Category: 2 Samũeli

Sheba gũũkĩrĩra Daudi

1 Na rĩĩrĩ, kũu Giligali nĩkwarĩ mũndũ mwaganu wetagwo Sheba mũrũ wa Bikiri, wa mũhĩrĩga wa Benjamini. Naake akĩhuuha karumbeeta, akĩanĩrĩra akiuga atĩrĩ,

“Ithuĩ tũtikwenda ũhoro wa Daudi!

Tũtikũmũrũmĩrĩra!

Andũ aya a Isiraeli, nĩtwĩinũkĩre o mũndũ gwake!”

2 Tondũ ũcio Aisiraeli magĩgĩtiganĩria Daudi makĩrũmĩrĩra Sheba. No andũ a Juda, kuuma Jorodani nginya Jerusalemu, magĩthiĩ na mbere gwathĩkĩra Daudi.

3 Rĩrĩa Daudi aakinyire gwake mũciĩ Jerusalemu, akĩoya atumia arĩa ikũmi a kũigwo aatigĩĩte maikaragie mũciĩ, akĩmahingĩrithia handũ nyũmbainĩ maikarage marangĩirwo. Agĩathana atĩ maheagwo irio ciakũmaigana, no ndacookire gũkoma nao. Magĩgĩtũũra ta marĩ atumia a ndigwa, mahingĩirwo o nginya hĩndĩ ĩrĩa maakuire.

4 Mũthamaki agĩcooka akĩĩra Amasa atĩrĩ, “Ndakũhe mĩthenya ĩtatũ ũkorwo ũcookanĩrĩire andũ oothe a Juda, na wee mwene ũkorwo ho.”

5 Tondũ ũcio Amasa agĩthiĩ kũmeeta, no ndaigana gũcooka ihindainĩ rĩrĩa mũthamaki atuĩte.

6 Kwoguo mũthamaki akĩĩra Abishai atĩrĩ, “Sheba mũrũ wa Bikiri nĩegũtũthĩĩnia makĩria ma ũrĩa tũrathĩĩnirio nĩ Abisalomu. Tondũ ũcio oya ndungata ciakwa, ũmũrũmĩrĩre na ihenya ataneegwatĩra matũũra marĩa mairigĩirwo na thingo cia hinya oore o biũ.”

7 Kwoguo andũ a Joabu, thigari iria ciarangagĩra mũthamaki, o na thigari iria ingĩ ciothe, makiuma Jerusalemu me hamwe na Abishai nĩguo marũmĩrĩre Sheba.

8 Rĩrĩa maakinyire ihigainĩ rĩrĩa inene rĩrĩ Gibeoni, Amasa agĩũka kũmatũnga. Joabu eehumbĩĩte nguo cia mbaara, na akeyoha igũrũ wacio rũhiũ rwa njora. Rĩrĩa aathiaga rũhiũ rũu rũkĩgwa thĩ.

9 Joabu agĩkĩũria Amasa atĩrĩ, “Wĩ mũhoro mũraata?” Agĩcooka akĩmũnyiita nderu na guoko kwa ũrĩo nĩguo amũmumunye.

10 No Amasa ndaigana kuona rũhiũ rũu Joabu aanyiitĩĩte na guoko gwake kwa ũmotho. Joabu agĩkĩmũtheeca nda, mara maake magĩitĩka thĩ, agĩikua o na atatheeceetwo rĩngĩ nĩ Joabu.

Joabu na mũrũ wa nyina Abishai magĩcooka makĩrũmĩrĩra Sheba na ihenya.

11 Ũmwe wa andũ a Joabu akĩrũũgama hakuhĩ na kĩimba kĩa Amasa, akĩanĩrĩra akiuga atĩrĩ, “Mũndũ o wothe ũrĩ mwena wa Joabu na Daudi nĩarũmĩrĩre Joabu!”

12 Kĩimba kĩa Amasa kĩaiyũrĩĩte thakame, na gĩakomeete gatagatĩ ka barabara. Rĩrĩa mwanake ũcio watigĩĩtwo nĩ Joabu oonire atĩ andũ oothe arĩa maageragĩra handũ hau nĩmaarũũgamaga, agĩkururia kĩimba kĩu kuuma barabara, agĩkĩiga handũ gĩthakainĩ, agĩcooka agĩkĩhumbĩra na nguo.

13 Thuutha wa kĩimba kĩu kweherio hau barabara, andũ oothe makĩrũmĩrĩra Joabu nĩguo magateng’erie Sheba mũrũ wa Bikiri.

14 Naake Sheba agĩtuĩkanĩria bũrũriinĩ wothe wa mĩhĩrĩga yothe ya Isiraeli, agĩkinya itũũra rĩa Abeli Bethi Maaka. Nao andũ oothe a mbarĩ ya Bikiri makĩũngana hamwe, makĩrũmanĩrĩra naake itũũrainĩ.

15 Nao andũ a Joabu makĩigua atĩ Sheba aarĩ itũũrainĩ rĩu, magĩthiĩ makĩrĩthiũrũrũkĩria. Magĩcooka magĩita ihumbu cia tĩĩri ciĩgiritanĩĩtie na rũthingo rwa itũũra. Ningĩ makĩambĩrĩria kwenja na thĩ wa rũthingo rũu nĩguo rũgwe.

16 Itũũrainĩ rĩu nĩkwarĩ na mũndũ wa nja mũũgĩ. Naake akĩanĩrĩra kuuma rũthingoinĩ igũrũ akiuga atĩrĩ, “Tathikĩrĩriai! Ndamũthaitha thikĩrĩriai! Ĩraai Joabu ooke haaha tondũ nĩndĩrenda kwaria naake.”

17 Joabu agĩgĩthiĩ hakuhĩ, naake mũndũ wa nja ũcio akĩmũũria atĩrĩ, “Wee nĩ we Joabu?”

Naake agĩcookia atĩrĩ, “Ĩĩ nĩ niĩ.”

Mũndũ wa nja ũcio akiuga atĩrĩ, “Taathikĩrĩria, mwathi wakwa.”

Naake Joabu agĩcookia atĩrĩ, “Nĩthikĩrĩirie.”

18 Mũndũ wa nja ũcio akiuga atĩrĩ, “Tene kweragwo atĩrĩ, ‘Thiĩ ũkahooe kĩrĩra itũũrainĩ rĩa Abeli,’ na ũguo nĩguo andũ meekaga.

19 Ithuĩ-rĩ tũrĩ andũ meendeete thaayũ na ehokeku thĩinĩ wa Isiraeli. Ũrenda kũniina itũũra rĩrĩa rĩkĩrĩirwo mũno thĩinĩ wa Isiraeli. Nĩ kĩĩ kĩratũma wende gũthũũkia kĩndũ kĩrĩa kĩrĩ kĩa MWATHANI?”

20 Naake Joabu agĩcookia atĩrĩ, “Kũroaga gũtuĩka ũguo! Niĩ ndingĩthũũkia kana niine itũũra rĩanyu!

21 Ũcio tiguo mũbango witũ. Nĩ mũndũ ũmwe wĩtagwo Sheba mũrũ wa Bikiri, wa kuuma bũrũri ũrĩa ũrĩ irĩma wa Efiraimu, wambĩrĩirie gũũkĩrĩra mũthamaki Daudi. Mũneaneei arĩ o we wiki, na nĩngwehera itũũrainĩ rĩĩrĩ.”

Naake mũndũ wa nja ũcio akĩmwĩra atĩrĩ, “Nĩtũgũgũikĩria mũtwe wake na kũu mwena ũcio ũngĩ wa rũthingo.”

22 Mũndũ wa nja ũcio agĩgĩthiĩ kũrĩ andũ oothe a itũũra rĩu e na mũbango ũcio wake wa ũũgĩ, nao magĩgĩtinia Sheba mũtwe makĩwũikĩria Joabu na kũu mwena ũrĩa ũngĩ wa rũthingo. Naake Joabu akĩhuuha karumbeeta nĩguo amenyithie andũ aake moime itũũrainĩ rĩu, nao magĩkĩinũka o mũndũ gwake mũciĩ. Naake Joabu agĩcooka Jerusalemu kũrĩ mũthamaki.

Njaama cia Daudi

23 Na rĩĩrĩ, Joabu nĩ we warĩ mũnene wa mbũtũ ciothe cia ita cia Isiraeli, na Benaia mũrũ wa Jehoiada aarĩ mũnene wa thigari iria ciarangagĩra Daudi.

24 Adoniramu nĩ we warĩ mũnene wa kũrutithia mawĩra ma hinya, naake Jehoshafatu mũrũ wa Ahiludu nĩ we warĩ mũnene wa kũiga rekondi.

25 Naake Sheva nĩ we warĩ karani ka igooti, nao Zadoku na Abiatharu maarĩ athĩnjĩri Ngai.

26 O naake Ira ũrĩa woimĩĩte itũũrainĩ rĩa Jairũ, aarĩ ũmwe wa athĩnjĩri Ngai a Daudi.

Njiarwa cia Saũlũ kũũragwo

1 Na rĩĩrĩ, hĩndĩ ĩrĩa Daudi aathamakaga gũkĩgĩa na ng’aragu nene ihindainĩ rĩa mĩaka ĩtatũ. Tondũ ũcio Daudi akĩũria MWATHANI gĩtũmi kĩa ũndũ ũcio, naake akĩmwĩra atĩrĩ, “Saũlũ na mũciĩ wake nĩ o matũmĩĩte ũndũ ũcio wonekane nĩ ũndũ wa kũũragana, na nĩ ũndũ wa ũrĩa ooragire Agibeoni.”

2 (Na rĩĩrĩ, Agibeoni matiarĩ Aisiraeli, maarĩ matigari ma Aamori, na Aisiraeli nĩmeehĩtĩĩte kũmagitĩra. No Saũlũ nĩagereetie kũmaniina nĩ ũndũ wa ũrĩa eendeete gũteithia andũ a Isiraeli na Juda.)

3 Kwoguo Daudi agĩgĩĩta Agibeoni akĩmooria atĩrĩ, “Mũkwenda ndĩmwĩkĩre atĩa? Ndĩrenda kũmũrĩhĩria ũũru ũrĩa mwekirwo, nĩguo na inyuĩ mũraathime andũ a MWATHANI.”

4 Nao magĩcookia atĩrĩ, “Thĩĩna witũ na Saũlũ na mũciĩ wake ndũngĩniinwo na betha kana thahabu. Ningĩ ithuĩ, tũtingĩenda kũũraga Mũisiraeli o na ũmwe.”

Naake Daudi akĩũria atĩrĩ, “Rĩu-rĩ, mũgwĩciiria njagĩrĩirwo nĩkũmwĩkĩra atĩa?”

5 Nao magĩgĩcookeria mũthamaki atĩrĩ, “Saũlũ akĩũraga andũ aitũ, eendaga gũtũniina gũtigaatigare mũndũ o na ũmwe bũrũriinĩ wothe wa Isiraeli.

6 Kwoguo tũnengere aariũ mũgwanja thĩinĩ wa aariũ aake, tũkamacuurie mĩtĩ igũrũ mbere ya MWATHANI kũu Gibea, itũũra rĩa Saũlũ, mũthamaki ũrĩa wathuurĩĩtwo nĩ MWATHANI.”

Naake mũthamaki agĩcookia atĩrĩ, “Nĩngũmaneana kũrĩ inyuĩ.”

7 No rĩĩrĩ, Daudi akĩhonokia Mefiboshethu mũrũ wa Jonathani na mũcũkũrũ wa Saũlũ, nĩ ũndũ wa ũrĩa we na Jonathani meeranĩire makĩhĩtaga na rĩĩtwa rĩa MWATHANI.

8 No nĩoire Arimoni na Mefiboshethu, aariũ eerĩ arĩa Rizipa mwarĩ wa Aia, aaciarĩire Saũlũ; na akĩoya aariũ ataano arĩa Merabu mwarĩ wa Saũlũ, aaciarĩire Adirieli mũrũ wa Barizilai, ũrĩa woimĩĩte Mehola.

9 Daudi agĩkĩmaneana kũrĩ Agibeoni, nao makĩmacuuria mũtĩ igũrũ handũ kĩrĩmainĩ mbere ya MWATHANI, na oothe mũgwanja magĩkua ihinda rĩmwe. Mooragirwo rĩrĩa mbaarĩ yambagĩrĩria kũgethwo.

10 Naake Rizipa mwarĩ wa Aia, ũrĩa warĩ mũtumia wa kũigwo wa Saũlũ, akĩĩyakĩra gĩthũnũ kĩa makũnia ihiga igũrũ harĩa ciimba icio ciarĩ. Agĩgĩikara ho kuuma rĩrĩa magetha maambĩrĩirie o nginya rĩrĩa mbura yaringire. Naake ndaigana gwĩtĩkĩria nyoni ihuutie ciimba icio mũthenya, o na kana nyamũ cia gĩthaka icĩhuutie ũtukũ.

11 Rĩrĩa Daudi aamenyithirio ũrĩa Rizipa eekĩĩte,

12 agĩthiĩ akĩoithia mahĩndĩ ma Saũlũ na ma mũũrũwe Jonathani kuuma kũrĩ andũ a Jabeshi bũrũriinĩ wa Gileadi. (Andũ a Gileadi maiyĩte ciimba ciao kuuma itũũra rĩa Bethi Shani gatagatĩ, kũrĩa Afilisiti maamacuurĩĩtie mũtĩ igũrũ mũthenya ũrĩa maamooragĩire kĩrĩmainĩ kĩa Giliboa.)

13 Daudi agĩkĩoithia mahĩndĩ ma Saũlũ, Jonathani, na mahĩndĩ ma andũ arĩa mũgwanja maacuurĩĩtio mũtĩ igũrũ.

14 Nao magĩgĩthika mahĩndĩ ma Saũlũ na ma Jonathani mbĩĩrĩrainĩ ya Kishu, ithe wa Saũlũ, ĩrĩa yarĩ Zela bũrũriinĩ wa Benjamini. Magĩcooka magĩĩka ũrĩa wothe mũthamaki aamaathĩĩte meeke. Thuutha ũcio Ngai agĩcookia mahooya marĩa maahoeete nĩ ũndũ wa bũrũri wao.

Mbaara gatagatĩ ka Aisiraeli na Afilisiti

15 Ningĩ gũkiuma mbaara ingĩ gatagatĩinĩ ka Afilisiti na Aisiraeli, naake Daudi na andũ aake magĩikũrũka makĩhũũrana na Afilisiti, naake Daudi akĩnoga mũno.

16 Kĩmũndũ kĩmwe kĩnene gĩetagwo Ishibibenobu, gĩakuuĩĩte itimũ rĩa gĩcango rĩa ũritũ wa kiro ithatũ na nuthu, na gĩkeeyoha rũhiũ rwerũ rwa njora, gĩgĩciiria no kĩũrage Daudi.

17 No rĩĩrĩ, Abishai, mũrũ wa Zeruia, nĩguo ateithie Daudi, agĩgĩtharĩkĩra Kĩmũfilisiti kĩu kĩnene, agĩkĩũraga. Hĩndĩ ĩyo andũ a Daudi makĩmwĩra na mwĩhĩtwa atĩrĩ, “Ndũgũcooka gũthiĩ na ithuĩ mbaarainĩ.Wee nĩ we kĩĩrĩgĩrĩro kĩa Isiraeli, na tũtingĩenda kũũrwo nĩ we.”

18 Thuutha ũcio gũkĩgĩa mbaara ingĩ na Afilisiti kũu Gobu, na mbaarainĩ ĩyo Sibekai woimĩĩte Husha akĩũraga kĩmũndũ kĩngĩ kĩnene gĩetagwo Safu.

19 Ningĩ gũkĩgĩa na mbaara o rĩngĩ kũu Gobu gatagatĩinĩ ka Aisiraeli na Afilisiti. Naake Elihanani mũrũ wa Jairũwoimĩĩte Bethilehemu akĩũraga kĩmũndũ kĩngĩ kĩnene gĩetagwo Goliathũ kĩoimĩĩte Gathu. Mũtĩ wa itimũ rĩakĩo warĩ mũtungu o ta rũbaaũ rũrĩa rũkoragwo maciniinĩ ya gũtuma nguo.

20 O rĩngĩ gũkĩgĩa na mbaara ingĩ kũu Gathu, nakuo nĩkwarĩ na kĩmũndũ kĩmwe kĩene mũno kĩarĩ na ciara ithathatũ o guoko na ciara ithathatũ o kũgũrũ.

21 Nakĩo kĩmũndũ kĩu gĩkĩũgita Aisiraeli, naake Jonathani mũrũ wa Shama, ũrĩa warĩ mũrũ wa nyina na Daudi, agĩkĩũraga.

22 Imũndũ icio inyaciarĩ njiarwa cia imũndũ iria nene ciatũũraga Gathu, nacio cioragirwo nĩ Daudi na andũ aake.

Rwĩmbo rwa Daudi rwa ũhootani

1 Daudi agĩkĩinĩra MWATHANI rwĩmbo rũũrũ, hĩndĩ ĩrĩa MWATHANI aamũhonokirie kuuma mookoinĩ ma Saũlũ na thũ iria ingĩ:

2 MWATHANI nĩ we mũmenyereri

nĩ we handũ haakwa haakĩĩtwo na rũthingo rwa hinya ha kwĩhitha

na no we mũngũũri.

3 Ngai wakwa-rĩ, nĩ we mũmenyereri,

na harĩ we ndingĩona ũgwati.

Nĩ we ngo yakwa,

na nĩ we ũngitagĩra na akanjikaria na thaayũ.

Nĩ we mũhonokia wakwa,

nĩ we ũngitagĩra na akahonokia haaroinĩ.

4 Ngayagĩra MWATHANI

naake akahonokia kuuma harĩ thũ ciakwa.

MWATHANI arogoocwo.

5 Ndathaĩĩtwo nĩ mĩnyororo ya gĩkuũ,

na ngakorererwo nĩ mĩiyũro ya wanangi.

6 Mĩnyororo ya kwa arĩa akuũ nĩ yo yeĩthiorereirie,

nayo mĩtego ya gĩkuũ ĩgathagathagwo ĩnyiite.

7 Ndĩ mĩnyamaaroinĩ ĩyo ngĩkaĩra MWATHANI;

ngĩkaĩra Ngai wakwa andeithie.

Naake akĩigua mũgambo wakwa arĩ o Hekaarũinĩ yake,

kĩrĩro gĩakwa gĩgĩkinya matũinĩ maake.

8 Hĩndĩ ĩyo thĩ ĩkĩinaina na ĩgĩthingitha;

nacio itina cia matuinĩ ikĩinaina o na igĩthingitha,

nĩ ũndũ Ngai aarĩ mũraakaru!

9 Maniũrũ maake makiuma ndoogo ĩkĩambata na igũrũ,

naguo mwaki wa kũniinana o na makara maarĩrĩmbũkaga ikiuma kanuainĩ gaake.

10 Akĩhingũrania igũrũ, agĩikũrũka thĩ

arangĩĩte itu rĩtumanu.

11 Aathiaga oombũkĩĩte akuuĩĩtwo nĩ kĩũmbe kĩrĩ mathagu

agĩgĩthiĩ arĩ mathaguinĩ ma rũhuuho.

12 Eehumbĩire na nduma,

na agathiũrũrũkĩrio nĩ matu matutungĩirie mbura.

13 Makara maakanaga makĩrĩrĩmbũka

moimĩĩte ũkengiinĩ ũrĩa warĩ mbere yake.

14 Hĩndĩ ĩyo MWATHANI akĩruruma e kũu igũrũ;

naguo mũgambo wa Ũrĩa Ũrĩ Igũrũ Mũno ũkĩiguuo.

15 Naake agĩikia mĩguĩ yake, akĩhurunjania thũ ciake,

na agĩciingatithia na heni.

16 Hĩndĩ ĩyo kũndũ kũrĩa kwĩ na thĩ wa iria rĩrĩa inene, gũkĩonekana,

nacio itina cia thĩ ikĩhumbũranio,

rĩrĩa MWATHANI arũithirie thũ ciake,

na agĩcigũũthũkĩra na maraakara.

17 MWATHANI arĩ igũrũ agĩtambũrũkia guoko akĩnyiita,

akĩnduta ndiainĩ ĩyo ndiku.

18 Agĩkĩĩhonokia kuuma mookoinĩ ma thũ ciakwa iria ciangĩrĩĩtie hinya,

o na akĩhonokia kuuma harĩ arĩa mathũire,

nĩ gũkorwo nĩmaangĩrĩĩtie hinya mũno.

19 Manjũkĩrĩire rĩrĩa ndaarĩ mathĩĩnainĩ,

no MWATHANI akĩmenyerera.

20 MWATHANI agĩkĩnyumĩrĩria kũndũ gũtaarĩ na moogwati;

agĩkĩhonokia nĩ ũndũ nĩakeneetio nĩ niĩ.

21 MWATHANI akĩndĩha kũringana na ũthingu wakwa;

akĩndĩha kĩndũ na kĩngĩ nĩ ũndũ mooko maakwa matiekĩĩte ũũru.

22 O na nĩ ũndũ ndiagĩĩte kũrũmĩrĩra njĩra cia MWATHANI

kana ngahuutatĩra Ngai wakwa nĩguo njĩke maũndũ mooru.

23 Nĩndahingĩĩtie ũrĩa mawatho maake moothe moigĩĩte,

na ngaathĩkĩra maathani maake.

24 Ndiarĩ na mahĩtia mbere ya MWATHANI,

na nĩndemenyagĩrĩra ndikaahĩtie.

25 Tondũ ũcio MWATHANI nĩandĩhĩĩte kũringana na ũthingu wakwa,

nĩ ũndũ niĩ ndiĩkĩĩte ũũru.

26 Wee, MWATHANI, wĩ mwĩhokeku kũrĩ arĩa makwĩhokeete,

na wĩ mũkinyanĩru kũrĩ arĩa akinyanĩru.

27 Wĩ mũtheru harĩ arĩa maikaraga methereetie,

no harĩ arĩa meekaga ũũru ũmeekaga kũringana na ciĩko ciao.

28 Wee-rĩ, nĩ we ũhonokagia andũ arĩa enyiihia,

no arĩa etĩĩi nĩũmaconorithagia.

29 Nĩ we, MWATHANI, ũtũmaga taawa wakwa wakane wega,

ũgakĩnjehereria nduma yakwa, wee Ngai wakwa.

30 Nĩ we ũheaga hinya wa kũhehenja mbũtũ cia thũ ciakwa;

o na ũkaahotithia kũrũũga thingo ciacio cia hinya cia kwĩgitĩra.

31 Ĩ Ngai ũyũ njĩra ciake ti nginyanĩru!

Ĩ ciĩranĩro ciake ti ciakwĩhokwo!

Nĩ we ngo ya arĩa oothe mooragĩra harĩ we amagitagĩre.

32 MWATHANI wiki no we Ngai;

Ngai wiki nĩ we mũtũgitĩri.

33 Ngai ũyũ, nĩ we kĩĩgitio gĩakwa kĩrĩa kĩrũmu mũno,

ningĩ nĩ we ũtũmaga njage gũtũngana na ũgwati njĩrainĩ ciakwa.

34 Nĩ we ũhotithagia gũteng’era itegũtindirũka o ta thwariga ya mũgoma,

ngoorĩra irĩmainĩ igũrũ kũrĩa itangĩona ũgwati.

35 Nĩ we ũndutaga ũrĩa mbaara ĩrũagwo,

o nginya ngahota kũhũthĩra ũta ũrĩa wĩ na hinya mũno.

36 MWATHANI, nĩ we ũmenyagĩrĩra o na ũkahonokia; ũteithio waku nĩguo ũndũũgĩrĩĩtie.

37 Nĩ we ũheaga kũndũ kwariĩ gwa kũũrĩra;

magũrũ maakwa matirĩ maatirũka.

38 Thũ ciakwa ndeng’eranagia nacio, ngaciananga;

ndihũndũkaga o nginya rĩrĩa ndĩrĩĩkia gũciniina.

39 Ndĩcigũthaga ikagũa thĩ, na itingĩhota gũcooka gũũkĩra,

ikagũa na ngara o magũrũinĩ maakwa.

40 Nĩ ũndũ wee, MWATHANI, nĩũheaga hinya wa kũrũa mbaara,

o na ũkaahotithia gũtooria thũ ciakwa.

41 Nĩũtũmaga thũ ciakwa injũrĩre,

arĩa nao mathũire nĩndĩmaniinaga.

42 Macaragia ũteithio, no mationaga wa kũmahonokia;

makayagĩra MWATHANI, no we ndameetĩkaga.

43 Na niĩ ngakĩmathĩa, makahinya o ta rũkũngũ;

ngamarangĩrĩria o ta ndooro ya njĩrainĩ.

44 Nĩ we wahonokirie kuuma harĩ andũ arĩa maang’eng’anaga na niĩ,

na ũgĩtũma njathage ndũũrĩrĩ;

rĩu andũ itaamenyeete nĩmatuĩkĩĩte ndungata ciakwa.

45 Andũ a kuuma mabũrũri mangĩ mookaga mbere yakwa makĩinamagĩrĩra;

maiguaga ngumo yakwa, makanjathĩkĩra.

46 Makuaga ngoro,

magooka makĩinainaga moimĩĩte matũũrainĩ maao,

marĩa mairigĩre na thingo cia hinya.

47 MWATHANI e muoyo!

Arogoocwo, o we mũngitĩri!

Ngai ũrĩa ũhonokagia arotũũgĩrio!

48 Nĩ we Ngai ũrĩa ũndĩhagĩria harĩ thũ ciakwa,

na agatooria ndũũrĩrĩ agaciiga rungu rwakwa.

49 Nĩ we ũndutaga mookoinĩ ma thũ ciakwa,

akanyambararia igũrũ wa arĩa manjũkagĩrĩra;

nĩ we ũmenyagĩrĩra kuuma harĩ andũ arĩa mahũthagĩra hinya.

50 Tondũ ũcio, nĩngũkũgooca, wee MWATHANI, gatagatĩinĩ ka ndũũrĩrĩ,

o na ngumie rĩĩtwa rĩaku na nyĩmbo.

51 Nĩũheete mũthamaki waku ũhootani mũnene,

na ũgatuga ũrĩa waku ũitĩrĩirie maguta ũkamũthuura,

o we Daudi na njiarwa ciake nginya tene na tene.

Ciugo cia mũthia cia Daudi

1 Daudi mũrũ wa Jesii aarĩ mũndũ ũrĩa Ngai atũũgĩririe mũno, ningĩ nĩ we Ngai wa Jakubu aitĩrĩirie maguta, akĩmwamũra atuĩke mũthamaki, na no we watungĩire Aisiraeli nyĩmbo cia thaburi njega mũno. Ici nĩcio ciugo cia mũthia cia Daudi:

2 Roho wa MWATHANI araaria na ũndũ wakwa;

ndũmĩrĩri yake ĩ kanuainĩ gaakwa.

3 Ngai wa Isiraeli nĩarĩĩtie;

mũgitĩri wa Isiraeli aanjĩĩrire atĩrĩ,

“Mũthamaki ũrĩa wathanaga na kĩhooto,

agaathanaga o atĩĩĩte Ngai-rĩ,

4 ahaana o ta ũtheri wa riũa

ũrĩa ũtheraga rũũciinĩ tene rĩrĩa gũtarĩ na matu;

ahaana o ta ũtheri wa riũa

ũrĩa ũtũmaga nyeki ĩmere mbura yaringa.”

5 Ũguo nĩguo Ngai akaraathima njiarwa ciakwa,

nĩ gũkorwo nĩarĩĩkanĩire na niĩ

kĩrĩĩkanĩro gĩa gũtũũra tene na tene,

nakĩo nĩ kĩrũmu ũndũ gĩtangĩgarũrĩka.

Ũndũ ũcio noguo wiki ndĩrirĩirie;

nĩguo ũgaatuĩka ũtoorania wakwa,

na ti itherũ Ngai nĩagaatũma ũndũ ũcio ũhinge.

6 No rĩĩrĩ, andũ arĩa matatĩĩĩte Ngai

mahaana o ta mĩigua ĩrĩa ĩteagwo,

nĩ ũndũ gũtirĩ mũndũ ũngĩmĩnyiita na mooko matheri.

7 Mũndũ akĩmĩhuutia,

no nginya ahũthĩre itimũ,

kana kĩndũ gĩthondekeetwo na cuuma,

na mĩigua ĩyo no mũhaka ĩcinwo na mwaki o biũ.

Thigari cia Daudi iria ciarĩ igweta

8 Maya nĩ mo marĩĩtwa ma thigari cia Daudi iria ciarĩ igweta: wa mbere aarĩ Joshebu Bashebethu wa kuuma Takemoni. Nĩwe warĩ mũnene wa anene arĩa angĩ a mbũtũ cia ita moĩkaine ta “Njamba Ithatũ.” Aahũũranire na andũ magana manaana (800) akĩmooraga oothe na itimũ rĩake mbaarainĩ o ĩmwe.

9 Njamba ya keerĩ thĩinĩ wa njamba icio ithatũ aarĩ Eleazaru mũrũ wa Dodo, wa mbarĩ ya Ahohi. Hĩndĩ ĩmwe we na Daudi nĩmaathooririe Afilisiti moonganĩĩte marũe na Aisiraeli. No rĩĩrĩ, Aisiraeli makĩambĩrĩria kũũra nĩ guoya.

10 No we akĩrũũgamana na Afilisiti, akĩhũũrana nao, o nginya guoko gwake gũkĩnoga ũguo atĩ ndangĩahotire kũrekia rũhiũ rwa njora rũrĩa aanyiitĩĩte na guoko. Naake MWATHANI agĩtũma ũhootani mũnene woneke mũthenya ũcio. Mbaara yarĩĩkia gũthira, Aisiraeli magĩcooka harĩa Eleazaru aarĩ o kuoya indo iria ciarĩ na thigari iria cioragĩĩtwo.

11 Wa gatatũ thĩinĩ wa njamba icio ithatũ aarĩ Shama mũrũ wa Agee, wa kuuma Harari. Afilisiti moonganĩĩte Lehi, kũrĩa kwarĩ na mũgũnda waiyũrĩĩte ndengũ. Nao Aisiraeli makĩũrĩra Afilisiti nĩ guoya.

12 No Shama, akĩrũũgama mũgũndainĩ ũcio, akĩũgitĩra, na akĩũraga Afilisiti acio. MWATHANI agĩgĩtũma ũhootani mũnene wonekane mũthenya ũcio.

13 Na rĩĩrĩ, magetha me hakuhĩ kwambĩrĩria, njamba ithatũ thĩinĩ wa anene a mbũtũ cia ita iria cioĩkaine ta “Njamba Mĩrongo Ĩtatũ,” igĩikũrũka ngurungainĩ ya Adulamu, kũrĩa Daudi aarĩ. Hĩndĩ ĩyo mbũtũ ya ita ya Afilisiti yakĩĩte kambĩ ya yo gĩtuambainĩ kĩa Refaimu.

14 Daudi aarĩ handũ kĩrĩmainĩ haagitĩirwo na hinya, nakĩo gĩkundi kĩmwe kĩa mbũtũ cia ita cia Afilisiti nĩgĩathiĩte, gĩgaikara Bethilehemu.

15 Naake Daudi akĩigua anyootiĩ mũno akiuga atĩrĩ, “Naarĩ korwo ndoona mũndũ ũngĩndeehere maaĩ ma kũnyua kuuma gĩthimainĩ kĩrĩa kĩrĩ kĩhingoinĩ Bethilehemu!”

16 Thigari iria ithatũ ciarĩ njamba ĩgĩtuĩkanĩria kambĩinĩ ya Afilisiti, igĩtaha maaĩ gĩthimainĩ, ikĩreeheere Daudi. No we handũ ha kũmanyua, akĩmaita thĩ marĩ igongoona kũrĩ MWATHANI.

17 Akiuga atĩrĩ, “MWATHANI, niĩ ndingĩhota kũnyua maaĩ maya, tondũ ingĩĩka ũguo, no ta kũnyua ingĩkorwo ngĩnyua thakame ya andũ aya megwĩtwarĩrĩirie ũgwatiinĩ!” Nĩ ũndũ ũcio ndaigana kũmanyua.

Macio nĩ mo maũndũ ma ũcamba marĩa thigari icio ithatũ njamba ciekire.

18 Abishai, mũrũ wa nyina na Joabu (nyina wao eetagwo Zeruia) nĩ we warĩ mũtongoria wa thigari icio cioĩkaine ta “Njamba Mĩrongo Ĩtatũ.” Naake akĩhũũrana na andũ magana matatũ (300) arĩ na itimũ rĩake, akĩmooraga. Tondũ wa ũguo akĩĩgĩĩra igweta inene thĩinĩ wa “Njamba icio Mĩrongo Ĩtatũ.”

19 Nĩ we warĩ igweta mũno thĩinĩ wa “Njamba icio Mĩrongo Ĩtatũ,” na kwoguo agĩgĩtuuo mũnene wao. No rĩĩrĩ, ndarĩ na igweta inene gũkĩra “Njamba iria cia mbere Ithatũ.”

20 O naake Benaia mũrũ wa Jehoiada, wa kuuma Kabizeeli aarĩ mũthigari warĩ igweta. Nĩekire ciĩko nyingĩ cia ũcamba, imwe ciacio irĩ ta ici: kũũraga thigari igĩrĩ ciarĩ igweta cia Moabi. Ningĩ hĩndĩ ĩmwe kwoiraga mbura ya mbarabu nĩathiire agĩtoonya irima thĩinĩ, akĩũragĩra mũrũũthi kuo.

21 Agĩcooka akĩũraga Mũmisiri, mũndũ warĩ njamba ma, na warĩ na itimũ. Benaia aamũtharĩkĩire na njũgũma, akĩhuria itimũ rĩu aanyiitĩĩte na guoko, akĩmũũraga narĩo.

22 Icio nĩcio ciĩko cia ũcamba iria Benaia, ũrĩa warĩ ũmwe wa “Njamba iria Mĩrongo Ĩtatũ eekire.”

23 Nĩ we wekĩrĩirwo mũno thĩinĩ wacio ciothe, no rĩĩrĩ, ndeekĩrĩirwo mũno ta “Njamba iria Ithatũ cia mbere.” Naake Daudi akĩmũtua mũnene wa thigari iria ciamũrangagĩra.

24-39 Thigari iria ingĩ ciarĩ thĩinĩ wa gĩkundi kĩa “Njamba Mĩrongo Ĩtatũ” nĩ:

Asaheli mũrũ wa nyina na Joabu

Elihanani mũrũ wa Dodo wa kuuma Bethilehemu

Shama na Elika arĩa moimĩĩte Harodi

Helezu wa kuuma Peleti

Ira mũrũ wa Ikeshu wa kuuma Tekoa

Abiezeri wa kuuma Anathothu

Mebunai wa kuuma Husha

Zalimoni wa kuuma mbarĩ ya Ahohi

Maharai wa kuuma Netofa

Helebu mũrũ wa Baana wa kuuma Netofa

Itai mũrũ wa Ribai wa kuuma Gibea Abisalomu aahaicĩĩte nyũmbũ,bũrũriinĩ wa Benjamini

Benaia wa kuuma Pirathoni

Hidai wa kuuma ituambainĩ cia Gaashu

Abialiboni wa kuuma Araba

Azimavethu wa kuuma Bahurimu

Eliaba wa kuuma Shaaliboni

aariũ a Jasheni Jonathani mũrũ wa Shama wa kuuma Harari

Ahiamu mũrũ wa Sharari wa kuuma Harari,

Elifeleti mũrũ wa Ahasibai wa kuuma Maaka

Eliamu mũrũ wa Ahithofeli wa kuuma Gilo

Heziro wa kuuma Karimeli

Paarai wa kuuma Arabu

Igali mũrũ wa Nathani wa kuuma Zoba

Bani wa kuuma Gadi

Zeleku wa kuuma Aamoni

Naharai, ũrĩa wakuuagĩra Joabu indo ciake cia mbaara, wa kuuma Beerothu

Ira na Garebu a kuuma Jatiri na

Uria ũrĩa Mũhiti.

Oothe maarĩ thigari mĩrongo ĩtatũ na mũgwanja ciarĩ igweta.

Daudi gũtara andũ

1 Ningĩ MWATHANI akĩraakara o rĩngĩ nĩ ũndũ wa Isiraeli na agĩgĩtũma Daudi amareehithĩrie mũtino, akĩmwĩra atĩrĩ, “Thiĩ ũgatare andũ a Isiraeli na a Juda.”

2 Kwoguo mũthamaki agĩkĩĩra Joabu mũnene wa mbũtũ cia ita ciake atĩrĩ, “Ũkĩraai hamwe na atongoria a mbũtũ ciaku cia ita mũthiĩ mĩhĩrĩgainĩ yothe ya Isiraeli kuuma mwena ũmwe wa bũrũri kinya ũrĩa ũngĩ, (ũguo nĩ ta kuuga kuuma Dani kinya Beerisheba) mũgatare andũ. Nĩngwenda kũmenya ũrĩa maigana.”

3 No Joabu agĩcookeria mũthamaki akĩmwĩra atĩrĩ, “Mwathi wakwa mũthamaki, MWATHANI Ngai waku arotũma andũ moongerereke, amoongerere maita igana gũkĩra ũrĩa maigana rĩu magĩtarwo, nawe ũroĩonera ũhoro ũcio. No rĩĩrĩ, ũgũkĩenda gũtara andũ nĩkĩ, we mwathi wakwa mũthamaki.”

4 No rĩĩrĩ, mũthamaki agĩgĩtũma Joabu na anene acio aake a mbũtũ cia ita ciake maathĩkĩre watho ũcio wake. Nao makiuma hau he mũthamaki magĩthiĩ gũtara andũ a Isiraeli.

5 Nao makĩringa rũũĩ rwa Jorodani makĩamba hema ciao na mwena wa na kĩanda wa Aroeri, itũũra rĩrĩa rĩarĩ gatagatĩ ga gĩtuamba, bũrũriinĩ wa Gadi. Moima hau magĩthiĩ na mwena wa rũgongo magĩkinya Jazeri.

6 Na moima hau magĩthiĩ Gileadi o na Kadeshi, bũrũriinĩ wa Ahiti. Magĩcooka magĩthiĩ Dani na moima Dani magĩthiĩ Sidoni kũrĩa kwarĩ na mwena wa ithũĩro.

7 Magĩcooka magĩthiĩ itũũra rĩrĩa rĩairigĩirwo na thingo cia hinya rĩa Turo mwena wa na kĩanda, o na magĩthiĩ matũũra moothe ma Ahivi o na Akanaani. Makĩrĩĩkĩrĩria na Beerisheba kũrĩa kwarĩ na mwena wa kĩanda wa bũrũri wa Juda.

8 Na rĩĩrĩ, thuutha wa mĩeri kenda na matukũ mĩrongo ĩĩrĩ, magĩcooka Jerusalemu marĩĩkĩĩtie kũhungura bũrũri wothe.

9 Naake Joabu agĩkĩhe mũthamaki ithabu rĩa ũrĩa andũ maiganaga maatarwo, arĩa mangĩahotire gũthiĩ mbaarainĩ. Na rĩĩrĩ, kũu Isiraeli kwarĩ andũ ngiri magana manaana (800,000), nakuo Juda andũ ngiri magana mataano (500,000.)

10 Na rĩĩrĩ, Daudi arĩĩkia gũtara andũ aake, akĩambĩrĩria gũthĩĩnio nĩ meciiria, agĩkĩĩra MWATHANI atĩrĩ, “Nĩnjĩhĩĩtie mũno nĩ ũndũ wa ũguo njĩkĩĩte. Ndagũthaitha ũnjohere. Nĩnjĩkĩĩte ũndũ wa ũkĩĩgu mũno.”

11-12 Hĩndĩ ĩyo MWATHANI akĩĩra Gadi, mũnabii wa Daudi, atĩrĩ, “Thiĩ wĩre Daudi atĩ, ndĩramũhe maũndũ matatũ ma gũthuura, athuure ũmwe ũrĩa ngũmwĩkĩra.” Rũũciinĩ rũũrũ rũngĩ, Daudi arĩĩkia gũũkĩra,

13 Gadi agĩthiĩ kũrĩ we, akĩmwĩra ũrĩa wothe MWATHANI oigĩĩte, akĩmũũria atĩrĩ, “Ũkwenda ũndũ ũrĩkũ? Ng’aragu mĩaka ĩtatũ bũrũriinĩ waku wothe, mĩeri ĩtatũ ũteng’ereetio nĩ thũ ciaku, kana kũgĩe mũthiro mĩthenya ĩtatũ bũrũriinĩ waku wothe. Rĩu-rĩ, wĩciirie, ũnjĩĩre ngũthiĩ kwĩra MWATHANI atĩa.”

14 Naake Daudi agĩcookia atĩrĩ, “Rĩu ndĩ handũ hooru mũno! No rĩĩrĩ, handũ ha kũherithio nĩ andũ, kaba kũherithio nĩ MWATHANI we mwene nĩ ũndũ tha ciake nĩ nyingĩ mũno.”

15 Nĩ ũndũ ũcio MWATHANI agĩgĩtũma kũgĩe mũthiro Isiraeli guothe kuuma rũũciinĩ rũu o nginya ihinda rĩrĩa atuĩte. Nakuo bũrũri ũcio wothe kuuma mwena ũmwe wa bũrũri kinya ũrĩa ũngĩ gũgĩkua andũ ngiri mĩrongo mũgwanja (70,000).

16 Na rĩĩrĩ, hĩndĩ ĩrĩa mũraika wa MWATHANI ehaarĩirie kũniina Jerusalemu, MWATHANI akĩĩricũkwo kũherithia andũ aake agĩkĩĩra mũraika ũcio woraganaga atĩrĩ, “Tiga rĩu! Ũguo nĩ mũiganu.” Naake mũraika ũcio aarĩ hakuhĩ na kĩhuuhĩro kĩa ngano kĩa Arauna ũrĩa Mũjebusi.

17 Naake Daudi oona mũraika ũrĩa woragaga andũ agĩkĩĩra MWATHANI atĩrĩ, “Nĩ niĩ mwĩhia, na nĩ niĩ njĩkĩĩte ũũru. No rĩĩrĩ, andũ aya matarĩ kĩene-rĩ, nĩ atĩa meekĩĩte? Ndagũthaitha herithia arĩ niĩ na andũ a nyũmba ya baaba.”

18 Naake Gadi agĩthiĩ he Daudi mũthenya o ro ũcio akĩmwĩra atĩrĩ, “Amba ũthiĩ kĩhuuhĩroinĩ kĩa ngano kĩa Arauna ũgaakĩre MWATHANI kĩgongoona ho.”

19 Daudi agĩgĩathĩkĩra uuge wa MWATHANI, akĩambata o ta ũguo Gadi aamwĩrĩĩte.

20 Naake Arauna agĩcũũthĩrĩria mwena wa kĩanda akĩona mũthamaki na njaama ciake makĩambata na kũrĩ we. Akiuma na nja akĩĩgũithia thĩ magũrũinĩ ma Daudi

21 akĩmũũria atĩrĩ, “Nĩ kĩĩ gĩtũmĩĩte wee mwathi wakwa ũũke kũrĩ niĩ ndungata yaku?”

Naake Daudi agĩcookia atĩrĩ, “Njũkĩĩte nĩguo ngũre kĩhuuhĩro gĩaku kĩa ngano, njooke njakĩre MWATHANI kĩgongoona ho. Na thuutha wa gwĩka ũguo agirĩrĩrie mũthiro ũyũ.”

22 Naake Arauna agĩkĩĩra mũthamaki atĩrĩ, “Kĩoe, mwathi wakwa mũthamaki, ũrutĩre MWATHANI ho kĩrĩa ũkuona kĩagĩrĩire. Ndeegwa cia kũruta igongoona rĩa njino nĩcio ici, nayo mĩtĩ ĩrĩa ĩhũũraga ngano o na macooki ma ndeegwa no ũmĩtue ngũ.”

23 Arauna agĩkĩhe mũthamaki indo icio ciothe na agĩcooka akĩmwĩra atĩrĩ, “MWATHANI Ngai waku aroĩtĩkĩra igongoona rĩaku.”

24 No naake mũthamaki agĩcookeria Arauna atĩrĩ, “Aaca, nĩkũrĩha ngũkũrĩha o ũrĩa ingiuma. Ndingĩrutĩra MWATHANI Ngai wakwa magongoona itarĩ kĩndũ o na kĩ ndĩmarutĩire.” Naake Daudi agĩkĩgũra kĩhuuhĩro kĩu kĩa ngano o na ndeegwa icio na icunjĩ mĩrongo ĩtaano cia betha.

25 Daudi agĩakĩra MWATHANI kĩgongoona hau, agĩcooka akĩrutĩra ho magongoona ma njino na ma thaayũ. Na tondũ ũcio MWATHANI akĩigua mahooya ma , akĩgirĩrĩria mũthiro ũcio kũu Isiraeli.