Jesũ kwaria ũhoro wa kwanangwo kwa Hekaarũ
1 Na rĩĩrĩ, Jesũ akiuma Hekaarũ, na rĩrĩa aathiaga arutwo magĩũka kũrĩ we makĩambĩrĩria kũmuonereria mĩako ya Hekaarũ.
2 Naake akĩmeera atĩrĩ, “Nĩmũkuona mĩako ĩno yothe? Ngũmwĩra na ma atĩ, gũtirĩ ihiga o na rĩmwe haaha rĩgaatigwo igũrũ wa rĩrĩa rĩngĩ, moothe nĩmakaamomorwo.”
Mathĩĩna na kũnyariirwo
3 Na hĩndĩ ĩrĩa Jesũ aikarĩĩte thĩ kĩrĩmainĩ kĩa Mĩtamaiyũ, arutwo aake nĩmaathiire kũrĩ we na hitho makĩmwĩra atĩrĩ, “Tatwĩre maũndũ macio moothe mageekĩka rĩ, na nĩ kĩĩ gĩgaakorwo kĩrĩ rũũri rwa gũũka gwaku o na rwa ithirĩro rĩa thĩ.”
4 Naake Jesũ akĩmeera atĩrĩ, “Mwĩmenyagĩrĩreei mũtikaanahĩtithio nĩ mũndũ o na ũrĩkũ,
5 nĩ amu andũ aingĩ nĩmagooka makiugaga atĩ maraaria handũinĩ haakwa makoiga atĩrĩ, ‘Nĩ niĩ Mesia!’ Nao nĩmakaahĩtithia andũ aingĩ.
6 Ningĩ nĩmũkaigua ũhoro wa mbaara na mũhuuhu wa mbaara, no mũtikaanetigĩre. Maũndũ ta macio no mũhaka makooneka, no ũguo ti kuonania atĩ ũcio nĩguo ũgaakorwo ũrĩ mũthia.
7 Namo mabũrũri nĩmagookanĩrĩra o na moothamaki mookanĩrĩre. Nakuo kũndũ kũingĩ nĩgũkaagĩa ng’aragu na ithingithia.
8 Maũndũ macio moothe magaakorwo mahaana ta kĩambĩrĩria kĩa ruwo ta rwa mũtumia akĩrũmwo aciare.
9 “Ningĩ nĩmũkaanyiitwo mũtwarwo mũkaherithio na mũũragwo. Nao andũ a ndũũrĩrĩ ciothe nĩmakaamũmena nĩ ũndũ wakwa.
10 Nao andũ aingĩ nĩmagaatigana na wĩtĩkio wao hĩndĩ ĩyo; na makunyananĩre na mathũũrane o eene.
11 Ningĩ anabii aingĩ a maheeni nĩmakooneka na nĩmakaahĩtithia andũ aingĩ.
12 Na tondũ waganu nĩũkaingĩha, wendo wa andũ aingĩ nĩũgaatharara.
13 No ũrĩa ũgaakirĩrĩria kinya mũthia nĩakaahonokio.
14 Naguo ũhoro ũyũ Mwega wa Ũthamaki nĩũkaahunjio thĩ yothe ũhaana ta ũira kũrĩ ndũũrĩrĩ ciothe, na thuutha ũcio ithirĩro rĩcooke rĩkinye.
Kĩndũ gĩ thaahu na magigi
15 “Nĩmũkoona ‘Kĩndũ gĩ thaahu na magigi’ kĩrĩa mũnabii Danieli aaririe ũhoro wakĩo, gĩakĩĩtwo handũ harĩa haamũrĩre Ngai,” (ũrĩa ũrathooma nĩamenye na ma ũrĩa gũkwĩrwo!)
16 “Hĩndĩ ĩyo arĩa me Judea nĩmakoorĩra irimainĩ.
17 Naake mũndũ ũrĩa wĩ nyũmba igũrũ ndakaanaharũrũke acookere indo iria irĩ thĩinĩ wa nyũmba yake,
18 kana ũrĩa wĩ mũgũnda acookere nguo ciake mũciĩ.
19 Kaĩ atumia arĩa magaakorwo marĩ na nda hĩndĩ ĩyo, o na arĩa magaakorwo makĩongithia nĩmakoona thĩĩna mũnene-ĩ!
20 Hooyai Ngai atĩ gwĩthara kwanyu gũtikaanakinye hĩndĩ ya heho kana mũthenya wa Thabatũ!
21 Amu hĩndĩ ĩyo nĩgũkooneka mathĩĩna makĩrĩĩte marĩa moothe maanoonwo kuuma rĩrĩa Ngai oombire thĩ nginyagia rĩu, na gũtirĩ hĩndĩ gũkooneka ta mo rĩngĩ.
22 No Ngai nĩanyiihanyiihĩĩtie matukũ macio ma mathĩĩna, nĩ ũndũ korwo ndeekĩĩte ũguo, gũtirĩ mũndũ o na ũmwe ũngĩkaahonoka. No nĩ ũndũ wa andũ arĩa aake athuure, matukũ macio nĩmakaanyiihanyiihio.
23 “Hĩndĩ ĩyo mũndũ angĩkaamwĩra atĩrĩ, ‘Mesia arĩ na haaha!’ kana ‘Ũũrĩa haarĩa!’ Mũtikaaneetĩkie.
24 Nĩ amu Mesia a maheeni na anabii a maheeni nĩmakooneka, nao maringe ciama makĩenda kũhĩtithia o na arĩa athuure a Ngai korwo no kũhoteke.
25 No inyuĩ nĩndamwĩra ũguo mbere ya hĩndĩ ĩyo!
26 “Nĩ ũndũ, ũcio mangĩkaamwĩra atĩrĩ, ‘Arĩ werũinĩ!’ mũtikaanathiĩ kuo; na mangĩkaamwĩra atĩ, ‘Ehithĩĩte nyũmba!’ mũtikaaneetĩkie.
27 Amu o ta ũrĩa rũheni rũhenũkaga kuuma mwena wa na irathĩro nginya wa na ithũĩro, ũguo noguo gũũka kwa Mũrũ wa Mũndũ gũgaakorwo kũhaana.
28 “Kũrĩa guothe kũrĩ kĩimba nĩkuo nderi ikoongana.
Gũũka kwa Mũrũ wa Mũndũ
29 “Na rĩĩrĩ, thuutha wa hĩndĩ ĩyo ya mathĩĩna, riũa nĩrĩgaatuĩka nduma, naguo mweri ũtige gũcooka kwara, nacio njata ciume igũrũ igwe thĩ, namo moonene ma igũrũ meenyenyio.
30 Hĩndĩ ĩyo kĩmenyithia kĩa Mũrũ wa Mũndũ nĩgĩkooneka kũũrĩa igũrũ; nao andũ oothe a thĩ nĩmakaarĩra moona Mũrũ wa Mũndũ agĩũka e thĩinĩ wa matu ma igũrũ e na hinya na riiri mũingĩ.
31 Hĩndĩ ĩyo karumbeeta nĩgakaahuuhwo, naake nĩagaatũma araika aake ituri ciothe cia thĩ makoonganie andũ aake arĩa athuure kuuma mũico ũmwe wa thĩ kinya ũrĩa ũngĩ.
Ũrutani kuuma harĩ mũkũyũ
32 “Mwĩruteei na mũkũyũ; honge ciaguo ciambĩrĩria kũruta mathangũ nĩmũmenyaga atĩ hĩndĩ ya ũrugarĩ ĩ hakuhĩ.
33 Ũguo noguo hĩndĩ ĩrĩa mũkoona maũndũ macio, mũkaamenya atĩ Mũrũ wa Mũndũ arĩ hakuhĩ o ta arĩ mũrangoinĩ.
34 Ngũmwĩra atĩrĩ na ma, rũciaro rũũrũ rũtigũthira maũndũ macio moothe matahingĩĩte.
35 Igũrũ na thĩ nĩigaathira, no ciugo ciakwa itigaathira.
Gũtirĩ mũndũ ũũĩ mũthenya kana thaa
36 “Gũtirĩ mũndũ ũũĩ rĩrĩa mũthenya ũcio na thaa ĩyo igaakinya, o na araika a igũrũ kana Mũũriũ,tiga o Ithe wiki.
37 O ta ũrĩa kwahaanaga matukũinĩ ma Noa, noguo gũũka kwa Mũrũ wa Mũndũ gũkaahaana.
38 Nĩ amu mbere ya kĩguũ andũ nĩmaarĩaga na makanyua, nao arũme na atumia no mahikanagia kinyagia mũthenya ũrĩa Noa aingĩrire Thabina.
39 Matiamenyaga ũrĩa kwahaanaga kinya hĩndĩ ĩrĩa oothe maatwarirwo nĩ mũiyũro wa maaĩ. Ũguo nĩguo gũcooka kwa Mũrũ wa Mũndũ gũkaahaana.
40 Hĩndĩ ĩyo andũ eerĩ nĩmagaakorwo mũgũnda hamwe, ũmwe akuuo naake ũrĩa ũngĩ atigwo.
41 Nao atumia eerĩ nĩmagaakorwo marĩ hamwe magĩthĩa, ũmwe akuuo, naake ũrĩa ũngĩ atigwo.
42 “Kĩĩhũgeei nĩ ũndũ mũtiũĩ mũthenya ũrĩa Mwathani wanyu agacooka.
43 Menyaai na ma atĩ, korwo mwene nyũmba nĩoĩ hĩndĩ ĩrĩa mũici angĩũka, no aikare ehũũgĩĩte nĩ geetha mũici ndakabunje nyũmba.
44 Nĩ ũndũ ũcio, o na inyuĩ no mũhaka mũikarage mwĩhaarĩirie hĩndĩ ciothe, nĩ ũndũ Mũrũ wa Mũndũ agooka ithaa rĩrĩa mũtamwĩrĩgĩrĩire.
Ndungata ĩrĩa njĩhokeku kana ĩrĩa ĩtarĩ njĩhokeku
45 “Ndungata ĩrĩa njĩhokeku na njũgĩ-rĩ, nĩ ĩrĩkũ? Nĩ ĩrĩa mũmĩathi eeraga ĩrore iria ingĩ na ĩcihe irio mathaa marĩa maagĩrĩire.
46 Ndungata ĩyo kaĩ nĩgĩaga na gĩkeno kĩnene ĩngĩkorererwo nĩ mũmĩathi ĩgĩĩka ũguo-ĩ!
47 Ngũmwĩra na ma atĩ mwene mũciĩ ehokagĩra ndungata ĩyo indo ciake ciothe.
48 No ndungata ĩyo ĩngĩkorwo ĩrĩ njũru ĩkĩĩre na ngoro, ‘Mwathi wakwa nĩegũikara hĩndĩ ndaaya atacookeete,’
49 ĩkĩambĩrĩrie kũhũũra ndungata iria ingĩ, na kũrĩa na kũnyua hamwe na arĩĩu,
50 Mwathi wayo agacooka mũthenya ũrĩa ndungata ĩyo ĩtamwĩrĩgĩrĩire na ithaa rĩrĩa ĩtooĩ,
51 amĩherithie na amĩikie hamwe na andũ arĩa hinga. Kũu andũ makaarĩra na mahagaranie magego.