Author: admin

Judithi gũthiĩ hemainĩ ya Holoferine

1 Rĩrĩa aarĩĩkirie ihooya rĩake kũrĩ Ngai wa Isiraeli-rĩ,

2 agĩũkĩra kuuma harĩa aakomeete, agĩĩta ndungata yake ya mũirĩĩtu, agĩikũrũka nyũmbainĩ ĩrĩa aikaraga mĩthenya ya Thabatũ na ya Thigũkũ.

3 Naake akĩruta nguo ya ikũnia ĩrĩa eekĩrĩĩte, o na akĩruta nguo ciake cia mũtumia wa ndigwa, agĩcooka agĩĩthamba mwĩrĩ na akĩĩhaka maguta manungi wega ma goro, agĩcanũra njuĩrĩ yake, akĩyoha rũkwaro rwa gĩtambaya mũtwe, na akĩĩhumba nguo njega iria eekagĩra mĩthenya ya gĩkeno rĩrĩa mũthuuriwe Manase aarĩ muoyo.

4 Ningĩ agĩĩkĩra iraatũ ciake, agĩcooka agĩĩkĩra mĩgathĩ na bangiri, na nyori ciake na mathaga maake moothe; agĩkĩĩgemia wega mũno nĩ geetha aguucĩrĩrie mũndũ mũrũme o wothe ũrĩa ũngĩamuonire.

5 Thuutha ũcio akĩnengera ndungata yake ya mũirĩĩtu mondo ya rũũa yarĩ na ndibei na cuuba yarĩ na maguta akuue. Ningĩ akĩiyũria kĩondo mĩgate ya gũkandwo ya mũtu wa ngano, na keeki cia matunda moomithie. Athondekania indo icio ciothe, akĩmũnengere.

6 Magĩkiumagara meerekeire thoome wa itũũra rĩa Bethulia. Nao magĩkora Uzia na atongoria arĩa eerĩ Kabirisi na Karimisi marũũgamĩĩte ho.

7 Na rĩĩrĩ, rĩrĩa moonire Judithi na makĩona ũrĩa ũthiũ wake wakengeete na akeehumba nguo thaka makĩguucĩrĩrio mũno nĩ ũthaka wake makĩmwĩra atĩrĩ,

8 “Ngai wa maithe maitũ arokũraathima na arotũma mũbango waku ũhinge, nĩ geetha ũreehithĩrie Jerusalemu ũkumio hamwe na ũhootani kũrĩ Isiraeli.” Naake Judithi agĩthaathaiya Ngai.

9 Agĩcooka akiuga atĩrĩ, “Athana hingũrĩrwo kĩhingo gĩa itũũra nĩ geetha nyumagare thiĩ ngahingie maũndũ marĩa twaririe na inyuĩ.” Nao magĩĩka ta ũrĩa aamoorĩĩtie, magĩatha aanake mahingũre ihingo nĩ ũndũ wake.

10 Marĩĩkia gwĩka ũguo Judithi akiumagara hamwe na ndungata yake ya mũirĩĩtu. Nao andũ a itũũra makĩmũrũũthĩrĩria o ũrĩa aathiaga, agĩikũrũka kĩrĩma, agĩtuĩkania kĩanda o nginya akĩbuĩria.

11 Na rĩĩrĩ, rĩrĩa atumia acio maatuĩkanagia kĩanda kĩu, mbũtũ ya athigaani a Asiria ĩgĩtũngana nao.

12 Ĩkĩnyiita Judithi ĩkĩambĩrĩria kũmũũria atĩrĩ, “Ũrĩ wa rũũrĩrĩ rũrĩkũ? Uumĩĩte kũ na wathiĩ kũ?”

Judithi agĩcookia atĩrĩ, “Niĩ-rĩ, ndĩ mũtumia Mũhibirania, na nĩkũũra ndĩroora kuuma kũrĩ o nĩ amu Ngai nĩekũmwĩtĩkĩria mũmaniine.

13 Ndĩ njĩrainĩ gũthiĩ kuona Holoferine, mũtongoria wa mbũtũ cianyu nĩ geetha ndĩmũkinyĩrie ũhoro wa kũmũteithia. Nĩngũmuonia njĩra ĩrĩa angĩgerera angĩkorwo nĩekwenda kũnyiita bũrũri wothe wa irĩmainĩ ategũte mũndũ wake o na ũmwe na njĩra ya kũnyiitwo mĩgwate kana kũũragwo.”

14 Rĩrĩa andũ acio maiguire ciugo ciake, na maarora ũthiũ wake makĩona atĩ aarĩ mũthaka mũno, makĩmwĩra atĩrĩ,

15 “Nĩwahonokia muoyo waku nĩ ũndũ wa gũũka gũũkũ kuona mwathi witũ. Andũ amwe aitũ nĩmegũgũtwara hemainĩ yake na makũnengerane kũrĩ we.

16 Na rĩĩrĩ, wakinya mbere yake ndũgeetigĩre. Mũmenyithie maũndũ macio watwĩra na nĩũkwamũkĩrwo wega.”

17 Magĩgĩcagũra andũ igana mamũtware hamwe na mũirĩĩtu ũcio ndungata yake, hemainĩ ya Holoferine.

18 Na rĩĩrĩ, ũhoro wa gũkinya gwake ũkĩhunja hemainĩ ciothe, gũkĩgĩa na gĩkeno kambĩinĩ yothe. Nao andũ oothe makĩambĩrĩria kũmũthiũrũrũkĩria arĩ o nja ya hema ya Holoferine eetereire amenyithanio.

19 Nao makĩgega mũno nĩ ũndũ wa ũthaka wake na makĩrigwo andũ a Isiraeli nĩ andũ a mũthemba ũrĩkũ. Makĩũrania atĩrĩ, “Nũũ ũngĩiguĩra andũ marĩ na atumia athaka ũũ ũũru? Wega nĩtũũrage arũme oothe. Kwaga ũguo, Aisiraeli nĩmekũguucĩrĩria thĩ yothe.”

20 Na rĩĩrĩ, thigari iria ciarangagĩra na iria ciatungatagĩra Holoferine ikiuma, igĩtoonyia Judithi thĩinĩ wa hema.

21 Holoferine nĩkũhuurũka aahuurũkĩĩte gĩtandainĩ gĩake rungu rwa maburi ma rangi wa babũ, na thahabu, na mahiga ma goro ma rangi wa ngirini ũrĩa mũtheru mũno, na tũhiga tũngĩ twa goro.

22 Andũ acio aake makĩmũmenyithia gũkinya kwa Judithi, naake akiuma atongoreetio na imũrĩ cia betha.

23 Na rĩĩrĩ, rĩrĩa Judithi aathiire hakuhĩ na Holoferine na ndungata ciake, oothe makĩgegio nĩ ũthaka wake. Judithi akĩinamĩrĩra akĩhuutia thĩ mbere ya Holoferine, no ndungata cia Holoferine ikĩmũrũũgamia.

1 Holoferine akĩĩra Judithi atĩrĩ, “Wĩyũmĩrĩrie, mũtumia ũyũ! Tiga gwĩtigĩra, amu ndirĩ ndeeka mũndũ ũũru angĩkorwo eetĩkĩrĩĩte gũtungatĩra Nebukadinezaru, mũthamaki wa thĩ yothe.

2 O na rĩu korwo rũũrĩrĩ rwaku rũrĩa rũtũũraga irĩmainĩ rũtianumire-rĩ, ndingĩoeete itimũ na igũrũ ndĩrũhũũre. Nĩruo rwĩreeheire maũndũ maya.

3 No takĩnjĩĩre atĩrĩ, nĩkĩ gĩtũmĩĩte ũmoorĩre ũũke kũrĩ ithuĩ? Ndũrĩ ũũru ũkuona gũũkũ! Kwoguo hatirĩ bata wa gwĩtigĩra! Ũtukũ ũyũ nĩtwahonokia muoyo waku, na ndũrĩ ũũru ũkoona thuutha ũyũ.

4 Gũtirĩ mũndũ ũrĩgwĩka ũũru gũũkũ. Ũrĩĩkagwo o ũrĩa kwagĩrĩire arĩa oothe matungatagĩra mwathi wakwa mũthamaki Nebukadinezaru.”

5 Judithi naake agĩcookia atĩrĩ, “Mwathi wakwa, njĩtĩkĩria ngwarĩrie. Ndagũthaitha ũthikĩrĩrie ũrĩa ngũkwĩra. Ngũkũhe o ũhoro wa ma.

6 Wona wathikĩrĩria mataaro maakwa, Ngai nĩegwĩka ũndũ mũnene akũhũthĩrĩĩte, na mwathi wakwa nderemwo nĩkũhingia mũbango wake.

7 Amu ngwĩhĩta harĩ we na ũtũũro na hinya wa Nebukadinezaru, mũthamaki wa thĩ yothe, ũrĩa ũgũtũmĩĩte ũreehithie wathĩki kũrĩ andũ oothe ũthamakiinĩ wake atĩ, to andũ ũtũmĩĩte mamũtungatĩre, no na ũndũ waku, o na nyamũ cia gĩthaka, na mahiũ, na nyoni nĩimwathĩkagĩra. Na ũndũ waku Nebukadinezaru nĩekũgaacĩra o hamwe na ũthamaki wake.

8 Atĩrĩĩrĩ, nĩtũrĩĩkĩĩtie kũigua ũhoro wa ũũgĩ na wara waku. Nĩkũĩkaine thĩ yothe atĩ ũthamakiinĩ wothe gũtirĩ ũngĩ ũngĩkũigana ũhotiinĩ, ũingĩinĩ wa kuona maũndũ, na warainĩ wa gũtongoria mbaara.

9 Na rĩĩrĩ, no tũraiguire ũrĩa Akioru oigire mĩarioinĩ yake mbere ya kĩama gĩaku. Amu andũ a Bethulia nĩmaamũiguĩrĩire tha, naake akĩmeera maũndũ moothe marĩa aakwĩrĩĩte.

10 Kwoguo mwathi na mũnene wakwa tiga kũhũthia ũrĩa aakwĩrire. No ũige meciiriainĩ maaku nĩ gũkorwo nĩ ũhoro wa ma. Gũtirĩ mũndũ ũngĩĩka andũ aitũ ũũru kana amahoote atangĩkorwo nĩmahĩtĩirie Ngai wao.

11 “No wee ndũrĩ kĩgirĩrĩria ũkuona o na ndũngĩaga kũhingia muorooto waku. Rĩrĩa Aisiraeli marĩĩhia na matũme Ngai wao araakare-rĩ, no marĩkua.

12 Atĩrĩĩrĩ, tondũ nĩmanyiihĩĩtie irio, na maaĩ maao me hakuhĩ gũthira, nĩmatuĩte mathĩnje mahiũ maao na magatua atĩ marĩe indo ciothe iria Ngai thĩinĩ wa maathani maake amagirĩĩtie kũrĩa.

13 O na nĩmatuĩte atĩ marĩe magetha ma mbere ma ngano, o na gĩcunjĩ gĩa ikũmi kĩa ndibei na kĩa maguta, o na gũtuĩka atĩ indo icio nĩmaciamũrĩĩte na magaciiga handũ mwanya nĩ ũndũ wa athĩnjĩri Ngai arĩa matungataga mbere ya Ngai kũu Jerusalemu. Kũringana na watho gũtirĩ mũndũ o na ũmwe wĩtĩkĩrĩĩtio o na gũcihuutia.

14 No tondũ andũ thĩinĩ wa Jerusalemu nĩmarĩĩkĩĩtie kuuna watho ũcio, andũ a itũũra riitũ nĩmatũmĩĩte arekio kũrĩ kĩama Jerusalemu kũũria rũũtha rwa gwĩka o ũguo.

15 Mũthenya ũrĩa marĩheeo rũũtha na marĩe irio icio-rĩ, nĩũrĩhota kũmaniina.

16 No niĩ ndungata yaku rĩrĩa ndĩramenyire ũguo wothe-rĩ, nĩgwĩthara ndĩretharire kuuma kũrĩ o. Ngai nĩkũndũma andũmĩĩte njũke twĩke maũndũ hamwe nawe magũtũũra mamakagia thĩ rĩrĩa yamaigua.

17 Amu ndungata yaku nĩ mũtumia ũtĩĩĩte Ngai wa igũrũ na ũmũtungatagĩra mũthenya na ũtukũ. Kwoguo-rĩ, nduĩte gũikara nawe, mwathi wakwa. Na rĩĩrĩ, niĩ ndungata yaku nĩndĩthiaga ũtukũ o ũtukũ kĩandainĩ kũhooya Ngai aamenyithie rĩrĩa magaakorwo meekĩĩte thaahu ũcio.

18 Thuutha ũcio nĩngooka ngwĩre nĩ geetha wĩ hamwe na mbũtũ yaku yothe muumagare na gũtirĩ o na ũmwe wao ũkaahota gũgwĩtiiria.

19 Nĩngaagũtongoria gũtwĩkanĩria bũrũri wa Juda nginya tũkinye Jerusalemu, kũrĩa ngaagwĩkĩrĩra thũmbĩ ũtuĩke mũthamaki o kũu gatagatĩinĩ ka itũũra. Nĩũkaahurunja andũ a Jerusalemu o ta ng’ondu itarĩ na mũrĩithi, na gũtirĩ o na ngui ĩkaagerereria gũgũkũgĩra. Ngai nĩanguũrĩirie maũndũ macio o mbere, na nĩandũmĩĩte njũke ngũmenyithie.”

20 Mĩario ya Judithi nĩyakenirie Holoferine na ndungata ciake ciothe, na makĩgegio nĩ ũũgĩ wake; makiuga atĩrĩ,

21 “Kuuma gĩturi kĩmwe gĩa thĩ kinya kĩrĩa kĩngĩ gũtirĩ mũtumia ũhaana taake ũthakainĩ na ũũgĩinĩ wa mĩario yake.”

22 Ningĩ Holoferine akĩĩra Judithi atĩrĩ, “Nĩ ũndũ mwega atĩ Ngai nĩagũtũmĩĩte gũũkũ ũtũreehere ũhootani na ũthũũkangie arĩa marumĩĩte mũthamaki Nebukadinezaru.

23 Wee-rĩ, to gũthakara wĩ mũthaka, no o na ũũgĩ wa mĩario wĩ naguo. Angĩkorwo nĩũgwĩka ũguo weranĩra, Ngai waku nĩegũtuĩka Ngai wakwa. Ningĩ ũrĩtũũraga nyũmbainĩ kwa Nebukadinezaru na ũgĩe igweta thĩ yothe.”

Judithi gũikara e mwĩhokeku ndiniinĩ yake

1 Naake Holoferine agĩatha andũ aake matware Judithi meethainĩ harĩa indo ciake cia kũrĩĩra cia betha ciaigĩĩtwo, na mamũhe irio ciake cia mwanya o hamwe na ndibei.

2 No Judithi agĩcookia atĩrĩ, “Ndingĩrĩa irio ciaku, amu ndeeka ũguo nĩnguuna watho wa Ngai wakwa. Reke ndĩe kĩrĩa njũkire nakĩo.”

3 Holoferine akĩmũũria atĩrĩ, “Irio ciaku na ndibei yaku ciathira-rĩ, ũgeeka atĩa? Tũgaakũrutĩra kũ irio ingĩ na gũũkũ kambĩinĩ iitũ gũtirĩ Aisiraeli?”

4 Judithi agĩcookia atĩrĩ, “Tiga kũmaka wee Mwathi wakwa. Mwathani nĩarĩkorwo andũmĩrĩĩte na akahingia mũbango wake mũira ndungata yaku ĩniine irio ici.”

5 Thuutha ũcio ndungata iria ciatungatagĩra Holoferine igĩtwara Judithi hemainĩ kũrĩa aakomire o nginya ũtukũ gatagatĩ. Na mbere ya ituanĩra rĩa rũũciinĩ, akĩarahũka

6 akĩrekania kũrĩ Holoferine kũũria eetĩkĩrio athiĩ kĩandainĩ akahooe.

7 Naake Holoferine agĩatha arangĩri aake meetĩkĩrie Judithi athiĩ. Kwoguo Judithi agĩikara kambĩinĩ ĩyo mĩthenya ĩtatũ, na o ũtukũ agathiĩ kĩandainĩ gũkuhĩ na Bethulia ageethamba mwĩrĩ gĩthimainĩ.

8 Thuutha wa gwĩthamba akahooya Mwathani Ngai wa Isiraeli amũtongorie mũbangoinĩ wake wa kũreehithĩria andũ aao ũhootani.

9 Thuutha ũcio agacooka kambĩinĩ atethaahĩĩtie, agaikara hemainĩ yake nginya thuutha wa irio cia hwaĩinĩ.

Judithi irugainĩ rĩa Holoferine

10 Mũthenya wa kana wa Judithi gũikara kambĩinĩ ĩyo, Holoferine agĩthondekera ndungata ciake ciiki iruga na ndeetire mũtongoria o na ũmwe wa thigari ciake.

11 Agĩkĩĩra Bagoasi, mũndũ warĩ mũhakũre na warĩ mũnyabaara wa maũndũ maake atĩrĩ, “Tathiĩ ũthaithe mũtumia ũrĩa Mũhibirania ũrĩa ũbaaragĩrĩra ooke eeturanĩre na ithuĩ tũrĩanĩre na tũnyuanĩre naake.

12 No tũthekererwo tũngĩreka mũtumia ta ũcio athiĩ tũtamũmenyeete wega. Tũngĩaga kũmuuha-rĩ, no tũthekererwo.”

13 Bagoasi agĩgĩtiga Holoferine agĩthiĩ kũrĩ Judithi akĩmwĩra atĩrĩ, “Mũtumia ũyũ mũthaka, mũtongoria wa mbũtũ nĩaragwĩta hemainĩ yake ũkanyue ndibei. Ũka wĩkenie ta atumia a Asiria arĩa matungataga nyũmbainĩ kwa Nebukadinezaru. Gĩĩkĩ nĩ gĩtĩĩo kĩnene mũno.”

14 Naake Judithi agĩcookia atĩrĩ, “Nĩngwĩtĩkĩra na gĩkeno. Ingĩhota atĩa kũrega? Nĩndĩririkanaga ũtukũ ũyũ wa gĩkeno hĩndĩ ĩrĩa yothe ngũtũũra muoyo.”

15 Oiga ũguo, agĩũkĩra akĩĩhumba nguo ciake iria thaka mũno, naake mũirĩĩtu ũrĩa wamũtungatagĩra akĩmũtongoria agĩthiĩ akĩara mbere ya Holoferine njũũa iria Bagoasi aaheete Judithi cia gũikaragĩra hĩndĩ ciothe rĩrĩa araarĩa.

16 Judithi naake akĩingĩra hemainĩ agĩikara thĩ. Naake Holoferine akĩigua akĩambaambwo amuona na akĩigua thuti nene ya gũkoma naake; amu kuuma mũthenya wa mbere ũrĩa aamuonire, aatũire eetereire kamweke ga kũmuuha.

17 Agĩkĩmwĩra atĩrĩ, “Wĩturanĩre na ithuĩ tũnyuanĩre na twĩkenie.”

18 Naake Judithi agĩcookia atĩrĩ, “Nĩngũkena ngĩĩka ũguo. Ũyũ nĩguo mũthenya wa gĩkeno kĩnene mũno kuuma hĩndĩ ĩrĩa ndaciarirwo.”

19 No o na gwatuĩka ũguo, Judithi aarĩaga na akanyua o kĩrĩa ndungata yake yakoragwo ĩhaarĩirie.

20 Holoferine nĩakenirio nĩ we mũno o nginya akĩnyua ndibei nyingĩ gũkĩra ũrĩa ananyua ũtũũroinĩ wake wothe.

1 Na rĩĩrĩ, rĩrĩa ũtukũ watuire gũkũra, ndungata ciake ikĩĩhĩka gũthiĩ. Naake Bagoasi akĩhinga hema kuuma na mwena wa na nja, na akĩgiria ndungata cia Holoferine gũtoonya. Kwoguo oothe magĩthiĩ toro; oothe nĩmaanogeete amu iruga nĩrĩathiĩte na mbere ihinda iraaya.

2 Judithi agĩgĩtigwo arĩ wiki hemainĩ na Holoferine ũrĩa wakomeete gĩtandainĩ e mũrĩĩu.

3 Hĩndĩ ĩyo Judithi aatigĩĩte eera mũirĩĩtu ũrĩa wamũtungatagĩra oime kũu nyũmba ya toro amweterere kinya rĩrĩa ariuma, o ta ũrĩa eekaga o ũtukũ. Ningĩ nĩerĩĩte Bagoasi atĩ nĩariumagara gũthiĩ kũhooya o ta mũtugo.

4 Na rĩĩrĩ, ihinda rĩu andũ oothe nĩmaatigĩĩte Holoferine na gũtirĩ mũndũ o na ũmwe, wa bata kana ũtarĩ, watigĩĩtwo kũu nyũmba thĩinĩ. Judithi agĩkĩrũũgama hakuhĩ na gĩtanda akiuga na ngoro atĩrĩ, “Mwathani Ngai Mwene Hinya Wothe, ndeithĩrĩria ũndũinĩ ũrĩa njerekeire gwĩka nĩ ũndũ wa ũkumio wa Jerusalemu.

5 Rĩĩrĩ nĩrĩo ihinda rĩa kũhonokia andũ aaku aamũre, na rĩa kũndeithĩrĩria hote kũhingia mũbango wakwa wa kũniina thũ iria iratwĩhĩtĩra.”

6 Arĩĩkia kũhooya ũguo, agĩthiĩ mũtĩinĩ wa ũrĩrĩ hakuhĩ na mũtwe wa Holoferine, agĩcomora rũhiũ rwake rwa njora rũrĩa rwacuurĩĩtio hau,

7 agĩkuhakuhĩrĩria gĩtandainĩ akĩmũnyiita njuĩrĩ cia mũtwe, akiuga atĩrĩ, “Mwathani Ngai wa Isiraeli, he hinya rĩu.”

8 Akĩoya rũhiũ na igũrũ agĩtema ngingo maita meerĩ na hinya wake wothe, agĩtinia kĩongo gĩake.

9 Thuutha ũcio akĩgaragaria mwĩrĩ wake kuuma gĩtandainĩ na agĩcuurũria gĩtaama kuuma mĩtĩinĩ ya gĩtanda. Agĩcooka akiuma nja akĩnengera ndungata yake kĩongo kĩu kĩa Holoferine,

10 nayo ĩgĩgĩĩkĩra kĩondoinĩ kĩa irio.

Judithi na ndungata yake gũcooka Bethulia

Nao marĩ eerĩ makiuma kambĩinĩ ĩyo o ta ũrĩa meekaga magĩthiĩ kũhooya. Thuutha wa kũhĩtũkĩra kambĩinĩ ya Aasiria, magĩtuĩkania kĩanda makĩambatĩrĩra mwena wa irĩma o nginya ihingoinĩ cia Bethulia.

11 Marĩ o haraaya Judithi akĩanĩrĩra arangĩri arĩa maarĩ kĩhingoinĩ akĩmeera atĩrĩ, “Hingũraai kĩhingo! Hingũraai kĩhingo! Ngai witũ arĩ o hamwe na ithuĩ. O rĩngĩ ũũmũũthĩ nĩonania hinya wake thĩinĩ wa Isiraeli na ahũthĩra hinya wake kũhũũra thũ ciitũ.”

12 Na rĩĩrĩ, maigua mũgambo wake, andũ a itũũra makĩhanyũka meerekeire thoome wa itũũra na magĩĩta atongoria oothe.

13 Oothe, anyiinyi na anene, magĩteng’era hamwe kĩhingoinĩ. Gũtirĩ mũndũ ũngĩetĩkirie atĩ Judithi nĩarĩĩkĩĩtie gũcooka. Magĩkĩmũhingũrĩra kĩhingo arĩ hamwe na ndungata yake, makĩmaamũkĩra. Magĩcooka magĩakia mwaki wa kuona naguo, magĩthiũrũrũkĩria atumia acio.

14 Judithi naake akĩanĩrĩra atĩrĩ, “Goocaai Ngai! Mũheei ũgooci! Goocaai Ngai ũrĩa ũtathengeetie tha ciake kuuma nyũmba ya Isiraeli. Ũtukũ ũyũ nĩahũthĩrĩĩte gũthũũkangia thũ ciitũ.”

15 Agĩcooka akĩruta kĩongo kĩrĩa kĩarĩ kĩondoinĩ kĩa irio agĩkĩonia andũ akiuga atĩrĩ, “Gĩĩkĩ nĩkĩo kĩongo kĩa Holoferine, mũtongoria ũrĩa mũnene wa ita cia Asiria, nakĩo gĩĩkĩ nĩ gĩtaama kĩa ũrĩrĩ wake harĩa egũkomeete e mũrĩĩu! Mwathani nĩkũmũniina amũniina na guoko kwa mũtumia.

16 Ngwĩhĩta na Mwathani ũrĩa ũtũũraga muoyo atĩ Holoferine ndahuutĩĩtie, o na gũtuĩka ũthaka wakwa nĩũmũheenereirie wakĩmũreehere kũniinwo gwake. Niĩ ndarĩ ũndũ eekĩĩte na niĩ wagũtũma thaahe kana njonoke. Mwathani ũrĩa mũtũũra muoyo nĩamenyereire maũndũinĩ macio moothe.”

17 Andũ oothe thĩinĩ wa itũũra makĩgega mũno, makĩinamĩrĩra magĩthaathaiya Ngai, makĩhooya me hamwe makiuga atĩrĩ, “Ngai witũ, wee nĩwagĩrĩirwo nĩkũgoocwo mũno. Ũũmũũthĩ nĩũhooteete thũ cia andũ aaku.”

18 Naake Uzia akĩĩra Judithi atĩrĩ, “Mwarĩ ũyũ wakwa, Ngai Ũrĩa Ũrĩ Igũrũ Mũno nĩakũraathimĩĩte gũkĩra atumia oothe thĩinĩ wa thĩ! Mwathani Ngai arogaathwo we mũũmbi wa igũrũ na thĩ ũrĩa ũkũhotithirie gũtinia kĩongo kĩa mũtongoria wa thũ ciitũ.

19 Gũtĩĩa Ngai gwaku gũtirĩ hĩndĩ gũkaariganĩra ngoroinĩ cia andũ rĩrĩa maaririkana ũhoro wa hinya wa Ngai.

20 Ngai arokũhe gĩtĩĩo gĩa gũtũũra nĩ ũndũ wa ũrĩa weka. Arokũhe iraathimo, amu nĩũikarĩĩte wĩ mwĩhokeku harĩ we, na ndũnacaaĩra muoyo waku no nĩkweheria weheririe kũhinyĩrĩrio kwa andũ aaku.”

Nao andũ oothe magĩcookia atĩrĩ, “Ameni! Ameni!”

Mũbango wa Judithi

1 Naake Judithi akĩmeera atĩrĩ, “Andũ aitũ, tathikĩrĩriai! Oyai kĩongo gĩĩkĩ mũgĩcuurie rũthingoinĩ rwa itũũra.

2 Mũcooke mwĩthuurĩre mũtongori, na gũkĩrooka gũkĩa arũme aanyu oothe arĩa me hinya mooe matharaita, moimagare kuuma itũũrainĩ matongoreetio nĩ we, metue atĩ nĩgũikũrũka maraikũrũka magatharĩkĩre kambĩ ya Asiria.

3 Nao arangĩri a Asiria nĩmarĩoya matharaita maao, mateng’ere kambĩinĩ magookĩrie atongoria aao. Atongoria nao marĩthiĩ na ihenya hemainĩ ya Holoferine no matirĩmuona. Nao nĩmarĩnyiitwo nĩ kĩmako maambĩrĩrie kũũrĩra mũtharĩko wanyu.

4 Hĩndĩ ĩyo inyuĩ na arĩa oothe matũũraga thĩinĩ wa bũrũri wa Isiraeli ũrĩa mũrĩĩka no kũmathingata, mũmoorage rĩrĩa marethara.

5 Mbere ya mwĩke ũguo-rĩ, ndũmĩraai Akioru ũrĩa Mũamoni. Nĩngwenda kuona kana nĩegũkũũrana Holoferine, mũndũ ũrĩa waririe ũhoro wa Isiraeli na rũmena, na agĩtũma Akioru kũrĩ ithuĩ agĩciirĩria atĩ nĩekũũraganĩrio hamwe na ithuĩ.”

Akioru kũgarũrũka

6 Kwoguo magĩĩta Akioru kuuma mũciĩ kwa Uzia. No akinya o ũguo na oona kĩongo kĩa Holoferine kĩnyiitĩĩtwo nĩ mũndũ ũmwe mũingĩinĩ, akĩringĩka akĩgũa thĩ.

7 Rĩrĩa maamũteithĩrĩirie kũrũũgama, akĩĩgũithia magũrũinĩ ma Judithi agĩturia ndu mbere yake akiuga atĩrĩ, “Mĩciĩ yothe thĩinĩ wa Juda ĩrokũgooca, na ndũũrĩrĩ ciothe iroinaina nĩ guoya rĩrĩa ciaigua rĩĩtwa rĩaku.

8 Rĩu ndagũthaitha njĩĩra ũrĩa ũhoteete gwĩka ũguo.”

Judithi athiũrũrũkĩirio nĩ andũ oothe akĩmwĩra maũndũ moothe marĩa eekĩĩte kuuma rĩrĩa oimire Bethulia nginya ihinda rĩu maaragia.

9 Arĩĩkia kwaria, andũ oothe magĩkayũrũrũka na kayũ kanene o nginya itũũra rĩkĩanũka nĩ gĩkeno.

10 Na rĩĩrĩ, Akioru arĩĩkia kũigua maũndũ moothe marĩa Ngai wa Isiraeli eekĩĩte, akĩmwĩtĩkia na hinya mũno. Agĩgĩĩtĩkĩra kũrua na thuutha ũcio akĩamũkĩrwo thĩinĩ wa nyũmba ya Isiraeli.

Kĩmako kũgĩa kambĩinĩ ya Holoferine

11 Kwarooka gũkĩa andũ a Isiraeli magĩcuuria kĩongo kĩa Holoferine rũthingoinĩ rwa itũũra na mũndũ o mũndũ akĩoya matharaita maake na oothe makiumagara marĩ ikundi magĩthiĩ tũcĩrainĩ twa irĩma.

12 Rĩrĩa andũ a Asiria maamoonire, makĩrekania kũrĩ anene a mbaara, nao acio magĩtũmana kũrĩ anene na atongoria a ita, na kũrĩ atongoria arĩa angĩ oothe.

13 Nao makĩrekania hemainĩ ya Holoferine, makĩĩra Bagoasi atĩrĩ, “Arahũra mũtongoria witũ, nĩ gũkorwo ngombo iria nĩciũmĩrĩirie igaikũrũka ciũke itũtharĩkĩre; irenda o kũniinwo biũ.”

14 Naake Bagoasi agĩtoonya thĩinĩ, akĩhũũra hĩ arĩ mbere ya gĩtambaya kĩrĩa kĩagayanĩĩtie hema tondũ eeciiragia atĩ Holoferine aakomeete na Judithi.

15 Rĩrĩa aaregire gwĩtĩkwo akĩhumbũria mbathiya, agĩtoonya kũrĩa Holoferine aakomaga. Agĩgĩkora mwĩrĩ wake ũtinĩĩtio mũtwe na ũtambũrũkĩĩtio thĩ harĩa hakinyithagio magũrũ mũndũ oima ũrĩrĩ.

16 Akiugĩrĩria na mũgambo mũnene akiuga mbu akĩrĩraga na akĩgirĩkaga agĩtembũrangaga nguo ciake.

17 Agĩcooka agĩthiĩ hemainĩ kũrĩa Judithi aikaraga no ndaigana kũmũkora. Thuutha ũcio akiuma na ihenya agĩthiĩ kũrĩ atongoria akĩanĩrĩra atĩrĩ,

18 “Ngombo iria nĩiratũheenirie! Mũtumia ũmwe Mũhibirania nĩareeheete gĩconoko thĩinĩ wa ũthamaki wa Nebukadinezaru. Taroraai! Holoferine akomeete thĩ e mũkuũ na kĩongo gĩake kĩrĩ gĩtinie gĩgathiio nakĩo!”

19 Rĩrĩa maiguire ũguo-rĩ, atongoria a mbũtũ cia Asiria magĩtembũranga nguo ciao nĩ ũndũ wa kĩeha, na kambĩ yothe ĩkĩiyũrwo nĩ kĩrĩro na mbugĩrĩrio nene.

Ũhootani wa Isiraeli

1 Rĩrĩa thigari ciaiguire ũrĩa gwekĩkĩĩte, ikĩmaka mũno

2 na ikĩambĩrĩria kũinaina nĩ guoya. Ciothe ikĩhurunjũka mĩena na mĩena kuuma kambĩinĩ, na itiageririe gũikara hamwe o na atĩa, nacio igĩkĩgeria gũtuĩkanĩria ngurumoinĩ o na kũũrĩra irĩmainĩ.

3 Nacio thigari iria ciambĩĩte hema irĩmainĩ iria ciathiũrũrũkĩirie Bethulia o nacio ikĩambĩrĩria gwĩthara. Nacio thigari ciothe cia Isiraeli igĩikũrũka gũcitharĩkĩra.

4 Naake Uzia akĩrekania matũũra ma Betomasithaimu, Bebai, Choba, Kola, na bũrũri wothe wa Isiraeli, nĩ geetha mamamenyithie ũrĩa gwatuĩkĩkĩĩte, na mamoorie meturanĩre hamwe nao gũtharĩkĩra na kũniina thũ ciao.

5 Rĩrĩa andũ a Isiraeli maanyiitire ndũmĩrĩri ĩyo, makĩmatharĩkĩra makĩmateng’eria o nginya Choba. O na andũ a Jerusalemu na arĩa oothe maatũũraga irĩmainĩ magĩĩturanĩra hamwe nao maarĩĩkia kũigua maũndũ marĩa maatuĩkĩkĩĩte thĩinĩ wa kambĩ ya thũ ciao. Nao andũ a mĩena ya Gileadi na Galili makĩhinga njĩra ĩrĩa andũ a Asiria mooragĩra na makĩũraga aingĩ aao. Makĩmathingata o nginya mwena ũrĩa ũthiũrũrũkĩirie Damasiki.

6 Nao andũ arĩa angĩ a Bethulia magĩikũrũka, magĩthiĩ kambĩinĩ ya Asiria makĩmĩtharĩkĩra na magĩtaha indo nyingĩ. Ũndũ ũcio ũgĩgĩtũma matonge mũno.

7 Nao Aisiraeli maacooka kuuma mbũraganoinĩ ĩyo makĩyoera kĩrĩa gĩatigarĩĩte. O nao andũ a matũũrainĩ na icagiinĩ cia bũrũri wa irĩma makĩĩnyiitĩra indo nyingĩ, nĩ gũkorwo kwarĩ na indo nyingĩ mũno.

Isiraeli gũkũngũĩra ũhootani

8 Atĩrĩĩrĩ, Joakimu, Mũthĩnjĩri Ngai Ũrĩa Mũnene na kĩama kĩa athuuri a Isiraeli arĩa maarĩ Jerusalemu magĩũka kwĩyonera na kwĩiguĩra mawega marĩa Mwathani aitũrũrĩire Isiraeli, o na kuona Judithi na kũmũgaathĩrĩria.

9 Nao maakinya, oothe makĩmũgaathĩrĩria makiuga atĩrĩ, “Wee nĩ we ũkumio wa Jerusalemu, wee nĩ we riiri mũnene wa Isiraeli na nowe mwĩtĩĩo wa rũũrĩrĩ rwitũ!

10 Na guoko gwaku, wee mwene nĩwoneire Aisiraeli, ũhootani mũnene ũũ; na Ngai nĩakeneetio mũno nĩ ũguo. Ũroraathimwo nĩ Mwathani Mwene Hinya Wothe nginya tene!” Nao andũ oothe magĩcookia atĩrĩ, “Ameni.”

11 Itĩĩna rĩa matukũ mĩrongo ĩtatũ andũ makĩomookera kambĩ makĩmĩtaha indo ciothe. Makĩhe Judithi hema ya Holoferine hamwe na thaani ciake ciothe cia betha, na mbakũri ciake na marĩrĩ maake, na indo ciake ciothe cia nyũmba. Naake Judithi agĩcioya agĩciigĩrĩra igũrũ rĩa nyũmbũ yake; akĩhaarĩria ngaari ciake akĩbokera indo icio ciothe.

12 Nao atumia oothe a Isiraeli makĩhiũha gũũka kũmuona; magĩitĩka kũmũinĩra nyĩmbo cia kũmũgaathĩrĩria makĩrũũgarũũgaga nĩ ũndũ wa gĩtĩĩo gĩake. Naake Judithi agĩtua mathĩgĩ ma mĩtamaiyũ akĩmanengera atumia arĩa maatwaranĩĩte naake.

13 Arĩ hamwe na atumia arĩa angĩ magĩtunga thũmbĩ cia mĩtamaiyũ. Agĩgĩtongoria mũtongoro wothe, agĩthiĩ mbere ya atumia arĩa maathiaga makĩrũgarũgaga. Nao arũme oothe a Isiraeli marĩ na matharaita na thũmbĩ cia mahũa mĩtwe makĩmoima thuutha makĩinaga nyĩmbo cia kũgaathĩrĩria.

Rwĩmbo rwa Judithi rwa kũgooca

1 Naake Judithi athiũrũrũkĩirio nĩ andũ oothe a Isiraeli akĩambĩrĩria kũina rwĩmbo rwa gũcookia ngaatho. Nao andũ makĩina makĩamũkĩria rwĩmbo rũũrũ rwa kũgooca maanĩrĩire.

2 Judithi akĩina atĩrĩ,

“Ĩtĩkaai kũinĩra Ngai wakwa na tamburini, mũkĩhũũrithanagia thaani.

Mũinĩreei rwĩmbo rwerũ,

mũgooceei na mũmwĩte amũteithie.

3 Amu Mwathani nĩ Ngai ũniinaga mbaara,

nĩahonokirie kuuma kũrĩ thũ ciakwa

na akĩnjookia kambĩinĩ ya andũ aake.

4 Aasiria moimire na mwena wa irĩmainĩ cia na rũgongo,

magĩũka na thigari ngiri na ngiri.

Ũingĩ wao nĩwahingĩrĩirie njũũĩ kũu mĩkuruinĩ,

thigari ciao cia mbarathi ikĩhumbĩra irĩma.

5 Nĩmaatũmakirie atĩ nĩmegũcina bũrũri witũ,

na moorage aanake aitũ na hiũ cia njora,

mahũũrithie tũkenge twitũ thĩ.

Ningĩ matahe ciana ciitũ macikuue ta mĩgwate

na matahe airĩĩtu aitũ arĩa thingi.

6 No Mwathani Mwene Hinya Wothe nĩamahĩngire,

akĩhũthĩra mũtumia kũmagirĩrĩria.

7 Nĩ gũkorwo njamba yao ndĩagũire na ũndũ wa mooko ma aanake,

o na ti ciana cia marimũ ciamũũragire,

o na ti imũndũ nene ciamũtharĩkĩire.

No nĩ Judithi mwarĩ wa Merari,

amu nĩ we wamũgũithirie na ũthaka wake.

8 Amu nĩeyaũrire nguo ya ũndigwa wake,

nĩ geetha atũũgĩrie andũ a Isiraeli arĩa maarĩ ahinyĩrĩrie.

Ehakire ũthiũ maguta manungi wega,

akĩrama njuĩrĩ ciake na agĩcioha na rũkwaro rwa gĩtambaya;

na akĩĩhumba nguo ya gataani nĩ geetha amũguucĩrĩrie.

9 Kĩraatũ gĩake nĩkĩaguucĩrĩirie maitho maake;

ũthaka wake ũkĩũmba ngoro yake,

naruo rũhiũ rwa njora rũkĩrenga ngingo yake.

10 Aperisia nĩmainainire nĩ ũũmĩrĩru wake;

Amede makĩmakio nĩkwĩgũgũma gwake.

11 Nao andũ aitũ arĩa maahinyĩrĩirio makĩanĩrĩra nĩkũhootana;

maarĩ ahinyaru namakahinyĩrĩrio

no nĩmaatũmire thũ ihũndũke imakĩĩte na guoya.

12 Ithuĩ tũrĩ njiarwa cia ngombo,

no thũ ciitũ nĩciagarũrũkire na igĩĩthara.

Twaciũragire o ta ngombo ciũrĩĩte,

igĩkĩniinwo nĩ ita cia Mwathani.

13 “Nĩngũinĩra Ngai wakwa rwĩmbo rwerũ:

Wee Mwathani wakwa, wĩ mũkaru na wĩ riiri!

Wĩ hinya mũno na ndũngĩhooteka!

14 Reke ciũmbe ciaku ciothe igũtungatĩre

tondũ ciagĩire na ũndũ wa kiugo gĩaku.

Watũmire Roho waku na agĩciũmba,

gũtirĩ mũndũ ũngĩhota gwĩtiiria mũgambo waku.

15 Amu irĩma o hamwe na maria nĩcinainaga,

na mahiga magatweka ta mũcumaa wamakuhĩrĩria.

No andũ arĩa magũtĩĩaga nĩũrĩthiaga na mbere kũmaiguĩra tha.

16 Mwathani nĩakenagio nĩ arĩa mamũtĩĩaga

gũkĩra nyama ciothe njega irutĩirwo kĩgongoonainĩ,

kana magongoona moothe marĩ na mũtararĩko ũrĩa mwega mũno.

17 Kaĩ ndũũrĩrĩ iria ciũkagĩrĩra andũ aakwa irĩ thĩĩnainĩ-ĩ!

Mwathani Mwene Hinya Wothe nĩagaaciherithia mũthenya wa ituĩro.

Nĩagaatũma mwaki na igunyũ irĩe mĩĩrĩ yao;

nao nĩmakaarĩra nĩ ruo tene na tene.”

Ngumo ya Judithi

18 Rĩrĩa maakinyire Jerusalemu-rĩ, nĩmeetheririe na magĩthaathaiya Ngai; makĩruta magongoona ma njino, na ma kwĩyendera, o na iheeo.

19 Na rĩĩrĩ, Judithi akĩrutĩra Ngai indo ciothe cia Holoferine iria aaheetwo nĩ andũ gĩtaama kĩrĩa na we mwene aacuurũrĩĩtie kuuma gĩtandainĩ kĩa Holoferine agĩkĩheana kĩrĩ kĩheeo kĩa mwanya kũrĩ Mwathani.

20 Andũ magĩgĩthiĩ na mbere gũkũngũĩra handũinĩ ha mĩeri ĩtatũ mbere ya Hekaarũ kũu Jerusalemu, naake Judithi agĩikarania nao.

21 Na rĩrĩa maũndũ macio maathirire, andũ oothe makĩinũka kwao, naake Judithi agĩcooka Bethulia agĩtũũra mũgũndainĩ wake. Ũtũũroinĩ wake wothe nĩaheetwo gĩtĩĩo bũrũriinĩ wothe wa Isiraeli.

22 Naake nĩoragio nĩ arũme aingĩ mamũhikie, no kuuma hĩndĩ ĩrĩa mũthuuriwe Manase aakuire, Judithi ndacookire kũhika rĩngĩ.

23-24 Ngumo yake nĩyathire ĩkĩongererekaga makĩria, na agĩkũra arĩ o nyũmbainĩ ĩrĩa mũthuuriwe aamũtigĩire. Mbere ya gũkua, Judithi nĩagayanĩirie indo ciake gatagatĩinĩ ka andũ aao na a kwa mũthuuriwe arĩa maamũkuhĩrĩirie, na akĩrekereria ndungata yake ya mũirĩĩtu. Aakuĩrĩire kũu Bethulia arĩ na ũkũrũ wa mĩaka igana na ĩtaano, agĩthikwo kũrigania na mũthuuriwe, nao andũ a Isiraeli makĩmũcakaĩra mĩthenya mũgwanja.

25 Na rĩĩrĩ, hĩndĩ ĩrĩa yothe Judithi aarĩ muoyo, o na mĩaka mĩingĩ thuutha wa gũkua gwake, gũtirĩ mũndũ o na ũmwe ũngĩageririe kũmakia andũ a Isiraeli.