Category: Esiteri

Gũtaarĩria

Maũndũ ma ibuku rĩa Esiteri meekĩkire gĩikaroinĩ kĩa mũnene wa Perisia kĩrĩa aikaraga hĩndĩ ya heho. Ũhoro ũrĩa ũheanĩĩtwo ũkoniĩ mũtumia Mũyahudi njamba wetagwo Esiteri, ũrĩa nĩ ũndũ wa wĩrutĩri wake kũrĩ andũ a rũũrĩrĩ rwake na ũcamba wamahonokirie matikaaniinwo nĩ thũ ciao. Ibuku rĩĩrĩ nĩrĩheanĩĩte ũhoro wa ũrĩa Thigũkũ ya Kĩyahudi ya Purimu yambĩrĩirie na ũrĩa yugĩĩte.

Maũndũ marĩa marĩ ibukuinĩ rĩĩrĩ

Esiteri gũtuĩka kwini 1.1–2.23

Mĩbango mĩũru ya Hamani 3.1–5.14

Hamani kũũragwo 6.1–7.10

Ayahudi kũhoota thũ ciao 8.1–10.3

Kwini Vashiti kũregana na watho wa mũthamaki Ahasuerusu

1-2 Atĩrĩĩrĩ, mũthamaki Ahasuerusu arĩ gĩtĩinĩ gĩake kĩa ũnene itũũrainĩ rĩa Susa, mũciĩ mũnene wa Perisia, aathaga mabũrũri igana na mĩrongo ĩĩrĩ na mũgwanja, kuuma India nginya Ethiopia.

3 Mwakainĩ wa gatatũ wa ũthamaki wake nĩathondekeire anene na aathani oothe iruga. Mbũtũ cia ita cia Perisia na cia Media ciarĩ kuo o hamwe na abarũũthi na andũ arĩa a bata a ng’ongo ciothe.

4 Ihindainĩ rĩa mĩeri ĩtandatũ nĩonanirie ũtonga wa ũthamaki wake, na ũrĩa bũrũri watĩĩĩtwo o na hinya waguo.

5 Thuutha wa ũguo, mũthamaki nĩathondekeire andũ oothe, itonga na athĩĩni, arĩa maarĩ itũũrainĩ rĩu inene rĩa Susa, iruga. Iruga rĩu rĩarĩirwo kiumia kĩmwe, na rĩarĩagĩrwo nja ya nyũmba ya mũthamaki.

6 Kũu nja ya nyũmba ya mũthamaki kwagemeetio na itambaya cia gataani cia rangi mwerũ na wa mburuu. Itambaya icio ciacunjurĩĩtio na ndigi cia gataani cia rangi wa babũ na ciohereirwo tũhocioinĩ twa betha tũtheecereirwo itugĩinĩ cia mahiga ma nyaigĩ. Nĩkwarĩ itĩ cia gwĩtiirania ciathondekeetwo na thahabu na betha ciaigĩĩtwo kũu nja ĩrĩa yarĩĩtwo mahiga ma nyaigĩ ma rangi mwerũ, mũtuune, ngoikoni, na mũirũ.

7 Ikombe iria andũ maanyuaga nacio ciarĩ cia thahabu na gũtirĩ kĩahaanaine na kĩrĩa kĩngĩ, na mũthamaki nĩamaheire ndibei na ũtaana.

8 Ũhoroinĩ wa kũnyua gũtirĩ mũndũ wathimagĩrwo;mũthamaki nĩathĩĩte andũ arĩa maatungatagĩra kwa mũthamaki atĩ mũndũ arekwo anyue o ũrĩa angĩenda.

9 Hĩndĩ ĩyo naake kwini Vashiti aarĩ na iruga aarugithĩirie atumia kũu thĩinĩ mũciĩ kwa mũthamaki.

10 Mũthenyainĩ wa mũgwanja wa iruga, mũthamaki nĩanyuaga akeneete, na nĩagĩĩtire andũ mũgwanja maarĩ ahakũre arĩa mamũtungatagĩra we mwene, na nĩ o Mehumani, Bizatha, Harabona, Bigatha, Abagutha, Zetharu, na Karikasi,

11 akĩmaatha mathiĩ mareehe kwini Vashiti ekĩrĩĩte thũmbĩ yake ya ũkwini nĩguo amuonanie kũrĩ anene na andũ oothe arĩa eetĩĩte. Kwini Vashiti aarĩ mũtumia mũthaka mũno.

12 No rĩĩrĩ, meera kwini Vashiti ũrĩa mũthamaki aathana, akĩrega gũũka. Ũhoro ũcio nĩwaraakaririe mũthamaki mũno.

13 Atĩrĩĩrĩ, mũthamaki nĩarĩ na mũtugo wa kũũria andũ arĩa me na ũmenyo ũhoroinĩ ũkoniĩ watho na mũtaratara. Kwoguo nĩatũmanĩire andũ arĩa maamũtaaraga, arĩa mangĩamenyire ũrĩa kwagĩrĩirwo nĩgwĩkwo.

14 Andũ arĩa kaingĩ ooragia ũtaari nĩ Karishena, Shetharu, Adamatha, Tarishishi, Meresu, Marisena, na Memukani. Acio nĩ o anene mũgwanja a Perisia na Media arĩa maarĩ na itĩ iria nene biũ ũthamakiinĩ ũcio wake.

15 Nĩakĩũririe andũ acio atĩrĩ, “Niĩ mũthamaki Ahasuerusu, njagĩrĩirwo nĩgwĩka atĩa na kwini Vashiti tondũ ndanathĩkĩra watho wakwa ndamũtũmĩra andũ arĩa ahakũre? Watho ũkuuga tũmwĩke atĩa?”

16 Memukani akĩĩra mũthamaki na njaama ciake atĩrĩ, “Kwini Vashiti to mũthamaki wiki ahĩtĩirie, ahĩtĩirie anene oothe o hamwe na andũ oothe a kũrĩa guothe mũthamaki Ahasuerusu aathanaga!

17 Atumia maigua ũhoro wa gĩĩko kĩu gĩa kwini, nĩmekũira athuuri aao amu mekuuga atĩrĩ, ‘Mũthamaki Ahasuerusu aathanire atĩ kwini Vashiti ooke, naake arega gũũka.’

18 Atumia a anene a Perisia na Media arĩa maigua ũhoro ũcio wa kwini nĩmekũwĩra athuuri aao ũũmũũthĩ o na gũtaanatuka. Atumia kũndũ guothe nĩmekũima athuuri aao gĩtĩĩo, na athuuri makĩraakario nĩ atumia aao.

19 Tondũ ũcio, mũthamaki witũ, ũngĩona arĩ wega-rĩ, ruta watho atĩ Vashiti ndakaanooneke mbere ya mũthamaki rĩngĩ. Aathana atĩ watho ũcio wandĩkwo mawathoinĩ ma Perisia na Media nĩ geetha ndũkaanagarũrwo, na ũcarie mũtumia ũngĩ mwega atuĩke kwini handũ haake.

20 Rĩrĩa watho ũcio waku ũrĩmenyithanio bũrũriinĩ wothe ũrĩa wathaga, mũtumia wothe nĩarĩheaga mũthuuriwe, arĩ gĩtonga kana mũthĩĩni, gĩtĩĩo kĩrĩa kĩagĩrĩire.”

21 Mũthamaki o hamwe na njaama icio ingĩ nĩmaakenirio nĩ rĩciiria rĩu, na mũthamaki agĩgĩĩka ũrĩa Memukani oigĩĩte.

22 Nĩakĩandĩkĩire andũ a bũrũri ndũmĩrĩri, o bũrũri na rũthiomi na mwandĩkĩre wa bũrũri wao, akiuga atĩ mũthuuri wothe no mũhaka akorwo nĩwe mũnene wa mũciĩ wake na ciugo ciake ikoragwo irĩ cia gwathĩkĩrwo.

Esiteri gũtuĩka kwini

1 Thuutha wa maũndũ macio, o na mũthamaki arĩĩkĩĩtie kũraakarũka, nĩeciiragia ũhoro wa ũrĩa Vashiti eekĩĩte, o na ũrĩa aamũtuĩrĩire ũũru.

2 Nao andũ amwe arĩa maamũtaaraga, arĩa maakuhanĩrĩirie naake mũno, makĩmwĩra atĩrĩ, “Kaĩ ũtangĩcaria airĩĩtu eethĩ thingi?

3 Atĩrĩĩrĩ, thuura anene kuuma rũgongo o rũgongo thĩinĩ wa bũrũri ũyũ wathanaga ũmeere atĩ mareehe airĩĩtu oothe thingi na athaka nyũmbainĩ ya atumia a mũthamaki gũũkũ Susa mũciĩ ũrĩa mũnene. Reke maroragwo nĩ Hegai, ũrĩa mũhakũre ũroraga atumia aaku, na ũreke manengerwo indo cia kũmathakaria.

4 Thuutha wa ũguo woe mũirĩĩtu ũrĩa ũkwenda atuĩke kwini handũ ha Vashiti.”

Mũthamaki nĩaiguire rĩciiria rĩu rĩrĩ rĩega, na agĩkĩrĩrũmĩrĩra.

5 Kũu thĩinĩ wa Susa mũciĩ ũcio mũnene nĩgwatũũraga Mũyahudi wetagwo Moridekai mũrũ wa Jairũ; aarĩ wa mũhĩrĩga wa Benjamini na aarĩ wa rũciaro rwa Kishu na Shimei.

6 Rĩrĩa mũthamaki Nebukadinezaru wa Babilonia aatwarire mũthamaki Jehoiakini wa Juda ithaamĩrio kuuma Jerusalemu hamwe na andũ arĩa maatahanĩirio naake, Moridekai aarĩ ũmwe wao.

7 Moridekai nĩarĩ na mwarĩ wa ithe mũnyiinyi wetagwo Esiteri, na rĩĩtwa rĩake na Kĩhibirania nĩ Hadasa; aarĩ mũirĩĩtu mũthaka, na aarĩ kĩĩrorerwa. Aciari a mũirĩĩtu ũcio maakua, Moridekai nĩamuoire akĩmũrera o ta mwarĩ.

8 Rĩrĩa mũthamaki aathanire na gũgĩgĩtwarwo airĩĩtu aingĩ mũciĩ wa Susa, Esiteri aarĩ ũmwe wao. O naake nĩakĩigirwo kwa mũthamaki rungu rwa Hegai, ũrĩa waroraga nyũmba ya atumia a mũthamaki.

9 Esiteri nĩagĩkenirie Hegai, naake agĩkĩmwenda, na ategũte ihinda nĩamũnengerire indo cia kũmũthakaria na akaheagwo irio iria ciagĩrĩire. Nĩamũigire kũndũ kũrĩa kwega mũno thĩinĩ wa nyũmba ĩyo ya atumia a mũthamaki, na agĩthuura airĩĩtu mũgwanja akĩmahe wĩra wa kũmũtungatĩra.

10 Esiteri nĩataarĩĩtwo nĩ Moridekai, ndakoimbũre atĩ aarĩ Mũyahudi.

11 O mũthenya Moridekai nĩahĩtũkagĩra kũu nyũmbainĩ ya atumia a mũthamaki kũmenya ũrĩa Esiteri ahaana, na ũrĩa arathiĩ na mbere.

12 Gũthakario kwa atumia kwaniinaga mĩeri ikũmi na ĩĩrĩ; mĩeri ĩtandatũ mamoyagwo na maguta ma manemane, nayo mĩeri ĩyo ĩngĩ ĩtandatũ makamoywo na maguta manungi wega. Thuutha wa ũguo o mũirĩĩtu nĩatwaragwo kwĩ mũthamaki Ahasuerusu arĩ wiki.

13 Mũirĩĩtu akiuma nyũmba ya atumia a mũthamaki agĩthiĩ mũciĩ kwa mũthamaki eekagĩra nguo o ĩrĩa angĩendire.

14 Mũirĩĩtu aathiaga kwa mũthamaki hwaĩinĩ, na mũthenya ũyũ ũngĩ rũũciinĩ, akoima kuo agatwarwo nyũmba ĩngĩ ya atumia a kũigwo a mũthamaki kũrĩa maaroragwo nĩ Shaashagaza, mũndũ mũrũme warĩ mũhakũre waroraga arĩa maarĩ ta atumia a mũthamaki. Na rĩĩrĩ, mũirĩĩtu ndangĩathiire kũrĩ mũthamaki rĩngĩ, tiga no akorirwo atĩ mũthamaki nĩaramwenda mũno, na akiuge rĩĩtwa rĩake, naake mũirĩĩtu akĩreehwo.

15 Na rĩĩrĩ, ihinda rĩa Esiteri gũthiĩ kwa mũthamaki nĩrĩakinyire. Esiteri aarĩ mwarĩ wa Abihaili ũrĩa warĩ ithe mũnyiinyi wa Moridekai, naake Moridekai nĩwe warereete Esiteri ta mwarĩ. Esiteri agĩthiĩ kwa mũthamaki eekĩrire o kĩrĩa anengerirwo nĩ Hegai, mũndũ ũrĩa warĩ mũhakũre waroraga atumia a mũthamaki. Mũndũ o wothe wonaga Esiteri nĩamwĩroragĩra.

16 Kwoguo Esiteri agĩgĩtwarwo kwa Ahasuerusu mweriinĩ wa ikũmi, nĩguo mweri wa Tebethi, mwakainĩ wa mũgwanja wa ũthamaki wake.

17 Mũthamaki nĩendire Esiteri gũkĩra atumia arĩa angĩ oothe, naake Esiteri agĩgĩĩtĩkĩrĩka nĩwe na akĩonwo arĩ mwega gũkĩra atumia arĩa angĩ oothe. Nĩamũhumbire thũmbĩ ya kwini mũtwe na akĩmũtua kwini handũinĩ ha Vashiti.

18 Thuutha wa ũguo mũthamaki nĩathondekire iruga nĩ ũndũ wa gĩtĩĩo kĩa Esiteri, agĩĩtĩra njaama ciake ciothe na aathani. Na akĩrekera andũ oothe matikaarute igooting’ongo ciothe, o na akĩheana iheeo o ta ũrĩa ũtaana wa mũthamaki watariĩ.

Moridekai kũhonokia mũthamaki ndakooragwo

19 Hĩndĩ ĩyo Moridekai nĩathuurĩĩtwo nĩ mũthamaki akaheeo wĩra wa gũikaria kĩhingo kwa mũthamaki.

20 Naake Esiteri ndakoreetwo amenyithanĩĩtie atĩ nĩ Mũyahudi. Moridekai nĩamwathĩĩte ndakaae kwĩra mũndũ o na ũrĩkũ, naake akĩmwathĩkĩra o ta ũrĩa aamwathĩkagĩra e mũirĩĩtu mũnyiinyi rĩrĩa aamũreraga.

21 Hĩndĩ ĩyo Moridekai aikaragia kĩhingo gĩa kwa mũthamaki andũ eerĩ maarĩ ahakũre arĩa meehokeirwo kũrora nyũmba thĩinĩ kwa mũthamaki na nĩ o, Bigithana na Tereshi makĩraakarĩra mũthamaki Ahasuerusu, na magĩthondeka mũbango mamũũrage.

22 Moridekai nĩamenyire ũhoro ũcio, naake akĩĩra kwini Esiteri. Naake kwini Esiteri akĩĩra mũthamaki na akĩmwĩra atĩ nĩ Moridekai ũmwĩrĩĩte.

23 Ũhoro ũcio nĩwatuĩririo na ũkĩmenyeka atĩ warĩ wa ma, na kwoguo andũ acio eerĩ magĩcuurio handũ hathondekeetwo ha gũitagĩra andũ, na ũhoro ũcio mũthamaki agĩathana atĩ wandĩkwo hamwe na maũndũ ma bata ma bũrũri.

Hamani gũthondeka mũbango wa kũniina Ayahudi

1 Thuutha wa maũndũ macio, mũthamaki Ahasuerusu nĩatuire mũndũ wetagwo Hamani mũtongoria wa anene arĩa angĩ oothe. Hamani aarĩ mũrũ wa Hamedatha na aarĩ Mũagagi.

2 Mũthamaki nĩathanĩĩte atĩ andũ oothe, arĩa maamũtungatagĩra maheage Hamani gĩtĩĩo na ũndũ wa kũmũturĩria ndu na kũmũinamĩrĩra. Oothe nĩmaathĩkire. No rĩĩrĩ, Moridekai nĩaregire kũmũturĩria ndu kana kũmũinamĩrĩra.

3 Na rĩĩrĩ, njaama icio ingĩ cia mũthamaki iria ciakoragwo kĩhingoinĩ nĩcioririe Moridekai atĩrĩ,

4 “Nĩ kĩĩ gĩtũmaga wage gwathĩkĩra watho wa mũthamaki?” Thuutha wa kũmũũria ũguo o mũthenya o mũthenya akĩagaga kũmaathĩkĩra-rĩ, nĩmeerire Hamani ũhoro ũcio nĩguo marore kana hiihi nĩekũũria Moridekai nĩ ũndũ wa ũguo eekaga, amu nĩameerĩĩte atĩ we nĩ Mũyahudi.

5 Hamani nĩaraakarire mũno rĩrĩa aiguire atĩ Moridekai ndangĩmũturĩria ndu kana amũinamĩrĩre.

6 Aamenya atĩ Moridekai nĩ Mũyahudi, agĩtua atĩ ndekũmũherithia arĩ wiki, no ekũũraga Ayahudi oothe arĩa me bũrũri ũrĩa wothe wathanagwo nĩ mũthamaki wa Perisia.

7 Na rĩĩrĩ, mweriinĩ wa mbere na nĩguo wĩtagwo Nisani, mwakainĩ wa ikũmi na ĩĩrĩ wa wathani wa Ahasuerusu, Hamani nĩathanire atĩ gũcuukwo mĩtĩ, na ũguo nĩ ta kuuga Purimu, kuoneke nĩ mũthenya ũrĩkũ na mweri ũrĩkũ itua rĩake rĩkaahingio. Nĩkuonekire atĩ mũthenya ũrĩa wagĩrĩire nĩ mũthenya wa ikũmi na ĩtatũ wa mweri wa ikũmi na ĩĩrĩ, nĩguo wĩtagwo Adari.

8 Hamani agĩkĩĩra mũthamaki atĩrĩ, “Nĩkũrĩ rũũrĩrĩ rwĩ kũndũ guothe thĩinĩ wa kũrĩa wathanaga, na rũkoragwo mabũrũri moothe. Mawatho maaruo matihaana ma andũ angĩ o na arĩkũ, na rũtiathĩkagĩra mawatho ma mũthamaki, na kwoguo hatirĩ bata wa kũrũkirĩrĩria.

9 Angĩkorwo wee mũthamaki nĩũkuona kwagĩrĩire-rĩ, athana atĩ andũ acio mooragwo, na gwekĩka ũguo ngũkwĩra na ma atĩ nĩngũrĩha kiro ngiri magana matatũ ma mĩrongo ĩna (340,000) cia betha ndĩcinengere arĩa maroraga mawĩra maciĩkĩre kĩgĩĩnainĩ kĩa mũthamaki.”

10 Mũthamaki nĩarutire gĩcũhĩ kuuma kĩarainĩ, agĩkĩnengera Hamani mũrũ wa Hamedatha, ũrĩa warĩ Mũagagi, na warĩ thũ ya Ayahudi. Gĩcũhĩ kĩu nĩkĩo kĩahũũraga mũhũũri maũndũ ma thirikaari.

11 Mũthamaki aamwĩrire atĩrĩ, “Andũ acio o hamwe na mbeeca ciao nĩ aaku, ĩka nao ũrĩa ũkwenda.”

12 Mweri ikũmi na ithatũ mweriinĩ wa mbere, Hamani agĩĩta tũrani twa mũthamaki akĩmeera makĩandĩkaga ũrĩa wothe oigaga, ũgĩtaũrwo na thiomi cia kũndũ guothe o hamwe na mĩandĩkĩre yothe. Ningĩ ũgĩcooka ũgĩtũmĩrwo atongoria, anene, o hamwe na aathani. Ũhoro ũcio wandĩkirwo atĩ nĩ mũthamaki uugĩĩte, na ũkĩhũũrwo mũhũũri na gĩcũhĩ gĩake.

13 Atwari marũa nĩmaakĩoire marũa macio maandĩkĩĩtwo ũhoro ũcio makĩmatwara ng’ongo ciothe kũrĩa mũthamaki aathanaga. Marũa macio maandĩkĩĩtwo atĩ mũthenya ũmwe, na nĩguo mũthenya wa ikũmi na ĩtatũ wa mweri wa Adari, Ayahudi oothe, eethĩ na akũrũ, atumia na ciana, nĩmakooragwo matekũiguĩrwo tha na indo ciao itahwo.

14 Ũhoro ũrĩa wandĩkĩĩtwo warĩ wa kũmenyithio mũingĩ wa ng’ongo ciothe nĩ geetha andũ oothe magaakorwo mehaarĩirie rĩrĩa mũthenya ũcio ũgaakinya.

15 Atwari marũa maathwo nĩ mũthamaki nĩmaathiire gũtwara marũa macio ng’ongo ciothe, na ũhoro ũcio ũkĩmenyithanio o na kũu Susa itũũra rĩu inene. Naake mũthamaki o hamwe na Hamani magĩikara thĩ kũnyua, o rĩrĩa Susa itũũra rĩu inene andũ maahĩngĩcĩĩtwo nĩ ũhoro ũcio.

Moridekai kũhooya Esiteri ũteithio

1 Rĩrĩa Moridekai aamenyire ũrĩa wothe gwekĩĩtwo, agĩtarũranga nguo ciake nĩ ũndũ wa kĩeha, agĩcooka agĩĩkĩra nguo ya ikũnia, na akĩĩhurĩria mũhu, agĩcooka akiumagara agĩtũrĩkĩria itũũrainĩ agĩkayũrũrũkaga e na kĩeha mũno.

2 Nĩathiire o nginya kĩhingoinĩ gĩa gũtoonya kwa mũthamaki, no ndatoonyire tondũ mũndũ o wothe wĩkĩrĩĩte nguo ya ikũnia ndeetĩkĩragio gũtoonya.

3 Na rĩĩrĩ, ng’ongo ciothe kũrĩa itua rĩu rĩa mũthamaki rĩamenyithanirio, Ayahudi nĩmaacakayaga maanĩrĩire, na makehinga kũrĩa, na makagirĩka o na magakayũrũrũka, na aingĩ aao magĩĩkĩra nguo cia makũnia na magĩkoma mũhuinĩ.

4 Rĩrĩa atungatĩri a Esiteri airĩĩtu o na arũme arĩa maarĩ ahakũre meerire Esiteri ũrĩa Moridekai areeka, nĩathumbũkire ngoro mũno, na agĩkĩnenganĩra nguo Moridekai eekĩre, arute ĩyo ya ikũnia. No Moridekai akĩrega gũciamũkĩra.

5 Esiteri nĩagĩĩtire ndungata ĩmwe yake ya mũndũ mũrũme warĩ mũhakũre, wathuurĩĩtwo nĩ mũthamaki wakũmũtungatĩra, wetagwo Hathaka, akĩmwĩra athiĩ harĩ Moridekai akamenye nĩ atĩa kũrathiĩ na mbere na nĩkĩ.

6 Hathaka agĩthiĩ harĩ Moridekai kĩhaaroinĩ gĩa itũũra, kĩhingoinĩ gĩa gũtoonya kwa mũthamaki,

7 naake Moridekai akĩmwĩra ũrĩa wothe we eekĩĩtwo, na mũigana wa mbeeca iria Hamani eeranĩire atĩ nĩekũiga kĩĩgĩnainĩ kĩa mũthamaki, Ayahudi oothe mangĩniinwo.

8 Moridekai nĩanengerire Hathaka kobĩ ya marũa ma itua rĩrĩa rĩatuĩrĩirwo kũu Susa, rĩathanĩĩte Ayahudi maniinwo. Moridekai nĩamwĩrire atwarĩre Esiteri marũa macio, na amũtaarĩrie ũrĩa kũhaana, na amũũrie athiĩ kũrĩ mũthamaki amũthaithe o na amũkaĩre atĩ aiguĩre andũ a rũũrĩrĩ rwao tha.

9 Hathaka nĩagĩthiire kũrĩ Esiteri akĩmwĩra ũhoro ũcio Moridekai aamũheete.

10 Naake Esiteri akĩmwĩra athiĩ akeere Moridekai atĩrĩ,

11 “Ndungata ciothe cia mũthamaki hamwe na andũ a bũrũri wothe wa mũthamaki nĩmooĩ atĩ mũndũ o na ũrĩkũ angĩtoonya nja ya thĩinĩ ya kwa mũthamaki atarĩ mwĩte, watho nĩ ũmwe harĩ andũ oothe atĩ mũndũ ũcio akooragwo. No rĩĩrĩ, nĩharĩ ũndũ ũmwe tu ũngĩgiria ooragwo, na nĩguo ũyũ: mũthamaki angĩtambũrũkĩria mũndũ mũthĩĩgi wake wa thahabu, mũndũ ũcio ndangĩũragwo. Na niĩ rĩu ndĩ na mweri ũmwe mũthamaki atarĩ andũmanĩra.”

12 Rĩrĩa Moridekai aanyiitire ndũmĩrĩri ya Esiteri,

13 nĩoigire akeerwo atĩrĩ, “Ndũkaae gwĩciiria atĩ wĩ handũ heega gũkĩra Ayahudi arĩa angĩ tondũ wĩ kwa mũthamaki.

14 Wona waga kwaria ihindainĩ ta rĩĩrĩ, ũteithio nĩũkuuma mwena ũngĩ Ayahudi mahonokio, no wee nĩũgũkua, na andũ a nyũmba ya thooguo magĩthire. Ningĩ-rĩ, nũũ ũũĩ kana hiihi ndwatuĩkire kwini nĩ ũndũ wa ihinda ta rĩĩrĩ?”

15 Esiteri nĩatũmanire kũrĩ Moridekai akeerwo atĩrĩ,

16 “Thiĩ ũcookanĩrĩrie Ayahudi oothe arĩa me Susa hamwe; mwĩhinge na mũũhoere. Mũtikaae kũrĩa kĩndũ kana kũnyua mĩthenya ĩtatũ na mootukũ matatũ. O na niĩ hamwe na airĩĩtu arĩa maandungatagĩra noguo tũgwĩka. Thuutha wa ũguo nĩngaathiĩ kwĩ mũthamaki o na angĩkorwo watho ndwĩtĩkĩrĩĩtie. Angĩkorwo ndĩ wa gũgaakua, nĩngaakua.”

17 Moridekai agĩthiĩ agĩĩka ũrĩa wothe eerĩĩtwo nĩ Esiteri ageeke.

Esiteri gwĩtĩra mũthamaki na Hamani iruga

1 Mũthenyainĩ wa gatatũ wa kwĩhinga gwake-rĩ, Esiteri nĩekĩrire nguo ciake cia ũnene agĩthiĩ akĩrũũgama nja ya thĩinĩ ya nyũmba kwa mũthamaki aringaine na kanyũmba karĩa kaarĩ na gĩtĩ kĩa mũthamaki. Naake mũthamaki aarĩ kũu kanyũmba thĩinĩ aikarĩire gĩtĩ kĩa ũthamaki eerekeire na kĩhingoinĩ.

2 Rĩrĩa mũthamaki oonire kwini Esiteri arũũgamĩĩte hau nja, akĩigua amwenda, agĩgĩtambũrũkia mũthĩĩgi wake wa thahabu, naake Esiteri agĩthiĩ akĩhuutia mũthia waguo.

3 Naake mũthamaki akĩmũũria atĩrĩ, “Kwini Esiteri, ũkwenda atĩa? Njĩĩra kĩrĩa ũkwenda; o na angĩkorwo nĩ nuthu ya kũrĩa njathanaga nĩngũkũhe.”

4 Naake Esiteri akĩmũcookeria atĩrĩ, “Angĩkorwo mwathi wakwa, wee mũthamaki, nĩũkuona kwagĩrĩire-rĩ, nĩngũkũũria atĩ ũrĩũka mwĩ na Hamani irugainĩ rĩrĩa ndĩramũhaarĩria ũũmũũthĩ hwaĩinĩ.”

5 Mũthamaki agĩtũmanĩra Hamani akiuga ooke na ihenya nĩguo mahingie wendi wa Esiteri. Kwoguo mũthamaki na Hamani magĩthiĩ irugainĩ rĩa Esiteri.

6 Na rĩrĩa maanyuaga ndibei, mũthamaki akĩĩra Esiteri atĩrĩ, “Njĩĩra kĩrĩa ũkwenda na nĩngũkũhe. O na angĩkorwo nĩ nuthu ya kũrĩa njathanaga, nĩngũkũhe.”

7 Naake Esiteri akĩmũcookeria atĩrĩ,

8 “Kĩrĩa ingĩkũũria ũnjĩke, angĩkorwo nĩnjĩtĩkĩrĩkĩĩte nĩwe-rĩ, no nyende wee mwĩ na Hamani mũgooka rũũciũ irugainĩ rĩngĩ rĩrĩa ngũmũhaarĩrĩria na hĩndĩ ĩyo nĩngaakwĩra kĩrĩa ngwenda.”

Hamani gũthondeka ũrĩa ekũũraga Moridekai

9 Hamani agĩkiuma irugainĩ e na gĩkeno na acanjamũkĩĩte ngoro, no rĩĩrĩ, akinya kĩhingoinĩ gĩa gũtoonya kwa mũthamaki akĩona Moridekai ndanarũũgama, na ndanamũhe gĩtĩĩo o na haniini, akĩhĩtũka. Hamani nĩaraakaririo nĩ ũndũ ũcio mũno.

10 No rĩĩrĩ, nĩakirĩrĩirie na akĩinũka. Akinya mũciĩ, nĩetire araata aake, o na agĩĩta Zereshu mũtumia wake o naake ooke.

11 Nĩameetĩĩĩire ũrĩa aarĩ mũtongu, ũrĩa aariũ aake marĩ aingĩ, ũrĩa mũthamaki aamũnenehirie, aamũtuĩte mũndũ wa igũrũ, na ũrĩa aarĩ mũndũ wa bata gũkĩra njaama ciothe iria ciathuurĩĩtwo nĩ mũthamaki.

12 Hamani nĩathiire na mbere akiuga atĩrĩ, “Ũndũ ũngĩ nĩ atĩ, kwini Esiteri egũtũthondekeire iruga o ithuĩ ithuerĩ na mũthamaki, na o na rũũciũ no atwĩtĩra rĩngĩ.

13 No macio moothe ti ũndũ rĩrĩa rĩothe ngũkorwo ngĩona Moridekai ũrĩa Mũyahudi aikarĩĩte kĩhingoinĩ gĩa gũtoonya kwa mũthamaki.”

14 Naake Zereshu mũtumia wake o hamwe na araata aake makĩmwĩra atĩrĩ, “Kaĩ ũtangĩakithia handũ ha gũitĩra andũ harĩ na ũraihu wa mita mĩrongo ĩĩrĩ na igĩrĩ, naguo rũũciũ rũũciinĩ ũkooria mũthamaki acuurithie Moridekai ho, na hĩndĩ ĩyo nĩũgaagĩthiĩ irugainĩ wĩ na gĩkeno?” Hamani nĩaiguire rĩciiria rĩu rĩrĩ rĩega na kwoguo agĩthondekithia handũ ha gũitĩra andũ.

Mũthamaki gũtĩĩithia Moridekai

1 Ũtukũ ũcio mũthamaki nĩagire toro, na kwoguo akiuga atĩ ibuku rĩrĩa rĩandĩkagwo maũndũ ma bata ma bũrũri wake rĩreehwo athoomerwo.

2 Harĩa aathoomeirwo nĩhaarĩ na ũhoro wa ũrĩa Moridekai aahithũririe njaama ya kũũraga mũthamaki. Njaama ĩyo yathondekeetwo nĩ Bigithana na Tereshi, arume arĩa eerĩ maarĩ ahakũre na marangagĩra kĩhingo gĩa gũtoonya kwa mũthamaki.

3 Mũthamaki akĩũria atĩrĩ, “Nĩ ũndũ ũrĩkũ twamũtĩithirie Moridekai naguo na twamũheire kĩheeo kĩrĩkũ nĩ ũndũ wa gĩĩko kĩu eekire?”

Nao andũ arĩa maamũtungatagĩra makĩmũcookeria atĩrĩ, “Gũtirĩ.”

4 Naake mũthamaki nĩoririe atĩrĩ, “Nĩkũrĩ mũnjaama o na ũmwe gũũkũ kwa mũthamaki?”

Hĩndĩ ĩyo naake Hamani aakorirwo atoonya nja ya kwa mũthamaki, ookĩĩte kũũria mũthamaki ũhoro wa handũ harĩa aakĩĩte ha gũitĩra Moridekai.

5 Kwoguo ndungata ciake ikĩmwĩra atĩrĩ, “Hamani arĩ haaha akĩenda gũkuona.”

Naake mũthamaki akĩĩra ndungata ciake atĩrĩ, “Mũrekeei atoonye.”

6 Hamani agĩgĩtoonya, naake mũthamaki akĩmũũria atĩrĩ, “Nĩharĩ mũndũ ndĩrenda gũtĩĩithia, ngũmũtĩĩithia na njĩra ĩrĩkũ?”

Naake Hamani agĩciiria na ngoro atĩrĩ, “Hiihi mũndũ ũyũ mũthamaki arenda gũtĩĩithia ti ũngĩ nĩ niĩ.”

7 Hamani nĩakĩĩrire mũthamaki atĩrĩ, “Ũũ nĩguo mũndũ ũrĩa mũthamaki arenda gũtĩĩithia egwĩkwo.

8 Athana atĩ nguo iria mũthamaki aneekĩra ireehwo, o na mbarathi ĩrĩa yanakuua mũthamaki ĩrĩa ĩĩkĩrĩĩtwo thũmbĩ ya ũthamaki mũtwe.

9 Thuutha wa ũguo mũndũ ũmwe mũnene eetwo eekĩre mũndũ ũcio nguo icio, acooke amũtongorie amũhaicĩĩtie mbarathi igũrũ. Macooke matuĩkanĩrie kĩhaaro gĩa itũũra. Na mũndũ ũcio mũnene ũkũmũtongoria athiĩ akĩanagĩrĩra atĩrĩ, ‘Taroraai ũrĩa mũndũ ũrĩa mũthamaki ekwenda gũtĩĩithia eekagwo!’ ”

10 Naake mũthamaki akĩĩra Hamani atĩrĩ, “Thiĩ narua woe nguo cia mũthamaki o hamwe na mbarathi, wĩke Moridekai ũrĩa Mũyahudi maũndũ macio moothe wagweta makũmũtĩĩithia. Nĩũkũmuona aikarĩĩte kĩhingoinĩ gĩa gũtoonya mũciĩ kwa mũthamaki.”

11 Kwoguo Hamani akĩoya nguo cia mũthamaki o hamwe na mbarathi, agĩcihumba Moridekai, agĩcooka akĩmũhaicia mbarathi igũrũ, na akĩmũtongoria magĩtuĩkanĩria kĩhaaro gĩa itũũra, Hamani akĩanagĩrĩra atĩrĩ, “Taroraai ũrĩa mũndũ ũrĩa mũthamaki eenda gũtĩĩithia eekagwo.”

12 Moridekai agĩcooka kĩhingoinĩ gĩa gũtoonya kwa mũthamaki, naake Hamani agĩkĩinũka gwake mũciĩ na ihenya ehumbĩrĩĩte ũthiũ nĩ ũndũ wa gũconoka.

13 Nĩakĩĩrire mũtumia wake hamwe na araata aake oothe ũrĩa wothe wamũkorereire. Naake mũtumia wake o hamwe na araata aake arĩa maarĩ oogĩ makĩmwĩra atĩrĩ, “Angĩkorwo Moridekai ũcio wambĩrĩria kuoya ũtongoria waku nĩ Mũyahudi, ndũngĩmũhoota. Nĩ ma nĩegũkũhoota.”

Hamani kũũragwo

14 O hĩndĩ ĩyo maaragia, arũme arĩa ahakũre a kwa mũthamaki magĩkinya mahiũhĩĩte nĩguo matware Hamani na ihenya irugainĩ rĩrĩa Esiteri aamahaarĩrĩirie.

1 Kwoguo Hamani na mũthamaki magĩthiĩ irugainĩ rĩa Esiteri

2 riita rĩa keerĩ. Na rĩrĩa maanyuaga ndibei, mũthamaki akĩũria kwini Esiteri atĩrĩ, “Kwini Esiteri, nĩ kĩĩ ũkwenda? Njĩĩra na nĩngũkũhe. O na angĩkorwo nĩ nuthu ya ũthamaki wakwa nĩngũkũhe.”

3 Naake kwini Esiteri akiuga atĩrĩ, “Angĩkorwo nĩnjĩtĩkĩrĩkĩĩte nĩwe, mũthamaki wakwa, na nĩũkuona kwagĩrĩire ũnjĩkĩre ũrĩa ngwenda-rĩ, ngũhooya o ndekwo njikare muoyo o hamwe na andũ aitũ.

4 Amu niĩ hamwe na andũ aitũ tũrĩendie tũũragwo, tũniinwo biũ. Korwo ithuĩ ithuothe arũme na atumia twendeetio tũtuĩke ngombo ndirĩ ũndũ ingĩũria; amu ruwo rwitũ rũtingĩgerekanio na hathara ĩrĩa mũthamaki egũthiĩ.”

5 Naake mũthamaki Ahasuerusu akĩũria kwini Esiteri atĩrĩ, “Mũndũ ũcio ũngĩgeria gwĩka ũguo nĩ ũrĩkũ na e kũ?”

6 Naake Esiteri akiuga atĩrĩ, “Mũndũ ũcio ũtũmeneete na nĩwe thũ iitũ-rĩ, nĩ Hamani ũyũ mũũru!”

Naake Hamani akĩiyũrwo nĩ guoya arĩ hau mbere ya mũthamaki na kwini.

7 Na rĩĩrĩ, mũthamaki agĩũkĩra na igũrũ ang’ũrĩkĩĩte, akiuma kũu irugainĩ, agĩthiĩ agĩtoonya mũgũnda wa nyũmba ya kwa mũthamaki, no Hamani agĩtigwo agĩthaitha kwini Esiteri nĩguo ndakooragwo, amu nĩonaga atĩ no mũhaka mũthamaki amũherithie nĩ ũndũ wa ũguo.

8 Naake mũthamaki akiuma mũgũndainĩ agĩcooka harĩa maanyuagĩra ndibei, agĩkora Hamani egũithĩĩtie gĩtĩinĩ kĩa mwĩtiiranio harĩa Esiteri aarĩ akĩmũthaitha. Mũthamaki oona ũguo akiuga atĩrĩ, “Mũndũ ũyũ kaĩ egũkĩenda kũnyiita mũtumia wakwa na hinya gũũkũ nyũmba gwakwa o na ndĩrĩ o ho?”

Mũthamaki akĩrĩĩkia kuuga ũguo, arũme arĩa ahakũre makĩhumbĩra Hamani mũtwe.

9 Naake Haribona ũmwe wa arũme acio maarĩ ahakũre, watungatagĩra mũthamaki akiuga atĩrĩ, “Hamani o na nĩarakithirie handũ ha gũcuuria Moridekai ũrĩa wahonokirie mũthamaki. Mĩtĩ ĩyo ĩ gwake mũciĩ na ĩ na kĩrũũgamo kĩa mita mĩrongo ĩĩrĩ na igĩrĩ!”

Naake mũthamaki agĩathana atĩrĩ, “Hamani nĩacuurio mĩtĩinĩ ĩyo.”

10 Kwoguo Hamani agĩcuurio mĩtĩinĩ ĩrĩa we mwene aakĩire Moridekai, namo maraakara ma mũthamaki magĩthira.

Ayahudi kwĩrwo merĩhĩrie

1 Mũthenya o ro ũcio, mũthamaki Ahasuerusu akĩhe kwini Esiteri indo ciothe cia Hamani ũcio warĩ thũ ya Ayahudi. Naake Moridekai agĩũka harĩ mũthamaki, amu Esiteri nĩamwĩrĩĩte ũrĩa aatarainie na Moridekai.

2 Mũthamaki akĩruta gĩcũhĩ gĩake gĩa kũhũũra mũhũũri kĩrĩa eetĩĩtie Hamani, agĩkĩnengera Moridekai. Naake Esiteri akĩĩra Moridekai arorage indo cia Hamani.

3 Ningĩ Esiteri akĩarĩria mũthamaki rĩngĩ egũithĩĩtie magũrũinĩ maake akĩmũthaitha agĩitaga maithori akĩmwĩra atĩ aniine mũbango ũrĩa Hamani ũrĩa Mũagagi aathondekeete wa kũniina Ayahudi.

4 Naake mũthamaki agĩtambũrũkĩria Esiteri mũthĩĩgi wake wa thahabu.

5 Naake Esiteri akĩrũũgama na igũrũ hau mbere ya mũthamaki akiuga atĩrĩ, “Angĩkorwo mũthamaki nĩũkuona arĩ wega, na angĩkorwo nĩnjĩtĩkĩrĩkĩĩte nĩwe, na angĩkorwo nĩũkuona kwagĩrĩire, na ngorwo nĩngũkeneetie-rĩ, athana atĩ kwandĩkwo marũa magũtharia marũa marĩa maandĩkĩĩtwo nĩ Hamani ũcio Mũagagi, mũrũ wa Hamedatha, marĩa aandĩkire makũniinithia Ayahudi arĩa oothe me bũrũri ũrĩa wathanaga.

6 Amu ingĩhota kũũmĩrĩria atĩa ngĩona andũ aitũ makĩniinwo?”

7 Mũthamaki Ahasuerusu akĩĩra kwini Esiteri na Moridekai ũrĩa Mũyahudi atĩrĩ, “Atĩrĩĩrĩ, nĩndĩracuurithirie Hamani tondũ wa gũthondeka mũbango wa kũũraga Ayahudi, na indo ciake ndĩracihe Esiteri.

8 No rĩĩrĩ, ũndũ wandĩkĩĩtwo thĩinĩ wa rĩĩtwa rĩa mũthamaki, na ũkahũũrwo mũhũũri na gĩcũhĩ gĩake, ndũrĩ hingo ũngĩgarũrwo o na kũhaana atĩa. No o na kũrĩ ũguo-rĩ, no mũkĩandĩkĩre Ayahudi ũndũ o wothe mũngĩenda thĩinĩ wa rĩĩtwa rĩakwa, na mũũhũũre mũhũũri na gĩcũhĩ kĩa mũthamaki.”

9 Ũndũ ũyũ wekĩkire mweri mĩrongo ĩĩrĩ na ithatũ mweriinĩ wa ĩtatũ, mweri ũrĩa wĩtagwo Sivani. Moridekai agĩgĩĩta tũrani twa kwa mũthamaki agĩtwĩra ũrĩa tũkwandĩka marũainĩ kũrĩ Ayahudi, o na kũrĩ anene, abarũũthi, na atongoria a mabũrũri moothe igana na mĩrongo ĩĩrĩ na mũgwanja kuuma India nginya Ethiopia. Marũa macio maandĩkĩirwo andũ a bũrũri na rũthiomi rwao o hamwe na mwandĩkĩre wao, na o nao Ayahudi makĩandĩkĩrwo na rũthiomi rwao, na kũringana na mwandĩkĩre wao.

10 Moridekai akĩandĩka marũa macio thĩinĩ wa rĩĩtwa rĩa mũthamaki Ahasuerusu, na akĩmahũũra mũhũũri na gĩcũhĩ kĩa mũthamaki. Marũa macio maatwarirwo nĩatwarithia a mbarathi mahaicĩĩte mbarathi igũrũ ndeng’eri mũno ciarereirwo kwa mũthamaki.

11 Marũa macio moigĩĩte atĩ mũthamaki nĩetĩkĩrĩĩtie Ayahudi a itũũra o rĩothe macookanĩrĩre hamwe magitĩre mĩoyo yao. Andũ me na matharaita a mũhĩrĩga o na ũrĩkũ kana rũgongo ruothe mangĩũkĩrĩra arũme Ayahudi, ciana ciao, na atumia aao, Ayahudi no mahũũrane nao mamaniine; mamoorage oothe maage gũtigaria o na ũmwe, na matahe indo ciao.

12 Watho ũcio wambagĩrĩria kũrutithio wĩra bũrũriinĩ wothe wa Perisia ũcio mũthamaki Ahasuerusu aathanaga mũthenya ũrĩa wabangĩĩtwo wa kũũraga Ayahudi, nĩguo mweri ikũmi na ithatũ mweri wa ikũmi na ĩĩrĩ, nĩguo wĩtagwo Adari.

13 Ũhoro ũcio nĩwatuirwo atĩ nĩ watho, na ũkĩmenyithio andũ oothe a mabũrũri moothe, nĩ geetha Ayahudi magaakorwo mehaarĩrie kũhũũrana na thũ ciao mũthenya ũcio wakinya.

14 Atwarithia a mbarathi nĩmaahaicire mbarathi igũrũ cia kwa mũthamaki amaatha, magĩthiĩ gũtwara marũa macio mateng’ereete mũno. Watho ũcio nĩwamenyithanirio o na kũu Susa, mũciĩ ũcio mũnene.

15 Naake Moridekai akiuma mũciĩ kwa mũthamaki ehumbĩĩte nguo ya ũthamaki ya rangi wa mburuu na mwerũ, na gĩthii kĩa rangi wa babũ gĩtumĩĩtwo na gataani ĩrĩa njega, na thũmbĩ nene ya thahabu. Nacio njĩra cia mũciĩ wa Susa ikĩiyũra ngemi nĩ ũndũ wa gĩkeno.

16 Ayahudi magĩthera ithiithi, makĩgĩa na gĩkeno, na makĩigua wega ngoro, na magĩitĩka kũrũũhia.

17 Na rĩĩrĩ, ng’ongoinĩ ciothe na matũũrainĩ moothe kũrĩa watho ũcio wa mũthamaki wathoomagwo, Ayahudi no gũcanjamũka maacanjamũkaga magakena, magathondeka maruga, na magakĩhuurũka kũruta mawĩra. Andũ angĩ aingĩ nĩmaagarũrũkire magĩtuĩka Ayahudi tondũ nĩmaameetigagĩra.

Ayahudi kũniina thũ ciao

1 Na rĩĩrĩ, mũthenya wa ikũmi na ĩtatũ mweriinĩ wa ikũmi na ĩĩrĩ nĩguo mweri wa Adari, rĩrĩa watho wa mũthamaki watigarĩĩte o haniini ũhingio, mũthenya ũcio thũ cia Ayahudi nĩcierĩgĩrĩire atĩ nĩikũmahoota. No rĩĩrĩ, mũthenya ũcio nĩwagarũrĩĩtwo ũgatuuo wa Ayahudi wa kũhoota thũ ciao.

2 Ayahudi nĩmaagĩcookanĩrĩire matũũrainĩ ma mabũrũri moothe ma kũrĩa mũthamaki Ahasuerusu aathanaga mahũũre andũ arĩa mangĩamookĩrĩire. Gũtirĩ mũndũ ũngĩametiiririe tondũ andũ oothe nĩmaanyiitĩĩtwo nĩ guoya.

3 Anene oothe, aathani, atongoria, o hamwe na abarũũthi nĩmateithĩrĩirie Ayahudi nĩ ũndũ wa gwĩtigĩra Moridekai.

4 Amu nĩkwamenyekeete o wega bũrũriinĩ ũcio wothe mũthamaki aathanaga, atĩ Moridekai nĩatuĩkĩĩte mũndũ mũnene mũciĩ kwa mũthamaki na no agĩthiaga na mbere kũneneha.

5 Kwoguo Ayahudi nĩmangĩekire thũ ciao o ũrĩa mangĩendire. Nĩmaagĩciũkĩrĩire na hiũ cia njora magĩcitemanga magĩciniina biũ.

6 Thĩinĩ wa Susa kuo gwiki mũciĩ ũrĩa warĩ mũnene, Ayahudi mooragire andũ magana mataano.

7-10 Gatagatĩinĩ ka acio mooragirwo nĩhaarĩ aariũ ikũmi a Hamani mũrũ wa Hamedatha, ũcio warĩ thũ ya Ayahudi. Aariũ acio meetagwo: Parishandatha, Dalifoni, Asipatha, Poratha, Adalia, Aridatha, Parimashata, Arisai, Aridai, na Vaizatha. No rĩĩrĩ, Ayahudi matiatahire indo ciao.

11 Na rĩĩrĩ, mũthenya o ro ũcio mũthamaki nĩerirwo mũigana wa andũ arĩa mooragirwo thĩinĩ wa Susa.

12 Naake akĩĩra kwini Esiteri atĩrĩ, “Thĩinĩ wa Susa mũciĩ mũnene gwiki-rĩ, Ayahudi mooragĩĩte andũ magana mataano na aariũ ikũmi a Hamani me ho. Ĩ hiihi thĩinĩ wa ng’ongo iria ĩngĩ meekĩĩte atĩa? Rĩu ũkwenda kĩ? Kĩrĩa ũkwenda nĩũkũheeo. Njĩĩra kĩrĩa kĩngĩ ũkwenda na nĩũkũheeo.”

13 Naake Esiteri agĩcookia atĩrĩ, “Angĩkorwo mũthamaki nĩũkuona arĩ wega-rĩ, reke rũũciũ Ayahudi arĩa me Susa mageeka rĩngĩ ũguo meeka mũthenya wa ũũmũũthĩ. Na wathane atĩ mĩĩrĩ ya aariũ acio ikũmi a Hamani ĩgaacuurio mĩtĩ igũrũ ya gũcuuria andũ.”

14 Mũthamaki agĩgĩathana atĩ gwĩkwo ũguo; na watho ũcio ũgĩathanwo thĩinĩ wa Susa, na aariũ acio ikũmi a Hamani magĩgĩcuurio handũ harĩa haitagĩrwo andũ.

15 Mũthenya wa ikũmi na ĩna wa mweri wa Adari, Ayahudi arĩa maarĩ Susa makĩũngana rĩngĩ makĩũraga andũ angĩ magana matatũ (300), no o na hĩndĩ ĩyo matiatahire kĩndũ.

16 Atĩrĩĩrĩ, Ayahudi arĩa maarĩ ng’ongoinĩ iria ingĩ cia kũrĩa mũthamaki aathanaga makĩũngana nĩguo merũĩrĩre matikooragwo. Nao magĩkĩũraga andũ ngiri mĩrongo mũgwanja na ithaano (75,000) arĩa maamameneete; no matiatahire kĩndũ.

17 Meekire ũguo mũthenya wa ikũmi na ĩtatũ wa mweri wa Adari, naguo mũthenya wa ikũmi na ĩna makĩũtua mũthenya wa ndĩa na gĩkeno.

18 No rĩĩrĩ, Ayahudi arĩa maarĩ Susa, macookanĩrĩire makĩhũũrana na thũ ciao mũthenya wa ikũmi na ĩtatũ, na wa ikũmi na ĩna, naguo mũthenya wa ikũmi na ĩtaano makĩhuurũka, makĩũtua mũthenya wa ndĩa na gĩkeno.

19 Kwoguo nĩkĩo Ayahudi arĩa maikaraga matũũrainĩ manyiinyi makoragwo na mũthenya wa ikũmi na ĩna wa mweri wa Adari wĩ wa gĩkeno, ndĩa, na kwaga kũruta wĩra, na noguo mũthenya ũrĩa matũmanagĩra iheeo cia mĩthemba ya irio.

Thigũkũ ya Purimu

20 Naake Moridekai akĩandĩka maũndũ macio, ibukuinĩ rĩa bata rĩa maũndũ. Ningĩ agĩũtũmĩra Ayahudi oothe, a bũrũri wa kũraaya na wa gũkuhĩ thĩinĩ wa kũrĩa guothe gwathanagwo nĩ mũthamaki wa Perisia.

21 Akĩmeera atĩ mũthenya wa ikũmi na ĩna, na mũthenya wa ikũmi na ĩtaano mweriinĩ wa Adari, o mwaka gũtikaarutagwo wĩra.

22 Mĩthenya ĩyo nĩyo Ayahudi maaniinire thũ ciao, nĩ mweri ũrĩa wagarũrirwo ũgĩtiga gũtuĩka wa kĩeha na maithori, ũgĩtuĩka wa gĩkeno na mĩtheko. Na makĩĩrwo atĩ mamĩtue mĩthenya ya ndĩa na maruga, na mateganagĩre iheeo cia mĩthemba ya irio, o na maheage athĩĩni ũteithio.

23 Kwoguo Ayahudi, magĩkĩrũmĩrĩra mataaro ma Moridekai na thigũkũ ĩyo ĩgĩtuĩka ya gũkũngũagĩrwo o mwaka.

24 Atĩrĩĩrĩ, Hamani mũrũ wa Hamedatha ũrĩa warĩ wa Mũagagi na thũ ya Ayahudi, nĩacuukire Pũrimu (ũguo nĩ ta kuuga gũcuuka mĩtĩ) nĩguo atue mũthenya ũrĩa Ayahudi makaaniinwo; abangĩĩte amaniine biũ.

25 No rĩĩrĩ, rĩrĩa kwini Esiteri aathiire kũrĩ mũthamaki, mũthamaki nĩandĩkire watho atĩ mũbango ũcio mũũru Hamani abangĩire Ayahudi ũmũcookerere we mwene, na kwoguo we mwene hamwe na aariũ aake magĩcuurio handũ harĩa hakĩĩtwo ha gũitĩra andũ.

26 Kwoguo magĩtua mĩthenya ĩyo rĩĩtwa Purimu, rĩrĩa riumĩĩte harĩ kiugo Puri. Na nĩ ũndũ wa marũa macio ma Moridekai, na nĩ ũndũ wa ũrĩa gwekĩkĩĩte kũrĩ o,

27 Ayahudi nĩmethondekeire watho wao o eene na wa njiarwa ciao, na wa mũndũ o wothe ũngĩatuĩkire Mũyahudi atĩ mĩthenya ĩyo yerĩ ĩrũmagĩrĩrwo hingo ciothe kũringana na mataaro ma Moridekai.

28 Nĩgwagĩtuirwo atĩ mĩthenya ĩyo ĩririkanagwo, na ndĩkanariganĩre njiarwainĩ ciothe, mĩciĩinĩ yothe, ng’ongoinĩ ciothe, na matũũrainĩ moothe, na mĩthenya ĩyo ya Purimu ndĩkaanagĩrwo kĩene gatagatĩinĩ ka Ayahudi, o na ndĩkaanaage kũgwetagwo njiarwainĩ ciothe iria igooka.

29 Na rĩĩrĩ, kwini Esiteri, o we ũcio warĩ mwarĩ wa Abihaili, me hamwe na Moridekai makĩandĩka marũa mangĩ ma gwĩkĩra hinya marũa marĩa maandĩkĩĩtwo nĩ Moridekai makoniĩ thigũkũ ya Purimu.

30 Marũa macio maandĩkĩirwo Ayahudi oothe na kobĩ ciamo igĩtũmĩrwo ng’ongo ciothe igana rĩa mĩrongo ĩĩrĩ na mũgwanja cia ũthamaki wa Perisia. Marũa macio maarĩ ma kũmeerĩra thaayũ na ũgaacĩru.

31 Makĩĩrwo atĩ mĩthenya ĩyo ya Purimu imenyagĩrĩrwo mahindainĩ maayo marĩa maagĩrĩire, o ta ũrĩa Moridekai ũrĩa Mũyahudi, na kwini Esiteri maathanĩĩte, na o ta ũrĩa maatuĩte o eene meekage o hamwe na njiarwa ciao ũhoroinĩ wa kwĩhinga na gũcakaya.

32 Watho ũcio wa kwini Esiteri wa gwĩkĩra hinya mawatho makoniĩ Purimu nĩwandĩkirwo ibukuinĩ.