Category: 1 Maũndũ ma Matukũ ma Tene

Daudi gũtuunyana itũũra rĩa Raba

1 Na rĩĩrĩ, kĩambĩrĩria kĩa mwaka, o hĩndĩ ĩrĩa athamaki maamenyereete gũthiaga mbaara, Joabu agĩtongoria mbũtũ ya ita, agĩthiĩ agĩtharĩkĩra bũrũri wa Aamoni. Ningĩ agĩcooka agĩthiũrũrũkĩria itũũra rĩa Raba, akĩrĩtharĩkĩra na akĩrĩananga. No rĩĩrĩ, mũthamaki Daudi aatigĩĩtwo Jerusalemu.

2 Daudi akĩruta kĩraũni gĩa thahabu mũtweinĩ wa Moleku, ngai ya Aamoni, nakĩo kĩarĩ na ũritũ ta wa kiro mĩrongo ĩtatũ na inya. Kĩraũni kĩu kĩarĩ na ihiga rĩa goro thĩinĩ. Daudi akĩoya ihiga rĩu rĩa goro, akĩrĩĩkĩra kĩraũniinĩ gĩake. Agĩcooka agĩtaha indo nyingĩ mũno kuuma itũũrainĩ rĩu.

3 Agĩcooka agĩkuua andũ aakuo, akĩmatua aatũri mbaaũ, aruti wĩra na macembe, na mathanwa. Ũguo noguo Daudi eekire andũ a matũũra moothe ma Aamoni. Thuutha ũcio Daudi na andũ aake magĩcooka Jerusalemu.

Mbaara gatagatĩ ka Aisiraeli na Afilisiti

4 Ningĩ gũgĩcooka gũkĩgĩa mbaara rĩngĩ na Afilisiti kũu Gezeri. Naake Sibekai, ũrĩa woimĩĩte Husha, akĩũraga Sipai, ũmwe wa njiarwa cia imũndũ iria ciarĩ nene, nao Afilisiti magĩkĩhootwo.

5 Ningĩ gũkĩgĩa mbaara na Afilisiti o rĩngĩ, naake Elihanani mũrũ wa Jairũ akĩũraga Lahami, mũrũ wa nyina na Goliathũ wa kuuma Gathu. Mũtĩ wa itimũ wa Lahami warĩ mũtungu o ta rũbaaũ rũrĩa rũkoragwo maciniinĩ ya gũtuma nguo.

6 O rĩngĩ gũkĩgĩa na mbaara ĩngĩ kũu Gathu, nakuo nĩkwarĩ na kĩmũndũ kĩmwe kĩnene mũno kĩarĩ na ciara ithathatũ o guoko, na ciara ithathatũ o kũgũrũ. Ciothe ciarĩ mĩrongo ĩĩrĩ na inya. Kĩarĩ kĩmwe kĩa njiarwa cia imũndũ iria ciarĩ nene.

7 Nakĩo gĩkĩũgita Aisiraeli, naake Jonathani mũrũ wa Shama ũrĩa warĩ mũrũ wa nyina na Daudi, agĩkĩũraga.

8 Imũndũ icio ithatũ ciarĩ njiarwa cia imũndũ iria nene ciatũũraga Gathu, na cioragirwo nĩ Daudi na andũ aake.

Daudi gũtara andũ

1 Na rĩĩrĩ, Caitaani akĩreeherere Aisiraeli mũtino, na ũndũ wa gũtũma Daudi amatare.

2 Kwa ũguo Daudi akĩĩra Joabu na atongoria arĩa angĩ a mbũtũ cia ita atĩrĩ, “Ũkĩraai mũthiĩ bũrũriinĩ wothe wa Isiraeli, kuuma mwena ũmwe wa bũrũri kinya ũrĩa ũngĩ, (ũguo nĩ ta kuuga kuuma Dani kinya Beerisheba) mũgatare andũ. Nĩngwenda kũmenya ũrĩa maigana.”

3 No Joabu agĩcookia atĩrĩ, “MWATHANI arotũma andũ moongerereke, amoongerere maita igana gũkĩra ũrĩa maigana rĩu magĩtarwo! Na rĩu, mwathi wakwa mũthamaki, ũgũkĩenda kũmatara nĩkĩ, na nĩũũĩ wega atĩ oothe nĩ ndungata ciaku? Ũkwenda kũreehere Aisiraeli mũtino nĩkĩ?”

4 No rĩĩrĩ, mũthamaki agĩtũma Joabu aathĩkĩre watho ũcio. Naake Joabu agĩthiĩ bũrũri wothe wa Isiraeli gũtara andũ, na thuutha ũcio agĩcooka Jerusalemu.

5 Naake Joabu agĩkĩhe mũthamaki Daudi ithabu rĩa ũrĩa andũ maiganaga maatarwo. Arĩa mangĩahotire gũthiĩ itainĩ a kuuma Isiraeli maarĩ arũme mirioni ĩmwe na ngiri igana rĩmwe (1,100,000), nao a kuuma Juda maarĩ arũme ngiri magana mana na mĩrongo mũgwanja (470,000).

6 Tondũ, ũndũ ũcio wa gũtarana wa mũthamaki ndwakenagia Joabu, ndaigana gũtara mũhĩrĩga wa Lawi na wa Benjamini.

7 Na rĩĩrĩ, Ngai ndaigana gũkenio nĩ ũndũ ũcio wekĩĩtwo, na kwoguo akĩherithia Aisiraeli.

8 Naake Daudi agĩkĩĩra MWATHANI atĩrĩ, “Nĩnjĩhĩĩtie mũno nĩ ũndũ wa ũguo njĩkĩĩte. MWATHANI, ndagũthaitha ũnjohere. Nĩnjĩkĩĩte ũndũ wa ũkĩĩgu mũno.”

9 Hĩndĩ ĩyo MWATHANI akĩĩra Gadi, mũnabii wa Daudi, atĩrĩ,

10 “Thiĩ wĩre Daudi atĩ, ndĩramũhe maũndũ matatũ ma gũthuura, athuure ũmwe ũrĩa ngũmwĩka.”

11 Nĩ ũndũ ũcio Gadi agĩthiĩ kũrĩ Daudi akĩmwĩra ũrĩa wothe MWATHANI oigĩĩte, akĩmũũria atĩrĩ, “Ũkwenda ũndũ ũrĩkũ?

12 Ng’aragu mĩaka ĩtatũ, mĩeri ĩtatũ ya gũteng’erio nĩ thigari cia thũ ciaku, kana mĩthenya ĩtatũ ya gũtharĩkĩrwo nĩ MWATHANI na rũhiũ rwa njora, gũtũmĩrwo mũthiro bũrũri waku wothe, na gũtũmĩrwo mũraika athiĩ akĩũraganaga bũrũriinĩ wothe wa Isiraeli? Rĩu-rĩ, ngũthiĩ kwĩra MWATHANI atĩa?”

13 Naake Daudi agĩcookeria Gadi atĩrĩ, “Rĩu ndĩ handũ hooru mũno! No rĩĩrĩ, handũ ha kũherithio nĩ andũ, kaba kũherithio nĩ MWATHANI we mwene nĩ ũndũ tha ciake nĩ nyingĩ mũno.”

14 Tondũ ũcio MWATHANI agĩtũma kũgĩe mũthiro kũu bũrũri wa Isiraeli, naguo ũkĩũraga andũ ngiri mĩrongo mũgwanja (70,000).

15 Ningĩ MWATHANI akĩrekia mũraika nĩguo akaniine itũũra rĩa Jerusalemu. No rĩĩrĩ, mũraika ũcio ataaneeka ũguo, Ngai akĩĩĩricũkwo akĩmwĩra atĩrĩ, “Tiga rĩu! Ũguo nĩ mũiganu.” Naake mũraika ũcio aarĩ hakuhĩ na kĩhuuhĩro kĩa ngano kĩa Arauna ũrĩa Mũjebusi.

16 Naake Daudi akĩroria maitho maake na igũrũ, akĩona mũraika arũũgamĩĩte rĩerainĩ, anyiitĩĩte rũhiũ na guoko ehaarĩirie kwananga Jerusalemu. Naake Daudi e hamwe na atongoria a andũ, meehumbĩĩte nguo cia makũnia, makĩĩgũithia maroreetie moothiũ maao na thĩ.

17 Daudi agĩthaitha Ngai akiuga atĩrĩ, “Ũi Ngai, maya moothe nĩ meehia maakwa, tondũ nĩ niĩ ndaathanire andũ matarwo. Rĩu-rĩ andũ aya matarĩ kĩene nĩ atĩa magĩĩkĩĩte? Ndagũthaitha, MWATHANI Ngai wakwa, herithia arĩ niĩ na andũ a nyũmba ya baaba, no ũiguĩre andũ aaku tha.”

18 Naake mũraika wa MWATHANI agĩatha Gadi akeere Daudi, aambate kĩhuuhĩroinĩ kĩa ngano kĩa Arauna agaakĩre MWATHANI kĩgongoona ho.

19 Daudi agĩgĩathĩkĩra uuge wa MWATHANI, akĩambata o ta ũguo Gadi aamwĩrĩĩte.

20 Na rĩĩrĩ, Arauna na aanake aake ana nĩkũhũũra maahũũraga ngano, na rĩrĩa aanake acio moonire mũraika makĩũra makĩhitha.

21 Rĩrĩa Arauna oonire mũthamaki Daudi aamũkuhĩhĩria, akiuma hau kĩhuuhĩroinĩ kĩa ngano, agĩthiĩ na kũrĩ we, akĩinamĩrĩra nĩguo amũhe gĩtĩĩo.

22 Naake Daudi akĩĩra Arauna atĩrĩ, “Nyenderia handũ haaha ũhuuhagĩra ngano, nĩguo njakĩre MWATHANI kĩgongoona ho, nĩ geetha agirĩrĩrie mũthiro ũyũ. Ngũkũrĩha o ũrĩa kwagĩrĩire.”

23 Naake Arauna akĩĩra mũthamaki Daudi atĩrĩ, “Hooe, mwathi wakwa mũthamaki, ĩka naho ũrĩa ũkuona kwagĩrĩire. Ningĩ-rĩ, haaha he na ndeegwa ũngĩruta igongoona rĩa njino, mĩtĩ ĩno tũkũhũũraga ngano nayo no ũmĩtue ngũ, na ngano ĩno ĩ haaha no ũmĩrute ĩrĩ igongoona rĩa mũtu. Indo icio ciothe nĩndakũhe.”

24 No mũthamaki Daudi akĩmũcookeria atĩrĩ, “Aaca, ngũkũrĩha o ũrĩa kwagĩrĩire. Ndingĩĩtĩkĩra o na haniini kũrutĩra MWATHANI igongoona rĩa indo ciaku. Ningĩ ndingĩĩtĩkĩra kũmũrutĩra igongoona itarĩ irĩhi ndutĩire.”

25 Tondũ ũcio agĩkĩgũra handũ hau icunjĩ cia thahabu magana matandatũ.

26 Naake Daudi agĩgĩakĩra MWATHANI kĩgongoona handũ hau, agĩcooka akĩrutĩra ho magongoona ma njino o na ma thaayũ. Arĩĩkia kũhooya, MWATHANI akĩmũcookeria mahooya maake, agĩtũma mwaki kuuma igũrũ, ũgĩcina magongoona macio maarĩ kĩgongoona igũrũ.

27 Naake MWATHANI agĩatha mũraika acookie rũhiũ rwake njora, naake mũraika agĩathĩka.

28 Rĩrĩa Daudi oonire atĩ MWATHANI nĩamũcookeria mahooya maake, akĩrutĩra magongoona kĩgongoonainĩ kĩrĩa aakĩĩte hau kĩhuuhĩroinĩ kĩa Arauna.

29 Na rĩĩrĩ, Hema ya MWATHANI ya gũtũnganwo, o ĩrĩa Musa athondekeire werũinĩ, o na kĩgongoona kĩa igongoona rĩa njino, ciarĩ kũndũ gũtũũgĩru kũrĩa gwathaathayagĩrio itũũrainĩ rĩa Gibeoni.

30 No rĩĩrĩ, Daudi ndangĩetĩkĩrire gũthiĩ gũthaathaĩria Ngai kuo nĩ ũndũ nĩetigagĩra rũhiũ rwa njora rwa mũraika wa MWATHANI.

1 Hĩndĩ ĩyo Daudi agĩkiuga atĩrĩ, “Haaha nĩ ho Hekaarũ ya MWATHANI Ngai ĩgaakwo. Ningĩ kĩgongoonainĩ gĩĩkĩ nĩ ho andũ a Isiraeli makaarutagĩra magongoona ma njino.”

Kũhaarĩria mwako wa Hekaarũ

2 Naake Daudi agĩathana atĩ andũ oothe a ndũũrĩrĩ arĩa maatũũraga bũrũri wa Isiraeli moongane hamwe, na mooka akĩmahe wĩra wa kũruta. Amwe aao akĩmahe wĩra wa gwacũhia mahiga ma gwaka Hekaarũ.

3 Agĩcooka akĩigithia cuuma nyingĩ cia gũthondekwo mĩcumaarĩ ya mĩrango ya ihingo o na irenji cia cuuma cia mĩrango ĩyo. Ningĩ akĩigithia o na cuuma nyingĩ cia gĩcango itaarĩ gĩthimi.

4 O na ikĩigithia mĩgogo mĩtungu mũno ya mĩtarakwa thuutha wa kũreeherwo yo nĩ andũ a Sidoni na Turo.

5 Naake Daudi akiuga atĩrĩ, “Mũrũ wakwa Solomoni nĩ mwĩthĩ o na ndarĩ na ũmenyo wa kũigana. Hekaarũ ĩrĩa agwakĩra MWATHANI no mũhaka ĩtuĩke thaka mũno, na ĩgĩe igweta bũrũriinĩ wothe. Nĩ ũndũ ũcio, no mũhaka haarĩrĩrie mwako wayo wega.” Tondũ ũcio Daudi akĩigithia indo nyingĩ mũno cia kũmĩaka mbere ya atanakua.

6 Hĩndĩ ĩyo agĩgĩĩta Solomoni mũũrũwe akĩmwatha atĩ aakĩre MWATHANI Ngai wa Isiraeli Hekaarũ.

7 Daudi agĩkĩmwĩra atĩrĩ, “Mũrũ wakwa Solomoni, nĩndũũrĩĩte nyendeete mũno gwakĩra MWATHANI Ngai wakwa Hekaarũ ĩĩtanĩĩtio na rĩĩtwa rĩake.

8 No rĩĩrĩ, MWATHANI nĩamenyithirie atĩ ti niĩ njagĩrĩirwo nĩkũmwakĩra Hekaarũ nĩ ũndũ nĩndooragire andũ aingĩ mũno na ngĩrũa mbaara nyingĩ.

9 O na kũhaana ũguo-rĩ, MWATHANI nĩanjĩĩrĩire atĩrĩ, ‘Nĩũkaagĩa na kahĩĩ, nako gagaathanaga na thaayũ, tondũ nĩngaatũma thũ ciako ciage gũgookĩrĩra. Kahĩĩ kau gageetwo Solomoninĩ ũndũ hĩndĩ ya ũthamaki wako nĩngaatũma Isiraeli kũgĩe na thaayũ na ũgitĩri.

10 Kahĩĩ kau nĩko gakaanjakĩra Hekaarũ. Nĩgagaatuĩka mũrũ wakwa, na niĩ nduĩke ithe wako. Ningĩ gĩtĩ gĩako gĩa ũthamaki gĩgaatũũra kĩgaacĩire tene na tene.’ ”

11 Daudi agĩthiĩ na mbere akĩmwĩra atĩrĩ, “Mũũriũ, MWATHANI Ngai waku aroikara hamwe nawe, na arokũhotithia kũmwakĩra Hekaarũ o ta ũrĩa aanjĩĩrĩire.

12 MWATHANI Ngai waku arokũhe ũmenyo na ũũgĩ, nĩ geetha ũkaahota gwathana Isiraeli kũringana na Watho wake.

13 Ningĩ ũngĩgaatũũra wathĩkagĩra mawatho moothe marĩa MWATHANI aaheire Musa nĩ ũndũ wa Aisiraeli nĩũkaagaacagĩra maũndũinĩ maaku moothe. Gĩa hinya na wĩyũmĩrĩrie. Ndũkaamake kana wĩtigĩre.

14 Haakwa mwene-rĩ, nĩndĩhinyanĩrĩirie ngaiga indo cia mwako ũcio, nacio nĩ: tani ngiri ithatũ na magana mana (3,400) cia thahabu na tani ngiri mĩrongo ĩtatũ na inya (34,000) cia betha. Hamwe na icio nĩnjigĩĩte icango na cuuma cia kũigana. Ningĩ nĩnjigithĩĩtie mbaaũ na mahiga, na icio ciothe no mũhaka ũgaaciongerera.

15 Ningĩ wĩ na aruti wĩra aingĩ: acũhia a mahiga, aaki na mahiga, mabundi ma mbaaũ, o na andũ aingĩ oogĩ a kũruta mawĩra ma mĩthemba yothe mahũthĩrĩĩte

16 thahabu, betha, icango, o na cuuma. Nĩ ũndũ ũcio wĩhaarĩrie kwambĩrĩria mwako, naake MWATHANI Ngai aroikara nawe.”

17 Ningĩ Daudi agĩatha atongoria oothe a Isiraeli mateithagie Solomoni, akĩmeera atĩrĩ,

18 “MWATHANI Ngai wanyu nĩakoreetwo hamwe na inyuĩ, o na ningĩ nĩatũmĩĩte mũkorwo mwĩ na thaayũ mĩena yothe. Nĩahotithirie kũhoota andũ arĩa oothe maatũũraga bũrũri ũyũ, na rĩu nĩ ndungata cianyu na cia MWATHANI.

19 Rĩu gĩtũũreei mũtungatagĩra MWATHANI Ngai wanyu na ngoro cianyu o na mĩoyo yanyu. Nĩ ũndũ ũcio kĩambĩrĩriei mwako wa Hekaarũ ya MWATHANI nĩ geetha mũcooke mũtoonyie Ithandũkũ rĩa Kĩrĩĩkanĩro kĩa MWATHANI kuo, o na indo iria ingĩ nyamũre cia gũthaathaiya Ngai nacio.”

1 Naake Daudi akũra mũno, agĩtua Solomoni mũũrũwe mũthamaki wa Isiraeli.

Wĩra wa Alawii

2 Naake agĩcookanĩrĩria atongoria oothe a Isiraeli hamwe, o na athĩnjĩri Ngai na Alawii.

3 Naake Daudi agĩtara Alawii oothe arĩa maarĩ na ũkũrũ wa mĩaka mĩrongo ĩtatũ na makĩria, nao maarĩ ngiri mĩrongo ĩtatũ na inyaanya (38,000).

4 Naake mũthamaki Daudi agĩthuura kuuma kũrĩ acio, Alawii ngiri mĩrongo ĩĩrĩ na inya (24,000) a kũrũũgamagĩrĩra wĩra Hekaarũinĩ ya MWATHANI. Ningĩ Alawii ngiri ithathatũ (6,000) magĩthuurwo matuĩke a kũmenyagĩrĩra rekondi o na gũtuithania maciira.

5 Nao Alawii ngiri inya (4,000) magĩthuurwo matuĩke arangĩri a ihingo. Nao Alawii ngiri inya (4,000) magĩthuurwo matuĩke a kũinagĩra MWATHANI na indo cia nyĩmbo iria mũthamaki aaheanĩĩte cia gũkumagia Ngai nacio.

6 Naake Daudi akĩbanga Alawii acio ikundi ithatũ, o ta ũrĩa mbarĩ ciao ciatariĩ ta ũũ: Mbarĩ ya Gerishoni, Kohathu, na ya Merari.

7 Gerishoni aarĩ ithe wa aariũ eerĩ nao nĩ o: Ladani na Shimei

8 Ladani aarĩ ithe wa aariũ atatũ nao nĩ o: Jehieli, Zethamu, na Joeli.

9 Acio nĩ o maarĩ anene a mĩciĩ ya mbarĩ ya Ladani. Nao aariũ a Shimei maarĩ atatũ, nao nĩ Shelomothu, Hazieli, na Harani.

10-11 Shimei aarĩ ithe wa aariũ ana nao maarũmanĩrĩire ta ũũ: Jahathu, Ziza, Jeushi, na Beria. Jeushi na Beria maatarirwo ta mbarĩ ĩmwe nĩ ũndũ njiarwa ciao itiarĩ nyingĩ.

12 Kohathu aarĩ ithe wa aariũ ana, nao nĩ o: Amuramu, Iziharu, Heburoni na Uzieli.

13 Amuramu aarĩ ithe wa aariũ eerĩ, nao nĩ o: Harũni na Musa. (Naake Harũni na njiarwa ciake magĩthuurwo mamenyagĩrĩre indo iria nyamũre, na macinage ũbaani magĩthaathayagia MWATHANI. Ningĩ matũũre matungatagĩra MWATHANI na maraathimaga andũ rĩĩtwainĩ rĩake tene na tene.

14 No rĩĩrĩ, aariũ a Musa, ndungata ĩyo ya Ngai, magĩtaranĩrio na Alawii.)

15 Musa aarĩ ithe wa aariũ eerĩ nao nĩ o: Gerishomu na Eliezeri.

16 Naake Shebueli nĩ we warĩ mũnene wa aariũ a Gerishomu.

17 Eliezeri aarĩ ithe wa mũũriũ ũmwe wetagwo Rehabia, no Rehabia aarĩ ithe wa aariũ aingĩ.

18 Iziharu, mũũriũ wa keerĩ wa Kohathu, aarĩ ithe wa mũũriũ ũmwe wetagwo Shelomithu na nĩ we warĩ mũnene wa mbarĩ yao.

19 Heburoni, mũũriũ wa gatatũ wa Kohathu, aarĩ ithe wa aariũ ana nao maarũmanĩrĩire ta ũũ: Jeria, Amaria, Jahazieli, na Jekameamu.

20 Uzieli aarĩ ithe wa aariũ eerĩ na nĩ o: Mika na Ishia.

21 Merari aarĩ ithe wa aariũ eerĩ, nao nĩ o: Mahali na Mushi. Mahali aarĩ ithe wa aariũ eerĩ, nao nĩ o Eleazaru na Kishu.

22 Na rĩĩrĩ, Eleazaru aakuire atarĩ na aanake tiga o airĩĩtu. Nao airĩĩtu acio makĩhikio nĩ aanake a mũrũ wa nyina ũrĩa wetagwo Kishu.

23 Mushi, mũũriũ wa keerĩ wa Merari, aarĩ ithe wa aariũ atatũ, nao nĩ: Mahali, Ederi na Jeremothu.

24 Acio nĩ o maarĩ njiarwa cia Lawi na maabangĩĩtwo na mbarĩ na nyũmba, na o mũndũ aandĩkĩĩtwo rĩĩtwa rĩake. Acio oothe no mũndũ wakinyĩĩtie mĩaka mĩrongo ĩĩrĩ na makĩria na nĩ o maarĩ a kũruta wĩra Hekaarũinĩ ya MWATHANI.

25 Naake Daudi agĩkiuga atĩrĩ, “MWATHANI Ngai nĩatũmĩĩte andũ aake maikare na thaayũ na egũtũũra Jerusalemu tene na tene.

26 Nĩ ũndũ ũcio gũtirĩ bata wa Alawii gũtũũra mathaamagia Hema ya MWATHANI o na kana indo iria ihũthagĩrwo gũthaathaiya Ngai kuo.”

27 Na rĩĩrĩ, kũringana na ciugo cia Daudi cia mũthia, Alawii arĩa makinyĩĩtie mĩaka mĩrongo ĩĩrĩ na makĩria no o maathuurirwo.

28 Alawii acio maagaĩirwo mawĩra maya: gũteithagĩrĩria athĩnjĩri Ngai arĩa a njiarwa ya Harũni mawĩrainĩ marĩa maarutaga Hekaarũinĩ; gũikaragia nja na tũnyũmba twayo i theru, o na kũmenyerera indo ciothe iria ciarĩ nyamũre na gũciiga i theru.

29 Ningĩ mamenyagĩrĩre mĩgate mĩtheru ya kũrutĩrwo MWATHANI magongoona, mũtu mũhinyu wa magongoona, mĩgate ĩtarĩ mĩĩkĩre ndaawa ya kũimbia, mĩgate ya gũkandwo, o na mũtu ũtukanĩĩtio na maguta ma mĩtamaiyũ, o na ningĩ gũthimaga ũritũ wa indo ciothe cia kũrutwo magongoona.

30 Ningĩ mateithagĩrĩrie kũgooca na gũcookeria MWATHANI ngaatho rũũciinĩ o ma hwaĩinĩ.

31 Na mateithagĩrĩrie kũrutĩra MWATHANI magongoona ma njino hĩndĩ ya Thabatũ, karũũgamo ka mweri, o na mĩthenya ĩrĩa ĩngĩ ya thigũkũ. Nĩgwathondekirwo mawatho ma gũtua nĩ Alawii aigana marĩrutaga wĩra ũcio o mũthenya. Alawii maaheirwo wĩra wa gũthaathayagia Ngai hĩndĩ ciothe.

32 Na nĩ ũndũ ũcio, Alawii makĩĩhokerwo wĩra wa gũtungata Hemainĩ ya gũtũnganwo na Hekaarũinĩ yake, o na gũteithagĩrĩria athĩnjĩri Ngai arĩa maarĩ njiarwa cia Harũni hĩndĩ ya gũthaathaiya Hekaarũinĩ.

Wĩra ũrĩa athĩnjĩri Ngai maagaĩirwo

1 Na rĩĩrĩ, njiarwa cia Harũni ciagaĩĩtwo ta ũũ: Harũni aarĩ ithe wa aariũ ana, nao nĩ: Nadabu, Abihu, Eleazaru, na Ithamaru.

2 No rĩĩrĩ, Nadabu na Abihu magĩkua mbere ya ithe wao, na matiarĩ na ciana. Na nĩ ũndũ ũcio Eleazaru na Ithamaru magĩtuĩka athĩnjĩri Ngai.

3 Naake Daudi, agĩteithĩrĩrio nĩ Zadoku wa rũciaro rwa Eleazaru me na Ahimeleku wa rũciaro rwa Ithamaru kũbangĩra andũ acio mawĩra maao.

4 Na rĩĩrĩ, arĩa maarĩ a rũciaro rwa Eleazaru makĩbangwo ikundi ikũmi na ithathatu na a Ithamaru ikundi inyaanya. Maabangirwo ũguo tondũ arũme aingĩ arĩa maarĩ atongoria a mbarĩ moimĩĩte thĩinĩ wa rũciaro rwa Eleazaru.

5 Tondũ hatirĩ rũciaro o na rũmwe rwa Eleazaru kana rwa Ithamaru rũtaarĩ na anene a Hekaarũ o na a gũtongoria maũndũ ma kĩĩroho-rĩ, ũndũ ũcio wekirwo na njĩra ya kuoya kura.

6 Na rĩrĩa kura cioyagwo, cioyagwo o mwena kura, o mwena kura. Ũguo nĩ ta kuuga mwena wa Eleazaru woya, mwena wa Ithamaru ũkooya. Naake Shemaia mũrũ wa Nethaneli, karani ka mũhĩrĩga wa Alawii agĩkĩmaandĩka oothe. Naake mũthamaki, njaama ciake, Zadoku mũthĩnjĩri Ngai, Ahimeleku mũrũ wa Abiatharu, atongoria a mbarĩ cia athĩnjĩri Ngai o na cia Alawii, oothe magĩtuĩka aira.

7-18 Ũyũ nĩguo mũtaratara wa ikundi icio mĩrongo ĩĩrĩ na inya cia mbarĩ ta ũrĩa ciagaĩrwo mawĩra, kura ciaikio nĩ atongoria aacio:

1. Jehoiaribu

2. Jedaia

3. Harimu

4. Seorimu

5. Malikija

6. Mijamini

7. Hakozu

8. Abija

9. Jeshua

10. Shekania

11. Eliashibu

12. Jakimu

13. Hupa

14. Jeshebeabu

15. Biliga

16. Imeri

17. Heziri

18. Hapizezu

19. Pethahia

20. Jehezekeli

21. Jakini

22. Gamuli

23. Delaia

24. Maazia

19 Nao andũ acio nĩgũtuanĩra maatuanagĩra mahinda ma gũtoonya Hekaarũinĩ nĩ geetha makarute mawĩra ta ũrĩa maandĩkĩĩtwo, o ta ũrĩa ithe wao Harũni aatigĩĩte aabanga, o na ta ũrĩa MWATHANI, Ngai wa Isiraeli aamwathĩĩte.

Mũtaratara wa Alawii

20 Aya nao nĩ o atongoria angĩ a nyũmba cia Alawii:

Amũramu aarĩ ithe wa Shubaeli, Shubaeli aarĩ ithe wa Jehideia.

21 Rehabia aarĩ ithe wa Ishia;

22 Iziharu aarĩ ithe wa Shelomithu;

Shelomithu aarĩ ithe wa Jahathu.

23 Nao aariũ a Heburoni maarũmanĩrĩire ta ũũ:

Jeria, Amaria, Jehazieli, na Jekameamu.

24 Uzieli aarĩ ithe wa Mika, Mika aarĩ ithe wa Shamiru.

25 Naake mũrũ wa nyina na Mika eetagwo Ishia. Ishia aarĩ ithe wa Zekaria.

26 Nao aariũ a Merari nĩ aya: Mahali, Mushi, na Jaazia.

27 Nao aariũ a Jaazia nĩ aya: Shohamu, Zakuru na Ibiri.

28-29 Naake Mahali aarĩ ithe wa aariũ eerĩ, nao nĩ o: Eleazaru na Kishu. No rĩĩrĩ, Eleazaru ndagĩire na aanake, no Kishu nĩagĩire na mwanake ũmwe wetagwo Jerameeli.

30 Naake Mushi aarĩ ithe wa aariũ atatũ nao nĩ o: Mahali, Ederi, na Jeremothu.

Acio nĩ o maarĩ aariũ a Alawii kũringana na ũrĩa nyũmba cia maithe maao ciatariĩ.

31 Na rĩĩrĩ, o mũtongoria o mũtongoria wa nyũmba hamwe na mũrũ wa nyina ũrĩa mũnyiinyi magĩikia kura o ũndũ ũmwe nĩ ũndũ wa mawĩra marĩa marĩrutaga. Meekire o ta ũrĩa athĩnjĩri Ngai arĩa maarĩ njiarwa cia Harũni meekire. Nao arĩa maarĩ aira kura icio igĩĩkio nĩ mũthamaki Daudi, Zadoku, Ahimeleku, o na atongoria a nyũmba cia athĩnjĩri Ngai o na cia Alawii.

Aini a nyĩmbo a Hekaarũinĩ

1 Ningĩ Daudi na anene a Alawii nĩmaathuurire mbarĩ ici cia Alawii nĩguo itongoragie magongoona ma gũthaathaiya Ngai: Mbarĩ ya Asafu, Hemani, na ya Jeduthuni. Acio maarĩ a kũhunjagia ũhoro wa Ngai, na kũina nyĩmbo makĩhũũraga inanda na thaani iria ihũũrithanagio ikagamba. Ũyũ nĩguo mũtaratara wa andũ arĩa maathuurirwo na mawĩra maao:

2 aariũ ana a Asafu: Zakuru, Josefu, Methania, na Asharela. Asafu nĩ we wamatongoragia, na no we wahunjagia ndũmĩrĩri ya Ngai o rĩrĩa rĩothe angĩathirwo nĩ mũthamaki.

3 Aariũ atandatũ a Jeduthuni: Gedalia, Zeri, Jeshaia, Shimei, Hashabia, na Matithia. Jeduthuni nĩ we wamatongoragia makĩhunjia ndũmĩrĩri ya Ngai. Maahunjagia makĩhũũraga inanda makĩinaga nyĩmbo cia kũgooca na gũcookeria MWATHANI ngaatho.

4 Aariũ ikũmi na ana a Hemani: Bukia, Matania, Uzieli, Shebueli, Jerimothu, Hanania, Eliatha, Gidaliti, Romamuti Ezeri, Joshibekasha, Malothi, Hothiru, na Mahaziothu.

5 Ngai aaheire Hemani, ũrĩa warĩ mũnabii wa mũthamaki, aariũ acio ikũmi na ana na airĩĩtu atatũ o ta ũrĩa aamwĩrĩire, nĩguo amũhe ũhoti.

6 Ithe wao nĩ we wamatongoragia makĩhũũra thaani iria ihuũrithanagio ikagamba na inanda, hĩndĩ ya gũthaathaiya Hekaarũinĩ. Nao Asafu, Jeduthuni, na Hemani maathagwo nĩ mũthamaki.

7 Andũ acio oothe mĩrongo ĩĩrĩ na ana maarĩ njoorua cia mawĩra maao; o nao Alawii acio angĩ nĩmaarutĩĩtwo kũina. Oothe maarĩ andũ magana meerĩ na mĩrongo ĩnaana na anaana (288).

8 Oothe mũkũrũ na mwĩthĩ, njoorua na ũtarĩ njoorua, maathuuraga mawĩra macio na njĩra ya gũikia kura.

9-31 Andũ acio magana meerĩ ma mĩrongo ĩnaana na anaana (288), maagayanĩĩtio kũringana na mbarĩ, ikundi mĩrongo ĩĩrĩ na inya, o gĩkundi andũ ikũmi na eerĩ. O gĩkundi kĩarĩ na mũtongoria wakĩo. Ũyũ nĩguo mũtaratara wa ũrĩa atongoria maarũmanĩrĩire mawĩrainĩ maao:

1. Josefu wa nyũmba ya Asafu

2. Gedalia

3. Zakuru

4. Zeri

5. Nethania

6. Bukia

7. Asharela

8. Jeshaia

9. Matania

10. Shimei

11. Uzieli

12. Hashabia

13. Shebueli

14. Matithia

15. Jerimothu

16. Hanania

17. Joshibekasha

18. Hanani

19. Malothi

20. Eliatha

21. Hothiru

22. Gidaliti

23. Mahaziothu

24. Romamuti Ezeri

Arangĩri a Hekaarũ

1 Na rĩĩrĩ, Alawii aya nĩ o maathuurirwo arangĩri a Hekaarũ: Kuuma mbarĩ ya Kora nĩ Meshelemia, mũrũ wa Kore, wa mbarĩ ya Asafu.

2 Naake Meshelemia aarĩ ithe wa aariũ mũgwanja, nao maarũmanĩrĩire ta ũũ: Zekaria, Jediaeli, Zebadia, Jathinieli,

3 Elamu, Jehohanani, na Eliehoenai.

4 Ningĩ nĩhaarĩ na Obedi Edomu ũrĩa Ngai aaraathimĩĩte na aariũ anaana; nao maarũmanĩrĩire ta ũũ: Shemaia, Jehozabadu, Joa, Sakaru, Nethaneli,

5 Amieli, Isakaru, na Peulethai.

6-7 Shemaia irigithaathi rĩa Obedi Edomu aarĩ ithe wa aariũ atandatũ, nao nĩ o: Othini, Refaeli, Obedi, Elizabadu, Elihu na Semakia. Nao maarĩ andũ a bata mũno mbarĩinĩ icio nĩ ũndũ maarĩ na ũhoti mũingĩ. Ningĩ Elihu na Semakia nĩmoonekaga me na iheeo cia mwanya.

8 Andũ arĩa moimire mũciĩinĩ wa Obedi Edomu a kũrutaga wĩra wa kũrangĩra Hekaarũ maarĩ mĩrongo ĩtandatũ na eerĩ na maarĩ njoorua cia mawĩra macio.

9 Naguo mũciĩ wa Meshelemia kwoimire andũ njoorua ikũmi na anaana.

10 Thĩinĩ wa mbarĩ ya Merari kwoimire Hosa, ũrĩa warĩ na aariũ ana: Shimuri, (ũcio nĩ we ithe aatuire mũtongoria wa acio angĩ o na gũtuĩka ti we warĩ wa irigithaathi.)

11 Hilikia, Tebalia, na Zekaria. Na rĩĩrĩ, arangĩri a Hekaarũ oothe arĩa moimĩĩte mũciĩ wa Hosa, maarĩ ikũmi na atatũ.

12 Na rĩĩrĩ, arangĩri acio a Hekaarũ maagayanĩĩtio ikundi ikundi kũringana na mbarĩ ciao. Ningĩ maagaĩirwo mawĩra kũu Hekaarũinĩ o ta ũrĩa Alawii arĩa angĩ maagaĩirwo.

13 O nyũmba, gũtekũbaarwo mũigana wayo, yaikirie kura nĩ geetha ĩmenye kĩhingo kĩrĩa ĩrĩrangagĩra.

14 Na rĩĩrĩ, Shelemia oire kura ya kũrangagĩra kĩhingo kĩa mwena wa na irathĩro, naake Zekaria mũũrũwe, mũndũ warĩ mũtaarani wa bata, kura ya kũrangĩra kĩhingo kĩa na mwena wa na rũgongo.

15 Naake Obedi Edomu akĩoya kura ya kũrangĩra kĩhingo kĩa mwena wa na kĩanda, nao aariũ aake kura ya kũrangagĩra mathitoo.

16 Nao Shupimu na Hosa makĩoya kura ya kũrangĩra kĩhingo kĩa mwena wa na ithũĩro o na kĩhingo gĩa Shalekethu kĩrĩa kĩarĩ barabarainĩ ya na rũgongo.Wĩra ũcio wa kũrangĩra nĩgũtuanĩrwo watuanagĩrwo.

17 Na rĩĩrĩ, mwena wa irathĩro warangagĩrwo nĩ arangĩri atandatũ o mũthenya, mwena wa na rũgongo arangĩri ana o mũthenya, o naguo mwena wa na kĩanda arangĩri ana o mũthenya. Thitoo ciarangagĩrwo nĩ arangĩri ana o mũthenya, o thitoo arangĩri eerĩ.

18 Ningĩ kĩbanda kĩrĩa kĩarĩ na mwena wa ithũĩro kĩarĩ na aikaria ana a gũikaria mwena wa barabara, na eerĩ magaikaria kĩbanda kĩo kĩene.

19 Macio nĩ mo mawĩra ma kũrangĩra marĩa Alawii a mbarĩ ya Kora na ya Merari maagaĩirwo.

Mawĩra mangĩ Hekaarũinĩ

20 Na rĩĩrĩ, Alawii arĩa angĩnĩ o maamenyagĩrĩra mũthiithũ wa Hekaarũ o na mathitoo kũrĩa kwaigĩĩtwo iheeo ciothe iria nyamũre.

21 Naake Ladani, ũmwe wa aariũ a Gerishoni, nĩwe warĩ ithe wa nyũmba mwanya mwanya iria ciahĩmbĩirie o na nyũmba ya mũũrũwe Jehieli.

22 Nao Zethamu na Joeli, aariũ a Jehieli, nĩ o maamenyagĩrĩra mũthiithũ wa Hekaarũ na mathitoo.

23 Ningĩ njiarwa cia Amuramu, Iziharu, Heburoni, na Uzieli o nacio nĩciagaĩirwo mawĩra ma kũrutaga.

24 Na rĩĩrĩ, Shebueli mũrũ wa Gerishomu, mũrũ wa Musa, nĩwe warĩ mũnene wa kũndũ kũrĩa kwaigagwo mĩthiithũ ya Hekaarũ.

25 Nao andũ a Shebueli, arĩa moimanĩĩte na Eliezeri mũrũ wa nyina na Gerishomu, maahaanaga ta ũũ: Eliezeri aarĩ ithe wa Rehabia, naake Rehabia aarĩ ithe wa Jeshaia, naake Jeshaia ithe wa Joramu, naake Joramu aarĩ ithe wa Zikiri, naake Zikiri aarĩ ithe wa Shelomithu.

26 Shelomithu na andũ a mũciĩ wake, nĩ o maamenyagĩrĩra iheeo iria mũthamaki Daudi, atongoria a mbarĩ, a nyũmba, na a thigari maamũrĩire Ngai.

27 Nao magĩkĩoya indo imwe cia iria maatahĩĩte mbaarainĩ, magĩciamũra nĩguo ihũthagĩrwo Hekaarũinĩ.

28 O na ningĩ Shelomithu na andũ a mũciĩ wake no o maamenyagĩrĩra indo ciothe iria ciamũrĩĩtwo nĩ ũndũ wa kũhũthĩrwo Hekaarũinĩ. Hamwe na icio no o maamenyagĩrĩra iheeo iria ciaheanĩĩtwo nĩ mũnabii Samũeli, mũthamaki Saũlũ, Abineri mũrũ wa Neri, na Joabu mũrũ wa Zeruia.

Mawĩra ma Alawii arĩa angĩ

29 Kuuma njiarwainĩ cia Iziharu, Kenania na aariũ aake nĩ o maaheirwo mawĩra ma wathani ma kũigaga rekondi na gũtuithania maciira ma andũ a Isiraeli.

30 Kuuma njiarwainĩ cia Heburoni, Hashabia na andũ a nyũmba yake ngiri ĩmwe na magana mũgwanja (1,700), andũ maarĩ njamba, magĩthuurĩrwo wĩra wa kũramataga maũndũ moothe ma ũndini o na ma mwathanĩre bũrũri wa Isiraeli wa na mwena wa ithũĩro wa rũũĩ rwa Jorodani.

31 Njiarwainĩ cia Heburoni Jeria nĩ we warĩ mũtongoria wao. Na rĩĩrĩ, mwaka wa mĩrongo ĩna wa ũthamaki wa Daudi-rĩ, gũgĩtuĩrio ũhoro gũkĩmenyekana atĩ njiarwa imwe cia rũciaro rwa Heburoni iria ciarĩ thigari njoorua ciatũũraga Jazeri bũrũriinĩ wa Gileadi.

32 Naake mũthamaki Daudi agĩthuura andũ ngiri igĩrĩ na magana mũgwanja (2,700), atongoria a bata kuuma mũciĩ wa Jeria. Andũ acio akĩmatua a kũramataga maũndũ moothe ma ũndini na ma mwathanĩre bũrũriinĩ wa Isiraeli na mwena wa irathĩro wa rũũĩ rwa Jorodani, ũrĩa wahĩmbĩirie rũgongo rwa andũ a Reubeni, Gadi, na nuthu ya mũhĩrĩga wa Manase.

Mũbangĩre wa wathani na wa mbũtũ cia ita

1 Na rĩĩrĩ, ũyũ nĩguo mũtaratara wa atongoria a nyũmba, mbarĩ, o na wa anene aao arĩa maatungataga ũthamakiinĩ. Na rĩĩrĩ, o mweri o mweri thĩinĩ wa mwaka, gĩkundi kĩa andũ ngiri mĩrongo ĩĩrĩ na inya (24,000) nĩ o maatungatagĩra mũthamaki, na o gĩkundi gĩakoragwo na mũtongoria wakĩo.

2-15 Aya nĩ o anene arĩa maarũũgamagĩrĩra ikundi icio mweri o mweri.

Mweri wa mbere: Jashobeamu mũrũ wa Zabidieli (wa mbarĩ ya Perezu, gĩcunjĩ kĩmwe kĩa mũhĩrĩga wa Juda.)

Mweri wa keerĩ: Dodai wa rũciaro rwa Ahohi (naake Mikilothu nĩ we warĩ mũniini wake.)

Mweri wa gatatũ: Benaia mũrũ wa Jehoiada, mũthĩnjĩri Ngai, (mũtongoria wa “Njamba iria Mĩrongo Ĩtatũ.” Amizabadu mũũrũwe nĩ we wacookire gũtuĩka mũtongoria wa gĩkundi gĩĩkĩ ithenya rĩake.)

Mweri wa kana: Asaheli mũrũ wa nyina na Joabu, (naake Zebadia mũũrũwe agĩcooka ithenya rĩake.)

Mweri wa gataano: Shamuhuthu wa rũciaro rwa Izirahu.

Mweri wa gatandatũ: Ira mũrũ wa Ikeshu ũrĩa woimĩĩte Tekoa.

Mweri wa mũgwanja: Helezu Mũpeloni wa kuuma njiarwa cia Efiraimu.

Mweri wa kanaana: Sibekai wa kuuma Husha (wa mbarĩ ya Zera.)

Mweri wa kenda: Abiezeri wa kuuma Anathothu kũrĩa kwarĩ rũgongo rwa mũhĩrĩga wa Benjamini.

Mweri wa ikũmi: Maharai wa kuuma Netofa wa mbarĩ ya Zera.

Mweri wa ikũmi na ũmwe: Benaia wa kuuma Pirathoni kũrĩa kwarĩ rũgongo rwa mũhĩrĩga wa Efiraimu.

Mweri wa ikũmi na ĩĩrĩ: Helidai wa kuuma Netofa (wa rũciaro rwa Othinieli.)

Mwathanĩre wa mĩhĩrĩga ya Isiraeli

16-22 Nao andũ arĩa maathaga mĩhĩrĩga ya Isiraeli maahaanaga ta ũũ:

Reubeni Eliezeri mũrũ wa Zikiri
Simeoni Shefatia mũrũ wa Maaka
Lawi Hashabia mũrũ wa Kemueli
Aaroni Zadoku
Juda Elihu, ũmwe wa aariũ a ithe na mũthamaki Daudi
Isakaru Omuri mũrũ wa Mikaeli
Zebuluni Ishimaia mũrũ wa Obadia
Nafutali Jeremothu mũrũ wa Azirieli
Efiraimu Hoshea mũrũ wa Azazia
Nuthu ya mũhĩrĩga wa Manase Joeli mũrũ wa Pedaia
Nuthu ya mũhĩrĩga wa Manase Ido mũrũ wa Zekaria
Benjamini Jaasieli mũrũ wa Abineri
Dani Azareli mũrũ wa Jerohamu.

23 Na rĩĩrĩ, mũthamaki Daudi ndaigana gũtara andũ arĩa maarĩ a ũkũrũ wa thĩ ya mĩaka mĩrongo ĩĩrĩ, nĩ gũkorwo MWATHANI nĩeranĩire atĩ nĩagaatũma Aisiraeli maingĩhe o ta njata cia igũrũ.

24 Naake Joabu, ũrĩa nyina eetagwo Zeruia, akĩambĩrĩria gũtarana no ndaigana kũrĩĩkia. Naguo ũndũ ũcio wa gũtarana ũgĩtũma Aisiraeli maherithio nĩ Ngai, na kwoguo mũigana wao ndwandĩkirwo thĩinĩ wa rekondi cia mũthamaki Daudi.

Amenyereri a ũtonga wa mũthamaki

25-31 Nao amenyereri a ũtonga wa mũthamaki maahaanaga ta ũũ:

Thitoo kũrĩa kwaigagwo ũtonga wa mũthamaki: Azimavethu mũrũ wa Adieli.

Thitoo kũrĩa kwaigagwo ũtonga wa mũingĩ: Jonathani mũrũ wa Uzia.

Aruti wĩra mũgũndainĩ: Eziri mũrũ wa Kelubu

Mĩgũnda ya mĩthabibũ: Shimei wa kuuma Rama.

Thitoo kũrĩa ndibei yaigagwo: Zabedi wa kuuma Shefamu.

Mũgũnda wa mĩtamaiyũ na mĩkũyũ (ĩrĩa yarĩ magũrũinĩ ma irĩma cia Juda mwena wa na ithũĩro): Baali Hanani wa kuuma Gederi

Thitoo kũrĩa kwaigagwo maguta ma mĩtamaiyũ: Joashu.

Mũmenyereri wa ndũũru cia ng’ombe iria ciarĩithagĩrio werũinĩ wa Sharoni: Shitirai wa kuuma Sharoni.

Mũmenyereri wa ng’ombe iria ciarĩithagĩrio ciandainĩ: Shafatu mũrũ wa Adilai.

Mũmenyereri wa ngamĩĩra: Obili Mũishumaeli

Mũmenyereri wa ndigiri: Jedeia wa kuuma Meronothi.

Mũmenyereri wa ng’ondu na mbũri: Jazizi Mũhagari.

Acio oothe nĩ o maarĩ aramati a ũtonga wa mũthamaki Daudi.

Ataari a mũthamaki Daudi

32 Na rĩĩrĩ, Jonathani, maamawe wa mũthamaki Daudi, aarĩ mũtaarani, mũndũ mũũgĩ na mwandĩki wa maũndũ. We hamwe na Jehieli mũrũ wa Hakimoni nĩ o maamenyagĩrĩra aariũ a mũthamaki.

33 Ahithofeli nĩ we wataaraga mũthamaki, naake Hushai Mũariki aarĩ mũraata wa mũthamaki o na mũmũhei kĩrĩra.

34 Ahithofeli akua, Abiatharu na Jehoiada mũrũ wa Benaia nĩ o maacookire handũ haake. Naake Joabu nĩ we warĩ mũnene wa ita cia mũthamaki.

Daudi gũtaarĩria ũhoro wa mwako wa Hekaarũ

1 Na rĩĩrĩ, Daudi agĩcookanĩrĩria anene oothe a Isiraeli kũu Jerusalemu. Nao maarĩ anene oothe a mĩhĩrĩga, anene oothe arĩa maatungataga mawĩra ma mũthamaki, atongoria a mbarĩ, amenyereri a indo na mahiũ ma mũthamaki o na a aariũ aake. O na anjaama a kwa mũthamaki, na thigari iria ciothe ciarĩ njamba o na andũ oothe a bata.

2 Hĩndĩ ĩyo mũthamaki Daudi akĩrũũgama mbere yao akĩmeera atĩrĩ, “Andũ aitũ, o inyuĩ andũ aakwa, nĩndĩrendeete mũno gwaka Hekaarũ nũmu ĩtuĩke handũ ha kũigaga Ithandũkũ rĩa Kĩrĩĩkanĩro o na ningĩ ĩtuĩke gaturwa ga kũigagĩrĩrwo magũrũ nĩ MWATHANI Ngai witũ. Ningĩ nĩnjigithĩĩtie indo ciothe cia mwako wa Hekaarũ ĩyo,

3 no rĩĩrĩ, MWATHANI nĩangaanĩĩtie kũmĩaka. Gĩtũmi gĩa kũũngaania nĩ ũndũ ndĩ mũndũ wa ita, na nĩnjitĩĩte thakame nyingĩ.

4 Na rĩĩrĩ, MWATHANI Ngai wa Isiraeli, nĩ niĩ aathuurire, niĩ o hamwe na njiarwa ciakwa, tũtũũre tũthamakaga Isiraeli. Agĩgĩtua atĩ nĩ thĩinĩ wa mũhĩrĩga wa Juda kwagĩrĩirwo nĩ kuuma mũthamaki, na thĩinĩ wa mũhĩrĩga ũcio agĩthuura mũciĩ wa baaba. Ningĩ kwarĩ kwenda gwake aathuure niĩ kuuma mũciĩ ũcio wa baaba nduĩke mũthamaki wa Isiraeli guothe.

5 Na rĩĩrĩ, MWATHANI nĩaheete aariũ aingĩ, na kuuma kũrĩ acio oothe, agagĩthuura Solomoni aikarĩre gĩtĩ gĩa ũthamaki wa MWATHANI, nĩguo athamakĩre Isiraeli.

6 “MWATHANI anjĩĩre atĩrĩ, ‘Mũũrũguo Solomoni nĩ we ũkaanjakĩra Hekaarũ o na nja ciayo. Nĩndĩmũthuurĩĩte atuĩke mũrũ wakwa na niĩ nduĩke ithe wake.

7 Ningĩ nĩngaatũma ũthamaki wake ũtũũre wĩhandĩĩte tene na tene angĩkorwo nĩagaatũũra amenyereire maathani maakwa o na mawatho maakwa o ta ũrĩa eekaga rĩu.’

8 “Na rĩu, andũ aakwa, ndĩramwĩra maũndũ maya andũ oothe a Isiraeli, o andũ oothe a kĩũngano kĩa MWATHANI makĩiguaga, na Ngai nĩ mũira. Ndĩramwatha, mwathĩkagĩre na kinyi maũndũ marĩa moothe MWATHANI Ngai witũ atwathĩĩte, nĩ geetha mũthiĩ na mbere gũtũũra bũrũri ũyũ mwega, o na nĩ geetha mũkaaũtigĩra njiarwa cianyu, ũtuĩke igai rĩacio tene na tene.”

9 Naake Daudi agĩcooka akĩĩhũgũrĩra mũũrũwe Solomoni, akĩmwĩra atĩrĩ, “Mũũriũ, tũũra ũmenyeete wega Ngai wa thooguo na ũmũtungatagĩre na ngoro ĩtarĩ ũhinga o na meciiria matarĩ makũringĩrĩrio. Ngai nĩoĩ meciiria maitũ o na mĩbango yamo. Wathiĩ harĩ we ndarĩ hĩndĩ agaakũingata, no ningĩ ũngĩkaamũtiga naake nĩagaagũtiganĩria tene na tene.

10 Rĩu nĩngwenda ũmenye atĩ MWATHANI nĩagũthuurĩĩte nĩguo wake Hekaarũ yake theru. Gĩa na hinya na wambĩrĩrie kũmĩaka.”

11 Hĩndĩ ĩyo Daudi agĩkĩhe Solomoni maabu ya mwako wothe wa Hekaarũ, mathitoo, tũnyũmba tũrĩa tũngĩ tuothe, na ya Handũ Harĩa Hatheru Mũno, harĩa meehia moohanagĩrwo.

12 Agĩcooka akĩmũhe maabu ingĩ cia ũrĩa angĩendire ithaku cia Hekaarũ ciakwo, o na tũnyũmba twa gũcithiũrũrũkĩria, na cia mathitoo makũigagwo indo cia Hekaarũ, o hamwe na iheeo iria ciamũragĩrwo MWATHANI.

13 Ningĩ agĩcooka akĩmũhe mũtaratara wa ũrĩa akaabangagĩra athĩnjĩri Ngai na Alawii mawĩra maao ma Hekaarũ o na ma kũmenyerera indo ciothe cia kũhũthĩrwo kũu Hekaarũinĩ.

14 Agĩcooka akĩmuonereria gĩthimi gĩa gũthimaga thahabu na betha nakĩo rĩrĩa egũthondeka indo cia kũhũthĩrwo Hekaarũinĩ,

15 mataawa na mĩtĩ ya kũmacuuria,

16 meetha cia betha, meetha o meetha ya thahabu ya kũigagĩrĩrwo mĩgate mĩtheru ya kũrutĩrwo MWATHANI.

17 Ningĩ akĩmũtaarĩria mũigana wa thahabu ĩrĩa therie mũno ya gũthondekithia hũũma cia kũrĩa, mbakũri, njagĩ cia maaĩ, o na mũigana wa thahabu na betha ya gũthondekithia mbakũri o mbakũri.

18 Agĩcooka akĩmuonereria gĩthimi gĩa thahabu ĩrĩa therie ya gũthondeka kĩgongoona gĩa gũcinĩra ũbaani o na ya gũthondeka ngaari ya mbarathi ya thahabu ya gũkuuaga ciũmbe iria irĩ mathagu iria ihumbagĩra Ithandũkũ rĩa Kĩrĩĩkanĩro kĩa MWATHANI.

19 Naake Daudi akiuga atĩrĩ, “Maũndũ macio moothe marĩ thĩinĩ wa maabu ĩno maandĩkĩĩtwo na magataarĩrio o ta ũrĩa MWATHANI we mwene aanjathire njĩke.”

20 Ningĩ Daudi akĩĩra mũũrũwe Solomoni atĩrĩ, “Mũũriũ, gĩa na hinya na wĩrutanĩrie wĩrainĩ ũcio. Nĩ ũndũ-rĩ, MWATHANI Ngai, o we ndungatagĩra, nĩarĩkoragwo hamwe nawe, nĩ ũndũ ũcio ndũgeetigĩre. MWATHANI ndagaagũtiganĩria kana akũrekererie o kinya ũkaarĩĩkia wĩra wothe wa mwako wa Hekaarũ.

21 Ningĩ-rĩ, athĩnjĩri Ngai na Alawii nĩmabangĩirwo mawĩra ma kũruta kũu Hekaarũinĩ. O na andũ oothe, o mũndũ wĩ na ũũgĩ wa mwako nĩmehaarĩirie gũgũteithĩrĩria, na andũ acio oothe na atongoria aao nĩ we ũrĩmaathaga.”

Maruta ma mwako wa Hekaarũ

1 Hĩndĩ ĩyo mũthamaki Daudi akĩĩra kĩũngano kĩu gĩothe kĩa andũ atĩrĩ, “Solomoni mũrũ wakwa nĩ we Ngai athuurĩĩte, no nĩ mũndũ mwĩthĩ na ndarĩ aruta wĩra ta ũyũ hĩndĩ ĩngĩ. Ningĩ wĩra ũyũ wĩ mbere yake nĩ mũritũ nĩ ũndũ nyũmba ĩno ti mũndũ ũraakĩrwo, nĩ Hekaarũ ya MWATHANI Ngai.

2 Niĩ haakwa-rĩ, nĩnjigithĩĩtie na kĩyo indo ciothe cia mwako wa Hekaarũ, nacio nĩ: Thahabu, betha, gĩcango, cuuma, mbaaũ, mahiga ma goro, tũhiga twa goro twa kũgemia, mahiga mangĩ ma gũtheecererwo mwakoinĩ ta magemio, o na mahiga mangĩ mathaka ma marangi maingĩ.

3 Hamwe na icio, tondũ wa ũrĩa ngoro yakwa ĩkenagĩra Hekaarũ ya Ngai, nĩheanĩĩte thahabu na betha kuuma mũthiithũ wa indo ciakwa.

4 Nĩheanĩĩte makĩria ma tani igana cia thahabu iria njega mũno, na ta tani magana meerĩ na mĩrongo ĩna cia betha ĩrĩa ĩthereetio biũ ya kũhũthĩrwo na kũgemia thingo cia Hekaarũ,

5 o na indo ingĩ iria igaathondekwo nĩ mabundi ma wĩra wa mooko. Rĩu-rĩ, nĩ mũndũ ũrĩkũ ũngĩ ũkũheana indo ciake kwĩ MWATHANI na ũndũ wa kwĩyendera?”

6 Hĩndĩ ĩyo atongoria a mbarĩ, anene a mĩhĩrĩga, anene a mbũtũ cia ita na amenyereri a mũthiithũ wa mũthamaki, makĩruta indo ciao na kwĩyendera.

7 Indo iria maarutire cia wĩra wa mwako wa Hekaarũ ciahaanaga ta ũũ: Makĩria ma tani igana na mĩrongo mũgwanja cia thahabu, makĩria ma tani magana matatũ na mĩrongo ĩna cia betha, ta tani magana matandatũ na mĩrongo ĩĩrĩ cia gĩcango, na makĩria ma tani ngiri ithatũ na magana mana (3,400) cia cuuma.

8 Arĩa maarĩ na mahiga ma goro, makĩmaneana makĩigwo mũthiithũinĩ wa Hekaarũ ũrĩa wamenyagĩrĩrwo nĩ Jehieli Mũlawii wa mbarĩ ya Gerishoni.

9 Hĩndĩ ĩyo andũ acio magĩkena mũno nĩ ũndũ wa kũrutĩra MWATHANI indo nyingĩ na kwĩyendera. O naake mũthamaki Daudi agĩkena gĩkeno kĩnene mũno.

Daudi kũgooca Ngai

10 Tondũ ũcio Daudi akĩgooca MWATHANI arĩ hau mbere ya kĩũngano kĩu gĩothe akiuga atĩrĩ, “Ũrogoocwo tene na tene, wee MWATHANI Ngai wa ithe witũ Jakubu!

11 Ũnene na hinya nĩ ciaku, ningĩ riiri na ũhootani na gwĩkĩrĩrwo no ciaku. Nĩ gũkorwo indo ciothe iria irĩ igũrũ o na gũũkũ thĩ nĩ ciaku, nĩ we mũthamaki, na nĩ we ũciathaga ciothe.

12 Ũtonga na gĩtĩĩo ciumaga kũrĩ we, na nĩ we wathaga maũndũ moothe. Ningĩ nĩ we wĩ na ũhoti na hinya, na nĩ we ũnenehagia mũndũ na ũkamũtũũgĩria.

13 Rĩu, Ngai witũ, nĩtwagũcookeria ngaatho na twakumia rĩĩtwa rĩaku rĩrĩa rĩrĩ riiri.

14 “Na rĩu MWATHANI Ngai, niĩ na andũ aakwa, tũtingĩhota gũkũrutĩra indo ciitũ ta ũrĩa kwagĩrĩire, nĩ ũndũ indo ciothe nĩ ciaku. Ningĩ ici twakũrutĩra nĩ imwe cia indo icio ciaku.

15 Nĩ gũkorwo wee MWATHANI, nĩũũĩ atĩ ithuĩ tũhaana ageni o na ahĩtũki o ta ũrĩa maithe maitũ maahaanaga. Ningĩ matukũ maitũ mahaana o ta kĩĩruru na gũkua no mũhaka tũgaakua.

16 MWATHANI Ngai witũ, nĩtũcookanĩrĩirie indo ciothe cia mwako wa Hekaarũ yaku, nĩ geetha rĩĩtwa rĩaku rĩkumagio; ũtonga ũcio wothe nĩ we ũtũheete na nĩ waku.

17 Nĩnjũũĩ nĩũthuuthuuragia ngoro ya mũndũ na nĩũkenagĩra andũ arĩa eega. Niĩ ndutĩĩte indo ici ciothe na kwĩyendera o na nĩ ũndũ wa kwĩhokeka. Ningĩ ndĩ mũira wa ũrĩa andũ aya aaku me haaha maakũrutĩra indo ciao na kwĩyendera na maiyũrĩĩtwo nĩ gĩkeno.

18 Na rĩu MWATHANI Ngai wa maithe maitũ Aburahamu, Isaaka na Jakubu, tũma ũndũ ũyũ ũtũũre ũrurumũkaga ngoroinĩ cia andũ aaku na ũtũme matũũre marĩ ehokeku harĩ we.

19 Ndagũthaitha ũhe Solomoni, mũrũ wakwa, ngoro nginyanĩru, nĩ geetha amenyagĩrĩre maathani maaku moothe na aake Hekaarũ ĩyo yaku njigithĩirie indo cia kũmĩaka.”

20 Naake Daudi akĩĩra andũ oothe atĩrĩ, “Rĩu kĩgooceei MWATHANI Ngai wanyu.” Nao andũ acio oothe makĩgooca MWATHANI Ngai wa maithe maao, magĩturumithia moothiũ maao thĩ makĩhe MWATHANI na mũthamaki gĩtĩĩo,

21 magĩkĩrutĩra MWATHANI magongoona. Mũthenya ũyũ ũngĩ makĩrutĩra MWATHANI magongoona ma njino: ndeegwa ngiri ĩmwe (1,000), ndũrũme ngiri ĩmwe (1,000), tũtũrũme ngiri ĩmwe (1,000), o hamwe na magongoona ma ndibei o na magongoona mangĩ maingĩ nĩ ũndũ wa Aisiraeli.

22 Mũthenya ũcio magĩkĩrĩa na makĩnyua marĩ na gĩkeno kĩnene marĩ hau mbere ya MWATHANI.

Magĩcooka magĩgĩtua Solomoni mũthamaki hĩndĩ ya keerĩ. Magĩkĩmũitĩrĩria maguta rĩĩtwainĩ rĩa MWATHANI, atuĩke mũtongoria wao, naake Zadoku atuĩke mũthĩnjĩri Ngai.

23 Nĩ ũndũ ũcio Solomoni agĩgĩikarĩra gĩtĩ gĩa ũthamaki kĩrĩa MWATHANI aahaarĩirie, agĩgĩtuĩka mũthamaki ithenyainĩ rĩa ithe Daudi. Naake Solomoni agĩkĩrĩrĩria kũgaacĩra na Aisiraeli oothe makĩmwathĩkĩra.

24 Nao anene oothe na mbũtũ ciothe cia ita, o na aariũ arĩa angĩ a Daudi, makĩĩranĩra atĩ nĩmarĩathĩkagĩra Solomoni.

25 Naake MWATHANI agĩtũũgĩria Solomoni mũno na agĩtũma eekĩrĩrwo kũu Isiraeli guothe gũkĩra athamaki arĩa oothe maarĩ mbere yake.

Ũthamaki wa Daudi na njĩra nguhĩ

26 Na rĩĩrĩ, Daudi, mũrũ wa Jesii aathamakĩire Aisiraeli oothe

27 mĩaka mĩrongo ĩna. Aathamakire mĩaka mũgwanja arĩ Heburoni na mĩaka mĩrongo ĩtatũ na ĩtatũ arĩ Jerusalemu.

28 Naake agĩgĩkua e mũkũrũ mũno, e gĩtonga, na atĩĩĩtwo mũno. Naake Solomoni mũũrũwe agĩthamaka ithenya rĩake.

29 Na rĩĩrĩ, maũndũ ma ũthamaki wa Daudi kuuma kĩambĩrĩria nginya kĩrĩĩkĩrĩro maandĩkĩĩtwo mabukuinĩ ma anabii aya atatũ: Samũeli, Nathani na Gadi.

30 Mabukuinĩ macio nĩkwandĩkĩĩtwo ũrĩa aathanire, ũrĩa aarĩ hinya mũingĩ wa gwathana, maũndũ marĩa maamũkorire, marĩa maakorire Isiraeli, o na marĩa maakorire moothamaki marĩa maamũthiũrũrũkĩirie.