Category: 2 Maũndũ ma Matukũ ma Tene

Andũ a Edomu kũhũũrwo

1 Na rĩĩrĩ, thuutha ũcio, mbũtũ cia ita cia Moabi, na cia Aamoni inyiitanĩire hamwe na Ameuniangĩ, igĩtharĩkĩra Juda.

2 Arekio amwe magĩthiĩ he Jehoshafatu makĩmwĩra atĩrĩ, “Mbũtũ nene ya ita yumĩĩte Edomu nĩrooka gũgũtharĩkĩra ĩgereire na mwena ũrĩa wa iria rĩa Cumbĩ. Rĩu mbũtũ ĩyo nĩrĩkĩĩtie kwĩnyiitĩra Hazazoni Tamaru.” (Itũũra rĩĩrĩ norĩo rĩĩtagwo Enigedi.)

3 Naake Jehoshafatu nĩ ũndũ wa gwĩtigĩra, akĩhooya MWATHANI nĩguo amuonie ũrĩa aagĩrĩirwo nĩgwĩka. Agĩcooka agĩathana atĩ andũ mehinge kũrĩa irio bũrũriinĩ wothe wa Juda.

4 Nao andũ oothe makiuma matũũrainĩ moothe ma Juda na ihenya magĩthiĩ Jerusalemu gũcaria ũteithio kwĩ MWATHANI.

5 Andũ oothe a Juda na a Jerusalemu makĩũngana kĩhaaro kĩerũ kĩa Hekaarũ. Hĩndĩ ĩyo mũthamaki Jehoshafatu agĩthiĩ akĩrũũgama gatagatĩ kaao

6 akĩhooya MWATHANI atĩrĩ, “MWATHANI, o wee Ngai wa maithe maitũ, nĩ we wathaga ndũũrĩrĩ ciothe, ũrĩ o kũu gwaku igũrũ. Hinya na ũhoti nĩ ciaku, na gũtirĩ mũndũ ũngĩhota gũgwĩtiiria.

7 Wee, nĩ we Ngai witũ. Hĩndĩ ĩrĩa andũ aaku a Isiraeli mookire bũrũri ũyũ, nĩwaingatire andũ arĩa maatũũraga kuo. Wamaingata wacookire ũkĩũhe njiarwa cia Aburahamu ũrĩa warĩ mũraata waku, nĩguo ũtuĩke ũtũũro wao tene na tene.

8 Rĩu, gũũkũ nĩkuo matũũraga na nĩmagwakĩire Hekaarũ ĩĩtanĩĩtio na rĩĩtwa rĩaku. Andũ aya nĩmooĩ wega atĩ,

9 mangĩgaakorererwo nĩ ũndũ mũũru ta mbaara, mĩrimũ, na ng’aragu nĩguo maherithio, gũũkũ Hekaarũinĩ ĩno kũrĩa wee ũthaathayagĩrio nĩkuo mangĩũka gũkũhooya. Marĩ o mathĩĩnainĩ macio maao no magũkaĩre, nawe ũkĩmaigue.

10 “Rĩu, andũ a Moabi na a Aamoni na a Edomu nĩmookĩĩte gũtũtharĩkĩra. Hĩndĩ ĩrĩa maithe maitũ moimaga Misiri, ndwameetĩkĩririe matoonye matũũra maao, na kwoguo magĩtigana nao na matiigana kũmatharĩkĩra.

11 Tarora wone atĩ o na matirĩ ngaatho, MWATHANI. Nĩgũũka marooka gũtũingata tuume bũrũri ũrĩa watũheire ũtuĩke ũtũũro witũ.

12 Rĩu, wee MWATHANI Ngai witũ, twagũthaitha wĩtĩkĩre kũmaherithia nĩ ũndũ ithuĩ tũtingĩmahoota nĩ ũndũ wa ũrĩa maingĩhĩĩte. Ithuĩ tũtiramenya ũrĩa tũgwĩka, no rĩĩrĩ MWATHANI, ũteithio witũ ũngiuma o harĩ wee.”

13 Nao andũ oothe a Juda, arũme na atumia aao, o na ciana ciao, marũũgamĩĩte hau mbere ya MWATHANI.

14 Na rĩĩrĩ, Mũlawii ũmwe warĩ thĩinĩ wa kĩũngano kĩu akĩiyũrwo nĩ roho wa MWATHANI. Mũlawii ũcio eetagwo Jahazieli mũrũ wa Zekaria na aarĩ wa mbarĩ ya Asafu. Naake Zekaria aarĩ mũrũ wa Benaia mũrũ wa Jeieli, Jeieli mũrũ wa Matania, naake Matania mũrũ wa Asafu.

15 Naake Jahazieli akĩĩra mũthamaki atĩrĩ, “Mũgaathe mũthamaki, o na inyuĩ inyuothe andũ a Juda na a Jerusalemu, MWATHANI aramwĩra atĩ mũtikaamake kana mwĩtigĩre mbũtũ ĩno ya ita. MWATHANI nĩwe ũkũrũa mbaara ĩno, no ti inyuĩ.

16 Rũũciũ-rĩ, mũgaikũrũka mũkahũũrane nayo hĩndĩ ĩrĩa ĩgaakorwo ĩgĩtoonyera mwanyainĩ wa Zizu. Mũgaacemania nayo mũthiainĩ wa gĩtuamba kĩrĩa kĩng’etheire werũ wa Jerueli.

17 Ti inyuĩ mũkaarũa mbaara ĩyo. Inyuĩ ũrĩa mũgeeka no kwĩhaarĩria mũkeehaarĩria ta andũ mekũrũa. Hĩndĩ ĩyo mũgaakorwo mũhaana ũguo-rĩ, nĩmũkoona MWATHANI akĩmũhootanĩra. Atĩrĩĩrĩ, andũ aya a Juda na a Jerusalemu, mũtigeetigĩre o na kana mũmake. Rũũciũ mũkoimagara mũkahũũrane nao; MWATHANI arĩ hamwe na inyuĩ!”

18 Naake Jehoshafatu akĩinamĩrĩra, agĩturumithia ũthiũ thĩ, nao andũ oothe magĩĩka o taake na oothe magĩthaathaiya MWATHANI.

19 Nao Alawii a mbarĩ ya Kohathu na a mbarĩ ya Kora makĩrũũgama magĩkumia MWATHANI Ngai wa Isiraeli maanĩrĩire na mũgambo mũnene mũno.

20 Na rĩĩrĩ, rũũciinĩ rwa mũthenya ũyũ ũngĩ makĩrooka gũthiĩ werũinĩ ũrĩa warĩ hakuhĩ na itũũra rĩa Tekoa. Rĩrĩa maambagĩrĩria rũgendo, Jehoshafatu akĩmataara na ciugo ici: “Atĩrĩĩrĩ andũ aya a Juda na a Jerusalemu! Mwĩhokeei MWATHANI Ngai wanyu, na nĩmũgũtũũra mwĩhandĩĩte wega. Ningĩ ĩtĩkagĩraai ciugo cia anabii aake, na nĩmũrĩgĩaga na ũhootani.”

21 Naake arĩĩkia gũcookania ndundu na andũ acio, agĩthuura aini a nyĩmbo a gũthiĩ matongoreetie ita meehumbĩĩte nguo iria meekagĩra marugainĩ marĩa mamũre. Wĩra wao warĩ gũthiĩ magĩkumagia MWATHANI na ciugo ici:

“Goocaai MWATHANI,

tondũ ũtugi wake nĩ wa tene na tene!”

22 Na rĩĩri, rĩrĩa maambĩrĩirie kũina o na kũgooca, MWATHANI agĩtũma thũ icio ciamathiũrũrũkĩirie ituruure.

23 Nao andũ a Amoni na a Moabi magĩtharĩkĩra mbũtũ ĩyo yothe ya Edomu makĩmĩniina biũ. Marĩĩkia kũmĩniina, magĩcooka kũrũa o eene.

24 Hĩndĩ ĩrĩa mbũtũ ya ita ya Juda yakinyire harĩa haarĩ na mũnaara ũrĩa warĩ kũu werũinĩ, ĩgĩcũũthĩrĩria na kũrĩa thũ ciao ciarĩ, ĩkĩona ciimba ciacio ciaraganĩĩte thĩ na gũtirĩ o na ĩmwe yatigarĩĩte muoyo.

25 Hĩndĩ ĩrĩa Jehoshafatu na thigari ciake maathiire kwĩyoera indo, magĩkora mahiũ maingĩ na indo cia mĩthemba mĩingĩ, nguo, o na indo ingĩ cia goro. Nao maakĩniina mĩthenya ĩtatũ moonganagia indo icio, no matiahotire kũũngania ciothe nĩkũingĩha.

26 Na rĩĩrĩ, mũthenya wa kana makĩũngana gĩtuambainĩ kĩa Beraka makĩgooca MWATHANI nĩ ũndũ wa maũndũ macio aameekĩĩte. Tondũ ũcio handũ hau hatũire heetagwo gĩtuamba kĩa Beraka, o na ũũmũũthĩ.

27 Naake Jehoshafatu agĩtongoria mbũtũ yake yothe ya ita magĩcooka Jerusalemu makeneete, nĩ ũndũ wa ũrĩa MWATHANI aamahootanĩire harĩ thũ ciao.

28 Nao maakinya Jerusalemu magĩtoonya Hekaarũinĩ makĩinaga makĩhũũraga ngita, inanda na makĩhuuhaga tũrumbeeta.

29 Namo mabũrũri moothe rĩrĩa maiguire ũrĩa MWATHANI aahootanĩire Aisiraeli harĩ thũ ciao, makĩiyũrwo nĩ guoya mũno.

30 Nakuo kũu bũrũriinĩ gũkĩiyũra thaayũ hĩndĩ yothe ya wathani wa Jehoshafatu, naake Ngai agĩikara amũgitĩire na mĩena yothe.

Mũthia wa ũthamaki wa Jehoshafatu

31 Na rĩĩrĩ, Jehoshafatu aambĩrĩirie gũthamaka Juda e wa mĩaka mĩrongo ĩtatũ na ĩtaano. Naake agĩthamaka kũu Jerusalemu mĩaka mĩrongo ĩĩrĩ na ĩtaano. Nyina eetagwo Azuba mwarĩ wa Shilihi.

32 Naake agĩgĩĩka maũndũ maingĩ meega ma gũkenia MWATHANI o ta marĩa meekĩĩtwo nĩ ithe Asa.

33 No rĩĩrĩ, kũndũ gũtũũgĩru kũrĩa gwathaathayagĩrio mĩhianano gũtiigana kweherio; andũ matiigana gũcaria Ngai wa maithe maao na ngoro yothe.

34 Na rĩĩrĩ, maũndũ marĩa mangĩ Jehoshafatu eekire, kuuma kĩambĩrĩria kĩa ũthamaki wake kinya kĩrĩĩkĩro, maandĩkĩĩtwo Ibukuinĩ rĩa Hisitoria ya Jehu mũrũ wa Hanani, narĩo nĩ gĩcunjĩ kĩmwe kĩa Ibuku rĩa Hisitoria ya Athamaki a Isiraeli.

35 Na rĩĩrĩ, hĩndĩ ĩmwe Jehoshafatu mũthamaki wa Juda nĩatumire ndũgũ na Ahazia mũthamaki wa Isiraeli. Ahazia ũcio, nĩekĩĩte maũndũ maingĩ mũno mooru.

36 Nao eerĩ, magĩaka meeri cia gũthiaga Tarishishi ciumĩĩte Ezioni Geberi.

37 No rĩĩrĩ, Eliezeri mũrũ wa Dodavahu woimĩĩte itũũra rĩa Maresha akĩrathĩra Jehoshafatu ũũru akĩmwĩra atĩrĩ, “Tondũ nĩwagwatanĩire na Ahazia, MWATHANI nĩekũharagania wĩra waku.” Nacio meeri icio ciothe igĩthũũkangio, igĩtiga gũthiĩ Tarishishi.

1 Naake Jehoshafatu agĩkua agĩthikwo mbĩĩrĩrainĩ cia athamaki kũu itũũrainĩ rĩa Daudi, naake Jehoramu mũũrũwe agĩthamaka ithenya rĩake.

Jehoramu mũthamaki wa Juda

2 Na rĩĩrĩ, Jehoramu mũrũ wa Jehoshafatu aarĩ na aariũ a nyina atandatũ. Nao nĩ: Azaria, Jehieli, Zekaria, Azariahu, Mikaeli, na Shefatia.

3 Naake ithe nĩaheete aariũ acio aake thahabu na betha nyingĩ, o na indo ingĩ cia goro. Ningĩ nĩaigĩĩte o mũndũ arũũgamagĩrĩre itũũra rĩake rĩirigĩre na thingo cia hinya kũu Juda. Na rĩĩrĩ, ũthamaki wake aũtigĩire Jehoramu tondũ nĩ we warĩ wa irigithaathi.

4 Na rĩĩrĩ, Jehoramu arĩĩkia gwĩkinyĩra wega ũthamakiinĩ wake, akĩũragithia a mũrũ wa nyina oothe na atongoria amwe a Isiraeli.

5 Jehoramu aatuĩkire mũthamaki wa Juda e wa mĩaka mĩrongo ĩtatũ na ĩĩrĩ, naake agĩthamaka mĩaka ĩnaana kũu Jerusalemu.

6 Naake akĩrũmĩrĩra mĩtugo mĩũru ya athamaki a Isiraeli, o ta ya mũciĩ wa Ahabu nĩ ũndũ aahikĩĩtie mwarĩ wa Ahabu. Agĩgĩĩka maũndũ maingĩ mooru marĩa mataakenagia MWATHANI.

7 No rĩĩrĩ, MWATHANI ndeetĩkĩrire kũniina nyũmba ya Daudi nĩ ũndũ nĩathondekeete kĩrĩĩkanĩro na Daudi.

8 Na rĩĩrĩ, hĩndĩ ya ũthamaki wa Jehoramu, nĩrĩo Aedomu maaremeire athamaki a Juda makĩgĩa na ũthamaki wao kĩũmbe.

9 Hĩndĩ ĩyo Jehoramu e hamwe na njaama ciake o na ngaari ciake cia mbarathi makiumagara gũtharĩkĩra Aedomu, nao Aedomu makĩmathiũrũrũkĩria. No rĩĩrĩ, mahinda ma ũtukũ, Jehoramu we na atongoria a ngaari ciake cia mbarathi makĩhota gwĩthara, makĩũra.

10 Ũguo nĩguo Aedomu maatigire gwathagwo nĩ Juda o nginyagia ũũmũũthĩ. Matukũinĩ o ro macio andũ a itũũra rĩa Libina nao makĩremera Juda magĩtiga gwathagwo nĩ o. Meekire ũguo tondũ Jehoramu nĩatirikĩĩte MWATHANI Ngai wa maithe maake.

11 Ningĩ nĩakire kũndũ gũtũũgĩru kũrĩa gwathaathayagĩrio mĩhianano irĩmainĩ cia Juda guothe na agĩtũma andũ a Juda na a Jerusalemu meehie.

12 Na rĩĩrĩ, mũnabii Elija agĩtũmĩra Jehoramu marũa maandĩkĩĩtwo ta ũũ: “MWATHANI Ngai, Ithe wa guukaguo Daudi, aroiga atĩrĩ, ‘Wee nĩũrĩkĩĩtie gũtuĩrwo ituĩro nĩ ũndũ wa ũrĩa wothe wĩkĩĩte. Nĩ ũndũ-rĩ, nĩwagire kũrũmĩrĩra mĩtugo ya thooguo, mũthamaki Jehoshafatu, o na ya guukaguo, mũthamaki Asa.

13 Handũ ha ũguo ũrũmĩrĩire mĩtugo mĩũru ya athamaki a Isiraeli ũgagĩtũma andũ a Juda na a Jerusalemu maage kwĩhokeka o ta ũrĩa Ahabu na athamaki arĩa maarĩ thuutha wake matũmire andũ a Aisiraeli maage kwĩhokeka. Ningĩ, nĩworagire aariũ a thooguo arĩa maarĩ eega gũgũkĩra.

14 Nĩ ũndũ ũcio, MWATHANI nĩekũherithia andũ aaku, ciana ciaku, o na atumia aaku na iherithia inene, o na aanange indo ciaku ciothe.

15 Wee mwene nĩũkũrũara mũrimũ wĩ na ruwo mũno wa mara, na ũrĩthiaga ũkĩĩhagĩrwo nĩguo o mũthenya.’ ”

16 Na rĩĩrĩ, MWATHANI akĩarahũra Afilisiti na Arabu amwe arĩa maatũũraga hakuhĩ na andũ a Ethiopia arĩa maarĩ rũteereinĩ rwa iria. Nao magĩũkĩrĩra Jehoramu,

17 magĩtharĩkĩra Juda. Magĩtaha indo iria ciarĩ nyũmba ya mũthamaki, makĩnyiita aariũ na atumia aake, magĩthiĩ nao marĩ mĩgwate. Na rĩĩrĩ, Ahazia, kĩhinga nda gĩake no we watigarire.

18 Thuutha wa maũndũ macio moothe MWATHANI akĩreehithĩria mũthamaki Jehoramu mũrimũ wa mara ũtangĩhoneka.

19 Na rĩĩrĩ, mũrimũ ũcio ũkĩmwĩhĩra mũno, na thuutha wa mĩaka ĩĩrĩ agĩkua e na ruwo rũingĩ mũno. Nao andũ aake matiigana kũmwakĩria icua inene rĩa mwaki nĩguo mamũcakaĩre ta ũrĩa meekĩire maithe maake.

20 Na rĩĩrĩ, Jehoramu aambĩrĩirie gũthamaka e wa mĩaka mĩrongo ĩtatũ na ĩĩrĩ na agĩthamaka mĩaka ĩnaana kũu Jerusalemu. Na rĩĩrĩ, gũtirĩ mũndũ o na ũrĩkũ weririre gĩkuũ gĩake. Nao makĩmũthika itũũra rĩa Daudi, no ti mbĩĩrĩrainĩ cia athamaki.

Ahazia mũthamaki wa Juda

1 Na rĩĩrĩ, mbũtũ nene ya andũ ĩtongoreetio nĩ Arabu, ĩgĩtharĩkĩra mũciĩ wa Jehoramu, ĩkĩũraga aariũ aake oothe tiga ũrĩa warĩ wa kĩhinga nda wetagwo Ahazia. Nĩ ũndũ ũcio, andũ oothe a Jerusalemu magĩtua Ahazia mũthamaki ithenya rĩa ithe.

2-3 Ahazia aambĩrĩirie gũthamaka arĩ wa mĩaka mĩrongo ĩĩrĩ na ĩĩrĩ, naake agĩthamaka mwaka ũmwe kũu Jerusalemu. Naake agĩĩka maũndũ maingĩ mooru, o ta marĩa meekĩĩtwo nĩ mũciĩ wa mũthamaki Ahabu. Aataaragwo nĩ nyina Athalia mwarĩ wa Ahabu na mũcũkũrũ wa Omuri mũthamaki wa Isiraeli, na nĩatũmire eehie mũno.

4 Na rĩĩrĩ, ithe arĩĩkia gũkua, andũ a mũciĩ wa mũthamaki Ahabu magĩtuĩka ataari aake, nao magĩtũma ahĩtĩrie MWATHANI, magĩgĩtuĩka akũmũniinithia.

5 Naake arĩĩkia gwĩtĩkania na kĩrĩra kĩao, akĩnyiitanĩra na Joramu mũthamaki wa Isiraeli magĩthiĩ kũhũũrana na Hazaeli mũthamaki wa Siria. Nao makĩrũĩra mbaara Ramothu bũrũriinĩ wa Gileadi, naake Joramu agĩtiihio nĩ thigari cia Siria.

6 Naake Joramu akĩhũndũka agĩcooka Jezireeli nĩguo akahonerie ironda ciake kuo, naake Ahazia mũthamaki wa Juda agĩikũrũka kuo kũmũrora.

7 Na rĩĩrĩ, iceera rĩũ rĩa gũthiĩ kwa Joramu rĩarĩ mũbango wa Ngai nĩguo Ahazia akaniinwo. Naake Ahazia akinya kuo, agĩthiĩ na Joramu kũhũũrana na Jehu mũrũ wa Nimushi. Jehu nĩ we MWATHANI aitĩrĩirie maguta akamũthuura nĩguo aniine mũciĩ wa Ahabu.

8 Na rĩĩri, rĩrĩa Jehu aahingagĩria mũciĩ wa Ahabu matua ma Ngai, agĩtũngana na atongoria a Juda na aanake a mũrũ wa nyina na Ahazia arĩa maareehanĩĩte naake, naake Jehu akĩmooraga oothe.

9 Naake Jehu agĩathana Ahazia acario, naake agĩkorwo ehithĩĩte Samaria. Nao arĩa maamũcaragia mamuona makĩmũtwara kwĩ Jehu, makĩmũũraga. Nao makĩmũthika nĩ ũndũ wa gĩtĩĩo gĩa ithe Jehoshafatu ũrĩa watungatĩire MWATHANI na kĩyo kĩnene.

Na rĩĩrĩ, gũtiatigarire mũndũ o na ũmwe thĩinĩ wa mũciĩ wa Ahazia ũngĩahotire gũthamaka.

Kwini Athalia wa Juda

10 Rĩrĩa Athalia nyina wa mũthamaki Ahazia aamenyire atĩ mũũrũwe nĩoragwo, akĩũragithia andũ oothe a nyũmba ya mũthamaki wa Juda.

11 Na rĩĩrĩ, Ahazia nĩarĩ na mwarĩ wa ithe wetagwo Jehosheba, wahikĩĩtio nĩ mũthĩnjĩri Ngai wetagwo Jehoiada. Naake Jehosheba akĩoya Joashu hamwe na mũreri wake akĩmahitha nĩguo matikooraganĩrio na aariũ arĩa angĩ a mũthamaki. Aamahithire kanyũmbainĩ ga toro Hekaarũinĩ. Gĩĩko kĩu eekire gĩa kũmũhitha nĩkĩo kĩahonokirie Joashu akĩaga kũũragwo nĩ kwini Athalia.

12 Naake akĩhithwo nĩ o mĩaka ĩtandatũ kũu Hekaarũinĩ, na ihinda rĩu rĩothe kwini Athalia nĩwe wathamakaga Juda.

Kwini Athalia gũũkĩrĩrwo

1 Na rĩĩrĩ, mĩaka ĩtandatũ yathira, Jehoiada mũthĩnjĩri Ngai agĩtua atĩ maũndũ matiagĩrĩirwo nĩgũikara makirĩirwo ũguo. Naake agĩĩta anene ataano, arĩa maarũũgamagĩrĩra o mũndũ thigari igana. Nao maarĩ Azaria mũrũ wa Jehoramu, Ishumaeli mũrũ wa Jehohanani, Azaria mũrũ wa Obedi, Maaseia mũrũ wa Adaia, na Elishafati mũrũ wa Zikiri, magĩcookania ndundu.

2 Nao magĩgĩthiĩ bũrũriinĩ wothe wa Juda, makĩũngania Alawii, na anene oothe a mbarĩ, makĩmareehe Jerusalemu.

3 Nao andũ acio magĩtoonya Hekaarũinĩ makĩgĩa na kĩrĩĩkanĩro na Joashu mũrũ wa mũthamaki. Naake Jehoiada akĩmeera atĩrĩ, “Mũrũ wa mũthamaki Ahazia nĩ we ũyũ! Ũyũ nĩ we ũgũtuĩka mũthamaki o ta ũrĩa MWATHANI eeranĩire atĩ njiarwa cia Daudi nĩcio igaatũũra ithamakaga.

4 Atĩrĩĩrĩ, ũũ nĩguo mwagĩrĩirwo nĩgwĩkaga. Rĩrĩa mwoka wĩra mũthenya wa Thabatũ, gĩcunjĩ kĩmwe gĩa ithatũ kĩanyu, inyuĩ athĩnjĩri Ngai na Alawii, kĩrĩrangagĩra ihingo cia Hekaarũ.

5 Nakĩo kĩu kĩngĩ gĩa ithatũ gĩkarangĩra nyũmba ya mũthamaki. Kĩu kĩngĩ kĩrĩrangagĩra kĩhingo kĩrĩa gĩĩtagwo ‘Kĩhingo kĩa Mũthingi.’ Andũ angĩ oothe marĩikaraga kũu nja ya Hekaarũ.

6 Mũtikaarekagĩrĩrie mũndũ o na ũrĩkũ atoonye Hekaarũinĩ o tiga athĩnjĩri Ngai na Alawii arĩa maratungata kuo. Acio nĩ o maagĩrĩirwo nĩgũtoonyaga kuo tondũ nĩ aamũre. Andũ acio angĩ maagĩrĩirwo nĩgwathĩkagĩra MWATHANI, magaikaraga nja.

7 Alawii marĩrangagĩra mũthamaki manyiitĩĩte hiũ cia njora o harĩa hoothe arĩthiaga. Mũndũ o na ũrĩkũ ũrĩgeragia gũtoonya Hekaarũinĩ, no kũũragwo arĩũragagwo.”

8 Nao Alawii na andũ oothe a Juda magĩĩka o ta ũrĩa Jehoiada mũthĩnjĩri Ngai aamaathĩĩte. Na rĩĩrĩ, andũ arĩa maakoragwo wĩra mũthenya wa thabatũ, moimĩra matietĩkagĩrio mainũke. Nĩ ũndũ ũcio anene maakoragwo na ikundi igĩrĩ cia andũ; andũ arĩa mookĩĩte wĩra na arĩa moimĩra wĩra.

9 Naake Jehoiada akĩhe anene matimũ na ngo iria ciarĩ cia mũthamaki Daudi iria ciaigĩĩtwo kũu Hekaarũinĩ.

10 Naake akĩmabanga marigiicĩirie Hekaarũ mwena wa na mbere, o mũndũ anyiitaĩĩte matharaita maake nĩguo magitĩre mũthamaki.

11 Naake Jehoiada akiumia Joashu mũrũ wa mũthamaki nja, akĩmwĩkĩra kĩraũni mũtwe. Thuutha wa ũguo akĩmũnengera ibuku rĩa mawatho ma wathani wa mũthamaki, agĩgĩtuuo mũthamaki. Naake Jehoiada mũthĩnjĩri Ngai na aariũ aake marĩĩkia kũmũitĩrĩria maguta ma kũmũtua mũthamaki, andũ oothe makĩanĩrĩra makiuga atĩrĩ, “Ũrotũũra mũthamaki!”

12 Rĩrĩa kwini Athalia aiguire andũ magĩkũngũĩra mũthamaki, agĩthiĩ ahiũhĩĩte na Hekaarũinĩ ya MWATHANI kũrĩ andũ.

13 Naake aacũũthĩrĩria, akĩona mũthamaki ũcio mwerũ etiiranĩĩtie na gĩtugĩ kĩa athamaki hau mũromoinĩ wa Hekaarũ athiũrũrũkĩirio nĩ anene a thigari na ahuuhi tũrumbeeta. Nao andũ oothe nĩgũkena maakenaga makĩhuuhaga tũrumbeeta matongoreetio nĩ aini a nyĩmbo a Hekaarũ makĩhũũraga indo ciao cia nyĩmbo thigũkũinĩ ĩyo. Hĩndĩ ĩyo kwini Athalia agĩtembũranga nguo ciake akiuga atĩrĩ, “Ndĩmũkunyanĩre! Ndĩmũkunyanĩre!”

14 Na rĩĩrĩ, tondũ Jehoiada ndeendaga Athalia ooragĩrwo Hekaarũinĩ, agĩatha anene a thigari atĩrĩ, “Mũgereriei gatagatĩ ka mĩhari ya arangĩri mũmuumie nja. Mũndũ o wothe ũkũgeria kũmũhonokia, nĩoragwo.”

15 Tondũ ũcio makĩmũnyiita, makĩmũgeria kĩhingo kĩrĩa gĩetagwo kĩhingo kĩa Mbarathi, makĩmũtwara nyũmbainĩ ya mũthamaki makĩmũũragĩra kuo.

Jehoiada kwagĩria maũndũ

16 Naake Jehoiada, mũthĩnjĩri Ngai, agĩtũma andũ na mũthamaki Joashu, manyiitanĩre naake gũthondeka kĩrĩĩkanĩro atĩ nĩmegũtuĩka andũ a MWATHANI.

17 Nao andũ oothe magĩthiĩ hekaarũinĩ ya Baali makĩmĩmomora, makiunanga igongoona ciayo, o na mĩhianano ya yo, na makĩũragĩra Matani mũthĩnjĩri ngai ĩyo o hau mbere ya igongoona icio.

18 Naake Jehoiada akĩiga athĩnjĩri Ngai na Alawii marutage wĩra wa Hekaarũ. Wĩra wao warĩ wa kũrutaga magongoona ma njino o ta ũrĩa mũthamaki Daudi oigĩĩte, o na ta ũrĩa kwandĩkĩĩtwo Wathoinĩ wa Musa. No o maarĩ a gũtabaragĩra mũinĩre wa nyĩmbo o na ikeno cia mĩthemba ĩrĩa ĩngĩ.

19 Jehoiada agĩcooka akĩiga arangĩri a kũrangagĩra ihingo cia Hekaarũ, nĩguo gũtigaatoonyage mũndũ wĩ na thaahu.

20 Naake Jehoiada, anene na atongoria a bata, na aathani na andũ oothe a bũrũri ũcio magĩtongoria mũthamaki Joashu kuuma Hekaarũinĩ makĩmũtwara nyũmbainĩ ya mũthamaki. Magĩgĩthiĩ magereire mũrango ũrĩa mũnene, magĩtoonya nyũmba ya mũthamaki. Naake Joashu agĩthiĩ agĩikarĩra gĩtĩ gĩa ũthamaki.

21 Tondũ ũcio, andũ oothe a bũrũri ũcio magĩkena mũno. Narĩo itũũra rĩu rĩgĩikara rĩhooreire tondũ Athalia nĩarĩĩkĩĩtie kũũragwo.

Joashu mũthamaki wa Juda

1 Na rĩĩrĩ, Joashu aambĩrĩirie gũthamaka Juda e wa mĩaka mũgwanja. Naake agĩthamaka mĩaka mĩrongo ĩna e Jerusalemu. Nyina eetagwo Zibia na oimĩĩte itũũra rĩa Beerisheba.

2 Naake Joashu agĩĩka maũndũ maingĩ marĩa moonagwo marĩ meega nĩ MWATHANI rĩrĩa rĩothe Jehoiada mũthĩnjĩri Ngai atũũraga muoyo.

3 Naake Jehoiada akĩmũthuurĩra airĩĩtu eerĩ matuĩke atumia aake, nao makĩmũciarĩra aanake na airĩĩtu.

4 Na rĩĩrĩ, thuutha wa matukũ manyiinyi, Joashu agĩtua atĩ nĩegũcookereria Hekaarũ kũrĩa gwatharũkĩĩte.

5 Naake agĩatha athĩnjĩri Ngai, na Alawii, mathiĩ matũũrainĩ moothe ma Juda makĩũnganagia mbeeca cia kũigana gũcookagĩrĩria Hekaarũ mwaka o mwaka. Joashu akĩmeera meeke ũndũ ũcio na ihenya, no Alawii makĩũhũthĩrĩria.

6 Naake Joashu agĩĩta Jehoiada mũtongoria wao akĩmũũria atĩrĩ, “Nĩkĩ gĩtũmĩĩte wage kuona atĩ Alawii nĩmeetĩĩtie igooti kuuma kũrĩ andũ oothe a Juda na Jerusalemu o ta ũrĩa Musa ndungata ya MWATHANI oigire gwĩkagwo? Igooti rĩu rĩatuĩtwo rĩa gũteithagĩrĩria Hema ya MWATHANI ya gũtũnganwo.”

7 Arũmĩrĩri a Athalia, mũndũ wa nja ũcio mwaganu, nĩmaathũũkangĩĩtie Hekaarũ, na magĩthiĩ na indo ciothe iria ciarĩ nyamũre gũthaathayagia Baali nacio.

8 Naake mũthamaki agĩatha Alawii mathondeke ithandũkũ rĩa gwĩkagĩra mĩhothi, na maarĩthondeka makĩrĩiga kĩhingoinĩ gĩa kũingĩra Hekaarũinĩ.

9 Na rĩĩrĩ, gũkĩanĩrĩrwo kũu Jerusalemu na Juda guothe, atĩ andũ oothe mareehe igooti mbere ya MWATHANI o ta ũrĩa Musa ndungata ya MWATHANI aambĩrĩirie rĩrĩa maarĩ werũinĩ.

10 Nao atongoria na andũ oothe maigua ũguo magĩkena, makĩreehe mbeeca ciao cia igooti o nginya ithandũkũ rĩkĩiyũra.

11 Nao Alawii arĩa meehokeirwo ithandũkũ rĩu, maarĩtwaragĩra atongoria rĩaiyũra. Naake karani wa mũthamaki na Mũthĩnjĩri Ngai Ũrĩa Mũnene arĩa meehokeirwo wĩra ũcio magagĩcitara, na magacookia ithandũkũ o harĩa rĩaigagwo. Nao magĩkĩũngania mbeeca nyingĩ mũno.

12 Naake mũthamaki me na Jehoiada makanengera andũ arĩa meehokeirwo wĩra wa Hekaarũ mbeeca icio. Nao magakĩandĩka aaki na mahiga, mabundi ma mbaaũ, o na aaki na cuuma nĩguo macookererie Hekaarũ.

13 Namo makundi macio makĩruta wĩra na kĩyo o nginya makĩũrĩĩkia. Nayo Hekaarũ ĩgĩkorwo ĩthakarĩĩte na ĩkarũma wega o ta mbere.

14 Na rĩĩrĩ, marĩĩkia wĩra ũcio, magĩtwarĩra mũthamaki na Jehoaiada mbeeca iria ciatigarĩĩte. Nacio ĩgĩthondeka mbakũri na indo ingĩ cia thahabu na cia betha cia kũhũthagĩrwo Hekaarũinĩ.

Mĩbango ya Jehoiada kũgarũranio

Na rĩĩrĩ, andũ magĩgĩthiĩ na mbere kũrutagĩra MWATHANI magongoona Hekaarũinĩ hĩndĩ ciothe rĩrĩa Jehoiada aarĩ muoyo.

15 Na rĩĩrĩ, Jehoiada agĩkua, e mũkũrũ mũno, arĩ wa mĩaka igana rĩa mĩrongo ĩtatũ (130).

16 Nao makĩmũthika mbĩĩrĩrainĩ cia athamaki kũu itũũra rĩa Daudi, nĩ ũndũ wa wĩra ũrĩa aarutĩire Aisiraeli, o hamwe na Ngai, o na Hekaarũ yake.

17 Na rĩĩrĩ, Jehoaiada arĩĩkia gũkua, anene oothe a Juda magĩũka makĩhatĩrĩria Joashu amathikagĩrĩrie, naake akĩmaathĩkĩra.

18 Nao magĩtiga gũthaathayagĩria Hekaarũinĩ ya MWATHANI wa maithe maao, makĩambĩrĩria gũthaathaiya Ashera na mĩhianano ya ngai ingĩ. Wĩhia ũcio wao ũgĩgĩtũma MWATHANI araakarĩre Juda na Jerusalemu mũno.

19 Naake MWATHANI agĩtũma anabii makamaarĩrie nĩguo mamũcookerere, no andũ matiigana kũmathikĩrĩria.

20 Roho wa Ngai akĩiyũra Zekaria mũrũ wa Jehoiada mũthĩnjĩri Ngai, akĩrũũgama handũ andũ oothe mangĩahotire kũmuona akĩanĩrĩra atĩrĩ, “MWATHANI aroiga atĩ nĩmwagararĩĩte maathani maake nĩkĩo mwagĩĩte kũgaacĩra. Tondũ nĩmũtiganĩirie MWATHANI, o naake nĩamũtiganĩirie!”

21 Nao makĩgĩa ndundu na mũthamaki Joashu nĩguo meeke Zekaria ũũru. Naake mũthamaki akĩruta watho, nao makĩũragĩra Zekaria kĩhaaroinĩ kĩa Hekaarũ.

22 Naake mũthamaki ndaigana kũririkana wega, o na ũmwe ũrĩa Jehoaiada ithe wa Zekaria aameekĩĩte. Ngaatho ciake no kũũragithia mũũrũwe Zekaria. Na rĩĩrĩ, rĩrĩa Zekaria aakuaga akĩanĩrĩra na mũgambo mũnene akiuga atĩrĩ, “MWATHANI aroona ũrĩa mũreeka na amũherithie.”

Marigĩrĩrio ma wathani wa Joashu

23 Na rĩĩrĩ, mbura ĩrĩa nene yaringa mwakainĩ ũcio, mbũtũ ya ita cia Siria igĩtharĩkĩra mũthamaki Joashu. Nao makĩũraga anene oothe a Juda na Jerusalemu, na magĩtaha indo nyingĩ, magĩcooka nacio Damasiki magĩcihe mũthamaki.

24 Nayo mbũtũ ya thigari cia Siria ĩrĩa yathiĩte kũhũũrana na Juda yarĩ o ya andũ anyiinyi. Nĩ ũndũ wa ũrĩa andũ a Juda maatiganĩirie MWATHANI Ngai wa maithe maao, akĩmarekereria makĩhootwo o na maarĩ aingĩ. Ũguo nĩguo Joashu aaherithirio.

25 Nayo mbũtũ ĩyo ya ita ĩkĩhũndũka na ĩgĩtiga ĩtiihangĩĩtie Joashu mũno. Thuutha wa kũmũtiga ahaana ũguo, ndungata ciake ikĩgĩa ndundu ya kũmwĩka ũũru nĩguo ciĩrĩhĩrie kũũragwo kwa mũrũ wa Jehoiada mũthĩnjĩri Ngai. Nao makĩmũũragĩra ũrĩrĩinĩ wake, magĩcooka makĩmũthika kũu itũũra rĩa Daudi. Nao matiigana kũmũthika mbĩĩrĩrainĩ cia athamaki.

26 Arĩa maagĩire ndundu ya kũmwĩka ũũru nĩ o aya: Zabadu, mũrũ wa mũndũ wa nja wetagwo Shimeathu Mũamoni, na Jehozabadu, mũrũ wa mũndũ wa nja wetagwo Shimurithu woimĩĩte Moabi.

27 Na rĩĩrĩ, ũhoro wa aariũ a Joashu o na wa ũrathi ũrĩa warathĩĩtwo igũrũ rĩake o na wa ũrĩa aacookereirie Hekaarũ kũrĩa gwathũkangĩĩte wandĩkĩĩtwo Ibuku rĩa Ũtaũranĩri wa maũndũ ma athamaki. Naake Amazia mũũrũwe agĩthamaka ithenya rĩake.

Amazia mũthamaki wa Juda

1 Na rĩĩrĩ, Amazia aambĩrĩirie gũthamaka arĩ wa mĩaka mĩrongo ĩĩrĩ na ĩtaano, naake agĩthamaka mĩaka mĩrongo ĩĩrĩ na kenda kũu Jerusalemu. Nyina eetagwo Jehoadini wa kuuma o kũu Jerusalemu.

2 Naake agĩgĩĩka maũndũ maingĩ marĩa maakenagia MWATHANI, no ndameekire agwatĩirie na ngoro yake yothe.

3 Rĩrĩa Amazia ekinyĩire ta mũthamaki, akĩũraga njaama ciake iria cioragĩĩte ithe.

4 No rĩĩrĩ, ndaigana kũũraga ciana cia ooragani acio, no nĩahingirie ũrĩa MWATHANI aathanĩĩte Wathoinĩ wa Musa atĩrĩ, “Aciari matikaanooragwo nĩ ũndũ wa mahĩtia ma ciana ciao, kana ciana ciũragwo nĩ ũndũ wa mahĩtia ma aciari acio; o mũndũ arĩũragagwo nĩ ũndũ wa meehia maake we mwene.”

Mbaara na Edomu

5 Naake Amazia agĩcookanĩrĩria arũme oothe a mũhĩrĩga wa Juda na wa Benjamini. Akĩmabanga mbũtũ cia athigari ikundi ikundi kũringana na mbarĩ ciao. Agĩcooka akĩiga atongoria a kũroraga mbũtũ cia ngiri ngiri, na a kũroraga cia igana igana. Naake agĩtara arũme oothe a mĩaka mĩrongo ĩĩrĩ na makĩria arĩa mangĩahotire kũhũthĩra matimũ na ngo. Agĩkĩona andũ ngiri magana matatũ (300,000) arĩa mangĩahotire gũthiĩ mbaara.

6 Hamwe na ũguo agĩkombora thigari njoorua ngiri igana (100,000) kuuma Isiraeli na thogora wa betha kiro ngiri ithatũ na magana mana (3,400).

7 No rĩĩrĩ, mũnabii agĩgĩthiĩ he mũthamaki akĩmwĩra atĩrĩ, “Mwathi wakwa mũthamaki, ndũgeetĩkĩre gũtwarana na mbũtũ cia ita cia Isiraeli. MWATHANI nĩatiganĩirie andũ aya a kuuma ũthamaki wa na rũgongo.

8 Rĩu-rĩ, wahota gwĩciiria atĩ andũ acio no o mangĩhota gũtũma mũhootane. No rĩĩrĩ, Ngai no we ũngĩtũma mũhootane kana mũhootwo, na arekererie thũ cianyu imũhoote.”

9 Naake Amazia akĩũria mũnabii ũcio atĩrĩ, “Ha ũhoro wa betha ĩrĩa yothe ndĩmarĩhĩĩte-rĩ, tũgwĩka atĩa nayo?”

Naake mũnabii akĩmũcookeria atĩrĩ, “MWATHANI ahota gũkũhe nyingĩ gũkĩra icio!”

10 Nĩ ũndũ ũcio Amazia akĩamũrania mbũtũ ĩyo ya ita aakomboreete akĩmĩĩra ĩinũke. Nayo ĩkĩinũka ĩng’ũrĩkĩĩte na ĩraakarĩire andũ a Juda mũno.

11 Naake Amazia agĩkĩũmĩrĩria agĩtongoria thigari ciake o nginya gĩtuamba gĩa Cumbĩ. Marĩ hau, makĩrũa mbaara, makĩũraga thigari ngiri ikũmi (10,000) cia rũũrĩrĩ rwa Edomu, na magĩtaha thigari ingĩ ngiri ikũmi.

12 Magĩcitwara igũrũ wa rwaro wa ihiga rũrĩa rũrĩ itũũrainĩ rĩa Sela. Nao magĩcigaragaria kuuma hau ĩgĩtiihangio nĩ mahiga igĩkua.

13 Na rĩĩrĩ, thigari cia Isiraeli iria ciaingatirwo nĩ Amazia nĩ geetha itigaathiĩ mbaarainĩ naake, ikĩgera ngero nene mũno. Igĩtharĩkĩra matũũra moothe ma Juda marĩa marĩ gatagatĩ ka Samaria na Bethi Horoni, ikĩũraga andũ ngiri ithatũ (3,000). Ĩgĩcooka igĩtaha indo nyingĩ mũno.

14 Na rĩĩrĩ, Amazia acooka kuuma kũhũũra Aedomu, akĩinũka na mĩhianano yao mĩingĩ, akĩmĩiga gwake, akĩmĩthaathaiya na akĩmĩcinĩra ũbaani.

15 Ũndũ ũcio ũkĩraakaria MWATHANI mũno, akĩmũrekeria mũnabii akamũũrie atĩrĩ, “Amazia, nĩkĩ gĩtũmĩĩte ũthaathaiye ngai ng’eni, o icio itangĩahotire kũhonokia andũ aacio kuuma harĩ we?”

16 O akĩaragia-rĩ, mũthamaki akĩmũũria atĩrĩ, “Nĩ kuuma rĩ, twagũtuire mũndũ wa gũtaaraga mũthamaki? Kinyia ũhoro waku hau, kana njuge ũũragwo!”

Na rĩĩrĩ, mũnabii ataanatiga kwaria akiuga atĩrĩ, “Nĩnjũũĩ MWATHANI nĩatuĩte gũkũũraga tondũ nĩwĩkĩĩte ũguo wothe, na nĩwarega kũigua mataaro maakwa.”

Mbaara na Isiraeli

17 Na rĩĩrĩ, Amazia mũthamaki wa Juda arĩĩkia kũhooya kĩrĩra kuuma kũrĩ arĩa maamũtaaraga, akĩbanga njaama ya gũũkĩrĩra Isiraeli. Agĩkĩrekia arekio kwĩ mũthamaki Jehoashu mũrũ wa Jehoahazu mũrũ wa Jehu mũthamaki wa Isiraeli ikamwĩre atĩrĩ, “Ũka tũng’eng’ane.”

18 Naake Jehoashu akĩmũcookeria atĩrĩ, “Kwĩ hĩndĩ mũigua wa irĩma cia Lebanoni watũmire ndũmĩrĩri kwĩ mũtarakwa ũkiuga atĩrĩ, ‘He mũrũ wakwa mwarĩguo amũhikie.’ Hĩndĩ o ĩyo hakĩhĩtũka nyamũ ya gĩthaka ĩkĩrangaranga mũigua ũcio.

19 Atĩrĩĩrĩ Amazia, nĩgwĩtĩĩa ũretĩĩa nĩ ũndũ wa kũhoota Aedomu. Ikara o kũu gwaku mũciĩ. Nĩkĩ gĩgũtũma wende gũthoga njũkĩ, wĩreeherere thĩĩna we mwene na andũ aaku a Juda?”

20 No rĩĩrĩ, Amazia akĩrega gũthikĩrĩria. Ũcio warĩ mũbango wa Ngai atĩ Amazia ahootwo nĩ ũndũ wa gũthaathaiya ngai cia mĩhianano cia bũrũri wa Edomu.

21 Tondũ ũcio Joashu, mũthamaki wa Isiraeli na Amazia mũthamaki wa Juda, makiumagara magĩthiĩ kũrũĩra Bethi Shemeshi bũrũriinĩ wa Juda.

22 Nacio thigari cia Juda igĩgĩtoorio nĩ thigari cia Isiraeli, nacio ikĩũra ikĩĩinũkĩra.

23 Naake Jehoashu mũthamaki wa Isiraeli akĩnyiita Amazia akĩmũtwara Jerusalemu. Agĩcooka agĩtharia rũthingo rwa itũũra rĩu kuuma kĩhingoinĩ kĩa Efiraimu nginya kĩhingoinĩ gĩa Koona, handũ ha ũraihu wa mita ta magana meerĩ.

24 Naake agĩkuua thahabu na betha iria oonire kũu Hekaarũinĩ iria ciamenyagĩrĩrwo nĩ Obedi Edomu, o na indo iria ingĩ oonire kuo. O na agĩkuua mũthiithũ wothe wa nyũmba ya mũthamaki agĩthiĩ na indo icio ciothe Samaria. Agĩcooka agĩkuua andũ marĩ mĩgwate ya gũgaakũũrwo thuuthainĩ agĩthiĩ nao.

25 Na rĩĩrĩ, Amazia mũthamaki wa Juda, agĩgĩtũũra muoyo mĩaka ĩngĩ ikũmi na ĩtaano kuuma rĩrĩa Jehoashu mũthamaki wa Isiraeli aakuire.

26 Na rĩĩrĩ, maũndũ marĩa mangĩ Amazia eekire kuuma kĩambĩrĩria kĩa ũthamaki wake nginya kĩrĩĩkĩro, maandĩkĩĩtwo Ibukuinĩ rĩa Hisitoria ya Athamaki a Juda na a Isiraeli.

27 Na rĩĩrĩ, kuuma ihinda rĩrĩa Amazia aatiganĩirie MWATHANI andũ a kũu Jerusalemu nĩmaambĩrĩirie kũgĩa ndundu cia kũmũũkĩrĩra. Naake akĩũra agĩthiĩ Lakishi, nao andũ makĩmũrũmĩrĩra makĩmũũragĩra kuo.

28 Nao andũ magĩkuua kĩimba gĩake na mbarathi magĩthiĩ magĩgĩthika Jerusalemu mbĩĩrĩrainĩ cia athamaki kũu itũũra rĩa Daudi.

Uzia mũthamaki wa Juda

1 Nao andũ oothe a Juda makĩoya Uzia mũrũ wa Amazia e wa mĩaka ikũmi na ĩtandatũ, makĩmũtua mũthamaki ithenya rĩa ithe.

2 (Uzia nĩ we wacookire gũtuunyana itũũra rĩa Elathu, na akĩrĩakithia thuutha wa ithe Amazia gũkua.)

3 Na rĩĩrĩ, Uzia aambĩrĩirie gũthamaka arĩ wa mĩaka ikũmi na ĩtandatũ na agĩthamaka mĩaka mĩrongo ĩtaano na ĩĩrĩ kũu Jerusalemu. Nyina eetagwo Jekolia wa kuuma o kũu Jerusalemu.

4 Naake agĩĩka maũndũ maingĩ marĩa maakenagia MWATHANI o ta ũrĩa Amazia ithe eekĩĩte.

5 Naake Uzia agĩtungatĩra Ngai na kĩyo, hĩndĩ ĩrĩa yothe Zekaria aarĩ muoyo tondũ nĩ we wamũtaaraga. Naake Ngai agĩtũma agaacĩre mũno.

6 Naake Uzia agĩthiĩ akĩhũũrana na Afilisiti, agĩtharia rũthingo rwa Gathu, na rwa Jamunia, o na rwa Ashidodu. Agĩcooka agĩaka matũũra mairigĩirwo na thingo cia hinya kũu rũgongo rwa Ashidodu, o na mangĩ kũu bũrũriinĩ wa Afilisiti.

7 Naake Ngai akĩmũteithia akĩhoota Afilisiti, o na Arabu arĩa maatũũraga Guribaali, o na akĩhoota Ameuni.

8 Nao Aamoni makĩrutĩra Uzia igooti, akĩgĩa hinya mũno, nayo ngumo yake ĩgĩkinya o na Misiri.

9 Uzia agĩcooka agĩaka mĩnaara kũu Jerusalemu kĩhingoinĩ gĩa Koona, na kĩhingoinĩ gĩa Gĩtuamba, o na harĩa rũthingo rwethioreire, na akĩmĩaka na hinya mũno.

10 Agĩcooka agĩaka mĩnaara kũu werũinĩ, na akĩenja marima maingĩ ma maaĩ. Eekire ũguo nĩ ũndũ aarĩ na mahiũ maingĩ maarĩithagio kũu magũrũinĩ ma irĩma o na ciaraganainĩ.

O na nĩarĩ na aruti wĩra aingĩ na aceehi a mĩthabibũ mĩgũndainĩ ĩrĩa yarĩ magũrũinĩ ma irĩma cia Juda mwena wa na ithũĩro na ĩngĩ yarĩ kũndũ kũrĩa kũnoru tondũ nĩendeete ũrĩmi.

11 Ningĩ Uzia nĩarĩ na mbũtũ nene ya kũrũa mbaara. Mũthiĩre wayo wa mbaarainĩ wabangagwo nĩ Jeieli na Maaseia arĩa maarĩ tũrani. Naake Hanania ũmwe wa anene a mbũtũ cia ita cia mũthamaki nĩ we wamarũũgamagĩrĩra oothe.

12 Nayo mbũtũ ĩyo ya ita yarũũgamagĩrĩrwo nĩ atongoria ngiri igĩrĩ na magana matandatũ (2,600).

13 Nacio thigari ciothe iria ciarĩ rungu rwao ciarĩ ngiri magana matatũ na mũgwanja na magana mataano, (307,500). Icio nĩcio ciarĩ njoorua cia kũrũa mbaara, na nĩcio ciarũagĩrĩra mũthamaki harĩ thũ ciake.

14 Naake Uzia agĩthondekithĩria mbũtũ ĩyo yothe ya ita ngo, matimũ, ngobia cia kũgitĩra mũtwe, tũbuuti twa gĩcango, mĩguĩ, moota, na tũhiga twa gũikio na igũtha.

15 Nao andũ aake arĩa maarĩ njoorua cia gũtura indo magĩthondeka kũu Jerusalemu inyamũ cia gũikagia mĩguĩ, o na mahiga kuuma mĩnaarainĩ ĩyo, o na kuuma koonainĩ cia thingo. Nayo ngumo yake ĩkĩhunja kũndũ kũraaya, nĩ ũndũ wa ũrĩa aagĩĩte na hinya nĩgũteithĩrĩrio nĩ Ngai.

Uzia kũherithio nĩ ũndũ wa mwĩtĩĩo wake

16 Na rĩĩrĩ, hĩndĩ ĩrĩa mũthamaki Uzia aagaacĩire, agĩtĩĩa mũno. Naguo mwĩtĩĩo ũcio wake ũgĩtũma aanangwo, nĩ ũndũ nĩanyararire MWATHANI Ngai wake na ũndũ wa gũthiĩ Hekaarũinĩ akĩenda gũcina ũbaani kĩgongoonainĩ kĩa ũbaani.

17 Naake Azaria mũthĩnjĩri Ngai e hamwe na athĩnjĩri Ngai mĩrongo ĩnaana njoorua, magĩtoonyania naake kuo mamuumĩĩte thuutha,

18 makĩmũgiria gwĩka ũguo. Nao makĩmwĩra atĩrĩ, “Uzia, ũcio ti wĩra waku gũcinĩra MWATHANI ũbaani. Ũcio nĩ wĩra wa athĩnjĩri Ngai, aariũ a Harũni, tondũ nĩ o maamũrĩirwo wĩra ũcio. Ehera handũ haaha haamũre. Nĩũhĩtĩirie MWATHANI Ngai, na ũkeiimithia kĩraathimo gĩake.”

19 Hĩndĩ ĩyo Uzia aarũũgamĩĩte mwenainĩ wa kĩgongoona gĩa gũcinĩra ũbaani anyiitĩĩte kanyũngũ ga gũcinĩra ũbaani kũu Hekaarũinĩ ya MWATHANI. Naake akĩnyiitwo nĩ maraakara nĩ ũndũ wa athĩnjĩri Ngai acio. O hĩndĩ ĩyo mũrimũ mũũru wa ngoothi ũkĩiyũra thiithi wake arĩ o hau mbere ya athĩnjĩri Ngai acio.

20 Naake Azaria na athĩnjĩri Ngai acio angĩ, makĩmũrora makĩona hatarĩ nganja nĩ mũrimũ mũũru wa ngoothi aarĩ naguo thiithi. Nao makĩmuumia na nja na ihenya, o naake we mwene akĩhiũha kuuma nja tondũ rĩu rĩarĩ iherithia rĩa MWATHANI.

21 Naake mũthamaki Uzia agĩtũũra e na thaahu matukũ moothe ma muoyo wake, nĩ ũndũ wa mũrimũ ũcio mũũru wa ngoothi. Naake ndangĩetĩkĩririo atoonye Hekaarũinĩ; aatũũraga nyũmba e wiki na ndarĩ wĩra aarutaga. Jothamu mũũrũwe nĩ we wathanaga hĩndĩ ĩyo aahaanaga ũguo.

22 Na rĩĩrĩ, ciĩko iria ingĩ cia Uzia, kuuma kĩambĩrĩria kĩa ũthamaki wake nginya mũthia ciandĩkĩĩtwo nĩ mũnabii Isaia mũrũ wa Amozu.

23 Naake Uzia akua makĩmũthika mũgũndainĩ wa mũthamaki, no ti mbĩĩrĩrainĩ cia athamaki, nĩ ũndũ wa mũrimũ ũcio mũũru wa ngoothi. Naake Jothamu mũũrũwe agĩthamaka ithenya rĩake.

Jothamu mũthamaki wa Juda

1 Na rĩĩrĩ, Jothamu aambĩrĩirie gũthamaka arĩ wa mĩaka mĩrongo ĩĩrĩ na ĩtaano. Naake agĩthamaka mĩaka ikũmi na ĩtandatũ kũu Jerusalemu. Nyina eetagwo Jerusha mwarĩ wa Zadoku.

2 Naake Jothamu agĩĩka maũndũ maingĩ marĩa moonagwo marĩ meega nĩ MWATHANI, o ta ũrĩa ithe Uzia eekĩĩte. Ndaigana gwĩtoonyia meehiainĩ ma kwenda gũthiĩ gũcina ũbaani Hekaarũinĩ ta ithe. No rĩĩrĩ, andũ a Juda magĩthiĩ o na mbere kwĩhia.

3 Jothamu nĩwe wakire kĩhingo kĩa mwena wa na Rũgongo kĩa Hekaarũ. Ningĩ nĩarutĩire rũthingo rwa Jerusalemu na mwena ũrĩa wetagwo Ofeli wĩra mũingĩ.

4 O na ningĩ nĩakire matũũra irĩmainĩ cia Juda, nakuo mĩtitũinĩ agĩaka nyũmba cia hinya cia kwĩgitĩra, o na mĩnaara.

5 O na nĩahũũranire na mũthamaki wa Aamoni na mbũtũ ciake cia ita akĩmatooria. Naake akĩmatuĩra igooti handũ ha mĩaka ĩtatu ĩrũmanĩrĩire. O mwaka maamũrĩhaga kiro ngiri ithatũ na magana mana (3,400) cia betha, ngano tani ngiri ĩmwe (1,000), na tani ngiri ĩmwe (1,000) cia mbaarĩ.

6 Naake Jothamu agĩkĩrĩria kũgĩa na hinya wathaniinĩ wake nĩ ũndũ wa ũrĩa aathĩkĩire MWATHANI Ngai wake hatarĩ na ũhinga.

7 Na rĩĩrĩ, maũndũ marĩa mangĩ Jothamu eekire, o na mbaara iria aahũũranire, o na mwathanire wake, maandĩkĩĩtwo Ibukuinĩ rĩa Hisitoria ya Athamaki a Isiraeli na a Juda.

8 Jothamu aambĩrĩirie gũthamaka e wa mĩaka mĩrongo ĩĩrĩ na ĩtaano, naake agĩthamaka mĩaka ikũmi na ĩtandatũ kũu Jerusalemu.

9 Naake Jothamu agĩkua, agĩthikwo kũu itũũra rĩa Daudi. Naake Ahazu mũũrũwe agĩthamaka ithenya rĩake.

Ahazu mũthamaki wa Juda

1 Na rĩĩrĩ, Ahazu aambĩrĩirie gũthamaka Juda arĩ wa mĩaka mĩrongo ĩĩrĩ. Naake agĩthamaka mĩaka ikũmi na ĩtandatũ kũu Jerusalemu. Naake ndaigana gwĩka maũndũ meega ta marĩa meekĩĩtwo nĩ guukawe Daudi. Handũ ha gwĩka ũguo, eekire maũndũ marĩa mataakenagia MWATHANI

2 o ta marĩa athamaki a Isiraeli meekĩĩte, o na agĩthondeka mĩhianano ya cuuma ya Baali.

3 Ningĩ nĩacinĩire ũbaani gĩtuambainĩ kĩa Hinomu, o na akĩruta aariũ aake igongoona arũmĩrĩire mĩtugo ĩrĩ magigi ya ndũũrĩrĩ iria MWATHANI aingatĩĩte ikeehera mbere ya andũ a Isiraeli.

4 Ahazu nĩarutagĩra magongoona o na agacinĩra ũbaani kũndũ kũrĩa gũtũũgĩru gwathaathayagĩrio mĩhianano, o na irĩmainĩ, o na rungu rwa mũtĩ wothe mũruru.

Mbaara ya Siria na Isiraeli

5-6 Nĩ ũndũ wa meehia ma mũthamaki Ahazu MWATHANI Ngai wake akĩmũneana mookoinĩ ma mũthamaki wa Siria, akĩhũũrwo, o nginya agĩtoorio. Mũthamaki wa Siria agĩcooka agĩkua andũ aingĩ kuuma Juda akĩmatwara Damasiki marĩ mĩgwate. Naake MWATHANI akĩreka Peka mũrũ wa Remalia, mũthamaki wa Isiraeli, ahoote Ahazu, na akĩũraga thigari ngiri igana rĩa mĩrongo ĩĩrĩ (120,000) iria njoorua cia mũthamaki wa Juda mũthenya o ro ũmwe. MWATHANI Ngai wa maithe maao nĩkũrekereria aamarekereirie mahootwo tondũ nĩmaamũtiganĩirie.

7 Naake Zikini mũthigari njamba woimĩĩte Isiraeli, akĩũraga Maaseia mũrũ wa mũthamaki Ahazu. Ningĩ akĩũraga Azirikamu, mũrũũgamĩrĩri wa maũndũ ma nyũmba ya mũthamaki o na Elikana ũrĩa warĩ mũniini wa mũthamaki.

8 Nacio ita cia Isiraeli ikĩnyiita andũ ngiri magana meerĩ (200,000), matukanĩĩte na atumia na ciana, ikĩmatwara Samaria marĩ mĩgwate. Meekire ũguo o na gũtuĩka andũ a Juda maarĩ aariũ a ithe wao. Maamatwaranĩire hamwe na indo nyingĩ iria maatahĩĩte kuo.

Mũnabii Odedi

9 Na rĩĩrĩ, nĩkwarĩ na mũnabii wa Ngai watũũraga itũũrainĩ rĩa Samaria wetagwo Odedi. Naake agĩgĩthiĩ gũtũnga mbũtũ ĩyo ya ita ya Isiraeli ĩgĩcooka Samaria akĩmĩĩra atĩrĩ, “MWATHANI, o we Ngai wa maithe maanyu nĩwe ũrekereirie andũ a Juda nĩguo mũmahoote tondũ nĩmamũraakarĩĩtie. No rĩĩrĩ, ngero ĩrĩa mũmagereete ya kũmooraga nĩmũkinyĩire o matũinĩ maake.

10 Rĩu-rĩ, mũrenda gũtua andũ oothe, arũme na atumia, a Juda na a Jerusalemu ngombo cianyu. Kaĩ mũriganĩirwo atĩ o na inyuĩ mũrĩ eehia maithoinĩ ma MWATHANI Ngai wanyu?

11 Rĩu tategaai matũ mũigue ũrĩa ngũmwĩra! Ndamũthaitha mũrekererie aariũ a ithe wanyu mũnyiitĩĩte mĩgwate mainũke, nĩ gũkorwo maraakara ma MWATHANI nĩmamũcũũthĩrĩirie.”

12 Nao anene ana a ũthamaki wa na Rũgongo, Azaria mũrũ wa Jehohanani, Berekia mũrũ wa Meshilemothu, Jehizikia mũrũ wa Shalumu, na Amasa mũrũ wa Hadilai, magĩtetia andũ acio moimĩĩte itainĩ.

13 Makĩmeera atĩrĩ, “Mũtigatoonyie andũ aya mũtahĩĩte gũũkũ! Ithuĩ nĩtwĩhĩĩtie meehia ma kũigana, tũkaraakaria MWATHANI ũguo atĩ no atũherithie. Rĩu-rĩ, mũrenda gwĩka ũndũ ũgũtũma mahĩtia maitũ maingĩhe.”

14 Tondũ ũcio, mbũtũ ĩyo ya ita ĩkĩnenganĩrĩria mĩgwate ĩyo hamwe na indo iria yatahĩĩte kũrĩ andũ aao na kũrĩ anene aao.

15 Nao anene arĩa ana, makĩoya andũ acio oothe maarĩ mĩgwate, nĩguo mamatuge. Magĩkĩmahumba nguo iria ciatahĩĩtwo, na makĩmahe iraatũ magĩĩkĩra. Magĩcooka makĩmahe irio, gĩa kũnyua, o na makĩmahaka maguta. Nao arĩa mataarĩ na hinya wa gwĩtwara na magũrũ makĩmakuua na ndigiri ciao. Arĩa oothe maarĩ mĩgwate makĩmacookia Jeriko, itũũra rĩa Mĩkĩndũ, kũrĩ aariũ a ithe wao. Thuutha ũcio anene acio magĩcooka Samaria.

Ahazu kũũria Aasiria ũteithio

16-17 Na rĩĩrĩ, andũ a bũrũri wa Edomu makĩambĩrĩria gũtharĩkĩra Juda rĩngĩ na makĩnyiita andũ aingĩ mĩgwate. Tondũ ũcio mũthamaki Ahazu agĩtũmanĩra Tigilathu Pileseri mũthamaki wa Aasiria ooke amũteithĩrĩrie.

18 Hĩndĩ o ro ĩyo Afilisiti nĩgũtharĩkĩra maatharĩkagĩra matũũra marĩa maarĩ magũrũinĩ ma irĩma cia Juda mwena wa na ithũĩro, o na mwena wa na kĩanda wa Juda. Nĩmaatunyanĩĩte matũũra ma Bethi Shemeshi, Aijaloni, Gederothu, Soko na tũtũũra twakuo, Timina na tũtũũra twakuo, o na Gimizo na tũtũũra twakuo, magatũũra kuo.

19 Mũthamaki Ahazu agĩthũũkia mũno maũndũ ma Juda o na agĩkararia MWATHANI, agĩgĩtũma MWATHANI aagithie Juda gĩtĩĩo.

20 Naake mũthamaki wa Aasiria agĩũkĩrĩra Ahazu, akĩmũhatĩrĩria mũno handũ ha kũmũteithĩrĩria.

21 Naake Ahazu akĩoya thahabu yothe kuuma Hekaarũinĩ, o na kuuma nyũmbainĩ ya mũthamaki, o na kuuma nyũmba cia anene aake, akĩhe mũthamaki wa Aasiria. O na eeka ũguo ndaigana gũteithĩka.

Meehia ma Ahazu

22 Na rĩĩrĩ, hĩndĩ ĩyo mũthamaki Ahazu macio moothe mathĩĩna, agĩkĩrĩrĩria kwagarara watho wa MWATHANI.

23 Agĩgĩkĩrutĩra ngai cia andũ a Siria arĩa maamũhooteete magongoona, akĩĩĩraga atĩrĩ, “Tondũ ngai cia athamaki a andũ a Siria nĩciamateithirie, ngũcirutĩra magongoona nĩguo cindeithie o na niĩ. Na rĩĩrĩ, icio nĩcio ciamwagithirie kĩene, we mwene o hamwe na andũ oothe a Isiraeli.”

24 Naake Ahazu akĩoya indo ciothe cia Hekaarũ agĩciũraganga tũcunjĩ tũcunjĩ. Agĩcooka akĩhinga mĩrango yothe ya Hekaarũ, agĩaka igongoona kũu itũũrainĩ rĩa Jerusalemu guothe.

25 Na rĩĩrĩ, matũũrainĩ moothe ma Juda agĩthondeka kũndũ gũtũũgĩru gwa gũcinagĩrwo ũbaani na gwa gũthaathayagĩrio mĩhianano, o na gũcinagĩra ngai ng’eni ũbaani. Ũndũ ũcio ũgĩtũma MWATHANI Ngai wa maithe maake aiyũrwo nĩ maraakara.

26 Na rĩĩrĩ, maũndũ marĩa mangĩ ma mũthamaki Ahazu, kuuma kĩambĩrĩria nginya kĩrĩĩkĩrĩro, maandĩkĩĩtwo Ibukuinĩ rĩa Hisitoria ya Athamaki a Juda na Isiraeli.

27 Naake Ahazu agĩkua, agĩthikwo kũu Jerusalemu, no ndathikirwo mbĩĩrĩrainĩ cia athamaki. Naake Hezekia mũũrũwe agĩthamaka ithenya rĩake.

Hezekia mũthamaki wa Juda

1 Na rĩĩrĩ, Hezekia aambĩrĩirie gũthamaka Juda arĩ wa mĩaka mĩrongo ĩĩrĩ na ĩtaano. Naake agĩthamaka mĩaka mĩrongo ĩĩrĩ na kenda kũu Jerusalemu. Nyina eetagwo Abija, mwarĩ wa Zekaria.

2 Naake agĩĩka maũndũ marĩa maakenagia MWATHANI o ta marĩa meekĩĩtwo nĩ guukawe Daudi.

Hekaarũ gũtherio

3 Na rĩĩrĩ, o mweri wa mbere wa mwaka wa mbere aambĩrĩria gũthamaka, akĩhingũra mĩrango ya Hekaarũ, na agĩthondeka kũrĩa yaathũkangĩĩte.

4 Naake agĩcookanĩrĩria athĩnjĩri Ngai na Alawii hamwe kĩhaaroinĩ kĩa Hekaarũ kĩa na mwena wa irathĩro

5 akĩmeera atĩrĩ, “Tathikĩrĩriai Alawii aya. Mwĩtheriei nĩguo mũcooke mũtherie Hekaarũ ya MWATHANI Ngai wa maithe maanyu. Na mweherie kĩrĩa gĩothe kĩmĩthaahĩĩtie.

6 Maithe maitũ nĩmaagararire watho wa MWATHANI Ngai witũ na magĩĩka maũndũ maingĩ mataamũkenagia. Nao makĩmũhuutatĩra na magĩtiganĩria gĩikaro gĩake.

7 O na makĩhinga mĩrango ya Hekaarũ, makĩhoria mataawa, o na magĩtiga gũcina ũbaani o na magongoona ma njino Hekaarũinĩ ya Ngai wa Isiraeli.

8 Namo maũndũ macio moothe magĩtũma MWATHANI araakarĩire Juda na Jerusalemu, naguo ũndũ ũrĩa ameekĩĩte nĩũmakĩĩtie andũ oothe na ũgatũma moige hĩ hĩ hĩ hĩ-ĩ! Na inyuothe nĩmwĩyoneire ũguo.

9 Na rĩĩrĩ, maithe maitũ nĩmooragĩirwo mbaarainĩ, nao atumia aitũ o na ciana ciitũ magatahwo magatwarwo ithaamĩrio.

10 “Rĩu niĩ nĩnduĩte ciira na ngoro yakwa atĩ tũthondeke kĩrĩĩkanĩro na MWATHANI, Ngai wa Isiraeli, nĩguo ndakaanacooke gũgaatũraakarĩra.

11 Atĩrĩĩrĩ aariũ aakwa, tigaai gũte mahinda. Tondũ rĩĩrĩ, nĩ inyuĩ MWATHANI athuurĩĩte mũmũcinagĩre ũbaani, na mũtongoragie andũ kũmũthaathaiya.”

12-14 Nao Alawii arĩa maarĩ hau nĩ aya:

Kuuma mbarĩ ya Kohathu; Mahathu mũrũ wa Amasai na Joeli mũrũ wa Azaria

Kuuma mbarĩ ya Merari; Kishu mũrũ wa Abadi na Azaria mũrũ wa Jehaleleli

Kuuma mbarĩ ya Gerishoni; Joa mũrũ wa Zima na Edeni mũrũ wa Joa

Kuuma mbarĩ ya Elizafani; Shimuri mũrũ wa Jeueli

Kuuma mbarĩ ya Asafu; Zekaria na Matania

Kuuma mbarĩ ya Hemani; Jehueli na Shimei

Kuuma mbarĩ ya Jeduthuni; Shemaia na Uzieli.

15 Nao magĩcookanĩrĩria Alawii arĩa angĩ, nao oothe magĩĩtheria. O ta ũrĩa maathĩĩtwo nĩ mũthamaki makĩambĩrĩria kũmĩtheria ta ũrĩa watho wa MWATHANI wathanĩĩte.

16 Athĩnjĩri Ngai magĩtoonya thĩinĩ nĩguo mamĩtherie, makĩruta indo iria ciarĩ thĩinĩ wa Hekaarũ magĩcitwara nja ya Hekaarũ. Nao Alawii magĩcioya ciothe magĩciruta nja ya itũũra magĩcite gĩtuambainĩ gĩa Kidironi.

17 Wĩra ũcio wa gũtheria Hekaarũ mawambĩrĩirie mũthenya wa mbere wa mweri wa mbere, na mũthenya wa kanaana nĩmaakoreetwo maũrutĩĩte wothe makaũrĩĩkia. O na nĩmaarĩĩkĩĩtie gũtheria kanyũmba karĩa kaarĩ itoonyeroinĩ rĩa Hekaarũ. Nao magĩcooka makĩruta wĩra mĩthenya ĩngĩ ĩnaana nĩguo moone atĩ Hekaarũ nĩyathera biũ, naguo mũthenya wa ikũmi na ĩtandatũ wĩra ũcio wothe ũkĩrĩĩka.

Kwamũrwo rĩngĩ kwa Hekaarũ

18 Na rĩĩrĩ, magĩthiĩ harĩ mũthamaki Hezekia makĩmwĩra atĩrĩ, “Hekaarũ yothe rĩu ndĩrĩ na thaahu tondũ nĩtũmĩthereetie. O na nĩtũthereetie kĩgongoona harĩa magongoona ma njino macinagĩrwo na indo ciakĩo ciothe, meetha ĩrĩa ĩigagĩrĩrwo mĩgate ĩrĩa mĩtheru ya kũrutĩrwo MWATHANI, o na indo ciayo ciothe.

19 O nacio indo ciothe iria mũthamaki Ahazu eehereetie rĩrĩa aagararire watho wa Ngai nĩtũcithereetie tũgaciamũra rĩngĩ. Rĩu irĩ mbere ya kĩgongoona kĩa MWATHANI.”

20 Hĩndĩ ĩyo mũthamaki Hezekia agĩĩka ũndũ wa ihenya mũno, akĩũnganithia atongoria a itũũra hamwe, na marĩ oothe magĩthiĩ magĩtoonya Hekaarũinĩ.

21 Magĩthiĩ na ndeegwa mũgwanja ndũrũme mũgwanja, na tũtũrũme mũgwanja, na thenge mũgwanja, irĩ magongoona ma kũhoroheria meehia ma mũciĩ wa mũthamaki na ma andũ a Juda, na irĩ cia gũtheria Hekaarũ. Naake mũthamaki agĩatha athĩnjĩri Ngai arĩa maarĩ njiarwa cia Harũni macithĩnjĩre igũrũ wa kĩgongoona kĩa MWATHANI irĩ magongoona.

22 Nao magĩthĩnja ndeegwa, ndũrũme, na tũtũrũme, nayo thakame yacio makĩminjaminjĩria kĩgongoona.

23 Nacio thenge iria ciarĩ cia kũhoroheria meehia, magĩcitwarĩra mũthamaki o na andũ, nao magĩciigĩrĩra mooko.

24 Nao athĩnjĩri Ngai magĩcithĩnja magĩitĩrĩria thakame yacio kĩgongoona igũrũ, igĩtuĩka igongoona rĩa kũhoroheria meehia ma andũ oothe. Ũguo nĩguo mũthamaki aathanĩĩte atĩ magongoona ma njino na ma kũhoroheria meehia marutwo nĩ ũndũ wa Aisiraeli oothe.

25 Naake mũthamaki agĩkĩiga Alawii kũu Hekaarũinĩ o ta ũrĩa MWATHANI aathĩĩte mũthamaki Daudi ahũthĩrĩĩte Gadi, mũnabii wa mũthamaki, o na ahũthĩrĩĩte mũnabii Nathani. Agĩkĩmaiga kuo me na inanda, ngita na thaani iria ihũũrithanagio ikagamba wega.

26 Alawii acio magĩkĩrũũgama manyiitĩĩte indo icio cia kũina, iria ciahaanaga ta iria Daudi ainaga nacio, nao athĩnjĩri Ngai makĩrũũgama manyiitĩĩte tũrumbeeta.

27 Hĩndĩ ĩyo Hezekia agĩathana igongoona rĩa njino rĩrutĩrwo kĩgongoona igũrũ. Hĩndĩ ĩrĩa igongoona rĩu rĩambĩrĩirie kũrutwo, nyĩmbo nacio ikĩambĩrĩria kũinwo cia kũgooca MWATHANI, gũkĩhũũragwo indo cia kũina iria ciahaanaga ta iria Daudi ainaga nacio, na gũkĩhuuhagwo tũrumbeeta.

28 Nao andũ oothe magĩthaathaiya Ngai, na makĩmũinĩra, natuo tũrumbeeta tũgĩthiĩ na mbere kũhuuhwo, o nginya hĩndĩ ĩrĩa igongoona rĩu rĩa njino rĩarĩĩkirie kũrutwo.

29 Thuutha wa ũguo, mũthamaki Hezekia na andũ oothe magĩturia maru magĩthaathaiya Ngai.

30 Naake Hezekia na atongoria a bũrũri magĩatha Alawii mainĩre MWATHANI nyĩmbo iria ciatungĩĩtwo nĩ mũthamaki Daudi na iria ciatungĩĩtwo nĩ mũnabii Asafu. Nao oothe makĩinĩra Ngai marĩ na gĩkeno kĩnene na magĩturia maru magĩthaathaiya Ngai.

31 Hĩndĩ ĩyo Hezekia akĩĩra andũ atĩrĩ, “Rĩu nĩmũthirĩĩtwo nĩ thaahu wothe. Reehereei MWATHANI magongoona ma kũmũcookeria ngaatho.” Nao magĩgĩathĩka, o na amwe aao makĩreehe ya kwĩyendera nyamũ cia kũrutwo magongoona ma njino.

32 Makĩruta ndeegwa mĩrongo mũgwanja, ng’ondu igana, na tũtũrũme magana meerĩ. Nyamũ icio ciothe maarutĩire MWATHANI irĩ magongoona ma njino.

33 Magĩcooka makĩruta ndeegwa magana matandatũ (600) na ng’ondu ngiri ithatũ (3,000). Nyamũ icio nacio maacirutire irĩ magongoona ma kũrĩĩo nĩ andũ.

34 Nao athĩnjĩri Ngai maarĩ anyiinyi mũno a kũruta wĩra wa gũthĩnja nyamũ icio marĩ oiki. Kwoguo magĩteithirĩrio nĩ Alawii o nginya makĩrĩĩkia wĩra ũcio. Wĩra ũcio ũkĩrĩĩka-rĩ, athĩnjĩri Ngai angĩ aingĩ nĩmeethereetie magathirwo nĩ thaahu. (Alawii maarĩ na kĩyo gĩa gũikaraga matarĩ na thaahu gũkĩra athĩnjĩri Ngai.)

35 Na rĩĩrĩ, hamwe na kũruta magongoona macio maingĩ ma njino, athĩnjĩri Ngai nĩ o meehokeirwo wĩra wa gũcina maguta marĩa maarutagwo kuuma nyamũ cia magongoona ma thaayũ. Ningĩ no o meehokeirwo wĩra wa kũminjaminja ndibei ĩrĩa yarutanagĩrio na magongoona ma njino.

Ũguo nĩguo ũhoro wa gũthaathaiya MWATHANI Hekaarũinĩ warurumũkirio rĩngĩ.

36 Naake mũthamaki Hezekia na andũ aake oothe magĩkũngũiya makeneete nĩ ũndũ wa ũrĩa Ngai aamateithirie kũrĩĩkia maũndũ macio na ihenya.