1 We ũũgĩ-rĩ, oonanagia hinya wake kuuma gĩturi kĩmwe gĩa thĩ kinya kĩrĩa kĩngĩ,
na akabanga maũndũ moothe na kinyi.
Solomoni kwenda ũũgĩ
2 Ũũgĩ ũcio-rĩ, nĩ we ndeendire
ngĩambĩrĩria kũmwetha rĩrĩa ndaarĩ mũnyiinyi.
Ndatuire ndĩmuoe atuĩke mũhiki wakwa
rĩrĩa ndoombirwo nĩ ũthaka wake.
3 Gũkuhanĩrĩria gwake na Ngai,
nĩkuongagĩrĩra riiri harĩ ndĩra cia mũndũ,
nĩ gũkorwo Mwathani wa andũ oothe-rĩ, nĩamwendeete.
4 Nĩ ma atĩ nĩoĩ maũndũ marĩa manene marĩ hithoinĩ ya Ngai,
na nĩ we ũmũcagũragĩra maũndũ marĩa egwĩka.
5 Angĩkorwo nĩ ũtonga wĩriragĩria gũũkũ thĩ-rĩ,
nĩ kĩĩ gĩakwĩrirĩrio kũrũũga ũũgĩ
ũrĩa ciĩko ciaguo cionekaga thĩ guothe?
6 Akorwo nĩ ũmenyo wendekanaga thĩinĩ wa mawĩra-rĩ,
nũũ mũũgĩ gũkĩra ũũgĩ,
ũrĩa ũtabaaragĩra mawĩra moothe?
7 Akorwo mũndũ ethaga ũthingu-rĩ,
maciaro ma ũũgĩ nĩ ũthingu.
Ũũgĩ nĩ we ũrutanaga
gĩthimi, ũthuurĩri, waragania na ũcamba;
gũtirĩ ũndũ ũngĩ ũteithagia andũ ũtũũroinĩ ũyũ ta maũndũ macio.
8 Ningĩ-rĩ, akorwo mũndũ eriragĩria kũgĩa na ũmenyo mwariĩ-rĩ,
ũũgĩ nĩoĩ marĩa mahĩtũku na nĩarathaga marĩa magaatwĩkĩka.
Nĩoĩ gũtataũra thimo, na akamenya gũtaũra ndaĩ.
Nĩakoragwo ooĩ o kabere magegania na moorirũ o na moimĩrĩro ma mariika na imera.
9 Kwoguo-rĩ, nĩndatuire ndĩmuoe nĩ geetha tũtũũranie naake,
amu nĩndamenyaga atĩ hingo ya thaayũ nĩarĩndaaraga
na hingo ya mathĩngĩthĩ na ya kĩeha nĩarĩnyũmagĩrĩria.
10 Nĩmenyeete atĩ, nĩ ũndũ wake andũ magomana
nĩndĩrĩtũũgagĩrio, o na gũtuĩka ndĩ mwĩthĩ
nĩndĩrĩtaranagĩrio na athuuri.
11 Nĩndĩonagwo ndĩ mũũgĩ hĩndĩ ĩrĩa ndĩratua ciira
na ngaathagĩrĩrio maithoinĩ ma andũ arĩa me na ũhoti.
12 Ndaaga kwaria-rĩ, marĩnjetagĩrĩra njarie,
na magatega matũ rĩrĩa ngwaria.
O na ndaria mũno no marĩthikagĩrĩria.
13 Atĩrĩĩrĩ, nĩmenyaga atĩ na njĩra yake
nĩngeeyonera kwaga kũbutha,
na nĩngaatigĩra arĩa makaanũmĩrĩra kĩririkano kĩa hĩndĩ ciothe.
14 Nĩngaathamakagĩra andũ,
nacio ndũũrĩrĩ nĩikandungatagĩra.
15 Athamaki arĩa egũgũmi-rĩ,
nĩmakaamakaga maigua rĩĩtwa rĩakwa rĩagwetwo.
Mbere ya andũ aakwa-rĩ, ngeyonanagia
ndĩ muuma andũ na njamba ya ita.
16 Ndainũka-rĩ, nĩndĩhuurũkaga hamwe naake,
tondũ mũndũ aikaranĩĩtie naake gũtirĩ ũndũ mũũru angĩona.
Gũtũũrania naake-rĩ, gũtireehaga mathĩĩna
o tiga ũkeni na gũcanjamũka.
17 Ndeciiririe na ngoro maũndũ macio moothe,
ngĩrĩĩkia kũmenya atĩ kwaga kũbutha kuumanaga
na gũkuruhana na ũũgĩ.
18 Kũiganĩra kũna kuumanaga na kũgĩa ndũgũ naake.
Ũtonga ũrĩa ũtangĩthira o naguo uumaga maũndũinĩ marĩa eekaga.
Ũmenyo uumaga thĩinĩ wa gũtũũrania naake.
Nakuo kũgĩa igweta kuumaga thĩinĩ wa kwaria naake.
Nĩ ũndũ ũcio nĩndoorũũrire mĩena yothe ngĩcaria ũrĩa ingĩmuuha atuĩke wakwa.
19 Ndaarĩ mwanake wĩconokeire, na nĩndaheetwo muoyo mwega;
20 wega nĩkuuga atĩ ndĩ mũthingu nĩndatoonyire mwĩrĩinĩ ũtaarĩ mũthaahie.
21 No rĩrĩa ndamenyire atĩ ndingĩhota kũgĩa na ũũgĩ tiga heirwo we nĩ Ngai,
(kũmenya nũũ ũheanaga ũndũ ũyũ naguo no ũũgĩ),
ndacookereire o Mwathani ngĩmũthaitha na ngoro yakwa yothe.