Category: Akolosai

Gũtaarĩria

Marũa ma Paũlũ kũrĩ Akolosai maandĩkĩirwo kanitha warĩ itũũrainĩ rĩa Kolosai, bũrũriinĩ wa Asia Niini mwena wa irathĩro wa Efeso.

Paũlũ nĩarũmbũyagia kanitha ũyũ, o na gũtuĩka ti we mwene wa wambĩrĩirie. Nĩatũmaga aruti wĩra kuo moimĩĩte itũũrainĩ rĩa Efeso, rĩrĩa rĩarĩ itũũra inene rĩa bũrũri wa Asia ũrĩa wathagwo nĩ Aroma.

Paũlũ nĩamenyeete atĩ thĩinĩ wa kanitha wa Kolosai nĩkwarĩ na arutani a maheeni arĩa meeraga andũ atĩ no mũhaka mũndũ aangĩathaathairie “maroho marĩa maathanaga na magathamaka.” Ningĩ arutani acio nĩmoigaga atĩ, no mũhaka mũndũ arũmĩrĩre mĩtugo ya ndũire ta kũrua na kũmenyerera mawatho makoniĩ ũhoro wa irio na maũndũ mangĩ ta macio.

Paũlũ aandĩkire ndũmĩrĩri ĩno ya ũhoro wa Ũkristiano ũrĩa wa ma nĩguo oonanie atĩ moorutani macio maarĩ ma maheeni. Ũndũ ũrĩa wa bata mũno ũrĩa eerĩĩte arutani acio a maheeni nĩ atĩ Jesũ Kristũ e na hinya wa kũhonokia andũ kũna. Kwoguo, mawĩtĩkio macio mangĩ na mĩtugo nĩyagũtũma andũ maraihĩrĩrie Jesũ. Ngai akĩũmba thĩ aahũthĩrire Kristũ na aramĩcookanĩrĩria harĩ we ahũthĩrĩĩte o Kristũ. Thĩ ĩtangĩkorwo ĩ kĩndũ kĩmwe na Kristũ ndĩrĩ hingo ĩngĩgĩa na mwĩhoko wa ũhonokio. Paũlũ nĩacookeete akonania ũhoro ũrĩa ũrutani ũyũ mũnene ũhuutainie na mũikarĩre wa andũ arĩa meetĩkĩĩtie.

Nĩ wega kũmenya atĩ Tukiko, ũrĩa watwarire marũa maya ma Paũlũ Kolosai, aathiire hamwe na Onesimo ngombo ĩrĩa yatũmire Paũlũ aandĩkĩre Filemona marũa.

Maũndũ marĩa marĩ marũainĩ maya

Gũtaarĩria 1.1-8

Mũhianĩre wa Kristũ na wĩra wake 1.9–2.19

Muoyo mwerũ thĩinĩ wa Kristũ 2.20–4.6

Kũrĩĩkia 4.7-18

1 Kuuma kũrĩ niĩ Paũlũ, mũtũmwo wa Kristũ Jesũ nĩ ũndũ wa kwenda kwa Ngai, na kuuma kũrĩ Timotheo mũrũ wa Ithe witũ:

2 Kũrĩ andũ a Ngai arĩa me Kolosai, o inyuĩ aariũ na aarĩ a Ithe witũ ehokeku thĩinĩ wa Kristũ:

Wega na thaayũ wa Ngai Ithe witũ irogĩa na inyuĩ.

Mahooya ma gũcookia ngaatho

3 Hingo ciothe rĩrĩa tũkũmũhoera nĩtũcookagĩria Ngai Ithe wa Mwathani witũ Jesũ Kristũ ngaatho,

4 tondũ nĩtũiguĩte ũhoro wa wĩtĩkio wanyu thĩinĩ wa Jesũ Kristũ, na ũrĩa mwendeete andũ a Ngai oothe.

5 Hĩndĩ ĩrĩa ndũmĩrĩri ĩrĩa ya ma, nĩ yo Ũhoro ũrĩa Mwega, yokire kũrĩ inyuĩ rĩa mbere, nĩmwaiguire ũhoro wa mwĩhoko ũrĩa ĩheanaga. Kwoguo wĩtĩkio na wendo wanyu irĩ na mũthingi harĩ kĩrĩa mwĩrĩgagĩrĩra kĩrĩa mũigĩirwo handũ heega kũũrĩa igũrũ.

6 Ũhoro ũcio mwega ũrathiĩ o na mbere kũreehe maciaro na nĩũrahunja thĩ yothe, o ta ũrĩa wahunjire gatagatĩinĩ kaanyu kuuma mũthenya ũrĩa mwaiguire ũhoro wa wega wa Ngai na mũkĩũmenya na ma.

7 Ũhoro ũcio mwamenyithirio nĩ Epafara, ndungata ĩrĩa twendeete na tũrutithanagia wĩra nayo. Epafara nĩ mũruti wa wĩra wa Kristũ mwĩhokeku, na arutaga wĩra handũ haitũ.

8 Nĩatũmenyithĩĩtie ũhoro wa wendo ũrĩa mũheetwo nĩ Roho.

9 Nĩ ũndũ ũcio, kuuma mũthenya ũrĩa twaiguire ũhoro wanyu tũtirĩ twatiga kũmũhoera. Tũthaithaga Ngai amũiyũrie ũmenyo wa wendi wake hamwe na ũũgĩ wothe na ũmenyo iria iheanagwo nĩ Roho wake.

10 Nĩguo mĩikarĩre yanyu ĩkoragwo ĩ mĩagĩrĩru he Mwathani na ĩmũkenagie, na ĩkoragwo na ciĩko njega, na mũthiage o na mbere gũkũra ũhoroinĩ wa Ngai.

11 Ngai aromwĩkĩra hinya ũrĩa uumaga hinyainĩ wake mũnene, nĩguo mũhotage kũũmĩrĩria maũndũ moothe mũkirĩrĩirie, mwĩ na gĩkeno,

12 mũgĩcookagĩria Ngai Ithe witũ ngaatho, tondũ nĩ we watũmire mũtuĩke agai a kĩrĩa aigĩire andũ aake ũthamakiinĩ wa ũtheri.

13 Nĩatũhonokirie agĩtũruta hinyainĩ wa nduma, agĩtũreehe atũmenyereire Ũthamakiinĩ wa Mũũriũ wake ũrĩa eendeete mũno,

14 o we ũtũmaga tũkũũrwo na tuoherwo meehia maitũ.

Mũhianĩre wa Kristũ na wĩra wake

15 Kristũ nĩ we mũhiano wa Ngai ũrĩa ũtoonekaga; nĩ we irigithaathi rĩa ciũmbe ciothe.

16 Ngai oombire indo ciothe na ũndũ wake, ituĩke ciake; iria irĩ thĩ na iria irĩ igũrũ, iria cionekaga na iria itoonekaga, o na moonene moothe na moothamaki, na maahinya.

17 Kristũ aarĩ kuo mbere ya indo ciothe, na o kĩndũ kĩgĩaga na handũ haakĩo kĩũmbe thĩinĩ wa Jesũ.

18 Nĩ we mũtwe wa mwĩrĩ wake, na nĩguo kanitha. Nĩ we kĩhumo gĩa kanitha. Nĩ we maciaro ma mbere ma kũriũka kuuma kũrĩ akuũ, nĩguo maũndũinĩ moothe atuĩke no we wa mbere.

19 Nĩ gũkorwo Ngai nĩonire arĩ wega Mũũriũ ahaanane biũ naake.

20 Kwoguo Ngai nĩahũthĩrire Mũũrũwe nĩguo thĩ yothe ĩcookanwo naake. Ngai aahũthĩrire gĩkuũ kĩa Mũũriũ wake mũtharabainĩ nĩguo kũgĩe na thaayũ, na nĩ ũndũ ũcio indo ciothe, iria irĩ thĩ na iria irĩ igũrũ, igĩcookanwo naake.

21 O na inyuĩ kwĩ hĩndĩ mwarĩ kũraaya na Ngai na mwarĩ thũ ciake, nĩ ũndũ wa maũndũ mooru marĩa mweciiragia na mwekaga.

22 No rĩu, nĩ ũndũ wa gĩkuũ kĩa Mũũrũwe, Ngai nĩamũtuĩte araata aake, nĩguo amũtware harĩ we mũrĩ atheru, athingu, na mũtarĩ na ũcuuke.

23 Kwoguo no mũhaka mũikarage mũrĩ ehokeku na mũrũmĩĩte wega mũthingiinĩ ũrĩa wa ma na mũrũmu, na mũtigeetĩkĩre kweherio kuuma he kĩĩrĩgĩrĩro kĩrĩa mwagĩire nakĩo hĩndĩ ĩrĩa mwaiguire Ũhoro ũrĩa Mwega. Ũhoro ũcio Mwega nĩguo niĩ, Paũlũ ndatuĩkire ndungata yaguo, na nĩũhunjĩirio andũ a thĩ yothe.

Wĩra wa Paũlũ ta ndungata ya kanitha

24 Niĩ rĩu nĩngeneete tondũ wa ũrĩa nyariiragwo nĩ ũndũ wanyu. Kũnyariirwo kũu mwĩrĩ wakwa ũnyariiragwo nakuo nĩgũteithĩrĩria ndeithagĩrĩria kũhingia mĩnyamaaro ĩrĩa Kristũ aatigarĩĩtie kũhingia nĩ ũndũ wa mwĩrĩ wake, na nĩguo kanitha.

25 Ngai nĩanduire ndungata ya kanitha nĩ ũndũ wanyu, akĩĩhe wĩra wa gũtũma ndũmĩrĩri yake ĩmenyeke biũ.

26 Ndũmĩrĩri ĩyo ĩtũire ĩhithĩĩtwo njiarwa ciothe iria ihĩtũkĩĩte, no rĩu nĩamĩguũrĩirie andũ aake.

27 Muorooto wa Ngai nĩkũmenyithia andũ aake ũrĩa ũtonga wa hitho ĩyo ũrĩ mũnene gatagatĩinĩ ka andũ oothe a ndũũrĩrĩ. Hitho ĩyo nĩ atĩ Kristũ e thĩinĩ wanyu; ũguo nĩkuuga atĩ Ngai nĩagaatũma mũgae riiri wake.

28 Ũcio nĩ we ithuĩ tũhunjagĩria andũ oothe ũhoro wake. Tũmakaanagia na tũkamaruta na ũmenyo wothe ũrĩa twĩ naguo, nĩguo moonekage marĩ agima thĩinĩ wa Kristũ.

29 Ũndũ ũcio nĩguo niĩ ndĩĩnogagia nĩ ũndũ waguo, ngĩĩrutanagĩria na hinya wothe ũrĩa Kristũ aaheaga.

1 Tarekeei ndĩmwĩre ũrĩa ndanaruta wĩra mũritũ nĩ ũndũ wanyu, o na nĩ ũndũ wa andũ a Laodikia, na nĩ ũndũ wa andũ angĩ aingĩ arĩa matarĩ manyona.

2 Ndĩmarutagĩra wĩra nĩguo magĩe na ũũmĩrĩru wa ngoro na magwatanio hamwe nĩ wendo, nĩguo maheeo ũtonga wothe ũrĩa ũreehagwo nĩ ũmenyo ũrĩa wa ma. Na njĩra ĩyo makĩmenye hitho ya Ngai, na nĩ yo Kristũ we mwene.

3 Mĩthiithũ yothe ya ũũgĩ na ya ũmenyi ĩhithĩĩtwo thĩinĩ wake.

4 Ndĩramwĩra ũguo nĩguo mũtikaareke mũndũ amũheenererie na mĩario ya maheeni, o na ĩngĩiguĩka ĩ mĩega atĩa.

5 O na akorwo ha mwĩrĩ ndirĩ hamwe na inyuĩ-rĩ, ndĩ hamwe na inyuĩ kĩĩroho, na nĩngeneete nĩkuona ũrĩa mũnyiitaine wega, o na ũrĩa mũrũmĩĩte wega wĩtĩkioinĩ wanyu thĩinĩ wa Kristũ.

Muoyo mũkinyanĩru thĩinĩ wa Kristũ

6 Rĩu tondũ nĩmwamũkĩrĩĩte Jesũ Kristũ ta Mwathani, ikaragaai thĩinĩ wake.

7 Mwĩhandeei wega thĩinĩ wake, na mwake ũtũũro wanyu igũrũ rĩake. Ikaragaai mũrũmĩĩte wega wĩtĩkioinĩ o ta ũrĩa mwarutirwo, na mũcookagie ngaatho mũno.

8 Mwĩmenyagĩrĩreei mũtigaatuuo ngombo nĩ mũndũ o na ũrĩkũ na maũndũ ma maheeni marĩa matarĩ bata ma maũũgĩ ma gũũkũ thĩ, marĩa matiganagĩrwo nĩ andũ na marĩa maumaga kũrĩ maroho marĩa maathanaga gũũkũ thĩ, no ti kuuma kũrĩ Kristũ.

9 Nĩ gũkorwo ũngai wothe ũikaraga ũmũndũinĩ wa Kristũ,

10 na inyuĩ nĩmũheetwo muoyo mũkinyanĩru thĩinĩ wake. We nĩ mũnene wa wathani wothe o na moohoti.

11 Atĩrĩĩrĩ, nĩmwaruire mũgĩtuĩka kĩndũ kĩmwe na Kristũ, no ti kũrua kũrĩa kwa ndũire, nĩkũrua kũrĩa gwĩkagwo nĩ Kristũ, nakuo nĩkuohorwo kuuma kwĩ hinya wa mwĩrĩ ũyũ wĩhagia.

12 O na ningĩ nĩmwacookire mũgĩthikwo hamwe naake hĩndĩ ĩrĩa mwabatithirio, na hĩndĩ o ro ĩyo mũkĩriũkanĩrio hamwe naake nĩ ũndũ wa gwĩtĩkia hinya wa Ngai, ũrĩa wariũkirie Kristũ kuuma kũrĩ akuũ.

13 Inyuĩ-rĩ, kwĩ hĩndĩ mwakuĩte kĩĩroho nĩ ũndũ wa meehia maanyu o na nĩ ũndũ mwarĩ andũ a Ndũũrĩrĩ arĩa matarĩ Watho. No rĩĩrĩ, Ngai rĩu nĩamũheete muoyo hamwe na Kristũ. Ngai nĩatuoheire meehia maitũ moothe;

14 aatharirie thiirĩ ũrĩa twandĩkĩĩtwo o hamwe na Watho ũrĩa watũmĩĩte tũgĩe na thiirĩ ũcio, akĩeheria maũndũ macio o biũ na ũndũ wa kũmaamba mũtharabainĩ. Hau mũtharabainĩ Kristũ

15 nĩatooririe hinya wa maroho marĩa maathanaga na magathamaka; aamoohanirie magĩthiĩ mamuumĩĩte thuutha, agĩkĩonania mbere ya mũingĩ atĩ nĩatooreetie hinya wa maroho macio.

16 Kwoguo mũtikaareke mũndũ o na ũrĩkũ amũthondekere mawatho ma kĩrĩa mũrĩrĩaga kana mũrĩnyuaga, kana ma mĩthenya ĩrĩa mĩamũre, kana thigũkũ ya karũũgamo ka mweri, kana Thabatũ.

17 Maũndũ macio moothe nĩ ciĩruru cia maũndũ marĩa magooka; ma yamo nĩ Kristũ we mwene.

18 Mũtigeetĩkĩre gũtuĩrwo nĩ mũndũ ũrĩa wendeete kwĩnenehia tondũ nĩonaga cioneki, o ũrĩa wĩtuaga mũhooreri na ũthaathayagia araika. Mũndũ ta ũcio etĩĩaga hatarĩ gĩtũmi nĩ ũndũ wa mwĩciirĩrie wake wa ũmũndũ,

19 na ndehokeete Kristũ ũrĩa arĩ we mũtwe wa mwĩrĩ wothe. Kristũ nĩ we ũheaga mwĩrĩ wothe hinya na akawohania na nyunĩro na mĩkiha, na ũkũraga kũringana na ũrĩa Ngai eendaga ũkũre.

Gũkuanĩra na Kristũ na kũriũkanĩra naake

20 Atĩrĩĩrĩ, angĩkorwo nĩmwakuire hamwe na Kristũ mũgĩtigana na maroho marĩa maathanaga gũũkũ thĩ-rĩ, nĩ kĩĩ kĩratũma mũikare ta andũ a thĩ ĩno? Nĩ kĩĩ kĩratũma mũrũmĩrĩre mawatho ta maya;

21 “Ndũkooe gĩĩkĩ,” “Ndũgaacame gĩĩkĩ,” “Ndũkaahuutie kĩĩrĩa?”

22 Macio moothe maraaria o ũhoro wa indo iria ituĩkaga cia tũhũ ciarĩĩkia kũhũthĩrwo; macio no mawatho na moorutani mathondekeetwo nĩ andũ.

23 Mawatho macio moonekaga ta me na ũũgĩ ũrĩa ũkoragwo wĩ thĩinĩ wa andũ wa gwĩthondekera mĩhoere, na nĩmahinyagĩrĩria mĩĩrĩ yao, no matirĩ gĩtũmi kĩa bata kĩrĩa gĩtũmaga marigĩrĩrie merirĩria ma mwĩrĩ.

1 Angĩkorwo nĩmũriũkanĩirio hamwe na Kristũ-rĩ, gĩcaragiei maũndũ marĩa me igũrũ, kũrĩa Kristũ aikarĩĩte mwena wa ũrĩo wa Ngai.

2 Igaai meciiria maanyu harĩ maũndũ ma igũrũ no ti ma gũũkũ thĩ.

3 Nĩ ũndũ nĩmũkuĩte, na muoyo wanyu ũhithĩĩtwo hamwe na Kristũ thĩinĩ wa Ngai.

4 Kristũ nĩ we muoyo witũ, na hĩndĩ ĩrĩa akooneka o na inyuĩ nĩmũkooneka hamwe naake na mũgae riiri wake!

Muoyo ũrĩa mũkũrũ na ũrĩa mwerũ

5 Nĩ ũndũ ũcio no mũhaka mũtigane biũ na merirĩria ma maũndũ ma gũũkũ thĩ marĩa marutaga wĩra thĩinĩ wanyu, namo nĩ; ũmaraaya, ũũra thoni, merirĩria mooru, na gũcuumĩkĩra, (amu gũcuumĩkĩra no ũndũ ũmwe na kũhooya mĩhianano.)

6 Nĩ ũndũ wa maũndũ macio, maraakara ma Ngai nĩmagooka kũrĩ arĩa matamwathĩkagĩra.

7 O na inyuĩ nĩmwakoragwo na maũndũ ta macio, rĩrĩa mĩtũũrĩre yanyu yathagwo nĩ mo.

8 No rĩu no mũhaka mweherie maũndũ maya: maraakara, mang’ũrĩ, muku, kũrumana, na kwaria maũndũ ma ũũra thoni.

9 Tigaai kũheenanagia inyuĩ eene nĩ ũndũ nĩmweyaũrire ũmũndũ wanyu ũrĩa mũkũrũ na mĩtugo yaguo yothe,

10 mũkĩĩhumba ũmũndũ mwerũ, ũrĩa ũrerũhio o nginya ũgĩe na ũmenyo ũhaanane na Ngai ũrĩa waũmbire.

11 Nĩ ũndũ ũcio, rĩu gũtirĩ ũtiganu wa Mũngiriki na Mũyahudi, mũndũ mũruu na ũtarĩ mũruu, mũndũ mũkĩĩgu, mũhooi mĩhianano, o na ngombo na mũndũ ũtarĩ ngombo; Kristũ nĩ we maũndũ moothe, na akoragwo arĩ thĩinĩ wamo moothe.

12 Inyuĩ mũrĩ andũ a Ngai; nĩamwendire na akĩmũthuura mũtuĩke andũ aake. Nĩ ũndũ ũcio, mwĩhumbeei kũiguanĩra tha, gũtugana, kwĩnyiihia, kũhoorera, na gũkirĩrĩria.

13 Kiranagĩrĩriai mũndũ na ũrĩa ũngĩ, na muohanagĩre rĩrĩa ũmwe wanyu eekwo ũũru nĩ ũrĩa ũngĩ. Ohanagĩraai o ta ũrĩa Mwathani amuoheire inyuĩ eene.

14 Mbere ya maũndũ macio moothe-rĩ, onanagiai wendani, tondũ nĩguo wohanagia maũndũ moothe magatuĩka maagĩrĩru kũna.

15 Rekeei thaayũ ũrĩa Kristũ aheanaga ũmũtongoragie mũgĩtua matua maanyu nĩ ũndũ thaayũ ũcio nĩguo Ngai amwĩtĩire, tondũ mũrĩ o mwĩrĩ ũmwe. Na mũcookagie ngaatho.

16 Ningĩ rekeei ũhoro wa Kristũ ũikarage ũingĩhĩĩte mũno thĩinĩ wanyu. Rutanagaai na mũtaaranage mũndũ na ũrĩa ũngĩ na ũũgĩ wothe ũrĩa mũrĩ naguo. Cookagĩriai Ngai ngaatho na ngoro cianyu, mũkĩmũinagĩra thaburi, nyĩmbo cia Ngai, o na nyĩmbo cia kĩĩroho.

17 Maũndũ moothe marĩa mũrĩĩkaga na ciĩko kana na kwaria, meekageei rĩĩtwainĩ rĩa Mwathani Jesũ, mũgĩcookagĩria Ngai Ithe witũ ngaatho na ũndũ wake.

Mũtũũranĩrie wa andũ thĩinĩ wa muoyo mwerũ

18 Inyuĩ atumia, heyagaai athuuri aanyu gĩtĩĩo tondũ ũguo nĩguo mwagĩrĩirwo nĩgwĩka ta Akristiano.

19 Inyuĩ athuuri, endagaai atumia aanyu na mũtikaamakũũmage.

20 Inyuĩ ciana, athĩkagĩraai aciari aanyu maũndũinĩ moothe, tondũ ũndũ ũcio nĩũkenagia Mwathani.

21 Na inyuĩ aciari, mũtikaaraakaragie ciana cianyu mũtikaae gũtũma ikue ngoro.

22 Inyuĩ ngombo, athĩkagĩraai aathani aanyu a gũũkũ thĩ maũndũinĩ moothe, ti atĩ nĩguo mamwende; maathĩkagĩrei biũ na ngoro cianyu nĩ ũndũ wa ũrĩa mũtĩĩĩte Mwathani.

23 Ũndũ o wothe ũrĩa mũrĩĩkaga, wĩkageei na ngoro yothe, ta arĩ wĩra wa Mwathani mũraruta, no ti wa andũ.

24 Ririkanagaai atĩ Mwathani nĩ we ũkaamũhe kĩrĩa aigĩire andũ aake kĩrĩ ta kĩheeo, tondũ Kristũ nĩ we Mwathani ũrĩa mũtungatagĩra.

25 Mũndũ ũrĩa wĩkaga ũũru akaarĩhwo kũringana na ũũru ũrĩa eekaga, tondũ Ngai atuagĩra andũ oothe ategũthuurania.

1 Inyuĩ aathani-rĩ, ĩkagaai ngombo cianyu maũndũ ma kĩhooto na marũngĩrĩru. Ririkanagaai atĩ o na inyuĩ mwĩ na Mwathani igũrũ matuinĩ.

Mataaro

2 Thiĩi o na mbere kũhooya mwĩiguĩte, mũgĩcookagĩria Ngai ngaatho.

3 Mũkĩhooya-rĩ, tũhooyagĩreei o na ithuĩ nĩguo Ngai atũhe mweke mwega wa kũhunjia ndũmĩrĩri yake ĩkoniĩ hitho ya Kristũ. Ũndũ ũcio nĩguo ũtũmĩĩte ngorwo ndĩmuohe.

4 Hooyagĩraai nĩguo hotage kũheana ũhoro wa hitho ĩyo na njĩra ĩkũiguĩka wega, tondũ ũguo nĩguo njagĩrĩirwo nĩgwĩka.

5 Thiagaai na mĩthiĩre ya ũũgĩ rĩrĩa mwĩ hamwe na andũ arĩa mateetĩkĩĩtie, na mũhũthagĩre mahinda maanyu moothe wega.

6 Mĩario yanyu yagĩrĩirwo nĩgũkoragwo ĩ mĩega na ya kwendeka hingo ciothe, nĩguo mũkoragwo mũkĩmenya ũrĩa mwagĩrĩirwo nĩgũcookeria mũndũ o wothe.

Ngeithi cia mũthia

7 Nĩmũrĩheeo ũhoro wakwa wothe nĩ mũrũ wa Ithe witũ Tukiko, ũrĩa twendeete mũno; nĩ ndungata njĩhokeku tũrutithanagia wĩra wa Mwathani nayo.

8 Kĩu nĩkĩo gĩtũmi kĩrĩa kĩratũma ndĩmũtũme kũrĩ inyuĩ nĩguo amũmenyithie ũrĩa ithuĩ tũhaana na amũũmĩrĩrie ngoro.

9 Arooka na mũrũ wa Ithe witũ Onesimo, ũrĩa uumĩĩte kũu kwanyu, naake nĩ mũndũ mwende mũno na mwĩhokeku. Mooka nĩmekũmũmenyithia ũrĩa maũndũ moothe mahaana gũũkũ.

10 Nĩmwageithio nĩ Arisitariko ũrĩa tuoheetwo naake, o hamwe na Mariko ũrĩa mũihwa wa Baranaba. (Nĩ mwĩrĩĩtwo atĩ Mariko angĩũka na kũu kwanyu mũmwamũkĩre).

11 O naake Joshua, ũrĩa wĩtagwo na rĩĩtwa rĩngĩ Jusito, nĩamũgeithia. Acio atatũ no o Ayahudi arĩa meetĩkĩĩtie Kristũ arĩa tũrutithanagia wĩra wa Ũthamaki wa Ngai nao; nĩ andũ mandeithĩĩtie mũno.

12 Ningĩ nĩmwageithio nĩ Epafara ũrĩa ũrĩ ũmwe wanyu. We nĩ ndungata njega ya Jesũ Kristũ, na nĩamũhooyagĩra mũno hingo ciothe, akĩũragia Ngai amũhotithagie gũikaraga mwĩhandĩĩte wega ta Akristiano oomĩrĩru na akinyanĩru ũhoroinĩ wothe wa kũhingia wendi wa Ngai.

13 Niĩ ndĩ mũira atĩ nĩarutĩĩte wĩra mũritũ nĩ ũndũ wa andũ a Laodikia na a Hierapoli.

14 Nĩmwageithio nĩ Luka ndagĩtaarĩ ũrĩa twendeete mũno, o na Dema nĩamũgeithia.

15 Geithiai aariũ na aarĩ a Ithe witũ arĩa makoragwo Laodikia, na mũgeithie Numifa o na andũ oothe a kanitha arĩa macemanagia gwake mũciĩ.

16 Mwarĩĩkia gũthoomerwo marũa maya no mũhaka mũmanengerane magathoomerwo andũ a kanitha wa Laodikia. Inyuĩ na inyuĩ no mũhaka muone atĩ nĩmwathooma marũa marĩa mekũnengeranwo nĩ kanitha wa Laodikia.

17 Ĩraai Arikipo atĩrĩĩrĩ, “No mũhaka wone atĩ nĩwahingia wĩra ũrĩa waheirwo wa gũtungatĩra Mwathani.”

18 Nĩ niĩ Paũlũ ndaandĩka ũũ na guoko gwakwa. “Niĩ Paũlũ, nĩndamũgeithia.” Mũtikaariganĩrwo atĩ ndĩ muohe na mĩnyororo.

Wega wa Mwathani ũrogĩa na inyuĩ.