Gũtaarĩria
Mbuku cia Mbaimbũ iria ciandĩkirwo na Kĩngiriki nĩciongereire tũcunjĩ tũngĩ twa maandĩko ma thuutha (Deuterokanoniko) harĩ Ibuku rĩa Danieli. Kamwe ga tũcunjĩ tũu nĩ ng’ano ici cia Beli na Ndamaathia iria ciongagĩrĩrwo harĩ Danieli 14.
Maũndũ marĩa marĩ ibukuinĩ rĩĩrĩ
Danieli na athĩnjĩri ngai a Beli 1-22
Danieli kũũraga ndamaathia 23-32
Danieli kũrutwo irimainĩ rĩa mĩrũũthi 33-42
1 Rĩrĩa mũthamaki Asitiagesi aakuire, Cairasi ũrĩa warĩ Mũperisia nĩ we wacookire handũ haake.
2 Naake Danieli aarĩ mũraata mũnene wa mũthamaki, na mũthamaki nĩamũheete gĩtĩĩo mũno gũkĩra araata arĩa angĩ aake oothe.
3 Na rĩĩrĩ, andũ a Babiloni nĩmaarĩ na ngai ya mũhianano yetagwo Beli, na o mũthenya nĩmaamĩheaga marebe ikũmi na meerĩ ma mũtu wa ngano mũhinyu, na ng’ondu mĩrongo ĩna, na rita magana meerĩ ma ndibei.
4 Mũthamaki nĩaheete mũhianano ũcio gĩtĩĩo, na o mũthenya nĩathiaga kũũthaathaiya, no Danieli aathaathayagia Ngai wake.
5 Naake mũthamaki nĩoririe Danieli atĩrĩ, “Nĩ kĩĩ kĩgiragia ũthaathaiye Beli?” Naake akĩmũcookeria atĩrĩ, “Tondũ ndithaathayagia ngai ithondekeetwo nĩ andũ, no thaathayagia Ngai ũrĩa ũrĩ muoyo, ũrĩa wombire igũrũ na thĩ, na ũrĩa wathaga andũ oothe.”
6 Naake mũthamaki akĩmũũria atĩrĩ, “Ndũgwĩciiria Beli nĩ Ngai wĩ muoyo? Nduonaga ũingĩ wa kĩrĩa arĩaga na wa kĩrĩa anyuaga o mũthenya?”
7 Naake Danieli agĩtheka akiuga atĩrĩ, “Mũthamaki tiga kũheenio; amu ngai ĩno mwena wa na thĩinĩ nĩ rĩũmba na wa na igũrũ nĩ gĩcango, na kuuma tene ndĩrĩ yanyua kĩndũ kana ĩkarĩa.”
8 Naake mũthamaki nĩaraakarire agĩgĩĩta athĩnjĩri ngai aake akĩmeera atĩrĩ, “Mwaga kũnjĩĩra nũũ ũrĩaga mĩhothi ĩno nĩmũkũũragwo.
9 No muonania atĩ Beli nĩ yo ĩmĩrĩaga, Danieli nĩ we ũkũũragwo, amu nĩarumĩĩte Beli.”
Naake Danieli akĩĩra mũthamaki atĩrĩ, “Reke gwĩkwo ũguo woiga.”
10 Beli yakĩrĩ na athĩnjĩri ngai mĩrongo mũgwanja, atumia aao na ciana ciao matatarĩĩtwo. Mũthamaki na Danieli magĩgĩthiĩ hekaarũinĩ ya Beli.
11 Nao athĩnjĩri ngai acio a Beli makiuga atĩrĩ, “Ithuĩ nĩtũkuuma nja, nawe mũthamaki, wee mwene ũmĩigĩre irio na ndibei, ũcooke ũhinge mũrango na ũũtume na mũhũũri waku.
12 Na rĩĩrĩ, rũũciũ rũũciinĩ warooka ũkore Beli ĩtacirĩĩte ciothe ũgatũũraga, no yakorwo ĩrĩĩte, Danieli ũcio ũraheenania akooragwo.”
13 Athĩnjĩri ngai matietigagĩra tondũ rungu rwa meetha nĩmaathondekeete mũrango wa hitho, na hau nĩ ho matoonyagĩra hingo ciothe makarĩa irio icio cia mĩhothi.
14 Na rĩrĩa athĩnjĩri ngai moimire nja, mũthamaki akĩigĩra Beli irio. Naake Danieli agĩatha ndungata ciake ireehe mũhu iũhurunje kũu hekaarũ thĩinĩ, mũthamaki we wiki eroreire. Nĩmaagĩcookire makiuma na makĩhinga mũrango, makĩũtuma na mũhũũri wa mũthamaki na magĩthiĩ.
15 O ũtukũ athĩnjĩri ngai magĩũka na atumia aao na ciana o ta ũrĩa maamenyereete gwĩka, makĩrĩa irio ciothe na makĩnyua ndibei yothe.
16 Naruo rũũciinĩ rũũrũ rũngĩ mũthamaki agĩũkĩra tene, agĩũka kũu hekaarũ me na Danieli.
17 Naake mũthamaki akĩũria Danieli atĩrĩ, “Nĩharĩ mũhũũri mũtumũre?”
Naake Danieli agĩcookia atĩrĩ, “Aaca hatirĩ o na ũmwe mũtumũre, mũthamaki.”
18 Na rĩrĩa mĩrango yahingũrirwo, mũthamaki agĩcũũthĩrĩria meethainĩ akĩona hatiarĩ kĩndũ, akĩanĩrĩra akiuga atĩrĩ, “Wee Beli wĩ mũnene, na ti maheeni wee wĩ ngai.”
19 No Danieli agĩtheka, akĩgiria mũthamaki gũtoonya thĩinĩ akĩmwĩra atĩrĩ, “Tacũũthĩrĩria thĩ wone makinya macio me kuo nĩ ma ũ.”
20 Naake mũthamaki akiuga atĩrĩ, “Nĩndĩrona makinya ma arũme, na ma atumia, na ma ciana.”
21 Naake mũthamaki akĩraakara akĩnyiitithia athĩnjĩri ngai, na atumia aao na ciana; nao magĩkĩmuonia mũrango wa hitho ũrĩa maamenyereete gũtoonyera makarĩa kĩrĩa kĩrĩ meetha igũrũ.
22 Kwoguo mũthamaki akĩmooragithia, na agĩkĩnengerana Beli kũrĩ Danieli, naake akĩmĩthũũkangia o hamwe na hekaarũ ya yo.
23 O na ningĩ nĩkwarĩ ndamaathia ĩmwe nene andũ a Babiloni maathaathayagia.
24 Naake mũthamaki akĩĩra Danieli atĩrĩ, “Ndũngiuga atĩ ĩno ti ngai ĩ muoyo, kwoguo mĩthaathaiye!”
25 Naake Danieli akĩmũcookeria atĩrĩ, “Niĩ-rĩ, ngũthaathaiya Mwathani Ngai wakwa, amu nĩ we Ngai ũrĩa ũrĩ muoyo.
26 Na wee, mũthamaki ũngĩnjĩtĩkĩria, nĩngũũraga ndamaathia ĩno itarĩ na rũhiũ kana mũtĩ.”
Naake mũthamaki akĩĩra Danieli atĩrĩ, “Nĩndagwĩtĩkĩria.”
27 Kwoguo Danieli akĩoya rami, maguta, na njuĩrĩ agĩcitherũkanĩria hamwe agĩthondeka keeki, agĩcooka agĩcihe ndamaathia ĩyo. Nayo ndamaathia yarĩa ĩkĩimba nda nginya ĩgĩtathũka. Naake Danieli akiuga atĩrĩ, “Nĩmuona kĩrĩa mũrathaathayagia!”
28 Hĩndĩ ĩrĩa andũ a Babiloni maiguire ũhoro ũcio, makĩraakara mũno na magĩthondekera mũthamaki mũbango mũũru makiuga atĩrĩ, “Mũthamaki nĩatuĩkĩĩte Mũyahudi, tondũ nĩathũũkangirie Beli, na akĩũraga athĩnjĩri ngai, na rĩu ningĩ nĩoragĩĩte ndamaathia iitũ.”
29 Nĩmaagĩthiire kũrĩ mũthamaki makĩmwĩra atĩrĩ, “Tũnengere Danieli, na angorwo ti ũguo nĩtũgũkũũraga hamwe na andũ a mũciĩ waku.”
30 Naake mũthamaki agĩkĩona atĩ nĩmagwatĩirie, agĩkĩmanengera Danieli.
31 Nao magĩikia Danieli irima rĩa mĩrũũthi, agĩikara kuo mĩthenya ĩtandatũ.
32 Kũu irima rĩu rĩa mĩrũũthi kwarĩ na mĩrũũthi mũgwanja, na o mũthenya yamenyereete kũheagwo andũ eerĩ na ng’ondu igĩrĩ, no mĩthenya ĩyo ĩtandatũ gũtirĩ kĩndũ yaheirwo nĩguo ĩrĩe Danieli.
33 Hĩndĩ ĩyo mũnabii Habakuku aarĩ Judea na nĩathondekeete ũcũrũ na agatinangĩria mĩgate gĩkabũinĩ, na aathiaga gũcitwarĩra andũ maarĩ mũgũnda makĩgetha.
34 No mũraika wa Mwathani akĩmwĩra atĩrĩ, “Irio icio wĩ nacio citware Babiloni kũrĩ Danieli ũrĩa wĩ irimainĩ rĩa mĩrũũthi.”
35 Naake Habakuku akiuga atĩrĩ, “Mũthuuri ũyũ, niĩ ndirĩ ndathiĩ Babiloni, o na ndiũĩ ũhoro wa irima rĩa mĩrũũthi.”
36 Naake mũraika ũcio wa Mwathani akĩmũnyiita njuĩrĩ akĩmuoya na igũrũ akĩmũtwara Babiloni atwarĩĩtwo nĩ rũhuuho o rĩmwe, akĩmũiga igũrũ wa irima rĩa mĩrũũthi.
37 Naake Habakuku agĩĩtana, “Danieli! Danieli! Oya irio ici Mwathani agũtũmĩire.”
38 Naake Danieli akiuga atĩrĩ, “Ngai nĩũndirikanĩĩte. Wee ndũtiganagĩria arĩa makwendeete.”
39 Kwoguo Danieli agĩũkĩra akĩrĩa, naake mũraika wa Ngai o rĩmwe agĩcookia Habakuku o kwao.
40 Mũthenya wa mũgwanja kuuma Danieli aikio irima rĩa mĩrũũthi mũthamaki nĩathiire ho kũmũcakaĩra. Akinya irimainĩ nĩacũũthĩrĩirie thĩinĩ akĩona Danieli aikarĩĩte thĩ.
41 Naake mũthamaki akĩgũũthũka akiuga atĩrĩ, “Mwathani Ngai wa Danieli wĩ mũnene na gũtirĩ ũngĩ tiga wee!”
42 Naake akĩguucia Danieli kuuma irimainĩ rĩu rĩa mĩrũũthi, agĩcooka agĩikia andũ acio meendaga kũmũũraga irimainĩ rĩu, nao makĩrĩĩo nĩ mĩrũũthi mũthamaki akĩonaga.