1 Rũũrũ nĩ rũgano rwa Tobiti mũrũ wa Tobieli, Tobieli mũrũ wa Ananieli, Ananieli mũrũ wa Adueli, Adueli mũrũ wa Gabaeli, wa njiarwa cia Asieli na wa mũhĩrĩga wa Nafutali.
2 Matukũinĩ ma Shalumaneseri, mũthamaki wa Asiria, Tobiti nĩanyiitirwo agĩthaamio kuuma Thisibe ĩrĩa ĩ kĩanda wa Kadeshi Nafutali thĩinĩ wa Galili ya rũgongo, na ĩrĩ mwena wa na rũgongo wa Hazoru, na ningĩ ĩrĩ thuutha wa barabara ĩrĩa ĩroreete ithũĩro, mwena wa na rũgongo wa Peori.
Ũtũũro wa wĩthĩ wa Tobiti
3 Ũtũũro wakwa wothe niĩ Tobiti ndũire ndĩ mwĩhokeku na ngeragia gwĩka ũrĩa kwagĩrĩire. Maita maingĩ ndanateithĩrĩria andũ arĩa tũciaranĩirwo nao, na Ayahudi arĩa twathaamĩirio hamwe nao Nineve, mũciĩ mũnene wa Asiria.
4 Rĩrĩa ndaarĩ mwĩthĩ ndatũũraga mwena wa na rũgongo wa bũrũri wa Isiraeli. Nayo mĩhĩrĩga yothe ya Isiraeli yarutagĩra magongoona maayo thĩinĩ wa Jerusalemu. Ngai nĩathuurĩĩte itũũra rĩa Jerusalemu gatagatĩinĩ ka matũũra moothe ma Isiraeli rĩtuĩke rĩagwakwo Hekaarũ ĩrĩ mũciĩ wake mũtheru na wa gũtũũra. No mũhĩrĩga witũ wothe wa Nafutali nĩwaregire Jerusalemu na athamaki arĩa maumaga njiarwainĩ cia Daudi.
5 O ta ũrĩa andũ oothe a mũhĩrĩga ũyũ meekaga, andũ a mũciĩ witũ nĩmaamenyereete gũthiĩ itũũrainĩ rĩa Dani rĩrĩa rĩarĩ irĩmainĩ cia Galili ya rũgongo. Maathiaga kũrutĩra magongoona ndeegwa ya thahabu ĩrĩa Jeroboamu mũthamaki wa Isiraeli aathondekeete kuo.
Wĩhokeku wa Tobiti ndiniinĩ yake
6 Thĩinĩ wa mũciĩ witũ no niĩ nyiiki ndathiaga kaingĩ Jerusalemu gũkũngũĩra thigũkũ o ta ũrĩa Watho wa Musa wathĩĩte mũndũ wothe gwĩka. Nĩndahiũhaga gũthiĩ Jerusalemu ndĩ na magetha maakwa ma mbere, na marigithaathi ma nyamũ ciakwa, na gĩcunjĩ gĩa ikũmi kĩa ng’ombe ciakwa, o hamwe na guoya wa mbere wa kwenjwo ng’ondu ciakwa. Ngathiĩ ngakĩrũũgama mbere ya kĩgongoona Hekaarũ thĩinĩ na ngaanengera athĩnjĩri Ngai, njiarwa cia Harũni, mĩhothi ĩyo yakwa.
7 Ngakĩnengera Alawii arĩa maatungatagĩra Ngai thĩinĩ wa Jerusalemu gĩcunjĩ gĩa ikũmi kĩa ngano yakwa, ndibei, maguta ma ndamaiyũ, makongomanga, ngũyũ, na matunda mangĩ. Mwaka o mwaka, tiga mwaka wa mũgwanja hĩndĩ ĩrĩa bũrũri wakoragwo ũhuurũkĩĩte, nĩndeendagia gĩcunjĩ gĩa keerĩ harĩ ikũmi kĩa indo ciakwa, na ngahũthĩra mbeeca icio marugainĩ ma thigũkũ thĩinĩ wa Jerusalemu.
8 No o mwaka wa gatatũ, nĩndaheanaga gĩcunjĩ gĩa ithatũ harĩ ikũmikũrĩ atumia a ndigwa, na kũrĩ ciana cia ngoriai, o na kũrĩ ageni arĩa maatũũraga gatagatĩinĩ ka andũ aitũ na tũgakĩrĩanĩra maruga ma Thigũkũ tũrĩ hamwe. Maũndũ maya ndameekaga kũringana na Watho wa Musa, ũrĩa Debora nyina wa Ananieli guuka aanjathĩĩte nũmagĩrĩre. (Baaba aakua, ndatigĩrwo ndĩ mwana wa ngoriai.)
Wĩhokeku wa Tobiti arĩ ithaamĩrioinĩ
9 Rĩrĩa ndagimarire, nĩndahikirie Ana, ũmwe wa andũ a mũhĩrĩga witũ, na tũkĩgĩa na kahĩĩ nako tũgĩgeeta Tobia.
10 Thuuthainĩ nĩndanyiitirwo na ngĩthaamĩrio Asiria, na ũguo nĩguo ndookire gũtũũra Nineve.
Hĩndĩ ĩrĩa twatũũraga Nineve, andũ aitũ oothe o na Ayahudi aitũ maarĩaga irio iria ciarĩagwo nĩ andũ a ndũũrĩrĩ;
11 no niĩ nĩnderigĩrĩirie kũrĩaga irio icio,
12 amu nĩndarũmagĩrĩra maathani ma Ngai Ũrĩa Ũrĩ Igũrũ Mũno hatarĩ itherũ.
13 Naake nĩatũmire njĩtĩkĩrĩke nĩ mũthamaki Shalumaneseri ũrĩa wanduire mũgũri wa indo ciake ciothe cia mahũthĩro.
14 Mũthamaki ataanakua nĩndaceeraga kaingĩ bũrũri wa Media kũmũgũrĩra indo kuo. Na hĩndĩ ĩmwe rĩrĩa ndaarĩ itũũrainĩ rĩa Ragesi thĩinĩ wa Media, nĩndatigĩire Gabaeli, mũrũ wa nyina na Gabaria makũnia ma mbeeca, ngĩmũũria anjigĩre. Makũnia macio maarĩ na makĩria ma kiro magana matatũ cia mbeeca cia betha.
15 Rĩrĩa Shalumaneseri aakuire, mũũriũ wake Senakeribu akĩambĩrĩria gwathana ithenya rĩa ithe. Thuutha ũcio kũgerera barabara cia Media gũgĩkorwo arĩ ũgwati ũguo atĩ ndiahotire gũcooka gũthiĩ kuo rĩngĩ.
Tobiti gũthika akuũ
16 Matukũinĩ ma Shalumaneseri, nĩndateithagĩrĩria Ayahudi aitũ rĩrĩa rĩothe mangĩabatarire.
17 Mangĩakorirwo marĩ ahũũtu, nĩndamagayagĩra irio ciakwa, na marĩ njaga ngamahe nguo imwe ciakwa. Ningĩ ingĩonire ũmwe wa andũ aitũ akuĩte na agaikanio na kũu nja ya rũthingo rwa itũũra rĩa Nineve, nĩndamuoyaga ngamũthika na gĩtĩĩo.
18 O na ningĩ nĩndathikire Aisiraeli arĩa oothe mooragirwo nĩ Senakeribu. Senakeribu nĩaherithĩĩtio nĩ Mwathani wa Igũrũ nĩ ũndũ wa kũmũruma. Na rĩrĩa ooraga kuuma Judea nĩoragire Aisiraeli aingĩ nĩ ũrĩa aaraakarĩĩte. Na niĩ ngĩgĩthika mĩĩrĩ yao na hitho, Senakeribu amĩetha ndamĩonire.
19 Na gũgĩkinya atĩ mũndũ ũmwe wa kuuma Nineve akĩĩra mũthamaki atĩ nĩ niĩ ndathikaga ciimba icio. Hĩndĩ ĩrĩa ndaakĩrĩĩkirie kũmenya atĩ mũthamaki nĩamenyeete ũhoro wakwa, na atĩ ũtũũro wakwa wakĩrĩ ũgwatiinĩ, ngĩĩtigĩra mũno. Kwoguo ngĩũra ngĩĩhitha.
20 Indo ciakwa ciothe igĩtahwo igĩĩkĩrwo kĩgĩĩnainĩ kĩa mũthamaki. Kĩrĩa ndaatigĩirio no mũtumia wakwa Ana na mũũriũ wakwa Tobia.
Tobiti kũhonokio nĩ mũihwa wake
21 Thuutha wa ciumia ithathatũ Senakeribu akĩũragwo nĩ aariũ aake eerĩ nao magĩcooka makĩũrĩra irĩmainĩ cia Ararati. Naake mũũriũ ũngĩ wake wetagwo Esarihadoni agĩtuĩka mũthamaki ithenya rĩake. Agĩtua Ahikaru, mwana wa mũrũ wa maitũ Anaeli, mũnene wa maũndũ moothe maakoniĩ mbeeca thĩinĩ wa ũthamaki ũcio.
22 Rĩĩrĩ rĩarĩ ihinda rĩa keerĩ rĩa Ahikaru gũtuuo mũnene, amu hĩndĩ ĩrĩa Senakeribu aarĩ mũthamaki wa Asiria, Ahikaru aarĩ mũtwarĩri mũthamaki gĩa kũnyua, mũigi wa kĩgĩĩna, mwandĩki wa mabuku ma mathabu ma mbeeca, o hamwe na mũrori wa mũhũũri wa thirikaari. Na tondũ Ahikaru aarĩ mũihwa wakwa, nĩanjarĩrĩĩrie kũrĩ mũthamaki na ngĩgĩĩtĩkĩrio gũcooka Nineve.