Category: Jeremia

Ciĩranĩro cia MWATHANI harĩ andũ aake

1 MWATHANI Ngai wa Isiraeli,

2 akĩnjarĩria akĩnjĩĩra atĩrĩ, “Andĩka ibukuinĩ maũndũ moothe marĩa ngwĩrĩĩte,

3 ihinda nĩrĩgooka rĩrĩa ngaatuga andũ aakwa a Isiraeli na a Juda o rĩngĩ. Nĩngaamacookia bũrũriinĩ ũrĩa ndaheire maithe maao, nao mawĩgwatĩre o rĩngĩ. Niĩ MWATHANI, nĩ niĩ ndoiga ũguo.”

4 MWATHANI ekwĩra andũ a Isiraeli na a Juda atĩrĩ,

5 “Nĩnjiguĩte mũkayũrũrũko wa kĩmako,

mbugĩrĩrio ya guoya no ti ya thaayũ.

6 Atĩrĩĩrĩ-i! Teciiriei wega ũhoro ũyũ!

Mũndũ mũrũme no ahote gũciara?

Nĩ kĩĩ ndĩrakĩona mũndũ mũrũme o wothe

enyiitĩĩte nda na mooko ta mũtumia ũrarũmwo?

Arũme oothe matukĩĩte ithiithi nĩkĩ?

7 Mũthenya mũũru nĩũrooka;

mũthenya ũtangĩhaananio na ũngĩ o wothe nĩũrooka.

Ũgũkorwo ũrĩ wa thĩĩna harĩ andũ aakwa,

no nĩmekũhonoka.”

8 MWATHANI Mwene Hinya Wothe ekuuga atĩrĩ, “Mũthenya ũcio wakinya-rĩ, nĩndĩunanga icooki rĩrĩa meekĩrĩĩtwo ngingo na nduanie mĩnyororo ĩrĩa moohetwo nayo. Matigaacooka gũtuĩka ngombo cia andũ a ndũũrĩrĩ hĩndĩ ĩngĩ.

9 Handũ ha ũguo-rĩ, nĩ niĩ, MWATHANI Ngai wao, marĩtungatagĩra na matungatagĩre ũmwe wa njiarwa cia Daudi ũrĩa ngũtua mũthamaki.

10 “Andũ aakwa, mũtigeetigĩre;

andũ a Isiraeli mũtikaamake ngoro.

Nĩngũmũhonokia kuuma bũrũri ũcio wa kũraaya,

bũrũri ũrĩa mũtũũraga mwĩ mĩgwate.

Nĩmũgũcooka mũciĩ mũikarage na thaayũ;

mũrĩikaraga mũhooreire mũtarĩ na mũndũ o na ũrĩkũ ũramũguoyohia.

11 Nĩ gũkorwo nĩngũũka ndĩmũhonokie,

nyanange ndũũrĩrĩ ciothe iria irĩ kũrĩa ndĩmũhurunjĩĩte,

no inyuĩ ndikũmwananga.

No rĩĩrĩ, inyuĩ ndiaga kũmũherithia;

kũmũherithia no ngũmũherithia no ndikwĩgũmĩra.”

12 MWATHANI ekwĩra andũ aake atĩrĩ,

“Nguraro cianyu itingĩhoneka,

ironda cianyu nĩitheete mũno.

13 Gũtirĩ o na ũ ũramũthaithanĩrĩra mũhonio,

ironda cianyu itirĩ na ndaawa ingĩcihonia,

inyuĩ mũtingĩhona o na atĩa.

14 Anyaanya aanyu oothe nĩmariganĩirwo nĩ inyuĩ;

matirarũmbũyania na inyuĩ o na haniini.

Ndĩmũgũthĩĩte o ta ũrĩa mũndũ agũthagwo nĩ thũ yake,

ndĩmũherithĩĩtie o ta ũrĩa mũndũ aherithagio nĩ thũ yake ĩtekũmũcaaĩra

tondũ mahĩtia maanyu nĩ manene mũno,

na meehia maanyu nĩ maingĩ mũno.

15 Mũrakaya nĩkĩ nĩ ũrĩa mũgurarĩĩtio?

Ruwo rwanyu rũtingĩthira.

Ndĩmũherithĩĩtie na njĩra ĩyo tondũ mahĩtia maanyu nĩ manene mũno,

na meehia maanyu nĩ maingĩ mũno.

16 No rĩĩrĩ, arĩa oothe maramũtambũrũranga, nĩmarĩtambururangwo;

na thũ cianyu ciothe nĩ irĩthaamio irĩ mĩgwate.

Andũ oothe arĩa maramũhinyĩrĩria, nĩmarĩhinyĩrĩrio;

na arĩa oothe maramũtuunya indo cianyu o nao nĩmarĩtuunywo.

17 Nĩ gũkorwo nĩngũmũcookeria ũgima wa mwĩrĩ o rĩngĩ,

na ndĩmũhonie ironda cianyu,

tondũ thũ cianyu iroiga atĩrĩ,

‘Zayuni nĩ mũimwo nĩ irĩ;

ndarĩ mũrũmbũiya.’

Niĩ MWATHANI, nĩ niĩ ndoiga ũguo.”

18 MWATHANI ekuuga atĩrĩ,

“Nĩngaacookia andũ aakwa bũrũriinĩ wao

na njiguĩre mĩciĩ yao tha;

itũũra rĩa Jerusalemu nĩrĩgaakwo o rĩngĩ,

nayo nyũmba ya ũthamaki ĩrũũgamio rĩngĩ.

19 Atũũri a Jerusalemu makainaga makĩgoocaga,

o na makiugagĩrĩria nĩgũkena.

Nĩngaamaraathima maingĩhe

na ndĩmaheithie gĩtĩĩo.

20 Nĩngaatũma rũũrĩrĩ rũgĩe na hinya

o ta ũrĩa rwarĩ naguo tene,

na ndĩrũhande wega o rĩngĩ;

arĩa oothe mahinyagĩrĩria andũ aaruo nĩngaamaherithia.

21-22 Ũrĩa ũkaamaathaga akoima rũũrĩrĩinĩ rwao kĩũmbe;

mũtongoria wao akoima gatagatĩinĩ kaao.

Ndamwĩta, nĩagaathengagĩrĩra,

nĩ gũkorwo nĩ mũndũ ũrĩkũ ũngĩgeria gũũthengerera itamwĩtĩĩte?

Nao magaatuĩka andũ aakwa,

na niĩ nduĩke Ngai wao.

Niĩ MWATHANI, nĩ niĩ ndoiga ũguo.”

23 Taroraai maraakara ma MWATHANI!

Mahaana kĩhuuhũkanio.

Mang’ũrĩ maake nĩmoimagarĩĩte, mahaana ta kĩhuuhũkanio kĩnene,

makahuuhũkanĩrie igũrũ rĩa mĩtwe ya arĩa aaganu.

24 Maraakara macio ma MWATHANI marakana ta mwaki

matiihũndũka atahingĩĩtie ũrĩa atuĩte gwĩka.

Matukũinĩ ma thuutha, andũ aake nĩmakaamenya ũhoro ũcio wega.

Aisiraeli gũcooka mũciĩ

1 MWATHANI ekuuga atĩrĩ, “Ihinda nĩrĩrooka rĩrĩa ngaatuĩka Ngai wa mĩhĩrĩga yothe ya Aisiraeli, nao matuĩke andũ aakwa.

2 Nĩndaiguĩrĩire tha andũ arĩa matooragirwo

na hiũ cia njora kũu werũinĩ.

Rĩrĩa Aisiraeli merirĩirie kũhuurũka,

3 nĩndamoimĩrĩire ndĩ haraaya.

Andũ aya a Isiraeli, ndũire ndĩmwendeete na wendo ũtarĩ mũthia,

nĩkĩo ngĩrĩrĩirie kũmũtuga.

4 Nĩngũmwaka o rĩngĩ mũrũme ki, inyuĩ andũ aakwa a Isiraeli!

Nĩmũrĩoya o rĩngĩ tamburini cianyu mũcimbice nĩgũkena.

5 Nĩmũrĩhanda o rĩngĩ mĩthabibũ irĩmainĩ cia Samaria,

na amĩhandi nĩmarĩrĩa maciaro maayo.

6 Tondũ-rĩ, ihinda nĩrĩrooka

rĩrĩa arangĩri marĩ irĩmainĩ cia Efiraimu makaanĩrĩra,

moige atĩrĩ,

‘Ũkaai twambate tũthiĩ Zayuni, kũrĩ MWATHANI Ngai witũ!’ ”

7 MWATHANI ekuuga atĩrĩ,

“Inĩraai Isiraeli na gĩkeno,

kumiai mũnene wa ndũũrĩrĩ.

Inaai rwĩmbo rwanyu rwa ũgooci mũkiugaga atĩrĩ,

‘MWATHANI nĩahonokeetie andũ aake;

nĩahonokeetie matigari moothe ma Isiraeli.’

8 Atĩrĩĩrĩ, ngũmareehe kuuma bũrũri wa na rũgongo

na ndĩmacookanĩrĩrie kuuma ituri ciothe cia thĩ.

Megũcooka gũũkũ marĩ gĩkundi kĩnene,

marĩ hamwe na itumuumu, cionje, atumia me na mahu,

o na atumia me hakuhĩ gũciara.

9 Andũ aakwa megũcooka makĩrĩraga,

na makĩhooyaga ndĩmatongoreetie.

Ngũmatongoria ndĩmatware tũrũũĩinĩ,

ndĩmagereirie barabara njaraganu wega ũndũ matangĩhĩngwo.

Nĩ gũkorwo niĩ ndĩ ithe wa Isiraeli,

naake Efiraimu nĩ irigithaathi rĩakwa.”

10 MWATHANI ekuuga atĩrĩ,

“Tathikĩrĩriai, inyuĩ andũ a ndũũrĩrĩ,

na mũmemeerekie ndũmĩrĩri yakwa hũgũrũrũinĩ cia iria kũndũ kũraaya.

Nĩ niĩ ndahurunjire andũ aakwa a Isiraeli

na nĩngũmacookanĩrĩria,

na ndĩmamenyagĩrĩre o ta ũrĩa mũrĩithi amenyagĩrĩra rũũru rwake.

11 Nĩ ũndũ niĩ MWATHANI, nĩngũũrĩĩte Aisiraeli,

na ngamahonokia kuuma mookoinĩ ma rũũrĩrĩ rũramakĩrĩĩtie hinya.

12 Megũũka mainĩre kĩrĩmainĩ gĩa Zayuni maanĩrĩire nĩgũkena,

na macanjamũrwo nĩ iheeo ciakwa cia ngano, ndibei na maguta ma mĩtamaiyũ,

na cia ng’ondu na ng’ombe.

Marĩhaanaga ta mũgũnda ũitĩrĩirio maaĩ wega,

matigaathĩĩnĩka rĩngĩ.

13 Hĩndĩ ĩyo airĩĩtu nĩmarĩcimbica macanjamũkĩĩte,

o na aanake na athuuri nĩmarĩkena.

Ndĩrĩgarũra kĩrĩro kĩao gĩtuĩke gĩkeno,

na ndĩmahoorerie makene na mathirwo nĩ kĩeha.

14 Nĩndĩrĩhũũnia athĩnjĩri Ngai na irio iria njega mũno,

na hingĩrie andũ aakwa mabataro maao moothe.

Niĩ MWATHANI, nĩ niĩ ndoiga ũguo.”

Tha cia MWATHANI harĩ Isiraeli

15 MWATHANI ekuuga atĩrĩ,

“Mũgambo nĩwaiguirwo Rama,

wa kĩrĩro na kũgirĩka kũnene.

Rakeli akĩrĩrĩra ciana ciake

na ndangĩakirĩkire, tondũ ciana nĩciakuĩte.

16 Atĩrĩĩrĩ, tiga kũrĩra; wĩgirie maithori.

Maũndũ moothe marĩa wĩkĩire ciana ciaku matikũũrĩra thĩ,

nĩigũcooka kuuma bũrũriinĩ wa thũ.

17 Na rĩĩrĩ, ũtũũro waku wa thuutha ũrĩ na kĩĩrĩgĩrĩro;

ciana ciaku nĩigũcooka mũciĩ.

Niĩ MWATHANI, nĩ niĩ ndoiga ũguo.

18 “Atĩrĩĩrĩ, nĩndĩraigua andũ a Isiraeli makiuga marĩ na kĩeha atĩrĩ,

‘MWATHANI, ithuĩ tũrahaanaga ta gacaũ gatarutĩĩtwo kũhoorera,

no we nĩũratũrutire gwathĩka.

Rĩu-rĩ, twamũkĩre; nĩtũgũgũcookerera,

nĩ ũndũ wee nĩ we MWATHANI Ngai witũ.

19 Nĩtwagũtiganĩirie, no o na tũtanaikara,

tũkĩĩrirĩria gũgũcookerera.

Warĩĩkia gũtũherithia,

nĩtwainamirie mĩtwe iitũ tũrĩ na kĩeha;

twaconokire na tũkĩĩnyarara tondũ twehirie tũrĩ o eethĩ.’

20 “Wee, Isiraeli, ũrĩ mũrũ wakwa nyendeete mũno;

wĩ mwana wakwa nyenda mũno.

Rĩrĩa rĩothe ingĩkũnegenia,

no ngwĩciiragia na wendo.

Nĩkĩo ngoro yakwa ĩrakwĩrirĩria;

na nĩngũkũiguĩra tha.

21 Handa imenyithia cia njĩra o na cionereria;

cũũrania wega barabara iria mwathiĩrĩire.

Cookaai, andũ a Isiraeli!

Cookaai mũciĩ matũũrainĩ maanyu marĩa mwatigire!

22 Mũgũtũũra nginya rĩ mũhindahindaga,

inyuĩ andũ aya mũtarĩ wĩtĩkio?

Atĩrĩĩrĩ, nĩnyũmbĩĩte kĩndũ kĩerũ kĩrĩ na ũtiganu,

ũtiganu ta mũtumia akĩgitĩra mũndũrũme.”

Ũgaacĩru ũrĩa andũ a Ngai magaakorwo naguo mahinda ma thuutha

23 MWATHANI Mwene Hinya Wothe, o we Ngai wa Isiraeli, ekuuga atĩrĩ, “Rĩrĩa ngaacookia andũ aakwa bũrũriinĩ wao-rĩ, marĩ bũrũriinĩ wa Juda na matũũrainĩ maaguo nĩmagaacooka kuuga atĩrĩ,

‘MWATHANI aroraathima kĩrĩma gĩtherukĩa Jerusalemu,

o handũ hatheru harĩa atũũraga.’

24 Na rĩĩrĩ, andũ nĩmagaatũũra Juda na matũũra maakuo moothe gũgaakorwo arĩmi na arĩithi marĩ na mahiũ maao.

25 Nĩngaacanjamũra arĩa anogu na hũũnie arĩa oothe mahũũtĩĩte makoorwo nĩ hinya.

26 Tondũ ũcio, andũ nĩmakoigaga atĩrĩ, ‘Ngomire, ndookĩra ndĩ mũcanjamũku.’

27 “Niĩ MWATHANI, nguuga atĩ ihinda nĩrĩrooka rĩrĩa ngaiyũria bũrũri wa Isiraeli na wa Juda andũ na nyamũ.

28 Na rĩĩrĩ, o ta ũrĩa ndamabaarĩrĩire ngĩmamunyania, ngĩmamomorania, ngĩmang’aũrania, ngĩmaananga, na ngĩmatharũrania-rĩ, noguo ngũbaarĩrĩra ngĩmahanda na ngĩmaaka.

29 Hĩndĩ ĩyo-rĩ, andũ matigaacooka kuuga atĩrĩ,

‘Aabaaba maarĩire thabibũ njĩthĩ,

no magego ma ciana nĩ mo maiguire thithi.’

30 Atĩrĩĩrĩ, mũndũ o wothe ũrĩrĩaga thabibũ njĩthĩ magego maake mwene nĩ mo marĩiguaga thithi; o mũndũ arĩkuaga nĩ ũndũ wa meehia maake kĩũmbe.”

31 MWATHANI ekuuga atĩrĩ, “Mũthenya nĩũrooka hĩndĩ ĩrĩa ngaathondeka kĩrĩĩkanĩro kĩerũ na andũ a Isiraeli o hamwe na andũ a Juda.

32 Kĩrĩĩkanĩro kĩu gĩtigaakorwo kĩhaana ta kĩrĩa ndarĩĩkanĩire na maithe maao ma tene rĩrĩa ndamanyiitire na guoko, ngĩmatongoria, ngĩmaruta bũrũri wa Misiri. Maithe maao matiigana gwathĩkĩra kĩrĩĩkanĩro kĩu, o na harĩa ndaarĩ ta mũthuuri wao.

33 Gĩĩkĩ nĩkĩo kĩrĩĩkanĩro kĩrĩa ngaarĩĩkanĩra na andũ a Isiraeli matukũinĩ macio: Ngeekĩra mawatho maakwa meciiriainĩ maao na ndĩmaandĩke ngoroinĩ ciao. Ngaatuĩka Ngai wao, nao matuĩke andũ aakwa.

34 Matigaacooka gũthoomithania mũndũ na ũrĩa ũngĩ, o na kana mũndũ athoomithie mũrũ wa ithe kũmenya MWATHANI, tondũ oothe nĩmakaamenya, kuuma ũrĩa mũnyiinyi nginya ũrĩa mũnene. Nĩngaamoohera mahĩtia maao, na ndigaacooka kũririkana meehia maao rĩ o rĩ. Nĩ niĩ MWATHANI ndoiga ũguo.”

35 MWATHANI nĩ we ũtũmaga riũa rĩarage mũthenya,

na no we ũheaga mweri na njata watho mũrũmu,

imũrĩkage ũtukũ.

Nĩ we uurugaga iria rĩkaruruma,

na rĩĩtwa rĩake nĩ MWATHANI Mwene Hinya Wothe.

36 MWATHANI ũcio egũkiuga atĩrĩ,

“Angĩkorwo watho ũcio mũrũmu, no ũthenge mbere yakwa-rĩ,

hĩndĩ ĩyo andũ a Isiraeli no magĩtige gũtuĩka rũũrĩrĩ nginya tene na tene.”

37 Ningĩ MWATHANI ekuuga atĩrĩ,

“Angĩkorwo igũrũ matuinĩ no gũthimĩke

na itina cia thĩ ituĩrĩke-rĩ,

hĩndĩ ĩyo norĩo ingĩingata andũ a Isiraeli

nĩ ũndũ wa ũrĩa wothe meekĩĩte.”

38 MWATHANI ekuuga atĩrĩ, “Ihinda nĩrĩrooka rĩrĩa Jerusalemu yothe ĩrĩakwo rĩngĩ ĩrĩ ta itũũra rĩakwa, kuuma mũnaara wa Hananeli, ũrĩa ũrĩ mwena wa ithũĩro, nginya kĩhingo gĩa Koona.

39 Naguo mũhaka ũcio ũgaathiĩ na mbere kuuma hau mwena wa ithũĩro, ũthiĩ nginya gĩthũngũri kĩa Garebu, ũcooke ũrigiicũke o nginya Goa.

40 Nakĩo gĩtuamba gĩothe, kũrĩa akuũ mathikagwo na mahuti mateagwo, na mĩgũnda yothe ĩrĩa ĩrĩ na igũrũ wa karũũĩ ga Kidironi gũthiĩ ũguo o nginya Kĩhingo kĩa Mbarathi kĩrĩa kĩrĩ mwena wa irathĩro, kũu guothe nĩngaamũrĩrwo gũtuĩke gwakwa. Itũũra rĩa Jerusalemu rĩtigaacooka kũmomoranio kana kwanangwo rĩ o rĩ.”

Jeremia kũgũra gĩthaka

1 MWATHANI nĩanjarĩirie mwakainĩ wa ikũmi wa ũthamaki wa Zedekia, mũthamaki wa Juda, na noguo warĩ mwaka wa ikũmi na ĩnaana wa ũthamaki wa Nebukadinezaru, mũthamaki wa Babilonia.

2 Ihindainĩ rĩu-rĩ, mbũtũ cia ita cia mũthamaki wa Babilonia nĩgũthiũrũrũkĩria ciathiũrũrũkĩirie itũũra rĩa Jerusalemu nĩguo irĩtharĩkĩre, na niĩ ndahingĩirwo kandurumu ĩrĩa yanyiitaine na nyũmba ya mũthamaki.

3 Ndahingĩirwo kũu kandurumuinĩ ĩyo nĩ mũthamaki Zedekia nĩ ũndũ nĩndarathĩĩte ngoiga atĩ MWATHANI oigĩĩte atĩrĩ, “Nĩngwĩtĩkĩria mũthamaki wa Babilonia anyiite itũũra rĩa Jerusalemu,

4 na mũthamaki Zedekia ndehonoka kuuma mookoinĩ ma Ababilonia. Ekũneanwo kũrĩ mũthamaki wa Babilonia, na nĩekuonana naake ũthiũ kwa ũthiũ, na aaranĩrie naake na kanua gaake mwene.

5 Zedekia egũkuuo atwarwo Babilonia, kũrĩa egũtũũra nginya rĩrĩa ngeeka naake ũrĩa kwenda. O na Zedekia angĩhũũrana na Ababilonia ndangĩhootana. Niĩ MWATHANI, nĩ niĩ ndoiga ũguo.”

6 Na rĩĩrĩ, MWATHANI nĩanjĩĩrire

7 atĩ Hanameli, mũrũ wa baaba mũkũrũ Shalumu, nĩegũũka anjũũrie ngũre gĩthaka gĩake kĩrĩa kĩarĩ Anathothu bũrũriinĩ wa Benjamini, tondũ nĩ niĩ ndaarĩ na kĩhooto gĩa gwĩka ũguo thĩinĩ wa andũ a nyũmba iitũ.

8 Na o ta ũrĩa MWATHANI oigĩĩte, Hanameli agĩũka kũu ndahingĩirwo kandurumu akĩnjũũria ngũre gĩthaka gĩake. Hĩndĩ ĩyo ngĩkĩmenya atĩ ti itherũ MWATHANI nĩanjarĩirie.

9 Kwoguo ngĩgũra gĩthaka kĩu kĩa Hanameli na ngĩmũtarĩra mbeeca; thogora wakĩo warĩ icunjĩ ikũmi na mũgwanja cia betha.

10 Ngĩcooka ngĩĩkĩra thaĩri marũa ma kũgũra gĩthaka kĩu, o nao aira magĩĩka o taguo, na ngĩthima icunjĩ icio cia betha na ratiri.

11 Ndarĩĩkia gwĩka ũguo-rĩ, ngĩoya marũa macio maarĩ na thaĩri na maũndũ moothe marĩa twandĩkanĩire, na kobi ya yo,

12 ngĩcinengera Baruku mũrũ wa Neria na mũcũkũrũ wa Mahaseia. Ndamũnengerire marũa macio Hanameli, na aira arĩa mameekĩrĩĩte thaĩri, na andũ oothe arĩa maarĩ hau nja ya kandurumu makĩyonagĩra.

13 Ngĩcooka, marĩ ho oothe, ngĩĩra Baruku atĩrĩ,

14 “MWATHANI Mwene Hinya Wothe, Ngai wa Isiraeli, agwatha woe marũa macio, macio marĩ na thaĩri na kobi ya yo, ũmaige thĩinĩ wa ndigithũ, nĩguo maikare ihinda iraaya matathũũkĩĩte.

15 Tondũ, MWATHANI Mwene Hinya Wothe, Ngai wa Isiraeli, oigĩĩte atĩ nyũmba, ithaka, na mĩgũnda ya mĩthabibũ nĩikaagũrwo o rĩngĩ bũrũriinĩ ũyũ?”

Ihooya rĩa Jeremia

16 Na rĩĩrĩ, thuutha wa kũnengera Baruku marũa macio ma kũgũra gĩthaka nĩndahoire ngiuga atĩrĩ,

17 “MWATHANI Ngai! Nĩ we wombire thĩ na igũrũ na hinya waku mũnene o na ũhoti; hatirĩ ũndũ o na ũrĩkũ ũngĩgũkĩria hinya!

18 Wee-rĩ, nĩũtugaga andũ ngiri na ngiri, no ningĩ nĩũherithagia ciana nĩ ũndũ wa meehia ma aciari aacio. Wee ũrĩ Ngai mũnene na wĩ hinya. Wee nĩ we MWATHANI Mwene Hinya Wothe.

19 Wee-rĩ, nĩũthondekaga mĩbango mĩkinyanĩru na ũgeeka maũndũ ma hinya. Nĩwonaga ũrĩa wothe andũ meekaga na nĩũrĩhaga o mũndũ kũringana na ciĩko ciake.

20 Hĩndĩ ya tene-rĩ, nĩwaringire ciama na ũgĩĩka maũndũ ma magegania bũrũriinĩ wa Misiri, na rĩu no ũrathiĩ na mbere gwĩka ũguo nginyagia ũũmũũthĩ, gũũkũ Isiraeli na gatagatĩinĩ ka ndũũrĩrĩ iria ingĩ ciothe, ũguo atĩ gũtirĩ kũndũ o na kũ rĩu wee ũtoĩo.

21 Wee-rĩ, nĩwarutire andũ aaku a Isiraeli Misiri na hinya waku na ũhoti, ũkĩringaga ciama na ũgĩĩkaga maũndũ ma magegania marĩa maamakirie thũ ciitũ mũno.

22 Wee nĩ we wamaheire bũrũri ũyũ mwega na mũnoru, ũrĩa werĩire maithe maao na mwĩhĩtwa atĩ nĩũkaamahe.

23 No rĩĩrĩ, rĩrĩa o mookire na makĩĩgwatĩra bũrũri ũyũ, matiigana gũgũthikĩrĩria o na kana gwathĩkĩra mawatho maaku; hatirĩ ũndũ o na ũmwe wa maũndũ marĩa wamaathĩĩte meeke meekire. Nĩkĩo rĩu ũtũmĩĩte mwanangĩko ũyũ wothe ũmakorerere.

24 “Rĩu-rĩ, Ababilonia nĩmaakĩrĩire itũũra rĩa Jerusalemu ngathĩ na mĩena yothe nĩguo maarĩtuunyane na nĩmararĩtharĩkĩra. Mbaara, ng’aragu, na mĩrimũ nĩigũtũma itũũra rĩĩrĩ rĩnyiitĩrwo nĩ Ababilonia. Ũrĩa wothe woigire nĩmũhingu; wee mwene nĩwĩyoneire.

25 No o na kũhaana ũguo-rĩ, wee MWATHANI Ngai, nĩ we ũranjathire ngũre gĩthaka na njĩte aira makorwo ho ngĩkĩgũra, o rĩrĩa itũũra rĩrĩ hakuhĩ gũtuunyanwo nĩ Ababilonia.”

26 Hĩndĩ ĩyo MWATHANI akĩnjarĩria akĩnjĩĩra atĩrĩ,

27 “Niĩ nĩ niĩ MWATHANI, Ngai wa andũ oothe, hatirĩ ũndũ o na ũrĩkũ ũngĩngĩria hinya.

28 Atĩrĩĩrĩ, nĩngũneana itũũra rĩĩrĩ kũrĩ Nebukadinezaru, mũthamaki wa Babilonia, hamwe na thigari ciake, nao nĩmekũrĩtuunyana

29 na marĩcine na mwaki. Mekũrĩcinanĩria hamwe na nyũmba iria igũrũ wacio andũ maacinĩire Baali ũbaani na magaitangĩra ngai ingĩ ndibei ĩrĩ ta igongoona, makĩndaakaria.

30 Andũ a Isiraeli na a Juda kuuma o marĩ eethĩ matũire meekaga maũndũ mooru na mandaakaragia na mĩthiĩre yao.

31 Andũ a itũũra rĩĩrĩ matũire mandaakaragia.Njikaraga ndĩ na marũrũ kuuma mũthenya ũrĩa itũũra rĩĩrĩ rĩakirwo. Kwoguo, nĩngũrĩananga

32 tondũ wa ũũru ũrĩa wothe wĩkĩĩtwo nĩ andũ a Juda na a Jerusalemu, hamwe na athamaki, atongoria, athĩnjĩri Ngai na anabii.

33 Nĩmaahuutatĩire o na harĩa ndũire ndĩmarutaga itegũtigithĩria, o matiiguaga na matitaarĩkaga.

34 O na ningĩ nĩmaigĩĩte mĩhianano yao ĩrĩ magigi Hekaarũinĩ ĩrĩa yakĩĩtwo ĩrĩ handũ haakwa ha gũũthaathayagĩrio makamĩthaahia.

35 Maakĩire Baali kũndũ gũtũũgĩru gwa gũthaathaĩrio gĩtuambainĩ kĩa Hinomu, kũrĩa marutagĩra ngai ĩrĩa ĩĩtagwo Moleku aariũ na aarĩ aao marĩ magongoona. Niĩ-rĩ, ndirĩ ndamaatha meekage ũndũ ta ũcio, o na ndirĩ ndeciiria atĩ no meeke gĩĩko ta kĩu kĩrĩ magigi gĩa gũtũma andũ a Juda meehie.”

MWATHANI kũheana kĩĩrĩgĩrĩro

36 MWATHANI, Ngai wa Isiraeli, akĩnjĩĩra atĩrĩ, “Jeremia, rĩu tathikĩrĩria wega ũrĩa nguuga ũhoroinĩ wa itũũra rĩĩrĩ rĩrĩa andũ maroiga atĩ mbaara, ng’aragu, na mĩrimũ nĩcio igũtũma rĩtuunyanwo nĩ mũthamaki wa Babilonia.

37 Atĩrĩĩrĩ, nĩngaacookereria andũ kuuma mabũrũri moothe kũrĩa ndamahurunjire ndaakarĩĩte na ndĩ na marũrũ maingĩ; ngaamacookia o gũũkũ na ndeke matũũre kuo na thaayũ.

38 Nao magaatuĩka andũ aakwa, na niĩ nduĩke Ngai wao.

39 Nĩngeekĩra muorooto ũmwe ngoroinĩ ciao na meciiriainĩ maao, naguo nĩ atĩ matũũre mandĩĩĩte, nĩguo o eene hamwe na njiarwa ciao makoonaga maũndũ meega.

40 Ningĩ nĩngaathondeka nao kĩrĩĩkanĩro gĩa tene na tene. Kĩrĩĩkanĩro kĩu ngaathondeka nao kĩrĩ atĩ niĩ ndirĩ hĩndĩ itakaamatugaga; nĩngaatũma mandĩyage na ngoro, nĩguo matikaanandiganĩrie o na rĩ.

41 Nĩngaakenaga ngĩmatuga, na nĩngaamahanda marũme ki bũrũriinĩ ũyũ.

42 “O ta ũrĩa ndeehithĩirie andũ aya mwanangĩko ũyũ mũnene ũguo, noguo ngaamareehithĩria maũndũ moothe meega marĩa ndĩmeerĩire.

43 Na rĩĩrĩ, mĩgũnda nĩkaagũrwo o rĩngĩ bũrũriinĩ ũyũ ũrĩa mũraaria ũhoro waguo mũkoiga atĩ nĩ maganjo matarĩ na mũndũ kana nyamũ na nĩũneanĩĩtwo mookoinĩ ma Ababilonia.

44 Andũ nĩmakaagũraga mĩgũnda ĩyo, mageekĩra thaĩri marũa ma kũmĩgũra, makamahũũra mũhũũri, na mageeta aira mooke moone magĩĩka ũguo. Ũndũ ũcio ũgeekagwo bũrũriinĩ wa Benjamini, icagiinĩ iria ithiũrũrũkĩirie Jerusalemu, matũũrainĩ ma Juda, matũũrainĩ ma bũrũri ũrĩa ũrĩ irĩma, magũrũinĩ ma irĩma cia Juda mwena wa na ithũĩro, na mwena wa na kĩanda wa Juda. Nĩ ũndũ-rĩ, nĩngaacookia andũ aakwa bũrũriinĩ wao. Niĩ MWATHANI, nĩ niĩ ndoiga ũguo.”

MWATHANI kũheana kĩĩrĩgĩrĩro o kĩngĩ

1 Ningĩ ndũmĩrĩri ya MWATHANI ĩkĩnginyĩra hĩndĩ ĩngĩ ndĩ o kũu ndahingĩirwo kandurumuinĩ.

2 MWATHANI, ũrĩa wombire thĩ, o we ũrĩa wamĩthugundire na akĩmĩhanda, o we wĩtagwo MWATHANI, nĩanjarĩirie akĩnjĩĩra atĩrĩ,

3 “Njĩta, na nĩngũgwĩtĩka; nĩngũkwĩra maũndũ ma magegania na mahithe marĩa wee ũtooĩ.

4 Niĩ MWATHANI, Ngai wa Isiraeli, ndoiga atĩ nyũmba cia Jerusalemu na nyũmba ya ũthamaki wa Juda nĩikũmomoranio. Ikũmomoranio tondũ itũũra rĩa Jerusalemu nĩrĩthiũrũrũkĩrie na mĩena yothe na rĩgatharĩkĩrwo.

5 Andũ amwe nĩmekũrũa na Ababilonia arĩa mekũiyũria nyũmba na ciimba cia andũ arĩa ngũũraga nĩ ũrĩa ndaakarĩĩte na ngang’ũrĩka. Atĩrĩĩrĩ, nĩhuutatĩire itũũra rĩĩrĩ tondũ wa maũndũ mooru marĩa andũ aarĩo meekĩĩte.

6 No rĩĩrĩ, nĩngaahonia itũũra rĩĩrĩ hamwe na andũ aarĩo na ndĩmacookerie ũgima wa mwĩrĩ. Nĩngaamahe thaayũ mũingĩ na ũgitĩri.

7 Nĩngaatũma bũrũri wa Juda na wa Isiraeli magaacĩre o rĩngĩ, na nĩngaamaaka rĩngĩ mahaane ta ũrĩa maahaanaga hĩndĩ ya mbere.

8 Nĩngaamatheria meehia moothe marĩa manjĩhĩirie, na ndĩmoohere meehia maao moothe na ũremi wao.

9 Itũũra rĩa Jerusalemu nĩrĩgaatũmaga ngenage, ngoocagwo, na ngumagio. Na rĩĩrĩ, ndũũrĩrĩ ciothe cia thĩ nĩikaiguaga guoya na ciinainage ciaigua maũndũ meega marĩa njĩkĩire andũ a Jerusalemu, na ũgaacĩru ũrĩa ndeehithĩirie itũũra rĩĩrĩ.”

10 MWATHANI ekuuga atĩrĩ, “Andũ maroiga atĩ kũndũ gũũkũ nĩkwanangĩĩtwo gũgatigwo gũtarĩ na andũ maragũtũũra, o na kana nyamũ. Ũcio-rĩ, nĩ ũhoro wa ma; matũũra ma Juda na njĩra cia Jerusalemu gũtirĩ na andũ. Gũtirĩ andũ kana nyamũ kuo. No rĩĩrĩ, nĩmũkaigua o rĩngĩ kũndũ gũũkũ

11 mĩgambo mĩcanjamũku na ya gĩkeno, o na ndũũhiũ cia hĩndĩ ya maruga ma ũhiki. Nĩmũkaigua andũ makĩina makĩreehaga iheeo ciao cia gũcookia ngaatho Hekaarũinĩ yakwa. Makoigaga atĩrĩ,

‘Cookeriai MWATHANI Mwene Hinya Wothe ngaatho,

tondũ nĩ mwega,

tondũ ũtugi wake nĩ wa tene na tene.’

Atĩrĩĩrĩ, nĩndĩrĩtuma bũrũri ũyũ ũgaacĩre o ta ũrĩa wagaacĩire hĩndĩ ya tene. Niĩ MWATHANI, nĩ niĩ ndoiga ũguo.”

12 MWATHANI Mwene Hinya Wothe ekuuga atĩrĩ, “Bũrũriinĩ ũyũ mwanangĩku na ũtarĩ na andũ kana nyamũ nĩgũkaagĩa moorĩithio marĩa arĩithi makaarĩithagia mahiũ maao.

13 Atĩrĩĩrĩ, arĩithi nĩmagaacooka gũtaraga ng’ondu ciao kũu matũũrainĩ ma bũrũri ũrĩa ũrĩ irĩma, magũrũinĩ ma irĩma cia Juda mwena wa na ithũĩro, mwena wa na kĩanda wa Juda, bũrũriinĩ wa Benjamini, icagiinĩ iria ithiũrũrũkĩirie Jerusalemu, na matũũrainĩ ma Juda. Niĩ MWATHANI, nĩ niĩ ndoiga ũguo.”

14 MWATHANI ekuuga atĩrĩ, “Matukũ nĩmagooka rĩrĩa ngaahingĩria andũ a Isiraeli na a Juda ũrĩa ndameeriire.

15 Matukũinĩ macio-rĩ, nĩngaathuura mũndũ ũmwe mũthingu kuuma njiarwainĩ cia Daudi atuĩke mũthamaki. Mũthamaki ũcio ageekaga maũndũ ma kĩhooto na ma waragania bũrũriinĩ wothe.

16 Matukũinĩ macio-rĩ, andũ a Juda nĩmakaahonokio, nao a Jerusalemu nĩmagaatũũra na thaayũ. Itũũra rĩa Jerusalemu rĩgeetagwo, ‘MWATHANI Ũhonokio Witũ.’

17 Atĩrĩĩrĩ, niĩ MWATHANI, nĩndeeranĩra atĩ gũtikaaga ũmwe wa njiarwa cia Daudi wa gũthamakĩra Isiraeli,

18 na atĩ gũtikaaga athĩnjĩri Ngai a mũhĩrĩga wa Lawi akũndungataga na akũrutaga magongoona ma njino, na ma irio cia mũgũnda, na akũrutaga magongoona.”

19 MWATHANI akĩnjĩĩra atĩrĩ,

20 “Angĩkorwo no ũgarũre kĩrĩĩkanĩro kĩrĩa niĩ ndĩĩkanĩire na mũthenya na ũtukũ atĩ mũthenya ũũkage mahinda marĩa mawagĩrĩire na ũtukũ o taguo,

21 hĩndĩ ĩyo no rĩo ingĩgarũra irĩĩko iria ndarĩĩkanĩire na ndungata yakwa Daudi na athĩnjĩri Ngai a mũhĩrĩga wa Lawi. Niĩ mwene nĩndarĩĩkanĩire na Daudi atĩ ndarĩ hingo akaaga ũmwe wa njiarwa ciake ũrathamaka ithenya rĩake, na ngĩrĩĩkanĩra na athĩnjĩri Ngai a mũhĩrĩga wa Lawi atĩ megũtũũra maandungataga.

22 Atĩrĩĩrĩ, nĩngaingĩhia njiarwa cia ndungata yakwa Daudi na nyingĩhie athĩnjĩri Ngai a mũhĩrĩga wa Lawi, ũguo atĩ matikaahoteka gũtarĩka, o ta ũrĩa njata cia igũrũ itangĩtarĩka, o na ta ũrĩa mũthanga ũrĩa ũrĩ hũgũrũrũinĩ cia iria ũtangĩthimĩka.”

23 MWATHANI akĩnjũũria atĩrĩ,

24 “Nĩũmenyeete ũrĩa andũ aya maroiga atĩ nĩndegeete Isiraeli na Juda, mĩciĩ ĩĩrĩ ĩrĩa ndathuurire? Tondũ ũcio-rĩ, nĩmanyaraire andũ aakwa, na matirĩ hingo mamoonaga ta marĩ rũũrĩrĩ.

25 Atĩrĩĩrĩ, o ta ũrĩa niĩ MWATHANI, thondekeete kĩrĩĩkanĩro kĩrũmu na mũthenya na ũtukũ na ngathondeka mawatho marĩa marũmagĩrĩrwo nĩ thĩ na igũrũ-rĩ,

26 ũguo noguo ngũtũũra nũmĩĩtie kĩrĩĩkanĩro gĩakwa na njiarwa cia Jakubu na cia ndungata yakwa Daudi. Gũtirĩ hingo ngaaga gũthuura mũndũ ũmwe kuuma njiarwainĩ cia Daudi aathage njiarwa cia Aburahamu, Isaaka, na Jakubu. Nĩ ũndũ nĩngaiguĩra andũ aakwa tha na ndũme magaacĩre o rĩngĩ.”

Ndũmĩrĩri kũrĩ Zedekia

1 Na rĩĩrĩ, MWATHANI nĩanjarĩirie rĩrĩa mũthamaki Nebukadinezaru wa Babilonia na mbũtũ ciake cia ita, ateithĩrĩirio nĩ moothamaki na andũ oothe arĩa aathaga maatharĩkagĩra itũũra rĩa Jerusalemu na matũũra marĩa maarĩkuhĩrĩirie.

2 MWATHANI Ngai wa Isiraeli, aanjĩĩrire thiĩ kũrĩ mũthamaki Zedekia wa Juda ndĩmwĩre atĩrĩ, “Niĩ MWATHANI, nĩngũneana itũũra rĩĩrĩ kũrĩ mũthamaki wa Babilonia, naake nĩekũrĩcina na mwaki.

3 Na rĩĩrĩ, wee ndũkaahota kũũra, nĩũkaanyiitwo ũtwarwo ũneanwo kũrĩ we, na nĩmũkoonana ũthiũ kwa ũthiũ na mwaranĩrie na kanua. Thuutha wa ũguo, nĩũgaatwarwo Babilonia.

4 No rĩĩrĩ, Zedekia, tathikĩrĩria ũrĩa niĩ MWATHANI nguuga ũhoroinĩ waku: Wee-rĩ, ndũkooragĩrwo mbaarainĩ.

5 Ũgaakua na thaayũ, na andũ nĩmagaagũcinĩra ũbaani o ta ũrĩa maithe maaku, arĩa maarĩ athamaki mbere yaku, maacinĩirwo magĩthikwo. Na rĩĩrĩ, nĩmagaakũrĩrĩra makiugaga atĩrĩ, ‘Wũi mũthamaki witũ nĩmũkuũ-ĩ!’ Niĩ MWATHANI, nĩ niĩ ndoiga ũguo.”

6 Na niĩ ngĩhe mũthamaki Zedekia, ũrĩa warĩ Jerusalemu, ũhoro ũcio wothe,

7 o hĩndĩ ĩrĩa mbũtũ cia ita cia mũthamaki wa Babilonia ciatharĩkagĩra itũũra rĩu. O na ningĩ mbũtũ icio cia ita nĩciatharĩkagĩra Lakishi na Azeka, nĩ ũndũ no mo maarĩ matũũra mairigĩre na thingo cia hinya marĩa maatigarĩĩte bũrũriinĩ wa Juda.

Ngombo kũheenio

8 Na rĩĩrĩ, mũthamaki Zedekia nĩathondekire kĩrĩĩkanĩro na andũ oothe a Jerusalemu atĩ marekererie

9 mũndũ o mũndũ ngombo ciake cia kĩruka kĩa Ahibirania, cia arũme o na cia andũ a nja, nĩguo gũtikaagĩe Mũisiraeli o na ũmwe ũigĩĩte Mũisiraeli ũrĩa ũngĩ arĩ ngombo.

10 Nao andũ oothe hamwe na atongoria aao magĩĩtĩkĩra kũrekereria ngombo ciao na makĩiguithanĩria atĩ matigaacooka gũcitua ngombo rĩ o rĩ. Magĩgĩcirekereria.

11 No rĩĩrĩ, thuutha wa gwĩka ũguo, makĩĩricũkwo, magĩcinyiita, magĩcitua na hinya ngombo o rĩngĩ.

12 Hĩndĩ ĩyo MWATHANI,

13 Ngai wa Isiraeli, akĩnjĩĩra njĩĩre andũ acio atĩrĩ, “Niĩ-rĩ, nĩndathondekire kĩrĩĩkanĩro na maithe maanyu rĩrĩa ndamarutire bũrũriinĩ wa Misiri, ngĩmarekereria kuuma ũkomboinĩ. Nĩndameerire atĩ

14 o mĩaka mũgwanja yathira, nĩmakaarekagĩrĩria ngombo o yothe ya Mũhibirania ĩmatungatĩĩte ihinda rĩa mĩaka ĩtandatũ. No rĩĩrĩ, maithe maanyu matiigana kũnjathĩkĩra o na kana gũũthikĩrĩria.

15 O ica ikuhĩ-rĩ, inyuĩ nĩmũrericũkirwo mũreeka ũndũ ũrangenirie. Inyuothe nĩmũretĩkĩrire kũrekereria Aisiraeli arĩa mũrĩ a ithe ũmwe nao, o na mũrathondeka kĩrĩĩkanĩro mbere yakwa thĩinĩ wa Hekaarũ yakwa ĩrĩa thaathayagĩrio.

16 No rĩĩrĩ, nĩmũcookeete mũkericũkwo o rĩngĩ na mũkaanyararithia; o mũndũ o mũndũ oeete ngombo iria ararekereirie ta ũrĩa ciendaga, agacitua na hinya ngombo ciake o rĩngĩ.

17 Kwoguo niĩ MWATHANI, ndoiga mũtinjathĩkĩire, tondũ nĩmwagĩĩte kũrekerereria Aisiraeli arĩa mũrĩ a ithe ũmwe nao. Tondũ ũcio-rĩ, nĩngũmũrekereria mũũragwo nĩ mbaara, mĩrimũ, na ng’aragu. Na rĩĩrĩ, nĩngũtũma ndũũrĩrĩ ciothe iria irĩ gũũkũ thĩ ciigue guoya nĩ ũrĩa ngũmwĩka.

18-19 Anene a Juda na a Jerusalemu, hamwe na anjaama a kwa mũthamaki, athĩnjĩri Ngai, na atongoria oothe nĩmaathondekire kĩrĩĩkanĩro na niĩ na ũndũ wa kũgerera gatagatĩ ka ndeegwa maatũranĩĩtie maita meerĩ. No rĩĩrĩ, nĩmaacookire magĩthũũkia kĩrĩĩkanĩro kĩu na matiigana kũhingia ũrĩa ndarĩĩkanĩire nao. Kwoguo ngwĩka andũ acio o ta ũrĩa meekire ndeegwa ĩyo.

20 Ngũmaneana kũrĩ thũ ciao iria irenda kũmooraga, nacio ciimba ciao irĩĩo nĩ nyoni na nyamũ cia gĩthaka.

21 O na ningĩ nĩngũneana mũthamaki Zedekia wa Juda na njaama ciake kũrĩ arĩa marenda kũmooraga. Ngũmaneana kũrĩ mbũtũ ya ita ya mũthamaki wa Babilonia, ĩrĩa ĩhũndũkĩĩte ĩgatiga kũmũtharĩkĩra.

22 Atĩrĩĩrĩ, nĩngwathana, nacio nĩigũcooka itũũrainĩ rĩĩrĩ, irĩtharĩkĩre, irĩtuunyane, na irĩcine na mwaki. Matũũra ma Juda ngũmatua maganjo matarĩ na andũ maramatũũra. Niĩ MWATHANI, nĩ niĩ ndoiga ũguo.”

Mbarĩ ya Rekabu kũgaathĩrĩrio

1 Na rĩĩrĩ, rĩrĩa Jehoiakimu mũrũ wa Josia aarĩ mũthamaki wa Juda, MWATHANI nĩanjarĩirie akĩnjĩĩra atĩrĩ,

2 “Thiĩ kũrĩ andũ a mbarĩ ya Rekabu ũmaarĩrie, ũcooke ũmatware Hekaarũinĩ, ũmatoonyie thĩinĩ wa rumu ĩmwe ya yo, ũmahe ndibei manyue.”

3 Kwoguo ngĩkĩoya andũ oothe a mbarĩ ya Rekabu, nao maarĩ Jaazania (mũrũ wa mũndũ wetagwo Jeremia, naake aarĩ mũrũ wa Habazinia), aariũ a nyina oothe o hamwe na ciana ciao,

4 ngĩmatwara Hekaarũinĩ. Ngĩcooka ngĩmatoonyia thĩinĩ wa rumu ya arutwo a mũnabii Hanani mũrũ wa Igidalia. Rumu ĩyo yarĩ igũrũ wa rumu ya Maaseia mũrũ wa Shalumu, ũmwe wa atongoria a Hekaarũ waheetwo gĩtĩĩo, na yarigainie na rumu cia atongoria arĩa angĩ.

5 Ndarĩĩkia kũmatoonyia kuo, ngĩmahe ikombe na mbakũri ciaiyũire ndibei ngĩmeera atĩrĩ, “Nyuai ndibei.”

6 No o makĩnjookeria atĩrĩ, “Tũtikũnyua ndibei, tondũ ithe witũ Jonadabu mũrũ wa Rekabu nĩatwathire agĩtwĩra atĩ tũtikaananyue ndibei o na rĩ, ithuĩ eene o na njiarwa ciitũ.

7 Ningĩ nĩatwathire agĩtwĩra atĩ tũtikaanaake nyũmba, kana tũrĩme mĩgũnda, kana tũhande mĩthabibũ mĩgũnda, o na kana tũgũre mĩgũnda ya mĩthabibũ. Aatwathire tũtũũre tũikaraga hemainĩ hingo ciothe, nĩguo tũtũũre matukũ maingĩ bũrũriinĩ ũyũ tũtũũraga ta ageni.

8 Ithuĩ-rĩ, nĩtwathĩkĩire ũrĩa wothe twathirwo nĩ ithe witũ Jonadabu atĩ ithuĩ eene, atumia aitũ, aariũ aitũ, na aarĩ aitũ tũtikaananyue ndibei o rĩ o rĩ.

9-10 Ningĩ tũtiakaga nyũmba ĩtuĩke mĩciĩ iitũ, tũtũũraga hemainĩ. Tũtirĩ mĩgũnda ya mĩthabibũ, ithaka kana mbeũ. Ithuĩ nĩtwathĩkĩire na tũkahingia ũrĩa wothe ithe witũ Jonadabu aatwathire.

11 No rĩĩrĩ, hĩndĩ ĩrĩa Nebukadinezaru, mũthamaki wa Babilonia, ookire gũtharĩkĩra bũrũri ũyũ, nĩtuonire arĩ wega tũũke Jerusalemu nĩguo tũũrĩre mbũtũ cia ita cia Babilonia na Siria. Nĩkĩo rĩu tũtũũraga gũũkũ Jerusalemu.”

12-13 Hĩndĩ ĩyo MWATHANI Mwene Hinya Wothe, Ngai wa Isiraeli, akĩnjĩĩra thiĩ ngeere andũ a Juda na a Jerusalemu atĩrĩ, “Niĩ MWATHANI, ndĩramũũria atĩrĩ, mũregaga gũũthikĩrĩria na gwathĩkĩra ciugo ciakwa nĩkĩ?

14 Njiarwa cia Jonadabu nĩciathĩkĩire ũrĩa aaciathire atĩ itikaananyue ndibei, na nginyagia ũũmũũthĩ ũyũ gũtirĩ o na ũmwe wao ũmĩnyuaga. No rĩĩrĩ, niĩ ndũire ndĩmwaragĩria itegũtigithĩrĩa, no inyuĩ mũtinjathĩkagĩra.

15 Ndũire ndĩmũtũmagĩra anabii, oothe ndungata ciakwa, nao mamwĩraga mũtigane na mĩthiĩre yanyu mĩũru, na mũrũnge ciĩko cianyu. Ningĩ nĩmamũkaanagia gũthaathayagia na gũtungatagĩra ngai ingĩ, nĩguo mũthiĩ na mbere gũtũũra bũrũriinĩ ũyũ ũrĩa ndamũheire inyuĩ na ngĩhe maithe maanyu. No rĩĩrĩ, inyuĩ mũtiigana gũũthikĩrĩria o na kana kũnjathĩkĩra.

16 Njiarwa cia Jonadabu nĩciathĩkĩire ũrĩa ciathirwo nĩ ithe wao, no inyuĩ andũ aya mũtinjathĩkĩire.

17 Tondũ ũcio niĩ, MWATHANI Mwene Hinya Wothe, Ngai wa Isiraeli, nĩngũmũreehithĩria inyuĩ andũ a Juda na a Jerusalemu mwanangĩko wothe ũrĩa njugĩĩte nĩngũmũreehithĩria. Ngwĩka ũguo tondũ o na ndamwarĩria mũtithikagĩrĩria, na ndamwĩta mũtiĩtĩkaga.”

18 Ngĩcooka ngĩĩra mbarĩ ya Rekabu atĩ MWATHANI Mwene Hinya Wothe, Ngai wa Isiraeli, oigĩĩte atĩrĩ, “Tondũ nĩmwathikĩire ũrĩa mwathirwo nĩ ithe wanyu Jonadabu; mũkĩrũmĩrĩra mataaro maake moothe, na mũgĩĩka ũrĩa wothe aamwathire,

19 niĩ, MWATHANI Mwene Hinya Wothe, Ngai wa Isiraeli, ndoiga atĩ Jonadabu mũrũ wa Rekabu ndarĩ hingo akaaga mũndũ mũrũme kuuma njiarwainĩ ciake wa kũndungata.”

Baruku gũthooma ibuku rĩa gĩkũnjo Hekaarũinĩ

1 Atĩrĩĩrĩ, mwakainĩ wa ĩna wa ũthamaki wa Jehoiakimu mũrũ wa Josia bũrũriinĩ wa Juda, MWATHANI nĩanjarĩirie akĩnjĩĩra atĩrĩ,

2 “Oya ibuku rĩa gĩkũnjo wandĩke ũhoro wothe ũrĩa ngũheete ũkoniĩ Isiraeli na Juda o na ndũũrĩrĩ ciothe. Andĩka ũhoro wothe ũrĩa ngũheete kuuma rĩrĩa ndakwarĩirie rĩa mbere, rĩrĩa Josia aarĩ mũthamaki, nginya ũũmũũthĩ.

3 No gũkorwo andũ a Juda maigua ũhoro wa mwanangĩko wothe ũrĩa bangĩĩte kũmareehithĩria nĩmegũtigana na mĩthiĩre yao mĩũru, na niĩ ndĩkĩmoohere waganu wao na meehia maao.”

4 Kwoguo ngĩgĩĩta Baruku mũrũ wa Neria, ngĩmwĩra akĩandĩkaga ũhoro wothe ũrĩa MWATHANI aaheete. Naake Baruku akĩwandĩka wothe ibukuinĩ rĩu rĩa gĩkũnjo.

5 Ngĩcooka ngĩatha Baruku ngĩmwĩra atĩrĩ, “Niĩ-rĩ, nĩngirĩĩtio gũcooka gũthiaga Hekaarũinĩ.

6 Ingĩkĩenda wee ũthiĩ kuo mũthenya ũrĩa andũ marĩkorwo mehingĩĩte kũrĩa, ũmathoomere ibuku rĩĩrĩ rĩa gĩkũnjo wanĩrĩire nĩguo maigue ũhoro wothe ũrĩa MWATHANI aanaahe, o ũcio ndakwĩra, nawe wawandĩka. Atĩrĩĩrĩ, ngwenda ũthoomere ũhoro ũcio harĩa andũ oothe marĩhota gũkũigua wega, gwata andũ a Juda arĩa marĩkorwo mookĩĩte kuuma matũũrainĩ maao.

7 No gũkorwo nĩmegũthaitha MWATHANI na matigane na mĩthiĩre yao mĩũru, nĩ ũndũ MWATHANI nĩehĩtĩire andũ aya araakarĩĩte na ang’ũrĩkĩĩte mũno.”

8 Naake Baruku agĩgĩthiĩ, agĩthooma ndũmĩrĩri ĩyo ya MWATHANI Hekaarũinĩ o ta ũrĩa ndamwathĩĩte eeke.

9 Na rĩĩrĩ, mweriinĩ wa kenda wa mwaka wa gataano wa ũthamaki wa Jehoiakimu bũrũriinĩ wa Juda, andũ oothe arĩa maatũũraga Jerusalemu na arĩa oothe mookĩĩte kuo moimĩĩte matũũrainĩ ma Juda, makĩĩhinga kũrĩa nĩguo mathaithe MWATHANI amatuge.

10 Hĩndĩ ĩyo Baruku agĩgĩthooma kuuma ibukuinĩ rĩu rĩa gĩkũnjo maũndũ moothe marĩa ndoigĩĩte andũ oothe mategeete matũ. Eekĩire ũndũ ũcio Hekaarũinĩ, arĩ rumuinĩ ya Gemaria mũrũ wa Shafani, ũrĩa warĩ karani. Rumu yake yarĩ kĩhaaroinĩ kĩa mwena wa na rũgongo kĩrĩa kĩarĩ hakuhĩ na itoonyero rĩa kĩhingo kĩa Hekaarũ kĩrĩa kĩoĩkaine ta Kĩhingo Kĩerũ.

Atongoria gũthoomerwo ibuku rĩa gĩkũnjo

11 Na rĩĩrĩ, Mikaya, mũrũ wa Gemaria na mũcũkũrũ wa Shafani, akĩigua Baruku agĩthooma ũrĩa wothe MWATHANI oigĩĩte kuuma ibukuinĩ rĩu rĩa gĩkũnjo.

12 Naake agĩikũrũka agĩthiĩ nyũmba ya mũthamaki, agĩtoonya wabici ya karani wakuo, agĩkora atongoria oothe magomanĩĩte kuo magĩciira. Atongoria acio maarĩ Elishama, ũrĩa warĩ karani, Delaia mũrũ wa Shamaia, Elinathani mũrũ wa Akiboru, Gemaria mũrũ wa Shafani, Zedekia mũrũ wa Hanania, na atongoria arĩa angĩ oothe.

13 Mikaya agĩkĩmeera ũhoro wothe ũrĩa aiguĩte Baruku agĩthoomera andũ.

14 Nao magĩtũma Jehudi (mũrũ wa Nethania na mũcũkũrũ wa Shelemia mũrũ wa Kushi) akeere Baruku amatwarĩre ibuku rĩu rĩa gĩkũnjo rĩrĩa aathoomeire andũ. Naake Baruku akĩoya ibuku rĩu rĩa gĩkũnjo, akĩmatwarĩra.

15 Nao makĩmwĩra atĩrĩ, “Ikara thĩ ũtũthoomere.” Baruku agĩgĩikara thĩ akĩmathoomera.

16 Marĩĩkia kũigua ũhoro wothe, makĩrorana mamakĩĩte, makĩĩra Baruku atĩrĩ, “No mũhaka tũmenyithie mũthamaki ũhoro ũcio wothe.”

17 Magĩcooka makĩmũũria atĩrĩ, “Tatwĩre, o ro rĩu, ũrandĩkire ũhoro ũcio atĩa. Nĩ Jeremia ũrakwĩrire ũkĩwandĩkaga?”

18 Baruku akĩmacookeria atĩrĩ, “Jeremia we mwene nĩ we ũraheire ũhoro ũcio wothe ngĩwandĩkaga na rangi ibukuinĩ rĩĩrĩ rĩa gĩkũnjo.”

19 Nao atongoria acio makĩmwĩra atĩrĩ, “Wee na Jeremia thiĩi mũkeehithe; mũtikaareke mũndũ o na ũrĩkũ amenye harĩa mũrĩ.”

Mũthamaki gũcina ibuku rĩu rĩa gĩkũnjo

20 Kwoguo atongoria acio magĩtiga ibuku rĩu rĩa gĩkũnjo kũu wabiciinĩ ya Elishama, ũrĩa warĩ karani, magĩthiĩ kũrĩa mũthamaki aarĩ, makĩmũmenyithia ũhoro ũcio wothe.

21 Naake mũthamaki agĩtũma Jehudi athiĩ akagĩĩre ibuku rĩu rĩa gĩkũnjo kuuma wabiciinĩ ya Elishama. Jehudi akĩrĩgĩĩra, akĩrĩthoomera mũthamaki na atongoria oothe arĩa maamũrigiicĩirie.

22 Hingo ĩyo kwarĩ hĩndĩ ya heho, naake mũthamaki agĩikaire nyũmba yake ĩrĩa aikaraga hĩndĩ ta ĩyo agĩota mwaki.

23 Na rĩĩrĩ, Jehudi athooma o icigo ithatũ kana inya-rĩ, naake mũthamaki agacitinangia na kahiũ, agaciikia mwakiinĩ. Aathire na mbere gwĩka ũguo nginya ibuku rĩu rĩothe rĩgĩcinwo rĩgĩthira.

24 O na kũhaana ũguo-rĩ, mũthamaki, o na kana ũmwe wa njaama ciake, arĩa maiguire ũhoro ũcio wothe matiigana gwĩtigĩra kana gũtembũranga nguo ciao moonanie ũrĩa maarĩ na kĩeha.

25 Ningĩ o na mũthamaki athaithwo nĩ Elinathani, Delaia, na Gemaria ndagaacine ibuku rĩu, ndaigana kũmathikĩrĩria o na atĩa.

26 Mũthamaki agĩcooka agĩatha mũũrũwe Jerameeli, na Saraia mũrũ wa Azirieli, na Shelemia mũrũ wa Abideeli, manyiite Jeremia na Baruku karani gaake. No rĩĩrĩ, MWATHANI nĩamahithĩĩte.

Jeremia kwandĩka ibuku rĩngĩ rĩa gĩkũnjo

27 Thuutha wa mũthamaki Jehoiakimu gũcina ibuku rĩu rĩa gĩkũnjo rĩrĩa rĩarĩ na ũhoro ũrĩa ndeerĩĩte Baruku akĩwandĩkaga, MWATHANI nĩanjĩĩrire

28 njoe ibuku rĩngĩ, nyandĩke thĩinĩ warĩo ũhoro wothe ũrĩa warĩ ibukuinĩ rĩa mbere.

29 Na rĩĩrĩ, MWATHANI aanjĩĩrire ngeere mũthamaki Jehoakimu atĩrĩ, “Nĩũracinire ibuku, na ũrooria Jeremia kĩrĩa kĩratũmire aandĩke atĩ mũthamaki wa Babilonia nĩegũũka, aanange bũrũri ũyũ, na oorage andũ aaguo o na nyamũ.

30 Tondũ ũcio, niĩ MWATHANI, ngwenda gũkwĩra wee mũthamaki Jehoiakimu, atĩ hatirĩ o na ũmwe wa njiarwa ciaku ũgaathamaka ũthamakiinĩ wa Daudi rĩ o rĩ. Kĩimba gĩaku gĩgaatigwo kĩaraganĩĩte gĩcinagwo nĩ riũa mũthenya, na gĩcinagwo nĩ mbaa ũtukũ.

31 Nĩngũkũherithia we mwene, njiarwa ciaku, na atongoria nĩ ũndũ wa meehia moothe marĩa mwĩkĩĩte. Ngũkũreehithĩria wee mwene, o hamwe na andũ a Jerusalemu na a Juda mwanangĩko wothe ũrĩa njugĩĩte ngũmũreehithĩria tondũ o na ndamũkaania mũtiiguaga.”

32 Kwoguo ngĩkĩoya ibuku rĩngĩ rĩa gĩkũnjo ngĩrĩnengera Baruku karani wakwa, naake akĩandĩka thĩinĩ warĩo ũhoro wothe ũrĩa ndamwĩrĩĩte akĩandĩkaga. Aandĩkire ũhoro wothe ũrĩa warĩ ibukuinĩ rĩrĩa mũthamaki Jehoiakimu aacinire, na akĩongerera ũhoro ũngĩ wahaanaga o ta ũcio wa mbere ũrĩa ndamũheire.

Ihooya rĩa Zedekia harĩ Jeremia

1 Na rĩĩrĩ, Nebukadinezaru, mũthamaki wa Babilonia, agĩtua Zedekia, mũrũ wa Josia, mũthamaki wa Juda ithenya rĩa Jehoiakini, mũrũ wa Jehoiakimu.

2 No rĩĩrĩ, Zedekia we mwene, kana njaama ciake, o na kana andũ a bũrũri wa Juda gũtirĩ wathĩkĩire ndũmĩrĩri ĩrĩa MWATHANI aarĩĩtie na kanua gaakwa.

3 Mũthamaki Zedekia agĩtũma Jehukali mũrũ wa Shelemia, na mũthĩnjĩri Ngai Zefania mũrũ wa Maaseia mooke manjũũrie hooe MWATHANI Ngai witũ nĩ ũndũ wa rũũrĩrĩ rwitũ.

4 Hĩndĩ ĩyo-rĩ, no ndaceeraceeraga na andũ o ta ũrĩa ingiendire tondũ ndiaikĩĩtio njeera.

5 Na rĩĩrĩ, mahindainĩ macio nĩguo mbũtũ cia ita cia Babilonia ciathiũrũrũkĩirie itũũra rĩa Jerusalemu. No rĩĩrĩ, rĩrĩa ciaiguire atĩ mbũtũ cia ita cia Amisiri nĩcioimagarĩĩte igakĩra mũhaka wa bũrũri, mbũtũ icio cia Babilonia igĩtiganĩria Jerusalemu ikĩũra.

6 Hĩndĩ ĩyo MWATHANI Ngai wa Isiraeli, akĩnjĩĩra

7 njĩĩre Zedekia atĩrĩ, “Mbũtũ cia ita cia Misiri iria ciũkĩĩte gũgũteithĩrĩria-rĩ, nĩikũhũndũka icooke o bũrũriinĩ wacio.

8 Ababilonia nao nĩmekũhũndũka, mooke matharĩkĩre itũũra rĩĩrĩ marĩtuunyane na marĩcine na mwaki.

9 Niĩ MWATHANI, nĩndamũkaania mũtikeeheenie na gwĩciiria atĩ Ababilonia matigũcooka, tondũ no nginya macooke.

10 O na mũngĩhoota mbũtũ ciothe cia ita cia Ababilonia, gũtuĩke atĩ no andũ arĩa matiihangĩĩtio matigaire makomeete hemainĩ ciao-rĩ, andũ o ro acio no marahũke, macine itũũra rĩĩrĩ na mwaki.”

Jeremia kũnyiitwo na kuohwo

11 Na rĩĩrĩ, hĩndĩ ĩrĩa mbũtũ cia ita cia Ababilonia ciatiganĩirie Jerusalemu ikĩũra tondũ mbũtũ cia ita cia Amisiri nĩgũũka ciokaga-rĩ,

12 ngĩkiuma kũu Jerusalemu nĩguo thiĩ bũrũri wa Benjamini nĩguo ngegwatĩre igai rĩakwa thĩinĩ wa indo cia mũciĩ witũ.

13 No rĩĩrĩ, rĩrĩa ndakinyire kĩhingoinĩ kĩrĩa gĩetagwo Kĩhingo kĩa Benjamini, ngĩkora mũnene wa arangĩri arĩa maarangĩire kũu wetagwo Irija, mũrũ wa Shelemia na mũcũkũrũ wa Hanania. Naake akĩndũũgamia, akĩnjĩĩra atĩrĩ, “Wee ũroora ũthiĩ kũrĩ Ababilonia!”

14 Na niĩ ngĩcookia atĩrĩ, “Macio nĩ maheeni! Niĩ ti kũũra ndĩroora.” No rĩĩrĩ, Irija ndaigana gũũthikĩrĩria; we no kũũnyiita aanyiitire akĩndwara kũrĩ atongoria.

15 Nao atongoria acio makĩndaakarĩra mũno, magĩathana hũũrwo na hingĩrwo nyũmbainĩ ya Jonathani, ũrĩa warĩ karani, tondũ nĩ yo yatuĩtwo njeera.

16 Ngĩkĩigwo kanyũmbainĩ kaarĩ thĩ wa nyũmba ĩyo, ngĩikara kuo ihinda iraaya.

17 Thuutha ũcio mũthamaki Zedekia akĩndũmanĩra, ndĩ gwake mũciĩ akĩnjũũria na hitho atĩrĩ, “Nĩharĩ ndũmĩrĩri o yothe wĩ nayo kuuma kũrĩ MWATHANI?”

Na niĩ ngĩcookia atĩrĩ, “Ĩĩ nĩharĩ.” Ngĩcooka ngĩthiĩ na mbere ngĩmwĩra atĩrĩ, “Nĩũkũneanwo kũrĩ mũthamaki wa Babilonia.”

18 Hĩndĩ ĩyo ngĩũria mũthamaki Zedekia atĩrĩ, “Nĩ mahĩtia marĩkũ ngũhĩtĩirie wee mwene, kana ngahĩtĩria atongoria o na kana andũ aya, nĩguo ũnjikithie njeera?

19 Atĩrĩĩrĩ, me ha anabii arĩa aaku arĩa maakũrathagĩra atĩ mũthamaki wa Babilonia ndagaagũtharĩkĩra o na kana atharĩkĩre bũrũri ũyũ?

20 Rĩu, mwathi wakwa mũthamaki, ndagũthaitha ũthikĩrĩrie na ũhingĩrie ũrĩa ngũkũhooya. Ndagũthaitha ndũkanjookie njeera nyũmbainĩ ya Jonathani, tondũ weka ũguo no ngũkuĩra kuo.”

21 Kwoguo mũthamaki Zedekia agĩathana hingĩrwo kũrĩa arangĩri maikaraga. Na niĩ ngĩgĩikara kuo, na o mũthenya nĩndaheagwo mũgate ũmwe kuuma mbekeriinĩ o nginya rĩrĩa mĩgate yathirire kũu itũũrainĩ.

Jeremia gũikio thĩinĩ wa irima rĩa maaĩ

1 Na rĩĩrĩ, Shefatia mũrũ wa Matani, Gedalia mũrũ wa Pashuri, Jehukali mũrũ wa Shelemia, na Pashuri mũrũ wa Malikia makĩigua ũrĩa ndeeraga andũ oothe atĩ

2 MWATHANI oigĩĩte atĩ mũndũ o wothe ũrĩa ũgũikara kũu itũũrainĩ arĩkuĩra mbaarainĩ, kana ooragwo nĩ ng’aragu, kana mũrimũ. No rĩĩrĩ, mũndũ o wothe ũrĩa ũkwĩneana kũrĩ Ababilonia ndarĩũragwo; ũcio, muoyo wake nĩũrĩhonokio.

3 O na ningĩ nĩndeeraga andũ atĩ MWATHANI oigĩĩte atĩ nĩekũneana itũũra rĩa Jerusalemu mookoinĩ ma mbũtũ cia ita cia mũthamaki wa Babilonia, nacio nĩikũrĩtuunyana.

4 Nao atongoria acio magĩthiĩ kwĩ mũthamaki makĩmwĩra atĩrĩ, “Mũndũ ũyũ no nginya ooragwo, tondũ nĩkũũraga ooragaga thigari ngoro o na andũ oothe arĩa matigarĩĩte gũũkũ itũũrainĩ rĩrĩa arameera maũndũ ta macio. Muorooto wake ti gũteithia andũ, arenda o kũmoonũha!”

5 Naake mũthamaki Zedekia agĩcookia atĩrĩ, “Niĩ-rĩ, ndingĩhota kũmũgirĩrĩria o na atĩa; mwĩkeei o ũrĩa mũkuona kwagĩrĩire.”

6 Kwoguo makĩnjoya, makĩĩharũrũkia na mĩkanda irimainĩ rĩa maaĩ rĩa mũrũ wa mũthamaki wetagwo Malikia. Irima rĩu rĩa maaĩ rĩarĩ kũrĩa arangĩri maikaraga, na rĩtiarĩ na maaĩ tiga o mũtondo. Na niĩ ngĩgĩtoonyerera mũtondoinĩ ũcio.

7 No rĩĩrĩ, Ebedimeleku, Mũethiopia warĩ mũhakũre watungataga mũciĩ kwa mũthamaki, akĩigua atĩ nĩmanjikĩĩtie kũu irimainĩ. Hĩndĩ ĩyo mũthamaki aarĩ na kĩama kĩhingoinĩ kĩa Benjamini.

8 Kwoguo Ebedimeleku agĩgĩthiĩ ho, akĩĩra mũthamaki atĩrĩ,

9 “Mwathi wakwa mũthamaki, andũ acio matiĩkĩĩte mũnabii Jeremia wega o na haniini. Mamũikĩĩtie irimainĩ rĩa maaĩ, akuĩre kuo nĩ ng’aragu, tondũ gũũkũ itũũrainĩ irio ciothe nĩthiru.”

10 Hĩndĩ ĩyo mũthamaki agĩatha Ebedimeleku ooe arũme atatũ mooke manguucie kuuma kũu irimainĩ itanakua.

11 Kwoguo Ebedimeleku akĩoya arũme atatũ, agĩthiĩ nao thitoo ya nyũmba ya mũthamaki, akĩoya ndangari cia nguo, agĩcioha na mũkanda, akĩĩharũrũkĩria kũu irimainĩ.

12 Akĩnjĩĩra njĩkĩre ndangari icio njegeekeinĩ ciakwa, nĩguo ndikaae gũkerwo nĩ mĩkanda. Na niĩ ngĩgĩĩka o ta ũguo,

13 nao makĩnguucia kuuma kũu irimainĩ. Thuutha ũcio ngĩigwo kũrĩa arangĩri maikaraga.

Mũthamaki Zedekia kũhooya Jeremia mataaro

14 Na rĩĩrĩ, hĩndĩ ĩngĩ mũthamaki Zedekia agĩathana ndwarwo itoonyeroinĩ rĩa gatatũ rĩa Hekaarũ o kũrĩa aarĩ. Naake akĩnjĩĩra atĩrĩ, “Harĩ na ũndũ ndĩrenda gũkũũria; ndũkaae kũũhitha kaũndũ o na kamwe.”

15 Na niĩ ngĩmũcookeria atĩrĩ, “Ndakwĩra ũhoro wa ma nĩũkũnjũraga, na ndagũtaara ndũkũnjigua.”

16 Hĩndĩ ĩyo mũthamaki Zedekia akĩĩheeherera akĩhĩtaga akĩnjĩĩra atĩrĩ, “Ndehĩta na Ngai ũrĩa ũrĩ muoyo, o we watũheire muoyo, atĩ ndigũkũũraga kana ngũneane kũrĩ andũ arĩa marenda gũkũũraga.”

17 Na niĩ ngĩĩra Zedekia atĩrĩ, “MWATHANI Ngai Mwene Hinya Wothe, o we Ngai wa Isiraeli, ekuuga ũũ: ‘Weneana kũrĩ anjaama a mũthamaki wa Babilonia nĩũkũhonokio na itũũra rĩĩrĩ rĩtigũcinwo na mwaki. Wee mwene na mũciĩ waku nĩmũkũhonokio.

18 No rĩĩrĩ, waga kwĩneana kũrĩ o, itũũra rĩĩrĩ rĩkũneanwo kũrĩ Ababilonia, marĩcine na mwaki, nawe mwene ndũhonoka.’ ”

19 Naake mũthamaki Zedekia akĩnjookeria atĩrĩ, “Nĩndĩretigĩra andũ a bũrũri witũ arĩa matũtiganĩirie magathiĩ mwena wa Ababilonia. Ndahota kũneanwo kũrĩ o, nao maaherithie.”

20 Na niĩ ngĩmwĩra atĩrĩ, “Ndũkũneanwo kũrĩ o. Wee-rĩ, athĩkĩra uuge wa MWATHANI, nĩguo ndũkoone ũũru na ũhonokie muoyo waku.

21 Tondũ rĩĩrĩ, warega kwĩneana kũrĩ o, ũũ nĩguo MWATHANI anyoneetie na kĩoneki:

22 Kĩonekiinĩ kĩu anyoneetie atumia oothe arĩa matigĩĩtwo nyũmbainĩ yaku ya ũthamaki makĩrutwo na nja matwarĩrwo anene a thigari cia mũthamaki wa Babilonia. Atumia acio marathiĩ makiugaga atĩrĩ,

‘Araata a mũthamaki arĩa eekĩrĩire mũno

nĩmamũhĩtithĩĩtie na makamũkĩria hinya;

nĩmamũtiganĩirie tondũ magũrũ maake nĩmatoonyereire mũtondoinĩ.’ ”

23 Ngĩcooka ngĩmwĩra atĩrĩ, “Atumia aaku oothe, hamwe na ciana, makaarutwo na nja matwarĩrwo Ababilonia, na wee mwene ndũkaahota kwĩhonokia kuuma mookoinĩ ma Ababilonia. Ũkaanyiitwo nĩ mũthamaki wa Babilonia, narĩo itũũra rĩĩrĩ rĩcinwo na mwaki.”

24 Naake Zedekia akĩnjĩĩra atĩrĩ, “Ndũkaareke mũndũ o na ũrĩkũ amenye ũguo twaria, ndũkaae kũũragwo.

25 Atongoria mangĩigua atĩ nĩnjarĩĩtie nawe, nao mooke makwĩre ũmeere ũrĩa twaririe na ndũkaamahithe ũndũ, na waga gwĩka ũguo nĩmegũkũũraga-rĩ,

26 meere atĩ nĩgũũthaitha ũgũũthaithaga ndikaae gũgũcookia kandurumu ũgakuĩre kuo.”

27 Na rĩĩrĩ, atongoria oothe magĩgĩũka kũũhũnga mahũri, na niĩ ngĩmacookeria o ta ũrĩa ndaathĩĩtwo nĩ mũthamaki. Nao magĩgĩtiga kũũhũnga mahũri tondũ gũtirĩ mũndũ waiguĩte ũrĩa twarĩĩtie.

28 Na niĩ ngĩigwo kũrĩa arangĩri maikaraga o nginya rĩrĩa itũũra rĩa Jerusalemu rĩanyiitirwo.

Itũũra rĩa Jerusalemu kũng’aũranio

1 Na rĩĩrĩ, mweriinĩ wa ikũmi wa mwaka wa kenda wa ũthamaki wa Zedekia bũrũriinĩ wa Juda, Nebukadinezaru, mũthamaki wa Babilonia, agĩũka na mbũtũ yake yothe ya ita, agĩtharĩkĩra itũũra rĩa Jerusalemu.

2 Mũthenya wa kenda wa mweri wa ĩna wa mwaka wa ikũmi na ũmwe wa ũthamaki wa Zedekia, thingo cia itũũra rĩa Jerusalemu igĩtoboranio ikĩgĩa na mĩanya ya gũtoonyerwo.

3 Na rĩĩrĩ, rĩrĩa itũũra rĩa Jerusalemu rĩanyiitirwo, anjaama oothe a mũthamaki wa Babilonia arĩa maarĩ anene magĩtoonya thĩinĩ, magĩikara kĩhingoinĩ gĩa Gatagatĩ. Amwe a anjaama acio maarĩ Nerigali Sharezeri, Samugari Nebo, Sarisekimu, na Nerigali Sharezeri o ũngĩ.

4 Hĩndĩ ĩrĩa mũthamaki Zedekia na thigari ciake ciothe maamoonire, makĩgeria kũũra kuuma kũu itũũrainĩ ũtukũ. Magĩkĩũra magereire njĩra ĩrĩa yarĩ mũgũndainĩ wa mũthamaki, makiumĩra kĩhingo kĩrĩa kĩarĩ gatagatĩ ga thingo igĩrĩ, makĩnyiita njĩra ĩrĩa yerekeire gĩtuambainĩ kĩa Jorodani.

5 No rĩĩrĩ, mbũtũ ya ita ya Ababilonia ĩgĩteng’erania nao, ĩgĩkinyĩrĩra Zedekia kĩaragana kĩrĩa kĩarĩ hakuhĩ na Jeriko. Ĩkĩmũnyiita, ĩkĩmũtwara kwĩ mũthamaki Nebukadinezaru ũrĩa warĩ itũũrainĩ rĩa Ribila rĩrĩa rĩrĩ rũgongo rwa Hamathu. Naake Nebukadinezaru akĩmũtuĩra arĩ o kũu.

6 Mũthamaki Nebukadinezaru agĩkĩũragithia aariũ a Zedekia o kũu Ribila ithe wao akĩonaga, agĩcooka akĩũragithia atongoria oothe a Juda.

7 Arĩĩkia gwĩka ũguo agĩkũũrithia Zedekia maitho na akĩmuoha na bĩngũ nĩguo atwarwo Babilonia.

8 Nao Ababilonia magĩcina nyũmba ya mũthamaki, o na nyũmba cia andũ, na makĩmomora thingo cia Jerusalemu.

9 Naake Nebuzaradani, ũrĩa warĩ mũnene wa arangĩri, agĩkuua andũ arĩa maatigarĩĩte kũu itũũrainĩ, hamwe na arĩa maarĩtiganĩirie magathiĩ mwena wake, akĩmatwara Babilonia marĩ mĩgwate.

10 No rĩĩrĩ, Nebuzaradani nĩatigire kũu bũrũriinĩ wa Juda andũ amwe arĩa maarĩ athĩĩni mũno na mataarĩ kĩndũ, na akĩmahe mĩgũnda ya mĩthabibũ o na mĩgũnda ya kũrĩma.

Jeremia kũrekererio

11 Na rĩĩrĩ, Nebukadinezaru, mũthamaki wa Babiloni, agĩatha Nebuzaradani, mũnene wa arangĩri, ũhoroinĩ wakwa akĩmwĩra atĩrĩ,

12 “Thiĩ ũgacarie Jeremia, na ũmũmenyerere wega. Ndũkaae kũmwĩka ũũru; mwĩke ũrĩa wothe ekwenda.”

13 Tondũ ũcio, Nebuzaradani, Nebushazibani, Nerigali Sharezeri, anjaama arĩa anene, o na anjaama arĩa angĩ oothe a mũthamaki wa Ababilonia,

14 makiuga ndutwo kũu kwa arangĩri. Makĩĩneana kũrĩ Gedalia, mũrũ wa Ahikamu na mũcũkũrũ wa Shafani, nĩguo anyinũkie mũciĩ. Na niĩ ngĩgĩikara kũu mũciĩ hamwe na andũ arĩa angĩ.

Ebedimeleku kũheeo mwĩhoko

15 Na rĩĩrĩ, rĩrĩa ndooheirwo kũrĩa arangĩri maikaraga, MWATHANI nĩanjarĩirie akĩnjĩĩra atĩrĩ,

16 “Thiĩ, wĩre Ebedimeleku ũrĩa Mũethiopia atĩrĩ, ‘MWATHANI Mwene Hinya Wothe, o we Ngai wa Isiraeli, ekuuga ũũ: Atĩrĩĩrĩ, o ta ũrĩa ndoigĩĩte nĩngwĩka, nĩngũreehithĩria itũũra rĩĩrĩ ũũru handũ ha wega. Ũndũ ũcio-rĩ, ndĩrĩwĩka wee mwene wĩroreire.

17 No rĩĩrĩ, niĩ MWATHANI nĩndĩrĩkũgitĩra ndũrĩneanwo kũrĩ andũ arĩa ũretigĩra.

18 Nĩndĩrĩkũmenyerera, na ndũrĩũragwo. Wee-rĩ, muoyo waku nĩũrĩhonokio, tondũ nĩũigĩĩte mwĩhoko waku harĩ niĩ. Niĩ MWATHANI, nĩ niĩ ndoiga ũguo.’ ”