Category: 1 Samũeli

Gũtaarĩria

Ibuku rĩa Mbere rĩa Samũeli rĩheanĩĩte ũhoro wa ũrĩa andũ a Isiraeli maatigire gũtongoragio nĩ Atiirĩrĩri Bũrũri, makĩambĩrĩria gũtongoragio nĩ athamaki. Andũ arĩa mahuutanĩĩtie mũno na ũhoro ũcio nĩ: Samũeli, ũrĩa warĩ wa mũthia thĩinĩ wa Atiirĩrĩri Bũrũri arĩa maarĩ igweta; Saũlũ ũrĩa warĩ mũthamaki wa mbere wa bũrũri wa Isiraeli, na Daudi ũrĩa ũhoro wa mũtũũrĩre wake ataanatuĩka mũthamaki, ũnyiitithanĩĩtio na wa Samũeli na wa Saũlũ.

Muorooto wa ibuku rĩĩrĩ, o ta wa mabuku marĩa mangĩ ma hisitoria ma Kĩrĩĩkanĩro Kĩrĩa Gĩkũrũ, nĩ atĩ, kwĩhoka Ngai kũreehage ũhootani, nakuo kũmũremera kũreehage mũtino. Ũhoro ũyũ nĩmũgwete wega ndũmĩrĩriinĩ ya Mwathani kũrĩ mũthĩnjĩri Ngai Eli gĩcigoinĩ gĩa 1 Samũeli 2.30: “Ndĩrĩtĩĩaga arĩa mandĩĩaga, nao arĩa manyararĩĩte ndĩrĩmoonaga ta matarĩ kĩene.”

Ibuku rĩĩrĩ nĩrĩonanĩĩtie meciiria marĩ na ũtiganu makoniĩ ũhoro wa andũ a Isiraeli kũgĩa na mũthamaki wa kũmathamakagĩra. Ũhoro wa ma nĩ atĩ, Mwathani we mwene nĩ we warĩ mũthamaki wa Isiraeli, no rĩĩrĩ, nĩguo ahingĩrie andũ a Isiraeli ihooya rĩrĩa maamũhoeete, nĩamathuurĩire mũthamaki. O na kũrĩ ũguo-rĩ, mũthamaki we mwene na andũ a Isiraeli oothe maikaraga marĩ rungu rwa ũnene na matua ma Ngai (1 Sam 2.7-10). Kũrĩ ũguo-rĩ, andũ oothe itonga na athĩĩni gũtirĩ ũngĩahinyĩrĩire ũrĩa ũngĩ, nĩ ũndũ oothe maarĩ rungu rwa watho wa Ngai.

Maũndũ marĩa marĩ ibukuinĩ rĩĩrĩ

Samũeli e mũtiirĩrĩri bũrũri wa Isiraeli 1.1–7.17

Saũlũ gũtuĩka mũthamaki 8.1–10.27

Mĩaka ya mbere ya ũthamaki wa Saũlũ 11.1–15.35

Mũikaranĩrie wa Daudi na Saũlũ 16.1–30.31

Saũlũ na aariũ aake gũkua 31.1-13

Elikana na andũ a mũciĩ wake marĩ Shilo

1 Hĩndĩ ĩmwe tene mũno nĩkwarĩ mũthuuri ũmwe wetagwo Elikana, warĩ wa mũhĩrĩga wa Efiraimu, watũũraga itũũrainĩ rĩa Rama bũrũriinĩ ũrĩa ũrĩ irĩma wa Efiraimu. Aarĩ mũũriũ wa Jerohamu na mũcũkũrũ wa Elihu, wa nyũmba ya Tohu, ĩrĩa yarĩ rũhonge rũmwe rwa mbarĩ ya Zufu.

2 Elikana aarĩ na atumia eerĩ, Hana na Penina. Penina nĩarĩ na ciana, no Hana ndarĩ.

3 Mwaka o mwaka Elikana nĩoimaga Rama akaambata Shilo gũthaathaiya na kũrutĩra MWATHANI Mwene Hinya Wothe magongoona. Nao aariũ a Eli eerĩ, Hofini na Finehasi, nĩ o maarĩ athĩnjĩri Ngai a MWATHANI kuo.

4 Hĩndĩ ĩrĩa yothe Elikana aruta igongoona, nĩaheaga Penina na ciana ciake o mũndũ rũĩga rwake.

5 No rĩĩrĩ, o na gũtuĩka Elikana nĩendeete Hana mũno, aamũheaga rũĩga o rũmwe tu, nĩ gũkorwo MWATHANI nĩamũhingĩĩte gũciara.

6 Na rĩĩrĩ, mũiruwe Penina nĩamũthirĩkagia na akamũiguithia ruwo ngoro, tondũ MWATHANI nĩamũhingĩĩte gũciara.

7 Ũndũ ũyũ wekĩkaga mwaka o mwaka; rĩrĩa rĩothe mathiĩ nyũmbainĩ ya MWATHANI, Penina nĩathirĩkagia Hana mũno, o nginya akarĩra na akaremwo nĩkũrĩa.

8 Mũthuuriwe Elikana agakĩmũũragia atĩrĩ, “Hana, ũrarĩrio nĩ kĩĩ? Ũrarega kũrĩa nĩkĩ? Ũikaraga wĩ na kĩeha ũguo nĩkĩ? Githĩ ndirĩ bata harĩ we gũkĩra aariũ ikũmi?”

Hana na Eli

9-10 Mũthenya ũmwe, marĩĩkia kũrĩa irio ciao marĩ nyũmbainĩ ya MWATHANI kũu Shilo, Hana akĩrũũgama. Nĩatangĩkĩĩte mũno ngoro, na akĩrĩra e na ruwo rũnene mũno rĩrĩa aahooyaga MWATHANI. Hĩndĩ ĩyo, Eli mũthĩnjĩri Ngai aikarĩire gĩtĩ gĩake hakuhĩ na mũrango wa Hekaarũ ya MWATHANI.

11 Hana akĩĩhĩta mwĩhĩtwa akiuga atĩrĩ, “MWATHANI Mwene Hinya Wothe, ndora niĩ ndungata yaku! Ona thĩĩna wakwa ũndirikane! Ndũkariganĩrwo nĩ niĩ! Ũngĩkaahe kahĩĩ-rĩ, niĩ na niĩ nĩndakwĩrĩra atĩ nĩngaakwamũrĩra kahĩĩ kau matukũ moothe ma muoyo wako, na gatikeenjwo njuĩrĩo na rĩ.”

12 Hana agĩkĩrũmanĩrĩria kũhooya MWATHANI, naake Eli no eeroragĩra iromo ciake.

13 Na rĩĩrĩ, Hana aahooyaga na ngoro, nacio iromo ciake nĩcioyoyaga, no mũgambo wake ndwaiguagwo. Kwoguo Eli agĩciiria nĩkũrĩĩo aarĩĩtwo,

14 agĩkĩmwĩra atĩrĩ, “Tigana na ũrĩĩu ũcio waku! Rĩũkwo!”

15 No Hana akĩmũcookeria atĩrĩ, “Mũthuuri ũyũ, ndirĩ mũrĩĩu. Ti kũnyua nyuĩte! Nĩgũtangĩka ndangĩkĩĩte mũno ngoro, na nĩkũhooya ngũhooyaga ngĩmenyithagia MWATHANI mathĩĩna maakwa.

16 Ndũkaae gwĩciiria ndĩ mũtumia ũtarĩ kĩene; ngũhooyaga ũguo tondũ ndĩmũtangĩku mũno.”

17 Eli agĩkĩmũcookeria atĩrĩ, “Thiĩ na thaayũ; Ngai wa Isiraeli arokũhe kĩrĩa wamũhooya.”

18 Naake Hana akĩmũcookeria atĩrĩ, “Reke niĩ ndungata yaku, njĩtĩkĩrĩke nĩ we.” Agĩgĩĩthiĩra, akĩrĩa irio, na ndacookire kũigua kĩeha rĩngĩ.

Gũciarwo na kwamũrwo gwa Samũeli

19 Mũthenya ũyũ ũngĩ rũũciinĩ tene, Elikana na andũ aake magĩũkĩra, na thuutha wa gũthaathaiya MWATHANI makĩinũka kwao mũciĩ Rama. Elikana agĩkoma na Hana mũtumia wake, na MWATHANI akĩmũcookeria mahooya maake.

20 Agĩkĩgĩa nda agĩciara kaana ga kahĩĩ, agĩgatua Samũeli,agĩkiuga atĩrĩ, “Nĩ gũkorwo nĩkũhooya ndakahoire kũrĩ MWATHANI.”

21 Mahinda nĩmaagĩkinyire o rĩngĩ ma Elikana na mũciĩ wake gũthiĩ Shilo akarutĩre MWATHANI igongoona rĩa mwaka o mwaka, o na akahingie igongoona rĩa mwanya rĩrĩa eeranĩire.

22 Hingo ĩyo Hana ndaigana gũthiĩ. Eerire mũthuuriwe atĩrĩ, “Mwana atiga kuonga-rĩ, nĩguo ngaamũtwara nyũmbainĩ ya MWATHANI kũrĩa agatũũra matukũ ma muoyo wake wothe.”

23 Elikana akĩmũcookeria atĩrĩ, “Nĩ wega; ĩka o ta ũrĩa ũkuona kwagĩrĩire. Ikara gũũkũ mũciĩ o nginyagia rĩrĩa ũkaamũtigithia kuonga. MWATHANI arotũma kĩrĩĩkanĩro gĩaku naake kĩhinge.” Kwoguo Hana agĩgĩikara mũciĩ akĩrera mwana wake.

24 Arĩĩkia kũmũtigithia kuonga, akĩmũtwara Shilo, na agĩthiĩ na ndeegwa ya mĩaka ĩtatũ,na kiro ikũmi cia mũtu, na mondo ĩmwe ya rũũa ĩiyũrĩĩte ndibei. Agĩgĩtwara Samũeli, arĩ o mũniini, nyũmbainĩ ya MWATHANI o kũu Shilo.

25 Marĩĩkia gũthĩnja ndeegwa ĩyo, magĩtwarĩra Eli mwana ũcio.

26 Hana akĩmwĩra atĩrĩ, “Mũthuuri ũyũ, tanjĩtĩkĩria. No ũndirikane? Nĩ niĩ mũtumia ũrĩa warũũgamĩĩte haaha akĩhooya MWATHANI.

27 Ndamũhooire mwana ũyũ, naake akĩĩhe.

28 Nĩ ũndũ ũcio, nĩndamwamũrĩra MWATHANI. Hĩndĩ ĩrĩa yothe egũtũũra muoyo-rĩ, egũtũũra e wa MWATHANI.”

Magĩgĩthaathaĩria MWATHANI kũu.

Ihooya rĩa Hana

1 Hana akĩhooya atĩrĩ,

“MWATHANI nĩacanjamũrĩĩte ngoro yakwa;

ndĩ mũkenu mũno nĩ ũndũ wa ũguo eekĩĩte!

Nĩgũthekerera ndĩrathekerera thũ ciakwa;

ndĩ mũcanjamũku mũno nĩ ũndũ wa ũrĩa MWATHANI andeithĩĩtie!”

2 “Gũtirĩ ũngĩ mũtheru ta MWATHANI,

gũtirĩ ũngĩ ũhaana taake;

gũtirĩ ũgitanagĩra ta Ngai witũ.”

3 Tigaai mwĩtĩĩo ũcio wanyu;

mũtikaarie ciugo cia mwĩgaatho.

Tondũ MWATHANI nĩ Ngai ũũĩ maũndũ;

nĩ we ũcũũranagia ũrĩa andũ meekaga.

4 Moota ma thigari irĩ hinya nĩmoinĩkangu,

no arĩa ahinyaru no kũgĩa maraagĩa na hinya.

5 Arĩa maarĩ ahũũnu-rĩ,

rĩu nĩmathiĩte kũrĩmia nĩguo moone gĩa kũrĩa,

no arĩa ahũũtu matigaacooka kũhũũta rĩngĩ.

Mũtumia ũrĩa thaata nĩaciarĩĩte ciana mũgwanja,

naake ũrĩa wĩ na ciana nyingĩ atigĩĩtwo atarĩ.

6 MWATHANI nĩ we ũũraganaga,

na agacookia muoyo.

Nĩ we ũikũrũkagia andũ kwa arĩa akuũ,

na agacooka akamaruta kuo.

7 Nĩ we ũtuaga andũ amwe athĩĩni na arĩa angĩ itonga;

akanyiihia amwe na arĩa angĩ akamatũũgĩria.

8 Ooyaga mũthĩĩni na igũrũ akamũruta rũkũngũinĩ,

akooya mwagi na igũrũ akamũruta kĩarainĩ kĩa mahuti.

Akamatua athiriti a anene

na akamaikarĩria itĩ cia ũnene.

Itina ciothe cia thĩ nĩ cia MWATHANI;

aakĩĩte thĩ igũrũ wacio.

9 “Agitagĩra mĩoyo ya arĩa mamwĩhokeete,

no arĩa aaganu makoorĩra ndumainĩ;

mũndũ ndahootanaga na hinya wake mwene.

10 Thũ cia MWATHANI nĩikaaniinwo;

agaacirurumĩria marurumĩ arĩ matuinĩ.

MWATHANI nĩagaaciirithia thĩ yothe;

nĩakaahe mũthamaki wake hinya,

atũũgĩrie ũrĩa athuurĩĩte akamũitĩrĩria maguta.”

11 Naake Elikana akĩinũka gwake mũciĩ Rama, no kahĩĩ kau ti Samũeli gagĩtigwo kũu Shilo, gatungatagĩre MWATHANI gakĩonagĩrĩrio nĩ Eli mũthĩnjĩri Ngai.

Aariũ a Eli

12-13 Aariũ a Eli maarĩ aaganu mũno, na matiathĩkagĩra MWATHANI. Rĩrĩa mũndũ ekũruta igongoona-rĩ, aariũ acio a Eli maamenyereete gũtũma ndungata na hũũma. O nyama ikĩrugagwo, ndungata ĩyo

14 ĩgaikia hũũma nyũngũinĩ, na nyama o yothe ĩrĩrutwo na hũũma ĩyo yatuĩkaga ya athĩnjĩri Ngai acio. Ũguo nĩguo meekaga Aisiraeli oothe arĩa mookaga kũu Shilo.

15 Ningĩ-rĩ, o na maguta mataanarutwo na gũcinwo, ndungata ya mũthĩnjĩri Ngai yokaga ĩkeera ũrĩa ũraruta igongoona atĩrĩ, “Nengera nyama ya mũthĩnjĩri Ngai akeehĩĩhĩrie; ndangĩtĩkĩra kwamũkĩra nyama ya ndugo kuuma kũrĩ we, tiga o ĩ njĩthĩ.”

16 Mũndũ ũcio angĩacookirie atĩrĩ, “Reke twĩke o ta ũrĩa kwagĩrĩire, twambe tũcine maguta, ũcooke woe kĩrĩa ũkwenda.” Ndungata ya mũthĩnjĩri Ngai yacookagia atĩrĩ, “Aaca! Nengera o ro rĩu! Kwaga ũguo, ngũmĩoya na hinya!”

17 Wĩhia ũcio wa aariũ a Eli warĩ mũũru mũno maithoinĩ ma MWATHANI, nĩ gũkorwo nĩmaanyararithirie mũno ũhoro wa kũrutagĩra MWATHANI magongoona.

Samũeli arĩ Shilo

18 No rĩĩrĩ, kamwana kau ti Samũeli gaatungataga MWATHANI kehotoreete aburoni ya gataani yamũrĩirwo wĩra ũcio kĩũmbe.

19 Mwaka o mwaka nyina nĩamũtumagĩra nguo ndaaya akamũtwarĩra hĩndĩ ĩrĩa maambatanagia na mũthuuriwe, makarute igongoona rĩa mwaka o mwaka.

20 Naake Eli nĩaraathimaga Elikana na mũtumia wake, agakĩĩra Elikana atĩrĩ, “MWATHANI arokũhe ciana ingĩ na mũtumia ũyũ ciagũcooka ithenya rĩa mwana ũyũ mwamwamũrĩire.” Thuutha wa ũguo makainũka mũciĩ.

21 Naake MWATHANI akĩraathima Hana, agĩciara aariũ angĩ atatũ na airĩĩtu eerĩ. Nako kamwana kau ti Samũeli gagĩkũrĩra ũtungatiinĩ wa MWATHANI.

Eli na aariũ aake

22 Na rĩĩrĩ, hĩndĩ ĩyo Eli aarĩ mũkũrũ mũno, na nĩaiguaga maũndũ moothe marĩa aariũ aake meekaga Aisiraeli oothe, o na akamenya atĩ nĩmakomaga na andũ anja arĩa maarutaga wĩra mũromoinĩ wa Hema ya gũtũnganwo.

23 Kwoguo akĩmooria atĩrĩ, “Mwĩkaga maũndũ ta macio nĩkĩ? Andũ oothe nĩmaamenyithagia maũũru marĩa mwĩkaga.

24 Tiganaai na mĩtugo ĩyo, aariũ aakwa! Macio nĩ maũndũ mooru mũno andũ a MWATHANI maraaria igũrũ rĩanyu!

25 Mũndũ angĩhĩtĩria mũndũ ũrĩa ũngĩ-rĩ, Ngai no amũciirithie, no nũũ ũngĩthaithanĩrĩra mũndũ ũrĩa ũhĩtĩirie MWATHANI?” No o matiigana kũigua ithe wao, tondũ MWATHANI nĩatuĩte kũmooraga.

26 Nako kamwana kau ti Samũeli gagĩkĩrĩrĩria gũkũra, gakĩendagwo nĩ MWATHANI o na andũ.

Andũ a mũciĩ wa Eli kũrathĩrwo maũndũ mooru

27 Na rĩĩrĩ, mũnabii ũmwe nĩareeheire Eli ndũmĩrĩri ĩno kuuma kũrĩ MWATHANI: “Hĩndĩ ĩrĩa thooguo Harũni na mũciĩ wake maarĩ ngombo cia mũthamaki wa Misiri, nĩndeguũrĩirie Harũni.

28 Mĩhĩrĩgainĩ yothe ya Isiraeli nĩndathuurire andũ a mũciĩ wake matuĩke athĩnjĩri Ngai aakwa, matungatage kĩgongoonainĩ gĩakwa, macinagĩre ũbaani ho, na mehumbage ebodimakĩĩhooya kĩrĩra. Na niĩ ngĩmeetĩkĩria meigagĩre gĩcunjĩ kĩmwe kĩa magongoona marĩa macinagĩrwo kĩgongoonainĩ.

29 Rĩu-rĩ, nĩ kĩĩ gĩtũmĩĩte mũkorokere magongoona na maruta marĩa njathĩĩte andũ aakwa mandutagĩre? Nĩ kĩĩ gĩtũmĩĩte ũtũũgĩrie aariũ aaku kũngĩra, ũgakĩmeetĩkĩria menorie na icunjĩ iria njega cia magongoona marĩa andũ aakwa mandutagĩra?

30 Niĩ, MWATHANI Ngai wa Isiraeli, nĩndeerĩire mũciĩ waku na mbarĩ yanyu atĩ mũgũtũũra mũndungatagĩra ta athĩnjĩri Ngai tene na tene. Rĩu nĩndarega ũndũ ũcio! Nĩ ũndũ-rĩ, ndĩrĩtĩĩaga arĩa mandĩĩaga, nao arĩa manyararĩĩte, ndĩrĩmoonaga ta matarĩ kĩene.

31 Tathikĩrĩria, mahinda nĩmarooka rĩrĩa ndĩrĩũraga aariũ oothe a mũciĩ waku o na a mbarĩ yanyu, nĩguo gũtikaanagĩe mũndũ o na ũmwe wa mũciĩ waku ũgaatũũra nginya ũkũrũinĩ.

32 “Nawe nĩũrĩona thĩĩna o na ũigue ũiru nĩ ũndũ wa iraathimo iria ndĩrĩraathima andũ arĩa angĩ a Isiraeli nacio, no gũtirĩ mũndũ o na ũmwe wa mũciĩ waku ũgaatũũra nginyagia ũkũrũinĩ.

33 No nĩngũtũũria mũndũ ũmwe wa njiarwa ciaku muoyo, na nĩakandungatĩra ta mũthĩnjĩri Ngai. No rĩĩrĩ, nĩagaatuĩka gĩtumuumu, na akue ngoro o biũ,na njiarwa ciaku icio ingĩ igaakua gĩkuũ kĩa ruwo.

34 Rĩrĩa aariũ aaku eerĩ Hofini na Finehasi magaakua mũthenya o ro ũmwe, ũndũ ũcio ũgaatuĩka kĩmenyithia harĩ wee atĩ maũndũ marĩa moothe njugĩĩte nĩmakaahinga.

35 Nĩngaathuura mũthĩnjĩri Ngai ũrĩa ũgaakorwo arĩ mwĩhokeku harĩ niĩ, na ũgeekaga ũrĩa wothe ngaamwathaga. Nĩngaamũhe njiarwa, iria igaatungataga hingo ciothe mbere ya mũthamaki ũrĩa thuurĩĩte ngaitĩrĩria maguta.

36 Na rĩĩrĩ, mũndũ o wothe wa njiarwa ciaku ũrĩa ũgaatigara agaathiaga kũrĩ mũthĩnjĩri Ngai ũcio akamũhooya mbeeca na irio, na akamũthaitha eetĩkĩrio ateithĩrĩrie athĩnjĩri Ngai nĩguo oone gĩa kũrĩa.”

MWATHANI gwĩta Samũeli

1 Matukũinĩ macio, rĩrĩa kamwana kau ti Samũeli gaatungatagĩra MWATHANI gakĩonagĩrĩrio nĩ Eli, gũtiakoragwo kũrĩ na ndũmĩrĩri na cioneki nyingĩ kuuma kũrĩ MWATHANI.

2 Na rĩĩrĩ, ũtukũ ũmwe Eli, ũrĩa ihinda rĩu maitho maake maarĩ hakuhĩ kũũra, aakomeete harĩa aakomaga.

3 Naake Samũeli aakomeete Hekaarũinĩ thĩinĩ, kũrĩa Ithandũkũ rĩa Kĩrĩĩkanĩro rĩaigĩĩtwo. Gũtaanakĩa o taawa ũgĩakanaga-rĩ,

4 MWATHANI agĩĩtana atĩrĩ, “ Samũeli! Samũeli!” Naake agĩcookia atĩrĩ, “Ĩ niĩ ũyũ haaha!”

5 Agĩgĩteng’era kwĩ Eli akiuga atĩrĩ, “ Ĩ niĩ ũyũ haaha. Nĩndooka tondũ nĩwanjĩta.”

No Eli akĩmũcookeria atĩrĩ, “Ndinagwĩta; thiĩ ũgakome.” Kwoguo Samũeli agĩcooka toro.

6-7 MWATHANI agĩĩta Samũeli rĩngĩ. Kamwana kau gatiigana kũmenya atĩ nĩ MWATHANI wageetaga, tondũ MWATHANI ndakaarĩirie rĩngĩ mbere ĩyo. Kwoguo gagĩgĩũkira, gagĩthiĩ kwĩ Eli, gakĩmwĩra atĩrĩ, “Ĩ niĩ ũyũ haaha. Nĩndooka tondũ nĩwanjĩta.”

No Eli agĩgacookeria atĩrĩ, “Mũũriũ, ndinagwĩta; cooka toro.”

8 MWATHANI agĩĩta Samũeli riita rĩa gatatũ. Naake agĩũkĩra, agĩthiĩ kwĩ Eli, akiuga atĩrĩ, “Ĩ niĩ ũyũ haaha. Nĩndooka tondũ nĩwanjĩta.”

Hĩndĩ ĩyo Eli agĩkĩmenya atĩ nĩ MWATHANI wetaga kamwana kau.

9 Kwoguo agĩkeera atĩrĩ, “Cooka toro, na agwĩta rĩngĩ, uga atĩrĩ, ‘Aria MWATHANI, ndungata yaku nĩthikĩrĩirie.’ ” Samũeli agĩgĩcooka toro.

10 MWATHANI agĩthiĩ akĩrũũgama hau, agĩĩtana atĩrĩ, “Samũeli! Samũeli!”

Samũeli agĩcookia atĩrĩ, “Aria, ndungata yaku nĩthikĩrĩirie.”

11 MWATHANI agĩkĩmwĩra atĩrĩ, “Nĩngwĩka ũndũ thĩinĩ wa Isiraeli, na mũndũ o wothe ũkaũigua nĩakaamakio nĩguo.

12 Mũthenya ũcio-rĩ, nĩguo ngaahingĩria mũciĩ wa Eli maũndũ moothe marĩa njarĩĩtie, kuuma kĩambĩrĩria nginya kĩrĩĩkĩrĩro.

13 “Nĩ gũkorwo nĩndĩmwĩrĩĩte atĩ nĩngũtũũra herithagia mũciĩ wake tene na tene, tondũ aariũ aake nĩmanjagĩire gĩtĩĩo. Eli nĩamenyaga atĩ nĩmeekaga ũguo, no ndaigana kũmakaania.

14 Nĩ ũndũ ũcio, nĩndĩhĩtĩire mũciĩ wa Eli ngoiga atĩ, gũtirĩ igongoona kana kĩheeo kĩngĩhota kweheria ituĩro rĩa wĩhia ũcio.”

15 Samũeli agĩgĩikara gĩtandainĩ nginya o rũũciinĩ. Agĩcooka agĩũkĩra, akĩhingũra mĩrango ya nyũmba ya MWATHANI. Naake agĩĩtigĩra kũmenyithia Eli kĩoneki kĩu.

16 No Eli akĩmwĩta atĩrĩ, “Samũeli, mũrũ wakwa!” Samũeli agĩĩtĩka atĩrĩ, “Ĩ niĩ ũyũ haaha.”

17 Eli akĩmũũria atĩrĩ, “MWATHANI-rĩ, arakwĩrire atĩa? Ndũkaahithe ũndũ o na ũmwe. Ngai nĩegũkũherithia mũno waga kũũnjĩĩra ũrĩa wothe aroigire!”

18 Kwoguo Samũeli agĩkĩmwĩra maũndũ moothe; ndamũhithire ũndũ o na ũmwe. Eli agĩkiuga atĩrĩ, “Nĩ we MWATHANI; reke eeke ũrĩa ekuona ũmwagĩrĩire.”

19 Samũeli agĩgĩkũra, naake MWATHANI aarĩ hamwe naake, na agĩtũma maũndũ marĩa moothe Samũeli oigaga mahinge.

20 Kwoguo andũ oothe bũrũriinĩ wothe wa Isiraeli,magĩkĩmenya atĩ ti itherũ Samũeli nĩatuĩkĩĩte mũnabii wa MWATHANI.

21 MWATHANI akĩrũmanĩrĩria kwĩyonithania kũu Shilo, kũrĩa oimĩrĩire Samũeli na akĩmwarĩria. Rĩrĩa rĩothe Samũeli aangĩaririe, Aisiraeli oothe nĩmaamũthikagĩrĩria.

Ithandũkũ rĩa Kĩrĩĩkanĩro gũtahwo

1 Na rĩĩrĩ, matukũinĩ macio Afilisiti makĩũngana makarũe na Aisiraeli, kwoguo Aisiraeli magĩkiumagara makarũe nao. Aisiraeli magĩaka kambĩ yao Ebenezeri, nao Afilisiti magĩaka yao Afeku.

2 Afilisiti magĩtharĩkĩra Aisiraeli, makĩmahũũra mũno, o nginya makĩmatooria, na makĩũragĩra arũme ta ngiri inya (4,000) kũu marũagĩra kĩhaaroinĩ kĩa mbaara.

3 Na rĩĩrĩ, rĩrĩa arĩa maatigarire macookire kambĩinĩ, atongoria a Aisiraeli makiuga atĩrĩ, “Nĩ kĩĩ gĩatũma MWATHANI eetĩkĩrie Afilisiti matũhoote ũũmũũthĩ? Rekeei tũgĩĩre Ithandũkũ rĩa Kĩrĩĩkanĩro kĩa MWATHANI kuuma Shilo, nĩguo MWATHANIatwarane na ithuĩ atũhonokie kuuma kũrĩ thũ ciitũ.”

4 Kwoguo magĩtũma andũ Shilo, makĩreehe Ithandũkũ rĩa Kĩrĩĩkanĩro kĩa MWATHANI Ngai Mwene Hinya Wothe ũrĩa ũikaraga gatagatĩ ga ciũmbe iria irĩ mathagu. Nao aariũ eerĩ a Eli, Hofini na Finehasi magĩũkania na Ithandũkũ rĩu rĩa Kĩrĩĩkanĩro.

5 Na rĩĩrĩ, rĩrĩa Ithandũkũ rĩa Kĩrĩĩkanĩro rĩakinyire, Aisiraeli oothe makiugĩrĩria na hinya mũnene mũno makeneete, nginya thĩ ĩkĩinaina.

6 Hĩndĩ ĩrĩa Afilisiti maiguire mbugĩrĩrio ĩyo makiuga atĩrĩ, “Tathikĩrĩriai mbugĩrĩrio ĩyo ĩrĩ kambĩinĩ ya Ahibirania; nĩyakuuga atĩa hiihi?” Rĩrĩa maamenyire atĩ nĩ Ithandũkũ rĩa Kĩrĩĩkanĩro kĩa MWATHANI rĩakinyĩĩte kambĩinĩ ya Ahibirania-rĩ,

7 makĩigua guoya mũno, makiuga atĩrĩ, “Ngai nĩyũkĩĩte kambĩinĩ yao! Kaĩ rĩu tũrĩ thĩĩnainĩ-ĩ! Nĩ gũkorwo ũndũ ta ũyũ ndũrĩ wekĩka kũrĩ ithuĩ rĩ o rĩ!

8 Nũũ ũngĩgĩtũhonokia kuuma kũrĩ ngai icio i na hinya ũguo? Ngai icio nĩcio cioragire Amisiri werũinĩ!

9 Mwĩyũmĩrĩriei Afilisiti aya! Rũaai ta arũme ki! Kwaga ũguo, tũgũtuĩka ngombo cia Ahibirania, o ta ũrĩa maarĩ ngombo ciitũ. Kwoguo rũaai ta arũme ki!”

10 Afilisiti magĩkĩrũa na hinya ma, o nginya magĩtooria Aisiraeli, nao Aisiraeli makĩũra o mũndũ gwake mĩciĩ. Gũkĩũraganwo mũno, na thigari ngiri mĩrongo ĩtatũ (30,000) cia Isiraeli ikĩũragwo.

11 Narĩo Ithandũkũ rĩa Kĩrĩĩkanĩro kĩa Ngai rĩgĩtahwo, nao Hofini na Finehasi, aariũ arĩa eerĩ a Eli, makĩũragwo.

Eli gũkua

12 Na rĩĩrĩ, mũndũ ũmwe wa mũhĩrĩga wa Benjamini agĩteng’era oimĩĩte mbaarainĩ agĩthiĩ Shilo, agĩkinya kuo mũthenya o ro ũcio. Nĩguo oonanie kĩeha gĩake, nĩatembũrangĩĩte nguo ciake, na akeitĩrĩria tĩĩri mũtwe.

13 Eli agĩkorwo aikarĩire gĩtĩ mũkĩrainĩ wa njĩra acũũthĩrĩirie, tondũ ngoro yake nĩyatangĩkĩĩte mũno nĩ ũndũ wa Ithandũkũ rĩa Kĩrĩĩkanĩro. Naake mũndũ ũcio akĩheana ũhoro kũndũ guothe itũũrainĩ, nao andũ maũigua, magĩkayũrũrũka nĩ guoya.

14 Rĩrĩa Eli aiguire inegene rĩu, akĩũria atĩrĩ, “Inegene rĩrĩ rĩothe, nĩ rĩa kĩĩ?” Naake mũndũ ũcio akĩhiũhahiũha na kũrĩ Eli nĩguo amũmenyithie ũhoro ũcio.

15 (Na rĩĩrĩ, Eli aarĩ na ũkũrũ wa mĩaka mĩrongo kenda na ĩnaana, na nĩorĩĩte maitho).

16 Mũndũ ũcio agĩkĩmwĩra atĩrĩ, “Nĩkũũra ndoora kuuma mbaarainĩ ũũmũũthĩ.” Naake Eli akĩmũũria atĩrĩ, “Kaĩ kwahaana atĩa, mũrũ wakwa?”

17 Naake mũndũ ũcio wareeheete ũhoro agĩcookia atĩrĩ, “Aisiraeli nĩmoorĩire Afilisiti, na andũ aitũ nĩmooragĩĩtwo mũno! Ningĩ-rĩ, aariũ aaku Hofini na Finehasi nĩmooragĩĩtwo, na Ithandũkũ rĩa Kĩrĩĩkanĩro kĩa Ngai nĩrĩtahĩĩtwo!”

18 Rĩrĩa mũndũ ũcio aagwetire Ithandũkũ rĩa Kĩrĩĩkanĩro, Eli agĩturũkana na mwenainĩ wa kĩhingo, oimĩĩte gĩtĩinĩ kĩrĩa aikarĩire. Nayo ngingo yake ĩkiunĩka, agĩkua, nĩ ũndũ aarĩ mũkũrũ mũno na agatunguha. Atongoririe Isiraeli ihinda rĩa mĩaka mĩrongo ĩna.

Mũtumia wa Finehasi gũkua

19 Ningĩ mũtumia wa mũũrũwe Finehasi aarĩ na nda, na ihinda rĩake rĩa kũheeo mwana nĩrĩakuhĩrĩirie. Rĩrĩa aiguire atĩ Ithandũkũ rĩa Kĩrĩĩkanĩro kĩa MWATHANI nĩrĩtahĩĩtwo, na atĩ ithe wa mũthuuriwe, na mũthuuriwe nĩmaakuĩte, akĩnyiitwo nĩ ruwo rwa gũciara o rĩmwe, akĩheeo mwana.

20 Na rĩĩrĩ, rĩrĩa aakuhĩrĩirie gũkua, atumia arĩa maamũciarithagia makĩmwĩra atĩrĩ, “Wĩyũmĩrĩrie! Wĩ na kahĩĩ!” No we ndaigana kũrũmbũiya ũhoro ũcio kana gũcookia ũndũ.

21 Naake agĩtua kaana kau Ikabodu,akiuga atĩrĩ, “Riiri wa Ngai nĩwehereire Isiraeli,” nĩ gũkorwo Ithandũkũ rĩa Kĩrĩĩkanĩro nĩrĩatahĩĩtwo, na ithe wa mũthuuriwe na mũthuuriwe nĩmakuĩte.

22 Agĩkiuga atĩrĩ, “Riiri wa Ngai nĩwehereire Isiraeli, tondũ Ithandũkũ rĩa Kĩrĩĩkanĩro kĩa Ngai nĩrĩtahĩĩtwo.”

Ithandũkũ rĩa Kĩrĩĩkanĩro rĩrĩ kwa Afilisiti

1 Na rĩĩrĩ, Afilisiti marĩĩkia gũtaha Ithandũkũ rĩa Ngai, makĩrĩkuua kuuma Ebenezeri makĩrĩtwara itũũrainĩ rĩao rĩa Ashidodu.

2 Maarĩigire hekaarũinĩ ya ngai yao yetagwo Dagoni, makĩrĩrũũgamia hakuhĩ na ngai ĩyo.

3 Rĩrĩa andũ a Ashidodu maarookire gũũkĩra kĩrooko tene, magĩkora ngai ĩyo yao ĩkomeete na nda mbere ya Ithandũkũ rĩa Kĩrĩĩkanĩro kĩa MWATHANI. Kwoguo makĩmĩoya makĩmĩcookia handũ haayo.

4 Kwarooka gũkĩa, magĩkora ngai ĩyo ĩgwĩte o rĩngĩ mbere ya Ithandũkũ rĩa MWATHANI. Mũtwe wayo na mooko maayo meerĩ moinĩkangĩĩte makagũa hakuhĩ na mũrango; no mwĩrĩ wiki watigarĩĩte.

5 (Ũndũ ũcio nĩguo ũtũmaga athĩnjĩri ngai a Dagoni na arĩa oothe mathaathayagia ngai ĩyo kũu Ashidodu maage gũkinya handũ hau na ikinya, kana gũthiĩra ho nginyagia ũũmũũthĩ).

6 MWATHANI akĩherithia andũ a Ashidodu mũno na akĩmeekĩra guoya. Aamaherithirie hamwe na andũ arĩa maarigainie nao na gũtũma magĩe na mũrimũ wa ngaaĩ.

7 Rĩrĩa moonire ũrĩa gwekĩkaga makiuga atĩrĩ, “Ngai wa Isiraeli nĩgũtũherithia aratũherithia ithuĩ eene o hamwe na Dagoni ngai iitũ. Tũtingĩĩtĩkĩra Ithandũkũ rĩa Kĩrĩĩkanĩro kĩa Ngai wa Isiraeli rĩikare gũũkũ gwitũ rĩngĩ.”

8 Nĩ ũndũ ũcio magĩtũmana anene oothe ataano a Afilisiti meetwo, makĩmooria atĩrĩ, “Tũgwĩka atĩa na Ithandũkũ rĩa Kĩrĩĩkanĩro kĩa Ngai wa Isiraeli?”

Nao magĩcookia atĩrĩ, “Rĩtwareei Gathu.” Kwoguo makĩrĩthaamĩria Gathu itũũra rĩngĩ rĩa Afilisiti.

9 No rĩĩrĩ, rĩarĩĩkia gũkinya kuo, MWATHANI akĩherithia itũũra rĩu o narĩo, agĩtũma andũ aarĩo manyiitwo nĩ guoya mũnene mũno. Aamaherithirie na mũrimũ wa ngaaĩ ũrĩa wanyiitire andũ oothe a itũũra rĩu, eethĩ na akũrũ.

10 Kwoguo magĩgĩthaamĩria Ithandũkũ rĩu rĩa MWATHANI Ekironi, itũũra rĩngĩ rĩa Afilisiti. Rĩrĩa rĩakinyire kuo, andũ a kuo makĩanĩrĩra makiuga atĩrĩ, “Hĩ! Mekũreehe Ithandũkũ rĩa Kĩrĩĩkanĩro kĩa Ngai wa Isiraeli gũũkũ nĩguo matũũragithie ithuothe!”

11 Tondũ ũcio, magĩkĩrekanĩria anene oothe a Afilisiti o rĩngĩ, makiuga atĩrĩ, “Cookiai Ithandũkũ rĩa Kĩrĩĩkanĩro kĩa Ngai wa Isiraeli handũ haarĩo kĩũmbe, nĩguo rĩtigaatũniine ithuĩ eene o hamwe na andũ a mĩciĩ iitũ.” Nĩ gũkorwo nĩkwarĩ na kĩmako kĩnene mũno itũũrainĩ rĩu rĩothe, tondũ Ngai nĩamaherithĩĩtie mũno.

12 O na arĩa mataigana gũkua nĩmaanyiitirwo nĩ mũrimũ wa ngaaĩ, nao magĩkaĩra ngai ciao imateithie.

Ithandũkũ rĩa Kĩrĩĩkanĩro gũcookerio Aisiraeli

1 Thuutha wa Ithandũkũ rĩa Kĩrĩĩkanĩro kĩa MWATHANI gũikara bũrũriinĩ wa Afilisiti mĩeri mũgwanja,

2 Afilisiti magĩĩta athĩnjĩri nga ciao na aragũri makĩmooria atĩrĩ, “Tũgwĩka atĩa na Ithandũkũ rĩa Kĩrĩĩkanĩro kĩa MWATHANI? Tũngĩrĩcookia kũrĩa riumĩĩte-rĩ, tũngĩrĩcookia na kĩ?”

3 Nao magĩcookia atĩrĩ, “Mũngĩcookia Ithandũkũ rĩa Kĩrĩĩkanĩro kĩa Ngai wa Isiraeli, no mũhaka mũmũcookerie hamwe na kĩheeo gĩa kũhoroheria meehia maanyu. Ithandũkũ rĩu rĩtingĩcookio rĩtarĩ na kĩheeo. Ĩyo no yo njĩra ĩrĩa ĩngĩtũma mũhonio, na mũmenye kĩrĩa gĩtũmĩĩte athiĩ na mbere kũmũherithia.”

4 Andũ makĩũria atĩrĩ, “Tũngĩmũtwarĩra kĩheeo gĩa kũhoroheria meehia maitũ kĩhaana atĩa hiihi?”

Nao makĩmacookeria atĩrĩ, “Tũnyamũ tũtaano twa thahabu tũtariĩ ta ngaaĩ icio, na tũmĩhianano tũtaano twa thahabu twa tũbĩa, o ta ũrĩa anene acio a Afilisiti maigana. Nĩ gũkorwo inyuothe o na anene aanyu, mũhũũrĩĩtwo na ihũũra rĩa mũthemba o ro ũmwe.

5 No nginya mũthondeke tũmĩhianano tũu twa ngaaĩ na twa tũbĩa tũu tũranyariira bũrũri wanyu, na no mũhaka mũtĩĩe Ngai wa Isiraeli. Hiihi nĩegũtiga kũmũherithia inyuĩ eene, ngai cianyu, o na bũrũri wanyu.

6 Mũgũkĩũmia ngoro cianyu ta ũrĩa mũthamaki wa Misiri na Amisiri moomirie ngoro ciao nĩkĩ? Tondũ-rĩ, Ngai arĩĩkia kũmaherithia mũno-rĩ, noguo meetĩkĩririe Aisiraeli moime Misiri.

7 Tondũ ũcio thondekaai ngaari njerũ. Mũcooke muoe ng’ombe igĩrĩ itarĩ ciekĩrwo icooki mũcioherere ngaariinĩ ĩyo, natuo tũcaũ twacio mũtũinũkie, mũtũhingĩre kiugũinĩ.

8 Mũcooke muoe Ithandũkũ rĩa Kĩrĩĩkanĩro kĩa MWATHANI mũrĩigĩrĩre igũrũ wa ngaari ĩyo. Natuo tũmĩhianano twa thahabu tũrĩa mũkũmũtwarĩra tũrĩ kĩheeo gĩa kũhoroheria meehia maanyu mũtwĩkĩre gathandũkũinĩ, mũkaige hakuhĩ na Ithandũkũ rĩu. Mwarĩĩkia gwĩka ũguo, mũrekererie ngaari ĩyo ĩĩthiĩre.

9 Mũbaare na kũrĩa ĩgũthiĩ; ĩngĩthiĩ ĩroreete itũũra rĩa Bethi Shemeshi, ũguo nĩkuuga atĩ nĩ Ngai wa Isiraeli ũtũreehithĩirie ũũru ũcio mũnene ũguo. No ingĩaga gwĩka ũguo, nĩtũkaamenya atĩ ti we ũtũreehithĩirie ũũru ũcio; ũndũ ũcio warĩ o mũtino tu.”

10 Nao andũ magĩgĩĩka o ta ũrĩa meerirwo; makĩoya ng’ombe igĩrĩ igũkamwo magĩcioherera ngaariinĩ, natuo tũcaũ twacio magĩtũhingĩra kiugũ.

11 Makĩigĩrĩra Ithandũkũ rĩa Kĩrĩĩkanĩro ngaari igũrũ, hamwe na gathandũkũ karĩa kaarĩ na mĩhianano ya thahabu ya tũbĩa na ngaaĩ.

12 Ng’ombe icio ikĩgwata njĩra iroreete Bethi Shemeshi itegũkerũra na kũngĩ. Ciathiaga ikĩanagia. Nao anene a Afilisiti magĩcirũmĩrĩra nginya mũhakainĩ wa Bethi Shemeshi.

13 Na rĩĩrĩ, andũ a Bethi Shemeshi nĩkũgetha maagethaga ngano gĩtuambainĩ. Rĩrĩa mainamũkire makĩona Ithandũkũ rĩu, magĩkena mũno.

14 Nayo ngaari ĩyo ĩgĩkinya mũgũnda wa mũndũ wetagwo Joshua, waikaraga Bethi Shemeshi, ĩkĩrũũgama hakuhĩ na handũ haarĩ na ihiga inene. Nao andũ arĩa maarĩ ho magĩatũranga mĩtĩ ya ngaari ĩyo, magĩthĩnja ng’ombe icio, makĩrutĩra MWATHANI igongoona rĩa njino.

15 Nao Alawii makĩruta Ithandũkũ rĩa Kĩrĩĩkanĩro kĩa MWATHANI na gathandũkũ karĩa kaarĩ na tũmĩhianano twa thahabu, magĩciigĩrĩra igũrũ wa ihiga rĩu inene. Nao andũ a Bethi Shemeshi makĩrutĩra MWATHANI magongoona ma njino na magongoona mangĩ mũthenya ũcio.

16 Nao anene acio ataano a Afilisiti moona ũguo, magĩcooka Ekironi mũthenya o ro ũcio.

17 Afilisiti maatwarire mĩhianano ĩyo ĩtaano ya ngaaĩ ĩthondekeetwo na thahabu kũrĩ MWATHANI ĩrĩ ta kĩheeo gĩa kũhoroheria meehia maao. O mũhianano warũũgamagĩrĩra o itũũra rĩa matũũra maao marĩa mataano, nĩ mo: Ashidodu, Gaza, Ashikeloni, Gathu, na Ekironi.

18 O natuo tũbĩa twa thahabu tũrĩa maatũmire twaiganaga o ta ũrĩa matũũra marĩa maathagwo nĩ anene acio ataano a Afilisiti maiganaga, marĩa mairigĩirwo na thingo cia hinya o na marĩa mataarĩ mairigĩre. Ihiga rĩu inene, rĩrĩa maigĩrĩire Ithandũkũ rĩa Kĩrĩĩkanĩro kĩa MWATHANI, rĩrĩ o ho mũgũndainĩ wa Joshua kũu Bethi Shemeshi nginyagia ũũmũũthĩ ta ũira wa ũrĩa gwekĩkire.

19 Naake MWATHANI akĩũraga andũ mĩrongo mũgwanjaa Bethi Shemeshi nĩ ũndũ nĩmaarorire thĩinĩ wa Ithandũkũ rĩa Kĩrĩĩkanĩro. Nao andũ makĩrĩra mũno nĩ kĩeha, nĩ ũndũ MWATHANI nĩoragĩĩte andũ aingĩ gatagatĩinĩ kaao.

Ithandũkũ rĩa Kĩrĩĩkanĩro rĩrĩ Kiriathu Jearimu

20 Nĩ ũndũ ũcio, andũ a Bethi Shemeshi magĩkiuga atĩrĩ, “Nũũ ũngĩkĩhota kũrũũgama mbere ya MWATHANI, Ngai ũyũ mũtheru? Tũngĩmũtũma kũrĩ ũ nĩguo atweherere?”

21 Magĩkĩrekia andũ mathiĩ kũrĩ andũ a Kiriathu Jearimu makoige atĩrĩ, “Afilisiti nĩmacookeetie Ithandũkũ rĩa Kĩrĩĩkanĩro kĩa MWATHANI. Ikũrũkaai mũrĩgĩre.”

1 Kwoguo andũ a Kiriathu Jearimu makĩgĩĩra Ithandũkũ rĩa Kĩrĩĩkanĩro kĩa MWATHANI, makĩrĩtwara nyũmbainĩ ya mũndũ wetagwo Abinadabu watũũraga kĩrĩmainĩ igũrũ. Magĩcooka makĩamũra mũũrũwe Eleazaru atuĩke mũmenyereri warĩo.

Samũeli gũtongoria Isiraeli

2 Ithandũkũ rĩu rĩgĩikara Kiriathu Jearimu ihinda iraaya, ta rĩa mĩaka mĩrongo ĩĩrĩ. Ihindainĩ rĩu rĩothe andũ oothe a Isiraeli nĩmaakayagĩra MWATHANI amateithie.

3 Samũeli agĩkĩĩra andũ a Isiraeli atĩrĩ, “Mũngĩkorwo nĩmũkwenda gũcookerera MWATHANI na ngoro yothe, no nginya mweherie ngai ng’eni na mũhianano wa ngai ĩrĩa ĩĩtagwo Ashitorathu. Mwĩyamũrĩreei MWATHANI o biũ, na mũmũthaathayagie o we wiki, naake nĩekũmũhonokia kuuma wathaniinĩ wa Afilisiti.”

4 Kwoguo Aisiraeli magĩkĩeheria mĩhianano yao ya Baali na Ashitorathu, magĩthaathaiya MWATHANI wiki.

5 Ningĩ Samũeli akĩrekanĩria Aisiraeli oothe macemanie Mizipa, akiugaga atĩrĩ, “Nĩngaamũhoera MWATHANI kuo.”

6 Nĩ ũndũ ũcio magĩcemania oothe Mizipa, magĩtaha maaĩ, makĩmaita thĩ marĩ ta igongoona kwĩ MWATHANI, na makĩĩhinga kũrĩa irio mũthenya ũcio wothe. Makiuga atĩrĩ, “Nĩtũhĩtĩirie MWATHANI.” (Kũu Mizipa nĩkuo Samũeli aatuithanagĩria Aisiraeli maciira).

7 Hĩndĩ ĩrĩa Afilisiti maiguire atĩ Aisiraeli nĩmoonganĩĩte Mizipa, anene arĩa ataano a Afilisiti makĩerekera nakuo me na mbũtũ ciao cia ita makamatharĩkĩre. Rĩrĩa Aisiraeli maiguire ũguo, magĩĩtigĩra,

8 makĩĩra Samũeli atĩrĩ, “Thiĩ o na mbere gũtũhoera kũrĩ MWATHANI Ngai witũ nĩguo atũhonokie kuuma kũrĩ Afilisiti.”

9 Samũeli agĩkĩoya kagondu gekuonga, agĩkaruta igongoona rĩa njino kũrĩ MWATHANI karĩ kagima o ũguo. Agĩcooka akĩhoera Aisiraeli, naake MWATHANI agĩcookia ihooya rĩake.

10 Hĩndĩ ĩrĩa Samũeli aarutaga igongoona-rĩ, Afilisiti magĩthengerera Aisiraeli nĩguo mamatharĩkĩre. No rĩĩrĩ, MWATHANI akĩrurumĩria Afilisiti marurumĩ manene mũno kuuma matuinĩ, magĩturuura, nao Aisiraeli makĩmahũũra mũno.

11 Nao Aisiraeli magĩthingata Afilisiti kuuma kũu Mizipa mamahanyũkĩĩtie, makĩmakinyia gũkuhĩ na Bethikari, makĩmooragagĩra njĩrainĩ.

12 Naake Samũeli akĩoya ihiga, akĩrĩhanda gatagatĩ ka Mizipa na Sheni, akiuga atĩrĩ, “O na kinyagia rĩu MWATHANI no atũteithĩĩtie.” Akĩrĩtua “Ihiga rĩa Ũteithio.”

13 Afilisiti magĩgĩtoorio o biũ, na matiacookire gũtoonya rĩngĩ bũrũriinĩ wa Isiraeli. MWATHANI agĩkĩgitĩra Aisiraeli kuuma kũrĩ Afilisiti matukũinĩ moothe marĩa Samũeli aatũũrire muoyo.

14 Namo matũũra moothe marĩa maatahĩĩtwo nĩ Afilisiti, kuuma Ekironi o nginya Gathu, magĩcookerio Isiraeli. Kwoguo andũ a Isiraeli magĩkĩĩnyiitĩra bũrũri wao wothe kuuma kũrĩ Afilisiti, na gũkĩgĩa na thaayũ gatagatĩinĩ ka Aisiraeli na Akanaani.

15 Samũeli aatongoririe Isiraeli matukũ ma muoyo wake wothe.

16 Mwaka o mwaka nĩathiaga Betheli, Giligali na Mizipa, agĩtuithanagia maciira kũu guothe.

17 Nĩacookaga agathiĩ kwao mũciĩ Rama, kũrĩa o nakuo aatuithanagia Aisiraeli maciira. Na rĩĩrĩ, nĩakĩire MWATHANI kĩgongoona kũu Rama.

Andũ kũũria maheeo mũthamaki

1 Rĩrĩa Samũeli aakũrire, agĩtua aariũ aake atuithania a maciira thĩinĩ wa Isiraeli.

2 Mũũrũwe wa irigithaathi eetagwo Joeli, na ũrĩa mũnyiinyi eetagwo Abija. Maarĩ atuithania a maciira Beerisheba.

3 No rĩĩrĩ, matiarũmĩrĩire mĩthiĩre ya ithe wao. Meendaga o gwĩcarĩria ũtonga; kwoguo nĩmaamũkagĩra mahaki na matiatuithanagia maciira na kĩhooto.

4 Hĩndĩ ĩyo atongoria oothe a Isiraeli magĩkĩũngana hamwe, magĩthiĩ gwĩ Samũeli o kũu Rama,

5 makĩmwĩra atĩrĩ, “ Rĩu nĩgũkũra ũrakũra, na aariũ aaku matirarũmĩrĩra mĩthiĩre yaku. Kwoguo gĩtũthuurĩre mũthamaki wa gũtũthamakagĩra, nĩguo tũgĩe na mũthamaki ta ndũũrĩrĩ iria ingĩ.”

6 No rĩĩrĩ, Samũeli ndakenirio nĩ ihooya rĩao rĩa kwenda kũgĩa na mũthamaki, kwoguo akĩhooya MWATHANI.

7 Naake MWATHANI akĩmwĩra atĩrĩ, “Thikĩrĩria maũndũ moothe marĩa andũ marakwĩra. Ti we maregeete, nĩ niĩ maregeete nduĩke mũthamaki wao.

8 Kuuma rĩrĩa ndamarutire Misiri, matũire matiganaga na niĩ, na magatungatagĩra ngai ingĩ, na rĩu maragwĩka o ta ũrĩa matũire manjĩkaga.

9 Kwoguo, mathikĩrĩrie. No rĩĩrĩ, mataare mũno na ũmoonererie ũrĩa mũthamaki ũrĩa ũkaamathamakagĩra akaameekaga.”

10 Samũeli agĩkĩĩra andũ acio mamwĩtagia mũthamaki maũndũ moothe marĩa MWATHANI aamwĩrĩĩte.

11 Akĩmataarĩria atĩrĩ, “Ũũ nĩguo mũthamaki wanyu akaamwĩka; nĩakooya aariũ aanyu atue amwe aao atwari a ngaari ciake cia mbarathi, angĩ thigari ciake cia mbarathi, na angĩ matongoragie ngaari ciake cia ita mateng’ereete.

12 Ningĩ nĩagaatua amwe aao anene a thigari ngiri, angĩ a thigari mĩrongo ĩtaano, angĩ a kũmũrĩmagĩra mĩgũnda na kũmũgethagĩra, na arĩa angĩ a kũmũthondekagĩra indo cia mbaara na cia ngaari ciake cia mbarathi.

13 Nao airĩĩtu aanyu akaamatua a kũmũthondekagĩra maguta marĩa manungaga wega, angĩ a kũmũrugagĩra, na arĩa angĩ a kũmũthondekagĩra mĩgate.

14 Ningĩ nĩakooya mĩgũnda yanyu ĩrĩa mĩega, mĩgũnda ya mĩthabibũ, o na ya mĩtamaiyũ amĩhe njaama ciake.

15 Nĩakooya gĩcunjĩ gĩa ikũmi kĩa irio cianyu na gĩa thabibũ cianyu, akĩheage njaama ciake na ndungata ciake.

16 Nĩakooya ndungata cianyu, ng’ombe cianyu iria njega mũno, na ndigiri cianyu ikamũrutagĩre wĩra.

17 Ningĩ nĩakooya gĩcunjĩ gĩa ikũmi kĩa mahiũ maanyu, na inyuĩ eene nĩmũgaatuĩka ngombo ciake.

18 Rĩrĩa ihinda rĩu rĩgaakinya, nĩmũgaateta nĩ ũndũ wa mũthamaki wanyu ũrĩa inyuene mwethuurĩire, no rĩĩrĩ, MWATHANI ndagaathikĩrĩria mateta maanyu.”

19 No rĩĩrĩ, andũ matiigana gũthikĩrĩria Samũeli. Maamũcookeirie atĩrĩ, “Aaca! Ithuĩ tũkwenda mũthamaki,

20 tũtuĩke ta ndũũrĩrĩ iria ingĩ, nĩ geetha atwathage, atũtongoragie itainĩ, na atũhũũranagĩre mbaarainĩ ciitũ.”

21 Samũeli agĩgĩthikĩrĩria ũrĩa wothe moigire, agĩcooka agĩthiĩ akĩĩra MWATHANI.

22 Naake MWATHANI akĩmũcookeria atĩrĩ, “Ĩka o ta ũguo mekwenda; mahe mũthamaki.” Naake Samũeli akĩĩra andũ oothe a Isiraeli o mũndũ acooke itũũra rĩake.

Saũlũ gũcemania na Samũeli

1 Na rĩĩrĩ, kwarĩ mũndũ ũmwe warĩ gĩtonga, na warĩ igweta wetagwo Kishu wa mũhĩrĩga wa Benjamini. Aarĩ mũrũ wa Abieli na mũcũkũrũ wa Zeroru, wa nyũmba ya Bekorathu, ĩrĩa yarĩ rũhonge rũmwe rwa mbarĩ ya Afia.

2 Naake aarĩ na mũũriũ wetagwo Saũlũ, mwanake warĩ mũthaka mũno. Saũlũ aarĩ mũraaya gũkĩra andũ arĩa angĩ oothe a Isiraeli, na gũtiarĩ mũndũ ũngĩ mũthaka bũrũriinĩ ũcio wothe kũmũkĩra.

3 Na rĩĩrĩ, ndigiri imwe cia Kishu nĩciorire. Kwoguo agĩkĩĩra Saũlũ mũũrũwe atĩrĩ, “Oya ndungata ĩmwe mũthiĩ mũgacarie ndigiri.”

4 Nao magĩtuĩkanĩria bũrũri wothe ũrĩa ũrĩ irĩma wa Efiraimu, na ng’ongo ciothe cia Shalisha, no matiacionire. Ningĩ magĩtuĩkanĩria ng’ongo ciothe cia Shaalimu, no ndigiri itiarĩ kuo. Magĩcooka magĩtuĩkanĩria bũrũri wothe wa Benjamini, o nakuo matiacionire.

5 Rĩrĩa maakinyire rũgongo rwa Zufu, Saũlũ akĩĩra ndungata yake atĩrĩ, “Nĩtũcooke mũciĩ, nĩ geetha baaba ndagatige gwĩciiria ũhoro wa ndigiri, aambĩrĩrie gũtangĩka nĩ ũndũ witũ.”

6 Nayo ndungata ĩyo ĩgĩcookia atĩrĩ, “Taamba ũtige! Itũũrainĩ rĩĩrĩ kũrĩ mũndũ wa Ngai mũtĩĩku, tondũ maũndũ moothe marĩa oigaga nĩmahingaga. Reke tũthiĩ kũrĩ we; hiihi ahota gũtuĩra kũrĩa tũngĩona ndigiri icio.”

7 Saũlũ akĩũria atĩrĩ, “Twathiĩ kũrĩ we-rĩ, tũkũmũtwarĩra kĩ? Hatirĩ na irio itigarĩĩte mondoinĩ ciitũ, na tũtirĩ na kĩndũ gĩa kũhe mũndũ ũcio wa Ngai. Twĩ na kĩo?”

8 Ndungata ĩyo ĩgĩcookia atĩrĩ, “Ndĩ na mbeeca ciigana ũna, na no ndĩmũhe nĩguo atwĩre kũrĩa tũngĩona ndigiri icio.”

9-11 Saũlũ agĩcookia atĩrĩ, “Rĩciiria rĩu nĩ rĩega! Nĩtũgĩthiĩ.” Kwoguo magĩgĩthiĩ itũũrainĩ rĩrĩa mũndũ ũcio mũthingu aatũũraga. Rĩrĩa maambataga itũũrainĩ rĩu, magĩcemania na airĩĩtu maathiaga gũtaha maaĩ, makĩmooria atĩrĩ, “Muoni maũndũ arĩ itũũrainĩ?” (Mahindainĩ macio mũnabii eetagwo muoni maũndũ, na kwoguo rĩrĩa rĩothe mũndũ aangĩendire kũũria Ngai kĩũria, oigaga atĩrĩ, “Reke tũthiĩ kũrĩ muoni maũndũ.”)

12-13 Airĩĩtu acio magĩcookia atĩrĩ, “Ĩĩ, arĩ kuo; o na e hau mbere yanyu. Mũngĩhiũha-rĩ, nĩmũkũmũkinyĩra. Mwatoonya itũũra o ũguo-rĩ, nĩmũkũmwona. Akinyire itũũrainĩ ũũmũũthĩ tondũ andũ nĩmekũrutĩra igongoona handũ harĩa hatũũgĩru ha gũthaathaĩria. Andũ arĩa meetĩĩtwo matingĩambĩrĩria kũrĩa, o nginya rĩrĩa arĩkinya ho, tondũ no mũhaka aambe araathime igongoona rĩu. Mũngĩthiĩ o ro rĩu, nĩmũkũmũkorerera ataanambata kĩrĩmainĩ kũrĩa.”

14 Kwoguo Saũlũ na ndungata yake magĩthiĩ itũũrainĩ, na rĩrĩa matoonyaga thĩinĩ, makĩona Samũeli ookĩĩte na kũrĩ o eerekeire handũ harĩa hatũũgĩru haathaathayagĩrio.

15 Na rĩĩrĩ, mũthenya ũrĩa wahĩtũkĩĩte MWATHANI nĩerĩĩte Samũeli atĩrĩ,

16 “Rũũciũ mathaa ta maya nĩngaakũreehithĩria mũndũ wa kuuma mũhĩrĩga wa Benjamini, nawe nĩũkaamũitĩrĩria maguta atuĩke mũthamaki wa gwathaga andũ aakwa a Isiraeli, na nĩakaamahonokia kuuma kũrĩ Afilisiti. Nĩ gũkorwo nĩnyoneete mathĩĩna ma andũ aakwa na ngaigua makĩngaĩra ndĩmateithie.”

17 Hĩndĩ ĩrĩa Samũeli oonire Saũlũ, MWATHANI akĩmwĩra atĩrĩ, “Ũyũ nĩ we mũndũ ũrĩa ndĩrakwĩraga ũhoro wake! Nĩ we ũgaathamakĩra andũ aakwa.”

18 Naake Saũlũ agĩgĩthiĩ he Samũeli, o hau aarĩ kĩhingoinĩ, akĩmũũria atĩrĩ, “Tanjĩĩra, muoni maũndũ aikaraga kũ?”

19 Samũeli agĩkĩmũcookeria atĩrĩ, “Nĩ niĩ we. Thiĩi mbere yakwa twambate handũ harĩa hatũũgĩru haathaathayagĩrio. Nĩmũkũrĩanĩra na niĩ ũũmũũthĩ. Rũũciũ rũũciinĩ nĩguo ngaamũcookeria ciũria cianyu ciothe njooke ndeke mwĩthiĩre.

20 Naho ha ũhoro wa ndigiri iria ciorire mĩthenya ĩtatũ mĩthiru-rĩ, mũtigacimakĩre; nĩirĩĩkĩĩtie kuoneka. No rĩĩrĩ, nũũ andũ a Isiraeli mabatairio nĩwe makĩria? Nĩ we mwene na nyũmba ya thooguo.”

21 Saũlũ agĩgĩcookia atĩrĩ, “Niĩ ndĩ wa mũhĩrĩga wa Benjamini, mũhĩrĩga ũrĩa mũniini mũno thĩinĩ wa Isiraeli. Ningĩ mbarĩ iitũ nĩyo ĩteekĩrĩirwo mũno mũhĩrĩgainĩ witũ wa Benjamini. Gũkĩrĩ ũguo-rĩ, nĩkĩ gĩgũgĩtũma ũnjarĩrie ndeto ta icio?”

22 Naake Samũeli agĩtoonyia Saũlũ na ndungata yake nyũmba ĩrĩa yarĩagĩrwo akĩmaikaria handũ ha gĩtĩĩo mũno meethainĩ hamwe na andũ arĩa meetĩĩtwo, haarĩ na andũ ta mĩrongo ĩtatũ.

23 Samũeli agĩkĩĩra mũrugi wa irio atĩrĩ, “Reehe rũgai rũrĩa ndĩrakũnengerire ndĩrakwĩra ũrũige handũ mwanya.”

24 Kwoguo mũrugi wa irio agĩkĩreehe nyama ĩyo ya guoko na kĩande akĩmĩiga mbere ya Saũlũ. Samũeli akiuga atĩrĩ, “Ĩno nĩ yo nyama ĩrĩa ũraigĩirwo. Oya ũmĩrĩe. Ndĩrakũigĩire nĩ geetha ũmĩrĩe ihindainĩ rĩĩrĩ hamwe na arĩa njĩtĩĩte.”

Kwoguo Saũlũ agĩkĩrĩanĩra na Samũeli mũthenya ũcio.

25 Rĩrĩa maikũrũkire kuuma handũ harĩa hatũũgĩru haathaathayagĩrio, magĩthiĩ itũũrainĩ, magĩthondekera Saũlũ handũ ha gũkoma igũrũ wa nyũmba,

26 naake agĩgĩkoma ho.

Samũeli gũitĩrĩria Saũlũ maguta atuĩke mũthamaki

Rũũciinĩ tene Samũeli agĩĩta Saũlũ kuuma kũu aarĩ nyũmba igũrũ akĩmwĩra atĩrĩ, “Ũkĩra, nguumagarie.” Saũlũ agĩgĩũkĩra, makiumagara o eerĩ magĩthiĩ njĩrainĩ.

27 Na rĩrĩa maakinyire mũthiainĩ wa itũũra, Samũeli akĩĩra Saũlũ atĩrĩ, “Ĩra ndungata yaku ĩhĩtũke ĩthiage mbere iitũ.” (Nayo ndungata ĩgĩkĩhĩtũka). Naake Samũeli agĩthiĩ na mbere akiuga atĩrĩ, “Amba weterere haniini, na nĩngũkwĩra ũrĩa Ngai oigĩĩte.”