Paũlũ gwĩtetera mbere ya Agiripa
1 Thuutha ũcio Agiripa akĩĩra Paũlũ atĩrĩ, “Wĩ na rũũtha wĩyarĩrĩrie.” Naake Paũlũ agĩtambũrũkia guoko akĩambĩrĩria gwĩtetera akiuga atĩrĩ:
2 “Mũthamaki Agiripa! Ngũigua ngeneete atĩ ũũmũũthĩ nĩngwĩtetera mbere yaku nĩ ũndũ wa maũndũ moothe marĩa njigĩrĩirwo nĩ Ayahudi.
3 Tondũ wee nĩũũĩ wega mĩtugo yothe ya ndũire ya Ayahudi na inegene rĩao, nĩndagũthaitha ũthikĩrĩrie ũkirĩrĩirie.
4 “Atĩrĩĩrĩ, Ayahudi oothe nĩmooĩ ta ũrĩa ũtũũro wakwa wahaanaga kuuma ndĩ o mũndũ mwĩthĩ. Nĩmooĩ ũrĩa ndatũũranagia na andũ a rũũrĩrĩ rwitũ kuuma o kĩambĩrĩria, kũu Jerusalemu.
5 Korwo no meetĩkĩre kũheana ũira, nĩmatũire mooĩ atĩ ndatũire ndĩ wa gĩkundi kĩa Afarisai kĩrĩa kĩrũmĩĩtie ndini iitũ mũno.
6 Rĩu ndũũgamĩĩte haaha ngĩciirithio nĩ ũndũ wa kĩĩrĩgĩrĩro kĩrĩa ndĩ nakĩo thĩinĩ wa kĩĩranĩro kĩrĩa Ngai eerĩire maithe maitũ.
7 Kĩĩranĩro kĩu nokĩo mĩhĩrĩga ĩrĩa iitũ ikũmi na ĩĩrĩ ĩĩrĩgagĩrĩra kũgĩa nakĩo, rĩrĩa ĩgũthaathaiya Ngai na kĩyo ũtukũ na mũthenya ĩtegũtigithĩria. Na rĩĩrĩ, mũthamaki mũgaathe, ndĩrathitangwo nĩ Ayahudi tondũ wa kĩĩrĩgĩrĩro kĩu!
8 Nĩ kĩĩ gĩgũtũma inyuothe mũrĩ haaha muone arĩ hinya gwĩtĩkia atĩ Ngai nĩariũkagia arĩa akuũ?
9 “Atĩrĩĩrĩ, o na niĩ mwene ndeciiragia atĩ no mũhaka njĩke o ũrĩa ingĩahotire kũhũũrana na ũhoro wa Jesũ wa Nazarethi.
10 Ngĩgĩĩka ũguo kũu Jerusalemu, ngĩgĩikithia andũ a Ngai aingĩ njeera heetwo hinya ũcio nĩ athĩnjĩri Ngai arĩa anene, na gwakinya hingo ya kũmooraga ngagaathĩrĩria ũhoro ũcio.
11 Ningĩ nĩndamaherithagia kaingĩ thunagogiinĩ ciothe ngageragia gũtũma marume Ngai, na ngamanyariiraga o nginya matũũrainĩ ma kũraaya ndĩ na mang’ũrĩ maingĩ.
Paũlũ kũmenyithania ũrĩa aagarũrũkire
12 “Na rĩĩrĩ, ndaarĩ rũgendoinĩ ngĩthiĩ Damasiki, ndĩ wĩrainĩ ũcio, heetwo hinya na watho nĩ athĩnjĩri Ngai arĩa anene.
13 Ta thaa thita cia mũthenya ndĩ njĩrainĩ, mũthamaki mũgaathe, ngĩona ũtheri woima igũrũ ũkengeete gũkĩra riũa, ũkĩnjarĩra mĩena yothe o hamwe na arĩa twarĩ nao.
14 Ithuothe tũkĩgũa thĩ, na niĩ ngĩigua mũgambo ũkĩnjarĩria ũkĩnjĩĩra na rũthiomi rwa Kĩhibirania atĩrĩ, ‘Saũlũ, Saũlũ! Ũnyariiraga nĩkĩ? Nĩkwĩnogia ũrenogia ũkĩhũũra maaĩ na ndĩrĩ.’
15 Na niĩ ngĩũria atĩrĩ, ‘Wee nĩ we ũ, Mwathani?’ Mwathani akĩnjĩĩra atĩrĩ, ‘Nĩ niĩ Jesũ, ũrĩa ũnyariiraga.
16 No rĩĩrĩ ũkĩra ũrũũgame na magũrũ maaku amu ndakwĩonithia nĩ geetha ngũthuure ngũtue ndungata. Ningĩ ngũtue mũira wa maũndũ maakwa marĩa wona rĩu na marĩa ũkoona thuutha.
17 Nĩngaakũhonokia kuuma mookoinĩ ma andũ a Isiraeli na ma andũ a Ndũũrĩrĩ arĩa ngaagũtũma kũrĩ o.
18 Nĩũkaamahingũra maitho nĩguo moime ndumainĩ mathiĩ ũtheriinĩ, na moime hinyainĩ wa Caitaani mathiĩ harĩ Ngai, nĩ geetha makaarekerwo meehia maao na magae igai hamwe na arĩa mathereetio nĩ ũndũ wa kũnjĩtĩkia.’
Paũlũ kũheana ũhoro wa wĩra wake
19 “Kwoguo mũthamaki Agiripa, niĩ ndiigana kwaga gwathĩkĩra kĩoneki kĩu ndoonirio kiumĩĩte igũrũ.
20 Ndambĩrĩirie kũhunjĩria andũ arĩa maarĩ Damasiki, na thuutha Jerusalemu, na bũrũri wothe wa Judea, na andũ a Ndũũrĩrĩ. Ndahunjagia atĩ no mũhaka andũ merire meehia maao, macookerere Ngai na meeke ciĩko cia kuonania atĩ nĩmerirĩĩte.
21 Kĩu nĩkĩo gĩtũmi kĩrĩa gĩatũmire Ayahudi manyiite ndĩ Hekaarũ thĩinĩ o na makĩgeria kũnjũraga.
22 No Ngai nĩandeithĩĩtie kinyagia ũũmũũthĩ, na nĩkĩo nũngiĩ haaha ngĩheana ũira wakwa mbere ya andũ oothe anyiinyi na anene. No rĩĩrĩ, ndiaragia maũndũ thengia o marĩa Musa na anabii moigire atĩ nĩmakaahinga,
23 namo nĩ atĩ: Mesia no mũhaka agaathĩĩnio na atuĩke wa mbere kũriũka kuuma kũrĩ akuũ, nĩguo aanĩrĩre ũtheri ũrĩa ũhonokanagia kũrĩ Ayahudi na kũrĩ andũ a Ndũũrĩrĩ.”
24 Na rĩĩrĩ, hingo ĩyo Paũlũ eetetagĩra ũguo Fesito akĩmũgũũthũkĩra akĩmwĩra atĩrĩ, “Paũlũ, wĩ mũgũrũku! Gĩthoomo kĩu gĩaku kĩnene ũguo nĩkĩo gĩkũgũrũkĩĩtie!”
25 No Paũlũ agĩcookia atĩrĩ, “Mũthuuri mũgaathe! Niĩ ndirĩ mũgũrũku. Ciugo iria ndĩraaria nĩ cia ma na ti cia ũgũrũki.
26 Ndĩrakwarĩria maũndũ maya ndĩ na ma, Mũthamaki Agiripa, tondũ gũtirĩ o na ũmwe wamo ũtooĩ, amu matiekĩirwo hithoinĩ.
27 Atĩrĩĩrĩ, Mũthamaki Agiripa, nĩwĩtĩkĩĩtie anabii? Nĩnjũũĩ atĩ nĩwĩtĩkĩĩtie!”
28 Naake Agiripa akĩĩra Paũlũ atĩrĩ, “Ũgwĩciiria no ũhote kũndũa Mũkristiano na ihinda iniini ũguo?”
29 Naake Paũlũ agĩcookia akĩmwĩra atĩrĩ, “Kana nĩ ihinda iniini kana inene-rĩ, ihooya rĩakwa kũrĩ Ngai nĩ atĩ to wee wiki, o na aya marathikĩrĩria ũũmũũthĩ ndeenda matuĩke o ta ũrĩa ndariĩ, o tiga matikoohwo na mĩnyororo ta ĩno!”
30 Hĩndĩ ĩyo mũthamaki, barũũthi, Berinike, na andũ arĩa angĩ oothe magĩũkĩra.
31 Nao marĩĩkia kuuma makĩĩrana atĩrĩ, “Mũndũ ũyũ ndeekĩĩte ũndũ wa gũtũma ooragwo kana aikio njeera.”
32 Naake Agiripa akĩĩra Fesito atĩrĩ, “Mũndũ ũyũ nĩangĩarekererio korwo ndaracookeetie ciira wake riiko kwĩ mũthamaki wa Roma.”