Author: admin

Kwĩrirĩria nyũmba ya Ngai

1 Hekaarũ yaku, MWATHANI Mwene Hinya Wothe,

kaĩ nĩndĩmĩendeete-ĩ!

2 Nĩndĩrerirĩria mũno gũkorwo ndĩ Hekaarũinĩ ya MWATHANI.

Ndĩrainĩra Ngai ũrĩa ũrĩ muoyo

na ngoro yakwa yothe ngeneete.

3 O nacio nyoni nĩciĩyoneire ũikaro kuo,

nacio thũngũrũrũ ikeyakĩra nyũmba cia gũikarwo nĩ tũcui twacio,

hakuhĩ na kĩgongoona gĩaku,

MWATHANI Mwene Hinya Wothe,

o wee mũthamaki wakwa na Ngai wakwa.

4 Kũraathimwo-rĩ, nĩ arĩa maikaraga Hekaarũinĩ yaku,

mainaga magĩkũgoocaga hingo ciothe.

5 Kũraathimwo-rĩ, nĩ arĩa maheagwo hinya nĩ we,

arĩa makoragwo merirĩirie gũthiĩ

gũgũthaathaiya kĩrĩmainĩ gĩa Zayuni.

6 Rĩrĩa megũtuĩkanĩria gĩtuamba kĩrĩa kĩũmũ gĩĩtagwo Kĩrĩro,

matũmaga kĩgĩe na ithima;

mbura ya kĩambĩrĩria kĩa mwaka ĩtũmaga kwarahe maaĩ.

7 Mathiaga magĩkĩragĩrĩria kũgĩa na hinya,

makeyonithania, kũu Zayuni mbere ya Ngai,

ũrĩa ũrĩ igũrũ rĩa ngaiiria ingĩ ciothe.

8 Igua ihooya rĩakwa, MWATHANI Ngai Mwene Hinya Wothe;

tega matũ, wee Ngai wa Jakubu!

9 Ngai, raathima mũthamaki witũ,

ũrĩa wee ũitĩrĩirie maguta ũkamwamũra.

10 Gũtinda mũthenya ũmwe Hekaarũinĩ yaku

nĩ kwega gũkĩra gũikara handũ hangĩ o hoothe mĩthenya ngiri.

Nĩ kaba ndũũgame kĩhingoinĩ kĩa nyũmba ya Ngai

handũ ha gũtũũra mĩciĩ ya andũ arĩa aaganu.

11 Nĩ gũkorwo MWATHANI nĩ we ũtũmenyagĩrĩra

na agatũthamakagĩra arĩ na riiri,

agĩtwĩkaga wega na agĩtũtĩĩithagia.

Ndarĩ ũndũ o na ũmwe mwega aimaga arĩa maikaraga magĩĩkaga wega.

12 MWATHANI Ngai Mwene Hinya Wothe,

kũraathimwo-rĩ, nĩ arĩa maikaraga makwĩhokeete!

Ihooya rĩa kũhoera wagĩrĩru wa bũrũri

1 MWATHANI, nĩwaiguĩrĩire tha bũrũri waku;

nĩwacookeirie Isiraeli ũtonga wake.

2 Nĩwarekeire andũ aaku mahĩtia maao;

meehia maao moothe wee nĩwamooheire.

3 Nĩwatigire kũng’ũrĩka nĩ ũndũ wao

na ũgĩthirwo nĩ maraakara mekũrĩrĩmbũka marĩa warĩ namo.

4 Gĩtũgaacĩrithie rĩngĩ Ngai mũhonokia witũ,

na ũtige gũikara ũtũraakarĩire!

5 Ũgũtũũra ũtũraakarĩire nginya tene na tene?

Gũtirĩ hĩndĩ maraakara maaku magaathira?

6 Tũhe hinya o rĩngĩ,

na ithuĩ, andũ aaku, nĩtũgũkũgooca.

7 Tuonie ũtugi waku, MWATHANI,

na ũtũhonokie.

8 Rĩu-rĩ, nĩthikĩrĩirie ũrĩa MWATHANI Ngai aroiga,

aratũĩrĩra thaayũ, ithuĩ andũ aake kĩũmbe,

tũngĩaga gũcookerera mĩthiĩre iitũ ya ũrimũ.

9 Ti itherũ nĩehaarĩirie kũhonokia arĩa mamũtĩĩĩte,

nĩguo riiri wake ũtũũre bũrũriinĩ witũ.

10 Wendo na ũhoro wa ma nĩirĩcemania;

ũthingu na thaayũ nĩirĩmumunyana.

11 Wĩhokeku ũrĩkunũkaga kuuma na thĩ,

naguo ũthingu ũcũũthagĩrĩrie ũrĩ o igũrũ.

12 MWATHANI nĩarĩtũtongia,

naguo bũrũri witũ ũgĩe na magetha maingĩ.

13 Ũthingu ũrĩthiaga MWATHANI mbere,

ũmũhaaragĩrĩrie njĩra.

Ihooya rĩa kũũria ũteithio

1 Ndegera gũtũ, MWATHANI, na ũnjookerie,

nĩ ũndũ ndĩ mũthĩĩnĩku na ngabatara.

2 Ndũkaareke ngue, tondũ nĩngũtĩĩĩte,

honokia, tondũ ndĩ ndungata yaku na nĩngwĩhokeete.

3 Njiguĩra tha, tondũ wee nĩ we Ngai wakwa,

ngũhooyaga mũthenya wothe.

4 Canjamũra ndungata yaku, MWATHANI,

tondũ nĩ we ndĩrahooya.

5 Nĩ gũkorwo wee, MWATHANI, wĩ mwega na nĩũrekanagĩra;

nĩũtugaga mũno arĩa oothe makũhooyaga.

6 Thikĩrĩria ihooya rĩakwa, MWATHANI,

na ũigue gũthaithana gwakwa.

7 Hĩndĩ ĩrĩa ndĩ mathĩĩnainĩ-rĩ, nĩ we ngayagĩra,

tondũ nĩũcookagia mahooya maakwa.

8 Gũtirĩ ngai ĩngĩ ĩhaana ta we, MWATHANI,

na hatirĩ o na ĩmwe ĩĩkĩĩte ũrĩa wee wĩkĩĩte.

9 Ndũũrĩrĩ ciothe iria wee ũũmbĩĩte

nĩigooka ikũinamĩrĩre, MWATHANI,

na ikumie rĩĩtwa rĩaku.

10 Tondũ wee wĩ mũnene

na nĩwĩkaga maũndũ ma kũgegania;

wee o wee wiki nĩ we Ngai.

11 MWATHANI, nduta ũrĩa ũkwenda njĩkage,

na niĩ nĩndĩrĩgwathĩkagĩra na wĩhokeku;

nduta gũgũtungata ndĩĩrutĩire kũna.

12 Nĩngũgũcookeria ngaatho, MWATHANI Ngai wakwa, na ngoro yakwa yothe,

na ndũũre ngumagia rĩĩtwa rĩaku tene na tene.

13 Nĩ gũkorwo nĩũnyoneetie ũtugi mũnene mũno;

nĩũhonokeetie kuuma irimainĩ rĩa gĩkuũ.

14 Nĩnjũkĩrĩirwo nĩ andũ etĩĩi, Ngai;

gĩkundi kĩa andũ matarĩ tha

na matatindanagĩrĩra nawe nĩmarenda kũnjũraga.

15 No wee, MWATHANI, wĩ Ngai ũrĩ tha na mũtugi

ndũhiũhaga kũraakara,

wĩ muuma andũ na mwĩhokeku.

16 Kĩĩhũgũkĩre na ũnjiguĩre tha;

he hinya niĩ ndungata yaku,

na ũhonokie niĩ mũrũ wa ndungata yaku ya mũndũ wa nja.

17 Nyonia kĩmenyithia kĩa wega waku, MWATHANI,

nĩguo arĩa mathũire moone maconoke

nĩ ũrĩa wee ũndeithĩĩtie na ũkaanyamarũra.

Gũkumia itũũra rĩa Jerusalemu

1 Atĩrĩĩrĩ, kĩrĩmainĩ kĩrĩa gĩtheru

nĩ ho MWATHANI aakire itũũra rĩake;

2 eendeete itũũra rĩa Jerusalemu

gũkĩra kũndũ kũrĩa kũngĩ guothe thĩinĩ wa Isiraeli.

3 Wee, itũũra rĩa Ngai, tathikĩrĩria

ũigue maũndũ meega marĩa Ngai araaria igũrũ rĩaku;

4 “Nĩngaagwetanĩria Misiri na Babilonia

hamwe na mabũrũri marĩa manjathĩkagĩra;

nĩngaataranĩria andũ a Filisitia, Turo, na Ethiopia

hamwe na atũũri a Jerusalemu.”

5 Na rĩĩrĩ, ũhoro wa Zayuni ũkĩario nĩgũkeeragwo atĩrĩ,

“Andũ oothe maaciarĩirwo thĩinĩ waku;”

nĩ gũkorwo Ũrĩa Ũrĩ Igũrũ Mũno nĩagaatũma rĩgĩe na hinya.

6 MWATHANI nĩakandĩka marĩĩtwa ma andũ ibukuinĩ

atĩ oothe maaciarĩirwo Jerusalemu.

7 Magaacimbicaga oothe nĩgũkena makĩinaga atĩrĩ,

“Itũũra rĩa Zayuni nĩrĩo kĩhumo kĩa iraathimo ciitũ ciothe.”

Ihooya rĩa kũũria ũteithio hĩndĩ ya mathĩĩna

1 MWATHANI, Ngai, mũhonokia wakwa,

ndindaga ngĩhooya ũteithio mũthenya wothe,

na ngarĩraga ũtukũ ndĩ mbere yaku.

2 Igua ihooya rĩakwa,

na ũthikĩrĩrie ngĩgũkaĩra ũndeithie!

3 Nĩ gũkorwo nĩnyariirĩkĩĩte mũno,

na ngirie gũkua.

4 Ndaranĩirio na arĩa makirie gũkua;

ndirĩ na hinya o na mũniini.

5 Haana ta mũndũ ũtiganĩirio gatagatĩinĩ ga ciimba;

ndariĩ ta ũmwe wa andũ mooragĩĩtwo magathikwo mbĩĩrĩrainĩ

arĩa ũtacookaga kũrũmbũiya rĩngĩ,

na ũthengeirie ũteithio waku.

6 Ũnjikĩĩtie o mbĩĩrĩrainĩ gĩtina,

kũndũ kwĩ nduma ndumanu na kũriku mũno.

7 Maraakara maaku nĩmangomeire mũno;

ndiihũ ciamo nĩcihehenjeete.

8 Nĩũtũmĩĩte ndiganĩrio nĩ araata aakwa;

ũnduĩte kĩndũ kĩ magigi harĩ o.

Hingĩrĩirio ũguo atĩ ndingĩhota kũũra.

9 Maitho maakwa nĩmoorĩĩtwo nĩ hinya nĩ ũrĩa nyamaarĩkĩĩte;

ngũkayagĩra mũthenya o mũthenya, MWATHANI,

na ngakũhooyaga nyambararĩĩtie mooko maakwa na igũrũ.

10 Nĩũringagĩra andũ arĩa akuũ ciama?

Nĩmarĩũkaga gũkũgooca?

11 Ũtugi waku nĩũhunjagio mbĩĩrĩrainĩ,

kana wĩhokeku waku ũkaganwo kũndũ kwa mwanangĩko?

12 Ciama ciaku nĩcionagwo kũndũ kũu kwa nduma

kana wega waku ũkamenywo bũrũriinĩ ũcio wa kĩriganĩro?

13 Niĩ-rĩ, nĩ we, MWATHANI, ngayagĩra;

ngũhooyaga rũũciinĩ o rũũciinĩ.

14 Ũndegeete nĩkĩ, MWATHANI?

Nĩkĩ gĩtũmĩĩte ũhuutatĩre?

15 Ndũire nyariirĩkaga ngakuhagĩrĩria gũkua kuuma ndĩ o mũnyiinyi;

nĩniinĩĩtwo hinya nĩ maũndũ ma kũguoyohia marĩa ũnjĩkĩĩte.

16 Maraakara maaku matangĩtatĩka nĩmahehenjeete;

mahũũra maaku ma kũguoyohia nĩmaranyananga.

17 Mathiũrũrũkagĩria mũthenya wothe o ta mũiyũro wa maaĩ;

hingagĩrĩrio nĩmo na mĩena yothe.

18 Nĩũtũmĩĩte ndiganĩrio o na nĩ araata aakwa arĩa nyumĩranĩĩtie ngoro mũno nao;

nduma noyo mũraata wakwa.

Rwĩmbo rwa kũinwo rĩrĩa bũrũri ũrathĩĩnĩka

1 MWATHANI, ngũtũũra nyinaga ũrĩa wee wĩ mũtugi,

na ng’anaga hingo ciothe ũrĩa wĩ mwĩhokeku.

2 Nĩnjũũĩ atĩ wendo waku ũgũtũũra nginya tene na tene,

na wĩhokeku waku nĩ mũrũmu o ta igũrũ.

3 Wee nĩwoigire atĩrĩĩrĩ, “Nĩndĩĩkanĩire na mũndũ ũrĩa thuurĩĩte;

nĩnjĩĩrĩire ndungata yakwa Daudi na mwĩhĩtwa ũũ:

4 ‘Njiarwa ciaku igũtũũra ithamakaga;

ũthamaki waku ngũũtũũria nginya tene na tene.’ ”

5 Igũrũ nĩgũkumia rĩrakumia ciĩko cia magegania iria wee, MWATHANI wĩkaga;

ciũmbe iria theru nĩkũgana iragana irĩ kĩũnganoinĩ gĩacio ũrĩa wee wĩ mwĩhokeku.

6 Gũtirĩ ũngĩ kũu igũrũ ũhaana ta we, MWATHANI,

ndũngĩigananio na kĩũmbe o na kĩmwe kĩa iria i kũu igũrũ matuinĩ.

7 Wee-rĩ, nĩũheetwo gĩtĩĩo kĩnene mũno kĩamainĩ gĩa ciũmbe iria theru;

ciothe ciikaraga igegearĩĩte nĩ ũndũ waku.

8 Gũtirĩ wĩ hinya ta we, MWATHANI Ngai Mwene Hinya Wothe.

Ũkoragwo wĩ mwĩhokeku maũndũinĩ moothe, MWATHANI.

9 Nĩ we wathaga iria rĩrĩa rĩhuuhũkanagia na hinya,

na ũkahooreria makũmbĩ maarĩo marĩa maikanagia na hinya.

10 Nĩ we wahehenjire ndamaathia ĩrĩa yetagwo Rahabu ũkĩmĩũraga;

thũ ciaku wacihurunjire na guoko gwaku kũrĩ hinya.

11 Igũrũ nĩ rĩaku, o ũndũ ũmwe na thĩ;

nĩ we wombire thĩ na kĩrĩa gĩothe gĩ thĩinĩ wayo.

12 Nĩ we wombire mwena wa na rũgongo na wa na kĩanda;

kĩrĩma gĩa Taboru na gĩa Herimoni nĩgũkũinĩra irakũinĩra nĩgũkena.

13 Wee-rĩ, kaĩ ũrĩ hinya mũingĩ-ĩ!

Kaĩ ũhootani waku nĩ mũnene-ĩ!

14 Mũthingi wa ũthamaki waku nĩ ũthingu na kĩhooto;

maũndũ moothe marĩa wĩkaga moonanagia wendani na wĩhokeku.

15 Kũraathimwo-rĩ, nĩ andũ arĩa mooĩ gũkũgooca na nyĩmbo;

acio-rĩ, maikaraga magĩtugagwo nĩwe, MWATHANI

16 Matindaga macanjamũkĩĩte mũthenya wothe nĩ ũndũ waku,

na magakũgoocaga tondũ nĩũmeekaga wega.

17 Nĩ we ũtũheaga ũhootani mũnene;

tũrũũhagia tũkiugagĩrĩria nĩ ũndũ nĩũtwendeete.

18 Wee, MWATHANI, nĩ we watũthuurĩire ũrĩa ũrĩtũgitagĩra;

Wee, Ngai Mũtheru wa Isiraeli, nĩ we watũheire mũthamaki witũ.

Ũrĩa Ngai eerĩire Daudi

19 Tene mũno-rĩ, nĩwarĩirie na njĩra ya kĩoneki

ndungata ciaku iria ciakwĩhokeete ũkiuga atĩrĩ,

“Nĩheete mũndũ ũmwe njamba ya ita hinya,

nĩheete ũrĩa thuurĩĩte kuuma andũinĩ gĩtĩ kĩa ũthamaki.

20 Nĩnduĩte ndungata yakwa Daudi mũthamaki

na ũndũ wa kũmũitĩrĩria maguta marĩa matheru.

21 Hinya wakwa ũrĩkoragwo hamwe naake hingo ciothe,

ũhoti wakwa nĩũrĩtũmaga agĩe na hinya.

22 Thũ ciake itikaamũkĩria hinya rĩ o rĩ,

andũ arĩa ooru matikaamũhoota.

23 Nĩngaahehenja thũ ciake

na njũrage arĩa oothe mamũthũire.

24 Nĩndĩrĩmwendaga na ndĩmuonagie wĩhokeku;

ndĩrĩmũheaga ũhootani hingo ciothe.

25 Nĩngaaramia ũthamaki wake kuuma iria rĩa Mediteraneani

nginya rũũĩ rwa Farati.

26 Akanjĩĩraga atĩrĩ,

‘Wee nĩ we baaba; na no we Ngai wakwa,

nĩ we ũmenyagĩrĩra na no we ũhonokagia.’

27 Nĩngaamũtua mũrũ wakwa wa irigithaathi,

na ndũme atuĩke mũthamaki mũnene gũkĩra athamaki oothe a thĩ.

28 Ngũtũũra ndĩmũtugaga nginya tene na tene,

nakĩo kĩrĩĩkanĩro kĩrĩa ndĩĩkanĩire naake gĩikarage kĩrũmĩĩte.

29 Ũthamaki wake ũgũtũũra o nginya igũrũ rĩgaathira;

njiarwa ciake igũtũũra ithamakaga nginya tene na tene.

30 “No rĩĩrĩ, njiarwa ciake ingĩkaaga gwathĩkĩra watho wakwa

ciage gũikara ta ũrĩa ndĩciathĩĩte,

31 ingĩkaagarara ũrĩa ndĩcirũtĩĩte,

ciage kũmenyerera maathani maakwa,

32 nĩngaaciherithia nĩ ũndũ wa wĩhia ũcio wacio

na nĩngaatũma inyariirĩke nĩ ũndũ wa mahĩtia maacio.

33 No ndigaatiga kwenda Daudi

kana njage kũhingia ũrĩa ndĩmwĩrĩire.

34 Ndigaathũũkia kĩrĩĩkanĩro kĩrĩa ndĩĩkanĩire naake

kana ngarũre ũrĩa ndĩmwĩrĩire.

35 “Nĩndehĩta na rĩĩtwa rĩakwa rĩtheru

atĩ ndikaaheenia Daudi rĩ o rĩ.

36 Mbeũ yake ndĩgaathira tene na tene,

na ngũtũũra menyagĩrĩra ũthamaki wake

matukũ moothe marĩa riũa rĩgũtũũra rĩaraga.

37 Ũthamaki wake ũgũtũũra wĩhandĩĩte

o ta mweri ũrĩa ũtũũraga wonagwo igũrũ matuinĩ.”

Gũcakaya nĩ ũndũ wa mũthamaki kũhootwo

38 No rĩĩrĩ, nĩũraakarĩĩtio nĩ mũthamaki,

ũrĩa ũthuurĩĩte na ũndũ wa kũmũitĩrĩria maguta ũkamũrega.

39 Nĩwĩthambĩĩte kĩrĩĩkanĩro kĩrĩa ũrĩĩkanĩire na ndungata yaku

na ũkarangĩrĩria thũmbĩ yake ndooroinĩ.

40 Nĩũmomoranĩĩtie thingo cia itũũra rĩake

na ũgatharũrania nyũmba ciake cia kwĩgitĩra iria njake na thingo cia hinya.

41 Indo ciake iraiywo nĩ mwĩhĩtũkĩri o wothe;

arĩa oothe arigainie nao nĩkũmũthekerera maramũthekerera.

42 Nĩũheete arĩa marĩ muku naake ũhootani;

nĩũtũmĩĩte thũ icio ciake ciothe ikene.

43 Nĩũtũmĩĩte indo ciake cia mbaara ituĩke cia tũhũ,

na ũkamũrekereria ahootwo mbaarainĩ.

44 Nĩũmũtuunyĩĩte mũthĩĩgi wa ũthamaki

na ũgaikania thũmbĩ yake thĩ.

45 Nĩũtũmĩĩte oonekane arĩ mũkũrũ,

nĩũmũhumbĩĩte gĩconoko.

Ihooya rĩa kũũria ũhonokio

46 MWATHANI, ũgũtũũra wĩhithĩĩte nginya tene na tene?

Maraakara maaku megũtũũra marĩrĩmbũkaga ta mwaki nginya rĩ?

47 Ririkana, MWATHANI, ũrĩa ũtũũro wakwa wĩ mũkuhĩ!

Ririkana atĩ watũũmbire tũrĩ o andũ!

48 Nũũ ũngĩtũũra na aage gũkaanakua?

Mũndũ-rĩ, no ahote kwĩgirĩrĩria ndakaanatoonye mbĩĩrĩrainĩ?

49 MWATHANI, wendo ũrĩa watwendeete naguo tene wathiire kũ?

Ciĩranĩro iria werĩire Daudi ciathiire kũ?

50 Ririkana ũrĩa niĩ, ndungata yaku ndĩranyũrũrio

na ũrĩa ndĩromĩrĩria irumi ciothe iria ndĩrarumwo nĩ ndũũrĩrĩ iria itagũtĩĩĩte.

51 Thũ ciaku, MWATHANI, nĩkũruma iraruma mũthamaki waku ũrĩa ũitĩrĩirie maguta ũkamũthuura!

Iramũruma o harĩa hoothe arathiĩra.

52 Goocaai MWATHANI nginya tene na tene!

Ameni! Ameni!

Ngai nĩ mũtũũra muoyo, no ũtũũro wa mũndũ nĩ mũkuhĩ

1 MWATHANI, wee nĩ we ũtũũraga wĩ gĩtũũro giitũ.

2 Mbere ya ũtanoomba irĩma, o ũtanathondeka thĩ

wee warĩ o Ngai mũtũũra muoyo

na ũgũtũũra ũrĩ Ngai nginya tene na tene.

3 Wĩraga mũndũ acooke o rũkũngũinĩ;

ũmũgarũraga agatuĩka o rũkũngũ.

4 Harĩ we-rĩ, mĩaka ngiri no ta mũthenya ũmwe;

no ta mũthenya wa ira ũguo ũrahĩtũkire;

no ta ihinda ikuhĩ rĩa ituanĩra rĩa ũtukũ.

5 Ũtũhaataga ta ũrĩa mũiyũro wa maaĩ ũhaataga;

tũthiraga na ihenya o ta kĩrooto.

Tũhaana ta nyeki ĩrĩa ĩringũraga rũũciinĩ,

6 ĩgakũra na ĩkarura wega,

hwaĩinĩ ĩgacooka ĩkahooha, ĩkooma.

7 Ithuĩ-rĩ, nĩkũniinwo tũraniinwo nĩ mang’ũrĩ maaku;

marũrũ maaku nĩgũtũguoyohia maratũguoyohia.

8 Waganu witũ ũũigĩĩte o mbere yaku;

meehia maitũ marĩa tũhithĩĩte

ũmaigĩĩte o harĩa ũngĩmoona.

9 Ũtũũro witũ nĩkũniinwo ũraniinwo nĩ maraakara maaku;

ũrathira o ta ihũũmũka.

10 Ũtũũro witũ wa gũũkũ thĩ nĩ mĩaka mĩrongo mũgwanja,

kana mĩaka mĩrongo ĩnaana,

tũngĩkorwo tũrĩ na hinya.

No rĩĩrĩ, kĩrĩa ĩtũreehagĩra no mathĩĩna na kĩeha;

ũtũũro ũthiraga na ihenya,

na ithuĩ tũgathiĩ tũkabuĩria.

11 Nũũ ũũĩ mang’ũrĩ maaku maigana atĩa

na akamenya marũrũ maaku

nĩguo akũhe gĩtĩĩo kĩrĩa wagĩrĩire kũheeo?

12 Tuonie ũrĩa ũtũũro witũ wĩ mũkuhĩ, nĩguo tũũhĩge.

13 Ũgũikara ũraakarĩĩte nginya rĩ, MWATHANI?

Tũiguĩre tha ithuĩ ndungata ciaku.

14 Tũhũũnagie ũtugi waku rũũciinĩ o rũũciinĩ,

nĩguo tũkenage na tũcanjamũkage matukũ maitũ moothe.

15 Tũkenie matukũ o ta marĩa ũtũnyariirĩĩte.

na mĩaka o ta ĩrĩa tuoneete mathĩĩna.

16 Reke ithuĩ, ndungata ciaku, tuone ciĩko ciaku cia hinya,

nacio njiarwa ciitũ cione hinya waku mũnene.

17 Wega wa MWATHANI Ngai witũ ũrogĩa na ithuĩ,

arotũteithagia kũhootana maũndũinĩ moothe marĩa tũrĩĩkaga!

Ngai nĩwe mũtũgitĩri

1 Ũrĩa wothe ũikaraga ũgitĩriinĩ wa Ũrĩa Ũrĩ Igũrũ Mũno,

na akamenyagĩrĩrwo nĩ Mwene Hinya Wothe

2 no ahote kũmwĩra atĩrĩ, “We nĩ we mũngitĩri na mũmenyereri;

we nĩ we Ngai wakwa ũrĩa niĩ ndĩhokeete.”

3 Tondũ we nĩarĩkũrigagĩrĩria ndũgaatoonye mũtegoinĩ ũrĩa ũhithĩĩtwo,

na ndũkaanyiitwo nĩ mũrimũ mũũru.

4 Arĩkũhumbagĩra na mathagu maake,

na ndũrĩ ũgwati ũrĩonaga

tondũ nĩarĩkũmenyagĩrĩra wega,

wĩhokeku wake nĩũrĩkũmenyagĩrĩra na ũkũgitagĩre.

5 Ndũrĩtigagĩra ũgwati o wothe ũrĩa ũngĩũka ũtukũ,

kana gũtharĩkĩrwo ũterĩgĩrĩire mathaa ma mũthenya,

6 kana mũthiro ũrĩa ũniinanaga rĩrĩa kwĩ nduma

na mwanangĩko ũrĩa ũũraganaga kwĩ o mũthenya.

7 Andũ ngiri ĩmwe o na mangĩgũa mwena waku wa ũmotho makuĩte,

nao angĩ ngiri ikũmi mwena waku wa ũrĩo,

wee ndũrĩ ũũru ũrĩgũkoragĩrĩra.

8 Wee-rĩ, no kwĩrorera ũrĩroragĩra na maitho maaku

ũrĩa andũ arĩa aaganu maraherithio.

9 Tondũ nĩũtuĩte MWATHANI mũkũgitĩri,

Ũrĩa Wĩ Igũrũ Mũno ũkamũtua mũkũmenyereri-rĩ,

10 ndũrĩ ũũru ũrĩonaga,

na mũciĩ waku ndũrĩkuhagĩrĩrio nĩ haaro o na ĩrĩkũ.

11 Ngai nĩarĩathaga araika aake

makũmenyagĩrĩre kũrĩa guothe ũrĩthiaga.

12 Marĩgũkuuaga na mooko maao

nĩguo ndũkaahĩngwo kũgũrũ nĩ ihiga.

13 Nĩũrĩrangagĩrĩria mĩrũũthi na gĩĩko

na ũkinyagĩrĩrie na magũrũ maaku

mĩrũũthi ĩrĩa mĩĩthĩ na nyoka iria irĩ thumu.

14 Ngai aroiga atĩrĩ, “Nĩndĩrĩhonokagia arĩa manyendeete

na menyagĩrĩre arĩa mooĩ rĩĩtwa rĩakwa.

15 Manjĩta nĩndĩrĩmeetĩkaga;

nĩndĩrĩkoragwo hamwe nao magĩthĩĩnĩka,

ndĩmahonokagie na ndĩmatĩĩithagie.

16 Nĩndĩrĩmaheaga ũtũũro mũraaya,

na ndĩmahonokagie.”

Rwĩmbo rwa kũgooca

1 Nĩ wega mũno gũgũcookagĩria ngaatho wee, MWATHANI,

na kũinaga tũgĩkumagia rĩĩtwa rĩaku,

wee, Ngai Ũrĩa Ũrĩ Igũrũ Mũno.

2 Nĩ ũndũ mwega mũno kũganaga ũtugi waku o rũũciinĩ,

na wĩhokeku waku o hwaĩinĩ,

3 tũkĩhũũraga ngita na tũkĩinaga na inanda.

4 Nĩ gũkorwo wee, MWATHANI, nĩũngeneetie na ciĩko ciaku cia hinya,

ndĩraina ngeneete nĩ ũndũ wa ũrĩa wĩkĩĩte.

5 Ĩ ciĩko ciaku, MWATHANI, ti nene!

Ĩ meciiria maaku, ti marikĩru!

6 Mũndũ ũrĩa kĩrimũ ndangĩmenya;

mũndũ mũkĩĩgu ndangĩkũũrana ũndũ ũyũ;

7 andũ arĩa aaganu o na mangĩkũra ta nyeki;

arĩa meekaga ũũru o na mangĩtonga; makaaniinwo o biũ,

8 tondũ wee, MWATHANI ũtũũraga ũtũũgĩrĩĩte nginya tene na tene.

9 Ti itherũ, thũ ciaku, MWATHANI nĩikaaniinwo,

na arĩa oothe meekaga ũũru nĩmagaatoorio.

10 Ũtũmĩĩte ngĩe na hinya o ta mbogo;

nĩũndaathimĩĩte na gĩkeno.

11 Nĩndĩyoneire na maitho maakwa thũ ciakwa ikĩhootwo,

na ngeiguĩra na matũ maakwa kĩrĩro kĩrĩa gĩkorereire andũ aaganu arĩa maranjũkĩrĩire.

12 Andũ arĩa athingu mathegeaga o ta mĩkĩndũ,

makũraga o ta mĩtarakwa ya Lebanoni.

13 Mahaana ta mĩtĩ ĩhandĩĩtwo nyũmbainĩ ya MWATHANI

ĩrĩa ĩkũraga Hekaarũinĩ ya Ngai witũ,

14 ĩkarutaga maciaro o na ĩrĩ mĩkũrũ

na ĩgaikaraga ĩrurĩĩte na ĩrĩ na hinya.

15 Ũndũ ũcio wonanagia atĩ MWATHANI nĩ mũrũngĩrĩru,

na atĩ ũrĩa ũmenyagĩrĩra nĩ mũthingu.

Ngai nĩwe mũthamaki

1 MWATHANI nĩ we mũthamaki;

ehumbĩĩte ũnene na hinya.

Thĩ ĩhandĩĩtwo ĩkarũma ki;

ndĩngĩenyenyeka o na atĩa.

2 Gĩtĩ gĩaku kĩa ũnene, MWATHANI gĩtũire gĩ kĩrũmu kuuma o tene;

wee-rĩ, warĩ o kuo kuuma tene na tene.

3 MWATHANI, iria nĩkwanĩrĩra rĩraanĩrĩra;

rĩraanĩrĩra rĩkĩrurumaga na rĩkĩhũũyũkaga.

4 MWATHANI ũrĩa wathanaga na ũnene wothe igũrũ matuinĩ

arĩ hinya gũkĩra mũhũũyũkanio wa iria na makũmbĩ maarĩo.

5 Mawatho maaku, MWATHANI, nĩ ma gũtũũra tene na tene.

Ti itherũ Hekaarũ yaku ĩgũtũũra ĩrĩ theru

nginya mĩndĩ na mĩndĩ.