Category: Ezekieli

Riiri wa MWATHANI kwehera Hekaarũinĩ

1 Na rĩĩrĩ, kĩonekiinĩ kĩu, ndarora ngĩona atĩ igũrũ rĩa kĩndũ kĩrĩa kĩahaanaga ta mũtambũrũko wa matu mairũ gĩatambarũkĩĩtio igũrũ rĩa mĩtwe ya ciũmbe iria irĩ mathagu, kwarĩ na kĩndũ kĩngĩ gĩatariĩ ta ihiga rĩa rangi wa mburuu, naguo mũhuanĩre wakĩo watariĩ ta gĩtĩ kĩa ũnene.

2 Naake Ngai akĩĩra mũndũ ũrĩa wehumbĩĩte nguo ya gataani atĩrĩ, “Thiĩ gatagatĩ ka magũrũ marĩa marĩ rungu rwa ciũmbe iria irĩ mathagu, woe ngundi ya makara me na mwaki marĩa marĩ gatagatĩ ga ciũmbe icio irĩ mathagu, ũthiĩ ũmanyaagie itũũrainĩ.” Naake mũndũ ũcio agĩgĩthiĩ agĩtoonya kuo ndĩmwĩroreire.

3 Ciũmbe icio irĩ mathagu ciarĩ na mwena wa na kĩanda wa Hekaarũ ya Ngai rĩrĩa mũndũ ũcio wehumbĩĩte nguo ya gataani atoonyire. Narĩo itu rĩaiyũire nja ĩrĩa ya na thĩinĩ.

4 Naguo riiri wa MWATHANI ũgĩkĩambata uumĩĩte harĩ ciũmbe icio, ũkĩrũũgama mũromoinĩ wa Hekaarũ, nayo ĩkĩiyũrwo nĩ itu, nayo nja ĩyo ĩkĩiyũra ũtheri wa riiri wa MWATHANI.

5 Na rĩĩrĩ, mũrurumo wa mathagu ma ciũmbe icio irĩ mathagu waiguĩkanaga nginya na kũu nja ya mwena wa nja. Waiguĩkanaga ũhaana ta mũgambo wa Ngai Mwene Hinya Wothe rĩrĩa ekũheana ũhoro.

6 Na rĩrĩa aathire mũndũ ũcio wehumbĩĩte nguo ya gataani akĩmwĩra, “Oya makara ma mwaki marĩa marĩ gatagatĩ ka magũrũ marĩa marĩ gatagatĩ ga ciũmbe icio irĩ mathagu.” Mũndũ ũcio agĩthiĩ akĩrũũgama hakuhĩ na kũgũrũ kũmwe.

7 Nakĩo kĩũmbe kĩmwe gĩacio gĩgĩtambũrũkia guoko gatagatĩinĩ gaacio, gĩkĩoya ngundi ya makara kuuma mwakiinĩ ũcio warĩ o hau gatagatĩ, gĩkĩmanengera mũndũ ũcio wehumbĩĩte nguo ya gataani. Naake mũndũ ũcio akĩoya makara macio akiumagara agĩĩthiĩra.

8 Ciũmbe icio-rĩ, ciarĩ na mooko ta ma mũndũ rungu rwa ithagu o ithagu rĩacio.

9-10 Ningĩ ndarora ngĩona magũrũ mana mahaana ta ma ngaari, na moothe nĩmaahaanaine, o kũgũrũ gũkarũũgamania na o kĩũmbe. Magũrũ macio maahenagia o ta mahiga ma goro na mahaanaga ta magũrũ matoonyanĩĩtio na mũkĩgiĩ, kũgũrũ na kũrĩa kũngĩ.

11 Na rĩĩrĩ, ciũmbe icio ciambĩrĩria gũthiĩ na mwena o ũrĩkũ, magũrũ macio maatwaranaga nacio matekwĩgata o na atĩa. Ningĩ na kũrĩa mũtwe warora no nakuo magũrũ maaroraga matekwĩgata magĩthiĩ.

12 Mĩĩrĩ ya ciũmbe icio, mĩgongo yacio, mooko maacio, magũrũ maacio o na mathagu maacio maiyũire maitho guothe.

13 Na nĩndeiguĩrĩire na matũ maya maakwa magũrũ macio makĩheeo rĩĩtwa magĩĩtwo “Magũrũ marĩa Mathiũrũrũkaga.”

14 Na rĩĩrĩ, kĩũmbe o kĩũmbe kĩarĩ na moothiũ mana, ũthiũ wa mbere warĩ ta wa ndeegwa,wa keerĩ ta wa mũndũ, wa gatatũ ta wa mũrũũthi, na wa kana ta wa rwĩgĩ.

15 Ciũmbe icio nocio ciũmbe iria irĩ muoyo iria ndooneete ndĩ o kũu rũũĩinĩ rwa Kebari. Na rĩĩrĩ, ciũmbe icio irĩ mathagu ikĩũmbũka na igũrũ

16 nĩ geetha ithiĩ, magũrũ macio moombũkanagia nacio. Ningĩ hĩndĩ ĩrĩa ciũmbe icio irĩ mathagu ciatambũrũkia mathagu ithiĩ na igũrũ, magũrũ macio matiatigagwo thĩ, maatwaranaga o nacio.

17 Ciũmbe icio ciarũũgama, namo magũrũ no kũrũũgama marũũgamaga; ciombũka namo magũrũ makoombũkania nacio. Gwekĩkaga ũguo nĩ ũndũ magũrũ macio maatongoragio nĩ ciũmbe icio irĩ mathagu.

18 Thuutha ũcio riiri wa MWATHANI ũgĩkiuma hau mũrangoinĩ wa Hekaarũ ĩyo, ũgĩthiĩ ũkĩũmba igũrũ rĩa ciũmbe icio irĩ mathagu.

19 Nacio ciũmbe icio irĩ mathagu igĩkũnjũra mathagu maacio ikĩũmbũka ikiuma thĩ ndĩciĩroreire, namo magũrũ magĩtwarana nacio. Nacio igĩthiĩ ikĩrũũgama mũromoinĩ wa kĩhingo kĩa mwena wa na irathĩro wa Hekaarũ ya MWATHANI na riiri wa MWATHANI warĩ o igũrũ rĩa ciũmbe icio irĩ mathagu.

20 Icio nocio ciũmbe iria irĩ muoyo ndooneete irĩ rungu rwa Ngai wa Isiraeli o kũu rũũĩinĩ rwa Kebari, na ndaciona ngĩkĩmenya atĩ nocio ciũmbe iria irĩ mathagu.

21 Kĩũmbe o kĩũmbe kĩarĩ na moothiũ mana, mathagu mana o na mooko mahaana ta ma mũndũ rungu wa mathagu maakĩo.

22 Na rĩĩrĩ, moothiũ maacio maahaanaga o ta ũrĩa ndamooneete ndĩ kũu rũũĩinĩ rwa Kebari. Na kĩũmbe o kĩũmbe gĩathiaga kĩroreete mbere gĩtekwĩhũgũra.

Jerusalemu kũmenererio

1 Na rĩĩrĩ, roho akĩnjoya na igũrũ akĩndwara kĩhingoinĩ kĩa mwena wa na irathĩro wa Hekaarũ ya Ngai, o kĩu kĩerekeire na irathĩro. Na hau mũrangoinĩ wa kĩhingo kĩu ngĩona arume mĩrongo ĩĩrĩ na ataano. Na rĩĩrĩ, Jaazania mũrũ wa Azuri na Pelatia mũrũ wa Benaia, atongoria eerĩ a rũũrĩrĩ, maarĩ thĩinĩ wao.

2 Naake Ngai akĩnjĩĩra atĩrĩ, “Mũrũ wa mũndũ, aya nĩ andũ arĩa mabangaga mĩbango mĩũru na makaheana mootaari mahĩngĩcanu thĩinĩ wa itũũra rĩĩrĩ.

3 Nĩ o moigaga atĩrĩĩrĩ, ‘Mahinda ti makinyu magwaka nyũmba. Itũũra rĩĩrĩ rĩgũtuĩka nyũngũ ya kũruga, na ithuĩ tũtuĩke nyama.’

4 Mũrũ wa mũndũ, nĩ ũndũ ũcio, marathĩre moohoro mooru!”

5 Na niĩ ngĩkĩiyũrwo nĩ roho wa MWATHANI, naake MWATHANI akĩnjĩĩra atĩrĩ, “Maarĩrie ũmeere atĩrĩ, MWATHANI aroiga ũũ: Nĩ inyuĩ nyũmba ya Isiraeli mwoiga ũguo? Niĩ mwene nĩnjũũĩ ngoro cianyu.

6 Nĩmũiyũrĩĩtie itũũra rĩĩrĩ na ciimba cia andũ arĩa mũũragĩĩte na mũgatũma ciimba ciaragane njĩrainĩ.

7 “Tondũ ũcio, niĩ MWATHANI Ngai ngũmwĩra atĩrĩ, “Itũũra rĩĩrĩ nĩrĩo nyũngũ ya kũruga na andũ arĩa mũũragĩĩte mũkamaaragania kũu njĩrainĩ nĩ o nyama. No rĩĩrĩ, nĩngũmũruta muume kuo.

8 Na tondũ nĩmwĩtigĩrĩĩte rũhiũ rwa njora, nĩngũreka rũhiũ rwa njora rũmuomokere. Nĩ niĩ MWATHANI Mwene Hinya Wothe ndoiga ũguo.

9 Njooke ndĩmũrutũrũre itũũra ndĩmũneane mookoinĩ ma andũ a ndũũrĩrĩ na hingie matua marĩa ndĩmũtuĩrĩire.

10 Mũkooragĩrwo mbaarainĩ mũrĩ o kũu bũrũriinĩ wa Isiraeli mũmenye atĩ niĩ nĩ niĩ MWATHANI.

11 Itũũra rĩĩrĩ rĩtigaatuĩka ta nyũngũ o na kana inyuĩ mũtuĩke ta nyama.Ngaamũherithĩria o kũu bũrũriinĩ wa Isiraeli.

12 Inyuĩ na inyuĩ mũmenye atĩ nĩ niĩ MWATHANI ũrĩa mwagararire mawatho maake na mũkĩaga gwathĩkĩra maathani maake rĩrĩa mwarũmĩrĩire mĩtugo ya ndũũrĩrĩ iria mũhakaine nacio.”

13 Na rĩĩrĩ, hĩndĩ o ĩyo ndarathaga moohoro Pelatia mũrũ wa Benaia akĩringĩka agĩkua. Na niĩ ngĩkĩĩgũithia ndoreetie ũthiũ thĩ ngĩkaya ngiuga atĩrĩ, “Ũi MWATHANI Ngai! Kaĩ ũkũniina andũ a Isiraeli arĩa matigarĩĩte?”

Ngai kũhe andũ arĩa atahe kĩĩrĩgĩrĩro

14 Naake MWATHANI akĩnjarĩria akĩnjĩĩra atĩrĩ,

15 “Mũrũ wa mũndũ, andũ arĩa maratũũra Jerusalemu nĩmaraaria ũhoro wanyu o na wa aariũ a thooguo, Aisiraeli arĩa mathaamĩĩtio, makoiga atĩ mũrĩ kũraaya mũno mũtingĩhota gũthaathaiya MWATHANI na atĩ MWATHANI nĩamaheete bũrũri ũcio.”

16 Nĩ ũndũ ũcio MWATHANI Ngai egũkiuga atĩrĩ, “Nĩ ma atĩ nĩndamatwarithirie magatũũre ndũũrĩrĩinĩ ng’eni na ngĩmahurunja mabũrũriinĩ ma kũraaya. No ningĩ nĩngoreetwo hamwe nao mabũrũriinĩ marĩa mathiĩte kwa ihinda.

17 “Kĩmakinyĩrie ũrĩa niĩ MWATHANI Ngai nguuga. Atĩrĩĩrĩ, nĩngaamacookanĩrĩria ndĩmarute mabũrũriinĩ marĩa ndamahurunjĩĩte na ndĩmahe bũrũri wa Isiraeli.

18 Na rĩrĩa magaacooka nĩmagaathengia mĩhianano yothe irĩ magigi ĩrĩa magaakora kuo.

19 Niĩ na niĩ nĩngaamahe ngoro njerũ na ndĩmeekĩre roho mwerũ. Nĩngaaruta thĩinĩ wao ngoro iria nyũmũ o ta ihiga na ndĩmeekĩre ngoro njathĩki.

20 Na nĩmagaacooka gwathĩkĩra mawatho maakwa na gũconokera maathani maakwa na mamahingagie. Magaatuĩka andũ aakwa na niĩ nduĩke Ngai wao.

21 No arĩa meendeete gũthaathaiya ngai cia mĩhianano cia maheeni na irĩ magigi, acio nĩkũherithia ngaamaherithia nĩ ũndũ wa ũrĩa maaneeka. Nĩ niĩ MWATHANI Mwene Hinya Wothe ndoiga ũguo.”

Riiri wa Ngai kwehera Jerusalemu

22 Thuutha ũcio ciũmbe icio irĩ mathagu ikĩambararia mathagu ikĩũmbũka, namo magũrũ magĩtwarana nacio. Naguo riiri wa Ngai wa Isiraeli waikarĩire o igũrũ rĩa ciũmbe icio.

23 Riiri wa Ngai ũgĩkiuma kũu gatagatĩ ga itũũra ũgĩthiĩ ũkĩrũũgama kĩrĩma igũrũ kĩrĩa kĩrĩ mwena wa irathĩro wa itũũra.

24 Kĩonekiinĩ kĩu, roho wa Ngai akĩnjoya akĩnjookia gatagatĩinĩ ka andũ arĩa maarĩ atahe o kũu Babilonia. Nakĩo kĩoneki kĩrĩa ndooneete gĩkĩbuĩria.

25 Thuutha ũcio nĩndeerire andũ arĩa maarĩ atahe maũndũ moothe marĩa MWATHANI anyoneetie.

Mũnabii gwĩtua ta mũndũ ũũrĩĩte akoima bũrũri wake

1 MWATHANI akĩnjarĩria akĩnjĩĩra atĩrĩ,

2 “Mũrũ wa mũndũ, ũtũũranagia na andũ mbũramatũ. Andũ marĩ na maitho na mationaga, na marĩ na matũ na matiiguaga, nĩ tondũ nĩ rũũrĩrĩ rwa andũ aremi.

3 “Mũrũ wa mũndũ, oha mĩrigo yaku o ta mũndũ ũrathaama na wambĩrĩrie rũgendo gũtaanatuka andũ magĩkuonaga. Reke andũ makuone ũgĩthaama uume mũciĩ ũgĩthiĩ kũndũ kũngĩ. No gũkorwo andũ acio nĩmekũmenya o na marĩ aremi.

4 Oha mĩrigo o ta mũndũ ũrathaama mathaa ma mũthenya o magĩkuonaga, uumagare ũkuuĩĩte mĩrigo yaku o ta mũndũ ũroimagara oore mathaa ma kĩhwaĩinĩ. Reke makuone ũkiumagara.

5 Tũrĩkia mwanya rũthingoinĩ uumĩre ho o magĩkuonaga.

6 Reke andũ acio makuone ũkuuĩĩte mĩrigo yaku na ciande, uumagare gũgĩthiĩ kũgĩa mairia, wĩhumbĩĩte maitho nĩguo ndũkoone kũrĩa ũrathiĩra, nĩ gũkorwo nĩngũtuĩte rũũri harĩ nyũmba ya Isiraeli.”

7 Niĩ na niĩ ngĩĩka o ũrĩa ndeerĩĩtwo. Ngĩkĩoha mĩrigo mathaa ma mũthenya o ta mũndũ ũrehaarĩria kũũra na gũgĩthiĩ kũgĩa mairia ngĩtũrĩkia rũthingo na mooko maakwa ngiumĩra ho nguuĩĩte mĩrigo yakwa na ciande o andũ oothe meĩndoreire. Na hĩndĩ ĩyo kwarĩ na gatuma.

8 Rũũciinĩ rũũrũ rũngĩ MWATHANI akĩnjarĩria akĩnjĩĩra atĩrĩ,

9 “Mũrũ wa mũndũ, githĩ andũ a Isiraeli, o andũ acio aremi, matirakũũririe atĩrĩ, ‘Nĩ atĩa ũreeka rĩu?’

10 Kĩmeere atĩrĩ, MWATHANI Ngai aroiga atĩ ĩyo nĩ ndũmĩrĩri harĩ mũnene wa Jerusalemu na harĩ andũ oothe a Isiraeli arĩa matũũraga kuo.

11 Nĩ rũũri harĩ inyuĩ. O ũguo ndĩreekire noguo mageekwo. Magaatahwo matwarwo bũrũri mũgeni marĩ ngombo.

12 Mũnene ũrĩa wathanaga agaakuua indo ciake na ciande kũrĩ nduma oorĩre mwanyainĩ ũrĩa magaakorwo matũrĩkĩĩtie rũthingoinĩ. Agaathiĩ ehumbĩĩte maitho ndakoone kũrĩa aratuĩkanĩria.

13 No rĩĩrĩ, nĩngaamwarĩra mũtego naake anyiitwo nĩguo. Njooke ndĩmũtwarithie itũũra rĩa Babiloni, no ndakoona itũũra rĩu, o na gũtuĩka nokuo agaakuĩra.

14 Andũ oothe arĩa maamũteithagĩrĩria, arĩa maamũtaaraga na thigari iria ciamũrangagĩra, ngaamanyaagia kũndũ guothe, na njooke ndĩmoime thuutha na rũhiũ rwa njora, ngĩmooragaga.

15 “Ndamahurunjĩra ndũũrĩrĩinĩ na ndamanyaagia mabũrũriinĩ mageni nĩmakaamenya atĩ nĩ niĩ MWATHANI.

16 No rĩĩrĩ, nĩngaareka andũ aniini mahonoke mbaara, ng’aragu o na mĩrimũ. Magaatigara nĩ geetha makoimbũragĩra ndũũrĩrĩ maũndũ moothe mooru na me magigi marĩa maneeka, nĩ geetha nacio ndũũrĩrĩ imenye atĩ niĩ nĩ niĩ MWATHANI.”

Mũnabii ũrainaina gũtuĩka kĩmenyithia

17 MWATHANI akĩnjarĩria akĩnjĩĩra atĩrĩ,

18 “Mũrũ wa mũndũ, rĩa irio na ũnyue maaĩ ũkĩinainaga nĩgwĩtigĩra;

19 wĩre andũ a bũrũri atĩ MWATHANI Ngai areera atũũri a Jerusalemu arĩa marĩ bũrũriinĩ wa Isiraeli ũũ: makaarĩaga irio mehũũgĩĩte mũno na manyuage maaĩ makuĩte ngoro nĩ tondũ kĩrĩa gĩothe kĩrĩ bũrũri wao nĩgĩgaathuthangwo nĩ gũkorwo andũ oothe arĩa matũũraga kuo meekaga o maũndũ ma gũtũmĩra hinya.

20 Matũũra marĩa rĩu marĩ na andũ aingĩ maratũũra kuo nĩmakaaharaganio, naguo bũrũri ũtigwo maganjo; na hĩndĩ ĩyo nĩmakaamenya atĩ nĩ niĩ MWATHANI.”

Thimo ĩmwe yũĩkaine na ndũmĩrĩri ĩngĩ ĩtoĩkaine

21 MWATHANI akĩnjarĩria akĩnjĩĩra atĩrĩ,

22 “Mũrũ wa mũndũ, nĩũũĩ ũrĩa thimo ĩno ĩtemaga bũrũri wa Isiraeli ĩmenyithagia, ‘Mahinda no kũhĩtũka marahĩtũka, nacio cioneki no gũtuĩka iratuĩka cia tũhũ?’

23 Thiĩ ũmeere atĩ MWATHANI Ngai aroiga atĩ nĩekwagithia thimo ĩyo kĩene na ndĩgaacooka gũtũmĩrwo thĩinĩ wa Isiraeli rĩngĩ. Na ũcooke ũmeere atĩ mahinda nĩmarooka na me hakuhĩ, na kĩoneki o gĩothe nĩgĩkũhinga.

24 “Rũũrĩrĩinĩ ruothe rwa Isiraeli gũtigaacooka kũiguuo cioneki cia maheeni o na kana ũrathi wa mathaara.

25 Nĩ gũkorwo niĩ MWATHANI njaragia, na ndaaria ngahingia ũrĩa njugĩĩte itakũwetereria. Nĩ gũkorwo ũndũ ũrĩa njarĩĩtie nĩngũũhingia o matukũinĩ maanyu, inyuĩ rũũrĩrĩ rũũrũ rũremi. Nĩ MWATHANI Mwene Hinya Wothe woiga ũguo.”

26 MWATHANI akĩnjarĩria akĩnjĩĩra atĩrĩ,

27 “Mũrũ wa mũndũ! Tarora! Andũ a Isiraeli maroiga atĩrĩ, ‘Cioneki iria mũndũ ũyũ arona ikaahinga tene, naguo ũrathi ũrĩa araratha ũkaahinga matukũ maingĩ mathira!’

28 No meere atĩrĩ, ‘MWATHANI Mwene Hinya Wothe aroiga atĩ gũtirĩ mũgambo wake ũgũcooka gwĩtererio; mũgambo o wothe ũrĩa aarĩĩtie nĩũkũhingio. Ũguo nĩguo MWATHANI Ngai oiga.’ ”

Athuuri anabii kũmenererio

1 MWATHANI akĩnjarĩria akĩnjĩĩra atĩrĩ,

2 “Mũrũ wa mũndũ, rathĩra athuuri a Isiraeli arĩa anabii; marathĩre na wĩre acio marathaga o moohoro ma kuuma ngoro ciao mathikĩrĩrie ciugo cia MWATHANI.”

3 Atĩrĩĩrĩ, MWATHANI Ngai ekuuga ũũ: “Anabii arĩa irimũ, o arĩa marũmagĩrĩra mwĩĩro wa ngoro ciao, na matirĩ ũndũ maguũrĩirio, kaĩ marĩ thĩĩnainĩ-ĩ!

4 Andũ aya a Isiraeli, anabii acio aanyu mahaana o ta mbwe itũũraga maganjoinĩ. Atĩrĩĩrĩ,

5 mũticookereirie kana mũgathinga mĩanya kũrĩa rũthingo rũmomokeete o na kana mũkarigiicĩria nyũmba ya Isiraeli na rũthingo nĩguo mũkaahota gwĩtiiria mbaara mũthenya wa MWATHANI wakinya.

6 Atĩrĩĩrĩ, cioneki ciao nĩ cia tũhũ o na moorathi maao no ma maheeni. Anabii acio mamwĩraga MWATHANI aroiga, o rĩrĩa atarĩ MWATHANI ũmatũmĩĩte, na makeehoka atĩ ciugo ciao nĩikũhinga!

7 Ndĩrakĩmeera atĩrĩ: cioneki cianyu-rĩ, githĩ ti cia tũhũ? Moorathi maanyu-rĩ, o namo githĩ to ma maheeni o na gũtuĩka muugaga atĩ nĩ ciugo cia MWATHANI, o rĩrĩa niĩ itaarĩĩtie?”

8 MWATHANI Mwene Hinya Wothe egũkiuga ũũ: “Tondũ nĩmũheanĩĩte ciugo cia maheeni na mũkaheana cioneki cia maheeni, o na niĩ nĩngũmũgarũrũka. Nĩ niĩ MWATHANI ndoiga ũguo.

9 Guoko gwakwa nĩgũgũũkĩrĩra anabii acio moonaga cioneki cia maheeni o na makaratha moohoro ma maheeni. Matigaacooka gũciirĩra andũ a Isiraeli; marĩĩtwa maao nĩgũthario megũthario kuuma marĩĩtwainĩ ma Aisiraeli, na ningĩ matigaikia bũrũri wa Isiraeli kũgũrũ. Na inyuĩ nĩmũkaamenya atĩ niĩ nĩ niĩ MWATHANI Mwene Hinya Wothe.

10 “Nĩmahĩtithĩĩtie andũ aakwa na kũmeera atĩ kũrĩ thaayũ na thaayũ ũcio ndũrĩ kuo. Na ningĩ mũndũ aaka rũthingo mookaga makarũhaka coka.

11 Anabii acio meekaga ũguo meere atĩ, rũthingo rũu nĩrũkũmomoka. Gũgũũka mbura ya kĩboboto ĩrĩ na mbembe ndungu ĩreehanĩĩte na rũhuuho rũnene ĩhũũre rũthingo rũu.

12 Rũthingo rwomoka-rĩ, andũ makooria kũraarĩ na bata ũrĩkũ wa kũrũhaka coka.”

13 Nĩ ũndũ ũcio MWATHANI Ngai egũkiuga ũũ: “Ndĩ na marũrũ maingĩ mũno nĩngaareehithia rũhuuho rũnene rũrĩ na mbura ya mbembe ya kĩboboto momore rũthingo rũu.

14 Rũthingo rũu mahakĩĩte coka-rĩ, ngarũharagania rũgũe thĩ o nginya mũthingi waruo ũthikũranio. Rũkĩmomoka rũkaamũgũĩra rũmũũrage inyuothe. Inyuĩ na inyuĩ nĩmũkaamenya atĩ niĩ nĩ niĩ MWATHANI.

15 “Rũthingo o ũndũ ũmwe na arĩa maarũhakire coka nĩmagaakorererwo nĩ maraakara maakwa. Ngaacooka ndĩmwĩre atĩrĩ: rũthingo o ũndũ ũmwe na arĩa maarũhakire coka rĩu matirĩ ho.

16 Acio maarũhakire coka nĩ anabii arĩa maarathagĩra Jerusalemu na makoona cioneki cia atĩ Jerusalemu kwarĩ na thaayũ o rĩrĩa gũtaarĩ.” Nĩ MWATHANI Ngai woiga ũguo.

Atumia anabii nao kũmenererio

17 MWATHANI agĩcooka akĩnjĩĩra atĩrĩ, “Mũrũ wa mũndũ, rĩu hũgũkĩra atumia a rũũrĩrĩ rwanyu arĩa marathaga moohoro na mwĩĩro wa ngoro. Marathĩre

18 ũmeere MWATHANI Ngai ekuuga ũũ: kaĩ atumia arĩa matũmaga ithitũ cia gwĩkĩrwo marũngoinĩ moothe ma mooko o na magathondeka itambaya ndaihu cia kũhumbĩra mĩtwe ya andũ nĩ geetha magwatie andũ marĩ thĩĩnainĩ-ĩ! Mũgwĩciiria mwagwatia andũ aakwa nĩmũgwĩteithia inyuĩ eene?

19 Nĩmũnjambithĩĩtie mbere ya andũ aakwa mũgĩĩcarĩria o ngundi ya mbaarĩ na tũmĩgate o tũniini. Mũũragithagia arĩa mataagĩrĩirwo nĩkũũragwo na mũkahonokia arĩa mataagĩrĩirwo nĩgũtũũra. Mũheenagĩrĩria andũ aakwa, nao makamwĩtĩkia.”

20 Nĩkĩo MWATHANI Ngai ekuuga ũũ: “nĩthũũrĩĩte ithitũ icio cianyu iria mũtegaga andũ nacio o ta ũrĩa nyoni itegagwo. Ngũcituanga, ndĩcithengie marũngoinĩ ma njara cianyu na ndekererie andũ acio mũgwatĩĩtie o ta ũrĩa nyoni irekagĩrĩrio.

21 Ningĩ ngũtembũranga itambaya icio cianyu, na ndute andũ aakwa mookoinĩ maanyu na mũtigaacooka kũmagwatia hĩndĩ ĩngĩ. Na nĩmũkaamenya atĩ niĩ nĩ niĩ MWATHANI.

22 “Na maheeni maanyu nĩmũũragĩĩte ngoro cia andũ arĩa athingu o acio niĩ itehaarĩirie kũũnũha. Ningĩ nĩmũgirĩrĩirie andũ arĩa aaganu matigaatigane na waganu wao mahonokie mĩoyo yao.

23 Kwoguo mũtigaacooka kuona cioneki icio cia maheeni o na kana mũcooke kũratha moohoro macio ma maheeni. Niĩ na niĩ nĩngaathara andũ aakwa ndĩmarute mookoinĩ maanyu na nĩmũkaamenya atĩ niĩ nĩ niĩ MWATHANI.”

Ngai kũmenereria gũthaathaiya mĩhianano

1 Thuutha ũcio athuuri amwe a Isiraeli magĩũka kũrĩ niĩ magĩikara o hau ndaarĩ.

2 Naake MWATHANI akĩnjarĩria akĩnjĩĩra atĩrĩ,

3 “Mũrũ wa mũndũ, andũ aya-rĩ, mehoceetie o mĩhiananoinĩ yao na maigĩĩte indo cia kũmahĩtithia o mbere ya maitho maao. Ũgwĩciiria nĩmbataire kũhooywo kĩrĩra nĩ o?

4 “Kwoguo maarĩrie ũmeere atĩ niĩ MWATHANI Ngai nguuga atĩ, mũndũ o wothe Mũisiraeli wĩhoceetie mĩhiananoinĩ na ũigĩĩte indo cia kũmũhĩtithia o maithoinĩ maake na agacooka gũũka kũhooya kĩrĩra harĩ mũnabii, nĩ niĩ, o niĩ MWATHANI, ngũmũcookeria ũhoro. Ngũmũcookeria kũringana na ũrĩa mĩhianano yake ĩrĩ mĩingĩ.

5 Ngwĩka ũguo nĩ geetha nyone ũrĩa ingĩcookia harĩ niĩ ngoro cia Aisiraeli oothe arĩa mahĩtithĩĩtio nĩ mĩhianano ĩyo yao.

6 “Nĩ ũndũ ũcio, arĩria andũ a Isiraeli ũmeere ũrĩa niĩ MWATHANI Ngai ndĩroiga: Garũrũkaai na mũhutaatĩre mĩhianano ĩyo yanyu na mũthengie indo icio cia kũmũhĩtithia hau maithoinĩ maanyu.

7 “Mũisiraeli o wothe kana mũrũũrĩrĩ o wothe ũthaamĩire bũrũri wa Isiraeli, ũraihanĩrĩire na niĩ na ũthaathayagia mĩhianano, ningĩ ũigĩĩte indo cia kũmũhĩtithia o maithoinĩ maake, agacooka agathiĩ kũrĩ mũnabii kũhooya ũhoro wakwa-rĩ, nĩ niĩ MWATHANI, o niĩ mwene, ngũmũhe icookio rĩake.

8 Ngaahũgũkĩra mũndũ ũcio ndũme andũ merutage naakena ndĩmũthengie oime harĩ andũ aakwa, na inyuĩ nĩmũkaamenya atĩ nĩ niĩ MWATHANI.

9 “Mũnabii angĩkĩheeneka aarie ndeto ciakwa, niĩ MWATHANI nĩ niĩ ngũkorwo ndĩmũheenereirie; ngaamũtambũrũkĩria guoko gwakwa ndĩmũniine oime thĩinĩ wa andũ aakwa a Isiraeli.

10 Na rĩĩrĩ, mũnabii na mũndũ ũcio ũgũthiĩte kũhooya kĩrĩra makaaherithio o ũndũ ũmwe.

11 Ngwĩka ũguo nĩguo ndigĩrĩrie Aisiraeli matige gũtigana na niĩ na matige gwĩthaahia na meehia maao, nĩ geetha matuĩke andũ aakwa na niĩ nduĩke Ngai wao. Nĩ niĩ MWATHANI Mwene Hinya Wothe ndoiga ũguo.”

Ũthingu wa Noa, Danieli, na Ayubu ũmahonokagia marĩ o ro oiki

12 Ningĩ MWATHANI akĩnjarĩria akĩnjĩĩra atĩrĩ,

13 “Mũrũ wa mũndũ, bũrũri ũngĩĩhĩtĩria, wage kũnjĩĩhoka, nĩngaũhũũra, ndĩũime irio na ndĩũtũmĩre ng’aragu o na niine andũ na mahiũ bũrũriinĩ ũcio.

14 Na rĩĩrĩ, Noa, Danieli, na Ayubu, o atatũ, o na mangĩkorwo kuo, o na marĩ athingu ũguo, no mahonokirie mĩoyo yao iiki. Ũguo nĩguo niĩ MWATHANI Mwene Hinya Wothe ndoiga.

15 “Ningĩ ingĩtũma nyamũ ndĩani bũrũri ũcio, nacio ciũtharĩkĩre na ciũikarie na ihooru, andũ maremwo nĩgũcooka kũgeraga kuo nĩ ũndũ wa gũciĩtigĩra-rĩ,

16 andũ acio atatũ o na mangĩkorwo marĩ kuo matingĩhota kũhonokia aanake kana airĩĩtu aao. No o oiki mangĩhota kwĩhonokia na bũrũri ũtigwo ũkirĩĩte ihooru o ũguo. Niĩ MWATHANI Ngai, o niĩ ndũũraga muoyo, nĩ niĩ ndoiga ũguo.

17 “Ningĩ ingĩtũma mbaara bũrũriinĩ ũcio, njuge mbaara ĩhunje bũrũriinĩ o na niine andũ na mahiũ,

18 niĩ MWATHANI Ngai, o niĩ ndũũraga muoyo, nguuga atĩ o na andũ acio atatũ mangĩkorwo kuo, matingĩhonokia aanake kana airĩĩtu aao. No o oiki mangĩĩhonokia.

19 “Ingĩtũma mũthiro bũrũriinĩ ũcio, na ndĩũikũrũkĩrie marũrũ na kũgĩe ikuũ nyingĩ, njũrage andũ na mahiũ,

20 o na Noa, Danieli, na Ayubu mangĩkorwo kuo, niĩ MWATHANI Ngai, o niĩ ndũũraga muoyo, nguuga atĩ, matingĩhonokia aanake na airĩĩtu aao; na ũthingu wao, mangĩhonokia o mĩoyo yao iiki.

21 “Niĩ MWATHANI Ngai nguuga atĩ nĩngũtũma anjaama aakwa arĩa ana ooru mũno, nao nĩ o mbaara, ng’aragu, nyamũ ndĩani, na mũrimũ kũu Jerusalemu. Na nĩngwananga andũ na nyamũ!

22 O na kũrĩ ũguo-rĩ, kũngĩoneka aanake na airĩĩtu megũtigara kuo nĩmekũhonokio. Moima kuo mamũkora, muona mĩtũũrĩre yao na ciĩko ciao nĩmũgũthirwo nĩ kĩeha, mwaririkana ũũru ũrĩa ndeehithĩirie Jerusalemu na ũguo nĩ ta kuuga maũndũ moothe njĩkĩĩte kuo.

23 Nĩmekũmũũmĩrĩria mũthirwo nĩ kĩeha muona mĩtũũrĩre yao o na mĩikarĩre yao na nĩmũkũmenya atĩ ndiĩkĩĩte maũndũ macio moothe njĩkĩĩte kuo itarĩ na gĩtũmi.” Nĩ MWATHANI Ngai woiga ũguo.

Ngerekano ya mũthabibũ

1 MWATHANI akĩnjarĩria akĩnjĩĩra atĩrĩ,

2 “Mũrũ wa mũndũ, mũtĩ wa mũthabibũ-rĩ, ũkĩrĩĩte mĩtĩ ĩrĩa ĩngĩ nakĩ? Rũhonge rwa mũthabibũ-rĩ, nĩ kĩĩ harĩ mĩtĩ ĩrĩa ĩngĩ ya mũtitũ?

3 Nĩwoyagwo ũthondeke kĩndũ kĩa bata? Nĩũthondekagwo higĩ cia gũcuuria indo?

4 Wega waguo no gũikio mwakiinĩ ũtuĩke rũkũ! Ningĩ-rĩ, wahĩa mĩthia yerĩ na gatagatĩ gũcure-rĩ, no ũgĩtũmĩrwo gũthondeka kĩndũ kĩngĩ?

5 Akorwo rĩrĩa uuma mũgima ũtanahĩa, ndũngĩthondekire kĩndũ-rĩ, warĩĩkia kũhĩa na watuĩka mũhu, nĩrĩo ũgũkĩgĩa bata?”

6 Nĩ ũndũ ũcio MWATHANI Mwene Hinya Wothe ekuuga atĩrĩ, “Andũ arĩa matũũraga Jerusalemu ngũmeeka o ta ũrĩa ndeeka mũtĩ ũcio wa mũthabibũ uuma mũtitũinĩ no ndaũikia mwakiinĩ watuĩka rũkũ.

7 Nĩngũmahũgũkĩra na megũkĩũrĩra mwaki ũmwe matoonye mwakiinĩ ũngĩ, naguo ũmacine. Inyuĩ na inyuĩ nĩmũrĩmenya atĩ niĩ nĩ niĩ MWATHANI rĩrĩa muona ndamahũgũkĩra.

8 Hĩndĩ ĩyo ndĩrĩtiga bũrũri ũyũ ũrĩ maganjo nĩ gũkorwo andũ aakuo nĩmeekĩĩte maũndũ ma kwaga kũnjĩĩhoka.” Ũguo nĩguo MWATHANI Ngai oiga.

Jerusalemu kwaga kwĩhokeka

1 Ningĩ MWATHANI akĩnjarĩria akĩnjĩĩra atĩrĩ,

2 “Mũrũ wa mũndũ, menyithia Jerusalemu maũndũ maarĩo me magigi.

3 Rĩĩre MWATHANI Ngai ekuuga atĩ woimĩĩte na waciarĩirwo bũrũri wa Kanaani. Thooguo aarĩ Mũamori, maitũguo naake aarĩ Mũhiti.

4 Ningĩ waciarwo o ũguo, mũthenya ũcio, gũtiarĩ mũndũ wa gũtinia rũrĩra kana wa gũgũthambia na maaĩ ũthere; wa gũkũhaka cumbĩ kana wa gũkũhumba nguo.

5 Gũtirĩ mũndũ wa kũiguĩrĩire tha agwĩke ũndũ o na ũmwe wa macio. Mũthenya ũcio waciarirwo wateanirio na kũu gĩthakainĩ tondũ nĩwagĩirwo kĩene.

6 “Na rĩrĩa ndahĩtũkĩire hau warĩ, ngĩona ũkĩĩgaragaria thĩinĩ wa thakame ĩyo yaku. Ningĩ o na ũiyũirwo nĩ thakame ũguo-rĩ, ndiagũtiganĩirie atĩ nĩguo ũkue.

7 Nĩndatũmire ũkũre ta mũmera ũrĩ na hinya mũno.Nĩwakũrire ũgĩtuĩka mũirĩĩtu mũgima, ũkiumia nyondo o na ũgĩkũria njuĩrĩ, no warĩ o njaga, ndwehumbĩĩte kĩndũ.

8 “Rĩrĩa ndahĩtũkĩire harĩ we riita rĩa keerĩ, ngĩona atĩ nĩwakinyĩĩtie ihinda rĩa kwendwo. Ngĩgĩkũhumba njaga ĩyo yaku na nguo yakwa. Tũgĩthondeka kĩrĩĩkanĩro nawe kĩa ũhiki na tũkĩiguana. Nawe ũgĩtuĩka wakwa.” Ũguo nĩguo niĩ MWATHANI Ngai ndoiga.

9 “Thuutha wa ũguo ngĩoya maaĩ ngĩgũthambia thakame ĩyo yaku na ngĩkũhaka maguta ma mĩtamaiyũ.

10 Ngĩcooka ngĩkũhumba nguo ng’emie mũno na iraatũ cia ngoothi iria thaka mũno. Ngĩcooka ngĩkũhumba nguo ya mbaamba thaka mũno o na nguo ya hariiri.

11 Ningĩ ngĩgwĩkĩra mathaga: ngĩgwĩkĩra bangiri mooko na mĩgathĩ ngingo.

12 Ngĩkũhe gĩcũhĩ kĩa iniũrũ na mindo cia matũ na kĩraũni gĩthaka mũno mũtwe.

13 Ngĩkũgemia na thahabu na betha; nguo ciaku cia mbaamba ciarĩ iria cia goro mũno na ng’emie mũno na iria ingĩ ciarĩ cia hariiri. Warĩaga irio ithondekeetwo na mũtu ũrĩa mwega mũno, na ũkarĩa ũũkĩ na maguta. Ũgĩgĩtuĩka mũtumia kĩrorerwa o nginya ũgĩtuĩka kwini.

14 Ũgĩkĩgĩa igweta mabũrũri moothe nĩ ũndũ wa ũrĩa warĩ mũthaka. No nĩ niĩ ndakũgemeetie ũguo. Ũguo nĩguo niĩ MWATHANI Mwene Hinya Wothe ndoiga.

15 “No rĩĩrĩ, nĩwetĩiire nĩ ũndũ wa ũthaka ũcio waku o na igweta rĩu rĩaku. Ũgĩkĩambĩrĩria kũhũũra ũmaraaya na mũndũ o wothe mwĩhĩtũkĩri.

16 Ũgĩkĩoya nguo imwe ciaku iria thaka, ũkĩgemia nacio nyũmba ciaku cia gũthaathaĩria na ũgĩcitũmĩra kũhũũra ũmaraaya nacio. Ũndũ ta ũcio ndũrĩ woneka, na ndũkooneka rĩngĩ.

17 Ningĩ ũkĩoya mathaga marĩa ndakũgemeetie namo ma thahabu na ma betha, ũgĩthondeka namo mĩhianano ya arũme na ũgĩthiĩ gũkoma nayo.

18 Ũgĩcooka ũkĩoya nguo iria cia goro ũkĩhumbĩra mĩhianano ĩyo, o na ũkĩoya maguta ma mĩtamaiyũ na ũbaani iria ndakũheete, ũgĩcicinĩra mbere ya mĩhianano ĩyo.

19 O na irio iria ndakũheete, na ndakũheaga mũtu ũrĩa mũhinyu na ũũkĩ na maguta, ũgĩciiga o hau mbere ya mĩhianano ĩyo irĩ igongoona. Ũguo nĩguo niĩ MWATHANI Mwene Hinya Wothe ndoiga.

20 “Ningĩ ũkĩoya aanake na airĩĩtu arĩa wanjiarĩire ũkĩmaheana kũrĩ mĩhianano ĩyo matuĩke igongoona.

21 Kaĩ ũmaraaya waku ũkĩrĩ mũniini, nĩ gũkorwo o na nĩwoire ciana ciakwa cia aanake na cia airĩĩtu ũgĩcithĩnjĩra mbere ya mĩhianano ĩyo ituĩke igongoona?

22 Mĩikarĩreinĩ ĩyo yaku yothe ya ũmaraaya na waganu-rĩ, ũrĩ waririkana rĩrĩa warĩ mũnyiinyi o rĩrĩa warĩ njaga na wegaragaragia thakameinĩ yaku?”

Mĩikarĩre ya ũmaraaya ya Jerusalemu

23 MWATHANI Mwene Hinya Wothe egũkiuga atĩrĩ, “Kaĩ ũrĩ thĩĩnainĩ-ĩ! Kaĩ ũrĩ thĩĩnainĩ-ĩ! Thuutha wa waganu waku wothe,

24 nĩweyakĩire igongoona na ũkĩyakĩra kũndũ gũtũũgĩru ihaaroinĩ ciothe.

25 Ningĩ macemanĩrioinĩ moothe ma barabara nĩweyakĩire kũndũ gũtũũgĩru, ũkĩhaka ũthaka waku ndooro, na ũgaturamagĩra na ũgakomagwo nawe nĩ mũndũ o wothe ũrehĩtũkĩra; ũmaraaya ũcio waku ũgagĩtororia.

26 Wahũũrire ũmaraaya na andũ a Misiri arĩa ũtũire ũhakaine nao, na nĩ andũ akorokeri atumia mũno. Ũtororeetie ũguo nĩ geetha ũthirĩkie ndaakare.

27 “Kwoguo ngĩgũtambũrũkĩria guoko ngũherithie. Nĩndanyiihanyiihirie irio ciaku,na ngĩkũneana kũrĩ arĩa magũthũire, nao nĩ o airĩĩtu a Afilisiti arĩa mairĩĩtio ngoro nĩ mĩikarĩre yaku ya waganu.

28 “Na tondũ ndwanyootokeete nĩwathiire kũhũũra ũmaraaya na Asiria na ndwanyootokire. Nĩ ma atĩ wahũũrire ũmaraaya na ndwanyootokire.

29 Wacookire ũkĩhũũra maraaya na ahũũri mbiacara a bũrũri wa Babilonia, no o na o matiigana gũkũnyootora.

30 “Kaĩ ngoro yaku nĩ nyũngũtũki-ĩ! Ũguo nĩguo niĩ MWATHANI Ngai ndĩrakwĩra nĩ gũkorwo nĩwĩkĩĩte maũndũ moothe marĩa mũndũ wa nja ũrĩa ũtanyootokaga ũmaraaya eekaga.

31 Nĩweyakĩire igongoona ituriinĩ ciothe cia njĩra na ũgĩaka kũndũ gũtũũgĩru ihaaroinĩ ciothe. Na nĩ ũndũ wa kũnyarara mbeeca, ũgĩĩkũũrana na maraaya marĩa mangĩ.

32 Wee, mũndũ wa nja ũyũ mũmaraaya, wee ũkomaga na ageni handũ ha mũthuuriguo!

33 Atĩrĩĩrĩ, maraaya moothe nĩkũheeo maheagwo mbeeca, nowe nĩ we ũgũraga anyaanya aaku oothe, ũkamahaka mooke kũrĩ we moimĩĩte mĩena yothe ũkome nao.

34 Gũtirĩ mũndũ wa nja ũhũũraga maraaya ta we: wee nĩ we ũheanaga mũcaara no ti kũheeo ũheagwo mbeeca. Ũguo nĩwekũũranĩre na maraaya marĩa mangĩ.”

Ngai gũtuĩra Jerusalemu

35 Kwoguo wee Jerusalemu mũndũ wa nja ũyũ mwaganu, gĩthikĩrĩrie ũhoro wa MWATHANI!

36 Niĩ MWATHANI Ngai nguuga atĩrĩ, “Nĩwanĩkire ũtharia waku na ũkĩonania njaga yaku rĩrĩa watharagia na anyaanya aaku, na mĩhianano yaku; o na rĩrĩa waitaga thakame ya ciana ciaku iria warutire magongoona kũrĩ mĩhianano ĩyo.

37 Kwoguo nĩngoonania anyaanya aaku, arĩa wendeete o na arĩa wathũire, na ngaamongania moime mĩena yothe makũhũũre. Nĩngaakũruta nguo mbere yao na oothe nĩmakoona njaga yaku.

38 Ningĩ ngaagũtuĩra o ta ũrĩa andũ a nja arĩa atharia na ooragani matuagĩrwo. Ndĩ na maraakara na ũiru mũingĩ, ngaakũhũũra uure thakame.

39 Ngaakũnenganĩra mookoinĩ maao, nao matharũrie igongoona ciaku na mamomore kũndũ gwaku kũrĩa ũhũũragĩra ũmaraaya na ũgathaathaĩria mĩhianano. Macooke makũrute nguo na mathaga maaku magũtige ũrĩ o ũguo njaga.

40 “Macooke makũũnganĩrie andũ makũhũũre na mahiga, na magũtemenge na hiũ ciao cia njora.

41 Andũ acio nĩmagaacina nyũmba ciaku na magũciirithie wĩroreirwo nĩ andũ a nja aingĩ. Na niĩ nĩngaatũma ũtigane na ũmaraaya waku o na ndũme ndũgaacooke kũgũra anyaanya aaku.

42 “Ũguo nĩguo ngaatũma maraakara maakwa mahoorere o na ũiru wakwa ũthire. Nĩngaahoorera na ndigaacooka kũraakara rĩngĩ.

43 Tondũ nĩwagire kũririkana ũrĩa ndaagũteithĩrĩirie rĩrĩa warĩ mwĩthĩ, na ũgĩĩthirĩkia na maũndũ macio moothe-rĩ, na niĩ nĩngũcookereirie maũũru macio moothe. Ndũgaacooka kuongerera waganu igũrũ rĩa maũndũ me magigi marĩa ũtũire wĩkaga. Ũguo nĩguo niĩ MWATHANI Ngai ndoiga.

Mũirĩĩtu atũkagia nyina

44 “Nĩ ũndũ ũcio arĩa oothe mooĩ kuuna thimo marĩheanaga thimo makoiga: ‘Mwana wa mũirĩĩtu atũkagia nyina.’

45 Wee-rĩ, ũtũkĩĩtie o maitũguo. Maitũguo nĩamenire mũthuuriwe o na ciana ciake. Wee-rĩ, ũtũkĩĩtie aarĩ a maitũguo. Aarĩ a maitũguo nĩkũmena maamenire athuuri o na ciana ciao. Maitũguo aarĩ mũtũmia Mũhiti, naake thooguo aarĩ Mũamori.

46 “Mwarĩ wa maitũguo ũrĩa mũkũrũ nĩ Samaria, naake hamwe na airĩĩtu aake matũũraga na mwena waku wa na rũgongo. Mwarĩ wa maitũguo ũrĩa mũnyiinyi kũrĩ we nĩ Sodomu. Naake e na airĩĩtu aake matũũraga na mwena waku wa na kĩanda.

47 Wee-rĩ, ndwaiganirwo nĩkũrũmĩrĩra waganu wao o na kana gwĩka ũmaramari wao. Thuutha wa ihinda iniini nĩwatororeetie mĩthiĩreinĩ yaku yothe ũkamakĩra.

48 “Niĩ MWATHANI Ngai, o niĩ ndũũraga muoyo-rĩ, nguuga atĩ mwarĩ wa maitũguo Sodomu kana airĩĩtu aake matianeeka ta ũrĩa wee na aarĩ aaku mwĩkĩĩte.

49 Mahĩtia ma mwarĩ wa maitũguo Sodomu na airĩĩtu aake maarĩ gwĩtĩĩa, gũkoroka na kũmaramara. Ningĩ matiigana gũteithĩrĩria athĩĩni na arĩa matarĩ na hinya.

50 Meetĩĩire na magĩĩka maũndũ ma gĩconoko mbere yakwa na niĩ ngĩmaherithia ta ũrĩa ndoonire kwagĩrĩire.

51 Na rĩĩrĩ, Samaria ndeekire o na nuthu ya waganu waku. Wee-rĩ, nĩkuongerera wathiaga ũkĩongagĩrĩra waganu waku. Aamwarĩ wa maitũguo moonekaga marĩ athingu maaringanio nawe.

52 Na rĩu nĩũkuuĩĩte gĩconoko kĩrĩa ũthengeirie aarĩ a maitũguo, nĩ gũkorwo nĩũgĩtororeetie ũgeeka maũndũ ma waganu kũmakĩra, o magakĩoneka marĩ athingu gũgũkĩra. Gĩconoke na wamũkĩre gĩconoko gĩaku nĩ amu nĩũtũmĩĩte aarĩ a maitũguo moonwo marĩ athingathingu gũgũkĩra.”

Sodomu na Samaria nĩikaarũũgamio rĩngĩ

53 MWATHANI arakĩĩra Jerusalemu atĩrĩ, “Nĩngaatũma Sodomu na airĩĩtu aake magaacĩre rĩngĩ; o na ndũme Samaria na airĩĩtu aake o nao magaacĩre rĩngĩ. Hĩndĩ ĩyo o nawe no ngaatũma ũgaacĩre o ta o,

54 nĩguo ngũconore ũigue thoni nĩ ũndũ wa maũndũ moothe marĩa waneeka ũkĩgwatanĩra nao.

55 Aarĩ a maitũguo Sodomu na airĩĩtu aake na Samaria na airĩĩtu aake, nĩmakaagaacĩra rĩngĩ. Hĩndĩ ĩyo o nawe ũrĩ hamwe na airĩĩtu aaku nĩũkaagaacĩra rĩngĩ.

56 Githĩ ndwathekagĩrĩra Sodomu mahinda marĩa waiyũirwo nĩ mwĩtĩĩo,

57 rĩrĩa ũmaramari waku ũtaamenyekeete wega? Rĩu-rĩ, ũtuĩkĩĩte o taake, kĩndũ gĩa gũthekererwo nĩ airĩĩtu a Edomu na andũ arĩa oothe mamarigicĩirie, o na nĩ airĩĩtu Afilisiti arĩa makũmeneete na magũthiũrũrũkĩirie na mĩena yothe.

58 No mũhaka ũkĩherithio nĩ ũndũ wa meehia na maũndũ macio maaku me magigi na ma waganu.” Nĩ MWATHANI woiga ũguo.

Kĩrĩĩkanĩro gĩa gũtũũra tene na tene

59 MWATHANI Ngai ekuuga ũũ: “Ngũgwĩka o ta ũrĩa nawe wĩkĩĩte. Nĩũthaahĩĩtie mwĩhĩtwa waku o na ũgathũũkia kĩrĩĩkanĩro giitũ nawe.

60 No o na kũrĩ ũguo-rĩ, nĩngaaririkana kĩrĩĩkanĩro kĩrĩa ndarĩĩkanĩire nawe rĩrĩa warĩ mwĩthĩ, na nĩngaathondeka nawe kĩrĩĩkanĩro gĩa gũtũũra tene na tene.

61 Nĩũkaaririkana mĩthiĩre yaku ya tene na ũconoke rĩrĩa ngaagũcookeria mwarĩ wa maitũguo ũrĩa mũkũrũ na ũrĩa mũnyiinyi matuĩke ta aarĩ aaku, o na gũtuĩka ũndũ ũcio ndwarĩ kĩrĩĩkanĩroinĩ giitũ nawe.

62 Nĩngeerũhia kĩrĩĩkanĩro giitũ nawe, na nĩũkaamenya atĩ nĩ niĩ MWATHANI.

63 Niĩ-rĩ, nĩngaakuohera maũũru moothe marĩa waneka. Wee nawe ũkaamaririkanaga ũgaconoka, na ndũgaacooka gũtumũra kanua rĩngĩ nĩ ũrĩa ũhereete.” Ũguo nĩguo niĩ MWATHANI Mwene Hinya Wothe ndoiga.

Ngerekano ya nderi na mũthabibũ

1 O rĩngĩ MWATHANI akĩnjarĩria akĩnjĩĩra atĩrĩ,

2 “Mũrũ wa mũndũ, arĩria andũ a Isiraeli na ngerekano

3 uuge: MWATHANI Ngai ekuuga ũũ: Hĩndĩ ĩmwe nĩkwarĩ na rwĩgĩ rũmwe rũnene mũno rwarĩ na mathagu manene na njoya nene na thaka mũno cia marangi mwanya mwanya. Rwĩgĩ rũu nĩrwathire irĩmainĩ cia Lebanoni na rũgĩtua gathuuna ka mũtarakwa.

4 Rũgĩcooka rũkĩoya gathuuna kau ka mũcacaana rũgĩgatwara bũrũri wa ahũũri mbiacara. Rũgĩkaiga o kũu itũũrainĩ rĩa ahũũri mbiacara acio.

5 Rũgĩcooka rũkĩoya mbegũ ĩmwe ya bũrũri wanyu rũkĩhanda mũgũndainĩ mũnoru mũno, gũkuhĩ na maaĩ maingĩ, rũkĩmĩhanda o ta mũtĩ ũrĩa ũkũraga ũtaambĩĩte kũu hũgũrũrũinĩ cia maaĩ.

6 Nayo mbegũ ĩyo ĩkĩmera na ĩgĩtuĩka mũthabibũ ũtarĩ wa kũraiha na igũrũ, ũkĩhaamba na ũkĩroria honge ciaguo na kũrĩ rwĩgĩ rũu. Nayo mĩri yaguo ĩgĩthiĩ na thĩ. Ũgĩgĩtuĩka mũthabibũ, ũkĩgĩa na honge na mathangũ maruru.

7 “Ningĩ nĩkwarĩ na rwĩgĩ rũngĩ rũnene rwarĩ na mathagu manene na njoya nyingĩ. Na rĩĩrĩ, mũthabibũ ũcio ũkĩhũgũra mĩri yaguo na kũrĩ rwĩgĩ rũu rũngĩ na ũkĩgĩa na honge ũgĩciroria na kũrĩ ruo atĩ nĩguo rũũheaga maaĩ.

8 Na menya atĩ wahandĩĩtwo mũgũndainĩ mũnoru gũkuhĩ na maaĩ maingĩ nĩguo ũrute honge na ũciare matunda o na ũtuĩke mũthabibũ wa bata!

9 “Nĩ ũndũ ũcio niĩ MWATHANI Ngai ngũkĩũria ũũ: ‘Mũthabibũ ũcio-rĩ, nĩũgaakĩrekwo ũtheereme? Githĩ rwĩgĩ rwa mbere, ti kũũmunya rukaaũmunya na mĩri, rũhurunje matunda maaguo, rũtemenge honge ciaguo na rũcitige ciũme? Atĩrĩĩrĩ, kũũkũra na mĩri gũtikaabatara hinya mũingĩ o na kana andũ aingĩ.

10 Nĩwahandirwo ti itherũ; no rĩĩrĩ, nĩũgaatũũra na ũtheereme? Rĩrĩa rũhuuho rwa kuuma na mwena wa na irathĩro rũkaaũhuruuta-rĩ, githĩ ti kũũma ũkooma o biũ? Ũkooma ũrĩ o hau ũhandĩĩtwo.’ ”

Ngerekano kũrugũrwo

11 Ningĩ MWATHANI akĩnjarĩria akĩnjĩĩra atĩrĩ, “Ta ũrĩa nyũmba ĩyo nemi atĩrĩ: nĩmũũĩ maũndũ maya marenda kuuga atĩa?

12 Ũcooke ũmeere atĩ mũthamaki wa Babilonia nĩokire Jerusalemu na akĩnyiita mũthamaki na atongoria aakuo akĩmatwara gwake Babilonia.

13 Nĩoire ũmwe wa andũ a nyũmba ya mũthamaki agĩthondeka kĩrĩĩkanĩro naake na akĩmwĩhĩtithia nĩ geetha atuĩke mwathĩki kũrĩ we. Aatahire atongoria,

14 nĩ geetha bũrũri ũcio ũhoorere na wage kwambararũka, na ningĩ nĩ geetha ũtũũrie kĩrĩĩko gĩa gwathĩka.

15 No rĩĩrĩ, mũthamaki ũcio wa Juda mwerũ nĩambũrũrũkĩre, agĩtũmana Misiri nĩ geetha ateithĩrĩrio na mbarathi na thigari nyingĩ. Mũthamaki ũcio wekire ũguo-rĩ, nĩekũhootana hiihi? No eeke ũguo na ahonoke? No athũũkie kĩrĩĩko na arekererio?

16 “ Niĩ MWATHANI Ngai, o niĩ ndũũraga muoyo, nguuga agaakuĩra o kũu Babilonia kwa ũcio wamũtuĩte mũthamaki, tondũ nĩarangĩrĩirie mwĩhĩtwa wake na agathũũkia kĩrĩĩko kĩrĩa aathondekeete naake.

17 Atĩrĩĩrĩ, mũthamaki wa Misiri o na angĩgooka na thigari nyingĩ, ndakaahota kũmũteithia kũrũa mbaara hĩndĩ ĩrĩa Ababilonia magaaka ihumbu cia tĩĩri na meenje mĩtaro nĩguo mahote kũũraga andũ aingĩ.

18 Nĩarangĩrĩirie mwĩhĩtwa wake na agĩthũũkia kĩrĩĩko kĩrĩa maarĩĩkanĩire. Nĩekire maũndũ macio moothe, rĩu ndekũhonoka.”

19 “Niĩ MWATHANI Ngai, o niĩ ndũũraga muoyo, nguuga ũũ: ngaamũherithia nĩ ũndũ wa gũthũũkia kĩrĩĩko kĩrĩa eehĩtĩĩte na rĩĩtwa rĩakwa atĩ nĩakaarũmia.

20 Ngaamwambĩra mũtego na nĩakaanyiitwo, njooke ndĩmũtware Babilonia. Kũu nĩkuo ngaamũherithĩria nĩ ũndũ wa gũkorwo atarĩ mwĩhokeku harĩ niĩ.

21 Thigari ciake cia ita iria njoorua ikooragĩrwo mbaarainĩ, na iria igaatigara ihurunjwo mĩena yothe. Hĩndĩ ĩyo nĩmũkaamenya atĩ nĩ niĩ MWATHANI ndoiga ũguo.”

Ngai kũhe andũ kĩĩrĩgĩrĩro

22 Ningĩ MWATHANI Ngai ekuuga atĩrĩ, “Nĩngooya gathuuna ka mũcacaana ka mũthia wa mũtarakwa ndĩkahande

23 kĩrĩmainĩ gĩa Isiraeli kĩrĩa kĩraihu na igũrũ gũkĩra iria ingĩ. Nako gakũre karute honge na gaciare gatuĩke mũtarakwa mũnene. Nyoni cia mĩthemba yothe ĩgookaga ho ĩkegitia hongeinĩ ciaguo.

24 Mĩtĩ yothe ya bũrũri nĩkaamenya atĩ nĩ niĩ MWATHANI, na atĩ nĩndũmaga mĩtĩ ĩrĩa mĩraihu ĩkuhĩhe, na ngatũma ĩrĩa mĩkuhĩ ĩraihe na igũrũ. Nĩndũmaga ĩrĩa mĩruru ĩhũrũrũke, nayo ĩrĩa mĩhũrũrũku ĩrũre.

“Nĩ niĩ MWATHANI ndoiga ũguo, na nĩngũhingia ũguo ndoiga atĩ nĩngeeka.”

Mũndũ o mũndũ agaatugwo nĩ ũndũ wa ciĩko ciake mwene

1 Ningĩ MWATHANI akĩnjarĩria akĩnjĩĩra atĩrĩ,

2 “Nĩkĩ gĩtũmaga bũrũriinĩ wa Isiraeli mũtũũre mũcookagĩra thimo ĩno:

Aabaaba maarĩire thabibũ njĩthĩ no nĩ magego ma ciana maiguire thithi?

3 “Atĩrĩĩrĩ, niĩ MWATHANI Ngai, o niĩ ndũũraga muoyo, nguuga atĩ, gũtigũcooka kũgĩa na bata wa gũcookera thimo ĩno bũrũriinĩ wa Isiraeli hĩndĩ ĩngĩ.

4 Atĩrĩĩrĩ, muoyo o wothe nĩ wakwa. Muoyo wa ithe na muoyo wa mwana, yerĩ no yakwa. Mũndũ ũrĩa wehia nĩ we ũrĩkuaga.

5 “No no kuoneke mũndũ mũthingu ũhingagia watho.

6 Mũndũ ũtathiaga irĩmainĩ kũrĩa irioo na ũtathaathayagia mĩhianano ĩrĩa andũ a Isiraeli meigĩire; ningĩ ũtahĩtagia na mũtumia wa mũndũ ũngĩ, o na ũtakomaga na mũndũ wa nja arĩ mahindainĩ maake ma mweri.

7 Mũndũ ũtahatagĩrĩria mũndũ o na ũrĩkũ; ũkombaga na agacookia; ũtarĩ hĩndĩ eekaga maũndũ ma ũici; ũheaga andũ arĩa matarĩ na irio irio; na ũteithagĩrĩria arĩa athirĩre nĩ nguo.

8 Mũndũ ũkombithanagia na ndacaragia uumithio o na kana ageetia makĩria. Mũndũ ũtheemaga ũũru na agatuithanagia mũndũ na mũndũ ũrĩa ũngĩ ahũthĩire kĩhooto.

9 Mũndũ wathĩkagĩra mawatho maakwa na agaconokagĩra maathani maakwa. Mũndũ ta ũcio nĩ mũthingu kũna na nĩagũtũũra muoyo. Nĩ niĩ MWATHANI Mwene Hinya Wothe ndoiga ũguo.

10 “No rĩĩrĩ, mũndũ ta ũcio rĩngĩ no agĩe na mwana wendeete o haaro na mbaara.

11 Mwana wĩkaga maũndũ ta maya ithe atarĩ eeka: kũrĩa irio kũu irĩmainĩ, kũhĩtia na mũtumia wa mũndũ ũngĩ;

12 kũhatagĩrĩria arĩa athĩĩni na arĩa matarĩ na hinya; gũtuunyana indo na hinya; gũkombaga na ndarĩhe; gũthaathayagia mĩhianano; gwĩka maũndũ ma wagi thoni; gũkombithanagia agĩcaragia uumithio na ageetĩĩa makĩria.

13 Mwana ta ũcio nĩgũkua agaakua na ndagaatũũra muoyo. Tondũ nĩ we wĩkĩĩte maũndũ macio me magigi nĩagĩrĩirwo nĩkũũragwo na acookererwo nĩ mahĩtia maake mwene.

14 “Naake angĩcooka agĩe na mwana. mwana, naake mwana ũcio oone ũmaramari wothe ũrĩa ithe eekaga, no aage kũrũmĩrĩra mĩtugo ya ithe.

15 Mwana ũcio aage gũthaathaiya mĩhianano ĩrĩa Aisiraeli meigĩire na aage gũthiaga kũrĩa irio irĩmainĩ. Athengere gũthiĩ kũhĩtia na mũtumia wa mũndũ ũngĩ.

16 Aage kũhatĩrĩria o na kana gũtuunya mũndũ o na ũrĩkũ kĩndũ gĩake, na akomba akarĩha. Ateithagie arĩa matarĩ na irio o na arĩa athirĩre nĩ nguo.

17 Atheemage gwĩka maũndũ ma ũmaramari na akombithania akagaaga gwĩtia uumithio. Ningĩ akahingagia mawatho maakwa na gwathĩkĩra maathani maakwa. Mwana ũcio ndakooragwo nĩ ũndũ wa meehia ma ithe; no nĩgũtũũra agatũũra muoyo.

18 Na mwena ũrĩa ũngĩ, ithe atũũraga aiyaga, aheenanagia na eekaga maũndũ mooru kũrĩ mũndũ o wothe. Ithe nĩakooragwo na ndagaatũũra muoyo na nĩ we ũgacookererwo nĩ meehia marĩa eekĩĩte.

19 “No rĩĩrĩ, inyuĩ mũũragia nĩ kĩĩ gĩkũgiria mwana aherithio nĩ ũndũ wa meehia ma ithe. Icookia nĩ atĩ mwana nĩekĩĩte maũndũ ma kĩhooto na meega. Mwana ũcio nĩathĩkĩire mawatho maakwa na agaathĩkĩra maathani maakwa na nĩakĩagĩrĩirwo nĩgũtũũra muoyo.

20 Mũndũ ũrĩa wĩhagia nĩ we ũrĩkuaga. Mwana ndarĩherithagio nĩ ũndũ wa mahĩtia ma ithe, kana ithe akaherithio nĩ ũndũ wa mahĩtia ma mwana. Mũndũ ũrĩa mũthingu arĩtugagwo nĩ ũndũ wa ũthingu wake mwene, na ũrĩa mwaganu arĩherithagio nĩ ũndũ wa waganu wake mwene.

21 “Mũndũ ũrĩa naake ũtũire eehagia, angĩgarũrũka atige kwĩhia na aambĩrĩrie kũhingia mawatho maakwa, eeke maũndũ ma kĩhooto na meega, ndagaakua no nĩagaatũũra muoyo.

22 Meehia maake moothe nĩakooherwo, na agĩtũũre muoyo, tondũ nĩekĩĩte ũrĩa kwagĩrĩire.

23 Nĩ ũndũ-rĩ, niĩ MWATHANI Ngai ndikenaga ngĩona mũndũ ũrĩa mũũru agĩkua. Ngenaga nĩkuona akĩĩrira nĩ geetha atũũre muoyo.

24 “Mũndũ ũrĩa mũthingu naake angĩregenyũka, atige gwĩka maũndũ ma ũthingu aambĩrĩrie gũthingata maũndũ moothe mooru na me magigi marĩa meekagwo nĩ andũ arĩa imaramari-rĩ, mũgwĩciiria no athiĩ na mbere gũtũũra muoyo? Aaca! Atĩrĩĩrĩ, gũtirĩ ũndũ o na ũmwe wa maũndũ ma ũthingu marĩa aaneeka makaaririkanwo. Nĩgũkua agaakua nĩ ũndũ wa meehia marĩa eekĩĩte na nĩ ũndũ wa ũguo aagĩĩte kwĩhokeka.

25 “No rĩĩrĩ, inyuĩ muugaga MWATHANI ndahũthagĩra waragania! Aisiraeli, tathikĩrĩriai. Atĩrĩĩrĩ, nĩ niĩ itarĩ na waragania? Githĩ ti inyuĩ mũtarĩ na waragania?

26 Mũndũ mũthingu angĩtigana na ũthingu wake ageekaga wĩhia angĩkua, angĩkua nĩ ũndũ wa wĩhia ũcio eekĩĩte.

27 No rĩĩrĩ, mũndũ mwaganu angĩtigana na waganu ũrĩa eekĩĩte na eeke maũndũ ma kĩhooto na meega, nĩkũhonokia ekũhonokia muoyo wake.

28 Agaatũũra muoyo na ndakue tondũ nĩecũũranirie ũhoro wa meehia moothe marĩa aaneeka agĩtigana namo.

29 Ĩndĩ andũ a Isiraeli moigaga atĩrĩ, ‘MWATHANI ndarĩ waragania!’ Andũ a Isiraeli, nĩ niĩ itarĩ na waragania? Githĩ ti inyuĩ mũtarĩ na waragania?

30 “Nĩ ũndũ ũcio, inyuĩ andũ a Isiraeli, ngaamũtuĩra o mũndũ kũringana na mĩthiĩre yake. Nĩ niĩ MWATHANI Ngai ndoiga ũguo. Kĩĩrirei na mũtigane na maũũru maanyu moothe, na wĩhia ndũgũtuĩka kĩndũ gĩa kũmũhĩngithia.

31 Thengeraai mahĩtia moothe marĩa mwĩkaga na mũgĩe na ngoro njerũ na roho mwerũ. Andũ a Isiraeli, kaĩ mũgũkĩenda gũkua nĩkĩ?

32 Niĩ ndĩkenagio nĩ gĩkuũ kĩa mũndũ o na ũmwe. Niĩ MWATHANI Ngai ndoiga ũguo. Kwoguo mwĩrireei na nĩmũgũtũũra muoyo.”

Rwĩmbo rwa macakaya

1 MWATHANI akĩnjarĩria akĩnjĩĩra atĩrĩ, “Ambĩrĩria gũcakaĩra anene a Isiraeli.

2 Moorie atĩrĩ, Kaĩ maitũguo aarĩ ũ!

Aatariĩ ta mũrũũthi wa mũgoma gatagatĩ ka mĩrũũthi ya njamba.

3 Aamamaanagia na mĩrũũthi ĩrĩa mĩĩthĩ imaamoinĩ,

akĩrera ciana ciake.

Aarerire kĩana kĩmwe gĩake gĩgĩtuĩka mũrũũthi mwĩthĩ,

gĩgĩcooka gĩkĩĩruta kũhĩta,

na gĩgĩtuĩka gĩa kũrĩaga andũ.

4 Ndũũrĩrĩ ciaigua ũhoro wakĩo,

ikĩenja irima rĩa gũgĩtega na igĩkĩgwatia.

Igĩkĩguucũrũrũkia na ndwano

igĩgĩtwara bũrũri wa Misiri.

5 Mũrũũthi ũrĩa nyina wakĩo ũgĩgĩeterera

o kinya ũgĩte mwĩhoko wothe.

Ũgĩcooka ũkĩoya kĩana kĩngĩ kĩaguo

ũgĩkĩrera gĩgĩtuĩka mũrũũthi mũgima.

6 Kĩagimara, gĩatwaranaga na mĩrũũthi ĩrĩa ĩngĩ,

nakĩo gĩkĩĩruta kũhĩta na kũrĩaga andũ.

7 Gĩgĩkĩharagania nyũmba ciao iria ciakĩĩtwo na thingo cia hinya,

na gĩgĩthũũkangia matũũra maao.

Bũrũri wothe ũgĩkira ihooru

nĩkũiguaga mũraramo wakĩo.

8 Ndũũrĩrĩ igĩkĩomokera

ciumĩĩte mĩena yothe na ng’ongo ciothe iria ciakĩrigiicĩirie,

igĩkĩigĩra mĩtego igĩkĩgwatia.

9 Igĩgĩtoonyia gĩkerengeinĩ ikĩnyiitĩĩte na ndwano,

igĩgĩtwara kũrĩ mũthamaki wa Babilonia.

Igĩkĩhingĩra nyũmbainĩ njake na thingo cia hinya

nĩ geetha mũraramo wakĩo ndũkaanacooke kũigwĩka rĩngĩ

kũu irĩmainĩ cia Isiraeli rĩ kana rĩ.

10 “Ningĩ maitũguo aarĩ ta mũthabibũ

ũhandĩĩtwo ndeereinĩ cia maaĩ,

ũkoimia honge nyingĩ na matunda maingĩ,

nĩ ũrĩa maaĩ maarĩ maingĩ.

11 Warĩ na honge cia hinya

iria ciatuĩkire mĩthĩĩgi ya anene.

Naguo mũthabibũ ũcio ũgĩkũra ũkĩraiha na igũrũ

o nginya ũkĩhuutia matu.

Ũgakĩĩrooragĩrwo nĩ ũndũ wa ũrĩa warĩ mũraihu

na warĩ na honge nyingĩ.

12 No nĩwamunyirwo na marũrũ maingĩ

ũkĩrekanio thĩ.

Rũhuuho rwa kuuma mwena wa irathĩro naruo rũkĩũmia matunda maaguo.

Honge ciaguo iria ciarĩ na hinya ikiunangwo ikĩũma,

igĩcooka igĩcinwo na mwaki.

13 Rĩu mũthabibũ ũcio ũcookeete ũkahandwo

werũinĩ kũndũ kũũmũ na gũtarĩ maaĩ.

14 Mwaki ũrutĩĩtie gĩtinainĩ kĩa mũthabibũ ũcio

ũgacina honge na matunda maaguo.

Ndũkaagĩa na honge irĩ na hinya

cia gũgaatuĩka mĩthĩĩgi ya anene rĩngĩ.”

Rũu nĩruo rwĩmbo rwa macakaya

na nĩrũinĩĩtwo maita maingĩ.