Author: admin

1 “Na rĩĩrĩ, mũnabii kana mũtaũri wa irooto ahota kũratha ũhoro, kana aringe kĩama,

2 nĩ geetha amũguucĩrĩrie mũthaathaiye na mũtungatĩre ngai iria mũtooĩ, o na mũtarĩ mwathaathaiya hĩndĩ ĩngĩ. O na ũrathi ũcio wake, kana kĩrooto gĩake ingĩkahinga-rĩ,

3 mũtikaanarũmbũyanie naake o na haniini. Nĩ gũkorwo nĩ MWATHANI Ngai wanyu ũramũhũthĩra nĩguo amũgerie inyuĩ nĩ geetha amenye kana nĩmũmwendeete na ngoro yothe na muoyo wothe.

4 Inyuĩ-rĩ, rũmagĩrĩraai MWATHANI na mũmũtĩĩage; mwathĩkagĩreei na mũhingagie maathani maake; mũthaathayagiei na mũtũũre mũmwĩhokeete.

5 Na rĩĩrĩ, mũnabii, kana mũtaũri wa irooto o wothe, ũrĩa ũngĩmwĩra mũremere MWATHANI ũrĩa wamũrutire Misiri kũrĩa mwatũũraga mwĩ ngombo-rĩ, mũũragageei. Mũndũ ta ũcio-rĩ, nĩ mwaganu, na nĩkwenda arenda kũmũtigithania na mũtũũrĩre ũrĩa MWATHANI Ngai wanyu amwathĩĩte mũtũũre. Andũ a mũthemba ta ũcio maagĩrĩirwo nĩkũũragwo nĩ geetha mwehererwo nĩ ũũru ũcio.

6 “Atĩrĩĩrĩ, mũrũ wa maitũguo, mũũrũguo, mwarĩguo, mũtumia waku ũrĩa wendeete, o na kana mũraataguo ũrĩa wendeete mũno, ahota gũkũheenereria na hitho ũthaathaiye ngai ingĩ iria wee na maithe maanyu mũtarĩ mwathaathaiya.

7 Ũmwe wao-rĩ, ahota gũkũũmĩrĩria ũgathaathaiye ngai cia andũ arĩa makũrigiicĩirie, o na kana cia andũ arĩa makũraihĩrĩirie.

8 Ndũkaaneetĩkĩre ũhoro ũcio wake, ndũkaanamũthikĩrĩrie, ndũkaanamũiguĩre tha, ndũkaanamũcaaĩre, kana ũmũgitĩre.

9 Mũndũ ta ũcio-rĩ, nĩoragagwo! Wee nĩ we ũgaakorwo wĩ wa mbere kũmũikĩria ihiga, nao andũ acio angĩ oothe marũmĩrĩre.

10 Mũkaamũhũũra na mahiga kinya akue! Nĩ gũkorwo nĩagaakorwo agereetie gũkũguucĩrĩria ũtigane na MWATHANI Ngai waku, ũrĩa wamũrutire Misiri kũrĩa mwatũũraga mwĩ ngombo.

11 Nao andũ oothe a Isiraeli nĩmakaigua ũrĩa gũgaakorwo gwĩkĩkĩĩte, metigĩre, na hatigaacooka kuoneka mũndũ o na ũmwe ũngĩenda gwĩka ũndũ mũũru ta ũcio.

12 “Hĩndĩ ĩrĩa mũgaakorwo mũtũũrĩĩte matũũrainĩ marĩa MWATHANI Ngai wanyu akaamũhe, na hĩndĩ ĩyo mũigue

13 atĩ andũ amwe aaganu a bũrũri wanyu nĩmaguucĩrĩirie andũ a itũũra rĩao magathaathaiye ngai matarĩ maathaathaiya;

14 mũngĩkaigua mũhuuhu ta ũcio, mũkaũtuĩria wega. Mũngĩkaamenya atĩ ũhoro ũcio nĩ wa ma-rĩ,

15 mũkaahũũra andũ a itũũra rĩu mũmoorage o hamwe na mahiũ maao. Narĩo itũũra rĩu mũkaarĩananga o biũ.

16 Nacio indo ciothe cia andũ arĩa matũũraga kuo, mũgaacicookanĩrĩria hamwe gatagatĩ ga itũũra. Mũcooke mũcine itũũra rĩu na indo iria irĩ kuo ta igongoona harĩ MWATHANI Ngai wanyu. No mũhaka rĩgaatigwo rĩrĩ maganjo tene na tene, na rĩtikaanacooke gwakwo.

17 Mũtikaaneigĩre kĩndũ o na kĩmwe kĩa indo iria ciamũrĩĩtwo cia kũniinwo, nĩ geetha MWATHANI agaatigana na maraakara maake me gwakana ta mwaki na amũiguĩre tha. Ningĩ nĩakaamwĩka maũndũ ma ũtugi, na atũme mwongerereke o ta ũrĩa eerĩire maithe maanyu,

18 mũngĩathĩkĩra mawatho maake moothe marĩa ndamwatha ũũmũũthĩ, na mwĩkage ũrĩa oonaga kwagĩrĩire.

Mũtugo ũrĩa ũtaagĩrĩire wa gũcakaya

1 “Na rĩĩrĩ, inyuĩ mũrĩ andũ a MWATHANI Ngai wanyu. Nĩ ũndũ ũcio, mũtikaanetemenge mĩĩrĩ yanyu, kana mwenjwo hĩndĩ ĩrĩa yothe mũgũcakaya nĩ ũndũ wa mũndũ mũkuũ.

2 Nĩ ũndũ mũrĩ a MWATHANI Ngai wanyu, na amũthuurĩĩte kuuma ndũũrĩrĩinĩ iria ingĩ itũũraga thĩ nĩ geetha mũtuĩke andũ aake kĩũmbe.

Nyamũ iria irĩ mũgiro na iria itarĩ mũgiro

3 “Mũtikaanarĩe kĩndũ o gĩothe kĩrĩa MWATHANI oigĩĩte kĩ mũgiro.

4 Nyamũ iria mũrĩrĩaga nĩcio ici: ng’ombe, ng’ondu, mbũri,

5 thwariga, mbũri cia gĩthaka, thiiya cia irĩmainĩ, ndoo, ngondi, o na thwara.

6 Ningĩ nyamũ ciothe irekanĩĩtie mahũngũ o na icookagia ithagumia-rĩ, icio o nacio no mũrĩage.

7 No rĩĩrĩ, thĩinĩ wa nyamũ iria icookagia ithagumia, o na kana iria irĩ na mahũngũ matũkanĩĩte, ici nĩcio mũtaagĩrĩirwo nĩkũrĩa: ngamĩĩra, mbũkũ, o na gĩtoore. Icio o nacio irĩ mũgiro harĩ inyuĩ; icio nĩicookagia ithagumia no itirĩ mahũngũ matukanĩĩte.

8 Mũtikaanarĩe ngũrũe, nĩ ũndũ o na gũtuĩka mahũngũ maayo nĩmarekanĩĩtie ndĩcookagia ithagumia, tondũ ũcio o nayo ĩrĩ mũgiro. Mũtikaanarĩe nyama cia nyamũ icio, kana mũhuutie ciimba ciacio.

9 “Thamaki o yothe ĩ na mathagu manyiitanĩĩte na ĩ na ngũũcĩ mĩrĩageei.

10 Nyamũ o yothe ĩikaraga maaĩinĩ na ndĩrĩ na mathagu manyiitanĩĩte kana ngũũcĩ, mũtikaanamĩrĩe; ĩyo ĩrĩ mũgiro harĩ inyuĩ.

11 “Mwahota kũrĩa nyoni cia mĩthemba yothe iria itarĩ mũgiro.

12-18 No rĩĩrĩ, ĩno nĩ yo mĩthemba ya nyoni ĩrĩa mũtarĩrĩaga; thũmbaina, ndiiyũ, gĩthũũya meeru, karwĩgĩ ka nyoni, rwĩgĩ, karũgũrũ, mahuru, nyaga, kĩhigoigũ, gĩthima mbũri, hũngũ, ngoru, ndundu, thambĩri, gakuua ũrogi, nderi, cua, cũũcũ wa njoka, karogi ngunũ, hudihuda, na rũhuuhu.

19 “Ningĩ tũnyamũ tũrĩa tũtambaga twĩ na mathagu na tũũmbũkaga, tũu tuothe twĩ na mũgiro mũtikaanatũrĩe.

20 No rĩĩrĩ, mwahota kũrĩa tũnyamũ tũrĩa tũtarĩ mũgiro.

21 “Mũtikaanarĩe nyamũ o na ĩrĩkũ ĩkuĩte gĩkuũ kĩa ndũire. No rĩĩrĩ, mwahota kũmĩhe andũ arĩa mũtũũranĩĩtie nao mamĩrĩe, o na kana mwenderie andũ a ndũũrĩrĩ ingĩ. No inyuĩ-rĩ, mwĩ rũũrĩrĩ rũthuure rwa MWATHANI Ngai wanyu. Ningĩ mũtikaanaruge koori kana kagondu na iria rĩa nyina.

Watho wĩgiĩ gĩcunjĩ gĩa ikũmi

22 “No mũhaka mũigage mwanya gĩcunjĩ gĩa ikũmi kĩa maciaro ma mĩgũnda yanyu mwaka o mwaka.

23 Na rĩĩrĩ, gĩcunjĩ kĩanyu gĩa ikũmi kĩa ngano, ndibei, maguta ma mĩtamaiyũ, na kĩa marigithaathi ma ng’ombe na mbũri mũgaakĩrĩagĩra mbere ya MWATHANI mũrĩ handũ harĩa MWATHANI athuurĩĩte ha gũthaathayagĩrio. Mũgeekaga ũguo nĩ geetha mwĩrute kũhe MWATHANI Ngai wanyu gĩtĩĩo hĩndĩ ciothe.

24 Na rĩĩrĩ, handũ hau ha gũthaathayagĩria hangĩgaakorwo haraihĩrĩirie ũguo atĩ mũtingĩhota gũtwara gĩcunjĩ kĩanyu gĩa ikũmi kĩa indo iria MWATHANI amũraathimĩĩte nacio,

25 mũgaaciendia, mũcooke mũtware mbeeca icio handũ harĩa hamũrĩĩtwo ha gũthaathayagĩria.

26 Mũkaagũra na mbeeca icio o kĩrĩa mũngĩyendera; ng’ombe, ng’ondu, ndibei, na njoohi. Mũgaacirĩa ciothe mũkeneete hamwe na andũ a mĩciĩ yanyu mũrĩ o hau mbere ya MWATHANI Ngai wanyu.

27 “Mũtikaanatiganĩrie Alawii arĩa matũũraga matũũrainĩ maanyu, nĩ gũkorwo acio matirĩ igai rĩao.

28 Na rĩĩrĩ, o mĩaka ĩtatũ yathira-rĩ, mũkoonganagia gĩcunjĩ gĩa ikũmi kĩa magetha maanyu, mũkamaiga matũũrainĩ maanyu.

29 Irio icio ciothe nĩ cia kũhũthagĩrwo nĩ Alawii nĩ ũndũ matirĩ igai rĩao, o ũndũ ũmwe na andũ a ndũũrĩrĩ, ciana cia ngoriai, na atumia a ndigwa arĩa matũũranagia na inyuĩ. Acio-rĩ, marĩũkaga makarĩa makahũũna. Ĩkagaai ũguo na MWATHANI Ngai wanyu nĩarĩmũraathimaga mawĩrainĩ moothe marĩa mũrĩrutaga.

Mwaka wa mũgwanja

1 “Na rĩĩrĩ, o mĩaka mũgwanja yathira, nĩmũrĩrekagĩra andũ arĩa marĩ na mathiirĩ maanyu.

2 Mũbango ũcio wa kũrekanĩra mathiirĩ ũrĩthiaga ta ũũ: Mũisiraeli o wothe nĩarĩrekagĩra Mũisiraeli ũrĩa ũngĩ mbeeca iria amũkombeire; ndakaanagerie kũmwĩtia mbeeca icio, tondũ MWATHANI we mwene nĩarĩĩkĩĩtie kũrekanĩra thiirĩ ũcio.

3 No rĩĩrĩ, thiirĩ ũrĩa mũrũũrĩrĩ arĩkoragwo naguo, nĩmũrĩmwĩtagia, no mũtikaanarandũre Mũisiraeli ũrĩa ũngĩ thiirĩ.

4 “MWATHANI Ngai wanyu nĩarĩmũraathimaga mwĩ bũrũri ũcio ekũmũhe ũtuĩke wanyu. Na rĩĩrĩ, hatirĩ mũndũ o na ũmwe wanyu ũrĩtuĩkaga mũthĩĩni

5 angĩkorwo nĩmũrĩathĩkagĩra na mũrũmagie maũndũ moothe marĩa ndamwatha ũũmũũthĩ.

6 MWATHANI nĩarĩmũraathimaga o ta ũrĩa eeranĩire atĩ nĩageeka. Nĩmurĩkombithagia ndũũrĩrĩ nyingĩ indo, no inyuĩ mũtirĩkombaga kuuma kũrĩ cio; nĩmũrĩathaga ndũũrĩrĩ nyingĩ, nocio itirĩmwathaga.

7 “Na rĩĩrĩ, hangĩgaakorwo na Mũisiraeli ũbatairio nĩ kĩndũ itũũrainĩ o rĩothe bũrũriinĩ ũcio MWATHANI Ngai wanyu ekũmũhe-rĩ, mũtikaanatuĩke eyendi mwage kũmũteithia na kĩrĩa abatairio nĩkĩo.

8 Mũkaamũtaanahĩra na mũmũkombithie kĩrĩa gĩothe abatairio nĩkĩo.

9 Menyereraai mũtikaanage kũmũkombithia kĩndũ tondũ mwaka wa kũrekanĩra mathiirĩ wĩ hakuhĩ. Mũtikaanareke meciiria macio mooru moone handũ ngoroinĩ cianyu. Mũngĩkaarega kũmũhe kĩrĩa abatairio nĩkĩo, mũthĩĩni ũcio nĩagaakaĩra MWATHANI, na inyuĩ mũtuĩke nĩmwĩhĩĩtie.

10 Mũheyageei mũtekũringĩrĩrio na mũtarĩ na mwĩyendo, na ũndũ ũcio nĩũrĩtũmaga MWATHANI amũraathimage maũndũinĩ moothe marĩa mũrĩĩkaga.

11 Atĩrĩĩrĩ, gũtikaaga Aisiraeli athĩĩni na abataru bũrũriinĩ, nĩkĩo ndamwatha mũmataanahagĩre.

Maũndũ marĩa mũrĩĩkaga ngombo

12 “Na rĩĩrĩ, Aisiraeli aanyu, arume kana andũ a nja, mangĩkeeyendia kũrĩ inyuĩ ta ngombo, makaamũtungatagĩra mĩaka ĩtandatũ. Mwaka wa mũgwanja wakinya-rĩ, mũkamarekereria mageethiĩra matarĩ na kĩndũ mekũrĩha.

13 Na rĩĩrĩ, hĩndĩ ĩrĩa mũkaamarekereria, mũtikaanareke mathiĩ matarĩ na kĩndũ.

14 Mũkaamũtuga na indo iria MWATHANI amũraathimĩĩte nacio ta ng’ondu, ngano, na ndibei.

15 Ririkanaai atĩ o na inyuĩ mwatũũraga mwĩ ngombo bũrũriinĩ wa Misiri, naake MWATHANI Ngai wanyu akĩmũruta kuo; nĩkĩo ndamwatha ũguo ũũmũũthĩ.

16 “Na rĩĩrĩ, ngombo yaku ĩngĩgaakwĩra atĩ ndĩkwenda gũthiĩ nĩ ũndũ wa ũrĩa ĩkwendeete wee mwene na andũ a mũciĩ waku,

17 ũkaamĩtwara mũrangoinĩ wa nyũmba yaku, ũmĩtũrĩre gũtũ kwayo na mũkuha ho, na kuuma hĩndĩ ĩyo ĩgĩtuĩke ngombo yaku matukũ maayo moothe. O nayo ngombo yaku ya mũndũ wa nja ũkaamĩĩka o ũguo.

18 No rĩĩrĩ, mũtikaanoone arĩ ũndũ wĩ hinya kũrekereria ngombo cianyu, nĩ ũndũ nĩimũtungatĩĩte mĩaka ĩtandatũ, na mũraciheaga nuthu ya mũcaara wa ndungata cia kwandĩkwo. Mweka ũguo, MWATHANI Ngai wanyu nĩarĩmũraathimaga maũndũinĩ moothe marĩa mũrĩĩkaga.

Marigithaathi ma ng’ombe na ma ng’ondu

19 “Atĩrĩĩrĩ, marigithaathi moothe ma njamba marĩ ma ng’ombe kana ma ng’ondu cianyu, mũrĩmaamũragĩra MWATHANI Ngai wanyu. Mũtikaanarutithie wĩra o na ũrĩkũ marigithaathi ma ng’ombe, na mũtikaanenje marigithaathi macio ma ng’ondu guoya.

20 Mwaka o mwaka, inyuĩ na andũ a mĩciĩ yanyu mũrĩrĩagĩra marigithaathi macio mbere ya MWATHANI, o handũ harĩa MWATHANI athuurĩĩte ha gũthaathayagĩrio.

21 No rĩĩrĩ, mangĩgaakorwo marĩ na kaũũgũ, ta gũthua, ũtumuumu, kana kaũũgũ kangĩ o goothe-rĩ, mũtikaanamarutĩre MWATHANI Ngai wanyu ta igongoona.

22 Marigithaathi ma mũthemba ta ũcio mũkaamaarĩagĩra mĩciĩinĩ yanyu, inyuothe mũndũ wĩ thaahu o na ũtarĩ, o ta ũrĩa mũngĩrĩa thwariga kana thiiya.

23 No rĩĩrĩ, mũtikaanarĩe thakame yamo, no mũhaka mũkaamĩitaga thĩ o ta ũrĩa maaĩ maitagwo.

Bathaka

1 “Menyagĩrĩraai mweri wa Abibu, na mũkũngũagĩre Bathaka ya MWATHANI Ngai wanyu, nĩ gũkorwo mweriinĩ ũcio nĩguo MWATHANI Ngai wanyu aamũrutire bũrũri wa Misiri kũrĩ o ũtukũ.

2 Mũrĩthiaga handũ o harĩa MWATHANI athuurĩĩte ha gũthaathayagĩrio mũgathĩnja ng’ondu ĩmwe yanyu kana ng’ombe ĩrĩ irio cia Bathaka nĩ ũndũ wa kũhe MWATHANI Ngai wanyu gĩtĩĩo.

3 Hĩndĩ ya kũrĩa ndĩa ĩyo mũtikaarĩanagĩrie nyamũ icio na mĩgate ĩrĩa mĩĩkĩre ndaawa ya kũimbia. Mũrĩrĩaga mĩgate ĩrĩa ĩtarĩ mĩĩkĩre ndaawa ya kũimbia mĩthenya mũgwanja, o ta ũrĩa mwekire rĩrĩa mwoimire bũrũri wa Misiri na ihenya. Rĩagaai mĩgate ĩyo ĩrĩa ĩrĩĩtagwo mĩgate ya mathĩĩna, nĩ geetha matukũ moothe ma muoyo wanyu mũtũũre mũririkanaga mũthenya ũrĩa mwoimire Misiri, kũndũ kwarĩ na mathĩĩna.

4 Hatigaakoragwo mũndũ o na ũmwe wĩ na ndaawa ya kũimbia mĩgate gwake mũciĩ handũ ha mĩthenya mũgwanja bũrũriinĩ wanyu wothe. Na rĩĩrĩ, nyamũ cia igongoona iria irĩthĩnjagwo hwaĩinĩ wa mũthenya wa mbere, icio irĩrĩagwo o ro ũtukũ ũcio, hatikaararage kĩndũ.

5-6 “Igongoona rĩa Bathaka rĩrĩthĩnjagĩrwo o harĩa MWATHANI aamũrĩĩte ha gũthaathayagĩrio, na rĩtigathĩnjagĩrwo handũ hangĩ o na hamwe bũrũriinĩ ũcio MWATHANI ekũmũhe. Mũrĩrĩthĩnjaga o hwaĩinĩ riũa rĩgĩthũa, o ihinda ta rĩrĩa mwoimire Misiri.

7 Nacio nyama icio mũgaacitherũkia ikahĩa, mũgacirĩĩra o handũ hau hathuurĩĩtwo ha gũthaathayagĩrio, mũkarooka kũinũka o mũndũ mũciĩ gwake.

8 Mĩthenya ĩtandatũ mũrĩrĩaga mĩgate ĩtarĩ mĩĩkĩre ndaawa ya kũimbia, naguo mũthenya wa mũgwanja mũkoongana gũthaathaiya MWATHANI Ngai wanyu, na mũthenya ũcio mũtikaarutage wĩra o na ũrĩkũ.

Thigũkũ ya Magetha

9 “Ningĩ mũtarage ciumia mũgwanja kuuma mũthenya ũrĩa mũkaambagĩrĩria kũgetha ngano,

10 mũcooke mũgĩe na thigũkũ ya gũkũngũĩra magetha, mũreehere MWATHANI Ngai wanyu iheeo cianyu cia kwĩyendera kũringana na ũrĩa MWATHANI amũraathimĩĩte.

11 Hĩndĩ ĩyo mũgĩkene mwĩ mbere ya MWATHANI, o hamwe na ciana cianyu, ndungata cianyu, Alawii, andũ a ndũũrĩrĩ, ciana cia ngoriai, na atumia a ndigwa arĩa matũũraga matũũrainĩ maanyu. Ũndũ ũyũ mũrĩwĩkagĩra o handũ hamwe harĩa hathuurĩĩtwo ha gũthaathayagĩrio.

12 Menyagĩrĩraai mũno kũrũmagĩrĩra mawatho maya na mũtikaanariganĩrwo atĩ mwarĩ ngombo bũrũriinĩ wa Misiri.

Thigũkũ ya Ithũnũ

13 “Thuutha wa kũhũũra ngano yanyu o na kũhĩha ndibei yanyu, hĩndĩ ĩyo mũgakũngũĩra Thigũkũ ya Ithũnũ mĩthenya mũgwanja.

14 Mũgakena mwĩ na ciana cianyu, ndungata cianyu, andũ a ndũũrĩrĩ, Alawii, ciana cia ngoriai na atumia a ndigwa arĩa matũũraga matũũrainĩ maanyu.

15 Tĩĩyagaai MWATHANI Ngai wanyu na ũndũ wa gũkũngũĩra thigũkũ ĩno mĩthenya mũgwanja o harĩa MWATHANI amũrĩĩte ha gũthaathayagĩrio. Na inyuĩ nĩmũrĩkenaga tondũ wa ũrĩa MWATHANI arĩkoragwo araathimĩĩte magetha maanyu o na wĩra wa mooko maanyu.

16 “Arũme oothe a bũrũri wanyu marĩũkaga handũ hau MWATHANI aamũrĩĩte mahinda matatũ o mwaka kũmũthaathaiya. Mahinda macio nĩ Bathaka, Thigũkũ ya Magetha, na Thigũkũ ya Ithũnũ. O mũndũ mũrũme nĩarĩreehage kĩheeo gĩake,

17 o ta ũrĩa ekũhota kũringana na ũrĩa araathimĩĩtwo nĩ MWATHANI Ngai wanyu.

Kuona kĩhooto nĩkĩarũmĩrĩrwo

18 “Thuuragaai atuithania na atongoria itũũra o itũũra rĩrĩa MWATHANI Ngai wanyu ekũmũhe o ta ũrĩa mĩhĩrĩga yanyu ĩtariĩ. Acio nĩ o marĩtuithanagia andũ na kĩhooto.

19 Matikaanahotomagie ciira, na matikaanathuutũkanie magĩtuithania maciira, o na kana maamũkĩre mahaki, nĩ gũkorwo mahaki mahingaga maitho ma andũ arĩa oogĩ, o nginyagia ciira wa arĩa ehokeku ũgathũũkio.

20 Rũmagĩrĩraai ũndũ ũrĩa wa ma na wa kĩhooto nĩguo mũhote kwĩgwatĩra bũrũri ũrĩa MWATHANI Ngai wanyu ekũmũhe na mũtũũre kuo hĩndĩ ndaaya.

21 “Rĩrĩa mũgaathondeka kĩgongoona kĩa MWATHANI Ngai wanyu, mũtikaanaige mũhianano wa ngai ĩrĩa ĩĩtagwo Ashera mwenainĩ wa kĩgongoona kĩu,

22 kana mũrũũgamie gĩtugĩ kĩa ihiga gĩa gũthaathaiyo ta ngai ya mũhianano, tondũ MWATHANI Ngai wanyu nĩathũire ngai icio.

1 “Mũtikaanarutĩre MWATHANI Ngai wanyu ng’ombe kana ng’ondu i na kaũũgũ o na karĩkũ; MWATHANI nĩathũire ũndũ ũcio.

2 “Na rĩĩrĩ, mũngĩkaigua mũndũ mũrũme kana mũndũ wa nja ũhĩtĩirie MWATHANI, akaagarara kĩrĩĩkanĩro gĩake,

3 agathaathaiya na agatungatĩra ngai ingĩ, kana akahooya riũa, mweri, kana njata, na ũguo tiguo MWATHANI aathanĩĩte gwĩkagwo;

4 mũngĩkaigua ribooti ya mũthemba ta ũcio, mũkaamĩtuĩria na kinyi. Ũndũ ũcio ũngĩgaakorwo nĩ wa ma atĩ wĩhia ũcio nĩwĩkĩĩtwo Isiraeli,

5 mũkooya mũndũ ũcio mũmuumie nja ya itũũra, mũmũhũũre na mahiga o kinya akue.

6 Mũndũ ũcio no ooragwo kũngĩkorwo he na ũira ũheanĩĩtwo nĩ andũ eerĩ kana atatũ. Ndakaanooragwo angĩkorwo no mũndũ ũmwe ũheanĩĩte ũira wake.

7 Andũ arĩa maheanĩĩte ũira wake nĩ o magaakorwo marĩ a mbere kũmũikĩria mahiga, andũ acio angĩ nao macooke marũmĩrĩre. Ũguo nĩguo mũkeeheria ũndũ ũcio mũũru gatagatĩinĩ kaanyu.

8 “Maciira mamwe mahota gũkorwo marĩ na hinya gũtuithanio nĩ atuithania arĩa mũthuurĩĩte, ta ma ihooto cia andũ cia mũthemba ũmwe kana ũrĩa ũngĩ, gũtiihanio, kana maciira megiĩ kũũragana mũndũ akĩendaga kana atekwenda. Ũndũ ta ũcio ũngĩkooneka, mũgaathiĩ handũ harĩa MWATHANI Ngai wanyu athuurĩĩte ha gũthaathayagĩrio,

9 mũheane ũhoro wa ciira ũcio kũrĩ athĩnjĩri Ngai a mũhĩrĩga wa Lawi na kũrĩ mũtuithania ũrĩa ũgaakorwo arĩ wĩrainĩ hĩndĩ ĩyo, mũreke matuithanie ciira ũcio.

10 Nao nĩmagaatuithania ciira, na inyuĩ mũgĩcooke mwĩke o ta ũrĩa makaamũtaara.

11 Ĩtĩkaanagiai na matua maao na mũrũmagĩrĩre ũrĩa wothe marĩmũtaaraga.

12 Mũndũ ũrĩa ũgaakararia mũthĩnjĩri Ngai, kana mũtuithania ũrĩa ũgaakorwo arĩ wĩrainĩ, mũndũ ũcio no mũhaka akooragwo; ũguo nĩguo mũkeeheria ũũru ũcio thĩinĩ wa Isiraeli.

13 Nao andũ oothe nĩmakaigua ũhoro ũcio, metigĩre, na hatigaacooka kuoneka mũndũ ũgeeka ũndũ ta ũcio rĩngĩ.

Ũtaari wĩgiĩ mũthamaki

14 “Rĩu-rĩ, mwarĩĩkia kwĩgwatĩra bũrũri ũrĩa MWATHANI Ngai wanyu ekũmũhe na mũũtũũre, hĩndĩ ĩyo nĩmũkaigua atĩ nĩmũbatarĩĩtio nĩ mũthamaki ta ndũũrĩrĩ iria ingĩ.

15 Menyereraai mũno atĩ mũndũ ũrĩa mũgaathuura atuĩke mũthamaki, agaakorwo no ũrĩa MWATHANI we mwene athuurĩĩte. No mũhaka agaakorwo arĩ ũmwe wa andũ aanyu, mũtikaanathuure mũrũũrĩrĩ atuĩke mũthamaki wanyu.

16 Mũthamaki nĩemenyerere ndakaaneigĩre mbarathi nyingĩ nĩ ũndũ wa ita ciake, na ndakaanatũme andũ mathiĩ Misiri makagũre mbarathi kuo, tondũ MWATHANI nĩoigĩĩte atĩ andũ aake matikaanacooke Misiri rĩngĩ.

17 Ningĩ mũthamaki ndakaanagĩe na atumia aingĩ, tondũ ũndũ ũcio wahota gũtũma atigane na MWATHANI, na ndakaanetongie na thahabu kana betha.

18 Hĩndĩ ĩrĩa agaikarĩra gĩtĩ gĩake gĩa ũthamaki, nĩakeegĩĩra na ibuku rĩa mawatho ma Ngai o na rĩa moorutani maguo, maandĩkĩĩtwo kuuma Wathoinĩ guo mwene ta ũrĩa matũire maigĩĩtwo nĩ athĩnjĩri Ngai a mũhĩrĩga wa Lawi.

19 Narĩo ibuku rĩu arĩigage hakuhĩ naake na arĩthoomage matukũ moothe ma muoyo wake, nĩ geetha amenyagĩrĩre gũtĩĩa MWATHANI na gwathĩkagĩra maũndũ moothe o ta ũrĩa maandĩkĩĩtwo thĩinĩ wa ibuku rĩu.

20 Ũndũ ũcio nĩũkamũteithagia ndageetĩĩe agĩciiria atĩ we nĩ mwagĩrĩru gũkĩra Aisiraeli arĩa angĩ, o na nĩ geetha ndakaanage gwathĩkĩra watho wa MWATHANI. Hĩndĩ ĩyo nĩagathamaka mĩaka mĩingĩ, o nacio njiarwa ciake nĩigaathamakĩra Isiraeli ihinda iraaya.

Igai rĩa athĩnjĩri Ngai

1 “Na rĩĩrĩ, mũhĩrĩga wothe wa Lawi, na nĩguo wa athĩnjĩri Ngai, ndũkaagĩa na igai Isiraeli guothe; ũkaarĩaga iheeo na magongoona mangĩ marĩa marutĩirwo MWATHANI.

2 Ndũkeegwatĩra igai rĩa gĩthaka ta mĩhĩrĩga ĩrĩa ĩngĩ, igai rĩaguo nĩ gĩtĩĩo gĩa gũtuĩka athĩnjĩri Ngai a MWATHANI o ta ũrĩa MWATHANI aawĩrĩire.

3 “Hĩndĩ ĩrĩa yothe mũkũruta magongoona ma ng’ombe kana ng’ondu, athĩnjĩri Ngai maagĩrĩirwo nĩkũheagwo guoko, thĩa cierĩ na nyama cia nda.

4 Ningĩ mũmaheage maciaro ma mbere ma ngano, ndibei, maguta ma mĩtamaiyũ, o na mũmaheage guoya wa ng’ondu iria cienjwo rĩa mbere.

5 MWATHANI nĩathuurĩĩte kuuma mĩhĩrĩga yanyu yothe mũhĩrĩga wa Lawi ũmũtungatagĩre ta athĩnjĩri Ngai tene na tene.

6 “Mũlawii o wothe angĩkeenda gũtungata, ahota kuuma itũũrainĩ o rĩothe rĩa matũũra ma Isiraeli athiĩ o handũ harĩa MWATHANI agaathuura ha gũthaathayagĩrio,

7 atungate ta mũthĩnjĩri wa MWATHANI Ngai wake, o ta Alawii arĩa angĩ matungataga ho.

8 Naake nĩakaagayagĩrwo igai rĩake rĩa irio rĩiganaine na rĩa athĩnjĩri Ngai arĩa angĩ, na no eigagĩre indo iria arĩheagwo nĩ andũ a mũciĩ wao.

Gũkaanio mĩtugo ĩtarĩ ya ũngai

9 “Hĩndĩ ĩrĩa mũgaakinya bũrũri ũrĩa MWATHANI Ngai wanyu akaamũhe-rĩ, menyereraai mũtikaanarũmĩrĩre mĩtugo mĩũru ĩrĩa ĩrũmagĩrĩrwo nĩ ndũũrĩrĩ iria itũũraga kuo.

10 Mũtikaanarute ciana ciaku ituĩke magongoona ma gũcinwo na mwaki kĩgongoonainĩ. Hatikaanooneke mũragũri, mũndũ ũkũragũria, mũrogi,

11 kana mũthingi wa ithiitũ. Mũtikaanameetĩkĩrie matuĩrie ũhoro kuuma kũrĩ maroho ma andũ arĩa makuĩte.

12 MWATHANI Ngai wanyu nĩathũire andũ arĩa meekaga maũndũ ta macio marĩ magigi, na nokĩo MWATHANI araingata ndũũrĩrĩ icio ciehere mbere yanyu.

13 Inyuĩ-rĩ, tuĩkaai ehokeku kũna harĩ MWATHANI Ngai wanyu.”

Kwĩrĩrwo mũnabii

14 Musa agĩcooka akiuga atĩrĩ, “Andũ a bũrũri ũrĩa mwathiĩ kwĩgwatĩra maragũraga, o na makaragũria, no inyuĩ MWATHANI ndamwĩtĩkĩrĩĩtie mwĩke ũguo.

15 MWATHANI nĩakaamũtũmĩra mũnabii ũhaana o ta niĩ kuuma kũrĩ andũ aanyu, na ũcio nĩ we mũgaathĩkagĩra.

16 “Na rĩĩrĩ, mũthenya ũrĩa mwacemanĩĩtie kĩrĩmainĩ gĩa Sinai-rĩ, nĩmwathaithanire mwĩtĩkĩrio mũtikaigue MWATHANI akĩaria rĩngĩ kana muone mwaki ũcio mũnene rĩngĩ, nĩ ũndũ nĩmwetigagĩra mũtigaakue.

17 Naake MWATHANI akĩnjĩĩra atĩrĩ, ‘Ihooya rĩao nĩ rĩega.

18 Nĩngaamatũmĩra mũnabii o ta we kuuma kũrĩ andũ aao; nĩngaamwĩraga ũrĩa akoigaga, naake nĩakaameeraga maũndũ moothe marĩa njathanĩĩte.

19 Mũnabii ũcio akaaragia rĩĩtwainĩ rĩakwa, na nĩngaaherithia mũndũ o wothe ũkaamũkararia.

20 No rĩĩrĩ, mũnabii o wothe ũrĩa ũkoomĩrĩria kwaria ũhoro akĩgwetaga rĩĩtwa rĩakwa itamwathĩĩte eeke ũguo-rĩ, no mũhaka akooragwo. Ũguo noguo mũnabii o wothe ũrĩa ũkaarĩa ũhoro akĩgweta rĩĩtwa rĩa ngai ingĩ ageekwo.’

21 “Mwahota kũmaka mũkĩĩyũria ũrĩa mũngĩmenya mũnabii ũtaraaria ũhoro uumĩĩte kwĩ MWATHANI.

22 Mũnabii angĩkaaria na rĩĩtwa rĩa MWATHANI, na ũrĩa wothe aarĩĩtie wage kũhinga, menyaai atĩ ũhoro ũcio nduumĩĩte kwĩ MWATHANI. Mũnabii ũcio aarĩĩtie na mwĩĩro; mũtikaanamwĩtigĩre.”

Matũũra ma kũũrĩrwo

1 “Na rĩĩrĩ, rĩrĩa MWATHANI Ngai wanyu akaaniina ndũũrĩrĩ ciothe kuuma bũrũri ũrĩa akaamũhe, mũrĩĩkie kwĩgwatĩra matũũra na nyũmba ciakuo, na mũkorwo mũtũũrĩĩte kuo-rĩ,

2-3 mũkaagayania bũrũri ũcio ng’ongo ithatũ, na o rũgongo rũkorwo rwĩ na itũũra rĩngĩkinyĩka na ihenya. Matũũra macio nĩmaakũũragĩrwo nĩ mũndũ o wothe ũũraganĩĩte, naake ndakooragwo.

4 Mũndũ angĩkooraga mũndũ ũtarĩ thũ yake atekwenda-rĩ, akooragĩra itũũra o rĩothe rĩa macio nĩ geetha ahonokie muoyo wake.

5 Kwa mũhaano, andũ eerĩ mahota gũtoonya mũtitũ magateme mĩtĩ, na hĩndĩ o ĩyo ithanwa rĩrũke rĩgũthe ũrĩa ũngĩ akue. Mũndũ ũcio woragana nĩorĩre itũũrainĩ rĩmwe rĩa macio nĩguo ahonokie muoyo wake.

6 Nĩ ũndũ itũũra rĩngĩkorwo rĩrĩ o rĩmwe na rũgendo rũkorwo nĩ rũraihu-rĩ, mũndũ wa ũrĩa ũũragĩĩtwo ahota gũteng’eria mũndũ ũcio ũtarĩ mwĩhia amũnyiite amũũrage nĩguo erĩhĩrie. Mũndũ ũcio ndaagĩrĩirwo nĩkũũragwo nĩ gũkorwo ooragĩĩte mũndũ ũcio atekwenda, no ti ũndũ nĩ thũ yake.

7 Kĩu nĩkĩo gĩatũma ndĩmwathe atĩ mũkaamũra matũũra macio matatũ.

8 “Hĩndĩ ĩrĩa MWATHANI Ngai wanyu akaamwaramĩria mĩhaka ya bũrũri wanyu, o ta ũrĩa eerĩire maithe maanyu, na amũhe bũrũri ũrĩa wothe aamwĩrĩire-rĩ,

9 mũgaathuura matũũra mangĩ matatũ. (Akaamũhe bũrũri ũcio mũngĩkaahingia ũrĩa wothe ndamwatha ũũmũũthĩ, na ũndũ wa kwenda MWATHANI Ngai wanyu na gũtũũra mũrũmĩrĩire ũrutani wake.)

10 Mũgeeka ũguo, nĩ geetha andũ matarĩ na ũũru meekĩĩte matikaanooragwo, na mũtikaanatuo eehia nĩ ũndũ wa kũmooragĩra bũrũriinĩ ũrĩa MWATHANI ekũmũhe.

11 “No rĩĩrĩ, mũndũ angĩthũũra mũndũ, amuoherie amũũrage, acooke oorĩre itũũra rĩmwe rĩa matũũra macio nĩguo ndakooragwo,

12 athuuri a itũũra rĩake maagĩrĩirwo nĩgũtũmana agĩĩrwo, mamũneane ooragwo.

13 Mũndũ ũcio-rĩ, matikaanamũigwĩre tha. Mũũragani ũcio no mũhaka athengio thĩinĩ wa Isiraeli, nĩ geetha mũgaatũũra na thaayũ.

Mĩhaka ya tene

14 “Mũtikaanakũũre mũtĩ wa mũhaka wa mũndũ ũrĩa mũrigainie naake, ũrĩa wekĩrirwo o tene bũrũriinĩ ũrĩa MWATHANI Ngai wanyu ekũmũhe.

Ũhoro wĩgiĩ aira

15 “Mũira ũmwe ti mũiganu wa gũtũma mũndũ wĩkĩĩte ũũru atuĩrwo. No mũhaka hakorwo he na aira eerĩ kana atatũ a kuonania atĩ mũndũ nĩahĩtĩĩtie.

16 Na rĩĩrĩ, mũira angĩruta ũira wa maheeni igũrũ rĩa mũndũ ũtahĩtĩĩtie-rĩ,

17 andũ acio eerĩ nĩmathiĩ marũũgame handũ harĩa hathuurĩĩtwo ha gũthaathayagĩrio, matuithanio nĩ athĩnjĩri Ngai na atuithania arĩa me wĩrainĩ hĩndĩ ĩyo.

18 Hĩndĩ ĩyo atuithania matuĩrie ciira ũcio wega. Mangĩona atĩ mũira ũcio nĩarĩĩtie ũira wa maheeni igũrũ rĩa Mũisiraeli ũrĩa ũngĩ,

19 mũira ũcio aagĩrĩirwo nĩkũherithio na ihera o ta rĩrĩa ekwendaga Mũisiraeli ũcio ũngĩ aheeo. Ũguo nĩguo mũkaaniina ũũru ũcio gatagatĩinĩ kaanyu.

20 Ũndũ ũcio nĩũgaatũma arĩa makaũigua metigĩre, na gũtirĩ mũndũ ũgaacooka gwĩka ũndũ mũũru ta ũcio rĩngĩ.

21 Mũtikaanaigue tha maciirainĩ ta macio; muoyo ũriumaga muoyo, riitho riumage riitho, igego riumage igego, guoko kuumage guoko, na kũgũrũ kuumage kũgũrũ.

Ũhoro wĩgiĩ mbaara

1 “Rĩrĩa mũkoimagara mũthiĩ mũkarũe na thũ cianyu, mũngĩkoona ngaari cia mbarathi, mbarathi, na thigari nyingĩ kũmũkĩra, mũtikaanetigĩre; MWATHANI Ngai wanyu ũrĩa wamũhonokirie kuuma Misiri nĩagaakorwo e hamwe na inyuĩ.

2 Na rĩĩrĩ, mũtaanaambĩrĩria kũrũa-rĩ, mũthĩnjĩri Ngai akaarũũgamaga mbere ya thigari agaciĩra atĩrĩ,

3 ‘Andũ a Isiraeli, tathikĩrĩriai! Ũũmũũthĩ nĩmũkũrũa. Nĩ ũndũ ũcio, mũtigeetigĩre thũ cianyu, na mũtikaamake kana mũũrwo nĩ hinya.

4 MWATHANI Ngai wanyu nĩegũkorwo hamwe na inyuĩ, na nĩekũmũhe ũhootani.’

5 “Hĩndĩ ĩyo atongoria nĩmakaarĩria andũ mamoorie atĩrĩ, ‘Harĩ mũndũ wĩ haaha wakĩĩte nyũmba na ndarĩ aramĩraara? Angĩkorwo arĩ ho, nĩainũke. Nĩ ũndũ-rĩ, mũndũ ta ũcio angĩũragĩrwo mbaarainĩ, mũndũ ũngĩ ahota kũraara nyũmba ĩyo yake.

6 Nĩharĩ mũndũ ũhandĩĩte mĩthabibũ mũgũndainĩ wake na ndarĩ aragĩa na mweke wa kũgetha thabibũ ciayo? Angĩkorwo arĩ ho, nĩainũke. Nĩ ũndũ-rĩ, mũndũ ta ũcio angĩũragĩrwo mbaarainĩ, mũndũ ũngĩ ahota gwĩkenia na ndibei ya maciaro ma mũgũnda ũcio.

7 Nĩharĩ mũndũ ũraacĩĩtie nĩ ũndũ wa mũirĩĩtu na ndarĩ aramũhikia? Angĩkorwo mũndũ ta ũcio arĩ ho, nĩainũke. Nĩ ũndũ-rĩ, mũndũ ta ũcio angĩũragĩrwo mbaarainĩ, mũndũ ũngĩ ahota kũhikia mũirĩĩtu ũcio ũrutĩirwo rũraacio.’

8 “Ningĩ atongoria nĩmagaathiĩ na mbere kũũria andũ atĩrĩ, ‘Nĩharĩ mũndũ wanyu ũraigua guoya kana ũũrĩĩtwo nĩ hinya? Angĩkorwo mũndũ ta ũcio arĩ ho nĩainũke. Nĩ ũndũ-rĩ, mũndũ ta ũcio ahota gũtũma arĩa angĩ makue ngoro.’

9 Na rĩĩrĩ, atongoria marĩĩkia kwarĩria thigari-rĩ, anene a ikundi magathuurwo.

10 “Hĩndĩ ĩrĩa mũgaathiĩ gũtharĩkĩra itũũra, mũkaamba kũhe andũ aarĩo mweke wa kwĩneana kũrĩ inyuĩ.

11 Mangĩkaamũhingũrĩra ihingo cia itũũra rĩao, meeneane kũrĩ inyuĩ, mũkaamatua ngombo cianyu na mũmarutithagie wĩra na hinya.

12 No rĩĩrĩ, mangĩkaarega kwĩneana kũrĩ inyuĩ meende o mbaara-rĩ, mũgaathiũrũrũkĩria itũũra rĩu rĩao na thigari cianyu.

13 Na rĩĩrĩ, MWATHANI Ngai wanyu arĩneana mookoinĩ maanyu, mũkooraga arũme oothe arĩa magaakorwo kuo.

14 No rĩĩrĩ, mũkeyoera atumia, ciana, mahiũ, na kĩrĩa kĩngĩ gĩothe gĩgaakorwo itũũrainĩ rĩu. Indo icio ciothe cia thũ cianyu no mũcihũthĩre nĩ ũndũ nĩ MWATHANI ũmũheete.

15 Ũguo nĩguo mũgeekaga matũũra marĩa maraihanĩrĩirie na bũrũri ũrĩa mũgũthiĩ gũtũũra.

16 “No rĩĩrĩ, rĩrĩa mũkeegwatĩra matũũra marĩa marĩ bũrũriinĩ ũrĩa MWATHANI Ngai wanyu ekũmũhe, mũkooraga andũ oothe arĩa marĩ kuo.

17 Andũ arĩa mũkooraga ta ũrĩa MWATHANI aamwathire nĩ: Ahiti, Aamori, Akanaani, Aperizi, Ahivi, na Ajebusi.

18 Mũkaamooraga nĩguo matikaanatũme mũhĩtĩrie MWATHANI, na ũndũ wa kũmũruta gwĩka maũndũ marĩa marĩ magigi marĩa meekaga ma gũthaathaiya ngai ciao.

19 “Mũngĩkaarigiicĩria itũũra hĩndĩ ndaaya nĩguo mũrĩĩgwatĩre, mũtikaanatemenge mĩtĩ ya matunda. Nĩ ũndũ mĩtĩ ti thũ cianyu atĩ nĩguo mũmĩtemenge. Mũkaarĩa matunda, no mĩtĩ mũtikaanamĩthũũkangie.

20 No rĩĩrĩ, mwahota gũtemenga mĩtĩ ĩrĩa ĩngĩ na mwĩthondekere indo cia gũtharĩkĩra itũũra rĩu nayo, o nginya mũkaarĩtuunyana.

Maciira ma ũũragani matarĩ matuithanie

1 “Ningĩ no kũhoteke kuoneke mũndũ ũũragĩirwo gĩthakainĩ bũrũriinĩ ũcio MWATHANI Ngai wanyu ekũmũhe, na mũtiũĩ nũũ ũmũũragĩĩte.

2 Hĩndĩ ĩyo atongoria aanyu na atuithania makoimagara mathiĩ mathime ũraihu wa kuuma handũ hau mũndũ ũcio ooragĩirwo gũthiĩ nginya o itũũra rĩa matũũra marĩa mathiũrũrũkĩirie.

3 Nao atongoria a itũũra rĩrĩa rĩrĩ hakuhĩ na kĩimba kĩu mathuure moori ya ng’ombe ĩtarĩ yarutithio wĩra.

4 Atongoria acio maikũrũkie moori ĩyo kĩandainĩ kĩ na karũũĩ gegũtherera, handũ hatarĩ haaciimbwo kana hakahandwo. Marĩ o kũu kĩandainĩ kĩu moine moori ĩyo ngingo.

5 Nao athĩnjĩri Ngai a mũhĩrĩga wa Lawi, mathiĩ ho tondũ nĩ o atuithania a maciira ma kũũragana. Acio nĩ o MWATHANI Ngai athuurĩĩte nĩguo mamũtungatagĩre na maraathimanage makĩgwetaga rĩĩtwa rĩake.

6 Hĩndĩ ĩyo atongoria oothe arĩa moimĩĩte itũũra rĩu rĩkuhanĩrĩirie na harĩa mũndũ ũcio ooragĩirwo methambĩre mooko maao igũrũ rĩa moori ĩyo yunĩĩtwo ngingo

7 makiugaga atĩrĩ, ‘Ithuĩ ti ithuĩ tũũragĩĩte mũndũ ũyũ, o na tũtiũĩ nũũ ũmũũragĩĩte.

8 MWATHANI, twagũthaitha ohera andũ aaku a Isiraeli arĩa wahonokirie kuuma Misiri. Tuohere na ndũgaatũcookererie thakame ya mũndũ ũtarĩ na mahĩtia.’

9 Kwoguo, tondũ nĩmwathĩkĩire uuge wa MWATHANI, mũtigaacookererwo nĩ thakame ĩyo.

Ũhoro wĩgiĩ atumia arĩa matahĩĩtwo mbaarainĩ

10 “Na rĩĩrĩ, rĩrĩa MWATHANI Ngai wanyu akaamũhe ũhootani mbaarainĩ, mũtahe mĩgwate,

11 mwahota gũkoona andũ a nja athaka mũngĩhikia.

12 Mũkaamainũkia mĩciĩinĩ yanyu, meenjwo mĩtwe, marenge ndwara,

13 na macenjie nguo. Thuutha wa ũguo maikare mĩciĩinĩ yanyu macakaĩre aciari aao handũ ha mweri ũmwe, thuutha ũcio mũcooke mũmahikie.

14 Na rĩĩrĩ, mũngĩgaacooka mũigue atĩ mũtikũmeenda, mũkaamarekereria methiĩre o kũrĩa mangĩenda. Tondũ nĩmũgaakorwo mũkomeete nao, mũtingĩhota kũmatua ngombo o na kana kũmeendia.

Ũhoro wĩgiĩ igai rĩa mwana wa kahĩĩ wa irigithaathi

15 “Na rĩĩrĩ, mũndũ ahota gũkorwo na atumia eerĩ, nao mamũciarĩre aariũ, no rĩĩrĩ, mũũriũ wa irigithaathi akorwo arĩ wa mũtumia ũrĩa ateendeete.

16 Rĩu-rĩ, hĩndĩ ya kũgaĩra ciana icio ũtonga wake, nĩamenyerere mũno ndakaanathuutũkanie na ũndũ wa kũhe mwana wa mũtumia ũrĩa eendeete igai inene, o na atarĩ we mũkũrũ.

17 Nĩagĩrĩirwo nĩkũhe mwana ũcio wa kahĩĩ wa irigithaathi igai maita meerĩ, o na angĩkorwo nĩ wa mũtumia ũrĩa athũũrĩĩte. Mũndũ no mũhaka eetĩkĩre mwana wake wa irigithaathi na amũhe igai rĩrĩa rĩmwagĩrĩire.

Ũhoro wĩgiĩ mwana wa kahĩĩ mũremi

18 “Na rĩĩrĩ, no kũhoteke mũndũ akorwo na mũũriũ mũng’athia na mũremi, ũtangĩathĩkĩra aciari aake o na mangĩmũherithia.

19 Hĩndĩ ĩyo aciari aake maagĩrĩirwo kũmũtwarĩra atongoria a itũũra rĩrĩa atũũraga nĩguo makamũciirithie.

20 Nao aciari mathitange mũũriũ ũcio wao ta ũũ: ‘Atĩrĩĩrĩ, mũũriũ ũyũ witũ nĩ mũng’athia na mũremi na ndatwathĩkagĩra, ningĩ nĩ mũitangi mbeeca, na mũnyui njoohi mũno.’

21 Hĩndĩ ĩyo andũ oothe a itũũra mamũhũũre na mahiga nginya akue, makĩehererwo nĩ waganu ũcio gatagatĩinĩ kaao. Na rĩĩrĩ, mũndũ o wothe thĩinĩ wa Isiraeli aigua ũrĩa mũũriũ ũcio eekĩĩtwo etigĩre.

Mawatho mwanya mwanya

22 “Na rĩĩrĩ, mũndũ angĩgera ngero na atuĩrwo kũũragwo, nakĩo kĩimba gĩake gĩcuurio mũtĩ igũrũ,

23 kĩimba kĩu gĩtikaanaraare hau mũtĩinĩ. Kĩagĩrĩirwo nĩgũthikwo mũthenya o ro ũcio, nĩ ũndũ kĩimba gĩcuurĩĩtio mũtĩ igũrũ nĩkĩreehagĩre bũrũri kĩrumi kĩa Ngai. Kĩimba kĩu kĩagĩrĩirwo nĩgũthikwo nĩ geetha bũrũri ũrĩa MWATHANI Ngai wanyu ekũmũhe ndũkaanagwatwo nĩ thaahu.

1 “Ũngĩkoona ng’ombe kana ng’ondu ya Mũisiraeli ũrĩa ũngĩ yũrĩĩte, ndũkaanamĩtiganĩrie; mĩhũũre umĩcookie kũrĩ we.

2 No rĩĩrĩ, mwene yo angĩkorwo ndatũũraga hakuhĩ nawe, kana ũkorwo ndũmũũĩ, ũkaamĩtwara gwaku mũciĩ. Mwene yo angĩgooka kũmĩcaria, ũkaamũcookeria.

3 Ũguo noguo ũgeeka wona ndigiri, nguo, kana kĩndũ o gĩothe kĩrĩa Mũisiraeli ũrĩa ũngĩ angĩkorwo ateete.

4 “Ningĩ ũngĩkoona ndigiri kana ng’ombe ya Mũisiraeli ũrĩa ũngĩ ĩgũĩte handũ njĩrainĩ, ndũkaanamĩtiganĩrie; ũkaamũteithia kũmĩũkĩria.

5 “Atĩrĩĩrĩ, mũndũ wa nja ndakaanehumbe nguo cia arũme kana mũndũ mũrũme ehumbe nguo cia andũ a nja; MWATHANI Ngai wanyu nĩathũire andũ arĩa meekaga maũndũ ta macio.

6 “Ũngĩkoona gĩtara kĩa nyoni kĩ handũ mũtĩinĩ kana handũ thĩ, na nyoni ĩhumbĩire matumbĩ kana tũcui twayo, ndũkaanooe nyoni ĩyo.

7 Nyoni ĩyo yagĩrĩirwo nĩkũrekwo ĩthiĩ, no rĩĩrĩ, no woe tũcui ũthiĩ natuo. Ũgeeka ũguo nĩguo ũtũũre hĩndĩ ndaaya na wonage maũndũ meega ũtũũroinĩ waku wothe.

8 “Waka nyũmba njerũ-rĩ, mĩĩkagĩre rũirigo igũrũ mĩenainĩ guothe nĩguo ndũkaanoorio thakame ya mũndũ o wothe ũngĩgũa oimĩĩte igũrũ wayo akue.

9 “Ndũkaanahande mũgũndainĩ wa mĩthabibũ mĩmera ya mũthemba ũngĩ; ũngĩgeeka ũguo, ndũgeetĩkĩrio kũgetha thabibũ kana maciaro ma mĩmera ĩyo ĩngĩ.

10 “Ndũkaanoohe ndeegwa na ndigiri icookiinĩ rĩmwe nĩguo ũrĩme nacio na mũraaũ.

11 “Ndũkaanehumbe nguo itumĩĩtwo na guoya wa ng’ondu na gataani ciogothanĩĩtio hamwe.

12 “Tumagĩrĩra ciohe cia ndigi mĩthiainĩ ĩna ya nguo yaku.

Mawatho megiĩ gũkomania

13 “Na rĩĩrĩ, mũndũ no ahikie mũndũ wa nja acooke ericũkwo aigue atĩ ndekũmwenda,

14 o na no amũigĩrĩre kĩgeenyo oige atĩ nĩakomeetwo naake nĩ mũndũ mũrũme ũngĩ ataanamũhikia.

15 “Ũndũ ta ũcio ũngĩgeekĩka, aciari a mũndũ wa nja ũcio makooya cuka wa ũrĩrĩ ũrĩa wakomeirwo nĩ mũndũ wa nja ũcio ahika wĩ na kĩmenyithia gĩa kuonania atĩ aarĩ thingi, mawonie kĩama gĩa athuuri a itũũra.

16 Ithe wa mũirĩĩtu ũcio ameere atĩrĩ, ‘Ndaheire mwanake ũyũ mũirĩĩtu ũyũ wakwa amũhikie, na rĩu nĩamũregeete.

17 Ningĩ-rĩ, nĩamũigĩrĩire kĩgeenyo akoiga atĩ ndaarĩ thingi rĩrĩa aamũhikirie. Niĩ ndĩ na ũira wa kuonania atĩ macio nĩ maheeni matheri. Roraai cuka wa ũrĩrĩ ũrĩa maakomeire mũthenya wa ũhiki muone thakame ho!’

18 Hĩndĩ ĩyo kĩama kĩu gĩa athuuri a itũũra kĩoe mũthitangwo, kĩmũhũũre.

19 Kĩama gĩcooke kĩmũtuĩre icunjĩ igana rĩmwe cia betha, gĩcinengere ithe wa mũirĩĩtu ũcio, nĩ ũndũ mũndũ mũrũme ũcio nĩareeheire mũirĩĩtu ũcio Mũisiraeli gĩconoko. Na rĩĩrĩ, mũirĩĩtu ũcio egũthiĩ na mbere gũtuĩka mũtumia wake, na mũndũ mũrũme ũcio ndarĩ hingo agaatigana naake matukũ moothe ma muoyo wake.

20 “Na rĩĩrĩ, ũhoro ũcio ũngĩkorwo nĩ wa ma, na hatirĩ na ũira wa kuonania atĩ mũirĩĩtu ũcio aarĩ thingi ataanahika,

21 makaamuoya mamũtware o mũromoinĩ wa nyũmba ya ithe, nao andũ a itũũra mamũhũũrire ho na mahiga nginya akue. Mũirĩĩtu ũcio nĩekĩĩte ũndũ wa gĩconoko kĩnene, nĩ ũndũ wa gũkomwo naake mbere ya kũhika arĩ o gwa ithe mũciĩ. Ũguo nĩguo mũkeeheria wĩhia ũcio gatagatĩinĩ kaanyu.

22 “Na rĩĩrĩ, mũndũ mũrũme angĩnyiitwo agĩkoma na mũtumia wa mũndũ ũngĩ-rĩ, eerĩ nĩmooragwo. Ũguo nĩguo mũkeeheria wĩhia ũcio thĩinĩ wa Isiraeli.

23 “Ningĩ no kũhoteke mũndũ mũrũme akorererwo itũũrainĩ akomeete na mũirĩĩtu ũũrĩĩtio nĩ mũndũ ũngĩ amũhikie.

24 Mwagĩrĩirwo nĩkũmooya eerĩ mũmoimie nja ya itũũra, mũmahũũre na mahiga nginya makue. Mũirĩĩtu ũcio ekũũragwo nĩ ũndũ ndaigana kuuga mbu nĩ geetha ateithũrwo nĩ andũ a itũũra. Naake mũndũ mũrũme ekũũragwo nĩ ũndũ nĩakomeete na mũirĩĩtu ũraarĩ hakuhĩ kũhikio. Ũguo nĩguo mũkeeheria wĩhia ũcio gatagatĩinĩ kaanyu.

25 “No rĩĩrĩ, mũndũ mũrũme angĩkora na kũu nja ya itũũra mũirĩĩtu ũũrĩĩtio nĩ mũndũ ũngĩ akome naake na hinya-rĩ, mũndũ mũrũme ũcio nĩoragwo arĩ o wiki.

26 Mũirĩĩtu ũcio ndaagĩrĩirwo nĩgwĩkwo ũndũ tondũ ndeekĩĩte ũndũ wa gũtũma ooragwo. Ciira ũcio no ta wa mũndũ ũũkĩrĩire ũngĩ akamũũraga.

27 Tondũ aakomire na mũirĩĩtu ũcio na kũu nja ya itũũra, na mũirĩĩtu oiga mbu ndoonire wa kũmũteithũra.

28 “Na rĩĩrĩ, mũndũ mũrũme angĩkoma na mũirĩĩtu atoorĩĩtio nĩ mũndũ, nao makorererwo,

29 mũndũ mũrũme ũcio aagĩrĩirwo nĩkũhe ithe wa mũirĩĩtu ũcio icunjĩ mĩrongo ĩtaano cia betha. Acooke ahikie mũirĩĩtu ũcio, nĩ ũndũ nĩamũringirĩirie akome naake. Naake agĩtuĩke mũtumia wake, na ndagaatigana naake matukũ ma muoyo wake wothe.

30 “Gũtirĩ mũndũ ũgaaconora ithe na ũndũ wa gũkoma na mũtumia o na ũmwe wa atumia a ithe.