Gũtaarĩria
Ibuku rĩĩrĩ rĩa Ũhoro Mwega ũrĩa wandĩkirwo nĩ Mariko rĩambĩrĩirie na kuuga atĩ “Ũyũ nĩ Ũhoro ũrĩa Mwega ũkoniĩ Jesũ Kristũ, Mũrũ wa Ngai.” Mwandĩki nĩonanĩĩtie atĩ Jesũ nĩ mũndũ wa ciĩko, o na ũhoti. Ũhoti wake wonekaga ũrutaniinĩ wake, na gũkorwo e na hinya wa kũingata ngoma o na kuohera andũ meehia maao. Thĩinĩ wa ibuku rĩĩrĩ, Jesũ nĩaugĩĩte atĩ we nĩ Mũrũ wa Mũndũ ũrĩa wokire kũruta muoyo wake nĩ geetha akũũre andũ kuuma meehiainĩ.
Mariko nĩaheanĩĩte ũhoro wa Jesũ arũngĩrĩirie wega na oomĩrĩirie mũno. Kĩrĩa Jesũ agaathĩrĩirie mũno nĩ maũndũ marĩa eekire, aaririe o na akĩrutana. Arĩĩkia gũtaarĩria na njĩra nguhĩ ũhoro ũkoniĩ Johana Mũbatithania na kũbatithio na kũgerio kwa Jesũ, mwandĩki nĩacookeete akaheana ũhoro wa wĩra wa Jesũ wa kũhonia andũ o na wĩra wake wa kũrutana. Thuutha wa gũikaranga na Jesũ, arũmĩrĩri aake nĩmaamũmenyire wega makĩria, no andũ arĩa maareganire naake magĩkĩrĩrĩria o kũregana naake. Icunjĩ cia kũrĩĩkĩrĩria cia ibuku rĩĩrĩ iheanĩĩte ũhoro wa kiumia kĩa mũthia kĩa Jesũ gũkorwo arĩ gũũkũ thĩ, na makĩria ũhoro wa ũrĩa aambirwo na akĩriũka.
Icigo igĩrĩ iria cia kũrĩĩkĩrĩria cia Ũhoro ũyũ Mwega, iria ciirigĩirwo ta ũũ [ ] ciĩciiragĩrio atĩ ciandĩkirwo nĩ mũndũ ũngĩ tiga mwandĩki wa ibuku rĩa Mariko.
Maũndũ marĩa marĩ ibukuinĩ rĩĩrĩ
Kĩambĩrĩria kĩa Ũhoro ũrĩa Mwega 1.1-13
Wĩra wa Jesũ mũingĩinĩ e bũrũriinĩ wa Galili 1.14–9.50
Rũgendo rwake kuuma Galili kinya Jerusalemu 10.1-52
Kiumia kĩa mũthia e hakuhĩ gũkinya Jerusalemu na arĩ kuo 11.1–15.47
Kũriũka kwa Jesũ 16.1-8
Jesũ kuumĩrĩra andũ na kwambata igũrũ 16.9-20