Author: admin

Mawatho makoniĩ mĩhĩtwa

1 Musa akĩĩra atongoria a mĩhĩrĩga ya Isiraeli atĩrĩ, “Maya nĩ mo maũndũ marĩa MWATHANI aathanĩĩte.

2 Mũndũ mũrũme angĩĩhĩta oige atĩ nĩekũhe MWATHANI ũndũ kana ehĩte atĩ nĩekwĩhinga kĩndũ, ndaagĩrĩirwo nĩkuugũkwo ũndũ o na ũmwe wa macio ehĩtĩĩte; aagĩrĩirwo nĩkũhingia ũrĩa wothe oigĩĩte nĩegwĩka.

3 “Mũirĩĩtu wĩ gwa ithe angĩĩhĩta oige atĩ nĩekũhe MWATHANI kĩndũ kana ehĩte atĩ nĩekwĩhinga ũndũ,

4 na ithe aigue ũhoro ũcio na ndamũũrie, no mũhaka ahingie mĩhĩtwa ĩyo ehĩtĩĩte.

5 No ithe angĩregana na mĩhĩtwa ĩyo aigua ũhoro wayo, mũirĩĩtu ũcio ndaagĩrĩirwo nĩkũhingia mwĩhĩtwa o na ũmwe. MWATHANI nĩekũmuohera nĩ ũndũ nĩ ithe wamũgiria amĩhingie.

6 “Mũirĩĩtu ũcio angĩhika arĩ o na mĩhĩtwa ĩyo yake eehĩtire akĩendaga kana ataambĩĩte gwĩciiria,

7 mũthuuriwe angĩigua ũhoro wayo na ndamwĩre ũndũ, no mũhaka ahingie mĩhĩtwa ĩyo yake.

8 No rĩĩrĩ, mũthuuriwe angĩigua ũhoro wayo aregane nayo, ndaagĩrĩirwo nĩkũmĩhingia. MWATHANI nĩekũmuohera.

9 “No mũhaka mũtumia wa ndigwa kana mũtumia ũtiganĩĩte na mũthuuriwe ahingagie mĩhĩtwa yothe ĩrĩa ehĩtĩĩte.

10 Mũtumia mũhiku angĩĩhĩta mwĩhĩtwa e kwa mũthuuriwe,

11 mũthuuriwe angĩigua ũhoro wa mĩhĩtwa ĩyo na ndamwĩre ũndũ, no mũhaka mũtumia ũcio ahingie mĩhĩtwa ĩyo ehĩtĩĩte.

12 No rĩĩrĩ, mũthuuriwe angĩigua ũhoro wayo amũkararie, ndaagĩrĩirwo nĩkũmĩhingia. MWATHANI nĩekũmuohera nĩ ũndũ nĩ mũthuuriwe wamũgiria amĩhingie.

13 Mũthuuriwe e na ũhoti wa gwĩtĩkĩria kana kũregana na mĩhĩtwa ĩrĩa mũtumia wake angĩkorwo ehĩtĩĩte.

14 No rĩĩrĩ, mũthuuriwe angĩaga kũregana nayo aigua ũhoro wayo, no mũhaka mũtumia ũcio ahingie ũrĩa wothe ehĩtĩĩte. Mũthuuriwe nĩamĩtĩkĩrĩĩte nĩ ũndũ ndaigana kũregana nayo aigua ũhoro wayo.

15 No rĩĩrĩ, mũthuuriwe angĩregana nayo arĩĩkĩĩtie kũigua ũhoro wayo, we mwene nĩ we ũgaacookererwo nĩ ũũru wa mĩhĩtwa ĩyo kwaga kũhingio.”

16 Macio nĩ mo mawatho marĩa MWATHANI aaheire Musa makoniĩ mũthuuri na mũtumia wake, na mũirĩĩtu wĩ gwa ithe.

Aisiraeli kũrũa mbaara theru na Amidiani

1 Naake MWATHANI akĩĩra Musa atĩrĩ,

2 “Herithia Amidiani nĩ ũndũ wa ũrĩa meekire andũ a Isiraeli. Warĩĩkia gwĩka ũguo nĩũgũkua.”

3 Kwoguo Musa akĩĩra andũ atĩrĩ, “Mwĩyoheei indo cia mbaara nĩguo mũtharĩkĩre Amidiani mũmaherithie nĩguo mũrĩhĩrie ũrĩa meekire MWATHANI.

4 Kuuma harĩ o mũhĩrĩga wa Isiraeli andũ ngiri ĩmwe nĩ o megũthiĩ mbaarainĩ.”

5 Kwoguo o mũhĩrĩga ũgĩthuura andũ ngiri ĩmwe, oothe makĩhinga andũ ngiri ikũmi na igĩrĩ mehaarĩirie kũrũa.

6 Musa agĩkĩmatũma mathiĩ mbaara matongoreetio nĩ Finehasi mũrũ wa Eleazaru mũthĩnjĩri Ngai, ũrĩa wakuuire indo imwe cia handũ harĩa hatheru na tũrumbeeta twa kũhuuhwo hĩndĩ ya mbaara.

7 Magĩgĩtharĩkĩra Amidiani o ta ũrĩa MWATHANI aathĩĩte Musa, makĩũraga arũme oothe,

8 hamwe na athamaki ataano a Amidiani, nĩ o: Evi, Rekemu, Zuru, Huri na Reba. O na ningĩ nĩmooragire Balaamu mũrũ wa Beori.

9 Andũ a Isiraeli magĩtaha atumia a Amidiani na ciana ciao, o hamwe na ng’ombe, na ng’ondu, na indo ciao ciothe.

10 Magĩcooka magĩcina matũũra maao moothe na kambĩ ciao.

11 Magĩgĩkuua indo ciothe iria maatahĩĩte o hamwe na andũ na mahiũ,

12 magĩtwarĩra Musa na Eleazaru o hamwe na andũ oothe a Isiraeli arĩa maakĩĩte kambĩ yao werũinĩ wa Moabi, mũrĩmo ũũrĩa ũngĩ wa Jorodani, kũng’ethera Jeriko.

Thigari gũcooka

13 Musa, Eleazaru mũthĩnjĩri Ngai, na atongoria oothe a mũingĩ magĩthiĩ kũmatũnga nja ya kambĩ.

14 Musa akĩraakario nĩ atongoria a mbaara arĩa maatongoragia thigari ngiri na arĩa maatongoragia thigari igana arĩa macookeete kuuma mbaarainĩ.

15 Akĩmooria atĩrĩ, “Mũrahonokirie atumia oothe nĩkĩ?

16 Ririkanaai atĩ nĩ atumia o aya maarũmĩrĩire mataaro ma Balaamu, magĩtũma andũ maregane na MWATHANI mwĩ Peori. Ũndũ ũcio nĩguo wareehithĩirie andũ a MWATHANI mũthiro.

17 Nĩ ũndũ ũcio, ũragaai kahĩĩ o goothe, o hamwe na mũtumia o wothe wanakoma na mũndũ mũrũme.

18 No airĩĩtu arĩa matarĩ maakomwo nao mwĩtigĩrie.

19 Na rĩĩrĩ mũndũ o wothe ũũraganĩĩte kana akahuutia kĩimba egũikara nja ya kambĩ mĩthenya mũgwanja. Mũthenya wa gatatũ na wa mũgwanja mwĩtherie o hamwe na atumia arĩa mũtahĩĩte.

20 No mũhaka mũtherie nguo ciothe na kĩndũ o gĩothe gĩthondekeetwo na rũũa, guoya wa mbũri, o na mĩtĩ.”

21 Naake Eleazaru mũthĩnjĩri Ngai akĩĩra njamba cia ita iria ciacookeete atĩrĩ, “Maya nĩ mo mawatho marĩa MWATHANI aathĩĩte Musa.

22-23 Kĩndũ o gĩothe kĩrĩa gĩtangĩhĩa ta thahabu, betha, gĩcango, cuuma, kĩgera kĩa ibaaba na kĩa bũrũbũrũ igũtherio na mwaki, icooke itherio na maaĩ ma gũthaahũra. No indo icio ingĩ ciothe igũtherio na maaĩ ma gũthaahũra.

24 Mũthenya wa mũgwanja mũthambie nguo cianyu, mũgĩthirwo nĩ thaahu, mũgĩcooke kambĩ.”

Ũrĩa indo iria ciatahĩĩtwo ciagayanirwo

25 Naake MWATHANI akĩĩra Musa atĩrĩ,

26 “Wee na Eleazaru na atongoria a mũingĩ taraai indo ciothe iria iratahirwo hamwe na andũ na mahiũ.

27 Mũcooke mũcigayanie maita meerĩ, imwe ituĩke cia thigari iria irathiĩte ita, nacio icio ingĩ ituĩke cia mũingĩ.

28 Na rĩĩrĩ, kuuma harĩ igai rĩa njamba cia ita, mũrutĩre MWATHANI mũgwate ũmwe kuuma harĩ o mĩgwate magana mataano, na mwĩke o taguo na ng’ombe, ndigiri, ng’ondu, na mbũri.

29 Mũcinengere Eleazaru mũthĩnjĩri Ngai irĩ kĩheeo kĩa mwanya kĩrutĩirwo MWATHANI.

30 Kuuma harĩ igai rĩa mũingĩ, mũrute mũgwate ũmwe kuuma harĩ mĩgwate mĩrongo ĩtaano, na mwĩke o taguo na ng’ombe, ndigiri, ng’ondu na mbũri. Mũcinengere Alawii arĩa maroraga Hema ya MWATHANI.”

31 Naake Musa na Eleazaru magĩĩka o ta ũrĩa MWATHANI aamaathĩĩte.

32-35 Ũyũ nĩguo mũigana wa andũ oothe na indo ciothe iria ciatahĩĩtwo nĩ njamba cia ita: mbũri na ng’ondu ngiri magana matandatũ na mĩrongo mũgwanja na ithaano (675,000), ng’ombe ngiri mĩrongo mũgwanja na igĩrĩ (72,000), ndigiri ngiri mĩrongo ĩtandatũ na ĩmwe (61,000), na airĩĩtu arĩa mataakomeetwo nao ngiri mĩrongo ĩtatũ na igĩrĩ (32,000).

36-40 Nuthu ĩrĩa yatuĩkire ya thigari yaiganaga ta ũũ: mbũri na ng’ondu ngiri magana matatũ na mĩrongo ĩtatũ na mũgwanja na magana mataano (337,500), nacio magana matandatũ na mĩrongo mũgwanja na ithaano (675) igĩtuĩka cia MWATHANI; ng’ombe ngiri mĩrongo ĩtatũ na ithathatũ (36,000), nacio mĩrongo mũgwanja na igĩrĩ igĩtuĩka cia MWATHANI; ndigiri ngiri mĩrongo ĩtatũ na magana mataano (30,500), nacio mĩrongo ĩtandatũ na ĩmwe igĩtuĩka cia MWATHANI, na airĩĩtu ngiri ikũmi na ithathatũ (16,000), nao mĩrongo ĩtatũ na eerĩ magĩtuĩka a MWATHANI.

41 Kwoguo Musa agĩkĩnengera Eleazaru mũthĩnjĩri Ngai indo icio ituĩke kĩheeo kĩa mwanya kĩrutĩirwo MWATHANI, o ta ũrĩa MWATHANI aamwathĩĩte.

42-46 Igai rĩa mũingĩ rĩaiganaga o ta rĩa thigari: mbũri na ng’ondu ngiri magana matatũ na mĩrongo ĩtatũ na mũgwanja na magana mataano (337,500), ng’ombe ngiri mĩrongo ĩtatũ na ithathatũ (36,000), ndigiri ngiri mĩrongo ĩtatũ na magana mataano (30,500), na airĩĩtu mataakomeetwo nao ngiri ikũmi na ithathatũ (16,000).

47 Kuuma harĩ igai rĩu rĩao Musa akĩoya mũirĩĩtu ũmwe kuuma harĩ o airĩĩtu mĩrongo ĩtaano, na agĩĩka o taguo na nyamũ. Agĩcinengera Alawii arĩa maaroraga Hema ya MWATHANI, o ta ũrĩa aathĩĩtwo nĩ MWATHANI.

48 Nao anene a thigari magĩthiĩ kũrĩ Musa makĩmwĩra atĩrĩ,

49 “Mwathi witũ, nĩtwatara njamba cia ita iria tũratongoreetie mbaarainĩ, na gũtirĩ o na ũmwe ũtarĩ ho.

50 Kwoguo nĩtwareehere MWATHANI indo iria o mũndũ aroonire: mathaga ma thahabu, bangiri, mĩrĩnga ya magũrũ, icũhĩ irĩ na marĩĩtwa, icũhĩ cia matũ, na mĩgathĩ. Twarutĩra MWATHANI indo ici irĩ cia kũrĩhĩra mĩoyo iitũ nĩguo atũgitagĩre.”

51 Musa na Eleazaru magĩkĩamũkĩra mathaga macio ma thahabu kuuma kũrĩ o.

52 Thahabu yothe ĩrĩa maarutire yarĩ na ũritũ wa kiro magana meerĩ.

53 Andũ arĩa mataarĩ anene a njamba cia ita makĩigĩra indo iria maatahĩĩte.

54 Musa na Eleazaru magĩgĩkuua thahabu ĩyo, makĩmĩtwara Hemainĩ ya gũtũnganwo, nĩ geetha MWATHANI agitagĩre andũ a Isiraeli.

Mĩhĩrĩga ya mwena wa na irathĩro wa rũũĩ rwa Jorodani

1 Na rĩĩrĩ, andũ a mũhĩrĩga wa Reubeni na wa Gadi maarĩ na mahiũ maingĩ mũno. Marĩĩkia kuona ũrĩa bũrũri wa Jazeri na wa Gileadi warĩ morĩithio meega,

2 magĩgĩthiĩ kũrĩ Musa na Eleazaru mũthĩnjĩri Ngai na atongoria a mũingĩ. Makĩmeera atĩrĩ,

3-4 “MWATHANI nĩateithĩrĩirie Aisiraeli makeegwatĩra matũũra ma Atarothu, Diboni, Jazeri, Nimura, Heshiboni, Eleale, Sebamu, Nebo, na Beoni. Matũũra macio me na morĩithio meega, na ithuĩ twĩ na mahiũ maingĩ mũno.

5 Angĩkorwo nĩtwĩtĩkĩrĩkĩĩte nĩ we-rĩ, reke ithuĩ ndungata ciaku tũheeo bũrũri ũyũ ũtuĩke igai riitũ, ndũkaareke tũringe rũũĩ rwa Jorodani.”

6 No Musa akĩmooria atĩrĩ, “Mũkwenda gũikara gũũkũ rĩrĩa Aisiraeli arĩa angĩ marathiĩ mbaarainĩ?

7 Kaĩ mũrakĩenda kũũraga Aisiraeli arĩa angĩ ngoro, mũgirie maringe rũũĩ rwa Jorodani, makinye bũrũri ũrĩa maheetwo nĩ MWATHANI?

8 Ũguo noguo maithe maanyu meekire rĩrĩa ndamatũmire kuuma Kadeshi Barinea magathigaane bũrũri ũcio.

9 Amu rĩrĩa moimagarire magĩthiĩ nginya gĩtuamba kĩa Eshikoli makĩona bũrũri ũcio, maacooka nĩmooragire ngoro cia andũ a Isiraeli, makĩmagiria gũthiĩ bũrũri ũcio maaheetwo nĩ MWATHANI.

10 Mũthenya ũcio MWATHANI nĩaraakarire na akĩĩhĩta atĩrĩ,

11 ‘Gũtirĩ o na ũmwe wa andũ arĩa moimire Misiri wĩ na ũkũrũ wa makĩria ma mĩaka mĩrongo ĩĩrĩ ũkoona bũrũri ũrĩa ndeerĩire Aburahamu, Isaaka, na Jakubu tondũ matianjathĩkĩire.

12 Gũtirĩ o na ũmwe ũkaaũtoonya tiga Kalebu mũrũ wa Jefune ũrĩa Mũkenizi, na Joshua mũrũ wa Nuni, amu acio nĩmaanjathĩkĩire.’

13 MWATHANI agĩkĩraakario nĩ andũ, agĩtũma moorũũre werũinĩ mĩaka mĩrongo ĩna nginya rũciaro rũrĩa rwamũraakarĩĩtie rũgĩthira.

14 Rĩu na inyuĩ nĩmũgĩtuĩkĩĩte ta maithe maanyu, mũgatuĩka rũciaro rwerũ rwa andũ me na meehia marenda gũtũma maraakara ma MWATHANI moongerereke kũrĩ Aisiraeli.

15 Kwoguo inyuĩ andũ a Reubeni na a Gadi mwarega kũmwathĩkĩra, nĩegũtiganĩria andũ aya oothe werũinĩ na nĩ inyuĩ mũkũmaniinithia.”

16 Magĩgĩkuhĩrĩria Musa makĩmwĩra atĩrĩ, “Amba ũreke twake gũũkũ ciugũ cia mahiũ maitũ, na twakĩre atumia na ciana ciitũ matũũra mairigĩre na thingo cia hinya.

17 Tũcooke tuoe indo ciitũ cia mbaara, twĩhaarĩirie gũthiĩ na Aisiraeli arĩa angĩ. Tũkũmatongoria tũkarũe, o nginya tũtige nĩmakinya bũrũri ũrĩa ũgaatuĩka igai rĩao. Hĩndĩ ĩyo atumia na ciana ciitũ megũkorwo maikarĩĩte matũũrainĩ mairigĩre na thingo cia hinya magitĩirwo kuuma harĩ andũ a gũũkũ.

18 Ithuĩ tũtigaacooka mĩciĩ gwitũ Aisiraeli arĩa angĩ oothe mateenyiitĩire igai rĩao.

19 Ithuĩ-rĩ, gũtirĩ kĩndũ tũkwenda kũgaya mũrĩmo ũũrĩa ũngĩ wa rũũĩ rwa Jorodani kana na kũu mbere, amu nĩtũgĩĩte na igai riitũ mũrĩmo ũyũ wa rũũĩ rwa Jorodani mwena wa irathĩro.”

20 Musa agĩkĩmeera atĩrĩ, “Angĩkorwo nĩmũgwĩka ũguo mũroiga, oyai indo cia mbaara rĩu haaha mbere ya MWATHANI mũthiĩ mũkarũe.

21 Njamba cianyu cia ita nĩikuringa rũũĩ rwa Jorodani, na itongoreetio nĩ MWATHANI itharĩkĩre thũ ciitũ o nginya MWATHANI acihoote,

22 anyiite bũrũri ũcio. Thuutha wa ũguo, no mũgĩcooke gũũkũ, nĩ ũndũ nĩmũgaagĩkorwo mũhingĩĩtie kĩĩranĩro kĩanyu kũrĩ MWATHANI, o na kũrĩ Aisiraeli arĩa angĩ. Hĩndĩ ĩyo MWATHANI nĩageetĩkĩra atĩ bũrũri ũyũ wĩ mwena wa irathĩro wa rũũĩ rwa Jorodani nĩ wanyu.

23 No mwaga gwĩka kũringana na kĩĩranĩro kĩanyu nĩmũgaakorwo mwĩhĩĩtie harĩ MWATHANI; na inyuĩ mũkĩmenye na ma atĩ meehia maanyu nĩ mo magaatũma mũherithio.

24 Gĩakĩreei atumia na ciana cianyu matũũra, na mwakĩre mahiũ maanyu ciugũ, mũcooke mũhingie kĩĩranĩro kĩanyu!”

25 Nao andũ a Gadi na a Reubeni makĩĩra Musa atĩrĩ, “Nĩtũgwĩka ũguo wathana.

26 Ciana ciitũ na atumia aitũ, o hamwe mahiũ maitũ nĩmegũtigwo gũũkũ matũũrainĩ ma Gileadi.

27 No rĩĩrĩ, ithuothe nĩtwĩhaarĩirie gũthiĩ mbaarainĩ tũtongoreetio nĩ MWATHANI. Nĩtũkũringa rũũĩ rwa Jorodani tũthiĩ tũkarũe o ta ũguo woiga.”

28 Musa agĩkĩhe Eleazaru mũthĩnjĩri Ngai, Joshua, na atongoria acio angĩ a Aisiraeli mawatho

29 maya akĩmeera atĩrĩ, “Arũme a mũhĩrĩga wa Gadi na wa Reubeni maaringa rũũĩ rwa Jorodani mehaarĩirie kũrũa matongoreetio nĩ MWATHANI mamũteithĩrĩrie kũhootana, hĩndĩ ĩyo mũkaamahe bũrũri wa Gileadi ũtuĩke igai rĩao.

30 No maaga kũringa hamwe na inyuĩ meyoheete indo cia mbaara, makaagaya hamwe na inyuĩ bũrũri wa Kanaani.”

31 Nao arũme a mũhĩrĩga wa Gadi na wa Reubeni makiuga atĩrĩ, “Mwathi witũ, ũrĩa MWATHANI atwathĩĩte-rĩ, noguo tũgwĩka.

32 Nĩtũkũringa rũũĩ rwa Jorodani twĩyoheete indo cia mbaara tũtongoreetio nĩ MWATHANI tũtoonye bũrũri wa Kanaani, nĩguo tũtigĩrwo mũrĩmo ũyũ wa rũũĩ rwa Jorodani ũtuĩke igai riitũ.”

33 Na rĩĩrĩ, Musa agĩkĩhe andũ a Gadi, a Reubeni, na a nuthu ya mũhĩrĩga wa Manase bũrũri wothe wa Sihoni mũthamaki wa Amori, na wa Ogu mũthamaki wa Bashani, na matũũra na ng’ongo iria ciamarigiicĩirie.

34 Nao andũ a Gadi, magĩaka rĩngĩ matũũra mairigĩre na thingo cia hinya ma Diboni, Atarothu, Aroeri,

35 Atorothu Shofani, Jazeri, Jogibeha,

36 Bethi Nimira, na Bethi Harani.

37 Nao andũ a Reubeni magĩaka rĩngĩ matũũra ma Heshiboni, Eleale, Kiriathaimu,

38 Nebo, Baali Meoni (rĩĩtwa rĩa itũũra rĩĩrĩ nĩrĩagarũrirwo), na Sibima. Nĩmaamaheire matũũra marĩa maakire rĩngĩ marĩĩtwa mangĩ.

39 Nao andũ a mbarĩ ya Makiru mũrũ wa Manase magĩtharĩkĩra bũrũri wa Gileadi makĩũtuunyana, makĩingata Aamori arĩa maarĩ kuo.

40 Naake Musa agĩkĩhe andũ a mbarĩ ya Makiru bũrũri ũcio wa Gileadi, nao magĩgĩtũũra kuo.

41 Naake Jairũ, wa mũhĩrĩga wa Manase, agĩtharĩkĩra na agĩtuunyana matũũra mamwe, akĩmatua “Matũũra ma Jairũ.”

42 Naake Nobahu agĩtharĩkĩra na agĩtuunyana Kenathu o hamwe na matũũra maakuo, agĩgũtua Nobahu ta ũrĩa we mwene eetagwo.

Rũgendo rwa kuuma Misiri gũthiĩ Moabi

1 Ũũ nĩguo andũ a Isiraeli maathiaga makĩambaga hema ciao moima Misiri. Maathiaga kũringana na mĩhĩrĩga yao matongoreetio nĩ Musa na Harũni.

2 Musa nĩathiaga akĩandĩkaga marĩĩtwa ma kũrĩa maambaga hema ta ũrĩa aathĩĩtwo nĩ MWATHANI.

3 Andũ a Isiraeli moimire Misiri mũthenya wa ikũmi na ĩtaano wa mweri wa mbere, mũthenya ũrĩa warũmĩrĩire Bathaka ya mbere. Moimagarire kuuma itũũra rĩa Ramesese magitĩirwo nĩ MWATHANI, meeroreirwo nĩ andũ a Misiri oothe.

4 Hĩndĩ ĩyo Amisiri nĩgũthika maathikaga aariũ aao a marigithaathi arĩa mooragĩĩtwo nĩ MWATHANI. MWATHANI nĩonanĩĩtie atĩ aarĩ na hinya gũkĩra ngai cia andũ a Misiri na njĩra ĩyo.

5 Andũ a Isiraeli moima Ramesese maathiire makĩamba hema ciao Sukothu.

6 Moima Sukothu magĩthiĩ makĩamba hema ciao Ethamu, rũteereinĩ rwa werũ.

7 Moima Ethamu magĩcooka na thuutha magĩthiĩ Pi Hahirothu, mwena wa irathĩro wa Baali Zefoni, makĩamba hema ciao hakuhĩ na Migidoli.

8 Moima Pi Hahirothu, magĩtuĩkanĩria Iria Ituune magĩtoonya werũinĩ wa Shuru, na thuutha wa gũthiĩ rũgendo rwa mĩthenya ĩtatũ makĩamba hema ciao Mara.

9 Moima kũu magĩthiĩ Elimu, kũrĩa kwarĩ na ithima ikũmi na igĩrĩ na mĩtĩ ya mĩkĩndũ mĩrongo mũgwanja, makĩamba hema ciao kuo.

10 Moima Elimu magĩthiĩ makĩamba hema ciao hũgũrũrũinĩ cia Iria Ituune.

11 Moima kũu magĩthiĩ makĩamba hema ciao werũinĩ wa Sini.

12 Moima werũinĩ wa Sini magĩthiĩ makĩamba hema ciao Dofika.

13 Moima Dofika magĩthiĩ makĩamba hema ciao Alushu.

14 Moima Alushu magĩthiĩ makĩamba hema ciao Refidimu, kũrĩa gũtaarĩ maaĩ o na maniini.

15-37 Kuuma Refidimu kinya kĩrĩmainĩ kĩa Hori, andũ a Isiraeli maathiire makĩambaga hema kũndũ gũũkũ: werũinĩ wa Sinai, Kibirothu Hataava (kana “Mbĩĩrĩra cia Thuti”), Hazerothu, Rithima, Rimoni Perezu, Libina, Risa, Kehelatha, kĩrĩmainĩ kĩa Sheferi, Harada, Makehelothu Tahathu, Tera, Mithika, Hashimona, Moserothu, Bene Jaakani, Hori Hagidigadi, Jotibatha, Aburona, Ezioni Geberi, werũinĩ wa Zini (kũu nĩkuo Kadeshi), kĩrĩmainĩ kĩa Hori, rũteereinĩ rwa bũrũri wa Edomu.

38-39 Na rĩĩrĩ, Harũni mũthĩnjĩri Ngai arĩ wa mĩaka igana rĩa mĩrongo ĩĩrĩ na ĩtatũ, akĩambata kĩrĩma kĩa Hori, ta ũrĩa aathĩĩtwo nĩ MWATHANI. Naake agĩkuĩra kuo mũthenya wa mbere wa mweri wa gataano, mwakainĩ wa mĩrongo ĩna kuuma andũ a Isiraeli moima bũrũri wa Misiri.

40 Naake mũthamaki wa Aradi, ũrĩa watũũraga mwena wa kĩanda wa Kanaani nĩaiguire atĩ Aisiraeli nĩmarooka.

41-47 Kuuma kĩrĩmainĩ kĩa Hori, andũ a Isiraeli maathiire meerekeire Moabi makĩambaga hema kũndũ gũũkũ: Zalimona, Punoni Obothu, maganjo ma Abarimu bũrũriinĩ wa Moabi, Diboni Gadi, Alimoni Dibulathaimu, irĩmainĩ cia Abarimu hakuhĩ na kĩrĩma kĩa Nebo.

48 Maarĩĩkĩrĩirie werũinĩ wa Moabi mũrĩmo ũũrĩa ũngĩ wa rũũĩ rwa Jorodani kũng’ethera Jeriko.

49 Kambĩ yao yoimĩĩte Bethi Jeshamothi nginya gĩtuamba kĩa Mĩgaa.

Aisiraeli gũtarwo mbere ya kũringa rũũĩ rwa Jorodani

50 Na rĩĩrĩ, MWATHANI nĩarĩirie Musa kũu werũinĩ wa Moabi hakuhĩ na rũũĩ rwa Jorodani kũng’ethera Jeriko.

51 Aamwĩrire eere andũ a Isiraeli atĩrĩ, “Mwaringa rũũĩ rwa Jorodani mũtoonye bũrũri wa Kanaani,

52 mũkaingata andũ oothe arĩa matũũraga bũrũri ũcio, mwanange mĩhianano yao yothe ya mahiga na ya igera, hamwe na kũndũ guothe gũtũũgĩru kũrĩa mathaathayagĩria.

53 Nĩmũkeenyiitĩra bũrũri ũcio mũtũũre kuo, amu nĩndĩmũheete ũtuĩke igai rĩanyu.

54 Mũkaagaya bũrũri ũcio kũringana na mĩhĩrĩga na ũndũ wa gũcuuka mĩtĩ. O mũhĩrĩga ũkaagayana kũringana na mbarĩ ciaguo, nĩ geetha mũhĩrĩga ũrĩa mũnene ũgaĩrwo kũndũ kũnene, naguo ũrĩa mũniini ũgaĩrwo kũndũ kũniini.

55 No rĩĩrĩ, mwaga kũingata andũ oothe arĩa matũũraga bũrũri ũcio, arĩa mũgaatigia kuo makahaana ta mahuti me thĩinĩ wa maitho maanyu na ta mĩigua mĩĩrĩinĩ yanyu. Magaatũũra mamũthĩĩnagia bũrũriinĩ ũcio.

56 Na rĩĩrĩ, mwaga kũmaingata, ngaamwananga ta ũrĩa ndabangĩĩte kũmaananga.”

Mĩhaka ya bũrũri

1 Ningĩ MWATHANI akĩĩra Musa

2 eere andũ Aisiraeli atĩrĩ, “Mwatoonya bũrũri wa Kanaani, bũrũri ũrĩa ngũmũhe mĩhaka yaguo ĩgaakorwo ĩhaana ta ũũ:

3 Mũhaka wa na kĩanda ũgaakorwo werũinĩ wa Zini kũrigania na mũhaka wa Edomu. Ũkaambĩrĩria mũthiainĩ wa na kĩanda wa iria rĩa Cumbĩ

4 ũcooke ũikũrũke ũroreete Mwanya wa Akirabimu, ũthiĩ ũhĩtũke Zini ũikũrũke o nginya Kadeshi Barinea. Ũcooke wĩyune ũthiĩ nginya Hazaru Adari, ũthiĩ na mbere nginya Azimoni.

5 Woima hau wĩyune werekere gĩtuamba kĩrĩa kĩrĩ mũhakainĩ wa Misiri, ũrĩĩkĩrĩre iriainĩ rĩa Mediteraneani.

6 “Mũhaka wa mwena wa ithũĩro nĩ iria rĩa Mediteraneani.

7 “Naguo mũhaka wa mwena wa na rũgongo ũgaathiĩ ũrũngĩrĩirie kuuma iriainĩ rĩa Mediteraneani nginya kĩrĩmainĩ kĩa Hori.

8 Kuuma hau ũthiĩ nginya Mwanyainĩ wa Hamathu, ũthiĩ Zedadi,

9 na nginya Zifironi, ũrĩĩkĩrĩrie Hazaru Enani.

10 “Naguo mũhaka wa mwena wa na irathĩro ũgaathiĩ ũrũngĩrĩirie kuuma Hazaru Enani nginya Shefamu.

11 Ũcooke ũikũrũke nginya Haribeli, mwena wa irathĩro wa Aini, ũthiĩ irĩmainĩ cia mwena wa irathĩro iria rĩa Galili,

12 ũcooke ũikũrũke ũtwaranĩĩte na rũũĩ rwa Jorodani ũrĩĩkĩrĩrie iriainĩ rĩa Cumbĩ.

“Ĩyo nĩ yo ĩgaakorwo ĩrĩ mĩhaka ya bũrũri wanyu.”

13 Musa agĩkĩĩra Aisiraeli atĩrĩ, “Ũcio nĩguo bũrũri ũrĩa mũkaagaya na ũndũ wa gũcuuka mĩtĩ, ũrĩa MWATHANI aheete mĩhĩrĩga ĩrĩa kenda na nuthu.

14 Amu andũ a mũhĩrĩga wa Reubeni, Gadi, na a nuthu ya mũhĩrĩga wa Manase nĩmagĩĩte na bũrũri wao, ũrĩ mũgayanie kũringana na mĩciĩ yao,

15 mwena wa irathĩro wa rũũĩ rwa Jorodani, kũng’ethera Jeriko.”

Atongoria a kũgayania bũrũri

16 MWATHANI agĩcooka akĩĩra Musa atĩrĩ,

17 “Eleazaru mũthĩnjĩri Ngai, na Joshua mũrũ wa Nuni nĩ o mekũgayania bũrũri.

18 Oya mũthuuri ũmwe kuuma harĩ o mũhĩrĩga mamateithĩrĩrie kũũgayania.”

19-28 Maya nĩ mo marĩĩtwa ma athuuri arĩa MWATHANI aathuurire:

Juda Kalebu mũrũ wa Jefune
Simeoni Shelumieli mũrũ wa Amihudi
Benjamini Elidadi mũrũ wa Kisiloni
Dani Buki mũrũ wa Jogili
Manase Hanieli mũrũ wa Efodi
Efiraimu Kemueli mũrũ wa Shifitani
Zebuluni Elizafani mũrũ wa Parinaki
Isakaru Palitieli mũrũ wa Azani,
Asheri Ahihudu mũrũ wa Shelomi
Nafutali Pedaheli mũrũ wa Amihudi.

29 Acio nĩ o andũ arĩa MWATHANI aaheire wĩra wa kũgaĩra andũ a Isiraeli bũrũri wa Kanaani.

Matũũra marĩa Alawii maagaĩirwo

1 Na rĩĩrĩ, MWATHANI nĩarĩirie Musa kũu werũinĩ wa Moabi hakuhĩ na rũũĩ rwa Jorodani kũng’ethera Jeriko.

2 Aamwĩrire atĩrĩ, “Ĩra andũ a Isiraeli atĩ bũrũriinĩ ũrĩa makaagaya, makaagaĩra Alawii matũũra mamwe, na mamahe kũndũ gwa kũrĩithagia gũthiũrũrũkĩirie matũũra macio.

3 Matũũra macio magaatuĩka maao, na nĩkuo magaatũũraga. Namo morĩithio magaatuĩka ma kũrĩagwo nĩ mahiũ maao o hamwe na nyamũ iria ingĩ ciao ciothe.

4 Morĩithio macio magaakorwo maarĩ mita magana mana na mĩrongo ĩtaano kuuma rũthingoinĩ gũthiũrũrũkĩria o itũũra.

5 Morĩithio magaakorwo marĩ thikwea ĩ na mita magana kenda o mwena, narĩo itũũra rĩgaakoragwo gatagatĩ ga thikwea ĩyo.

6 “Makaahe Alawii matũũra matandatũ kũrĩa mũndũ angĩũrĩra angĩũraga mũndũ atekwenda. Hamwe na macio nĩmakaamahe matũũra mangĩ mĩrongo ĩna na meerĩ

7 hamwe na morĩithio maamo. Matũũra moothe marĩa makaahe Alawii magaakorwo marĩ mĩrongo ĩna na manaana.

8 Mũigana wa matũũra marĩa Alawii makaaheeo nĩ o mũhĩrĩga ũgaatuuo kũringana na ũria igai rĩa o mũhĩrĩga rĩigana. Igai rĩa mũhĩrĩga rĩakorwo rĩrĩ inene, mũhĩrĩga ũkaheana matũũra maingĩ, na rĩakorwo rĩrĩ iniini, ũkaheana matũũra maniini.”

Matũũra ma kũũrĩrwo

9 Ningĩ MWATHANI akĩĩra Musa eere

10 andũ a Isiraeli atĩrĩ, “Mwaringa rũũĩ rwa Jorodani mũtoonye bũrũri wa Kanaani-rĩ,

11 mũgaathuura matũũra ma kũũrĩrwo nĩ geetha mũndũ angĩũraga mũndũ atekwenda akoorĩra kuo.

12 Matũũra macio marĩũragĩrwo nĩ mũndũ ũũragĩĩte mũndũ atwekwenda, nĩguo ndakooragwo nĩ eene mũndũ ũcio ooragĩĩte makĩenda kwĩrĩhĩria. Mũndũ o wothe ũũraganĩĩte atekwenda ndaagĩrĩirwo nĩkũũragwo ataciirithĩĩtio mbere ya mũingĩ.

13 Matũũra ma kũũrĩrwo marĩa mũkaaheana magaakorwo marĩ matandatũ.

14 Matũũra matatũ magaakorwo mwena wa irathĩro wa rũũĩ rwa Jorodani, na matatũ bũrũriinĩ wa Kanaani.

15 Matũũra macio magaakorwo marĩ ma kũũrĩrwo nĩ Mũisiraeli, o na mũrũũrĩrĩ ũtũũranagia na inyuĩ kana ũũkĩĩte gũceera. Mũndũ o wothe ũũraganĩĩte atekwenda, no ooragĩre kuo.

16-18 “No rĩĩrĩ, mũndũ angĩũragana na mũcuuma, ihiga, kana mũtĩ, ũcio nĩ mũũragani, na aagĩrĩirwo nĩoragwo.

19 Mũndũ wa ũrĩa ũũragĩĩtwo nĩ we wagĩrĩirwo nĩkũũraga mũũragani ũcio rĩrĩa angĩtũngana naake.

20-21 “Mũndũ angĩtheeca mũndũ ũngĩ nĩ ũndũ wa rũthũũro, kana amũikĩrie kĩndũ, kana amuohie, kana amũringe na ngundi amũũrage, mũndũ ũcio nĩ mũũragani, na aagĩrĩirwo no kũũragwo. Mũndũ wa ũrĩa ũũragĩĩtwo nĩ we wagĩrĩirwo nĩkũũraga mũũragani ũcio rĩrĩa angĩtũngana naake.

22-24 “No rĩĩrĩ, mũndũ angĩtheeca mũndũ ũngĩ hatarĩ rũthũũro, kana amũikĩrie kĩndũ atamuoheetie, kana aikie ihiga atekũmuona amũgũthe amũũrage, mũingĩ nĩguo ũgaatuithania mũũragani na mũndũ wa ũrĩa ũũragĩĩtwo.

25 Mũingĩ nĩguo ũkahonokia mũũragani kuuma harĩ mũndũ wa ũrĩa ũũragĩĩtwo, ũmũcookie itũũra rĩrĩa oorĩire. Naake mũndũ ũcio agĩtũũre itũũrainĩ rĩu o nginya rĩrĩa Mũthĩnjĩri Ngai Ũrĩa Mũnene agaakua.

26 No rĩĩrĩ, mũndũ ũcio ũũraganĩĩte angĩkoima nja ya itũũra rĩrĩa oorĩire,

27 mũndũ wa ũrĩa ooragire amuone amũũrage, ũndũ ũcio wa kwĩrĩhĩria ndũgaatũma atuuo mũũragani.

28 Amu mũndũ ũcio aagĩrĩirwo nĩgũikara itũũrainĩ rĩrĩa oorĩire o nginya Mũthĩnjĩri Ngai Ũrĩa Mũnene agaakua, na hĩndĩ ĩyo agĩcooke itũũrainĩ rĩake.

29 Mawatho macio nĩmakũrũmagĩrĩrwo nĩ inyuĩ na njiarwa cianyu ciothe o kũrĩa guothe mũrĩtũũraga.

30 “Mũndũ angĩũragana, no ooragwo aira eerĩ kana makĩria maruta ũira. Ũira wa mũndũ ũmwe ndũngĩtũma mũndũ ũũraganĩĩte ooragwo.

31 Mũũragani no mũhaka ooragwo; ndarĩ irĩhi angĩruta nĩguo ndakooragwo.

32 Ningĩ mũũragani wĩtharĩire itũũra rĩa kũũrĩrwo ndarĩ irĩhi angĩruta nĩguo acooke itũũrainĩ rĩake Mũthĩnjĩri Ngai Ũrĩa Mũnene atakuĩte.

33 Mũngĩgeeka ũguo, nĩmũgaathaahia bũrũri ũrĩa mũtũũraga. Amu thakame nĩthaahagia bũrũri, na gũtirĩ ũndũ ũngĩhoroheria thakame ĩrĩa ĩitĩĩtwo tiga o thakame ya mũndũ ũrĩa ũmĩitĩĩte.

34 Mũtikaanathaahie bũrũri ũrĩa mũtũũraga, amu niĩ MWATHANI ndũũranagia na andũ a Isiraeli kuo.”

Igai rĩa atumia ahiku

1 Na rĩĩrĩ, atongoria a nyũmba cia mbarĩ ya Gileadi mũrũ wa Makiru na mũcũkũrũ wa Manase mũrũ wa Josefu, marĩ na atongoria arĩa angĩ, nĩmaathiire kũrĩ Musa.

2 Makĩmwĩra atĩrĩ, “MWATHANI aagwathire ũgaĩre andũ a Isiraeli bũrũri na ũndũ wa gũcuuka mĩtĩ. Ningĩ nĩagwathire atĩ igai rĩa Zelofehadi, mũndũ wa nyũmba iitũ, ũrĩnengere aarĩ aake.

3 No rĩĩrĩ, airĩĩtu acio mangĩhikĩra andũ a mũhĩrĩga ũngĩ-rĩ, igai rĩu rĩao rĩgũgĩtuĩka rĩa mũhĩrĩga ũngĩ, na kĩrĩa ithuĩ tũkĩgaĩirwo gĩkĩnyiihe.

4 Mwakainĩ wa Njookio, rĩrĩa kĩndũ o gĩothe kĩrĩa kĩgũrĩĩtwo gĩcookagĩrio ũrĩa warĩ mwene o mbere-rĩ, igai rĩa aarĩ a Zelofehadi rĩgaagĩturanĩrwo na rĩa andũ a mũhĩrĩga ũrĩa makaahikĩra, rĩkĩeherio biũ kuuma harĩ mũhĩrĩga witũ.”

5 Musa agĩgĩatha andũ a Isiraeli kũringana na watho wa MWATHANI akĩmeera atĩrĩ, “Ũrĩa andũ a mũhĩrĩga wa Manase maroiga nĩ ma,

6 kwoguo MWATHANI ekuuga atĩ aarĩ a Zelofehadi no mahikĩre mũndũ o ũrĩa mangĩenda, no akorwo e wa mũhĩrĩga wao.

7 Igai rĩa Mũisiraeli o wothe rĩtiriumaga mũhĩrĩgainĩ wake.

8 Mũtumia o wothe ũrĩgĩaga na igai mũhĩrĩgainĩ wothe wa Aisiraeli arĩhikagĩra o mũndũ wa mũhĩrĩga wake. Na njĩra ĩyo Mũisiraeli o wothe nĩarĩrigagia na igai rĩa ithe.

9 Kwoguo gũtirĩ igai rĩriumaga mũhĩrĩga ũmwe rĩgathiĩ mũhĩrĩga ũngĩ, o mũhĩrĩga ũgũtũũra o na igai rĩaguo.”

10-11 Kwoguo Mahala, Tiriza, Hogila, Milika, Noa, aarĩ a Zelofehadi, magĩgĩĩka ũrĩa Musa eerĩĩtwo nĩ MWATHANI, makĩhikĩra aariũ a mũrũ wa nyina na ithe wao.

12 Maahikirio nĩ andũ a mũhĩrĩga wa Manase mũrũ wa Josefu, igai rĩao rĩgĩgĩikara o mũhĩrĩgainĩ wa ithe.

13 Macio nĩ mo mawatho marĩa MWATHANI aaheire Aisiraeli ahũthĩrĩĩte Musa werũinĩ wa Moabi, mũrĩmo ũũrĩa ũngĩ wa rũũĩ rwa Jorodani kũng’ethera Jeriko.