Aisiraeli kũrũa na Aamaleki
1 Na rĩĩrĩ, Samũeli akĩĩra Saũlũ atĩrĩ, “Nĩ niĩ ndarekirio nĩ MWATHANI ngũitĩrĩrie maguta ũtuĩke mũthamaki wa andũ aake a Isiraeli. Rĩu gĩthikĩrĩrie ũrĩa MWATHANI Mwene Hinya Wothe ekuuga.
2 MWATHANI nĩekũherithia andũ a Amaleki tondũ maithe maao nĩmaarigĩrĩirie Aisiraeli rĩrĩa moimaga Misiri.
3 Thiĩ ũtharĩkĩre Aamaleki na ũniine o biũ kĩrĩa gĩothe me nakĩo. Ndũkahonokie kĩndũ o na kĩ; ũraga arũme oothe, atumia, ciana, tũkenge, ng’ombe, ng’ondu, ngamĩĩra, na ndigiri.”
4 Saũlũ agĩgĩĩta andũ, akĩmatarĩra Telemu. Haarĩ na thigari ngiri magana meerĩ (200,000) kuuma Isiraeli, na thigari ngiri ikũmi (10,000) kuuma Juda.
5 Hĩndĩ ĩyo Saũlũ na andũ aake magĩgĩthiĩ itũũra rĩa Aamaleki, makĩoheria andũ kĩandainĩ kĩa rũũĩ.
6 Naake Saũlũ agĩtũmĩra Akeni, arĩa maithe maao maatugire Aisiraeli rĩrĩa moimaga Misiri, ndũmĩrĩri akĩmeera atĩrĩ, “ Ehereraai Aamaleki nĩguo ndikaamũniinanĩrie nao.” Tondũ ũcio Akeni magĩkĩĩeherera.
7 Saũlũ agĩkĩhoota Aamaleki, amarutĩĩtie Havila nginya Shuri, kũrĩa kwarĩ mwena na irathĩro wa Misiri.
8 Agĩkĩnyiita Agagi mũthamaki wa Aamaleki arĩ o muoyo, na akĩũraga andũ oothe.
9 No rĩĩrĩ, Saũlũ na andũ aake makĩhonokia Agagi na matiigana kũũraga ndũrũme na ndeegwa irĩa ciarĩ njega, tũcaũ na tũtũrũme tũrĩa twega, o na kana kĩndũ o gĩothe kĩrĩa kĩarĩ kĩega. Maaniinire indo o iria ciarĩ thũũku na itaarĩ kĩene.
Saũlũ kũregwo ta mũthamaki
10 MWATHANI agĩkĩĩra Samũeli atĩrĩ,
11 “Nĩndĩrirĩĩte nĩgũtua Saũlũ mũthamaki, tondũ nĩandirikĩĩte na akaaga gwathĩkĩra mawatho maakwa.” Samũeli agĩkĩraakara, na ũtukũ wothe akĩraara agĩthaitha MWATHANI.
12 Kwarooka gũkĩa, rũũciinĩ tene, Samũeli agĩthiĩ gũcaria Saũlũ. Akĩigua atĩ Saũlũ nĩathiĩte Karimeli, kũrĩa eeyakĩire mũnaara wa gũtũma atũũre aririkanagwo, na agacooka agathiĩ Giligali.
13 Samũeli agĩgĩthiĩ kũrĩ Saũlũ o kũu Giligali, naake Saũlũ akĩmũgeithia akiugaga atĩrĩ, “MWATHANI arokũraathima, Samũeli! Nĩnjathĩkĩire watho wa MWATHANI.”
14 Samũeli agĩkĩũria atĩrĩ, “Na nĩ kĩĩ kĩragĩtũma njigue ndeegwa na ndũrũme ikĩania?”
15 Naake Saũlũ agĩcookia atĩrĩ, “Andũ aakwa maracirutire kwa Aamaleki. Maratigirie ndũrũme na ndeegwa iria njega nĩguo macirutĩre MWATHANI Ngai waku igongoona, na icio ingĩ nĩtũraciniinire biũ.”
16 Samũeli agĩkĩĩra Saũlũ atĩrĩ, “Takira ngwĩre ũrĩa MWATHANI aranjĩĩrire hwaĩ.”
Naake Saũlũ akĩmwĩra atĩrĩ, “Tanjĩĩra.”
17 Samũeli agĩkĩmwĩra atĩrĩ, “O na angĩkorwo nĩũreeyona ta ũtarĩ bata, wĩ mũtongoria wa mĩhĩrĩga ya Isiraeli. MWATHANI nĩagũitĩrĩirie maguta ũtuĩke mũthamaki wa Isiraeli,
18 na agĩgwatha ũthiĩ ũkaniine Aamaleki, eehia acio. Aakwĩrire ũhũũrane nao nginya ũmoorage oothe.
19 Nĩ kĩĩ kĩrakĩgiririe ũmwathĩkĩre? Nĩ kĩĩ kĩragĩtũmire ũteng’erere gũtaha indo, ũragĩĩka ũndũ wa kũraakaria MWATHANI?”
20 Naake Saũlũ agĩcookia atĩrĩ, “Nĩndĩrathĩkĩire MWATHANI. Nĩndĩrathiire o ta ũrĩa aranjĩrĩĩte, ndĩrareehe mũthamaki Agagi, na ndĩrooraga Aamaleki oothe.
21 No rĩĩrĩ, andũ aakwa matiigana kũũraga ndũrũme o na ndeegwa iria njega maratahire; handũ ha gwĩka ũguo maracireehire gũũkũ Giligali nĩguo marutĩre MWATHANI Ngai waku igongoona.”
22 Samũeli agĩkiuga atĩrĩ,
“Nĩ kĩĩ MWATHANI angĩenda?
Nĩgwathĩkĩrwo-ĩ, kana nĩ maruta na magongoona?
Nĩ wega kũmwathĩkĩra
kũrĩ kũmũrutĩra magongoona ma ndũrũme iria njega.
23 Ũremi harĩ we nĩ mũũru o ta wĩhia wa kũragũra,
naguo mwĩtĩĩo nĩ ta wĩhia wa kũhooya mĩhianano.
Rĩu-rĩ, tondũ nĩũregeete MWATHANI,
o naake nĩakũregeete ũtuĩke mũthamaki.”
24 Saũlũ agĩcookia atĩrĩ, “Ĩĩ, nĩnjĩhĩĩtie, nĩ ũndũ nĩndaagire gwathĩkĩra uuge wa MWATHANI, o na ũrĩa wanjĩrĩĩte. Nĩndetigĩrire andũ aakwa, na ngĩĩka ũrĩa meendaga.
25 No rĩu, ndagũthaitha ũnjohere rĩĩhia rĩakwa, na ũcookanie na niĩ, nĩguo ngathaathaiye MWATHANI.”
26 Naake Samũeli agĩcookia atĩrĩ, “Ndingĩcookania nawe, tondũ nĩũregeete uuge wa MWATHANI, naake nĩakũregeete ũtuĩke mũthamaki wa Isiraeli.”
27 Na rĩĩrĩ, Samũeli agĩkĩgarũrũka ethiĩre, no Saũlũ akĩnyiita gĩcũrĩ kĩa nguo yake, nayo ĩgĩtarũka.
28 Samũeli agĩkĩmwĩra atĩrĩ, “Ũũmũũthĩ MWATHANI nĩatembũra ũthamaki wa Isiraeli kuuma kũrĩ we aũhe mũndũ ũngĩ mwega gũgũkĩra.
29 Ningĩ-rĩ, Ngai, ũrĩa ũrĩ riiri wa Isiraeli ti mũndũ; ndaheenanagia na ndericũkagwo.”
30 Naake Saũlũ agĩcookia atĩrĩ, “Nĩnjĩhĩĩtie. No rĩĩrĩ, he gĩtĩĩo mbere ya atongoria a andũ aakwa o na Aisiraeli oothe. Cookania na niĩ nĩguo ngahooe MWATHANI Ngai waku.”
31 Kwoguo Samũeli agĩcookania naake, naake Saũlũ agĩthaathaiya MWATHANI.
32 Samũeli akiuga atĩrĩ, “Tandeehereei mũthamaki Agagi haaha.” Naake Agagi agĩũka harĩ we akeneete, akĩĩraga na ngoro atĩ ruwo rwa gĩkuũ nĩrũmwehereire.
33 Naake Samũeli akiuga atĩrĩ, “O ta ũrĩa rũhiũ rwaku rwa njora rwanatũma atumia aingĩ matigwo matarĩ na ciana-rĩ, ũguo noguo maitũguo egũtigwo atarĩ na mwana.” Samũeli agĩgĩtinangia Agagi tũcunjĩ, tũcunjĩ mbere ya kĩgongoona kũu Giligali.
34 Thuutha ũcio Samũeli agĩthiĩ Rama, naake mũthamaki Saũlũ akĩinũka gwake mũciĩ Gibea.
35 Na rĩĩrĩ, Samũeli ndacookire kuona Saũlũ rĩngĩ o nginya rĩrĩa Saũlũ aakuire, no nĩamũrĩragĩra mũno. MWATHANI agĩkĩĩrira nĩ ũndũ wa gũtua Saũlũ mũthamaki wa Isiraeli.