Category: Isaia

Ciugo cia kũũmanĩrĩria

1 Ngai witũ aroiga atĩrĩ,

“Ũmĩrĩria andũ aakwa! Moomĩrĩrie ti itherũ!

2 Ũmĩrĩria andũ a Jerusalemu,

ũmeere atĩ nĩmathĩĩnĩĩte o kũigana

na atĩ rĩu nĩmooheirwo meehia maao.

Nĩndĩmaherithĩĩtie o kũigana nĩ ũndũ wa meehia maao.”

3 Atĩrĩĩrĩ, kũrĩ na mũgambo wa mũndũ ũranĩrĩra ũkoiga,

“Thondekaai barabara ya MWATHANI kũu werũinĩ!

Theriai njĩra ya Ngai witũ kũu gũtakũraga kĩndũ!

4 Thikaai mũkuru o wothe

na mwaraganie kĩrĩma o gĩothe.

Ithũngũri ciothe igaatuĩka kũndũ kwaraganu

na kũrĩa gũtarĩ kwaraganu kwaraganio.

5 Hĩndĩ ĩyo riiri wa MWATHANI nĩũkoonanio

na andũ oothe nĩmakaawona.

MWATHANI nĩ we mwene wĩranĩire ũguo.”

6 Kũrĩ na mũgambo wa mũndũ ũrakayũrũrũka ũkoiga

“Anĩrĩra ndũmĩrĩri.”

Na niĩ ngooria atĩrĩ,

“Nĩ ndũmĩrĩri irĩkũ ngwanĩrĩra?

Anĩrĩra atĩ andũ oothe matariĩ o ta nyeki,

na riiri wao wothe no ta mahũa ma mĩgũnda.

7 Nyeki yũmaga namo mahũa magaitĩka

rĩrĩa MWATHANI atũma rũhuuho rũmoombũre.

Nĩ ma andũ mahaana o ta nyeki,

8 Ĩĩni, nyeki yũmaga namo mahũa magaitĩka.

No rĩĩrĩ, mũgambo wa Ngai witũ ũtũũraga mĩndĩ na mĩndĩ.”

9 Wee ũheanaga ũhoro mwega Zayuni,

thiĩ kĩrĩma igũrũ kĩrĩa kĩraaya;

Wee ũreehagĩra Jerusalemu ũhoro mwega,

anĩrĩra na kayũ kanene.

Aria ũtagwĩtigĩra wĩre matũũra ma Juda

atĩ Ngai wao nĩarooka.

10 MWATHANI Ngai nĩarooka gwathana arĩ na ũhoti;

arooka hamwe na andũ arĩa ahonokeetie.

11 Arĩramataga rũũru rwake ta mũrĩithi;

arĩcookanagĩrĩria tũgondu agatũkuua na mooko maake;

arĩtongoragia ng’ondu iria irĩ na tũgondu acimenyereire wega.

Gũtirĩ ũngĩ ũhaana Ngai wa Isiraeli

12 Nũũ ũngĩhota gũthima maaĩ ma iria rĩrĩa inene na rũhĩ rwake?

Nũũ ũngĩhota gũthima mũtambũrũko wa matu na guoko gwake?

Nũũ ũngĩhota kũiganĩria tĩĩri wa thĩ yothe gĩkombeinĩ?

Nũũ ũngĩhota gũthima irĩma na tũthũngũri na ratiri?

13 Nũũ wanonereria MWATHANI ũrĩa egwĩka?

kana agatuĩka wa kũmũtaara?

14 Nũũ MWATHANI arĩ ahooya ũtaaro?

Na nũũ wanonereria MWATHANI njĩra ya kĩhooto?

Nũũ ũrĩ wamũthoomithia nĩguo oohĩge

kana akĩmuonia ũrĩa angĩĩka angĩenda ũũgĩ?

15 Maithoinĩ ma MWATHANI-rĩ, ndũũrĩrĩ no ta itaata rĩa maaĩ rĩrĩ ndooinĩ,

no ta thanda ya rũkũngũ ĩigĩrĩirwo ratiri igũrũ.

MWATHANI athimaga icigĩrĩra cia iriainĩ

o ta arĩ rũkũngũ rũrĩa rũhinyu.

16 Nyamũ ciothe cia mĩtitũ ya Lebanoni

itingĩigana cia kũrutĩra Ngai witũ igongoona;

mĩtĩ yothe ya mĩtitũ ĩyo

ndĩngĩigana ya gwakia mwaki wa igongoona.

17 Harĩ we-rĩ, ndũũrĩrĩ ciothe nĩ kĩndũ hatarĩ,

acionaga o ta tũhũ mũtheri.

18 Nũũ ũngĩkĩigananio na Ngai?

Ngai angĩhaananio na mũhianano ũrĩkũ?

19 Mũhianano ũthondekagwo nĩ bundi,

naake mũturi thahabu akaũhumbĩra na thahabu wothe,

agacooka akaũthondekera irengeeri cia betha.

20 Mũndũ mũthĩĩni ũtangĩonera thahabu-rĩ,

naake athuuraga mũtĩ ũrĩa ũtangĩbutha,

agacaria bundi ũrĩa njoorua mũno

amwacũhĩrie mũhianano ũtangiunĩkanga.

21 Kaĩ mũtarĩ mwamenya?

Kaĩ mũtarĩ mwaigua?

Kaĩ mũteerirwo kuuma o kĩambĩrĩria?

Kaĩ mũtarĩ mwamenya ũrĩa thĩ yambĩrĩirie?

22 Yathondekirwo nĩ ũrĩa ũikaraga gĩtĩinĩ gĩa ũthamaki igũrũ rĩa thĩ,

ũrĩa watambarũkirie matu ta marĩ kĩandarũũa,

akĩmatambũrũkia ta marĩ hema ya gũtũũrwo.

Mbere yake andũ arĩa matũũraga thĩ mahaana o ta ndaahi nĩ kũnyiiha.

23 Atuaga athamaki kĩndũ hatarĩ,

na agatua arĩa maathanaga gũũkũ thĩ tũhũ mũtheri.

24 Atĩrĩĩrĩ, o rĩĩrĩ maambĩrĩria kwĩhanda na gũtheerema,

o rĩĩrĩ maambĩrĩria gwĩkinyĩra,

atũmaga rũhuuho rũkamahuruuta makooma,

nakĩo kĩhuuhũkanio gĩgooka gĩkamoombũra o ta mahuti.

25 Ngai ũrĩa Mũtheru arakĩũria atĩrĩ,

“Mũngĩkĩhaanania na ũ?

Kana nũũ ũngĩiganana na niĩ?”

26 Roriai maitho maanyu na igũrũ, mũbaare;

nũũ wombire njata iiria?

Ũrĩa ũcireehage acibangĩĩte

na agaciĩta ĩmwe kwa ĩmwe na rĩĩtwa,

hinya wake nĩ mũingĩ, na ũhoti wake nĩ mũnene

ũguo atĩ gũtirĩ o na ĩmwe yagaga.

27 Isiraeli, ũragĩteta ũkiugaga:

“MWATHANI ndaramenya mathĩĩna maaku

na Ngai waku ndararũmbũiya ũhoro waku nĩkĩ?”

28 Kaĩ ũtarĩ wamenya?

Kaĩ ũtarĩ waigua?

MWATHANI nĩ we Ngai ũrĩa ũtũire aagu na aagu;

nĩ we wombire thĩ yothe,

ndarĩ hingo aagaga hinya kana akanoga;

na gũtirĩ ũngĩhungura meciiria maake.

29 Arĩa maagĩĩte hinya nĩ we ũmacookagĩria hinya,

na arĩa anogu akamaniinĩra mĩnoga.

30 Andũ eethĩ no maage hinya na manoge,

na no mahĩngwo magũe.

31 No rĩĩrĩ, arĩa mehokeete MWATHANI

nĩmarĩgĩaga na hinya mwerũ,

marĩũmbũkaga na mathagu o ta rwĩgĩ,

mahanyũkage matekũnoga,

na mathiage na magũrũ matekũigua ta matarĩ na hinya.

Ngai kũũmĩrĩria Aisiraeli

1 Ngai aroiga atĩrĩ,

“Kiraai na mũthikĩrĩrie, inyuĩ icigĩrĩra cia iriainĩ.

Andũ nĩmehaarĩrie gũtwara ciira igootiinĩ,

na nĩmekũheeo ihinda rĩa kwaria.

Ũkaai tũcookanie ndundu,

tuone nũũ ũrĩ na kĩhooto.

2 “Nũũ ũtũmĩĩte mũhootani ooke oimĩĩte mwena wa irathĩro,

na agatũma ahootane kũrĩa guothe aragerera?

Nũũ ũmũheaga ũhootani igũrũ rĩa athamaki na ndũũrĩrĩ?

Amahũũraga na rũhiũ rwake rwa njora o ta marĩ rũkũngũ,

na akamahurunja na mĩguĩ yake o ta marĩ mahuti moombũrĩĩtwo nĩ rũhuuho.

3 Amaingatithagia na akahĩtũka na ihenya inene,

ta arĩ kũũmbũka arombũka na ndoone ũũru.

4 Nũũ ũbangĩĩte na agatũma maũndũ maya matuĩke?

Nũũ ũbangaga ũrĩa maũndũ marũmanagĩrĩra kuuma o kĩambĩrĩria?

Niĩ MWATHANI, o niĩ MWATHANI, ũrĩa warĩ kuo kĩambĩrĩria na ũgaakorwo kuo mũthiainĩ.

5 “Andũ a icigĩrĩrainĩ cia iriainĩ nĩmooneete ũrĩa njĩkĩĩte,

makanyiitwo nĩ guoya na magatuĩka nda.

Oothe magakĩrũrũngana magooka.

6 Mookĩĩte magĩteithanagia

na makĩũmanagĩrĩria mũndũ na ũrĩa ũngĩ.

7 Bundi wa mbaaũ akeera mũturi wa thahabu atĩrĩ,

‘Nĩwĩkĩĩte wega.’

Ũrĩa naake ũnyorokagia mũhianano

akoomĩrĩria ũrĩa ũũgwatanagia na mĩcumaarĩ.

Makeerana atĩrĩ, ‘Nĩwagwatana wega.’

Magacooka makaũrũũgamia handũ haaguo na mĩcumaarĩ.

8 “No-rĩ, inyuĩ andũ a Isiraeli, ndungata ciakwa,

nĩ inyuĩ andũ arĩa thuurĩĩte,

na mũrĩ njiarwa cia Aburahamu, mũraata wakwa.

9 Ndamũreehire ndĩmũrutĩĩte ituri cia thĩ,

ndamwĩtĩĩte kuuma mabũrũri ma kũraaya mũno,

ngĩmwĩra atĩrĩ,

‘Mũrĩ ndungata ciakwa,

nĩndĩmũthuurĩĩte na ndimũingatĩĩte.’

10 Tigaai gwĩtigĩra, ndĩ hamwe na inyuĩ.

Tigaai kũmaka, amu nĩ niĩ Ngai wanyu;

nĩndĩmũũmagĩrĩria na ndĩmũteithagie,

nĩndĩmũgitagĩra na ndĩmũhonokagie.

11 “Arĩa oothe mamũraakarĩire magaaconoka na mahootwo.

Arĩa mahũũranaga na inyuĩ makooragwo mathire.

12 Mũgaagĩcaria arĩa macindanaga na inyuĩ na mũtikaamoona.

Arĩa mahũũranaga na inyuĩ magaatuĩka tũhũ mũtheri.

13 Nĩ gũkorwo niĩ MWATHANI Ngai wanyu,

ndĩmũnyiitĩĩte guoko kwa ũrĩo,

na ndĩramwĩra, ‘Mũtikaamake, nĩngũmũteithia.’ ”

14 MWATHANI aroiga atĩrĩ,

“Isiraeli, o na akorwo mũrĩ anyiinyi na mũtirĩ hinya,

tigaai gwĩtigĩra, nĩngũmũteithia.

Niĩ, Ngai Ũrĩa Mũtheru wa Isiraeli, nĩ niĩ ndĩmũhonokagia.

15 Atĩrĩĩrĩ, nĩngũmũtua ta macini ya kũhũũra ngano,

irĩ na magego meerũ na moogĩ.

Mũkaahũũra irĩma na mũcithĩe ihinye.

nacio ithũngũri mũcithĩe ituĩke rũkũngũ.

16 Mũgacihuuhĩra rĩerainĩ na rũhuuho rũciũmbũre,

kĩhuuhũkanio nakĩo gĩũke gĩcihurunje.

No inyuĩ nĩmũgaakena tondũ ndĩ Ngai wanyu,

na nĩmũkangooca, niĩ Ngai Ũrĩa Mũtheru wa Isiraeli.

17 “Rĩrĩa athĩĩni na arĩa abatari

megũcaria maaĩ, makamaaga,

na rĩrĩa manyooteete na mĩmero yao ĩkang’ara,

hĩndĩ ĩyo niĩ MWATHANI nĩndĩrĩiguaga ihooya rĩao.

Niĩ Ngai wa Isiraeli ndirĩ hĩndĩ ndĩrĩmatiganagĩria.

18 Nĩngaatũma njũũĩ itherũke na itherere kuuma kũndũ gũtheri kwambararu,

na ithima cia maaĩ itherere mĩkuruinĩ.

Nĩngaatũma werũ ũgarũrũke ũtuĩke iria rĩa maaĩ,

naguo bũrũri ũrĩa mũũmũ ũtuĩke ithima cia maaĩ.

19 Kũu werũinĩ nĩngaareka gũkũre

mĩtarakwa, mĩgaa, mĩhandathi, na mĩtamaiyũ.

Nakuo bũrũri ũrĩa mũũmũ gũkũre mũtitũ,

mũtitũ ũtukanĩĩte mĩthengera, mĩkarakaba, na mĩcindanũgũ.

20 Nao andũ moona ũguo mamenye

atĩ nĩ niĩ MWATHANI njĩkĩĩte ũndũ ũcio;

na meetĩkie atĩ Ngai Ũrĩa Mũtheru wa Isiraeli

nĩ we ũtũmĩĩte ũndũ ũcio ũhinge.”

MWATHANI kũmenereria ngai cia mĩhianano

21 MWATHANI, mũthamaki wa Isiraeli, ekuuga atĩrĩ,

“Inyuĩ ngai cia ndũũrĩrĩ, thitangaai ciira wanyu.

Reeheeni ihooto cianyu iria cia hinya mũno.

22 Ũkaai haaha mũtũrathĩre maũndũ marĩa magatuĩka,

nĩguo tũkaamenya rĩrĩa makaahinga.

Ĩraai igooti maũndũ marĩa maatuĩkĩkire tene

na mũtwĩre nĩ kĩĩ mamenyithanagia.

23 Twĩreei maũndũ marĩa magooka

na nĩtũgũkĩmenya atĩ mũrĩ ngai!

Ĩkaai ũndũ mwega kana mũũru,

mũtũgegie na mũtũtue nda!

24 Atĩrĩĩrĩ, inyuĩ eene mũrĩ o tũhũ mũtheri,

na ciĩko cianyu ciothe no tũhũ;

arĩa oothe mamũthaathayagia nĩ kĩndũ kĩ magigi.

25 “Niĩ-rĩ, nĩ niĩ njĩtĩĩte mũndũ ũtũũraga mwena wa irathĩro

na nĩngũmũreehe ahithũkĩre kuuma mwena wa rũgongo.

Ekũrangĩrĩria athamaki o ta marĩ ndooro

o ta ũrĩa mũũmbi nyũngũ arangaga rĩũmba.

26 Nĩ ũrĩkũ wanyu wahotire kũratha

kuuma o kĩambĩrĩria atĩ ũndũ ũcio nĩũgeekĩka,

nĩ geetha tũkĩhote kuuga atĩ nĩmwarathire wega?

Gũtirĩ o na ũmwe wanyu woigire ũndũ;

na gũtirĩ mũndũ o na ũmwe waiguire mũkiuga ũndũ.

27 Niĩ MWATHANI, nĩ niĩ ndaambire kũmenyithia Zayuni ũhoro;

nĩ niĩ ndatũmire mũrekio Jerusalemu

akamenyithanie ũhoro mwega.

28 No ndaikia maitho gatagatĩ ka ngai icio

ndianoona ya kũũdaara,

kana ya gũcookia ciũria ndooria.

29 Mĩhianano ĩno yothe ndĩrĩ kĩene

na ndĩrĩ ũhoti o na haniini.

Ndĩngĩhota kwĩĩkĩra ũndũ o na haniini.”

Ndungata ya MWATHANI

1 MWATHANI aroiga atĩrĩ,

“Ĩno nĩ yo ndungata yakwa ĩrĩa heyaga hinya,

nĩ yo thuurĩĩte na nĩ yo ĩkengagia ngoro yakwa

na nĩngenaga mũno nĩ ũndũ wayo.

Nĩdĩmĩheete Roho wakwa

nayo nĩkaamenyithia andũ oothe ituĩro rĩakwa.

2 Ndĩgaakararania na andũ kana ĩmagũũthũkĩre

ningĩ ndĩgaathiĩ ikĩmaheaga ũhoro yanĩrĩire njĩrainĩ.

3 Nĩgaakorwo ĩrĩ hooreri mbere ya arĩa matarĩ hinya,

na ĩiguĩre arĩa matahotaga gwĩteithia tha.

4 Ndĩgaakua ngoro na ndĩgaatoorio kinya kĩhooto kĩiyũre thĩ,

nao andũ oothe nĩmakaiga mwĩhoko wao thĩinĩ wayo,

na mabũrũri ma kũraaya marĩikaraga meetereire watho wayo.”

5 Ngai nĩ we wombire igũrũ na akĩrĩtambũrũkia;

nĩ we wathondekire thĩ na kĩrĩa gĩtũũraga kuo;

na no we ũheaga andũ aayo mĩhũũmũ na roho.

MWATHANI Ngai arakĩĩra ndungata yake atĩrĩ,

6 “Niĩ MWATHANI, nĩngwĩtĩĩte na ngakũhe ũhoti

wa kuona atĩ kĩhooto nĩkĩahingio gũũkũ thĩ.

Nĩngũkũhe hinya ũrĩĩkanĩre na andũ,

o na ũtuĩke ũtheri wa ndũũrĩrĩ

7 Nĩũkahingũra maitho ma arĩa matoonaga,

arĩa marĩ njeera nao ũmoohorithie,

na arĩa mahingĩirwo kandurumu ĩrĩ nduma nao ũtũme marekio.

8 “Niĩ nĩ niĩ MWATHANI, rĩu nĩrĩo rĩĩtwa rĩakwa.

Ndigeetĩkĩra kũgayana riiri wakwa na kĩũmbe kĩngĩ

o na kana kũigananio na mĩhianano.

9 Atĩrĩĩrĩ, maũndũ marĩa ndarathire tene nĩmarĩĩkĩĩtie kũhinga;

rĩu ndĩrakwĩra mangĩ meerũ,

ndĩrakwĩra maũndũ maya matarĩ mareekĩka.”

Rwĩmbo rwa kũgooca

10 Inĩraai MWATHANI rwĩmbo rwerũ,

wee thĩ yothe mũgooce!

Mũinĩreei inyuĩ arĩa mũthiaga iriainĩ,

mũgooceei inyuĩ ciũmbe ciothe cia iriainĩ!

Mũinĩreei inyuĩ icigĩrĩra cia iriainĩ,

mũgooceei inyuĩ arĩa mũtũũraga kuo!

11 Werũ na matũũra maakuo nĩmamũkumie,

andũ a matũũra ma Kedari nĩmamũgooce.

Andũ arĩa matũũraga itũũra rĩa Sela nĩmaine makeneete

na maanĩrĩre marĩ irima igũrũ.

12 Andũ arĩa matũũraga icigĩrĩra cia iriainĩ

nĩmakumie na magooce MWATHANI.

13 MWATHANI oimagaraga ta njamba ya ita,

nĩehaarĩirie na nĩarahĩahĩa akĩenda mbaara.

Aranĩrĩra na akoigĩrĩria,

na nĩaronia thũ hinya wake.

Ngai kwĩrĩra andũ aake ũteithio

14 Ngai aroiga atĩrĩ,

“Nĩngirĩĩte ihinda iraaya,

na nĩhoorereete na ngerigĩrĩria,

na rĩu ihinda rĩa gwĩka ũndũ nĩikinyu.

Ngũrĩra o ta mũtumia ũrarũmwo,

njaae na heehe.

15 Nĩngwananga irĩma na ithũngũri,

na nyũmie nyeki na mĩtĩ yothe ĩrĩa ĩrĩ kuo.

Nĩngũtũma cianda cia njũũĩ ituĩke werũ

na ndũme maria ma maaĩ mahũe.

16 “Ngũtongoria andũ arĩa atumuumu

ndĩmagerie njĩra matooĩ.

Ngũgarũrania ũtumuumu wao ũtuĩke ũtheri,

na ndĩmaaraganĩrie na njĩra ĩrĩa ĩtarĩ njaraganu.

Maũndũ macio nĩ mo ndĩrameerĩra,

na nĩngũmahingĩria hatarĩ nganja.

17 Arĩa maigaga mwĩhoko wao thĩinĩ wa mĩhianano,

arĩa moigaga mĩhianano nĩ yo ngai ciao

mekũmenererio na maconorithio.”

Aisiraeli kwaga kwĩruta

18 Thikĩrĩriai, inyuĩ itaigua ici!

Inyuĩ na inyuĩ itumuumu, roraai muone!

19 Nũũ mũtumuumu ta ndungata ĩyo yakwa?

Nũũ mbũramatũ ta mũrekio wakwa ũrĩa ndũmĩĩte?

Nũũ mũtumuumu ta ũrĩa wakwa mwamũre?

Nũũ mũtumuumu ta ndungata ya MWATHANI?

20 Nĩonaga maũndũ maingĩ

no ndamarũmbũyagia.

Nĩahingũrĩĩte matũ

no ndaiguaga ũndũ.

21 Atĩrĩĩrĩ, MWATHANI nĩ Ngai wendeete kũhonokania,

nĩguo atũũgĩrie Watho

na aũhe gĩtĩĩo.

22 No rĩu, andũ aake nĩmatahĩĩtwo;

oothe mahingĩirwo njeera

o na magaikio kandurumu.

Maiyĩtwo na magatahwo

na matirĩ na wa kũmahonokia.

23 Nũũ wanyu ũgũthikĩrĩria ũhoro ũyũ?

Nũũ ũrĩiguaga na arũmbũyanagie naguo?

24 Atĩrĩĩrĩ, nũũ wanenganĩrire Isiraeli kũrĩ atahani?

Nĩ MWATHANI ũrĩa twĩhĩĩtie,

o ũrĩa twagĩĩte kũrũmĩrĩra ũrutani wake,

o na tũkaaga gwathĩkĩra mawatho maake.

25 Nĩkĩo aatũmire tũigue ũritũ wa maraakara maake

na tũgĩkorererwo nĩ mathĩĩna ma mbaara.

Maraakara maake maarĩrĩmbũkaga ta mwaki mĩena yothe,

na tũtiigana kũmenya ũrĩa gwathiaga na mbere,

tũtirĩ ũndũ twerutire na ũndũ ũcio o na haniini.

Ngai kwĩranĩra kũhonokia andũ aake

1 Atĩrĩĩrĩ, MWATHANI ũrĩa wakũũmbire, wee Isiraeli aroiga atĩrĩ,

“Ndũgeetigĩre, nĩngũkũhonokia.

Nĩngwĩtĩĩte na rĩĩtwa rĩaku, wee wĩ wakwa.

2 Rĩrĩa ũkũgerera ndiainĩ ndiku

ndĩrĩkoragwo ndĩ hamwe nawe;

na mathĩĩna maaku matirĩkũmakagia.

Rĩrĩa ũkũhĩtũkĩra thĩinĩ wa mwaki,

mwaki ũcio ndũrĩgũcinaga.

Magerio ma hinya magũkorerera,

matirĩgũtiihagia o na atĩa.

3 Nĩ gũkorwo niĩ nĩ niĩ MWATHANI Ngai waku,

o niĩ Ũrĩa Mũtheru wa Isiraeli,

na niĩ ngũhonokagia.

Nĩngũheana bũrũri wa Misiri nĩguo ngũkũũre,

o na Ethiopia na Seba ndĩmaheane handũ haaku.

4 Ningĩ nĩngũheana ndũũrĩrĩ ng’ima

nĩguo ngũũre muoyo waku,

nĩ gũkorwo wĩ kĩndũ kĩa goro maithoinĩ maakwa.

Nĩngwendeete na ngagũtũũgĩria.

5 Tiga gwĩtigĩra, ndĩ hamwe nawe.

“Nĩngũreehe andũ aaku moimĩĩte mwena wa irathĩro

na nĩngũmacookanĩrĩria ndĩmarutĩĩte mwena wa ithũĩro.

6 Nĩngwĩra mwena wa na rũgongo ũmarekererie

naguo mwena wa na kĩanda ndũkamarigĩrĩrie.

Aanake aakwa nĩmarekwo mooke moimĩĩte mabũrũri ma kũraaya

o na airĩĩtu aakwa mooke moimĩĩte itũri ciothe cia thĩ.

7 Oothe nĩ andũ aakwa kĩũmbe,

ndamoombire maaheithagie gĩtĩĩo.”

Isiraeli nĩ mũira wa MWATHANI

8 Ngai aroiga atĩrĩ,

“Ĩtaai andũ aakwa mooke ciirainĩ.

Atĩrĩĩrĩ, marĩ na maitho,

no nĩ atumuumu.

Marĩ na matũ,

no nĩ itaigua.

9 Ĩtaai ndũũrĩrĩ ciothe ciũke ituĩroinĩ.

Nĩ ngai irĩkũ ciacio ingĩhota kũratha ũhoro ũrĩa ũgooka?

Nĩkũrĩ ciahotire kũratha

ũrĩa kũreekĩka ũũmũũthĩ?

Nĩikĩreehe aira aacio,

moonanie ũrĩa irĩ ma-inĩ

na iheane ũira wa ũrĩa mĩgambo yacio ĩrĩ ya ma.

10 “Inyuĩ andũ a Isiraeli, nĩ inyuĩ aira aakwa!

Ndamũthuurire mũtuĩke ndungata ciakwa,

nĩ geetha mũũmenye na mũũnjĩtĩkie,

na mũmenye atĩ no niĩ nyiiki Ngai.

Tiga niĩ gũtirĩ ũngĩ;

gũtirĩ kwagĩa na gũtikaagĩa na ũngĩ tiga niĩ.

11 Atĩrĩĩrĩ, niĩ, o niĩ nyiiki nĩ niĩ MWATHANI

na thengia niĩ, gũtirĩ ũngĩ ũngĩhota kũhonokania.

12 Nĩndooroteete o kabere ũndũ ũrĩa ũgeekĩka,

na ngĩũka ngĩmũteithia.

Gũtirĩ ngai ng’eni ĩrĩ yeka ũndũ ta ũcio;

inyuĩ nĩ inyuĩ aira aakwa.

13 Niĩ, o niĩ nyiiki nĩ niĩ Ngai

na no niĩ ngũtũũra ndĩ Ngai.

Gũtirĩ ũngĩhota kwĩruta ũhotiinĩ wakwa

na gũtirĩ ũngĩhota kũgarũra ũrĩa njĩkĩĩte.”

Isiraeli kũrutwo Babiloni

14 MWATHANI Ngai Ũrĩa Mũtheru wa Isiraeli

o we MWATHANI ũrĩa ũkũhonokagia, aroiga atĩrĩ,

“Nĩguo ngũhonokie, nĩngũtũma mbũtũ ya thigari ikahũũre Babiloni;

nĩngũbeberanga ihingo ciothe cia itũũra rĩu,

na mũkayũrũrũko wa andũ aakuo ũgĩtuĩke kĩrĩro.

15 Niĩ, o niĩ nyiiki, nĩ niĩ MWATHANI, nĩ niĩ Ngai waku ũrĩa mũtheru.

Nĩ niĩ ndakũũmbire, Wee Isiraeli

na niĩ mũthamaki waku.”

16 Tene MWATHANI nĩathondekire barabara,

yatwĩkanĩirie ndiihũinĩ cia maaĩ.

17 Nĩagereirie mbũtũ nene ya ita,

mbũtũ ya ngaari cia mbarathi, na ya mbarathi nyingĩ.

Ciothe ikĩgũa na itiacookire kũrũũgama

igĩthira na ikĩhora o ta rũtambĩ rwa taawa.

18 MWATHANI arakiuga atĩrĩ,

“Tiga kũririkana o maũndũ marĩa meekĩkire tene,

o na kana gwĩciiria marĩa maarĩ kuo tene.

19 Eterera wone ũndũ ũngĩ mwerũ ũrĩa ngwĩka,

o na rĩu nĩũratuĩka,

na nĩũkũhota kũwona!

Atĩrĩĩrĩ, nĩ ngũthondeka barabara ĩtwĩkanĩrie kũu werũinĩ

na ndũme njũũĩ igĩe kuo.

20 Nyamũ iria iraaraga gĩthaka nĩikũũhe gĩtĩĩo,

mbwe na nyaga o nacio nĩikũngooca,

tondũ nĩndũmĩĩte njũũĩ igĩe kũu werũinĩ

ihe andũ aakwa arĩa thuurĩĩte maaĩ.

21 Acio nĩ andũ arĩa ndeyũmbĩire

nĩ geetha maanyinagĩre na mangoocage.”

Wĩhia wa Isiraeli

22 MWATHANI ekuuga atĩrĩ,

“Wee Isiraeli, nĩũnogeetio nĩ niĩ,

na ũkaaga gũũthaathaiya.

23 Nĩwagĩĩte kũndutĩra magongoona ma njino ma ndũrũme,

na ũkaaga kũũhe gĩtĩĩo na magongoona maaku.

Niĩ ndiakũritũhĩirie maũndũ na gũgwĩtia maruta

o na kana ngĩkũnogia ngĩĩtia ũbaani.

24 Wee-rĩ, ndũngũrĩire ũbaani,

ningĩ ndũhũũnĩĩtie na maguta ma nyamũ ciaku cia magongoona.

No rĩĩrĩ, nĩkũnditũhĩra ũnditũhĩire na meehia maaku,

na ũkanogia na mahĩtia marĩa wĩkĩĩte.

25 No o na kũrĩ ũguo-rĩ, no niĩ Ngai

ũrĩa ũkuohagĩra meehia maaku,

na njĩkaga ũguo nĩ ũndũ wa gĩtĩĩo gĩakwa mwene.

Ndigũcooka kũririkana meehia maaku.

26 “Ũka tũthiĩ ciirainĩ.

Gweta thitango iria ũgũũthitanga nacio.

Heana itũmi cia kuonania atĩ wĩ kĩhootoinĩ.

27 Guukaguo ũrĩa wa tenenĩehirie

o na atongoria aanyu nĩmaahĩtĩirie.

28 Aathani aanyu nĩmaathaahirie Hekaarũ yakwa,

kwoguo ngĩreehithĩria Isiraeli mwanangĩko,

ngĩkĩrekereria andũ aakwa marumwo.”

MWATHANI nowe wiki Ngai

1 MWATHANI aroiga atĩrĩ,

“Thikĩrĩriai, inyuĩ Aisiraeli, ndungata ciakwa,

o andũ aakwa arĩa thuurĩĩte,

o inyuĩ njiarwa cia Jakubu.

2 Niĩ nĩ niĩ MWATHANI ũrĩa wamũũmbire.

Kuuma rĩrĩa mwaciarirwo, ndũire ndĩmũteithagia.

Tigaai gwĩtigĩra, inyuĩ mbarĩ ya Jakubu,

mũrĩ ndungata ciakwa, andũ arĩa thuurĩĩte na nyendeete.

3 “Nĩngũhe bũrũri ũrĩa mũnyootu maaĩ,

ndũme njũũĩ itherere bũrũri ũrĩa mũũmu.

Nĩngaitĩrĩria ciana cianyu roho wakwa,

na njiarwa cianyu ndĩciikũrũkĩrie iraathimo ciakwa.

4 Nacio ikũre o ta nyeki ĩitĩrĩirio maaĩ wega,

kana ta mĩtĩ ĩrĩa ĩkũraga rũteereinĩ rwa rũũĩ.

5 “Amwe moigage atĩrĩ, ‘Niĩ ndĩ wa MWATHANI.’

Angĩ makeĩĩtanagia na andũ a Isiraeli.

Angĩ makeyandĩka mookoinĩ maao atĩ nĩ a MWATHANI,

na makeĩĩta amwe a andũ a Ngai.”

6 MWATHANI, ũrĩa ũthamakagĩra na akagitĩra Isiraeli,

o we MWATHANI Mwene Hinya Wothe, aroiga ũũ,

“Niĩ nĩ niĩ kĩambĩrĩria

na nĩ niĩ kĩrĩĩkĩro.

Niĩ no niĩ nyiiki Ngai;

gũtirĩ ũngĩ thengia niĩ.

7 Nũũ ũhaana ta niĩ?

Nĩeyumaumĩrie!

Nũũ wanahota kũratha maũndũ

marĩa mageekĩka kuuma kĩambĩrĩria

kinya mũico wa mahinda maya?

8 Tigaai gwĩtigĩra kana kũmaka;

nĩmũũĩ atĩ kuuma o tene kinya rĩu,

nĩnjugaga maũndũ marĩa mageekĩka.

Inyuĩ mũrĩ aira aakwa.

Kaĩ gũkĩrĩ Ngai ũngĩ thengia niĩ?

Nĩkũrĩ Ngai ũngĩ ũrĩ na ũhoti?

Ndirĩ ndamũigua!”

Gũtĩĩa mĩhianano nĩ ũndũ ũrĩ magigi

9 Andũ arĩa mathondekaga ngai cia mĩhianano nĩ a tũhũ mũno, na ngai icio magaathagĩrĩria itirĩ bata. Andũ arĩa macithaathayagia nĩ itumumu na irimũ. Nĩkĩo magaconorithio.

10 Nũũ ũthondekaga ngai ya mũhianano kana agaacũhia mĩhianano ateetereire kuona uumithio?

11 Arĩa oothe maheaga ngai icio cia mĩhianano gĩtĩĩo-rĩ, nĩmagaconorwo. Ningĩ arĩa macithondekaga no andũ ta andũ arĩa angĩ. Rekeei oothe macookanĩrĩre maciirithio; nĩkũmaka mekũmaka na maconoke.

12 Atĩrĩĩrĩ, mũturi wa cuuma, ooyaga gĩcuuma kĩmwe, agagĩikia mwakiinĩ, agakĩhũũra na nyondo, na agagĩkũnja na hinya wa mooko maake. Hĩndĩ ĩyo arakĩrutĩra wĩra, ahũũtaga na akaaga hinya; anyootaga, akang’ara o na akanoga.

13 Bundi wa mbaaũ naake athimaga gĩcunjĩ kĩa mũtĩ, agacora mbica na karamu. Agagĩkĩrutĩra wĩra na indo ciake, agathondeka mbica thaka mũno ya mũndũ, ĩgagĩtuĩka ya kũigwo nyũmbainĩ yake.

14 Ahota gũtema mũtarakwa aũtũmĩre, kana atoonye mĩtitũ acagũre mũgandi kana mũthengera. Ningĩ no ahande mũkarakaba na eeterere mbura ĩũkũrie.

15 Mũtĩ ũcio ũtũmagĩrwo ta ngũ na ũgatũmĩrwo gwacũhio mĩhianano. Mũndũ oyaga kĩnuthu kĩmwe agaakia nakĩo mwaki wa guota na wa kũruga irio, kĩnuthu kĩrĩa kĩngĩ agagĩacũhia agathondeka ngai akamĩthaathaiya.

16 Gĩcunjĩ kĩmwe kĩa mũtĩ aakagia mwaki nakĩo; akahĩĩhia nyama naguo, akarĩa akahũũna. Ahehũka akoiga atĩrĩ, “Kaĩ mwaki ũyũ nĩ mwega na ũrĩ na ũrugarĩ-ĩ! Kaĩ mwaki ũyũ nĩ mwega-ĩ!”

17 Gĩcunjĩ kĩu kĩngĩ agathondeka mũhianano, agacooka akaũinamĩrĩra akaũthaathaiya. Aũhooyaga akoiga atĩrĩ, “Ndagũthaitha honokia amu wee nĩ we ngai yakwa.”

18 Andũ acio nĩ akingitaru mũno na matimenyaga ũrĩa mareeka. Mahingaga maitho na meciiria maao matikaanoone na mamenye ũũma.

19 Mũndũ ũrĩa ũthondekaga mĩhianano ndagĩaga na ũcamba kana ũmenyo wa kuuga, “Gĩcunjĩ kĩmwe kĩa mũtĩ ũyũ, ndaakirie mwaki nakĩo, ngĩruga irio na makara maakĩo na ngĩhĩĩhia nyama ngĩrĩa. Gĩcunjĩ kĩu kĩngĩ nĩkĩo ndathondekire mũhianano ũyũ nakĩo. Na atĩ rĩu nĩ niĩ ũyũ ndĩrainamĩrĩra gĩcunjĩ kĩa mũtĩ!”

20 Mũndũ ũcio ariitĩĩte akarĩa mai! Meciiria maake mamũturuurĩĩtie makamwagithia njĩra na ndangĩteithĩka. Ndangĩĩcookerera amenye atĩ mũhianano ũcio anyiitĩĩte na mooko maake ti ngai o na atĩa!

MWATHANI nĩ we mũũmbi na mũhonokania

21 MWATHANI aroiga atĩrĩ,

“Isiraeli, ririkana ũndũ ũyũ!

Ririkana wĩ ndungata yakwa.

Niĩ ndakũũmbire na ngĩgũtua ndungata yakwa,

na ndirĩ hĩndĩ ngariganĩrwo nĩ we.

22 Haatĩĩte mahĩtia maaku o ta ũrĩa matu mahaatagwo,

na meehia maaku o ta ũrĩa kĩbii kĩhaatagwo.

Kĩnjookerere, tondũ nĩ niĩ ngũhonokagia.”

23 Inaai mũkeneete inyuĩ, igũrũ!

Anĩrĩraai inyuĩ thĩ kũrĩa kũriku!

Tuthũkaai mũkeneete, inyuĩ irima,

o na inyuĩ mĩtitũ na mĩtĩ yothe ĩrĩa ĩrĩ kuo!

Nĩ gũkorwo MWATHANI nĩahonokeetie andũ aake,

na nĩarĩtũũgagĩrio thĩinĩ wa Isiraeli.

24 “Niĩ nĩ niĩ MWATHANI mũhonokia waku; nĩ niĩ ndakũũmbire ndainĩ ya maitũguo.

Nĩ niĩ MWATHANI ũrĩa wombire indo ciothe;

nĩ niĩ ndatambarũkirie igũrũ.

No niĩ ndoombire thĩ na ndamĩũmbire ndĩ o nyiiki.

25 Nĩ niĩ nduruuragia ooni maũndũ,

na ngariitia arĩa maragũraga na njata.

Nĩndeganaga na mĩgambo ya njũhĩga

na ngoonania atĩ ũũgĩ wao nĩ ũrimũ mũtheri.

26 Nĩ niĩ ndũmaga mĩgambo ya ndungata yakwa ĩhinge,

na ngatũma ũrathi wa atũmwo aakwa ũkinye.

Nĩ niĩ ndĩreera Jerusalemu atĩ

andũ nĩmegũcooka gũtũũra thĩinĩ waku.

O na ngeera matũũra ma Juda atĩ

nĩmagaakwo rĩngĩ.

Matũũra maakuo marĩa marĩ ciĩgĩĩgĩ

nĩngaamaaka rĩngĩ.

27 Nĩ niĩ ndutaga watho

iria na njũũĩ ikahũa.

28 Na niĩ njĩĩrĩĩte Cairasi atĩrĩ,

‘Wee ũrĩathanaga handũinĩ haakwa,

ũrĩĩkaga ũrĩa ngwenda wĩke,

nĩũrĩathana Jerusalemu yakwo rĩngĩ,

na mũthingi wa Hekaarũ nĩũgaakwo rĩngĩ.’ ”

MWATHANI gũthuura Cairasi

1 MWATHANI areera Cairasi, ũrĩa aitĩrĩirie maguta akamũthuura atuĩke mũthamaki atĩrĩ,

“Ngũheete hinya ũhoote ndũũrĩrĩ,

na ũrangĩrĩrie athamaki.

Niĩ MWATHANI nĩngũkũhingũrĩra ihingo cia matũũra,

na iticooke kũhingwo.

2 Ngũgũtongoria thiĩ ngĩaraganagia irĩma mbere yaku,

ngĩtuangaga ihingo iria ciakĩĩtwo na kĩgera,

o na ngĩanangaga cuuma ciacio.

3 Nĩngũkũhe ũtonga ũrĩa ũhithĩĩtwo kũndũ kũrĩ nduma,

o na ũrĩa ũrĩ kũndũ kũrĩa kũhithe mũno.

Ũgĩkĩmenye atĩ niĩ, MWATHANI Ngai wa Isiraeli,

nĩ niĩ ngwĩtĩĩte na rĩĩtwa.

4 O na gũtuĩka ndũnjũũĩ,

ngwĩtĩĩte na rĩĩtwa na ngakũheithia ngumo,

nĩ ũndũ wa Isiraeli, ndungata yakwa ĩrĩa thuurĩĩte.

5 “Atĩrĩĩrĩ, niĩ nĩ niĩ MWATHANI

na gũtirĩ ũngĩ o na ũrĩkũ.

Tiga niĩ gũtirĩ ngai ĩngĩ.

Nĩ niĩ ngwĩkĩrĩĩte hinya,

o na akorwo ndũnjũũĩ.

6 Njĩkĩĩte ũguo nĩguo,

kuuma irathĩro rĩa riũa nginya ithũĩro rĩarĩo,

andũ mamenye atĩ nĩ niĩ MWATHANI

na atĩ thengia niĩ gũtirĩ ũngĩ.

7 Nĩ niĩ nyũũmbaga ũtheri na ngoomba nduma,

no niĩ ndehithagia kĩraathimo na mũthiro.

Niĩ MWATHANI, nĩ niĩ njĩkaga maũndũ macio moothe.

8 Niĩ MWATHANI nĩngeeka ũũ:

nĩngaareka igũrũ na matu, ciurie ũthingu ta mbura.

Na ndeke thĩ yatũke yumie ũhonokania na ũthingu,

ikũranĩre hamwe.”

MWATHANI nĩ we mwene maũndũ moothe

9 “Kaĩ ũrĩa ũng’eng’anaga na ũrĩa wamũũmbire arĩ thĩĩnainĩ-ĩ!

Atariĩ o ta gĩcere kĩrĩ thĩinĩ wa icere iria ingĩ.

Atĩrĩĩrĩ, rĩũmba no rĩũrie mũũmbi,

‘Ũreeka atĩa’ kana rĩmwĩre,

‘nyũngũ yaku ndĩrĩ na matũ?’

10 Ũrĩa ũũragia ithe

‘Ũciaraga nĩkĩ?’

Kana akooria nyina,

‘Ũgĩaga na ciana nĩkĩ?’

Kaĩ arĩ thĩĩna-ĩ!”

11 MWATHANI, Ngai Ũrĩa Mũtheru wa Isiraeli,

o we mũũmbi, arooria atĩrĩ,

“No ũnjũũrie ũhoro wa ciana ciakwa

kana ũhoro wa mawĩra marĩa ndutaga na mooko maakwa?

12 Nĩ niĩ ndoombire thĩ,

na ngĩũmba andũ matũũrage kuo.

Nĩ niĩ ndatambũrũkirie kũũrĩa igũrũ na mooko maakwa niĩ mwene

na nĩ niĩ njathaga riũa, mweri na njata.

13 Nĩ niĩ njarahũrĩĩte Cairasi

ngamũhe kĩhooto na ngathondeka njĩra iria ekũgerera.

Nĩakanjakithĩria rĩngĩ itũũra rĩakwa rĩa Jerusalemu,

na andũ aakwa arĩa matahĩĩtwo

amareehithĩrie wĩyathi.

No ndageeka ũguo nĩ ũndũ wa mbeeca

kana nĩ ũndũ wa kũhakwo na kĩndũ.

Ũguo nĩguo niĩ MWATHANI Mwene Hinya Wothe ndoiga.”

14 Ningĩ MWATHANI aroiga atĩrĩ,

“Ũtonga wa Misiri na wa Ethiopia ũgũtuĩka waku,

Aseba, imũndũ iria ndaihu, igũtuĩka ngombo ciaku;

irĩkũrũmĩrĩra cioheetwo na bĩngũ,

irĩkũinamagĩrĩra ikiugaga atĩrĩ,

‘Nĩ ma Ngai arĩ hamwe nawe.

We no we Ngai, na gũtirĩ ũngĩ thengia we.

15 Ngai wa Isiraeli, nĩ Ngai ũhonokagia andũ aake,

ningĩ nĩ Ngai wĩhithĩĩte.

16 Arĩa oothe mathondekaga mĩhianano

nĩgũconoka marĩconakaga

o na manyararagwo.

17 No rĩĩrĩ, Isiraeli ahonokagio nĩ MWATHANI,

ũhonokio wake nĩ wa tene na tene

na ndagaaconorithio rĩ kana rĩ!’ ”

18 MWATHANI ũrĩa wombire igũrũ,

no we wiki Ngai gũtirĩ ũngĩ,

na no we wombire na agĩthondeka thĩ,

aamĩũmbire akĩmĩtua nũmu na ya gũtũũra,

ndamĩũmbire ĩrĩ kĩĩgĩĩgĩ o ũguo

aamĩũmbire ĩrĩ kũndũ gwa gũtũũrwo nĩ andũ.

MWATHANI ũcio nĩ we ũroiga,

“Nĩ niĩ MWATHANI,

na gũtirĩ Ngai ũngĩ.

19 Niĩ ndiarĩĩtie na hitho

kana ngahithĩrĩra itaanya rĩakwa.

Ndierire andũ a Isiraeli,

manjaragie kĩĩgĩĩgĩinĩ.

Niĩ MWATHANI njaragia ũhoro ũrĩa wa ma,

na ngamenyithania maũndũ ma kĩhooto.”

MWATHANI wa thĩ na mĩhianano ya Babiloni

20 MWATHANI aroiga atĩrĩ,

“Cookanĩrĩraai inyuĩ andũ a ndũũrĩrĩ,

o inyuĩ mũtigarĩĩte ũthamaki waharagana,

mũũke mũciirithio!

Andũ arĩa mathiaga makuuĩĩte ngai cia gwacũhio

na mahooyaga ngai itangĩhota kũmahonokia,

matirĩ ũndũ mooĩ o na haniini.

21 Ũkaai mũreehe ciira wanyu igootiinĩ,

arĩa maraciirithio nĩmacookanie ndundu.

Nũũ wagwetire ũhoro ũyũ o tene

na akĩũmenyithania ũtanakinya?

Githĩ ti niĩ MWATHANI, Ngai ũrĩa ũhonokagia andũ aake?

Thengia niĩ gũtirĩ Ngai ũngĩ.

22 “Njookereraai na nĩmũkũhonokio inyuĩ andũ oothe a thĩ,

nĩ gũkorwo niĩ no niĩ Ngai

na gũtirĩ ũngĩ thengia niĩ.

23 Ndĩrehĩta ngĩĩgwetaga niĩ mwene.

Ũndũ ũrĩa njugĩĩte na kanua gaakwa nĩ ũhoro wa ma

na ndirĩ hingo ngericũkwo.

Andũ oothe marĩnduragĩria ndu

na mehĩtage kũndungatagĩra.”

24 Mariugaga atĩrĩ,

“Kĩhooto na hinya cionekaga o harĩ niĩ MWATHANI.

Arĩa mathũire nĩgũconorwo magaconorwo.

25 Niĩ MWATHANI nĩngaahonokia njiarwa ciothe cia Isiraeli,

nacio nĩigaakena.

1 “Ngai ĩrĩa ĩĩtagwo Beli nĩgwĩte

nayo ĩrĩa ĩĩtagwo Nebo nĩnũnde.

Ngai icio rĩu ikuuĩĩtwo nĩ ndigiri ta mĩrigo;

na nĩiritũhĩire nyamũ icio icikuuĩĩte.

2 Ngai icio igwĩte ikaiganĩrĩrwo hamwe,

itingĩhota kwĩhonokia.

Nĩgũtwarwo iratwarwo ithaamĩrioinĩ.

3 “Tegaai matũ mũũthikĩrĩrie,

inyuĩ andũ a Isiraeli arĩa oothe mũtigarĩĩte.

Ndũire ndimũmenyagĩrĩra kuuma o mwaciarwo,

o na mũrĩ ndainĩ no ndamũteithagia.

4 Ngũtũũra njĩkaga ũguo

kinya mũkũre na mũgĩe na mbuĩ.

Nĩ niĩ ndamũũmbire

na nĩndĩrĩmũmenyagĩrĩra,

na ndĩmũhonokagie.

5 “Mũngĩningithania na ũ atĩ nĩguo tũiganane?

Ningĩ mũngĩningithania na ũ atĩ nĩguo tũhaanane?

6 Andũ mahingũraga mĩhuko yao makaruta thahabu,

na magathima betha na ratiri.

Magacooka makarĩha mũturi, agacithondeka igatuĩka ngai.

Magagĩũka makamĩinamĩrĩra, na makamĩthaathaiya.

7 Magacooka makamĩigĩrĩra ciande,

makamĩkuua magathiĩ makamĩiga handũ haayo;

hau mamĩiga ndĩngĩhota gũcooka gwĩthengia ho.

Mũndũ angĩmĩkaĩra,

ndĩngĩhota kũmũruta thĩĩnainĩ.

8 Kwoguo, ririkanaai ũndũ ũcio

na mũwĩkĩre ngoro, inyuĩ eehia aya.

9 Ririkanaai maũndũ marĩa maatuĩkĩkire tene,

amu niĩ no niĩ nyiiki Ngai,

na gũtirĩ ũngĩ thengia niĩ.

No niĩ nyiiki Ngai

na gũtirĩ ũngĩ tũhaanaine naake.

10 O kĩambĩrĩriainĩ nĩndamenyithanirie ũrĩa maũndũ makaarĩĩkĩrĩria;

na kabere mũno ngĩmenyithania maũndũ marĩa meerekeire gũũka.

Ngakiuga atĩ mũbango wakwa, no mũhaka ũhinge;

na ũrĩa wothe nduĩte kũhingia, nĩngũhingia.

11 Nĩndĩreeta mũndũ ũmwe mwena wa irathĩro,

na arĩomokanagĩra o ta nderi.

Ekuuma bũrũri wa kũraaya ooke ahingie mũbango wakwa.

Niĩ njugĩĩte ũguo, na nĩngũũhingia.

12 “Tegaai matũ mũũthikĩrĩrie, inyuĩ mũũmĩĩtie ngoro,

o inyuĩ mũreciiria atĩ ũhootani wakwa nĩũmũraihĩrĩirie.

13 Atĩrĩĩrĩ, nĩngũreehithia mũthenya wa ũhootani hakuhĩ,

no kaĩ ndũrĩ haraaya-ĩ!

Ũhootani ũcio wakwa ndũgũcererithio;

nĩngũhonokia Jerusalemu,

na ndũme Aisiraeli matũũgĩre kuo.”

Babiloni gũtuĩrwo

1 MWATHANI aroiga atĩrĩ,

“Babiloni, uma gĩtĩinĩ gĩaku gĩa ũthamaki,

ikara thĩ rũkũngũinĩ.

Kũrĩ hĩndĩ wahaanaga ta mũirĩĩtu gathirange,

warĩ itũũra rĩtarĩ mũndũ ũngĩarĩtooririe.

No rĩu ndũgaacooka gũkorwo ũrĩ mũthaka

o na ũrĩ mũhooreri rĩngĩ!

2 Oya ihiga rĩa gĩthĩi, ũthĩe mũtu!

Ruta gĩtambaya gĩaku kĩa mũtwe,

na wĩyaũre nguo ciaku thaka!

Heta nguo ciaku na igũrũ ũringe njũũĩ!

3 Andũ magĩkuone njaga

ũconokeete na ũinamĩĩtie maitho nĩ thoni,

niĩ na niĩ ndĩrĩhĩrie gũtarĩ mũndũ ngũiguĩra tha.”

4 Mũkũũri witũ eetagwo MWATHANI Mwene Hinya Wothe

na no we Ngai Ũrĩa Mũtheru wa Isiraeli.

5 MWATHANI areera Babiloni atĩrĩ,

“Kira ki, na ũthiĩ wĩhithe handũ ndumainĩ.

Ndũgũcooka gwĩtwo kwini wa ndũũrĩrĩ!

6 Tondũ-rĩ, ndaraakarĩire andũ aakwa,

na ngĩmakaana ta andũ aakwa kĩũmbe;

ngĩmarekereria mookoinĩ maaku,

no we-rĩ, ndũigana kũmaiguĩra tha o na haniini.

Arĩa maikangĩĩtie mĩaka nĩkũmahatĩrĩria wamahatĩrĩirie mũno mũno.

7 Ningĩ weĩraga atĩ ũgũtũũra ũrĩ kwini,

na ndũigana gwĩciiria maũndũ macio ngoroinĩ

o na kana wĩyũrie makaarĩĩkĩrĩra atĩa.

8 “Tagĩthikĩrĩrie, wee wendeete ikeno,

wee wĩciiragia atĩ nĩwĩhandĩĩte na ndũrĩ ũgwati ũngĩona.

Wee uugaga, ‘No niĩ na gũtirĩ ũngĩ,

ndirĩ hingo ngaatuĩka mũtumia wa ndigwa,

o na kana ngĩe na kĩeha gĩa gũkuĩrwo nĩ ciana.’

9 Maũndũ macio meerĩ-rĩ,

gũtuĩka mũtumia wa ndigwa, na gũkuĩrwo nĩ ciana,

magaagũkorerera ihinda na mũthenya o ro ũmwe,

o na ũngĩhũthĩra mĩthaiga yaku mĩingĩ

na ũgo ũrĩa wa hinya.

10 “Ũratũire wĩhandĩĩte ũũruinĩ waku,

ũkeĩĩraga na ngoro atĩ nduonagwo nĩ mũndũ.

Ũũgĩ waku na wara waku nĩcio irakũhĩtithagia,

ũkeĩĩraga na ngoro atĩ wee no we wiki,

gũtirĩ ũngĩ thengia wee.

11 Atĩrĩĩrĩ, ũũru ũtooĩ na kũrĩa uumĩĩte,

ũtangĩhoroherio na mĩthaiga yaku

nĩũgũgũkorerera.

Mwanangĩko ũtangĩhota kwĩrigĩrĩria

nĩũgũgũkorerera.

Mũthiro ũtarĩ weciiria ũhoro waguo

nĩũgũgũũkĩrĩra ũterĩgĩrĩire.

12 Tagĩthiĩ na mbere na mĩthaiga yaku mĩingĩ

o na ũhũthire ũgo waku ũrĩa wa hinya,

ũrĩa ũtũire ũhũthagĩra kuuma rĩrĩa warĩ mwĩthĩ!

Reke tuone kana nĩigũgũteithĩrĩria,

o na kana nĩũkũmakia thũ ciaku nacio.

13 O na ũheetwo mataaro maingĩ ũguo,

ũtigĩĩtwo o ũtarĩ na hinya.

Reke andũ aaku arĩa maragũraga na njata,

mooke makũhonokie.

Acio nĩ arĩa mathoomaga ũhoro wa njata,

makagayania igũrũ icunjĩ mwanya mwanya,

na magakũmenyithagia maũndũ,

marĩa marĩgũkoragĩrĩra mweri o mweri.

14 “Atĩrĩĩrĩ, o mahaana o ta mahuti;

na nĩmaagacinwo nĩ mwaki.

Matikaahota kwĩhonokia o eene kuuma mwakiinĩ ũcio;

ndũgaakorwo ũrĩ mwaki wa guotwo

o na kana wa gũikarwo hakuhĩ naguo.

15 Aragũri acio ũtũire ũhũthagĩra kuuma rĩrĩa warĩ mwĩthĩ,

magaagũtiganĩria o mũndũ ethiĩre njĩra yake

na gũtirĩ ũkaahota gũkũhonokia.

Ũcio noguo wega ũrĩa magaagwĩka.”

Ngai nĩwe MWATHANI wa maũndũ marĩa magooka

1 Tathikĩrĩriai ũhoro ũyũ inyuĩ andũ a Isiraeli,

o inyuĩ muugaga atĩ mũrĩ njiarwa cia Juda:

Inyuĩ mwĩhĩtaga mũkĩgwetaga rĩĩtwa rĩa MWATHANI,

na mũkoiga atĩ mũthaathayagia Ngai wa Isiraeli,

no mũtiĩkaga ũguo mũgwatĩirie ũhoro ũcio.

2 Mwĩtĩĩaga mũkiugaga atĩ mũrĩ atũũri a itũũra rĩrĩa rĩtheru,

na atĩ mwĩhoceetie harĩ Ngai wa Isiraeli

ũrĩa wĩtagwo MWATHANI Mwene Hinya Wothe.

3 “Atĩrĩĩrĩ, tene mũno-rĩ, nĩndamũmenyithirie maũndũ marĩa magooka,

na maũndũ macio moimĩĩte kanuainĩ gaakwa.

Ndacookire ngĩmahingia o narua.

4 Tondũ nĩnjũũĩ atĩ mũrĩ andũ oomũ ngoro mũno,

ngingo cianyu ciũmĩĩte o ta cuuma

na ciongo cianyu nacio o ta gĩkama.

5 Ndamũmenyithirie maũndũ marĩa magaatuĩkĩka o kabere,

matarĩ maratuĩkĩka,

nĩ geetha mũtikaanoige atĩ ngai cianyu cia mĩhianano,

ya gwacũhio kana ya gũtwekio

nĩcio itũmĩĩte maũndũ macio mahinge.

6 “Maũndũ marĩa ndamwĩrire tene

nĩmuoneete moothe nĩmahingĩĩte.

Mũkĩagĩrĩirwo nĩgwĩtĩkĩra

atĩ maũndũ marĩa ndarathire maarĩ ma ma.

Rĩu nĩngũmwĩra maũndũ mangĩ meerũ,

maũndũ matũire marĩ mahithe

na mũtimooĩ.

7 Matiathondekirwo tene nĩ hĩndĩ marathondekwo;

mũtierirwo ũhoro wamo mbere ya hĩndĩ ĩno,

tondũ korwo nĩmwerĩĩtwo,

no muuge nĩtũramooĩ moothe.

8 Nĩnjũũĩ atĩ mũtingĩĩhokwo,

na mũtũire mũrĩ aremi kuuma o mwaciarwo.

Nĩkĩo mũtarĩ mwamaigua na mũtirĩ mwamamenya,

matũ maanyu matirĩ maakinyĩrwo nĩ ũhoro wa ma.

9 “Nĩ ũndũ wa rĩĩtwa rĩakwa niĩ mwene

nĩngwĩgirĩrĩria ndikaaraakare.

Nĩ ũndũ wa gĩtĩĩo gĩakwa niĩ mwene

ndikũmũraakarĩra na ndikũmũniina.

10 Oneei nĩndĩmũthereetie, no ti ta ũrĩa betha ĩtheragio.

Ndĩmũgereirie icuainĩ rĩa mathĩĩna.

11 Ũndũ ũyũ ngwĩka nĩ ũndũ wakwa kĩũmbe.

Kaĩ rĩĩtwa rĩakwa rĩagĩrĩirwo nĩgũthaahio?

Ndingĩtĩkĩra kũhe ũngĩ riiri ũrĩa ũrĩ wakwa kĩũmbe.”

Cairasi, mũtongoria mũthuure nĩ MWATHANI

12 MWATHANI aroiga atĩrĩ,

“Tegaai matũ, mũũthikĩrĩrie

Wee Isiraeli, o inyuĩ andũ arĩa njĩtĩĩte!

Niĩ nĩ niĩ Ngai!

Nĩ niĩ wa mbere na wa mũthia.

13 Mooko maakwa nĩ mo maathondekire itina cia thĩ,

na no mo maatambarũkirie igũrũ.

Njĩtaga thĩ na igũrũ, ikanjathĩkĩra o rĩmwe.

14 “Gomanaai inyuothe na mũthikĩrĩrie,

nĩ ngai ĩrĩkũ yarathire ũhoro ũyũ

atĩ mũndũ ũrĩa thuurĩĩte nĩekũhingia wendi wakwa

na atharikĩre Ababilonia?

15 Niĩ, o niĩ mwene, nĩ niĩ njarĩĩtie na ngamwĩta,

nĩ niĩ ndĩmũreeheete na nĩngũmũhe ũhootani.

16 “Ũkaai hakuhĩ na niĩ, mũigue ũrĩa nguuga.

Atĩrĩĩrĩ, kuuma o kĩambĩrĩria niĩ ndirĩ ndaaria na hitho;

Na nĩhingagia ũrĩa njugĩĩte.”

(MWATHANI Ngai nĩanjĩkĩrĩĩte hinya wake na nĩandũmĩĩte).

Mũbango wa MWATHANI harĩ andũ aake

17 Mũkũũri waku, o we MWATHANI Ngai Ũrĩa Mũtheru wa Isiraeli, aroiga atĩrĩ,

“Nĩ niĩ MWATHANI Ngai waku,

nyendaga gũkũruta maũndũ ma gũkũguna,

na gũkuonereria njĩra iria ũbataire kũgerera.

18 Naarĩ korwo nĩwathikĩrĩirie maathani maakwa!

Ũtonga waku ũngĩhaana o ta rũũĩ rũtahũaga,

ũhootani waku naguo ũngĩhaana o ta ndiihũ cia iriainĩ.

19 Ciana ciaku ingĩingĩhĩĩte o ta mũthanga,

njiarwa ciaku nacio ingĩhaana o ta thanda cia mũthanga.

Itingĩkaariganĩra rĩ o rĩ.”

20 Umaai Babiloni!

Mwĩthareei mwehererere Ababilonia!

Thiĩi mũkĩanagĩrĩra mũkeneete!

Anĩrĩraai mũmenyithanie ituriinĩ ciothe cia thĩ,

atĩ MWATHANI nĩakũũrĩĩte andũ aake a Isiraeli.

21 Aamagereirie kũndũ werũinĩ

na matiathĩĩnire nĩkwaga maaĩ.

Aatũmire maaĩ moime rwaroinĩ rwa ihiga

na agĩatũranga ndwaro cia mahiga gũkiuma tũrũũĩ.

22 MWATHANI aroiga atĩrĩ,

“Andũ arĩa eehia, matirĩ thaayũ marĩonaga.”

Isiraeli, ũtheri wa ndũũrĩrĩ

1 Tategaai matũ mũũthikĩrĩrie inyuĩ andũ a icigĩrĩrainĩ cia iria

o inyuĩ andũ arĩa matũũraga kũndũ kũraaya!

Atĩrĩĩrĩ, MWATHANI aathuurire akĩnyamũra nduĩke ndungata yake

o hĩndĩ ĩrĩa ndarĩ ndainĩ ya maitũ.

2 Aathondekire kanua gaakwa karĩ koogĩ

o ta rũhiũ rwa njora,

aanjigire angitĩire na guoko gwake.

Aathondekire haana o ta mũguĩ mũnyorokie wega,

ũrĩ mũnoore na ũkahaarĩrio wega.

3 Agĩcooka akĩnjĩĩra atĩrĩ,

“Isiraeli, wee nĩ we ndungata yakwa

na nĩũrĩtũmaga andũ mangooce.”

4 No niĩ ngiuga atĩrĩ,

“Niĩ-rĩ, nĩndutĩĩte wĩra, no ndũgĩĩte na uumithio;

nĩnogeete, no ndirĩ ũndũ hingĩĩtie.

No rĩĩrĩ, nĩnjĩrĩgĩrĩire atĩ MWATHANI nĩarĩgitagĩra ihooto ciakwa

na aheage mũcaara nĩ ũndũ wa wĩra ũrĩa ndutĩĩte.”

5 Hĩndĩ ĩrĩa ndaarĩ ndainĩ ya maitũ, MWATHANI nĩathuurire,

nduĩke ndungata yake,

nĩ geetha njookie mbarĩ ya Jakubu harĩ we

na njookanĩrĩrie Aisiraeli harĩ we.

MWATHANI nĩaheete gĩtĩĩo,

Ngai wakwa nĩatuĩkĩĩte hinya wakwa.

6 MWATHANI arakĩnjĩĩra atĩrĩ,

“Ndungata yakwa, ndĩ na wĩra mũnene mũno ngũkũhe;

to gũcookanĩrĩria ũgũcookanĩrĩria matigari ma andũ a Aisiraeli,

no nĩngũgũtua ũtheri wa kũmũrĩkĩra ndũũrĩrĩ

nĩ geetha ũhonokania wakwa ũkinye ituri cia thĩ.”

7 MWATHANI Ũrĩa Mũtheru wa Isiraeli,

o we mũkũũri wa Aisiraeli,

areera, ũrĩa ũnyararĩĩtwo nĩ andũ,

akamenwo nĩ ndũũrĩrĩ

na agatuuo ngombo nĩ aathani, atĩrĩ,

“Athamaki marĩkuonaga makarũũgama makũhe gĩtĩĩo.

Anene nao magakũinamĩrĩra, magakwĩnyiihĩria.”

Tondũ MWATHANI nĩahingagia irĩĩko ciake

na Ngai Ũrĩa Mũtheru wa Isiraeli

nĩ we ũgũthuurĩĩte.

Andũ a Jerusalemu gũcookanĩrĩrio

8 MWATHANI aroiga atĩrĩ,

“Hĩndĩ ya gũtugana, nĩngaamũthikĩrĩria.

Hĩndĩ ya kũhonokania yakinya, nĩngaamũteithia.

Nĩngaamũgitĩra na ndĩmũmenyerere

na ndĩmũhũthĩre gũthondeka kĩrĩĩkanĩro na andũ oothe.

Nĩngaamwĩtĩkĩria gũcooka gũikara

bũrũri wanyu ũrĩa rĩu ũrĩ maganjo.

9 Arĩa marĩ njeera, nĩngaamarekereria

nao arĩa mahingĩrĩirwo kandurumu ĩrĩ nduma,

ndũme mahingũrĩrwo mooke ũtheriinĩ

nao makaahaana o ta rũũru rũrarĩithio mĩkĩrainĩ ya njĩra

na rũrarĩa kũndũ kũrĩa gũtũũgĩru.

10 Matikaahũũta o na kana manyoote,

matigaathĩĩnio nĩ ũrugarĩ wa riũa,

o na kana nĩ rũhuuho.

Mũndũ ũmeendeete nĩ we ũkaamatongoria

akaamatongoria ameerekeirie ithimainĩ cia maaĩ.

11 “Nĩngaathondeka njĩra yakwa itwĩkanĩirie irĩmainĩ ciothe,

ngaathondeka njĩra ya kũgererwo nĩ andũ aakwa.

12 Amwe makoima mabũrũri ma kũraaya,

angĩ moime mwena wa na rũgongo na wa ithũĩro

na angĩ moime Aswani, mwena wa na kĩanda.”

13 Wee igũrũ ina ũkeneete!

Nawe thĩ ugĩrĩria nĩgũkena!

Irĩma nacio nĩ itumũke ciine!

MWATHANI nĩomĩrĩirie andũ aake;

andũ aake arĩa maranyarirĩka nĩamaiguĩrĩire tha.

14 No andũ a Jerusalemu maroiga atĩrĩ,

“MWATHANI nĩatũtiganĩirie!

Nĩariganĩirwo nĩ ithuĩ.”

15 Naake MWATHANI agacookia atĩrĩ,

“Mũtumia no ariganĩrwo nĩ mwana oongithĩĩtie?

No aage kwenda mwana aciarĩĩte?”

O na angĩriganĩrwo nĩ we,

niĩ ndirĩ hingo ingĩriganĩrwo nĩ inyuĩ.

16 Jerusalemu, ndingĩriganĩrwo nĩ we rĩ kana rĩ,

nyaandĩkĩĩte rĩĩtwa rĩaku hĩinĩ ciakwa.

17 “Andũ a gũgwaka rĩngĩ megũũka o narua,

na arĩa maakwanangire nĩmegũthaama.

18 Taikia maitho maaku mĩena na mĩena

wone ũrĩa kũrathiĩ na mbere!

Andũ aaku nĩkũũngana marongana,

nĩgũũka marooka mũciĩ!

O ta ũrĩa niĩ Ngai ndũũraga muoyo,

nĩũgũkenio nĩ andũ aaku,

o ta ũrĩa mũhiki akenagio nĩ mathaga maake.

19 “Atĩrĩĩrĩ, kũndũ gwaku kũrĩa gũthũũkangĩĩtio

na kũrĩa gũkirĩĩte ihooru,

o na kũrĩa kwanangĩĩtwo,

andũ aaku magũtumngana kuo kũnyiihe,

na maingate arĩa oothe marakwanangaga.

20 Andũ aaku arĩa maaciarĩirwo ĩthaamĩrioinĩ,

makoiga atĩrĩ ũkĩiguaga,

‘Bũrũri ũyũ nĩ mũnyiinyi mũno,

nĩtũbatairio nĩ bũrũri mwaraariĩ nĩguo tuone gwa gũtũũra.’

21 We nawe nĩũgecũũrania wĩyũrie atĩrĩ,

‘Nũũ ũnjiarĩire ciana ici ciothe?

Nĩndatuunyirwo ciana ciakwa,

na ndingĩrahotire kũgĩa na ingĩ.

Ndĩraarĩ mũthaamie na ngaingatwo.

Nũũ ũkĩrereete ciana ici?

Ndĩratigĩĩtwo ndĩ o nyiiki,

ciana ici nacio iroimire na kũ?’ ”

22 MWATHANI Ngai areera andũ aake atĩrĩ,

“Nĩngũheneria ndũũrĩrĩ na guoko,

na ndĩcihe kĩmenyithia.

Nacio ikĩreehe aanake aaku imakuuĩĩte gĩthũriinĩ

na airĩĩtu aaku imakuuĩĩte na ng’oong’o.

23 Athamaki nĩ o magaakorwo mahaana maithe maanyu

nao kwini matuĩke ta maanyina maanyu.

Nao magooka mainamĩrĩire mbere yaku,

makũhe gĩtĩĩo.

Magaakũhe gĩtĩĩo menyiihĩĩtie.

Nawe nĩũkaamenya atĩ niĩ nĩ niĩ MWATHANI,

na atĩ gũtirĩ wetagĩrĩra ũteithio wakwa ũconorithagio.”

24 Atĩrĩĩrĩ, mũndũ njamba no atuunyĩke indo iria atahĩĩte?

Mũthamaki ũtarĩ tha no arekererie mabuthu maake?

25 MWATHANI aroiga atĩrĩ,

Ũguo nĩguo gũgũtuĩka.

Mũndũ njamba nĩegũtuunywo mabuthu maake

na mũthamaki ũtarĩ tha atuunywo indo iria atahĩĩte.

Niĩ mwene nĩ niĩ ngũhũũrana na arĩa mararũa nawe,

na no niĩ ngũhonokia ciana ciaku.

26 Arĩa makũhinyagĩrĩria ngaatũma marĩe nyama cia mĩĩrĩ yao,

na marĩĩo nĩ thakame yao eene

o ta ũrĩa mũndũ arĩagwo nĩ ndibei.

Hĩndĩ ĩyo andũ oothe nĩmakaamenya

atĩ niĩ nĩ niĩ MWATHANI ũrĩa ũkũhonokagia,

na atĩ niĩ Ngai wa Jakubu, o niĩ Mwene Ũhoti, nĩ niĩ Mũgũkũũri.