Thigũkũ ya kĩĩmũciĩ
1 Rĩrĩa ndacookire mũciĩ nĩtwacookanĩrĩire na mũtumia wakwa Ana na mũũriũ wakwa Tobia. Na hĩndĩ ya Thigũkũ ya magetha, ĩrĩa ĩĩtagwo na rĩĩtwa rĩngĩ Thigũkũ ya Ciumia Mũgwanja, nĩndathondekeirwo irio njega mũno na ngĩgĩikara thĩ kũrĩa.
2 Rĩrĩa ndoonire irio iria ciothe ciarĩ meethainĩ, ngĩĩra Tobia atĩrĩ, “Mũũriũ, umagara ũgacarie Mũyahudi witũ o wothe ũngĩkorwo atũũraga gũũkũ ithaamĩrio arĩ mũthĩĩni, mũndũ ũngĩkorwo arũmagĩrĩra mawatho ma Ngai na kĩyo. Ũmũreehe nĩ geetha ooke arĩanĩre irio ici hamwe na ithuĩ. Ndikwambĩrĩria kũrĩa nginya rĩrĩa ũrĩcooka.”
Mũndũ kũũragwo Nineve
3 Kwoguo Tobia agĩthiĩ gũcaria mũndũ ta ũcio eerĩĩtwo. No agĩcooka o ro na ihenya akĩanagĩrĩra atĩrĩ, “Baaba! Baaba!”
Na niĩ ngĩmũcookeria atĩrĩ, “Ũũĩ! Nĩ kĩĩ?”
“Ũmwe wa andũ aitũ nĩoragwo! Harĩ mũndũ wamũita na aikia mwĩrĩ wake ndũũnyũinĩ.”
4 Ngĩrũũga na igũrũ ngiuma hau meethainĩ o na itarĩĩte irio ciakwa. Ngĩeheria mwĩrĩ ũcio njĩrainĩ ngĩũkuua ngĩũiga kĩĩruruinĩ, ngĩeterera riũa rĩthũe ndĩũthike.
5 Ngĩgĩcooka mũciĩ, ngĩĩthamba nĩ ũndũ wa gwĩtheria, ngĩcooka ngĩrĩa irio ciakwa ndĩ na kĩeha kĩnene.
6 Maũndũ macio makĩndirikania ũrĩa mũnabii Amosi eerĩĩte andũ a Betheli atĩ,
“Thigũkũ cianyu igaatuĩka cia macakaya.
na nyĩmbo cianyu cia gĩkeno ituĩke cia kĩeha.”
Ngĩkĩambĩrĩria gũita maithori.
7 Riũa rĩathũa ngiumagara, ngĩenja mbĩĩrĩra, ngĩthika mũndũ ũcio.
8 Nao andũ arĩa twariganĩĩtie magĩĩthekerera makiuga atĩrĩ, “Kaĩ ataretigĩra? Githĩ ndoorire hĩndĩ ĩrĩa ĩngĩ, rĩrĩa maamũcaragia mamũũrage nĩ ũndũ wa ihĩtia o ta rĩĩrĩ, na rĩu nĩ we ũyũ agĩthika akuũ rĩngĩ?”
Tobiti gũtuĩka gĩtumuumu
9 Ũtukũ ũcio ngĩĩthamba nĩ ũndũ wa gwĩtheria, ngĩcooka ngĩthiĩ njainĩ yakwa ngĩkoma hakuhĩ na rũthingo. Ũtukũ ũcio warĩ na ũrugarĩ mũingĩ na kwoguo ndiehumbĩrire mũtwe.
10 Ningĩ ndiamenyaga atĩ rũthingoinĩ rũu igũrũ rĩa mũtwe wakwa nĩhaarĩ thũngũrũrũ ciakĩĩte hau igũrũ rĩakwa. Namo mai maacio marĩ o mahiũ makĩngũĩra makĩingĩra maithoinĩ maakwa, makĩgĩa njereeri. Nĩndagĩthiire kũrĩ mandagĩtaarĩ, no o ũrĩa maathondekaga na ndaawa ciao, noguo maitho maakwa maakĩragĩrĩria gũthũũka o nginya mũicoinĩ ngĩtuĩka gĩtumuumu biũ.
Handũinĩ ha mĩaka ĩna gũtirĩ kĩndũ ndoonaga. Andũ a nyũmba iitũ oothe nĩmaiguaga kĩeha nĩ ũndũ wakwa, naake Ahikaru akĩndangĩra handũ ha mĩaka ĩĩrĩ nginya rĩrĩa aathaamire agĩthiĩ Elamu.
Niĩ na mũtumia wakwa gũtetania
11 Thuutha wa Ahikaru gũthaama, mũtumia wakwa Ana no mũhaka angĩathiire kũruta wĩra. Kwoguo akĩambĩrĩria gũtuma, o ta atumia arĩa angĩ.
12 Andũ arĩa aarutagĩra wĩra maamũrĩhaga arĩĩkia gũtwara nguo iria atumĩĩte. Na rĩĩrĩ, mũthenya wa mũgwanja wa mweri wa Disitiro nĩarĩĩkirie itambaya, agĩtwarĩra arĩa maamwĩtĩĩtie. Rĩrĩa maamũrĩhire irĩhi rĩake, nĩmaamũheire o na kabũri.
13 Na rĩrĩa Ana ookire mũciĩ na kabũri kau, gakĩambĩrĩria kwania. Kwoguo ngĩkĩmũũria atĩrĩ, “Kabũri kau koima nakũ? Nĩkũiya wakaiya. Githĩ tiguo? Gacookie nginya kũrĩ eene ko. Amu gũtiagĩrĩire kũrĩa kĩndũ gĩa kũiywo!”
14 Naake agĩcookia atĩrĩ, “Aaca, ti ga kũiya. Ndaheeo arĩ ta kĩheeo hamwe na irĩhi rĩakwa.” No ndiamwĩtĩkirie, ngĩgĩthitia gĩthiithi nĩ thoni nĩ ũndũ wa ũrĩa eekĩĩte. Ngĩcooka ngĩmwĩra acookie kabũri kau kũrĩ eene ko. Naake akĩnjookeria atĩrĩ na maraakara, “Rĩu nĩndoona ũrĩa wee ũhaana biũ! Ũrũmbũyania waku wothe kũrĩ andũ arĩa angĩ ũkĩrĩ kũ? Ĩ nacio ciĩko ciaku ciothe njega iria wĩkaga ũhoro wacio atĩa?”