Author: admin

Aisiraeli kũhoota mũthamaki Ogu

1 “Tũgĩcooka tũkĩhũndũka tũkĩambata na rũgongo tũroreete Bashani, naake Ogu mũthamaki wa Bashani akiumagara hamwe na andũ aake nĩguo ahũũrane na ithuĩ hakuhĩ na itũũra rĩa Edirei.

2 Naake MWATHANI akĩnjĩĩra atĩrĩ, ‘Ndũkaamwĩtigĩre nĩ ũndũ nĩndĩmũneanĩĩte we mwene, andũ aake oothe, o na bũrũri wake wothe mookoinĩ maaku. Mwĩke o ta ũrĩa wekire Sihoni mũthamaki wa Aamori ũrĩa wathanaga Heshiboni.’

3 “Tondũ ũcio MWATHANI Ngai witũ akĩrekereria Ogu hamwe na andũ aake oothe mookoinĩ maitũ, na ithuĩ tũkĩmooraga oothe.

4 Hĩndĩ ĩyo tũgĩtuunyana matũũra maake moothe, na hatirĩ o na rĩmwe twatigire. Tũgĩgĩtuunyana matũũra mĩrongo ĩtandatũ, nĩ mo bũrũri wothe wa Arigobu, kũrĩa mũthamaki Ogu wa Bashani aathanaga.

5 Matũũra macio moothe-rĩ, mairigĩirwo na thingo ndaaya cia hinya, igeekĩrwo ihingo o na mĩcuuma ya kũhinga ihingo icio, o na nĩkwarĩ na matũũra maingĩ matairigĩirwo.

6 Na rĩĩrĩ, nĩtwanangire matũũra moothe, tũkĩũraga arũme oothe, andũ a nja oothe na ciana ciothe o ta ũrĩa twekire matũũra marĩa maarĩ ma Sihoni mũthamaki wa Heshiboni.

7 Tũgĩgĩĩtahĩra ũhiũ wothe o na indo iria ciarĩ kuo.

8 “Hĩndĩ ĩyo tũgĩgĩtaha bũrũri ũcio wothe wathagwo nĩ athamaki acio eerĩ a Aamori, ũrĩa warĩ mwena wa irathĩro wa rũũĩ rwa Jorodani, kuuma rũũĩ rwa Arinoni o nginya kĩrĩma kĩa Herimoni.

9 (Asidoni meetaga kĩrĩma kĩa Herimoni Sirioni, nao Aamori magagĩĩta Seniru.)

10 Tũgĩkĩĩnyiitĩra matũũra moothe marĩa maarĩ bũrũri ũcio mwaraganu, o na matũũra ma Gileadi na Bashani, o kinya Saleka na Edirei matũũra marĩa maarĩ na mwena wa irathĩro, kũrĩa guothe gwathagwo nĩ Ogu mũthamaki wa Bashani.”

11 (Na rĩĩrĩ, Ogu, mũthamaki wa Bashani, no we wiki watigarĩĩte rũrukainĩ rwa Arefai. Gĩtanda gĩake gĩathondekeetwo na cuuma na kĩarĩ na ũraihu wa mita inya na hakuhĩ mita igĩrĩ kwarama kũringana na mũthimĩre ũrĩa ũiguanĩirwo. Gĩtanda kĩu-rĩ, kĩrĩ o ho kũu Raba itũũra rĩa Aamoni.)

Mĩhĩrĩga ĩrĩa yagaĩirwo mwena wa na irathĩro wa rũũĩ rwa Jorodani

12 “Hĩndĩ ĩrĩa twegwatĩire bũrũri ũcio ũgĩtuĩka witũ-rĩ, ngĩgaĩra mũhĩrĩga wa Reubeni na wa Gadi mwena wa na rũgongo wa itũũra rĩa Aroeri, hakuhĩ na rũũĩ rwa Arinoni, o na gĩcunjĩ kĩmwe kĩa bũrũri ũrĩa ũrĩ irĩma wa Gileadi na matũũra maakuo.

13 Nayo nuthu ya mũhĩrĩga wa Manase ngĩmĩhe gĩcunjĩ kĩu kĩngĩ kĩa Gileadi, o na Bashani guothe kũrĩa Ogu aathanaga, ũguo nĩ ta kuuga rũgongo ruothe rwa Arigobu.”

(Bashani guothe gwetagwo bũrũri wa Arefai.

14 Naake Jairũ wa mũhĩrĩga wa Manase, akĩĩgwatĩra rũgongo ruothe rwa Arigobu, ũguo nĩ ta kuuga bũrũri wothe wa Bashani, o nginya mũhakainĩ wa Ageshuri na Amaakathi. Agĩcooka agĩĩtania matũũra macio moothe na rĩĩtwa rĩake, na matũire meetagwo matũũra ma Jairũ o na ũũmũũthĩ.)

15 “Nakuo Gileadi ngĩkũhe mbarĩ ya Makiru wa mũhĩrĩga wa Manase.

16 Nayo mĩhĩrĩga ya Reubeni na Gadi ngĩmĩhe rũgongo ruothe kuuma Gileadi o nginya rũũĩ rwa Arinoni. Naguo mũhaka wa na kĩanda wa bũrũri wao warĩ gatagatĩ ka rũũĩ rũu. Naguo wa mwena wa na rũgongo warĩ rũũĩ rwa Jaboku, rũrĩa rwamahakainie na Aamoni.

17 Naguo mwena wa na ithũĩro bũrũri wao wakinyĩĩte rũũĩ rwa Jorodani, kuuma iriainĩ rĩa Galili mwena wa na rũgongo nginya iria rĩa Cumbĩ, mwena wa na kĩanda, ũgathiĩ ũguo o nginya magũrũinĩ ma kĩrĩma kĩa Pisiga mwena wa na irathĩro.

18 “Hĩndĩ o ro ĩyo ngĩmahe mataaro maya ngĩmeera atĩrĩ, ‘MWATHANI Ngai witũ, nĩamũheete bũrũri ũyũ wothe wĩ mwena wa na irathĩro ũtuĩke wanyu. Rĩu-rĩ, njamba cianyu cia ita nĩciĩyohe indo ciacio cia mbaara ithiĩ mbere ya mĩhĩrĩga yothe ya Isiraeli, iringe rũũĩ rwa Jorodani, nĩguo imateithie kwĩnyiitĩra bũrũri ũcio.

19 No rĩĩrĩ, atumia aanyu, ciana cianyu, o na ũhiũ wanyu (na nĩnjũũĩ mwĩ na mahiũ maingĩ), matigwo kũu matũũrainĩ macio ndĩmũheete.

20 Teithĩrĩriai andũ acio aanyu kwĩnyiitĩra bũrũri ũcio MWATHANI ekũmahe, ũcio wĩ mwena wa na ithũĩro wa Jorodani, na mweterere o nginya matũũre kuo na thaayũ, o ta ũrĩa MWATHANI Ngai wanyu amwĩkĩire. Mwarĩĩkia gwĩka ũguo, no mũcooke bũrũri ũyũ ndĩmũheete.’

21 “ Hĩndĩ ĩyo ngĩatha Joshua ngĩmwĩra atĩrĩ, ‘Nĩweyoneire na maitho maaku ũrĩa MWATHANI Ngai wanyu eekire athamaki arĩa eerĩ, Sihoni na Ogu; ũguo noguo ageeka mabũrũri moothe marĩa mũkaagerera.

22 Mũtikaanametigĩre nĩ gũkorwo MWATHANI Ngai wanyu nĩ we ũkaamũhũũranĩra.’

Musa kũgirio gũtoonya bũrũri wa Kanaani

23 “Hĩndĩ ĩyo ngĩgĩthaitha MWATHANI ngiuga atĩrĩ,

24 ‘Wee MWATHANI Ngai, nĩnjũũĩ atĩ rĩu nĩũnyoneetie kĩambĩrĩria kĩa maũndũ ma magegania na manene marĩa ũgeeka. Rĩu-rĩ, gũtirĩ ngai kũu matuinĩ o na kana gũũkũ thĩ ingĩhota gwĩka maũndũ manene ta maya wee mwene wĩkĩĩte.

25 Rĩu, ndagũthaitha MWATHANI ũnjĩtĩkĩrie ninge mũrĩmo ũũrĩa ũngĩ wa rũũĩ rwa Jorodani, ngeeyonere bũrũri ũcio mwega, o ũcio mũthaka wĩ irĩma, o na irĩma cia Lebanoni.’

26 “Na rĩĩrĩ, MWATHANI akĩndaakarĩra nĩ ũndũ wanyu, na akĩaga gũũthikĩrĩria. Akĩnjĩĩra atĩrĩ, ‘Reka ũguo ũigane, na ndũkaananjũũrie ũndũ ũcio rĩngĩ!

27 Thiĩ ũrũũgame gacũmbĩrĩ ga kĩrĩma kĩa Pisiga ũrore mwena wa na rũgongo, wa na kĩanda, wa na irathĩro, o na wa na ithũĩro, ũbaare wega kĩrĩa ũkuona, nĩ ũndũ ndũkaaringa rũũĩ rũũrũ rwa Jorodani.

28 No rĩĩrĩ, taara Joshua ũmũũmĩrĩrie na ũmwĩkĩre hinya, nĩ ũndũ nĩ we ũgũtongoria andũ nĩguo maringe makeegwatĩre bũrũri ũcio ũkuona.’

29 “Kwoguo tũgĩgĩikara gĩtuambainĩ kĩrĩa kĩang’etheire itũũra rĩa Bethipeoru.”

Musa gũthaitha Aisiraeli matuĩke ehokeku

1 Hĩndĩ ĩyo Musa akĩĩra andũ a Isiraeli atĩrĩ, “Athĩkĩraai mawatho moothe marĩa ndĩramũruta na nĩmũgũtũũra, na mwĩgwatĩre bũrũri ũrĩa MWATHANI Ngai wa maithe maanyu ekũmũhe.

2 Mũtikaanarutarute kana muongerere kiugo o na kĩmwe kĩa ũrĩa ngũmwatha. Athĩkagĩraai maathani ma MWATHANI Ngai wanyu marĩa ndĩmwathĩĩte.

3 Na rĩĩrĩ, inyuĩ nĩmweyoneire na maitho maanyu ũrĩa MWATHANI eekire kĩrĩmainĩ kĩa Peori. Nĩkũniina aaniinire arĩa oothe mathaathayagia ngai cia Baali kuo,

4 no rĩĩrĩ, arĩa aanyu maarĩ ehokeku harĩ MWATHANI Ngai wanyu, marĩ o muoyo o na ũũmũũthĩ.

5 “Atĩrĩĩrĩ, nĩndĩmũrutĩĩte mawatho moothe o ta ũrĩa MWATHANI aanjathire njĩke. Tũũraai mũmarũmĩĩtie mwĩ bũrũriinĩ ũrĩa mwĩ hakuhĩ kwĩgwatĩra ũtuĩke wanyu.

6 Tondũ ũcio-rĩ, maathĩkagĩreei na mũmeekage, nĩ gũkorwo nĩ mo marĩonanagia ũũgĩ wanyu kũrĩ andũ a ndũũrĩrĩ. Na rĩĩrĩ, hĩndĩ ĩrĩa maigua ũhoro wa mawatho macio, mariugaga atĩrĩ, ‘Kaĩ rũũrĩrĩ rũũrũ rũnene rwĩ na ũũgĩ na ũmenyo mũnene-ĩ!’

7 “Nĩ ũndũ-rĩ, hatirĩ rũũrĩrĩ o na rũmwe, o na rũngĩkorwo rũrĩ rũnene atĩa, rwanagĩa na ngai ĩrĩ hakuhĩ mũno naruo ta ũrĩa MWATHANI Ngai witũ arĩ hakuhĩ na ithuĩ. Hĩndĩ ĩrĩa twamũthaitha atũteithie nĩatũcookagĩria.

8 Gũtirĩ rũũrĩrĩ o na rũmwe, o na rũngĩkorwo rũrĩ rũnene atĩa, rwanagĩa na mawatho ma kĩhooto ta maya ndamũruta ũũmũũthĩ.

9 Inyuĩ ikaragaai mwĩhũũgĩĩte! O na mũmenyerere mũtikaanariganĩrwo matukũ ma muoyo wanyu moothe nĩ maũndũ marĩa inyuĩ eene mwoneete na maitho maanyu. Na rĩĩrĩ,

10 menyithagiai ciana cianyu, o na ciana cia ciana cianyu ũhoro wa mũthenya ũrĩa mwarũũgamĩĩte mbere ya MWATHANI Ngai wanyu kĩrĩmainĩ gĩa Sinai, rĩrĩa aanjĩĩrire atĩrĩ, ‘Cookanĩrĩria andũ. Nĩngwenda mathikĩrĩrie ũrĩa wothe ngũmeera, nĩ geetha meemenyerie kũnjathĩkĩra matukũ marĩa moothe megũtũũra muoyo, nĩguo makaaruta ciana ciao kũndĩĩaga.’

11 “Na rĩĩrĩ, menyithagiai ciana cianyu ũrĩa mwathiire mũkĩrũũgama magũrũinĩ ma kĩrĩma kĩrĩa kĩahumbĩrĩĩtwo nĩ itu rĩa ndoogo nene, naguo mwaki ũkarĩrĩmbũkaga igũrũ matuinĩ.

12 Mamenyithagiei ũrĩa MWATHANI aamwarĩirie e mwakiinĩ ũcio thĩinĩ, na ũrĩa mwaiguire akĩaria no mũtiigana kuona mũhianĩre wake.

13 Agĩkĩmũmenyithia ũrĩa mwagĩrĩirwo nĩgwĩkaga nĩ geetha mũtũũrie kĩrĩĩkanĩro kĩrĩa aarĩĩkanĩire na inyuĩ atĩ no mũhaka mwathĩkagĩre Maathani marĩa Ikũmi marĩa aandĩkire ihengereinĩ iria igĩrĩ cia mahiga.

14 Hĩndĩ ĩyo MWATHANI akĩnjatha ndĩmũrute mawatho moothe marĩa mũrĩrũmagĩrĩra mwĩ bũrũri ũcio mwĩ hakuhĩ kũwĩgwatĩra mũtũũre.

Gũkaanio gũthaathaiya mĩhianano

15 “Na rĩĩrĩ, rĩrĩa MWATHANI aamwarĩirie e mwakiinĩ kĩrĩmainĩ gĩa Sinai, mũtionire mũhianĩre o na ũrĩkũ. Nĩ ũndũ ũcio mwĩmenyagĩrĩreei,

16 mũtikaaneehie na gwĩthondekera mũhianano wa mũthemba wothe, wa mũndũ mũrũme kana wa mũndũ wa nja,

17 wa nyamũ kana wa nyoni,

18 wa nyamũ ĩtambaga thĩ, o na kana wa thamaki.

19 Mwĩmenyagĩrĩreei mũtikaanatoonye magerioinĩ ma gũthaathaiya o na gũtungatĩra kĩrĩa muonaga matuinĩ: riũa, mweri, o na njata. MWATHANI Ngai wanyu nĩaheete andũ arĩa angĩ indo icio macithaathayagie.

20 No rĩĩrĩ, inyuĩ nĩkũhonokio mwahonokirio kuuma Misiri kũrĩa kwahaanaga icua rĩa mwaki. MWATHANI aamũrutire kuo nĩ geetha amũtue andũ aake kĩũmbe ta ũrĩa mũtariĩ ũũmũũthĩ.

21 Na rĩĩrĩ, MWATHANI akĩndaakarĩra nĩ ũndũ wanyu, akĩĩhĩta akiuga atĩ ndikaaringa rũũĩ rwa Jorodani, ndoonye bũrũri ũcio mwega ehaarĩirie kũmũhe.

22 Niĩ-rĩ, ngũkuĩra o gũũkũ, ndikũringa rũũĩ rũũrũ rwa Jorodani. No inyuĩ mwĩ hakuhĩ kũrũringa mũkegwatĩre bũrũri ũcio mwega ũtuĩke wanyu.

23 Mwĩmenyagĩrĩreei mũtikaanariganĩrwo nĩ kĩrĩĩkanĩro kĩrĩa MWATHANI Ngai wanyu aarĩĩkanĩire na inyuĩ. Mũtikaanaremere MWATHANI Ngai wanyu mwĩthondekere mũhianano wa mũthemba o wothe,

24 nĩ ũndũ MWATHANI Ngai wanyu atariĩ ta rũrĩrĩmbĩ rwa mwaki; ndeendaga kũigananio na ngai ĩngĩ.

25 “Na rĩĩrĩ, rĩrĩa mũgaakorwo mũtũũrĩĩte bũrũri ũcio hĩndĩ ndaaya, na mũgaciara ciana, o na cio igaciarana, mũtikaaneehie na gwĩthondekera mũhianano wa mũthemba o na ũrĩkũ. Ũndũ ũcio nĩ wĩhia maithoinĩ ma MWATHANI, na no ũmũraakarie.

26 Rĩu-rĩ, nĩndeeta igũrũ na thĩ ũũmũũthĩ ituĩke aira nĩ ũndũ wanyu atĩ mũngĩkaanemera, nĩmũkeehera bũrũri ũcio o narua. Mũtigaatũũra ihinda iraaya bũrũriinĩ ũcio wĩ mũrĩmo wa Jorodani, o ũcio mwĩ hakuhĩ kwĩgwatĩra ũtuĩke wanyu. Na rĩĩrĩ, nĩkũniinwo mũkaaniinwo biũ.

27 MWATHANI nĩakaamũhurunja ndũũrĩrĩinĩ irĩa ingĩ, kũrĩa o andũ anyiinyi aanyu magaatigara.

28 Kũu mũgaatungatagĩra ngai iria ithondekeetwo na mooko ma andũ cia mahiga, mĩtĩ, o na ngai itangĩhota kuona, kũigua, kũrĩa, o na kũnungĩra.

29 No rĩĩrĩ, mwĩ kũu mũngĩgaakaĩra MWATHANI Ngai wanyu, na mũmũcarie na ngoro yothe na muoyo wothe-rĩ, hĩndĩ ĩyo nĩakaamũigua.

30 Rĩĩrĩa mũgaakorwo mathĩĩnainĩ, namo maũndũ macio moothe mamũkorerere-rĩ, hĩndĩ ĩyo nĩmũkaagarũrũkĩra MWATHANI mũmwathĩkĩre.

31 MWATHANI nĩ Ngai wĩ tha nyingĩ. Ndakaamũtiganĩria kana amũniine, o na ndakaariganĩrwo nĩ kĩrĩĩkanĩro kĩrĩa aarĩĩkanĩire na maithe maanyu.

32 “Tuĩriai ũhoro wa mahinda marĩa mathirĩĩte, rĩrĩa inyuĩ mũtaarĩ aciare, o gwata rĩrĩa Ngai oombire mũndũ gũũkũ thĩ. Tuĩriai thĩ guothe kana kwaneekĩka ũndũ mũnene ta ũyũ. O na kana kwĩ mũndũ wanaigua ũndũ ta ũyũ.

33 Nĩkũrĩ andũ maanatũũra muoyo thuutha wa kũigua ngai ĩkĩmaarĩria ĩrĩ thĩinĩ wa mwaki ta ũrĩa inyuĩ mwaiguire?

34 Nĩkũrĩ na ngai yanageria kũũmagara ĩgathiĩ kwĩrutĩra rũũrĩrĩ kuuma rũũrĩrĩ rũngĩ rũtuĩke rwayo kĩũmbe ta ũrĩa MWATHANI Ngai wanyu aamwĩkire akĩmũruta Misiri? Na inyuĩ mũkĩĩyonera na maitho maanyu agĩĩka maũndũ na hinya na ũhoti wake mũnene, akĩringa ciama na agĩĩka maũndũ ma kũgegania, akĩreehithia matũhũũhũ, akĩhũũrana mbaara, na agĩtũma maũndũ ma kũguoyohia mũno meekĩke.

35 MWATHANI aamwonirie maũndũ macio moothe nĩguo mũmenye atĩ no we wiki Ngai na gũtirĩ ũngĩ.

36 MWATHANI we mwene agĩgĩtũma mũigue mũgambo wake kuuma igũrũ nĩguo amũtaare, nakuo gũũkũ thĩ akĩmũreka muone mwaki wake mũnene, o na mũkĩigua mũgambo wake kuuma mwakiinĩ ũcio.

37 Na rĩĩrĩ, tondũ wa ũrĩa eendeete maithe maanyu, agĩkĩmũthuura inyuĩ, agĩcooka akĩmũruta Misiri na ũhoti wake mũnene.

38 O mũgĩthiaga na mbere, MWATHANI akĩmũingatĩra ndũũrĩrĩ nyingĩ na ciarĩ na hinya kũrĩ inyuĩ, nĩguo amũkinyie na amũhe bũrũri wacio, bũrũri ũrĩa ũrĩ wanyu o na rĩu.

39 Tondũ ũcio ririkanaai ũũmũũthĩ, na mũtikaanariganĩrwo o na rĩ, atĩ MWATHANI nĩ Ngai wa igũrũ na thĩ, na gũtirĩ ũngĩ o na ũrĩkũ.

40 Nĩ ũndũ ũcio, tũũraai mwathĩkagĩra mawatho moothe ma MWATHANI marĩa ndamwatha ũũmũũthĩ, nĩ geetha mwonage maũndũ meega inyuĩ eene o hamwe na ciana cianyu. Mweka ũguo nĩmũgũtũũra matukũ maingĩ bũrũriinĩ ũcio MWATHANI Ngai wanyu ekũmũhe ũtuĩke wanyu tene na tene.”

Matũũra ma kũũrĩra mwena wa irathĩro wa rũũĩ rwa Jorodani

41 Hĩndĩ ĩyo Musa agĩkĩamũra matũũra matatũ mwena wa irathĩro wa rũũĩ rwa Jorodani,

42 nĩ geetha mũndũ angĩũraga mũndũ ũtarĩ thũ yake atekwenda, ooragĩre kuo nĩguo ahonokie muoyo wake. Mũndũ ta ũcio no ooragĩre itũũrainĩ rĩmwe rĩa macio nĩguo ndakaae kũũragwo.

43 Matũũra macio maagairwo ta ũũ: Mũhĩrĩga wa Reubeni ũkĩheeo Bezeri itũũra rĩarĩ werũinĩ kũndũ kwaraganu; mũhĩrĩga wa Gadi ũkĩheeo itũũra rĩa Ramothu rĩrĩa rĩarĩ Gileadi; mũhĩrĩga wa Manase ũkĩheeo Golani itũũra rĩrĩa rĩarĩ Bashani.

Kũhaarĩria kũheana Watho wa Ngai

44 Na rĩĩrĩ, Musa agĩgĩtaarĩria andũ a Isiraeli ũrĩa mawatho ma Ngai maatariĩ.

45-46 Aamaheire mawatho maya marĩĩkia kuuma Misiri, rĩrĩa maarĩ gĩtuambainĩ mwena wa irathĩro wa rũũĩ rwa Jorodani, kũng’ethera itũũra rĩa Bethipeoru. Bũrũri ũcio nĩguo Sihoni, mũthamaki wa Aamori ũrĩa watũire Heshiboni aathaga, nĩ we wahootirwo nĩ Musa na andũ a Isiraeli hĩndĩ ĩrĩa moimire Misiri.

47 Nao Aisiraeli makĩĩgwatĩra bũrũri wake ũgĩtuĩka wao, o na makĩĩgwatĩra bũrũri wa Ogu mũthamaki wa Bashani, ũrĩa o naake warĩ mũthamaki wa Aamori watũũraga mwena wa irathĩro wa rũũĩ rwa Jorodani.

48 Bũrũri ũcio wothe woimĩĩte itũũra rĩa Aroeri, rĩrĩa rĩrĩ ndeereinĩ cia rũũĩ rwa Arinoni, o nginya kĩrĩmainĩ gĩa Sirioni, na nokĩo gĩĩtagwo Herimoni.

49 Ningĩ bũrũri ũcio wao nĩwahĩmbĩirie rũgongo ruothe rwa mwena wa irathĩro wa rũũĩ rwa Jorodani, ũgathiĩ o nginya iria rĩa Cumbĩ rĩrĩa rĩrĩ na kĩanda, na o nginya magũrũinĩ ma kĩrĩma kĩa Pisiga kĩrĩa kĩrĩ mwena wa irathĩro.

Maathani Marĩa Ikũmi

1 Naake Musa agĩcookanĩrĩria andũ oothe a Isiraeli akĩmeera atĩrĩ, “Inyuĩ andũ aya a Isiraeli, tathikĩrĩriai mawatho moothe marĩa ngũmũhe ũũmũũthĩ; meruteei na mũmaathĩkagĩre na kinyi.

2 Na rĩĩrĩ, MWATHANI Ngai witũ nĩathondekire kĩrĩĩkanĩro kĩrĩmainĩ gĩa Sinai,

3 to o na maithe maitũ moiki, no o na ithuĩ ithuothe, o ithuĩ arĩa twĩ muoyo ũũmũũthĩ.

4 Naake MWATHANI akĩmwarĩria ũthiũ kwa ũthiũ hau kĩrĩmainĩ e mwakiinĩ thĩinĩ.

5 Na niĩ ihindainĩ rĩu ngĩrũũgama gatagatĩ kaanyu na MWATHANI nĩguo ndĩmwĩre ũrĩa MWATHANI oigaga, nĩ gũkorwo nĩmwetigagĩra mwaki ũcio, na mũtingĩetĩkĩrire kwambata kĩrĩmainĩ.

“Naake MWATHANI akiuga atĩrĩ,

6 ‘Niĩ nĩ niĩ MWATHANI Ngai waku, ũrĩa wakũrutire bũrũri wa Misiri, uume nyũmbainĩ ya ũkombo.

7 “ ‘Ndũkaanathaathaiye ngai ingĩ tiga niĩ.

8 “ ‘Ndũkaanethondekere mĩhianano ya kĩndũ o gĩothe kĩrĩ kũũrĩa igũrũ, kana kĩrĩ gũũkũ thĩ, kana kĩrĩ maaĩinĩ marĩa me rungu rwa thĩ.

9 Ndũkaanainamĩrĩre mũhianano o wothe kana ũthaathaiye, nĩ amu niĩ MWATHANI Ngai waku ndĩ Ngai ũteendeete kũigananio na ngai ĩngĩ. Nĩherithagia arĩa mathũire, o na ciana ciao, o nginya rũciaro rwa gatatũ na rwa kana.

10 Ningĩ nĩnjiguagĩra andũ ngiri na ngiri tha arĩa manyendeete na makaigua maathani maakwa.

11 “ ‘Ndũkaanagwete rĩĩtwa rĩakwa na itherũ nĩ gũkorwo niĩ MWATHANI Ngai waku nĩherithagia mũndũ o wothe ũgwetaga rĩĩtwa rĩakwa na itherũ.

12 “ ‘Menyagĩrĩra mũthenya wa Thabatũ ũwamũrage o ta ũrĩa niĩ MWATHANI Ngai waku ngwathĩĩte.

13 Rutaga wĩra waku wothe mĩthenya ĩtandatũ.

14 Mũthenya wa mũgwanja nĩ mũthenya wa kũhuurũka ũrĩa wamũrĩirwo MWATHANI Ngai waku. Mũthenya ũcio ndũkaanarute wĩra wee mwene, mũũrũguo, mwarĩguo, ndungata yaku ya mũndũ mũrũme kana ya mũndũ wa nja, ũhiũ waku, o na kana mũgeni ũrĩa ũrĩ gwaku mũciĩ. Ngombo ciaku o nacio nĩciagĩrĩirwo nĩkũhũũrũkaga o ta we.

15 Ririkanaga atĩ o nawe warĩ ngombo bũrũriinĩ wa Misiri, na niĩ, MWATHANI Ngai waku, ngĩkũruta kuo na hinya na ũhoti wakwa mũnene. Nĩkĩo ndĩragwatha ũmenyagĩrĩre mũthenya wa Thabatũ ũwamũrage.

16 “ ‘Tĩĩa thooguo na maitũguo, ta ũrĩa niĩ MWATHANI Ngai waku ngwathĩĩte, nĩ geetha wonage maũndũ meega, na ũtũũre matukũ maingĩ bũrũri ũrĩa niĩ, MWATHANI Ngai waku, ngũkũhe.

17 “ ‘Ndũkaanooragane.

18 “ ‘Ndũkaanatharanie.

19 “ ‘Ndũkaanaiye.

20 “ ‘Ndũkaanaigĩrĩre mũndũ ũrĩa ũngĩ kĩgeenyo.

21 “ ‘Ndũkaanerirĩrie mũtumia wa mũndũ ũrĩa ũngĩ, o na ndũkaanerirĩrie nyũmba yake, mũgũnda wake, ndungata yake ya mũndũ mũrũme kana ya mũndũ wa nja, kana ndeegwa yake, ndigiri yake, kana o kĩndũ gĩake o gĩothe.’

22 “Macio nĩ mo maathani marĩa MWATHANI aamũheire inyuothe rĩrĩa mwonganĩĩte hau kĩrĩmainĩ. Aamwarĩirie na mũgambo mũnene e mwakiinĩ thĩinĩ, o na e ituinĩ itumanu, akĩmũhe maathani macio, na ndoongereire ũndũ ũngĩ. Agĩcooka akĩmaandĩka ihengereinĩ igĩrĩ cia mahiga akĩĩnengera.

Andũ gwĩtigĩra

23 “Hĩndĩ ĩrĩa mwaiguire mũgambo woimaga ndumainĩ, rĩrĩa kĩrĩma kĩu gĩothe gĩakanaga mwaki, atongoria o na anene a mĩhĩrĩga yanyu magĩũka harĩ niĩ

24 makĩnjĩĩra atĩrĩ, ‘MWATHANI Ngai witũ nĩatuoneetie hinya wake o na riiri wake, rĩrĩa tũiguire agĩtwarĩria e mwakiinĩ thĩinĩ! Ũũmũũthĩ nĩtweyonera atĩ Ngai no aarie na mũndũ, na mũndũ ũcio athiĩ o na mbere gũtũũra muoyo.

25 Rĩu-rĩ, tũgwĩtoonyereria gĩkuũinĩ rĩngĩ nĩkĩ? Mwaki ũcio mũnene ũguo nĩũgũtũniina. Twĩ na ma atĩ tũngĩigua MWATHANI Ngai witũ akĩaria hĩndĩ ĩngĩ no tũkue.

26 Nĩ ũndũ-rĩ, nĩkũrĩ mũndũ wanathiĩ na mbere gũtũũra muoyo thuutha wa kwarĩrio nĩ Ngai ũrĩa ũrĩ muoyo e mwakiinĩ thĩinĩ?

27 Atĩrĩĩrĩ, Musa, cooka ũthikĩrĩrie maũndũ moothe marĩa MWATHANI Ngai witũ ekuuga. Nawe ũgĩcooke ũũke ũtwĩre ũrĩa akwĩra, na ithuĩ nĩtũkũigua na twathĩke.’

28 “Rĩrĩa MWATHANI aiguire ndeto iria mwaririe akĩnjĩĩra atĩrĩ, ‘Nĩnjiguĩte ndeto ciothe iria andũ aya makwĩrĩĩte, na nĩ njega.

29 Naarĩ korwo maatũũra maiguaga ta ũguo, na matũũre mandĩĩĩte na mathĩkagĩra maathani maakwa moothe, nĩguo o eene na ciana ciao matũũre moonaga maũndũ meega tene na tene!

30 Thiĩ ũkameere macooke hemainĩ ciao.

31 No wee Musa-rĩ, rũũgama o haaha harĩ niĩ, na nĩngũkũhe maathani na mawatho maakwa moothe. Marutage andũ nĩguo mamaathĩkagĩre me bũrũriinĩ ũrĩa ngũmahe.’

32 “Tondũ ũcio, inyuĩ andũ aya a Isiraeli, mwĩmenyagĩrĩreei mwĩkage maũndũ moothe marĩa MWATHANI Ngai wanyu amwathĩĩte. Mũtikaanakararie watho o na ũmwe wa mawatho maake.

33 Tũũraai mwathĩkagĩra maathani macio moothe, nĩ geetha mũtũũre hĩndĩ ndaaya na muonage maũndũ meega mwĩ bũrũriinĩ ũcio mũkwĩgwatĩra ũtuĩke wanyu.

Rĩathani rĩrĩa Inene

1 “Maya nĩ mo mawatho moothe marĩa MWATHANI Ngai wanyu aanjathire ndĩmũrute. Maathĩkagĩreei mwĩ bũrũri ũcio mwĩ hakuhĩ gũtoonya mũwĩgwatĩre ũtuĩke wanyu.

2 Matukũ moothe ma muoyo wanyu no nginya inyuĩ eene na njiarwa cianyu mũtĩĩage MWATHANI Ngai wanyu na mwathĩkagĩre mawatho maake moothe marĩa ndĩramũhe, nĩ geetha mũtũũre bũrũriinĩ ũcio hĩndĩ ndaaya.

3 Tondũ ũcio, inyuĩ andũ aya a Isiraeli, iguai mawatho maake na mũmaathĩkagĩre. Na inyuĩ nĩmũrĩonaga maũndũ meega, na mũtuĩke rũũrĩrĩ rũnene, na mũtũũre bũrũri ũcio mwega na mũnoru, o ta ũrĩa MWATHANI Ngai wa maithe maanyu eeranĩire.

4 “Atĩrĩĩrĩ wee Isiraeli, ririkanaga ũndũ ũyũ; MWATHANI Ngai witũ, o we wiki no we MWATHANI.

5 Nawe enda MWATHANI Ngai waku na ngoro yaku yothe, na muoyo waku wothe, o na hinya waku wothe.

6 Ndũkaanariganĩrwo nĩ mawatho maya moothe ndĩragwatha ũũmũũthĩ,

7 na ũmarutage ciana ciaku na kinyi. Meririkanagie rĩrĩa wĩ gwaku mũciĩ, rĩrĩa uumagarĩĩte, rĩrĩa ũhuurũkĩĩte, o na rĩrĩa ũkũruta wĩra.

8 Moohagĩrĩre mookoinĩ maaku, na ũmeekagĩre thiithiinĩ ta kĩririkania.

9 Ningĩ maandĩke buremuinĩ cia mũrango wa nyũmba yaku o na ihingoinĩ ciaku.

Andũ gũkaanio kũrema

10 “Na rĩĩrĩ, hĩndĩ ĩrĩa MWATHANI Ngai wanyu akaamũkinyia bũrũri ũcio eerĩire maithe maanyu Aburahamu, Isaaka, na Jakubu atĩ nĩakaamũhe bũrũri ũrĩ na matũũra manene na meega marĩa inyuĩ eene mũtaakire,

11 o na nyũmba ciyũrĩĩte indo nyingĩ njega mũno, na ti inyuĩ eene mũciyũrĩĩtie, o na ithima cia maaĩ, na ti inyuĩ eene mwenjire, o na mĩgũnda ya mĩthabibũ na mĩtamaiyũ, ĩrĩa inyuĩ eene mũtaahandire, na mũkarĩaga mũkahũũna,

12 ririkanaai mũtikaanariganĩrwo nĩ MWATHANI ũrĩa wamũrutire bũrũri wa Misiri muume ũkomboinĩ.

13 Tĩĩyagaai MWATHANI Ngai wanyu, na mũmũthaathayagie o we wiki, na mũkĩĩhĩta mũkeehĩtaga na rĩĩtwa rĩake.

14 Mũtikaanathaathaiye ngai ingĩ thĩinĩ wa ngai cia andũ arĩa mamũrigicĩirie.

15 Mũngĩgaathaathaiya ngai ingĩ, maraakara ma Ngai nĩmakaamũũkĩrĩra o ta mwaki amũniine o biũ, tondũ MWATHANI Ngai wanyu, ũrĩa ũrĩ hamwe na inyuĩ, ndeendaga kũigananio na ngai ĩngĩ.

16 “Mũtikaanagerie MWATHANI Ngai wanyu, ta ũrĩa mwamũgeririe Masa.

17 Kĩrĩrĩai gwathĩkĩra mawatho moothe marĩa MWATHANI Ngai wanyu amũheete.

18 Ikagaai o maũndũ marĩa MWATHANI oonaga marĩ ma kĩhooto na meega, na maũndũ maanyu moothe nĩmarĩthiaga wega. O na nĩguo mũhote kwĩgwatĩra bũrũri ũcio mwega ũrĩa MWATHANI eerĩire maithe maanyu,

19 na mũingate thũ cianyu ciehere mbere yanyu o ta ũrĩa MWATHANI eeranĩire.

20 “Na rĩĩrĩ, matukũinĩ ma thuutha ciana cianyu ciamũũria kĩrĩa gĩatũmire MWATHANI Ngai witũ atwathe twathĩkagĩre mawatho maya moothe,

21 mũgaacicookeria mũciĩre atĩrĩ, ‘Twarĩ ngombo cia mũthamaki wa Misiri, naake MWATHANI agĩtũruta kuo na hinya wake mũnene.

22 Nĩtweyoneire na maitho maitũ MWATHANI akĩringa ciama, na agĩĩka andũ a Misiri o na mũthamaki wao na njaama ciake ciothe maũndũ ma kũguoyohia.

23 Naake MWATHANI agĩtũruta bũrũri ũcio wa Misiri, agĩtũreehe gũũkũ na agĩtũhe bũrũri ũyũ, o ta ũrĩa eerĩire maithe maitũ atĩ nĩakaamahe.

24 Hĩndĩ ĩyo MWATHANI Ngai witũ agĩtwatha twathĩkagĩre mawatho maya maake moothe na tũmũtĩĩage. Na rĩĩrĩ, tweka ũguo, nĩegũtũũra atũmenyereire na atũme bũrũri witũ ũikarage ũgaacĩire.

25 Tũngĩthiĩ na mbere gwathĩkĩra maũndũ moothe marĩa MWATHANI Ngai witũ atwathĩĩte-rĩ, ũndũ ũcio nĩũrĩmũkenagia.’

Andũ a MWATHANI kĩũmbe

1 “Na rĩĩrĩ, MWATHANI Ngai wanyu nĩakaamũkinyia bũrũri ũcio mũgũthiĩ kwĩgwatĩra ũtuĩke wanyu, na nĩakaingata ndũũrĩrĩ nyingĩ ciume kuo. O mũgĩthiaga na mbere kũũtoonya-rĩ, nĩakaingata ndũũrĩrĩ mũgwanja nene na i na hinya kũrĩ inyuĩ, nacio nĩ: Ahiti, Agirigashi, Aamori, Akanaani, Aperizi, Ahivi, na Ajebusi.

2 Rĩrĩa MWATHANI Ngai wanyu agaakorwo arekereirie ndũũrĩrĩ icio ciothe mookoinĩ maanyu na mũgacihoota-rĩ, no nginya mũgaaciũraga ciothe. Mũtikaanarĩĩkanĩre ũndũ o na ũrĩkũ nacio, kana mũciiguĩre tha.

3 Ningĩ mũtikaanagũrane nao; mũtikaanarekererie airĩĩtu aanyu mahike kuo kana aanake aanyu mahikanie kuo,

4 tondũ no maguucĩrĩrie ciana cianyu iriganĩrwo nĩ MWATHANI ithaathaiye ngai ingĩ. Ũndũ ta ũcio ũngĩgeekĩka, MWATHANI nĩagaacinwo nĩ maraakara nĩ ũndũ wanyu na amũniine o rĩmwe.

5 Nĩ ũndũ ũcio, mũgaatharũria igongoona ciao, mũũnange itugĩ ciao cia mahiga iria mathaathayagia, mũtemenge mĩhianano ya ngai yao ĩrĩa ĩĩtagwo Ashera, na mũcine mĩhianano ĩrĩa ĩngĩ yao.

6 Ĩkagaai ũguo tondũ mwĩ a MWATHANI Ngai wanyu. Nĩwe wamũthuurire kuuma ndũũrĩrĩinĩ ciothe cia thĩ mũtuĩke andũ aake kĩũmbe.

7 “Na rĩĩrĩ, o na mũtaarĩ rũũrĩrĩ rwa andũ aingĩ, MWATHANI nĩamwendire na akĩmũthuura kuuma gatagatĩinĩ ka ndũũrĩrĩ icio.

8 MWATHANI nĩkũmwenda aamwendire, na akĩenda kũhingia kĩrĩĩkanĩro kĩrĩa aarĩĩkanĩire na maithe maanyu. Ũndũ ũcio nĩguo watũmire amũhonokie na hinya mũnene kuuma ũkomboinĩ wa mũthamaki wa Misiri.

9 Tondũ ũcio, ririkanaai atĩ MWATHANI Ngai wanyu no we wiki Ngai, na nĩ mwĩhokeku. Nĩatũũragia irĩĩkanĩro ciake, na agakinyagĩria wendo wake njiarwa na njiarwa cia arĩa mwamwendeete na mahingagia maathani maake.

10 No ndatithagia kũherithia arĩa mamũthũire.

11 Tondũ ũcio, athĩkagĩraai maathani na mawatho moothe marĩa ndamwatha ũũmũũthĩ.

Iraathimo nĩ ũndũ wa gwathĩka

12 “Na rĩĩrĩ, mwaigua mawatho macio na mũmaathĩkĩre na kinyi-rĩ, hĩndĩ ĩyo MWATHANI Ngai wanyu nĩegũthiĩ na mbere gũtũũria kĩrĩĩkanĩro gĩake na inyuĩ, na amũkinyagĩrie wendo wake o ta ũrĩa eerĩire maithe maanyu.

13 Nĩarĩmwendaga na amũraathimage, na atũme mwongerereke na mũciare ciana nyingĩ. Nĩarĩraathimaga mĩgũnda yanyu, nĩguo yumage ngano, thabibũ, na maguta ma mĩtamaiyũ, na amũraathimage na ng’ombe na ng’ondu. Indo icio ciothe akaamũhe mwĩ bũrũri ũcio MWATHANI eerĩire maithe maanyu atĩ nĩakaamũhe.

14 Gũtirĩ ndũũrĩrĩ ingĩ ikaraathimwo na ũtonga gũũkũ thĩ guothe ta inyuĩ. Gũtikaagĩa o na ũmwe wanyu kana ũhiũ wanyu ũgaatuĩka thaata.

15 MWATHANI nĩakaamũgitĩra kuuma kwĩ ndwari ciothe, na ndakaamũreehithĩria mĩrimũ mĩũru ta ĩrĩa mwoĩ mwĩ Misiri. No rĩĩrĩ, nĩagaatũma thũ cianyu igatwo nĩ yo.

16 Na rĩrĩ, nĩmũkaaniina ndũũrĩrĩ ciothe iria MWATHANI akaaneana mookoinĩ maanyu, na mũtigaaciiguĩra tha o na haniini. Mũtikaanathaathaiye ngai ciao tondũ ũndũ ũcio nĩũgaatũma mũgũe mũtegoinĩ.

17 “Ningĩ mũtikeĩĩre na ngoro atĩ andũ acio nĩ aingĩ kũmũkĩra, na atĩ mũtingĩhota kũmaingata.

18 Mũtikaanametigĩre, ririkanagaai ũrĩa MWATHANI Ngai wanyu eekire mũthamaki wa Misiri o hamwe na andũ aake oothe.

19 Ningĩ ririkanaai matũhũũhũ marĩa mweyoneire na maitho maanyu, o na ciama na maũndũ ma magegania marĩa Ngai eekire na guoko gwake kwa hinya nĩguo amũhonokie. Ũguo noguo MWATHANI o ũcio waniinire andũ a Misiri, ageeka andũ acio mũretigĩra.

20 O na ningĩ, MWATHANI Ngai wanyu nĩagaatũma andũ acio manyiitwo nĩ kĩmako kĩnene, o na aniine arĩa magaakorwo moorĩĩte makeehitha.

21 Mũtikaanametigĩre tondũ MWATHANI Ngai wanyu e hamwe na inyuĩ, o we Ngai ũrĩa mũnene na wa gũtĩĩagwo

22 MWATHANI ndakaingata ndũũrĩrĩ icio o rĩmwe ciehere mbere yanyu. Mũtikaahota gũciniina ciothe o rĩmwe nĩ ũndũ mũngĩgeeka ũguo nyamũ cia gĩthaka ciahota gũkaamũingĩhĩra ciambĩrĩrie kũmũthĩĩnia.

23 No rĩĩrĩ, MWATHANI Ngai wanyu nĩakaaneana thũ icio mookoinĩ maanyu, na atũme inyiitwo nĩ kĩmako kĩnene, o nginya rĩrĩa ikaaniinwo.

24 MWATHANI nĩakaaneana athamaki aao mookoinĩ maanyu, mũmoorage, nao makĩriganĩre biũ. Hatirĩ mũndũ ũkaahota kũmũgirĩrĩria o nginya mũkaamaniina oothe biũ.

25 Mũgaacina mĩhianano yothe ya ngai ciao. Mũtikaanacumĩkĩre betha o na kana thahabu iria imĩthondekeete, o na kana mũcioe ituĩke cianyu. Mũngĩgeeka ũguo, nĩmũkaagũa mũtegoinĩ, tondũ MWATHANI Ngai wanyu nĩathũire mĩhianano.

26 Ningĩ mũtikaanatoonyie mĩhianano ĩyo nyũmba cianyu, nĩguo mũtikaananyiitwo nĩ kĩrumi kĩrĩa kĩmĩnyiitĩĩte. No mũhaka mũthũũre na mũnyarare mĩhianano ĩyo nĩ tondũ nĩmĩnyiite nĩ kĩrumi kĩa MWATHANI.

Bũrũri mwega wa kwĩgwatĩrwo

1 “Rĩu-rĩ, athĩkagĩraai mawatho macio moothe ndamwatha ũũmũũthĩ, nĩ geetha mũtũũre muoyo na mũingĩhe, na mwĩgwatĩre bũrũri ũcio MWATHANI eerĩire maithe maanyu.

2 Ririkanaai ũrĩa MWATHANI Ngai wanyu aamũtongoririe mĩaka mĩrongo ĩna werũinĩ, na akĩmũrekeria mathĩĩna nĩguo amũgerie nĩ geetha amenye ũrĩa mwehaarĩirie gwĩka, kana nĩmũrĩathĩkagĩra maathani maake.

3 Agĩgĩtũma mũhũũte, agĩcooka akĩmũhe mana mũrĩe, irio iria inyuĩ o na maithe maanyu mũtaarĩĩte mbere ĩyo. Amwĩkĩire ũndũ ũcio nĩguo amũrute atĩ to irio ciiki ingĩtũũria mũndũ muoyo, tiga o kiugo gĩothe kĩrĩa kiumaga kanuainĩ ka MWATHANI.

4 Na rĩĩrĩ, mũtiathirĩirwo nĩ nguo o na kana mũkĩimba magũrũ mĩaka ĩyo mĩrongo ĩna.

5 Tũũraai mũririkanaga atĩ o ta ũrĩa mũciari ahũũraga ciana ciake agĩcirũnga, noguo MWATHANI Ngai wanyu arĩmwĩkaga.

6 Tondũ ũcio tũũraai mũmenyereire maathani ma MWATHANI Ngai wanyu, mũmwathĩkagĩre na mũmũtĩĩage.

7 Nĩ gũkorwo MWATHANI Ngai wanyu nĩekũmũtwara bũrũri mwega, bũrũri wĩ na njũũĩ iratherera kuuma ithima irĩ ituambainĩ na irĩmainĩ.

8 Nĩ bũrũri wĩ ngano, mbaarĩ, thabibũ, ngũyũ, makongomanga, ndamaiyũ, na ũũkĩ.

9 Kũu gũtirĩ kĩndũ mũkaagaga, o na kũhũũta mũtikaahũũtaga. Mahiga ma bũrũri ũcio nĩmarĩ cuuma, na irĩmainĩ ciakuo nĩkuo mũkeenjaga icango.

10 Na inyuĩ mũkaarĩaga mũkahũũna, na mũcookagĩrie MWATHANI Ngai wanyu ngaatho nĩ ũndũ wa kũmũhe bũrũri ũcio mwega ũguo.

Aisiraeli gũkaanio matikaariganĩrwo nĩ MWATHANI

11 “Mwĩmenyagĩrĩreei mũno mũtikaanariganĩrwo nĩ MWATHANI Ngai wanyu: mũtikaanaage kũhingia watho o na ũmwe wa mawatho marĩa ndĩramwatha ũũmũũthĩ.

12 Hĩndĩ ĩrĩa mũgaakorwo mũrĩĩte mũkahũũna, mwakĩĩte nyũmba njega cia gũtũũra,

13 nacio ng’ombe, ng’ondu, mbũri, betha, thahabu, o na indo iria ingĩ mwĩ nacio igaakorwo ciongererekeete-rĩ,

14 mwĩmenyerereei mũno mũtikaanetĩĩe kana mũriganĩrwo nĩ MWATHANI Ngai wanyu ũrĩa wamũrutire bũrũri wa Misiri kũrĩa mwatũũraga mwĩ ngombo.

15 MWATHANI Ngai wanyu nĩ we wamũtongoririe werũinĩ ũcio mũnene na wa kũmakania, kũrĩa kwarĩ na nyoka irĩ thumu na tũng’aurũ. Agĩgĩtũma maaĩ moime ndũmbainĩ ya ihiga kũu werũinĩ ũcio warĩ mũũmagaru na ũkaaga maaĩ.

16 Kũu werũinĩ akĩmũhe mana mũrĩe, irio iria maithe maanyu mataarĩĩte hĩndĩ ĩngĩ. MWATHANI agĩgĩtũma mũkorwo nĩ maũndũ maritũ nĩ geetha amũgerie, nĩguo akaamwĩka maũndũ meega matukũinĩ ma kũrigĩrĩria.

17 Nĩ ũndũ ũcio mũtikaaneciirie atĩ hinya wanyu na ũhoti wanyu nĩcio imuoneire ũtonga ũcio.

18 Ririkanagaai atĩ MWATHANI Ngai wanyu nĩ we ũmũheaga hinya wa kwĩyethera ũtonga ũcio. Eekaga ũguo nĩguo kĩrĩĩkanĩro kĩrĩa aarĩĩkanĩire na maithe maanyu gĩtũũre kĩrũmĩĩte wega.

19 Menyereraai atĩ mũtikaanariganĩrwo nĩ MWATHANI Ngai wanyu kana mũrũmĩrĩre ngai ingĩ nĩguo mũcithaathayagie kana mũcitungatagĩre. Mũngĩgeeka ũguo, ngũmwĩra na ma mũthenya wa ũũmũũthĩ atĩ, mũtirĩ hingo mũtakaaniinwo.

20 Na rĩĩrĩ, mũngĩkaaga gwathĩkĩra mũgambo wa MWATHANI Ngai wanyu, mũkaaniinwo o ta ndũũrĩrĩ iria MWATHANI egũthiĩ akĩniinaga ciehere mbere yanyu.

Ũremi wa andũ a Aisiraeli

1 “Atĩrĩĩrĩ, andũ aya a Isiraeli, tathikĩrĩriai mũigue; ũũmũũthĩ mwĩ hakuhĩ kũringa rũũĩ rwa Jorodani mũthiĩ mũkegwatĩre bũrũri ũcio wa ndũũrĩrĩ nene o na irĩ na hinya kũmũkĩra. Matũũra maacio nĩ manene mũno, na mairigĩirwo na thingo ikinyĩĩte o matuinĩ.

2 Andũ a bũrũri ũcio-rĩ, nĩ araihu na marĩ hinya; nĩ imũndũ nene, na nĩmũiguĩte ũhoro wacio ũkĩario atĩ gũtirĩ mũndũ o na ũmwe ũngĩciĩtiiria.

3 Tondũ ũcio nĩmũkwĩyonera na maitho maanyu, atĩ MWATHANI Ngai wanyu nĩ we ũkũmũtongoria ahaana ta mwaki wa kũniinana. Nĩ we ũgũthiĩ akĩmahootaga mũgĩthiaga o na mbere, nĩguo na inyuĩ mũmaingate na mũmaanange na ihenya, o ta ũrĩa aamwĩrire.

4 “Na rĩĩrĩ, hĩndĩ ĩrĩa MWATHANI Ngai wanyu agaakorwo amaingatĩĩte makeehera mbere yanyu-rĩ, mũtikaaneĩĩre na ngoro atĩ MWATHANI aamũreehire mwĩgwatĩre bũrũri ũyũ tondũ nĩmwagĩrĩirwo nĩkũwĩgwatĩra. Ũrĩa kũrĩ nĩ atĩ MWATHANI ekũmũingatĩra andũ acio nĩ ũndũ nĩ aaganu.

5 Na rĩĩrĩ, ti ũndũ inyuĩ mwĩ eega mũno na mwĩkaga o maũndũ marĩa meega, nĩkĩo MWATHANI ekũmwĩtĩkĩria mwĩgwatĩre bũrũri ũcio wao. No rĩĩrĩ, MWATHANI ekũmaingata meehere mbere yanyu nĩ tondũ wa waganu wao, o na nĩ geetha ahingie kĩrĩĩkanĩro gĩake kĩrĩa aarĩĩkanĩire na maithe maanyu Aburahamu, Isaaka, na Jakubu.

6 Tondũ ũcio menyaai atĩ MWATHANI ndaramũhe bũrũri ũcio mwega ũguo nĩ ũndũ nĩmwagĩrĩirwo nĩkũheeo. Aaca, inyuĩ mũrĩ andũ aremi mũno.

7 “Mũtikaanariganĩrwo o na rĩ nĩ ũrĩa mwaraakaririe MWATHANI Ngai wanyu mwĩ kũu werũinĩ. Kuuma mũthenya ũrĩa muoimire Misiri kinyagia ũũmũũthĩ mũtũire mũmũremeire.

8 Ningĩ mũrĩ kĩrĩmainĩ gĩa Sinai nĩmwaraakaririe MWATHANI mũno, o nginya akĩenda kũmũniina.

9 Ndaambatire kĩrĩmainĩ nĩ geetha nganengerwo ihengere iria cia mahiga iria ciandĩkĩĩtwo Kĩrĩĩkanĩro kĩrĩa MWATHANI arĩĩkanĩire na inyuĩ. Ngĩgĩikara kũu kĩrĩmainĩ mũthenya na ũtukũ, mĩthenya mĩrongo ĩna, itekũrĩa kana nganyua kĩndũ.

10 Naake MWATHANI akĩĩnengera ihengere icio igĩrĩ cia mahiga, iria aandĩkĩĩte na guoko gwake ũhoro wothe, ũrĩa aamwĩrire e mwakiinĩ thĩinĩ rĩrĩa mwonganĩĩte hau kĩrĩmainĩ.

11 Na rĩĩrĩ, rĩrĩa mĩthenya ĩyo mĩrongo ĩna yathirire-rĩ, MWATHANI akĩĩnengera ihengere icio cierĩ cia mahiga iria aandĩkĩĩte kĩrĩĩkanĩro.

12 “Hĩndĩ ĩyo MWATHANI akĩnjĩĩra atĩrĩ, ‘Ikũrũka narua uume gũũkũ kĩrĩmainĩ, nĩ ũndũ andũ aaku arĩa warutire Misiri nĩmathũũkĩĩte na mageeka maũndũ ma waganu. Nĩmagarũrũkĩĩte magatiga kũrũmĩrĩra maũndũ marĩa ndamaathire meekage, mageethondekera mũhianano.’

13 “Ningĩ MWATHANI akĩnjĩĩra atĩrĩ, ‘Nĩnjũũĩ atĩ andũ aya nĩ aremi mũno.

14 Ndũkaagerie kũngirĩrĩria o na haniini. Nĩndĩharĩirie kũmaniina matikaanacooke kũririkanwo nĩ mũndũ o na ũrĩkũ. Thuutha wa ũguo njooke ngũtue ithe wa rũũrĩrĩ rũnene rwĩ na hinya kũmakĩra.’

15 “Nĩ ũndũ ũcio, ngĩkĩhũndũka ngĩikũrũka kuuma kĩrĩmainĩ kĩu gĩakanaga mwaki. Hĩndĩ ĩyo ndakuuĩĩte na mooko ihengere icio igĩrĩ cia mahiga iria ciandĩkĩĩtwo kĩrĩĩkanĩro.

16 Na niĩ ngĩcũũthĩrĩria ngĩona atĩ nĩmwakararĩĩtie ũrĩa MWATHANI Ngai wanyu aamwathĩĩte, na mũkamũhĩtĩria na ũndũ wa gwĩthondekera mũhianano wa gateegwa ga cuuma.

17 Ndĩ o hau mbere yanyu, ngĩoya ihengere icio igĩrĩ cia mahiga, ngĩciikania thĩ, ikiunĩkanga icunjĩ icunjĩ.

18 Ngĩcooka ngĩkoma thĩ na nda mbere ya MWATHANI, mũthenya na ũtukũ, mĩthenya mĩrongo ĩna, na ndiarĩire kana ngĩnyua kĩndũ. Ndeekire ũguo nĩ ũndũ nĩmwehĩirie MWATHANI mũgĩtũma araakare.

19 Hĩndĩ ĩyo, ngĩgĩĩtigĩra mũno nĩ ũndũ wa maraakara macio ma MWATHANI maakanĩĩte ta mwaki, nĩ ũndũ nĩaraakarĩĩte o nginya akeenda kũmũniina. No rĩĩrĩ, o na ihinda rĩu MWATHANI no aanjiguire.

20 Ningĩ MWATHANI akĩraakarĩra Harũni mũno, akĩenda kũmũũraga, na niĩ ngĩmũthaithanĩrĩra hĩndĩ o ro ĩyo.

21 Hĩndĩ ĩyo ngĩkĩoya mũhianano ũcio wa wĩhia, ũcio wa gateegwa ga cuuma, ngĩũkia mwakiinĩ. Ngĩcooka ngĩunanga icunjĩ icunjĩ, ngĩũthĩa ũgĩtuĩka rũkũngũ, ngĩrũikia karũũĩinĩ karĩa gaathereraga koimĩĩte kĩrĩmainĩ.

22 “O na ningĩ nĩmwaraakaririe MWATHANI Ngai wanyu mwĩ Tabera, Masa, na Kibirothu Hataava.

23 Ningĩ hĩndĩ ĩrĩa MWATHANI aamwathĩĩte muume Kadeshi Barinea mwambate mũkegwatĩre bũrũri ũrĩa aamũheaga ũtuĩke wanyu, mũkĩmũremera, na mũtiigana kũmwĩhoka o na kana kũmũigua.

24 Kuuma rĩria ndamũmenyire mũtũire o mũremagĩra MWATHANI.

25 “Tondũ ũcio, ngĩgĩkoma thĩ na nda mbere ya MWATHANI, mũthenya na ũtukũ, mĩthenya mĩrongo ĩna, nĩ ũndũ nĩndamenyeete o wega atĩ MWATHANI nĩehaarĩirie kũmwananga.

26 Na niĩ ngĩhooya MWATHANI ngĩmwĩra atĩrĩ, ‘MWATHANI Ngai, ndagũthaitha ndũkaaniine andũ aya aaku, arĩa wakũũrire ũkĩmaruta Misiri na ũhoti na hinya waku mũnene.

27 Ririkana ndungata ciaku, Aburahamu, Isaaka, na Jakubu; ndũkaarore ũremi, waganu, o na wĩhia wa andũ aya.

28 Ũngĩĩka ũguo, andũ a Misiri no moige atĩ nĩwaremirwo nĩgũkinyia andũ aaku bũrũri ũrĩa wameerĩire. Ningĩ no moige atĩ wareehire andũ aaku gũũkũ werũinĩ nĩguo ũmooragĩre kuo nĩ ũndũ nĩũmathũũrĩĩte.

29 Andũ aya nĩ o andũ aaku kĩũmbe, arĩa wee mwene wethuurĩire matuĩke aaku; nĩ o warutire Misiri na hinya na ũhoti waku mũnene.’

Musa kwamũkĩra Maathani rĩngĩ

1 “Hĩndĩ ĩyo MWATHANI agĩkĩnjĩĩra atĩrĩ, ‘Acũhia ihengere igĩrĩ cia mahiga itariĩ ta iria cia mbere na ũthondeeke ithandũkũ rĩa mbaaũ. Warĩĩkia gwĩka ũguo, wambate gũũkũ kũrĩ niĩ kĩrĩmainĩ.

2 Na niĩ njooke nyandĩke igũrũ wa ihengere icio ciugo iria ciarĩ ihengereinĩ iria woragire, nawe ũcooke ũciĩkĩre ithandũkũinĩ rĩu.’

3 “Tondũ ũcio ngĩgĩthondeka ithandũkũ rĩa mũtĩ wa mũgaa, na ngĩgĩacũhia ihengere igĩrĩ cia mahiga ciatariĩ ta iria cia mbere, ngĩambata nacio kĩrĩmainĩ ndĩcikuuĩĩte na mooko maakwa.

4 Naake MWATHANI agĩkĩandĩka ihengereinĩ icio Maathani marĩa Ikũmi o ta ũrĩa aamaandĩkĩĩte hĩndĩ ya mbere, namo nĩ mo MWATHANI aaririe ũhoro wamo na inyuĩ e mwakiinĩ thĩinĩ hĩndĩ ĩrĩa muonganĩĩte hau kĩrĩmainĩ. Hĩndĩ ĩyo MWATHANI akĩĩnengera ihengere icio,

5 na niĩ ngĩhũndũka, ngĩikũrũka kuuma kĩrĩmainĩ. Ningĩ o ta ũrĩa MWATHANI aanjathire ngĩcooka ngĩĩkĩra ihengere icio Ithandũkũinĩ rĩrĩa ndathondekeete, na hau nĩ ho itũũraga kuuma hĩndĩ ĩyo.”

6 (Na rĩĩrĩ, Aisiraeli makĩgwata rũgendo moimĩĩte ithimainĩ cia andũ a Jaakani, magĩkinya Mosera. Kũu nĩkuo Harũni aakuĩrĩire na agĩthikwo o ro kuo, naake Eleazaru, mũũrũwe, agĩtuĩka mũthĩnjĩri Ngai handũ haake.

7 Kuuma hau makĩgwata rũgendo magĩthiĩ Gudugoda. Magĩthiĩ na mbere moimĩĩte hau magĩkinya Jotibatha, bũrũri warĩ na twanda twa maaĩ.

8 Hĩndĩ ĩyo MWATHANI agĩkĩamũra andũ a mũhĩrĩga wa Lawi nĩguo makuuage Ithandũkũ rĩa Kĩrĩĩkanĩro kĩa MWATHANI, na matuĩke athĩnjĩri Ngai na maraathimanage makĩgwetaga rĩĩtwa rĩake. Ũguo noguo matũire meekaga o na ũũmũũthĩ.

9 Kĩu nĩkĩo gĩatũmire mũhĩrĩga wa Lawi wage kũheeo igai rĩa bũrũri ta ũrĩa mĩhĩrĩga ĩrĩa ĩngĩ yaheirwo. Kĩrĩa maaheirwo nĩ gĩtĩĩo gĩa gũtuĩka athĩnjĩri Ngai o ta ũrĩa MWATHANI Ngai wanyu eeranĩire.)

10 “Na niĩ ngĩgĩikara kũu kĩrĩmainĩ mũthenya na ũtukũ, mĩthenya mĩrongo ĩna o ta hĩndĩ ya mbere. Naake MWATHANI agĩthikĩrĩria o rĩngĩ, naake agĩgĩtiga kwenda kũmũniina.

11 Ningĩ MWATHANI akĩnjĩĩra njũkĩre ndĩmũtongorie, nĩguo mũkegwatĩre bũrũri ũcio eerĩire maithe maanyu atĩ nĩakaamahe.

Ũrĩa Ngai eendaga

12 “Rĩu-rĩ, inyuĩ andũ aya a Isiraeli, tathikĩrĩriai mũigue ũrĩa MWATHANI Ngai wanyu arĩendaga mwĩkage: thaathayagiai MWATHANI na mwĩkage ũrĩa wothe aathanĩĩte. Mwendageei na mũtungatagĩreei na ngoro yothe na muoyo wothe,

13 na mwathĩkagĩre mawatho maake moothe. Mawatho macio ndamũhe ũũmũũthĩ, nĩ mo marĩtũmaga muonage maũndũ meega.

14 Atĩrĩĩrĩ, MWATHANI nĩwe mwene igũrũ kũrĩa kũraihu mũno o na thĩ o na indo ciothe iria irĩ kuo.

15 Tondũ wa ũrĩa MWATHANI eendeete maithe maanyu-rĩ, nĩamũthuurire inyuĩ handũ ha andũ arĩa angĩ oothe. O na ũũmũũthĩ mũrĩ o andũ aake arĩa athuurĩĩte.

16 Tondũ ũcio, kuuma rĩu tũũraai mwathĩkagĩra MWATHANI na mũtige kũmũremera.

17 Nĩ gũkorwo MWATHANI Ngai wanyu, nĩ we Ngai ũkĩrĩĩte ngai iria ingĩ ciothe na maahinya moothe. We nĩ mũnene na e hinya, nĩwagwĩtigĩrwo, ndathuutũkanagia, o na ndahakagwo.

18 MWATHANI nĩ we wonaga ciana cia ngoriai na atumia a ndigwa nĩmatungatwo wega. Ningĩ nĩendeete ageni arĩa matũũranagia na andũ aitũ, akamaheaga irio o na nguo.

19 Tondũ ũcio, endagaai ageni tondũ o na inyuĩ mwatũũraga mũrĩ ageni bũrũriinĩ wa Misiri.

20 Athĩkagĩraai MWATHANI Ngai wanyu na mũthaathayagie o we wiki. Tũũraai mũrĩ ehokeku harĩ we, na mwĩhĩtage mũkĩgwetaga rĩĩtwa rĩake.

21 Mũgoocageei tondũ nĩwe Ngai wanyu, na nĩmwĩyoneire na maitho maanyu maũndũ manene na ma kũgegania marĩa amwĩkĩire.

22 Hĩndĩ ĩrĩa maithe maanyu maikũrũkire Misiri, maarĩ o andũ mĩrongo mũgwanja. No MWATHANI Ngai wanyu amũingĩhĩĩtie o ta njata cia igũrũ.

Ũnene wa MWATHANI

1 “Endagaai MWATHANI Ngai wanyu, na mwathĩkagĩre mawatho maake moothe hĩndĩ ciothe.

2 Tondũ ũcio, ririkanaai ũũmũũthĩ maũndũ marĩa mwĩrutĩĩte kuuma kwĩ MWATHANI mahinda macio moothe mũtũũranĩĩtie naake. Na rĩĩrĩ, ti ciana cianyu cionire maũndũ macio, nĩ inyuĩ eene mwamoonire. Inyuĩ-rĩ, nĩmweyoneire ũnene wa MWATHANI, hinya, ũhoti,

3 o na ciama ciake. Nĩmweyoneire maũndũ marĩa eekire mũthamaki wa Misiri na bũrũri wake wothe.

4 Nĩmweyoneire ũrĩa MWATHANI aaniinire biũ mbũtũ ya ita ya Misiri, mbarathi ciayo, o na ngaari ciayo cia mbarathi, o na mũkĩona ũrĩa aamĩikirie Iriainĩ Ituune hĩndĩ ĩrĩa yamũrũmĩrĩire.

5 Nĩmũkũririkana ũrĩa MWATHANI aamwĩkĩire mwĩ werũinĩ o nginya mũgĩkinya gũũkũ.

6 O na ningĩ nĩmũkũririkana ũrĩa eekire Dathani na Abiramu, aariũ a Eliabu ũrĩa warĩ wa mũhĩrĩga wa Reubeni, hĩndĩ ĩrĩa thĩ yatũkire ĩkĩmameria o eene, mĩciĩ yao, hema ciao, ndungata ciao o na mahiũ maao. Eekire ũguo andũ oothe meroreire.

7 Nĩ inyuĩ mweyoneire maũndũ macio manene ũguo, marĩa MWATHANI eekire.

Iraathimo cia bũrũri wa kĩĩranĩro

8 “Tondũ ũcio athĩkagĩraai mawatho moothe marĩa ngũmwatha ũũmũũthĩ nĩ geetha mũgĩe na hinya, mũringe rũũĩ mũkegwatĩre bũrũri ũcio ũtuĩke wanyu.

9 Mweka ũguo nĩmũgaatũũra hĩndĩ ndaaya bũrũriinĩ ũcio mwega na mũnoru, ũcio MWATHANI eerĩire maithe maanyu na njiarwa ciao atĩ nĩakaamahe.

10 Nĩ gũkorwo bũrũri ũcio mũgũthiĩ kwĩgwatĩra ũtuĩke wanyu, ndũtariĩ ta bũrũri wa Misiri, kũrĩa mwatũũraga. Kũu mwahanda mbeũ cianyu, nĩkuunithia mwaciunithagĩria maaĩ.

11 No rĩĩrĩ, bũrũri ũrĩa mũkũringa mũkegwatĩre ũtuĩke wanyu-rĩ, nĩ bũrũri wĩ irĩma na ituamba, na nĩkuuraga mbura wega.

12 Na rĩĩrĩ, MWATHANI Ngai wanyu nĩ we ũmenyagĩrĩra bũrũri ũcio na agaikaraga aũcũũthĩrĩirie mwaka wothe.

13 “Nĩ ũndũ ũcio athĩkagĩraai mawatho marĩa ngũmwatha ũũmũũthĩ, mwendage MWATHANI Ngai wanyu na mũmũtungatagĩre na ngoro yothe o na muoyo wothe.

14 Mweka ũguo-rĩ, nĩarĩmuuragĩria mbura hĩndĩ ĩrĩa yagĩrĩire, mbura ĩrĩa nene na ĩrĩa niini, nĩ geetha mũtikaanage irio, ndibei o na kana maguta ma mĩtamaiyũ.

15 O na ningĩ atũme kũgĩe nyeki ya mahiũ maanyu, na inyuĩ mũrĩage mũkahũũna.

16 Mwĩmenyagĩrĩreei mũtikaanaheenererio mũtigane na MWATHANI, mũtungatagĩre ngai ingĩ, o na mũcithaathayagie.

17 Mũngĩgeeka ũguo, MWATHANI nĩakaamũraakarĩra, ahinge matu gũtikaanoire mbura, o nayo thĩ yũmagare ũguo atĩ o na irio itigaakũra. Na inyuĩ mũgĩkue o narua, o na gũtuĩka bũrũri ũcio MWATHANI ekũmũhe nĩ mwega.

18 “Tondũ ũcio, ririkanagaai mawatho maya na mũmaigage ngoroinĩ cianyu. Mooherereei mookoinĩ maanyu, o na mũmeekĩre mathiithiinĩ maanyu matuĩkage kĩririkania.

19 Marutageei ciana cianyu, na mwaragie ũhoro wamo hĩndĩ ĩrĩa mwĩ mũciĩ, hĩndĩ ĩrĩa mwĩ kũraihu na mũciĩ, hĩndĩ ĩrĩa mũhuurũkĩĩte o na mũkĩruta wĩra.

20 Maandĩkageei buremuinĩ cia nyũmba cianyu na ihingoinĩ cianyu,

21 nĩ geetha inyuĩ eene na ciana cianyu mũtũũre hĩndĩ ndaaya bũrũri ũrĩa MWATHANI Ngai wanyu eerĩire maithe maanyu nĩakaamahe. Mũgaatũũra bũrũri ũcio ihinda rĩothe igũrũ rĩgũtũũra igũrũ rĩa thĩ.

22 “Atĩrĩĩrĩ, athĩkagĩraai mawatho moothe marĩa ndamũhe, endagaai MWATHANI Ngai wanyu, ĩkagaai ũrĩa wothe amwathĩĩte, na mũmwĩhokage o we wiki.

23 MWATHANI nĩakamũingatĩra ndũũrĩrĩ icio ciothe ciehere mbere yanyu; na inyuĩ mwĩgwatĩre mabũrũri ma ndũũrĩrĩ nene na irĩ na hinya kũmũkĩra.

24 Na rĩĩrĩ, kũndũ guothe kũrĩa mũgaakinya na makinya maanyu, gũgaatuĩka kwanyu. Nayo mĩhaka ya bũrũri wanyu, ĩkaambĩrĩria werũinĩ na mwena wa na kĩanda, o nginya irĩmainĩ cia Lebanoni na mwena wa na rũgongo. Na mwena wa irathĩro ĩkaambĩrĩria rũũĩinĩ rwa Farati o nginya iriainĩ rĩa Mediteraneani rĩrĩa rĩrĩ na mwena wa ithũĩro.

25 Na rĩĩrĩ, MWATHANI Ngai wanyu nĩagaatũma mwĩtigĩrwo nĩ andũ a bũrũri o wothe ũrĩa mũgaakinya, o ta ũrĩa aamwĩrĩire, na hatikaagĩa mũndũ o na ũrĩkũ ũkaahota kũmwĩtiiria.

26 “Atĩrĩĩrĩ, ũũmũũthĩ nĩndaiga mbere yanyu ũhoro wa kĩraathimo, o na wa kĩrumi.

27 Mũrĩraathimagwo hĩndĩ ĩrĩa mwathĩkĩra maathani ma MWATHANI Ngai wanyu marĩa ndamwatha ũũmũũthĩ.

28 Mũrĩgwatagwo nĩ kĩrumi hĩndĩ ĩrĩa mwarega gwathĩkĩra maathani maya ndamwatha ũũmũũthĩ, mũkaambĩrĩria gũthaathaiya ngai iria mũtaathaathayagia mbere ĩyo.

29 Hĩndĩ ĩrĩa MWATHANI Ngai wanyu akaamũkinyia bũrũri ũrĩa mũgũthiĩ kwĩgwatĩra ũtuĩke wanyu-rĩ, mũkaanĩrĩra ũhoro wa kĩraathimo mũrĩ kĩrĩmainĩ kĩa Gerizimu, na wa kĩrumi mũrĩ kĩrĩmainĩ kĩa Ebali.

30 (Irĩma icio cierĩ irĩ na mwena wa ithũĩro wa rũũĩ rwa Jorodani, bũrũriinĩ wa Akanaani arĩa matũũraga gĩtuambainĩ kĩa Jorodani. Irĩma icio irĩ mwena wa ithũĩro, gũkuhĩ na mĩgandi ya More, hakuhĩ na itũũra rĩa Giligali.)

31 Rĩu mwĩ hakuhĩ mũno kũringa rũũĩ rwa Jorodani, mũkegwatĩre bũrũri ũrĩa MWATHANI Ngai wanyu ekũmũhe ũtuĩke wanyu. Mwawĩgwatĩra na mũũtũũre-rĩ,

32 athĩkagĩraai mawatho moothe marĩa ndĩramwatha ũũmũũthĩ.

Handũ o hamwe ha gũthaathayagĩria

1 “Maya nĩ mo mawatho marĩa mũgaathĩkagĩra matukũ moothe marĩa mũgaatũũra bũrũri ũcio MWATHANI Ngai wa maithe maanyu akaamũhe ũtuĩke wanyu.

2 Mwĩ bũrũri ũcio mũkeegwatĩra-rĩ, no mũhaka mũkaananga kũndũ guothe kũrĩa ndũũrĩrĩ cia bũrũri ũcio ithaathayagĩria: irĩmainĩ iria ndaaya mũno, ithũngũriinĩ, o na rungu rwa mĩtĩ ĩrĩa mĩruru.

3 Mũkoinanga igongoona ciacio na itugĩ ciacio cia mahiga iria mathaathayagia tũcunjĩ tũcunjĩ. Naguo mũhianano wa ngai yao ĩrĩa ĩĩtagwo Ashera mũũcine na mwaki, na mũtemenge mĩhianano yao ya gwacũhio, nĩ geetha ndĩkaanacooke gũthaathaiyo hĩndĩ ĩngĩ kũndũ kũu.

4 “Mũtikaanathaathaiye MWATHANI Ngai wanyu ta ũrĩa andũ a ndũũrĩrĩ icio mathaathayagia ngai ciao.

5 No rĩĩrĩ, MWATHANI nĩagaathuura handũ o hamwe bũrũriinĩ wanyu wothe harĩa mĩhĩrĩga yothe ĩkoonganaga kũmũthaathaiya.

6 Hau-rĩ, nĩ ho makaarutagĩra magongoona ma njino o na magongoona marĩa mangĩ maanyu. Ningĩ no ho makaarutagĩra gĩcunjĩ kĩanyu gĩa ikũmi na matega maanyu, na iheeo iria mwĩrĩire MWATHANI, o na iria mũrutaga mwĩyendeire, o na marigithaathi ma ng’ombe, mbũri na ma ng’ondu cianyu.

7 Hau no ho inyuĩ na njiarwa cianyu mũkaarĩagĩra na mũkenagĩre indo cianyu iria mũrutĩire wĩra mũrĩ mbere ya MWATHANI Ngai wanyu ũcio ũmũraathimĩĩte ũguo.

8 “Ihinda rĩu rĩakinya, mũtikaaneeke ũrĩa mũkoreetwo mũgĩĩka. Nginyagia ũũmũũthĩ, o mũndũ akoreetwo agĩthaathaiya Ngai na njĩra o ĩrĩa ekuona ĩmwagĩrĩire.

9 Mũkoreetwo mũgĩĩka ũguo, tondũ mũtirĩ mũrakinya bũrũri ũrĩa MWATHANI Ngai wanyu ekũmũhe kũrĩa mũgaatũũra na thaayũ.

10 No rĩĩrĩ, hĩndĩ ĩrĩa mũkaaringa rũũĩ rwa Jorodani, MWATHANI nĩagaatũma mwĩgwatĩre bũrũri ũcio na mũtũũre kuo. Hĩndĩ ĩyo nĩakaamũgitĩra kuuma gwĩ thũ cianyu ciothe na nĩmũgaatũũra na thaayũ.

11 MWATHANI Ngai wanyu nĩagaathuura o handũ hamwe harĩa agathaathayagĩrio, na hau nĩ ho mũkaareehage magongoona moothe ta ũrĩa ndamwatha: magongoona maanyu ma njino, magongoona marĩa mangĩ, gĩcunjĩ gĩa ikũmi, matega, o na iheeo iria mwĩrĩire MWATHANI.

12 Hau no ho mũgaakenagĩra mbere ya MWATHANI Ngai wanyu inyuĩ eene, ciana cianyu, ndungata cianyu, o na Alawii arĩa matũũraga matũũrainĩ maanyu, nĩ ũndũ matikaagaĩrwo gĩthaka hamwe na inyuĩ.

13 Mwĩmenyerereei mũtikaanarutĩre magongoona macio o harĩa mũkeenda.

14 No mũhaka mũkaarutagĩra magongoona maanyu o handũ hamwe harĩa MWATHANI agaathuura mũhĩrĩgainĩ ũmwe wa mĩhĩrĩga yanyu. Hau nĩ ho mũkaarutagĩra magongoona maanyu ma njino, na mwĩkage maũndũ marĩa mangĩ ndamwatha mwĩkage.

15 “No rĩĩrĩ, mwahota gũthĩnjĩra na kũrĩĩra nyamũ cianyu o harĩa hoothe mũngĩkorwo mũgĩtũũra, na mũrĩe nyama ciacio o ta ũrĩa MWATHANI akaamũraathima. Inyuothe mwĩ na thaahu kana mũtarĩ, mwahota kũrĩa nyama icio o ta ũrĩa mũngĩrĩa nyama cia thwariga, kana cia thiiya.

16 No mũtikaanarĩe thakame yacio; ĩyo nĩgũita mũkaamĩitaga thĩ o ta maaĩ.

17 No rĩĩrĩ, mũtikaanarĩĩre mĩciĩinĩ yanyu kĩndũ o na kĩmwe kĩa indo iria mwamũrĩire MWATHANI; gĩ gĩcunjĩ gĩa ikũmi kĩa irio, ndibei, maguta ma mĩtamaiyũ, indo iria mwĩrĩire MWATHANI, iheeo iria mũrutaga mwĩyendeire, iheeo ingĩ o ciothe, o na kana marigithaathi ma ng’ombe, mbũri, na ng’ondu.

18 Indo icio ciothe-rĩ, mũgaacirĩagĩra mbere ya MWATHANI Ngai wanyu, o handũ harĩa agaathuura ha gũthaathayagĩrio. Mũgaacirĩagĩra o hau, inyuĩ eene, ciana cianyu, ndungata cianyu, o na Alawii arĩa matũũraga matũũrainĩ maanyu. No ho mũgaakenagĩra mwĩ mbere ya MWATHANI Ngai wanyu nĩ ũndũ wa maũndũ moothe marĩa mwĩkĩĩte.

19 Mwĩmenyagĩrĩreei mũtikaanatiganĩrie Alawii matukũ marĩa moothe mũgaatũũra bũrũriinĩ ũcio wanyu.

20 “Na rĩĩrĩ, hĩndĩ ĩrĩa MWATHANI Ngai wanyu akaamwaramĩria mĩhaka ya bũrũri wanyu ta ũrĩa aamwĩrĩĩte, no mũrĩage nyama o rĩrĩa mũngĩenda.

21 Na rĩĩrĩ, mũngĩkoona handũ harĩa haamũrĩĩtwo ha gũthaathayagĩrio haraihĩrĩirie-rĩ, hĩndĩ ĩyo no mũthĩnje ng’ombe, mbũri kana ng’ondu iria MWATHANI amũheete, o rĩrĩa rĩothe mũngĩenda, na mũcirĩĩre mĩciĩinĩ yanyu o ta ũrĩa ndamwatha.

22 Na rĩĩrĩ, mũndũ o wothe wĩ na thaahu kana ũtarĩ, ahota kũrĩa nyama icio, o ta ũrĩa angĩrĩa nyama cia thwariga kana cia thiiya.

23 No rĩĩrĩ, mũtikaanarĩanĩrie nyama hamwe na thakame, nĩ gũkorwo thakame nĩ yo ĩ na muoyo. Mũtiagĩrĩirwo nĩkũrĩanĩria muoyo hamwe na nyama.

24 Mũtikaanarĩe thakame ta irio; mĩitageei thĩ o ta maaĩ.

25 Na rĩĩrĩ, mũngĩathĩkira watho ũyũ, ũndũ ũcio nĩũrĩkenagia MWATHANI, na nĩmũrĩonaga maũndũ meega inyuĩ eene, o hamwe na njiarwa cianyu.

26 No rĩĩrĩ, iheeo cianyu o na indo iria mwĩrĩire MWATHANI mũgaacitwaraga o handũ harĩa hathuurĩĩtwo ha gũthaathayagĩria.

27 Hau no ho mũkaarutagĩra kĩgongoonainĩ kĩa MWATHANI Ngai wanyu magongoona ma njino. Ningĩ no ho mũkaarutagĩra magongoona marĩa mũngĩrĩa nyama ciamo, no mũgaita thakame yamo igũrũ wa kĩgongoona.

28 Mwĩmenyagĩrĩreei mũhingagie mawatho moothe marĩa ndamwatha, na nĩmũrĩonaga maũndũ meega inyuĩ eene o na njiarwa cianyu tene na tene, tondũ nĩmũrĩkoragwo mũgĩĩka maũndũ marĩa moonagwo marĩ meega na maagĩrĩru nĩ MWATHANI Ngai wanyu.

Gũkaanio gũthaathaiya mĩhianano

29 “Na rĩĩrĩ, MWATHANI Ngai wanyu nĩakamũingatĩra ndũũrĩrĩ ciehere mbere yanyu, na inyuĩ mwĩgwatĩre bũrũri wacio mũtũũre kuo.

30 Na rĩĩrĩ, MWATHANI arĩĩkia kũniina ndũũrĩrĩ icio-rĩ, mwĩmenyerereei mũno mũtikaanarũmĩrĩre mĩtugo yacio yagũthaathaiya nĩ ũndũ yahota kũmũtoonyia mũtegoinĩ. Ningĩ-rĩ, mũtikaanatuĩrie ũrĩa ndũũrĩrĩ icio ithaathayagia ngai ciacio nĩguo atĩ o na inyuĩ mũthaathayagie ta cio.

31 Mũtikaanathaathaiye MWATHANI Ngai wanyu ũguo nĩ gũkorwo rĩrĩa rĩothe igũthaathaiya ngai icio, ciĩkaga maũndũ me thaahu marĩa MWATHANI Ngai athũire. O na ningĩ nĩicinaga igongoonainĩ ciacio ciana ciacio ta magongoona.

32 “Ũndũ o wothe ndamwatha mwĩkage-rĩ, ĩkagaai guo; mũtikaanawongerere kana mũũnyiihanyiihie.