Author: admin

1 Tondũ wa ũrĩa tũrĩ aruti wĩra hamwe na Ngai-rĩ, nĩtwamũthaitha inyuĩ mũgĩĩte na wega wa Ngai mũtikaareke ũtuĩke wa tũhũ.

2 Amu Ngai oigĩĩte atĩ:

“Ihinda rĩrĩa rĩagĩrĩru rĩakinya, nĩndagũthikĩrĩirie

naguo mũthenya wa ũhonokanio wakinya ngĩgũteithia.”

Atĩrĩĩrĩ-i, rĩĩrĩ nĩrĩo ihinda rĩu rĩagĩrĩru; ũyũ nĩguo mũthenya wa kũhonokio!

3 Ithuĩ tũtitũmaga hagĩe ũndũ ũngĩhĩnga mũndũ nĩguo ũtungati ũcio witũ ndũkoonerwo mahĩtia.

4 Ithuĩ nĩtwĩyonanagia maũndũinĩ moothe atĩ tũrĩ ndungata cia Ngai nĩ ũndũ wa gũkirĩrĩria mathĩĩna na mĩnoga na gũthĩĩnĩka.

5 Ningĩ twanahũũrwo na twanaikio njeera, o na twanareeherwo ngũĩ; twanarutithio mawĩra maritũ, twanoorwo nĩ toro o na kwaga kũrĩa irio.

6 O na ningĩ tondũ wa gũtũũra na ũthingu, ũmenyo, gũkirĩrĩria, gũtugana, gũkorwo twĩ na Roho Mũtheru, kũgĩa na wendani ũtarĩ na wara,

7 kwaria ũhoro wa ma, gũkorwo twĩ na hinya wa Ngai, na gũkorwo na ũthingu ũrĩ ta indo ciitũ cia mbaara cia gũtharĩkĩra na cia kwĩgitĩra.

8 Rĩmwe nĩtũheagwo gĩtĩĩo, na rĩngĩ tũgaconorwo; rĩmwe nĩtũrumagwo, na rĩngĩ tũkagaathĩrĩrio. Tũtuagwo andũ a maheeni o rĩrĩa ithuĩ twaragia ũhoro wa ma;

9 tũhaana ta tũtoĩkaine, no nĩtũĩkaine nĩ andũ oothe; tũhaana ta tũkuĩte, no o ta ũrĩa mũratuona tũrĩ o muoyo. O na angĩkorwo nĩtũherithagio, tũtiũragagwo;

10 o na angĩkorwo nĩtũraakaragio ithuĩ tũkoragwo tũkeneete hingo ciothe; tuonekaga ta tũrĩ athĩĩni, no nĩtũtũmaga andũ aingĩ matonge; tuonekaga ta tũtarĩ kĩndũ, no indo ciothe nĩ ciitũ.

11 Atĩrĩĩrĩ, Akorinitho aya, tũramwarĩria tũtarĩ na ũndũ tũkũmũhitha; nĩtũmũhingũrĩire ngoro ciitũ.

12 Ithuĩ nĩtũmuoneetie wendo witũ no inyuĩ mũtituoneetie wendo wanyu.

13 Rĩu ngwaria na inyuĩ ta arĩ ciana ciakwa ndĩraarĩria ndĩmwĩre atĩrĩ: “Twĩkageei maũndũ o ta marĩa tũmwĩkaga; tũhingũrĩreei ngoro cianyu!”

Gũkaanio ũhoro wa kũheenio nĩ arĩa mateetĩkĩĩtie

14 Tigaai gũtuĩka a thiritũ ya arĩa mateetĩkĩĩtie, tondũ gũtingĩhoteka. Amu-rĩ, ũthingu na waganu ciahota kũiguana? Ningĩ ũtheri na nduma-rĩ, ciahota gũikarania?

15 Atĩrĩĩrĩ, Kristũ na Ngoma mahota kũiguana? Mũndũ ũrĩa wĩtĩkĩĩtie na ũrĩa ũteetĩkĩĩtie-rĩ, no magwatanĩre?

16 Hekaarũ ya Ngai yahota atĩa kũiguana na mĩhianano? Amu ithuĩ nĩ ithuĩ Hekaarũ ya Ngai ũrĩa ũrĩ muoyo! O ta ũrĩa Ngai oigĩĩte atĩrĩ:

“Nĩndĩtũũranagia na andũ aakwa,

njeerage gatagatĩinĩ kaao;

Ndĩkoragwo ndĩ Ngai wao,

nao marĩ andũ aakwa.”

17 Kwoguo Mwathani ekuuga atĩrĩ:

“No mũhaka mũtigane nao

na mwĩyamũranie nao.

Mũtikaahutagie kĩndũ kĩrĩ na thaahu,

na niĩ nĩndĩrĩmwamũkagĩra.

18 Ndĩrĩkoragwo ndĩ Ithe wanyu,

na inyuĩ mũrĩ aariũ na aarĩ aakwa.

Ũguo nĩguo Mwathani Mwene Hinya Wothe oiga.”

1 Araata aakwa, maũndũ macio moothe nĩ ithuĩ twĩrĩirwo. Nĩ ũndũ ũcio rekeei twĩtherie maũndũ moothe marĩa mathũũkagia mwĩrĩ na roho, nĩguo tũikarage tũrĩ athingu na tũtĩĩĩte Ngai.

Gĩkeno kĩa Paũlũ

2 Tũheei handũ thĩinĩ wa ngoro cianyu. Ithuĩ tũtirĩ twahĩtĩria mũndũ; tũtirĩ twathũũkia mũndũ, na tũtirĩ twahũthĩra mũndũ na njĩra njũru.

3 Ndiroiga ũguo ngĩmũtuĩra, amu o ta ũrĩa nguugĩĩte na hau kabere mũkoragwo mwĩ thĩinĩ wa ngoro ciitũ, tũkuanĩre hamwe kana tũtũũranie muoyo.

4 Niĩ-rĩ, ndĩ na mwĩhoko mũnene harĩ inyuĩ; nĩndĩrahaga mũno nĩ ũndũ wanyu! Thĩinĩ wa mathĩĩna moothe niĩ ngoragwo njiyũrĩĩtwo nĩ ũũmĩrĩru na gĩkeno.

5 Atĩrĩĩrĩ, o na thuutha wa gũkinya Makedonia tũtiahuurũkire o na haniini, amu kwarĩ na mathĩĩna kũndũ guothe. Nĩtwarĩ na inegene na andũ, na ngoro ciitũ nĩciarĩ na guoya.

6 No Ngai ũrĩa ũũmagĩrĩria arĩa moorĩĩtwo nĩ hinya-rĩ, nĩatũũmĩrĩirie na ũndũ wa gũũka gwa Tito.

7 Na to gũũka gwake gwiki gwatũmire tũũmĩrĩrie, no nĩ ũndũ wa ũrĩa o na inyuĩ mwamũũmĩrĩirie. Nĩatwĩrire ũrĩa mwĩ na bata wa kũnyona, na ũrĩa mũratũiguĩra tha, na ũrĩa mwĩhaarĩirie kũngitĩra; nĩ ũndũ ũcio nĩngeneete mũno makĩria.

8 Amu o na angĩkorwo marũa marĩa ndamwandĩkĩire nĩmaamũiguithirie kĩeha-rĩ, ndiĩriraga nĩ ũndũ wa kũmaandĩka o na akorwo nĩnderirĩĩte. Amu nĩnguona atĩ marũa macio nĩmaamwĩkĩrire kĩeha kwa ihinda iniini.

9 No rĩu ndĩ na gĩkeno, no ti tondũ wa kũmũiguithia kĩeha, no nĩ tondũ kĩeha kĩu kĩanyu nĩgĩatũmire mwĩrire. Kĩeha kĩu mwaiguithirio nĩ Ngai, na kwoguo gũtirĩ ũndũ mũũru o na ũmwe twamwĩkire.

10 Amu kĩeha kĩrĩa Ngai aiguithanagia kĩreehage kwĩrira, nakuo kwĩrira kũreehage ũhonokio, na gũtirĩ mũndũ ũtangĩenda ũguo! No rĩĩrĩ, kĩeha gĩa gũũkũ thĩ kĩreehage gĩkuũ.

11 Atĩrĩĩrĩ, taoneei ũrĩa Ngai eekĩĩte na kĩeha kĩu kĩanyu; nĩgĩtũmĩĩte mũgĩe na kĩyo kĩnene, na kwenda kuonania ũrĩa mũrĩ athingu. O na nĩgĩtũmĩĩte mũgĩe na mũhĩahĩĩo, kĩmako kĩnene, kwĩhũũga, kwĩrutĩra kũnene, na gũkorwo mwĩhaarĩirie kũherithia arĩa meekaga waganu! Nĩmwonanĩĩtie atĩ mũtirĩ na ũndũ mũũru o na ũmwe maũndũinĩ moothe.

12 Nĩ ũndũ ũcio o na angĩkorwo nĩndaandĩkire marũa macio, ndiandĩkire nĩ ũndũ wa ũrĩa wahĩtĩirio kana ũrĩa wahĩtirie, ndaandĩkire nĩguo ndĩmuonie mbere ya Ngai ũrĩa kwĩrutĩra kwanyu harĩ ithuĩ kũhaana.

13 Kĩu nĩkĩo gĩatũmire tũũmĩrĩrio.

Tokũũmĩrĩrio twomĩrĩirio; nĩtwakenire mũno nĩ ũrĩa mwacanjamũrire Tito ngoro, naake ooka agĩtũkenia.

14 Amu angĩkorwo nĩnderahĩire Tito nĩ ũndũ wanyu-rĩ, mũtinjonoreete. Atĩrĩĩrĩ, o ta ũrĩa maũndũ marĩa twamwĩrire maarĩ ma ma-rĩ, ũguo noguo kwĩraha gwitũ nĩ ũndũ wanyu gwatuĩkire kwa ma kũrĩ Tito.

15 Kwoguo ngoro yake nĩrakĩrĩrĩria kũmwenda hingo ciothe rĩrĩa aririkana ũrĩa inyuothe mwathĩkĩĩte, na ũrĩa mwamwamũkĩrire mwĩtigĩrĩĩte mũkĩinainaga.

16 O na niĩ, nĩngeneete mũno tondũ mwĩhoko wakwa wothe ũrĩ harĩ inyuĩ.

Ũheani wa Akristiano

1 Aariũ na aarĩ a Ithe witũ, nĩtũkwenda mũmenye ũhoro wa wega wa Ngai ũrĩa waheanirwo makanithainĩ ma Makedonia.

2 Andũ acio nĩmaageririo nĩ mathĩĩna marĩa moonire; no gĩkeno kĩao kĩarĩ kĩnene mũno ũguo atĩ nĩmaaheanire merutĩire o na gũtuĩka maarĩ athĩĩni mũno.

3 Maaheanire kũringana na hinya wao, amu niĩ ndĩ mũira wao atĩ nĩmaaheanire o na makĩria ya ũrĩa maagĩrĩirwo nĩkũheana. Nĩ ũndũ wa kwĩyendera kwao

4 magĩtũũria na kĩyo atĩ tũmeetĩkĩrie o nao manyiitanĩre na arĩa angĩ gũteithĩrĩria andũ a Ngai arĩa me Judea.

5 Meekire makĩria ya ũrĩa twerĩgĩrĩire! Maambire kwĩheana o eene kũrĩ Mwathani magĩcooka makĩheana kũrĩ ithuĩ nĩ ũndũ wa kwenda kwa Ngai.

6 Kwoguo tũgĩkĩringĩrĩria Tito, ũrĩa wambĩrĩirie wĩra ũcio, athiĩ naguo na mbere na amũteithĩrĩrie mũrĩĩkie wĩra ũcio wa gũtugana.

7 Na rĩĩrĩ, inyuĩ mũrĩ atongu maũndũinĩ moothe ma wĩtĩkio, ũũgĩ, kĩyo, ũhoroinĩ wa kwaria ma na wa wendo ũrĩa mũtwendeete naguo. Kwoguo tũkwenda mũkorwo mũrĩ ataana thĩinĩ wa wĩra ũyũ wa gũtugana o naguo.

8 Ngĩmwĩra ũguo ti kũmwatha ndĩramwatha. Ngĩmwĩra ũrĩa andũ arĩa angĩ meendeete gũteithĩrĩria, ndĩrenda kũmenya kana wendani wanyu nĩ wa ma.

9 Inyuĩ nĩmũũĩ atĩ o na Jesũ Kristũ arĩ mũtongu mũno, nĩ ũndũ wa wega wake nĩetuire mũthĩĩni nĩ ũndũ wanyu nĩguo amũtongie na gũthĩĩna gwake.

10 Nĩ ũndũ wa maũndũ macio, rĩciiria rĩrĩa ingĩmũhe nĩ rĩĩrĩ, atĩ mwagĩrĩirwo nĩkwamba kũhingia ũrĩa mwambĩrĩirie gwĩka mwaka mũthiru. Nĩ inyuĩ mwarĩ a mbere gwĩka, na to gwĩka gwiki, o na gwĩka mwĩyendeire.

11 Atĩrĩĩrĩ, thiĩi na mbere kũhingia wĩra ũcio! Mwĩrutanĩriei kũũrĩĩkia o ta ũrĩa mwerutanĩirie mũkĩũbanga, na mũũrĩĩkie na kĩrĩa mwĩ nakĩo rĩu.

12 Mũndũ angĩkorwo arĩ na wendo wa kũheana Ngai aamũkagĩra o kĩrĩa gĩothe angĩheana, no ti kĩrĩa atangĩhota kũheana.

13-14 Ngiuga ũguo ti kuuga atĩ njehererie arĩa angĩ mũrigo ndĩmũigĩrĩre, no nĩ tondũ rĩu mwĩ na indo nyingĩ, na nĩ wega mũteithĩrĩrie arĩa marĩ na thĩĩna. Nĩ ũndũ hĩndĩ ĩrĩa makaagĩa na indo na inyuĩ mũkorwo na thĩĩna, nĩmakaamũteithĩrĩria. Na githĩ gũthiĩte ũguo mũtikuona atĩ nĩmũgũteithania!

15 O ta ũrĩa kwandĩkĩĩtwo atĩrĩ, “Ũrĩa wagethire nyingĩ ndarĩ na kĩndũ aatigarĩirio, na ũrĩa wagethire nyiinyi ndarĩ na kĩndũ aagire.”

Tito na arĩa maathiaga nao

16 Rekeei tũcookerie Ngai ngaatho tondũ nĩaheire Tito wendi wa kũmũteithĩrĩria o ta ũrĩa na ithuĩ atũheete!

17 Tito to gwĩtĩkĩra eetĩkĩrire ũrĩa twamwĩrire; nĩarĩ na wendo mũnene wa gũteithia, na kwoguo akĩĩruta gũũka kũrĩ inyuĩ.

18 Hamwe na Tito nĩtũgũtũma mũrũ wa Ithe witũ ũrĩa ũheetwo gĩtĩĩo makanithainĩ moothe nĩ ũndũ wa kũhunjia ũhoro ũrĩa mwega ooke naake.

19 Na to gĩtĩĩo giiki aheetwo, nĩ amu nĩathuurirwo na akĩamũrwo nĩ makanitha atĩ tũthiage naake kũruta wĩra ũyũ wa kũheana ũhoro wa riiri wa Mwathani, nĩguo tuonanie atĩ nĩtũrenda gũteithia.

20 Nĩtũrageria mũno gũtikaagĩe na inegene o na rĩrĩkũ na ũndũ wa ũrĩa tũramenyerera ũteithio ũcio mũheanaga na wendo.

21 Amu wendi witũ nĩ wa gwĩka ũrĩa kwagĩrĩire mbere ya Mwathani o na mbere ya andũ.

22 Kwoguo nĩtũgũtũma mũrũ wa Ithe witũ ũngĩ ooke na aariũ a Ithe witũ acio angĩ. Mũrũ wa Ithe witũ ũcio nĩtũmũgereetie na maũndũ maingĩ tũkoona e na wendi wa gũteithia. Ningĩ tondũ wa mwĩhoko ũrĩa arĩ naguo harĩ inyuĩ nĩehaarĩirie kũmũteithia.

23 Ha ũhoro wa Tito, nĩ mũraata wakwa, tũkoragwo naake, na tũrutithanagia wĩra wanyu naake. Nao aariũ na aarĩ a Ithe witũ acio megũũka naake matũmĩĩtwo nĩ makanitha, nĩmoonanagia riiri wa Kristũ.

24 Moniei wendo wanyu nĩguo makanitha moothe mamenye na ma atĩ tũtikoragwo na mahĩtia rĩrĩa tũkwĩraha nĩ ũndũ wanyu.

Gũteithia Akristiano arĩa angĩ

1 Rĩu-rĩ, ndikuona harĩ na bata wa kũmwandĩkĩra ũhoro wa ũteithio ũrĩa ũratũmĩrwo andũ a Ngai a Judea.

2 Tondũ nĩnjũũĩ wendi wanyu wa gũteithia, o na andũ a Makedonia nĩndĩmerahĩire nĩ ũndũ wanyu ngameera atĩ: “Aariũ na aarĩ a Ithe witũ a Akaia, matũire mehaarĩirie gũteithania kuuma mwaka ũcio ũrathirire.” Wendo ũcio wanyu nĩguo ũmaarahũrĩĩte.

3 Ndĩratũma aariũ na aarĩ a Ithe witũ kũrĩ inyuĩ nĩguo kwĩraha gwitũ nĩ ũndũ wanyu gũtikooneke ta gũtarĩ kĩene. O ta ũrĩa njugire na hau kabere, no mũhaka mũkorwo mwĩhaarĩirie na ũteithio wanyu.

4 Atĩrĩĩrĩ, ingĩreehane na andũ a Makedonia mamũkore mũtehaarĩirie-rĩ, ithuĩ, nĩ ũndũ wa ũrĩa tũmwĩhokeete na ma, no tũconoke mũno, o na tũtekuuga ũrĩa inyuĩ eene mũngĩconoka.

5 Kwoguo nĩndĩronire arĩ wega gũtũma aariũ na aarĩ a Ithe witũ kũrĩ inyuĩ o mbere, nĩguo mũhaarĩrie iheeo iria mweranĩire nĩ geetha igaakorwo ihaarĩirio hĩndĩ ĩrĩa ngooka, naguo ũndũ ũcio nĩũkonania atĩ mũheanaga nĩ ũndũ wa kwĩyendera no ti tondũ wa kũringĩrĩrio.

6 Ririkanaai atĩ mũndũ ũrĩa ũhandaga tũniini agethaga o tũniini; na mũndũ ũrĩa ũhandaga nyingĩ agethaga nyingĩ.

7 O mũndũ nĩaheane kũringana na ũrĩa we mwene atuĩte no ndakaheane ta atekwenda kana ahaane ta arĩ kũringĩrĩrio araringĩrĩrio, tondũ Ngai eendaga mũndũ ũrĩa ũheanaga akeneete.

8 Naake Ngai ahota kũmũhe nyingĩ gũkĩra iria mũbataire nĩguo mũkoragwo mwĩ na indo njiganu, na mũkoragwo mwĩ na ingĩ nyingĩ cia kũruta mawĩra moothe meega.

9 O ta ũrĩa kwandĩkĩĩtwo atĩrĩ:

“Andũ arĩa me na thĩĩna nĩamaheaga na ũtaana;

ũtugi wake ũtũũraga tene na tene.”

10 Ngai ũrĩa ũheaga mũrĩmi mbegũ na akamũhe irio cia kũrĩa, nĩekũmũhe na aingĩhie mbegũ cianyu na nĩekũingĩhia magetha ma ũthingu wanyu.

11 Ningĩ nĩ mũrĩtongagio na njĩra ciothe nĩguo mũheanage na ũtaana hingo ciothe, nao andũ angĩ nĩmarĩcookagĩria Ngai ngaatho nĩ ũndũ wa ũtaana wanyu ũrĩa maamũkagĩra kuuma kũrĩ ithuĩ.

12 Amu ũteithio ũyũ mũrutaga ndũteithagia andũ a Ngai oiki, no nĩũtũmaga Ngai acookerio ngaatho mũno makĩria.

13 Naguo ũtungati wanyu nĩũkũmoonia ũrĩa mũhaana, na andũ angĩ nĩmekũgooca Ngai nĩ ũndũ wanyu, o na nĩ ũndũ wa gwathĩkĩra ũhoro ũrĩa mwega wa Kristũ, ũrĩa muumbũraga atĩ nĩmwĩtĩkĩĩtie, na kũgayana indo cianyu nao na andũ arĩa angĩ oothe.

14 Na tondũ wa ũrĩa marĩ na wendo mũnene nĩmarĩmũhooyagĩra nĩ ũndũ wa kũingĩhĩrio wega wa Ngai.

15 Rekeei tũcookerie Ngai ngaatho nĩ ũndũ wa kĩheeo gĩake gĩtangĩgereka.

Paũlũ kũgitĩra wĩra wake

1 Niĩ Paũlũ, o niĩ ngoragwo ndĩnyiihĩĩtie hĩndĩ ĩrĩa twĩ na inyuĩ no hĩndĩ ĩrĩa ndĩ kũraaya na inyuĩ ngakorwo njĩhĩĩte mũno, nĩndamũthaitha na ũhooreri na ũkirĩrĩria wa Kristũ.

2 Ndamũthaitha mũtikanatũme nyoneke ta ndĩmwĩhĩire mũno hĩndĩ ĩrĩa ngooka, amu nĩnjũũĩ na ma atĩ no thũũkĩre andũ arĩa maratwĩciirĩria atĩ mĩthiĩre ĩrĩa tũthiaga nayo nĩ ya gũũkũ thĩ.

3 Tondũ o na angĩkorwo tũikaraga gũũkũ thĩ-rĩ, tũtirũaga mbaara na mĩthiĩre ya gũũkũ thĩ.

4 Amu indo ciitũ cia mbaara ti cia gũũkũ thĩ, no iria i na hinya wa Ngai wa kũniina kĩrĩa gĩakĩĩtwo gĩkarũma. Nĩtũniinaga ngarari cia maheeni,

5 na tũkaniina kĩndũ o gĩothe kĩrĩa gĩtũũgagĩrio na mwĩtĩĩo wa kũhĩnga ũũgĩ wa Ngai, na tũgataha meciiria moothe tũkamatua ma gwathĩkĩra Kristũ.

6 Nĩtwĩhaarĩirie kũherithia mũndũ ũrĩa ũgeeka gĩĩko gĩtaagĩrĩire hĩndĩ ĩrĩa mũgaathĩka biũ.

7 Inyuĩ muonaga maũndũ o na nja tu. Angĩkorwo nĩharĩ mũndũ wĩtuaga atĩ nĩ wa Kristũ, nĩecirie rĩngĩ we mwene amenye atĩ o na ithuĩ tũrĩ a Kristũ o taake.

8 Atĩrĩĩrĩ, niĩ ndingĩconoka o na angĩkorwo nĩndĩrahaga mũno nĩ ũndũ wa hinya ũrĩa Mwathani aatũheire wa kũmũthondeka, no ti wa kũmũharagania.

9 Ndikwenda kuonekana ta ndĩramũmakia na marũa maakwa.

10 Tondũ rĩĩrĩ, andũ amwe moigaga atĩ, “Marũa ma Paũlũ makoragwo na ũũru na hinya mũingĩ, no rĩrĩa arĩ hamwe na ithuĩ oonekaga atarĩ na hinya, na ciugo ciake itikoragwo na ũritũ.”

11 Mũndũ ũrĩa uugaga ũguo nĩamenye atĩ, ũrĩa tuugaga na marũa tũrĩ kũnene noguo tũgeeka hĩndĩ ĩrĩa tũgooka.

12 Ithuĩ tũtirĩ hĩndĩ tũngĩgeria kwĩiganania kana kwĩgerekania na arĩa metũũgagĩria. Andũ acio nĩ akĩĩgu mũno tondũ methimaga na magetuĩra kũringana na matua maao eene!

13 Ithuĩ gũtirĩ hĩndĩ tũkeeraha makĩria ya ũrĩa kwagĩrĩire; kwĩraha gwitũ kũrĩikaraga kũringana na wĩra ũrĩa tũheetwo nĩ Ngai, na o na inyuĩ mwĩ gĩcunjĩ kĩa wĩra ũcio witũ.

14 Tondũ mũkĩrĩ thĩinĩ wa wĩra ũcio witũ-rĩ, hĩndĩ ĩrĩa twamũreehagĩra Ũhoro ũrĩa Mwega wa Kristũ tũtiarĩ nja ya wĩra witũ.

15 Kwoguo ithuĩ tũtiĩrahaga nĩ ũndũ wa wĩra wa andũ arĩa angĩ, no twĩ na mwĩhoko atĩ o ũrĩa wĩtĩkio wanyu ũraneneha noguo wĩra witũ ũgũthiĩ ũkĩingĩhaga kũringana na ũrĩa tũgereirwo nĩ Ngai.

16 Hĩndĩ ĩyo nĩtũkaahota kũhunjia Ũhoro ũrĩa Mwega kũrĩ mabũrũri marĩa me kũraaya na inyuĩ, tũtekwĩraha nĩ ũndũ wa wĩra ũrĩa ũrutĩĩtwo kũndũ kũngĩ nĩ mũndũ ũngĩ.

17 Amu kwandĩkĩĩtwo atĩrĩ, “Ũrĩa ũkwĩraha nĩerahe nĩ ũndũ wa ũrĩa Mwathani eekĩĩte.”

18 Tondũ Mwathani ndagaathagĩrĩria mũndũ ũrĩa wĩthuurĩĩte, agaathagĩrĩria ũrĩa ethuurĩire we mwene.

Paũlũ na atũmwo a maheeni

1 Naarĩ korwo no mũũthikĩrĩrie o na hĩndĩ ĩrĩa ndĩ mũkĩĩgu haniini. Ndamũthaitha thikĩrĩriai!

2 Niĩ-rĩ, ndĩ na ũiru nĩ ũndũ wanyu, ũiru uumĩĩte kwĩ Ngai, inyuĩ mũhaana mũirĩĩtu thingi ũrĩa ndeerĩire mũndũ ũmwe nĩguo amũhikie, na nĩ we Jesũ Kristũ.

3 No nĩndĩretigĩra atĩ hiihi mwahota kũheenio, o ta ũrĩa nyoka yaheenirie Hawa na maheeni maayo ma wara, nĩguo mũthũũkio meciiria nĩ geetha mũtige kwĩrutĩra ũrĩa mwĩrutĩire Kristũ.

4 Tondũ nĩmwĩtĩkagĩra mũkeneete mũndũ o wothe ũrĩa ũngĩũka kũmũhunjĩria ũhoro wa Jesũ ũngĩ tiga ũrĩa twamũhunjĩirie, na nĩmwetĩkĩrire roho ũngĩ na ũhoro ũngĩ, ũtahaanaine na Roho kana ũhoro ũrĩa mwega ũrĩa mwaiguire kuuma kũrĩ ithuĩ!

5 Niĩ ndigwĩciiria atĩ nĩharĩ ũndũ o na ũmwe ũrĩ na acio mũreeta “Atũmwo” itarĩ naguo!

6 O na angĩkorwo ha ũhoro wa kwaria nĩkwĩĩga njĩgaga-rĩ, ũguo tiguo haana ũhoroinĩ wa ũũgĩ; ũguo nĩtũmuoneetie maũndũinĩ moothe rĩrĩa tũkoretwo na inyuĩ.

7 Hĩndĩ ĩrĩa ndamũhunjagĩria Ũhoro ũrĩa Mwega wa Ngai-rĩ, niĩ ndirĩ kĩndũ ndamwĩtagia; ndenyiihirie nĩguo inyuĩ mũtuĩke andũ a bata. Hiihi ũguo ndeekire nĩ mahĩtia?

8 Ningĩ-rĩ, hĩndĩ ĩrĩa ndamũtungataga ndaheagwo ũteithio nĩ makanitha marĩa mangĩ. Ũguo nĩkuuga atĩ nĩkũmaiya ndamaiyaga nĩguo ndĩmũteithie.

9 Ningĩ hĩndĩ ĩrĩa twarĩ na inyuĩ-rĩ, ndaagĩa na thĩĩna ndiathĩĩnirie mũndũ o na ũmwe nĩ tondũ aariũ na aarĩ a Ithe witũ arĩa moimĩĩte Makedonia nĩmaaheire indo cia kũigana. Nĩndageririe mũno ndikaae gũtuĩka wa gũthĩĩnia mũndũ o na ũmwe, na no ngũthiĩ na mbere kũgeria!

10 Ngũmwĩra atĩrĩ, andũ a Akaia matingĩtũma ndige kwĩraha, amu nĩnjũũĩ na ma atĩ ũhoro wa ma wa Kristũ nĩũkoragwo hamwe na niĩ.

11 Kĩrĩa gĩatũma njuge ũguo nĩ kĩĩ? Hiihi nĩgũtuĩka atĩ ndimwendeete? Ngai nĩoĩ atĩ nĩndĩmwendeete!

12 Niĩ ngũthiĩ o na mbere gwĩka ũrĩa njĩkaga nĩ geetha andũ arĩa macaragia kamweke ga gũtuĩka atĩ tũrutaga wĩra ũmwe nao ndĩmaagithie kamweke kau.

13 Andũ ta acio nĩ atũmwo a maheeni arĩa maheenanagia na wĩra wao metuĩte atũmwo a Kristũ.

14 Ũcio-rĩ, ti ũndũ wa kũũmakia tondũ o na Caitaani nĩetuaga mũraika wa ũtheri!

15 Kwoguo ti ũndũ mũnene ngombo ciake igĩĩtua ngombo cia ũthingu. Marigĩrĩrioinĩ nĩmakaagĩa na kĩrĩa kĩringaine na ciĩko ciao.

Paũlũ gũthĩĩnĩka ta mũtũmwo

16 Nĩngũcookera o rĩngĩ atĩrĩ: gũtirĩ mũndũ wagĩrĩirwo nĩgwĩciiria atĩ ndĩ mũkĩĩgu. No angĩkorwo nĩmũgwĩciiria atĩ ndĩ mũkĩĩgu-rĩ, njĩtĩkĩriai o ro ũguo haana nĩguo o na niĩ ndĩrahe haniini.

17 Atĩrĩĩrĩ, ũhoroinĩ ũyũ wa kwĩraha-rĩ, ndiraaria ta ũrĩa Ngai angĩenda njarie; no ndĩraaria ta kĩrimũ,

18 na tondũ andũ aingĩ nĩmeerahaga nĩ ũndũ wa indo cia thĩ, o na niĩ to ndĩkĩĩrahe.

19 Inyuĩ mũrĩ oogĩ mũno, na kwoguo nĩmwamũkagĩra irimũ na gĩkeno!

20 Inyuĩ-rĩ, nĩmũkiragĩrĩria mũndũ ũrĩa ũkũmũtua ngombo ciake kana ũkũrĩa indo cianyu, kana ũkũmũtwarĩrĩria, kana akeenenehia kana akamũhũũra.

21 Nĩngũconoka ngiuga atĩ tũtionekaga twĩ na hinya wa gwĩka ũguo.

Ngwaria ta kĩrimũ njuge atĩ ũrĩa mũndũ ũngĩ ekwĩraha nĩ ũndũ waguo, o na niĩ no ndĩrahe nĩ ũndũ waguo.

22 Angĩkorwo o nĩ Ayahudi, o na niĩ ndĩ Mũyahudi. Angĩkorwo o nĩ Aisiraeli, o na niĩ ndĩ Mũisiraeli. Angĩkorwo o nĩ a njiarwa cia Aburahamu, o na niĩ ndĩ wa rũciaro rwa Aburahamu.

23 Angĩkorwo o nĩ ndungata cia Kristũ, niĩ ndĩ ndungata njega makĩria. Hiihi mũraigua ta ndĩ mũgũrũku, no ndĩ ndungata njega kũmakĩra, amu ndanarutithio wĩra mũritũ, na ndanoohwo maita maingĩ kũmakĩra, na ndanahũũrwo iboko maita matangĩtarĩka na o na maita maingĩ ndanakuhĩrĩria gũkua!

24 Ayahudi nĩmaahũũrire maita mataano iboko mĩrongo ĩtatũ na kenda.

25 Aroma nĩmahũũrire na iboko maita matatũ, na nĩhũũrĩĩtwo na mahiga riita rĩmwe. Ndanathũũkĩrwo nĩ meeri maita matatũ. Na hĩndĩ ĩmwe nĩnjikarĩĩte iriainĩ mathaa mĩrongo ĩĩrĩ na mana.

26 Ndanathiĩ ng’endo cia magũrũ na igakorwo irĩ na mĩtino mĩingĩ ya njũũĩ nene, ya atuunyani, ya andũ aitũ Ayahudi o na andũ a Ndũũrĩrĩ; na ya gũkorwo mĩciĩinĩ mĩnene o na kũrĩa gũtarĩ mĩciĩ, ya iriainĩ o na ya kuuma kũrĩ aariũ na aarĩ a Ithe witũ a maheeni.

27 Ndanaruta mawĩra maritũ mũno na ngaaga gũkoma matukũ maingĩ; ndanakorwo na ng’aragu na nyoota; ndanaikara hehoinĩ itarĩ na irio kana maaĩ.

28 Nĩkũrĩ mangĩ maingĩ itanagweta, na thĩinĩ wamo nĩharĩ ũmwe ũhinyagĩrĩria mũno, naguo nĩ gũtangĩka gwakwa nĩ ũndũ wa makanitha moothe.

29 Nũũ ũngĩkorwo aagĩĩte hinya na niĩ ndikorwo njagĩĩte hinya taake? Nũũ ũngĩhĩtithio na niĩ ndicinwo nĩ maraakara?

30 Angĩkorwo no mũhaka ndĩrahe, ngwĩraha nĩ ũndũ wa maũndũ marĩa moonanagia ũrĩa itarĩ na hinya.

31 Ngai, na no we Ithe wa Mwathani witũ Jesũ ũrĩa mũraathime kinya tene, na tene nĩoĩ na ma atĩ ndiraheenania.

32 Hĩndĩ ĩrĩa ndaarĩ Damasiki-rĩ, barũũthi ũrĩa wathanaga kuo rungu rwa mũthamaki Areta nĩeigire arangĩri marangĩre itũũra rĩu nĩguo anyiite,

33 no ngĩĩkirwo kĩondo ngĩgerio ndirica ngĩikũrũkĩrio rũthingoinĩ ngĩhonoka kũnyiitwo nĩ we.

Paũlũ kuonio na kũguũrĩrio maũndũ

1 No mũhaka ndĩrahe o na akorwo gũtirĩ kĩndũ ngũgĩa nakĩo o na ndetĩĩa. Rĩu ngwaria ũhoro wa cioneki iria Mwathani anyoneetie na marĩa anguũrĩirie.

2 Nĩnjũũĩ mũndũ ũmwe Mũkristiano wambatirio na igũrũ kinya igũrũ rĩa gatatũ mĩaka ikũmi na ĩna mĩthiru (ũrĩa itooĩ nĩ kana mũndũ ũcio aambatirio na mwĩrĩ kana atarĩ naguo; no Ngai ũũĩ.)

3 Ningĩ nĩnjũũĩ atĩ mũndũ ũcio nĩathiire kinya ikenero no ũrĩa itooĩ nĩ kana aathiire na mwĩrĩ kana atarĩ naguo, no Ngai ũũĩ.

4 Na rĩĩrĩ, kũu nĩaiguire maũndũ matangĩarĩrĩka na mũndũ atangĩhota kũmagweta.

5 Handũinĩ ha mũndũ ũcio niĩ nĩngwĩraha, no ndingĩĩraha nĩ ũndũ wakwa mwene tiga o wa maũndũ marĩa moonanagia atĩ ndirĩ hinya.

6 Angĩkorwo nĩngwenda kwĩraha ndingĩĩraha ta kĩrimũ, amu ngwaria o ũhoro wa ma. No rĩĩrĩ,rĩu ndikwĩraha tondũ ndingĩenda mũndũ oone ũhoro wakwa ta ũrĩ mũnene gũkĩra ũrĩa oonaga ngĩĩka kana akaigua ngiuga.

7 Nĩguo ndikerahe nĩ ũndũ wa maũndũ maingĩ marĩa nguũrĩirio-rĩ, nĩndaheirwo mũigua thĩinĩ wa mwĩrĩ wakwa ũrĩa arĩ guo mũrekio wa Caitaani, nĩguo ũthĩĩnagie nĩ geetha ndikaae gwĩtĩĩaga.

8 Nĩndathaithire Mwathani maita matatũ andute mũigua ũcio.

9 Naake akĩnjĩĩra atĩrĩ: “Wega wakwa nĩũkũiganĩĩte, tondũ hinya wakwa nĩwonekaga harĩa hatarĩ na hinya.” Kwoguo nĩngwĩraha ndĩ na gĩkeno nĩ ũndũ wakwa kwaga hinya, nĩguo hinya wa Kristũ ũikarage thĩinĩ wakwa.

10 Nĩ ũndũ ũcio, nĩngenaga nĩ ũndũ wa kwaga hinya, kũrumwo, gũthĩĩnĩka, kũnyariirwo, na kũnyamaario na mathĩĩna maingĩ nĩ ũndũ wa Kristũ. Amu hĩndĩ ĩrĩa itarĩ na hinya nĩguo ndĩ na hinya makĩria.

Paũlũ kũrũmbũiya Akorinitho

11 Atĩrĩĩrĩ, njĩkaga maũndũ ta kĩrimũ! No nĩ inyuĩ mwatũmire haane ũguo. Nĩ inyuĩ mwagĩrĩirwo nĩkũngaathĩrĩria, amu o na akorwo niĩ ndirĩ kĩene, “Atũmwo” arĩa anene aanyu matirĩ ũndũ mangĩrĩĩte naguo.

12 Tondũ-rĩ, maũndũ marĩa moonanagia atĩ mũndũ nĩ mũtũmwo wa ma nĩmeekĩĩtwo gatagatĩinĩ kaanyu na gũkirĩrĩria kũnene na ũndũ wa kũringa ciama na moorirũ.

13 Amu-rĩ, makanitha marĩa mangĩ mamũkĩrĩĩte na kĩ tiga o atĩ niĩ ndiigana kũũria ũteithio kuuma kũrĩ inyuĩ? Njoheraai mahĩtia macio!

14 Atĩrĩĩrĩ, rĩĩrĩ nĩ ihinda rĩa gatatũ ndĩhaarĩirie gũũka kwanyu, na ndirĩ kĩndũ o na kĩmwe ngenda kuuma kũrĩ inyuĩ, o tiga inyuĩ eene. Tondũ nĩmũũĩ atĩ ciana ti cio ciigagĩra aciari mũthiithũ, no aciari nĩ o maigagĩra ciana mũthiithũ.

15 Niĩ nĩngaakena nĩ ũndũ wa kũhũthĩra indo ciakwa ciothe, o na kwĩhũthĩra niĩ mwene, nĩ ũndũ wa mĩoyo yanyu. Hiihi inyuĩ no mũrege kũnyenda o na ndĩmwendeete ũguo wothe?

16 Nĩnjũũĩ nĩmũgwĩtĩkĩra atĩ ndiatuĩkire mũrigo harĩ inyuĩ, no nĩkũrĩ mũndũ ũngiuga atĩ nĩndaarĩ na mawara na ngĩmũtega na maheeni.

17 Mũndũ ũmwe wa arĩa ndatũmaga kũrĩ inyuĩ nĩ we hiihi watũmire mũnũmĩrĩre?

18 Nĩndathaithire Tito ooke kũrĩ inyuĩ, na ngĩtũma mũrũ wa Ithe witũ ũmwe mooke naake. Kaĩ hiihi Tito ooka amũtwarĩrĩirie? We na niĩ kaĩ tũtahaanaine wĩrainĩ witũ? Tũtiarũmagĩrĩra mĩtugo ĩhaanaine?

19 Mwahota gũkorwo mũgĩciiria atĩ ihinda rĩĩrĩ rĩothe nĩkwĩgitĩra tũregitĩra kuuma kũrĩ inyuĩ? Aaca; ithuĩ twaragia kũringana na wendi wa Kristũ, Ngai arĩ hamwe na ithuĩ. Maũndũ moothe marĩa twĩkaga araata aakwa, twĩkaga nĩ ũndũ wanyu.

20 Ndĩ na guoya atĩ hiihi ũrĩa ingĩenda mũgaakorwo mũhaana ndooka tiguo mũgaakorwo, o na inyuĩ mũtikaanyona ũrĩa mũngĩenda ngorwo haana. Nĩngaakora mwĩ na inegene, ũiru, maraakara, kwĩyenda, njiinũ na njuukũ, na kwaga mũbango.

21 Ndĩ o na guoya atĩ hĩndĩ ĩrĩa ngooka rĩngĩ Ngai wakwa ahota kũnjonora mbere yanyu, na nĩngũiguĩra andũ aingĩ tha arĩa meehirie o mbere matiĩrirĩĩte maũndũ mooru, ũmaraaya, na merirĩria mooru ma mwĩrĩ.

Gũkaanio kwa mũthia na ngeithi

1 Rĩĩrĩ nĩrĩo ihinda rĩa gatatũ ngoreetwo ngĩũka kwanyu. Ũndũ o wothe ũrĩa ũkwĩrwo nĩwĩkĩĩtwo no mũhaka ũkorwo na aira eerĩ kana atatũ, o ta ũrĩa maandĩko moigĩĩte.

2 O mbere nĩndakaanirie andũ arĩa meehĩĩtie marĩ hamwe na andũ arĩa angĩ oothe; rĩu ndĩrandĩka ndĩmakaanie o na itarĩ kuo, o ta ũrĩa ndamakaanirie ihinda rĩa keerĩ rĩrĩa twarĩ na inyuĩ, na ndĩmeere atĩ gũtirĩ mũndũ o na ũmwe itakaaherithia,

3 tondũ nĩmũrooria muonio na kĩhooto atĩ Kristũ nĩaragia arĩ thĩinĩ wakwa. Ndakoragwo aagĩĩte hinya akĩruta wĩra harĩ inyuĩ, no nĩkuonania oonanagia hinya wake.

4 Tondũ o na akorwo nĩambirwo mũtĩ igũrũ nĩ ũndũ wa kwaga hinya, nĩatũũraga muoyo nĩ ũndũ wa hinya wa Ngai. O na ithuĩ nĩtwagire hinya nĩ ũndũ wa kũnyiitana hamwe naake, na ithuĩ hamwe na inyuĩ nĩtũtũũraga muoyo hamwe na Kristũ na ũndũ wa hinya wa Ngai.

5 Mwĩroreei na mwĩgerie muone kana nĩmũrũmĩĩtie wĩtĩkio wanyu. Kaĩ mũtooĩ atĩ Kristũ Jesũ arĩ thĩinĩ wanyu? Angĩkorwo tiguo mũkĩrĩ ahoote.

6 Ngwĩhoka nĩmũkuona atĩ ithuĩ tũtihooteetwo.

7 Nĩtũhooyaga Ngai atĩ mũtikeehie, no ti geetha tuonanie atĩ nĩtũhootanĩĩte, no nĩ geetha mwĩkage ũrĩa kwagĩrĩire, o na angĩkorwo nĩtũkuoneka ta tũhooteetwo.

8 Amu tũtingĩhota gwĩka ũndũ ũtaagĩrĩire, no twĩkire ũrĩa wagĩrĩire.

9 Hĩndĩ ĩrĩa tũtarĩ na hinya na inyuĩ mwĩ naguo-rĩ, nĩtũiguaga tũkeneete. O na nĩngĩ nĩtũmũhooyagĩra mũtuĩke aagĩrĩru.

10 Kĩrĩa kĩratũma nyandĩke ũhoro ũyũ o na ndĩ kũraaya na inyuĩ-rĩ; nĩguo hĩndĩ ĩrĩa ngooka ndikaanooneke ta ndĩrathana na hinya ngĩhũthĩra ũhoti ũrĩa heetwo nĩ Mwathani wa gũthondeka, no ti wa gũthũũkia.

11 Ngĩrĩĩkia aariũ na aarĩ a Ithe witũ, ngũmwĩra mũtigwo na wega! Thiagaai na mĩthiĩre ĩrĩa yagĩrĩire; thikagĩrĩriai mataaro maakwa; iguanagaai; ikaranagiai na thaayũ na Ngai wa wendo na thaayũ nĩarĩkoragwo hamwe na inyuĩ.

12 Geithaniai inyuothe na ngeithi cia kũmumunyana.

Andũ oothe a Ngai nĩmamũgeithia.

13 Wega wa Mwathani witũ Jesũ Kristũ, na wendani wa Ngai, na ngwatanĩro yaRoho Mũtheru iroikara na inyuĩ inyuothe.