Author: admin

Ngai nĩwe ũtuagĩra andũ oothe

1 MWATHANI, tondũ wĩ Ngai ũrĩa ũrĩhanagĩria

onania ũrĩa ũraakarĩĩte!

2 Wee ũtuagĩra andũ oothe arahũka

ũhe andũ arĩa etĩĩi kĩrĩa kĩmaagĩrĩire.

3 MWATHANI, nĩ nginya rĩ andũ arĩa aaganu megũtũũra makenaga?

Megũtũũra ũguo nginya rĩ?

4 Andũ arĩa ooru-rĩ, nĩ nginya rĩ megũtũũra meyambararagia,

na metĩĩaga nĩ ũndũ wa ciĩko ciao cia ũmaramari?

5 Mahehenjaga andũ aaku, MWATHANI,

na makanyariira arĩa me aaku kĩũmbe.

6 Mooragaga atumia a ndigwa na ciana cia ngoriai,

hamwe na ageni arĩa matũũraga bũrũriinĩ witũ.

7 Moigaga atĩrĩ, “MWATHANI ndarona;

Ngai wa Isiraeli ndararũmbũiya.”

8 Inyuĩ andũ aya akingitaru, gĩai na ũmenyo;

kaĩ mũkoohĩga rĩ, irimũ ici?

9 Mũreciiria Ngai ũrĩa wombire matũ ndaiguaga?

Mũreciiria ũrĩa wombire maitho ndoonaga?

10 Mũreciiria Ngai ũrĩa ũrũngaga ndũũrĩrĩ ndangĩciherithia?

Mũreciiria Ngai ũrĩa ũrutaga andũ oothe ndarĩ ũmenyo?

11 MWATHANI nĩoĩ ũrĩa andũ meciiragia;

nĩoĩ ũrĩa meciiria maao marĩ ma tũhũ.

12 Kũraathimwo-rĩ, nĩ mũndũ ũrĩa ũtaaragwo nĩ we, MWATHANI,

ũrĩa wee ũrutaga watho waku.

13 Ũtũmaga aikare ahooreire hĩndĩ ya mathĩĩna

o nginya andũ arĩa aaganu makenjerwo irima.

14 Nĩ gũkorwo MWATHANI ndangĩtiganĩria andũ aake;

ndangĩteanĩria andũ arĩa marĩ aake kĩũmbe.

15 Kĩhooto nĩgĩgũcooka kuonekana maciirainĩ

nao andũ oothe athingu nĩmarĩnyiitaga ũndũ ũcio mbaru.

16 Nũũ wokĩrĩire andũ acio aaganu handũinĩ haakwa?

Nũũ warĩ mwena wakwa ngĩng’eng’ana na andũ acio meekaga ũũru?

17 Korwo MWATHANI ndandeithĩrĩirie-rĩ,

no gũkua ingĩakuire o narua.

18 Ndoigire atĩrĩ, “Nĩndĩragũa!”

No ũtugi waku, MWATHANI, ũkĩĩnyiitĩrĩra.

19 Rĩrĩa ngoro yakwa ĩtangĩkĩĩte na ĩrathĩĩnĩka-rĩ,

wee, nĩũhooragĩria na ũkanjanjamũra.

20 Wee-rĩ, ndũrĩ ngwatanĩro na atuithania ooru,

arĩa moogomagia watho.

21 Moonganaga makabanga ũrĩa mekũũraga andũ arĩa athingu,

na magatuĩra andũ matarĩ na mahĩtia kũũragwo.

22 No rĩĩrĩ, MWATHANI nĩatuĩkĩĩte mũgitĩri wakwa;

Ngai wakwa nĩ we ũmenyagĩrĩra.

23 Nĩekũmaherithia nĩ ũndũ wa mahĩtia maao

na amaniine nĩ ũndũ wa waganu wao;

MWATHANI Ngai witũ nĩekũmaniina.

Rwĩmbo rwa kũgooca

1 Ũkaai, tũgooce MWATHANI!

Rekeei tũinĩre Ngai ũrĩa ũtũmenyagĩrĩra tũkeneete!

2 Nĩtũthiĩi harĩ we tũrĩ na ngaatho;

rekeei tũmũinĩre nyĩmbo cia kũmũgooca tũkeneete.

3 Nĩ gũkorwo MWATHANI nĩ Ngai mũnene,

na nĩ mũthamaki mũnene wa ngai iria ingĩ ciothe.

4 Nĩ we wathaga thĩ yothe,

kuuma kũrĩa kũriku mũno

o nginya tũcũmbĩrĩ twa irĩma.

5 Nĩ we wathaga iria na nĩwe warĩũmbire

o ũndũ ũmwe na thĩ nyũmũ,

ĩrĩa we mwene oombire na mooko maake.

6 Ũkaai, tũmũinamĩrĩre na tũmũthaathaiye;

nĩtũturiei ndu mbere ya MWATHANI ũrĩa watũũmbire.

7 Nĩ gũkorwo we nĩ we Ngai witũ,

nĩ ithuĩ andũ arĩa aramataga,

ng’ondu iria we mwene arĩithagia.

Thikĩrĩriai ũrĩa aroiga ũũmũũthĩ.

8 “Mũtikoomie ngoro ta ũrĩa maithe maanyu meekire marĩ Meriba,

o na ta ũrĩa meekire mũthenya ũrĩa maarĩ Masa kũu werũinĩ.

9 Mangeririe na makĩndoria,

o na gũtuĩka nĩmooneete ũrĩa wothe ndameekĩire.

10 Nĩndatũire ndaakarĩire andũ acio mĩaka mĩrongo ĩna

na ngiuga atĩrĩĩrĩ, ‘Ĩ andũ aya ti aremi!

Matiathĩkagĩra maathani maakwa.’

11 Tondũ ũcio nĩndehĩtire ndaakarĩĩte ngiuga atĩrĩ,

‘Matirĩ hingo magatoonya bũrũri ũrĩa ingĩkaamahe ũhuurũko.’ ”

Ngai nĩwe Mũthamaki ũrĩa Mũnene

1 Inĩraai MWATHANI rwĩmbo rwerũ!

Inĩraai MWATHANI, andũ oothe a thĩ!

2 Inĩraai MWATHANI, na mũmũgooce!

Menyithanagiai o mũthenya ũrĩa atũhonokeetie!

3 Ganĩraai ndũũrĩrĩ ciothe ũhoro wa riiri wake;

ĩraai andũ oothe ũhoro wa ciĩko ciake cia magegania.

4 Nĩ gũkorwo MWATHANI nĩ mũnene, na nĩ wa kũgoocwo mũno;

nĩ wa gũtĩĩo gũkĩra ngai ciothe.

5 Ngai cia ndũũrĩrĩ iria ingĩ ciothe nĩ mĩhianano mĩtheri,

no MWATHANI nĩ we wombire igũrũ.

6 Athiũrũrũkĩirio nĩ ũnene na riiri;

Hekaarũ yake ĩiyũire hinya na ũthaka.

7 Goocaai MWATHANI, andũ oothe a thĩ;

kumiai riiri o na hinya wake.

8 Goocaai rĩĩtwa rĩa MWATHANI rĩrĩa rĩrĩ riiri;

ũkaai Hekaarũinĩ yake mũrĩ na iheeo.

9 Thaathayai MWATHANI o we mwene ũnene na riiri;

inainaai mũrĩ mbere yake andũ oothe a thĩ!

10 Ĩraai ndũũrĩrĩ ciothe atĩrĩ,

“MWATHANI nĩ we mũthamaki!

Thĩ ĩrũmĩĩte ũndũ ĩtangĩenyenyeka;

nĩagaatuĩra andũ na kĩhooto.”

11 Igũrũ ta nĩrĩkene, thĩ nayo ta nĩcanjamũke;

iria ta nĩrĩrurume o na ciũmbe ciothe iria irĩ kuo.

12 Ithaka ta nĩicanjamũke, o na indo ciothe iria irĩ thĩinĩ wacio!

Mĩtĩ yothe ya mũtitũ nĩkiuge ngemi

13 mbere ya MWATHANI, tondũ nĩarooka;

arooka gwathana thĩ.

Arĩathaga andũ oothe a thĩ na kĩhooto na ũhoro wa ma.

Ngai nĩ mũnene wa anene oothe

1 MWATHANI nĩ we mũthamaki!

Thĩ ta nĩkene,

icigĩrĩra cia iriainĩ ta nĩicanjamũke!

2 Athiũrũrũkĩirio nĩ matu na nduma ndumanu;

arathana na ũthingu na kĩhooto.

3 Atongoreetio nĩ mwaki ũracina thũ ciake mĩena yothe.

4 Heni ciake nĩkũmũrĩka iramũrĩka mabũrũri;

thĩ no kũinaina ĩrainaina yaciona.

5 Irĩma iraringũka o ta mũcumaa mbere ya MWATHANI,

mbere ya MWATHANI wa thĩ yothe.

6 Igũrũ rĩranĩrĩra ũthingu wake,

nao andũ oothe nĩmaroona riiri wake.

7 Arĩa oothe mathaathayagia mĩhianano nĩmaconoreetwo,

o acio metĩĩaga nĩ ũndũ wa mĩhianano ĩyo ya tũhũ.

Ngai ciothe nĩkũinamĩrĩra irainamĩrĩra MWATHANI.

8 Andũ a Zayuni nĩmakeneete nĩkũigua ũguo,

namo matũũra ma Juda nĩmacanjamũkĩĩte

tondũ wa matuĩro maaku, MWATHANI.

9 Nĩ gũkorwo wee, MWATHANI, nĩ we wathaga thĩ yothe;

wee wĩ mũnene gũkĩra ngai ciothe.

10 MWATHANI nĩendeete arĩa mathũire ũũru;

nĩamenyagĩrĩra mĩoyo ya andũ aake,

akamahonokia kuuma mookoinĩ ma andũ arĩa aaganu.

11 Ũtheri nĩwarĩire andũ arĩa athingu,

nao andũ arĩa eega nĩmakinyĩrĩirwo nĩ gĩkeno.

12 Inyuothe arĩa athingu kenaai

nĩ ũndũ wa ũrĩa MWATHANI eekĩĩte!

Ririkanaai ũrĩa Ngai ũrĩa mũtheru eekĩĩte,

na mũmũcookerie ngaatho.

Ngai nĩwe wathaga thĩ yothe

1 Inĩraai MWATHANI rwĩmbo rwerũ,

tondũ nĩekĩĩte maũndũ ma magegania;

guoko gwake kwa ũrĩo na hinya wake mũtheru nĩimũreehithĩirie ũhootani.

2 MWATHANI nĩamenyithanĩĩtie ũhootani wake;

nĩoneetie ndũũrĩrĩ hinya wake wa kũhonokania.

3 Nĩahingĩĩtie na wĩhokeku ũrĩa eerĩire andũ aake a Isiraeli;

thĩ yothe nĩyoneete ũhootani wa Ngai witũ.

4 Inĩraai MWATHANI mũkeneete inyuĩ andũ oothe a thĩ;

mũgooceei na nyĩmbo mũkiugagĩrĩria nĩgũkena!

5 Inaai mũkĩgoocaga MWATHANI!

Inaai mũkĩhũũraga inanda!

6 Huuhaai tũrumbeeta na macoro,

na muugĩrĩrie nĩgũkena

mũrĩ mbere ya MWATHANI, mũthamaki witũ!

7 Iria nĩrĩrurume,

o ũndũ ũmwe na ciũmbe ciothe iria irĩ thĩinĩ warĩo;

thĩ nĩĩine, o ũndũ ũmwe na atũũri aayo!

8 Njũũĩ nĩihũũre hĩ;

irĩma nĩciine mbere ya MWATHANI ikeneete,

9 tondũ nĩarooka gwatha thĩ.

Arĩathaga andũ a thĩ na kĩhooto

na amatuagĩre ũrĩa kwagĩrĩire.

Ngai nĩwe Mũthamaki ũrĩa mũnene

1 MWATHANI nĩ we mũthamaki;

andũ nĩkũinaina marainaina.

Aikarĩire ciũmbe iria irĩ mathagu

irĩ ta gĩtĩ gĩake gĩa ũthamaki,

nayo thĩ no gũthingitha ĩrathingitha.

2 MWATHANI nĩ mũnene Zayuni;

nĩ we wathaga ndũũrĩrĩ ciothe.

3 Andũ oothe nĩmarĩkumagia rĩĩtwa rĩake rĩnene na rĩa gwĩtigĩrwo.

We nĩ mũtheru!

4 Wee, mũthamaki ũrĩa ũrĩ hinya nĩwendeete kĩhooto;

nĩũhandĩĩte waragania thĩinĩ wa Isiraeli;

nĩũtũmĩĩte kũgĩe na kĩhooto na ũthingu.

5 Goocaai MWATHANI Ngai witũ!

Mũthaathaiyei mũrĩ mbere ya gĩtĩ gĩake kĩa ũthamaki.

We nĩ mũtheru!

6 Musa na Harũni maarĩ athĩnjĩri Ngai aake,

naake Samũeli aarĩ ũmwe wa arĩa maamũhooyaga;

nĩmaakaĩire MWATHANI, naake akĩmeetĩka.

7 Aamaarĩirie arĩ gĩtugĩinĩ gĩa itu;

nĩmaathĩkĩire mawatho na maathani marĩa aamaheire.

8 Nĩwetĩkire andũ aaku, MWATHANI Ngai witũ,

ũkĩmoonia atĩ we ũrĩ Ngai wohanagĩra,

o na gũtuĩka nĩwamaherithirie nĩ ũndũ wa meehia maao.

9 Goocaai MWATHANI Ngai witũ,

na mũmũthaathaiye mũrĩ kĩrĩmainĩ gĩake gĩtheru,

tondũ MWATHANI Ngai witũ nĩ mũtheru!

Rwĩmbo rwa kũgooca

1 Inĩraai MWATHANI inyuĩ andũ oothe a thĩ!

2 Thaathayai MWATHANI mũcanjamũkĩĩte;

ũkaai mbere yake mũkĩinaga mũkeneete!

3 Menyaai atĩ MWATHANI nĩ Ngai;

nĩ we watũũmbire, na tũrĩ aake;

tũrĩ andũ aake, na ng’ondu iria arĩithagia

4 Toonyeraai ihingo cia Hekaarũ yake mũrĩ na ngaatho

thiĩi njainĩ ciayo mũkĩgoocaga.

Mũcookeriei ngaatho na mũmũgooce.

5 Nĩ gũkorwo MWATHANI nĩ mwega;

wendo wake ndũrĩ hĩndĩ ũgaathira

na wĩhokeku wake ũgũtũũra nginya tene na tene.

Ũrĩa Mũthamaki eerĩire Ngai nĩarĩĩkaga!

1 Nĩngũina rwĩmbo rũkoniĩ wĩhokeku na kĩhooto;

wee, MWATHANI, nĩ we ngũinĩra rwĩmbo rũu.

2 Ndĩrĩthiaga na mĩthiĩre ĩtarĩ na ũcuuke.

Ũgooka harĩ niĩ rĩ?

Nĩndĩrĩikaraga gwakwa mũciĩ na mũikarĩre mũkinyanĩru,

3 na nĩndĩrĩreganaga na ũndũ o wothe mũũru.

Nĩthũire ciĩko cia arĩa matirikaga Ngai;

ndĩrĩgĩaga ngwatanĩro nao.

4 Ndirĩogomagia kĩhooto

na ndirĩendaga gũkuhanĩrĩria na ũndũ mũũru.

5 Nĩndĩrĩniinaga mũndũ o wothe ũrĩa ũcambagia mũndũ ũrĩa ũngĩ na hitho;

ndirĩkiragĩrĩria mũndũ mwĩtĩi na mũng’athia.

6 Nĩndĩrĩiguagĩra tha andũ arĩa ehokeku bũrũriinĩ,

na ndĩmeetĩkagĩrie maikaranagie na niĩ.

Mũndũ o wothe ũtarĩ ũcuuke nĩarĩndungataga.

7 Gũtirĩ mũndũ o na ũrĩkũ ũheenanagia ũrĩikaraga gwakwa;

mũndũ ũrĩa waragia ũhoro ũtarĩ wa ma ndarĩikaraga mbere yakwa.

8 Mũthenya o mũthenya nĩndĩrĩniinaga andũ ooru arĩa marĩ bũrũriinĩ witũ;

nĩndĩrĩingataga andũ oothe arĩa meekaga ũũru kuuma itũũra rĩa MWATHANI.

Ihooya rĩa mũndũ mwĩthĩ ũranyariirĩka

1 Thikĩrĩria ihooya rĩakwa, MWATHANI,

na ũigue gũkaya gwakwa.

2 Ndũkaae kũrora na kũngĩ rĩrĩa ndĩrathĩĩnĩka!

Thikĩrĩria, na ũnjĩtĩke narua ndagũkaĩra!

3 Ũtũũro wakwa nĩgũthira ũrathira o ta ũrĩa ndoogo ĩthiraga;

mwĩrĩ wakwa ũrakana o ta mwaki.

4 Hũũrĩkangĩĩte ngahooha o ta nyeki;

nĩnjũrĩĩtwo nĩ ngoro ya kũrĩa irio.

5 Nĩhĩnjĩĩte mũno nĩ ũrĩa ndĩracaaya na hinya.

6 Haana o ta nderi ya werũinĩ;

nduĩkĩĩte o ta ndundu ĩrĩa ĩikaraga kũndũ gũtharũranĩĩtio.

7 Ndionaga toro;

haana ta kanyoni karĩ o goiki

gacũmbĩrĩ igũrũ ka nyũmba.

8 Ndindaga ngĩthirĩkio nĩ thũ ciakwa;

arĩa manyũrũragia mahũthagĩra rĩĩtwa rĩakwa makĩrumana.

9 Ndĩaga mũhu ta irio

na ngatukania kĩrĩa ndĩranyua na maithori maakwa,

10 nĩ ũndũ wa maraakara maaku na mang’ũrĩ

tondũ ũnjoeete na igũrũ ũkanyuguta kũndũ kũraaya.

11 Ũtũũro wakwa ũhaana ta kĩĩruru kĩa hwaĩinĩ;

ndĩrahooha o ta nyeki.

12 No wee, MWATHANI, ũgũtũũra ũthamakaga nginya tene na tene;

rĩĩtwa rĩaku rĩgũtũũra rĩririkanagwo nĩ njiarwa ciothe.

13 Ti itherũ nĩũkwarahũka ũiguĩre itũũra rĩa Zayuni tha;

ihinda rĩa kũrĩka wega nĩrĩrĩĩkĩĩtie gũkinya;

ihinda rĩrĩa rĩagĩrĩire ti rĩngĩ nĩ rĩĩrĩ.

14 Ndungata ciaku nĩirĩendeete,

o na gũtuĩka nĩrĩanangĩĩtwo;

nĩiringagwo nĩ tha nĩ ũndũ warĩo,

o na gũtuĩka nĩrĩtharũranĩĩtio.

15 Ndũũrĩrĩ nĩigeetigĩra MWATHANI;

athamaki oothe a thĩ nĩmageetigĩra hinya wake.

16 Nĩ ũndũ MWATHANI nĩagaaka Zayuni rĩngĩ;

nĩakoonania ũnene wake.

17 Nĩakaigua ihooya rĩa andũ aake arĩa matiganĩirio,

na ndakaanyarara ihooya rĩao.

18 Andĩkĩra rũciaro rũrĩa rũrooka ũrĩa MWATHANI eekĩĩte,

nĩguo arĩa matarĩ aciare makaamũgooca.

19 MWATHANI aacũũthĩrĩirie arĩ handũ haake hatheru kũu igũrũ,

akĩbaara thĩ arĩ igũrũ matuinĩ.

20 Akĩigua mũcaayo wa arĩa mooheetwo

na akĩohora arĩa maatuĩrĩirwo kũũragwo.

21 Tondũ ũcio rĩĩtwa rĩa MWATHANI nĩrĩkaanĩrĩrwo Zayuni,

na nĩagaakumio Jerusalemu,

22 rĩrĩa mabũrũri na moothamaki

makoongana hamwe mathaathaiye MWATHANI.

23 MWATHANI nĩahinyarĩĩtie ndĩ o mwĩthĩ,

nĩakuhakuhĩĩtie muoyo wakwa.

24 Ndũkanjũrage, Ngai wakwa, itarĩ mũkũrũ.

Wee, MWATHANI, ũtũũraga nginya tene na tene;

25 nĩ we wombire thĩ kuuma o tene,

na ũkĩũmba igũrũ na mooko maaku.

26 Thĩ na igũrũ nĩigaathira, no wee ndũgaathira;

igaakũra o ta nguo.

Ũgaaciteania o ta nguo, nacio ithire.

27 No wee-rĩ, ndũgarũrũkaga;

muoyo waku ũtũũraga tene na tene.

28 Ciana ciitũ nĩigaatũũra na thaayũ,

na njiarwa ciacio nĩigaikaraga na thaayũ imenyereirwo nĩ we.

Wendo wa Ngai wa magegania

1 Ngoro yakwa, gooca MWATHANI!

Kĩrĩa gĩothe gĩ thĩinĩ wakwa

nĩgĩkumie rĩĩtwa rĩake rĩtheru!

2 Ngoro yakwa, gooca MWATHANI!

Na ndũkariganĩrwo nĩ ũrĩa e mũtaana.

3 Anjohagĩra meehia maakwa moothe,

na akahonia mĩrimũ yakwa yothe.

4 Ahonokagia ndigaakue,

na akanyonagia wendani na tha

5 Ahũũnagia na maũndũ meega mũthenya o mũthenya,

nĩguo ngaikaraga ndĩ mwĩthĩ na ndĩ na hinya ta rwĩgĩ.

6 MWATHANI nĩoragĩria arĩa mahinyĩrĩirio,

na akarũũgamagĩrĩra ihooto ciao.

7 Nĩaguũrĩirie Musa mĩbango yake,

na akĩreka andũ a Isiraeli

moone ciĩko ciake cia hinya.

8 MWATHANI arĩ tha na nĩ muuma andũ,

ndaraakaraga na ihenya

na aiyũirwo nĩ ũtugi.

9 Ndaikaraga agĩtũrũithagia,

kana araakarĩĩte nginya tene na tene.

10 Ndatũherithagia ta ũrĩa twagĩrĩirwo nĩkũherithio,

kana akerĩhĩria ta ũrĩa

meehia na mahĩtia maitũ maigana.

11 O ta ũrĩa igũrũ rĩraihĩrĩirie thĩ-rĩ,

noguo wendo wake ũigana harĩ arĩa mamũtĩĩĩte.

12 O ta ũrĩa irathĩro rĩraihĩrĩirie ithũĩro,

noguo atwehereirie meehia maitũ magatũraihĩrĩria.

13 O ta ũrĩa mũciari aiguagĩra ciana ciake tha,

noguo MWATHANI aiguagĩra tha arĩa mamũtĩĩĩte,

14 tondũ nĩoĩ kĩrĩa tũũmbĩĩtwo nakĩo;

nĩaririkanaga atĩ twĩ rũkũngũ.

15 Ithuĩ tũhaana o ta nyeki,

kana ta ihũa rĩa gĩthaka

rĩrĩa rĩcanũkaga na ihenya,

16 rĩgacooka rĩkahũũrwo nĩ rũhuuho rĩgathira,

rĩkaaga gũcooka kuonwo rĩngĩ.

17 No rĩĩrĩ, wendo wa MWATHANI ũikaranagia na arĩa mamũtĩĩĩte nginya tene na tene,

naguo wega wake ũgakinyagĩrĩra njiarwa ciao

18 iria imenyagĩrĩra kĩrĩĩkanĩro gĩake

na ciathĩkagĩra maathani maake.

19 MWATHANI nĩahandĩĩte gĩtĩ gĩake kĩa ũthamaki igũrũ matuinĩ,

na nĩ mũthamaki wa indo ciothe.

20 Goocaai MWATHANI, inyuĩ araika aake njamba irĩ hinya,

o inyuĩ mwathĩkagĩra maathani maake

na mũthikagĩrĩria ũrĩa aroiga!

21 Goocaai MWATHANI, inyuĩ mbũtũ ciake ciothe cia ita,

o inyuĩ ndungata ciake, mwĩkaga ũrĩa eendeete!

22 Goocaai MWATHANI inyuĩ ciũmbe ciake ciothe

iria irĩ kũrĩa guothe athamakaga!

Ngoro yakwa gooca MWATHANI!