Category: Jeremia

Gũthaathaiya mĩhianano na gũthaathaiya Ngai ũrĩa wa ma

1 Inyuĩ andũ aya a Isiraeli, tathikĩrĩriai ndũmĩrĩri ĩrĩa MWATHANI arenda kũmũhe.

2 MWATHANI aroiga atĩrĩ,

“Mũtikaarũmĩrĩre mĩthiĩre ya ndũũrĩrĩ iria ĩngĩ,

o na kana mũthĩĩnĩke ngoro nĩ ũndũ wa moorirũ ma igũrũ;

rekeei ndũũrĩrĩ iria ingĩ imakio nĩ mo.

3 Ndini cia andũ acio nĩ cia maheeni.

Mũtĩ ũtemagwo mũtitũ,

ũgaacũhio na ithanwa nĩ mwacũhia wa indo cia mĩtĩ,

4 na akaũgemia na betha na thahabu.

Agacooka akaũhũũrĩrĩra mĩcumaarĩ

nĩguo ũrũme ndũkang’aũkane.

5 Mĩhianano ĩyo yao ĩhaana ibuuri irĩ mũgũndainĩ wa marenge;

ndĩngĩhota kwaria;

no mũhaka ĩkuuo, tondũ ndĩngĩhota gwĩtwara.

Mũtikaamĩtigĩre, nĩ gũkorwo ndĩngĩmwĩka ũũru,

o na kana ĩmwĩke wega o na atĩa.”

6 MWATHANI, gũtirĩ ũngĩ ũhaana ta we;

wee-rĩ, wĩ mũnene, na rĩĩtwa rĩaku rĩ hinya mũingĩ.

7 Nũũ ũtangĩgũtĩĩa,

wee mũthamaki wa ndũũrĩrĩ ciothe?

Nĩwagĩrĩire gũtĩĩo,

tondũ thĩinĩ wa andũ oothe oogĩ a ndũũrĩrĩ,

o na kana thĩinĩ wa athamaki aao oothe,

hatirĩ ũhaana ta we.

8 Oothe nĩ akĩĩgu na makariita;

nĩ kĩĩ mangĩĩruta na mĩhianano ya mĩtĩ?

9 Mĩhianano yao ĩgemeetio na betha ya kuuma Sipania

na thahabu ya kuuma Ũfazi.

Wĩra ũcio wothe ũrutĩĩtwo

nĩ aacũhia a mĩtĩ na aturi thahabu

ĩhumbĩĩtwo nguo cia rangi wa mburuu na wa babũ

itumĩĩtwo nĩ atumi nguo oohĩgĩrĩru.

10 No wee, MWATHANI, nĩ we Ngai wa ma;

wee-rĩ, nĩ we Ngai ũrĩa ũrĩ muoyo,

na mũthamaki wa tene na tene.

Hĩndĩ ĩrĩa ũraakarĩĩte, thĩ nĩthingithaga,

na ndũũrĩrĩ itingĩhota gwĩtiiria mang’ũrĩ maaku.

11 (Inyuĩ andũ a Isiraeli no mũhaka mũmeere atĩ ngai iria itoombire thĩ na igũrũ nĩikaaniinwo ithire biũ gũũkũ thĩ).

Rwĩmbo rwa kũgooca Ngai

12 MWATHANI nĩ we wombire thĩ na hinya wake;

nĩ we wathondekire thĩ na ũũgĩ wake,

na agĩtambũrũkia matu mairũ na ũmenyo wake.

13 Hĩndĩ ĩrĩa agũũthũka, maaĩ marĩa me igũrũ nĩkũruruma marurumaga;

nĩ we ũreehithagia matu kuuma ituri cia thĩ.

Atũmaga rĩrĩa kũroira heni ihenũke,

na akareehithia rũhuuho kuuma thitoo ciake.

14 Andũ oothe moona ũguo, makariita na magaturuura;

arĩa oothe mathondekaga mĩhianano makaigua maconokeete

tondũ ngai iria mathondekaga ti cia ma na itirĩ muoyo.

15 Ngai icio ciao nĩ cia tũhũ na ciagĩrĩire o kũnyararwo;

hĩndĩ ĩrĩa MWATHANI agaatua gũciherithia nĩikaaniinwo.

16 Ngai wa Jakubu ndatariĩ tacio;

nĩ we wombire indo ciothe;

na agĩthuura andũ a Isiraeli matuĩke aake kĩũmbe.

Rĩĩtwa rĩake nĩ MWATHANI Mwene Hinya Wothe.

Gũthaamio nĩkũrooka

17 Inyuĩ andũ a Jerusalemu, mũrĩ arigiicĩrie!

Cookanĩrĩriai indo cianyu!

18 Tondũ MWATHANI ekuuga atĩ

nĩekũmũikia na nja ya bũrũri ũyũ.

Ekũmũnyariirithia, nginya mũmenye nĩmũnyariirĩĩtwo.

19 Andũ a Jerusalemu magĩkaya makiuga atĩrĩ,

“Ĩ tũtitiihangĩĩtio! Ironda ciitũ itingĩhona!

Tũreciiragia no twĩyũmĩrĩrie ihũũra ta rĩĩrĩ!

20 Hema ciitũ nĩcianangĩĩtwo,

na mĩkanda ĩrĩa irambĩĩtwo nayo nĩtinangĩĩtio.

Ciana ciitũ ciothe nĩithiĩte igatweherera;

hatirĩ mũndũ o na ũmwe ũtigaire wa gũtwambagĩra hema ciitũ rĩngĩ,

o na wa kuohagĩrĩra ciandarũũa ciacio.”

21 Na niĩ ngĩcookia atĩrĩ,

“Atongoriaaitũ nĩ akĩĩgu,

matihooyaga MWATHANI kĩrĩra.

Nĩkĩo matagaacĩire wega,

na andũ aitũ makahurunjwo.

22 Thikĩrĩriai, ũhoro nĩwakinya!

Kwĩ na inegene inene rũũrĩrĩinĩ rwa mwena wa na rũgongo;

mbũtũ ciaruo cia ita igũtua matũũra ma Juda maganjo

matuĩke imaamo cia mbwe.”

23 MWATHANI, nĩnjũũĩ atĩ mũndũ ndangĩĩthuurĩra njĩra ĩrĩa ekũgerera;

mũndũ ndarĩ hinya igũrũ rĩa muoyo wake.

24 Rũnga andũ aaku, MWATHANI, no ndũkegũmĩre mũno;

ndũgaatũherithie ũraakaire tũtigaathire.

25 Erekeria maraakara maaku kũrĩ ndũũrĩrĩ iria itagũthaathayagia,

o na kũrĩ andũ arĩa makũregeete.

Nĩ gũkorwo nĩciũragĩĩte andũ aaku,

nĩitwanangĩĩte o biũ,

na igatiga bũrũri witũ ũrĩ maganjo.

Ngai kũririkania andũ kĩrĩĩkanĩro gĩake nao

1 MWATHANI akĩnjĩĩra atĩrĩ,

2 “Thikĩrĩria maũndũ maya makoniĩ kĩrĩĩkanĩro, ũcooke wĩre andũ a Juda na a Jerusalemu ũhoro wamo.

3 Meere atĩrĩ, niĩ MWATHANI Ngai wa Isiraeli, nĩngũtũma mũndũ o wothe ũrĩa ũtaathĩkaga kũringana na ũrĩa maũndũ ma kĩrĩĩkanĩro moigĩĩte anyiitwo nĩ kĩrumi.

4 Kĩrĩĩkanĩro kĩu nĩ kĩrĩa ndathondekire na maithe maanyu hĩndĩ ĩrĩa ndamarutire Misiri, bũrũri ũrĩa wahaanaga icua rĩa mwaki ũkũrĩrĩmbũka. Ndameerire manjathĩkagĩre na meekage ũrĩa wothe ndamaathĩĩte nĩguo matuĩke andũ aakwa, na niĩ nduĩke Ngai wao.

5 Meeka ũguo, na niĩ nĩngaahingia ũrĩa ndeerĩire maithe maao na mwĩhĩtwa atĩ nĩngaamahe bũrũri mwega na mũnoru ũrĩa rĩu me naguo.”

Hĩndĩ ĩyo na niĩ ngĩcookia atĩrĩ, “Kũrotuĩka ũguo, MWATHANI.”

6 Naake MWATHANI akĩnjĩĩra atĩrĩ, “Thiĩ matũũrainĩ ma Juda na njĩrainĩ cia Jerusalemu wanĩrĩre ndũmĩrĩri yakwa kuo. Ĩra andũ mathikĩrĩrie ũrĩa maũndũ ma kĩrĩĩkanĩro maroiga na mamaathĩkĩre.

7 Nĩ gũkorwo rĩrĩa ndarutire maithe maao Misiri, nĩndameerire ngwatĩirie manjathĩkagĩre, na no ndĩrathiĩ na mbere kũmeera ũguo nginyagia rĩu.

8 No o matiigana gũũthikĩrĩria kana kũnjathĩkĩra; oothe maakĩrĩirie kũrema na gũtuĩka ooru. Kwoguo ngĩmareehithĩria mahera moothe marĩa marĩ kĩrĩĩkanĩroinĩ kĩrĩa ndamaathĩĩte marũmagĩrĩre no matiigana gũkĩrũmĩrĩra.”

9 Ningĩ MWATHANI akĩnjĩĩra atĩrĩ, “Andũ a Juda na a Jerusalemu nĩmarabanga na hitho kũnjũkĩrĩra.

10 Nĩmacookereire meehia ma maithe maao, arĩa maaregire kũnjathĩkĩra; nĩmathaathaĩtie ngai ingĩ. Andũ a Isiraeli na a Juda nĩmathaahĩĩtie kĩrĩĩkanĩro kĩrĩa ndathondekire na maithe maao.

11 Tondũ ũcio, niĩ MWATHANI, ngwenda maikare mooĩ wega atĩ, nĩngũmareehithĩria mwanangĩko matangĩhota kũũrĩra. Hĩndĩ ĩyo nĩmarĩngaĩra ndĩmateithie, no ndĩrĩmathikĩrĩria.

12 Nao andũ a Juda na a Jerusalemu nĩmarĩthiĩ kũrĩ ngai iria marutagĩra magongoona macikaĩre imateithie, no itirĩhota kũmahonokia hĩndĩ ĩrĩa mwanangĩko ũcio ũrĩũka.

13 Nĩ gũkorwo andũ a Juda me na ngai nyingĩ o ta matũũra marĩa me namo. Nao atũũri a Jerusalemu maakĩĩte igongoona cia kũrutĩra ngai ĩyo ĩrĩ magigi ĩĩtagwo Baali, ikaingĩha o ta njĩra iria irĩ itũũrainĩ rĩu rĩao.

14 Tondũ ũcio, Jeremia, ndũkaahooe o na kana ũthaithe ithenyainĩ rĩa andũ aya, nĩ ũndũ ndirĩthikĩrĩria hĩndĩ ĩrĩa marĩngaĩra ndĩmateithie marĩ mathĩĩnainĩ.”

15 MWATHANI ekũũria atĩrĩ, “Andũ arĩa nyendeete me na kĩhooto kĩrĩkũ gĩa gũkorwo me Hekaarũinĩ yakwa o rĩrĩa mareeka ciĩko njũru? Mareciiria no magirĩrĩrie mũthiro na ũndũ wa kwĩhĩta mĩhĩtwa na kũruta magongoona ma nyamũ? Gwĩka ũguo no gũtũme magĩe na gĩkeno?

16 He hĩndĩ ndameetaga mũtamaiyũ wĩ na mathangũ maruru wega, na ũiyũire matunda meega. Rĩu ngũruruma ta marurumĩ njine mathangũ maaguo na nyunange honge ciaguo.

17 Niĩ, MWATHANI Ngai Mwene Hinya Wothe, nĩ niĩ ndahandire Isiraeli na Juda, no rĩu nĩngũmareehithĩria mũthiro. Ngwĩka ũguo tondũ nĩmeekĩĩte ũũru magatũma ndaakare na ũndũ wa kũrutĩra Baali magongoona.”

Mũbango wa kũũraga Jeremia

18 MWATHANI akĩĩmenyithia,

na niĩ ngĩmenya mĩbango mĩũru

ĩrĩa thũ ciakwa ciarĩ nayo ya kũnjũkĩrĩra.

19 Ndatariĩ ta ndũrũme hooreri ĩrathiĩ gũthĩnjwo

Ndiigana kũmenya atĩ nĩ niĩ maacaragĩria kĩrĩi, hĩndĩ ĩrĩa moigaga atĩrĩ,

“Rekeei rĩu twanange mũtĩ hamwe na maciaro maaguo;

rekeei tũmũũrage ndakaanacooke kũririkanwo rĩngĩ gũũkũ thĩ.”

20 Hĩndĩ ĩyo ngĩhooya ngiuga atĩrĩ,

“MWATHANI Ngai Mwene Hinya Wothe, o wee, ũtuanagĩra na kĩhooto,

na ũgeragia ngoro na meciiria ma andũ;

reke nyone ũkĩndĩhĩria harĩ andũ aya,

tondũ ciira wakwa nao ndaũiga mookoinĩ maaku.”

21 Andũ a itũũra rĩa Anathothu nĩmeendaga kũnjũragithia. Manjĩĩrĩĩte atĩ nĩmekũnjũraga ndathiĩ na mbere kũratha ngĩgwetaga rĩĩtwa rĩa MWATHANI.

22 Tondũ ũcio MWATHANI Ngai Mwene Hinya Wothe akiuga atĩrĩ, “Nĩnguonana nao! Andũ eethĩ aao makooragĩrwo mbaarainĩ, nacio ciana ciao ciũragwo nĩ ng’aragu.

23 Hatirĩ mũndũ o na ũmwe wa itũũra rĩa Anathothu ũgaatigara, nĩ gũkorwo nĩbangĩĩte ihinda rĩa kũreehithĩria andũ a itũũra rĩĩrĩ mũthiro.”

Jeremia kũũria MWATHANI ciũria

1 MWATHANI, ingĩkũreehere mateta maakwa,

wonekanaga ũrĩ o kĩhootoinĩ.

No o na kũrĩ ũguo-rĩ, nĩngwenda gũciira nawe.

Andũ arĩa ooru magaacagĩra nĩkĩ?

Arĩa makunyanagĩra arĩa angĩ matongaga nĩkĩ?

2 Ũmahandaga, nao makagĩa na mĩri,

magakũra o na makagĩa na maciaro.

Maganaga wega waku hingo ciothe,

no ngoro ciao ikoragwo ciikaire kũraaya nawe.

3 No wee, MWATHANI, nĩũnjũũĩ,

nĩwonaga ũrĩa ndĩreeka,

ũkoona atĩ nĩngwendeete.

Guucũrũria andũ aya ooru ta ng’ondu ĩgĩtwarwo gĩthĩnjĩroinĩ,

ũmarangĩre nginya ihinda rĩao rĩa gũthĩnjwo rĩkinye.

4 Nĩ nginya rĩ bũrũri ũgũtũũra ũcakaayaga,

na nyeki kũndũ guothe ĩhooheete?

Nyamũ na nyoni nĩgũkua irakua,

nĩ ũndũ wa waganu wa andũ aitũ,

arĩa moigaga atĩrĩ, “Ngai ndarona ũrĩa tũreeka.”

5 MWATHANI akiuga atĩrĩ,

“Jeremia, angĩkorwo nĩũteng’eranĩĩtie na andũ magakũhũũmia,

ũngĩkĩhota atĩa gũcindana na mbarathi?

Ningĩ angĩkorwo nĩkũgũa ũragũa kũndũ kwaraganu-rĩ,

no ũgĩĩtiirie mũtitũ wa Jorodani?

6 Nĩ gũkorwo aariũ a maitũguo, na andũ a mũciĩ wanyu nĩmagũkunyanĩire;

nĩmagwatanĩire na arĩa marakũhũũra.

Ndũkaamehoke, o na makũnyorokeria tũnua.”

MWATHANI kũiguĩra andũ aake kĩeha

7 MWATHANI ekuuga atĩrĩ,

“Nĩndiganĩirie andũ aakwa a Isiraeli;

nĩndegeete rũũrĩrĩ rwakwa rũrĩa thuurĩĩte.

Nĩndekereirie andũ arĩa nyendeete mookoinĩ ma thũ ciao.

8 Andũ aakwa arĩa thuurĩĩte nĩmangarũrũkĩĩte;

mandaramĩire o ta mũrũũthi ũrĩ mũtitũ;

tondũ ũcio nĩndĩmathũire.

9 Andũ aakwa arĩa thuurĩĩte mahaana

nyoni iratharĩkĩrwo na mĩena yothe nĩ ndwĩgĩ.

Ĩtaai nyamũ ciothe cia mũtitũ ciũke ndĩainĩ ĩyo.

10 Aathani aingĩ a ndũũrĩrĩ nĩmaanangĩĩte mũgũnda wakwa wa mĩthabibũ.

Nĩmarangĩĩte mũgũnda wakwa;

nĩmatuĩte mũgũnda wakwa mwega werũ mũtheri.

11 Maũtuĩte o maganjo;

ũikaire mbere yakwa ũrĩ o gĩceng’ũ.

Bũrũri wothe ũtuĩkĩĩte werũ,

no gũtirĩ mũndũ ũramakio nĩ ũguo.

12 Aniinani moimĩĩte na mĩena yothe ya irĩma cia werũ;

nĩngũtũma kũgĩe na mbaara ya kwananga bũrũri wothe;

hatirĩ mũndũ ũgũikara na thaayũ.

13 Andũ aakwa maahandire ngano, no gũgĩkũra ria;

maarutire wĩra mũingĩ wa mĩnoga, no gũtirĩ uumithio moonire.

Maaconorirwo nĩ magetha maao

tondũ wa maraakara maakwa me gwakana ta mwaki.”

Kĩĩranĩro kĩa MWATHANI kũrĩ arĩa mahakaine na Isiraeli

14 MWATHANI ekuuga atĩrĩ ũhoroinĩ wa ndũũrĩrĩ iria njaganu irigainie na Aisiraeli, iria cianangĩĩte bũrũri ũrĩa ndaheire andũ aakwa a Isiraeli ũtuĩke wao, “Ndũũrĩrĩ icio njũru nĩkũmunya ngaacimunya, ta ũrĩa mũtĩ ũmunyagwo, ndĩcirute mabũrũriinĩ maacio, njooke honokie andũ a Juda kuuma mookoinĩ maacio.

15 Thuutha wa kũruta ndũũrĩrĩ icio mabũrũriinĩ maacio, nĩngaacooka ndĩciiguĩre tha, njookie o rũũrĩrĩ ũgaiinĩ waruo o na bũrũriinĩ waguo kĩũmbe.

16 Ndũũrĩrĩ icio ingĩkanjĩtĩkia itarĩ na itherũ, ta ũrĩa andũ aakwa manjĩtĩkĩĩtie, na ciĩhĩtage ikiugaga, ‘O ta ũrĩa MWATHANI atũũraga muoyo,’ na o ta ũrĩa nacio ciarutĩĩte andũ aakwa kwĩhĩtaga na Baali, hĩndĩ ĩyo o nacio nĩigaatuĩka gĩcunjĩ kĩmwe kĩa andũ aakwa na nĩikaagaacĩra.

17 No rĩĩrĩ, rũũrĩrĩ o na rũrĩkũ rũngĩkaaga kũnjathĩkĩra, ngaarũmunya na mĩri, na ndĩrwanange. Niĩ MWATHANI, nĩ niĩ ndoiga ũguo.”

Thuruarĩ ya gataani

1 MWATHANI akĩnjĩĩra atĩrĩ, “Thiĩ wĩgũrĩre thuruarĩ ya gataani, ũmĩĩkĩre, no ndũkaamĩrikie maaĩinĩ.”

2 Kwoguo ngĩgũra thuruarĩ o ta ũrĩa MWATHANI aanjathĩĩte, ngĩmĩĩkĩra.

3 Ningĩ MWATHANI akĩnjarĩria hĩndĩ ĩngĩ akĩnjĩĩra atĩrĩ,

4 “Thiĩ rũũĩinĩ rwa Farati ũmĩhithe mwatũkainĩ wa rwaro rwa ihiga.”

5 Na niĩ ngĩthiĩ ngĩmĩhitha hakuhĩ na rũũĩ rwa Farati o ta ũrĩa MWATHANI aanjathĩĩte.

6 Thuutha ũcio, MWATHANI akĩnjĩĩra atĩrĩ, “Ũkĩra ũthiĩ rũũĩinĩ rwa Farati, ũkagĩĩre thuruarĩ ĩrĩa ndagwathire ũkahithe kuo.”

7 Ngĩgĩthiĩ rũũĩinĩ rwa Farati, ngĩruta thuruarĩ ĩyo harĩa ndamĩhithĩĩte. Na rĩĩrĩ, ngĩona atĩ thuruarĩ ĩyo nĩyarĩĩkĩĩtie kũbutha ĩkaaga bata.

8 Hĩndĩ ĩyo MWATHANI akĩnjarĩria rĩngĩ, akiuga atĩrĩ,

9 “Ũguo nĩguo ngwananga mwĩtĩĩo wa Juda na mwĩtĩĩo ũrĩa mũnene wa Jerusalemu.

10 Andũ aya ooru nĩmaregeete kũnjathĩkĩra. Matũũraga marĩ aremi na aaganu magatungatagĩra o na magathaathayagia ngai ingĩ. Kwoguo magaatuĩka o ta thuruarĩ ĩno ĩtarĩ kĩene.

11 Nĩ gũkorwo ndeendaga andũ oothe a Isiraeli na a Juda maanũmie o ta rĩa thuruarĩ ĩrũmagia njohero. Na njĩra ĩyo nĩmangĩatuĩkire andũ aakwa na matũme rĩĩtwa rĩakwa rĩgoocwo na rĩtĩĩo. No rĩĩrĩ, o matiigana kũnjathĩkĩra.”

Mũtũngi wa ndibei

12 Ningĩ MWATHANI Ngai akĩnjĩĩra atĩrĩ, “Jeremia, ĩra andũ a Isiraeli atĩ no nginya mũtũngi o wothe wa ndibei ũiyũrio ndibei. Magũcookeria atĩ ndwagĩrĩirwo nĩkũmeera ũguo tondũ nĩmooĩ ũguo,

13 ũmeere atĩrĩ, niĩ MWATHANI, ngũhe andũ oothe arĩa marĩ bũrũriinĩ ũyũ ndibei nginya marĩĩo. Andũ acio nĩ athamaki arĩa njiarwa cia Daudi, athĩnjĩri Ngai, anabii, na atũũri oothe a Jerusalemu.

14 Ngũmagũthithania mũndũ na ũrĩa ũngĩ, mũkũrũ na mwĩthĩ, o ta mĩtũngi iringithanĩĩtio hamwe. Ngũmaananga itekũmaiguĩra tha, na itekũmacaaĩra, o na itekũmaiguĩra kĩeha.”

Jeremia gũkaania andũ matige mwĩtĩĩo

15 Andũ a Isiraeli, MWATHANI nĩaria!

Mũthikĩrĩriei, na mũtige mwĩtĩĩo.

16 Tĩĩai MWATHANI, Ngai wanyu, atanareehe nduma,

na inyuĩ mũhĩngwo nĩ irĩma;

ningĩ atanagarũra ũtheri ũrĩa mwĩrĩgĩrĩire ũtuĩke nduma ndumanu.

17 Mwaga gũthikĩrĩria,

roho wakwa ũkũrĩra na hitho, ũrĩrĩre mwĩtĩĩo wanyu.

Ngũrĩra ndĩ na ruwo, ngĩitaga maithori

nĩ ũndũ andũ a MWATHANI nĩmatahĩĩtwo magatuĩka mĩgwate.

18 MWATHANI akĩnjĩĩra atĩrĩ,

“Ĩra mũthamaki na nyina mookĩrĩrie itĩ ciao cia ũthamaki,

nĩ gũkorwo thũmbĩ ciao iria thaka nĩciumĩĩte mĩtweinĩ yao ikagũa thĩ.

19 Matũũra ma Juda ma na kĩanda

nĩmarigiicĩrie na mĩena yothe,

gũtirĩ mũndũ o na ũrĩkũ ũngĩkinya kuo.

Andũ oothe a Juda nĩmatahĩĩtwo magatwarwo ithaamĩrio.”

20 Jerusalemu, tatiira maitho wone!

Thũ ciaku nĩgũũka irooka ciumĩĩte na rũgongo!

Andũ arĩa waheirwo ũmaramatage,

o acio ũretĩĩyaga nao, me ha?

21 Ũkoiga atĩa rĩrĩa andũ arĩa weciiragia nĩ araata aaku magaakũhoota na magwathage?

Githĩ ndũkaigua ruwo o ta rwa mũtumia agĩciara?

22 Ũngĩkeeyũria kĩrĩa gĩtũmĩĩte maũndũ maya moothe magũkorerere,

o na nguo ciaku ikahetwo ũkoonwo njaga,

menya atĩ nĩ ũndũ wa meehia maaku maingĩ mũno.

23 Mũndũ no ahote kũgarũra rangi wa ngoothi yake?

Ĩ ngarĩ no ĩthengie maara maayo?

Angĩkorwo kwahoteka ũguo-rĩ,

o na inyuĩ mũmenyereete gwĩkaga ũũru no mũmenye gwĩkaga wega.

24 MWATHANI ekũmũhurunja

o ta mahuti moombũrĩĩtwo nĩ rũhuuho rwa werũ.

25 MWATHANI oigĩĩte rĩu nĩrĩo igai rĩanyu rĩrĩa amũgaĩire,

tondũ nĩmũriganĩirwo nĩ we mũkehoka ngai cia mĩhianano.

26 Ekũmũruta nguo, njaga yanyu yonekane.

27 MWATHANI nĩoneete mũgĩĩka maũndũ marĩa anyararĩĩte;

nĩoneete mũkĩhang’ania na ngai ng’eni irĩmainĩ na mĩgũndainĩ,

ta mũndũ ũrerirĩria mũka wene,

kana ta mbarathi ya njamba ĩgĩteng’eria ya nga ĩmĩhaice.

Andũ aya a Jerusalemu kaĩ mwĩ thĩĩnainĩ-ĩ!

Mũgũikara nginya rĩ mũgĩgaathera?

Mbura kwaga kũndũ guothe bũrũriinĩ

1 Hĩndĩ ĩrĩa mbura yagĩĩte MWATHANI akĩnjĩĩra atĩrĩ,

2 “Bũrũri wa Juda nĩgũcakaya ũracakaya,

matũũra maguo nĩkũhwererekera marahwererekera,

andũ a Juda mararĩra makomeete thĩ,

narĩo itũũra rĩa Jerusalemu nĩgũkaya rĩrakaya rĩteithio.

3 Andũ arĩa itonga maratũma ndungata ciao igatahe maaĩ;

igathiĩ marimainĩ ma maaĩ, igakora matirĩ na maaĩ.

Ikahũndũka na mĩtũngi mĩtheri

iconokeete na ituruurĩĩte,

na ihithĩĩte moothiũ maacio.

4 Tondũ wa ũrĩa mbura yagĩĩte bũrũriinĩ na thĩ ĩkoomagara,

arĩmi nĩgũkua marakua ngoro, makeehitha moothiũ maao.

5 O na thwariga ĩrĩa ĩciarĩire werũinĩ nĩgũtiganĩria ĩratiganĩria njaũ yayo

nĩ ũndũ gũtirĩ na nyeki.

6 Nacio ndigiri cia gĩthaka irarũũgama

irĩma igũrũ ikĩnungagĩra rĩera ta mbwe;

maitho maacio matirahota kuona

nĩ ũndũ nĩciagĩĩte gĩa kũrĩa.

7 ‘O na gũtuĩka meehia maitũ nĩmaratũcuuka,

tũteithie, MWATHANI, nĩ ũndũ wa rĩĩtwa rĩaku.

Tũteithie, o na gũtuĩka twanacooka na thuutha maita maingĩ,

na nĩtũkũhĩtĩirie.

8 MWATHANI, nĩwe mwĩhoko wa Isiraeli;

nĩ we ũtũhonokagia kuuma mathĩĩnainĩ.

Nĩkĩ gĩtũmĩĩte ũtuĩke ta mũgeni bũrũriinĩ witũ,

kana ta mũgendi ũraraarĩrĩra ũtukũ o ro ũmwe?

9 Nĩkĩ gĩtũmĩĩte ũtuĩke ta mũndũ ũmakĩĩte,

kana ta mũndũ njamba ũtangĩhota kũhonokania?

Ti itherũ, MWATHANI, ũrĩ hamwe na ithuĩ!

Ithuĩ tũrĩ andũ aaku;

ndũgaatũtiganĩrie.’ ”

10 MWATHANI ekuuga atĩrĩ nĩ ũndũ wa andũ aya, “Aya nĩ andũ meendeete gũcangacanga, na matimenyagĩrĩra mĩthiĩre yao. Tondũ ũcio ndikeneetio nĩ o. Rĩu nĩngũririkana mahĩtia marĩa meekĩĩte na ndĩmaherithie nĩ ũndũ wa meehia maao.”

11 MWATHANI akĩnjĩĩra atĩrĩ, “Ndũkaae gũũthaitha ndeithie andũ aya.

12 O na mangĩĩhinga kũrĩa, ndingĩthikĩrĩria makĩngaĩra ndĩmateithie; o na mangĩndutĩra magongoona ma njino na magongoona ma irio cia mũgũnda, ndingĩmaamũkĩra. No ngũmaniina na mbaara, ng’aragu, o na mĩrimũ.”

13 Na niĩ ngiuga atĩrĩ, “Hĩ! MWATHANI Ngai, githĩ anabii matireera andũ atĩ gũtikũgĩa na mbaara o na kana ng’aragu, tondũ maroiga atĩ nĩugĩĩte atĩ thaayũ noguo ũgũkorwo gũũkũ bũrũriinĩ witũ?”

14 MWATHANI akĩnjookeria atĩrĩ, “Anabii nĩkũratha mararatha maheeni makĩgwetaga rĩĩtwa rĩakwa. Ndimarekeetie, kana ngamaatha, o na kana ngamaarĩria kiugo o na kĩmwe. Maramũrathĩra ũhoro wa cioneki itamaguũrĩirie; maũndũ marĩa maraheana ma ũrathi nĩ maũndũ matarĩ na bata marĩa mathugundĩĩte na meciiria maao eene.

15 Niĩ MWATHANI, nĩngũkwĩra ũrĩa ngwĩka anabii acio mararatha makĩgwetaga rĩĩtwa rĩakwa itamarekeetie, makiugaga atĩ mbaara na ng’aragu itigũkorerera bũrũri ũyũ. Ngũmaniina na mbaara na ng’aragu.

16 Nao andũ arĩa mararathĩra maũndũ macio makaaniinwo na njĩra o ro ĩyo. Ciimba ciao igaatigwo ciaraganĩĩte njĩrainĩ cia Jerusalemu, na itikoona mũndũ o na ũmwe wa gũcithika. Ũndũ ũyũ ũkaamakorerera oothe, o ũndũ ũmwe na atumia aao, na aariũ na aarĩ aao. Hĩndĩ ĩyo ngaamaherithia nĩ ũndũ wa waganu wao.”

17 MWATHANI akĩnjatha njĩĩre andũ ũhoro wa kĩeha gĩakwa, ndĩmeere ũũ;

“ Reke maitho maakwa maite maithori mũthenya na ũtukũ,

reke marĩre mategũtigithĩria,

nĩ gũkorwo andũ aakwa nĩmagũthĩĩtwo na magatiihio ũũru mũno.

18 Ndathiĩ mĩgũndainĩ, ndĩrona ciimba cia andũ mooragĩirwo mbaarainĩ;

ndatoonya matũũrainĩ, ngoona andũ marakua nĩ ng’aragu.

Anabii o ũndũ ũmwe na athĩnjĩri Ngai mararuta mawĩra maao,

no matiramenya ũrĩa mareeka.”

Andũ gwĩthaithanĩrĩra harĩ MWATHANI

19 MWATHANI, kaĩ ũregeete Juda o biũ?

Kaĩ ũthũire andũ a Zayuni?

Nĩkĩ gĩtũmĩĩte ũtũtiihie ndiihio nene ũguo atĩ tũtingĩhona?

Twerĩgĩrĩire thaayũ, no tũtiigana kũona ũndũ mwega;

tũkĩĩrĩgĩrĩra kũhonio, no tũkĩona ũndũ wa gũtũguoyohia.

20 Nĩtwĩtĩkĩrĩĩte meehia maitũ, MWATHANI,

o na mahĩtia ma maithe maitũ,

nĩ ũndũ nĩtũkũhĩtĩirie.

21 Tondũ wa rĩĩtwa rĩaku, ndũgaatũrege;

ndũgaaconorithie Jerusalemu,

kũrĩa ũtuĩte gĩtĩ kĩrĩ riiri kĩa ũnene waku.

Ririkana na ndũkoorage kĩrĩĩkanĩro kĩrĩa warĩĩkanĩire na ithuĩ.

22 Hatirĩ ngai o na ĩmwe ya ndũũrĩrĩ ingĩhota kuuria mbura,

o na igũrũ rĩo rĩene rĩtingĩhota kuuria mbura ya rũthuthuũ.

Tũigĩĩte mwĩhoko witũ harĩ we, MWATHANI Ngai witũ,

tondũ nĩ we wĩkaga maũndũ macio moothe.

Thĩĩna ũrĩa ũgũkora andũ a Juda

1 MWATHANI agĩcooka akĩnjĩĩra atĩrĩ, “O na Musa na Samũeli mangĩrũũgama haaha maathaithe, ndingĩiguĩra andũ aya tha o na haniini. Meere mathiĩ, meehere mbere yakwa!

2 Makũũria nĩ nakũ megũthiĩ ũmeere njugĩĩte ũũ:

‘Arĩa marĩ a kũũragwo nĩ mũrimũ,

nĩmeerekere kũrĩ mũrimũ!

Arĩa marĩ a kũũragĩrwo mbaarainĩ,

nĩmeerekere mbaarainĩ!

Arĩa marĩ a kũũragwo nĩ ng’aragu,

nĩmeerekere kũrĩ ng’aragu!

Arĩa nao marĩ a gũtahwo matuĩke mĩgwate

nĩmeerekere ithaamĩrioinĩ!’ ”

3 “Niĩ MWATHANI, nĩnduĩte atĩ nĩmekuonana na maũndũ maya mana mooru; nĩmekũũragĩrwo mbaarainĩ; ciimba ciao nĩigũkururio nĩ ngui; nyoni cia rĩerainĩ icirie, nacio nyamũ cia gĩthakainĩ irie kĩrĩa nyoni igũtigaria.

4 Nĩngũtũma mamakĩrwo nĩ andũ oothe a gũũkũ thĩ nĩ ũndũ wa ũrĩa Manase mũrũ wa Hezekia eekire arĩ Jerusalemu rĩrĩa aarĩ mũthamaki wa Juda.”

5 MWATHANI ekũũria atĩrĩ,

“Andũ aya a Jerusalemu, nũũ ũngĩmũiguĩra tha,

kana amũiguĩre kĩeha?

Nũũ ũngĩrũũgama haniini

amũũrie kana mũrĩ ahoro?

6 Inyuĩ nĩkũndega mũndegeete, mũgakĩrĩrĩria kũũhuutatĩra.

Nĩkĩo ndambũrũkĩĩtie guoko gwakwa ngamwananga

tondũ nĩnogeetio nĩgũikara ngĩĩricũkagwo.

7 Matũũrainĩ moothe ma bũrũri ndĩmũhuuhĩĩte ta mahuti

mahuuhĩĩtwo na gĩtaarũrũ.

Andũ aakwa, nĩndĩmwanangĩĩte,

na ngooraga ciana cianyu

tondũ nĩmũregeete gũtigana na mĩthiĩre yanyu mĩũru.

8 Bũrũriinĩ wanyu, atumia a ndigwa nĩ aingĩ gũkĩra mũthanga wa iriainĩ.

Nĩnjũragĩĩte andũ eethĩ marĩ gatũũrũinĩ ka ũtũũro wao,

ngagĩtũma maanyina maao manyamaarĩke.

Nĩndũmĩĩte o rĩmwe maguoyohe na mathĩĩnĩke.

9 Mũtumia ũrĩa ũkuĩrĩirwo nĩ ciana mũgwanja nĩethikĩire,

kĩeha kĩrĩa e nakĩo gĩtingĩthira.

Riũa nĩrĩmũthũĩre kũrĩ o mũthenya;

nĩmũconore na akaagithio gĩtĩĩo.

Matigari maanyu ngũmareekeria thũ cianyu imoorage.

Niĩ MWATHANI, nĩ niĩ ndoiga ũguo.”

Jeremia gũteta harĩ MWATHANI

10 Maitũ! Kaĩ ndĩ thĩĩnainĩ! Wanjiarire nĩkĩ ndũũre ngararanagia na ng’eng’anaga na andũ bũrũriinĩ wothe? Ndirĩ na kĩndũ ngombithĩĩtie mũndũ kana ngakomba mũndũ kĩndũ, no o na kũhaana ũguo, andũ oothe nĩkũũnuma maranuma.

11 MWATHANI, reke ũguo maranuma gũtuĩke guo angĩkorwo ndigũtungatĩĩtewega, na angĩkorwo ndithaithanĩrĩire thũ ciakwa harĩ we hĩndĩ ĩrĩa i mathĩĩnainĩ na mĩnyamaaroinĩ.

12 (Nũũ ũngĩhota kuuna cuuma, makĩria cuuma ya kuuma mwena wa na rũgongo ĩtukanĩĩtio na gĩcango?)

13 MWATHANI akĩnjĩĩra atĩrĩ, “Ngũrekia thũ ciũke itahe ũtonga na mĩthiithũ ya andũ aakwa, nĩguo ndĩmaherithie nĩ ũndũ wa meehia marĩa meekĩĩte bũrũriinĩ wothe.

14 Ngũtũma matungatĩre thũ ciao bũrũriinĩ matooĩ, nĩ gũkorwo maraakara maakwa mahaana mwaki, na megwakana nginya tene na tene.”

15 Hĩndĩ ĩyo ngiuga atĩrĩ, “Wee, MWATHANI, nĩũũĩ,

ndirikana na ũndeithie,

na ũndĩhĩrie harĩ arĩa maranyamaaria.

Ndũkamakirĩrĩrie mũno nginya manjũrage;

ririkana atĩ ndĩrarumwo nĩ ũndũ waku.

16 Wanjarĩirie, na niĩ ngĩgũthikĩrĩria wega;

ciugo ciaku igĩtũma ngene na njanjamũke,

nĩkũmenya atĩ ndĩ waku, wee MWATHANI Ngai Mwene Hinya Wothe.

17 Ndiaikaraga ndunduinĩ ya andũ arĩa meendeete o gũtheka,

o na kana ngĩkenanĩra nao.

Ndaikarire ndĩ wiki o ta ũrĩa wanjathĩĩte,

njiyũirwo nĩ maraakara.

18 Ruwo rwakwa rũraaga gũthira nĩkĩ?

Nĩ kĩĩ ironda ciakwa irakĩrĩrĩria gũtheea ikaaga kũhona?

Ũgũkĩenda kũnjũraga ngoro nĩkĩ, o ta karũũĩ kahũaga hĩndĩ ya riũa?”

19 Naake MWATHANI akĩnjookeria atĩrĩ,

“Ũngĩnjookerera, nĩngũkwamũkĩra,

na nĩũgũtuĩka ndungata yakwa o rĩngĩ.

Ũngĩheana ndũmĩrĩri ĩrĩ na bata handũ ha kwaria matũhũũhũ,

nĩũgũtuĩka mũnabii wakwa o rĩngĩ.

Andũ nĩmekũhũndũka mooke kũrĩ we,

no ti we ũkũhũndũka ũthiĩ kũrĩ o.

20 Ngũtũma ũtuĩke ta rũthingo rwa hinya rwa gĩcango harĩ andũ aya;

marĩgũtharĩkagĩra, no matirĩgũtooragia,

nĩ ũndũ nĩndĩrĩkoragwo hamwe nawe

nĩguo ngũgitagĩre na ngũmenyagĩrĩre.

21 Nĩndĩrĩkũhonokagia kuuma mookoinĩ ma andũ arĩa ooru,

na hatĩkainĩ cia andũ arĩa matarĩ tha.

Niĩ MWATHANI, nĩ niĩ ndoiga ũguo.”

Wendi wa MWATHANI harĩ ũtũũro wa Jeremia

1 MWATHANI akĩnjarĩria hĩndĩ ĩngĩ akĩnjĩĩra atĩrĩ,

2 “Ndũkaae kũhikania o na kana ũciarĩre ciana kũndũ ta gũũkũ.

3 Ndũkaae gwĩka ũguo tondũ wa gĩtũmi gĩĩkĩ ngũkwĩra: Ciana iria iciarĩirwo kũndũ gũũkũ o ũndũ ũmwe na aciari aacio,

4 oothe makooragwo nĩ mĩrimũ mĩũru mũno. Matigaacakaĩrwo o na kana mathikwo; ciimba ciao ikaaragana thĩ o ta rũrua. Makaaniinwo nĩ mbaara na ng’aragu, nacio ciimba ciao ituĩke irio cia nyoni cia rĩerainĩ na nyamũ cia gĩthaka.

5 “Ndũkaanatoonye mũciĩ ũrĩa ũrĩ na macakaya, kana ũigue kĩeha nĩ ũndũ wa mũndũ o na ũrĩkũ. Gĩtũmi nĩ tondũ ndigũcooka kũhe andũ aakwa thaayũ, kũmeenda, o na kana kũmaiguĩra tha.

6 Andũ arĩa itonga na arĩa athĩĩni magaakuĩra bũrũriinĩ ũyũ, na matigaathikwo o na kana macakaĩrwo nĩ mũndũ o na ũrĩkũ. Hatirĩ mũndũ o na ũrĩkũ ũgeetemenga mwĩrĩ nĩ ũndũ wao, o na kana eenje njuĩrĩ yake nĩguo oonanie ũrĩa arĩ na kĩeha nĩ ũndũ wao.

7 Hatirĩ mũndũ o na ũmwe ũkaarĩanĩra o na kana anyuanĩre na mũndũ o wothe ũkuĩrĩirwo, nĩguo amũhoorerie ngoro. O na hatirĩ mũndũ o na ũrĩkũ ũkaaringwo nĩ tha nĩ ũndũ wa mũndũ ũrĩa ũkuĩrĩirwo nĩ ithe kana nyina.

8 “Ndũkaanatoonye mũciĩ ũrĩ na iruga nĩguo ũrĩanĩre na ũnyuanĩre na eene mũciĩ ũcio.

9 Nĩ gũkorwo niĩ, MWATHANI Mwene Hinya Wothe, Ngai wa Isiraeli, nguuga ũũ: nĩngũniina mĩgambo ya gĩkeno na mĩtheko o na ndũũhiũ cia maruga ma ũhiki. Ũndũ ũcio ngũwĩka mũrĩ o muoyo, mũkĩĩyonagĩra na maitho maanyu.

10 “Warĩĩkia kũmeera maũndũ macio moothe, nĩmegũkũũria kĩrĩa gĩatũma ndĩmatuĩre ihera inene ũguo. O na ningĩ nĩmegũkũũria ũmeere ũũru ũrĩa meekĩĩte na rĩĩhia rĩrĩa meehĩirie MWATHANI Ngai wao.

11 Nawe ũkũmacookeria ũmeere ‘Niĩ MWATHANI, ngũmaherithia nĩ tondũ maithe maao nĩmaandiganĩirie, magĩthaathaiya na magĩtungatĩra ngai ingĩ. Maandiganĩirie na matiigana gwathĩkĩra watho wakwa.

12 No rĩĩrĩ, inyuĩ nĩmwĩkĩĩte ũũru gũkĩra ũrĩa maithe maanyu meekire, nĩ ũndũ inyuĩ oothe mũrĩ andũ aremi na ooru, na mũtinjathĩkagĩra.

13 Tondũ ũcio, ngũmũikania na nja ya bũrũri ũyũ mũthiĩ mũkagũe bũrũriinĩ mũtooĩ, o na ũtooĩo nĩ maithe maanyu. Kũu bũrũriinĩ ũcio nĩkuo mũgaatungatagĩra ngai ingĩ ũtukũ na mũthenya, na ndikaamũiguĩra tha o na haniini.’ ”

Gũcooka kuuma ithaamĩrio

14 MWATHANI ekuuga atĩrĩ, “Ihinda nĩrĩrooka rĩrĩa andũ matagaacooka kwĩhĩta na niĩ makiugaga atĩrĩ, ‘O ta ũrĩa MWATHANI ũrĩa warutire andũ a Isiraeli bũrũriinĩ wa Misiri atũũraga muoyo.’

15 Handũ ha ũguo, makeehĩtaga makiugaga atĩrĩ, ‘O ta ũrĩa MWATHANI atũũraga muoyo, ũrĩa warutire andũ a Isiraeli bũrũri wa na rũgongo o na akĩmaruta mabũrũriinĩ marĩa mangĩ moothe kũrĩa aamahurunjire,’ nĩ gũkorwo nĩngaamacookia bũrũriinĩ wao kĩũmbe ũrĩa ndaheire maithe maao.”

Kũherithio kũrĩa kwerekeire gũũka

16 MWATHANI ekuuga atĩrĩ, “Ngũrekanĩria ategi a thamaki aingĩ mooke matege manyiite andũ aya. Thuutha ũcio njooke ndekanĩrie ahĩti aingĩ mamahĩte irĩmainĩ na ithũngũriinĩ ciothe o na ngurungainĩ iria irĩ ndwaroinĩ cia mahiga.

17 Nĩ gũkorwo maitho maakwa nĩmarona ũrĩa wothe mareeka; hatirĩ ũndũ o na ũmwe hithĩĩtwo. O na meehia maao nĩndĩramoona wega.

18 Ngũmaherithia maita meerĩ nĩ ũndũ wa meehia na ũũru wao. Ngũmeeka ũguo tondũ nĩmathaahĩĩtie bũrũri wakwa na ngai ciao cia mĩhianano itarĩ muoyo, na makaũiyũria na maũndũ me magigi.”

Ihooya rĩa Jeremia rĩa kuonania ũũmĩrĩru harĩ MWATHANI

19 MWATHANI wee nĩ we ũheaga hinya

na ũkangitĩra;

nĩ we ũndeithagia hĩndĩ ya mathĩĩna.

Ndũũrĩrĩ igooka kũrĩ we ciumĩĩte mĩena yothe ya thĩ ciuge atĩrĩ,

“Maithe maitũ hatirĩ kĩndũ maarĩ nakĩo

tiga o ngai cia maheeni;

matiarĩ na kĩndũ tiga o mĩhianano ya tũhũ.

20 Mũndũ-rĩ, no ethondekere ngai ciake kĩũmbe?

Aaca, o na angĩĩka ũguo, itingĩkorwo irĩ ngai cia ma.”

21 MWATHANI egũkiuga atĩrĩ, “Tondũ ũcio, nĩngũtũma ndũũrĩrĩ imenye rĩmwe rĩa kũigana hinya o na ũhoti wakwa; nĩikũmenya atĩ niĩ nĩ niĩ MWATHANI.”

Meehia ma andũ a Juda na kũherithio kwao

1 MWATHANI ekuuga atĩrĩ, “Andũ a Juda, meehia maanyu maandĩkĩĩtwo na karamu ga cuuma, makururĩĩtwo ngoroinĩ cianyu na mũthia mũũgĩ wa ihiga rĩa arumaathi, o na magakururwo koonainĩ cia igongoona cianyu.

2 Andũ aanyu marathaathaĩria mĩhiananoinĩ o na igongoonainĩ iria ĩthondekeirwo ngai ĩrĩa ĩĩtagwo Ashera, iria ciigĩĩtwo rungu rwa mũtĩ o wothe mũruru wega, ithũngũri igũrũ,

3 o na irĩmainĩ iria irĩ werũinĩ. Nĩngũtũma thũ cianyu itahe ũtonga wanyu na mĩthiithũ yanyu yothe tondũ wa meehia moothe marĩa mwĩhĩĩtie bũrũriinĩ wothe wanyu.

4 Nĩmũgũtuunywo bũrũri ũrĩa ndamũheire, na nĩngũtũma mũtungatagĩre thũ cianyu mũrĩ bũrũri mũtooĩ tondũ maraakara maakwa nĩ ta mwaki, na megũtũũra maakanaga nginya tene na tene.”

Mĩario mwanya mwanya

5 MWATHANI ekuuga atĩrĩ,

“Mũndũ ũrĩa ũndirikaga akeehoka mũndũ,

akaiga mwĩhoko wake harĩ mũndũ ũrĩa ũrĩ o rũkũngũ,

arogwatwo nĩ kĩrumi.

6 Mũndũ ta ũcio ahaana kĩhinga kĩrĩ werũinĩ,

kĩhinga kĩrakũra kũndũ kũũmũ,

rũng’ũrĩinĩ rwa cumbĩ rũtangĩkũra kũndũ o na kĩ.

Ndarĩ wega o na ũrĩkũ oonaga.

7 “Kũraathimwo-rĩ, nĩ mũndũ ũrĩa ũigaga mwĩhoko wake harĩ niĩ MWATHANI.

8 Mũndũ ta ũcio ahaana ta mũtĩ ũhandĩĩtwo ndeereinĩ cia rũũĩ,

ũrĩa ũtambagia mĩri yaguo hakuhĩ na maaĩ.

Rĩrĩa kwagĩa na ũrugarĩ mũtĩ ũcio ndũmakaga,

mathangũ maaguo maikaraga marurĩĩte.

Ndũtangĩkaga hĩndĩ ĩrĩa gũtarĩ mbura,

ũthiaga o na mbere gũciara.

9 “Nũũ ũngĩhota kũmenya ngoro ya mũndũ?

Gũtirĩ kĩndũ kĩheenanagia ta yo;

nĩ njũru o biũ!

10 Niĩ, MWATHANI nĩ niĩ nduĩragia meciiria ma andũ,

na ngageria ngoro ciao

nĩguo njĩke o mũndũ kũringana na mĩthiĩre yake,

na kũringana na ciĩko ciake.”

11 Mũndũ ũrĩa wĩcaragĩria ũtonga na njĩra ĩtarĩ ya kĩhooto,

ahaana ngware iria ikomagĩrĩria matumbĩ itarekeetie.

Rĩrĩa aikarĩĩte egangarĩĩte-rĩ,

nĩguo ũtonga ũcio wake ũmũũraga,

marigĩrĩrioinĩ agakĩonekana arĩ o kĩrimũ.

12 Hekaarũ iitũ ĩhaana gĩtĩ kĩa ũthamaki kĩrĩ riiri,

kĩaigirwo kĩrĩmainĩ kĩraaya na igũrũ kuuma o kĩambĩrĩria.

13 MWATHANI, wee nĩ we mwĩhoko wa Isiraeli;

arĩa oothe magũtiganagĩria nĩmagaaconorithio.

Magaathira ta ũrĩa marĩĩtwa maandĩkĩĩtwo rũkũngũinĩ mathiraga,

tondũ nĩmagũtiganĩirie MWATHANI,

o wee gĩthima kĩa maaĩ me muoyo.

Jeremia kũhooya MWATHANI ũteithio

14 MWATHANI, honia, na nĩngũhona;

honokia, na nĩngũhonoka,

tondũ wee nĩ we ngoocaga!

15 Andũ maranjũũria atĩrĩ,

“Me ha maũndũ mooru marĩa MWATHANI aroigaga nĩegũtwĩka?

Nĩakĩmeeke rĩu!”

16 No rĩĩrĩ, MWATHANI, niĩ ndirĩ ndakũringĩrĩria ũmareehithĩrie ũũru,

o na kana ngĩrirĩria mũthenya wa mũthiro ũkinye.

Wee, MWATHANI, nĩũũĩ ũguo;

nĩũũĩ ũrĩa wothe njugĩĩte na kanua gaakwa.

17 Ndũkaae kũnjĩkĩra guoya;

wee-rĩ, nĩ we handũ haakwa ha gwĩtharĩra hĩndĩ ya ũũru.

18 Conorithia arĩa maranyariira, no niĩ ndũkanjonorithie;

maguoyohie, no niĩ ndũkaanguoyohie;

mareehithĩrie mũthiro, ũmaniine o kũmaniina.

Kũmenyerera mũthenya wa Thabatũ

19 MWATHANI akĩnjĩĩra atĩrĩ, “Jeremia, thiĩ ũrũũgame kĩhingoinĩ kĩrĩa gĩĩtagwo Kĩhingo kĩa Andũ, kĩrĩa athamaki a Juda mageragĩra magĩtoonya na makiuma itũũrainĩ, o na ningĩ ũthiĩ ũrũũgame ihingoinĩ ciothe cia Jerusalemu,

20 uuge ũũ: Iguai ndũmĩrĩri ya MWATHANI, inyuĩ athamaki a Juda, na andũ oothe a Juda, na atũũri oothe a Jerusalemu, o inyuĩ mũtoonyagĩra ihingoinĩ ici!”

21 Mwathani aroiga atĩrĩ, “Mwĩmenyagĩrĩreei, mũtikaanakuue mĩrigo o yothe mũthenya wa Thabatũ, mũmĩtoonyerie ihingoinĩ ici cia Jerusalemu,

22 o na kana mũkuuage mĩrigo o yothe kuuma nyũmbainĩ cianyu mũthenya wa Thabatũ. Mũtikaarutage wĩra o na ũrĩkũ mũthenya wa Thabatũ; menyagĩrĩraai mũthenya wa Thabatũ na mũwamũrage, o ta ũrĩa ndaathire maithe maanyu.

23 No rĩĩrĩ, maithe maanyu matiigana gũũthikĩrĩria o na kana kwĩrũmbũiya; o-rĩ, no kũrema maanemeire, matianjathĩkĩire o na kana makĩigua mataaro maakwa.

24 “Mũngĩnjathĩkĩra na mwage gũtoonyagĩria mĩrigo o yothe ihingoinĩ cia itũũra rĩĩrĩ mũthenya wa Thabatũ, na mũmenyagĩrĩre mũthenya wa Thabatũ, na mwagage kũruta wĩra o wothe mũthenyainĩ ũcio,

25 athamaki aanyu na atongoria aanyu nĩmarĩtoonyagĩra ihingoinĩ cia itũũra rĩĩrĩ rĩa Jerusalemu na mathamakage o ta ũrĩa mũthamaki Daudi aathamakaga. O eene, hamwe na andũ a Juda na a Jerusalemu, marĩtoonyaga makuuĩĩtwo nĩ ngaari cia mbarathi, na mahaicĩĩte mbarathi, narĩo itũũra rĩĩrĩ rĩa Jerusalemu rĩikarage rĩrĩ na andũ hĩndĩ ciothe.

26 Andũ nĩmarĩũkaga moimĩĩte matũũrainĩ ma Juda, o na kũndũ guothe kũrĩa gũthiũrũrũkĩirie Jerusalemu, o na bũrũriinĩ wa Benjamini, o na magũrũinĩ ma irĩma cia Juda mwena wa na ithũĩro, o na irĩmainĩ, o na mwena wa na kĩanda wa Juda. Marĩũkaga Hekaarũinĩ yakwa kũreehe magongoona ma njino na ma irio cia mũgũnda, ũbaani, na magongoona ma gũcookia ngaatho.

27 No rĩĩrĩ, mũngĩrega kũnjathĩkĩra mwage kũmenyerera mũthenya wa Thabatũ na mũkuuage mĩrigo o yothe mũkamĩtoonyagĩria ihingoinĩ cia Jerusalemu mũthenya wa Thabatũ-rĩ, na niĩ nĩngaacina ihingo cia itũũra rĩa Jerusalemu. Ngaacina nyũmba cia ũthamaki cia Jerusalemu na mwaki ũtangĩhoreka o na atĩa.”

Jeremia kwĩrwo athiĩ mũciĩ wa mũũmbi wa nyũngũ

1 MWATHANI akĩnjĩĩra atĩrĩ,

2 “Ikũrũka ũthiĩ mũciĩ wa mũũmbi nyũngũ, na nĩngũkũheera ndũmĩrĩri yakwa kuo.”

3 Kwoguo ngĩikũrũka ngĩthiĩ kuo, ngĩmũkora akĩruta wĩra wake wa ũũmbi.

4 Na rĩĩrĩ, kĩndũ kĩrĩa oombaga kĩngĩathũkire, ooyaga rĩũmba rĩrĩa ekũũmbaga narĩo, akoomba narĩo kĩndũ kĩngĩ, o kĩrĩa aangĩendire kũũmba.

5 Hĩndĩ ĩyo MWATHANI akĩnjarĩria akĩnjĩĩra atĩrĩ,

6 “Niĩ-rĩ, githĩ ndingĩhota kũmwĩka inyuĩ, andũ a Isiraeli, ta ũguo mũũmbi nyũngũ eekaga na rĩũmba? Inyuĩ-rĩ, o ta ũrĩa rĩũmba rĩu rĩtariĩ rĩ mookoinĩ ma mũũmbi, noguo na inyuĩ mũhaana mwĩ mookoinĩ maakwa.

7 Ingiuga hĩndĩ o yothe atĩ nĩngũmunya, memeende, na nyanange rũũrĩrĩ o ruothe kana ũthamaki o wothe,

8 no rũũrĩrĩ rũu rũtigane na ũũru waruo, niĩ na niĩ ndingĩrwĩka maũndũ mooru marĩa nduĩte nĩngũrwĩka.

9 Ningĩ no njuge atĩ nĩngwaka na hande rũũrĩrĩ o ruothe kana ũthamaki o wothe,

10 no rũũrĩrĩ rũu rũũnemere na rwĩke maũndũ mooru, hĩndĩ ĩyo na niĩ ndingĩrwĩka maũndũ meega marĩa nduĩte nĩngũrwĩka.

11 Rĩu-rĩ, ĩra andũ a Juda na a Jerusalemu atĩ nĩndĩmabangĩire mĩbango mĩũru na nĩndĩhaarĩirie kũmaherithia. Meere matige gũikara makĩĩhagia, meere magarũrĩre mĩthiĩre yao na ciĩko ciao.

12 No o marĩcookia atĩrĩ, ‘Ũguo wothe woiga no tũhũ mũtheri. Tũgũthiĩ o na mbere na ũremi witũ na gwĩka maũndũ mooru o ta ũrĩa tũngĩenda.’ ”

Andũ kũrega MWATHANI

13 Tondũ ũcio MWATHANI ekuuga atĩrĩ,

“Ũriai rũũrĩrĩ o rũũrĩrĩ,

kana ũndũ ta ũyũ ũrĩ wekĩka rĩngĩ.

Andũ a Isiraeli nĩmeekĩĩte ũndũ mũũru mũno!

14 Tũcũmbĩrĩ twa irima cia Lebanoni

nĩkũrĩ hingo tũikaraga tũtarĩ na tharunji?

Tũrũũĩ tũrĩa tuumaga kuo tũrĩ na maaĩ mahehu wega

kũrĩ hingo tũhũaga?

15 No rĩĩrĩ, andũ aakwa nĩmariganĩirwo nĩ niĩ;

maracinĩra mĩhianano ũbaani.

Nĩmahĩngĩĩtwo njĩrainĩ iria maagĩrĩirwo nĩkũgerera.

Matirũmagĩrĩra njĩra iria cia tene;

mageragĩra tũcĩra twa mĩkĩra,

handũ ha kũgera njĩra yo nyene.

16 Matũmĩĩte bũrũri ũyũ ũtuĩke kĩndũ gĩa kũmakĩrwo,

na gĩa kuugagĩrwo hĩ hĩ hĩ hĩ-ĩ! tene na tene.

Arĩa oothe marahĩtũkĩra hakuhĩ na bũrũri ũyũ,

no kũinainia marainainia mĩtwe nĩkũmaka.

17 Ngaahurunja andũ aakwa mbere ya thũ ciao,

o ta rũkũngũ rũmbũrĩĩtwo nĩ rũhuuho rwa kuuma mwena wa irathĩro.

Mũthenya ũrĩa marĩkorwo thĩĩnainĩ ndirĩmateithia;

ndĩrĩrora na kũngĩ.”

Mũbango wa kũũnũha Jeremia

18 Hĩndĩ ĩyo andũ makiuga atĩrĩ, “Ũkaai twĩciirie ũrĩa tũkũũnũha Jeremia. Ithuĩ-rĩ, gũtirĩ hingo tũkaaga athĩnjĩri Ngai a gũtũruta, andũ oogĩ a gũtũtaara, na anabii a gũtũhe ndũmĩrĩri cia Ngai. Nĩtũmũthiteei tũrege gũcooka gũthikĩrĩria ũrĩa aroiga.”

19 Kwoguo ngĩhooya ngiuga atĩrĩ,

“MWATHANI, thikĩrĩria, ihooya rĩakwa,

na ũigue ũrĩa thũ ciakwa iroiga.

20 Wega-rĩ, no ũrĩhwo na ũũru?

No o nĩmanyenjeire irima.

Ririkana ũrĩa ndĩramathaithanagĩrĩra harĩ we

nĩguo ndũkaamahũũre na maraakara maaku.

21 Rĩu, MWATHANI, reke ciana ciao ikue nĩ ng’aragu;

irooragwo na hiũ cia njora.

Atumia aao maroorwo nĩ ciana ciao na athuuri aao;

arũme aao marooragwo nĩ mĩrimũ,

nao aanake aao marooragĩrwo mbaarainĩ.

22 Mbu ĩroiguuo mĩciĩinĩ yao

nĩ ũrĩa ũtũmĩĩte makorererwo nĩ atuunyani materĩgĩrĩire,

makamatuunya indo ciao!

Nĩ gũkorwo nĩmeenjeete irima manyiite,

na makanjigĩra mĩtego mangwatie.

23 No wee, MWATHANI, nĩũũĩ mĩbango ĩrĩa marabanga manjũrage.

Ndũkamoohere mahĩtia maao,

o na kana ũtharie meehia maao.

Matungumanie thĩ mbere yaku;

mahũũre ũrĩ na maraakara.”

Nyũngũ nguũ

1 MWATHANI akĩnjĩĩra atĩrĩ, “Thiĩ ũgũre nyũngũ ya rĩũmba. Warĩĩkia gwĩka ũguo, woe atongoria amwe a andũ na athĩnjĩri Ngai arĩa akũrũ,

2 muumĩre kĩhingo kĩrĩa gĩĩtagwo kĩa Ngĩo mũthiĩ nginya gĩtuambainĩ kĩa Hinomu. Mũrĩ kũu, ũrĩheana ũhoro ũrĩa niĩ ngũkwĩra.

3 Ũriuga atĩrĩ, ‘Inyuĩ athamaki a Juda na atũũri a Jerusalemu, iguai ndũmĩrĩri ya MWATHANI. MWATHANI Mwene Hinya Wothe, o we Ngai wa Isiraeli, ekuuga ũũ: nĩngũreehithĩria kũndũ gũũkũ mũthiro mũũru mũno ũguo atĩ mũndũ o wothe ũrĩũiguaga no kũmaka arĩmakaga.

4 Ngwĩka ũguo tondũ andũ nĩmandiganĩirie na magathaahia kũndũ gũũkũ na ũndũ wa kũrutĩra ngai ingĩ magongoona. Ngai icio nĩ ngai iria o eene matooĩ, o iria maithe maao na athamaki a Juda matooĩ. Maiyũrĩĩtie kũndũ gũũkũ na thakame ya andũ matarĩ na mahĩtia.

5 Nĩmaakĩire ngai ĩrĩa ĩĩtagwo Baali kũndũ gũtũũgĩru gwa gũthaathaĩria nĩguo mamĩcinagĩre ciana ciao irĩ ta magongoona ma njino. Niĩ ndirĩ hingo ndĩ ndamaatha meekage ũguo, o na ndirĩ ndakorwo na ũndũ ta ũcio meciiriainĩ maakwa.

6 Tondũ ũcio-rĩ, ihinda nĩrĩrooka rĩrĩa kũndũ gũũkũ gũtarĩĩtagwo Tofethi kana gĩtuamba kĩa Hinomu. Handũ ha gwĩtwo ũguo-rĩ, kũrĩĩtagwo gĩtuamba gĩa Kĩng’eero.

7 Mĩbango yothe ya Juda na Jerusalemu ngũmĩthũũkĩria kũndũ gũũkũ. Nĩngũreka thũ ciao imahoote na imooragĩre mbaarainĩ. Ngũhe nyoni na nyamũ cia gĩthaka ciimba ciao ituĩke irio ciacio.

8 Ngũreehithĩria itũũra rĩĩrĩ mwanangĩko ũguo atĩ ũrĩa wothe ũrĩhĩtũkagĩra hakuhĩ narĩo ariugaga, hĩ hĩ hĩ hĩ-ĩ! Nĩ ũrĩa amakĩĩte.

9 Thũ ciao, iria irenda kũmooraga, igũũka ithiũrũrũkĩrie itũũra rĩĩrĩ rĩa Jerusalemu, imahingĩrĩrie kũu thĩinĩ. Ũndũ ũcio ũgũtũma moone ruwo na thĩĩna nginya maambĩrĩrie kũrĩa ciana ciao, o na o eene maambĩrĩrie kũrĩana mũndũ na ũrĩa ũngĩ.’

10 “Warĩĩkia kuuga ũguo-rĩ, ũũrage nyũngũ ĩyo ũkĩonagwo nĩ andũ acio megũkorwo matwaranĩĩte nawe.

11 Ũcooke ũmeere MWATHANI Mwene Hinya Wothe ekuuga ũũ, ‘O ta ũrĩa mũndũ arekanagia thĩ nyũngũ ya rĩũmba ĩgakua ũndũ ĩtangĩthondekeka ĩtuĩke ng’ima rĩngĩ, ũguo noguo na niĩ ngũrekania andũ aya na itũũra rĩĩrĩ. Andũ marĩthikana nginya gũũkũ Tofethi tondũ gũtirĩkorwo na kũndũ kũngĩ gũtigaru gwa gũthikana.

12 Ngũtua itũũra rĩĩrĩ o hamwe na atũũri aarĩo o ta Tofethi.

13 Nyũmba cia Jerusalemu, o na nyũmba cia athamaki a Juda, o ũndũ ũmwe na nyũmba ciothe iria icinagĩrwo ũbaani igũrũ ũrĩ igongoona harĩ njata na igaitwo ndibei ĩrĩ igongoona harĩ ngai ingĩ, ikũnyiitwo nĩ thaahu o ta Tofethi.’ ”

14 Ngĩcooka ngiuma kũu Tofethi, kũrĩa ndatũmĩĩtwo nĩ MWATHANI ngarathe. Ngĩthiĩ ngĩrũũgama nja ya Hekaarũ ngĩĩra andũ oothe atĩrĩ,

15 “MWATHANI Mwene Hinya Wothe, o we Ngai wa Isiraeli, ekuuga ũũ: ‘Nĩngũreehithĩria itũũra rĩĩrĩ na matũũra moothe marĩa marĩthiũrũrũkĩirie maũndũ moothe mooru marĩa ngweteete igũrũ warĩo. Ngwĩka ũguo tondũ inyuĩ mũrĩ andũ aremi na mũtithikagĩrĩria ciugo ciakwa.’ ”