Author: admin

1 “Ũtũũro wakwa werekeire gũkinya mũthia;

ndirahota kũhiihia;

no mbĩĩrĩra ĩnjetereire.

2 Thiũrũrũkĩirio nĩ andũ maramiinja mĩnyĩrĩ;

maitho maakwa maroona o andũ maratũma ndaakare.

3 “Ngai, ndĩraaria ũhoro wa ma;

amũkĩra ciugo ciakwa.

Gũtirĩ mũndũ ũngĩ ũngĩnyiita mbaru ũhoro ũrĩa ngwaria.

4 Tondũ nĩũhingĩĩte meciiria maao matikaagĩe na ũmenyo,

ndũkaareke maahoote.

5 Arĩa makunyanagĩra araata aao nĩ geetha megune,

ciana ciao nĩikoora maitho.

6 “Ngai anduĩte kĩndũ gĩa gũthekererwo;

andũ no mata maranduĩra ũthiũ.

7 Ndĩ na ruwo rũingĩ ũguo atĩ, maitho maakwa maroona o nduma;

ciĩga ciakwa itigĩĩtwo o mahĩndĩ matheri.

8 Andũ arĩa metuaga athingu maroona ũguo makamaka;

maranjũkĩrĩra ta mũndũ ũtatĩĩĩte Ngai.

9 No rĩĩrĩ, mũndũ ũrĩa mũthingu nĩarũmĩĩtie njĩra yake;

mũndũ ũrĩa ũrĩ na mooko matheru athiaga akĩongagĩrĩra hinya.

10 No hatirĩ o na ũmwe wa araata aakwa

oonekaga arĩ mũũgĩ.

11 Matukũ maakwa nĩmathiru;

mĩbango yakwa nĩharaganĩĩte;

mwĩhoko wakwa nĩ mũthiru.

12 No araata aakwa maroiga ũtukũ nĩ mũthenya;

maroiga nĩgũkĩa kũrakĩa,

no niĩ njũũĩ atĩ ndĩ o ndumainĩ.

13 Mwĩhoko wakwa no kwa arĩa akuũ,

kũrĩa ngaakoma ndumainĩ.

14 Ngeera mbĩĩrĩra atĩrĩ,

‘Wee nĩ we baaba,’

naguo mũthũa ndĩwĩre atĩrĩ,

‘Inyuĩ nĩ inyuĩ a maitũ,

na no inyuĩ aarĩ a maitũ.’

15 Kĩĩrĩgĩrĩro gĩakwa gĩkĩrĩ ha?

Nũũ ũgũkĩona kĩĩrĩgĩrĩro gĩakwa?

16 Kĩĩrĩgĩrĩro kĩu no gĩgĩthiĩ na niĩ kwa arĩa akuũ?

No gĩgĩikũrũkanie na niĩ rũkũngũinĩ?”

Mĩario ya Bilidadi

1 Naake Bilidadi ũrĩa wa kuuma Shuha agĩcookia atĩrĩ,

2 “Ayubu, kaĩ ũtangĩkira?

Korwo no ũkire no tũkwarĩrie.

3 Ũratuona tũrĩ ta ng’ombe nĩkĩ?

Ũratuona tũrĩ akĩĩgu nĩkĩ?

4 Nĩkwĩyũnũha ũreyũnũha waraakara.

Thĩ-rĩ, nĩgũtiganĩrio tondũ nĩwaraakara?

Ndũmba cia mahiga-rĩ, nĩigũthengio harĩa irĩ waraakara?

5 “Ũtheri wa mũndũ mwaganu no ũkũhorio;

rũrĩrĩmbĩ rwaguo rũtigaacooka gwakana rĩngĩ.

6 Ũtheri wa nyũmba yake ũtuĩkĩĩte o nduma,

na taawa wake nĩmũhorie.

7 Arathiaga ekinyĩire, no rĩu nĩgũtũgũũga aratũgũũga.

Mwĩĩro wa ngoro yake nĩguo ũmũgũithĩĩtie thĩ.

8 Etwarĩrĩire mũtegoinĩ magũrũ maake magakĩgwatio;

agereire o marimainĩ.

9 Mũtego ũmũnyiitĩĩte o thũngw’ainĩ

ũgategũka na ndangĩĩteithũra.

10 Ahithĩirwo mũtego thĩ,

na marima makeenjwo kũrĩa ekũgerera.

11 Kĩmako kĩmuumaga na mĩena yothe,

na gĩkamũrũmĩrĩra ikinya gwa ikinya.

12 Aratũũraga ta gĩtonga,

rĩu ndangĩona o na gĩa kũrĩa;

mũtino wĩhandĩĩte wetereire harĩa arĩ.

13 Mwĩrĩ wake ũiyũirwo nĩ mũrimũ wa kũmakania,

na nĩ mũrimũ ũgũtũma mooko na magũrũ maake mabuthe.

14 Arutũrũrĩĩtwo nyũmba ĩrĩa aratũire egangarĩĩte,

agatwarwo akarũũgame mbere ya mũthamaki ũrĩa wĩtagwo Gĩkuũ.

15 Nyũmba yake rĩu ĩratũũrwo nĩ andũ angĩ,

na nĩitĩĩtwo ũbiriiti wa kũmĩtheria.

16 Na thĩ mĩri yake nĩkũũma irooma,

nakuo na igũrũ honge ciake nĩkũhooha irahooha.

17 Ngumo yake nĩgũthira ĩrathira gũũkũ thĩ;

gũtirĩ mũndũ ũramũririkana.

18 Arutĩĩtwo ũtheriinĩ, agaikanio ndumainĩ;

nĩarutũrũrĩĩtwo kuuma bũrũriinĩ wa arĩa marĩ muoyo.

19 Ndarĩ na ciana kana njiarwa mũhĩrĩgainĩ wao;

ndarĩ na wa gũcooka gũtũũra kũu aratũũraga.

20 Kuuma irathĩro kinya ithũĩro,

arĩa oothe maraigua maũndũ marĩa mamũkorereire

maranyiitwo nĩ guoya makainaina nĩkũmaka.

21 Macio nĩ mo marigĩrĩrio ma andũ arĩa ooru;

macio nĩ mo marigĩrĩrio ma arĩa matarũmbũyanagia na Ngai.”

Mĩario ya Ayubu

1 Ayubu agĩcookia atĩrĩ,

2 “Mũgũtũũra mũũnyamaaragia nginya rĩ?

Mũgũtũũra mũũhũũraga na ciugo nginya rĩ?

3 Nĩ maita maingĩ mũkoreetwo mũkĩnjinũra;

kaĩ mũtangĩconoka nĩ ũguo mũũnumĩĩte?

4 O na akorwo nĩnjĩhĩĩtie-rĩ,

ũndũ ũcio ũramũtuura nĩkĩ?

5 Mũreyona ta mũrĩ eega kũngĩra,

na mũkoona ta hĩtĩĩtie nĩ ũrĩa nyamaarĩkĩĩte.

6 Kaĩ mũtaroona atĩ nĩ Ngai ũrahinyĩrĩria,

na atĩ nĩ mũtego anjigĩire nĩguo anyiite?

7 Ndateta nĩ ũndũ wa ũguo ahinyĩrĩirie-rĩ,

gũtirĩ mũndũ ũrathikĩrĩria;

ndĩrakayũrũrũka, no ndiroona kĩhooto gĩkĩrũmĩrĩrwo.

8 Ngai ahingĩĩte njĩra yakwa ũguo atĩ ndingĩhota kũhungura.

Nĩekĩrĩĩte njĩra yakwa nduma.

9 Nĩandunyĩĩte ũtonga wakwa wothe,

na agaathũũkĩria ngumo yakwa.

10 Arahũũra na mĩena yothe,

akamunya kĩĩrĩgĩrĩro gĩakwa,

akandiganĩria hinyĩrĩrĩke, ngue.

11 Anjitũrũrĩire maraakara maake,

na akandua ta thũ yake.

12 Andũmĩire thigari citharĩkĩre,

nacio nĩcienjeete mĩtaro,

na igathiũrũrũkĩria nyũmba yakwa.

13 “Nĩatũmĩĩte andũ a mũciĩ wakwa mandiganĩrie,

na agatũma arĩa oothe manjũũĩ mandaihĩrĩrie.

14 Andũ aitũ na araata aakwa nĩmandiganĩirie.

15 Ageni arĩa marookaga gwakwa nĩmariganĩirwo nĩ niĩ;

ndungata ciakwa cia andũ a nja iranyona ta mũrũũrĩrĩ;

nduĩkĩĩte ta mũndũ itarĩ ciona.

16 Ingĩĩta ĩmwe ya ndungata ciakwa, ndĩngĩnjĩtĩka;

nĩkũmũthaitha ndĩmĩthaithaga ĩndeithie.

17 Mũtumia wakwa ndaroomĩrĩria mĩheehũ yakwa,

na aariũ a maitũ matiranguhĩrĩria.

18 O na ciana nĩcimeneete;

ndarũũgama no gũũthekerera irathekerera.

19 Araata aakwa oothe arĩa a bata maranyona magethithimũkwo;

andũ arĩa ndĩrendeete mũno nĩmangarũrũkĩĩte.

20 Rĩu ndigĩĩtwo o mahĩndĩ matheri;

no gũkua itakuĩte.

21 “Araata aakwa, njiguĩraai tha;

njiguĩraai tha, amu Ngai angũthĩĩte akaanũnda.

22 Mũragĩthiĩ o na mbere kũũnyariira ta ũguo Ngai areeka nĩkĩ?

Kaĩ mũtangĩiganwo nĩ ũguo mũũnyariirĩĩte?

23 “No nyende ciugo ciakwa ciandĩkwo!

No nyende ciandĩkwo ibukuinĩ iririkanagwo!

24 No nyende ikarwo mahigainĩ igũrũ na karamu ga cuuma,

itũũre tene na tene.

25 Nĩnjũũĩ atĩ Mũngũũri arĩ muoyo,

na mũthiainĩ nĩakaarũũgama kũnjarĩrĩria.

26 O na ikonde ciakwa ciarĩĩo nĩ mũrimũ ũguo,

nĩngoona Ngai ndĩ o mwĩrĩinĩ ũyũ.

27 Ngaamuona na maitho maakwa kĩũmbe;

ngaamuona arĩ mwena wakwa.

No rĩĩrĩ, nĩndĩroorwo nĩ hinya.

28 Araata aakwa, mũthugundĩĩte mũbango wa kũndũithia na kũũnyamaaria

mũkiugaga atĩ, nĩ niĩ mwene ndereehereire ũndũ ũyũ.

29 No rĩĩrĩ, mwĩtigĩreei rũhiũ rwa njora,

rũrĩa rũreehithagia maraakara ma Ngai harĩ arĩa meehagia,

nĩ geetha mũmenye atĩ kũrĩ mũndũ ũtuanagĩra.”

Mĩario ya Zofaru

1 Zofaru ũrĩa wa kuuma Naamathu

agĩcookia atĩrĩ,

2 “Ayubu nĩũrathĩĩnia meciiria maakwa,

ngwaria nĩ ũguo woiga.

3 Nĩndaigua irumi ciaku

no nĩngũmenya ũrĩa ngũcookia.

4 “Kaĩ ũtooĩ atĩ kuuma o tene, rĩrĩa mũndũ aigirwo gũũkũ thĩ,

5 kũrũũhia kwa mũndũ mwaganu nĩ kũniini

na ũkeni wa mũndũ mũũru no wa ihinda?

6 O na angĩĩtũũgĩria, kĩrũũgamo gĩake,

mũtwe wake ũhaane ta ũkũhuutia matu-rĩ,

7 athiraga o ta mai maake.

Arĩa maramuonaga mooranagia atĩrĩ, ‘Rĩu akĩrĩ kũ?’

8 Airagĩria o ta kĩrooto, na ndacookaga kuoneka;

athiraga o ta kĩoneki gĩa ũtukũ.

9 Andũ arĩa maramuonaga,

maticookaga kũmuona,

andũ aake matimũikagia riitho rĩngĩ.

10 Ciana ciake nĩcio ituĩkaga cia kũrĩha athĩĩni arĩa aanatuunya indo.

11 Mwĩrĩ wake ũrĩa wakoragwo wĩ na hinya na ũrugarĩ,

ũkuaga ũgathikwo ũgatuĩka o tĩĩri.

12 “Ũũru ũkoragwo ũrĩ mũrĩo kanuainĩ gaake ũguo atĩ,

aũhithaga rungu rwa rũrĩmĩ rwake;

13 ndangĩũrekereria ũthiĩ,

aũhingagĩrĩria kanuainĩ gaake.

14 No rĩĩrĩ, irio ciake irũraga irĩ o nda;

irũraga o ta thumu wa nyoka ĩrĩa njũru.

15 Agagĩtahĩka ũtonga ũrĩa aanameria;

Ngai agakĩũrutũrũra uume nda yake.

16 Ameragia thumu wa nyoka;

nyoka ĩrĩa ĩĩtagwo gĩĩko ĩmũrũmaga ĩkamũũraga.

17 Ndatũũraga kinya akoona iraathimo cia Ngai;

ndakoona ũũkĩ na iria irĩa Ngai aheaga andũ aake na ũingĩ.

18 Ndakaarĩa kĩrĩa anogeire,

na ndagaakenera ũtonga wake,

19 amu nĩahinyagĩrĩria athĩĩni na akamatiganĩria,

na akeyoera nyũmba iria we mwene ataakire.

20 “Tondũ ũhahanyi wake ndũrĩ gĩthimi,

ndangĩhota kũhonokia kĩndũ o gĩothe gĩake kĩa bata.

21 Tondũ ndarĩ kĩndũ atigagia aarĩa,

ũtonga wake ndũngĩgĩtũũra.

22 Oomokagĩrwo nĩ mathĩĩna o rĩĩrĩ egangarĩĩte;

akoragĩrĩrwo nĩ nditi nene cia mĩnyamaaro akaharagana.

23 Nĩarĩe o kĩrĩa gĩothe ekwenda!

Ngai arĩmũherithia arĩ na maraakara mekũrĩrĩmbũka mwaki.

24 Akoorĩra rũhiũ rwa njora rwa cuuma,

no arathwo na mũguĩ wa gĩcango,

25 ũtũrĩkanie mwĩrĩ wake,

mũthia waguo ũkũhenia ũnyũrũrũke thakame yake,

ngoro yake ĩkĩiyũrwo nĩ kĩmako.

26 Kĩrĩa gĩothe eigĩire mũthiithũ nĩkĩrĩanangwo;

arĩcinwo nĩ mwaki ũtaakĩĩtio nĩ mũndũ,

o na ũcine kĩrĩa gĩothe gĩtigaire nyũmbainĩ yake.

27 Igũrũ nĩrĩrĩmenyithania waganu wa mũndũ ũcio,

nayo thĩ ĩmũũkĩrĩre.

28 Kĩrĩa gĩothe arĩ nakĩo kĩrĩkuuo gĩthiio nakĩo;

kĩrĩkururio gĩthiio nakĩo rĩrĩa Ngai arĩraakara.

29 Kĩu nĩkĩo kĩheeo kĩrĩa mũndũ mwaganu arĩheeo nĩ Ngai;

rĩu nĩrĩo igai rĩrĩa aathĩrĩirwo nĩ Ngai.”

Mĩario ya Ayubu

1 Ayubu agĩcookia atĩrĩ,

2 “Tategaai matũ mũigue ũrĩa nguuga!

Ũguo noguo ngũmũũria mũnyũmĩrĩrie naguo.

3 Njĩtĩkĩriai njarie;

ndarĩĩkia kwaria no mũgĩcooke kũnyũrũria.

4 “Mũreciiria nĩ mũndũ ndĩratetia?

Ngũgĩkirĩrĩa nĩkĩ?

5 Tandoraai na nĩmũkũgega,

mũhumbe tũnua twanyu na mooko.

6 Ndĩreciiria ũndũ ũyũ ngethithimũkwo,

na mwĩrĩ wakwa wothe ũkainaina.

7 “Andũ arĩa aaganu-rĩ, marekagwo matũũre nĩkĩ?

Marekagwo makinye ũkũrũinĩ na magaacĩre nĩkĩ?

8 Ciana ciao ikũraga magĩcionaga,

na ikagaacĩra o maithoinĩ maao.

9 Mĩciĩ yao ĩikaraga na thaayũ;

Ngai ndamĩreehithagĩria ũũru o wothe.

10 Ng’ombe ciao igwatagia igaciara,

na gũtirĩ o na ĩmwe ihunaga.

11 Moimagaragia ciana ciao o ta rũũru,

nacio igathiĩ igĩtũũhatũũhaga.

12 Ithiaga ikĩinagĩrwo na tamburini na ngita,

na igakenaga nĩkũhuuhĩrwo mĩtũũrirũ.

13 Matũũraga o magaacĩire,

na magakua o na thaayũ.

14 “Meeraga Ngai atigane nao;

matiendaga kũrũmĩrĩra njĩra ciake.

15 Mooragia atĩrĩ, ‘Mwene Hinya Wothe nĩ we ũ nĩguo tũmũtungatĩre?

Nĩkũrĩ uumithio tũngĩona twamũhooya?’

16 Moigaga atĩ nĩ o eene mecarĩirie ũtonga wao;

niĩ ndingĩnyiitanĩra na meciiria macio maao.

17 “Nĩ maita maigana taawa wa andũ arĩa aaganu wanahorio?

Nĩ maita maigana maanakorererwo nĩ mũtino?

Nĩ maita maigana Ngai aanamaherithia araakaire?

18 Nĩ maita maigana aanamoombũra ta uumbuthĩ?

Nĩ maita maigana maanahurutwo ta maragara moombũrĩĩtwo nĩ kĩhuuhũkanio?

19 “Muugaga atĩ Ngai aherithagia mwana nĩ ũndũ wa waganu wa mũciari.

Aaca! Ngai nĩaherithie mũndũ mwaganu nĩ ũndũ wa waganu wake mwene;

nĩonanie atĩ areeka ũguo nĩ ũndũ wa wĩhia.

nĩarekwo aigue ũritũ wa waganu wake arĩ we mwene;

20 Mũndũ ũrĩa mwaganu nĩarekwo akuue ihera rĩake mwene,

na acame maraakara ma Mwene Hinya Wothe.

21 Ũtũũro wake wathira-rĩ,

angĩcooka atĩa kũrũmbũiya ciana iria atiga na thuutha?

22 Nũũ ũngĩtaara Ngai,

o rĩrĩa arĩ we ũtuagĩra aathani arĩa marĩ hinya?

23-24 “Andũ amwe matũũraga na ũgima wa mwĩrĩ o nginya rĩrĩa magaakua;

makuaga makeneete na mahooreire,

mĩĩrĩ yao ĩrĩ o na hinya.

25 Angĩ nao makuaga marĩ na ruwo ngoro,

matarĩ maacama gĩkeno o na haniini.

26 No oothe makuaga magathikwo,

makarĩĩo nĩ mũthũa.

27 “Nĩndĩramenya ũrĩa mũreciiria,

na ũũru ũrĩa mũraĩnjiirĩria.

28 Mũrooria atĩrĩ, ‘Nyũmba ya mũnene ũyũ ĩkĩrĩ ha rĩu?

Hema ĩrĩa mũndũ mwaganu aratũũraga ĩrĩ ha rĩu?’

29 Kaĩ mũtarĩ mwatereeta na agendi?

Kaĩ mũtarĩ mwaigua ndeto iria mainũkaga nacio?

30 Andũ arĩa ooru no o matigaraga mũthenya wa ũgwati;

no o mahonokagio mũthenya wa maraakara.

31 Gũtirĩ mũndũ o na ũmwe wa gũthitanga mũndũ mwaganu,

kana wa kũmũrĩha maũndũ moothe marĩa aaneeka.

32 Rĩĩrĩ akuuĩĩtwo agĩtwarwo irimainĩ,

mbĩĩrĩra yake ĩkoragwo ĩrangĩirwo wega.

33 Andũ aingĩ moimanaga mũtongoro magĩthiĩ mathiko maake;

o na tĩĩri nĩũhumbagĩra kĩimba gĩake wega.

34 Mũrakĩĩnyũmĩrĩria na maũndũ ma tũhũ nĩkĩ?

Macookio maanyu moothe no maheeni matheri!”

Mĩario ya Elifazi

1 Elifazi ũrĩa wa kuuma Temani agĩcookia atĩrĩ,

2 “Mũndũ nĩ wa bata ũrĩkũ harĩ Ngai,

o na angĩkorwo e mũũgĩ atĩa?

3 Gũkorwo ũrĩ mũthingu-rĩ, kũngĩguna Mwene Hinya Wothe atĩa?

Gũkorwo mĩtugo yaku ĩtarĩ na ũcuuke-rĩ, kũngĩmũteithia na kĩ?

4 Ngai ndarakũherithia na ndaragũtuĩra,

nĩ ũrĩa ũmũheaga gĩtĩĩo.

5 Githĩ ti ũndũ wa waganu waku mũnene,

na wa meehia maaku matangĩtarĩka?

6 Nĩwarĩhirie andũ a mũciĩ wanyu thiirĩ mataarĩ naguo,

na ũkĩmaaũra nguo ũkĩmatiga njaga.

7 Nĩwaimire arĩa maanogeete maaĩ ma kũnyua,

na ũkĩima arĩa maahũũtiĩ irio.

8 Nĩwatũmĩrire ũhoti waku na gĩtĩĩo kĩrĩa ũheetwo,

gũtuunyana gĩthaka gĩothe.

9 Waingatire atumia a ndigwa mooko matheri,

na ũkĩhinyirĩria ciana cia ngoriai.

10 Nĩkĩo ũthiũrũrũkĩirio nĩ mĩtego,

na ũranyiitwo nĩ guoya ũterĩgĩrĩire.

11 Nokĩo ũraremwo nĩkuona nĩ ũrĩa ũtumanĩirwo;

mũiyũro wa maaĩ ũrakũiga na guoya.

12 Githĩ Ngai ndatũũraga igũrũ rĩa igũrũ,

na nĩacũũthagĩrĩria njata, o na ciakorwo irĩ igũrũ?

13 O na kũrĩ ũguo-rĩ, ũũragia atĩrĩ, ‘Nĩ kĩĩ Ngai ooĩ?

Nĩahumbĩirwo nĩ matu;

angĩkĩhota atĩa gũtũtuĩra?

14 Wĩciiragia atĩ nĩagiragĩrĩrio kuona nĩ matu matumanu,

rĩrĩa araceeraceera mũtambũrũkoinĩ wa matu mairũ.’

15 Ũgũgĩthiĩ o na mbere kũrũmĩrĩra njĩra

o ĩrĩa andũ aaganu matũire mageragĩra?

16 Maatwarirwo nĩ kĩguũ

o na ihinda rĩao rĩtakinyĩĩte.

17 Acio nĩ arĩa maakararirie Ngai,

na meetĩkĩĩtie atĩ Mwene Hinya Wothe ndarĩ ũndũ angĩahotire kũmeeka.

18 Ĩndĩ nĩ Ngai watũmire matonge;

niĩ ndingĩnyiitanĩra na meciiria ma andũ acio aaganu.

19 Andũ arĩa athingu moonaga andũ aaganu makĩherithio magakena;

andũ arĩa matarĩ ũcuuke mamathekagĩrĩra

20 makoiga atĩrĩ, ‘Thũ ciitũ nĩcianangĩĩtwo,

na ũtonga ũrĩa itigĩĩte ũgacinwo na mwaki.’

21 “Ayubu, wĩiguithanie na Ngai;

tiga kũmuona ta arĩ thũ.

Weka ũguo nĩegũkũraathima.

22 Amũkĩra mataaro marĩa arakũhe,

na ũige ciugo ciake ngoroinĩ yaku.

23 Cookerera Mwene Hinya Wothe wĩnyiihĩĩtie,

na ũtigane na ũũru wothe

ũrĩa wĩkagwo gwaku mũciĩ.

24 Ikia thahabu yaku kũraaya nawe;

te thahabu yaku ĩrĩa thaka mũno

o ta ũrĩa ũngĩte ngomongo.

25 Reke Mwene Hinya Wothe atuĩke thahabu yaku,

o na atuĩke betha yaku ĩrĩa ya goro.

26 Weka ũguo-rĩ, ũrĩikaraga wĩhokeete o Mwene Hinya Wothe,

naake atuĩke gĩthima gĩa gĩkeno gĩaku.

27 Wamũhooya, nĩarĩgũcookagĩria,

na nĩũrĩhingagia mĩhĩtwa ĩrĩa wĩhĩtĩĩte.

28 Nĩũrĩgaacagĩra maũndũinĩ moothe marĩa ũrĩĩkaga,

na ũtheri nĩũrĩkũmũrĩkagĩra njĩra.

29 Ngai nĩanyiihagia arĩa etĩĩi,

na akahonokia arĩa enyiihia.

30 Nĩegũkũhonokia akorwo ũtarĩ na mahĩtia,

na akorwo maũndũ marĩa wĩkaga matirĩ ũcuuke.”

Mĩario ya Ayubu

1 Ayubu agĩcookia atĩrĩ,

2 “O na ũũmũũthĩ ngũthiĩ o na mbere gũteta ndĩ na marũrũ,

tondũ Ngai nĩahũũrĩĩte

o na ngĩcaayaga.

3 Korwo nĩnjũũĩ kũrĩa ingĩmuona

no thiĩ kuo.

4 No ndĩmũmenyithie mateta maakwa,

na ndĩmuonie ihooto ciakwa.

5 No nyende kũmenya ũrĩa angĩnjĩĩra,

na ũrĩa angĩnjookeria.

6 Ngai no ahũthĩre ũhoti wake mũnene kũũnjũkĩrĩra?

Aaca, no athikĩrĩrie ngĩaria.

7 Tondũ ndirĩ ũcuuke,

no nyũmĩrĩrie gũcookanĩria naake;

no oonanie ũrĩa itarĩ na mahĩtia o na atĩa.

8 “Ndĩmũcarĩĩtie mwena wa irathĩro, na ndimuone;

ngamũcaria mwena wa ithũĩro, ngamwaga.

9 Akoreetwo akĩruta wĩra mwena wa na rũgongo na wa na kĩanda,

no ndirĩ ndĩramuona.

10 No rĩĩrĩ, nĩoĩ mĩthiĩre yakwa yothe;

angĩnduĩria, ndarĩ mahĩtia angĩona.

11 Ndiumaga njĩrainĩ ciake,

na ndikeruraga na kũngĩ o na atĩa.

12 Ndirĩ ndatiganĩria maathani maake;

ndũire hingagia wendi wake.

13 Ngai ndagarũrũkaga,

na gũtirĩ mũndũ ũngĩmũkararia;

eekaga o ũrĩa ekuona kwagĩrĩire.

14 Ũrĩa ekwenda gwĩka na niĩ, nĩguo egwĩka,

na ũcio no ũndũ ũmwe wa marĩa maingĩ me meciiriainĩ maake.

15 Nĩkĩo nyinainaga ndĩ harĩ we,

na ngaigua guoya ndeciiria ũhoro ũcio.

16 Ngai nĩagithĩĩtie ngoro yakwa hinya;

Mwene Hinya Wothe nĩanjĩguithĩĩtie guoya.

17 Ti nduma ĩmakĩĩtie,

o na ti nduma ĩnduruurĩĩtie;

nĩ Ngai ũmakĩĩtie.

1 “Atĩrĩĩrĩ, Mwene Hinya Wothe aagaga kũiga mahinda ma gũciirithania nĩkĩ?

Aagaga kũiga mũthenya ũrĩa akoonania ihooto cia arĩa mamũtungataga nĩkĩ?

2 Andũ ooru mamunyaga ngiri cia mĩhaka, makahatĩka mĩgũnda yene;

matuunyanaga mahiũ, makamarĩithigia marĩ maao.

3 Matuunyaga ciana cia ngoriai ndigiri,

na makooya ndeegwa ya mũtumia wa ndigwa makamĩiga o nginya akaamarĩha thiirĩ.

4 Maagithagia athĩĩni ihooto,

na magatũma arĩa oothe abataru mathiĩ makeehithe.

5 Athĩĩni acio magagĩcangacanga werũinĩ,

o ta ndigiri cia gĩthaka magĩcaria irio;

gũtirĩ kũndũ kũngĩ mangĩhota kuonera ciana ciao gĩa kũrĩa.

6 Meyũnganagĩria gĩa kũrĩa mĩgũndainĩ ĩtarĩ yao,

na makoongania matigari ma thabibũ

mĩgũndainĩ ya andũ acio ooru.

7 Ũtukũ maraaraga matehumbĩire;

matikoragwo na gĩa kwĩrigĩrĩria heho.

8 Moiragĩrwo nĩ mbura irĩmainĩ magaconjora,

maaga gwa kwĩyũa magathiĩ kwĩgitia rwaroinĩ rwa ihiga.

9 “Andũ acio ooru matuunyaga atumia a ndigwa ciana iria marongithia,

magaciiga o nginya rĩrĩa makaarĩha thiirĩ.

10 Athĩĩni acio magakĩũrũũraga matarĩ na nguo cia kwĩhumba,

na magathiaga kũgetha ngano marĩ o ahũũtu.

11 Mamahihagĩra ndamaiyũ ikoima maguta,

na makamahihĩra thabibũ ikoima ndibei,

no magakoragwo marĩ o anyootu.

12 Itũũrainĩ andũ arĩa marakua no gũcaaya maracaaya,

nao arĩa atiihangie no gũkaya marakaya,

no Ngai ndarathikĩrĩria mahooya maao.

13 “Kũrĩ andũ mooragĩra ũtheri,

matiendaga kũmenya njĩra ciaguo,

na matigeragĩra tũcĩra twaguo.

14 Mũũragani ookagĩra rũũciinĩ tene,

agathiĩ kũũraga andũ arĩa athĩĩni,

na ũtukũ agathiĩ kũiya.

15 Gĩtharia gĩetagĩrĩra kũgĩe mairia

gĩkiugaga na ngoro atĩrĩ, ‘Gũtirĩ mũndũ ũkũnyona,’

na gĩkeehumbĩra ũthiũ gĩtikaamenyeke.

16 Aici matharĩkagĩra nyũmba ũtukũ,

makeehingĩra mũthenya tondũ matiendaga kuona ũtheri.

17 Nduma ndumanu nĩ yo rũũciinĩ rwao oothe,

amu matumaga ndũgũ o na maũndũ ndumainĩ ma kũguoyohia.

Mĩario ya Zofaru

18 “Andũ ooru makuuagwo nĩ maaĩ o ta mahuti;

mĩgũnda yao ĩkoragwo ĩrĩ mĩrume nĩ Ngai;

na gũtirĩ mũndũ ũthiaga kũruta wĩra mĩgũndainĩ yao ya mĩthabibũ.

19 O ta ũrĩa riũa na ũrugarĩ

iringũraga mbarabu ĩgathira,

noguo andũ arĩa eehia mameragio nĩ bũrũri wa arĩa akuũ.

20 Maanyina mariganagĩrwo nĩ o,

na makua makarĩĩo nĩ mũthũa;

maanangagwo o ta mũtĩ watemwo.

21 “Andũ eehia mahinyagĩrĩria atumia thaata,

na matirĩ hingo marũmbũyagia atumia a ndigwa.

22 Ngai nĩanangaga andũ arĩa marĩ hinya na hinya wake;

ooya guoko na igũrũ, andũ acio eehia no gũkua makuaga.

23 Ngai no areke matũũre magaacĩire,

no aikaraga akĩmatuĩragia hĩndĩ ciothe.

24 Matũũgagĩrio kwa ihinda, magacooka makabuĩria;

mahoohaga makooma narua o ta ria;

marengagwo o ta magira ma ngano.

25 Angĩkorwo ũguo tiguo kũrĩ, nũũ ũngĩhota kuonania atĩ nĩndĩraheenania?

Nũũ ũngĩhota kũraria ciugo ciakwa?”

Mĩario ya Bilidadi

1 Bilidadi ũrĩa wa kuuma

Shuha agĩcookia atĩrĩ,

2 “Ngai arĩ hinya, na andũ oothe nĩmaagĩrĩirwo nĩkũmũtĩĩa;

atũũragia gwake igũrũ na thaayũ.

3 Thigari ciake no itarĩke?

Kũrĩ handũ atamũrĩkaga na ũtheri wake?

4 Mũndũ angĩkĩhota atĩa gũtuĩka mũthingu mbere ya Ngai?

Mũndũ ũciarĩĩtwo nĩ mũtumia no aage kũhĩtia?

5 Angĩkorwo maithoinĩ ma Ngai

mweri ndũrĩ ũtheri wa kũigana,

na njata itirĩ na ũkengi wa kũigana-rĩ,

6 mũndũ, ũrĩa ũrĩ o kĩgunyũ, akĩhaana atĩa?

Ũtũũro wa mũndũ ũkĩrĩ kĩ maithoinĩ ma Ngai?”

Mĩario ya Ayubu

1 Naake Ayubu agĩcookia atĩrĩ,

2 “Kaĩ nĩũndeithĩĩtie-ĩ,

o niĩ mũndũ mũthĩĩni na ũtarĩ na hinya!

3 Nĩũheete ũtaaro mwega na ũkanjũhĩgia,

niĩ mũndũ mũkĩĩgu.

4 Nũũ wera ũguo wothe?

Nũũ ũkũhotithĩĩtie kwaria ũguo?”

Mĩario ya Bilidadi

5 Naake Bilidadi agĩcookia atĩrĩ,

“Ngoma cia andũ arĩa maakuire nĩkũinaina irainaina

irĩ maaĩinĩ marĩa marĩ rungu rwa thĩ.

6 Ngai nĩonaga kwa arĩa akuũ;

maithoinĩ maake gũtirĩ kĩndũ gĩkũhumbĩrĩĩte.

7 Nĩ we watambũrũkirie igũrũ,

nayo thĩ akĩmĩcuuria atarĩ na handũ amĩohereire.

8 Nĩ we ũiyũragia matu maaĩ

na maritũha akamanyiitĩrĩra matigaatathũke.

9 Nĩ we ũhumbagĩra mweri,

agatambũrũkia itu igũrũ rĩaguo.

10 Eekĩrire rũkiriri maaĩinĩ,

akĩgayũkania ũtheri na nduma.

11 Akayagĩrĩria itugĩ iria itiirĩrĩire igũrũ,

ikainaina na igathingitha nĩ guoya.

12 Nĩ we watooririe iriana hinya wake.

na agĩtooria ndamaathia ĩrĩa ĩĩtagwo Rahabuna ũũgĩ wake.

13 Mĩhũũmũ yake nĩ yo yatũire igũrũ gũthaka,

namo mooko maake makĩũraga ndamaathia ĩrĩa yetharaga.

14 Maũndũ macio moothe no mũhiũkio wa ũhoti wake;

ũrĩa wothe tũiguĩte, tũiguĩte o na kĩheehũ.

No rĩĩrĩ, nũũ ũngĩtaũkĩrwo nĩ ũrĩa Ngai arĩ mũnene?”