Category: 1 Maũndũ ma Matukũ ma Tene

Mũthamaki Saũlũ gũkua

1 Na rĩĩrĩ, Afilisiti magĩkĩhũũrana na Aisiraeli kĩrĩmainĩ kĩa Giliboa. Nao andũ aingĩ mũno a Isiraeli makĩũragĩrwo kuo. Andũ acio angĩ makĩũra, o hamwe na Saũlũ na aariũ aake.

2 Nao Afilisiti makĩmateng’eria na makĩũraga aariũ a Saũlũ: Jonathani, Abinadabu, na Malikishua.

3 Nayo mbaara ĩgĩkĩũmĩra Saũlũ mũno, naake akĩrathwo na mĩguĩ nĩ thũ ciake, agĩtiihio mũno.

4 Saũlũ agĩkĩĩra mwanake ũrĩa wamũkuuagĩra indo ciake cia mbaara atĩrĩ, “Comora rũhiũ rwaku rwa njora ũnjũrage, nĩ geetha andũ aya matatĩĩĩte Ngai matigooke manguucanĩrie manjũrage.” No rĩĩrĩ, mwanake ũcio akĩigua guoya mũno gwĩka ũguo. Kwoguo Saũlũ akĩoya rũhiũ rwake rwa njora akĩrũgwĩra.

5 Mwanake ũcio wamũkuuagĩra indo ciake cia mbaara oona atĩ Saũlũ nĩakua, o naake akĩĩgũithĩria rũhiũ rwake rwa njora, agĩkua.

6 Ũguo nĩguo Saũlũ na aariũ aake atatũ maakuire. Na rĩĩrĩ, ũthamaki wa Saũlũ ũgĩgĩkinya mũthia.

7 Rĩrĩa Aisiraeli arĩa maarĩ na mwena ũũrĩa ũngĩ wa gĩtuamba kĩa Jezireeli, maiguire atĩ mbũtũ ya ita ya Isiraeli nĩyora, na atĩ Saũlũ na aariũ aake nĩmaakua, magĩtiganĩria matũũra maao, makĩũra. Nao Afilisiti magĩthiĩ magĩikara matũũrainĩ macio.

8 Mũthenya ũrĩa warũmĩrĩire, Afilisiti magĩthiĩ kũũngania indo iria ciatigĩĩtwo nĩ andũ arĩa mooragĩĩtwo. Nao makĩona ciimba cia Saũlũ na aariũ aake atatũ igũĩte kũu kĩrĩmainĩ kĩa Giliboa.

9 Magĩgĩtinia mũtwe wa Saũlũ na makĩmwaũra nguo ciake cia mbaara. Magĩcooka magĩtũma andũ bũrũriinĩ wothe wa Afilisiti makamenyithanie ũhoro ũcio mwega kũrĩ ngai ciao cia mĩhianano o na kũrĩ andũ aao.

10 Magĩcooka makĩiga indo ciake cia mbaara hekaarũinĩ ĩmwe yao, naguo mũtwe wake makĩũcuuria hekaarũinĩ ya Dagoni ngai yao.

11 Rĩrĩa andũ a Jabeshi, itũũra rĩa Gileadi, maiguire ũrĩa Afilisiti meekĩĩte Saũlũ,

12 andũ arĩa maarĩ njamba magĩthiĩ makĩgĩĩra kĩimba gĩa Saũlũ na ciimba cia aariũ aake magĩcitwara Jabeshi. Magĩcithika rungu rwa mũtĩ wa mũgandi na makĩĩhinga kũrĩa irio mĩthenya mũgwanja.

13 Ũguo nĩguo Saũlũ aakuire nĩ ũndũ wa kwaga kwĩhokeka harĩ MWATHANI, kwaga gwathĩkĩra watho wake, na kũhooya kĩrĩra maroho ma andũ arĩa maakuĩte

14 handũ ha kũhooya MWATHANI. Kwoguo MWATHANI akĩmũũraga, naguo ũthamaki wake akĩũhe Daudi mũrũ wa Jesii.

Daudi gũtuĩka mũthamaki wa Isiraeli na Juda

1 Hĩndĩ ĩyo andũ oothe a Isiraeli magĩthiĩ Heburoni kũrĩ Daudi makĩmwĩra atĩrĩ, “Tũrĩ a mũthiimo ũmwe nawe, o na a mwĩrĩ ũmwe.

2 O na rĩrĩa Saũlũ aakoragwo arĩ mũthamaki witũ, wee nĩ we watongoragia andũ a Isiraeli magĩthiĩ mbaarainĩ o na makĩinũka. Naake MWATHANI Ngai waku agĩkwĩrĩra atĩ nĩũkaarĩithagia andũ aake, na ũtuĩke mũtongoria wao.”

3 Tondũ ũcio atongoria oothe a Isiraeli magĩthiĩ kwĩ mũthamaki Daudi kũu Heburoni. Naake agĩthondeka kĩrĩĩkanĩro nao, nao makĩmũitĩrĩria maguta, agĩtuĩka mũthamaki wa bũrũri wa Isiraeli, o ta ũrĩa MWATHANI eeranĩire ahũthĩrĩĩte Samũeli.

4 Naake Daudi na andũ oothe a Isiraeli magĩthiĩ, magĩtharĩkĩra itũũra rĩa Jerusalemu. Hĩndĩ ĩyo itũũra rĩu rĩetagwo Jebusi, na Ajebusi, arĩa maarĩ atũũri aakuo kuuma o tene, maatũũraga o kuo.

5 Nao Ajebusi makĩĩra Daudi ndangĩtoonya kuo o na atĩa. No Daudi agĩtuunyana itũũra rĩao rĩa Zayuni, rĩrĩa rĩairigĩirwo na rũthingo rwa hinya, narĩo rĩgĩcooka gwĩtagwo “Itũũra rĩa Daudi.”

6 Naake Daudi akiuga atĩrĩ, “Mũndũ wa mbere ũrĩa ũkũũmĩrĩrĩria kũhũũra Ajebusi, nĩwe ũgũtuĩka mũtongoria wa mbũtũ cia ita.” Joabu, ũrĩa nyina eetagwo Zeruia, nĩ we warĩ wa mbere gwĩka ũguo, naake agĩtuuo mũtongoria.

7 Naake Daudi agĩgĩtũũra itũũrainĩ rĩu rĩairigĩĩtwo na rũthingo rwa hinya, narĩo rĩgĩcooka, gwĩtagwo “Itũũra rĩa Daudi.”

8 Agĩcooka akĩrĩakĩrĩra, aambĩrĩirie na mwena wa irathĩro wa kĩrĩma, tondũ nĩkuo thĩ yaraganĩĩte wega. Naake Joabu agĩcookereria itũũra rĩu kũrĩa gwatigarĩĩte.

9 Naake Daudi agĩkĩrĩrĩria kũgĩa na hinya nĩ ũndũ MWATHANI Mwene Hinya Wothe aarĩ hamwe naake.

Thigari cia Daudi iria ciarĩ njamba

10 Ũyũ nĩguo mũtaratara wa thigari cia Daudi iria ciarĩ igweta. Thigari ici, inyiitanĩire na andũ arĩa angĩ a Isiraeli, nĩcio ciamũteithĩrĩirie gũtuĩka mũthamaki, o ta ũrĩa MWATHANI eeranĩire. Nocio ciamũteithĩrĩirie nĩguo ũthamaki wake wĩhande wega.

11 Njamba ya mbere yetagwo Jashobeamu ya mbarĩ ya Ahakimoni. Nĩ yo yarĩ mũnene wa anene arĩa angĩ a mbũtũ cia ita moĩkaine ta “Njamba Ithatũ.” Yahũũranire na andũ magana matatũ, ĩkĩmooraga oothe na itimũ rĩayo mbaarainĩ o ĩmwe.

12 Njamba ya keerĩ thĩinĩ wa njamba icio ithatũ yetagwo Eleazaru mũrũ wa Dodo ya mbarĩ ya Ahohi.

13 Hĩndĩ ĩmwe, ĩrĩ hamwe na Daudi nĩyarũire na Afilisiti kũndũ gwetagwo Pasi Damimu. Yarĩ handũ mũgũnda waiyũire mbaarĩ, rĩrĩa Asiraeli maambĩrĩirie kũũra nĩ guoya.

14 No yo hamwe na andũ aayo makĩrũũgama mũgũndainĩ ũcio gatagatĩ, makĩhũũrana na Afilisiti. Naake MWATHANI akĩmahe ũhootani mũnene.

15 Mũthenya ũmwe, njamba ithatũ thĩinĩ wa anene mĩrongo ĩtatũ arĩa maarĩ njamba cia ita, magĩikũrũka ngurungainĩ ya Adulamu kũrĩa Daudi aarĩ. Hĩndĩ ĩyo mbũtũ ya ita ya Afilisiti yakĩĩte kambĩ yayo gĩtuambainĩ kĩa Refaimu.

16 Daudi aarĩ handũ kĩrĩmainĩ hagitĩirwo na hinya, nakĩo gĩkundi kĩmwe kĩa mbũtũ cia ita cia Afilisiti nĩgĩathiĩte, gĩgaikara Bethilehemu.

17 Naake Daudi akĩigua anyootiĩ mũno akiuga atĩrĩ, “Naarĩ korwo ndoona mũndũ ũngĩndeehere maaĩ ma kũnyua kuuma gĩthimainĩ kĩrĩa kĩrĩ kĩhingoinĩ kĩa Bethilehemu!”

18 Thigari iria ithatũ ciarĩ njamba, igĩgĩtuĩkanĩria kambĩinĩ ya Afilisiti, igĩtaha maaĩ kuuma gĩthimainĩ, ikĩreehera Daudi. No we handũ ha kumanyua akĩmaita thĩ marĩ igongoona kũrĩ MWATHANI.

19 Akiuga atĩrĩ, “Niĩ ndingĩhota kũnyua maaĩ maya, tondũ ingĩĩka ũguo, no ta kũnyua ingĩkorwo ngĩnyua thakame ya andũ aya megwĩtwarĩrĩirie ũgwatiinĩ wa gĩkuũ!” Nĩ ũndũ ũcio ndaigana kũmanyua. Macio nĩ mo maũndũ ma ũcamba marĩa thigari icio ithatũ njamba ciekire.

20 Abishai, mũrũ wa nyina na Joabu nĩwe warĩ mũtongoria wa thigari icio cioĩkaine ta “Njamba Mĩrongo Ĩtatũ.” Naake akĩhũũrana na andũ magana matatũ arĩ na itimũ rĩake, akĩmooraga. Tondũ wa ũguo akĩĩgĩĩra igweta inene thĩiniĩ wa “Njamba icio Mĩrongo Ĩtatũ.”

21 Nĩ we warĩ igweta mũno thĩinĩ wa njamba icio “Mĩrongo Ĩtatũ,” na kwoguo agĩgĩtuuo mũnene wao. No rĩĩrĩ, ndarĩ na igweta inene gũkĩra “Njamba iria cia mbere Ithatũ.”

22 O naake Benaia mũrũ wa Jehoiada wa kuuma Kabizeeli aarĩ mũthigari warĩ igweta mũno. Nĩekire ciĩko nyingĩ cia ũcamba, imwe ciacio irĩ ta ici: kũũraga thigari igĩrĩ ciarĩ igweta cia Moabi. Ningĩ hĩndĩ ĩmwe kwoiraga mbura ya mbarabu nĩathiire agĩtoonya irima thĩinĩ, akĩũragĩra mũrũũthi kuo.

23 Agĩcooka akĩũraga Mũmisiri, mũndũ warĩ na kĩũga kĩnene mũno, warĩ na ũraihu wa makĩria ma mita igĩrĩ na warĩ na itimũ inene. Banaia aamũtharĩkĩire na njũgũma, akĩhuria itimũ rĩrĩa aanyiitĩĩte na guoko akĩmũũraga narĩo.

24 Icio nĩcio ciĩko cia ũcamba iria Benaia, ũrĩa warĩ ũmwe wa “Njamba iria Mĩrongo Ĩtatũ” eekire.

25 Nĩ we wekĩrĩirwo mũno thĩinĩ wa iria “Mĩrongo Ĩtatũ,” no rĩĩrĩ, ndeekĩrĩirwo mũno ta “Njamba iria cia mbere Ithatũ.” Naake Daudi akĩmũtua mũnene wa thigari iria ciamũrangagĩra.

26-47 Thigari iria ingĩ ciarĩ njamba nĩ ici:

Asaheli, mũrũ wa nyina na Joabu

Elihanani mũrũ wa Dodo wa kuuma Bethilehemu

Shamothu wa kuuma Harodi

Helezu wa kuuma Peleti

Ira mũrũ wa Ikeshu wa kuuma Tekoa

Abiezeri wa kuuma Anathothu

Sibekai wa kuuma Husha

Ilai wa kuuma mbarĩ ya Ahohi

Maharai wa kuuma Netofa

Heledi mũrũ wa Baana wa kuuma Netofa

Ithai mũrũ wa Ribai wa kuuma Gibea bũrũriinĩ wa Benjamini

Benaia wa kuuma Pirathoni

Hurai wa kuuma ituambainĩ cia Gaashu

Abieli wa kuuma Ariba

Azimavethu wa kuuma Bahurumu

Eliaba wa kuuma Shaaliboni

Hashemu wa kuuma Gizoni

Jonathani mũrũ wa Shagee wa kuuma Harari

Ahiamu mũrũ wa Sakaru wa kuuma Harari

Elifali mũrũ wa Uru

Heferi wa kuuma Mekera

Ahija wa kuuma Peloni

Heziro wa kuuma Karimeli

Naarai mũrũ wa Ezibai

Joeli mũrũ wa nyina na Nathani

Mibihari mũrũ wa Hagiri

Zeleku wa kuuma Aamoni

Naharai, ũrĩa wakuuagĩra Joabu indo cia mbaara wa kuuma Beerothu

Ira na Garebu a kuuma Jatiri

Uria ũrĩa Mũhiti

Zabadu mũrũ wa Ahalai

Adina mũrũ wa Shiza (aarĩ mũtongoria ũmwe wa bata wa mũhĩrĩga wa Reubeni na aarĩ na thigari ciake mĩrongo ĩtatũ.)

Hanani mũrũ wa Maaka

Joshafatu wa kuuma Mithani

Uzia wa kuuma Ashitera

Shama na Jeieli aariũ a Hothamu a kuuma Aroeri

Jediaeli na Joha aariũ a Shimuri a kuuma Tizi

Elieli wa kuuma Mahava

Jeribai na Joshavia aariũ a Elinaamu

Ithima wa kuuma Moabi

Elieli, Obedi, na Jaasieli a kuuma Zoba.

Andũ a mbere a mũhĩrĩga wa Benjamini kũrũmĩrĩra Daudi

1 Na rĩĩrĩ, Daudi aatũũraga Zikilagi ehithĩĩte mũthamaki Saũlũ. Arĩ o kũu, thigari nyingĩ, njamba na njĩhokeku, igĩũka kũrĩ we,

2 ciumĩĩte mũhĩrĩgainĩ wa Benjamini, ũrĩa warĩ wa Saũlũ. Ciarĩ njoorua cia gũikia mĩguĩ o na gũikia mahiga na kĩgũtha na guoko kwa ũrĩo kana kwa ũmotho.

3-7 Nao atongoria a thigari icio maarĩ Ahiezeri na Joashu aariũ a Shemaa a kuuma Gibea.

Nacio thigari icio nĩ ici:

Jezieli na Peleti aariũ a Azimavethu

Beraka na Jehu aa kuuma Anathothu

Ishimaia wa kuuma Gibeoni ũrĩa warĩ njamba na ũmwe wa atongoria a njamba iria “Mĩrongo Ĩtatũ”

Jeremia, Jahazieli, Jahanani na Jozabadu a kuuma Gedera

Eluzai, Jerimothu, Bealia, Shemaria na Shefatia a kuuma Harifi

Elikana, Ishia, Azareli, Joezeru na Jashobeamu a mbarĩ ya Kora.

Joela na Zebadia, aariũ a Jerohamu, a kuuma Gedori.

Andũ a mũhĩrĩga wa Gadi arĩa maarũmĩrĩire Daudi

8 Ici nĩcio thigari iria irĩ igweta na njoorua cia mũhĩrĩga wa Gadi, iria ciathiire kũrĩ Daudi nyũmbainĩ ĩrĩa yagitĩirwo na thingo cia hinya werũinĩ. Ciarĩ njoorua cia kũrũa na matimũ o na kwĩgita na ngo, namo moothiũ maacio maarĩ na ũũru mũingĩ o ta mũrũũthi, na ikagĩa ihenya o ta thwariga ĩrĩ irĩmainĩ.

9-13 Nacio thigari icio ciarũmanĩrĩire ta ũũ kũringana na ũnene: Ezeri, Obadia, Eliabu, Mishimana, Jeremia, Atai, Elieli, Johanani, Elizabadu, Jeremia, na Makabanai.

14 Thigari icio cioimĩĩte mũhĩrĩgainĩ wa Gadi, na ciarĩ atongoria a ngathĩ cia igũrũ. Imwe ciacio ciarũũgamagĩrĩra thigari ngiri ĩmwe (1,000), nacio iria ciarĩ cia ngathĩ cia thĩ ikarũũgamĩrĩra thigari igana.

15 Na rĩĩrĩ, mweriinĩ wa mbere wa mwaka, o rĩrĩa rũũĩ rwa Jorodani rwaiyũrĩĩte rũkoina, igĩthiĩ ikĩrũringa, ikĩhurunja andũ oothe arĩa maatũũraga ituambainĩ cia mwena wa irathĩro na wa ithũĩro wa rũũĩ rũu.

Andũ a mũhĩrĩga wa Benjamini na wa Juda arĩa maarũmĩrĩire Daudi

16 Na rĩĩrĩ, andũ moimĩĩte mũhĩrĩgainĩ wa Benjamini na wa Juda, magĩthiĩ kũrĩ Daudi nyũmbainĩ ĩrĩa yagitĩirwo na thingo cia hinya.

17 Naake Daudi akiumagara akamatũnge, akĩmeera atĩrĩ, “Mũngĩkorwo mũũkĩĩte kũrĩ niĩ ta araata nĩguo mũndeithie, nĩndamwamũkĩra. No rĩĩrĩ, mũngĩkorwo mũũkĩĩte mũngunyanĩre gwĩ thũ ciakwa, o na hatarĩ ũũru njĩkĩĩte, Ngai wa maithe maitũ aromenya na amũherithie.”

18 Amasai mũnene wa thigari iria “Mĩrongo Ĩtatũ” akĩiyũrwo nĩ roho wa Ngai akiuga atĩrĩ,

“Daudi, ithuĩ tũrĩ aaku!

Tũrĩ a mwena waku, mũrũ wa Jesii!

Ũrogĩa na ũhootani ũrĩ hamwe na arĩa magũteithagia!

Ngai arĩ mwena waku!”

Naake Daudi akĩmaamũkĩra na akĩmatua anene a mbũtũ ciake cia ita.

Andũ a mũhĩrĩga wa Manase arĩa maarũmĩrĩire Daudi.

19 Na rĩĩrĩ, thigari imwe cia kuuma mũhĩrĩgainĩ wa Manase igĩthiĩ mwena wa Daudi hĩndĩ ĩrĩa oimagarire hamwe na Afilisiti kũhũũrana na mũthamaki Saũlũ. No rĩĩrĩ, Daudi ndaigana gũteithĩrĩria Afilisiti, nĩ gũkorwo athamaki a Afilisiti maamwĩkũaga atĩ ahota gũkaamakunyanĩra he Saũlũ mwathi wake. Nĩ ũndũ ũcio, makĩmũingata agĩthiĩ Zikilagi.

20 Na rĩĩrĩ, thigari ici cia mũhĩrĩga wa Manase nĩcio ciathiire mwena wa Daudi hĩndĩ ĩyo acookaga Zikilagi: Adina, Jozabadu, Jedieli, Mikaeli, Jozabadu, Elihu, na Zilethai. Mbere ĩyo o ũmwe wao aarũũgamagĩrĩra thigari ngiri (1,000) cia mũhĩrĩga wa Manase.

21 Nacio igĩgĩteithĩrĩria Daudi kũhũũrana na andũ arĩa maamũtharĩkagĩra tondũ ciarĩ thigari njoorua. Ningĩ nĩcio ciacookire gũtuĩka atongoria thĩinĩ wa mbũtũ cia ita cia Isiraeli.

22 Na rĩĩrĩ, thigari cia Daudi ciathiaga ikĩongererekaga mũthenya o mũthenya. Nĩ ũndũ ũcio, mbũtũ yake ya ita igĩkĩneneha mũno makĩria.

Mũtaratara wa ita cia Daudi

23-37 Na rĩĩrĩ, rĩrĩa Daudi aarĩ Heburoni thigari nyingĩ njoorua nĩciathiire mwena wake nĩguo ikamũteithĩrĩrie gũtuĩka mũthamaki ithenya rĩa Saũlũ, o ta ũrĩa MWATHANI eeranĩire. Mũigana wa thigari icio wahaanaga ta ũũ:

mũhĩrĩga wa Juda: arũme ngiri ithathatũ na magana manaana (6,800), ciarĩ na indo cia mbaara o ũũ wega

mũhĩrĩga wa Simeoni: arũme ngiri mũgwanja na igana rĩmwe (7,100), njamba cia kũrũa mbaara

mũhĩrĩga wa Lawi: arũme ngiri inya na magana matandatũ (4,600)

arũmĩrĩri a Jehoiada wa rũciaro rwa Harũni: arũme ngiri ithatũ na magana mũgwanja (3,700)

andũ a nyũmba ya Zadoku, mwanake warĩ njoorua na kũrũa mbaara: atongoria mĩrongo ĩĩrĩ na eerĩ;

mũhĩrĩga wa Benjamini (na nĩguo warĩ wa Saũlũ): arũme ngiri ithatũ (3,000), (andũ aingĩ a mũhĩrĩga ũyũ maathĩkagĩra Saũlũ).

Mũhĩrĩga wa Efiraimu: arũme ngiri mĩrongo ĩĩrĩ na magana manaana (2,800), andũ maarĩ igweta mbarĩinĩ ciao

nuthu ya mũhĩrĩga wa Manase ya mwena wa ithũĩro: arũme ngiri ikũmi na inyaanya (18,000) arĩa maathuurĩĩtwo magatue Daudi mũthamaki

mũhĩrĩga wa Isakaru: atongoria magana meerĩ (200) o hamwe na andũ arĩa maatongoragia (atongoria mooĩ gũkũũrana mahinda, na makamenya ũrĩa Aisiraeli maagĩrĩirwo nĩgwĩka)

mũhĩrĩga wa Zebuluni: arũme ngiri mĩrongo ĩtaano (50,000), ehokeku, meeheyanĩĩte kũrũa mbaara, na maarĩ na ũũgĩ wa kũhũthĩra indo ciothe cia mbaara

mũhĩrĩga wa Nafutali: atongoria ngiri ĩmwe (1,000) hamwe na arũme ngiri mĩrongo ĩtatũ na mũgwanja (37,000) andũ maarĩ na matimũ na ngo

mũhĩrĩga wa Dani: arũme ngiri mĩrongo ĩĩrĩ na inyaanya na magana matandatũ (28,600) andũ maarĩ na ũũgĩ wa kũrũa mbaara;

mũhĩrĩga wa Asheri: arũme ngiri mĩrongo ĩna (40,000) maikaraga mehaarĩirie kũrũa

mũrĩmo wa irathĩro wa rũũĩ rwa Jorodani: arũme ngiri igana rĩa mĩrongo ĩĩrĩ (120,000) a mũhĩrĩga wa Reubeni, Gadi na nuthu ya mũhĩrĩga wa Manase maarĩ na ũũgĩ wa kũhũthĩra indo ciothe cia mbaara.

38 Thigari icio ciothe igĩthiĩ Heburoni na ciaikaraga ciĩhaarĩirie kũrũa, na irĩ na ngoro ĩmwe ya gũtua Daudi mũthamaki wa Aisiraeli. Andũ arĩa angĩ oothe a Isiraeli nĩmaanyiitanĩire nao ũndũinĩ ũcio wa gũtua Daudi mũthamaki.

39 Nacio igĩikarania na Daudi kũu aarĩ, ikĩrĩa na ikĩnyua tondũ nĩciarugĩirwo wega nĩ Aisiraeli arĩa angĩ.

40 O na mĩhĩrĩga ya mwena wa na rũgongo biũ ya Isakaru, Zebuluni, na Nafutali nĩyacitwarĩire irio ikuuĩĩtwo na ndigiri, ngamĩĩra, nyũmbũ, o na ndeegwa. Irio icio ciarĩ mũtu, keeki cia ngũyũ, imanjĩka cia thabibũ nyũmũ, ndibei, na maguta ma mĩtamaiyũ. Ningĩ nĩmaatwarire ndeegwa na ng’ondu nĩguo mamathĩnjĩre marĩe. Ũndũ ũcio wothe wekĩkire nĩ ũndũ wa gĩkeno kĩrĩa kĩarĩ kũu Isiraeli guothe.

Ithandũkũ rĩa Kĩrĩĩkanĩro kũrutwo Kiriathu Jearimu

1 Na rĩĩrĩ, mũthamaki Daudi agĩcookania ndundu na anene oothe a thigari ngiri, o na a thigari igana.

2 Naake akĩĩra Aisiraeli oothe arĩa moonganĩĩte kũu atĩrĩ, “Mũngĩkorwo nĩmũkuona kwagĩrĩire, naguo ũndũ ũcio ũkorwo nĩ wendi wa MWATHANI Ngai witũ-rĩ, nĩtũrekiei arekio mathiĩ kũrĩ andũ arĩa angĩ aitũ, o na kũrĩ athĩnjĩri Ngai na Alawii arĩa marĩ matũũrainĩ maao, mameere mooke meturanĩre na ithuĩ.

3 Hĩndĩ ĩyo tũkĩgĩĩre Ithandũkũ rĩa Ngai rĩa Kĩrĩĩkanĩro, rĩrĩa rĩatiganĩirio hĩndĩ ya mũthamaki Saũlũ.”

4 Nao andũ oothe magĩkenio nĩ ũhoro ũcio na magĩĩtĩkĩra kũwĩka.

5 Tondũ ũcio Daudi agĩcookanĩrĩria andũ acio oothe a Isiraeli kuuma bũrũri wothe. Aarutĩĩtie kuuma karũũĩ ka Misiri karĩa geetagwo Shihoru na mwena wa kĩanda, o nginya itoonyeroinĩ rĩa Hamothu na mwena wa rũgongo, nĩ geetha magĩĩre Ithandũkũ rĩa Kĩrĩĩkanĩro kuuma Kiriathu Jearimu marĩtware Jerusalemu.

6 Naake Daudi na andũ oothe a Isiraeli, makĩambata Baala, na nokuo Kiriathu Jearimu thĩinĩ wa Juda, nĩguo makagĩĩre Ithandũkũ rĩa Ngai rĩa Kĩrĩĩkanĩro, rĩrĩa rĩĩtanĩĩtio na rĩĩtwa rĩa MWATHANI ũrĩa ũikaraga atũũgĩrĩĩtio igũrũ wa ciũmbe iria irĩ mathagu.

7 Nao makĩruta Ithandũkũ rĩu rĩa Kĩrĩĩkanĩro kuuma nyũmbainĩ ya Abinadabu, makĩrĩigĩrĩra igũrũ wa ngaari njerũ ya kũguucio. Nao Uza na Ahio magĩtwarithia ngaari ĩyo.

8 Naake Daudi na andũ oothe a Isiraeli makĩina makĩrũũhagia na hinya wao wothe nĩguo makumie Ngai. Mainaga makĩhũũraga inanda, ngita, tamburini, thaani iria ihũũrithanagio ikagamba, na makĩhuuhaga tũrumbeeta.

9 Na rĩĩrĩ, rĩrĩa maakinyire kĩhuuhĩroinĩ kĩa ngano gĩa Kidoni, ndeegwa ikĩhingwo, naake Uza agĩtambũrũkia guoko akĩnyiitĩrĩra Ithandũkũ rĩa Kĩrĩĩkanĩro.

10 Naake MWATHANI akĩraakario nĩ Uza, akĩmũũraga nĩ ũndũ wa kũhuutia ithandũkũ. Naake agĩkuĩra o hau.

11 Nĩ ũndũ ũcio, handũ hau hatũire heetagwo Perezu Uzakinyagia ũũmũũthĩ. Naake Daudi akĩraakara nĩ ũndũ MWATHANI nĩaherithirie Uza na maraakara.

12 Naake Daudi agĩĩtigĩra Ngai akiuga atĩrĩ, “Rĩu-rĩ, ingĩtwara Ithandũkũ rĩĩrĩ rĩa Kĩrĩĩkanĩro gwakwa atĩa hiihi?”

13 Nĩ ũndũ ũcio Daudi ndatwarire Ithandũkũ rĩa Kĩrĩĩkanĩro Jerusalemu. Handũ ha ũguo, aarĩtigire mũciĩ kwa mũndũ wetagwo Obedi Edomu, ũrĩa warĩ wa itũũra rĩa Gathu.

14 Narĩo Ithandũkũ rĩu rĩa Kĩrĩĩkanĩro rĩgĩikara kuo mĩeri ĩtatũ. Naake MWATHANI akĩraathima mũciĩ wa Obedi Edomu, o na kĩrĩa gĩothe aarĩ nakĩo.

Maũndũ marĩa Daudi eekire arĩ Jerusalemu

1 Na rĩĩrĩ, Hiramu mũthamaki wa Turo akĩrekeria Daudi njaama cia ahũũri mbiacara. Agĩcooka akĩmũtwarithĩria mĩtarakwa, o hamwe na mabundi ma mbaaũ na ma mahiga makamwakĩre nyũmba.

2 Nĩ ũndũ ũcio Daudi agĩkĩmenya atĩ MWATHANI nĩamũhandĩĩte akamũtua mũthamaki wa Isiraeli. Ningĩ nĩatũmaga ũthamaki wake ũgaacĩre nĩ ũndũ wa andũ aake a Isiraeli.

3 Na rĩĩrĩ, Daudi arĩ kũu Jerusalemu akĩhikia atumia angĩ, nao makĩmũciarĩra ciana ingĩ cia aanake na cia airĩĩtu.

4 Ici nĩcio ciana ciake iria ciaciarĩirwo kũu Jerusalemu: Shamua, Shobabu, Nathani, Solomoni,

5 Ibiharu, Elishua, Elipeleti,

6 Noga, Nefegu, Jafia,

7 Elishama, Beeliada, na Elifeleti.

Afilisiti kũhootwo

8 Na rĩĩrĩ, rĩrĩa Afilisiti maiguire atĩ Daudi nĩatuĩtwo mũthamaki wa bũrũri wothe wa Isiraeli, makiumagara makamũnyiite. Naake Daudi aigua ũhoro ũcio akiumagara nĩguo akahũũrane nao.

9 Nao Afilisiti magĩkinya gĩtuambainĩ kĩa Refaimu, makĩambĩrĩria gũtaha indo.

10 Naake Daudi agĩtuĩria ũhoro he Ngai akĩmũũria atĩrĩ, “Tharĩkĩre Afilisiti? Nĩũkũũhe ũhootani igũrũ rĩao?”

Naake MWATHANI akĩmũcookeria atĩrĩ, “Ĩĩ, matharĩkĩre. Nĩngũkũhe ũhootani!”

11 Kwoguo Daudi agĩthiĩ Baali Perazimu, akĩhootera Afilisiti kuo. Akiuga atĩrĩ, “Ngai ahũthĩrĩĩte ngatũrĩkĩria gatagatĩ ga thũ ciakwa o ta mũiyũro wa maaĩ.” Nĩ ũndũ ũcio handũ hau heetagwo Baali Perazimu.

12 Afilisiti moora, magĩtiga mĩhianano ya ngai ciao hau, naake Daudi agĩathana ĩcinwo.

13 Thuutha ũcio Afilisiti magĩcooka o rĩngĩ gĩtuambainĩ kĩa Refaimu, makĩambĩrĩria gũtaha indo.

14 O rĩngĩ Daudi agĩtuĩria ũhoro harĩ Ngai, naake akĩmũcookeria atĩrĩ, “Ndũkaamatharĩkĩre kuuma mwena ũyũ; thiũrũrũka ũmatharĩkĩre kuuma na mwena ũũrĩa ũngĩ, hakuhĩ na mĩkũngũgũ.

15 Rĩrĩa ũrĩigua mũkubio ta wa andũ mekũgera mĩtĩ igũrũ, hingo ĩyo ũrĩtharĩkĩra, nĩ gũkorwo ndĩrĩkorwo ngũtongoreetie kũhoota ita cia Afilisiti.”

16 Daudi agĩgĩĩka o ta ũrĩa Ngai aamwathĩĩte, akĩingata Afilisiti kuuma Gibeoni o nginya Gezeri.

17 Nayo ngumo ya Daudi ĩgĩkĩhunja kũndũ guothe, naake Ngai agĩtũma Daudi eetigĩrwo nĩ ndũũrĩrĩ ciothe.

Kwĩhaarĩria gũthaamia Ithandũkũ rĩa Kĩrĩĩkanĩro

1 Naake Daudi agĩgĩaka nyũmba nyingĩ itũũrainĩ rĩa Daudi nĩ ũndũ wa mabata maake. Agĩcooka agĩthondeka handũ akĩamba hema ho nĩguo haigagwo Ithandũkũ rĩa Ngai rĩa Kĩrĩĩkanĩro.

2 Hĩndĩ ĩyo akiuga atĩrĩ, “No Alawii oiki maagĩrĩirwo nĩgũkuua Ithandũkũ rĩa Kĩrĩĩkanĩro, nĩ gũkorwo acio nĩ o MWATHANI aathuurire marĩkuuage na matũũre mamũtungatagĩra hĩndĩ ciothe.”

3 Nĩ ũndũ ũcio Daudi agĩcookanĩrĩria andũ oothe a Isiraeli kũu Jerusalemu nĩguo makagĩĩre Ithandũkũ rĩa Kĩrĩĩkanĩro marĩreehe handũ hau aarĩthondekeire.

4 Agĩcooka agĩcookanĩrĩria njiarwa cia Harũni o na Alawii.

5 Kuuma mbarĩ ya Kohathu gũgĩũka andũ igana rĩa mĩrongo ĩĩrĩ, (120) matongoreetio nĩ Urieli;

6 kuuma mbarĩ ya Merari gũgĩũka andũ magana meerĩ ma mĩrongo ĩĩrĩ (220) matongoreetio nĩ Asaia;

7 kuuma mbarĩ ya Gerishoni gũgĩũka andũ igana rĩa mĩrongo ĩtatũ (130) matongoreetio nĩ Joeli;

8 kuuma mbarĩ ya Elizafani gũgĩũka andũ magana meerĩ (200) matongoreetio nĩ Shemaia;

9 kuuma mbarĩ ya Heburoni gũgĩũka andũ mĩrongo ĩnaana (80) matongoreetio nĩ Elieli;

10 kuuma mbarĩ ya Uzieli gũgĩũka andũ igana na ikũmi na eerĩ (112) matongoreetio nĩ Aminadabu.

11 Ningĩ Daudi agĩĩta Zadoku na Abiatharu athĩnjĩri Ngai o na Alawii atandatũ mooke harĩ we, nao nĩ: Urieli, Asaia, Joeli, Shemaia, Elieli, na Aminadabu.

12 Akĩmeera atĩrĩ, “Inyuĩ nĩ inyuĩ atongoria a mbarĩ cia Alawii. Mwĩtheriei inyuĩ eene o na Alawii arĩa angĩ nĩ geetha mũkagĩĩre Ithandũkũ rĩa Kĩrĩĩkanĩro kĩa MWATHANI Ngai wa Isiraeli mũrĩreehe handũ harĩa ndĩrĩthondekeire.

13 Tondũ mũtiarĩkuuĩĩte ihinda rĩrĩa rĩa mbere, nĩkĩo MWATHANI Ngai witũ aatũraakarĩire nĩ ũndũ tũtiarĩmenyereire wega.”

14 Tondũ ũcio athĩnjĩri Ngai na Alawii magĩĩtheria magĩthirwo nĩ thaahu nĩguo magĩĩre Ithandũkũ rĩa Kĩrĩĩkanĩro kĩa MWATHANI Ngai wa Isiraeli.

15 Nao Alawii makĩrĩkuua na mĩtĩ mĩraaya maigĩrĩire ciande ciao o ta ũrĩa MWATHANI aathanĩĩte ahũthĩrĩĩte Musa.

16 Naake Daudi akĩĩra atongoria a Alawii mathuure Alawii amwe a kũina na kũhũũra inanda na thaani iria ihũũrithanagio makeneete.

17-21 Tondũ ũcio magĩgĩthuura andũ kuuma mbarĩ iria cioĩ kũina a kũhũũra thaani iria ihũũrithanagio ikagamba. Andũ acio maarĩ Hemani mũrũ wa Joeli, mũrũ wa ithe Asafu mũrũ wa Berekia, na Ethani mũrũ wa Kushaia, a mbarĩ ya Merari. Hamwe na acio gũgĩthuurwo Alawii a kũhũũra inanda iria i mũgambĩre mũceke, nao nĩ Zekaria, Jaazieli, Shemiramothu, Jehieli, Uni, Eliabu, Maaseia, na Benaia.

Alawii arĩa maathuurirwo a kũhũũra inanda iria i mũgambĩre wa kũruruma nĩ: Matithia, Elifelehu, Mikineia, Azazia, na Obedi Edomu na Jeieli arĩa maarĩ arangĩri a Hekaarũ.

22 Naake Kenania nĩ ũndũ wa ũrĩa aarĩ njoorua ya kũina agĩthuurwo ainithagie Alawii.

23-24 Nao Berekia, Elikana, Obedi Edomu, na Jehia magĩthuurwo mamenyerere Ithandũkũ rĩa Kĩrĩĩkanĩro. Nao athĩnjĩri Ngai aya: Shebania, Benaia, Eliezeri, Joshafatu, Nethaneli, Amasai, na Zekaria, magĩthuurwo mathiĩ makĩhuuhaga tũrumbeeta matongoreetie Ithandũkũ rĩa Kĩrĩĩkanĩro.

Gũthaamĩria Ithandũkũ rĩa Kĩrĩĩkanĩro Jerusalemu

25 Kwoguo mũthamaki Daudi, atongoria a Isiraeli, na anene a thigari magĩgĩthiĩ kwa Obedi Edomu makeneete makagĩĩre Ithandũkũ rĩa Kĩrĩĩkanĩro.

26 Nao makĩruta igongoona rĩa ndeegwa mũgwanja na ndũrũme mũgwanja, nĩ geetha Ngai ateithie Alawii arĩa maakuuĩĩte Ithandũkũ rĩa Kĩrĩĩkanĩro.

27 Hĩndĩ ĩyo Daudi, aini a nyĩmbo, Kenania mũtongoria wao, o na Alawii arĩa maakuuĩĩte Ithandũkũ rĩa Kĩrĩĩkanĩro, meehumbĩĩte nguo ndaaya cia gataani. Ningĩ Daudi nĩehumbĩĩte ebodi ya gataani.

28 Kwoguo Aisiraeli oothe makĩambatia Ithandũkũ rĩa Kĩrĩĩkanĩro Jerusalemu makĩanagĩrĩra nĩgũkena, makĩhuuhaga tũrumbeeta na macoro, makĩhũũrithanagia thaani iria igambaga, o na makĩhũũraga inanda.

29 Hĩndĩ ĩrĩa Ithandũkũ rĩa Kĩrĩĩkanĩro rĩatoonyagio itũũrainĩ, Mikali, mwarĩ wa Saũlũ, agĩcũũthĩrĩria e ndiricainĩ, akĩona mũthamaki Daudi akĩina akĩrũũgarũũgaga nĩgũkena, akĩmũnyarara.

1 Magĩtwara Ithandũkũ rĩa Kĩrĩĩkanĩro hemainĩ ĩrĩa Daudi aambĩĩte nĩ ũndũ warĩo, makĩrĩiga kũu thĩinĩ. Magĩcooka makĩrutĩra MWATHANI magongoona ma njino na ma thaayũ.

2 Rĩrĩa Daudi aarĩĩkirie kũruta magongoona macio akĩraathima andũ rĩĩtwainĩ rĩa MWATHANI,

3 na akĩmagaĩra irio oothe. Akĩhe mũndũ mũrũme na mũndũ wa nja thĩinĩ wa Isiraeli mũgate, o mũndũ gĩcunjĩ kĩa nyama hĩĩhie, na keeki ya thabibũ nyũmũ.

4 Naake Daudi agĩthuura Alawii amwe matongoragie andũ magĩthaathaiya MWATHANI Ngai wa Isiraeli. Marĩmatongoragia makĩinaga na makĩgoocaga MWATHANI marĩ mbere ya Ithandũkũ rĩa Kĩrĩĩkanĩro.

5 Naake Asafu agĩthuurwo atuĩke mũtongoria wao, naake Zekaria agĩthuurwo amũteithagĩrĩrie. Nao Shemiramothu, Jeieli, Matithia, Eliabu, Benaia, Obedi Edomu, Jeieli magĩthuurwo mahũũrage inanda. Asafu aathuurirwo ahũũrithanagie thaani iria igambaga.

6 Nao Benaia na Jahazieli, arĩa maarĩ athĩnjĩri Ngai, magĩthuurwo mahuuhage tũrumbeeta marĩ mbere ya Ithandũkũ rĩa Kĩrĩĩkanĩro.

7 Mũthenya ũcio nĩguo Daudi aaheire Asafu na Alawii arĩa angĩ wĩra wa gũcookagĩria MWATHANI ngaatho makĩinaga.

Rwĩmbo rwa kũgooca

8 Cookeriai MWATHANI ngaatho,

anĩrĩraai ũnene wake;

menyithiai andũ oothe a thĩ ũrĩa eekĩĩte!

9 Mũgooceei na nyĩmbo;

menyithaniai maũndũ moothe ma magegania marĩa eekĩĩte!

10 Kenaai tondũ tũrĩ aake;

arĩa oothe mamũthaathayagia nĩmacanjamũke!

11 Cariai MWATHANI, o na hinya wake;

mũthaathayagiei hingo ciothe.

12-13 Inyuĩ njiarwa cia Aburahamu, ndũngata ya Ngai,

o na inyuĩ njiarwa cia Jakubu, arĩa Ngai aathuurĩĩte,

ririkanaai ciama iria Ngai aaringire

o na matuĩro marĩa aatuire.

14 MWATHANI nĩ we Ngai witũ;

maathani maake nĩmakũrũmagĩrĩrwo nĩ thĩ yothe.

15 Egũtũũra amenyereire kĩrĩĩkanĩro gĩake nginya tene na tene,

na ndakaariganĩrwo nĩ ciĩranĩro ciake rĩ kana rĩ.

16 Kĩrĩĩkanĩro kĩu nĩkĩo aarĩĩkanĩire na Aburahamu

na nokĩo eerĩire Isaaka na mwĩhĩtwa.

17 MWATHANI nĩerũhĩirie Jakubu kĩrĩĩkanĩro kĩu,

gĩa gũtũũra tene na tene,

18 akiuga atĩrĩ, “Nĩngaakũhe bũrũri wa Kanaani;

ũcio nĩguo ũgaatuĩka igai rĩaku.”

19 Andũ acio a Ngai matiarĩ aingĩ,

maarĩ o ageni bũrũriinĩ wa Kanaani.

20 Maatũire moorũũraga mabũrũriinĩ moothe,

na moimaga ũthamakiinĩ ũmwe magathiĩ ũrĩa ũngĩ.

21 No rĩĩrĩ, Ngai ndaigana gwĩtĩkĩria mũndũ o na ũmwe amahinyĩrĩrie;

nĩguo amamenyerere, nĩakaanirie athamaki

22 akĩmeera atĩrĩ,

“Mũtikaanahuutie andũ aakwa arĩa njitĩrĩirie maguta ngamaamũra;

mũtikaaneeke anabii aakwa ũũru.”

23 Inyuĩ andũ oothe a thĩ inĩraai MWATHANI,

menyithanagiai o mũthenya ũrĩa atũhonokeetie.

24 Ganĩraai ndũũrĩrĩ ũhoro wa riiri wake,

ĩraai andũ oothe ũhoro wa ciĩko ciake cia magegania.

25 Nĩ gũkorwo MWATHANI nĩ mũnene

na nĩ wa kũgoocwo mũno;

nĩ wa gũtĩĩo gũkĩra ngai ciothe.

26 Ngai ciothe cia ndũũrĩrĩ nĩ mĩhianano mĩtheri,

no MWATHANI nĩ we wombire igũrũ.

27 Athiũrũrũkĩirio nĩ ũnene na riiri,

nayo Hekaarũ yake ĩkaiyũra hinya na gĩkeno.

28 Goocaai MWATHANI inyuĩ andũ oothe a thĩ,

kumiai riiri o na hinya wake!

29 Goocaai rĩĩtwa rĩa MWATHANI rĩrĩa rĩrĩ riiri,

ũkaai Hekaarũinĩ yake mũrĩ na kĩheeo;

thaathaiyai MWATHANI mwĩhumbĩĩte nguo cia ũthingu.

30 Inainaai mwĩ mbere yake inyuĩ andũ oothe a thĩ!

Thĩ ĩrũmĩĩte ũndũ ĩtangĩenyenyeka.

31 Igũrũ tanĩrĩkene, thĩ nayo ta nĩcanjamũke!

Ĩraai ndũũrĩrĩ ciothe atĩrĩ,

“MWATHANI nĩ mũthamaki.”

32 Iria tanĩrĩrurume o na indo ciothe iria irĩ kuo.

Mĩgũnda tanĩcanjamũke o na kĩrĩa gĩothe gĩ thĩinĩ wayo!

33 Hĩndĩ ĩyo mĩtĩ ya mũtitũ no ĩkiuge ngemi mbere ya MWATHANI,

tondũ MWATHANI nĩarooka gwatha thĩ.

34 Cookeriai MWATHANI ngaatho tondũ nĩ mwega,

ũtugi wake nĩ wa tene na tene.

35 Mwĩreei atĩrĩ, “Tũhonokie, wee Ngai, ũrĩa ũtũhonokagia,

tũcookanĩrĩrie na ũtũhonokie kuuma kwĩ ndũũrĩrĩ,

nĩguo tũgũcookagĩrie ngaatho,

na tũkumagie rĩĩtwa rĩaku rĩtheru.

36 Goocaai MWATHANI Ngai wa Isiraeli!

Mũkumiei rĩu na nginya tene na tene.”

Nao andũ oothe makiuga “Ameni,” na makĩgooca MWATHANI.

Gũthaathaĩria Ngai Jerusalemu na Gibeoni

37 Naake Daudi agĩgĩtiga Asafu na aariũ a ithe Alawii matuĩke a gũthaathayagia Ngai marĩ o kũu Ithandũkũ rĩa Kĩrĩĩkanĩro rĩarĩ. Wĩra ũcio wa gũthaathaiya warĩ wa kũrutagwo mũthenya o mũthenya.

38 Naake Obedi Edomu, mũrũ wa Jeduthuni, na andũ a mbarĩ yake mĩrongo ĩtandatũ na anaana (68) magĩtuĩka a kũmateithagĩrĩria. Naake Hosa na Obedi Edomu magĩtuĩka arangĩri a ihingo.

39 Naake Zadoku mũthĩnjĩri Ngai, o na aariũ a ithe athĩnjĩri Ngai magĩtigwo hau nĩ Daudi, nĩguo marutagĩre magongoona ma njino kũndũ gũtũũgĩru kũrĩa gwathaathayagĩrio kũu Gibeoni.

40 Maagĩrĩirwo nĩkũrutaga magongoona ma njino o rũũciinĩ na o hwaĩinĩ o ta ũrĩa kwandĩkĩĩtwo wathoinĩ ũrĩa MWATHANI aaheire Aisiraeli mahingagie.

41 Ningĩ hamwe nao hagĩtigwo Hemani na Jeduthuni o na arĩa maathuurĩĩtwo noguo mainage nyĩmbo cia gũkumia MWATHANI nĩ ũndũ ũtugi wake nĩ wa tene na tene.

42 Nao Hemani na Jeduthuni nĩ o maamenyagĩrĩra tũrumbeeta, thaani iria ihũũrithagio ikagamba, o na indo iria ingĩ ciahũthagĩrwo nĩ aini hĩndĩ ya kũgooca. Nayo mbarĩ ya Jeduthuni nĩ yo yarangagĩra ihingo.

43 Thuutha wa ũguo andũ makĩinũka o mũndũ gwake. Naake Daudi agĩcooka mũciĩ kũraathima andũ a mũciĩ wake.

Ndũmĩrĩri ya Nathani kũrĩ Daudi

1 Na rĩĩrĩ, rĩrĩa mũthamaki Daudi aakorirwo atũũrĩĩte nyũmbainĩ yake, akĩĩra mũnabii Nathani atĩrĩ, “Tarora wone atĩ rĩu ndĩraikara nyũmba yakĩĩtwo na mĩtarakwa, no Ithandũkũ rĩa Kĩrĩĩkanĩro kĩa MWATHANI rĩigĩĩtwo o hemainĩ!”

2 Naake Nathani akĩmũcookeria atĩrĩ, “Ĩka o ta ũrĩa ũreciiria gwĩka, nĩ gũkorwo Ngai arĩ hamwe nawe.”

3 No rĩĩrĩ, ũtukũ o ro ũcio Ngai akĩĩra Nathani atĩrĩ,

4 “Thiĩ ũkeere ndungata yakwa Daudi atĩrĩ, ‘Ti we ũkũnjakĩra Hekaarũ ya gũikaraga.

5 Kuuma rĩrĩa ndarutire andũ a Isiraeli kuuma Misiri kinyagia ũũmũũthĩ ndirĩ ndatũũra thĩinĩ wa Hekaarũ; ndũire njũrũũraga ngĩikaraga hemainĩ.

6 Kũrĩa guothe ndũire thiaga na andũ a Isiraeli, ndirĩ ndooria mũtongoria o na ũmwe wa arĩa ndathuurire matongoragie andũ aakwa a Isiraeli, gĩtũmi gĩa kwaga kũnjakĩra Hekaarũ ya mĩtarakwa.’

7 “Nĩ ũndũ ũcio, thiĩ wĩre ndungata yakwa Daudi atĩ niĩ MWATHANI Mwene Hinya Wothe ndamwĩra ũũ, ‘Ndakũrutire rũũruinĩ kũrĩa warĩithagia ng’ondu, ngĩgũtua mũtongoria wa andũ aakwa a Isiraeli.

8 Ngoreetwo nawe kũrĩa guothe wanathiĩ, na nĩngũhootanĩire harĩ thũ ciaku ciothe ũkĩyonagĩra na maitho maaku. Nĩngũtũma ũgĩe na igweta o ta atongoria a gũũkũ thĩ arĩa njamba mũno.

9-10 Nĩthuurĩire andũ aakwa a Isiraeli handũ, ngamaiga ho nĩ geetha matũũre handũ haao kĩũmbe, na matikaanacooke kũhinyĩrĩrio o na rĩ. Kuuma rĩrĩa maatoonyire bũrũriinĩ ũyũ, matũire matharĩkagĩrwo nĩ thũ, no ũndũ ũyũ ndũgeekĩka rĩngĩ. Nĩndakwĩrĩra na ma atĩ nĩndĩrĩkũgitagĩra kuuma gwĩ thũ ciaku ciothe na ndũme ũgĩe na njiarwa nyingĩ.

11 Rĩrĩa ũgaakua na ũthikwo mbĩĩrĩrainĩ cia maithe maaku-rĩ, nĩngaatua ũmwe wa aariũ aaku mũthamaki na nĩngaatũma ũthamaki wake ũgaacĩre.

12 Ũcio nĩwe ũkaanjakĩra Hekaarũ, na niĩ nĩngaatũma ũthamaki wake ũtũũre tene na tene.

13 Na niĩ nĩngaatuĩka ithe, naake atuĩke mũũriũ wakwa. Ndikaamũthengeria tha ciakwa ta ũrĩa ndacithengeirie Saũlũ ũrĩa ndeeheririe nĩguo wee ũtuĩke mũthamaki.

14 Nĩngaamũtua mũtongoria wa andũ aakwa na wa ũthamaki wakwa tene na tene. Gĩtĩ gĩake gĩa ũthamaki gĩgaatũũra kĩrũmĩĩte tene na tene.’ ”

15 Naake Nathani akĩmenyithia Daudi maũndũ moothe marĩa Ngai aamũguũrĩirie.

Ihooya rĩa Daudi rĩa gũcookia ngaatho

16 Naake mũthamaki Daudi agĩtoonya Hemainĩ thĩinĩ agĩikara thĩ mbere ya MWATHANI akĩhooya ũũ: “Rĩu MWATHANI Ngai, niĩ ndĩ ũ, o na nyũmba yakwa nĩ kĩĩ nĩguo ũnginyie hau nginyĩĩte.

17 O na no ũrathiĩ na mbere kũnjĩka wega makĩria; nĩũheanĩĩte ciĩranĩro ikoniĩ njiarwa ciakwa cia matukũ ma thuutha, na wee MWATHANI Ngai, nĩũndũũgĩrĩĩtie o ta mũndũ wa bata mũno!

18 Nĩ atĩa ũngĩ ingĩgĩkwĩra? Nĩũnjũũĩ wega, na no ũheete gĩtĩĩo, niĩ ndungata yaku.

19 Warĩ wendi waku o na mũbango waku haane ũguo haana, na kũnyonia ũrĩa ngaaneneha thuuthainĩ.

20 Na rĩu, MWATHANI, gũtirĩ ũngĩ ũhaana ta we; na nĩtũkoreetwo tũkĩmenya atĩ wee nowe wiki Ngai.

21 Gũtirĩ rũũrĩrĩ rũngĩ gũũkũ thĩ rũhaana ta rwa andũ aaku a Isiraeli, arĩa wakũũrire kuuma ũkomboinĩ ũkĩmatua andũ aaku. Maũndũ manene na ma kũgegania marĩa wameekĩire nĩmatambĩĩtie ngumo yaku thĩ guothe. Nĩwakũũrire andũ aaku kuuma Misiri na ũkĩingata ndũũrĩrĩ ingĩ kũrĩa guothe maathiagĩra.

22 Nĩũtuĩte Aisiraeli andũ aaku kĩũmbe tene na tene, nawe, MWATHANI, ũgatuĩka Ngai wao.

23 “Rĩu, MWATHANI, tũũra ũhingagia kĩĩranĩro kĩrĩa wanjĩĩrĩire niĩ mwene na njiarwa ciakwa, na wĩke o ta ũguo woigire nĩũgeeka.

24 Ũgũtũũra ũkumagio, na andũ matũũre moigaga atĩrĩ, ‘MWATHANI Mwene Hinya Wothe nĩwe Ngai ũrĩa wathaga Isiraeli.’ Nawe nĩũkamenyerera ũthamaki wakwa ũtũũre ũrũmĩĩte wega tene na tene.

25 Nĩ gũkorwo wee, Ngai wakwa, nĩũnguũrĩirie, niĩ ndungata yaku, maũndũ macio moothe, na nĩũnjĩĩrĩĩte atĩ nĩũgaatua njiarwa ciakwa athamaki. Tondũ ũcio ndingĩĩtigĩra ngĩkũhooya ihooya rĩĩrĩ.

26 Wee, MWATHANI, nĩwe Ngai, na nĩũnjĩĩrĩire ũndũ ũcio mwega.

27 Ndagũthaitha ũraathime njiarwa ciakwa nĩguo itũũre ikenagĩra wega waku. Wee, MWATHANI, nĩ we wĩranĩire ũndũ ũcio, na njiarwa ciakwa igũtũũra iraathimagwo nĩ we tene na tene.”

Ũhootani wa Daudi itainĩ

1 Thuutha ũcio, Daudi agĩtharĩkĩra Afilisiti rĩngĩ akĩmahoota, akĩmatuunya Gathu o na matũũra marĩa maakũrigiicĩirie.

2 Ningĩ agĩcooka akĩhoota Amoabi, nao magĩtuĩka ndungata ciake ciakũmũrutagĩra igooti.

3 Ningĩ Daudi akĩhoota Hadadezeri mũthamaki wa Zoba bũrũriinĩ wa Siria. Hadadezeri aahooteirwo rũgongo rwa Hamathu, rĩrĩa aageragia gũũkĩrĩra bũrũri ũrĩa warĩ mwena wa na rũgongo wa rũũĩ rwa Farati.

4 Daudi akĩmũtuunya ngaari cia mbarathi ngiri ĩmwe, thigari cia mbarathi ngiri mũgwanja (7,000), na thigari cia magũrũ ngiri mĩrongo ĩĩrĩ (20,000). Agĩtigia mbarathi cia kũigana kũguucia ngaari igana cia mbarathi, iria ingĩ ciothe agĩcitemengithia magũrũ ikĩonja.

5 Rĩrĩa andũ a Siria a kuuma Damasiki maatũmire ita ciũke iteithie mũthamaki Hadadezeri, Daudi agĩcitharĩkĩra, akĩũraga andũ ngiri mĩrongo ĩĩrĩ na igĩrĩ (22,000).

6 Agĩcooka agĩaka kambĩ cia thigari bũrũriinĩ wao, nao andũ a Siria magĩtuĩka ndungata ciake cia kũmũrutagĩra igooti. MWATHANI agĩgĩtũma Daudi agĩe na ũhootani kũndũ guothe.

7 Daudi agĩkĩoya ngo cia thahabu iria ciakuuĩĩtwo nĩ njaama cia Hadadezeri, agĩcitwara Jerusalemu.

8 Ningĩ akĩoya icango nyingĩ mũno kuuma Tibihathu na Kuni, matũũra marĩa maathagwo nĩ Hadadezeri. (Icango icio nĩcio Solomoni aahũthĩrire gwaka itangi rĩa gĩcango, itugĩ, o na indo iria ingĩ cia gĩcango cia Hekaarũ.)

9 Naake Toi, mũthamaki wa Hamathu, akĩigua atĩ Daudi nĩahooteete ita ciothe cia Hadadezeri.

10 Akĩrekia mũũrũwe Joramu kũrĩ mũthamaki Daudi, akamũgeithie na amũgaathĩrĩrie nĩ ũndũ wa kũhoota Hadadezeri. Toi aatũire arũaga na Hadadezeri. Naake Joramu agĩtwarĩra Daudi iheeo ciathondekeetwo na thahabu, betha, na gĩcango.

11 Naake mũthamaki Daudi akĩamũra indo icio nĩguo ihũthagĩrwo na gũthaathaiya MWATHANI. Hamwe na icio nĩamũrire betha na thahabu iria aarutĩĩte mabũrũri marĩa aahooteete ma Edomu, Moabi, Aamoni, Filisitia, na Aamaleki.

12 Naake Abishai, ũrĩa nyina eetagwo Zeruia, akĩũragĩra Aedomu ngiri ikũmi na inyaanya (18,000) gĩtuambainĩ gĩa Cumbĩ.

13 Agĩaka kambĩ cia thigari bũrũriinĩ wothe wa Edomu, na andũ aakuo oothe magĩtuĩka ndungata cia Daudi. Naake MWATHANI agĩtũma Daudi agĩe na ũhootani kũndũ guothe.

14 Daudi agĩgĩthamakĩra Isiraeli guothe, na nĩonaga atĩ andũ aake oothe nĩmatungatagwo na njĩra ya kĩhooto na ya waragania.

15 Joabu, mũrũ wa nyina na Abishai, nĩ we warĩ mũnene wa mbũtũ cia ita. Jehoshafatu mũrũ wa Ahiludu nĩ we wamenyagĩrĩra rekondi ciothe.

16 Zadoku mũrũ wa Ahitubu na Ahimeleku mũrũ wa Abiatharu nĩ o maarĩ athĩnjĩri Ngai. Seraianĩwe warĩ karani ka igooti.

17 Benaia mũrũ wa Jehoiada nĩwe warĩ mũnene wa thigari iria ciarangagĩra Daudi, nao aariũ a Daudi maarĩ atongoria anene a thirikaari yake.

Daudi kũhoota Aamoni na andũ a Siria

1 Thuutha ũcio, Nahashu mũthamaki wa Aamoni agĩkua, naake mũũrũwe Hanuni agĩtuĩka mũthamaki ithenya rĩake.

2 Naake mũthamaki Daudi akiuga atĩrĩ, “No mũhaka njĩke Hanuni mũrũ wa Nahashu maũndũ ma ũtugi o ta ũrĩa ithe aanjĩkire.” Kwoguo Daudi agĩtũma arekio makamũtwarĩre macakaya maake.

Rĩrĩa maakinyire kwa Hanuni bũrũriinĩ wa Aamoni,

3 atongoria a Aamoni makĩĩra mũthamaki atĩrĩ, “Ũgwĩciiria tondũ Daudi nĩatũmĩĩte andũ mooke magũcakaithie, nĩ thooguo atĩĩĩte mũno? Aaca! Amatũmĩĩte gũũkũ ta athigaani, mathigaane bũrũri nĩguo atũhoote!”

4 Tondũ ũcio Hanuni akĩnyiita anjaama a Daudi akĩmeenjithia nderu ciao, agĩtinithia nguo ciao kuuma njohero gũthiĩ na thĩ, agĩcooka akĩreka methiĩre.

5 Rĩrĩa Daudi aamenyithirio ũhoro ũcio, akĩrekania matũngwo, nĩ gũkorwo andũ acio nĩmaiguaga thoni gũcooka mũciĩ. Akĩmeera maikare Jeriko nginya rĩrĩa nderu ciao ikaaneneha, thuutha ũcio mainũke.

6 Rĩrĩa mũthamaki Hanuni na Aamoni moonire atĩ nĩmaatuma ũthũ na Daudi makĩrĩha kiro ngiri mĩrongo ĩtatũ na inya (34,000) cia betha nĩguo makombore ngaari cia mbarathi na thigari cia mbarathi kuuma Mesopotamia, Maaka, na Zoba.

7 Magĩgĩkombora ngaari cia mbarathi ngiri mĩrongo ĩtatũ na igĩrĩ (32,000), o hamwe na mũthamaki wa Maaka na ita ciake. Acio oothe magĩthiĩ magĩaka kambĩ yao mang’etheire Medeba. O nao Aamoni oothe makiuma matũũrainĩ maao mehaarĩirie kũrũa.

8 Rĩrĩa Daudi aiguire ũhoro ũcio, akĩmarekeria Joabu na mbũtũ cia ita ciothe cia andũ arĩa maarĩ njamba.

9 Nao Aamoni makiumagara makĩĩhanda wega kĩhingoinĩ kĩa Raba me na indo ciao ciothe cia mbaara. Raba rĩarĩ itũũra rĩao rĩrĩa inene. Hĩndĩ ĩyo nao athamaki arĩa mookĩĩte kũmateithĩrĩria mehandĩĩte o kũu werũinĩ.

10 Na rĩĩrĩ, hĩndĩ ĩrĩa Joabu oonire atĩ ita cia thũ icio ciahota kũmũtharĩkĩra imuumĩĩte na mbere na na thuutha-rĩ, agĩthuura thigari iria ciarĩ njamba thĩinĩ wa thigari cia Isiraeli agĩcibanga ing’ethanĩire na andũ a Siria.

11 Nacio thigari icio ingĩ agĩciiga rungu rwa ũtongoria wa Abishai mũrũ wa nyina, ũrĩa naake wacibangire ing’ethanĩire na Aamoni.

12 Naake Joabu akĩĩra Abishai atĩrĩ, “Wona andũ a Siria makĩndooria-rĩ, ũka ũndeithĩrĩrie, na niĩ ndoona Aamoni magĩgũtooria, nĩngũũka gũgũteithĩrĩria.

13 Gĩa na hinya na wĩyũmĩrĩrie. Nĩtũhũũrane na hinya nĩ ũndũ wa andũ aitũ na matũũra ma Ngai witũ; naake MWATHANI aroĩka o ta ũrĩa ekuona kwagĩrĩire.”

14 Joabu na andũ aake magĩkuhĩrĩria andũ a Siria nĩguo mamatharĩkĩre, nao andũ a Siria makĩũra.

15 Na rĩĩrĩ, hĩndĩ ĩrĩa Aamoni moonire atĩ andũ a Siria nĩmoora-rĩ, o nao makĩũrĩra Abishai magĩĩtharĩra itũũrainĩ. Naake Joabu agĩcooka Jerusalemu.

16 No rĩĩrĩ, andũ a Siria moona atĩ nĩmaahootwo nĩ Aisiraeli, magĩcookanĩrĩria mbũtũ ciao cia ita iria ciarĩ ng’ongoinĩ cia Siria, mwena wa irathĩro wa rũũĩ rwa Farati. Nacio igĩũka itongoreetio nĩ Shobaku, mũnene wa mbũtũ cia ita cia Hadadezeri mũthamaki wa Zoba.

17 Rĩrĩa Daudi aamenyithirio ũhoro ũcio-rĩ, agĩcookanĩrĩria mbũtũ ciothe cia ita cia Isiraeli, akĩringa rũũĩ rwa Jorodani, agĩcibanga nĩguo ihũũrane na andũ a Siria. Nayo mbaara ĩkĩambĩrĩria.

18 Aisiraeli makĩingatithia thigari cia Siria. Naake Daudi na thigari ciake makĩũraga atwari a ngaari cia mbarathi cia andũ a Siria ngiri mũgwanja (7,000), na thigari cia magũrũ ngiri mĩrongo ĩna (40,000). Ningĩ makĩũraga Shobaku mũnene wa mbũtũ cia ita cia Siria.

19 Na rĩĩrĩ, hĩndĩ ĩrĩa athamaki oothe arĩa maathĩkagĩra Hadadezeri moonire atĩ nĩmaahootwo nĩ Aisiraeli, magĩkĩiguana na Daudi magĩtuĩka a kũmwathĩkagĩra. Nao andũ a Siria matiigana gwĩtĩkĩra gũteithia Aamoni hĩndĩ ĩngĩ.