Paũlũ na Baranaba me Ikonio
1 Na rĩĩrĩ, rĩrĩa Paũlũ na Baranaba maarĩ kũu Ikonio, makĩingĩra thunagogi ya Ayahudi o ta mũtugo, makĩhe andũ ũhoro, ũũ wega atĩ, andũ aingĩ, Ayahudi na andũ a Ndũũrĩrĩ magĩĩtĩkia.
2 No Ayahudi arĩa mateetĩkirie magĩthogotha andũ a Ndũũrĩrĩ, makĩmathũũkia ngoro, magĩtũma mookĩrĩre andũ arĩa meetĩkĩĩtie.
3 No atũmwo magĩikara kũu hĩndĩ ndaaya, makaaragia ũhoro wa Mwathani mategwĩtigĩra, naake agĩkĩonania atĩ wega wa ũhoro wa Ngai nĩ wa ma, na ũndũ wa kũmahe hinya wa kũringa ciama na moorirũ.
4 Nao andũ a itũũra rĩu makĩamũkana: amwe magĩĩtĩkania na Ayahudi, nao arĩa angĩ magĩĩtĩkania na atũmwo.
5 Rĩrĩa Ayahudi na andũ a Ndũũrĩrĩ me hamwe na anene aao meendaga gwĩka Paũlũ na Baranaba ũũru o na kũmahũũra na mahiga,
6 makĩmenya, makĩũra magĩthiĩ matũũra ma bũrũri wa Likaonia, nĩ mo Lusitera na Deribe, o na matũũra marĩa maarĩ kũu gũkuhĩ.
7 Makĩhunjia Ũhoro ũrĩa Mwega kuo.
Paũlũ na Baranaba me Lusitera na Deribe
8 Na rĩĩrĩ, kũu itũũrainĩ rĩa Lusitera nĩkwarĩ mũndũ ũtaahotaga gwĩtwara na magũrũ maake, na aatũire e kĩonje kuuma gũciarwo atarĩ hingo arĩ etwara.
9 Naake agĩikara thĩ athikĩrĩirie Paũlũ akĩaria. Naake Paũlũ akĩmũkũũrĩra maitho, akĩona atĩ aarĩ na wĩtĩkio wa gũtũma ahonio,
10 agĩkĩanĩrĩra na mũgambo mũnene akiuga atĩrĩ, “Rũũgama wĩhande na magũrũ maaku!” Naake akĩrũũgama o rĩmwe agĩĩtwara.
11 Nakĩo kĩrĩndĩ rĩrĩa kĩonire ũrĩa Paũlũ eekire, gĩkĩanĩrĩra na rũthiomi rwa andũ a Likaonia gĩkiuga atĩrĩ, “Ngai nĩciikũrũkĩĩte igooka thĩ kũrĩ ithuĩ ihaana ta andũ!”
12 Baranaba makĩmũtua Zeu, naake Paũlũ makĩmũtua Herime, tondũ nĩ we watongoragia mĩario.
13 Naake mũthĩnjĩri ngai ĩyo yetagwo Zeu, ũrĩa hekaarũ yake yarĩ thoomeinĩ wa itũũra, akĩreehe ndeegwa na thũmbĩ kĩhingoinĩ akĩenda kũmarutĩra igongoona e hamwe na kĩrĩndĩ.
14 Rĩrĩa Baranaba na Paũlũ maiguire ũrĩa gwekĩkaga, magĩtembũranga nguo ciao magĩteng’era gatagatĩinĩ ka mũingĩ makĩanagĩrĩra atĩrĩ,
15 “Athuuri, mũreeka maũndũ maya nĩkĩ? O na ithuĩ tũrĩ andũ mahaanaine na inyuĩ! Tũũkĩĩte kũmũmenyithia Ũhoro ũrĩa Mwega atĩ no mũhaka mũtigane na maũndũ maya ma tũhũ mũgarũrũkĩre Ngai ũrĩa ũrĩ muoyo, ũrĩa wombire igũrũ, thĩ, iria o na indo ciothe iria irĩ thĩinĩ wacio.
16 Matukũinĩ ma tene nĩatiganĩirie andũ oothe meekage ũrĩa mekwenda.
17 No ndamatiganĩirie matarĩ na ũndũ wa kuonanagia atĩ we arĩ kuo, amu nĩekaga maũndũ meega akamũhe mbura kuuma igũrũ na imera i na maciaro maingĩ, na akamũhe irio na akaiyũragia ngoro cianyu gĩkeno.”
18 Ĩndĩ o na atũmwo moiga ũguo, matiahotire kũgiria kĩrĩndĩ kĩmarutĩre igongoona.
19 Na rĩĩrĩ, kũu nĩgwokire Ayahudi moimĩĩte Anitiokia bũrũriinĩ wa Pisidia na Ikonio, nao marĩĩkia kũringĩrĩria andũ mamarũmĩrĩre magĩtũma mahũũre Paũlũ na mahiga, magĩcooka makĩmũkururia makĩmuumia nja ya itũũra meciirĩĩtie atĩ nĩ mũkuũ.
20 Rĩrĩa andũ arĩa meetĩkĩĩtie mookire makĩmũrigiicĩria, agĩũkĩra agĩtoonya itũũrainĩ, na mũthenya ũyũ ũngĩ magĩthiĩ na Baranaba itũũra rĩa Deribe.
Paũlũ na Baranaba gũcooka Anitiokia bũrũriinĩ wa Siria
21 Na rĩĩrĩ, marĩĩkia kũhunjia Ũhoro ũrĩa Mwega itũũrainĩ rĩu makĩgĩa na arũmĩrĩri aingĩ mũno. Nao magĩgĩcooka na thuutha makĩgera Lusitera, Ikonio, na Anitiokia bũrũriinĩ wa Pisidia.
22 Maathiaga makĩũmagĩrĩria andũ arĩa meetĩkĩĩtie makĩmataaraga atĩ maikarage marũmĩĩtie wĩtĩkio, na makameera atĩrĩ, “No mũhaka tũhĩtũkĩre mathĩĩnainĩ maingĩ nĩ geetha tũtoonye Ũthamakiinĩ wa Ngai.”
23 Naguo o kanitha makĩũthuurĩra athuuri aaguo, na thuutha wa kũhooya na kwĩhinga kũrĩa makĩmaneana mookoinĩ ma Mwathani ũrĩa meetĩkĩĩtie.
24 Magĩcooka magĩtuĩkanĩria bũrũriinĩ wa Pisidia magĩkinya Pamufulia.
25 Nao makĩhe andũ a itũũra rĩa Periga ũhoro wa Ngai, magĩcooka magĩikũrũka Atalia.
26 Ningĩ makiuma kũu magĩthiĩ Anitiokia, o kũrĩa maanengeranĩirwo wegainĩ wa Ngai nĩ ũndũ wa wĩra ũcio maarĩĩkirie.
27 Rĩrĩa maakinyire Anitiokia, magĩcookanĩrĩria andũ a kanitha hamwe makĩmeera maũndũ moothe marĩa Ngai eekĩĩte nao, na ũrĩa ahingũrĩire andũ a Ndũũrĩrĩ mũrango wa wĩtĩkio.
28 Nao magĩgĩikara na arĩa meetĩkĩĩtie ihinda iraaya.