Aira arĩa eerĩ
1 Ngĩcooka ngĩnengerwo mũtĩ wa gũthima ũhaana ta mũthĩĩgi, ngĩĩrwo atĩrĩ, “Thiĩ ũgathime Hekaarũ ya Ngai hamwe na kĩgongoona na ũtare andũ arĩa marathaathaiya Ngai kuo.
2 No ndũgaathime nja ya Hekaarũ harĩa haikaragwo nĩ andũ a ndũũrĩrĩ. Ndũkaahathime nĩ amu nĩhanengereetwo andũ a ndũũrĩrĩ arĩa makarangĩrĩria Itũũra rĩrĩa Rĩtheru mĩeri mĩrongo ĩna na ĩĩrĩ.
3 Na rĩĩrĩ, nĩngaahe aira aakwa arĩa eerĩ ũhoti wa kũratha matukũ ngiri ĩmwe na magana meerĩ ma mĩrongo ĩtandatũ (1,260) mehumbĩĩte nguo cia makũnia.”
4 Aira acio eerĩ nĩ mĩtĩ ĩrĩa ĩĩrĩ ya mĩtamaiyũ na mĩtĩ ĩrĩa ĩĩrĩ ya kũhangĩrwo mataawa, arĩa marũũgamĩĩte mbere ya Mwathani wa thĩ.
5 Mũndũ o wothe ũngĩgeria kũmathũũkia mwaki ũriumaga tũnuainĩ twao ũkaniina thũ icio ciao, na kwoguo mũndũ ũrĩa ũkaageria kũmeeka ũũru nĩakoragwo.
6 Aira acio me na hinya wa kũhinga igũrũ nĩ geetha gũtikoire mbura ihindainĩ rĩothe rĩrĩa megũkorwo makĩratha. O na me na hinya wa gũtua maaĩ thakame, na wa kwananga thĩ na matũhũũhũ ma mĩthemba yothe maita maingĩ o ũrĩa mangĩenda.
7 Na rĩĩrĩ, marĩĩkia kũheana ũira wao nyamũ ĩrĩa yumaga irima rĩrĩa iriku rĩtarĩ mũthia nĩkaarũa nao na ĩmahoote, ĩcooke ĩmoorage.
8 Nacio ciimba ciao nĩigaatigwo ciaraganĩĩte njĩrainĩ cia itũũra rĩrĩa inene kũrĩa Mwathani wao aambĩirwo, rĩrĩa rĩĩtanagio na Sodomu kana Misiri.
9 Andũ a kuuma ndũũrĩrĩinĩ ciothe, mĩhĩrĩgainĩ yothe, thiomiinĩ ciothe, na irukainĩ ciothe nĩmakeerorera ciimba icio ciao mĩthenya ĩtatũ na nuthu, na matikaareka ithikwo.
10 Nao andũ arĩa matũũraga thĩ nĩmagaakena nĩ ũndũ wa aira acio kũũragwo, na nĩmagaakũngũĩra magĩtũmanagĩra iheeo, tondũ anabii acio eerĩ maatũũraga mathĩĩnagia andũ a thĩ.
11 No rĩĩrĩ, thuutha wa matukũ macio matatũ na nuthu, mĩhũũmũ ĩrĩa ĩtũmaga andũ matũũre muoyo ĩkiuma kwĩ Ngai igĩtoonya thĩinĩ wa aira acio, nao makĩrũũgama na igũrũ; na rĩĩrĩ, andũ arĩa oothe maamoonire magĩĩtigĩra mũno.
12 Aira acio magĩcooka makĩigua mũgambo wanĩrĩire uumĩĩte na igũrũ ũkĩmeera atĩrĩ, “Ambataai haaha!” Nao makĩambata na igũrũ me ituinĩ, thũ ciao imeroreire.
13 O hĩndĩ ĩyo gũkĩgĩa na gĩthingithia kĩnene, itũũra gĩcunjĩ kĩmwe gĩa ikũmi rĩgĩthũũkangio, na andũ ngiri mũgwanja (7,000) makĩũragwo nĩ gĩthingithia kĩu, nao arĩa maatigarire makĩnyiitwo nĩ kĩmako, makĩgooca Ngai wa igũrũ.
14 Thĩĩna wa keerĩ nĩwathira, no thĩĩna wa gatatũ nĩũgũũka o narua!
Karumbeeta ka mũgwanja
15 Atĩrĩĩrĩ, mũraika wa mũgwanja akĩhuuha karumbeeta gaake, nakuo kũu igũrũ gũkĩgĩa na mĩgambo ĩraanĩrĩra ĩkoiga atĩrĩ, “Ũthamaki wa thĩ nĩũtuĩkĩĩte wa Mwathani witũ hamwe na Mesia wake, na egũtũũra aathanaga kinya tene na tene!”
16 Nao athuuri arĩa mĩrongo ĩĩrĩ na ana, arĩa maikaragĩra itĩ ciao mbere ya Ngai, magĩturumithia moothiũ maao thĩ magĩthaathaiya Ngai
17 makiuga atĩrĩ:
“Nĩtwagũcookeria ngaatho wee Mwathani Ngai Mwene Hinya Wothe,
o wee wĩ kuo, na warĩ o kuo!
Nĩ tondũ nĩwoete hinya waku mũnene
ũkaambĩrĩria gwathana!
18 Ndũũrĩrĩ nĩciang’ũrĩkire
nĩ tondũ ihinda rĩa maraakara maaku nĩrĩkinyĩĩte,
o na ihinda rĩa arĩa akuũ gũtuĩrwo.
Ihinda nĩikinyu rĩa kũhe ndungata ciaku iheeo.
Nacio nĩcio anabii na andũ arĩa aamũre,
arĩa magũthaathayagia,
arĩa anyiinyi o na arĩa anene.
Ihinda nĩikinyu rĩa kwananga arĩa maanangaga thĩ!”
19 Nayo Hekaarũ ya Ngai ĩrĩa ĩ igũrũ ĩgĩcooka ĩkĩhingũrwo, narĩo Ithandũkũ rĩa Kĩrĩĩkanĩro rĩkĩonwo rĩrĩ kũu thĩinĩ. Gũgĩcooka gũkĩgĩa heni, mĩgambo, ngwa, marurumĩ, gĩthingithia, na mbura nene ya mbembe.