Author: admin

Gũtaarĩria

Ibuku rĩa Thaama rĩĩtanĩĩtio na ũndũ ũrĩa ũrĩ ngumo mũno thĩinĩ wa hisitoria yothe ya Isiraeli. Naguo nĩ kuuma (kana gũthaama) kwa Aisiraeli bũrũri wa Misiri kũrĩa maatũire marĩ ngombo. Ũndũ ũcio wa kũrutwo bũrũri wa Misiri, wonanagia ũrutani ũrĩa wa bata mũno thĩinĩ wa ibuku rĩĩrĩ atĩ Ngai nĩ we Mũkũũri kana Mũhonokia wa andũ aake.

Ibuku rĩĩrĩ no rĩgayanio icunjĩ inya ta ũũ: 1. Ahibirania kũũra kuuma ũkomboinĩ; 2. Rũgendo rwao meerekeire kĩrĩma gĩa Sinai; 3. Kĩrĩĩkanĩro kĩa Ngai na andũ aake kĩrĩmainĩ gĩa Sinai. Kĩrĩĩkanĩro kĩu nĩkĩo kĩaheire andũ a Isiraeli mawatho ma kũmatongoragia maũndũini ma kĩndini ma kĩndũire, o na ma mwathanĩre. 4. Gwaka handũ ha gũthaathayagĩria Ngai na gwĩkĩra handũ hau indo iria ciabatairwo, o hamwe na kũheeo mawatho marĩa marĩrũmagĩrĩrwo nĩ athĩnjĩri Ngai o na marĩa marĩrũmagĩrĩrwo gũgĩthaathaiyo Ngai.

Ibuku rĩĩrĩ rĩtaarĩirie na kinyi ũrĩa Ngai eekire akĩruta andũ aake ũkomboinĩ o na akĩmaaka ta rũũrĩrĩ rũrĩ na kĩĩrĩgĩrĩro kĩa mahinda marĩa magooka.

Mũndũ ũrĩa wĩkĩrĩirwo mũno thĩinĩ wa ibuku rĩĩrĩ nĩ Musa. Musa nĩ we Ngai aathuurire atongorie andũ aake kuuma Misiri. Gĩcunjĩ kĩrĩa kĩũĩkaine mũno thĩinĩ wa ibuku rĩĩrĩ nĩ Maathani Ikũmi marĩa marĩ gĩcunjĩ kĩa mĩrongo ĩĩrĩ.

Maũndũ marĩa marĩ ibukuinĩ rĩĩrĩ

1. Aisiraeli kũrutwo Misiri 1.1–15.21

a. Aisiraeli marĩ ngombo bũrũriinĩ wa Misiri 1.1-22

b. Gũciarwo na kĩambĩrĩria kĩa ũtũũro wa Musa 2.1–4.31

c. Musa na Harũni kũng’ethanĩra na mũthamaki wa Misiri 5.1–11.10

d. Bathaka na gũthaama Misiri 12.1–15.21

2. Kuuma Iria Ituune o kinya kĩrĩma gĩa Sinai 15.22–18.27

3. Watho na Kĩrĩĩkanĩro 19.1–24.18

4. Hema Nyamũre na mawatho ma hĩndĩ ya gũthaathaiya Ngai 25.1–40.38

Andũ a Isiraeli kũhinyĩrĩrio bũrũriinĩ wa Misiri

1 Marĩĩtwa ma aariũ a Jakubu arĩa maathiire Misiri hamwe naake, o mũndũ agĩthiĩ na andũ a mũciĩ wake, nĩ mo maya:

2 Reubeni, Simeoni, Lawi, Juda,

3 Isakaru, Zebuluni, Benjamini,

4 Dani, Nafutali, Gadi, na Asheri.

5 Andũ acio oothe maarĩ njiarwa cia Jakubu, na maarĩ mĩrongo mũgwanja.No mũũrũwe Josefu hĩndĩ ĩyo aarĩ Misiri.

6 Na rĩĩrĩ, Josefu agĩkua, o hamwe na aariũ a ithe, na rũciaro rũu ruothe.

7 No njiarwa ciao, nĩcio andũ a Isiraeli, igĩciarana ikĩgĩa na hinya na ikĩingĩha mũno, o nginya ikĩiyũra bũrũri wa Misiri.

8 Na rĩĩrĩ, nĩkwagĩire mũthamaki ũngĩ bũrũriinĩ wa Misiri, ũtooĩ Josefu.

9 Naake akĩĩra andũ aake atĩrĩ, “Andũ aya a Isiraeli nĩ aingĩ mũno, o na nĩmatũkĩrĩĩtie hinya.

10 Kũngiuma mbaara, mahota kũnyiitana na thũ ciitũ mahũũrane na ithuĩ, na moore kuuma bũrũriinĩ. Kwoguo no mũhaka tũmathiĩ na wara, tũcarie njĩra ya kũgiria maingĩhe.”

11 Nĩ ũndũ ũcio, andũ a Misiri makĩmaigĩra anyabaara akũmahinyĩrĩria na mawĩra maritũ; magĩgĩakĩra mũthamaki wa Misiri matũũra ma kũigwo indo marĩa meetagwo Pithomu na Ramesese.

12 No o ũrĩa andũ a Isiraeli maahinyagĩrĩrio, noguo moongererekaga na magathiĩ na mbere kũhunja bũrũriinĩ. Nao andũ a Misiri magĩkĩambĩrĩria gwĩtigĩra andũ a Isiraeli.

13 Kwoguo makĩrutithia andũ a Isiraeli wĩra na hinya mũno,

14 o na makĩmaritũhĩria ũtũũro mũno na ũndũ wa kũmarutithia wĩra wa hinya wa gũthondeka thimiti na maturubaarĩ, na kũruta mawĩra ma mĩthemba yothe mĩgũndainĩ yao matekũmaiguĩra tha.

15 Mũthamaki wa Misiri agĩcooka akĩarĩria Shifira na Pua, atumia Ahibirania a gũciarithania, akĩmeera atĩrĩ,

16 “Hĩndĩ ĩrĩa mwathiĩ gũteithĩrĩria atumia a Ahibirania gũciara-rĩ, angĩkorwo nĩ kahĩĩ gaaciarwo, mũgakooraga, no angĩkorwo nĩ kairĩĩtu, mũtigakooragage.”

17 No atumia acio a gũciarithania nĩmaatĩĩĩte Ngai; matiigana gwĩka ũrĩa mũthamaki wa Misiri aamaathĩĩte. Handũ ha gwĩka ũguo, nĩmaarekagĩrĩria twana twa tũhĩĩ tũtũũre muoyo.

18 Kwoguo mũthamaki agĩtũmanĩra atumia acio a gũciarithania akĩmooria atĩrĩ, “Nĩkĩ kĩratũma mũrekererie twana twa tũhĩĩ tũtũũre muoyo?”

19 Atumia acio a gũciarithania magĩcookeria mũthamaki atĩrĩ, “Atumia a Ahibirania matihaana ta atumia a Amisiri, nĩ amu o me hinya na moohokaga tũtakinyĩĩte.”

20-21 Nĩ ũndũ wa gũkorwo atumia acio aciarithania nĩmaatĩĩĩte Ngai, Ngai nĩameekire wega agĩtũma magĩe na mĩciĩ yao eene. Nao andũ a Isiraeli magĩthiĩ na mbere kuongerereka na kũgĩa na hinya.

22 Naake mũthamaki agĩgĩatha andũ aake oothe akĩmeera atĩrĩ, “Kaana o goothe ga kahĩĩ karĩciaragwo nĩ Ahibirania no mũhaka mũgagaikia rũũĩ rwa Nailo, no tũirĩĩtu mũkareka tũtũũre muoyo.”

Gũciarwo kwa Musa

1 Na rĩĩrĩ, mũndũ ũmwe wa mũhĩrĩga wa Lawi nĩahikirie mũirĩĩtu wa mũhĩrĩga o ro ũcio,

2 naake mũtumia ũcio agĩciara kaana ga kahĩĩ. Rĩrĩa oonire ũrĩa kaana kau kaarĩ gathaka, agĩkahitha mĩeri ĩtatũ.

3 Rĩrĩa aaremirwo nĩgũthiĩ na mbere gũkahitha, akĩoya gĩkabũ gĩathondekeetwo na ithanjĩ, agĩgĩthinga na rami nĩguo gĩtigatonyie maaĩ. Agĩcooka agĩkomia kaana kau thĩinĩ wa gĩkabũ kĩu, agĩkĩiga ithanjĩinĩ rũteereinĩ rwa rũũĩ.

4 Naake mwarĩ wa nyina na kaana kau akĩrũũgama haraaya nĩguo oone ũrĩa gũgũtuĩka igũrũ rĩako.

5 Na rĩĩrĩ, mwarĩ wa mũthamaki agĩikũrũka gwĩthamba rũũĩinĩ, nacio ndungata ciake cia airĩĩtu ciaceerangaga mwenainĩ wa rũũĩ. O rĩmwe mwarĩ ũcio wa mũthamaki akĩona gĩkabũ kĩu gatagatĩ ga ithanjĩ, agĩtũma ndungata ĩmwe yake ya mũirĩĩtu ĩgakĩgĩĩre.

6 Rĩrĩa mwarĩ ũcio wa mũthamaki akĩhingũrire, akĩona kaana ga kahĩĩ, nako kaana nĩkũrĩra kaarĩraga. Agĩkaiguĩra tha akiuga atĩrĩ, “Kaana gaaka nĩ kamwe ga twana twa Ahibirania.”

7 Naake mwarĩ wa nyina na kaana kau akĩũria mwarĩ wa mũthamaki atĩrĩ, “Nĩũkwenda thiĩ ngagwĩtĩre mũtumia Mũhibirania nĩguo akũrerere kaana gaaka?”

8 Naake mwarĩ wa mũthamaki akĩmũcookeria atĩrĩ, “Ĩĩ.” Kwoguo mũirĩĩtu ũcio agĩthiĩ agĩĩta nyina wa kaana kau.

9 Naake mwarĩ wa mũthamaki akĩĩra mũtumia ũcio atĩrĩ, “Oya kaana gaaka ũthiĩ ũnderere, na nĩndĩrĩkũheaga mũcaara.” Mũtumia ũcio agĩkĩoya kaana kau, agĩkarera.

10 Thuuthainĩ kaana kau gaakũrakũra, agĩgatwarĩra mwarĩ wa mũthamaki, nako gagĩtuĩka mũũriũ wake. Agĩgatua Musa,akiuga atĩrĩ, “Nĩ amu ndakarutire maaĩinĩ.” Ningĩ rĩĩtwa rĩĩri nĩrĩĩtanagio na Seiru, bũrũri ũrĩa thuuthainĩ wacookire gũtũũrwo nĩ njiarwa cia Esau.

Musa kũũrĩra bũrũri wa Midiani

11 Na rĩĩrĩ, Musa atuĩka mũndũ mũgima, mũthenya ũmwe nĩoimagarire agĩthiĩ gũceerera andũ aao, nĩ o Ahibirania, akĩona ũrĩa maarutithagio wĩra wa hinya. O na ningĩ nĩonire Mũmisiri akĩhũũra ũmwe wa Ahibirania aao.

12 Naake Musa akĩrora mwena na mwena, akĩona atĩ hatirĩ mũndũ wamuonaga, akĩũraga Mũmisiri ũcio, na akĩhitha mwĩrĩ wake mũthangainĩ.

13 Na rĩĩrĩ, mũthenya ũcio ũngĩ oimagara, agĩkora Ahibirania eerĩ makĩgiana. Akĩũria ũrĩa warĩ na mahĩtia atĩrĩ, “Nĩ kĩĩ kĩratũma ũgie Mũhibirania ũrĩa ũngĩ?”

14 Naake mũndũ ũcio akĩmũcookeria atĩrĩ, “Nũũ ũgũtuĩte mũnene witũ na mũtũtuithania? Anga nĩũkwenda kũnjũraga ta ũrĩa ũrooragire Mũmisiri?” Musa agĩgĩĩtigĩra, akĩĩĩra na ngoro atĩrĩ, “Ti itherũ andũ nĩmarĩĩkĩĩtie kũmenya ũrĩa ndĩreekire.”

15-16 Rĩrĩa mũthamaki aiguire ũrĩa gwekĩkĩĩte, akĩgeria kũũragithia Musa, no Musa akĩũra agĩthiĩ gũtũũra bũrũriinĩ wa Midiani.

Na rĩĩrĩ, mũthenya ũmwe rĩrĩa Musa aikarĩĩte thĩ gĩthimainĩ, airĩĩtu mũgwanja a mũthĩnjĩri Ngai wa Midiani wetagwo Jethero magĩũka gũtaha maaĩ, na kũiyũria mĩharatĩ nĩ geetha ũhiũ wa ithe wao ũnyue maaĩ.

17 No arĩithi magĩũka makĩmaingata. Naake Musa akĩrũũgama akĩmateithĩrĩria, na akĩnyuithia ũhiũ wao maaĩ.

18 Rĩrĩa airĩĩtu acio maacookire kũrĩ ithe wao, akĩmooria atĩrĩ, “Kaĩ arĩ atĩa ũũmũũthĩ mwacooka tene ũguo?”

19 Nao makĩmũcookeria atĩrĩ, “Nĩ Mũmisiri watũteithũra kuuma kũrĩ arĩithi, o na atũtahĩra maaĩ anyuithia ũhiũ witũ.”

20 Naake ithe akĩmooria atĩrĩ, “Mũndũ ũcio arĩ ha? Mũmũtigire nĩkĩ? Thiĩi mũkamwĩte nĩ geetha arĩanĩre na ithuĩ.”

21 Kwoguo Musa agĩĩtĩkĩra gũtũũra kũu, naake Jethero akĩmũhe mũirĩĩtu wake wetagwo Zipora amũhikie.

22 Naake Zipora agĩciarĩra Musa kaana ga kahĩĩ karĩa aatuire Gerishomuamu oigire atĩrĩ, “Ndĩ mũgeni bũrũriinĩ ũyũ.”

23 Thuutha wa mĩaka mĩingĩ mũthamaki wa Misiri agĩkua. Nao andũ a Isiraeli no macaayaga marĩ ũkomboinĩ na magakaya mateithio. Nakĩo kĩrĩro kĩao gĩgĩkinyĩra Ngai,

24 akĩigua mũcaayo wao, na akĩririkana kĩrĩĩkanĩro gĩake na Aburahamu, Isaaka, na Jakubu.

25 Naake Ngai akĩona ũkombo wa andũ a Isiraeli, agĩitĩka kũmarũmbũiya.

Musa gwĩtwo nĩ Ngai

1 Mũthenya ũmwe, rĩrĩa Musa arĩithagia ũhiũ wa mũthoni we Jethero, mũthĩnjĩri Ngai wa Midiani, nĩatwarire ũhiũ mwena ũũrĩa ũngĩ wa werũ o kinya agĩkinya kĩrĩmainĩ, kĩrĩa gĩtheru gĩa Sinai.

2 Arĩ kũu, mũraika wa MWATHANI nĩamuumĩrĩire arĩ rũrĩrĩmbĩinĩ rwa mwaki rwoimaga gatagatĩ ga kĩhinga. Naake Musa aacũũthĩrĩria, akĩona atĩ kĩhinga nĩgĩakanaga, no gĩtiahĩaga.

3 Naake Musa akĩĩĩra na ngoro atĩrĩ, “Ũyũ nĩ ũndũ wa magegania, reke nguhĩrĩrie nyone nĩ kĩĩ kĩratũma kĩhinga kĩage kũhĩa.”

4 Rĩrĩa MWATHANI oonire Musa agĩkuhĩrĩria kĩhinga, akĩmwĩta kuuma gatagatĩ ga kĩhinga akĩmwĩra atĩrĩ, “Musa! Musa!”

Naake agĩcookia atĩrĩ, “Ĩ niĩ ũyũ haaha.”

5 Ngai akĩĩra Musa atĩrĩ, “Ndũgakuhĩrĩrie; ruta iraatũ ciaku nĩ amu hau ũrũngiĩ nĩ handũ hatheru.”

6 Agĩcooka akĩmwĩra atĩrĩ, “Nĩ niĩ Ngai wa maithe maaku, Ngai wa Aburahamu, Isaaka, na Jakubu.” Musa agĩkĩĩhumbĩra ũthiũ nĩ amu nĩetigĩrire kũrora Ngai.

7 MWATHANI agĩcooka akĩmwĩra atĩrĩ, “Nĩndĩkĩĩtie kuona mĩnyamaaro ya andũ aakwa arĩa me Misiri, na ngaigua kĩrĩro kĩao atĩ mahonokio kuuma kũrĩ anyabaara arĩa mamahinyagĩrĩria. Nĩnjũũĩ mathĩĩna marĩa marĩ namo,

8 na kwoguo nĩnjikũrũkĩĩte ndĩmahonokie kuuma kũrĩ andũ a Misiri. Ngũmaruta bũrũri wa Misiri ndĩmatware bũrũriinĩ mwariĩ, mwega na mũnoru, kũrĩa rĩu gũtũirwo nĩ Akanaani, Ahiti, Aamori, Aperizi, Ahivi, na Ajebusi.

9 Ti itherũ kĩrĩro kĩa andũ a Isiraeli nĩkĩnginyĩire, na nĩnyoneete ũrĩa andũ a Misiri maramahinyĩrĩria.

10 Rĩu nĩngũgũtũma kũrĩ mũthamaki wa Misiri nĩ geetha ũgatongorie andũ aakwa moime bũrũriinĩ ũcio.”

11 No Musa akĩũria Ngai atĩrĩ, “Niĩ ndĩkĩrĩ ũ atĩ nĩguo thiĩ kũrĩ mũthamaki wa Misiri nĩguo ngatongorie andũ a Isiraeli ndĩmarute kuo?”

12 Naake Ngai akĩmũcookeria atĩrĩ, “Nĩngũkorwo hamwe nawe; na rũũrũ nĩruo rũũri rwa kuonania atĩ nĩ niĩ ndagũtũma: waruta andũ kuuma Misiri, nĩmũgaathaathayĩria kĩrĩmainĩ gĩĩkĩ.”

13 No Musa agĩcookeria Ngai atĩrĩ, “Ndathiĩ kũrĩ andũ a Isiraeli ndĩmeere atĩ, ‘Ngai wa maithe maanyu nĩ we wandũma kũrĩ inyuĩ’ nao manjũũrie atĩrĩ, ‘Rĩĩtwa rĩake nĩ rĩrĩkũ?’ Ngaameera atĩa?”

14 Naake Ngai akĩmwĩra atĩrĩ, “NĨ NIĨ ŨRĨA WE.”Ũũ nĩguo ũkaameera: ũrĩa wĩtagwo, “NĨ NIĨ,nĩ we wandũma kũrĩ inyuĩ.”

15 Ningĩ Ngai akĩĩra Musa atĩrĩ, “Ĩra andũ a Isiraeli atĩ, ‘MWATHANI, Ngai wa maithe maanyu, o we Ngai wa Aburahamu, Isaaka, na Jakubu, nĩ we wandũma kũrĩ inyuĩ.’ Rĩĩrĩ nĩrĩo rĩĩtwa rĩakwa kinya tene; na ũguo nĩguo njiarwa ciothe irĩnjĩtaga.

16 Thiĩ ũcookanĩrĩrie atongoria oothe a Isiraeli ũmeere atĩ, niĩ MWATHANI, o niĩ Ngai wa maithe maanyu, o niĩ Ngai wa Aburahamu, Isaaka, na Jakubu, nĩnguumĩrĩire. Meere atĩ nĩnjũkĩĩte kũrĩ o, na nĩnyoneete maũndũ marĩa andũ a Misiri marameeka.

17 Nĩnduĩte atĩ nĩngũmaruta moime mĩnyamaaroinĩ ĩrĩa marathĩĩnio nayo bũrũriinĩ wa Misiri, ndĩmatware bũrũri mwega na mũnoru; bũrũri wa Akanaani, Ahiti, Amori, Aperizi, Ahivi, na wa Ajebusi.

18 “Nao nĩmagaathikĩrĩria ũrĩa ũkaameera. Ningĩ nĩũgaacooka ũthiĩ kũrĩ mũthamaki wa Misiri ũrĩ hamwe na atongoria a Isiraeli ũmwĩre atĩrĩ, ‘MWATHANI, o we Ngai wa Ahibirania nĩeyonanĩĩtie kũrĩ ithuĩ; tondũ wa ũguo twĩtĩkĩrie tũthiĩ werũinĩ rũgendo rwa mĩthenya ĩtatũ nĩguo tũkarutĩre MWATHANI, Ngai witũ magongoona.’

19 No rĩĩrĩ, nĩnjũũĩ atĩ mũthamaki wa Misiri ndemũreka mũthiĩ o tiga ahatĩrĩirio eeke ũguo.

20 No nĩngaahũthĩra hinya wakwa herithie bũrũri wa Misiri na ũndũ wa gwĩka maũndũ ma kũguoyohia kuo. Thuutha wa maũndũ macio, mũthamaki nĩakamwĩtĩkĩria mũthiĩ.

21 “Nĩngaatũma andũ a Misiri matĩĩe andũ a Isiraeli, nĩguo rĩrĩa andũ aakwa makoima Misiri, matikaanathiĩ mooko matheri.

22 Mũtumia Mũisiraeli o wothe nĩagaathiĩ kũrĩ Mũmisiri ũrĩa marigainie, o na kũrĩ mũgeni o wothe ũrĩ nyũmba ya Mũmisiri ũcio, ameetie nguo, indo cia betha, o na cia thahabu. Indo icio mũgaaciĩkĩra aariũ na aarĩ aanyu, na kwoguo mũgĩkuue ũtonga wa andũ a Misiri.”

Ngai kũhe Musa hinya wa kũringa ciama

1 Ningĩ Musa agĩcookeria MWATHANI atĩrĩ, “Andũ a Isiraeli mangĩrega kũnjĩtĩkia na gũthikĩrĩria ũrĩa ngũmeera-rĩ, ngeeka atĩa mangĩnjĩĩra atĩ wee ndwanyumĩrĩire?”

2 Kwoguo MWATHANI agĩkĩmũũria atĩrĩ, “Nĩ kĩĩ kĩu ũnyiitĩĩte?”

Naake Musa akĩmũcookeria atĩrĩ, “Nĩ mũthĩĩgi.”

3 MWATHANI akĩmwĩra atĩrĩ, “Taũikie thĩ.” Rĩrĩa Musa aikirie mũthĩĩgi ũcio thĩ, ũgĩtuĩka nyoka, naake akĩmĩũrĩra.

4 No MWATHANI akĩmwĩra atĩrĩ, “Inamĩrĩra ũmĩnyiite gitong’oe.” Musa agĩkĩinamĩrĩra akĩmĩnyiita, nayo ĩgĩtuĩka mũthĩĩgi rĩngĩ.

5 MWATHANI akĩmwĩra atĩrĩ, “Ũguo nĩguo ũgeeka nĩguo andũ a Isiraeli meetĩkie atĩ MWATHANI, o we Ngai wa maithe maao, o we Ngai wa Aburahamu, Isaaka, na Jakubu nĩakuumĩrĩire.”

6 Ningĩ MWATHANI akĩarĩria Musa akĩmwĩra atĩrĩ, “Taikia guoko gwaku gĩthũriinĩ gĩaku.” Naake Musa agĩikia guoko gwake gĩthũriinĩ gĩake; rĩrĩa aakũrutire, gũgĩkorwo kũrũarĩĩte mũrimũ mũũru wa ngoothi, gũkeerũha o ta ira.

7 MWATHANI akĩmwĩra rĩngĩ atĩrĩ, “Tacookia guoko gwaku gĩthũriinĩ gĩaku.” Naake agĩĩka o ta ũguo, na rĩrĩa aakũrutire, gũgĩkorwo gwĩ kũgima o ta mwĩrĩ ũrĩa ũngĩ.

8 MWATHANI agĩkĩmwĩra atĩrĩ, “Mangĩkaaga gũgwĩtĩkia o na kana marege kũigua ũira wa kĩama kĩa mbere, nĩmageetĩkia ũira wa kĩama kĩu gĩa keerĩ.

9 Mangĩkĩrega gwĩtĩkia o na ũira wa ciama icio cierĩ, kana marege gũthikĩrĩria ũrĩa ũkaameera-rĩ, nĩũgaathiĩ ũtahe maaĩ rũũĩinĩ rwa Nailo ũmaite thĩ. Maaĩ macio nĩmagaatuĩka thakame.”

10 No Musa akĩĩra MWATHANI atĩrĩ, “Mwathi wakwa, tiga kũndũma. Niĩ ndirĩ mũndũ mwaria, o na ndirĩ ndatuĩka mwaria kuuma tene, o na kuuma rĩrĩa wambĩrĩirie kwaria na niĩ. Mwarĩrie wakwa nĩ wa kahora, na nĩndondoiraga.”

11 MWATHANI agĩkĩmũũria atĩrĩ, “Nũũ ũheaga mũndũ hinya wa kwaria? Nũũ ũtũmaga mũndũ atuĩke gĩtaigua kana aremwo nĩkwaria? Nũũ ũmũheaga ũhoti wa kuona kana agatũma atuĩke gĩtumuumu? Githĩ ti niĩ, MWATHANI?

12 Rĩu gĩthiĩ! Nĩngũgũteithĩrĩria kwaria na nĩngũgũtaara ũrĩa ũkuuga.”

13 No Musa agĩcookia atĩrĩ, “Mwathi wakwa, ndagũthaitha tũma mũndũ ũngĩ.”

14 MWATHANI agĩkĩraakarĩra Musa akĩmũũria atĩrĩ, “Githĩ mũrũ wa maitũguo Harũni ũrĩa Mũlawii ndarĩ ho? Nĩnjũũĩ atĩ no ahote kwaria wega. O na nĩarooka gũgũtũnga, na akuona nĩegũkena.

15 Mwarĩrie na ũmũtaare ũrĩa ekuuga; nĩngũmũteithĩrĩria inyuĩ eerĩ kwaria na ndĩmũtaare ũrĩa mũgwĩka.

16 Nĩ we ũgũtuĩka wa kwaragĩria andũ handũ haaku, nawe ũgĩtuĩke ta Ngai harĩ we ũmwĩrage ũrĩa ekuuga.

17 Oya mũthĩĩgi ũyũ ũthiĩ naguo, amu nĩũkaaringa ciama naguo.”

Musa gũcooka Misiri

18 Naake Musa agĩcooka kũrĩ Jethero, mũthoni we akĩmwĩra atĩrĩ, “Ndagũthaitha ũnjĩtĩkĩrie njooke kũrĩ andũ aitũ arĩa marĩ Misiri, nĩ geetha ngarore kana marĩ o muoyo.” Jethero akĩĩra Musa atĩrĩ, “Thiĩ na thaayũ.”

19 Naake Musa arĩ o kũu bũrũriinĩ wa Midiani, MWATHANI nĩamwarĩirie akĩmwĩra atĩrĩ, “Cooka Misiri nĩ amu arĩa oothe meendaga gũkũũraga nĩmarĩĩkĩĩtie gũkua.”

20 Kwoguo Musa agĩkĩoya mũtumia wake na aariũ aake, akĩmahaicia ndigiri, akĩnyiita rũgendo rwa gũcooka Misiri. Aathiire akuuĩĩte mũthĩĩgi ũrĩa Ngai aamwĩrĩĩte akuue.

21 Ningĩ MWATHANI akĩĩra Musa atĩrĩ, “Warĩĩkia gũcooka bũrũri wa Misiri-rĩ, ũtigĩrĩre nĩwaringa mbere ya mũthamaki wa Misiri ciama ciothe iria ngũheete hinya wa kũringa. No nĩngũũmia ngoro yake nĩguo agirie andũ mathiĩ.

22 Hĩndĩ ĩyo nĩũkaamwĩra atĩrĩ, ‘MWATHANI ekuuga ũũ: Isiraeli nĩ mũũriũ wakwa wa irigithaathi.

23 Ndakwĩra atĩ ũreke mũũriũ wakwa athiĩ nĩ geetha agaathaathaiye. Ũngĩrega kũmwĩtĩkĩria athiĩ, nĩngũũraga mũũrũguo wa irigithaathi.’ ”

24 Na rĩĩrĩ, marĩ handũ maambĩĩte hema njĩrainĩ magĩthiĩ Misiri-rĩ, MWATHANI nĩatũngire Musa na akĩgeria kũmũũraga.

25-26 Zipora agĩkĩoya kahiga kahaanaga rũenji, akĩruithia mũũriũ nako, agĩcooka akĩhuutia magũrũma Musa na gakonde kau. Nĩ ũndũ wa irua rĩu akĩĩra Musa atĩrĩ, “Ti itherũ wee wĩ mũthuuri wa thakame!” Nĩ ũndũ ũcio MWATHANI agĩkĩhonokia muoyo wa Musa.

27 Na rĩĩrĩ, MWATHANI nĩarĩĩkĩĩtie kwĩra Harũni atĩrĩ, “Thiĩ werũinĩ ũgatũnge Musa.” Kwoguo agĩthiĩ akĩmũtũnga kĩrĩmainĩ gĩtheru, akĩmũmumunya.

28 Naake Musa agĩgĩtaarĩria Harũni ũhoro wothe ũrĩa MWATHANI aamũheete rĩrĩa aamwĩrire acooke Misiri. O na ningĩ nĩamũtaarĩirie ũhoro wa ciama iria MWATHANI aamwathĩĩte aringe.

29 Kwoguo Musa na Harũni magĩgĩthiĩ Misiri, na makĩũngania atongoria oothe a andũ a Isiraeli.

30 Harũni akĩmahe ũhoro wothe ũrĩa MWATHANI eerĩĩte Musa, naake Musa akĩringa ciama andũ meroreire.

31 Nao andũ magĩĩtĩkia. Rĩrĩa maiguire atĩ MWATHANI nĩokĩĩte kũmarora, na nĩoneete mĩnyamaaro yao, makĩinamĩrĩria mĩtwe magĩthaathaiya.

Musa na Harũni gũthiĩ kũrĩ mũthamaki wa Misiri

1 Musa na Harũni magĩgĩthiĩ kũrĩ mũthamaki wa Misiri makĩmwĩra atĩrĩ, “MWATHANI, Ngai wa Isiraeli, ekuuga atĩrĩ, ‘Reke andũ aakwa mathiĩ, nĩ geetha makagĩe na thigũkũ ya kũngumia werũinĩ.’ ”

2 No mũthamaki akĩũria atĩrĩ, “MWATHANI nũũ atĩ nĩguo ndĩmũthikĩrĩrie na njĩtĩkĩrie andũ a Isiraeli mathiĩ? MWATHANI ũcio niĩ ndimũũĩ, na ndigwĩtĩkĩria andũ a Isiraeli mathiĩ.”

3 Nao Musa na Harũni magĩcookia atĩrĩ, “Ngai wa Ahibirania nĩeyonithanĩĩtie kũrĩ ithuĩ; twagũthaitha ũtwĩtĩkĩrie tũthiĩ rũgendo rwa mĩthenya ĩtatũ werũinĩ tũkarutĩre MWATHANI Ngai witũ magongoona. Twaga gwĩka ũguo, nĩegũtũniina na mĩrimũ kana mbaara.”

4 No mũthamaki akĩũria Musa na Harũni atĩrĩ, “Mũrenda gũtigithia andũ wĩra wao nĩkĩ? Thiĩi mwĩre ngombo icio icooke wĩrainĩ wacio!

5 Inyuĩ andũ aya nĩmũingĩhĩĩte gũkĩra andũ a Misiri, na rĩu mũrenda gũtiga kũruta wĩra!”

6 Mũthenya o ro ũcio, mũthamaki agĩatha akabuurũ arĩa maarĩ Amisiri na anyabaara arĩa maarĩ Aisiraeli akĩmeera atĩrĩ,

7 “Mũtigaacooke kũhe andũ rũũa rwa ngano rwa gũthondeka maturubaarĩ naruo; kuuma rĩu rekeei mathiage gwĩcarĩria o eene.

8 No mũigana wa maturubaarĩ marĩa marĩthondekaga ũrĩkoragwo ũrĩ o ta wa mbere. Mũtikaamanyiihĩrie o na haniini, nĩ amu nĩmagũũtarĩĩte na nĩkĩo marandĩrĩra atĩ ndeke mathiĩ makarutĩre Ngai wao magongoona!

9 Nĩmaheeo wĩra mũritũ makĩria ũrĩa makoragwo makĩruta nĩguo matigaacooke kũrũmbũyania na ũhoro wa maheeni.”

10 Kwoguo akabuurũ na anyabaara magĩthiĩ kũrĩ andũ a Isiraeli makĩmeera atĩrĩ, “Mũthamaki ekuuga atĩ ndegũcooka kũmũhe rũũa rwa ngano rĩngĩ.

11 Mũrĩthiaga mũkarũcaria o kũrĩa mũngĩhota kũruona, na mũmenye atĩ wĩra wanyu ndũkũnyiihanyiihio o na haniini.”

12 Kwoguo andũ magĩkĩũrũũra Misiri guothe gũcaria rũũa.

13 Nao akabuurũ no maamahatagĩrĩria mathondeke o mũthenya mũigana wa maturubaarĩ o ta ũrĩa maathondekaga hĩndĩ ĩrĩa maaheagwo rũũa.

14 Nao akabuurũ a Misiri makĩhũũra anyabaara a andũ a Isiraeli arĩa maigĩĩte marũũgamagĩrĩre wĩra makĩmooragia atĩrĩ, “Nĩkĩ kĩratũma mwage gũthondeka mũigana wa maturubaarĩ ta ũrĩa mũrathondekaga mbere?”

15 Anyabaara acio a andũ a Isiraeli magĩgĩthiĩ magĩkaĩra mũthamaki makiuga atĩrĩ, “Mũthamaki, nĩkĩ kĩratũma ũtũĩke maũndũ ta maya, ithuĩ ndungata ciaku?

16 Tũtiraheeo rũũa, na no tũrathwo tũthondeke maturubaarĩ! Ningĩ no tũrahũũrwo, o na gũtuĩka andũ aaku nĩ o me na mahĩtia.”

17 No mũthamaki akĩmacookeria atĩrĩ, “Inyuĩ mũrĩ igũũta na mũtirenda kũruta wĩra; nĩkĩo mũranjũũria ndĩmwĩtĩkĩrie mũthiĩ mũkarutĩre MWATHANI magongoona.

18 Rĩu cookaai mũkarute wĩra! Gũtirĩ rũũa mũkũheeo, na no mũhaka mũthondeke mũigana wa maturubaarĩ o ta wa mbere.”

19 Anyabaara acio a andũ a Isiraeli magĩkĩona atĩ maarĩ thĩĩnainĩ rĩrĩa meerirwo atĩ o mũthenya no mũhaka mathondekage mũigana wa maturubaarĩ o ta ũrĩa marathondekaga mbere ĩyo.

20 Na rĩĩrĩ, rĩrĩa moimaga kwa mũthamaki magĩtũngana na Musa na Harũni arĩa maameetereire.

21 Nao makĩĩra Musa na Harũni atĩrĩ, “MWATHANI nĩoneete ũrĩa mwĩkĩĩte, na hatirĩ nganja nĩekũmũherithia nĩ ũndũ wa gũtũma mũthamaki na njaama ciake itũthũũre. Nĩmũrĩkĩĩtie kũmahe kĩĩgwatio gĩa gũtũũraga.”

Musa gũtetia MWATHANI

22 Musa agĩkĩhũgũkĩra MWATHANI rĩngĩ akĩmũũria atĩrĩ, “MWATHANI, nĩkĩ kĩratũma wĩke andũ aaku ũũru? Nĩkĩ gĩatũmire ũndũme gũũkũ?

23 Kuuma rĩrĩa ndathiire kũrĩ mũthamaki kũmwarĩria thĩinĩ wa rĩĩtwa rĩaku, no gwĩka eekaga andũ aya ũũru, nawe ndũrĩ ũndũ wĩkĩĩte wa kũmakũũra!”

1 No MWATHANI akĩĩra Musa atĩrĩ, “Rĩu nĩũkuona ũrĩa ngwĩka mũthamaki wa Misiri. Ngũmũhatĩrĩria nginya areke andũ aakwa mathiĩ; ti itherũ ngũmũhinyĩrĩria ndũme amaingate moime bũrũriinĩ wake.”

Ngai kwarĩria Musa

2 Ningĩ Ngai akĩarĩria Musa akĩmwĩra atĩrĩ, “Nĩ niĩ MWATHANI.

3 Nĩndoimĩrĩire Aburahamu, Isaaka, na Jakubu, ta Ngai Mwene Hinya Wothe, no ndiemenyithanirie kũrĩ o na rĩĩtwa rĩakwa rĩtheru ‘MWATHANI.’

4 Ningĩ nĩndathondekire kĩrĩĩkanĩro nao atĩ nĩngaamahe bũrũri wa Kanaani, o bũrũri ũrĩa maatũũraga ta ageni.

5 Rĩu nĩnjiguĩte mũcaayo wa andũ a Isiraeli arĩa maigĩĩtwo ũkomboinĩ nĩ andũ a Misiri, na ngakĩririkana kĩrĩĩkanĩro gĩakwa.

6 Kwoguo ĩra andũ a Isiraeli atĩrĩ, ‘Nĩ niĩ MWATHANI, na nĩngũmũruta ndĩmũrekererie kuuma ũkomboinĩ wa andũ a Misiri. Nĩngũtambũrũkia guoko gwakwa kwĩ hinya ndĩmareehere iherithia inene, na nĩngũmũhonokia.

7 Nĩngũmũtua andũ aakwa, na niĩ nduĩke Ngai wanyu. Nĩmũkaamenya atĩ nĩ niĩ MWATHANI Ngai wanyu rĩrĩa ngaamũruta kuuma ũkomboinĩ wa Misiri.

8 Na nĩngũmũtwara bũrũri ũrĩa ndehĩtire atĩ nĩngaahe Aburahamu, Isaaka, na Jakubu; nĩngũmũhe ũtuĩke wanyu kĩũmbe. Niĩ nĩ niĩ MWATHANI.’ ”

9 No Musa eera andũ a Isiraeli maũndũ macio, makĩrega kũmũthikĩrĩria, nĩ amu nĩmakuĩte ngoro nĩ ũndũ wa ũkombo wao mũũru.

10 Ningĩ MWATHANI akĩĩra Musa atĩrĩ,

11 “Thiĩ wĩre mũthamaki wa Misiri areke andũ a Isiraeli moime bũrũri wake.”

12 No Musa agĩcookia atĩrĩ, “O andũ a Isiraeli makĩrege gũũthikĩrĩria, no mũthamaki wa Misiri ũgwĩtĩkĩra gũũthikĩrĩria, o niĩ mũndũ ũtooĩ kwaria?”

13 No MWATHANI agĩatha Musa na Harũni akĩmeera atĩrĩ, “Ĩraai andũ a Isiraeli o na mũthamaki wa Misiri, atĩ nĩndamwatha mũtongorie andũ a Isiraeli moime bũrũri wa Misiri.”

Ndĩra cia Musa na Harũni

14 Reubeni, ũrĩa warĩ irigithaathi rĩa Jakubu aarĩ na aariũ ana: Hanoku, Palu, Hezironi, na Karimi. Acio nĩ o maarĩ maithe ma mbarĩ iria ciĩtanĩĩtio na marĩĩtwa maao.

15 Simeoni aarĩ na aariũ atandatũ: Jemueli, Jamini, Ohadi, Jakini, Zoharu, na Shaulu, ũrĩa warĩ mũũriũ wa mũtumia Mũkanaani. Acio nĩ o maarĩ maithe ma mbarĩ iria ciĩtanĩĩtio na marĩĩtwa maao.

16 Lawi aarĩ na aariũ atatũ: Gerishoni, Kohathu, na Merari. Acio nĩ o maarĩ maithe ma mbarĩ iria ciĩtanĩĩtio na marĩĩtwa maao. Lawi aatũũrire mĩaka igana rĩa mĩrongo ĩtatũ na mũgwanja (137).

17 Gerishoni aarĩ na aariũ eerĩ: Libini, na Shimei, na maarĩ na njiarwa nyingĩ.

18 Kohathu aarĩ na aariũ ana: Amuramu, Iziharu, Heburoni, na Uzieli. Kohathu aatũũrire mĩaka igana rĩa mĩrongo ĩtatũ na ĩtatũ (133).

19 Naake Merari aarĩ na aariũ eerĩ: Mahali, na Mushi. Icio nĩcio mbarĩ cia Lawi na njiarwa ciacio.

20 Na rĩĩrĩ, Amuramu akĩhikia taatawe wetagwo Jokebedi, ũrĩa wamũciarĩire Harũni na Musa. Amuramu aatũũrire mĩaka igana rĩa mĩrongo ĩtatũ na mũgwanja (137).

21 Iziharu aarĩ na aariũ atatũ: Kora, Nefegu, na Zikiri.

22 O naake Uzieli aarĩ na aariũ atatũ: Mishaeli, Elizafani, na Sithiri.

23 Na rĩĩrĩ, Harũni akĩhikia Elisheba, mwarĩ wa Aminadabu, ũrĩa warĩ mwarĩ wa nyina na Nahashoni, naake akĩmũciarĩra: Nadabu, Abihu, Eleazaru, na Ithamaru.

24 Kora aarĩ na aariũ atatũ: Asiru, Elikana, na Abiasafu; acio nĩ o maarĩ maithe ma nyũmba cia mbarĩ ya Kora.

25 Naake Eleazaru, mũrũ wa Harũni, akĩhikia mũirĩĩtu ũmwe wa Putieli, naake mũirĩĩtu ũcio akĩmũciarĩra Finehasi. Acio nĩ o maarĩ atongoria a nyũmba na mbarĩ cia mũhĩrĩga wa Lawi.

26 Harũni na Musa nĩ o MWATHANI eerire atĩrĩ, “Umiai andũ a Isiraeli bũrũri wa Misiri kũringana na mĩhĩrĩga yao.”

27 No o meerire mũthamaki wa Misiri arekererie andũ a Isiraeli.

MWATHANI gwatha Musa na Harũni

28 Hĩndĩ ĩrĩa MWATHANI aarĩirie Musa bũrũriinĩ wa Misiri,

29 aamwĩrire atĩrĩ, “Nĩ niĩ MWATHANI; ĩra mũthamaki wa Misiri ũhoro wothe ũrĩa ngũkwĩra.”

30 No Musa agĩcookeria MWATHANI atĩrĩ, “Wee nĩũũĩ atĩ niĩ ndiũĩ kwaria; mũthamaki wa Misiri angĩgĩĩthikĩrĩria atĩa?”

1 Naake MWATHANI akĩĩra Musa atĩrĩ, “Nĩngũgũtua ta Ngai harĩ mũthamaki wa Misiri, naake Harũni mũrũ wa maitũguo arĩaragia ta mũnabii waku.

2 Wee ũrĩĩraga Harũni maũndũ moothe marĩa ndĩrĩgwathaga, naake akeera mũthamaki wa Misiri nĩguo arekererie andũ a Isiraeli moime bũrũri wake.

3-4 No nĩngũũmia mũthamaki wa Misiri ngoro, na ndarĩmũthikĩrĩria, o na ndathiĩ na mbere gwĩka maũndũ ma kũguoyohia bũrũriinĩ wa Misiri. Ningĩ nĩngũreehithĩria Misiri na iherithia rĩnene, na ndongorie mĩhĩrĩga ya andũ aakwa yume bũrũri ũcio.

5 Andũ a Misiri nĩmagaakĩmenya atĩ nĩ niĩ MWATHANI, rĩrĩa ngaamatambũrũkĩria guoko gwakwa ndĩmahũũre, na ndute andũ a Isiraeli bũrũriinĩ wao.”

6 Nao Musa na Harũni magĩgĩĩka o ũrĩa MWATHANI aamaathĩĩte.

7 Hĩndĩ ĩrĩa maarĩirie mũthamaki wa Misiri, Musa aarĩ wa mĩaka mĩrongo ĩnaana, naake Harũni aarĩ wa mĩaka mĩrongo ĩnaana na ĩtatũ.

Mũthĩĩgi wa Harũni

8 Naake MWATHANI akĩĩra Musa na Harũni atĩrĩ,

9 “Mũthamaki wa Misiri angĩmwĩra mũringe kĩama nĩguo mwonanie atĩ mũrĩ a ma-rĩ, wee Musa ĩra Harũni ooe mũthĩĩgi wake aũikie thĩ mbere ya mũthamaki, naguo nĩũgũtuĩka nyoka.”

10 Kwoguo Musa na Harũni magĩthiĩ kũrĩ mũthamaki magĩĩka o ta ũrĩa MWATHANI aamaathĩĩte. Harũni agĩikia mũthĩĩgi wake thĩ mbere ya mũthamaki na njaama ciake, naguo ũgĩtuĩka nyoka.

11 Mũthamaki agĩgĩĩta andũ aake arĩa oogĩ na ago, nao makĩhũthĩra ũgo wao magĩĩka o ta ũrĩa Harũni eekĩĩte.

12 Magĩgĩikia mĩthĩĩgi yao thĩ, nayo ĩgĩtuĩka nyoka. No mũthĩĩgi wa Harũni ũkĩmeria mĩthĩĩgi yao.

13 O na gwatuĩka ũguo, mũthamaki wa Misiri akĩũmia ngoro, na o ta ũrĩa MWATHANI oigĩĩte, akĩrega gũthikĩrĩria Musa na Harũni.

Matũhũũhũ kũgĩa Misiri

Thakame

14 Ningĩ MWATHANI akĩĩra Musa atĩrĩ, “Mũthamaki nĩomĩĩtie ngoro mũno, na nĩaregeete kũreka andũ mathiĩ.

15 Kwoguo thiĩ ũmũtũnge kĩrooko hĩndĩ ĩrĩa arathiĩ rũũĩinĩ rwa Nailo, na ũkuue mũthĩĩgi ũrĩa wagarũrũkĩĩte ũgatuĩka nyoka, ũmweterere hũgũrũrũinĩ cia rũũĩ.

16 Nawe ũkĩmwĩre atĩrĩ, ‘MWATHANI, o we Ngai wa Ahibirania, nĩ we ũndũmĩĩte kũrĩ wee ngwĩre ũreke andũ aake mathiĩ, nĩ geetha makamũthaathaĩrie werũinĩ. No rĩĩrĩ, nginyagia rĩu nĩũregeete gũthikĩrĩria.

17 MWATHANI egũkiuga atĩ ũndũ ũrĩa ũgũkũmenyithia atĩ we nĩ we MWATHANI nĩ atĩ, nĩngũgũtha maaĩ ma rũũĩ na mũthĩĩgi ũyũ nyiitĩĩte na guoko gwakwa, namo nĩmekũgarũrũka matuĩke thakame.

18 Nacio thamaki nĩigũkua, naruo rũũĩ rũnunge mũno ũguo atĩ andũ a Misiri matihota kũnyua maaĩ maaruo.’ ”

19 MWATHANI akĩĩra Musa atĩrĩ, “Ĩra Harũni ooe mũthĩĩgi wake atambũrũkie guoko gwake igũrũ rĩa njũũĩ ciothe cia Misiri, mĩtaro yakuo, o na maria maakuo. Maaĩ moothe megũtuĩka thakame, bũrũriinĩ wothe wa Misiri kũgĩe thakame nginyagia indoinĩ ciothe cia mbaaũ kana cia mahiga.”

20 Musa na Harũni magĩgĩĩka o ta ũrĩa maathĩĩtwo nĩ MWATHANI. Harũni akĩoya mũthĩĩgi wake na igũrũ akĩgũtha maaĩ ma rũũĩ rwa Nailo, mũthamaki wa Misiri na njaama ciake meroreire; namo maaĩ moothe rũũĩinĩ makĩgarũrũka magĩtuĩka thakame.

21 Nacio thamaki iria ciarĩ rũũĩ igĩkua, naruo rũũĩ rũkĩnunga ũũru mũno o nginya andũ a Misiri makĩremwo nĩkũnyua maaĩ maaruo. Ningĩ gũkĩgĩa thakame bũrũriinĩ wothe wa Misiri.

22 No ago a Misiri magĩĩka o ta ũguo na ũgo wao; kwoguo mũthamaki wa Misiri agĩthiĩ na mbere kũũmia ngoro, akĩrega gũthikĩrĩria Musa na Harũni o ta ũrĩa MWATHANI oigĩĩte.

23 Handũ ha ũguo, aahũndũkire akĩinũka gwake mũciĩ, o na ũndũ ũcio ndaigana kũwĩkĩra ngoro.

24 Nao andũ oothe a Misiri makĩenja hũgũrũrũinĩ cia rũũĩ nĩguo moone maaĩ ma kũnyua nĩ amu matingĩahotire kũnyua maaĩ ma rũũĩ rwa Nailo.

25 Na rĩĩrĩ, MWATHANI arĩĩkia kũgũtha rũũĩ rwa Nailo ũguo, gũkĩniina mĩthenya mũgwanja.

Ciũra

1 Ningĩ MWATHANI akĩĩra Musa atĩrĩ, “Thiĩ kwa mũthamaki ũmwĩre, MWATHANI ekuuga atĩrĩ, ‘Reke andũ aakwa mathiĩ nĩ geetha magaathaathaiye.

2 No rĩĩrĩ, ũngĩrega kũmareka mathiĩ-rĩ, nĩngũherithia bũrũri waku na kũũiyũria ciũra.

3 Rũũĩ rwa Nailo rũkũiyũra ciũra iria igũũka nginya nyũmba gwaku o na nginya nyũmba yaku ya toro, o na gĩtandainĩ gĩaku, na nginya nyũmbainĩ cia njaama ciaku o na cia andũ aaku, o na nginya itoonye mariikoinĩ maaku ma gũcinĩra irio, o na indoinĩ ciaku cia gũkimĩra mũtu.

4 Ciũra icio irĩkũrũũgagĩrĩra igatamba mwĩrĩ waku, mĩĩrĩ ya andũ aaku, o na ya njaama ciaku ciothe.’ ”

5 MWATHANI akĩĩra Musa atĩrĩ, “Ĩra Harũni atambũrũkie guoko gwake kũnyiitĩĩte mũthĩĩgi wake igũrũ rĩa njũũĩ, mĩtaro, o na maria, atũme ciũra igĩe bũrũri wothe wa Misiri.”

6 Kwoguo Harũni agĩtambũrũkia guoko gwake igũrũ rĩa maaĩ moothe na cio ciũra ikiumĩra ikĩiyũra bũrũri wothe wa Misiri.

7 No ago magĩĩka o ta ũguo na ũgo wao, magĩtũma ciũra ciumĩre bũrũriinĩ wa Misiri.

8 Mũthamaki wa Misiri agĩgĩĩta Musa na Harũni akĩmeera atĩrĩ, “Thaithaai MWATHANI anjehererie ciũra ici o na aciehererie andũ aakwa, na nĩngwĩtĩkĩria andũ aanyu mathiĩ, nĩ geetha makarutĩre MWATHANI magongoona.”

9 Musa akĩmũcookeria atĩrĩ, “Nĩngũkena ngĩgũthaithanĩrĩra. No njĩĩra nĩ ihinda rĩrĩkũ ngũgũthaithanĩrĩra, na thaithanĩre njaama ciaku, o na andũ aaku nĩguo ciũra iniinwo ikweherere, na ciehere nyũmbainĩ ciaku itigare o rũũĩinĩ rwa Nailo.”

10 Naake mũthamaki agĩcookia atĩrĩ, “Thaithanĩra rũũciũ.” Musa akiuga atĩrĩ, “Reke gũtuĩke o ũguo woiga, nĩ geetha ũmenye atĩ gũtirĩ ũngĩ ũhaana ta MWATHANI Ngai witũ.

11 Ciũra nĩigũkweherera, na cieherere nyũmba ciaku, o na njaama ciaku, o na andũ aaku; gũtirĩ igaatigara o tiga thĩinĩ wa rũũĩ rwa Nailo.”

12 Kwoguo Musa na Harũni magĩkiuma kwa mũthamaki, naake Musa agĩthaitha MWATHANI eeherie ciũra icio o ta ũrĩa aiguithanĩiriena mũthamaki

13 Naake MWATHANI agĩĩka ũrĩa Musa aamũũrĩĩtie, nacio ciũra iria ciarĩ nyũmbainĩ, o na kũu nja, o na mĩgũndainĩ igĩkua.

14 Nao andũ a Misiri magĩcicookereria irũndo nene, o nginya bũrũri ũkĩnunga nĩ ũndũ wacio.

15 No rĩrĩa mũthamaki oonire atĩ ciũra nĩirĩĩkĩĩtie gũkua, akĩũmia ngoro rĩngĩ, na o ta ũrĩa MWATHANI oigĩĩte, akĩrega gũthikĩrĩria Musa na Harũni.

Rwagĩ

16 Ningĩ MWATHANI akĩĩra Musa atĩrĩ, “Ĩra Harũni atambũrũkie mũthĩĩgi wake agũthe rũkũngũ rwa thĩ, naruo nĩrũkũgarũrũka rũtuĩke rwagĩ bũrũriinĩ wothe wa Misiri.”

17 Kwoguo Harũni agĩgĩtambũrũkia mũthĩĩgi wake akĩgũtha rũkũngũ rwa thĩ, naruo rũkũngũ ruothe thĩinĩ wa Misiri rũgĩtuĩka rwagĩ, naruo rwagĩ rũu rũkĩũmbĩrĩra andũ o na nyamũ.

18 Nao ago makĩgeria gwĩka o ta ũguo na ũgo wao atĩ matũme rwagĩ rũgĩe, no makĩremwo. Naruo rwagĩ rũu rwaiyũire kũndũ guothe.

19 Nao ago acio makĩĩra mũthamaki atĩrĩ, “Ngai nĩ we wĩkĩĩte ũũ!” No mũthamaki akĩũmia ngoro, na o ta ũrĩa MWATHANI oigĩĩte, akĩrega gũthikĩrĩria Musa na Harũni.

Ngi

20 MWATHANI agĩkĩarĩria Musa akĩmwĩra atĩrĩ, “Rũũciũ rũũciinĩ rooka gũkĩra, weterere mũthamaki agĩthiĩ rũũĩinĩ, ũmwĩre MWATHANI oiga atĩrĩ, ‘Reke andũ aakwa mathiĩ nĩ geetha magaathaathaiye.

21 Waga kũreka mathiĩ-rĩ, nĩngũkũherithia na gũkũreehithĩria mĩrumbĩ ya ngi ikũũmbĩrĩre na ciũmbĩrĩre njaama ciaku o na andũ aaku, na itoonye thĩinĩ wa nyũmba ciaku, ciyũre nyũmba cia andũ a Misiri, na bũrũri kũiyũrwo nĩcio.

22 No nĩngũgitĩra mwena wa Gosheni, kũrĩa andũ aakwa matũraga, nĩ geetha kũu gũtikaagĩe ngi. Ngwĩka maũndũ macio nĩguo ũmenye atĩ nĩ niĩ MWATHANI ndĩraruta wĩra bũrũriinĩ ũyũ.

23 Na njĩra ĩyo, nĩnguonania ngũũrani gatagatĩinĩ ka andũ aakwa na andũ aaku. Nakĩo kĩama kĩu gĩgeekĩka rũũciũ.’ ”

24 Naake MWATHANI agĩĩka o ro ũguo; gũgĩũka mĩrumbĩ mĩnene ya ngi thĩinĩ wa nyũmba ya mũthamaki, o na thĩinĩ wa nyũmba cia njaama ciake, o na bũrũriinĩ wothe wa Misiri. Bũrũri wothe ũgĩthũũkangio nĩ ngi icio.

25 Mũthamaki agĩgĩĩta Musa na Harũni akĩmeera atĩrĩ, “Thiĩi mũkarutĩre Ngai wanyu magongoona o gũũkũ bũrũriinĩ ũyũ.”

26 No Musa akĩmũcookeria atĩrĩ, “Gũtingĩkorwo arĩ wega gwĩka ũguo, nĩ amu indo iria tũkũrutĩra MWATHANI Ngai witũ magongoona, nĩ indo irĩ thaahu kũrĩ andũ a Misiri. Twakĩruta magongoona ma indo irĩ thaahu andũ a Misiri makĩonaga-rĩ, githĩ matigũgĩtũhũũra na mahiga?

27 No mũhaka tũthiĩ rũgendo rwa mĩthenya ĩtatũ werũinĩ, tũkarutĩre MWATHANI Ngai witũ magongoona o ta ũrĩa atwathĩĩte.”

28 Kwoguo mũthamaki agĩkĩmeera atĩrĩ, “Nĩngũreka mũthiĩ mũkarutĩre MWATHANI Ngai wanyu magongoona werũinĩ, angĩkorwo mũtigũthiĩ kũraaya mũno. O na niĩ hoeraai.”

29 Naake Musa agĩcookia atĩrĩ, “Ndarĩĩkia gũthiĩ o ũguo, nĩngũhooya MWATHANI atĩ rũũciũ ngi ici igaakorwo ikwehereire, na ciehereire njaama ciaku, na andũ aaku. No rĩĩrĩ, no mũhaka ũmenye ndũgatũheenie rĩngĩ na ũtũgirie tũthiĩ tũkarutĩre MWATHANI igongoona.”

30 Musa agĩkiuma harĩ mũthamaki na akĩhooya MWATHANI.

31 Naake MWATHANI agĩĩka o ta ũrĩa Musa aamũũririe, akĩehereria mũthamaki mĩrumbĩ ĩyo ya ngi, o na agĩciehereria njaama cia mũthamaki, na andũ aake; gũtirĩ o na ĩmwe yatigarire.

32 No o na hĩndĩ ĩyo, mũthamaki akĩũmia ngoro rĩngĩ, na akĩrega gwĩtĩkĩria andũ mathiĩ.