Author: admin

Categories
Kũguũrĩrio

Kũguũrĩrio 18

Babiloni kũng’aũranio

1 Na rĩĩrĩ, thuutha wa ũguo nĩndoonire mũraika ũngĩ agĩikũrũka oimĩĩte igũrũ matuinĩ e na ũhoti mũnene, nayo thĩ ĩkĩarĩrwo nĩ riiri wake.

2 Naake akĩanĩrĩra na mũgambo mũnene akiuga atĩrĩ, “Babiloni itũũra rĩrĩa rĩnene nĩrĩgwĩte! Rĩgwĩte rĩgatuĩka kũndũ gwa gũikaragwo nĩ ngoma, njeera ya maroho moothe mooru, na njeera ya mĩthemba yothe ya nyoni njũru na itendeetwo.

3 Tondũ ndũũrĩrĩ ciothe nĩcinyuĩte ndibei ya maraakara ma ũmaraaya wake, athamaki a thĩ magatharia naake, nao ahũũri mbiacara a mabũrũri magatongio nĩ mũtũũrĩre wake wa mĩago ya mĩthemba yothe.”

4 Ngĩcooka ngĩigua mũgambo ũngĩ uumĩĩte igũrũ matuinĩ ũkiuga atĩrĩ:

“Andũ aakwa, umaai thĩinĩ wake!

Mũtikanyiitanĩre naake meehia maake

mũtikaherithanĩrio hamwe naake!

5 Tondũ meehia maake macookanĩrĩirio kĩrũndo makahuutia o matu,

na Ngai nĩaririkanĩĩte ciĩko ciake njũru.

6 Mwĩkeei ũrĩa amwĩkĩĩte;

maũndũ marĩa moothe amwĩkĩĩte mũrĩheei maita meerĩ.

Mũiyũrĩriei gĩkombe gĩake gĩa kũnyua kĩrũrũ

maita meerĩ ma kĩrĩa aramũthondekeire.

7 Mũnyamaariei na mũmwĩkĩre kĩeha kĩiganaine na mwĩgaatho na mwĩĩkĩrĩro wake,

nĩ amu areĩĩra na ngoro atĩrĩ:

‘Niĩ njikarĩĩte o ta kwini!

Ndirĩ mũtumia wa ndigwa,

na ndirĩ hingo ngaagĩa na kĩeha!’

8 Kwoguo matũhũũhũ maake: mĩrimũ, kĩeha, na ng’aragu,

makaamũkora mũthenya o ro ũmwe.

Ningĩ nĩagaacinwo na mwaki,

tondũ Mwathani Ngai ũrĩa ũmũtuagĩra e hinya.”

9 Nao athamaki a thĩ arĩa maanyiitanĩire naake ũmaraayainĩ wake na mũtũũrĩreinĩ wake wa mĩago ya mĩthemba yothe nĩmakaarĩra na magirĩke nĩ ũndũ wa itũũra rĩu moona ndoogo yarĩo rĩkĩhĩa.

10 Makaarũũgama o haraaya nĩ ũndũ wa gwĩtigĩra iherithia rĩu rĩake moigage atĩrĩ, “Wee Babiloni, itũũra inene na rĩa hinya kaĩ wĩ na thĩĩna-ĩ! Kaĩ wĩ na thĩĩna-ĩ! Ituĩro rĩaku rĩakinya ihinda o rĩmwe!”

11 Ahũũri mbiacara a mabũrũri o nao nĩmakaarĩra na magirĩke nĩ ũndũ wake, amu gũtirĩ mũndũ ũgaacooka kũgũra mĩrigo yao rĩngĩ:

12 thahabu, betha, tũhiga twa goro, o na ruuru; mataama ma gataani, nguo cia rangi wa babũ, cia hariiri, na iria nduune; mĩtĩ ĩrĩa mĩnungi wega, na indo cia mĩthemba yothe ithondekeetwo na mĩguongo, mĩtĩ ya goro, gĩcango, cuuma, na mahiga ma goro;

13 makoni ma mĩndarathini, iriki, ũbaani, manemane, na ubumba; na ndibei, maguta ma mĩtamaiyũ, mũtu ũrĩa mũhinyu, na ngano; ng’ombe, ng’ondu, na mbarathi hamwe na makaari macio, na ngombo o na mĩoyo ya andũ.

14 Ahũũri acio a mbiacara marĩmwĩraga atĩrĩ, “Indo ciothe iria ũreriragĩria kũgĩa nacio nĩthengie harĩ we, naguo ũtonga waku wothe na riiri waku nĩmũthiru, na ndũrĩ hingo ũgaciona rĩngĩ!”

15 Ahũũri mbiacara arĩa meetongirie na indo icio makaarũũgama o haraaya nĩ ũndũ wa gwĩtigĩra iherithia rĩake. Makaarĩra na magirĩke,

16 makiugaga, atĩrĩ, “Kaĩ wĩ na thĩĩna-ĩ! Kaĩ wĩ na thĩĩna wee Itũũra rĩĩrĩ inene, rĩrĩa rĩratũũraga rĩĩhumbaga nguo cia gataani, cia rangi wa babũ, na cia rangi mũtuune, na rĩreekagĩra mathaga ma thahabu, ma tũhiga twa goro, na twa ruuru-ĩ.

17 Ũtonga ũcio wothe waniinwo na ithaa o rĩmwe! Anene oothe a meeri, na arĩa makuuĩĩtwo, na arĩa macitwarithagia, na arĩa oothe makoragwo na mbiacara iriainĩ makaarũũgama o haraaya.”

18 Moona ndoogo ya itũũra rĩu rĩkĩhĩa magaakayũrũrũka makiugaga atĩrĩ, “Kũrĩ kwagĩa itũũra rĩngĩ ta itũũra rĩĩrĩa inene?”

19 Makeehurĩria rũkũngũ mĩtwe makĩrĩraga na makĩgirĩkaga makiuge atĩrĩ, “Kaĩ wĩ na thĩĩna-ĩ! Kaĩ wĩ na thĩĩna we Itũũra rĩĩrĩ inene, rĩrĩa rĩatũmire andũ oothe arĩa marĩ na meeri matonge nĩ ũndũ wa ũtonga warĩo-ĩ! Rĩathira o biũ na ithaa o rĩmwe!”

20 Wee igũrũ, kena nĩ ũndũ wa kwanangwo kwa Babiloni! Inyuĩ andũ a Ngai, atũmwo na anabii, kenaai tondũ Ngai nĩatuĩrĩire itũũra rĩu nĩ ũndũ wa ũrĩa rĩamwĩkire!

21 Thuutha ũcio mũraika wĩ na hinya akĩoya ihiga rĩmwe rĩatariĩ ta ihiga inene rĩa thĩo, akĩrĩikia iriainĩ akiugaga atĩrĩ, “Ũguo nĩguo Babiloni, itũũra rĩrĩa inene rĩgaikanio thĩ na hinya, na rĩtigaacooka kuoneka rĩngĩ.

22 Mũgambo wa inanda na mĩgambo ya aini, na mĩgambo kuuma kũrĩ ahuuhi a mĩtũũrirũ na tũrumbeeta ndĩkaiguuo harĩ we kinya tene! Gũtirĩ bundi wa mũthemba o na ũrĩkũ ũgaacooka kuoneka thĩinĩ waku o na rĩ, o na mũrurumo wa ihiga rĩu rĩa thĩo ndũgaacooka kũiguĩka thĩinĩ waku o na rĩ!

23 Ũtheri wa taawa ndũgaacooka gũkenga thĩinĩ waku o na rĩ, na mĩgambo ya ahiki na ahikania ndĩgaacooka kũiguĩka thĩinĩ waku o na rĩ. Amu ahũũri mbiacara aaku nĩ o maraarĩ andũ arĩa anene a mabũrũri, na ndũũrĩrĩ ciothe nĩciaheenereirio nĩ ũringi ciama waku wa maheeni!”

24 Babiloni yaherithirio nĩ ũndũ thakame ya anabii na ya andũ a Ngai o hamwe na ya andũ oothe arĩa maanooragwo thĩinĩ wa thĩ nĩyonekire thĩinĩ wayo.

Categories
Kũguũrĩrio

Kũguũrĩrio 19

1 Thuutha wa ũguo ngĩigua mũgambo mũnene watariĩ ta wa andũ gĩkundi kĩnene kũu igũrũ matuinĩ makiuga atĩrĩ, “Haleluya! Ũhonokio na riiri na hinya nĩ cia Ngai witũ,

2 amu gũtuanĩra gwake nĩ kwa ma, na gwa kĩhooto! Ngai nĩatuĩrĩire mũmaraaya ũrĩa mũnene ũrĩa ũrathũũkĩĩtie thĩ na ũmaraaya wake, na nĩamũherithĩĩtie nĩ ũndũ wa gũita thakame ya ndungata ciake.”

3 Ningĩ makiuga rĩngĩ atĩrĩ, “Haleluya! Ndoogo ya mwaki ũrĩa ũramũcina ĩgũtũũra yambataga na igũrũ kinya tene na tene!”

4 Nao athuuri arĩa mĩrongo ĩĩrĩ na ana, o hamwe na ciũmbe inya iria i muoyo makĩgũa thĩ, magĩthaathaiya Ngai ũrĩa ũikarĩire gĩtĩ kĩa ũnene makiugaga atĩrĩ, “Ameni! Haleluya!”

Iruga rĩa ũhiki wa Gatũrũme

5 Ningĩ mũgambo ũkiuma gĩtĩinĩ kĩa ũnene ũkiuga atĩrĩ, “Ngai witũ nĩakumio nĩ inyuĩ inyuothe ndungata ciake, o inyuĩ andũ oothe anene na anyiinyi arĩa mamũheete gĩtĩĩo!”

6 Ningĩ ngĩigua mũgambo ta wa andũ gĩkundi kĩnene ũrĩa wagambaga ta wa ndururumo nene mũno, kana ta wa marurumĩ manene mũno ũkiuga atĩrĩ, “Haleluya! Mwathani Ngai witũ ũrĩa Mwene Hinya Wothe nĩ Mũthamaki!

7 Nĩtũkeneei na tũcanjamũke; nĩtũgooceei ũnene wake! Amu ũhiki wa Gatũrũme nĩmũkinyu, na mũhiki wake nĩehaarĩirie.

8 Naake mũhiki nĩanengereetwo nguo theru ya gataani ĩrahenia eekĩre.” (Nguo ya gataani nĩ ciĩko iria njega cia andũ a Ngai.)

9 Ningĩ ngĩcooka ngĩĩrwo nĩ mũraika ũũ, “Andĩka atĩrĩ: Kũraathimwo nĩ andũ arĩa meetĩirwo iruga rĩa ũhiki wa Gatũrũme.” Agĩcooka akĩnjĩĩra atĩrĩ, “Ciugo ici cia Ngai nĩ cia ma.”

10 Na niĩ ngĩkĩĩgũithia thĩ magũrũinĩ maake ndĩmũthaathaiye, no we akĩnjĩĩra atĩrĩ, “Ndũgeeke ũguo! Niĩ ndĩ ndungata o ta we, o na ta andũ arĩa angĩ meetĩkĩĩtie arĩa makoragwo marũmĩĩtie ũira wa Jesũ. Thaathaiya Ngai!”

Nĩ ũndũ ũhoro wa ma ũrĩa Jesũ aamenyithanirie nĩguo ũtaaraga anabii makĩratha.

Mũndũ ũikarĩire mbarathi njerũ

11 Ningĩ ngĩcooka ngĩona igũrũ rĩhingũkĩĩte, na nĩkwarĩ na mbarathi njerũ. Naake mũndũ ũrĩa wamĩikarĩire eetagwo Mwĩhokeku na Wa ma; atuaga ciira na kĩhooto o na akarũa na kĩhooto.

12 Maitho maake maahaanaga ta rũrĩrĩmbĩ rwa mwaki, naguo mũtwe wake nĩawĩkĩrĩĩte thũmbĩ nyingĩ. Nĩandĩkĩĩtwo rĩĩtwa, no gũtirĩ mũndũ ũngĩ ũrĩũĩ tiga o we wiki.

13 Nguo ĩrĩa ehumbĩĩte nĩyatobokeetiothakameinĩ, na rĩĩtwa rĩake nĩ “Kiugo kĩa Ngai.”

14 Mbũtũ cia ita iria irĩ igũrũ nĩciamũrũmĩrĩire ciikarĩire mbarathi njerũ, na igeekĩra nguo njerũ theru cia gataani.

15 Kanuainĩ gaake nĩkwoimĩĩte rũhiũ rwa njora rũũgĩ, rũrĩa akaananga ndũũrĩrĩ naruo. Akaamariĩraga na rũthanju rwa cuuma na arangĩrĩrie ihihĩro rĩa ndibei ya maraakara mararĩrĩmbũka ma Ngai Mwene Hinya Wothe.

16 Nguoinĩ yake o na kĩeroinĩ gĩake haandĩkĩĩtwo atĩrĩ, “Mũthamaki wa athamaki na Mwathani wa aathani.”

17 Ngĩcooka ngĩona mũraika arũngiĩ riũainĩ. Naake akĩanĩrĩra nyoni iria ciũmbũkaga rĩerainĩ agĩciĩra atĩrĩ, “Ũkaai mũcookanĩrĩre hamwe nĩ ũndũ wa iruga rĩnene rĩa Ngai!

18 Ũkaai mũrĩe mĩĩrĩ ya athamaki, ya arũithia a mbaara, ya njamba cia ita, ya mbarathi na ya arĩa maciikaragĩra, o na ya andũ oothe arĩa ngombo na arĩa matarĩ ngombo, arĩa anene na arĩa aniini!”

19 Ngĩcooka ngĩona nyamũ ĩrĩa hamwe na athamaki a thĩ, na mbũtũ ciao cia ita macookanĩrĩire hamwe marũe na ũcio waikarĩire mbarathi, o hamwe na mbũtũ yake ya ita.

20 Nayo nyamũ ĩyo ĩkĩnyiitwo, o hamwe na mũnabii wa maheeni ũrĩa waringaga ciama ĩ ho. (Ciama icio nĩcio mũnabii ũcio aahĩtithĩĩtie nacio andũ arĩa meekĩrĩĩtwo rũũri rwa nyamũ ĩyo, o na arĩa maathaathaĩĩtie mũhianano wayo.) Nyamũ ĩyo hamwe na mũnabii ũcio wa maheeni magĩikio icuainĩ rĩa mwaki wa ũbiriiti me muoyo.

21 Acio angĩ nao makĩũragwo na rũhiũ rũrĩa ruumĩĩte kanuainĩ ka ũcio waikarĩire mbarathi, nacio nyoni ciothe ikĩrĩa nyama cia mĩĩrĩ yao o ta ũrĩa ingĩahotire.

Categories
Kũguũrĩrio

Kũguũrĩrio 20

Mĩaka ĩrĩa ngiri ĩmwe

1 Ngĩcooka ngĩona mũraika agĩikũrũka kuuma igũrũ anyiitĩĩte macabi ma irima rĩrĩa rĩtarĩ mũthia, o na mũnyororo mũnene na guoko gwake.

2 Naake akĩnyiita ndamaathia, o yo nyamũ ya tene, na no yo Ngoma kana Caitaani, akĩmĩoha mĩaka ngiri ĩmwe,

3 akĩmĩikia irimainĩ rĩu rĩtarĩ mũthia. Agĩcooka akĩrĩhinga na akĩrĩtuma, nĩ geetha ndĩkaaheenie andũ a ndũũrĩrĩ rĩngĩ kinya mĩaka ngiri ĩmwe (1,000) ĩgaathira. Thuutha ũcio nĩkoohorwo kwa ihinda iniini.

4 Ngĩcooka ngĩona itĩ cia ũnene, nao arĩa maaciikarĩire makĩheeo hinya wa gũtuanĩra. O na nĩndoonire mĩoyo ya andũ arĩa mooragĩĩtwo nĩ tondũ wa kuumbũra Jesũ, na kũheana Ũhoro wa Ngai. Ningĩ matiathaathaĩĩtie nyamũ ĩyo kana mũhianano wayo, na matiekĩrĩĩtwo rũũri rwayo moothiũinĩ kana mookoinĩ maao. Nĩmaagĩire na muoyo rĩngĩ na magĩathana hamwe na Kristũ mĩaka ngiri ĩmwe (1,000).

5 (Andũ arĩa angĩ maakuĩte matiacookire muoyo kinya rĩrĩa mĩaka ngiri ĩmwe (1,000) yathirire.) Kũu nĩkuo kũriũka kwa mbere kwa arĩa akuũ.

6 Gũkena na kũraathimwo-rĩ, nĩ mũndũ ũrĩa wĩ na handũ kũriũkainĩ kũu kwa mbere. Gĩkuũ gĩa keerĩ gĩtirĩ na hinya wa gwĩka andũ acio ũndũ o na ũrĩkũ; magaatuĩka athĩnjĩri a Ngai o na a Kristũ, na nĩmagaathanaga naake mĩaka ngiri ĩmwe (1,000).

Kũhootwo gwa Caitaani

7 Na rĩĩrĩ, mĩaka ngiri ĩmwe (1,000) yathira, Caitaani nĩakoohorwo kuuma njeera yake,

8 naake nĩagaathiĩ kũheenia andũ a ndũũrĩrĩ arĩa maiyũrĩĩte ituri ciothe cia thĩ, nĩ o Gogu na Magogu, amacookanĩrĩrie hamwe nĩ ũndũ wa mbaara, na magaakorwo marĩ aingĩ o ta mũthanga wa iriainĩ.

9 Nao nĩmaacoorire thĩ yothe, na magĩthiũrũrũkĩria kambĩ ya andũ a Ngai na itũũra rĩrĩa Ngai eendeete, no mwaki ũkiuma igũrũ ũkĩmaniina.

10 Nayo Ngoma, ĩrĩa yamaheeneetie ĩgĩikio icuainĩ rĩa mwaki na ũbiriiti, rĩrĩa nyamũ ĩrĩa yarĩ, hamwe na mũnabii ũrĩa wa maheeni, nao magaatũũra maherithagio ũtukũ na mũthenya kinya tene na tene.

Ituĩro rĩa mũthia

11 Ngĩcooka ngĩona gĩtĩ kĩa ũnene kĩerũ na ũrĩa wagĩikarĩire. Nacio thĩ na igũrũ igĩĩthara mbere yake na itiacookire kuonwo rĩngĩ.

12 Ningĩ ngĩona andũ arĩa akuũ, anene na anyiinyi marũũgamĩĩte mbere ya gĩtĩ kĩa ũnene. Namo mabuku makĩhingũrwo. Ningĩ ibuku rĩngĩ rĩkĩhingũrwo, na nĩrĩo ibuku rĩa muoyo. Nao arĩa akuũ magĩtuĩrwo kũringana na ciĩko iria maaneeka, o ta ũrĩa ciandĩkĩĩtwo mabukuinĩ macio.

13 Narĩo iria rĩkĩnengerana akuũ arĩa maarĩ thĩinĩ warĩo. Gĩkuũ na kũrĩa akuũ mathiaga makua ikĩnengerana akuũ arĩa maarĩ thĩinĩ wacio, nao oothe magĩtuĩrwo kũringana na ciĩko iria meekĩĩte.

14 Nakĩo gĩkuũ na kũrĩa andũ mathiaga makua igĩikio icuainĩ rĩa mwaki. (Icua rĩĩrĩ rĩa mwaki nĩ gĩkuũ gĩa keerĩ).

15 Na rĩĩrĩ, mũndũ o wothe ũrĩa rĩĩtwa rĩake rĩtoonekire rĩandĩkĩĩtwo thĩinĩ wa ibuku rĩa muoyo nĩgũikio aikirio icuainĩ rĩa mwaki.

Categories
Kũguũrĩrio

Kũguũrĩrio 21

Igũrũ Rĩerũ na Thĩ Njerũ

1 Ngĩcooka ngĩona igũrũ rĩerũ na thĩ njerũ. Igũrũ rĩa mbere na thĩ ya mbere nĩciathirĩĩte o narĩo iria rĩa mbere rĩtiarĩ ho.

2 Ningĩ ngĩona itũũra rĩrĩa itheru, nĩrĩo Jerusalemu njerũ, rĩgĩikũrũka riumĩĩte na igũrũ kwĩ Ngai, rĩthagathagĩĩtwo ta mũhiki agemeirio mũthuuriwe.

3 Na ngĩigua mũgambo mũnene ũkĩaria kuuma gĩtĩinĩ kĩu kĩa ũnene ũkiuga atĩrĩ, “Gĩikaro kĩa Ngai rĩu kĩrĩ hamwe na andũ! Naake arĩikaranagia nao, nao matuĩke andũ aake. Ngai we mwene arĩkoragwo hamwe nao na nĩegũtuĩka Ngai wao.

4 Nĩekũmagiria maithori maao moothe, tondũ gĩkuũ kana kĩeha kana kĩrĩro kana ruwo itigaacooka gũkorwo kuo rĩngĩ, tondũ maũndũ marĩa ma tene nĩ mathiru.”

5 Ningĩ ũrĩa waikarĩire gĩtĩ kĩa ũnene akiuga atĩrĩ, “Rĩu nĩnderũhia indo ciothe!” Ningĩ akĩnjĩĩra atĩrĩ, “Andĩka ũguo tondũ ciugo icio nĩ cia kwĩhokeka na nĩ cia ma.”

6 Agĩcooka akĩnjĩĩra atĩrĩ, “Nĩkwahinga! Nĩ niĩ Alifa na nĩ niĩ Omega, kĩambĩrĩria na kĩrĩĩkĩrĩro. Mũndũ o wothe mũnyootu nĩngũmũhe maaĩ ma kũnyua kuuma gĩthimainĩ kĩa muoyo na ngũmũhe o tũhũ.

7 Mũndũ o wothe ũrĩa ũkũhootana nĩekũgaya maũndũ maya kuuma harĩ niĩ: ngũtuĩka Ngai wake, naake atuĩke mũũriũ wakwa.

8 No iguoya, arĩa mateetĩkĩĩtie, imaramari, ooragani, ahũũri maraaya, arogi, andũ arĩa mahooyaga mĩhianano, na arĩa oothe maheenanagia, acio me na handũ haao icuainĩ rĩrĩa rĩakanaga mwaki na ũbiriiti, na kĩu nĩkĩo gĩkuũ gĩa keerĩ.”

Jerusalemu Njerũ

9 Naake ũmwe wa araika arĩa mũgwanja maarĩ na mbakũri iria mũgwanja iria ciarĩ na matũhũũhũ marĩa mũgwanja ma mũthia agĩũka harĩ niĩ akĩnjĩĩra atĩrĩ, “Ũka nguonie mũhiki, o we mũtumia wa Gatũrũme.”

10 Na niĩ ngĩnyiitwo nĩ Roho, naake mũraika ũcio akĩnguua akĩndwara kĩrĩmainĩ kĩnene na kĩraaya, akĩnyonia Jerusalemu itũũra rĩrĩa rĩamũre rĩgĩikũrũka riumĩĩte na igũrũ kwĩ Ngai,

11 rĩrĩ na riiri wa Ngai. Itũũra rĩu rĩakengaga ta mahiga ma goro; rĩakengaga ta mahiga ma goro marĩ na marangi mĩthemba mĩingĩ meetagwo Jasiperi, rĩkahaana o ta gĩciicio.

12 Ningĩ rĩarĩ na rũthingo rũnene, rũraaya mũno, na rwarĩ na ihingo ikũmi na igĩrĩ, nacio ihingo icio nĩciarangĩrĩĩtwo nĩ araika ikũmi na eerĩ. Kũu ihingoinĩ nĩkwandĩkĩĩtwo marĩĩtwa ma mĩhĩrĩga ĩrĩa ikũmi na ĩĩrĩ ya andũ a Isiraeli.

13 Na rĩĩrĩ, o mwena wa rũthingo warĩ na ihingo ithatũ: mwena wa irathĩro ihingo ithatũ, mwena wa na rũgongo ihingo ithatũ, mwena wa na kĩanda ihingo ithatũ, na mwena wa ithũĩro ihingo ithatũ.

14 Rũthingo rũu rwa itũũra nĩ rwarĩ na mĩthingi ikũmi na ĩĩrĩ, na mĩthingiinĩ ĩyo nĩhaandĩkĩĩtwo marĩĩtwa ma atũmwo arĩa ikũmi na eerĩ a Gatũrũme.

15 Naake mũraika ũrĩa wanjarĩirie aarĩ na kamũtĩ ga thahabu ga gũthima itũũra rĩu, ihingo ciarĩo na rũthingo rwarĩo.

16 Itũũra rĩu rĩarĩ na mĩena ĩna yaiganaine, ũguo nĩkuuga kũraiha na kwarama nĩrĩaiganaine. Nake mũraika ũcio agĩthima itũũra rĩu na kamũtĩ gaake ga gũthima, narĩo rĩarĩ kiromita ngiri igĩrĩ na magana mana (2,400) kũraiha, na kwarama o taguo, na kwambata na igũrũ o taguo.

17 O na rũthingo nĩarũthimire, naruo rwarĩ na mita mĩrongo ĩtandatũ kwambata na igũrũkũringana na mũthimĩre wa mũndũ, na noguo mũthimĩre wa mũraika.

18 Naruo rũthingo rũu rwakĩĩtwo na mahiga ma goro marĩ na marangi mĩthemba mĩingĩ meetagwo Jasiperi, narĩo itũũra rĩo rĩene rĩarĩ rĩa thahabu theru biũ ta gĩciicio.

19 Nayo mĩthingi ya thingo cia itũũra rĩu yagemeetio na mahiga ma goro ma mĩthemba yothe. Mũthingi wa mbere warĩ wa mahiga ma goro marĩ na marangi, mĩthemba mĩingĩ meetagwo Jasiperi, na wa keerĩ warĩ wa mahiga ma goro mũno ma rangi wa mburuu, wa gatatũ warĩ wa mahiga ma goro me na tũcigo twa marangi meerũ na ma gĩtĩĩri, na wa kana warĩ mahiga ma goro ma rangi wa ngirini ũrĩa mũtheru mũno.

20 Mũthingi wa gataano warĩ wa mahiga ma goro marĩ na marangi mĩthemba mĩingĩ meetagwo Onikisi, na wa gatandatũ warĩ wa mahiga ma goro ma rangi mũtuune. Wa mũgwanja warĩ wa mahiga ma goro marĩ na marangi mĩthemba mĩingĩ mahaana thahabu, na wa kanaana warĩ wa mahiga ma goro ma rangi wa ngirini kana wa mũtukanio wa mburuu na ngirini. Mũthingi wa kenda warĩ wa mahiga ma goro ma rangi wa yerũũ, na wa ikũmi warĩ wa mahiga ma goro ma rangi wa iria kana wa kĩbuu. Wa ikũmi na ũmwe warĩ wa mahiga ma goro ma rangi wa mburuu kana wa mũtukanio wa mburuu na ngirini, naguo wa ikũmi na ĩĩrĩ warĩ wa mahiga ma goro ma rangi wa babũ.

21 Ihingo iria ikũmi na igĩrĩ ciarĩ ruuru ikũmi na igĩrĩ; o kĩhingo gĩathondekeetwo na ruuru ĩmwe. Njĩra ĩrĩa nene ya itũũra yarĩ ya thahabu ĩrĩa theru biũ o ta gĩciicio.

22 Na rĩĩrĩ, ndionire Hekaarũ kũu itũũrainĩ, nĩ tondũ Hekaarũ yakuo nĩ Mwathani Ngai Mwene Hinya Wothe na Gatũrũme.

23 Ningĩ itũũra rĩu rĩtiarĩ na bata wa kũmũrĩkĩrwo nĩ riũa kana mweri, amu riiri wa Ngai nĩguo ũtheri warĩo, na taawa warĩo nĩ Gatũrũme.

24 Andũ a thĩ magaathiaga na ũtheri warĩo, nao athamaki a thĩ mareehage ũtonga wao thĩinĩ warĩo.

25 Ihingo cia itũũra rĩu igaatũũra ihingũrĩĩtwo mũthenya wothe; gũtirĩ hingo ikaahingwo tondũ kũu gũtirĩ hingo gũgaatuka.

26 Ũtonga na ũnene wa andũ a ndũũrĩrĩ nĩikareehagwo thĩinĩ wa itũũra rĩu.

27 No gũtirĩ kĩndũ kĩ na thaahu gĩgaatoonya itũũrainĩ rĩu, o na kana mũndũ wĩkaga ciĩko cia thoni kana waragia maheeni. No arĩa maandĩkĩĩtwo ibukuinĩ rĩa Gatũrũme rĩa muoyo oiki magaatoonya kuo.

Categories
Kũguũrĩrio

Kũguũrĩrio 22

1 Ningĩ mũraika nĩacookire akĩnyonia rũũĩ rwa maaĩ ma muoyo maahenagia ta gĩciicio. Rũũĩ rũu rwoimaga gĩtĩinĩ kĩa ũnene kĩa Ngai na gĩa Gatũrũme,

2 na rwathereraga rũgereire gatagatĩ ka barabara ya itũũra rĩu. Ndeereinĩ cierĩ cia rũũĩ rũu nĩhaarĩ na mũtĩ ũrĩa wa muoyo, ũrĩa ũciaraga maciaro maita ikũmi na meerĩ o mwaka, o mweri riita rĩmwe; namo mahuti maaguo nĩ ma kũhonia andũ a ndũũrĩrĩ.

3 Gũtirĩ kĩndũ o na kĩmwe kĩrume gĩgaakorwo kũu itũũrainĩ.

Nakĩo gĩtĩ kĩa ũnene kĩa Ngai na gĩa Gatũrũme igaakorwo kũu itũũrainĩ, nao arĩa mamũtungatagĩra nĩmakaamũthaathayagia.

4 Nao nĩmakoona ũthiũ wake, narĩo rĩĩtwa rĩake rĩandĩkwo moothiũinĩ maao.

5 Gũtigaatuka rĩngĩ, na matikaabatario nĩ taawa, kana ũtheri wa riũa, amu Mwathani Ngai nĩ we ũgaakorwo e ũtheri wao, na magaatũũra mathamakaga kinya tene na tene.

Gũũka kwa Jesũ

6 Ningĩ mũraika akĩnjĩĩra atĩrĩ, “Ciugo icio nĩ cia kwĩhokeka na nĩ cia ma. Mwathani, we Ngai wa maroho ma anabii nĩatũmĩĩte mũraika wake akoonie ndungata ciake maũndũ marĩa megwĩkĩka o narua.”

7 Jesũ ekuuga, “Atĩrĩĩrĩ! Nĩndĩrooka o narua! Kũraathimwo nĩ mũndũ ũrĩa ũhingagia ciugo cia ũrathi iria irĩ ibukuinĩ rĩĩrĩ!”

8 Niĩ, Johana, nĩ niĩ ndaiguire na ngĩona maũndũ macio. Na rĩrĩa ndamaiguire na ngĩmoona, ngĩĩgũithia magũrũinĩ ma mũraika ũrĩa wanyonagia maũndũ macio, nĩguo ndĩmũthaathaiye.

9 No we akĩnjĩĩra atĩrĩ, “Tiga gwĩka ũguo! Niĩ ndĩ ndungata o ta we, o na ta aariũ a thooguo anabii, o na ta arĩa marũmagĩrĩra ciugo cia ibuku rĩĩrĩ. Thaathaiya Ngai!”

10 Ningĩ akĩnjĩĩra atĩrĩ, “Ndũkaae kũhingĩra ciugo cia ũrathi iria irĩ ibukuinĩ rĩĩrĩ atĩ ituĩke ũndũ wa hitho, amu ihinda nĩrĩkuhĩrĩirie rĩa maũndũ maya moothe kũhinga.

11 Mũndũ ũrĩa mwĩki naaĩ, nĩathiĩ o na mbere gwĩka naaĩ, naake ũrĩa mwaganu athiĩ o na mbere gwĩka maũndũ ma waganu, naake ũrĩa wĩkaga maũndũ meega athiĩ o na mbere gwĩka wega, na ũrĩa naake mũtheru athiĩ o na mbere gũtuĩka mũtheru.”

12 Jesũ ekuuga “Atĩrĩĩrĩ! Nĩndĩrooka o narua. Ngũũka na iheeo ciakwa nĩguo he o mũndũ kĩheeo gĩake kũringana na ciĩko iria aaneeka.

13 Nĩ niĩ Alifa na Omega, Wa mbere na Wa mũthia, na nĩ niĩ Kĩambĩrĩria na Kĩrĩĩkĩrĩro.”

14 Kũraathimwo-rĩ, nĩ arĩa megũthambia nguociao ithere nĩguo magĩe na rũũtha rwa kũrĩa matunda ma mũtĩ wa muoyo, o na rwa gũtoonya itũũrainĩ magereire ihingo.

15 Kũu nja ya itũũra nĩkuo kwĩ magui, arogi, ahũũri maraaya, ooragani, ahooi mĩhianano, na arĩa oothe meendeete maheeni na maheenanagia.

16 “Niĩ Jesũ nĩndatũma mũraika wakwa ooke kũrĩ inyuĩ aanĩrĩre maũndũ maya kũu makanithainĩ. Nĩ niĩ thuuna na wa rũciaro rwa Daudi; o njata ĩrĩa ngengu ya kĩrooko.”

17 Roho na Mũhiki maroiga atĩrĩ, “Ũka!”

Mũndũ o wothe ũkũigua ũhoro ũyũ nĩoige atĩrĩ, “Ũka!”

Mũndũ ũrĩa mũnyootu nĩoke, ũrĩa naake ũkwenda, nĩamũkĩre maaĩ ma muoyo tũhũ.

Kũrĩĩkia

18 Niĩ, Johana, nĩngũkaania mũndũ o wothe ũiguaga ciugo cia ũrathi iria irĩ ibukuinĩ rĩĩrĩ ndĩmwĩre atĩ: Mũndũ o wothe ũkoongerera kaũndũ ciugoinĩ ici, Ngai nĩakaamuongerera matũhũũhũ marĩa maarĩĩtio ũhoro wa mo ibukuinĩ rĩĩrĩ.

19 Naake mũndũ o wothe ũkeeheria kaũndũ kuuma ciugoinĩ cia ũrathi iria irĩ ibukuinĩ rĩĩrĩ, Ngai nĩakaamũima igai rĩake harĩ mũtĩ wa muoyo o na harĩ itũũra rĩrĩa rĩamũre, iria ciarĩĩtio ũhoro wacio ibukuinĩ rĩĩrĩ.

20 Mũndũ ũrĩa ũrutaga ũira wa maũndũ maya oigaga atĩrĩ, “Ĩĩ, nĩndĩrooka o narua!”

Ameni, Ũka Mwathani Jesũ.

21 Wega wa Mwathani Jesũ ũrogĩa hamwe na andũ oothe.

Categories
Tobiti

Tobiti Gũtaarĩria

Gũtaarĩria

Ibuku rĩa Tobiti rĩheanaga ũhoro wa mũtũũrĩre wa kĩĩmũciĩ. Itũũrainĩ rĩa Nineve nĩkuo Tobiti aatũũraga. Tobiti nĩ mũndũ mũthingu, mũrũmia wa Watho wa Musa, na mũndũ mũtugi. No nĩ gĩtumuumu. Aatahanĩirio hamwe na mũhĩrĩga wao wa Nafutali agĩtwarwo Nineve.

Nakuo itũũrainĩ rĩa Ekibatana nĩgwatũũraga mũndũ wa mũhĩrĩga wa Tobiti wetagwo Ragueli. Mwarĩwe Sara nĩatigĩĩtwo nĩ athuuri mũgwanja kĩrũmanĩrĩrio tondũ mooragagwo nĩ ngoma yetagwo Asimodeo, o ũtukũ ũrĩa mahikania mbere ya mamenyane kĩĩmwĩrĩ.

Tobiti na Sara nĩ ũndũ wa mathĩĩna maao marahooya Mwathani amarute muoyo, no Ngai agacookia mahooya na njĩra ciake mwene. Aramatũmĩra mũraika Rafaili. Rafaili agatwara Tobia mũrũ wa Tobiti kwa Ragueli na akahikithania Tobia na Sara, o na akahe Tobia ndaawa ya kũhonia maitho ma ithe.

Ibuku rĩĩrĩ rĩragaathĩrĩria ũhoro wa kũruta mĩhothi, na ũhoro wa kũbaarĩrĩra mĩĩrĩ ya andũ makua. Ningĩ nĩrĩraheana mũhiano mwega wa ũtũũro wa ũhikania gatagatĩinĩ ga Akristiano, o na rĩgatũruta atĩ Ngai na ũtugi wake atwaranaga na ithuĩ mũthenya o mũthenya.

Ibuku rĩĩrĩ rĩandĩkirwo na Kĩhibirania kana Kĩaramaika ta mĩaka 200 mbere ya gũciarwo kwa Jesũ Kristũ. Nĩrĩheanaga na njĩra hubũku ũhoro wa ndini na mĩtugo ya Ayahudi kabere ga gũciarwo kwa Jesũ Kristũ.

Maũndũ marĩa marĩ ibukuinĩ rĩĩrĩ

Tobiti arĩ Nineve na Sara arĩ Media, gũthĩĩnĩka na kũhooya kwao 1.1–3.15

Mahooya maao gũcookio 3.16–11.18

a. Ngai gũcookia mahooya maao na njĩra ya gũtũma mũraika Rafaili 3.16-17

b. Tobiti gũtaara mũũriũ Tobia 4.1-21

c. Rafaili gũthiĩ Media marĩ na Tobia 5.1–7.12

d. Tobia kũhikia Sara 7.13–9.6

e. Rafaili gũcooka hamwe na Tobia na Sara, na kũhonia ũtumuumu wa Tobiti 10.1–11.18

Mũraika Rafaili kwĩmenyithania nĩ we ũ 12.1-22

Tobiti kũgaatha Ngai na gũtaara Tobia 13.1–14.15

Categories
Tobiti

Tobiti 1

1 Rũũrũ nĩ rũgano rwa Tobiti mũrũ wa Tobieli, Tobieli mũrũ wa Ananieli, Ananieli mũrũ wa Adueli, Adueli mũrũ wa Gabaeli, wa njiarwa cia Asieli na wa mũhĩrĩga wa Nafutali.

2 Matukũinĩ ma Shalumaneseri, mũthamaki wa Asiria, Tobiti nĩanyiitirwo agĩthaamio kuuma Thisibe ĩrĩa ĩ kĩanda wa Kadeshi Nafutali thĩinĩ wa Galili ya rũgongo, na ĩrĩ mwena wa na rũgongo wa Hazoru, na ningĩ ĩrĩ thuutha wa barabara ĩrĩa ĩroreete ithũĩro, mwena wa na rũgongo wa Peori.

Ũtũũro wa wĩthĩ wa Tobiti

3 Ũtũũro wakwa wothe niĩ Tobiti ndũire ndĩ mwĩhokeku na ngeragia gwĩka ũrĩa kwagĩrĩire. Maita maingĩ ndanateithĩrĩria andũ arĩa tũciaranĩirwo nao, na Ayahudi arĩa twathaamĩirio hamwe nao Nineve, mũciĩ mũnene wa Asiria.

4 Rĩrĩa ndaarĩ mwĩthĩ ndatũũraga mwena wa na rũgongo wa bũrũri wa Isiraeli. Nayo mĩhĩrĩga yothe ya Isiraeli yarutagĩra magongoona maayo thĩinĩ wa Jerusalemu. Ngai nĩathuurĩĩte itũũra rĩa Jerusalemu gatagatĩinĩ ka matũũra moothe ma Isiraeli rĩtuĩke rĩagwakwo Hekaarũ ĩrĩ mũciĩ wake mũtheru na wa gũtũũra. No mũhĩrĩga witũ wothe wa Nafutali nĩwaregire Jerusalemu na athamaki arĩa maumaga njiarwainĩ cia Daudi.

5 O ta ũrĩa andũ oothe a mũhĩrĩga ũyũ meekaga, andũ a mũciĩ witũ nĩmaamenyereete gũthiĩ itũũrainĩ rĩa Dani rĩrĩa rĩarĩ irĩmainĩ cia Galili ya rũgongo. Maathiaga kũrutĩra magongoona ndeegwa ya thahabu ĩrĩa Jeroboamu mũthamaki wa Isiraeli aathondekeete kuo.

Wĩhokeku wa Tobiti ndiniinĩ yake

6 Thĩinĩ wa mũciĩ witũ no niĩ nyiiki ndathiaga kaingĩ Jerusalemu gũkũngũĩra thigũkũ o ta ũrĩa Watho wa Musa wathĩĩte mũndũ wothe gwĩka. Nĩndahiũhaga gũthiĩ Jerusalemu ndĩ na magetha maakwa ma mbere, na marigithaathi ma nyamũ ciakwa, na gĩcunjĩ gĩa ikũmi kĩa ng’ombe ciakwa, o hamwe na guoya wa mbere wa kwenjwo ng’ondu ciakwa. Ngathiĩ ngakĩrũũgama mbere ya kĩgongoona Hekaarũ thĩinĩ na ngaanengera athĩnjĩri Ngai, njiarwa cia Harũni, mĩhothi ĩyo yakwa.

7 Ngakĩnengera Alawii arĩa maatungatagĩra Ngai thĩinĩ wa Jerusalemu gĩcunjĩ gĩa ikũmi kĩa ngano yakwa, ndibei, maguta ma ndamaiyũ, makongomanga, ngũyũ, na matunda mangĩ. Mwaka o mwaka, tiga mwaka wa mũgwanja hĩndĩ ĩrĩa bũrũri wakoragwo ũhuurũkĩĩte, nĩndeendagia gĩcunjĩ gĩa keerĩ harĩ ikũmi kĩa indo ciakwa, na ngahũthĩra mbeeca icio marugainĩ ma thigũkũ thĩinĩ wa Jerusalemu.

8 No o mwaka wa gatatũ, nĩndaheanaga gĩcunjĩ gĩa ithatũ harĩ ikũmikũrĩ atumia a ndigwa, na kũrĩ ciana cia ngoriai, o na kũrĩ ageni arĩa maatũũraga gatagatĩinĩ ka andũ aitũ na tũgakĩrĩanĩra maruga ma Thigũkũ tũrĩ hamwe. Maũndũ maya ndameekaga kũringana na Watho wa Musa, ũrĩa Debora nyina wa Ananieli guuka aanjathĩĩte nũmagĩrĩre. (Baaba aakua, ndatigĩrwo ndĩ mwana wa ngoriai.)

Wĩhokeku wa Tobiti arĩ ithaamĩrioinĩ

9 Rĩrĩa ndagimarire, nĩndahikirie Ana, ũmwe wa andũ a mũhĩrĩga witũ, na tũkĩgĩa na kahĩĩ nako tũgĩgeeta Tobia.

10 Thuuthainĩ nĩndanyiitirwo na ngĩthaamĩrio Asiria, na ũguo nĩguo ndookire gũtũũra Nineve.

Hĩndĩ ĩrĩa twatũũraga Nineve, andũ aitũ oothe o na Ayahudi aitũ maarĩaga irio iria ciarĩagwo nĩ andũ a ndũũrĩrĩ;

11 no niĩ nĩnderigĩrĩirie kũrĩaga irio icio,

12 amu nĩndarũmagĩrĩra maathani ma Ngai Ũrĩa Ũrĩ Igũrũ Mũno hatarĩ itherũ.

13 Naake nĩatũmire njĩtĩkĩrĩke nĩ mũthamaki Shalumaneseri ũrĩa wanduire mũgũri wa indo ciake ciothe cia mahũthĩro.

14 Mũthamaki ataanakua nĩndaceeraga kaingĩ bũrũri wa Media kũmũgũrĩra indo kuo. Na hĩndĩ ĩmwe rĩrĩa ndaarĩ itũũrainĩ rĩa Ragesi thĩinĩ wa Media, nĩndatigĩire Gabaeli, mũrũ wa nyina na Gabaria makũnia ma mbeeca, ngĩmũũria anjigĩre. Makũnia macio maarĩ na makĩria ma kiro magana matatũ cia mbeeca cia betha.

15 Rĩrĩa Shalumaneseri aakuire, mũũriũ wake Senakeribu akĩambĩrĩria gwathana ithenya rĩa ithe. Thuutha ũcio kũgerera barabara cia Media gũgĩkorwo arĩ ũgwati ũguo atĩ ndiahotire gũcooka gũthiĩ kuo rĩngĩ.

Tobiti gũthika akuũ

16 Matukũinĩ ma Shalumaneseri, nĩndateithagĩrĩria Ayahudi aitũ rĩrĩa rĩothe mangĩabatarire.

17 Mangĩakorirwo marĩ ahũũtu, nĩndamagayagĩra irio ciakwa, na marĩ njaga ngamahe nguo imwe ciakwa. Ningĩ ingĩonire ũmwe wa andũ aitũ akuĩte na agaikanio na kũu nja ya rũthingo rwa itũũra rĩa Nineve, nĩndamuoyaga ngamũthika na gĩtĩĩo.

18 O na ningĩ nĩndathikire Aisiraeli arĩa oothe mooragirwo nĩ Senakeribu. Senakeribu nĩaherithĩĩtio nĩ Mwathani wa Igũrũ nĩ ũndũ wa kũmũruma. Na rĩrĩa ooraga kuuma Judea nĩoragire Aisiraeli aingĩ nĩ ũrĩa aaraakarĩĩte. Na niĩ ngĩgĩthika mĩĩrĩ yao na hitho, Senakeribu amĩetha ndamĩonire.

19 Na gũgĩkinya atĩ mũndũ ũmwe wa kuuma Nineve akĩĩra mũthamaki atĩ nĩ niĩ ndathikaga ciimba icio. Hĩndĩ ĩrĩa ndaakĩrĩĩkirie kũmenya atĩ mũthamaki nĩamenyeete ũhoro wakwa, na atĩ ũtũũro wakwa wakĩrĩ ũgwatiinĩ, ngĩĩtigĩra mũno. Kwoguo ngĩũra ngĩĩhitha.

20 Indo ciakwa ciothe igĩtahwo igĩĩkĩrwo kĩgĩĩnainĩ kĩa mũthamaki. Kĩrĩa ndaatigĩirio no mũtumia wakwa Ana na mũũriũ wakwa Tobia.

Tobiti kũhonokio nĩ mũihwa wake

21 Thuutha wa ciumia ithathatũ Senakeribu akĩũragwo nĩ aariũ aake eerĩ nao magĩcooka makĩũrĩra irĩmainĩ cia Ararati. Naake mũũriũ ũngĩ wake wetagwo Esarihadoni agĩtuĩka mũthamaki ithenya rĩake. Agĩtua Ahikaru, mwana wa mũrũ wa maitũ Anaeli, mũnene wa maũndũ moothe maakoniĩ mbeeca thĩinĩ wa ũthamaki ũcio.

22 Rĩĩrĩ rĩarĩ ihinda rĩa keerĩ rĩa Ahikaru gũtuuo mũnene, amu hĩndĩ ĩrĩa Senakeribu aarĩ mũthamaki wa Asiria, Ahikaru aarĩ mũtwarĩri mũthamaki gĩa kũnyua, mũigi wa kĩgĩĩna, mwandĩki wa mabuku ma mathabu ma mbeeca, o hamwe na mũrori wa mũhũũri wa thirikaari. Na tondũ Ahikaru aarĩ mũihwa wakwa, nĩanjarĩrĩĩrie kũrĩ mũthamaki na ngĩgĩĩtĩkĩrio gũcooka Nineve.

Categories
Tobiti

Tobiti 2

Thigũkũ ya kĩĩmũciĩ

1 Rĩrĩa ndacookire mũciĩ nĩtwacookanĩrĩire na mũtumia wakwa Ana na mũũriũ wakwa Tobia. Na hĩndĩ ya Thigũkũ ya magetha, ĩrĩa ĩĩtagwo na rĩĩtwa rĩngĩ Thigũkũ ya Ciumia Mũgwanja, nĩndathondekeirwo irio njega mũno na ngĩgĩikara thĩ kũrĩa.

2 Rĩrĩa ndoonire irio iria ciothe ciarĩ meethainĩ, ngĩĩra Tobia atĩrĩ, “Mũũriũ, umagara ũgacarie Mũyahudi witũ o wothe ũngĩkorwo atũũraga gũũkũ ithaamĩrio arĩ mũthĩĩni, mũndũ ũngĩkorwo arũmagĩrĩra mawatho ma Ngai na kĩyo. Ũmũreehe nĩ geetha ooke arĩanĩre irio ici hamwe na ithuĩ. Ndikwambĩrĩria kũrĩa nginya rĩrĩa ũrĩcooka.”

Mũndũ kũũragwo Nineve

3 Kwoguo Tobia agĩthiĩ gũcaria mũndũ ta ũcio eerĩĩtwo. No agĩcooka o ro na ihenya akĩanagĩrĩra atĩrĩ, “Baaba! Baaba!”

Na niĩ ngĩmũcookeria atĩrĩ, “Ũũĩ! Nĩ kĩĩ?”

“Ũmwe wa andũ aitũ nĩoragwo! Harĩ mũndũ wamũita na aikia mwĩrĩ wake ndũũnyũinĩ.”

4 Ngĩrũũga na igũrũ ngiuma hau meethainĩ o na itarĩĩte irio ciakwa. Ngĩeheria mwĩrĩ ũcio njĩrainĩ ngĩũkuua ngĩũiga kĩĩruruinĩ, ngĩeterera riũa rĩthũe ndĩũthike.

5 Ngĩgĩcooka mũciĩ, ngĩĩthamba nĩ ũndũ wa gwĩtheria, ngĩcooka ngĩrĩa irio ciakwa ndĩ na kĩeha kĩnene.

6 Maũndũ macio makĩndirikania ũrĩa mũnabii Amosi eerĩĩte andũ a Betheli atĩ,

“Thigũkũ cianyu igaatuĩka cia macakaya.

na nyĩmbo cianyu cia gĩkeno ituĩke cia kĩeha.”

Ngĩkĩambĩrĩria gũita maithori.

7 Riũa rĩathũa ngiumagara, ngĩenja mbĩĩrĩra, ngĩthika mũndũ ũcio.

8 Nao andũ arĩa twariganĩĩtie magĩĩthekerera makiuga atĩrĩ, “Kaĩ ataretigĩra? Githĩ ndoorire hĩndĩ ĩrĩa ĩngĩ, rĩrĩa maamũcaragia mamũũrage nĩ ũndũ wa ihĩtia o ta rĩĩrĩ, na rĩu nĩ we ũyũ agĩthika akuũ rĩngĩ?”

Tobiti gũtuĩka gĩtumuumu

9 Ũtukũ ũcio ngĩĩthamba nĩ ũndũ wa gwĩtheria, ngĩcooka ngĩthiĩ njainĩ yakwa ngĩkoma hakuhĩ na rũthingo. Ũtukũ ũcio warĩ na ũrugarĩ mũingĩ na kwoguo ndiehumbĩrire mũtwe.

10 Ningĩ ndiamenyaga atĩ rũthingoinĩ rũu igũrũ rĩa mũtwe wakwa nĩhaarĩ thũngũrũrũ ciakĩĩte hau igũrũ rĩakwa. Namo mai maacio marĩ o mahiũ makĩngũĩra makĩingĩra maithoinĩ maakwa, makĩgĩa njereeri. Nĩndagĩthiire kũrĩ mandagĩtaarĩ, no o ũrĩa maathondekaga na ndaawa ciao, noguo maitho maakwa maakĩragĩrĩria gũthũũka o nginya mũicoinĩ ngĩtuĩka gĩtumuumu biũ.

Handũinĩ ha mĩaka ĩna gũtirĩ kĩndũ ndoonaga. Andũ a nyũmba iitũ oothe nĩmaiguaga kĩeha nĩ ũndũ wakwa, naake Ahikaru akĩndangĩra handũ ha mĩaka ĩĩrĩ nginya rĩrĩa aathaamire agĩthiĩ Elamu.

Niĩ na mũtumia wakwa gũtetania

11 Thuutha wa Ahikaru gũthaama, mũtumia wakwa Ana no mũhaka angĩathiire kũruta wĩra. Kwoguo akĩambĩrĩria gũtuma, o ta atumia arĩa angĩ.

12 Andũ arĩa aarutagĩra wĩra maamũrĩhaga arĩĩkia gũtwara nguo iria atumĩĩte. Na rĩĩrĩ, mũthenya wa mũgwanja wa mweri wa Disitiro nĩarĩĩkirie itambaya, agĩtwarĩra arĩa maamwĩtĩĩtie. Rĩrĩa maamũrĩhire irĩhi rĩake, nĩmaamũheire o na kabũri.

13 Na rĩrĩa Ana ookire mũciĩ na kabũri kau, gakĩambĩrĩria kwania. Kwoguo ngĩkĩmũũria atĩrĩ, “Kabũri kau koima nakũ? Nĩkũiya wakaiya. Githĩ tiguo? Gacookie nginya kũrĩ eene ko. Amu gũtiagĩrĩire kũrĩa kĩndũ gĩa kũiywo!”

14 Naake agĩcookia atĩrĩ, “Aaca, ti ga kũiya. Ndaheeo arĩ ta kĩheeo hamwe na irĩhi rĩakwa.” No ndiamwĩtĩkirie, ngĩgĩthitia gĩthiithi nĩ thoni nĩ ũndũ wa ũrĩa eekĩĩte. Ngĩcooka ngĩmwĩra acookie kabũri kau kũrĩ eene ko. Naake akĩnjookeria atĩrĩ na maraakara, “Rĩu nĩndoona ũrĩa wee ũhaana biũ! Ũrũmbũyania waku wothe kũrĩ andũ arĩa angĩ ũkĩrĩ kũ? Ĩ nacio ciĩko ciaku ciothe njega iria wĩkaga ũhoro wacio atĩa?”

Categories
Tobiti

Tobiti 3

Ihooya rĩa Tobiti

1 Ndĩ na kĩeha kĩingĩ mũno nĩndacaaire na ngĩgirĩka, ngĩhooya ndĩ na ruo rũnene ngiuga atĩrĩ:

2 “Ũrĩ mũthingu, wee Mwathani!

Wee nĩũiguanagĩra thamaũndũinĩ moothe marĩa wĩkaga.

Wĩ mwĩhokeku maũndũinĩ maaku moothe.

Wee nĩ we ũciirithagia thĩ.

3 “Ndirikana na ũtũme njĩtĩkĩrĩke harĩ we.

Ndũkaae kũũherithia nĩ ũndũ wa meehia maakwa,

o na nĩ ũndũ wa meehia marĩa itooĩ,

o na wa ma maithe maakwa.

4 “Amu nĩtwakwĩhĩirie na tũkĩaga gwathĩkĩra mawatho maaku.

Nawe ũgĩtũma tũtahwo, tũthaamio na tũũragwo.

Ũgĩgĩtũma tũtuĩke kĩndũ gĩa kũmenwo na gĩ thoni

thĩinĩ wa ndũũrĩrĩ ciothe kũrĩa watũhurunjire.

5 “Wee wanatuĩra maithe maakwa nĩ ũndũ wa meehia maao,

na wanaaherithia nĩ ũndũ wa meehia maakwa.

Twanaaga wathĩki na tũkaregana na mawatho maaku,

na kwoguo iherithia rĩaku hingo ciothe rĩkoragwo rĩrĩ rĩa kĩhooto.

6 “Rĩu njĩka o ũrĩa ũkwenda.

Oya muoyo wakwa ũnjeherie kuuma thĩ ĩno;

reke mwĩrĩ wakwa ũcooke tĩĩriinĩ.

Amu nguona njagĩrĩirwo nĩgũkua gũkĩra gũtũũra muoyo.

Nĩ gũkorwo nĩndĩrathĩĩnĩka nĩ irumi itanjagĩrĩire,

na kĩeha gĩkĩrĩ kĩnene thĩinĩ wakwa.

Mwathani, athana ũtũme mathĩĩna maakwa moothe makinye mũthia,

njoya ũndware ũhuurũkoinĩ wakwa wa tene na tene.

Ndũkaae kũrega ihooya rĩakwa.

Amu kaba gũkua gũkĩra kũrĩa thĩĩna,

na kũigua irumi njũru ũũ.”

Mathĩĩna ma Sara

7 Mũthenya o ro ũcio thĩinĩ wa itũũra rĩa Ekibatana bũrũriinĩ wa Media nĩgwakinyire atĩ Sara, mwarĩ wa mũthuuri wetagwo Ragueli akĩrumwo nĩ ĩmwe ya ndungata cia airĩĩtu cia ithe.

8 Amu Sara nĩahikĩĩtio nĩ athuuri mũgwanja, no ngoma yetagwo Asimodeo nĩyoragaga o mũthuuri atanakoma na Sara. Kwoguo ndungata ĩyo ya mũirĩĩtu ĩgĩkĩmwĩra atĩrĩ, “Kaĩ ũtooĩ atĩ wee nĩ we ũũragaga athuuri aaku? Ũkoreetwo na athuuri mũgwanja, no gũtirĩ o na ũmwe ũrĩ waikara ihinda iraihu rĩa kũhota gũkũhe kĩhĩĩ.

9 Nĩkĩ gĩgũgĩtũma ũtũhũũre? Kaĩ ũtangĩthiĩ ũkeegwatanie na athuuri acio aaku akuũ? Tũngĩroaga gũkoona kahĩĩ kana kairĩĩtu gaaku!”

10 Hĩndĩ ĩrĩa Sara aiguire maũndũ macio, akĩigua kĩeha kĩnene na akĩrĩra mũno o nginya akĩhaica ngoroba igũrũ akeyũrage. No eciirangia akĩĩĩra atĩrĩ, “Niĩ ndĩ mwana wa mũũmwe wa baaba; ingĩyũraga gũgũkorwo arĩ gĩconoko kũrĩ we na ndĩgĩtũme arĩ mũkũrũ ũguo akue arĩ na kĩeha.”

Ihooya rĩa Sara

11 Kwoguo agĩkĩhooya atambũrũkĩĩtie mooko arũũgamĩĩte hakuhĩ na ndirica yake akiuga atĩrĩ,

“Wee Ngai wa tha, wee wagĩrĩirwo nĩkũgoocwo,

rĩĩtwa rĩaku rĩrotĩĩo hĩndĩ ciothe,

ciũmbe ciaku ciothe irokũgooca tene na tene.

12 “Rĩu Mwathani nĩ we njũthĩrĩirie ũndeithie.

13 Athana na ũkĩnjohore kuuma ũtũũroinĩ ũyũ,

nĩguo ndigagĩcooke kũigua irumi ici.

14 Wee Mwathani nĩũũĩ atĩ niĩ ndĩ o thingi;

ndirĩ ndakoma na mũndũ mũrũme.

15 O na ndirĩ ndeconorithia kana ngĩconorithia rĩĩtwa rĩa baaba,

mahinda marĩa moothe tũtũũrĩĩte bũrũriinĩ ũyũ wa ithaamĩrio.

Baaba ndarĩ mwana ũngĩ wa kũmũgaya,

na gũtirĩ mũndũ wa nyũmba iitũũrĩa ingĩhikĩra.

Arũme aakwa mũgwanja nĩmarĩĩkĩĩtie gũkua,

kwoguo bata wakwa wa gũtũũra muoyo ũkĩrĩ ũrĩkũ?

No angĩkorwo ti wendi waku kweheria muoyo wakwa-rĩ,

kĩnjiguĩre tha.

Ndũkaareke njigue irumi icio rĩngĩ!”

Ngai kũigua mahooya ma Tobiti na ma Sara

16 Rĩrĩa Tobiti na Sara mahooyaga, Ngai arĩ igũrũ akĩigua mahooya maao,

17 na agĩtũma Rafaili mũraika wake akamateithie. Agĩtũmwo akeeherie njereeri kuuma maithoinĩ ma Tobiti nĩ geetha ahote gũcooka kuona, na atabaarĩre ũhiki gatagatĩinĩ ga Sara na Tobia mũrũ wa Tobiti, ũrĩa warĩ na kĩhooto gĩa kũmũhikia tondũ aarĩ mũrũ wa maamawe, o na aingate ngoma ĩyo yetagwo Asimodeo yume harĩ Sara. Na ihinda o rĩrĩa Tobiti aacookaga nyũmba gwake kuuma nja, naake Sara nĩgũikũrũka aikũrũkaga kuuma ngoroba ya nyũmba yake kũu Ekibatana.

Categories
Tobiti

Tobiti 4

Tobiti gũtaara Tobia

1 Ningĩ mũthenya o ro ũcio Tobiti akĩririkana mbeeca iria aatigĩire Gabaeli itũũrainĩ rĩa Ragesi thĩinĩ wa Media.

2 Akĩĩĩra atĩrĩ, “Rĩu tondũ nĩndooria Ngai anjĩtĩkĩrie ngue-rĩ, nĩ wega njĩte mwana wakwa Tobia ndĩmwĩre ũhoro wa mbeeca icio.”

3 Kwoguo Tobiti agĩĩta Tobia akĩmwĩra atĩrĩ, “Mwana wakwa, wona ndakua ũthike na gĩtĩĩo. Ndũkaanatiganĩrie maitũguo. Ũmũtĩĩage matukũ moothe ma ũtũũro waku; mwĩkage maũndũ ma kũmũkenia, na ndũkaae kũmũiguithagia kĩeha.

4 Mwana wakwa, ririkana atĩ nĩarĩ moogwatiinĩ maingĩ nĩ ũndũ waku ũtaanaciarwo. Wona akua, ũkaamũthika hakuhĩ na niĩ.

5 “Mwana wakwa, ririkana Mwathani Ngai witũ matukũ maaku moothe, na ndũkaaneehie ũkĩendaga kana ũrege gwathĩkĩra maathani maake. Hĩndĩ ciothe ĩkaga ũrĩa kwagĩrĩire na ndũkaaneingĩrie ũndũinĩ wothe mũũru.

6 Tuĩka mwĩhokeku na nĩũrĩgaacagĩra maũndũinĩ marĩa ũrĩĩkaga.

7 “Mũndũ o wothe wathĩkagĩra Ngai mũheage na ũtaana kuuma harĩ indo ciaku. Angĩkorwo ũrĩkoragwo wĩ mũkarĩ hĩndĩ ĩrĩa ũkũhe athĩĩni, o naake Ngai noguo arĩtuĩkaga mũkarĩ hĩndĩ ĩrĩa egũkũhe.

8 Heanaga kũringana na ũrĩa indo ciaku ciigana, amu o ũrĩa indo ciaku irĩ nyingĩ noguo wagĩrĩirwo nĩkũheana. Angĩkorwo indo ciaku nĩ niini, ndũkaae gwĩtigĩra kũheana kũringana na icio niini ũrĩ nacio.

9 Na njĩra ĩyo ũgaagĩkorwo ũkĩigĩra mũthiithũ nĩ ũndũ wa mũthenya ũrĩa ũgaakorwo ũrĩ na bata.

10-11 Amu gũteithĩrĩria athĩĩni nĩguo mũhothi ũrĩa ũkenagia Ngai Ũrĩa Ũrĩ Igũrũ Mũno. Ĩka ũguo na nĩũkũhonokio kuuma bũrũri wa nduma wa arĩa akuũ.

12 “Mwana wakwa, wĩmenyerere ũmaraaya wothe. Makĩria ma ũguo, hikia mũtumia kuuma mũhĩrĩgainĩ witũ, amu tũrĩ njiarwa cia anabii. Ndũkaanahikie mũndũ ũtarĩ wa mũhĩrĩga witũ. Ririkana atĩ Noa, Aburahamu, Isaaka, o na Jakubu, arĩa maarĩ maithe maitũ ma mbere biũ, oothe maahikirie andũ a mũhĩrĩga wao. Ngai nĩamaraathimire akĩmahe ciana, na kwoguo njiarwa ciao nĩikaagaya bũrũri wa Isiraeli.

13 Kwoguo rĩu mũrũ wakwa, eendaga andũ aanyu, na thĩinĩ wa ngoro yaku ndũkaae kũira aariũ na aarĩ a andũ aanyu na njĩra ya kũrega kũhikia mũtumia kuuma kũrĩ o. Mwĩtĩĩo ta ũcio ũreehage gũtangĩka kũũru na kwanangĩka, o ta ũrĩa ũgũũta ũreehage thĩĩna mũnene na ng’aragu.

14 “Aruti aaku a wĩra marĩhage o mũthenya; ndũkaae kũiga mũcaara wao kinya mũthenya ũyũ ũngĩ. Tĩĩaga Ngai na njĩra ĩyo na nĩegũkũhe kĩheeo. Ĩkaga wega hingo ciothe.

15 Ndũkaneeke mũndũ ũngĩ ũndũ o wothe ũrĩa ũtangĩenda mũndũ agwĩke wee mwene.

“Ndũkanyuage ndibei nyingĩ nginya ũkarĩĩo, na ndũkaareke kũnyuaga ndibei gũtuĩke mũtugo.

16 “Arĩa ahũũtu maheage irio, na arĩa me njaga ũkamahe nguo ciaku. Angĩkorwo wĩ mũtongu, heanaga na ũtaana, na wĩkage ũguo ũkeneete!

17 “Mũndũ ũmwe mwĩhokeku wa Ngai angĩkua, thondekagĩra mũciĩ wake irio, no ndũgeekage ũguo mũndũ mwĩhia angĩkua.

18 “Geragia gũtaarwo nĩ mũndũ o wothe mũũgĩ, na ndũkaanaire ũtaari wothe mwega.

19 “Goocaga Mwathani Ngai waku mahinda moothe, na ũmũũragie atũmage ũgaacagĩre ũndũinĩ o wothe wehaarĩria gwĩka. Amu ndaheanaga ũũgĩ wake kũrĩ andũ a rũũrĩrĩ rũngĩ. We nĩ we kĩhumo kĩa mawega moothe, na kũringana na wendi wake, no akwanange kana akũũrage.

“Kwoguo mwana wakwa, ririkana mataaro maakwa, na ndũkaanariganĩrwo nĩ mo o na haniini.

20 “Na rĩu nĩngwenda ũmenye atĩ nĩndatigĩire Gabaeli mũrũ wa Gabaria mbeeca nyingĩ itũũrainĩ rĩa Ragesi thĩinĩ wa Media.

21 Tiga gwĩtigĩra mũrũ wakwa atĩ tondũ rĩu nĩtũtuĩkĩĩte athĩĩni. Ũngĩathĩkĩra Ngai na weherere ũũru wothe, Ngai nĩegũkenio nĩ we na atũme ũgaacĩre.”