Category: Isaia

Mũnabii Isaia gũtuĩka kĩmenyithia na ũndũ wa gũthiĩ e njaga

1 Na rĩĩrĩ, Sarigoni, mũthamaki wa Asiria, nĩathire mũnene wa mbũtũ ciake cia ita athiĩ agatharĩkĩre itũũra rĩa Afilisiti rĩa Ashidodu arĩnyiite.

2 Mĩaka ĩtatũ mbere ĩyo, MWATHANI nĩerĩĩte Isaia mũrũ wa Amozu arute iraatũ na nguo ya ikũnia iria eehumbĩĩte. Isaia nĩathĩkire, agĩikara arĩ njaga na atarĩ na iraatũ.

3 Rĩrĩa itũũra rĩa Ashidodu rĩanyiitirwo, MWATHANI akiuga atĩrĩ, “Ndungata yakwa Isaia ĩtũire ĩthiaga njaga na ĩtarĩ iraatũ mĩaka ĩtatũ. Ũndũ ũcio ũgũtuĩka kĩmenyithia kĩa ũrĩa gũkaahaana bũrũriinĩ wa Misiri na wa Ethiopia.

4 Mũthamaki wa Aasiria nĩagaathiĩ na andũ arĩa agataha mabũrũriinĩ macio meerĩ marĩ njaga. Athuuri na aanake magaathio nao matina maao makĩonekaga, marĩ njaga, na matarĩ na iraatũ, naguo ũndũ ũcio ũgĩtuĩke gĩconoko harĩ andũ a Misiri.

5 Hĩndĩ ĩyo andũ arĩa mehokeete andũ a Ethiopia na metĩĩaga na andũ a Misiri nĩmarĩkua ngoro na maturuure.

6 Andũ arĩa matũũraga ndeereinĩ cia iria cia bũrũri wa Filisitia mariuga atĩrĩ, ‘Oneei ũrĩa andũ arĩa tũrehokeete matũgitĩre harĩ mũthamaki wa Aasiria meekĩĩtwo! Ithuĩ na ithuĩ tũngĩkĩhonoka atĩa?’ ”

Kĩoneki gĩa kũng’aũranio kwa Babiloni

1 Ĩno nĩ yo ndũmĩrĩri nditũ ĩkoniĩ Babilonia.

O ta ũrĩa kĩhuuhũkanio kĩa ngoma cia aka

kĩhuuhũkanagia gĩtuĩkanĩirie werũinĩ,

noguo mũthiro ũgooka uumĩĩte bũrũriinĩ wa kũmakania.

2 Nĩnyoneete kĩoneki kĩrũrũ ma;

kĩoneki kĩa andũ magĩkunyananĩra na makĩniinana.

Mbũtũ cia Elamu tharĩkĩraai!

Mbũtũ cia Amede thiũrũrũkĩraai matũũra!

Ngai nĩekũniina mathĩĩna marĩa mareehithĩĩtio nĩ Babiloni.

3 Maũndũ marĩa nyoneete na ngaigua kĩonekiinĩ kĩu

nĩmanduĩte nda na makanjiguithia ruwo,

o ta rwa mũtumia akinyĩrĩirwo kũheeo kaana.

4 Meciiria maakwa nĩmaturuurĩĩte

na nĩndĩrainaina ndĩ na guoya.

Ndĩratheethũkagĩra hwaĩinĩ ũkinye,

no ũndeeheire o kĩmako.

5 Kĩonekiinĩ kĩu-rĩ, meetha nĩikũhaarĩirio,

na mĩgeka ĩkaarĩrwo ageni;

ageni nĩkũrĩa mekũrĩaga makĩnyuaga.

Ihinda o rĩu mũtongoria wa thigari oiga atĩrĩ,

“Thigari! Haarĩriai ngo cianyu!”

6 Hĩndĩ ĩyo Mwathani anjĩĩra atĩrĩ,

“Tathiĩ ũige mũrangĩri,

na ũmwĩre amenyithanie kĩrĩa ekuona.

7 Oona andũ magĩũka mahaicĩĩte mbarathi eerĩ eerĩ,

na oona angĩ mahaicĩĩte ndigiri na ngamĩĩra,

nĩamabaare wega mũno.”

8 Mũrangĩri aanĩrĩra na kayũ kanene atĩrĩ,

“Mũthuuri ũyũ, ngoreetwo ngĩrangĩra ũtukũ na mũthenya

ndĩ o gũũkũ mũnaara igũrũ.

9 “Rĩu nĩ o aarĩa marooka!

Marooka eerĩ eerĩ mahaicĩĩte mbarathi.”

Mũrangĩri akiuga atĩrĩ,

“Babiloni nĩng’aũranie! Babiloni nĩng’aũranie!

Mĩhianano yothe ya ngai ciakuo yunangĩĩtwo ĩkarekanio thĩ.”

10 Andũ aakwa a Isiraeli, mũrahũũrĩĩtwo o ta ngano,

no rĩu nĩndamũhe ndeto njega

iria njiguĩte harĩ MWATHANI Mwene Hinya Wothe, o we Ngai wa Isiraeli.

Ndũmĩrĩri ĩkoniĩ Edomu

11 Ĩno nĩ yo ndũmĩrĩri nditũ ĩkoniĩ Edomu.

Atĩrĩĩrĩ, kũrĩ mũndũ ũranjĩta arĩ Edomu, akanjũũria atĩrĩ,

“Mũrangĩri ũyũ, ũtukũ ũrĩthira rĩ?

Kaĩ ũgũikara atĩa ũgĩgaathira?”

12 Na niĩ ngacookia atĩrĩ,

“Nĩgũgũkĩa, no ũtukũ nĩũgũcooka o rĩngĩ.

Angĩkorwo nĩũkwenda kũũria rĩngĩ-rĩ, ũka o rĩngĩ ũũrie.”

Ndũmĩrĩri ĩkoniĩ Arabia

13 Ĩno nĩ yo ndũmĩrĩri nditũ ĩkoniĩ Arabia.

Inyuĩ mĩtongoro ya andũ a Dedani,

o inyuĩ mũraaragĩrĩra ihingainĩ cia werũ mũthaatu wa Arabia,

14 andũ arĩa mekũmũkora marĩ anyootu maheei maaĩ.

Inyuĩ andũ a bũrũri wa Tema,

heei andũ arĩa maroora irio.

15 Andũ acio maroorĩra hiũ cia njora icomoreetwo imoorage,

moota mageeteetwo mamarathe,

o na makoorĩra moogwati moothe ma mbaara.

16 MWATHANI agĩcooka akĩnjĩĩra atĩrĩ, “Mwaka ũmwe ũgĩthira ũguo-rĩ, ũnene wa mĩhĩrĩga ya Kedari ũgaakorwo ũthirĩĩte.

17 Andũ arĩa marathaga na mĩguĩ, nĩ o thigari njoorua mũno gatagatĩinĩ ka andũ a Kedari, no nĩ aniini mũno magaakorwo matigarĩĩte. Ũguo nĩguo niĩ, MWATHANI Ngai wa Isiraeli, ndoiga.”

Ndũmĩrĩri nditũ ĩkoniĩ Jerusalemu

1 Ĩno nĩ ndũmĩrĩri nditũ ikoniĩ gĩtuamba gĩa Kĩoneki.

Nĩ kĩĩ kĩrathiĩ na mbere,

tondũ inyuothe mũhaicĩĩte nyũmba igũrũ?

2 Mũiyũrĩĩtie itũũra rĩothe inegene, mwagaago, na ndũũhiũ.

Andũ aanyu arĩa makuĩte matiũragĩĩtwo na hiũ cia njora,

o na kana makooragĩrwo mbaarainĩ.

3 Atongoria aanyu moorire oothe hamwe,

manyiitirwo mataikĩĩtie mũguĩ o na ũmwe.

Arĩa matigarire manyiitirwo hamwe oothe,

o na gũkorwo nĩmekũũrĩĩte magathiĩ kũraaya.

4 Nĩkĩo ndĩramwĩra atĩrĩ, “Tiganaai na niĩ.

Ndĩ na ruwo rũingĩ, nĩndekwo ndĩre.

Tigaai kũgeria kũũhoreria,

nĩkũrĩrĩra ndĩrarĩrĩra andũ aakwa arĩa makuĩte.”

5 Rĩu nĩ ihinda rĩa mwagaago, rĩa gĩthombocano

na rĩa inegene kũu gĩtuambainĩ gĩa Kĩoneki.

Thingo cia itũũra riitũ nĩmomore,

na mbugĩrĩrio ĩkinyĩĩte o irĩmainĩ.

MWATHANI Ngai Mwene Hinya Wothe

nĩ we ũtũtũmĩire ũhoro ũyũ.

6 Thigari cia bũrũri wa Elamu ciũkĩĩte

ihaicĩĩte mbarathi irĩ na mĩguĩ na moota,

nacio cia bũrũri wa Kiri nĩihaarĩirie ngo ciacio.

7 Cianda iria noru cia Juda ciyũire ngaari cia mbarathi,

thigari ihaicĩĩte mbarathi nĩcio irangĩrĩĩte o kĩhingoinĩ kĩa Jerusalemu

8 Ũgitĩri wothe wa bũrũri wa Juda nĩũharaganĩĩte.

Hĩndĩ ĩyo mũkĩruta indo cia mbaara iria ciarĩ “Thitoo ya matharaita.”

9-10 Nĩmuonire mĩanya ĩrĩa yarĩ thingoinĩ cia Jerusalemu ĩrĩa yabataire gũthingwo. Ningĩ nĩmwabaarire nyũmba ciothe thĩinĩ wa Jerusalemu na mũkĩmomora imwe nĩguo muone mahiga ma gũthinga kũrĩa thingo cia itũũra ciarĩ na mĩanya. Nĩguo mũgĩe na gwa kũiga maaĩ,

11 nĩmwakire itangi itũũra thĩinĩ rĩa kũiga maaĩ ma karia karĩa ga tene. No nĩmwagire kũmenya Ngai ũrĩa wabangire ũndũ ũcio kuuma o tene, o we watũmire ũhinge.

12 MWATHANI Ngai Mwene Hinya Wothe aamwĩtaga mũrĩre na mũcakae,

mwenjwo mĩtwe, na mwĩhumbe nguo cia makũnia.

13 No-rĩ, inyuĩ nĩkũrũũhia mwarũũhirie mũgĩĩkenagia,

mũgĩthĩnja ndũrũme na ndeegwa mũrĩe,

o na mũkĩnyua ndibei.

Mwoigaga atĩrĩ, “Rekeei tũrĩe na tũnyue,

amu twetereire o gũkua!”

14 MWATHANI Mwene Hinya Wothe aanjĩĩrire atĩrĩ,

“Matikooherwo wĩhia ũcio wao kinya magaakua.

Ũguo nĩguo niĩ MWATHANI Ngai Mwene Hinya Wothe ndoiga.”

Shebina gũkaanio

15 Ningĩ MWATHANI Ngai Mwene Hinya Wothe akĩnjĩĩra atĩrĩ, “Thiĩ kũrĩ Shebina, mũramati wa nyũmba ya mũthamaki

16 ũmũũrie atĩrĩ, ‘Ũreciiria wee wĩ ũ? Ũrĩ na kĩhooto kĩrĩkũ ũkĩĩyenjera mbĩĩrĩra mahiga igũrũ?

17 Mũndũ ũyũ, o na ũngĩkorwo ũtũũgĩrĩĩtio atĩa, MWATHANI arĩgũkumbaca agũikie kũnene.

18 Arĩkuoya o ta mũbiira, agũikie bũrũri mwariĩ. Kũu nĩkuo ũgaakuĩra, na ngaari ciaku cia mbarathi cia ũnene itigwo kuo, nĩ gũkorwo nĩũconorithĩĩtie nyũmba ya mwathi waku.

19 MWATHANI nĩarĩkũruta gĩtĩinĩ kĩu gĩaku, akũharũrũkie kuuma ũneneinĩ.’ ”

20 “ Ihinda rĩu rĩakinya, arĩĩta ndungata yake Eliakimu mũrũ wa Hilikia,

21 amũhumbe nguo icio ciaku cia ũnene, amuohe mũcibi waku, na amũtue mũnene handũ haaku. Arĩmũtua ithe wa atũũri oothe a Jerusalemu o na a bũrũri wothe wa Juda.

22 Acooke amũnengere macabi ma nyũmba ya Daudi. Arĩhingũraga, na gũtirĩ ũrĩhingaga; ahinga gũtirĩ ũrĩhingũraga.

23 MWATHANI arĩmũhanda arũme o ta mũcumaarĩ mũhũũrĩre, amũtue wa gwĩtĩĩagwo naake nĩ nyũmba yothe ya ithe.

24 “Andũ oothe a nyũmba ya ithe, ciana na ciana cia ciana ciao, marĩmũcuuhagĩrĩra o ta thaburia na mbakũri icuurĩĩtio mũcumaarĩinĩ.

25 No MWATHANI Mwene Hinya Wothe ekuuga atĩ mũcumaarĩ ũrĩa wahũũrĩirwo ũkarũma, ũkaamunyanio, uunangwo, ũikio thĩ; indo iria igaakorwo icuurĩĩtio mũcumaarĩinĩ ũcio no kũharagana ikaaharagana.” Nĩ MWATHANI woiga ũguo.

Ndũmĩrĩri nditũ ĩkoniĩ Foenicia

1 Ĩno nĩ ndũmĩrĩri nditũ ĩkoniĩ Turo.

Inyuĩ meeri cia Sipania rĩraai mũrĩ na kĩeha!

Turo nĩkũmomore!

Gũtirĩ nyũmba kana icukĩro cia meeri itigĩĩtwo irũngiĩ.

Meeri cianyu igĩcooka kuuma Kuporo, menyaai ũguo.

2 Rĩraai muugĩrĩirie, inyuĩ ahũũri mbiacara a Sidoni!

Nĩmũtũmĩĩte andũ

3 mũrĩmo ũũrĩa ũngĩ wa iria makagũre

na makeendie irio iria ciumaga Misiri,

o na makahũũre mbiacara na ndũũrĩrĩ ciothe.

4 Sidoni, conoka!

Iria na kũrĩa kũriku ciarĩĩtie ikoiga atĩrĩ,

“Kaĩ niĩ ndirĩ ndarũmwo nĩ ruwo rwa gũciara kana ngĩciara-ĩ!

Ndirĩ ndarera aanake kana airĩĩtu!”

5 Ũhoro ũcio wamenyeka Misiri,

andũ aakuo makaamaka na makue ngoro,

maigua atĩ Turo nĩkũmomoranie.

6 “Inyuĩ atũũri a Foenicia,

rĩraai mũrĩ na kĩeha!

Ũrĩraai bũrũriinĩ wa Sipania.

7 Kũu no Turo kũrĩa gwakirwo tene,

na kũraiyũire ikeno?

Ĩ rĩu no itũũra rĩrĩa rĩratũmaga andũ

kũndũ kũraaya magatũũre kuo?

8 Nũũ watuĩrĩire Turo ũguo?

Turo nĩkuo andũ maraheagĩrwo thũmbĩ;

ahũũri mbiacara aakuo maraarĩ nding’ũri,

na maraheetwo gĩtĩĩo thĩ yothe.

9 Nĩ MWATHANI Mwene Hinya Wothe wagũtuĩrĩire ũguo.

Eekire ũguo nĩguo aniine mwĩtĩĩo wothe warĩo,

na aconorithie andũ aakuo,

o acio maheetwo gĩtĩĩo thĩ yothe.

10 “Inyuĩ atũũri a Sipania, rĩmaai mĩgũnda yanyu,

nĩ amu rĩu mũtirĩ na icukĩro cia meeri cianyu iria nene.

11 MWATHANI nĩatambũrũkĩĩtie guoko gwake igũrũ rĩa iria

na akaharagania moothamaki.

Nĩarutĩĩte watho matũũra ma Foenicia

marĩa mairigĩre wega na thingo cia hinya mamomorwo.

12 Eerĩĩte andũ a Sidoni, arĩa ahinyĩrĩrie

atĩ, gĩkeno kĩao nĩgĩkinyu mũthia.

O na mangĩringa iria moorĩre Kuporo,

matingĩona ũhuurũko.”

13 (Andũ a Babiloni nĩ o maatũmire itũũra rĩa Turo rĩtuĩke rĩa nyamũ cia gĩthaka, no ti Aasiria. No o maarĩakĩrĩire mĩnaara ya kũrĩtharĩkĩra, makĩmomora thingo cia hinya iria ciarĩgitĩire, na makĩrĩtiga rĩrĩ maganjo.)

14 Inyuĩ meeri cia Sipania, rĩraai mũrĩ na kĩeha!

Itũũra rĩrĩa mũrairigĩire na thingo cia hinya nĩrĩmomore.

15 Ihinda nĩrĩrooka na itũũra rĩa Turo nĩrĩkaariganĩra mĩaka mĩrongo mũgwanja, mĩaka ta ya ũtũũro wothe wa mũthamaki ũmwe. Mĩaka mĩrongo mũgwanja yathira-rĩ, itũũra rĩa Turo rĩkainĩrwo ta mũmaraaya ũrĩa ũinagĩrwo atĩrĩ,

16 “Mũmaraaya ũyũ, o wee wariganĩire,

thiũrũrũka itũũra rĩothe ũkĩhũũraga ngita;

ina nyĩmbo nyingĩ njega mũno

nĩguo arũme magũcookerere.”

17 Mĩaka ĩyo mĩrongo mũgwanja yathira, MWATHANI nĩakaaririkana itũũra rĩa Turo rĩngĩ, narĩo rĩcookerere mbiacara ciarĩo, na rĩhũũre ũmaraaya na moothamaki moothe ma thĩ.

18 Mbeeca na indo iria rĩkoonaga rĩahũũra mbiacara, ikaamũragĩrwo MWATHANI na itikaigagwo mũthiithũ. Andũ arĩa mathaathaiyagia MWATHANI magaacihũthĩra kũgũra irio na nguo iria mabatairio nĩcio.

MWATHANI kũherithia thĩ

1 Atĩrĩĩrĩ, MWATHANI nĩekũhũũra thĩ amĩtige ĩrĩ theri o ũguo.

Ekũmĩinamania na amĩhang’uranie,

acooke ahurunje atũũri aakuo.

2 Oothe mageekwo ũndũ ũmwe:

athĩnjĩri Ngai na andũ arĩa angĩ,

ngombo na mũmĩathi,

mwandĩkwo na mwandĩkani,

mwendia na mũgũri,

mũkombi na mũkombithania,

gĩtonga na mũthĩĩni.

3 Thĩ ĩkũhũũrwo ĩhũũrĩke na yanangĩke kũna,

nĩ gũkorwo nĩ MWATHANI uugĩĩte ũndũ ũcio.

4 Thĩ gũkwara indo ciothe ciũme;

thĩ yothe yage hinya,

o na igũrũ na thĩ ciage hinya.

5 Andũ nĩmathaahĩĩtie thĩ,

makaagarara watho wa Ngai,

na makarangĩrĩria kĩrĩĩkanĩro kĩrĩa gĩa tene na tene.

6 Nĩ ũndũ ũcio thĩ nĩĩrarĩĩo nĩ kĩrumi,

andũ nao nĩkũherithio maraherithĩrio meehia maao.

Nĩkĩo atũũri thĩ marathiĩ magĩthiraga,

na no aniini matigarĩĩte.

7 Mĩthabibũ nĩkũhooha ĩrahooha,

ndibei nayo nĩgũthira ĩrathira.

Arĩa oothe maraikaraga makeneete,

gĩkeno kĩao nĩgĩthirĩĩte.

8 Gĩkeno kĩrĩa kiumanaga na kũhũũra ndarama na ngita,

nakĩo nĩgĩthirĩĩte.

9 Gũtirĩ mũndũ ũraina akĩnyua ndibei,

na ndibei ĩrĩa hĩu ĩracama ta arĩ kũgagata ĩgagatĩĩte.

10 Maũndũ moothe thĩinĩ wa itũũra nĩ mathombocanu;

andũ marehingĩra nyũmba megitĩre.

11 Njĩrainĩ ciarĩo no kĩrĩro nĩ wagi wa ndibei.

Gĩkeno gĩothe nĩgĩthiru,

bũrũri ndũrĩ na gĩkeno.

12 Itũũra rĩtigĩĩtwo rĩrĩ maganjo,

na ihingo igatharũrio.

13 Nĩ gũkorwo gũũkũ thĩ o na gatagatĩ ka ndũũrĩrĩ

gũkũhaana o ta rĩrĩa magetha mathira,

rĩrĩa mĩtamaiyũ yagethwo ndamaiyũ cia mũico,

na mĩthabibũ yatuuo thabibũ cia mũico.

14 Arĩa magaatigara nĩmakaina makĩrũũhagia.

Arĩa matũũraga mwena wa ithũĩro mageekĩrĩra riiri wa MWATHANI,

15 arĩa matũũraga mwena wa irathĩro nao magooce MWATHANI,

arĩa matũũraga ndeereinĩ cia iria

nao magaathe rĩĩtwa rĩa MWATHANI Ngai wa Isiraeli.

16 Kuuma ituri cia thĩ

na ithuĩ tũigue nyĩmbo cia kũgaathĩrĩria Ũrĩa Mũthingu.

No niĩ ndĩroiga atĩrĩ,

“Kaĩ ndĩ thĩĩnainĩ-ĩ! Kaĩ ndĩ thĩĩnainĩ-ĩ!

Kaĩ ndĩ na thĩĩna-ĩ!

Atĩrĩĩrĩ, andũ arĩa aungumania,

nĩmeekĩĩte maũndũ ma ungumania,

ĩĩ, arĩa aungumania nĩmeekĩĩte maũndũ manene ma ungumania.”

17 Inyuĩ atũũri a gũũkũ thĩ

mũikaraga mwetereirwo no guoya, marima, na mĩtego.

18 Mũndũ o wothe oorĩra maũndũ marĩa mamũigaga na guoya

arĩgũaga irima;

oima irima arĩnyiitagwo nĩ mũtego.

Amu ndirica cia igũrũ nĩhingũre,

mbura ya mũiyũro nĩroira kuuma igũrũ,

na itina cia thĩ nĩirathingitha.

19 Thĩ no kwanangĩka ĩranangĩka,

no kũharagana ĩraharagana,

no gũthingithio irathingithio.

20 Thĩ ĩrathingithio o ta mũrĩĩu,

iracũũgĩo o ta gĩthũnũ kĩrĩ kĩhuuhũkanioinĩ.

Ningĩ ĩritũhĩirwo nĩ meehia maayo

ũguo atĩ ndĩĩhanda rĩngĩ.

21 Ihinda rĩu rĩakinya, MWATHANI nĩakaaherithania;

maahinya ma igũrũ, amaherithĩrie o kũu igũrũ,

athamaki a gũũkũ thĩ, amaherithĩrie o gũũkũ thĩ.

22 Magacookanĩrĩrio hamwe ta mĩgwate,

macooke mahingĩrwo njeera,

na magaatuĩrwo thuutha wa matukũ maingĩ gũthira.

23 Mweri nĩũgaatundumara,

narĩo riũa rĩtigaacooka kwara.

MWATHANI Mwene Hinya Wothe

nĩ we ũgaathanaga kĩrĩmainĩ kĩa Zayuni o kũu Jerusalemu.

Ningĩ atongoria nĩmakoona riiri wake.

Rwĩmbo rwa kũgooca

1 MWATHANI, wee nĩ we Ngai wakwa,

niĩ nĩndĩrĩgũtũũgagĩria,

na nĩndĩrĩkumagia rĩĩtwa rĩaku.

Nĩ gũkorwo nĩwĩkĩĩte maũndũ ma magegania;

mĩbango ĩrĩa wabangire o tene,

nĩũmĩhingĩĩtie ũtekũgarũrĩra o na haniini.

2 Nĩũtuĩte itũũra hĩba ya mahiga,

na ũkamomorania thingo iria irĩgitĩire.

Nyũmba ya ũnene ĩrĩa thũ ciitũ ciakĩĩte

nĩthengu o gũthenga, na ndĩgaakwo rĩ o rĩ.

3 Kwoguo andũ a ndũũrĩrĩ iria irĩ hinya nĩmarĩgũkumagia,

na wĩtigagĩrwo nĩ matũũra ma ndũũrĩrĩ iria nema kũhĩa.

4 Athĩĩni mooragĩra harĩ we,

arĩa abataru nao makoorĩra harĩ we hingo ya thĩĩna.

Megiritagia harĩ we hĩndĩ ya kĩhuuhũkanio,

na makeyũaga riũa hingo ya ũrugarĩ.

Nĩ gũkorwo andũ arĩa nema kũhĩa mahithũkanagĩra

o ta ndiihũ cia hĩndĩ ya mũiyũro wa maaĩ,

5 o na kana ta riũa werũinĩ.

No rĩĩrĩ, wee, MWATHANI, thũ ciitũ,

na ũgakiria inegene rĩa andũ arĩa nema kũhĩa,

o ta ũrĩa itu rĩhooragĩria ũrugarĩ mũthenya.

Ngai kũhaarĩria kĩrugo

6 Kĩrĩmainĩ gĩĩkĩ gĩa Zayuni nĩkuo MWATHANI Mwene Hinya Wothe akaahaarĩrĩria ndũũrĩrĩ ciothe kĩrugo kĩa irio njega mũno, nyama noru, na ndibei ĩrĩa njega.

7 Nokuo MWATHANI agaathengeria ndũũrĩrĩ ciothe nguo ya kĩeha ĩrĩa ihumbĩrĩĩte nayo,

8 na nokuo akaaniinĩra gĩkuũ agĩtoorie tene na tene. MWATHANI Ngai nĩakaagiria moothiũ moothe maithori na athengerie andũ aake gĩconoko kĩrĩa maaconoreetwo nakĩo thĩ yothe. Nĩ MWATHANI woiga ũguo.

9 Maũndũ macio maahinga, mũndũ o mũndũ akoigaga atĩrĩ, “Ũyũ nĩ we Ngai witũ, tũigĩĩte mwĩhoko witũ harĩ we atũhonokie. Ũyũ nĩ we MWATHANI, nĩtũigĩĩte mwĩhoko witũ thĩinĩ wake, rekeei tũkene na tũcanjamũke tondũ nĩatũhonokeetie.”

Ngai kũherithia Moabi

10 MWATHANI nĩakaagitĩra kĩrĩma gĩĩkĩ gĩa Zayuni, no nĩakaarangĩrĩria Amoabi thĩ, o ta ũrĩa rũũa rũrangagĩrĩrio kĩarainĩ.

11 Nao magaatambarũkia mooko maao o ta andũ magĩthambĩra, no MWATHANI nĩakaamagithia gĩtĩĩo na amaconorithie hamwe na mawĩra maao.

12 Akaamomorania mĩnaara ya kwĩgitĩra ya Amoabi; amĩrũnde thĩ ĩtuĩke mũthegethege.

Ngai kũhe andũ aake ũhootani

1 Mũthenya ũcio wakinya-rĩ

rwĩmbo rũũrũ nĩrũkainwo bũrũriinĩ wa Juda.

Itũũra riitũ nĩrĩirigĩre wega,

Ngai atuĩte atĩ kũhonokania gwake

nĩkuo thingo ciitũ cia na nja na cia na thĩinĩ.

2 Hingũraai ihingo;

mũreke rũũrĩrĩ rũrĩa rũthingu rũtoonye,

o rũu rwĩkaga maũndũ marĩa marũngĩrĩirie.

3 Mũndũ wothe ũikaraga akwĩhokeete, MWATHANI,

nĩũmũigaga na thaayũ

tondũ atũũraga akwĩrĩgĩrĩire.

4 Ikaragaai mwĩhokeete MWATHANI tene na tene,

tondũ we nĩ rwaro rwa ihiga rwa tene na tene.

5 Nĩahang’ũranĩĩtie arĩa maikaraga metũũgĩrĩĩtie,

akamomora itũũra rĩrĩa rĩirigĩre maikaraga,

thingo ciarĩo agacirekania o rũkũngũinĩ.

6 Athĩĩni na andũ matarĩ kĩene

marathiĩ marĩrangĩĩte na makinya maao.

7 Njĩra ya andũ arĩa athingu ndĩkoragwo na mĩhĩnga;

wee, MWATHANI, aragania njĩra yao.

8 Tũthiaga tũkĩhingagia wendi waku, wee MWATHANI,

na tũigĩĩte mwĩhoko witũ o thĩinĩ waku;

amu wee no we twĩriragĩria.

9 Ũtukũ nĩ we ndĩriragĩria na ngoro yakwa yothe;

nayo thamiriyakwa ĩgakorwo ĩgĩgũtheethũkĩra.

Nĩ gũkorwo matua maaku moonekaga gũũkũ thĩ,

andũ arĩa matũũraga gũũkũ thĩ nĩmataũkagĩrwo nĩ ũthingu.

10 Mũndũ mwaganu o na angĩiguĩrwo tha,

nderutaga njĩra ya ũthingu.

Athiaga o na mbere kũgera ngero bũrũriinĩ wa andũ arĩa akinyanĩru,

na ndarĩ hingo oonaga riiri wa MWATHANI.

11 MWATHANI, nĩwambararĩĩtie guoko gwaku,

no thũ ciaku itirakuona.

Reke ikuone, na iconoke nĩ ũrĩa ũramataga andũ aaku na kĩyo;

gĩciniine na mwaki wa mang’ũrĩ maaku.

12 MWATHANI, nĩũgaatũhe thaayũ,

amu mawĩra maitũ moothe nĩ we ũtũrutĩire.

13 MWATHANI Ngai witũ, nĩtwathĩĩtwo nĩ aathani angĩ;

no ithuĩ no rĩĩtwa rĩaku riiki tũrĩheaga gĩtĩĩo.

14 Aathani acio nĩmakuĩte, matingĩcooka gũtũũra rĩngĩ,

ningĩ matingĩriũka o na atĩa,

tondũ ũmahũũrĩĩte ũkamaniina,

na ũgatũma mariganĩre o kũriganĩra.

15 Wee MWATHANI, nĩũkũrĩĩtie rũũrĩrĩ,

ũrũkũrĩĩtie ũkeegĩĩra na igweta;

na nĩwaramĩĩtie bũrũri na mĩena yothe.

16 MWATHANI wahũũrire andũ aaku,

nao magĩgũkaĩra hĩndĩ ya mathĩĩna maao.

17 O ta ũrĩa mũtumia ũrĩ na nda akinyĩrĩirwo nĩ ihinda rĩake rĩa kũheeo kaana,

eyunangaga na akarĩra nĩ ruwo,

noguo wee MWATHANI watũmire tũrĩre.

18 Nĩ ta twagĩire nda,

na nĩtũkinyĩrĩirwo nĩ ihinda riitũ rĩa gũciara.

Twĩyunangĩĩte na tũkarĩra no tũciarĩĩte o rũhuuho.

Tũtirĩ ũhootani tũreehete gũũkũ thĩ

o na kana tũkoongerera andũ a gũtũũra gũũkũ thĩ.

19 Andũ aaku arĩa makuĩte nĩmagaatũũra muoyo

na mĩĩrĩ yao nĩkaariũka.

Inyuĩ mũkomeete rũkũngũinĩ, ũkĩraai mũine mũkĩrũũharũũhagia.

O ta ũrĩa ime rĩnyootoraga thĩ,

noguo MWATHANI akaarahũra arĩa maakuire tene.

Gũtuĩrwo na gũcookanĩrĩrio

20 Inyuĩ andũ aakwa, toonyaai nyũmba cianyu mwĩhingĩre kuo.

Wĩhitheei kwa ihinda iniini

nginya maraakara ma Ngai mathire.

21 MWATHANI aroima gĩikaroinĩ gĩake,

ooke aherithie andũ a gũũkũ thĩ nĩ ũndũ wa meehia maao.

Thĩ nayo nĩĩkuonania thakame ĩrĩa yanaitwo kuo,

na ndĩgũcooka kũhitha andũ arĩa maanooragĩrwo kuo.

1 Mũthenya ũcio MWATHANI akaahũthĩra rũhiũ rwake rwa njora,

rũrĩa rũũgĩ na rwa hinya,

aherithie Leviathani, ndamaathia ĩrĩa ya iriainĩ,

rĩĩrĩ ĩrethara na ĩrenyogonda;

akaamĩũragĩra o iriainĩ thĩinĩ.

2 Mũthenya ũcio MWATHANI,

nĩakainĩra rwĩmbo mũgũnda wake wa mĩthabibũ ũrĩa mũthaka rwĩmbo rũũrũ:

3 “Niĩ MWATHANI, nĩ niĩ mbaaragĩrĩra mũgũnda wakwa wa mĩthabibũ,

na ndĩũitagĩrĩria maaĩ hĩndĩ ciothe.

Ndĩũgitagĩra ũtukũ na mũthenya

ndũkaae gũthũũkio nĩ mũndũ.

4 Niĩ ndirĩ mũraakarie nĩ mũgũnda ũcio wakwa wa mĩthabibũ.

No kũngĩrĩ mĩtare na mĩigua-rĩ,

ingĩhũũrana nayo njooke ndĩmĩcine yothe.

5 Nĩ ũndũ ũcio mĩigua na mĩtare nĩgĩũke ĩĩgitie harĩ niĩ,

nĩĩiguithanie na niĩ,

ĩĩ, nĩĩiguithanie na niĩ.”

6 Matukũ nĩmagooka, andũ a Isiraeli, o o njiarwa cia Jakubu, matheereme,

maciare maiyũrie thĩ yothe maciaro maao,

na magĩe na mĩri o ta mĩtĩ.

7 MWATHANI nĩamahũũrĩĩte ta ũrĩa aahũũrire arĩa maamahũũraga?

Kana nĩmooragĩĩtwo na ũingĩ ta ũrĩa arĩa maamooragaga mooragirwo?

8 MWATHANI aaherithirie andũ a Isiraeli

akĩmatwarithia ithaamĩrioinĩ.

Aamatwarithirie na kĩhuuhũkanio kĩũru,

kĩa rũhuuho ruumĩĩte mwena wa na irathĩro.

9 Tondũ ũcio meehia ma Isiraeli makaahoroherio,

o rĩrĩa magaakorwo mathĩĩĩte mahiga ma igongoona cia ngai ingĩ

magatuĩka ta coka mũthĩe,

mathengeetie igongoona cia gũcinĩra ũbaani,

na magathengia mĩhianano ya ngai ĩrĩa ĩĩtagwo Ashera.

10 Itũũra rĩrĩa rĩirigĩre na thingo cia hinya nĩrĩthaamĩĩtwo,

rĩgatigwo o ũguo ta werũ.

Ng’ombe ikarĩithagio na igakomaga kuo.

11 Honge cia mĩtĩ ciũmĩĩte ikoinĩkanga,

nao atumia magaciũngania magathiĩ magacitua ngũ.

Nĩ gũkorwo andũ aya nĩmaagĩĩte ũmenyo,

nĩkĩo ũrĩa wamoombire ndakaamaiguĩra tha,

o na kana ameeke maũndũ ma ũtugi.

12 Mũthenya ũcio MWATHANI nĩagacookanĩrĩria andũ aake ũmwe kwa ũmwe

o ta mũndũ akĩhuuha ngano kuuma mahutiinĩ,

kuuma o gĩturi kĩa Farati nginya rũũĩ rwa Misiri.

13 Mũthenya ũcio, karumbeeta nĩgakaahuuhwo na hinya,

geete Aisiraeli arĩa oothe maathaamĩirio bũrũri wa Asiria na wa Misiri;

nao mooke mathaathaĩrie MWATHANI gũũkũ Jerusalemu,

o gũũkũ kĩrĩmainĩ gĩake kĩrĩa gĩtheru.

Ũthamaki wa mwena wa na rũgongo gũkaanio

1 Kaĩ atongoria a Efiraimu arĩa arĩĩu,

o acio meĩkĩraga thũmbĩ cia mwĩtĩĩo

me thĩĩnainĩ-ĩ!

Riiri wao o ũcio ũhaana ta mahũa marahooha

maigĩrĩirwo mĩtwe ya atongoria acio atoorie nĩ ndibei,

kaĩ wĩ thĩĩnainĩ-ĩ!

2 MWATHANI arĩ na mũndũ njamba na ũrĩ hinya;

ahaana o ta kĩhuuhũkanio gĩa kũniinana kĩa mbura ya mbembe,

na ta mũiyũro wa maaĩ moinĩĩte,

mũndũ ũcio akaamaharũrũkia thĩ na hinya.

3 Hĩndĩ ĩyo, thũmbĩ icio cia mwĩtĩĩo

cia atongoria a Efiraimu acio arĩĩu a ndibei,

nĩikaarangĩrĩrio thĩ na makinya.

4 Riiri wao o ũcio ũhaana ta wa mahũa marahooha,

wĩkĩrĩĩtwo mĩtwe ya atongoria etĩĩi,

ũkaahaana o ta ngũyũ ya mbere kwĩrua.

Ĩtuagwo nĩ mũndũ wa mbere kũmĩona,

na ĩgĩkinya guokoinĩ gwake ũguo nĩamĩrĩĩte.

5 Mũthenya ũcio MWATHANI Mwene Hinya Wothe agaatuĩka thũmbĩ ya riiri na ya ũthaka

harĩ andũ aake arĩa magaatigara.

6 Nĩakaahe arĩa matuanagĩra ngoro ya waragania,

na arĩa marangagĩra kĩhingoinĩ amahe hinya.

Isaia na anabii arĩĩu a Bũrũri wa Juda

7 O nao anabii na athĩnjĩri Ngai nĩmarĩĩtwo nĩ ndibei na njoohi ndũrũ.

Marĩĩtwo atĩ marathiiĩ magĩtũgũũgaga;

marĩĩtwo magaturuura;

anabii marĩĩtwo makaaga kuona cioneki,

nao athĩnjĩri Ngai magaturuura matuainĩ maao.

8 Meetha ciothe iria maikaragĩra ciyũrĩĩte matahĩko

na gũtirĩ handũ o na hamwe hatheru.

9 Marateta igũrũ rĩakwa makoiga atĩrĩ,

“Nĩ andũ arĩkũ arathoomithia?

Nĩ a arahe kĩrĩra?

Kĩrĩra gĩake kĩagĩrĩire o ngeenge iria itigithĩĩtio kuonga

kana irutĩĩtwo nyondoinĩ.

10 Atĩrĩĩrĩ, ararutana kiugo gwa kiugo,

mũhari kwa mũhari,

gĩcunjĩ gwa gĩcunjĩ.”

11 Amu mwaga kũnjigua, Ngai ekũmwarĩria

na tũnua twa ndũũrĩrĩ iratondoira

na iraaria thiomi ng’eni.

12 Aamwĩrire atĩrĩ,

“Ũkaai mũhuurũke gũũkũ,

inyuĩ mũnogeete, ũkaai mũhuurũke.

Ũkaai mũhuurũke, gũũkũ kwĩ na ũhuurũko.”

No inyuĩ mũtiigana gũthikĩrĩria.

13 Nĩkĩo MWATHANI aramwarĩria kiugo gwa kiugo,

mũhari kwa mũhari,

gĩcunjĩ gwa gĩcunjĩ,

nĩ geetha mũgĩthiĩ mũturuure mũcooke na thuutha,

mũgũe muunangĩke,

na mũgũe mũtegoinĩ mũnyiitwo mĩgwate.

Ihiga rĩa mũthingi rĩa Zayuni

14 Inyuĩ andũ aya ang’athia,

o inyuĩ mwathaga andũ a Jerusalemu,

thikĩrĩriai ũrĩa MWATHANI aroiga.

15 Mũretĩĩa atĩ nĩmũthondekeete kĩrĩĩkanĩro na gĩkuũ,

na mũkagĩa kĩrĩĩko na bũrũri wa arĩa akuũ.

Mwĩ na ma atĩ rĩrĩa mũthiro ũrĩtuĩkania gũũkũ ndũrĩmũhuutia,

nĩ gũkorwo mwĩgiritanĩĩtie na maheeni,

na mũkeehitha ũrongoinĩ.

16 Nĩ ũndũ ũcio MWATHANI Mwene Hinya Wothe ekuuga atĩrĩ,

“Nĩngũiga ihiga rĩa mũthingi Zayuni,

ihiga rĩtangĩmumuthũka na rĩa goro,

rĩa gũthondeka mũthingi mũrũmu;

mũndũ o wothe ũkaarĩhoka ndagaconorithio.

17 Waragania ũgũtuĩka buutikamba ya gũthima mũthingi,

na ũthingu ũtuĩke kabirũ gakũũthima.”

Mbura ya mbembe ĩriura

ĩhaate maheeni marĩa mwĩgiritanĩĩtie namo,

nakĩo kĩguũ kĩiyũre kũrĩa mwĩhithĩĩte.

18 Hĩndĩ ĩyo kĩrĩĩkanĩro kĩanyu na gĩkuũ nĩkĩrĩthario,

nakĩo kĩrĩĩko kĩanyu na bũrũri wa arĩa akuũ kĩage kĩene.

Rĩrĩa mũthiro ũrĩtwĩkania ũrĩmũhũũra ũmũniine.

19 Maita moothe marĩa mũthiro ũrĩtuĩkanagia nĩũrĩmũkoragĩrĩra,

amu ũrĩtuĩkanagia kĩrooko o kĩrooko,

o na mũthenya na ũtukũ.

Mwaigua ũndũ ũcio, no kũmaka mũrĩmakaga.

20 Mũrĩhaana ta mũndũ ũrĩa ũgweteetwo thimoinĩ,

ũrĩa ũrĩrĩ wake nĩ mũkuhĩ

ũguo atĩ ndangĩhota gũkoma igũrũ rĩaguo,

naguo mũrĩngĩti wake nĩ mũceke

ũguo atĩ ndũngĩtũngana ehumbĩrĩĩte naguo.

21 Nĩ gũkorwo MWATHANI arĩrũwa o ta ũrĩa aarũire kĩrĩmainĩ kĩa Perazimu,

na ang’ũrĩke o ta ũrĩa aang’ũrĩkĩĩte kĩandainĩ kĩa Gibeoni.

Ihinda rĩĩrĩ egwĩka ũndũ wa kũmakania;

ndegwĩka ũrĩa mwĩrĩgĩrĩire nĩegwĩka.

22 Kwoguo-rĩ, tigaai kĩnyũrũri,

mũtigaatũme bĩngũ iria muoheetwo nacio inyiitanyiitio.

Tondũ nĩnjiguĩte itua rĩa MWATHANI Ngai Mwene Hinya Wothe

atĩ bũrũri wothe werekeire kũniinwo biũ.

Ũũgĩ wa Ngai

23 Tegaai matũ mũigue ũhoro wakwa,

thikĩrĩriai mũigue ũrĩa ndĩroiga.

24 Arĩmi matũũraga marĩmaga matukũ moothe?

Matũũraga mahũũraga tuuta hĩndĩ ciothe?

25 Githĩ marĩĩkia kũhaarĩria mũgũnda, maticookaga makaminja kũmini,

magaita ndengũ na mĩhari,

magacooka makahanda mbaarĩ na ngano mĩhakainĩ?

26 Nĩmooĩ wĩra wao,

tondũ Ngai wao nĩamarutĩĩte na akamoonia.

27 Amu mbegũ cia kũmini na cia ndengũ itihũũragwo na mũtĩ mũtungu,

o na kana ikahũũrwo na kũrangwo na magũrũ ma ngaari,

no ihũũragwo na karũthanju.

28 Ngano ndĩhũũragwo kinya ĩgakua;

ĩrangagwo na magũrũ ma ngaari ya kũguucio ya mbarathi,

na mbarathi itimĩhũũraga ĩgathĩĩĩka.

Nĩguo mũgate ũthondekwo

nĩgũthĩo ĩthĩagwo.

29 Ũũgĩ ũcio uumaga harĩ MWATHANI Mwene Hinya Wothe;

nĩ mũtaarani wa magegania

na ũũgĩ wake nĩ mũingĩ.

Marigĩrĩrio ma Jerusalemu

1 Kaĩ itũũra rĩa Jerusalemu, rĩrĩa rĩĩtagwo “ Kĩgongoona kĩa Ngai,” rĩ thĩĩnainĩ-ĩ!

Kaĩ Jerusalemu, itũũra rĩrĩa Daudi aatũũraga, rĩ thĩĩnainĩ-ĩ!

Mwaka nĩũrekwo ũrũmĩrĩre mwaka,

thigũkũ irekwo ithiĩ na mbere.

2 No rĩĩrĩ, nĩngaareehithĩria itũũra rĩu rĩĩtagwo “Kĩgongoona kĩa Ngai” thĩĩna,

nakuo kũgĩe kĩrĩro na macakaya,

rĩgĩtuĩke kĩgongoona kĩiyũire thakame harĩ niĩ.

3 Wee Jerusalemu, nĩngaagũthiũrũrũkĩria na mĩena yothe,

ngwakĩrĩre ngathĩ,

o na ndũũgamie ihumbu cia tĩĩri thingoinĩ ciaku nĩguo ngũtharĩkĩre.

4 Nĩũkaamomorwo waragie ũrĩ na kũu thĩ,

mũgambo waku uumage na kũu rũkũngũinĩ.

Mũgambo waku ũkĩiguagwo ũkiuma na kũu thĩ o ta wa ngoma;

ũkaiguagwo ta ũraaria na kĩheehũ na kũu tĩĩriinĩ.

5 No rĩĩrĩ, thũ icio ciaku irũrũnganĩĩte igaatuĩka o ta rũkũngũ;

mũrũrũngano ũcio wa thigari itarĩ tha ũgĩtuĩke o ta mahuti moombũrĩĩtwo nĩ rũhuuho.

Na rĩĩrĩ, o rĩmwe, o ta kũbucia kwa riitho,

6 MWATHANI Mwene Hinya Wothe nĩagooka akũhonokie,

arĩ na marurumĩ na gĩthingithia na ngwa nene;

arĩ na kĩhuuhũkanio na mũhũyũko mũnene wa rũhuuho,

o na arĩ na nĩnĩmbĩ cia mwaki wa kũniinana.

7 Ndũũrĩrĩ ciothe iria irahũũranaga na Jerusalemu, itũũra rĩrĩa rĩĩtagwo “Kĩgongoona kĩa Ngai,”

iria ciothe irĩtharĩkagĩra na irĩreehagĩra thĩĩna,

ikoona o ta arĩ kĩrooto kana kĩoneki gĩa ũtukũ.

8 Ikoona ta arĩ kĩrooto kĩa mũndũ ũhũũtiĩ;

araroota akĩrĩa irio, no ookĩra ageekora no ahũũtiĩ.

Kana ta mũndũ mũnyootu ũraroota akĩnyua maaĩ.

no ookĩra ageekora no anyootiĩ.

Ũguo noguo gũkaahaana

na ndũũrĩrĩ ciothe iria ihũũranaga

na kĩrĩma gĩa Zayuni.

Mataaro kũrangĩrĩrio

9 Wĩritiei na mũtuĩke irimũ,

wĩhingeei maitho na mũtuĩke itumuumu!

Tuĩkaai arĩĩu na mũtirĩĩtwo nĩ ndibei,

Tũgũũgaai na mũtirĩĩtwo nĩ njoohi ndũrũ!

10 MWATHANI nĩamũtũmĩire roho

wa gũtũma mũkome toro;

nĩahingĩĩte maitho maanyu, inyuĩ anabii,

na nĩakunĩkĩĩte mĩtwe yanyu inyuĩ ooni maũndũ.

11 Ũrathi wothe ũhaana o ta ibuku rĩtume harĩ inyuĩ. Rĩngĩtwarĩrwo mũndũ ũũĩ gũthooma, eerwo “Wenda tũthoomere ibuku rĩĩrĩ,” naake angĩcookia “Ndingĩhota, tondũ nĩrĩtume.”

12 Rĩngĩtwarĩrwo mũndũ ũtooĩ gũthooma eerwo, “Wenda tũthoomere ibuku rĩĩrĩ,” angĩcookia, “Ndiũĩ gũthooma.”

13 MWATHANI arakiuga atĩrĩ,

“Andũ aya manguhagĩrĩria o na tũnua,

maheaga gĩtĩĩo o na mĩromo,

ĩndĩ ngoro ciao irĩ kũraaya na niĩ.

Gĩtĩĩo kĩao harĩ niĩ no kĩa mawatho

marĩa andũ merutĩĩte kuuma kũrĩ arĩa angĩ.

14 Nĩ ũndũ ũcio-rĩ, nĩngwĩka rĩngĩ maũndũ ma

magegania harĩ andũ aya:

nyongerere magegania harĩ magegania marĩa mangĩ.

Ũũgĩ wa andũ arĩa imenyi nĩgũthira ũgũthira;

naguo wara wa andũ arĩa aara ndũũgĩa kĩene rĩngĩ.”

Kĩĩrĩgĩrĩro kĩa matukũ ma thuutha

15 Arĩa mahithaga MWATHANI, mĩbango yao,

na mageekaga maũndũ maao na hitho na makeĩĩraga,

gũtirĩ ũramoona o na kana ũramamenya,

kaĩ marĩ thĩĩnainĩ-ĩ!

16 Kaĩ nĩmeheeneetie-ĩ!

Mũũmbi no aigananio na rĩũmba?

Kĩndũ gĩa gũthondekwo no kĩĩre ũrĩa ũgĩthondekeete

“Wee ti we wathondekire.”

No kĩĩre ũrĩa ũgĩthondekeete

“Wee ndũrĩ mũũgĩ?”

17 Nĩ ihinda iniini rĩtigarĩĩte,

Lebanoni gũtuĩke mũgũnda ũthakarĩĩtio nĩ irio;

ningĩ mũgũnda ũcio ũthakarĩĩtio ũguo nĩ irio

ũcooke ũtuĩke mũtitũ.

18 Hĩndĩ ĩyo arĩa mataiguaga nĩmakaigua magĩthoomerwo ibuku.

Andũ arĩa matoonaga arĩa matũũraga ndumainĩ,

maitho maao nĩmakaahingũka.

19 Arĩa ahooreri, nĩmagaakena rĩngĩ thĩinĩ wa MWATHANI.

Arĩa athĩĩni nĩmagaacanjamũka nĩ ũndũ wa Ngai Ũrĩa Mũtheru wa Isiraeli.

20 Tondũ gũtigaakorwo andũ matarĩ tha;

arĩa mamenagĩrĩria arĩa angĩ nĩmagaathira,

arĩa nao macaragia o maũũru nĩmakaaniinwo.

21 Andũ arĩa mahĩtithagia arĩa angĩ na mĩario,

arĩa maigagĩra atuithania ciira mĩtego hau kĩhingoinĩ,

na arĩa magithagia andũ arĩa athingu ihooto ciao, na maũndũ ma tũhũ,

oothe nĩmakaaniinwo.

22 Kwoguo MWATHANI, Ngai wa Isiraeli,

ũrĩa wahonokirie Aburahamu kuuma mĩnyamaaroinĩ, aroiga atĩrĩ,

“Andũ aakwa, mũtigaacooka gũconorwo,

kana gũtukia ũthiũ.

23 Nĩ gũkorwo rĩrĩa mũkoona ciana cianyu,

iria irĩ wĩra wa mooko maakwa, irĩ gatagatĩinĩ kaanyu,

nĩmũkaagooca rĩĩtwa rĩakwa,

mũgooce Ngai ũrĩa Mũtheru wa Jakubu,

na mũheage Ngai wa Isiraeli gĩtĩĩo.

24 Andũ arĩa ariitu nĩmageetĩkĩra kũgĩa na ũmenyo

na arĩa matũũraga mang’ong’oraga makenere gũthoomithio.”