainamĩrĩre enyiihĩĩtie,

kĩĩrĩgĩrĩro kĩahota gũkorwo o ho;

30 O na angĩhũũrwo na arumwo,

nĩamũkĩre maũndũ moothe.

31 MWATHANI ndangĩtũrega nginya tene na tene.

32 O na angĩtũreehithĩria kĩeha,

no egũcooka atũiguire tha

tondũ ũtugi wake nĩ mũingĩ.

33 Ndakenagio nĩkũherithania

kana nĩkũreehithĩria andũ kĩeha.

34 Ndakenaga kuona andũ arĩa oohe

makĩhinyĩrĩrio.

35 Ndakenaga kuona

mũndũ akĩimwo ihooto ciake.

36 Ndakenaga kuona

mũndũ agĩtuĩrwo nĩ igooti gũtarũmĩrĩirwo waragania.

37 Nũũ ũngĩhota gwathana na ũndũ ũhinge,

MWATHANI atabangĩĩte ũguo?

38 Githĩ maũũru na mawega moothe maatiũkaga

o rĩrĩa Ũrĩa Ũrĩ Igũrũ oiga?

39 Mũndũ arĩ muoyo akĩherithio nĩ ũndũ wa meehia maake-rĩ,

atetaga nĩkĩ?

40 Nĩtũthuuthuuriei na tũtuĩrie mĩtugo iitũ

tũcookerere MWATHANI.

41 Nĩtũhingũrĩreei Ngai ũrĩa ũrĩ matuinĩ ngoro ciitũ

tũmũhooe tũkĩmwĩraga atĩrĩ,

42 “Nĩtwĩhĩĩtie na nĩtũkũremeire,

nawe MWATHANI ndũtuoheire.

43 “Wĩhumbĩĩte maraakara ũgatũteng’eria,

ũgatũũraga ũtegũtũiguĩra tha.

44 Wĩhumbĩire na itu ithimbu,

mahooya maitũ matingĩhota kũrĩtũrĩkia.

45 Ũtũtuĩte gĩko na mborera andũ a ndũũrĩrĩ makĩyonagĩra.

46 “Thũ ciitũ ciothe nĩgwathamia

itwathamĩirie tũnua igĩtũrumaga na igĩtũnyũrũragia.

47 Tũikarĩĩte tũrĩ na guoya na tũmakĩĩte,

nĩtũkorereirwo nĩ mũthiro na mwanangĩko.

48 Maitho maakwa mathothokaga maithori o ta rũũĩ,

tondũ andũ aakwa nĩmaanangĩĩtwo.

49 “Maitho maakwa marĩitaga maithori mategũtigithĩria,

50 o kinya rĩrĩa MWATHANI, arĩ o igũrũ, arĩona.

51 Njiyũirwo nĩ kĩeha,

ndoona maũndũ marĩa meekĩĩtwo andũ a nja oothe a itũũra rĩakwa.

52 “Hĩtĩĩtwo o ta nyoni

nĩ thũ ciakwa iria imeneete hatarĩ gĩtũmi.

53 Cinjikĩĩtie irima ndĩ muoyo ikaahingĩra na ihiga.

54 Maaĩ manginyĩĩte o mũtwe

ngagĩciiria atĩ nĩndathira.

55 “Ndĩ o kũu irima thĩinĩ,

nĩndĩragũkaĩire we MWATHANI.

56 Nĩũraiguire ihooya rĩakwa

na ndũnahinga matũ maaku ngĩgũkaĩra ũndeithie.

57 Nĩũrookire hakuhĩ na niĩ ndagũkaĩra,

ũrakĩnjĩĩra ndige gwĩtigĩra.

58 “Nĩũroire ciira wakwa, MWATHANI,

na ũrakĩhonokia muoyo wakwa.

59 Nĩũronire maũũru marĩa njĩkĩĩtwo, MWATHANI,

ũragĩtua ciira wakwa na kĩhooto.

60 Nĩũronire wĩrĩhĩria wao wothe,

o na mĩbango yothe mĩũru ĩrĩa marabangĩire.

61 “MWATHANI, nĩũraiguire irumi ciao

o na mĩbango yothe mĩũru ĩrĩa marabangĩire.

62 Thũ ciakwa iratindaga mũthenya wothe ikĩaria

na igĩciiria o ũrĩa ingĩnjĩka ũũru.

63 Ũngĩracionire ciikaire thĩ kana irũngiĩ,

no niĩ ĩranyũrũragia na nyĩmbo ciacio.

64 “MWATHANI, gĩciherithie nĩ ũndũ wa maũndũ marĩa ciĩkĩĩte.

65 Ciũrage ngoro

na ũreke inyiitwo nĩ kĩrumi gĩaku.

66 MWATHANI citeng’erie ũraakaire

ũcianange ithire gũũkũ thĩ.”

Itũũra rĩa Jerusalemu thuutha wa kũng’aũranio

1 Atĩrĩĩrĩ, kaĩ thahabu nĩrooteete-ĩ!

Thahabu ĩrĩa therie mũno rĩu nĩngarũrũku!

Mahiga ma Hekaarũ maaraganĩĩtio magomanoinĩ moothe ma njĩra.

2 Aanake a Zayuni, arĩa maraarĩ bata ta thahabu,

rĩu maigananĩĩtio na nyũngũ cia rĩũmba iria ciũmbĩĩtwo nĩ mũndũ.

3 Mĩthige nĩyongithagia twana twayo,

no andũ aakwa matuĩkĩĩte o ta nyaga iria itiganagĩria tũcui twacio werũinĩ.

4 Tondũ-rĩ, ngeenge nĩgũkua irakua nĩkũnyoota;

ciana iretia irio na gũtirĩ mũndũ ũracihe.

5 Andũ arĩa mararĩaga irio njega,

rĩu marakuĩra barabarainĩ nĩ ng’aragu.

Arĩa mararereetwo ta ciana cia itonga,

rĩu marakoma kĩarainĩ kĩa mũhu.

6 Andũ aakwa nĩmaherithĩĩtio o na gũkĩra andũ a itũũra rĩa Sodomu,

rĩrĩa rĩanangirwo mũthenya o ro ũmwe rĩtahuutĩĩtio nĩ mũndũ.

7 Atongoria aitũ maraarĩ atheru gũkĩra mbarabu,

maraarĩ eerũ gũkĩra iria;

maraarĩ na hinya na nĩmareiguĩte mũno,

na maraarĩ na ũgima mwega wa mwĩrĩ.

8 Rĩu mairĩĩte magakĩra mbiro, matiramenyeka marĩ kũu barabarainĩ.

Ngoothi yao yũmĩĩte o ta ngũ

matigarĩĩte o mahĩndĩ matheri.

9 Andũ arĩa mooragĩirwo mbaarainĩ maarĩ na mũnyaka

gũkĩra arĩa marakua nĩ ng’aragu,

tondũ marathirĩrĩkĩrĩra kahora o kahora;

marakua nĩ wagi wa irio cia kũmaiga muoyo.

10 Na rĩĩrĩ, o na akorwo atumia marĩ tha-rĩ,

rĩrĩa andũ aakwa maanangagwo,

maarugaga ciana ciao eene igatuĩka irio magacirĩa.

11 MWATHANI, araakarĩĩte mũno mũno,

nĩaitũrũrire maraakara maake,

agĩcina itũũra rĩa Zayuni na mwaki, rĩkĩhĩa rĩothe.

12 Gũtirĩ mũthamaki o na kana mũtũũri o wothe wa thĩ wetĩkĩĩtie

atĩ thũ o na kana mũndũ wa gũtharĩkĩra

no atoonyere ihingoinĩ cia Jerusalemu.

13 Ũndũ ũcio watuĩkire tondũ anabii aakuo nĩmeehĩĩtie

o na athĩnjĩri Ngai aakuo nĩmaahĩtĩĩtie,

nĩgũita thakame ya andũ mataarĩ na mahĩtia.

14 Maacangacangaga njĩrainĩ o ta atumuumu,

maiyũirwo nĩ thakame ũguo atĩ gũtirĩ mũndũ ũngĩomĩrĩirie kũhuutia nguo ciao.

15 Andũ maamaingataga na kayũ kanene makĩmeeraga atĩrĩ,

“Umaai gũũkũ! Umaai gũũkũ!

Mũtigaatũkuhĩrĩrie tondũ mũrĩ na thaahu!”

Magĩkĩũrĩra kwa ndũũrĩrĩ,

magĩtũũra macangacangaga matarĩ na mũndũ wa kũmanyiita ũgeni.

16 MWATHANI we mwene nĩ we wamahurunjire na akĩmatiganĩria.

Athĩnjĩri Ngai magĩkĩagĩrwo gĩtĩĩo,

nao atongoria magĩkĩmenererio.

17 Ithuĩ na ithuĩ tũgĩcũũthĩrĩria tũkĩnoga;

twacaragia ũteithio na tũtiawonire.

Twacũũthagĩrĩria rũũrĩrĩ rũtangĩahotire gũtũhonokia.

18 Thũ nĩciatũtuĩragia, kwoguo tũtiahotaga gũthiĩra njĩrainĩ ciitũ.

Matukũ maitũ maarĩ matare

naguo mũthiro witũ warĩ hakuhĩ.

19 Arĩa maatũingataga maarĩ na ihenya gũkĩra nderi.

Maatũingatithagĩria irĩmainĩ

na magatwĩhithĩra werũinĩ.

20 Mũthamaki ũrĩa MWATHANI aitĩrĩirie maguta nĩanyiitirwo nĩ o,

na nĩ we warĩ mwĩhoko witũ.

Mbere ĩyo twehokeete atĩ nĩ we ũgaatũgitĩra kũrĩ ndũũrĩrĩ ciothe.

21 Andũ a Edomu, o inyuĩ mũtũũraga bũrũri wa Uzu,

kenaai na mũrũũhie.

No o na inyuĩ nĩmũkaanengererio gĩkombe kĩa mathĩĩna;

mũgaakĩnyuĩra mũrĩĩo kinya mũthiĩ njaga.

22 Zayuni, nĩũrĩĩkĩĩtie ihera rĩaku,

MWATHANI ndagũthiĩ na mbere gũgũtũũria ithaamĩrioinĩ.

No wee, Edomu, MWATHANI nĩegũkũherithia nĩ ũndũ wa mahĩtia maaku

na oimbũranie meehia maaku.

Ihooya rĩa kũũria tha cia Ngai

1 MWATHANI, ririkana maũndũ marĩa matũkorereire;

rora wone gĩconoko kĩrĩa tũrĩ nakĩo.

2 Igai riitũ rĩnengereetwo ageni,

nyũmba ciitũ iratũũrwo nĩ andũ a ndũũrĩrĩ.

3 Ithuĩ tũtuĩkĩĩte ciana itarĩ na maithe;

maanyina maitũ matuĩkĩĩte atumia a ndigwa.

4 Nĩkũgũra tũragũra maaĩ marĩa tũranyua,

ngũ nacio nĩkwenderio tũrenderio.

5 Arĩa maratũthĩĩnia matũikarĩire o ciande;

tũrĩ anogu na matiratũhe ũhuurũko.

6 Nĩtũtumĩĩte ndũgũ na Misiri na Asiria,

nĩguo tuone irio cia kũigana.

7 Maithe maitũ nĩmeehirie, no matirĩ ho,

rĩu nĩ ithuĩ tũraherithio handũ haao.

8 Tũrathwo nĩ ngombo,

na gũtirĩ wa gũtũruta wathaniinĩ wacio.

9 Tũraikia mĩoyo iitũ ũgwatiinĩ tũgĩcaria irio,

tondũ ooragani maiyũire ithakainĩ.

10 Mĩĩrĩ iitũ nĩhinyarĩĩtio nĩ kĩhuti,

ĩrakana o ta mwaki nĩ ũrĩa tũhũũtiĩ.

11 Atumia maranyiitwo na hinya kũu Zayuni,

airĩĩtu nao magakomwo nao na hinya matũũrainĩ moothe ma bũrũri wa Juda.

12 Anene moeetwo magaitwo,

athuuri nao matiraheeo gĩtĩĩo o na haniini.

13 Aanake marathĩithio ngano ta ngombo,

tũhĩĩ natuo tũrathiĩ tũgĩtũgũũgaga tũkuuithĩĩtio mĩrigo ya ngũ.

14 Athuuri nĩmatigĩĩte gũikara kĩhingoinĩ gĩa itũũra,

nao aanake magatigana na nyĩmbo ciao.

15 Ngoro ciitũ nĩithirĩĩtwo nĩ gĩkeno,

kĩrĩro nĩkĩo gĩcookeete handũ ha nyĩmbo ciitũ.

16 Maũndũ marĩa tũretĩĩaga namo, gũtirĩ mũtigaru.

Kaĩ ithuĩ twĩhĩĩtie, tũrĩ thĩĩnainĩ-ĩ!

17 Nĩkĩo ngoro ciitũ irwarĩĩte ikaaga hinya,

na tũkoona nduma.

18 Amu kĩrĩma gĩa Zayuni gĩtigĩĩtwo ũtheri,

no mbwe ĩrarimũũtha kuo.

19 No rĩĩrĩ, wee MWATHANI, ũgũtũũra ũthamakaga nginya tene na tene,

na wathani waku ũgũtũũra njiarwa na njiarwa.

20 Kaĩ ũgũkĩriganĩrwo nĩ ithuĩ tene na tene?

Ũgĩtũtiganĩirie ihinda iraaya ũguo nĩkĩ?

21 MWATHANI, tũcookie harĩ we nĩguo tũgũcookerere;

tũcookerie riiri ũrĩa twarĩ naguo tene.

22 Tiga no ũkorirwo ũtũregeete tene na tene

na ũgatũraakarĩra hatarĩ na gĩthimi.