Author: admin

Gĩkuũ kĩa Lazaro

1 Na rĩĩrĩ, nĩkwarĩ na mũndũ wetagwo Lazaro, watũũraga itũũra rĩa Bethania, naake nĩarũarire. Kũu Bethania nĩkuo Mariamu na mwarĩ wa nyina Maritha maatũũraga.

2 (Ũyũ nĩ Mariamu ũrĩa waitĩrĩirie Mwathani maguta marĩa maanungaga wega, agĩcooka akĩmũgiria magũrũ na njuĩrĩ yake; Mariamu ũyũ aarĩ wa nyina ũmwe na Lazaro ũcio warĩ mũrũaru.)

3 Mariamu na Maritha magĩgĩtũmanĩra Jesũ akeerwo atĩrĩ, “Mwathani, mũraata waku nĩ mũrũaru.”

4 Rĩrĩa Jesũ aiguire ũhoro ũcio, akiuga atĩrĩ, “Mũrimũ ũyũ ti wa gũtũma Lazaro akue, no nĩwagũtũma Ngai agoocwo nĩ geetha Mũrũ wa Ngai akumio.”

5 Na rĩĩrĩ, Jesũ nĩendeete Maritha o hamwe na mwarĩ wa nyina, o na Lazaro.

6 Kwoguo rĩrĩa aiguire atĩ Lazaro nĩ mũrũaru akĩniina mĩthenya ĩngĩ ĩĩrĩ kũu aarĩ.

7 Thuutha ũcio akĩĩra arutwo aake atĩrĩ, “Ũkaai tũcooke Judea.”

8 Nao makĩmũcookeria atĩrĩ, “Mũrutani, githĩ to matukũ maniini mathiru kuuma rĩrĩa Ayahudi a kuo marendaga gũkũhũũra na mahiga na rĩu ũrenda gũcooka o kuo?”

9 Naake Jesũ akiuga atĩrĩ, “Githĩ mũthenya ndũkoragwo na mathaa ikũmi na meerĩ? Mũndũ o wothe ũthiaga mũthenya ndahĩngagwo, amu nĩonaga ũtheri wa gũũkũ thĩ.

10 Ĩndĩ mũndũ ũrĩa ũthiaga ũtukũ nĩahĩngagwo nĩ tondũ ndarĩ na ũtheri.”

11 Jesũ agĩthiĩ na mbere kwaria akiuga atĩrĩ, “Mũraata witũ Lazaro nĩakomeete, no nĩngũthiĩ kũmũũkĩria.”

12 Nao arutwo makĩmũcookeria atĩrĩ, “Akorwo nĩgũkoma akomeete nĩekũhona.”

13 Ĩndĩ Jesũ eendaga kũmeera atĩ Lazaro nĩgũkua aakuĩte, no o magĩciiria atĩ oigaga nĩgũkoma toro.

14 Agĩkĩmeera wega atĩrĩ, “Lazaro nĩakuĩte,

15 no nĩngeneete nĩ ũndũ wanyu tondũ ndiraarĩ ho agĩkua. Ũkĩraai tũthiĩ kũrĩ we.”

16 Naake Toma (ũrĩa wetagwo wa Mahatha) akĩĩra arutwo acio angĩ atĩrĩ, “Rekeei ithuothe tũthiĩ na Mũrutani nĩguo tũgakuanĩre hamwe naake!”

Jesũ nĩ we kũriũka o na muoyo

17 Na rĩrĩa Jesũ aakinyire agĩkora atĩ Lazaro nĩarĩĩkĩĩtie gũthikwo na mĩthenya ĩna ĩgathira.

18 Bethania yarĩ ta kiromita ithatũ kuuma Jerusalemu.

19 Andũ aingĩ nĩmookĩĩte kũu gũcakaithia Maritha na Mariamu nĩ ũndũ wa gũkuĩrwo nĩ mũrũ wa nyina wao.

20 Na rĩĩrĩ, rĩrĩa Maritha aiguire atĩ Jesũ nĩarooka akiuma kũmũtũnga, no Mariamu agĩtigwo nyũmba.

21 Naake Maritha akĩĩra Jesũ atĩrĩ, “Mwathani, korwo ũraarĩ gũũkũ mũrũ wa maitũ ndangĩrakuire!

22 No nĩnjũũĩ atĩ o na rĩu kĩrĩa gĩothe ũngĩĩtia Ngai nĩegũkũhe.”

23 Naake Jesũ akĩmwĩra atĩrĩ, “Mũrũ wa maitũguo nĩakaariũka.”

24 Maritha agĩcookia atĩrĩ, “Nĩnjũũĩ atĩ nĩakaariũka hĩndĩ ya kũriũka mũthenya wa mũthia.”

25 Naake Jesũ akĩmwĩra atĩrĩ, “Nĩ niĩ kũriũka na nĩ niĩ muoyo. Ũrĩa wothe ũnjĩtĩkĩĩtie, o na akua nĩagaatũũra muoyo;

26 na ũrĩa wothe wĩ muoyo na nĩanjĩtĩkĩĩtie ndarĩ hĩndĩ agaakua. Wee nĩwĩtĩkĩĩtie ũguo?”

27 Maritha akiuga atĩrĩ, “Ĩĩ Mwathani! Niĩ nĩnjĩtĩkĩĩtie atĩ wee nĩ we Mesia, Mũrũ wa Ngai ũrĩa ũrooka thĩ.”

Jesũ gũita maithori

28 Maritha oiga ũguo agĩcooka agĩthiĩ agĩĩta mwarĩ wa nyina Mariamu handũ e wiki, akĩmwĩra atĩrĩ, “Mũrutani nĩoka na nĩarakũũria.”

29 Rĩrĩa Mariamu aiguire ũguo akiuma na ihenya agĩthiĩ kũmũtũnga.

30 (No hĩndĩ ĩyo Jesũ ndakoreetwo atoonyeete gĩcagi thĩinĩ, aarĩ o hau Maritha aamũtũngĩĩte.)

31 Nao Ayahudi arĩa maarĩ kũu nyũmba na Mariamu makĩmũcakaithia makĩmũrũmĩrĩra rĩrĩa moonire oima narua, tondũ meeciiragia athiĩ mbĩĩrĩrainĩ kũrĩrĩra ho.

32 Naake Mariamu agĩgĩkinya harĩa Jesũ aarĩ, amuona akĩgũa magũrũinĩ maake, akĩmwĩra atĩrĩ, “Mwathani, korwo ũraarĩ gũũkũ, mũrũ wa maitũ ndangĩrakuire!”

33 Rĩrĩa Jesũ oonire ũrĩa Mariamu na arĩa maarĩ naake maarĩraga, akĩringwo nĩ tha na agĩthĩĩnĩka ngoro.

34 Akĩmooria atĩrĩ, “Mũmũthikĩĩte ha?”

Nao makĩmũcookeria makĩmwĩra atĩrĩ, “Mwathani, ũka ũkoone.”

35 Naake Jesũ agĩita maithori.

36 Nao makiuga atĩrĩ, “Oneei ũrĩa aramwendeete!”

37 Nao Ayahudi arĩa maarĩ ho makĩũrania atĩrĩ, “Mũndũ ũyũ wahingũrire mũtumuumu ũrĩa maitho-rĩ, githĩ ndangĩrahotire kũgiria Lazaro akue?”

Kũriũkio kwa Lazaro

38 Naake Jesũ agĩthiĩ agĩthĩĩnĩkaga ngoro mũno, agĩkinya mbĩĩrĩrainĩ. Nayo yarĩ ngurunga, na nĩyakunĩkĩĩtwo na ihiga.

39 Jesũ akiuga atĩrĩ, “Eheriai ihiga!”

No Maritha, mwarĩ wa nyina na ũcio wakuĩte, akĩĩra Jesũ atĩrĩ, “Mwathani, rĩu mbĩĩrĩra nĩranunga ũũru mũno, nĩ ũndũ aikarĩĩte mbĩĩrĩrainĩ mĩthenya ĩna!”

40 Naake Jesũ akĩmwĩra atĩrĩ, “Githĩ ndikwĩrire atĩ korwo wetĩkia no wone riiri wa Ngai?”

41 Magĩgĩthengia ihiga. Jesũ akĩrora igũrũ akiuga atĩrĩ, “Awa nĩndagũcookeria ngaatho tondũ nĩũnjiguaga.

42 Nĩnjũũĩ atĩ hingo ciothe nĩũnjiguaga no nguuga ũguo nĩ ũndũ wa andũ aya me haaha, nĩ geetha meetĩkie atĩ nĩwe wandũmire.”

43 Oiga ũguo agĩcooka akĩgũũthũka na mũgambo mũnene akiuga atĩrĩ, “Lazaro, uma!”

44 Naake Lazaro akiuma e muohe na ndaamĩ mooko na magũrũ o na akoohwo rũtaamĩ ũthiũ. Jesũ akĩĩra andũ acio maarĩ naake atĩrĩ, “Muohoreei mũreke athiĩ.”

Mũbango wa kũũraga Jesũ

45 Na rĩĩrĩ, Ayahudi aingĩ arĩa mookĩĩte gũceerera Mariamu rĩrĩa moonire ũrĩa Jesũ eeka makĩmwĩtĩkia.

46 No amwe aao magĩthiĩ kũrĩ Afarisai makĩmeera ũrĩa Jesũ eekĩĩte.

47 Nao Afarisai maheeo ũhoro makĩũngana hamwe na athĩnjĩri Ngai arĩa anene magĩĩta kĩama makĩũria atĩrĩ, “Tũgwĩka atĩa? Taoneei ũrĩa mũndũ ũyũ araringa ciama nyingĩ.

48 Twareka athiĩ na mbere ũguo, andũ oothe nĩmekũmwĩtĩkia, nao Aroma nĩmegũũka mathũũkie Hekaarũ iitũ na rũũrĩrĩ rwitũ!”

49 No mũndũ ũmwe wao wetagwo Kaiafa, ũrĩa warĩ Mũthĩnjĩri Ngai Ũrĩa Mũnene mwaka ũcio akĩmeera atĩrĩ, “Kaĩ inyuĩ mũrĩ akĩĩgu-ĩ!

50 Mũtikũmenya atĩ kaba mũndũ ũmwe akuĩre andũ handũ ha rũũrĩrĩ ruothe rũniinwo?”

51 Ũndũ ũcio ndoigire eĩrĩĩte we mwene; tondũ akĩrĩ Mũthĩnjĩri Ngai Ũrĩa Mũnene mwaka ũcio, nĩkũratha aarathire atĩ Jesũ nĩagaakuĩra rũũrĩrĩ rwa Ayahudi,

52 na to Ayahudi oiki, no nĩ geetha acookanĩrĩrie ciana cia Ngai iria ihurunjũkĩĩte ituĩke rũũrĩrĩ rũmwe.

53 Na rĩĩrĩ, mũthenya ũcio anene a Ayahudi magĩthondeka mũbango wa ũrĩa mangĩmũũragithia.

54 Kwoguo Jesũ ndacookire gũthiĩ kũu Judea akĩĩonithanagia; oimire kuo agĩthiĩ bũrũri warĩ werũinĩ, itũũrainĩ rĩetagwo Efiraimu, agĩikara kuo hamwe na arutwo aake.

55 Hĩndĩ ĩyo gũgĩkorwo atĩ thigũkũ ya Ayahudi ya Bathaka nĩyakuhĩrĩirie na andũ aingĩ nĩmaathiaga Jerusalemu nĩ ũndũ wa gwĩtheria mbere ya thigũkũ gũkinya.

56 Nao nĩmaacaragia Jesũ, na marũngiĩ Hekaarũ thĩinĩ makooranagia atĩrĩ, “Ũgwĩciiria atĩa? Kana hiihi ndegũũka thigũkũinĩ?”

57 Nao athĩnjĩri Ngai arĩa anene o na Afarisai nĩmaathanĩĩte atĩ mũndũ ũrĩa ũkũmenya kũrĩa Jesũ arĩ, athiĩ akameere nĩ geetha mamũnyiite.

Jesũ gũitĩrĩrio maguta e Bethania

1 Na rĩĩrĩ, rĩrĩa Bathaka yatigairie mĩthenya ĩtandatũ ĩkinye, Jesũ agĩthiĩ Bethania mũciĩ kwa Lazaro ũrĩa aariũkĩĩtie kuuma kũrĩ akuũ.

2 Nakuo agĩthondekerwo irio cia hwaĩinĩ, naake Maritha nĩateithagĩrĩria kũheana irio; Lazaro aarĩ ũmwe wa arĩa maikarĩĩte na Jesũ meethainĩ.

3 Naake Mariamu akĩoya cuuba yarĩ na maguta maanungaga wega ma goro mũno, agĩitĩrĩria Jesũ magũrũ, agĩcooka akĩmũgiria na njuĩrĩ yake. Naguo mũnungo mwega wa maguta macio ũkĩiyũra nyũmba yothe.

4 No mũrutwo ũmwe wa Jesũ, na nĩ we Judasi Mũisikariota ũrĩa wacookire kũmũkunyanĩra, akĩũria atĩrĩ,

5 “Nĩ kĩĩ kĩagiria maguta maya meendio Dinarimagana matatũ iheeo athĩĩni?”

6 Ĩndĩ ndoigire ũguo nĩ tondũ wa kũrĩrĩra athĩĩni, no nĩ tondũ aarĩ mũici. Nĩ we wakuuaga mondo ya mbeeca na nĩaiyaga imwe akahũthagĩra we mwene.

7 Naake Jesũ akĩmũcookeria atĩrĩ, “Tigana naake! Rekeei aige kĩrĩa e nakĩo o nginya mũthenya wa mathiko maakwa.

8 Amu arĩa athĩĩni mwĩ nao hĩndĩ ciothe, no niĩ mũtirĩkoragwo na niĩ hĩndĩ ciothe.”

Mũbango wa kũũraga Lazaro

9 Na rĩĩrĩ, rĩrĩa Ayahudi maiguire atĩ Jesũ e Bethania, magĩthiĩ kuo marĩ gĩkundi kĩnene. Ti ũndũ wa Jesũ tu watũmire mathiĩ kuo, no nĩ geetha mathiĩ makĩonaga Lazaro ũrĩa wariũkĩĩtio kuuma kũrĩ akuũ nĩ Jesũ.

10 Kwoguo athĩnjĩri Ngai arĩa anene magĩthondeka mũbango wa kũũraga Lazaro o naake,

11 amu Ayahudi aingĩ maamenya ũrĩa Lazaro eekĩĩtwo nĩmaaregaga ũhoro wa athĩnjĩri Ngai mageetĩkia Jesũ.

Jesũ kũingĩra Jerusalemu na ndũũhiũ

12 Na mũthenya ũyũ ũngĩ, andũ aingĩ arĩa mookĩĩte thigũkũ ya Bathaka makĩigua atĩ Jesũ nĩokaga Jerusalemu.

13 Magĩgĩkuua mathĩgĩ ma mĩkĩndũ, magĩthiĩ kũmũtũnga makĩanagĩrĩra atĩrĩ, “Hosana! Kũraathimwo nĩ ũrĩa ũgũũka na rĩĩtwa rĩa Mwathani! Kũraathimwo nĩ mũthamaki wa Isiraeli!”

14 Naake Jesũ akĩona njaũ ya ndigiri akĩmĩikarĩra igũrũ, o ta ũrĩa Maandĩko moigĩĩte atĩrĩ,

15 “Tigaai gwĩtigĩra inyuĩ andũ a itũũra rĩa Zayuni!

Oneei mũthamaki wanyu nĩarooka

aikarĩire njaũ ya ndigiri!”

16 Arutwo aake matiigana kũmenya gĩtũmi kĩa ũndũ ũcio hĩndĩ ĩyo no thuutha rĩrĩa aarĩĩkirie kũgoocithio, makĩririkana ũrĩa ũhoro wake wandĩkĩĩtwo atĩ nĩmakaamwĩka maũndũ macio, na no mo eekirwo.

17 Nao andũ arĩa maarĩ naake rĩrĩa eetire Lazaro kuuma mbĩĩrĩrainĩ akĩmũriũkia kuuma kũrĩ akuũ, nĩmaathiĩte makeera andũ ũrĩa eekĩĩte.

18 Ũndũ ũcio nĩguo watũmire andũ oothe mamũtũnge tondũ andũ nĩmaiguĩte ũhoro wa kĩama kĩu aaringĩĩte.

19 Nao Afarisai makĩĩrana atĩrĩ, “Takĩoneei, tũtirĩ ũndũ tũngĩhota gwĩka! Andũ oothe nĩmamũrũmĩrĩire!”

Angiriki amwe gũcaria Jesũ

20 Na rĩĩrĩ, nĩkwarĩ Angiriki amwe matwaranĩĩte na andũ arĩa mookĩĩte gũthaathaiya Ngai kũu Jerusalemu hĩndĩ ya thigũkũ.

21 Nao magĩthiĩ harĩ Filipu (ũrĩa woimĩĩte Bethisaida thĩinĩ wa Galili) makĩmwĩra atĩrĩ, “Mũthuuri ũyũ, tũkwenda kuona Jesũ.”

22 Naake Filipu agĩthiĩ akĩĩra Anderea ũhoro ũcio. Nao eerĩ magĩthiĩ makĩĩra Jesũ.

23 Naake Jesũ akĩmeera atĩrĩ, “Ihinda nĩikinyu rĩa Mũrũ wa Mũndũ agoocithio.

24 Ngũmwĩra na ma atĩ, mbegũ ya ngano ĩngĩaga kũgũa tĩĩriinĩ na ĩkue, ĩgũtũũra ĩ iiki. No ĩngĩkua, hĩndĩ ĩyo nĩgũciara mbegũ nyingĩ.

25 Mũndũ o wothe ũrĩa wendeete muoyo wake nĩakaaũtee; ĩndĩ ũrĩa wothe ũthũũrĩĩte muoyo wake e gũũkũ thĩ nĩakaũtũũria muoyoinĩ wa tene na tene.

26 Ũrĩa wothe ũkwenda kũndungatĩra no mũhaka anũmĩrĩre, nĩ geetha harĩa ndĩ ndungata yakwa ĩrĩkoragwo ĩrĩ ho o nayo. Mũndũ o wothe ũndungatagĩra, nĩarĩheagwo gĩtĩĩo nĩ Awa.

Jesũ kwaria ũhoro wa gĩkuũ gĩake

27 “Rĩu ngoro yakwa nĩrathĩĩnĩka mũno, ĩndĩ ngũkiuga atĩa? Njuge atĩ Awa ndũkaareke ihinda rĩĩrĩ rĩnginyĩrĩre? Aaca, tondũ kĩu nĩkĩo gĩtũmi kĩrĩa gĩatũmire njũke, nĩ geetha nginyĩrĩrwo nĩ ihinda rĩĩrĩ.

28 Awa goocithia rĩĩtwa rĩaku!”

Na hĩndĩ ĩyo mũgambo ũkiuma na igũrũ ũkiuga atĩrĩ, “Nĩndĩrĩgoocithĩĩtie, na no ngũrĩgoocithia rĩngĩ.”

29 Nao andũ arĩa maarũngiĩ hau maigua mũgambo ũcio, amwe makiuga atĩrĩ, “Macio nĩ marurumĩ!” Nao arĩa angĩ makiuga atĩrĩ, “Mũraika nĩamwarĩria!”

30 Ĩndĩ Jesũ akĩmeera atĩrĩ, “Mũgambo ũcio ndũnaaria nĩ ũndũ wakwa, no nĩ ũndũ wanyu.

31 Rĩu nĩ hĩndĩ thĩ ĩno ĩgũtuĩrwo; rĩu nĩ hĩndĩ mũnene wa gũũkũ thĩ egũikio nja.

32 Niĩ ndarĩĩkia kũhaicio igũrũ nyume gũũkũ thĩ, nĩngaaguucĩrĩria andũ oothe harĩ niĩ.”

33 (Akiuga ũguo eendaga kuonania ũrĩa eerekeire gũkua.)

34 Nao andũ magĩcookia atĩrĩ, “Ithuĩ tũiguĩte kuuma Wathoinĩ atĩ Mesia nĩ wa gũtũũra tene na tene. Nĩ atĩa ũguo ũgũkiuga atĩ Mũrũ wa Mũndũ nĩakaahaicio igũrũ? Mũrũ wa Mũndũ ũcio nũũ?”

35 Naake Jesũ akĩmacookeria atĩrĩ, “Ũtheri nĩũgũkorwo gatagatĩinĩ kaanyu kwa ihinda. Nĩ ũndũ ũcio thiagaai rĩrĩa mwĩ na ũtheri, nĩ geetha mũtikaae gũkorererwo nĩ nduma, amu mũndũ ũrĩa ũthiaga na nduma ndamenyaga kũrĩa arathiĩ.

36 Gĩĩtĩkiei ũtheri rĩrĩa mwĩ naguo, nĩ geetha mũtuĩke ciana cia ũtheri.”

Andũ kwaga gwĩtĩkia

Jesũ arĩĩkia kuuga ũguo, akiuma hau akĩmeehitha agĩthiĩ.

37 O na gũtuĩka nĩaringĩĩte ciama icio ciothe andũ acio makĩyonagĩra-rĩ, matiigana kũmwĩtĩkia,

38 nĩ geetha ciugo iria ciaririo nĩ mũnabii Isaia ihinge rĩrĩa oigire atĩrĩ:

“Mwathani, nũũ wetĩkirie ũhoro ũrĩa twaheanire?

Nũũ Mwathani aaguũrĩirie hinya wake?”

39 Nĩ ũndũ ũcio matingĩamwĩtĩkirie, amu Isaia nĩoigĩĩte handũ hangĩ atĩ:

40 “Ngai nĩamatuĩte atumuumu,

na akoomia ngoro ciao

nĩ geetha matikaae kuona na maitho maao,

o na kana mataũkĩrwo ngoroinĩ ciao,

manjookerere ndĩmahonie.”

41 Isaia oigire ũguo tondũ nĩoneete riiri wa Jesũ, naake agĩkĩheana ũhoro wake.

42 O na kũhaana ũguo anene aingĩ a Ayahudi nĩmeetĩkĩĩtie Jesũ; no tondũ nĩmeetigagĩra Afarisai, nĩmaaremagwo nĩkwaria ũhoro wake makĩiguagwo nĩguo matikaingatwo thunagogiinĩ.

43 O meendeete kũganwo nĩ andũ makĩria ya kũganwo nĩ Ngai.

Ituĩro rĩkoima ciugoinĩ cia Jesũ

44 Naake Jesũ akĩanĩrĩra akiuga atĩrĩ, “Ũrĩa wothe ũnjĩtĩkĩĩtie to niĩ eetĩkĩĩtie, eetĩkĩĩtie o na ũrĩa wandũmire.

45 Na rĩĩrĩ, ũrĩa wothe ũnyonaga oonaga ũrĩa wandũmire.

46 Niĩ njũkĩĩte ndĩ ũtheri wa thĩ, nĩ geetha mũndũ o wothe ũkũnjĩtĩkia ndakaae gũikara ndumainĩ.

47 Mũndũ angĩigua ciugo ciakwa na arege gũcirũmĩrĩra ndingĩmũtuĩra. Amu niĩ ndiokire gũtuĩra andũ, no ndookire kũhonokia andũ.

48 Ũrĩa wothe ũkũrega kũnyamũkĩra, o na arege gwĩtĩkia ciugo ciakwa nĩharĩ ũrĩa ũkaamũtuĩra. Ũhoro ũrĩa niĩ ndĩmũheete inyuĩ nĩguo ũgaatuĩka wa kũmũtuĩra mũthenya wa mũthia!

49 Amu ndimũheete ũhoro na ũhoti wakwa niĩ mwene. Awa ũrĩa wandũmire nĩ we wanjathire ũrĩa ngwaria na nguuga.

50 Nĩnjũũĩ atĩ Watho wake nĩguo muoyo wa tene na tene. Nĩ ũndũ ũcio, ũhoro ũrĩa heanaga nĩ ũrĩa Awa anjathĩĩte heanage.”

Jesũ gũthambia arutwo aake nyaarĩrĩ

1 Na rĩĩrĩ, gũtigairie mũthenya ũmwe thigũkũ ya Bathaka ĩkinye, Jesũ nĩamenyeete atĩ ihinda rĩake rĩa kuuma gũũkũ thĩ athiĩ kũrĩ Ithe nĩikinyu. Naake nĩendeete andũ aake arĩa maarĩ gũũkũ thĩ, na aameendeete kũna.

2 Na rĩrĩa Jesũ na arutwo aake maarĩaga irio cia hwaĩinĩ, Ngoma nĩarĩĩkĩĩtie gwĩkĩra ngoro ya Judasi mũrũ wa Simoni Mũisikariota meciiria ma gũkunyanĩra Jesũ.

3 Naake Jesũ nĩamenyaga atĩ Ithe nĩamũheete indo ciothe, akamenya atĩ oimĩĩte kwĩ Ngai, na nokuo aacookaga.

4 Kwoguo agĩgĩũkĩra, akĩruta nguo yake ya igũrũ agĩcooka akĩyoha taurũ njohero.

5 Agĩcooka agĩĩkĩra maaĩ kĩraĩ akĩambĩrĩria gũthambia arutwo aake nyaarĩrĩ, akĩmagiragia na taurũ ĩyo eeyoheete njohero.

6 Rĩrĩa Simoni Petero aakinyĩrĩirwo akĩũria Jesũ atĩrĩ, “Wee Mwathani nĩwe ũgũũthambia nyaarĩrĩ?”

7 Naake Jesũ akĩmũcookeria atĩrĩ, “Wee rĩu ndũramenya ũrĩa ndĩreeka, no nĩũrĩmenya thuuthainĩ.”

8 Petero akĩmwĩra atĩrĩ, “Wee ndũrĩ hĩndĩ ũngĩĩthambia nyaarĩrĩ!”

Naake Jesũ akĩmwĩra atĩrĩ, “Ndaaga gũgũthambia, ndũrĩ mũrutwo wakwa.”

9 Simoni Petero agĩkĩmũcookeria atĩrĩ, “Mwathani, gĩtige gũũthambia o nyaarĩrĩ ciiki! Thambia o na mooko o na mũtwe!”

10 Naake Jesũ akĩmwĩra atĩrĩ, “Mũndũ ũrĩĩkĩĩtie gwĩthamba mwĩrĩ ndabatairio nĩgwĩthamba hangĩ, tiga o nyaarĩrĩ ciiki tondũ akoragwo e mũtheru guothe. Na rĩĩrĩ, o na inyuĩ mũrĩ atheru, no ti inyuothe.”

11 (Tondũ Jesũ nĩamenyaga ũrĩa ũkaamũkunyanĩra nĩkĩo oigire atĩ, “Mũtirĩ atheru inyuothe.”)

12 Jesũ arĩĩkia kũmathambia nyaarĩrĩ agĩcookia nguo yake ya igũrũ agĩcooka agĩikara thĩ harĩa aarĩ mbere. Hĩndĩ ĩyo akĩmooria atĩrĩ, “Nĩmwamenya ũndũ ũcio ndamwĩka?”

13 Mũnjĩtaga Mũrutani na Mwathani, na mũtihĩtagia hĩndĩ ĩrĩa mũkũnjĩta ũguo, amu ũguo nĩguo ndĩ.

14 Angĩkorwo niĩ ndĩ Mwathani na Mũrutani wanyu, nĩndamũthambia nyaarĩrĩ, no mũhaka o na inyuĩ mũthambanagie mũndũ na ũrĩa ũngĩ.

15 Gĩĩkĩ nĩ kĩonereria ndamũhe nĩ geetha o na inyuĩ mwĩkanage ũguo niĩ ndamwĩka.

16 Ngũmwĩra na ma atĩ: ngombo ti nene kũrĩ mũmĩathi, kana mũtũmwo agakĩra mũmũtũmi.

17 Tondũ nĩmwarĩĩkia kũmenya maũndũ macio, nĩmũrĩgĩaga na kĩraathimo kĩnene rĩrĩa mũrĩmeekaga!

18 “Ndiraaria ũhoro wanyu inyuothe, amu nĩnjũũĩ arĩa thuurĩĩte. No rĩĩrĩ, maandĩko no mũhaka mahinge harĩa herĩĩtwo atĩrĩ, ‘Ũrĩa tũrarĩanagĩra thaani ĩmwe naake nĩangarũrũkĩĩte.’

19 Ndamwĩra ũhoro o mbere ũtaaneekĩka, nĩ geetha rĩrĩa ũgeekĩka mũgeetĩkia atĩ, ‘Niĩ nĩ niĩ ũrĩa we.’

20 Ngũmwĩra na ma atĩ: ũrĩa wothe wamũkagĩra mũndũ ũrĩa ndũmĩĩte nĩ niĩ aamũkagĩra; na ũrĩa ũnyamũkagĩra nĩ ũrĩa wandũmire aamũkagĩra.”

Jesũ kuuga ũrĩa agaakunyanĩrwo

21 Na rĩĩrĩ, Jesũ arĩĩkia kuuga ũguo agĩtangĩka ngoro, akiumbũra akiuga atĩrĩ, “Ngũmwĩra na ma atĩ ũmwe wanyu nĩekũngunyanĩra.”

22 Nao arutwo makĩrorana magegeete mũno marigĩĩtwo nũũ aaragia ũhoro wake.

23 Na rĩĩrĩ, ũmwe wa arutwo aake, ũrĩa Jesũ eendeete, aarĩ o hau etiiranĩĩtie na gĩthũri kĩa Jesũ.

24 Kwoguo Simoni Petero akĩheneria mũrutwo ũcio akĩmwĩra atĩrĩ, “Tamũũrie nũũ ũcio araaria ũhoro wake?”

25 Naake mũrutwo ũcio arĩ o hau gĩthũriinĩ kĩa Jesũ, akĩmũũria atĩrĩ, “Nũũ ũcio, Mwathani?”

26 Jesũ akĩmũcookeria atĩrĩ, “Nĩ ũrĩa ngũnengera mũgate ũyũ ndarĩĩkia kũũtobokia mũcũthiinĩ.” Agĩkĩoya gĩcunjĩ kĩa mũgate agĩgĩtobokia mũcũthiinĩ, agĩkĩnengera Judasi mũrũ wa Simoni Mũisikariota.

27 Naake Judasi ooya mũgate ũcio, Caitaani akĩingĩra thĩinĩ wake. Naake Jesũ akĩmwĩra atĩrĩ, “Ũrĩa ũgwĩka, ĩka narua!”

28 No arĩa maarĩ hau meethainĩ gũtirĩ wamenyire kĩrĩa gĩatũmire Jesũ eere Judasi ũguo.

29 Ĩndĩ tondũ Judasi nĩ we wakuuaga mondo ya mbeeca, arutwo amwe magĩciiria atĩ Jesũ aamwĩra athiĩ akagũre indo iria ibatarainie cia thigũkũ, kana hiihi akahe athĩĩni kĩndũ.

30 Na rĩĩrĩ, arĩĩkia kuoya mũgate, akiuma nja na ihenya. Hĩndĩ ĩyo kwarĩ ũtukũ.

Rĩathani rĩrĩa rĩerũ

31 Na rĩĩrĩ, Judasi oima, Jesũ akiuga atĩrĩ, “Rĩu Mũrũ wa Mũndũ nĩagoocithĩĩtio, naake Ngai nĩagoocithĩĩtio e thĩinĩ wake.

32 Angĩkorwo Ngai nĩagoocithĩĩtio e thĩinĩ wake-rĩ, o naake Ngai nĩekũmũgoocithia e thĩinĩ wake, na amũgoocithie o narua.

33 Ciana ciakwa, niĩ ngũkorwo na inyuĩ o ihinda iniini. Nĩmũkaanjaria; ngũmwĩra o ta ũrĩa ndeerire Ayahudi atĩ, ‘Kũrĩa ngũthiĩ mũtingĩhota gũũka.’

34 Na rĩu nĩngũmũhe rĩathani rĩerũ: Endanagaai mũndũ na ũrĩa ũngĩ. O ta ũrĩa niĩ ndĩmwendeete, o ũguo mwendanage mũndũ na ũrĩa ũngĩ.

35 Mũngĩendana mũndũ na ũrĩa ũngĩ, hĩndĩ ĩyo andũ oothe nĩmarĩmenyaga atĩ mũrĩ arutwo aakwa.”

Petero kwĩrwo atĩ nĩarĩkaana Jesũ

36 Na rĩĩrĩ, Simoni Petero akĩmwĩra atĩrĩ, “Mwathani, kaĩ ũrathiĩ kũ?”

Naake Jesũ akĩmũcookeria atĩrĩ, “Kũrĩa ngũthiĩ ndũngĩhota kũũnũmĩrĩra rĩu, no thuuthainĩ nĩũkaanũmĩrĩra.”

37 Naake Petero akĩmũcookeria atĩrĩ, “Mwathani, nĩ kĩĩ gĩkũgiria rĩu hote gũkũrũmĩrĩra? Niĩ no ndute muoyo wakwa nĩ ũndũ waku!”

38 Naake Jesũ akĩmũũria atĩrĩ, “Atĩ no ũrute muoyo waku nĩ ũndũ wakwa? Ndakwĩra atĩrĩ na ma, ngũkũ ĩtaanakũga nĩũrĩngaana gatatũ.”

Jesũ nĩwe njĩra ya gũthiĩ kũrĩ Awa

1 Jesũ akĩmeera atĩrĩ, “Mũtigatangĩke ngoro, ĩtĩkiai Ngai, o na niĩ mũnjĩtĩkie.

2 Mũciĩ kwa Awa kwĩ na ciikaro nyingĩ. Korwo tiguo kũhaana-rĩ, no anga ingĩamwĩra atĩ ndathiĩ kũmũthondekera handũ?

3 No ndarĩĩkia gũthiĩ na ndaamũthondekera handũ nĩngaacooka njũke ndĩmũiyĩre ndĩmũtware gwakwa nĩ geetha o na inyuĩ mũikarage o harĩa niĩ ndĩ.

4 Na rĩĩrĩ, Njĩra ya gũthiĩ kũrĩa ngũthiĩ nĩmũmĩũĩ.”

5 Toma akĩmwĩra atĩrĩ, “Mwathani, ithuĩ tũtiũĩ kũrĩa ũrathiĩ; tũngĩkĩhota kũmenya njĩra atĩa?”

6 Naake Jesũ akĩmũcookeria atĩrĩ, “Niĩ nĩ niĩ njĩra, na nĩ niĩ ũhoro wa ma; na nĩ niĩ muoyo. Gũtirĩ mũndũ ũngĩkinya kwĩ Awa atagereire harĩ niĩ.

7 Korwo nĩmũmenyeete-rĩ, nĩmũngĩmenyeete o na Awa. Na rĩĩrĩ, kuuma rĩu nĩmũmũũĩ, na nĩmũmuoneete.”

8 Filipu akĩmwĩra atĩrĩ, “Mwathani, tuonie Thooguo na nĩtũkũiganĩra.”

9 Naake Jesũ akĩmũcookeria atĩrĩ, “Filipu, ndũire na inyuĩ ihinda rĩĩrĩ rĩothe na ndũrĩ wamenya? Mũndũ wothe ũnyoneete nĩoneete Awa. Nĩ kĩĩ gĩgũgĩtũma wee ũnjĩĩre ndĩmuonie Awa?”

10 Wee Filipu ndwĩtĩkĩĩtie atĩ niĩ ndĩ thĩinĩ wa Awa, naake Awa e thĩinĩ wakwa? Maũndũ marĩa moothe ndĩmwĩrĩĩte ti niĩ ngoragwo ndĩĩrĩĩte, no Awa ũrĩa ũkoragwo e thĩinĩ wakwa nĩ we ũrutaga mawĩra maake.

11 Ĩtĩkiai atĩ niĩ ndĩ thĩinĩ wa Awa, naake Awa e thĩinĩ wakwa. Mwarega ũguo-rĩ, gĩĩtĩkiei nĩ ũndũ wa ciĩko iria njĩkaga.

12 Ngũmwĩra na ma atĩ ũrĩa wothe ũnjĩtĩkĩĩtie nĩageeka ciĩko ta iria njĩkaga, o na nĩageeka ciĩko nene makĩria ma ũguo, amu niĩ ndĩrathiĩ kũrĩ Awa.

13 Na rĩĩrĩ, ũndũ o wothe ũrĩa mũkaahooya thĩinĩ wa rĩĩtwa rĩakwa nĩngaawĩka nĩ geetha Awa agoocithio thĩinĩ wa Mũũriũ.

14 Mwahooya ũndũ o na ũrĩkũ thĩinĩ wa rĩĩtwa rĩakwa nĩndĩrĩwĩkaga.

Kwĩrĩrwo Roho Mũtheru

15 “Angĩkorwo nĩmũnyendeete nĩmũrĩathĩkagĩra maathani maakwa.

16 Naniĩ nĩngũhooya Awa, naake nĩekũmũhe Mũteithia ũngĩ, nĩ geetha atũũranie na inyuĩ nginya tene na tene.

17 Ũcio nĩ we Roho ũrĩa ũguũranagĩria ũhoro wa ma wa Ngai. Andũ a thĩ matingĩhota kũmwamũkĩra, amu matimuonaga o na kana makamũmenya. Ĩndĩ inyuĩ nĩmũmũũĩ tondũ atũũranagia na inyuĩ o na e thĩinĩ wanyu.

18 “Niĩ ndikũmũtiga ta ciana cia ngoriai, amu nĩngaacooka kũrĩ inyuĩ.

19 No ihinda iniini itigaru andũ a thĩ matige gũcooka kũnyona, no inyuĩ nĩmũrĩnyonaga, tondũ ngũtũũra muoyo, na o na inyuĩ no mũgaatũũra muoyo.

20 Na rĩĩrĩ, rĩrĩa mũthenya ũcio ũgaakinya, nĩmũkaamenya atĩ ndĩ thĩinĩ wa Awa o na atĩ inyuĩ mũrĩ thĩinĩ wakwa, na niĩ ndĩ thĩinĩ wanyu.

21 “Mũndũ ũrĩa wothe wamũkagĩra maathani maakwa, na akamaathĩkĩra, ũcio nĩ we ũnyendeete. Naake Awa nĩarĩendaga ũrĩa wothe ũnyendeete, o na niĩ nĩndĩrĩmwendaga na ndĩmwĩyonithagie.”

22 Naake Judasi (no ti ũrĩa Mũisikariota) akĩmwĩra atĩrĩ, “Mwathani, gũkaahoteka atĩa wĩyonithanagie kũrĩ ithuĩ na ti kwĩ andũ a thĩ?”

23 Jesũ akĩmũcookeria atĩrĩ, “Ũrĩa wothe ũnyendeete nĩarĩathĩkagĩra ũrutani wakwa. Naake nĩarĩendagwo nĩ Awa, na niĩ na Awa nĩtũrĩũkaga kũrĩ we tũikaranagie naake.

24 Naake ũrĩa wothe ũtanyendeete ndathĩkagĩra ũrutani wakwa. Naguo ũrutani ũrĩa mũiguaga kuuma kũrĩ niĩ ti wakwa niĩ mwene, no nĩ wa Awa ũrĩa wandũmire.

25 “Ndamwĩra maũndũ maya rĩu ndĩ hamwe na inyuĩ.

26 No rĩĩrĩ, Mũteithia, na nĩ we Roho Mũtheru, ũrĩa mũgaatũmĩrwo nĩ Awa thĩinĩ wa rĩĩtwa rĩakwa, nĩakaamũruta maũndũ moothe, na amũhotithie kũririkana ũrĩa wothe ndanamwĩra.

27 “Thaayũ nĩguo ngũmũtigĩra; thaayũ wakwa nĩguo ndamũhe. No ndikũmũhe thaayũ taũrĩa andũ a thĩ maheanaga. Mũtigatangĩke ngoro, o na kana mũigue guoya.

28 Inyuĩ nĩmwaigua ngĩmwĩra atĩ, ‘Nĩngũthiĩ ndĩmũtige, no nĩngaacooka njũke rĩngĩ kũrĩ inyuĩ.’ Korwo nĩmũnyendeete, nĩmũngĩakena tondũ ngũthiĩ kũrĩ Awa, amu Awa nĩ mũnene kũrĩ niĩ.

29 Ndamwĩra maũndũ macio mataneekĩka nĩ geetha rĩrĩa mageekĩka mũgeetĩkia.

30 Ndingĩhota kwaria maũndũ maingĩ na inyuĩ, nĩ amu mũnene wa gũũkũ thĩ nĩarooka. We ndarĩ na hinya wa kũnjatha.

31 No rĩĩrĩ, njĩkaga o ũrĩa Awa anjathĩĩte nĩ geetha andũ mamenye atĩ nĩnyendeete Awa.

“Ũkĩraai tũthiĩ.

Jesũ nĩwe mũthabibũ ũrĩa wa ma

1 “Niĩ nĩ niĩ Mũthabibũ ũrĩa wa ma, naake Awa nĩ we mũrĩmĩri.

2 Rũhonge o ruothe rwĩ thĩinĩ wakwa rũtaciaraga matunda arũtinagia akarute, naruo rũrĩa ruothe rũciaraga nĩarũceehaga nĩ geetha rũciarage matunda maingĩ.

3 Inyuĩ rĩu mũrĩ atheru nĩ ũndũ wa ũhoro ũrĩa ndanamũhe.

4 Ikaragaai thĩinĩ wakwa, na niĩ nĩndĩrĩikaraga thĩinĩ wanyu. O ta ũrĩa rũhonge rũtangĩhota gũciara matunda rũtarĩ mũthabibũinĩ, ũguo noguo o na inyuĩ mũtangĩhota gũciara matunda mũtaikarĩĩte thĩinĩ wakwa.

5 “Nĩ niĩ mũthabibũ, na inyuĩ mũrĩ honge. Ũrĩa wothe ũgũikara thĩinĩ wakwa, na niĩ thĩinĩ wake, nĩarĩciaraga matunda maingĩ, amu mũtirĩ ũndũ mũngĩhota gwĩka mũtarĩ hamwe na niĩ.

6 Ũrĩa wothe ũtegũikara thĩinĩ wakwa nĩegũteeo, oome o ta rũhonge; honge ta icio ciũnganagio igaikio mwakiinĩ ikahĩa.

7 No mwaikara thĩinĩ wakwa nacio ciugo ciakwa ciikare thĩinĩ wanyu, nĩmũrĩĩkagĩrwo ũndũ o wothe ũrĩa mũrĩhooyaga.

8 Ũndũ ũrĩa ũngĩgoocithia Awa no mũciarage matunda maingĩ, naguo ũndũ ũcio nĩũrĩonanagia atĩ mũrĩ arutwo aakwa.

9 O ta ũrĩa Ithe witũ anyendeete, noguo o na inyuĩ ndĩmwendeete; gĩikarageei thĩinĩ wa wendo wakwa.

10 Na rĩĩrĩ, mwathĩkĩra maathani maakwa, nĩmũrĩikaraga wendoinĩ wakwa o ta ũrĩa niĩ njathĩkĩire maathani ma Awa ngaikara wendoinĩ wake.

11 “Ndamwĩra maũndũ macio nĩguo mũgĩe na gĩkeno ta kĩrĩa ndĩ nakĩo, na nĩ geetha gĩkeno kĩanyu gĩkinyanĩre.

12 Narĩo rĩathani rĩakwa nĩ rĩĩrĩ: Endanagaai mũndũ na ũrĩa ũngĩ o ta ũrĩa niĩ ndĩmwendeete inyuĩ.

13 Gũtirĩ mũndũ wĩ na wendani mũnene gũkĩra ũyũ atĩ mũndũ no arute muoyo wake nĩ ũndũ wa araata aake.

14 Inyuĩ mweka ũrĩa ndĩmwathĩĩte mũrĩ araata aakwa.

15 Ndigũcooka kũmwĩta ndungata rĩngĩ, amu ndungata ndĩkoragwo ĩkĩmenya ũrĩa mũmĩathi areeka. Ndĩmwĩtaga araata nĩ tondũ nĩndĩmũmenyithĩĩtie maũndũ moothe marĩa njiguĩte kuuma kũrĩ Awa.

16 Ti inyuĩ mwathuurire; nĩ niĩ ndamũthuurire na ngĩmũtũma mũthiĩ mũgaciare maciaro maingĩ marĩa magũtũũra. Naake Awa nĩarĩmũheaga kĩrĩa gĩothe mũrĩmũhooyaga thĩinĩ wa rĩĩtwa rĩakwa.

17 Ndakĩmwatha atĩrĩ: Endanagaai mũndũ na ũrĩa ũngĩ.

Rũmena rwa andũ

18 “Andũ a thĩ mangĩmũmena-rĩ, ririkanagaai atĩ mataanamũmena nĩ niĩ maambire kũmena.

19 Korwo mũrĩ a thĩ, andũ no mamwende. No tondũ inyuĩ mũtirĩ a thĩ, na nĩndĩmũthuurĩĩte kuuma gũũkũ thĩ, nĩkĩo andũ a thĩ mamũmeneete.

20 Ririkanaai ũrĩa ndamwĩrire atĩ: ‘Ngombo ti nene gũkĩra mũmĩathi.’ Angĩkorwo niĩ nĩmaanyariirire-rĩ, o na inyuĩ no makaamũnyariira. Angĩkorwo nĩmaathĩkĩire ũrutani wakwa-rĩ, o na wanyu nĩmakaawathĩkĩra.

21 Maũndũ macio moothe makaamwĩka tondũ mũrĩ aakwa na matiũĩ ũrĩa wandũmire.

22 Korwo ndiokire na ngĩmahe ũhoro matingĩagĩire na meehia, no rĩu matirĩ na kĩĩgwatio kĩa meehia maao.

23 Ũrĩa wothe ũthũire nĩathũire o na Awa.

24 Korwo mationire ciama iria ndaringire gatagatĩinĩ kaao, o iria gũtarĩ mũndũ ũngĩ ũrĩ waringa matingĩgaatuuo eehia; no kũhaana atĩrĩ, nĩmooneete ũrĩa ndeekire, na nĩmaathũũrĩĩte o na magathũũra Awa.

25 Naguo ũndũ ũcio nĩ wa gũtũma ciugo ici ihingio iria ciandĩkĩĩtwo Wathoinĩ wao atĩ: ‘Maathũũrire o ũguo tũhũ.’

26 “No rĩrĩa Mũteithia agooka, ũrĩa ngaamũtũmĩra kuuma kũrĩ Awa, na nĩ we Roho ũrĩa ũguũranagĩria ũhoro wa ma wa Ngai, o wee ũrĩa uumaga kũrĩ Awa, we nĩakaaheana ũira wakwa.

27 O na inyuĩ nĩmũkaaheana ũira wakwa, tondũ nĩmũkoreetwo hamwe na niĩ kuuma o kĩambĩrĩria.

1 “Ndamwĩra maũndũ macio nĩ geetha mũtikaanatigithĩrie kũrũmia wĩtĩkio wanyu.

2 Nĩmakaamũingata kuuma thunagogiinĩ, na ihinda nĩrĩgaakinya rĩrĩa mũndũ o wothe ũrĩa ũkaamũũraga inyuĩ, agaakorwo agĩciiria atĩ agĩĩka ũguo nĩ Ngai aratungatĩra.

3 Makaamwĩka maũndũ macio moothe nĩ tondũ niĩ matiigana kũũmenya, o na kana makĩmenya Awa.

4 No ndamwĩra maũndũ macio, nĩguo rĩrĩa ihinda rĩgaakinya rĩa kũmwĩka maũndũ macio, mũkaaririkana atĩ nĩndamwĩrĩĩte ũguo.

Wĩra wa Roho Mũtheru

“Ndiamwĩrire maũndũ macio kuuma o kĩambĩrĩriainĩ, tondũ ndĩraikaraga hamwe na inyuĩ.

5 No rĩu nĩngũthiĩ kũrĩ ũrĩa wandũmire, na gũtirĩ o na ũmwe wanyu ũranjũũria ndĩrathiĩ kũ.

6 Tondũ rĩu nĩndamwĩra maũndũ macio, ngoro cianyu nĩciyũrĩĩtwo nĩ kĩeha.

7 Ĩndĩ ndĩramwĩra ũhoro wa ma atĩ nĩkwagĩrĩire thiĩ, amu ingĩaga gũthiĩ mũtingĩreeherwo Mũteithia. No ndathiĩ nĩngaamũtũma kũrĩ inyuĩ.

8 Naake rĩrĩa agooka nĩakoonia andũ a thĩ ũrĩa mahĩtĩĩtie ũhoroinĩ wa meehia, ũthingu, o na ũhoroinĩ wa ciira.

9 Nĩmahĩtĩĩtie ũhoroinĩ wa meehia tondũ matinjĩtĩkĩĩtie;

10 nĩmahĩtĩĩtie ũhoroinĩ wa ũthingu tondũ ngũthiĩ kũrĩ Awa na mũtigũcooka kũnyona;

11 ningĩ nĩmahĩtĩĩtie ũhoroinĩ wa ciira tondũ mũnene wa gũũkũ thĩ nĩarĩĩkĩĩtie gũtuĩrwo.

12 “Ndĩ na maũndũ mangĩ maingĩ ma kũmwĩra no mũtingĩhota kũmoomĩrĩria rĩu.

13 No rĩrĩa Roho ũrĩa ũguũranagĩria ũhoro wa ma wa Ngai agooka nĩakaamũtongoria maũndũinĩ moothe ma ũũma. We ndakaaragia na ũhoti wake we mwene, no akaaragia ũhoro wa maũndũ marĩa aiguĩte, na nĩakaamwĩra ũhoro wa maũndũ marĩa magooka.

14 Nĩakangoocithia nĩ ũndũ akaamũkinyagĩria o ũhoro ũrĩa arutĩĩte kuuma kũrĩ niĩ.

15 Kĩrĩa gĩothe Awa e nakĩo nĩ gĩakwa; nĩkĩo ndamwĩra atĩ Roho akaamũkinyagĩria o ũhoro ũrĩa arutĩĩte kuuma kũrĩ niĩ.

Kĩeha na gĩkeno

16 “Thuutha wa ihinda iniini mũticooka kũnyona, no thuutha wa ihinda iniini nĩmũrĩnyona.”

17 Nao amwe a arutwo aake makĩũrania atĩrĩ, “Ũguo nĩkuuga atĩa? Aratwĩra atĩ, ‘Thuutha wa ihinda iniini tũticooka kũmuona, na thuutha wa ihinda iniini nĩtũrĩmuona;’ ningĩ akoiga atĩ, ‘Nĩ tondũ ngũthiĩ kũrĩ Awa.’

18 Akiuga, ‘Ihinda iniini’ arenda kuuga atĩa? Ithuĩ tũtiramenya ũrĩa arenda kuuga!”

19 Naake Jesũ amenya atĩ nĩmeendaga kũmũũria akĩmeera atĩrĩ, “Ndamwĩra atĩ, ‘Thuutha wa ihinda iniini mũtigũcooka kũnyona, na thuutha wa ihinda iniini, nĩmũrĩnyona.’ Ũguo nĩguo mũrorania nĩkuuga atĩa?

20 Ngũmwĩra na ma atĩ: inyuĩ nĩmũkaarĩra na mũgirĩke, no andũ a thĩ nĩgũkena magaakena; nĩmũkaagĩa na kĩeha, no kĩeha kĩu kĩanyu gĩgacooka gĩtuĩke gĩkeno.

21 Rĩrĩa mũtumia akinyĩrĩirwo nĩkũigua ruwo rwa gũciara nĩagĩaga na kĩeha, tondũ ihinda rĩake rĩa ruwo nĩrĩkinyu, no aagĩa mwana agakena na ndacookaga kũririkana ruwo rwake, tondũ mũndũ nĩaciarwo gũũkũ thĩ.

22 Kwoguo inyuĩ rĩu mwĩ na kĩeha, no nĩngaamuona rĩngĩ, na hĩndĩ ĩyo ngoro cianyu nĩikaiyũrwo nĩ gĩkeno, gĩkeno kĩrĩa gĩtarĩ mũndũ ũngĩmũtuunya.

23 “Rĩrĩa mũthenya ũcio ũgaakinya mũtirĩ ũndũ mũkanjũũria. Ngũmwĩra na ma atĩ Awa nĩakaamũhingĩria ũndũ o wothe ũrĩa mũkaahooya thĩinĩ wa rĩĩtwa rĩakwa.

24 Nginyagia rĩu mũtirĩ mwahooya ũndũ thĩinĩ wa rĩĩtwa rĩakwa; hooyai na nĩmũkũheeo nĩguo gĩkeno kĩanyu gĩkinyanĩre.

Nĩndooreetie thĩ

25 “Ndamwĩra maũndũ macio moothe na thimo. No ihinda nĩrĩgaakinya rĩrĩa itagaacooka kũmũhe ũhoro ũcio rĩngĩ na thimo, no ngaamũheaga, ũhoro wa Awa o wega itekuunĩrĩra.

26 Mũthenya ũcio wakinya, mũkaamũhooya thĩinĩ wa rĩĩtwa rĩakwa. No niĩ ndiramwĩra atĩ nĩngaamũhoera kũrĩ Awa,

27 amu Awa we mwene nĩamwendeete tondũ na inyuĩ nĩmũnyendeete, o na mũgeetĩkia atĩ ndoimire kwĩ Awa.

28 Ndoimire kũrĩ Awa ngĩũka thĩ na rĩu nĩnguuma thĩ njooke kũrĩ Awa.”

29 Nao arutwo aake makĩmwĩra atĩrĩ, “Hĩ! Nĩwatũhe ũhoro ũtekuunĩrĩra na ũtekwaria na thimo.

30 Rĩu nĩtwamenya atĩ wee nĩũũĩ maũndũ moothe; na ndũbatarĩĩtio kũũrio kĩũria nĩ mũndũ. Ũndũ ũcio nĩwatũma twĩtĩkie atĩ woimire kwĩ Ngai.”

31 Naake Jesũ akĩmacookeria atĩrĩ, “Rĩu nĩmwetĩkia?

32 Ihinda nĩrĩrooka, o na rĩu nĩrĩkinyu, rĩrĩa inyuothe mũrĩhuruunjwo, o mũndũ athiĩ gwake mũciĩ mũndige ndĩ nyiiki. No ndirĩ nyiiki nĩ ũndũ Awa arĩ hamwe na niĩ.

33 Ndamwĩra maũndũ macio moothe nĩ geetha mũgĩe na thaayũ nĩ ũndũ wa kũnyiitana na niĩ. Andũ a thĩ nĩmarĩtũma mũnyamaare, ĩndĩ ũmĩrĩriai! Niĩ nĩndooreetie thĩ!”

Jesũ kũhoera arutwo aake

1 Na rĩĩrĩ, Jesũ arĩĩkia kuuga ũguo agĩtiira maitho akĩrora na igũrũ akiuga atĩrĩ, “Awa, ihinda nĩikinyu. Goocithia Mũũrũguo, nĩ geetha o naake akũgoocithie,

2 amu nĩwamũheire ũhoti igũrũ rĩa andũ oothe, nĩguo ahe acio oothe wamũheire muoyo wa tene na tene.

3 Naguo muoyo wa tene na tene nĩmakũmenye wee Ngai ũrĩa wa ma, o na mamenye Jesũ Kristũ ũrĩa watũmire.

4 Nĩngũgoocithĩĩtie gũũkũ thĩ; nĩndĩkĩĩtie wĩra ũrĩa waheire ndute.

5 Awa! Ngoocithia rĩu o maithoinĩ maaku; ngoocithia na ũgooci ũrĩa ndaarĩ naguo hamwe nawe thĩ ĩtaanoombwo.

6 “Nĩndũmĩĩte ũmenyeke nĩ andũ arĩa waheire gũũkũ thĩ. Maarĩ aaku, nawe ũkĩĩhe o, nao nĩmaathĩkĩire ciugo ciaku.

7 Rĩu nĩmamenyeete atĩ maũndũ moothe marĩa waheire moimaga kũrĩ we.

8 Nĩ gũkorwo nĩndĩmaheete ũhoro ũrĩa waheire, nao makawamũkĩra magakĩmenya na ma atĩ niĩ ndoimire kũrĩ we, o na mageetĩkia atĩ nĩ we wandũmire.

9 “Acio nĩ o ndĩrahoera. Ndikũhoera andũ a thĩ, tiga o arĩa ũheete, tondũ nĩ aaku.

10 Kĩrĩa gĩothe ndĩ nakĩo nĩ gĩaku, na kĩrĩa gĩothe wĩ nakĩo nĩ gĩakwa; na nĩcionanĩĩtie riiri wakwa.

11 Rĩu niĩ nĩngũũka kũrĩ we; ndigũcooka gũkorwo ndĩ gũũkũ thĩ, no aya ũheete marĩkoragwo gũũkũ thĩ. Awa Mũtheru! Mamenyagĩrĩre na hinya wa rĩĩtwa rĩaku o rĩĩtwa rĩu ũheete, nĩguo matuĩke ũmwe o ta ũrĩa niĩ nawe tũrĩ ũmwe.

12 Rĩrĩa ndĩrakoragwo nao nĩndĩramamenyagĩrĩra na hinya wa rĩĩtwa rĩaku, o rĩu ũheete. Nĩndĩramagitagĩra na gũtirĩ o na ũmwe wao ũroorire tiga o mwana ũrĩa wa kũũra, nĩ geetha Maandĩko mahinge.

13 “Rĩu nĩndĩrooka kũrĩ we. Ndĩroiga maũndũ macio moothe ndĩ gũũkũ thĩ nĩ geetha magĩe na gĩkeno gĩakwa kĩrĩ gĩkinyanĩru ngoroinĩ ciao.

14 Nĩndĩmaheete ũhoro waku, nao andũ a thĩ makamathũũra, tondũ o ti a gũũkũ thĩ, o ta ũrĩa o na niĩ itarĩ wa gũũkũ thĩ.

15 Ndirakũhooya atĩ ũmarute gũũkũ thĩ, no ũrĩa ndĩrakũhooya nĩ atĩ ũmamenyagĩrĩre kuuma kũrĩ Ũrĩa Mũũru.

16 Amu o ta ũrĩa o na niĩ itarĩ wa gũũkũ thĩ, noguo o nao matarĩ a gũũkũ thĩ.

17 Matherie na ũndũ wa ũhoro ũrĩa wa ma; tondũ ũhoro waku nĩ wa ma.

18 O ta ũrĩa wee wandũmire gũũkũ thĩ, noguo o na niĩ ndĩmatũmĩĩte gũũkũ thĩ.

19 Nĩndĩthereetie nĩ ũndũ wao, nĩ geetha o nao matherio na ũndũ wa ũhoro ũrĩa wa ma.

20 “Ningĩ ti aya oiki ndĩrahoera; ndĩrahoera o na arĩa marĩnjĩtĩkagia nĩ ũndũ wa ciugo cia andũ aya.

21 Ndĩrakũhooya atĩ oothe matuĩke ũmwe. Awa! Marokoragwo thĩinĩ witũ, o ta ũrĩa wee ũrĩ thĩinĩ wakwa na niĩ thĩinĩ waku. Marotuĩka ũmwe nĩ geetha andũ a thĩ meetĩkie atĩ wee nĩ we wandũmire.

22 Nĩndĩmaheete riiri ũrĩa wee ũheete nĩ geetha matuĩke ũmwe, o ta ũrĩa niĩ nawe tũrĩ ũmwe:

23 Niĩ thĩinĩ wao, nawe thĩinĩ wakwa, nĩ geetha matuĩke ũmwe kũna, nĩguo andũ a thĩ mamenye atĩ nĩ we wandũmire, nao andũ aya mamenye atĩ nĩũmeendeete, o ta ũrĩa ũnyendeete.

24 “Awa! Nĩngwenda aya ũheete o nao magĩikarage harĩa niĩ ndĩ nĩ geetha moonage riiri wakwa ũrĩa ũheete, tondũ nĩwanyendeete o na mbere ya thĩ kũũmbwo.

25 Awa Mũthingu! Andũ a thĩ matikũũĩ, no niĩ nĩngũũĩ, o na andũ aya nĩmooĩ atĩ nĩ we wandũmire.

26 Nĩndatũmire makũmenye! Na no ngũthiĩ na mbere gwĩka ũguo, nĩ geetha wendani ũrĩa ũnyendeete naguo ũkoragwo thĩinĩ wao, na niĩ ngoragwo thĩinĩ wao.”

Kũnyiitwo kwa Jesũ

1 Na rĩĩrĩ, Jesũ arĩĩkia kũhooya, akiumagara arĩ na arutwo aake magĩthiĩ makĩringa mũrĩmo ũũrĩa ũngĩ wa mũkuru wa karũũĩ ga Kidironi. Nakuo kũu nĩkwarĩ na mũgũnda, naake Jesũ na arutwo aake magĩtoonya kuo.

2 Na rĩĩrĩ, Judasi, ũrĩa wamũkunyanĩire, nĩoĩ harĩa Jesũ aamenyereete gũcemanagia kuo na arutwo aake maita maingĩ.

3 Kwoguo Judasi agĩgĩthiĩ kuo arĩ na thigari na arangĩri a Hekaarũ, matũmĩĩtwo nĩ athĩnjĩri Ngai arĩa anene hamwe na Afarisai. Maathiire makuuĩĩte indo cia mbaara na magakuua mataawa na imũrĩ.

4 Tondũ Jesũ nĩamenyaga maũndũ moothe marĩa aakirie kuona, agĩkiumĩra akĩmooria atĩrĩ, “Nũũ mũracaria?”

5 Nao makĩmũcookeria atĩrĩ, “Nĩ Jesũ wa Nazarethi.”

Naake agĩkĩmeera atĩrĩ, “Nĩ niĩ we.”

Naake Judasi, ũrĩa wamũkunyanĩire, aarũũgamĩĩte o hau me na andũ acio.

6 Na rĩĩrĩ, rĩrĩa Jesũ aameerire atĩrĩ, “Nĩ niĩ we,” magĩcooka na thuutha makĩgũa thĩ.

7 Naake Jesũ akĩmooria o rĩngĩ atĩrĩ, “Nũũ mũracaria?”

Nao makĩmũcookeria atĩrĩ, “Nĩ Jesũ wa Nazarethi.”

8 Jesũ akĩmeera atĩrĩ, “Nĩndamwĩra atĩ nĩ niĩ we. Kwoguo angĩkorwo nĩ niĩ mũracaria-rĩ, rekeei aya angĩ mathiĩ.”

9 (Oigire ũguo nĩ geetha ũrĩa oigĩĩte mbere ĩyo ũhinge, rĩrĩa oigire atĩ, “Awa, nditeete mũndũ o na ũmwe wa arĩa waheire.”)

10 Na rĩĩrĩ, Simoni Petero aarĩ na rũhiũ rwa njora; naake agĩkĩrũcomora, agĩtinia ngombo ya Mũthĩnjĩri Ngai Ũrĩa Mũnene gũtũ kwa ũrĩo. Ngombo ĩyo yetagwo Maliku.

11 Jesũ akĩĩra Petero atĩrĩ, “Cookia rũhiũ njorainĩ! Gĩkombe kĩa mathĩĩna kĩrĩa Awa aheete-rĩ, no njage gũkĩnyua?”

Jesũ gũtwarwo kwĩ Anasi

12 Nacio thigari icio i hamwe na mũtongoria wacio o na arangĩri a Ayahudi ikĩnyiita Jesũ, ikĩmuoha.

13 Ikĩamba kũmũtwara kwĩ Anasi, mũthoniwe wa Kaiafa, ũrĩa warĩ Mũthĩnjĩri Ngai Mũnene mwaka ũcio.

14 Na rĩĩrĩ, Kaiafa nĩ we wataarĩĩte Ayahudi atĩ nĩkwagĩrĩire mũndũ ũmwe akuĩre andũ oothe.

Petero gũkaana Jesũ

15 Naake Simoni Petero na mũrutwo ũngĩ makiuma Jesũ thuutha. Tondũ mũrutwo ũcio ũngĩ nĩoĩkaine nĩ Mũthĩnjĩri Ngai ũcio Mũnene, agĩkĩngĩrania na Jesũ kinya kũu nja ya nyũmba ya mũthĩnjĩri Ngai ũcio mũnene.

16 Ĩndĩ Petero agĩtigwo kĩhingoinĩ. Naake mũrutwo ũcio woĩkaine nĩ Mũthĩnjĩri Ngai Ũrĩa Mũnene agĩcooka nja, akĩaria na mũirĩĩtu ũrĩa waikaragia kĩhingo, agĩtoonyia Petero thĩinĩ.

17 Naake mũirĩĩtu ũcio waikaragia kĩhingo akĩũria Petero atĩrĩ, “Githĩ o nawe ndũrĩ ũmwe wa arutwo a mũndũ ũũrĩa?”

Petero agĩcookia atĩrĩ, “Aaca niĩ ndirĩ ũmwe wao.”

18 Na rĩĩrĩ, tondũ nĩkwarĩ na heho arangĩri o na ndungata nĩciakĩĩtie mwaki wa makara igootagĩra hau nja irũngiĩ. Nĩ ũndũ ũcio Petero o naake agĩthiĩ akĩrũũgama hamwe nao oote mwaki.

Jesũ kũũrio ciũria nĩ Mũthĩnjĩri Ngai Ũrĩa Mũnene

19 Naake Mũthĩnjĩri Ngai ũcio Mũnene agĩkĩũria Jesũ ũhoro wa arutwo aake o na wa maũndũ marĩa aarutanaga.

20 Jesũ akĩmũcookeria atĩrĩ, “Niĩ ndũũraga njaragia ndĩ mbere ya andũ itekwĩhitha; moorutani maakwa moothe ndĩmarutanagĩra thunagogiinĩ na thĩinĩ wa Hekaarũ kũrĩa Ayahudi oothe macemanagia. Niĩ ndirĩ ndaarĩria andũ hithoinĩ.

21 Ũgũkĩnjũũria nĩkĩ? Ũria andũ arĩa manjiguire; moorie ũrĩa ndameerire nĩ o mooĩ ũrĩa ndoigire.”

22 Na rĩrĩa Jesũ oigire ũguo, mũrangĩri ũmwe wa arĩa maarĩ hau akĩmũgũtha rũhĩ akĩmũũria atĩrĩ, “Ũguo nĩguo ũgũcookeria Mũthĩnjĩri Ngai Ũrĩa Mũnene?”

23 Naake Jesũ akĩmũcookeria atĩrĩ, “Angĩkorwo nĩndoiga ũndũ mũũru, ĩra andũ na uuge ũndũ ũcio nĩ ũrĩkũ. No angĩkorwo ũguo ndoiga nĩguo kũrĩ-rĩ, wakĩngũthĩra kĩ?”

24 Hĩndĩ ĩyo Anasi akĩneana Jesũ arĩ o muohe atwarwo gwa Kaiafa Mũthĩnjĩri Ngai Ũrĩa Mũnene.

Petero gũkaana Jesũ rĩngĩ

25 Na rĩĩrĩ, Petero arũũgamĩĩte o hau agĩota mwaki andũ arĩa maarĩ ho makĩmũũria atĩrĩ, “Githĩ o nawe ndũrĩ ũmwe wa arutwo a mũndũ ũũrĩa?”

Petero agĩkaana akiuga atĩrĩ, “Niĩ ndirĩ ũmwe wao.”

26 Ningĩ ngombo ĩmwe ya Mũthĩnjĩri Ngai ũcio Mũnene, yatarainie na mũndũ ũrĩa Petero aatinĩĩtie gũtũ, ĩkĩũria Petero atĩrĩ, “Na githĩ wee ndikuonire naake mũgũndainĩ?”

27 Petero agĩkaana o rĩngĩ, na o hĩndĩ ĩyo ngũkũ ĩgĩkũga.

Jesũ gũtwarwo kwĩ Pilato

28 Na rũũciinĩ tene, makĩruta Jesũ gwa Kaiafa makĩmũtwara mũciĩ kwa Pilato. Anene a Ayahudi matiaingĩrire kwa Pilato matikaae kũnyiitwo nĩ thaahu mataanarĩa Bathaka.

29 Nĩ ũndũ ũcio Pilato agĩkiuma nja akĩmooria atĩrĩ, “Mũndũ ũyũ mũramũthitangĩra maũndũ marĩkũ?”

30 Nao makĩmũcookeria atĩrĩ, “Korwo gũtirĩ ũndũ mũũru eekĩĩte tũtingĩamũreehe kũrĩ we.”

31 Naake Pilato agĩkĩmeera atĩrĩ, “Kĩmuoei mũkamũciirithie arĩ inyuĩ kũringana na Watho wanyu.”

Nao makĩmũcookeria atĩrĩ, “Ithuĩ tũtiĩtĩkĩrĩĩtio kũũraga mũndũ.”

32 (Gwekĩkire ũguo nĩ geetha ũrĩa Jesũ oigĩĩte ũhinge rĩrĩa aarĩĩtie ũhoro wa gĩkuũ kĩrĩa agaakua.)

33 Pilato agĩgĩcooka nyũmba thĩinĩ agĩĩta Jesũ akĩmũũria atĩrĩ, “Atĩ wee nĩ we Mũthamaki wa Ayahudi?”

34 Naake Jesũ akĩmũũria atĩrĩ, “Ũkũũria ũguo nĩ tondũ nĩguo andũ makwĩrĩĩte ũhoro wakwa kana nĩ tondũ nĩguo wee ũũĩ?”

35 Pilato akĩmwĩra atĩrĩ, “Ũgwĩciiria niĩ ndĩ Mũyahudi? Nĩ andũ aanyu, hamwe na athĩnjĩri Ngai arĩa anene makũreehire kũrĩ niĩ. Wĩkĩĩte atĩa?”

36 Naake Jesũ agĩcookia atĩrĩ, “Ũthamaki wakwa ti wa gũũkũ thĩ; korwo nĩ wa gũũkũ thĩ, arũmĩrĩri aakwa mangĩrĩ kũndũĩrĩra ndikaneanwo kũrĩ anene a Ayahudi. Ĩndĩ ũthamaki wakwa ti wa gũũkũ thĩ!”

37 Pilato agĩkĩmũũria atĩrĩ, “Kwoguo wee ũkĩrĩ mũthamaki?”

Naake Jesũ akĩmũcookeria atĩrĩ, “Wee nĩ we woiga atĩ ndĩ mũthamaki. Niĩ ndaciarirwo na ngĩũka gũũkũ thĩ nĩ ũndũ wa gĩtũmi kĩmwe tu, heanage ũhoro wa ma. Mũndũ o wothe wa ũhoro wa ma nĩathikagĩrĩria.”

38 Pilato akĩmũũria atĩrĩ, “Ũhoro wa ma ũkĩrĩ ũrĩkũ?”

Jesũ gũtuĩrwo kũũragwo

Hĩndĩ ĩyo Pilato akiuma nja akĩĩra Ayahudi atĩrĩ, “Niĩ ndirona ũũru ũrĩa mũndũ ũyũ eekĩĩte.

39 Tondũ kũringana na mũtugo wanyu nĩ atĩ hĩndĩ ya Bathaka ngamuohorera mũndũ ũmwe-rĩ, rĩu nĩmũkwenda ndĩmuohorere mũthamaki wa Ayahudi?”

40 No o magĩitĩka kwanĩrĩra makiugaga atĩrĩ, “Aaca! Tũtikwenda ũcio! Tũkwenda Baraba!” (Baraba aarĩ mũtuunyani.)

1 Gwakinya hau, Pilato agĩathana Jesũ ooywo ahũũrwo na kĩboko.

2 Nacio thigari igĩthondeka thũmbĩ ya mĩigua ikĩmwĩkĩra mũtwe; igĩcooka ikĩmwĩkĩra nguo ya babũ,

3 ikĩambĩrĩria gũũka harĩ we ikamwĩraga atĩrĩ, “Ũrĩ mwega Mũthamaki wa Ayahudi!” Igacooka ikamũgũtha na hĩ.

4 Naake Pilato akiuma nja rĩngĩ akĩĩra Ayahudi atĩrĩ, “Taoneei! Nĩngũmũreehe haaha nja nĩguo mũmenye atĩ niĩ ndirona ũũru o na ũmwe eekĩĩte.”

5 Jesũ agĩkiuma nja eekĩrĩĩte thũmbĩ ya mĩigua na nguo ya babũ. Naake oima nja Pilato akĩĩra Ayahudi atĩrĩ, “Oneei! Mũndũ nĩ we ũyũ!”

6 Na rĩrĩa athĩnjĩri Ngai arĩa anene o na arangĩri a Hekaarũ maamuonire makĩanĩrĩra makiugaga atĩrĩ, “Mwambe! Mwambe!”

Naake Pilato akĩmeera atĩrĩ, “Muoei mũkamwambe arĩ inyuĩ amu niĩ ndirona ngero ĩrĩa agereete.”

7 Nao andũ magĩcookia atĩrĩ, “Ithuĩ twĩ na Watho witũ ũrĩa uugaga atĩ aagĩrĩirwo nĩgũkua nĩ tondũ etuĩĩte Mũrũ wa Ngai.”

8 Rĩrĩa Pilato aiguire ũrĩa moiga agĩĩtigĩra mũno makĩria.

9 Agĩgĩcooka na thĩinĩ rĩngĩ akĩũria Jesũ atĩrĩ, “Kwanyu nĩ kũ?”

No Jesũ agĩkira na ndamũcookerie.

10 Naake Pilato akĩmũũria atĩrĩ, “Ndũkwenda kũnjarĩria? Nĩũũĩ atĩ ndĩ na ũhoti wa gũkuohora kana gũkwamba?”

11 Jesũ akĩmũcookeria atĩrĩ, “Wee ndũngĩrĩ na ũhoti wa kũnjĩka ũndũ korwo ndũheetwo ũhoti ũcio nĩ Ngai. Kwoguo mũndũ ũrĩa ũndeehire kũrĩ we nĩ we wĩ na wĩhia ũrĩa mũnene makĩria.”

12 Rĩrĩa Pilato aiguire ũguo, akĩgeria gũcaria ũrĩa angĩohora Jesũ. No andũ makĩanĩrĩra makiuga atĩrĩ, “Wohora mũndũ ũcio, wee ndũrĩ mũraata wa mũthamaki wa Roma! Amu mũndũ o wothe wĩtuaga mũthamaki nĩ thũ ya mũthamaki wa Roma!”

13 Rĩrĩa Pilato aiguire ciugo icio akĩruta Jesũ nja, agĩikarĩra gĩtĩ gĩa gũtuanĩra handũ heetagwo “Ihiga Rĩare” (na Kĩhibirania heetagwo “Gabatha”).

14 Hĩndĩ ĩyo kwarĩ ta thaa thita mũthenya ũrĩa wa kwĩhaarĩria nĩ ũndũ wa Bathaka. Pilato agĩkĩĩra andũ atĩrĩ, “Ũyũ mũthamaki wanyu!”

15 Nao andũ makĩanĩrĩra magĩcookia atĩrĩ, “Mũũrage! Mũũrage! Mwambe!”

Naake Pilato akĩmooria atĩrĩ, “Nyambe mũthamaki wanyu?”

Nao athĩnjĩri Ngai arĩa anene makĩmũcookeria atĩrĩ, “Ithuĩ tũtirĩ mũthamaki ũngĩ tiga o mũthamaki wa Roma!”

16 Pilato agĩkĩneana Jesũ kũrĩ o athiĩ akaambwo.

Jesũ kwambwo

Nao andũ acio makĩnyiita Jesũ,

17 makĩmũtwara ekuuĩire mũtharaba, magĩthiĩ handũ heetagwo “Handũ ha Ihĩndĩ rĩa Mũtwe” (na Kĩhibirania heetagwo “Gologotha”).

18 Makĩamba Jesũ ho, na makĩamba andũ angĩ eerĩ hamwe naake, ũmwe mwena ũyũ, na ũrĩa ũngĩ mwena ũrĩa ũngĩ, Jesũ e gatagatĩ kaao eerĩ.

19 Naake Pilato akĩandĩkithia kĩmenyithia kĩoigaga atĩrĩ, “Jesũ wa Nazarethi, Mũthamaki wa Ayahudi,” agĩgĩcuurithia hau mũtharabainĩ wake.

20 Naho hau Jesũ aambĩirwo haarĩ hakuhĩ na itũũra, kwoguo andũ aingĩ nĩmaathoomire kĩmenyithia kĩu. Kĩmenyithia kĩu kĩandĩkĩĩtwo na Kĩhibirania, Kĩlatini, na Kĩngiriki.

21 Nao athĩnjĩri Ngai arĩa anene makĩĩra Pilato atĩrĩ, “Tiga kwandĩka ‘Mũthamaki wa Ayahudi,’ kaba wandĩke atĩrĩ, ‘Mũndũ ũyũ oigire atĩrĩ, nĩ niĩ Mũthamaki wa Ayahudi.’ ”

22 Naake Pilato akĩmacookeria atĩrĩ, “Ũguo ndaandĩka nĩndaandĩka.”

23 Nacio thigari ciarĩĩkia kwamba Jesũ ikĩgayania nguo ciake maita mana, o mũũthigari akĩnengerwo gĩcunjĩ gĩake. Igĩcooka ikĩoya nguo yake ya igũrũ ĩtaarĩ rũtumo o na rũmwe.

24 Thigari icio ikĩĩrana atĩrĩ, “Rekeei tũtige kũmĩtinangia; tũmĩcuukĩre mĩtĩ tuone nũũ ũgũthiĩ nayo.” Ũndũ ũcio wekĩkire nĩ geetha Maandĩko mahinge harĩa haandĩkĩĩtwo atĩ:

“Nĩmaagayanire nguo ciakwa,

nayo nguo yakwa ya igũrũ makĩmĩcuukĩra mĩtĩ.”

Na ũguo noguo thigari ciekire.

25 Naho hau hakuhĩ na Mũtharaba nĩharũũgamĩĩte nyina, mwarĩ wa nyina na nyina wa Jesũ, Mariamu mũtumia wa Kileopa, na Mariamu Mũmagidali.

26 Naake Jesũ oona nyina na mũrutwo ũrĩa eendeete marũngiĩ ho akĩĩra nyina atĩrĩ, “Mũtumia, ũcio nĩ we mũũrũguo.”

27 Agĩcooka akĩĩra mũrutwo ũcio atĩrĩ, “Ũcio nĩ we maitũguo.” Kuuma mũthenya ũcio mũrutwo ũcio akĩmuoya agĩthiĩ gũikaraga gwake mũciĩ.

Jesũ gũkua

28 Thuutha wa ũguo, Jesũ aamenya atĩ maũndũ moothe nĩmahingĩĩte, nĩ geetha ũrĩa kwandĩkĩĩtwo kũhinge, agĩkiuga atĩrĩ, “Nĩnyootiĩ.”

29 Na rĩĩrĩ, hau hakuhĩ nĩhaarĩ mbakũri yarĩ na ndibei ngagatu; thibonji ĩgĩtobokio ndibeiinĩ ĩyo, ĩgĩcooka ĩgĩtheecererwo kamũtĩinĩ ka hithobu ĩkĩhutithio Jesũ kanua.

30 Jesũ arĩĩkia gũkunda akiuga atĩrĩ, “Maũndũ moothe nĩmahinga!”

Agĩcooka akĩinamia mũtwe, agĩtuĩkana.

Jesũ gũtheecwo mbaruinĩ

31 Thuutha ũcio anene a Ayahudi magĩthiĩ makĩhooya Pilato rũũtha rwa kuunanga magũrũ ma andũ acio maambĩĩtwo, o na rwa gũcuurũria mĩĩrĩ ĩyo kuuma mĩtharaba igũrũ. Mooririe meetĩkĩrio gwĩka ũguo tondũ mũthenya ũcio warĩ wa kwĩhaarĩria kwa Ayahudi nĩguo marookere Thabatũ. Matiendaga mĩĩrĩ ĩyo ya andũ acio ĩkorwo ĩ mĩtĩ igũrũ mũthenya wa Thabatũ, makĩria nĩ tondũ Thabatũ ĩyo yokaga hĩndĩ ĩyo yarĩ nene.

32 Kwoguo thigari igĩgĩthiĩ ikiunanga magũrũ ma andũ arĩa maambanĩirio na Jesũ.

33 No rĩrĩa ciakinyire harĩ Jesũ igĩkora nĩarĩĩkĩĩtie gũkua, kwoguo itiamuunangire magũrũ.

34 Ĩndĩ mũũthigari ũmwe agĩikia itimũ agĩtheeca Jesũ mbaruinĩ, naho hau aatheecirwo hakiuma maaĩ na thakame.

35 (Mũndũ ũrĩa wonire ũndũ ũcio ũgĩĩkĩka nĩ we ũraheana ũira wake, ũira wake nĩ wa ma, na nĩoĩ atĩ araaria ũhoro wa ma nĩ geetha o na inyuĩ mwĩtĩkie.)

36 Ũndũ ũyũ wonekire nĩ geetha Maandĩko mahingio marĩa moigĩĩte atĩrĩ, “Gũtirĩ ihĩndĩ o na rĩmwe rĩake rĩkoinangwo.”

37 O na no harĩ Maandĩko mangĩ moigĩĩte atĩrĩ, “Andũ nĩmagaacũũthĩrĩria mũndũ ũrĩa maatheecire.”

Jesũ gũthikwo

38 Thuutha ũcio Josefu wa kuuma itũũra rĩa Arimathea, akĩhooya Pilato rũũtha rwa gũkuua mwĩrĩ wa Jesũ. (Josefu aarĩ mũrutwo wa Jesũ, no aamũrũmagĩrĩra na hitho nĩ ũndũ wa gwĩtigĩra anene a Ayahudi.) Pilato agĩkĩmwĩtĩkĩria akaũkuue, naake Josefu agĩthiĩ agĩkuua mwĩrĩ wa Jesũ.

39 Naake Nikodemo, ũrĩa wokĩĩte kwĩ Jesũ rĩmwe ũtukũ, agĩthiĩ hamwe na Josefu akuuĩĩte mũtukanio wa maguta ma manemane na thubiri ta kiro mĩrongo ĩtatũ.

40 Nao andũ acio eerĩ makĩoya mwĩrĩ wa Jesũ makĩwoha na cuka wa gataani o hamwe na mũtukanio ũcio wa maguta kũringana na mũtugo wa Ayahudi wa gũthikana.

41 Na rĩĩrĩ, hau Jesũ aambĩirwo nĩhaarĩ na mũgũnda warĩ na mbĩĩrĩra, nayo ndĩakoreetwo ĩthikĩĩtwo mũndũ o na ũmwe.

42 Nao makĩiga mwĩrĩ wa Jesũ mbĩĩrĩrainĩ ĩyo, tondũ yarĩ hakuhĩ na ningĩ kwarĩ mũthenya wa Ayahudi wa kwĩhaarĩria nĩ ũndũ wa Thabatũ.

Mbĩĩrĩra gũkorwo ĩtarĩ kĩndũ

1 Na rĩĩrĩ, mũthenya wa Kiumia rũũciinĩ tene, kũrĩ o na nduma, Mariamu Mũmagidali agĩthiĩ mbĩĩrĩrainĩ, akĩona ihiga rĩrĩa rĩaigĩĩtwo mũromoinĩ rĩthengeetio.

2 Agĩteng’era kũrĩ Simoni Petero, o na kũrĩ mũrutwo ũrĩa Jesũ eendeete, akĩmeera atĩrĩ, “Nĩmathengeetie Mwathani mbĩĩrĩrainĩ, na tũtiũĩ kũrĩa mamũigĩĩte!”

3 Naake Petero na mũrutwo ũcio ũngĩ magĩthiĩ mbĩĩrĩrainĩ mateng’ereete,

4 no mũrutwo ũcio ũngĩ agĩkĩria Petero ihenya, agĩkinya mbĩĩrĩrainĩ mbere.

5 Akinya akĩinamĩrĩra, agĩcũũthĩrĩria thĩinĩ akĩona nguo iria cioheete mwĩrĩ wa Jesũ, no ndatoonyire.

6 Naake Simoni Petero ũrĩa warĩ thuutha akinya, akĩingĩra mbĩĩrĩra thĩinĩ o rĩmwe. Akĩona cuka wa gataani wĩ hau thĩ,

7 naguo taama ũrĩa woheete Jesũ mũtwe, warĩ o hau hakuhĩ na cuka ũcio. Taama ũcio ndwarĩ hamwe na cuka ũcio wa gataani, no wakũnjĩĩtwo ũkaigwo handũ wĩ wiki.

8 Hĩndĩ ĩyo mũrutwo ũcio ũngĩ ũrĩa wakinyĩĩte mbĩĩrĩrainĩ mbere ya Petero, o naake agĩtoonya thĩinĩ, akĩona na agĩĩtĩkia.

9 (Kinya hĩndĩ ĩyo matiakoreetwo mataũkĩirwo nĩ maandĩko atĩ no mũhaka ariũke oime kũrĩ arĩa akuũ.)

10 Arutwo acio magĩcooka makĩinũka kwao.

Jesũ kuumĩrĩra Mariamu Mũmagidali

11 Na rĩĩrĩ, Mariamu arũũgamĩĩte hau mbĩĩrĩrainĩ akĩrĩraga, nĩainamĩrĩire agĩcũũthĩrĩria mbĩĩrĩra thĩinĩ.

12 Naake akĩona araika eerĩ me na nguo njerũ maikarĩĩte harĩa mwĩrĩ wa Jesũ warĩ, ũmwe agaikara mũtweinĩ na ũrĩa ũngĩ magũrũinĩ.

13 Nao makĩmũũria atĩrĩ, “Mũtumia, nĩ kĩĩ kĩrakũrĩria?”

Naake agĩcookia atĩrĩ, “Nĩ tondũ nĩmeehereetie Mwathani wakwa, na ndiũĩ kũrĩa mamũigĩĩte!”

14 Mariamu arĩĩkia kuuga ũguo akĩĩhũgũra na thuutha akĩona Jesũ arũũgamĩĩte hau, no we ndamenyaga atĩ nĩ Jesũ.

15 Naake Jesũ akĩmũũria atĩrĩ, “Mũtumia, nĩ kĩĩ kĩrakũrĩria? Nũũ ũracaria?”

Mariamu agĩciiria atĩ mũndũ ũcio nĩ mũrĩmi wa mũgũnda ũcio agĩkĩmwĩra atĩrĩ, “Mũthuuri ũyũ, ũngĩkorwo nĩ we ũramweheririe, njĩĩra harĩa ũramũigire thiĩ ngamũkuue.”

16 Hĩndĩ ĩyo Jesũ akĩmwĩta, “Mariamu!”

Naake Mariamu akĩĩhũgũra na kũrĩ we, agĩcookia na Kĩhibirania atĩrĩ, “Raboni!” (Na ũguo nĩkuuga, “Mũrutani”).

17 Jesũ akĩmwĩra atĩrĩ, “Tiga kũũnyiita, amu ndirĩ ndĩrambata kũrĩ Awa. Ĩndĩ thiĩ kũrĩ aariũ a Awa ũmeere atĩ nĩndĩrambata kũrĩ Awa na no we Ithe wanyu, na kũrĩ Ngai wakwa, na no we Ngai wanyu.”

18 Naake Mariamu Mũmagidali agĩthiĩ akĩĩra arutwo a Jesũ atĩ nĩoneete Mwathani, na akĩmeera maũndũ moothe marĩa eerĩĩtwo nĩ we.

Jesũ kuumĩrĩra arutwo aake

19 Na mũthenya o ro ũcio wa kiumia hwaĩinĩ, arutwo a Jesũ maikarĩĩte mehingĩire nyũmba tondũ nĩmeetigagĩra anene a Ayahudi. Na rĩĩrĩ, hĩndĩ ĩyo Jesũ agĩũka akĩrũũgama gatagatĩ kaao akĩmeera atĩrĩ, “Thaayũ ũrogĩa na inyuĩ.”

20 Arĩĩkia kuuga ũguo akĩmoonia mooko maake o na mbaru ciake. Nao makĩiyũrwo nĩ gĩkeno nĩ ũndũ wa kuona Mwathani.

21 Naake Jesũ akĩmeera o rĩngĩ atĩrĩ, “Thaayũ ũrogĩa na inyuĩ. O ta ũrĩa Awa aandũmire, noguo o na niĩ ndamũtũma.”

22 Hĩndĩ ĩyo akĩmahuuhĩrĩria mĩhũũmũ yake akĩmeera atĩrĩ, “Amũkĩraai Roho Mũtheru.

23 Arĩa oothe mũrĩohagĩra meehia maao nĩmarĩohagĩrwo, na arĩa oothe mũtarĩohagĩra meehia maao matirĩohagĩrwo.”

Jesũ na Toma

24 Na rĩĩrĩ, Toma ũmwe, wa arutwo arĩa ikũmi na eerĩ, (ũrĩa wetagwo wa Mahatha), ndaarĩ nao hĩndĩ ĩyo Jesũ ookire.

25 Arutwo acio angĩ magĩkĩmwĩra atĩrĩ, “Nĩtuoneete Mwathani!”

Naake Toma akiuga atĩrĩ, “Itangĩona irema cia mĩcumaarĩ iria i mookoinĩ maake, na njikie kĩara gĩakwa iremainĩ icio cia mĩcumaarĩ, o na njikie guoko mbaruinĩ ciake, ndingĩĩtĩkia.”

26 Na rĩĩrĩ, thuutha wa mĩthenya ĩnaana arutwo maikarĩĩte hamwe nyũmba thĩinĩ rĩngĩ, na Toma aarĩ hamwe nao. Mĩrango yarĩ mĩhinge, no Jesũ akĩmoimĩrĩra akĩrũũgama gatagatĩ kaao, akĩmeera atĩrĩ, “Thaayũ ũrogĩa na inyuĩ.”

27 Agĩcooka akĩĩra Toma atĩrĩ, “Rora mooko maakwa, na ũikie kĩara gĩaku iremainĩ ici, o na ũtambũrũkie guoko ũgũikie mbaruinĩ ciakwa, nĩ geetha ũthirwo nĩ nganja icio ciaku, wĩtĩkie!”

28 Naake Toma akĩmũcookeria atĩrĩ, “Mwathani wakwa na Ngai wakwa!”

29 Jesũ akĩmũũria atĩrĩ, “Wetĩkia tondũ nĩwanyona? Kũraathimwo nĩ arĩa meetĩkagia o na matooneete!”

Bata wa ibuku rĩĩrĩ

30 Nĩkũrĩ ciama ingĩ nyingĩ Jesũ aaringire arutwo aake makĩyonagĩra itaandĩkĩĩtwo thĩinĩ wa ibuku rĩĩrĩ.

31 Ici irĩ ho ciandĩkĩĩtwo nĩ geetha mwĩtĩkie atĩ Jesũ nĩ we Mesia, Mũrũ wa Ngai, na nĩ ũndũ wa kũmwĩtĩkia mũgĩe na muoyo.