Author: admin

1 “Atĩrĩ, ũtũũro wa mũndũ gũũkũ thĩ nĩ mũritũ;

matukũ maake no ta ma mũndũ mwandĩke wĩra.

2 Ahaana ta ngombo ĩracaria kĩĩgunyĩ,

kana ta mũruti wĩra ũratheethũkĩra mũcaara wake.

3 Niĩ ngaĩirwo mĩeri itarĩ kĩndũ gĩa gwĩteithia,

na ngaheeo mootukũ itangĩona toro.

4 Ndakoma nyonaga ũtukũ ũrĩ mũraihu,

ndaaraga ngĩĩgariũraga, ngĩũragia gũgaakĩa rĩ.

5 Mwĩrĩ wakwa ũhumbĩrĩĩtwo nĩ igunyũ na ngũũcĩ;

ũiyũire ironda, na mahira no to-o-o-o.

6 Matukũ maakwa marahanyũka na ihenya mũno;

marathira itarĩ na kĩĩrĩgĩrĩro o na kĩrĩkũ.

7 “Ngai, ririkana atĩ ũtũũro wakwa no ihũũmũka rĩmwe,

na gĩkeno gĩakwa nĩgĩkinyĩĩte mũthia.

8 Rĩu nĩũranyona, no ndũkaanyona rĩngĩ,

ũngĩkaanjaria, ngaakorwo ndĩthiĩrĩire.

9-10 Ta ũrĩa itu rĩthengaga rĩkabũĩria,

noguo andũ makuaga na maticookaga rĩngĩ,

arĩa oothe maramooĩ makariganĩrwo nĩ o.

11 “Ingĩkĩhota atĩa gũtumia kanua gaakwa?

Ngwaria ndĩ na ruwo ngoroinĩ,

ndĩĩtetere tondũ ndĩ na ruwo rũingĩ.

12 Kaĩ ngĩrĩ ndamaathia ya iriainĩ

nĩ geetha uuge nangagĩrwo?

13 Thiaga ũrĩrĩ ngahuurũke,

14 no wee ũkaamakia na irooto,

na ũkandua nda na cioneki.

15 Kaba gũitwo ngue,

handũ ha gũtũũra mwĩrĩinĩ.

16 Nĩnogeetio nĩgũtũũra muoyo, na ndigũtũũra tene na tene;

tigana na niĩ, nĩ gũkorwo matukũ maakwa no ihũũmũka rĩmwe.

17 Mũndũ nĩ kĩĩ, tondũ ũmũtũũgĩrĩĩtie ũguo,

na ũmũrũmbũyagia?

18 Ũmũng’eetagia rũũciinĩ o rũũciinĩ,

na ũkamũgeria mahinda moothe.

19 Kaĩ ũtangĩrora na mwena ũngĩ haniini,

ũhe kamweke ga kũmeria mata?

20 Ingĩĩhia-rĩ, no ngorwo ngwĩkĩĩte ũndũ, wee mũrangĩri wa andũ?

Ũnduĩte kĩndũ gĩakwĩruta cabaa nakĩo nĩkĩ?

Kaĩ nduĩkĩĩte mũrigo harĩ we?

21 Kaĩ ũtarĩ hingo ũngĩnjohera wĩhia wakwa?

Kaĩ ũtangĩndekera ihĩtia rĩrĩa njĩhĩĩtie?

Njerekeire gũthiĩ mbĩĩrĩrainĩ,

na ndĩrĩkorwo ndĩthiĩrĩire rĩrĩa ũrĩkorwo ũkĩnjaria.”

Mĩario ya Bilidadi

1 Naake Bilidadi wa kuuma Shuha agĩcookia atĩrĩ,

2 “Ũgũthiĩ na mbere itĩĩna rĩigana atĩa ũkĩaragia maũndũ ta maya?

Mĩario yaku no ta kũhũũra maaĩ na ndĩrĩ.

3 Kaĩ kũrĩ hingo Ngai oogomagia waragania?

Mwene Hinya Wothe-rĩ, nĩoinaga kĩhooto?

4 Ciana ciaku no mũhaka ikorwo ciĩhĩirie Ngai,

nĩkĩo aciherithĩĩtie ta ũrĩa ciagĩrĩirwo.

5 Ũngĩcookerera Ngai,

na ũthaithe Mwene Hinya Wothe,

6 ũngĩkorwo ũrĩ mũthingu na ũtarĩ na ũcuuke,

Ngai no ooke agũteithie,

na agũcookerie mũciĩ na indo ciaku ta kĩheeo.

7 Ũtonga ũrĩa wothe ũteete ũgũtuĩka kĩndũ hatarĩ,

ũkĩringithanio na kĩrĩa egũkũhe.

8 “Ndagũthaitha taikia maitho na thuutha mahindainĩ ma tene,

wone ũrĩa maithe maitũ meerutire.

9 Atĩrĩĩrĩ, ũtũũro witũ nĩ mũkuhĩ,

na tũtirĩ ũndũ tũũĩ.

Matukũ maitũ gũũkũ thĩ mathiraga o ta kĩĩruru.

10 Reke andũ arĩa oogĩ a tene magũthoomithie;

thikĩrĩria ũrĩa maroiga.

11 “Ithanjĩ-rĩ, no rĩkũre kũndũ gũtarĩ maaĩ?

Marura-rĩ, no makũre kũndũ gũtaarahĩĩte maaĩ?

12 Maaĩ mangĩhũa-rĩ, marura macio na ithanjĩ rĩu

no kũũma moomaga matarĩ makũrũ makũhũthĩrwo.

13 Andũ arĩa mataathĩkagĩra Ngai mahaana o ta marura macio;

maaga gwathĩkĩra Ngai

kĩĩrĩgĩrĩro kĩao no gũthira gĩthiraga.

14 Maigaga mwĩhoko wao handũ hatarĩ harũmu,

mwĩhoko wao ũgakĩhũtha o ta rũrenda rwa mbũmbũĩ.

15 Mangĩĩtiirania naho, nĩkũmomoka hamomokaga;

mangĩhenyiitĩrĩra, hatingĩmarũũgamia.

16 Andũ arĩa ooru maringũkaga o ta rĩa hĩndĩ ya ũrugarĩ;

mahaana o ta ria rĩrĩa rĩhambaga mũgũnda wothe.

17 Mĩri yarĩo ĩtambagĩrĩra mahiga,

ĩkenyiitĩrĩra mahiga.

18 No rĩĩrĩ, rĩngĩmũnywo,

gũtirĩ mũndũ ũngĩmenya atĩ rĩarĩ ho.

19 Kĩu nĩkĩo gĩkeno kĩa andũ arĩa ooru;

andũ angĩ mookaga magaikara handũ haao.

20 “Atĩrĩĩrĩ, Ngai ndatiganagĩria mũndũ mũthingu,

na ndateithagĩrĩria arĩa ooru.

21 Kwoguo nĩagaatũma ũtheke o rĩngĩ,

na wanĩrĩre nĩgũkena.

22 Nĩagaaconorithia arĩa makũmeneete,

na aharaganie mĩciĩ ya andũ arĩa ooru.”

Mĩario ya Ayubu

1 Naake Ayubu agĩcookia atĩrĩ,

2 “Nĩnjũũĩ ma atĩ ũguo nĩguo kũrĩ;

no rĩĩrĩ, mũndũ no atuĩke mũthingu mbere ya Ngai?

3 Mũndũ angĩenda gũciira na Ngai,

ndangĩhota kũmũcookeria o na kĩũria kĩmwe harĩ ciũria ngiri.

4 Ngai nĩ mũũgĩ na arĩ hinya mũingĩ;

kũrĩ mũndũ ũrĩ wehandahanda aciire naake akĩhootana?

5 Athengagia irĩma iterĩgĩrĩire,

na agacihang’urania na maraakara.

6 Ainainagia thĩ ĩkoima harĩa ĩrĩ,

nacio itugĩ ciayo ikeenyenya.

7 Aathaga riũa, rĩkaaga kũratha,

o na njata, ikaaga kũruta ũtheri.

8 Nĩ we wiki watambũrũkirie matu mairũ,

na akĩrangaranga ng’oong’o wa ndamaathia ya iriainĩ.

9 Nĩ we wathondekire njata iria ciĩtagwo, Nduba, Karaũ,

Kĩrĩmĩra, o na njata iria cia mwena wa na kĩanda.

10 Eekaga maũndũ manene tũtangĩhungura,

o na ageeka maũndũ ma kũgegania matangĩtarĩka.

11 Ngai ahĩtũkagĩra hakuhĩ na niĩ,

na ndingĩhota kũmuona.

12 Ooyaga kĩrĩa gĩothe ekwenda,

na gũtirĩ ũngĩmũrigĩrĩria;

gũtirĩ ũngĩmũũria, ‘Ũreeka atĩa?’

13 “Angĩraakara, ndaraakarũkaga narua;

nĩarangĩrĩirie arĩa maateithĩrĩirie ndamaathia

ya iriainĩ ĩrĩa ĩĩtagwo Rahabu.

14 “Ingĩkĩruta ciugo kũ,

nĩguo njookerie Ngai?

15 O na angĩkorwo itarĩ na ũcuuke-rĩ, ndingĩhota kũmũcookeria;

ũrĩa ingĩĩka no njũũririe Ngai ũrĩa ũtuanagĩra ciira anjiguĩre tha.

16 O na ingĩĩka ũguo, na eetĩkĩre njarie,

ndingĩĩtĩkia atĩ no aathikĩrĩrie.

17 Amu nĩatũmaga kĩhuuhũkanio kĩĩhũũre,

na akandiihangia mũno hatarĩ gĩtũmi.

18 Ndaheaga mweke wa kũhiihia;

aiyũrĩĩtie ũtũũro wakwa na mathĩĩna.

19 Angĩkorwo nĩkũgerana hinya-rĩ,

e na hinya kũngĩra.

Angĩkorwo nĩgũtwarana igootiinĩ-rĩ,

nũũ ũngĩmũtwarĩra thamanji?

20 O na gũtuĩka ndirĩ na mahĩtia,

ciugo ciakwa mwene ciahota kũndua mwĩhia.

O na gũtuĩka ndirĩ na ũcuuke,

no ahote kuonania atĩ ndĩ mũremi.

21-22 Niĩ ndirĩ na mahĩtia, no ndiramaka;

nĩnogeetio nĩ ũtũũro, no ũcio ti ũndũ;

twĩ na mahĩtia kana tũtarĩ, Ngai no egũtwananga.

23 Mũndũ ũtarĩ ũcuke angĩkua gĩkuũ kĩa na ihenya,

Ngai nĩgũtheka athekaga.

24 Ngai nĩkũneana aneanĩĩte thĩ mookoinĩ ma andũ ooru.

Nĩkũhinga ahingĩĩte maitho ma arĩa oothe matuithanagia ciira.

Angĩkorwo ti Ngai wĩkĩĩte ũguo-rĩ, nũũ ũgĩĩkĩĩte?

25 “Matukũ maakwa nĩmarathira na ihenya;

marahanyũka, na ndirĩ wega ndĩroona.

26 Marahĩtũka o ta gatarũ karĩa karĩ ihenya mũno,

kana o ta rwĩgĩ rũkĩoya gacui.

27-28 Ingĩtheria gĩthiithi gĩakwa, ngerie kũriganĩrwo nĩ ruwo rwakwa,

mathĩĩna maakwa moothe manjũkagĩrĩra makanjĩkĩra guoya;

nĩnjũũĩ atĩ Ngai anduĩte mwĩhia.

29 Tondũ nĩnduĩtwo mwĩhia-rĩ,

ngũgĩthiĩ na mbere gwĩthĩĩnia nĩkĩ?

30 O na ingĩĩthamba na thabuuni ũrĩkũ,

meehia maakwa matingĩthera.

31 Ngai anjikĩĩtie irimainĩ rĩa gĩko,

o na nguo ciakwa mwene nĩirandega.

32 Ngai angĩrĩ mũndũ, ndamũcookeria;

no tũtwarane igootiinĩ tũgatuithanio.

33 Ĩndĩ gũtirĩ mũndũ wa kũrũũgama gatagatĩ gaakwa naake;

gũtirĩ wa gũtũtuithania niĩ na Ngai.

34 Ngai, tiga kũherithia!

ndagũthaitha, tiga kũmakia!

35 Ngwaria itarĩ na guoya,

tondũ nĩndĩyũĩ o ngoro thĩinĩ.

1 “Niĩ-rĩ, nĩnogeetio nĩ ũtũũro;

ndingĩhota gũtumĩria mateta maakwa,

na ngwaria ndĩ na ruwo rũingĩ ngoro.

2 Ngai, tiga kũnjethera mahĩtia!

Tanjĩĩra! Mahĩtia maakwa nĩ marĩkũ?

3 Kaĩ wonaga arĩ wega kũhinyanĩrĩria?

No ũmene kĩndũ ũthondekeete na mooko maaku,

kana gũkenera mĩbango ya andũ aaganu?

4 Maitho maaku-rĩ, kaĩ matariĩ ta ma mũndũ?

Muonere waku wa maũndũ kaĩ ũkĩrĩ ta wa mũndũ?

5 Matukũ maaku-rĩ, kaĩ makĩrĩ ta ma mũndũ?

Mĩaka yaku kaĩ ĩkĩrĩ ta ya mũndũ?

6 Ũragĩthuuthuuria mahĩtia maakwa

na ũkanjarĩria meehia nĩkĩ?

7 Wee nĩũũĩ atĩ ndihĩtĩĩtie,

na gũtirĩ ũngĩngũũra kuuma mookoinĩ maaku.

8 “Mooko maaku nĩ mo manyũmbire na magĩĩthondeka,

na rĩu nĩũrericũkwo ũkanyananga.

9 Ririkana atĩ ũnyũmbĩĩte na rĩũmba;

kaĩ ũgũgĩĩthĩa nduĩke rũkũngũ o rĩngĩ?

10 Nĩwaheire baaba hinya wa kũnjiara,

ũgĩkĩreka ngũre ndĩ ndainĩ ya maitũ.

11 Nĩwathondekire mwĩrĩ wakwa na mahĩndĩ na mĩkiha,

na ũkĩhumbĩra mahĩndĩ macio na nyama na gĩkonde.

12 Nĩũheete muoyo na ũkaanyonia ũtugi;

nĩũmenyagĩrĩra na ũkanjiga muoyo.

13 No rĩĩrĩ, mahinda macio moothe nĩnjũũĩ

ũkoragwo ũkĩbanga na ngoro kũnyũnũha.

14 Wetereire wone kana nĩngwĩhia,

nĩguo wage kũnjohera.

15 Ingĩĩhĩa, kaĩ ndĩ thĩĩnainĩ-ĩ!

O na ingĩĩka wega ndingĩyambararia.

Amu njiyũirwo nĩ gĩconoko na nyonaga o mathĩĩna maakwa.

16 Ingĩyambararia, ũũhĩtaga ũhaana o ta mũrũũthi,

o na ũkaringaga ciama nĩguo ũnyũnũhe.

17 Ũnjethagĩra aira angĩ mangararie;

maraakara maaku harĩ niĩ nĩkuongerereka moongererekaga;

ũndeehithagĩria mbũtũ na mbũtũ cia kũhũũra hingo ciothe.

18 “Warekire nyume nda ya maitũ nĩkĩ?

Naarĩ korwo ndakuire itooneetwo nĩ riitho o na rĩmwe!

19 Naarĩ korwo ndakuire o ndoima nda ya maitũ,

ndwarwo mbĩĩrĩra thikwo!

20 Githĩ matukũ maakwa ti manyiinyi?

Tandigithĩria ngenakene haniini,

21 itaanathiĩ kũrĩa itakoima,

bũrũri wĩ nduma na ihooru,

22 bũrũri wĩ nduma na thogothogo, kũrĩa ũtheri ũhaana nduma.”

Mĩario ya Zofaru

1 Zofaru ũrĩa wa kuuma Naama agĩcookia atĩrĩ:

Ndeto nyingĩ ũguo-rĩ, no ciage gũcookio?

2 “Mũndũ wa kwaria maũndũ maingĩ ũguo-rĩ, no atuĩke mũkinyanĩru?

3 Mũhũhũũtĩko waku-rĩ, no ũkirie andũ?

No ũthekerere andũ, na wage wa gũgũcookeria?

4 Woiga atĩ ũrutani waku nĩ mũrũngarũ,

na atĩ ũrĩ mũtheru maithoinĩ ma Ngai.

5 Naarĩ korwo Ngai no aarie;

naarĩ korwo no agũcookerie!

6 Naarĩ korwo no akũmenyithie maũndũ marĩa mahithe ma ũũgĩ!

Ngai nĩoĩ maũndũ maingĩ.

Kĩmenye atĩ ndakũherithĩĩtie ta ũrĩa kwagĩrĩire.

7 “No ũhote kũmenya maũndũ ma hitho

marĩa mathiũrũrũkĩirie Mwene Hinya Wothe?

8 Maũndũ macio nĩ maraaya gũkĩra igũrũ,

na nĩ mariku gũkĩra kwa arĩa akuũ.

Ũngĩgĩĩka atĩa o rĩrĩa ũũĩ o maũndũ maniini?

9 Ningĩ nĩ maraihu gũkĩra thĩ,

na makaarama gũkĩra iria.

10 Ngai angĩgũikia njeera,

kana agũtware igootiinĩ,

nũũ ũngĩmũgirĩrĩria?

11 Ngai nĩoĩ andũ arĩa a tũhũ;

angĩkĩona mahĩtia no aage kũrũmbũiya?

12 Angĩkorwo ndigiri ya gĩthaka no ĩciare mũndũ-rĩ,

naake mũndũ mũkĩĩgu no oohĩge.

13 “Ayubu, ũngĩthondeka ngoro yaku,

no ũthaathaiye Ngai.

14 Angĩkorwo wĩ na mahĩtia, mathengie;

ndũkaareke ũmaramari ũtũũre gwaku mũciĩ.

15 Hĩndĩ ĩyo no ũtiire ũthiũ waku ũtarĩ na thoni.

Ĩĩ, na no ũrũũgame ũtarĩ na guoya.

16 No ũriganĩrwo nĩ mĩtangĩko yaku,

o ta maaĩ marĩa marĩĩkĩĩtie gũtherera.

17 Ũtũũro waku ũgĩthere gũkĩra thaa thita cia mũthenya,

namo mahinda marĩa mooru ma ũtũũro ũcio

magĩthere o ta ũrĩa gũtheraga gũgĩkĩa.

18 Nawe ũtũũre wĩiguĩte na ũiyũirwo nĩ kĩĩrĩgĩrĩro,

naake Ngai akũgitagĩre na akũheage thaayũ.

19 No ũkomage na nduone wa gũgũthĩĩnia,

na andũ aingĩ meyendithagie harĩ we.

20 No rĩĩrĩ, andũ arĩa aaganu nĩmagaaturuura,

na matione njĩra o yothe ya kũũrĩra;

mwĩhoko wao ũgaakorwo ũrĩ o gĩkuũ.”

Mĩario ya Ayubu

1 Naake Ayubu agĩcookia atĩrĩ:

2 “Kaĩ mũrĩ imenyi-ĩ!

Mwakua-rĩ, ũũgĩ ũgaakuanĩra na inyuĩ.

3 No rĩĩrĩ, o na niĩ ndĩ na ũũgĩ o ta inyuĩ;

mũtirĩ oogĩ kũngĩra.

Nũũ ũtooĩ maũndũ macio?

4 Araata aakwa rĩu nĩgũũthekerera marathekerera,

o niĩ ndahooyaga Ngai na akanjigua.

Nĩgũũthekerera marathekerera,

o niĩ mũndũ mũthingu ũtarĩ ũcuuke.

5 Matirĩ na mathĩĩna, na nĩgũũthaakĩra marathaakĩra;

njerekeire kũgũa, na no marahũũra.

6 No rĩĩrĩ, atuunyani na arĩa matatĩĩĩte Ngai maikaire na thaayũ,

o acio matuaga atĩ hinya wao nĩguo ngai yao.

7 “Rĩu-rĩ, ũria nyamũ na nĩigũgũthoomithia;

ũria nyoni na nĩigũgũcookeria.

8 Arĩria mĩtĩ na nĩgũgũthoomithia;

ningĩ arĩria thamaki na nĩigũgũtaarĩria.

9 Ciothe nĩciũĩ atĩ nĩ guoko kwa MWATHANI gwaciũmbire.

10 Kĩndũ o gĩothe kĩrĩ muoyo,

o na roho wa mũndũ o wothe irĩ guokoinĩ gwake.

11 Matũ makenagio nĩkũigua ciugo,

o ta ũrĩa rũrĩmĩ rũkenagio nĩgũcama irio.

12 Andũ akũrũ makoragwo na ũũgĩ;

arĩa maikĩĩtie matukũ nĩmooĩ maingĩ.

13 “Ngai nĩ mwene ũũgĩ na hinya;

nĩoĩ gũtaarana, na nĩoĩ maingĩ.

14 Ngai angĩmomora-rĩ, nũũ ũngĩaka rĩngĩ?

Angĩhingĩrĩria mũndũ-rĩ, nũũ ũngĩmũhingũrĩra?

15 Angĩgirĩrĩria mbura, indo ciothe nĩkũũma ciũmaga;

angĩmĩhingũrĩra, kũgĩaga na mũiyũro.

16 Nĩarĩ hinya o na ũũgĩ;

mũhĩtithio na mũhĩtithania, o eerĩ nĩ aake.

17 Aconoraga anene,

na agatua atongoria irimũ.

18 Arutaga athamaki itĩinĩ ciao,

akamatua mabuthu.

19 Aconoraga athĩnjĩri Ngai,

na akahang’ũrania anene arĩa matangĩenyenyeka.

20 Akiragia arĩa mehokeetwo nĩ andũ,

nao arĩa akũrũ akamatuunya ũmenyo.

21 Aagithagia aathani gĩtĩĩo,

na agatuunya anene ũnene.

22 Athikũragia maũndũ marĩa mathike,

na akareehe marĩa marĩ ndumainĩ ũtheriinĩ.

23 Atũũgagĩria ndũũrĩrĩ na agacihang’urania;

atũmaga itheereme o na agaciharagania.

24 Atuaga aathani irimũ,

agatũma maturuure na matione njĩra.

25 Magagĩthiĩ makĩhambahambataga ndumainĩ,

magĩtũgũũgaga o ta arĩĩu.

1 “Atĩrĩĩrĩ, maitho maakwa nĩmooneete maũndũ macio moothe,

matũ maakwa nĩmamaiguĩte na ngamamenya.

2 Marĩa mũũĩ o na niĩ nĩndĩmooĩ;

ndĩ mũũgĩ o ta inyuĩ.

3 No ngwenda kwaria na Mwene Hinya Wothe;

ngwenda gũciira na Ngai.

4 Inyuĩ-rĩ, mũhumbĩrĩĩte ũrimũ wanyu na maheeni;

inyuothe mũrĩ mandagĩtaarĩ matangĩĩhoneria mũndũ.

5 Naarĩ korwo mwakira;

no mwoneke ta mũrĩ oogĩ!

6 “Rĩu tathikĩrĩriai ihooto ciakwa;

tathikĩrĩriai mateta maakwa.

7 Mũraarĩria Ngai mũgĩtũmagĩra maheeni?

Mũramwarĩria mũgĩtũmagĩra wara?

8 Nĩkũgeria mũrageria kũmũgitĩra?

Nĩmũkũmũciirĩrĩra?

9 No muone wega Ngai angĩmũthuuthuuria?

Ningĩ-rĩ, no mũmũheenie ta ũrĩa mũndũ aheenagia ũrĩa ũngĩ?

10 O na mũngĩgĩa na mũthuutũkanio na hitho-rĩ,

hatirĩ nganja no amũkũũme.

11 Githĩ riiri wake to ũmwĩkĩre guoya?

Githĩ gĩtĩĩo gĩake to kĩmũtue nda?

12 Thimo cianyu nĩ cia tũhũ o ta mũhu;

ihooto cianyu nĩ cia tũhũ o ta ndaka.

13 Kiraai mũreke njarie;

ngwaria njĩkwo ũrĩa ngwĩkwo.

14 “Ngũkĩaga gũikia muoyo wakwa ũgwatiinĩ nĩkĩ?

15 O na Ngai angĩnjũraga-rĩ, nĩ kĩĩ kĩngĩ njetereire?

Ĩndĩ no ngwĩtetera mbere yake.

16 No gũkorwo gwĩtetera nokuo kũngĩĩhonokia,

amu gũtirĩ mũndũ mũũru ũngĩrũũgamana na Ngai.

17 “Tagĩthikĩrĩriei wega ciugo ciakwa;

tategaai matũ mũigue mĩario yakwa.

18 Rĩu nĩngwĩciirĩrĩra,

amu nĩnjũũĩ atĩ ndirĩ na mahĩtia.

19 “Nũũ ũngĩrũũgamana na niĩ?

No ngĩkire njeterere kũũragwo.

20 Ngai, ũngĩnjĩkĩra o maũndũ meerĩ,

no ndige kwĩhitha ũthiũ waku.

21 Namo nĩ maya: ũtige kũũnyamaaria,

na ũtige kũnjĩkĩra guoya.

22 “Weka ũguo, no wambe warie, na niĩ njookie,

kana ũreke njarie, nawe ũnjookerie.

23 Njĩkĩĩte mahĩtia marĩkũ?

Meehia maakwa-rĩ, maigana atĩa?

Ndagũthaitha menyithia mahĩtia maakwa na meehia maakwa.

24 “Ũraĩtheema nĩkĩ?

Ũranyona ta ndĩ thũ yaku nĩkĩ?

25 Ũrahahũra nĩkĩ?

Niĩ ndĩ o ihuti;

ũrahanyũkania na niĩ o ta maragara.

26 Ũrathitangĩra maũndũ mooru mũno,

na ũkanjookereria mahĩtia ma rĩrĩa ndarĩ mwĩthĩ.

27 Ũnjoheete magũrũ na nyororo,

ũkabaara mĩthiĩre yakwa yothe,

o na ũgathuuthuuria makinya maakwa.

28 Ndĩragĩthira o ta kĩndũ kĩbuthu,

o ta nguo ndĩe nĩ memenyi.

1 “Mũndũ ũrĩa ũciaragwo nĩ mũtumia,

atũũraga o ihinda iniini,

na nĩwakuona mathĩĩna maingĩ.

2 Akũraga na akahooha o ta ihũa,

akabuaĩria o ta kĩĩruru.

3 Wee Ngai-rĩ, mũndũ ta ũcio no ũmũrore?

Mũndũ ta ũcio no ũciire naake?

4 Kũrĩ mũndũ ũngĩhota kũruta kĩndũ gĩtheru kuuma harĩ kĩndũ gĩtarĩ gĩtheru?

Gũtirĩ o na ũmwe ũngĩhota!

5 Matukũ ma mũndũ nĩmatare;

nĩũũĩ mũigana wa mĩaka yake;

ũmwĩkĩrĩire mĩhaka atangĩhota gũkĩra.

6 Roria maitho na kũngĩ ũtige kũmuona;

reke akenere matukũ maake,

ta mũthũkũmi agĩkenera mũcaara wake.

7 “Mũtĩ watemwo, nĩhakoragwo na kĩĩrĩgĩrĩro atĩ,

wahota kũringũra, ũrute thuuna.

8 O na mĩri yaguo ĩngĩhoohera tĩĩriinĩ,

na gĩthukĩ kĩaguo kĩũme,

9 wona maaĩ ũthundũkaga

na ũkoimia honge o ta mũtĩ mwĩthĩ.

10 Ĩndĩ mũndũ akuaga, agatuĩka kĩndũ hatarĩ;

arĩĩkia gũtuikana-rĩ, athiaga na kũ?

11 “Ta ũrĩa maaĩ ma iria mahũaga,

na ta ũrĩa rũũĩ rwagaga maaĩ rũkooma-rĩ,

12 noguo mũndũ akuaga na ndacookaga muoyo;

kinya rĩrĩa igũrũ rĩgaathenga, ndagacooka gũũkĩra rĩngĩ,

o na kana arahũrwo toroinĩ ũcio wake.

13 “Naarĩ korwo no ũũhithe kwa arĩa akuũ

nginya maraakara maaku mathire,

ũcooke ũtue ihinda rĩa kũndirikana.

14 Mũndũ angĩkua-rĩ, no ariũke?

No niĩ-rĩ, nĩnjetereire mahinda meega;

ngweterera o nginya mahinda maya ma thĩĩna mathire.

15 Hĩndĩ ĩyo no wĩtane na niĩ njĩtĩke;

nawe ũgĩkenio nĩ niĩ, o niĩ kĩũmbe gĩaku.

16 Hĩndĩ ĩyo no ũkĩbaarage mĩthiĩre yakwa yothe,

na nduone meehia maakwa.

17 No ũnjohere meehia maakwa na ũriganĩrwo nĩmo,

na ũhuure mahĩtia marĩa moothe ndaneeka.

18 “Nĩkũrĩ mahinda makinyaga irĩma ikainaina na ikaharagana,

nyanjara cia mahiga ikarutwo harĩa ciuma,

19 maaĩ makahũũra mahiga ma rũũĩ magathera,

na kĩguũ gĩgatwara tĩĩri.

Ũguo noguo ũharaganagia mwĩhoko wa mũndũ.

20 Ũtooragia mũndũ, ageethiĩra tene na tene;

ũgarũraga gĩthiithi gĩake, ũkamũingata.

21 Ciana ciake itũũgĩragio, na ndangĩmenya;

iconoragwo, na ndangĩona.

22 Aiguaga ruwo o rwa mwĩrĩ wake,

na akeerĩrĩra o we mwene.”

Mĩario ya Elifazi

1 Thuutha ũcio Elifazi ũrĩa wa kuuma Temani

agĩcookia o rĩngĩ atĩrĩ,

2 “Ayubu, mũndũ mũũgĩ no aarie ciugo cia tũhũ ũguo?

No ahũhũũtĩke ũguo?

3 Mũndũ mũũgĩ-rĩ, nĩagĩrĩirwo kwaria mĩgambo ĩtarĩ uumithio,

kana ciugo itangĩmũguna?

4 No rĩĩrĩ, wee nĩkũniina ũraniina gĩtĩĩo kĩa Ngai

na ũkagiria andũ mamũhooe.

5 Waganu waku nĩguo ũragũtongoria;

ũgagĩtũmĩra ciugo cia wara.

6 Kwoguo kanua gaaku nĩ ko karakuohithia, ti niĩ;

ciugo ciaku nĩcio iragũtuĩra.

7 “Kaĩ arĩ we mũndũ wa mbere gũciarwo?

Kaĩ waciarirwo mbere ya ithũngũri?

8 Kaĩ waiguire kĩama kĩa Ngai gĩgĩciira?

Ũreciiria atĩ we no we mũũgĩ?

9 Nĩ kĩĩ ũũĩ ithũĩ tũtooĩ?

Nĩ kĩĩ ũiguĩte, tũtaiguĩte?

10 Gatagatĩinĩ gaitũ harĩ na andũ akũrũ na marĩ na mbuĩ,

nĩ akũrũ gũkĩra thooguo.

11 Kaĩ ũtaanaiganĩra Ngai akũũmĩrĩria,

o na kana akwarĩria na ũhooreri atũhũthĩrĩĩte?

12 Ngoro yaku ĩratuumatuuma nĩkĩ?

Ũratũbucabucĩria maitho macio maaku nĩkĩ?

13 Ũraraakarĩra Ngai nĩkĩ?

Ũrareka mĩgambo ta ĩyo yume kanua gaaku nĩkĩ?

14 Mũndũ kaĩ akĩrĩ kĩĩ, atĩ no akorwo arĩ mũtheru?

Mũndũ ũciarĩĩtwo nĩ mũtumia-rĩ, no atuĩke mũthingu?

15 Ngai ndehokaga o na araika aake,

o na ti atheru maithoinĩ maake.

16 Mũndũ ũrĩa ũnyuaga waganu o ta ũrĩa anyuaga maaĩ-rĩ,

githĩ to agĩkorwo arĩ kĩndũ kĩnungu

na kĩrĩ magigi mbere ya Ngai?

17 “Tathikĩrĩria, ngwĩre;

nĩngũkuumbũrĩra marĩa nyoneete.

18 Nĩngũkuumbũrĩra maũndũ marĩa andũ oogĩ maanoiga,

marutĩĩtwo nĩ maithe maao,

matekũmahitha ũndũ o na ũmwe.

19 No o oiki maatũũraga bũrũriinĩ wao;

gũtiarĩ mũrũũrĩrĩ wa gũtũma matigane na Ngai.

20 Mũndũ ũrĩa ũhinyagĩrĩria arĩa angĩ

atangĩkaga matukũ maake moothe.

21 Mĩgambo ya kũmwĩkĩra guoya nĩ yo aiguaga matũinĩ maake,

atuunyani mamũũkagĩrĩra hĩndĩ ĩrĩa aterĩgĩrĩire.

22 We ndeetĩkagia atĩ nĩakoima ndumainĩ;

oonaga eetereirwo no gĩkuũ.

23 Kĩimba gĩake gĩgaatuĩka irio cia nderi;

nĩoĩ atĩ marigĩrĩrio maake no kwanangwo.

24 Kĩeha na kĩmako imwĩkagĩra guoya;

imũũkagĩrĩra o ta mũthamaki wĩhaarĩirie gũthiĩ mbaarainĩ.

25 Nĩ tondũ nĩakũnjĩire Ngai ngundi,

na nĩatuĩte kũremera Mwene Hinya Wothe.

26-27 Nĩ mwĩtĩi na nĩ mũremi;

anyiitaga ngo yake oomĩĩtie kĩongo, akarũe na Ngai.

28 Mũndũ ũcio atũũraga matũũrainĩ matiganĩirio,

nyũmbainĩ ĩtangĩtũũrwo nĩ andũ,

cierekeire gũtuĩka ciĩgĩĩgĩ.

29 Ndangĩtũũra e mũtongu;

ũtonga wake ndũngĩtheerema,

ndangĩgĩa na mĩri bũrũriinĩ,

30 na ndangĩhota gũthengera gĩkuũ.

Ahaana o ta mũtĩ ũrĩa honge ciaguo icinĩĩtwo nĩ mwaki

na mahũa maguo moombũrĩĩtwo nĩ rũhuuho.

31 Tanĩagĩtige kwĩheenia akĩiga mwĩhoko wake ũũruinĩ,

tondũ ũũru nĩguo ũgaatuĩka mũcaara wake.

32 Akaahooha o ta mũtĩ hĩndĩ yake ĩtarĩ nginyu,

na oome o ta rũhonge rũrĩa rũtacookaga kũrura rĩngĩ.

33 Akaahaana o ta mũthabibũ ũrĩa thabibũ ciaguo ciitĩkaga itaaneerua,

kana ta mũtamaiyũ ũrĩa ũitaga kĩro kĩaguo.

34 Imaramari itikaagĩa na mbeũ,

na mwaki nĩũgaacina nyũmba iria ciakĩĩtwo na mahaki.

35 Acio nĩ o andũ arĩa mathugundaga mathĩĩna, na meekaga ũũru;

ngoro ciao ciyũire o maheeni matheri.”

Mĩario ya Ayubu

1 Naake Ayubu agĩcookia atĩrĩ,

2 “Nĩnjiguĩte ciugo nyingĩ ta icio.

Kaĩ inyuothe mũrĩ oomanĩrĩria a kũiguĩrwo tha-ĩ!

3 Kaĩ ciugo cia kũhũhũũtĩka itegũthira?

Nĩ kĩĩ kĩramũhatĩrĩria mũthiĩ o na mbere kwaria?

4 Mũngĩrĩ handũ haakwa-rĩ,

no njuge ũrĩa wothe mũroiga;

no njarie ciugo cia kũmũtuura,

na ndĩmũnyũrũrie.

5 No ndĩmũũmĩrĩrie na mataaro,

na horahorie ruwo rwanyu na mĩario yakwa.

6 “O na ndaria, ruwo rwakwa rũtirahorahora;

o na ndakira, rũtirandigithĩria.

7 Ngai ahũũrĩĩte kĩhinyio;

nĩanangĩĩte mũciĩ wakwa wothe.

8 Ũrĩa eekĩĩte mwĩrĩ ũyũ wakwa,

nĩ ũira wa ũrĩa anyariirĩĩte.

Ũhinyaru wakwa nĩũtũmĩĩte

andũ moone atĩ nĩnjĩhĩĩtie.

9 “Ngai andambururangĩĩte na maraakara;

angũũrĩire maitho e na rũthũũro.

10 Andũ nĩmaanyararĩĩte;

moonganĩĩte hamwe manjũkĩrĩre;

marahũũra thĩa matarĩ na tha.

11 Ngai anenganĩrĩĩte kũrĩ andũ ooru;

anjikĩĩtie mookoinĩ ma andũ aaganu.

12 Ndatũũraga hooreire,

no Ngai akĩnyiita mũmero,

akĩĩbebera na akĩĩmemenda.

Ngai areruta cabaa na niĩ;

13 aranjikĩria mĩguĩ na mĩena yothe;

atheeceete akandiihia;

ndaranjiguĩra tha o na haniini.

14 Ngai atheecangĩĩte maita maingĩ;

ahithũkĩire o ta mũũthigari ũrĩ na rũthũũro rũingĩ.

15 “Ndĩracakaya ndĩhumbĩĩte nguo ya ikũnia,

na ngaikara haaha rũkũngũinĩ hootekeete.

16 Ndĩrĩĩte nginya maitho magatuunĩha;

ndĩroona o marundurundu.

17 No niĩ ndirĩ ũũru njĩkĩĩte,

na ihooya rĩakwa kwĩ Ngai rĩtirĩ na ũcuuke.

18 “We thĩ, ndũgakũnĩkĩre mahĩtia marĩa njĩkĩĩtwo;

ndũkaareke kĩrĩro gĩakwa ngĩrĩrĩra ihooto ciakwa gĩkirio!

19 Kũũria igũrũ kũrĩ mũndũ

ũrĩ mwena wakwa ũranjarĩrĩria.

20 Araata aakwa marathekerera,

niĩ na niĩ ngarĩrĩra Ngai.

21 Ũcio ũrĩ mwena wakwa-rĩ,

ararũĩrĩra kĩhooto gĩakwa mbere ya Ngai

o ta mũndũ akĩarĩrĩria mũraatawe.

22 Mĩaka yakwa nĩgũthira ĩrathira,

ndĩthiĩre kũrĩa itakoima.