Category: Agalatia

Gũtaarĩria

Rĩrĩa andũ arĩa mataarĩ Ayahudi maahunjĩirio Ũhoro ũrĩa Mwega na makĩwĩtĩkĩra, nĩkwambĩrĩirie kũũrio kana mũndũ no mũhaka arũmĩrĩre Watho wa Musa nĩguo atuĩke Mũkristiano kũna. Paũlũ nĩoigĩĩte atĩ ũndũ ũcio ndwarĩ na bata. Gĩtũmi nĩ tondũ ũndũ ũrĩa ũtũmaga andũ maikare me rũmwe na Kristũ nĩ wĩtĩkio wiki, na nĩguo ũtũmaga andũ oothe makorwo maiguithanĩĩtio na Ngai. Thĩinĩ wa makanitha ma Galatia, kũrĩa kwarĩ bũrũriinĩ ũrĩa wathagwo nĩ Aroma wa Asia Niini, nĩkwagĩire na andũ maakararirie Paũlũ makiuga atĩ mũndũ no mũhaka arũmĩrĩre Watho wa Musa o naguo, nĩguo akorwo aigwithanĩĩtio na Ngai.

Marũa maya ma Paũlũ kũrĩ Agalatia maandĩkirwo nĩ geetha macookie andũ arĩa maahĩtithagio nĩ ũrutani wa maheeni wĩtĩkioinĩ ũrĩa wa ma na mĩtugoinĩ ĩrĩa mĩkinyanĩru. Paũlũ aambĩrĩirie na kũgitĩra kĩhooto gĩake gĩa gũkorwo arĩ mũtũmwo wa Jesũ Kristũ. Oigĩĩte agwatĩirie atĩ gwĩtwo gwake atuĩke mũtũmwo gũtioimire kũrĩ mũndũ o na ũmwe kwoimire kũrĩ Ngai, naguo wĩra wake wa kũhunjia werekereetio makĩria kũrĩ andũ arĩa mataarĩ Ayahudi. Nĩacookeete agathiĩ na mbere akoiga atĩ andũ maiguithanagio na Ngai nĩ ũndũ wa gwĩtĩkia tu. Icunjĩinĩ cia kũrĩĩkia Paũlũ nĩonanĩĩtie atĩ mũtugo wa Ũkristiano uumaga wendoinĩ ũrĩa wonekaga kuumana na gwĩtĩkia Kristũ.

Maũndũ marĩa marĩ marũainĩ maya

Gũtaarĩria 1.1-10

Ũhoti wa Paũlũ ta mũtũmwo 1.11–2.21

Ũhoro Ũrĩa Mwega wa wega wa Ngai 3.1–4.31

Wĩyathi na wĩra wa Mũkristiano 5.1–6.10

Kũrĩĩkia 6.11-18

1 Kuuma kũrĩ niĩ Paũlũ, ũrĩa watuĩkire mũtũmwo ti na ũndũ wa gwĩtwo kana kwarĩrĩrio nĩ mũndũ, no nĩ na ũndũ wa gwĩtwo nĩ Jesũ Kristũ o hamwe na Ngai Ithe ũrĩa wamũriũkirie akiuma kũrĩ akuũ.

2 Nĩtwamũgeithia inyuĩ andũ a makanitha ma Galatia twĩ na aariũ na aarĩ a Ithe witũ oothe arĩa twĩ hamwe nao:

3 Mũrogĩa na wega na thaayũ iria ciumaga kwĩ Ngai Ithe witũ o hamwe na Mwathani Jesũ Kristũ.

4 Kristũ nĩerutire we mwene nĩ ũndũ wa meehia maitũ, nĩguo atũhonokie kuuma maũndũinĩ mooru ma matukũ maya, kũringana na wendi wa Ngai, o we Ithe witũ.

5 Ngai arogoocwo tene na tene! Ameni.

Ũhoro ũrĩa Mwega nĩ ũmwe tu

6 Inyuĩ nĩmũũmakĩĩtie nĩ ũndũ thuutha wa ihinda o iniini nĩmũratiganĩria ũrĩa wamwĩtire na ũndũ wa wega wa Kristũ, mũkarũmĩrĩra ũhoro mwega wa mũthemba ũngĩ.

7 Atĩrĩĩrĩ, gũtirĩ ũhoro mwega wa mũthemba ũngĩ. Ndoiga ũguo tondũ nĩkũrĩ andũ maramũthĩĩnia makĩenda kũgarũra Ũhoro ũrĩa Mwega wa Kristũ.

8 O na ithuĩ tũngĩmũhunjĩria ũhoro mwega wa mũthemba ũngĩ, kana o na mũraika angiuma igũrũ ooke amũhunjĩrie ũhoro mwega wa mũthemba ũngĩ tiga ũrĩa twamũhunjĩirie, aronyiitwo nĩ kĩrumi!

9 Ũhoro ũyũ nĩtũugĩĩte, na no ngũũgweta o rĩngĩ atĩ; mũndũ o na ũrĩkũ angĩmũhunjĩria Ũhoro Mwega wa mũthemba ũngĩ tiga ũrĩa mwetĩkĩrire aronyiitwo nĩ kĩrumi!

10 Ngiuga ũguo-rĩ, nĩ andũ ndĩrenda mandue mwega kana nĩ Ngai? Nĩ andũ ndĩrenda gũkenia? Korwo no andũ ndũire ngeragia gũkenia-rĩ, ndikĩagĩrĩirwo nĩ gũkorwo ndĩ ndungata ya Kristũ.

Ũrĩa Paũlũ aatuĩkire mũtũmwo

11 Rekeei ndĩmwĩre, aariũ na aarĩ a Ithe witũ atĩ Ũhoro ũrĩa Mwega hunjagia nduumĩĩte kũrĩ mũndũ.

12 Atĩrĩĩrĩ, Ũhoro ũcio ndianengerirwo nĩ mũndũ kana ngĩthoomithio nĩ mũndũ. Jesũ Kristũ we mwene nĩ we wanguũrĩirie ũhoro ũcio.

13 Nĩmũiguĩte ũrĩa ndatũũraga na hau kabere rĩrĩa ndarũmagĩrĩra na kĩyo kĩnene ndini ya Ayahudi, o na mũkaigua ũrĩa ndanyariiraga kanitha wa Ngai itarĩ na tha, ngĩgeragia mũno kũũniina.

14 Ũhoroinĩ wa kũrũmĩrĩra mĩtugo ya Ayahudi-rĩ, ndarĩ mbere ya Ayahudi aingĩ a riika rĩakwa, na nĩndeheanĩĩte mũno maũndũinĩ ma mĩtugo ya ndũire ya maithe maitũ.

15 No rĩĩrĩ, Ngai nĩathuurire na ũndũ wa wega wake o na itarĩ mũciare akĩnjĩta ndĩmũtungatagĩre. Na rĩĩrĩ, rĩrĩa oonire arĩ wega

16 aanguũrĩirie Mũũriũ nĩguo ngahunjie Ũhoro wake kũrĩ andũ a ndũũrĩrĩ, ndiathiire gũtaarwo nĩ mũndũ o wothe,

17 kana ngĩthiĩ Jerusalemu kuonana na arĩa maatuĩkĩĩte atũmwo mbere yakwa; ndathiire Arabia, thuutha ũcio ngĩcooka Damasiki o rĩngĩ.

18 Thuutha wa mĩaka ĩtatũ nĩguo ndathiire Jerusalemu gũceerera Petero, ngĩikara naake matukũ ikũmi na mataano.

19 Atũmwo acio angĩ tũtionanire nao o tiga Jakubumũrũ wa nyina na Mwathani.

20 Ũhoro ũyũ ndĩrandĩka nĩ wa ma, Ngai nĩ mũira atĩ ndiraheenania!

21 Thuutha ũcio nĩndacookire ngĩthiĩ Siria na Kilikia.

22 Nginyagia hĩndĩ ĩyo andũ a kanitha wa Judea matianjũũĩ niĩ mwene,

23 no kũigua maiguaga atĩrĩ: “Mũndũ ũrĩa watũũraga atũnyariiraga rĩu nĩkũhunjia arahunjia ũhoro wa wĩtĩkio o ũcio eendaga kũniina!”

24 Nao magĩkĩgooca Ngai nĩ ũndũ wakwa.

Paũlũ na atũmwo arĩa angĩ

1 Thuutha wa mĩaka ikũmi na ĩna nĩndaambatire rĩngĩ Jerusalemu na Baranaba, na tũgĩthiĩ na Tito.

2 Ndathiire tondũ Ngai nĩanguũrĩirie thiĩ kuo. Nĩtwacookanirie ndundu na atongoria oiki, ngĩmataarĩria ndũmĩrĩri ya ũhoro ũrĩa mwega ĩrĩa hunjagĩria andũ a Ndũũrĩrĩ, tondũ ndiendaga wĩra ũrĩa ndarutĩĩte kana ũrĩa ndathiaga na mbere kũruta ũtuĩke wa tũhũ.

3 Matioigire atĩ Tito, ũrĩa twarĩ naake, no mũhaka arue tondũ aarĩ Mũngiriki,

4 o na gũtuĩka andũ amwe nĩmeendaga arue. Andũ acio nĩmaatoonyire gatagatĩinĩ gaitũ metuĩte aariũ na aarĩ a Ithe witũ, no maarĩ athigaani meendaga gũtuĩria ũhoro wa wĩyathi ũrĩa tũkoragwo naguo nĩ ũndũ wa gũkorwo tũrĩ thĩinĩ wa Kristũ Jesũ. Andũ acio meendaga gũtũtua ngombo,

5 no tũtietĩkĩrire ũhoro wao o na haniini, nĩguo ũũma wa Ũhoro Mwega ũgitĩrwo nĩ ũndũ wanyu.

6 No rĩĩrĩ, acio maahaanaga ta arĩ o anene-rĩ, (ndĩroiga ũguo tondũ ũrĩa maarĩ harĩ niĩ no ũndũ ũmwe; Ngai ndacagũranagia); nguugaga atĩrĩĩrĩ, anene acio matirĩ ũndũ mwerũ manjĩĩrire.

7 O eene nĩmoonire atĩ Ngai nĩaheete wĩra wa kũhunjĩria andũ a Ndũũrĩrĩ Ũhoro ũrĩa Mwega, o ta ũrĩa aaheete Petero wĩra wa kũhunjĩria Ayahudi ũhoro o ro ũcio.

8 Ngai ũrĩa watuire Petero mũtũmwo wa kũhunjĩria Ayahudi no we wanduire mũtũmwo wa kũhunjĩria andũ a Ndũũrĩrĩ.

9 Nao Jakubu, Petero, na Johana, arĩa maahaanaga ta arĩ o atongoria magĩkĩona o wega atĩ Ngai nĩaheete wĩra ũcio wa bata, magĩtũgeithia twĩ na Baranaba na mooko. Maatũgeithirie ũguo nĩguo matuonie atĩ twarutaga o wĩra ũmwe tũgwatanĩire. Nĩtwaiguithanĩirie atĩ niĩ na Baranaba tũrĩhunjagĩria andũ a Ndũũrĩrĩ, nao mahunjagĩrie Ayahudi.

10 Ũndũ ũrĩa maatwĩrire tũtikariganagĩrwo no ũhoro wa andũ arĩa me na thĩĩna gatagatĩinĩ kaao, na ũndũ ũcio nĩngoreetwo ngĩũthingata na kĩyo.

Paũlũ gũkũũma Petero me Anitiokia

11 No rĩĩrĩ, hĩndĩ ĩrĩa Petero ookire Anitiokia nĩndamũkararirie mbere ya andũ, tondũ nĩonekire ahĩtĩĩtie.

12 Ndamũkararirie nĩ tondũ nĩarĩanagĩra na aariũ na aarĩ a Ithe witũ a Ndũũrĩrĩ andũ arĩa maatũmĩĩtwo nĩ Jakubu matanakinya. No rĩĩrĩ, rĩrĩa andũ acio maakinyire eeyeheririe harĩ andũ acio a Ndũũrĩrĩ, agĩtiga kũrĩanĩra na Ndũũrĩrĩ nĩ ũndũ nĩetigagĩra andũ arĩa moigaga atĩ no mũhaka andũ a Ndũũrĩrĩ maambe marue.

13 Ayahudi arĩa angĩ oothe nĩmaambĩrĩirie gwĩka ta Petero nĩ ũndũ wa gwĩtigĩra, kinya o naake Baranaba akĩnyiitanĩra nao ũhingainĩ wao.

14 Rĩrĩa ndoonire atĩ matiarĩ andũ arũngĩrĩru kũringana na ma ya Ũhoro Ũrĩa Mwega ngĩĩra Petero acio angĩ oothe makĩiguaga atĩrĩ, “Wee-rĩ, wĩ Mũyahudi, no ũkoreetwo ũgĩikara na mĩtugo ya andũ a Ndũũrĩrĩ; ũngĩkĩhota atĩa kũhatĩrĩria andũ a Ndũũrĩrĩ maikare na mĩtugo ya Ayahudi?”

Gwĩtĩkia nĩkuo gũtũmaga Ayahudi na andũ a Ndũũrĩrĩ mahonokio

15 Ithuĩ-rĩ, tũtiaciarirwo twĩ andũ a Ndũũrĩrĩ arĩa meehagia, twaciarirwo twĩ Ayahudi.

16 No nĩtũrĩĩkĩĩtie kũmenya atĩ mũndũ aiguithanagio na Ngai na ũndũ wa gwĩtĩkia Kristũ Jesũ, no ti tondũ wa gwĩka ũrĩa Watho uugĩĩte. O na ithuĩ nĩtwĩtĩkĩĩtie Kristũ Jesũ nĩguo tũiguithanio na Ngai na ũndũ wa ũrĩa twĩtĩkĩĩtie Jesũ, no ti tondũ wa gwĩka ũrĩa Watho uugĩĩte. Nĩ gũkorwo gũtirĩ mũndũ o na ũmwe ũiguithanagio na Ngai nĩ ũndũ wa gwĩka ũrĩa Watho uugĩĩte.

17 Angĩkorwo rĩrĩa tũrageria kũiguithanio na Ngai tũrĩ thĩinĩ wa Kristũ nĩtuonekaga tũrĩ eehia o ta andũ a Ndũũrĩrĩ-rĩ, ũguo nĩkuuga atĩ Kristũ akoragwo agĩtungatĩra wĩhia? Aaca o na haniini!

18 Angĩgĩkorwo ngũcookerera maũndũ ma Watho marĩa ndaregire-rĩ, ũguo nĩkuonania atĩ niĩ ndĩ muuni Watho?

19 Niĩ-rĩ, nĩndakuire ũhoroinĩ wa Watho, ngĩũragwo nĩ Watho guo mwene, nĩguo ndũũre muoyo ndĩ wa Ngai.

20 Nĩnyambanĩirio hamwe na Kristũ, na nĩ ũndũ ũcio rĩu ti niĩ ndũũraga muoyo, no nĩ Kristũ ũtũũraga thĩinĩ wakwa. Muoyo ũyũ ndũũraga ndĩ na mwĩrĩ ndũũraga na ũndũ wa gwĩtĩkia Mũrũ wa Ngai, ũrĩa wanyendire, akĩĩruta nĩ ũndũ wakwa.

21 Ndingĩtĩkĩra gũtua wega wa Ngai kĩndũ gĩa tũhũ; angĩkorwo mũndũ aiguithanagio na Ngai nĩ ũndũ wa gwĩka kũringana na Watho-rĩ, gĩkuũ gĩa Kristũ nĩ gĩa tũhũ!

Watho kana wĩtĩkio

1 Atĩrĩĩrĩ inyuĩ Agalatia aya akĩĩgu! Nũũ ũmũrogeete? Nĩndamũtaarĩirie wega ũrĩa Jesũ Kristũ aambirwo mũtharabainĩ!

2 Ũndũ ũrĩa ndĩrenda kũmũũria nĩ atĩrĩĩrĩ; mwagĩire na Roho wa Ngai nĩ tondũ wa gwĩka ũrĩa Watho uugĩĩte kana nĩ tondũ wa kũigua Ũhoro ũrĩa Mwega na kũwĩtĩkia?

3 Kaĩ mũrĩ akĩĩgu atĩa? Mwambĩrĩirie na Roho wa Ngai na rĩu mũrenda kũrĩĩkĩrĩria na hinya wanyu kĩũmbe?

4 Maũndũ moothe marĩa mwamenyire maarĩ ma tũhũ? Nĩ ma matiarĩ ma tũhũ!

5 Ngai amũheaga Roho na akaringaga ciama gatagatĩinĩ kaanyu tondũ wa ũrĩa mwĩkaga ũrĩa Watho uugĩĩte kana wa ũrĩa mũiguaga Ũhoro Ũrĩa Mwega na mũkawĩtĩkia?

6 Ririkanaai ũhoro wa Aburahamu; Maandĩko moigĩĩte atĩrĩ, “Eetĩkirie Ngai, naake Ngai akĩmũtua mũthingu.”

7 Kĩmenyeei atĩ andũ oothe arĩa meetĩkĩĩtie nĩ o ciana cia Aburahamu.

8 Maandĩko nĩmoigĩĩte o tene atĩ Ngai nĩagaatua andũ a Ndũũrĩrĩ athingu nĩ tondũ wa gwĩtĩkia. Kwoguo Aburahamu nĩamenyithirio Ũhoro Mwega o mbere akĩĩrwo nĩ Maandĩko atĩrĩ: “Andũ a ndũũrĩrĩ ciothe nĩmakaaraathimwo nĩ ũndũ waku.”

9 Kwoguo andũ arĩa meetĩkagia nĩmaraathimagwo o ta ũrĩa Aburahamu aaraathimirwo nĩ ũndũ wa gwĩtĩkia.

10 Andũ oothe arĩa mehokeete ũhoro wa gwathĩkĩra Watho me na kĩrumi. Gĩtũmi nĩ tondũ Maandĩko moigĩĩte atĩrĩ, “Mũndũ o wothe ũtaathĩkagĩra maũndũ moothe maandĩkĩĩtwo ibukuinĩ rĩa Watho e na kĩrumi!”

11 Rĩu nĩtũũĩ atĩ gũtirĩ mũndũ ũiguithanagio na Ngai nĩ tondũ wa gwĩka ũrĩa Watho uugĩĩte nĩ ũndũ Maandĩko moigĩĩte atĩrĩ, “Mũndũ ũrĩa ũgaatũũra muoyo no ũrĩa ũiguithanĩĩtio na Ngai nĩ ũndũ wa gwĩtĩkia.”

12 No Watho nduugaga ũhoro wa gwĩtĩkia; handũ ha ũguo uugaga atĩrĩ, “Mũndũ o wothe wĩkaga ũrĩa wothe Watho uugĩĩte nĩagaatũũra muoyo.”

13 No rĩĩrĩ, Kristũ nĩatũkũũrire kuuma kĩrumiinĩ kĩa Watho, naake mwene akĩnyiitwo nĩ kĩrumi kĩu handũ haitũ; tondũ Maandĩko moigĩĩte atĩrĩ: “Mũndũ o wothe ũgaacuurio mũtĩinĩ e na kĩrumi.”

14 Kristũ Jesũ eekire ũguo nĩ geetha andũ a Ndũũrĩrĩ magĩe na kĩraathimo kĩrĩa Ngai eerĩire Aburahamu, nĩguo na ũndũ wa gwĩtĩkia tũgĩe na Roho ũrĩa Ngai eeranĩire.

Watho na kĩĩranĩro

15 Aariũ na aarĩ a Ithe witũ, ngũmũhe ngerekano ya maũndũ o marĩa muonaga. Atĩrĩĩrĩ, mũndũ angĩrĩĩkia kwĩgaya na aandĩke ũguo aatua, gũtirĩ mũndũ ũngĩhota kũregana na ũrĩa egaĩĩte kana oongerere ũndũ o na ũmwe.

16 Ha ũhoro wa ciĩranĩro-rĩ, Aburahamu nĩ we werĩirwo o hamwe na mbeũ yake. Maandĩko matiugĩĩte ũhoro wa ciana ciake, moigĩĩte ũhoro wa mwana wake. Maandĩko macio moigaga ũhoro wa mũndũ ũmwe, na nĩ we Kristũ.

17 Ndĩrenda kuuga atĩrĩ: “Kĩrĩĩkanĩro kĩrĩa Ngai aarĩĩkanĩire na Aburahamu gĩtingĩniinwo gĩtuĩke gĩa tũhũ nĩ Watho ũrĩa wacookire gũũka thuutha wa mĩaka magana mana ma mĩrongo ĩtatũ (430).”

18 Nĩ ũndũ-rĩ, angĩkorwo Ngai aheanaga igai kũringana na Watho-rĩ, igai rĩu rĩtikĩrĩ hĩndĩ rĩngĩgĩkorwo riumanĩĩte na kĩĩranĩro gĩake. No rĩĩrĩ, Ngai eegaĩire Aburahamu kũringana na kĩĩranĩro.

19 Watho-rĩ, ũkĩrĩ wa kĩ? Watho wekĩrirwo nĩguo wonanagie meehia nĩ kĩĩ, kinya hĩndĩ ĩrĩa mbeũ ya Aburahamu ĩrĩa yerĩirwo kĩĩranĩro kĩu ĩgooka. Watho wanenganĩrirwo nĩ araika mahũthĩrĩĩte mũndũ wa kũũkinyia kũrĩ andũ.

20 No rĩĩrĩ, mũndũ ta ũcio ndakoragwo akĩendekana rĩrĩa harĩ o mũndũ ũmwe, na Ngai nĩ ũmwe tu.

Ũrĩa Watho wendaga gwĩka

21 Ũhoro ũyũ ũrenda kuuga atĩ Watho nĩũreganĩĩte na ciĩranĩro cia Ngai? Aaca o na haniini! Nĩ ũndũ-rĩ, korwo andũ maagĩire na Watho ũngĩhota kũmahe muoyo, mũndũ o wothe nĩangĩiguithanagio na Ngai na ũndũ wa kũũrũmĩrĩra.

22 No Maandĩko moigaga atĩrĩ, “Andũ oothe me rungu rwa hinya wa meehia, nĩ ũndũ ũcio igai rĩrĩa rĩĩranĩirwo na ũndũ wa gwĩtĩkia Jesũ Kristũ rĩheagwo arĩa meetĩkagia.”

23 Mbere ya wĩtĩkio gũũka-rĩ, Watho nĩguo watuoheete ta mĩgwate kinya rĩrĩa wĩtĩkio waguũririo.

24 Kwoguo Watho warĩ wa gũtũrũũgamĩrĩra kinya Kristũ ooke, nĩguo tũiguithanio na Ngai na ũndũ wa gwĩtĩkia.

25 Rĩu tondũ hĩndĩ ya wĩtĩkio nĩ nginyu-rĩ, Watho ndũngĩgĩcooka gũtũrũũgamĩrĩra rĩngĩ.

26 Inyuothe mũrĩ ciana cia Ngai thĩinĩ wa Kristũ Jesũ.

27 Inyuĩ-rĩ, nĩmwabatithirio thĩinĩ wa Kristũ, na rĩu mwĩhumbĩĩte Kristũ we mwene.

28 Nĩ ũndũ ũcio hatikĩrĩ ũtiganu wa Mũyahudi na mũrũũrĩrĩ, ngombo na mũndũ ũtarĩ ngombo, o na mũndũ mũrũme na mũtumia; inyuothe mwĩ thĩinĩ wa Kristũ Jesũ.

29 Angĩkorwo mũrĩ a Kristũ-rĩ, mũkĩrĩ a mbeũ ya Aburahamu na nĩmũkaagaya igai rĩrĩa Ngai eeranĩire.

1 Ndĩrenda kuuga atĩrĩ, mũndũ ũrĩa ũregaĩrwo angĩkorwo e mwana-rĩ, ndarĩ ũtiganu na ngombo o na gũtuĩka nĩ we mwene indo icio ciothe cia ithe.

2 Ihinda rĩu akoragwo e mwana nĩharĩ andũ makoragwo makĩmũrora na makĩramata maũndũ maake o kinya ihinda rĩrĩa ithe aathanire rĩgaakinya.

3 Ũguo noguo o na ithuĩ twatũire twĩ ngombo cia maũndũ ma thĩ tũtaanagimara kĩĩroho.

4 No rĩĩrĩ, rĩrĩa mahinda marĩa maagĩrĩire maakinyire, Ngai nĩatũmire Mũũriũ wake kĩũmbe. Mũũriũ ũcio wake ookire na ũndũ wa gũciarwo nĩ mũndũ wa nja na akĩrerwo e rungu rwa Watho wa Ayahudi

5 nĩguo akũũre andũ arĩa matũire rungu rwa Watho, nĩ geetha tũtuĩke ciana cia Ngai.

6 Nĩguo Ngai oonanie atĩ tũrĩ ciana ciake, nĩatũmire Roho wa Mũũriũ ngoroinĩ ciitũ ũrĩa wĩtanaga arĩ thĩinĩ witũ, “Awa! Baaba!”

7 Rĩu nĩtwagĩtigire gũtuĩka ngombo tũgĩtuĩka ciana ciake. Tondũ nĩtwagĩtuĩkire ciana ciake-rĩ, nĩtũkaagaya igai rĩrĩa Ngai aigĩire ciana ciake.

Paũlũ kũiguĩra Agalatia kĩeha

8 Tene rĩrĩa mũtooĩ Ngai mwatũire ũkomboinĩ wa ciũmbe iria itarĩ ngai.

9 Rĩu tondũ nĩmũmenyeete Ngai, kana ndĩkiuge, Ngai nĩamũmenyeete-rĩ, mũrakĩenda gũcookerera maroho marĩa matarĩ bata na matarĩ kĩene nĩkĩ? Mũrenda gũtuĩka ngombo ciamo o rĩngĩ nĩkĩ?

10 Nĩmũcookeete kũhe gĩtĩĩo mĩthenya ĩmwe, mĩeri, mahinda o na mĩaka.

11 Ũhoro ũcio wanyu nĩũnjĩkĩrĩĩte kĩeha! Gwakĩhoteka gũtuĩke wĩra wothe ũrĩa ndarutire nĩ ũndũ wanyu nĩ wa tũhũ?

12 Aariũ na aarĩ a Ithe witũ, ndamũthaitha mũhaane ta niĩ, tondũ niĩ haana o ta inyuĩ. Gũtirĩ mũndũ o na ũmwe wanyu ũrĩ wahĩtĩria.

13 Inyuĩ-rĩ, nĩmũũĩ atĩ ndamũhunjĩirie ũhoro ũrĩa Mwega hĩndĩ ya mbere tondũ ndaarĩ mũrũaru.

14 O na gũtuĩka ndwari ĩyo yakwa yarĩ magerio kũrĩ inyuĩ, mũtiamenire kana mũkĩndega. Mwanyamũkĩrire o ta ũrĩa mũngĩamũkĩra mũraika wa Ngai, kana ta ũrĩa mũngĩamũkĩra Kristũ Jesũ we mwene.

15 Kũiganĩra kũrĩa mwaiguaga mũiganĩire kaĩ gwathiire kũ? Niĩ ndĩ mũira atĩ korwo maitho nĩmaheanagwo nĩmũngĩakũũrire maanyu mũũhe.

16 Kaĩ rĩu ndĩgĩtuĩkĩĩte thũ yanyu nĩ tondũ wa kũmwĩra ũhoro wa ma?

17 Andũ acio angĩ maramuonia atĩ me na bata mũno na inyuĩ, no muorooto wao ti mwega. Kĩrĩa kĩmabatairie no kũmũtigithania na niĩ nĩguo mũmarũmĩrĩre.

18 Nĩ wega kũgĩa bata na andũ wĩ na muorooto mwega hingo ciothe, na ũguo nĩguo niĩ ngoragwo ndariĩ hĩndĩ ciothe, no to hĩndĩ ĩrĩa twĩ na inyuĩ.

19 Ciana ciakwa! O rĩngĩ ndĩ na ruwo rũnene mũno nĩ ũndũ wanyu o ta rwa mũtumia akĩheeo mwana, na ngũigua ruwo kinya rĩrĩa mũgeetĩkĩra kũgarũrwo mũhaane Kristũ.

20 Naarĩ korwo ta rĩu ũguo, ndĩ hamwe na inyuĩ na no ngarũre mwarĩrie! Inyuĩ nĩmũũmakĩĩtie mũno!

Ngerekano ya Hagari na Sara

21 Tarekeei njũũrie arĩa meendeete gũkorwo me rungu rwa Watho atĩrĩ: kaĩ mũtaiguaga ũrĩa Watho uugaga?

22 Kwandĩkĩĩtwo atĩrĩĩrĩ, Aburahamu aarĩ na aariũ eerĩ, ũmwe waciarĩĩtwo nĩ mũtumia warĩ ngombo, na ũrĩa ũngĩ nĩ mũtumia ũtaarĩ ngombo.

23 Mũũriũ wa mũtumia ũrĩa warĩ ngombo aaciarirwo na ũmwĩrĩ tu, no mũũriũ wa mũtumia ũrĩa ũtaarĩ ngombo aaciarirwo na ũndũ wa kũhingia kĩĩranĩro kĩa Ngai.

24 Ngerekano ya atumia acio eerĩ ĩrũũgamĩrĩire ciĩranĩro igĩrĩ: Mũtumia ũrĩa waciarĩire ũkomboinĩ nĩ Hagari na agerekanĩĩtio na kĩrĩĩkanĩro kĩrĩa gĩathondekeirwo kĩrĩmainĩ gĩa Sinai.

25 Hagari, ũcio ũgerekanĩĩtio na kĩrĩma gĩa Sinai kĩrĩa kĩ Arabia, nĩ mũhaano wa itũũra rĩa Jerusalemu ũrĩa rĩhaana ũũmũũthĩ ũyũ; rĩ ũkomboinĩ hamwe na andũ aarĩo oothe.

26 No Jerusalemu ya igũrũ ndĩrĩ ũkomboinĩ, na nĩ we nyina witũ.

27 Tondũ nĩkwandĩkĩĩtwo atĩrĩ:

“Kena wee mũtumia ũyũ ũtarĩ wagĩa mwana!

Ugĩrĩria na ũrĩre nĩgũkena,

wee ũtarĩ waigua ruwo rwa mũtumia akĩheeo mwana!

Nĩ gũkorwo ciana cia mũtumia ũrĩa watiganĩirio nĩikaingĩha

gũkĩra cia ũrĩa ũtaatiganĩirio nĩ mũthuuriwe.”

28 Inyuĩ aariũ na aarĩ a Ithe witũ, mwĩ ciana cia Ngai na ũndũ wa kĩĩranĩro, o ta ũrĩa Isaaka aarĩ.

29 Hĩndĩ ĩyo-rĩ, mwana ũrĩa waciarĩĩtwo na njĩra ya ũmwĩrĩ nĩanyariirire ũrĩa waciarĩĩtwo na hinya wa Roho wa Ngai; ũguo noguo o na ũũmũũthĩ ũyũ kũhaana.

30 No rĩĩrĩ, Maandĩko moigĩĩte atĩa? Moigĩĩte atĩrĩ, “Ingata mũtumia ũcio ngombo o hamwe na mũũriũ, nĩ gũkorwo gũtirĩ hĩndĩ mũũriũ wa mũtumia ngombo akaagaya igai hamwe na mũũriũ wa mũtumia ũrĩa ũtarĩ ngombo.”

31 Kwoguo, aariũ na aarĩ a Ithe witũ, tũtikĩrĩ ciana cia mũtumia ngombo, twĩ ciana cia mũtumia ũrĩa ũtarĩ ngombo.

Gitĩra wĩyathi waku

1 Atĩrĩĩrĩ, Kristũ nĩatuohorire tũkiuma ũkomboinĩ! Ikaraai o ro ũguo, na mũtigeetĩkĩre gũcooka ũkomboinĩ rĩngĩ.

2 Tathikĩrĩriai! Niĩ, Paũlũ, ngũmwĩra atĩrĩĩrĩ, wona mwetĩkĩra kũrua, ũndũ ũcio ũkuonania atĩ inyuĩ mũtirĩ bata na Kristũ o na haniini.

3 Nĩngũmwĩra o rĩngĩ atĩ mũndũ ũrĩa wĩtĩkagĩra kũrua, aagĩrĩirwo nĩkũrũmĩrĩra Watho wĩ wothe.

4 Arĩa gatagatĩinĩ kaanyu marageria kũiguithania na Ngai na ũndũ wa kũrũmĩrĩra Watho nĩmeyehereetie kuuma harĩ Kristũ, o na makeyeheria kuuma wegainĩ wa Ngai.

5 Ithuĩ-rĩ, tũkoragwo twĩhokeete atĩ Ngai nĩagaatũtua athingu. Ũndũ ũcio nĩguo tũkoragwo twetereire tũrĩ na wĩtĩkio, tũhotithĩĩtio nĩ Roho wa Ngai.

6 Thĩinĩ wa Kristũ, kũrua kana kwaga kũrua gũtirĩ ũtiganu; kĩrĩa kĩ bata nĩ wĩtĩkio ũrĩa wĩyonithanagia na wendani.

7 Nĩmũrathiĩte wega mũno! Nũũ ũmũgirĩĩtie gũcooka gwathĩkĩra Ũhoro ũrĩa wa ma?

8 Ngai ũrĩa ũmwĩtaga ti we ũmũgirĩĩtie.

9 Ndaawa nyiinyi ya kũimbia mĩgate ĩimbagia mũtu wothe ũrĩa ĩkimanĩirio naguo.

10 Ndĩ thĩinĩ wa Mwathani nĩndĩhokeete atĩ mũtikũgarũrũka mũgĩe na meciiria mangĩ. Mũndũ ũrĩa ũramũthĩĩnia o na akorwo arĩ ũ kana ũ nĩekũherithio nĩ Ngai.

11 No niĩ, aariũ na aarĩ a Ithe witũ, korwo no kũhunjia hunjagia atĩ nĩ wega kũrua-rĩ, nĩingĩranyariirwo? Korwo ũhoro ũcio nĩ wa ma-rĩ, mahunjio maakwa makoniĩ mũtharaba wa Kristũ matirĩ hĩndĩ mangĩreehage thĩĩna.

12 No nyende andũ acio maramũthĩĩnia mathiĩ o na mbere kinya mehakũre!

13 Inyuĩ, aariũ na aarĩ a Ithe witũ, mwetirwo mũgĩe na wĩyathi. Mũtikaarekage wĩyathi ũcio wanyu ũtũmage mũtongoragio nĩ merirĩria ma mwĩrĩ. Rekeei wendo ũtũmage mũtungatanagĩre inyuĩ eene.

14 Nĩ ũndũ-rĩ, ũhoro wothe wa Watho ũhingĩtio nĩ rĩathani rĩĩrĩ rĩmwe tu: “Enda mũndũ ũrĩa ũngĩ o ta ũrĩa wĩyendeete wee mwene.”

15 No rĩĩrĩ, angĩkorwo mũraikara ta nyamũ cia gĩthaka mũkĩrũmanaga na mũkĩrĩanaga-rĩ, mwĩmenyerereei mũtikaaniinane.

Roho na ũmũndũ

16 Ũrĩa nguuga nĩ atĩrĩĩrĩ, rekeei Roho amũtongoragie, na mũtirĩhingagia merirĩria ma mwĩrĩ.

17 Gĩtũmi nĩ tondũ merirĩria ma mwĩrĩ nĩmarũaga na merirĩria ma Roho, namo merirĩria ma Roho makarũa na merirĩria ma mwĩrĩ. Mwĩrĩ na Roho irĩ ũthũ, na nĩ ũndũ ũcio mũtingĩhota gwĩka ũrĩa mũrenda gwĩka.

18 No rĩĩrĩ, mũngĩtongorio nĩ Roho, mũtingĩkorwo rungu rwa Watho.

19 Maũndũ ma kĩĩmwĩrĩ nĩmeyonanĩĩtie o wega, namo nĩ: ũtharia, merirĩria mooru, ũũra thoni,

20 gũthaathaiya mĩhianano, kũrogana, ũthũ, gũkararania, kũiguanĩra ũiru, kũraakarania, kwĩyenda, kwamũkana, moorutani mooru,

21 gũcuumĩkĩra, ũrĩĩu, maruga ma waganu marĩa mainagwo nyĩmbo njũru, na maũndũ mangĩ ma mĩthemba ta ĩyo. Ha ũhoro wa maũndũ macio nĩngũmũkaania rĩngĩ o ta ũrĩa ndamũkaanirie ngĩmwĩra atĩ, andũ arĩa meekaga maũndũ macio matikaagaya Ũthamaki wa Ngai.

22 No maciaro ma Roho nĩ wendani, gĩkeno, thaayũ, ũkirĩrĩria, ũtugi, ũtaana, wĩhokeku,

23 ũhooreri, na kwĩnyiita ũhoroinĩ wa merirĩria ma mwĩrĩ. Maũndũ macio gũtirĩ Watho uugĩĩte matigeekagwo.

24 Nao arĩa a Kristũ Jesũ nĩmooragĩĩte ũmũndũ wao, o hamwe na thuti na merirĩria ma mwĩrĩ.

25 Angĩkorwo tũtũire muoyo nĩ ũndũ wa Roho-rĩ, nĩtũgĩthiage tũtongoreetio no we mĩthiĩreinĩ iitũ.

26 Tũtiagĩrĩirwo nĩgwĩtĩĩa, kũũgitana, o na kana kũiguanagĩra ũiru.

Teithanagiai mũndũ na ũrĩa ũngĩ mathĩĩnainĩ

1 Aariũ na aarĩ a Ithe witũ, mũndũ angĩkorwo ahĩtĩĩtie-rĩ, inyuĩ mũrĩ na Roho mũrũngageei mũhooreire. Mũgĩĩka ũguo-rĩ, mwĩmenyagĩrĩreei mũno nĩguo o na inyuĩ mũtikaae kũhĩtia taake.

2 Teithanagiai mũndũ na ũrĩa ũngĩ mathĩĩnainĩ; mweka ũguo nĩmũrĩhingagia Watho wa Kristũ.

3 Mũndũ angĩciiria atĩ nĩ wa bata o rĩrĩa atarĩ wa bata, nĩkwĩheenia areheenia.

4 O mũndũ nĩarorage wĩra wake we mwene. Wakorwo wĩ mwega-rĩ, nĩagĩtĩĩage nĩ ũndũ wa ũrĩa eekĩĩte we mwene atekũringithania wĩra wake na wa mũndũ ũngĩ.

5 Nĩ ũndũ o mũndũ no mũhaka akuue mathĩĩna maake.

6 Mũndũ ũrĩa ũrarutwo ũhoro wa Kristũ nĩagayanage maũndũ marĩa meega e namo na mũrutani wake.

7 Mũtikeeheenie; Ngai ndaheenekaga. O mũndũ akaagetha kĩrĩa ahandaga.

8 Angĩkorwo ahandaga maũndũ ma kũhũũnia thuti cia mwĩrĩ wake-rĩ, akaagetha gĩkuũ kĩrĩa kiumanaga na maũndũ macio. No rĩĩrĩ, angĩkorwo ahandaga maũndũ ma gũkenia Roho-rĩ, akaagetha muoyo wa tene na tene.

9 Kĩrekeei tũtikaanogagio nĩgwĩkaga wega, nĩ ũndũ twaga gũkua ngoro, ihinda nĩrĩgaakinya rĩa kũgetha.

10 Kwoguo nĩtwĩkage andũ oothe wega rĩrĩa rĩothe twĩ na ihinda, na makĩria twĩkage wega arĩa tuumbũraga wĩtĩkio ũmwe nao.

Gũkaanio kwa mũthia na kuuga ũhoro

11 Nĩmũkuona ũrĩa ndĩramwandĩkĩra ndemwa nene na guoko gwakwa mwene!

12 Andũ acio maramwĩra atĩ no mũhaka mũrue nĩ arĩa meendaga kwĩyonania na nja ũrĩa mahaana. Mareeka ũguo nĩ geetha matikaanyariirwo nĩ ũndũ wa mũtharaba wa Kristũ.

13 O na acio maruaga matirũmagĩrĩra Watho, no ũrĩa marenda nĩ inyuĩ mũrue nĩguo meetĩĩage makiugaga atĩ nĩmũheete irua gĩtĩĩo.

14 Haakwa mwene-rĩ, ndirĩ na ũndũ ũngĩ ingĩtĩĩra tiga o mũtharaba wa Mwathani witũ Jesũ Kristũ. Nĩ gũkorwo maũndũ ma thĩ nĩmeehereete thĩinĩ wakwa, na niĩ ngeehera maũndũinĩ ma thĩ nĩ ũndũ wa hinya wa mũtharaba wake.

15 Kũrua kana kwaga kũrua hatirĩ ũndũ kuugĩĩte; ũndũ ũrĩa wĩ na bata nĩgũtuĩka kĩũmbe kĩerũ.

16 Thaayũ na tha cia Ngai irogĩa na andũ arĩa marũmagĩrĩra Watho ũyũ, o hamwe na andũ oothe a Ngai!

17 Ngĩrĩĩkia nguuga atĩrĩ: ndikwenda gũthĩĩnio rĩngĩ nĩ mũndũ o na ũrĩkũ, nĩ ũndũ irema iria ndĩ nacio mwĩrĩ ironania ndĩ ndungata ya Kristũ.

18 Wega wa Mwathani witũ Jesũ Kristũ ũroikara na inyuĩ inyuothe, aariũ na aarĩ a Ithe witũ, Ameni.